2022: PRAN WAN LADAW LABAN (33) NA MUNGGA

Jan pru rawt ai; dai hpang jan shang mat na n shut n shai. Shangai wa ai kadai mung si wa ai nhtoi de du na n shut n shai. Ningpawt ninghpang shagu gaw jahtum a ninghpang hkrai rai nga ai. Nga-yawng nga-pra a jahtum e byin na lam, mungkan ga dinghta ga a jahtum nhtoi hte seng nna Madu Yesu tsun shadum ai. Jahtum du ni wa yang na kumla kau mi hpe mung jaw da ai. Kaning re ai kumla ni hpe mu ai rai tim, dai jahtum na nhtoi hpe kadai n chye lu ai. Kamsham ai ni a matu, galoi, kaning rai, hpa byin na n chye ai rai tim; jahtum chyălai tinang sat kau hkrum na tsang shara she nga tim, hten bya ai kaw n du na, nga ai. Hkam sharang, hkamjan ai a marang e, tinang a asak lawt lu na rai nga ai.

Lai wa sai shaning 20 ning jan hta mungkan htum sa na, shaning, nhtoi du hkra chye da ai zawn nga makam masham hpung kau mi ja ja hkaw tsun lai wa ma ai. Dai ni du hkra n teng wa ai. Shawng shawng hkan e mung mungkan htum na shaning nhtoi tsun shamawng hkawm ai ni nga lai wa sai. Hkristan prat hpang ai ten kaw na dai lam hpe tak tsun hkaw tsun ai ni prat hte prat, nga lai wa ai sha re. Kaja wa gaw Yesu shi jaw da ai kumla ni hpe prat shagu e mu lu ai sha rai nga ai. Shing ngu ai majaw, Yesu jaw da ai kumla ni mung hpa n re ai, ngu kau na kun?

Byin wa na lam ni hte seng nna Yesu tsun ai lam hta, madung gaw numdaw masum hku nna dik wa na rai nga ai_
1) Yerusalem Nawku Htingnu hte Mare, teng sha hten run na lam; labau hta teng sha byin lai wa sai.
2) Masha langai si wa ai nhtoi hta shi a mungkan htum mat ai rai nga ai.
3) Hkrung mi hkrung, nga mi nga, yawng mayawng a jahtum nhtoi nga ai; dai hpang, Hkristu Madu gaw yawng mayawng hpe jeyang na rai nga ai. Ala shajin nga ra ga ai.
Ahkyak grau ai gaw, ya, ngu ai mungkan, shăni shagu e byin ai amu ni, shăni shăgu dawdan ai amu ni,…. langai hpra a matu dai gaw ahkyak grau ai rai nga ai. Ta-tut hta gaw tinang a mungkan htum ai nhtoi a matu hkyen shajin da na ahkyak grau ai. Shing rai la maja nga ai wa a matu, mungkan a jahtum nhtoi du tim shi a matu maren sha rai na n rai a hka?

Yesu du sa ai lai hkrang mung masum rai nga ai. Mungkan labau hta, shangai, si ai, hkrung rawt nna lamu de lung mat wa ai. Asak jaw ai wenyi hku nna du sa ai, mungga hku nna du sa ai, Sakramentu ni hku nna du sa ai, mabyin amyu myu hku nna du sa ai. Jahtum na lang gaw hpung shingkan hte du sa na, yawng hpe jeyang na rai nga ai. Shawng na lang du sa ai Madu hpe kamsham hkap la na; shăni shăgu na măbyin ni hta Shi hte matut mahkai nga nna Shi a myit hkan shadik ai rai yang, tinang a mungkan htum ai nhtoi mi rai rai, mungkan a jahtum na nhtoi hta rai rai, kabu gara ai myit hte Shi Madu hpe hkap bawp la lu na rai nga ai. Yawng mayawang a jahtum nhtoi hta du sa na Madu hpe gaw ala nga ra ga ai.

Hkrit hpa ni, tinang hpe nji n-mu gunjang shatsang ai baw ni, manghkang baw hpan ni, ru ai yak ai hte tinang a hkum hkrang asak sat kau hkrum na (ni dik ai jinghku e, manang wa e sat kau na) tsang ra hkra rai tim, n jaw n ang ai măga n yawng ai, n tara ai măga n tsap lawm ai, marin lawhpa ai myit hpe renghkang lu ai rai yang, hkrit tsang na lam n nga ai, nga, Madu tsun ai. Shing rai lu na matu, makam masham ngang kang ra ai, myit galu hkam sharang ra ai, machyi hkam ra ai, (tinang a asak hpe pyi) asum hkam ra ai lam ni nga na n rai a hka! Tinang a myit, tinang a hkum hpe n dang nyet kau ai, ngu ai a lachyum hpe grau shadan ya ai n rai a hka! Shaloi, tinang asum hkam ai daram Karai Kasang bai hkap jaw na rai nga ai.

Malaki Laika hta tsun da ai, dai nhtoi hta, n hkru n kaja ai ni, n tara ai ni hpe nat agrawm kau na, ru-pawt kaw na gawt kau na, nga ai myihtoi ga n dik wa shi ai kun? Shanhte gaw ja she ja, kadai e she n shakrip kau. Tara ai maga awng dang nna simsa ai aprat galoi mi she du?
Hkam sharang hkamjan lu ai chyeju, Karai a madi shadaw ai chyeju teng sha ra ga ai: “Maja let hkyen lajang nga mu; hkamjan lu ai majaw hkye la hkrum na ra ai!”

2022: PRAN WAN LADAW LABAN (33) NA CHYUM LAIKA

PRANWAN LADAW HTA LABAN 33
November 13, 2022
CHYUM MUNGGA DAW 1

Malahki 4:1-2

Ya hti na gaw, myihtoi Malahki a laika hta na rai nga ai.
1Dai Nhtoi du ra ai; dai gaw wan mang zawn grung kahtet nga ai: gumrawng gumtawng ai ni hte, tara n lang ai amu galaw ai ni yawng, yi hku ndu tai na mara ai. Du ra ai nhtoi gaw, npawt ndung n ngam hkra, shanhte hpe hkru kau na ra ai, nga nna Zaw nawng Zaw wa up ai Madu tsun ai. 2Nye a amying hpe hkrit hkungga ai ni a ntsa e chyawm gaw, ding hpring shangun ai ajan gaw, shamai shatsai ai atsam hte du pru na ra ai.
Karai Kasang a Mungga rai nga ai.

CHYUM MUNGGA DAW 2

2 HTESALONI 3:7-12

Ya hti na gaw, Htesaloni masha ni hpang de San Pawlu shagun dat ai laika lahkawng hta na rai nga ai.
Anhte kasi ningli hte maren gara hku hkan sa galaw ra ai lam hpe nanhte nan chye nga ndai. Anhte gaw nanhte hte rau nga ai shaloi, lagawn lamawn rai nna kaman nga nga ai n rai; manu n ya ai sha, kadai wa a lusha hpe mung anhte n sha saga ai. Nanhte hta na langai a ntsa de lit li ai n shangun u ga, amu magam hte ru yak ai hta, anhte shani shana bungli galaw saga ai. Shing rai galaw ai gaw, nanhte anhte hpe n bau ra ai majaw n rai; anhte galaw ai hte maren, nanhte hkan galaw lu na matu, nanhte a matu kasi ningli tai saga ai.
Nanhte hte rau naw nga nga yang, Amu bungli n kam galaw ai wa gaw shat mung n sha u ga, ngu nna nanhte hpe htet da ga ai. Nanhte hta lawm nga ai ni nkau mi gaw lagawn lamawm rai nna, hpa amu bungli n galaw ai sha, tinang hte n seng ai hta hkan kajam nga ma ai hpe, anhte na la saga ai. Shing rai galaw nga ai ni gaw, ti nang a asak bau ya na matu, amu bungli hpe atsawm sha hkan galaw mu ga, ngu nna anhte hkang dat ai hte shadum jahprang ya nga ga ai.
Karai Kasang a Mungga rai nga ai.

