2022: PRAN WAN LADAW LABAN (26) NA CHYUM LAIKA

PRANWAN LADAW HTA LABAN 26
September 25, 2022
CHYUM MUNGGA DAW 1

AMO 6:1,4-7

Ya hti na gaw, myihtoi Amo a laika hta na rai nga ai.
Mahkra dang chye ai Karai Kasang ning nga ai: Zium bum ntsa e ngwi pyaw nga nna, Samari bum ntsa e hkrithpa n dum nga ai ni a matu, tsang shara nga malu ai. Magwi kawng yup ku hta shanhte kaleng tawn nga nna, panep ni hta gumkan taw nga ma ai. Shanhte gaw sagu hpung na sagu kasha hpe mung, dumsu ulawng na dumsu kasha hpe mung, sha ma ai: tingse dum let, nchyun chyun nna, Dawi zawn dum ai baw amyu myu hpe tinang a matu galaw ma ai: tsabyi chyaru hpe lu lai nna, kaja htum ai sau hte tinang a hkum hpe chya ma ai. Rai ti mung, Yosep hten byak ai lam hpe n tsang ma ai. Dai re ai majaw, tsasam mung de bawng dung na matu, shanhte hpe shawng woi wa na mara ai. Shing rai, gumkan taw ai ni a pyaw daw kadaw ai lam htum mat na ra ai.
Karai Kasang a Mungga rai nga ai.

CHYUM MUNGGA DAW 2

1 TIMOHTI 6:11-16

Ya hti na gaw, Timohti hpang de San Pawlu shagun dat ai laika langai hta na rai nga ai.
Nang gaw Karai Kasang a masha wa rai nga ndai majaw, ding hpring ai, tara hkungga ai, kam sham ai, tsaw ra ai, shakut sharang ai hte, sumnung ai myit hpe hkan shachyut nga u. Htani htana asak hpe nang hkam la lu na matu, makam masham hte seng ai, mai kaja ai gasat gala ai hpe a gasat nga u: dai hpe hkam la na matu nang hpe shaga la nna, sakse law law a man e teng man ai a matu nang sakse hkam ya nit dai. Yawng mayawng hpe asak jahkrung ya ai Karai Kasang a man e mung, Puntsiu Pilatu a man e teng man ai a matu sakse hkam ya ai. Yesu Hkristu a man e mung, ngai nang hpe shadum dat ai gaw: Anhte a Madu a Madu Yesu Hkristu paw pru ai nhtoi du hkra, nang hpe hkang da ai ga mahkra hpe, mara n kap ai sha ding ding man hkan galaw shatup nga u, ngu nna nang galaw ra ai magam hpe madun dat nngai.
Karai Kasang gaw, ahkying aten ang wa yang, dai Yesu Hkristu paw pru shangun na ra ai. Madu Karai Kasang htani htana ngwi pyaw ai hta anga nga nna, yawng mayawng hte hpe up nga ai Madu langai sha rai nga ai. Shi gaw hkawhkam ni a Hkawhkam, madu ni a Madu rai nga ai rai nna, Shi chyu sha htani htana asak a rawng nga ai hte, anhte a n dep lu ai nhtoi hta a nga nga ai. Masha kadai mung Shi hpe n mu yu ai hte, n mu lu nga ai: Shi kaw htani htana arawng sadang hte hpung shingkang anga nga u ga law. Amen.
Karai Kasang a Mungga rai nga ai.

KABU GARA SHIGA

LUKA 16:19-31

Ya hti na gaw, Luka a laika hta na Kabu Gara Shiga rai nga ai.
Yesu gaw Hparishe ni hpe tsun mu ai gaw: Lang mi na sahti langai mi gaw reng htum ai hte kya mani ai hpun palawng bu hpun sumli nna, shani shanang pyaw pyaw ningngai ga ai. Hkum ting kahpraw hpye ai Lazaru ngu ai hpyi sha ai wa langai mi hpe mung, dai sahti wa sha ku hta na hkrat ai adaw ahkyep hta sha mayu nna, shi a chyinghka makau e sa tawn da mu ai: gwi ni mung shi a nma sa mata ya ma ai. Shaloi, dai hpyi sha ai wa si mat nna, lamu kasa ni gaw shi hpe Abraham a lahpyen hta woi bang da mu ai: sahti wa mung si wa nna, makoi mayang di dat mu ai. Katsan ga e nachying nni hkri hkrum let shi mada yu nna, Abraham hpe mung, shi a lahpyen hta rawng ai Lazaru hpe mung mu wu ai.
Shaloi, shi gaw Wa Abraham e, ngai hpe matsan dum la e; ngai gaw ndai wan grung ai hta, n ji n mu hkrum nga nngai majaw, Lazaru gaw shi a lata ndung hte ntsin kapruk sa nna, nye a shinglet madit katsi ya li ga, ngai hpang de shangun dat ru law, ngu nna hpyi jahtau wu ai. Shaloi, Abraham gaw, Sha e, nang gaw naw hkrung nga ai hte yang, na a ngamu ngamai lu la nit dai mung, Lazaru gaw dai hte yang tsin yam tsindam hkrum nga ai mung, dum nga u: ya chyawm gaw shi nang e pyaw nga sai, nang mahtang gaw n ji n mu hkrum nga nit dai. Dai hta kaga, ndai yang nna, nanhte gaw n ji n mu hkrum nga nit dai. dai hta kaga, ndai yang nna, nanhte hpang de rap sa mayu ai ni, n rap lu mu ga mung, dai yang nna, anhte hpang de kadai n rap wa lu mu ga mung, anhte hte nanhte a lapran e sung la ai krung sinwa din nga ai, ngu nna htan wu ai.
Bai, sahti wa gaw, Wa e, dai rai yang gaw, ngai nang hpe hpyi de ga, ngai nau manga naw nga ma ai majaw, shanhte mung ndai nni nkri hkrum ai shara de, n du mu ga, shanhte hpe wa shadum shahprang na, Lazaru hpe nye wa nta de shangun dat ya e law, ngu nna hpyi wu ai. Abraham gaw, shanhte kaw Mawshe hte myihtoi ni nga ma ai: dai ni a ga madat mu ga, ngu wu ai. Sahti wa gaw, N rai, Wa Abraham e, si ai ni hta na, langai mi shanhte kaw bai wa yang gaw, shanhte myit malai lu na ma ai, ngu wu ai. Abraham gaw Mawshe hte myihtoi ni a ga shanhte n madat ma yang gaw, si ai ni hta na langai mi bai hkrung rawt wa rai ti mung, madat kam na ma ai n rai, ngu nna shi hpe htan wu ai.
Madu a Kabu Gara Shiga rai nga ai.

2022: PRAN WAN LADAW LABAN (25) NA MUNGGA

Shinggyim masha ni rap-ra tara hkan shatup na lam, shada matsan dum myit hte kanawn mazum na lam, Karai Kasang ra sharawng ai. Masha amyu baw yawng, hkye hkrang la hkrum ai kaw du na lam, Karai Kasang ra sharawng ai. N tara ai amu, masu magaw lailen hte hpring ai dinghta ga ntsa e asak hkrung nga ga yang, zet let ai myit, htauli htaula myit rawng nna, tinang lu mi lu ahkaw ahkang hpe hkye hkrang la ai kaw du na matu akyu jashawn chye ra ai lam, Madu sharin ya ai.