KABU GARA SHIGA

LUKA 21:5-19

Ya hti na gaw, Luka a laika hta na Kabu Gara Shiga rai nga ai.
Dai nawku htingnu gaw reng hkik ai nlung hte mung, alu kumhpa ni hte mung, mawn sumli da ai rai nga ai, nga nna nkau mi tsun yang, Yesu gaw, Nanhte mu nga ai arai ni gaw, nlung langai mi a ntsa e langai mi n mara hkra, mahkra hten bya ai nhtoi du na ra ai, ngu mu ai. Shing nga jang shanhte gaw, Sara e, dai zawn galoi byin wa na rai ta? Dai byin na ni wa magang jang, hpa kumla dan pru na ra ta? Dai byin na ni wa magang jang, hpa kumla dan pru na ra ta? ngu nna Yesu hpe san mu ai. Shaloi shi gaw, Nanhte hkalem kau ai n hkrum myit ga, sadi nga mu; kaning rai nme law, masha law law wa nye a amying hte paw pru nna, Ngai gaw dai wa rai nga nngai, ahkying mung du ra ai, nga nna tsun na mara ai: shanhte a hpang hkum hkan nang nga myit.
Hpyen gasat ai hte gumlau rawt ai lam na yang, hkum hkrit myit: dai lam ni gaw shawng byin wa na ra ai: rai ti mung, jahtum ai gaw, dai shaloi jang, rai na n rai, ngu mu ai. Bai Yesu gaw shanhte hpe tsun mu ai gaw: Amyu mi hte amyu mi, mung mi hte mung mi shada da gasat hkat na mara ai; 11nnang nawn kaba wa ai mung, shara kaga ga hta ana zinli hte hku hku ai byin wa na ra ai: sumsing lamu de na hkrit hpa hte lamik kumla kaba mung dan pru na ra ai. Rai ti mung, dai lam yawng garai n byin yang, masha ni gaw nanhte hpe rim la nna, zingri zingrat di nhtawm, tara jawng ni hte htawng ni hta ap kau na myit dai; nye a amying majaw hkawhkam ni hte du ni a man de nanhte hpe sa bang kau na mara ai. Dai shaloi e, nanhte nye a matu sakse hkam ya na aten rai nga ai.
Dai re ai majaw, nanhte kaning ngu nna hkap tsun htan na, n tsang ra sai: kaning rai nme law, nanhte a hpyen ni nlang, n hkap htang lu hkra, ngai nanhte hpe n-gup ga hte hpaji jaw na made ai. Nanhte gaw kanu kawa ni kahpu kanau ni, mayu dama ni hte jinghku jingyu ni e pyi, ap kau ai hkrum na marin dai: shanhte gaw nanhte hta na nkau mi hpe sat kau shangun na mara ai: nye a amying majaw masha yawng mayawng nanhte hpe n dawng n yawt na mara ai. Raitimung, nanhte a kara singgawng langai mi pyi, hten lu na n rai. Nanhte hkam sharang yang gaw, tinang a matu asak hpe lu la na marin dai.
Madu a Kabu Gara Shiga rai nga ai.

2022: SAN PRA AI NI YAWNG A POI SHANI NA MUNGGA

Shinggyim masha a jăhtum chyălai na myit mada ai lam gaw htani htana asak hkrung nga lu ai lam, hkrit tsang n ra, yawn hkyen n nga, htani htana myit pyaw myit dik lu ai, n htum n wai ai asak hkrung lam rai nga ai. Shing re ai asak hkrung lu ai shara ndai dinghta ga ntsa e galoi prat hta tim, gara shara kaw mung, n lu mai ai. Karai Kasang a mungdan, Karai hpe man chyaw mu mada lu nna, Shi a asak hta kuptsup ai hku jawm pawng nga lu jang sha, kuptsup lu na rai nga ai. Dinghta ga e nan shachyoi shapra ai hkam la ra ga ai. Shăchyoi shăpra ai lam hkam la ai gaw măchyi ai. Sumsing mungdan e du nga ai ni yawng gaw shachyoi shapra ai lam hpe tsang hte tsang hkam la ngut ai htawm, san pra wa ai ni rai ma ai. Shanhte hpe shăgrau ai poi galaw ai a marang e, anhte mung hkamjan lu ai chyeju hkam la lu nna, shanhte du nga ai shara de anhte mung teng sha du wa lu na myit mada lu ga ai.

Sumsing mungdan e du nga sai San Pra ai masha ni gaw ra rawng ai lam n nga, kuptsup ai hku shachyoi shapra hkrum ma sai. Shanhte gaw ndai dinghta prat hta kuptsup ai masha ni n rai ma ai. Dinghta ga na myit ru ai lam amyu myu, myit masin wenyi a hpyen amyu myu, nji n-mu baw hkum hkra hkrum sha hkamjan lai wa ma nu ai. Awng dang yu, hkrat sum yu, pyaw yu hkrap yu, rai nna dinghta prat hpe tawt lai da ai ni rai ma ai.

Ndai dinghta ga e shăchyoi shăpra hkam la lu na lam-yan (8) hpe Madu Yesu sharin ya ai. Dinghta prat hta myit pyaw myit dik ai lam hpe hkam la lu na matu, myit masin wenyi san seng san pra ra ai, dinghpring ai myit masin akyang lailen lu ra ai, tara hkan shatup ra ai, mara dat ya chye ai, htingram chye ra ai, …. N dai zawn, lam-yan (8) gaw teng sha, myit pyaw myit dik ai, hkamjan lu ai atsam marai jaw ya ai matsun ni rai nga ai. Chyoi pra ai aprat kaw du wa lu na matu garum ya ai matsun ni rai nga ai.

Mungkan sutgan arawng aya lu nna myit ru jamjau, myit n pyaw, myit tsang, shimlum lam n lu, n ju n dawng, dz., dz., nji n-mu hkam sha ra ai baw hpan kade she law! Ja sutgan lu ai, gumhpraw lu ai hta kabu pyaw hpa majing n re ai; lu lawm ai daram, byin nga ai madang hte shapyaw chye ai, myit shadik la chye ai atsam marai mahtang, kabu myit pyaw lu ai lam majing de du shangun ai re, ngu ai lam myit dum mai ga ai.
Wa Sarabyin Francis tsun ai, “San pra ai masha tai ai, ngu ai gaw, laksan Karai e lata la ai n law la ai masha kau mi a matu sha n re ai; masha shagu gaw san pra ai masha tai na matu shaga la hkrum ai” nga ai.
Mătut nna Wa Sarabyin tsun dan ai_
“Sangan hpun lawai ai ni n re ai (shawa hpung masha ni hta na) san pra masha law law lu ra ga ai.
Chyoi Pra Hkum sin, rosary akyu hpyi shaja ai san pra masha law law lu ra ai zawn,
Jean pant bu ai, skirt bu ai, tenis shoes din ai ni hta na san pra masha law law lu ra ga ai;
Manaw manang ni hte hkawm chyai ai, dwi hpa mu hpa jawm lu jawm sha ai ni hta na san pra masha law law lu ra ga ai;
Manang ni hte beer lu hkawm, ka manawt shara de sa ai ni hta na san pra masha law law lu ra ga ai;
Ndai dinghta ga e nga ai masha ni hta na san pra ai masha law law lu ra ga ai; dinghta prat na mai kaja ai baw yawng hpe kabu gara ai myit hte lachyum pru ai hku hkam la chye ai, Karai e yawsing ai amu hte nhtan n shai ai hku kabu chye ai san pra masha law law lu ra ga ai “, nga ai.

Matut nna tsun ai hta, “Anhte mung, tinang nang a dinghku hta, htingbu ni a lapran, bungli galaw ai shara, kanang e mi nga nga, san pra ai masha ni byin tai lu ga ai. Htingbu wa hta ra kadawn ai lam ni hpe mu chye, na ya chye ai masha tai na; tinang a jamjau lam ni hpe hkrai tsun shaja nna manang ni hpe nji n-mu byin shangun na malai, masha ni a nji n-mu ai lam ni hpe grau madat ya chye ai ni tai ra ga ai. Masha ni a ruyak jamjau ai lam ni hpe madat ya nna, shanhte hpe gara hku garum lu na, ngu, lam tam ai ni tai ga”, nga nna ninggun jaw lai wa ai.

Shawng shawng na Hkristan ni hpe, “San pra ai masha ni” ngu nna shamying lai wa ai. Kaja wa shada tsawra makawp maga, zinlum hkat ma ai hte, makam masham hpe nga-sa lailen hta adan sha madun dan lu ai ni rai ma ai. Hpang hpang e sha, “San pra ai masha” ngu ai ga-si hpe laksan, laklai ai hku kăsi madun lu ai masha kau mi hpe sha, Nawku Hpung e shagrau ai shingteng tai wa ai.

Shăchyoi shăpra ai lam hpe hkam la ra ai dinghta prat e, Yesu matsun ai lam-yan (8) hpe kamsham hkan shadik ai rai yang, teng sha, ndai dinghta ga e pyi san pra ai masha ni tai lu na ga ai. Shingran laika hta sumsing mungdan kăning san ai shara re ai lam, shingran jaw da ai. Kasa Yawhan mung ninggun jaw ai: anhte Karai a kasha ni rai ga ai hte maren, Karai Kasang hpe myi-man chyaw mu mada lu ai shaloi sha, tinang nang hkam la lu na hpung shingkang arawng sadang kade hkik hkam ai lam chye lu na, nga ai. Myit mada ala nga let, “Karai a kasha ni” ngu ai amying shingteng hte gingdan ai hku asak hkrung nga ra ga ai.

Awng dang nga sai, sumsing mungdan na San Pra ai ni yawng hpe shagrau kungdawn let, shanhte a akyu hpyi htinglu ya ai chyeju mung hkam la ga.

2022: SAN PRA AI NI YAWNG A POI SHANI NA CHYUM LAIKA

SAN PRA AI NI YAWNG MAYAWNG A POI SHANI
November 6, 2022
CHYUM MUNGGA DAW 1

SHINGRAN 7:2-4, 9-14

Ya hti na gaw, Yawhan a Shingran laika hta na rai nga ai.
Jan praw maga de na pru lung wa nna, ahkrung nga ai Karai Kasang a dazik lang ai lamu kasa hpe ngai Yawhan mu nngai. Dai lamu kasa gaw, Anhte a Karai Kasang a shangun ma ni hpe, kahtan e dazik garai n shakap yang, aga hpe mung, nammukdara hpe mung, hpun ni hpe mung hkum jahten kau mu, nga nna lamu ga hte nammukdara hpe jahten shabya kau na ahkang lu ai lamu kasa mali hpe, nsen kaba hte jahtau wu ai. Shaloi dasik shakap hkam la ai ni hpe hti ai jahpan ngai na nngai: Israela kashu kasha ni a amyu yawng hta na, sen mi mun mali e hkying mali dazik shakap ai hkam la ma sai.
Dai hpang, yu u, mungdan shagu hta na mung, baw lakung shagu hta na mung, amyu baw shagu hta na mung, ga amyu shagu hta na mung, kadai n dang hti lu ai masha unawng kaba hpe ngai mu nngai. Ndai ni gaw hpraw ai hpun palawng bu hpun nna, tinang a lata hta namhtan hpun lakung lang let, Tingnyang a man e mung, Sagu Kasha a man e mung tsap nga ma ai. Shanhte gaw nsen kaba hte jahtau let, Tingnyang hta dung nga ai anhte a Karai Kasang hte Sagu Kasha gaw, awng dang u ga law, nga ma ai. Bai, dai tingnyang hte salang ni hte dusat amyu mali a grup yin e, lamu kasa yawng hte gaw kawan tsap nga ma ai. Shaloi shanhte gaw tingnyang a man e dingnyawm dagup nna Karai Kasang hpe nawku, let, Amen Shakawn kungdawn ai, Hpung shingkang, Hpaji byeng-ya, Chyeju dum ya ai, Arawng sadang, Ahkang aya hta N-gun atsam gaw, htani htana prat dingsa e, anhte a Karai Kasang kaw a nga nga u ga law Amen, nga nna tsun ma ai. Shaloi salang ni hta na langai mi, Hpun-palawng ahpraw bu hpun ai ndai ni gaw, kadai ni rai nga ma ta? Kanang na pru wa ma ta?. nga nna ngai hpe hkap san nngai. Ngai gaw, Nye a Madu e, nang chye nga ndai, ngu nna Shi hpe htan we ai. Shaloi shi tsun ai gaw: Ndai ni gaw, zingri zingrat kaba hpe hkam sharang ngut nna, tinang a hpun palawng hpe Sagu Kasha a asai hta hkrut jahpraw la ai ni rai nga ma ai.
Karai Kasang a Mungga rai nga ai.

CHYUM MUNGGA DAW 2

1 YAWHAN 3:1-3

Ya hti na gaw, Yawhan shagun dat ai laika langai hta na rai nga ai.
1Karai Kasang a kashu kasha ni anhte hpe ngu shamying mi ai majaw, Kawa gaw anhte hpe gade wa tsaw ra da mi hka: Shi a kashu kasha ni nan anhte rai nga ga ai. Dai rai nna, mungkan ga gaw Shi hpe n chye wu ai majaw, anhte hpe mung n chye n hkap la ma ai. Tsaw ra ai ni e, Karai Kasang a kashu kasha ni, anhte ya e rai nga ga ai; hpang e anhte hpa tai na, garai n shadan dan nga ai. Dai hpe shadan dan ai shaloi anhte shi hte maren n bung na ga ai lam hpe anhte chye nga ga ai; kaning rai nme law, Shi hkum nan nga nga ai hte maren, anhte Shi hpe mu lu na ga ai. Ndai lam hpe myit mada ai masha yawng hte gaw, Hkristu Madu Chyoi Pra nga ai hte maren, tinang a hkum hpe shachyoi shapra ya ra ai.
Karai Kasang a Mungga rai nga ai.

KABU GARA SHIGA

MAHTE 5:1-12

Ya hti na gaw, Mahte a laika hta na Kabu Gara Shiga rai nga ai.
Yesu gaw masha wunawng wuwa hpe mu jang, bum ntsa de lung wa ai; dai yang e Shi dung nga yang, shi a sape ni shi a makau de sit sa wa ma ai. Shaloi Shi shanhte hpe sharin shaga let tsun wu ai gaw: ‘Myit masin hta matsan mayan ai ni gaw, a lu ma ai; lamu mungdan gaw shanhte a mungdan rai nga malu ai. ‘Myit sumnung ai ni gaw a lu ma ai; shanhte mungkan ga hpe madu lu na mara ai. ‘Yawn hkyen hkrum ai ni gaw a lu ma ai; shanhte shalan shabran ai hkrum na mara ai. ‘Ding hpring ai hte kawsi hpang gara ai ni gaw a lu ma ai; shanhte hkru kat wa na mara ai. ‘Matsan dum chye ai ni gaw a lu ma ai; shanhte matsan dum la ai hkrum na mara ai. ‘Myit san seng ai ni gaw a lu ma ai; shanhte gaw Karai Kasang hpe mu lu na mara ai.
‘Ngwi pyaw simsa ai hpe shabyin ai ni gaw a lu ma ai; shanhte hpe Karai a kasha ni ngu shamying na mara ai; ‘Dingman ai lam a majaw zingri zingrat hkrum ai ni gaw a lu ma ai; lamu mungdan gaw shanhte a mungdan rai nga malu ai. ‘Nye a amying majaw masha ni nanhte hpe asawng asang zingri zingrat di ai hte, n teng n man ai hku mara amyu myu shagun da ai shaloi nanhte a lu myit dai: lamu mungdan hta nanhte a kumhpa kaba nga malit dai majaw, kabu gara nna ngwi pyaw nga mu.
Madu a Kabu Gara Shiga rai nga ai.

2022: PRAN WAN LADAW LABAN (31) NA MUNGGA

Karai Kasang gaw Shi hpan da ai baw yawng hpe tsawra mănu shădan ai. Mungkan ting manu dan ai, reng ai baw hte hpring nga ai. Dai daram manu dan ai rai tim mungkan ga gaw Karai a man e ga numhpu hkyep mi zawn sha re; manap e hkrat ai numri kahte mi zawn sha re, kaji la ai, nga ai. Dai gaw Karai Kasang a kuptsup ai lam, shadawn n lu ai Shi a atsam marai hpung shingkang a lam Hpaji Byeng-ya e tsun dan ai rai nga ai. Rai timung, Shi jaw da ai asak shăgu, hkrung mi hkrung hpe mănu shădan ai, nga ai. Dai majaw, hkrung mi hkrung hta mănu dan grau ai shinggyim masha a asak htenza mat na, sum mat na hpe lahpawt dum ai. Tsawra matsan dum ai Karai Kasang, shut hpyit lam dam mat ai ni myit malai lu nna asak prawn lu na lam hpe ra sharawng ai Karai Kasang rai nga ai.