Russia mung Gumsan Măgam Putin gaw shi a mungdan na hpyen ninggun hpe kam nna, hpyen ninggun nun grau ai, kaji grau ai htingbu mungdan Ukraine hpe roi chyăhkoi rai, mara kata, zăhte tam shang htim gasat ai. Putin gaw shi gaw da ai tăra grai dinghpring ai zawn nga, grai tăra ai zawn nga hkaw tsun ndau ai. Ukraine hpe u-nyem roi hku roi ai; mungdan ting hpe dap shătai nna lamu ga găshun la lu na shakut ai. Ukraine mungdan ting hpe shani shana, shata hti nna bawm shărut bun ai: mung shawa masha, dum nta, dusat yam nga, hkai sun, hkrup mi ra sat nat hpya run ai lădat lang ai. N tăra ai gaw ladu lai she rai nga ai. Miwa mung, mungkan ting hpe up lu na shakut nga ding-yang. Putin daram n sawng ai rai tim, mungkan ting hta n tara ai amu, kaji kadun ai ni hpe, n tai n mai ai ni hpe, amyu shayi ni hte ma kaji ni hpe, roi rip amyat htuk ai amu kade law la ai hpe dum mai ga ai. Num ma law law dut sha kau hkrum ma ai. Ma kaji ni hpe shabrai loi sha jaw nna bungli shangun sha ai. Masu magaw ai lădat hte mari/dut hpăga ga nga ma ai.

Gumhpraw arang lu ai ni gaw matsan masha ni kaw na arung arai ni hpe manu hpa hpa hte mari la, lai jan ai manu hte dut la ai majaw, lauban tai ma ai. Matsan ai ni gaw grau matsan mat wa ai. Amo tsun ai hte maren, matsan masha ni hpe gumhpraw hte mari la kau ai, masha langai hpe kyepdin man mi hte mănu dawdan ai, mari ai shaloi mam hteng shingnoi hpe kaba jat, dut jang shingnoi hpe kaji jau di, manu sharawt kau ai, joi jang mawp ai, Laban ban nhtoi galoi mi lai lai, ngu, ala nga ma ai, nga, shingran pra pra mu shăngun ai. Karai Kasang gaw rap-ra ai, tara ai Wa re ai majaw, n tara ai amu, matsan dum myit n rawng ai amu tawt lai ai ni hpe majoi yu shalai kau na n re ai lam, myihtoi Amo shadum ya ai.

Kabu Gara Shi-ga hta mung, myit magaw ai manager gaw shi maw sha ai amu hpe bungli madu lauban wa chye kau ai lam dum ai. Bungli kaw na shapraw kau hkrum jang masha ni shi hpe hkap la lu hkra, gumhpraw jahpan hpe manai makai di shanut kau da ai; lauban wa hpe hka kap ai ni kaw na shi myi-man tam ai. Lauban wa gaw manager a măsu măgaw ai lailen hpe matsat ai rai tim, manager shi matut nna nga-mu nga-mai lam, lu ai ahkaw ahkang hpe akyu jashawn amyat htuk chye ai zai nyan hpe shakawn ai. Ndai măbyin kaw na Yesu sharin ya mayu ai lam gaw ndai re: tinang lu da ai ja gumhpraw, sutgan, arawng aya, machye machyang,… hpa mi rai rai, dai hpe akyu jashawn nna sumsing mungdan shang lu hkra galaw la chye ra ai lam, shadum ya ai.

Shing nga ai majaw, măsu măgaw dip sha maw sha ai kaw na lu la ai gumhpraw hpe alu bang shaja let sumsing mungdan shang lekmat mari la mu, ngu ai n rai. Dai myit masa gaw n jaw ai. Măsu măgaw roi rip ai amu langai hpe pyi Karai Kasang n yu shalai kau na lam, matsing da ai lam, myihtoi Amo shadum ya ai. Zake-u gaw Yesu hpe tsun ai, “Ngai marai langai ngai hpe mawp sha kau ai rai yang, htam 4 mara hka wa na nngai”, ngu ai baw myit masa mahtang myit malai ai kumla, lu da ai sut-rai hpe akyu jashawn nna marawng raw ai amu tai wa lu ai; dai hpe gaw shakawn ging ai.

Anhte a lata de shang wa ai ja gumhpraw, alu, ni masha law law e jai lang lai wa ai hpe dum ra ga ai: lata chyang ai, lata hkyeng ai, lata tsit ai, lata htoi ai san ai, lata law law kaw na lai wa ai. Tinang a lata kade hpraw san tim n san seng ai lata law law kaw na lai du wa ai rai nga ai. Dai zawn matsat hpa kap ai gumhpraw hpe pyi kaja ai maga, matsan dum hkye mawoi la ai amu ni hta akyu jashawn nna, sumsing mungdan de du shang lu na lam tam chye ra ai, ngu ai lachyum rai nga ai.

N san n seng ai hku gumhpraw tam la lu ai hpang, mai kaja ai lam hpa hta mung n jai, matsan dum hkye mawoi ai amu hta mung n chye lang, alu atan mung n chye bang rai nna tinang htingkyeng a matu hkrai lu lu sha sha rai jai lang kau ai rai yang, hpang na prat a matu hpa mi myit mada shara nga na rai ta?

Mungmasa gyin ai ni, mung-up du hkawhkam ni kaja yang kaja ai hku, mungdan ngwi pyaw simsa na rai nga ai. N jaw ai mungmasa, gawda ai tara n jaw jang, dinghpring ai masha ni du hkra matsan jamjau hkrum lu ai. Dai majaw, shanhte a matu akyu hpyi ya ra ai lam, Timoti Laika hta tsun da ai. Anhte tinang hkum nan n dep n hkap, n hkan galaw, n hkan sharai lu ai lam law law, n jaw n tara ai amu ni law law nga nga ai lapran, anhte galaw lu ai lam mi gaw akyu hpyi htinglu ya ai amu re ai hpe dum mai ga ai.

2022: PRAN WAN LADAW LABAN (25) NA CHYUM LAIKA

PRANWAN LADAW HTA LABAN 25
September 18, 2022
CHYUM MUNGGA DAW 1

AMO 8:4-7

Ya hti na gaw, myihtoi Amo a laika hta na rai nga ai.
Hpa n lu ai ni hpe shagrit kau ai hte, n dai mung na matsan mayan ni hpe dip sha ai ni e, ndai ga hpe madat mara mu: Nanhte gaw, Anhte mam dut lu na, shata praw, hkaulan mam hpe dut lu na, laban nhtoi lau lai u ga. Shaloi dang hpe kaji, gumhpraw shen na joi hpe kaba shangun nna, maw sha map sha let, matsan mayan ni hpe gumhpraw hte, hpa n lu ai ni hpe kyepdin man mi hte mari la lu na ga ai; hkaulan mam shingyun hpe pyi dut kau lu na ga ai, nga nna tsun nga myit dai. Madu gaw Yaku a arawng sadang hpe myit dum let, Gaja wa, nanhte a amu bungli mahkra hpe, ngai galoimung malap mali kau na n rai, ngu nna dagam da nu ai.
Karai Kasang a Mungga rai nga ai.
 
CHYUM MUNGGA DAW 2

1 TIMOHTI 2:1-8

Ya hti na gaw, Timohti hpang de San Pawlu shagun dat ai laika langai hta na rai nga ai.
Shinggyim masha ni yawng a matu hpyi nem ai, akyu hpyi ai, hpyi htinglu ya ai hte, chyeju dum shakawn ai lam ni hpe, kaga lam ni mahkra a shawng e galaw na sut la ai, ngu nna shadum jahprang dat nngai. Tara hkungga nna, htap htuk ai lam amyu myu hpe hkan galaw shatup let, ngwi pyaw simsa ai hte anhte nga sa lu na matu, hkawhkam ni hte ahkang aya jum ai ni a matu mung akyu hpyi ra ai. Dai gaw, anhte a hkye hkrang la ai madu Karai Kasang a man e mai kaja ai hte sharawng awng ai lam rai nga ai: masha yawng mayawng hkye hkrang la ai hkrum na hte, teng man ai lam hpe chye chyang wa na hpe Shi Madu ra nga ai. Kaning rai nme law, Karai Kasang langai sha nga ai; dai Karai Kasang hte shinggyim masha a lapran e, shinggyim masha rai nga ai, Hkristu Yesu ngu ai htinglu htinglai ya ai wa langai sha nga ai.
Shi gaw yawng mayawng a matu shi hkum nan hpe gawng malai hkungga di nna ap kau nu ai. Shing rai, daw da ai ahkying aten hta Hkristu Yesu sa du nna, Karai Kasang dai hku myit ra ai hpe Shi sakse hkam ya nu ai. Ndai lam hpe tsun shana na hte, de a kasa wa tai na matu, ngai hpe san tawn da ai ni rai nna, teng man ai makam masham hta maigan amyu ni hpe sharin shaga ai wa ngai rai nga nngai: ngai ning nga tsun ai gaw, teng man ai ga tsun nngai, ngai n masu ai law. dai re ai majaw, masin n pawt ai hte, ndang kalang n re ai sha, lasha ni gaw hkungga lara ai hte lata sharawt let, shara shagu hkan e akyu hpyi nga na hpe ngai ra nngai.
Karai Kasang a Mungga rai nga ai.

KABU GARA SHIGA

LUKA 16:1-13

Ya hti na gaw, Luka a Laika hta na Kabu Gara Shiga rai nga ai.
Dai aten hta Yesu Shi a sape ni hpe tsun mu ai gaw: Sahti langai mi kaw kunhting wa langai mi nga ai; dai kunhting wa gaw shi a madu a arai jai shamat kau ai rai nna, madu a man e mara sa shagun da mu ai. Shaloi sahti wa gaw shi hpe shaga la nna, Na a lam hta ngai na la ai gaw, kaning re ai rai ta? Nang jum ai gumhpraw jahpan laika dan yu rit; ya kaw nna kunhting amu n galaw lu na ndai, ngu wu ai. Dai rai nna dai kunhting wa gaw, Nye madu ngai hpe kunhting amu na jahkrat kau ni ai majaw, ngai kaning di na i? Ga htu ga chye na mung ngai n-gun n rawng nngai; hpyi sha na mung ngai kaya nngai. Ngai hpe shapraw kau jang, masha ni ngai hpe tinang a nta hta hkap la ra hkra, ngai galaw ra ai lam, ya ngai chye se ai, nga nna shi a kraw hta myit la wu ai.
Dai rai nna shi a madu kaw hka kap ai ni langai hte langai hpe shaga la nna, shawng na wa hpe, Nye a madu hpe hka gade daram wa ra nta? Ngu nna san yang, dai wa gaw, Namman joi hkying mi wa ra nngai, ngu wu ai. Shaloi kunhting wa gaw, Na a jahpan laika la nna, dung let manga tsa ka da u; lawan di u, ngu wu ai. Bai kaga wa hpe, Nang mung gade wa ra nta? ngu nna san yang, dai wa gaw, Hkaulan mam dang hkying mi wa ra nngai, ngu wu ai. Kunhting wa gaw, Na a jahpan laika la nna, matsat tsa ka da u, ngu wu ai. Dai n tara ai kunhting wa hpaji hte chye galaw ai majaw, shi a madu shi hpe shakawn wu ai; kaning rai nme law, ndai mungkan ga a kashu kasha ni gaw, tinang a lam hta e, nhtoi a kashu kasha ni hta rau nna hpaji rawng ma ai.
Dai rai nna ngai nanhte hpe tsun made ga: Nanhte a mungkan sutgan hte tinang a matu jinghku ni hpe tam nga mu; shaloi dai hpe kau da na aten du jang, shanhte gaw dinggrin a nga nga ai nta de nanhte hpe hkap la na mara ai. Amu kaji hta kangka re ai wa gaw amu kaba hta mung kangka rai na ra ai. amu kaji hta n ding n man ai wa gaw, amu kaba hta n ding n man nga na ra ai. Ndai mungkan ga na sutgan hte pyi nanhte kangka n rai lu yang gaw, reng htum ai sutgan majing hpe nanhte kaw kadai mi kam ap ya na a ta? Masha kaga a sut rai hte nanhte kangka n rai lu yang gaw, nanhte madu ang ai sut rai hpe nanhte hpe kadai mi ap ya na rai ta? Kadai shangun ma rai ti mung, madu lahkawng a amu gun hpai lu ai n rai; langai wa hpe shi n dawng n yawt nna, langai wa hpe tsaw ra na wu ai: Shing n rai, langai wa hta machyu nna, langai wa hpe n kaw n law di na wu ai: nanhte gaw Karai Kasang hpe mung, mungkan a sutgan hpe mung rau daw jau lu na myit dai n rai.
Madu a Kabu Gara Shiga rai nga ai.

2022: PRAN WAN LADAW LABAN (24) NA MUNGGA

Karai a n htum n wai ai tsawra matsan dum myit hte mara raw dat ya ai lam rai nga ai. Kade daram mara kaba ai rai tim, Karai e n dat ya lu ai mara n nga ai. Ahkyak dik ai gaw myit malai majing lu nna, Kawa Karai hpang de sit shang wa na lam langai sha nga ai. Shinggyim masha gaw gawng kya ai amyu re ai lam hpe Pru Mat wa ai Laika hta tsun da ai. Pawlu mung, shi daram mara kaba ai wa hpe Karai Kasang e matsan dum ya ai lam; shi hkam la lu ai chyeju hta, Yesu Hkristu a n htum n wai myit galu kaba ai, matsan dum mara dat ya ai lam dan san dik ai sakse tai wa ai, nga ai.