Ma kaji langai hpe gumhpraw 10,000 dan jepa langai hte muk tawng langai lăta la shangun yang, ma gaw muk tawng she lata la na re. Gwi hpe ja tawng hta nra tawng arau jahkrat da ya yang nra tawng hpe she lăta la na rai nga ai. Tinang hpe akyu jaw ai baw hpe sha manu shadan na rai nga ai. Hpaji n rawng ai wa gaw gumhpraw la nna ja rawng ai sun hkau-na aloi sha dut sha kau na rai nga ai. Tinang hpe akyu jaw ai baw hpe she manu shadan chye ga ai n rai a hka! Dai majaw, Hpaji Byeng-ya Laike e tsun ai, mungkan ting Karai a matu hpa wa mi rai a ta? Ga numhpu hkyep mi sha zawn, manap e hkrat ai numri kăahtawk mi zawn sha re, nga ai. Ra n rawng ai, kuptsup ai Karai Kasang gaw tsawra myit san san hte yawng mayawng hpe hpan da ai she rai nga ai. Karai e ra sharawng ai majaw sha hkrung mi hkrung, asak dun shamu shamawt nga lu ai, nga ai.

Gumhpraw 10,000 dan jepa hpe n hta la ai, ja tawng hpe ngam da ai ma hte gwi hpe yu matsan dum na ga ai. Ma hte gwi gaw sawn chye ai madang dai daram sha re ai majaw rai nga ai. Ra rawng gawng kya ai masha hpe Karai Kasang matsan dum ai, nga nna tsun da ai. “Karai Kasang e matsan dum ya ai n rai yang kadai shinggyim masha wa Karai a man e tsap dan lu na rai ta, nga, Shakawn Kungdawn-130 hta tsun da ai n rai a hka! Karai Kasang a matsan dum myit a majaw sha, shinggyim masha hte nga yawng nga pra grin nga, hkrung nga lu ai lam, Hpaji Byeng-ya Laika matut tsun da ai. Anhte shinggyim masha shada jeyang hkat, mătai dawp hkat ai alai ni kăde hkrit hpa, kăde matsat hpa wa she rai nga a hka!

Luka ka da ai laika na mabyin, Hparishe ni hte jaiwa ni gaw tinang hkum hpe tinang tara hkan dum, dinghpring dum nna shut hpyit lam dam ai ni hpe jahpoi asawng, yu kaji; shanhte hpe lam madun hkye mawoi la na n myit ma ai. Yesu galaw ai amu, Karai Kasang a n htum n wai matsan dum myit hpe madun dan ai. Yesu gaw kang hta ai masha Zake-u hpe tsun ai, “Hkye hkrang la ai chyeju dai ni ndai nta kaw du shang wa sai”, nga ai. Yesu gaw shut hpyit lam dam ai ni hpe hkan tam nna hkye mawoi na matu dinghta ga de du sa ai.

Karai a Mungga gaw asak rawng ai, a hkrung nga ai. Galoi prat hta rai tim, “dai ni” ngu nhtoi, ya, ngu ai aten, Yesu hpe hkap la saw shaga ai wa a dum nta de Shi du sa nna hkye hkrang la ai chyeju jaw ya na rai nga ai. Zake-u gaw Yesu hpe mu mayu ai majaw hpun ntsa e lung dung ala shăkut wu ai. Shi hkrum shakut ai loi mi kachyi mi sha, Yesu gaw grau ai hku shi hpe htang jaw ai, nta du hkra hkan sa nna nta e shat sha lawm ai.

Anhte ra rawng gawng kya ai ni myit malai shakut ai hta, Shi hpe hkrum katut shakut ai hta, loi sha pyi shakut ga yang, Yesu shi jaw ya na chyeju mahtang grau ai hpe dum mai ga ai. Yesu hpe n kam hkrum, n kam saw shaga, myit ja nan nga jang hkye hkrang la ai chyeju tinang kaw du shang wa na mahkrun mung n nga na rai nga ai.

Anhte kuptsup ai hku Karai Kasang hpe kamsham nawku dawjau ai n galaw byin na ga ai. Anhte hpa n re ai ni, gawng kya kăhtap shut shut re ai ni a lam hpe Karai Kasang chye ya ai majaw, Karai Kasang gaw matsan dum ai. Anhte a măga Yesu hte ni htep lu hkra, shi hta asak jawm pawng lu hkra, shi hpe chyeju dum htang lu hkra,…. Shăkut nga na ahkyak ai. Anhte shakut ai hta Karai Kasang maga na galaw ya na mahtang grau ai lam, Zake-u na mabyin a lam sharin la lu sa ga ai.

Jăhtum chyălai, Yesu hpe myi-man chyaw hkrum lu hkra, Yesu hpe hkap bawp la lu hkra, dinghpring chyoi pra ai hku nga sa ra ai lam, San Pawlu shădum ya ai. Dai jăhtum chyălai myi-man chyaw hkrum na nhtoi n du shi yang pyi, ya, ngu ai aten hta Yesu hte hkrum matut lu ai lam hpe mung shadum ya ai_ “Madu a Nhtoi” ya e pyi du nga sai, nga ai.

Karai Kasang shi a tsawra myit hte hpan da ai amyu baw hkum sumhpa hpe Shi tsawra manu shadan ai zawn, anhte hpa wa mi n rai ga timung, Karai Kasang zawn, hpan da amu yawng hpe, asak rawng ai baw hpan shagu hpe, masha shagu hpe manu shadan, tsawra chye, mara dat ya hkat chye ra ga ai n rai a hka!

2022: PRAN WAN LADAW LABAN (31) NA CHYUM LAIKA

PRANWAN LADAW HTA LABAN 31
October 30, 2022
CHYUM MUNGGA DAW 1

HPAJI BYENG-YA 11:22-12:2

Ya hti na gaw, Hpaji Byeng-ya laika hta na rai nga ai.
Madu e, mungkan ting gaw Na a man e kaji htum ai joi si hte, ga ntsa de hkrat ai mari nsi langai mi zawn rai nga ai. Rai ti mung, Nang gaw mahkra dang chye ai Madu rai nga ndai majaw, yawng mayawng hpe matsan dum chye nna, shut hpyit ai ni myit malai lu hkra, shanhte a mara hpe n matsing da ndai. Rai sa, Madu e, nga yawng nga pra hpe Nang tsaw ra nna, hpan tawn da ai arai mahkra hta na, Nang n dawng n yawt ai baw hpa mung n nga ai. Hpa majaw nga yang, arai lama mi hpe Nang n dawng n yawt ai rai yang gaw, dai hpe n galaw tawn da na ndai. Nang Madu n ra yang gaw, hpan da ai baw lama mi kaning rai nga lu na i? Madu lanu lahku ya ai n nga yang gaw, gara hku grin lu na i? Asak hkrung ai ni hpe tsaw ra ai Madu e, yawng mayawng hte gaw Na a hkrai rai nga ai majaw, shanhte hpe matsan du chye nga ndai. Dai re ai majaw, shut hpyit ai ni hpe Nang angwi sha sharin achyin ya nna, shanhte hpe shadum jahprang let, gara hku shut ai lam shanhte hpe madun dan nga ndai. Shing rai, n hkru n kaja ai lam hpe shanhte koi kau lu nna, Nang Madu hpe kamhpa lu na ma ai.
Karai Kasang a Mungga rai nga ai.