Anhte myit galu hkam sharang ya na yak dik htum ai masha jahpan hta tsa ya kaba, kani ya, 4-ya ni teng sha lawm ai. Kăga baw yin lu ya lu ai ni hpe hkam sharang ya na mung n loi la nga ai. Tsa, kanni hte kaga nanghpam baw lu lang ai ni hpe tsi ya ai dawn dabang hkan na mabyin ni hpe yu jang myit daw hpa nan rai nga ai. Kade madang tsaw ai, kaja dik ai dawn dabang hkan e rai tim, nanghpam a mayam tai ai kaw na tsep kawp lawt lu ai, awng dang ai masha shau la ai (n law la ai); marai 100 hta marai 4-5 daram sha re ai lam hpe chye lu ai.
 
Nta dinghku masha ni, alu jaw madi shadaw ai ni, sharin achyin ya ai ni…yawng a matu myit daw hpa n rai a hka?

Kanu kawa ni, hkrap myi-prwi hkaw ai kade lang ngu ai she rai na ma ai. Chyu rum kahpu kanau kana ni kade lang myit daw ga shaga kau na she rai ma hka! Dum nta e shimlum lam n nga mat ai, dinghku sut ring jat lu ai lam n nga ai, mare kahtawng hta mung shimlum lam n nga mat ai. Kade daram yawn hpa she rai a hka! Nanghpam a mayam tai mat ai masha ni a gam maka anhte yawng chye ga ai. Shanhte hpe yawng e yu matsat kau na ma ai.

Nanghpam a mayam tai ai ni sha n rai; kaga baw n kaja ai lailen hte hten byak nga ai masha ni hpe hkam sharang ya na mung n loi la ai. Shinggyim masha shăda hkamjan n lu, sharin ya n lu, mara dat ya n lu, re ai mabyin ni hta Karai a n htum n wai tsawra matsan dum myit hpe dum mai ga ai. Mungmasa sut-masa hkrat sum taw nga ai ladaw, ruyak jamjau ai lam lăja lăna hkam sha nga ai aten hta n shawp n hkap ai, matse lăbye hkrit hpa matsat hpa ni a lăpran e asak hkrung nga ga yang, Karai a n htum n wai tsawra matsan dum myit hpe myit dum nna hkamjan lu na chyeju hpyi la mai ga ai.

Sainai (Sinna) Bum lagaw e Karai hte ga-shaka jaw hkat ngut ai n na yang, Karai a amyu masha gaw hpăra shăje hpe nawku jawjau ma ai. Karai a pawt sindawng ai hte shanhte hpe arip kau na maw tim, Karai Kasang măhtang myit malai nna shut hpyit ai masha ni hpe hkyamsa jaw ai, mau hpa n rai a hka! Nhtang hku myit malai lu ai, ngu ai gaw mau hpa nan n rai a hka! Tinang hpe shut ai ni a ntsa, kanawn n kam ai wa a ntsa gade myit galu hkam sharang ya lu ga ta?

Moshe gaw Karai Kasang hte ni htep hku-hkau ai majaw, pawt sindawng ai Karai Kasang kaw pyi sit sa hpyi nem gwi ai. Amyu masha yawng a matu tawngban hpyi htinglu ya lu ai. Karai Kasang hte ni htep hku-hkau ai lam kade daram ahkyak ai, ndai lam hpe sharin la lu ga ai. Karai Kasang hte ni htep hku-hkau lu na matu, shani shagu akyu hpyi ai hte Karai a ra sharawng ai lam hpe hkan shatup lu na shakut ra ai n rai a hka! Shut hpyit lam dam ai ni myit malai shajang na lam man man akyu
 
hpyi htinglu ya ai gaw tsawra matsam dum ai amu kaba rai nga ai.
Myit malai lu ai marai langai a majaw, sumsing mungdan na masha ja ja kabu ma ai, nga ai; anhte akyu hpyi shaja ai a marang e, myit malai lu shajang ai masha marai kade re ai hpe anhte n chye ga ai. Karai Kasang chye ai.

Sawlu hpe madun dan ai Karai a tsawra matsan dum lăma gaw yawng hpe sakse tai ya ai, nga ai. Shi daram Yesu a sape ni hpe mara tam, hkan rim, htawng sharawng rai zingri zingrat ai wa hpe pyi Karai Kasang matsan dum lama madun ai, nga ai. San Stephen nlung hte kabai sat hkrum na, si maw ai aten hta akyu hpyi da ya ai majaw n rai a hka! Shut hpyit lam dam ai ni, mara hta lup taw nga ai ni myit malai lu na lam akyu hpyi htinglu ya ai a marang e mai kaja wa lu ai masha marai kade re anhte n chye ga ai; Karai Kasang chye ai. Tinang chye ai masha ni, n chye ai masha ni a matu, matut matut nna akyu hpyit htinglu ya mai ga ai.

2022: PRAN WAN LADAW LABAN (24) NA CHYUM LAIKA

PRANWAN LADAW HTA LABAN 24
September 11, 2022
CHYUM MUNGGA DAW 1

PRU MAT WA AI 32:7-11, 13-14

Ya hti na gaw, Pru Mat Wa ai laika hta na rai nga ai.
Madu gaw Mawshe hpe tsun ai gaw: Nang yu wa sit; Egutu mung de na nang shaw wa ai, na a masha ni gaw htak masai. Ngai hkang da ai lam hta na shanhte alawan dam mat masai; dumsu sumla jaw nhtawm shanhte gaw, Israela e, hpara ndai gaw Egutu mung de nna nang hpe shaw wa ai na a hpara rai nga ai, nga nna tsun let, dai sumla a man e nawku nna, hkungga nawng nga masai, ngu nna Madu tsun wu ai. Dai hta kaga, Madu gaw Mawshe hpe, Ndai amyu gaw gade wa myit ja ai hpe ngai ya e chye se ai. Dai rai nna, nang ngai kaw nna pru mat wa sanu; nye a pawt sindawng ai kahtet nga nna, ngai shanhte hpe atsai awai di kau na nngai; nang hpe chyu sha amyu kaba shatai na de ai, ngu nna tsun wu ai. Mawshe chyawm gaw dai Madu shi a Karai Kasang hpe, Madu e, atsam kaba hte n-gun rawng ai lata hte Egutu mung na nang shaw wa ai, Na a amyu hpe hpa rai pawt bu nga nta? Na a ali ama ni Abraham, Isak hte Yaku hpe myit dum nga u.
Nang shanhte hpe tsun ndai hte maren, Nanhte a amyu matu hpe sumsing lamu na shagan ni zawn ngai shalaw na made ai; ngai ndat da ai mungdan ting, nanhte a amyu matu ni hpe ngai jaw nna, dai hpe prat dingsa shanhte madu nga lu na mara ai nga nna, nang hkum dai hta dagam let, shanhte hpe ga ndat da nit dai, ngu nna Mawshe hpyi nem wu ai. Madu mung Shi a amyu hpe ari jaw na lam tawn da ai myit dawm la kau wu ai.
Karai Kasang a Mungga rai nga ai.

CHYUM MUNGGA DAW 2

1 TIMOHTI 1:12-17

Ya hti na gaw, Timohti hpang de San Pawlu shagun dat ai laika langai hta na rai nga ai.
Ngai hpe n-gun shaja ai anhte a Madu Hkristu Yesu hpe chyeju dum shakawn nngai. Ngai shawng e Shi hpe shatan nhkan ai, zingri zingrat ai hte, asawng asang di kau ti mung, Shi ngai hpe kangka re ai wa nawn nna, Shi a amu magam gun hpai na ngai hpe shaga la ni ai majaw, Shi hpe chyeju dum shakawn nngai. Kam sham ai chyeju hpe ngai garai n lu yang, n chye n chyang ai hte dai hpe galaw ni ai majaw, matsan dum la ai hkrum nngai. Anhte a Madu a chyeju ngai hpe laklai ai hku jaw da nna, Hkristu Yesu hta e anhte lu la ai, makam masham hte tsaw ra ai chyeju, ngai hta e law wa sai.
Shut hpyit ai ni hpe hkye hkrang la na matu, Hkristu Yesu mungkan ga de du sa ai, nga ai ga gaw, kam ging ai ga rai nga nna, nanhte yawng myit jung ai hte dai hpe hkam la na ra ai. Dai shut hpyit ai ni hta na ngai mahtang kaba htum ai wa rai nga nngai. Rai ti mung, htani htana asak lu la hkra, hpang de Hkristu Yesu hpe kam sham ai ni gaw, Madu a matsan dum ai myit gade wa galu kaba nga ai hpe shanhte chye lu na matu, ngai hkum nan hpe dai matsan dum la ai chyeju madun dan ni ai. Ya, htani htana e nga nga nna, n hten n mat chye ai myi e n mu lu ai Hkawhkam ngu ai, Karai Kasang langai sha kaw, arawng sadang hte hpung shingkang, htani htana prat dingsa e anga nga u ga law. Amen.
Karai Kasang a Mungga rai nga ai.

KABU GARA SHIGA

LUKA 15:1-32

Ya hti na gaw, Luka a laika hta na Kabu Gara Shiga rai nga ai.
Kang hta ai ni hte mara kap ai ni nlang hte gaw, shi a ga madat la na matu Yesu hpang de sa ma ai. Dai rai nna, Hparishe ni hte tara sara ni gaw, Ndai wa gaw mara kap ai ni hpe hkap la nna, shanhte hte rau lu sha nga ai, nga nna aput apai tsun ma ai. Shaloi dai ni hpe ndai ga shadawn Yesu tsun mu ai gaw: Nanhte hta sagu latsa lu nna langai mi mat yang, dai jahku shi jahku hpe nam e tawn da nhtam, mat ai sagu hpe mu la hkra n hkan tam ai, kadai wa nga na rai ta? Dai hpe mu la jang mung, kabu gara ai myit hte kahpa hta mara hpai nna, nta de du wa jang, jinghku jingyu ni hte htingbu htingbyen ni hpe shaga nna, Ngai hte rau kabu gara nga ga; nye a mat ai sagu hpe ngai bai mu la se ai, nga nna tsun na ra ai.
Ngai nanhte hpe tsun made ga: Dai hte maren, myit n malai ra ai ding hpring ai masha jahku shi jahku a majaw kabu gara ai hte, myit malai lu da ai, mara kap ai masha langai mi a majaw, sumsing lamu hta e grau nna kabu rai na ra ai. Bai lam mi gaw, Numsha langai ngai gaw gumhpraw lap shi lu ai hta na, lap mi mat yang, pyengding shatu nhtawm, nta ting ye kau nna, dai lap mi hpe mu la hkra, azin ayang hkan sawk yu ai, n rai ni? Dai hpe mu la jang mung, Shi a jinghku jingyu ni hte htingbu htingbyen ni hpe shaga nna, Ngai hte rau kabu gara nga ga; mat ai gumhpraw hpe ngai bai mu la se ai, nga na ra ai. Ngai nanhte hpe tsun made ga: Dai hte maren, mara kap ai masha langai mi myit malai lu ai majaw, Karai Kasang a lamu kasa ni a man e kabu gara shara rai nga ai, ngu mu ai.

(Luka 15: 11-32 du hkra tsun matut lu ai.)
Bai Yesu gaw, Masha langai mi shadang sha lahkawng lu ai. Dai yan hta kasha kaji mahtang gaw kawa hpe, Wa e, ngai la ang ai sali wunli ngai hpe karan ya e, ngu nna hpyi yang, kawa mung shan hpe sali wunli karan ya wu ai. Dai hpang nhtoi gade ya n na yang, kasha kaji gaw arai mahkra shinggyin la nhtawm, tsan ai mung de sa wa nna, dai shara e pyaw daw kadaw hkawm nga ai hte, shi a sut rai ginlut shamat kau wu ai. Shing rai lu malu shamat kau ma jang, dai mung e hku wa kaba hku wa ai rai nna, shi matsan chyaren hkrum magang nga ai. Shaloi dai mung na masha langai mi kaw shi sa shingbyi nga ai; dai wa mung shi a prang ga de, shi hpe wa rem shangun dat wu ai.
Shaloi shi gaw, wa ni sha ai shapre kawp hte pyi, shi a kan jahkru mayu ti mung, kadai mung n jaw sha mu ai. Shing rai shi myit dum yang, Nye Wa a shabrai sha ai ni gade wa n taw n tsang muk sha lu na ma hka! ngai wa gaw ndai yang e kawsi kyet ai hte hten bya magang wa nga nngai. Ngai rawt nna nye wa kaw wa nhtawm, Wa e, sumsing lamu a man e mung, na a man e mung, ngai n ging n dan nngai: na a shabrai sha ai masha langai mi zawn ngai hpe tawn da e law, ngu na we ai, nga nna myit lu ai. Shing ria shi rawt wa nna, kawa kaw du wa ai. Shi tsan tsan naw rai nga yang, kawa gaw shi hpe hkap mu ai hte, matsan yu dum nna, gat sa nhtawm, kasha a du hta noi ginshum let shi hpe a pup wu ai. Shaloi kasha gaw, Wa e, sumsing lamu a man e mung, na a man e mung, ngai shut ni ai: ya kaw nna na nsha ngu na ngai n ging n dan nngai; na a shabrai sha ai masha langai mi zawn ngai hpe tawn da ya e, ngu nna kawa hpe tsun nem wu ai. Kawa chyawm gaw shi a mayam ni hpe, Reng htum ai hpun palawng alawan la sa nna, shi hpe jahpun ya maru; shi a lata hta lachyawp chyawp ya maru; lagaw hta kyepdin din ya maru; kawn tawn ai dumsu kasha mung la sat mu; shing rai anhte kabu gara ai hte lu sha nga ga: hpa majaw nga yang, ndai ngai sha gaw si mat sai, ya bai hkrung sali ai; mat mat sai mung, ya bai mu la se ai, ngu mu ai. Shing rai shanhte pyaw pyaw rai nga ma ai. Kasha kaba wa chyawm gaw yi e nga nga ai; dai de na bai wa nna nta du magang yang, chying bau dum ai hte ka manawt ai nsen na wu ai; dai rai nna ma langai mi shaga la nhtawm, dai kaning re ai rai nga ai, san yu wu ai.
Dai ma gaw, Na nnau bai wa ra ai rai nna, nwa mung shi hpe a hkam a kaja sha hkap la lu ai majaw, kawn tawn ai dumsu kasha sat nu ai, ngu nna shi hpe tsun dan wu ai. Dai hpe na jang, shi masin pawt nna, nhku de n shang wa hkraw ai. Shaloi shi a kawa pru sa nna, shi hpe sa nem wu ai. Dai kasha chyawm gaw, Yu u, nde nlaw ning tup na a nchyang amu ngai galaw nna, nang tawn da ai hku ngai galoimung n lai nngai: rai ti mung, nye a jinghku ni hte pyaw pyaw rai nga na, nang kalang mi bainam kasha langai mi pyi, ngai hpe n jaw yu ndai: shawa num ni hte kanawn nna, na a sut rai ginlut shamat kau ai; ndai na nsha wa bai wa jang chyawm gaw, kawn tawn ai dumsu kasha shi a matu nang sat nit hka, ngu nna shi a kawa hpe htan wu ai. Kawa gaw, Ngai sha e, nang gaw ngai hte rau tut nawng a nga nga ndai; nye a sut rai nga manga gaw, na a hkrai rai nga ai. Rai ti mung, pyaw pyaw rai kabu gara mai nga ai; hpa majaw nga yang, ndai na nnau gaw si mat sai, ya bai hkrung ra ai; mat mat sai mung, ya bai mu la saga ai, ngu nna shi hpe nem wu ai.
Madu a Kabu Gara Shiga rai nga ai.