CHYUM MUNGGA DAW 2

2 HTESALONI 1:11-2:2

Ya hti na gaw, Htesaloni masha ni hpang de San Pawlu shagun dat ai laika lahkawng hta na rai nga ai.
Nanhte hpe shaga la ai chyeju hte maren ging dan ai hku hkan galaw lu hkra, anhte a Karai Kasang gaw nanhte hpe shadaw shangang ya u ga; mai kaja ai amu galaw na mayu ai myit shagu hpe mung, Karai Kasang Shi a n-gun atsam hte shadik ya nna, makam masham a jaw e nanhte galaw nga ai magam bungli shagu hpe Shi jahkum shatsup ya u ga, ngu nna, nanhte a matu mara anhte tut nawng e akyu a hpyi nga ga ai. Hpa majaw nga yang, anhte a Madu Karai Kasang hte Madu Yesu Hkristu a mying nsang gaw nanhte hta e shagrau ai hkrum lu na hte, nanhte mung shi hta e shagrau ai hkrum lu na myit dai.
Hpu nau ni e, ya anhte a Madu Yesu Hkristu bai du sa na hte, anhte Shi hte rau zup hpawng nga na lam hpe myit yu ga. Madu Yesu a Shani gaw ni magang wa ra ai, nga nna, masha ni tak tsun ai ga hte, tsun shamawng ai ga a majaw mung, anhte shagun dat ai laika zawn san ai laika hta ka da ai majaw mung, myit masin kahpra nna n dum n dam hkum rai myit.
Karai Kasang a Mungga rai nga ai.

KABU GARA SHIGA

LUKA 19:1-10

Ya hti na gaw, Luka a laika hta na Kabu Gara Shiga rai nga ai.
Yesu gaw Yerihku mare de shang nna, mare ka-ang hku lai sa wa ai. Ya Zake mying kang hta ai agyi langai mi nga ai: dai wa gaw sut su ai wa rai nga ai. Yesu gaw kaning san ai wa re ai hpe grai mu mayu ti mung, masha unawng kaba nga ai hte, shi gaw hkum gadun ai majaw, n mu lu wu ai. Dai rai nna Madu hpe mu lu hkra, shi shawng de gat sa nhtawm, Yesu lai sa wa na ra ai lam makau na lakum hpun hta lung dung nga ai. Dai de du yang Yesu shi hpe mada ya nna, Zake e, alawan yu wa rit; dai ni ngai na a nta e rai na nngai, ngu nna shi hpe tsun wu ai. Shaloi shi alawan yu wa nna, kabu gara ai hte Yesu hpe hkap hkalum la wu ai. Nga manga ni gaw dai hpe mu jang, Yesu gaw mara kap ai wa langai mi kaw shang manam sai, nga nna aput angun nga ma ai. Zake chyawm gaw rawt tsap nna, Madu e, nye a sut rai ka-ang hkup ngai matsan mayan ni hpe karan jaw na we ai; langai ngai hpe mawp sha kau ai rai yang gaw, htam mali ngai bai wa na nngai, ngu nna Madu hpe tsun wu ai. Shaloi Yesu gaw, Dai ni ndai nta hta hkye hkrang la ai lam du shang sai: kaning rai nme law, shi mung Abraham a kasha rai nga ai. Masha Kasha gaw mat mat ai ni hpe, hkan tam nna hkye hkrang la na matu du sa ai rai nga ai, ngu nna Zake hpe tsun wu ai.
Madu a Kabu Gara Shiga rai nga ai.

2022: PRAN WAN LADAW LABAN (30) NA MUNGGA

Karai Kasang gaw myi-man n tau ai wa rai tim, machyi hkrum ai wa, matsan măyan re ai măga shănang ya grau ai: myit masin kaw na prut pru ai sanseng ai akyu hpyi nsen gaw lamu hkanggau hpe tawt nna Karai Kasang kaw hkrang du lu ai. Shi a akyu hpyi nsen hpe Karai Kasang madat ya na. Myit tsaw myit dap ai masha, tinang hkum hpe dinghpring dum ai, gumrawng ai wa a akyu hpyi nsen gaw kaman lila tai mat na, ngu ai lam re.

Kălang mi na aten hta Buddha hpe sa kăwan hkung ga jaw ai sape langai mi, lahkawng măga nampan lang let Bukda shi kaw du sa ai. Bukda gaw ning ngu tsun ai, “Nang lu ai hpe tek lang ai hpe kau u”, ngu tsun ai. Sape wa gaw shi hpai lăta na nampan hpe tat jahkrat kau ai (pai lata hku lang sa jaw ai n sut ai, ngu, shadu la ai). Bukda gaw, “Nang lu ai hpe tek lang ai hpe kau u”, ngu, kahtap tsun ai. Hkra lata e lang da ai nampan hpe mung tat kabai kau ai. Rai tim, masum ngu na lang “Tat kau u…” ngu bai kahtap tsun jang sape wa gaw mau ai. Hpa hpe tsun ai n chye nna Bukda hpe san yang mahtai lu la ai, “Na hkum hkrang myit masin yawng hpe tat kau u, yawng hpe kaman lila, hpa n lu ai, hpa n tai ai wa re ai hpe hkap la yin la na lam tsun ai hpe chye la nu ai da.

Karai a man e sit sa ga yang, tinang gaw hpa n re ai lam, rai dum na hpa n nga ai lam, ra kădawn ai lam hkrai re ai lam, myit shut sawn shut ai hte shut chye ai lam, Karai a man e matsan mayan re ai masha re ai lam, ga hkum mi hte tsun yang shagrit shanyem ra ai lam rai nga ai. Hparishe wa mahtang shi byin ai lam, dinghpring ai lam, tăra hkan shădik ai lam, grau sawng jat ai gaw kăga wa hte shădawn nna Karai a man e shi a hkum hpe shi shagrau dan ai amu rai nga ai. Dai zawn re ai masha hpe Karai Kasang sha n rai, anhte masha ni mung, n ra ai rai nga ai. Karai a man e ra rawng ai lam hpe n hkap la ai masha, shi hkum hpe shi dinghpring dum ai majaw, Karai Kasang mung shi hpe kăman dat dat nu ai, nga ai.

Kang hta ai masha gaw Roma asuya e san da ai magam gun langai; Yuda amyu sha shada kaw na hkanse ni hpe hta shinggyin nna hpyen amyu re ai Roma asuya hpe sakjaw ai amu gun masha rai nga ai. Dai majaw kanghta ai masha hpe mara lu ai masha hku shăwa e sawn la ma ai. Kang hta ai masha gaw hpyen asuya hte lăta hkindun nna asak bau ai makan galaw ai majaw, shi hkum hpe shi mung mara kap ai masha hku chye na hkap la ai. Dai majaw, Karai a man e grit nyem ai myit hte sit shang nna, “Karai Kasang e, shut hpyit mara lu ai wa ngai hpe matsan dum la e law” ngu nna, akyu hpyi ai rai nga ai. Shi gaw dinghpring ai chyeju lu la nu ai, nga ai.

Gumrawng gumtawng ai, myit tsaw myit dap ai myit jăsat hpe kădai mung n ra shărawng ai; matsat hpa mung rai nga ai. Rai tim, gumrawng myit n rawng sawng, tinang hkum hpe rai dum ai myit n rawng sawng re ai kadai wa nga a ta? Masha law mi law gaw Hparishe wa dăram n sawng na re, kang hta ai masha daram mung shagrit n lu kun, rai na re. Nang/ngai, malawng gaw tai shai ai lahkawng maga na nchyang a lapran le re she rai kun? Tinang jaw dum, byin dum, rai dum re ai arawng sădang hpe loi sha mi htawk, di ya yang n kam hkam ga ai n rai a hka! N kam hkam ai, pawt sindawng ai degree madang gaw n bung hkat ai. Masha kau mi gaw tinang hpe loi sha htawk, di dat yang ladu lai pawt wa ai, lai jan ai hku tai htang ai, jahpoi shatan n ma, myit nji n-mu aten sharen nna hkam sha chye ma ai. Tai shai ai lahkawng maga na nchyan a lapran e nga ai ni, langai hpra gaw tinang Hparishe wa a myit jasat maga shanang grau ai kun, kang hta ai wa a akyu hpyi ai myit jasat maga shănang grau ai kun, myit sumru, sawn shen yu nna sharai ding-yang galaw ra ga ai n rai a hka!

Karai Kasang a man de sit shang akyu hpyi nawku ga yang, teng sha tinang lu dum, byin dum, dinghpring dum ai myit hpe “Ground Zero” galaw na lam, Bukda gaw nampan la sa ya ai sape wa hpe tsun ai hpa rai nga ai. English hku gaw “Self-emptying” ngu ai; tinang kăman lila sha re ai, ngu, shagrit shanyem ai hpe tsun ai.

Tinang chye ai, lu ai, byin ai, yawng gaw Karai a chyeju wa n rai a hka? Aten tup Karai a bausin măkawp măga ya ai chyeju hte alak re ai shaman ya na hpe ra kadawn ai hkrai n rai a hka? Shut hpyit mara lu ai amyu, shut kătaw chye ai amyu re ai hpe dum ga yang, teng sha, shagrit shanyem ai myit hte nawku dawjau akyu hpyi lu na rai ga ai.
 
San Pawlu gaw htawng rawng, sharen da hkrum ai aten_ shi hpe tsun maga ya na arawng aya lu ai masha n lu ai. Bawng masha, sat kau hkrum na hpe shi dum ai. Shi gaw Karai a man e pyet pyet taw ai myit masa rawng ai hpe mu lu ai. Shi a myit masin wenyi tup Karai a lata hta ap da nu ai. Shing di ai majaw, jahtum chyalai, Karai Kasang shi hpe hkye la na lam hpe n shut n shai myit mada ai. Bawng masha tai ai gaw dai Kabu Gara Shi-ga hkaw tsun ai nhkan e zingri hkrum ai; dinghta ga na power hpe, n jaw n teng ai hpe asum n jaw ai. Sat kau hkrum na wa rai tim, shi a asak hpe n lahpawt ai. Dinghta ga arawng power, nat Satan a power kaw na Karai e hkye la na lam tup hkrak kamsham ai.

Pawlu gaw Sirak Laika e tsun da ai hte maren, Karai a man e pyet pyet taw ai majaw Karai a hkye hkrang la ai kumhpa hkam la lu na lam akyu hpyi nawng da ai rai nga ai. San Pawlu a hpunda hpe n dep lu tim, Ja Chyum Mungga masum hte kaw na sharin hkaja la let, shani shagu loi loi rai nna tinang a myit masin wenyi hpe hprang shătsawm la ra ga ai. Shaloi, Karai a man e grit nyem ai myit hte sit shang akyu hpyi lu na, tinang hte gingdan ai akyu ara hkam la lu na ga ai.

2022: PRAN WAN LADAW LABAN (30) NA CHYUM LAIKA

PRANWAN LADAW HTA LABAN 30
October 23, 2022
CHYUM MUNGGA DAW 1

SIRAK 35: 12-14, 16-18

Ya hti na gaw, Myihtoi Sirak a Laika na rai nga ai.
Madu gaw myiman n lata ai tara agyi wa rai nga ai. Shi gaw matsan mayan wa hpe n gawn n sawn di kau nna masha hpe myiman lata na n rai. Shut hkrum ai wa hpyi shawn ai ga hpe Madu madat ya nga ai. Jahkrai nmai ni hpyi jahtau ai shaloi, Madu gaw shi a myiman kayin kau ai n rai; gaida jan shi a lam aput apai nga tsun dan ai shaloi, shi hpe gawt kau na n rai. Shi a myit masin mahkra hte Madu hpe daw jau ai wa gaw, Karai Kasang a man e myiman pa nna, dai wa hpyi nem ai sumwi du hkra lung wa na ra ai. Myit grit nem ai wa a akyu hpyi ai nsen gaw, sumsing lamu de hkrang wa na ra ai. Madu htan ya ai ga garai n du yang, shi shalan shabran ai n hkrum lu ai rai nna, Tsaw Htum ai Wa shi hpe garai n mada yu jang, shi hpyi nem ai lam n hkring na ra ai. Madu gaw lanyan nga na n rai; Shi gaw ding man ai ni hpe shalawt nna, shanhte a hpang maga de tara dara ya na ra ai.
Karai Kasang a Mungga rai nga ai.

CHYUM MUNGGA DAW 2

2 TIMOHTI 4:6-8, 16-18

Ya hti na gaw, Timohti hpang de San Pawlu shagun dat ai laika lahkawng hta na rai nga ai.
Ya e pyi, nawku tawn ntsa de luhpa ru jaw ai zawn, nye a asak ru kau ai hkrum nna, ngai pru lai mat wa na aten du magang ra ai. Ngai gaw kaja ai gasat gala gasat ngut se ai: gat shingjanwng ai lam htum hkra gat shadu se ai; makam masham hpe a manoi nga ni ai. Ya e lam langai sha ra ai. Ding hpring ai tara agyi wa ngu ai Madu gaw, dai Nhtoi Kaba hta, ding hpring ai a ja janmau ngai hpe ap ya na ra ai; ngai hpe sha n rai, Shi a dan pru na lam hpe sharawng awng ai ni yawng hte hpe ap ya na ra ai. Nye a amu hpe shawng lang tsun ai shaloi, ngai hpe garum ai sakse langai mi n pru ai; yawng hte gaw ngai hpe kau da mani ai; dai gaw shanhte a ntsa e mara n tai u ga. Rai ti mung, nye a marang e Kabu Gara Shiga hpe, maigan amyu ni mahkra na la lu hkra, hkaw shadan dan lu na matu, Madu gaw ngai a hpang manga de lawm nna, ngai hpe n-gun hta na mawai la ai ngai hkrum ni ai. Madu gaw n hkru n hkra ai lam yawng hta na ngai hpe mawai la nna, sumsing lamu na Shi a mungdan du hkra ngai hpe makawp maga la na ra ai. Shi gaw htani htana prat dingsa hpung shingkang a nga nga u ga law. Amen.
Karai Kasang a Mungga rai nga ai.

KABU GARA SHIGA

LUKA 18:9-14

Ya hti na gaw, Luka a laika hta na Kabu Gara Shiga rai nga ai.
Dai aten hta e Yesu gaw, tinang a hkum hpe ding man dum nna, masha kaga hpe n gawn n sawn di kau ai ni hpe, ndai ga shadawn tsun mu ai gaw: Masha lahkawng akyu hpyi na matu nawku htingnu de lung wa ma ai; langai mi gaw Hparishe masha, langai mi gaw kang hta ai wa rai nga ma ai. Hparishe wa gaw tsap nga nna, Karai Kasang e, lagu lagan, n ding n man ai, num shaw ai amu galaw ai masha gale ni hte, ngai n bung nngai hta n-ga, ndai kang hta ai wa zawn pyi n rai nngai majaw, ngai nang hpe chyeju dum nngai.
Ngai mahtang bat mi hta lahkawng lang lusha gam nga nngai; ngai lu malu hta na htam shi hta htam mi alu jaw nga nngai, nga nna shi a kraw lawang hta tsun wu ai. Kang hta ai wa chyawm gaw, tsan ai kaw tsap nna, lamu de pyi n mada yu ai sha, sinda adup nga let, Karai Kasang e, mara kap ai wa ngai hpe matsan dum rit law, ngu nna hpyi wu ai. Ngai nanhte hpe tsun made ga: Kang hta ai wa gaw, Hparishe wa hta Karai Kasang a chyeju grau lu la nna ,shi a nta de wa mat nga ai. Kaning rai nme law, tinang a hkum hpe shagrau ai wa kadai mung, shagrit shanem ai hkrum na ra ai; tinang hkum hpe shagrit ai wa chyawm gaw shagrau ai hkrum na ra ai.
Madu a Kabu Gara Shiga rai nga ai.

2022: PRAN WAN LADAW LABAN (29) NA MUNGGA

Akyu hpyi ai, ngu ai gaw Hkristan masha langai a matu shăni shăgu gălaw ra ai bungli langai, lit magam langai rai nga ai. “Madu a akyu hpyi ga” tsun ga yang, shani shagu anhte ra kădawn ai lu sha, anhte hpe jaw rit, ngu nna akyu hpyi ga ai. Karai a shăman chyeju, măkawp măga ai chyeju, asak a chyeju kumhpa ni n hkam la ra ai, n kadawn ai shani n nga ai hpe dum ra ga ai. Ya hpyi ya lu, re ai n byin wa timung, Karai Kasang gaw n jaw ai n nga na, grau ra ai hpe mahtang lu la na, ngu ai hpe kam let, myit n daw ai akyu hpyi ra ai lam shărin ya ai.