2022: PRAN WAN LADAW LABAN (23) NA MUNGGA

“Tingang lu mi lu hpe n tat kau, asum n hkam ai wa kadai rai tim, ngai a sape n tai lu ai. Tinang a wudang n hpai ai sha nye hpang hkang nang ai wa kadai rai tim, ngai a sape n tai lu ai”, nga, Madu tsun ai. Karai a mungga, tinang hpe Karai e byin shăngun mayu ai lam chye na hkap la na yak ai; Karai a jahtoi ya ai chyeju n lawm yang hkap la na yak ai. Philemon gaw shi kaw na hprawng yen mat ai mayam wa hpe bai hkap la na lam; Philemon shi a myit hpe nyet kau asum jaw nna dai mayam hpe kanau zawn yin la na lam, San Pawlu gaw lauban Philemon hpe lajin ai. Shing rai byin lu na matu teng sha, Karai a chyeju atsam ra ai. Tinang a myit shădang ai alai hpe nyet kau ra ai. Matsaw lahta tsang na lam hpe kadai tam mu sa hka (!), nga nna, Hpaji Byeng-ya Laika hta ga-san san da ai.

Wudang a lam rai n tsun shi yang, Yesu a sape tai mayu ai wa gaw kanu kawa, kahpu kanau ni hpe shawng n ju n dawng ra ai, nga ai. Tinang a nta masha ni, jinghku ni hte tinang tsawra dik ai masha ni hpe tsawra ai hta, Yesu hpe grau tsawra ra ai lam tsun ai. N ju n dawng di ra ai, ngu ai ga, Yuda masha ni a tsun shaga ai alai she re; kăga masha yawng hta Yesu hpe grau tsawra ra ai lam tsun ai re. Tinang kade tsawra hku hkau ai masha rai tim, tinang Yesu hte hku hkau lam hpe dut-dang shangun ai rai yang, kau da gui ra ai, ngu ai lachyum re. Wudang gaw tinang myit ra ai hte tai shai ai, ruyak ai, jamjau ai, ngu ai lam hpe tsun ai. Tinang a myit shadang ai lam hpe nyet kau ra ai hpe tsun ai.

Yesu a hpang hkan nang ai ni law law nga ma ai. Yesu galaw dan ai lamik kumla ni a majaw mung; Shi sharin shaga ai lam ni gaw kaga jau/hkinjawng, jaiwa, hparishe ni hkaw tsun sharin shaga ai hte n bung ai majaw mung; kam ging ai wa re ai, ngu, hkap la ai majaw mung; kaga akyu amyat ni hkam la lu na myit ai majaw mung, Yesu kaw hkan nang shajang ma ai. Rai tim, pyaw hpa tam ai ni, ja sutgan arawng aya lu na myit ai ni, shakawn shagrau hkrum na myit mada ai ni,…. Yesu kaw hkan nang ai rai yang, teng sha myit daw na ma ai. Yesu a hkrun lam nan wudang hkrun lam she rai nga ai; jahtum e wudang ntsa jen sat kau hkrum ai kaw dinghta asak ngut kre mat ai. Yesu tsun sharin shaga ai lam ni hpe tup hkra n chye na la ai sape ni hta na Yuda Iskariut gaw Yesu hpe dut sha kau ai. Kaga sape marai 10 gaw hprawng makoi mat ma ai. Yawhan chyu sha wudang nhpang e tsap dan lu ai.

Yesu a sape tai mayu ai rai yang manu shabrai jaw ra ai: dai gaw, tinang a wudang hpai let Yesu kaw hkan nang ai lam re. Ga-shadawn hku nna nta htingchying gawgap mayu ai masha gaw gumhpraw law na n law na sawn yu ra ai lam; hpyen gasat na rai yang tinang maga na hpyen ninggun kade nga ai hpe sawn shen yu ra ai lam mung tsun ai. Yesu a sape tai lu na matu tinang maga kade machyi hkam ra ai, asum hkam ra ai lam ni hpe sawn shen yu ngut ai htawm dawdan ra ai.

Masha shăgu a gawng kya ai lam gaw, tinang a man e myi hte mu lu, myit hte sawn maram lu ai daram na akyu amyat ni hpe sha hkap la lu ai lam re. Kadun ai hku tsun ga nga yang, ndai dinghta prat na akyu amyat hpe sha mu mada ga ai. Dinghta prat hpe tawt lai nna hkam la lu na akyu amyat hpe gaw wenyi mahkrun hku sha mu lu na ga ai. Dai hta, Karai e jahtoi ya ai chyeju ra kadawn ga ai. Karai a myit maw ai lam hte yawsing ai lam, sumsing sutgan hte seng ai lam hpe kadai wa tam mu sa ta, nga nna Hpaji Byeng-ya Laika hta ga-san san da ai.

Mungkan htung lailen, dinghta myit masa hkan ai rai yang, Philemon gaw shi kaw na hprawng mat ai mayam wa hpe bai woi la lu jang, shi hpe ari dam kaba jaw na rai nga ai; shing n rai galaw dut kau na rai nga ai. Rai tim, San Pawlu gaw Philemon myit galai shai ra ai lam tsun ai. “Na a mayam wa hku n rai, Hkristu hta e na a kanau majing zawn shi hpe bai hkap la na lam, Pawlu lajin ai. Shing rai lu na matu, Philemon gaw shi a myit shadang nna dawdan ai lam n galaw na, shi a pawt sindawng ai lam hpe shăzim kau ra na, makam masham hta Du amyu, Hkawhkam amyu, daroi darat amyu, ngu, madang ginhka amyu ginhka ai masa n nga ai, ngu ai hpe hkap la ra na rai nga ai.