Prat hta awng dang dik htum ai masha langai_ nam kahtawng e nga ai majaw matsan ai, jawng n lu lung ai. Jawng kaji sha lung da lu ai. Rai tim n sim n sa laika hti, hpaji hkaja ai. Mare kaba de htawt nna hpaji matut hkaja ai. Shawng na lang rung bungli shawk ai, lăta la n hkrum ai. Mung-shăwa rapdaw ra lăta poi langai hta shang shingjawng ai; sum ai. Dai hpang, lamu ga gawn rung langai kaw bungli shawk ai; lata la n hkrum ai. Ningtau Gumsan măgam ra lata poi hta shang shingjawng ai; sum mat ai. Shi tsawra dik ai sumtsaw jan n myit mada ai si mat ai. Shi hkum nan grai n tsawm ai la re. Dai hpang mungshăwa rapdaw ra lăta poi hta shăra langai lu hkra shingjawng ai, sum ai. Hpang lahkawng ning na ai hpang bai shingjawng ai shaloi mungshawa dat kasa lăta la hkrum ai. Jahtum na awng padang gaw Gumsan magam lata la hkrum ai; mying gumhkrawng dik ai American Gumsan Magam Abraham Linkun (Lincoln) rai nga ai. Shi prat hta dai dăram hkam sharang shăkut shăja lu ai, myit n daw ai sha awng dang ai prat de du lu ai gaw akyu hpyi shaja ai majaw rai nga ai.

Pru Mat wa ai Laika hta Moshe lata shărawt lamu madi akyu hpyi nga dingsang, Israel dap gaw hpyen Ameleki hpe dang ai; Moshe lata tsu nna lata jahkrat jang Israel dap sum htingnut wa ai. Moshe a pai hkra marai lahkawng, shi a lata n hkrat hkra madi shadaw ya ma ai majaw, hpyen amyu Ameleki hpe dang kau lu ai, nga ai. Akyu hpyi nga dingngam, shaman chyeju hpe jang jang e, myi hte mu lu ai hku chyeju lu la ai.

Luka a Laika hta rai jang, matsan mayan re ai numjan myit n daw n hten ai sha law law lang hpyi lajin ai jahtum e she shi ra mayu ai hpe lu la ai lam tsun da ai. N sim n sa Karai Kasang kaw akyu hpyi ai tsawra kasha ni a hpyi jahtau ai nsen hpe, Karai Kasang n madat la ya ai nga na kun, nga ai. Jang jang e n jaw ai rai tim pyi n jaw ai n nga na lam tsun da ai.
Lahkawng yan na mabyin ni hta shaman chyeju jaw ai gaw Karai Kasang sha re. Karai Kasang gaw maji ai wa n rai, na maza hkra hpyi jang she jaw ai Karai Kasang n rai. Hkrup mi ra, jaw kam jang jaw n jaw

kam jang n jaw re ai Karai Kasang n rai. Ra ai hta hkan nna jaw ai; hpyi ai ni a kamsham myit hta hkan nna jaw ai; myit n daw ai sha, myit galu ai hte hpyi jang n lu ai n nga na, ngu ai lam hpe sharin ya ai lam re.

Israel masha ni hpyen găsat nga ai aten, jang jang e ra kădawn nga ai hte maren, Moshe n sim n sa hpyi htinglu ya ai. Shăman chyeju jang jang e ra ai hte maren, jang jang e jaw ya ai. Moshe gaw Karai Kasang hte hku-hkau ai wa rai nga ai; dai zawn Karai Kasang hte hku- hkau lu na matu shi kade hkam sharang ra ai, kade lang pyet pyet taw nna Karai a ga hpe madat ai, kade wa nni nhkri hkam sharang lai wa sai, ngu ai hpe mung myit dum mai ga ai.

Myit su ai kanu kawa ni gaw kasha ni hpyi shăgu n jaw ai; ra ai yawng yawng mung n galaw ya ma ai. Ma ni, shanhte hta rawng ai atsam ni hpe mu chye wa hkra, shanhte hta rawng ai atsam hpe shăngun lang nna manghkang ni, dut dang ai lam ni hpe shanhte hkum nan hpăran chye hkra garum ya ai lam rai nga ai. Kanu kawa kau mi, ma ni hpyi shagu jaw, ra kadawn ai lam yawng yawng hpe hkan galaw ya, manghkang shagu hpe hkan hpăran ya ai a majaw, ma dai ni gaw tinang lăgaw hta tinang tsap n chye wa ai. Ma ni hpe jăhten kau ai mahtang tai wa ai n rai a hka!

Hkum hkrang hta mung, wenyi mahkrun hta mung, ru ai yak ai, kadawn ai lam law law hpe hkrum sha yu ai ni mahtang, hkum hkrang myit masin wenyi grau kunghpan wa lu ai rai nga ai. Ruyak jamjau n hkrum yu ai ni gaw prat hta shingjawng saw ai lam law law hkrum katut jang ămai sha asum jaw chye ma ai. Myit daw loi ma ai.

Tsawra dik ai Kawa Karai Kasang mung, hpyi shagu n jaw ai; aten sharen da ai lam nga tim n jaw ai n nga na hpe hkrak kam ging ai lam, Madu e sharin ya ai.

Timoti Laika hta Kasa Pawlu gaw shi a sape timoti hpe tsun ai, lam shagu hpe hkamjan lu ai gaw makam masham a jaw re re ai lam, dai Kabu Gara Shi-ga hpe htawn tsun shana ai amu hta, awng dang ai aten nga ai zawn, yakhkak jamjau hkrum ai, dut dang ai lam ni mung hkrum na. Myit n daw ai sha, myit galu hkam sharang let hkaw tsun shaja na lam, ninggun jaw ya ai. Myit n galu, n hkam sharang lu ai ni awng dang ai bandung de n du lu ai. Hkam sharang hkamjan ai akyu law la ai lam hpe hkaja la lu ga ai.

Shing n-rai; Makam Masham Shachyam Shabra Laban
(Is 60:1-6; Rom 10:9-18; Mt 28:16-20)
 
Yesu gaw săpe marai (11) hpe tsun ai, “Nanhte pru sa nna masha amyu shăgu hpe ngai a sape shătai mu; Kawa a, Kasha a, Chyoi Pra Wenyi a mying ningsang hta shanhte hpe kashin kamun jaw mu”, nga ai.
Pru sa na matu, Yesu gaw sape marai 12 hpe shăga la ai; shanhte chye ra ai baw yawng tsun dan, sharin dan ai. “12” ngu ai kuptsup ai nambat re. Marai 12 tup hkra hpe shăngun dat ra ai rai tim, Yesu hkum nan, dai kuptsup ai nambat gu hkra n lu shăngun dat ai. Marai 11 hpe sha shangun dat lu ai. Hpang e Kasa ni gaw marai mi hpe lata la nna nambat 12 hpe shatup la lu ma ai. Hpa hpe shadum ya a ta?

Sasăna bungli hta masha law hkra, ra n rawng ai hku shăngun dat na masha galoi mung n law na re. Shawng shawng e mung Madu tsun ai, “Mam dan masha n law ai; dan la na mam law wa myin nga ai” nga ai. Nawku Hpung hta, sasăna bungli hta magam gun masha dumhprut ai majaw myit n daw mai ga ai. Yesu pyi gaw marai 12 hpe shăngun dat mayu tim marai 11 hpe sha shangun dat lu ai n rai a hka? Nambat 12 tup lu hkra jahpring ya na gaw nang/ngai a lit n rai a hka?

Anhte Wunpawng myu sha ni a ginra ginsa, ru-pawt a lam săgawn dat yang, moi moi na masha ni gaw ri-da măka laklai ai măchye măchyang hte atsam lu ma ai; nhtu/sinat hte kaga laknak ni hpe madang tsaw ai hku galaw lang chye ma ai; hpri/gumhpraw/magri_ ndup hpaji mădang tsaw ai; hkyen hpaji kunghpan ma ai,…ndai zawn kăga atsam law law lu ma ai rai tim, ban hte ban hti htawn shalai, hkringhtawng matut shalai ai lădat hta ningra ai majaw, laili laika n chye ai majaw, ta maka hte kăga machye machyang hpan law law shămat kau ai lam hpe chye lu ai.

Hpa majaw Wunpawng myu sha ni ji woi ji wa prat na manu dan dik ai hpaji machye machyang amyu myu tat sum kau, shamat kau a ta? Shada prat hte prat, ban hte ban, hti htawn shălai ai lădat ninggun kya ai majaw rai nga ai. Anhte ji jum ji woi ni a lata hpaji machye machyang hpe kăga amyu ni hkaja sharin la nna shanhte a hpăga rai shătai kau ma nu ai. Dai ni na prat, anhte nhtang hku mări lang ra taw nga sai n rai a hka?

Galu kaba chying ring ai amyu, labau ngang kang ai amyu tai lu na matu, “tinang a” ngu makam masham htung lailen hte kaga hpaji ni hpe sharin ya ai, arawng la ai hte rem kyem hti htawn jaw na mung ahkyak nga ai. Moi na masha ni kaja dik, reng dik ai tsi hkrung tsi-nan lang lai wa tim, ban hte ban matut shălai htawn jaw hkat ai lam n galaw lu ai majaw, hpaji machye machyang hpe makoi da yip da ai majaw, shamat kau ai mahtang tai ai. Dai zawn sha, Hkristan makam masham hpe mung tinang hkrak shareng ai rai yang, rem kyem ra ai hta n-ga, kaga masha ni hpe hti jaw htawn ya ai rai yang sha, Hkristan makam masham gaw greng ja manu dan na rai nga ai.

Yesu hpe chye chyang tsawra kamhpa lu ai masha langai gaw Yesu a mai kaja ai lam, shi a tsawra myit hte atsam marai, shi a tara hte sharin shaga ai lam ni, kaga masha ni hpe n htawn jaw n garan jaw ai n nga lu na sha rai nga ai. Shing di gam garan ya ai a marang e, tinang a makam masham mung grau greng ja grawng rawt wa na rai nga ai.

Vietnam mungdan na mama ni gaw shinggan e mungshawa masha hpe dawjau ai tara shang bungli hpan law law e magam gun shajang ma ai da: gumhpraw dum, shopping mall-gat dut, rai chywi, nursing, machyi masha gawn, jak-rung amu, dz., dz., lu mai ai, ang ai shara magup shang lawm nna bungli run kaga manang ni hpe makam masham lailen, mai kaja ai, sumnung shingdi ai, dingman ai, tsawra lakawn chye ai,… Dai zawn shanhte kasi kaja madun ai ladat hte makam masham hpe sakse hkam dan ma ai da.

Makam masham sakse hkam ai, sasăna măgam hta hpan amyu myu, ladat amyu myu hku shang lawm mai ai lam hpe shadum ya ai. Makam masham hpe sakse hkam ai, sasăna măgam hta shang lawm madi shadaw ai gaw lit re ai hte maren, ahkaw ahkang (privilege) mung re ai hpe dum mai ga ai.

2022: PRAN WAN LADAW LABAN (29) NA CHYUM LAIKA

PRANWAN LADAW HTA LABAN 29
October 16, 2022
CHYUM MUNGGA DAW 1

PRU MAT WA AI 17:8-13

Ya hti na gaw, Pru Mat Wa Ai laika hta na rai nga ai.
Dai aten hta e, Amalek masha ni sa pru nna, Rehpidim ngu ai shara e, Israela amyu hpe sa gasat ma ai. Dai majaw Mawshe gaw Yawshu hpe, Masha lata la nna, Amalek ni hpe gasat na pru su; hpawt de, Karai Kasang a dawhkrawng lang nna, dai kawng pungding e ngai tsap nga na ring ngai, ngu nna tsun wu ai. Shing rai Mawshe hkang dat ai hte maren Yawshu galaw nna, Amalek ni hpe gasat wu ai; Mawshe, Arun hte Hura gaw kawng pungding de lung wa ma ai.
Ya Mawshe gaw shi a lata sharawt yang, Israela masha ni dang wa ma ai; shi a lata jahkrat yang gaw, Amalek ni dang wa ma ai. Rai ti mung, Mawshe a lata tsu wa lu ai rai nna, Arun yan Hura nlung langai mi la nhtawm, dai hta shi hpe dung shangun wu ai. Shing rai Arun yan Hura gaw, maga mi de langai ngai nga nna, Mawshe a lata pawn shadaw ya mu ai: dai rai nna jan du hkra shi a lata sharawt dingyang rai nga lu ai. Yawshu mung Amalek du wa hte shi a masha ni hpe, nhtu hte gasat dang kau wu ai.
Karai Kasang a Mungga rai nga ai.

CHYUM MUNGGA DAW 2

2 TIMOHTI 3:14 - 4:2

Ya hti na gaw, Timohti hpang de San Pawlu shagun dat ai laika lahkawng hta na rai nga ai.
Nang sharin la sai mungga teng man rai nga ai hpe myit hkut da nit dai majaw, dai hpe myit jung ai hte manoi manat ra ai. Nang hpe sharin ya ai sara ni kadai re ai myit dum nna, ma kaji aprat kaw nna Chyoi Pra ai Chyum laika ni hpe chye nga nit dai hpe a dum nga u. Dai Chyum laika ni gaw, Hkristu Yesu hpe kam sham ai a marang e hkye hkrang la ai hkrum lu hkra, chye ra ai hpaji byeng- ya nang hpe jaw lu ai. Chyum Laika shagu gaw, Karai Kasang a myit jahtoi ya ai hte ka da nga ai. Dai rai nna, sharin shaga ya na, n teng n man ai lam hpe nhtang madun na, masha a arawn alai hpe shading ya na hte, Chyoi Pra ai lam hpe sharin achyin ya na matu, Chyum Laika ni akyu rawng nga ai.
Karai Kasang a masha wa gaw dai hku hkan galaw yang, hkum hkum tsup tsup rai wa nna, mai kaja ai magam bungli shagu a matu chyip chyip rai na ra ai. Karai Kasang a man e mung, hkrung nga ai ni hte si ai ni hpe jeyang daw dan na ra ai, Yesu Hkristu a man e mung ngai nga nna, Yesu a dan pru na lam hte, shi a mungdan a amying hte, ngai nang hpe shadut dat de ai gaw: Dai shiga a lam hpe hkaw dan nga u; na ra ti mung, n na ra ti mung, shakut sharang ai hte tsun shana ya u. Daru sharin u; kam shut ai lam hpe madun dan u; mai kaja lam de woi len la u; rai ti mung, sharin shaga ya na myit rawng nga nna, myit galu kaba ai hte dai lam yawng hpe hkan galaw nga u.
Karai Kasang a Mungga rai nga ai.

KABU GARA SHIGA

LUKA 18:1-8

Ya hti na gaw, Luka a laika hta na Kabu Gara Shiga rai nga ai.
Tut nawng e akyu a hpyi nga mu ga hte, myit n hten mat mu ga, Yesu shi a sape ni hpe ga shadawn tsun mu ai gaw: Mare langai mi hta Karai Kasang hpe mung n hkrit, masha hpe mung hpa n shadu ai tara agyi langai mi nga ai. Dai mare hta gaida jan langai mi mung nga ai. Shi gaw dai tara agyi wa kaw sa nna, Ngai hte amu byin ai wa hpe, ding man ai hku daw dan ya rit, nga nna a tsun nga ai. Rai ti mung, nhtoi ram ram na hkra dai tara agyi wa n jeyang ya hkraw ai. Dai hpang shi gaw, Karai Kasnag hpe n hkrit, masha hpe hpa n shadu nngai, rai ti mung, ndai gaida jan ngai hpe a tsun shatsang nga ai majaw, shi hpang maga ngai tara dara ya na nngai; dai n rai yang, shi ya sha ya sha sa sa rai nna, ngai hpe n sim n sa sharu shatsang na ra ai, nga nna shi a kraw hta myit la wu ai, ngu nna Yesu ga shadawn hkai dan wu ai.
Shaloi Madu Yesu gaw, N ding n man ai tara agyi wa tsun ai ga hpe myit la mu: Karai Kasang gaw matsan dum lama nga ai rai nna, shi a shani shana hpyi jahtau nga ai, shi a lata la ai ni a hpang maga de, tara n dara ya ai, nga na a ni? Nanhte hpe ngai tsun made ga, Shanhte hpang maga alawan tara dara ya na ra ai. Rai ti mung, Masha Kasha du sa ai nhtoi hta, ndai mungkan ga ntsa e makam masham nga nga ai gaw mu lu na a ni? ngu nna sape ni hpe tsun mu ai.
Madu a Kabu Gara Shiga rai nga ai.