Teng sha, Hkristu shi hkum nan hpe yawng mayawng hta, tinang hpe tinang tsawra ai hta grau tsawra hku hkau lu ai rai yang, anhte n galaw lu ai amu, n byin mai ai amu, n sawn shadawn lu ai akyu ara ni hpe hkam la lu na n rai a hka? Myi hte mu lu ai dinghta ga na akyu ara hpe sha shărawng grau chye ga ai: ja rawng ai sun/ hkau-na hpe dut sha kau ai hte bung ai. Dut nna lu ai gumhpraw gaw n grin lu ai; sun/ hkau-na ntsa e hkai sha nga na rai yang prat sănat nsi naisi shapraw ya lu ai hpe myit yu mai ga ai. Myi hte n hkawn hkrang lu ai sumsing mungdan hte de a akyu ara hpe chye na hkap la lu na matu, wudang hkrun lam hpe hkap la lu na matu, teng sha, matsaw lahta tang na wenyi a atsam chyeju, Karai a chyeju hkam la ra ai lam, Hpaji Byeng- ya Laika e shadum ya ai.

2022: PRAN WAN LADAW LABAN (23) NA CHYUM LAIKA

PRANWAN LADAW HTA LABAN 23
September 4, 2022
CHYUM MUNGGA DAW 1

HPAJI BYENG-YA 9:13-18

Ya hti na gaw, Hpaji Byeng-ya laika hta na rai nga ai.
Karai Kasang myit maw ai lam hpe kadai wa chye chyang lu na rai ta? Madu myit ra ai hku kadai wa gawn lu na rai ta? Shinggyim masha ni myit mang ai lam galoimung teng man nga ai n rai; anhte myit maw ai gaw kangka nga ai n rai. Kaning rai nme law, htum mat chye ai hkum hkrang gaw nsa wenyi hpe dip kamyet nna, ga hkumpup hte galaw ai ndai ginsum gaw, sumru yu ai myit masin ntsa de li ai lit hpe shagun da nga ai. Dinghta ga na hpaji hparat hpe chye lu na yak la ai. Anhte dep lu ai hpaji ningli gawn yu na, ru yak ai amu rai nga mali ai.
Dai rai jang, sumsing lamu na hpaji byeng-ya hpe kadai wa gawn lu na i? Nang Madu hpaji byeng-ya n jaw, na a Chyoi Pra ai Wenyi hpe matsaw ntsang de nang n shangun dat yang gaw, Nang myit mang ai hpe kadai wa chye lu na a ta? Shing rai, Na a Hpaji Hparat a marang e, dinghta ga na ni hkawm sa wa ai lam hpe Nang shading malang ya nit dai; shinggyim masha ni hpe Nang myit ra ai hku sharin achyin ya nna, shanhte hpe hkye hkrang la nit dai.
Karai Kasang a Mungga rai nga ai.

CHYUM MUNGGA DAW 2

HPILEMON 1:9-10, 12-17

Ya hti na gaw, Hpilemon hpang de San Pawlu shagun dat ai laika hta na rai nga ai.
Ngai Pawlu dingla wa gaw, Hkristu Yesu a majaw bawng dung nga yang, nang hpang de laika ka dat nngai. Ngai hpri sumri hte gyit hkang hkrum ai shaloi e, ngai shangai la ai, ngai sha Onesimu a matu nang hpe hpyi nem dat nngai.
Shi hkum nan hpe nang hpang de bai wa shangun dat nngai; shi hte rau nye a tsaw ra ai myit mung nang hpang de lawm nga ai. Dai Kabu Gara Shiga a majaw ngai bawng dung ai shaloi, Onesimu gaw na a malai hku ngai hpe galaw jaw na, ngai shi hpe woi nga mayu nngai. Rai ti mung, nang ngai hpe chyeju madun ai gaw, ngai shagwi ai majaw n rai, na a mai kaja ai myit hte rai wa u ga, nang ra ai hku n chye yang gaw, ngai hpa mung n galaw mayu sai. Shi nang hte tawng marang mi hka mat ai gaw, hpang de mayam wa zawn n rai, tsaw ra ai hpu nau wa zawn shi tut nawng e nang hte rau nga nga lu na matu rai nga ai.
Shi gaw ngai a tsaw ra ai hpu nau wa hta n ga, masha hku rai tim, Madu a lam hku rai tim, nang grau nna tsaw ra mai ai, hpu nau wa majing rai nga ai. Dai re ai majaw, nang ngai hte rau makam masham chyeju jawm pawng ai hpe, manu shadan ai rai yang, ngai hpe zawn shi hpe hkap hkalum la u.
Karai Kasang a Mungga rai nga ai.

KABU GARA SHIGA

LUKA 14:25-33

Ya hti na gaw, Luka a Laika hta na Kabu Gara Shiga rai nga ai.
Lang mi na shawa hpung kaba Yesu hte rau sa wa nga ai rai nna, dai ni hpe kayin yu let Shi tsun ai gaw: Ngai kaw sa du ai wa kadai mung, tinang a kanu kawa, madu jan kasha ni hte, kahpu kanau kajan ni hpe mung, dai hta n-ga tinang a asak hpe mung, n dawng n yawt ai n rai yang gaw, dai wa gaw nye a sape n tai lu ai. Kadai mung tinang a udang hpai let nye hpang n hkan ai wa gaw, nye a sape n tai lu ai.
Kaning rai nme law, nanhte hta na masha langai mi, ngang kang ai nlung nta galaw mayu yang, dai ngut hkra shi lu ai gumhpraw law na n law na, hkrat ang ai jahpu hpe, dung nna shawng n sawn yu na masha nga a ni? Shing n rai yang, npawt nhpang jung ngut nhtawm, ngut hkra n galaw lu yang gaw, Ndai wa gaw npawt gaw hpang nhtawm, ngut hkra n galaw lu nu ai, nga nna mu ai ni yawng shi hpe jawm asawng kau na mara ai.
Lam mi gaw, hkawhkam langai mi kaga hkawhkam hpe gasat na maw yang, masha mun lahkawng hte sa ai wa hpe, mun mi hte hkap dang kau lu na, n dang kau lu na, dung nna shawng n bawng yu ai, nga na a ni? Shi n dang lu yang, dai kaga hkawhkam wa tsan tsan e naw rai nga yang, kasa shangun dat nna, htinglu htinglai na lam hpyi nem na ra ai. Dai hte maren, nanhte hta tinang a arai nga manga hpe n kau da ai wa gaw nye a sape n tai lu ai.
Madu a Kabu Gara Shiga rai nga ai.

2022: PRAN WAN LADAW LABAN (22) NA MUNGGA

“Tinang hkum hpe tinang shăgrau shakawn ai wa kadai rai tim, shăgrit kau ai hkrum na ra ai; shăgrit shănyem ai wa chyawm gaw shagrau shagrawt ai hkrum na ra ai” (Lk). Sirak Laika hta tsun da ai gaw, “Myit tsaw myit dap ai wa a yawn madai ai ana hpe hpa e mung shamai ya lu na n rai; n kaja ai ru lămyi gaw shi hta jung nan taw ai, nga ai. Tinang hkum hpe shagrit shanyem lu ai wa gaw Karai a man e myi-man pa nna, shi a kundawn hkungga hpe mung sharawng awng ya na ra ai, nga ai.

Shagrit shanyem ai ningli gaw matsan masha, hpaji madang n nga ai ni matu sha n re ai; madang n ginhka, yawng gaw hkaja shăman shăkyang ai a marang e, sumnung shingdi ai myit rawng lu nna masha law law hpe akyu jaw ai zawn, masha law law kaw na akyu mung hkam la lu na rai nga ai.

Kalang mi na aten hta myit ana hte seng ai masha, myit Sarawun (Psychiatrist) kaw sa hkrum ai. Shi gaw arawng aya lu ai masha, ja gumhpraw mung n taw n tsang lu lang ai. Hkumhkrang hkam kaja ai lam mung lu ai. Rai tim, kaga masha ni hte kanawn mazum ai lam hta mung, madu jan hte kasha ni hte mung kanawn mazum n pyaw ai. Kanawn mazum lam hte seng nna manghkang law wa ai hpe dum ai majaw, tsi sara kaw du ai re. Tsi sara gaw shi a myit jasat hpe jep yu ai. Dinghku masha ni kaw na hkawt, kaga masha ni mung shi hpe hkung ga tsawra myit n madun ai, ngu, hkam sha lam hpe byin shangun lu ai mabyin ni san jep ai. Hpa mi san san, shi a maga jaw ai, dingman ai, kangka ai, kaja ai,.. ngu nna hkrai htan ya ai. Shi a maga hpa ra rawng ai lam n nga ai zawn hkrai htan ya ai da. Tawng marang mi hkrum hkat ai hpang, jahtum e tsi sara gaw shi hpe tsun ai, “Ngai nang hpe tsi shamai lu ai matsun n jaw lu sai; mai tsai mayu jang shagrit shanyem ai ningli hpe hkaja su” ngu matsun dat ai da.

Masha langai gaw ja gumhpraw, arawng aya lu ai majaw awng dang ai prat hpe lu la sai, ngu, n tsun lu ai. Ja gumhpraw arawng aya mi lu tim, kaga masha ni a kamhpa tsawra hkung ga ai myit ni hpe n lu la ai, hku hkau kanawn manang taw ai rai yang, gara hku mung kuptsup na n rai nga ai.

Kalang mi na aten hta Dominican mungdan na mabyin, nnang nawn kaba a majaw mare langai hten bya mat ai; hkye mawoi hpung gaw la kasha langai hpe mu hkrup ma ai. Kanu kawa hte kaga nta masha kadai hte mung jahkrup n byin ai, jahtum e jahkrai nta ginra de sa kau ma ai. America kaw na lauban langai mi sa mu matsan dum nna woi mat wa ai. Ma dai kaba wa yang chye chyang kunghpan wa nna lu su nga pyaw nu ai. Rai tim kanu kawa majing kadai ta? Gaw naw hkrung nga ma ai kun, ngu, myit lu ai majaw myit dik ai lam n nga ai. Kalang mi na aten hta shi hkungran maw ai numsha hte rau buga mungdan, Dominican de sa kawan ai. Mare găang lam kau e hpyi sha ai mawhpyi dingla langai hpe n myit mada ai mu hkrup nu ai: shi a du e gali da ai lakhpoi magri chyen gaw shi lu da ai magri lakhpoi a achyen rai taw ai hpe mu mau nu ai. Dingla dai hte loi mi jahta yu ai shaloi, kawa re ai lam hkrak chye la nu ai. Rai tim, sumtsaw a man e kaya ai majaw, shagrit shanyem n lu ai majaw, Dolla ahkyep loi jaw da nna America de bai htang wa ai.

Kawa hpe sa tam woi la na matu Domican de shi hkrai bai htang sa mat ai. Dingla wa hpyi sha sha di ai lam ding-yang, kaga masha ni, kaga mawhpyi ni hpe san sagawn yu ai shaloi, kade mi n na yang mawdaw langai adawt hkrup nna si mat sai lam hkap tsun dan ma ai da. N htum nni yawn hkyen kaba hkrum nu ai. Kawa majing hpe mawhpyi prat kaw na shalawt dat mayu ai n mai byin sai. Kawa hte hkrum yang kanu hte kahpu kanau ni a lam sagawn la lu na myit ai. Yawn myiprwi si hte America de bai htang wa mat nu ai. Kalang sha lu la shawng na mahkrum madup hta, shi a gumrawng gumtawng ai myit, sumtsaw a man e kaya ai myit, grau nna shagrit shanyem ai myit n rawng ai majaw, myit malai hpang hkrat nu ai. Tinang a ma prat na labau hpe nyet kau ai majaw, shagrit shanyem ai myit n madun lu ai majaw, sumtsaw a man kawa hpe nyet kau ai. Jahtum e n htum nni myit machyi na ai lam hpe hkam sha ra nu ai.

Kaja wa gaw shagrit shanyem lu ai masha hpe kadai hpa n di lu ai; shagrit shanyem ai wa hpe yu kaji jahpoi ai ni mahtang măna n htang tai ai. Shagrit shanyem lu ai gaw atsam kaba re; san seng ai myit hte shagrit shanyem lu ai wa gaw shi hta hpa n machyi dum ai. Lu lawm awng dang ai rai tim gumrawng gumtawng ai wa hpe shawa e yu matsat ai lam gaw adan sha rai nga ai. Shani shagu na mahkrum madup hta n shagrit shanyem lu ai majaw tinang hta machyi nan ai, matai dawp mayu ai, mara shagun n ma rai nna myit machyi, aju machyi ai lam hpe tinang hkum nan she shalaw shagrin ai hpe mu lu na ga ai.

Anhte hpa mi lu lu, kaning re ai awng dang ai lam mi lu lu, Karai hta n dun n noi ai rai yang, gumrawng gumtawng myit a majaw htenbya hkrum na ga ai. Si wa lu ai amyu re ai hpe dum mai ga ai. Lam shagu hta grit nyem ai myit hte Karai hpe chyeju dum ra ga ai. “Shagrit shanyem lu ai wa gaw Karai a man e myi-man pa lu ai” nga, Sirak hpaji jaw da ai. Madu Yesu mung, “Shagrit shanyem lu ai wa gaw shagrau sharawt hkrum na” nga ai.

 Tinang hkum hpe tinang gaw gumrawng gumtawng ai wa n re ai hku mu shajang ai. Dai gaw hpa hpa a majaw wa rai kun?
 Kaga masha ni tinang hpe jahpoi asawng, mara shagun wa ai aten hta tinang kaning re ai myit masa hku hkap la ai kun? Malawng maga gara hku tai htang chye ai kun?
 N kam hkam ai, pawt ja ai, matai dawp ai, myit machyi nan taw ai, n kam shaga n kam kanawn sai, ngu ai kumla ni gaw kaning re ai myit jasat rai ta?

2022: PRAN WAN LADAW LABAN (22) NA CHYUM LAIKA

PRANWAN LADAW HTA LABAN 22
August 28, 2022
CHYUM MUNGGA DAW 1

SIRAK 3:19-21, 30-31

Ya hti na gaw, Sirak a laika hta na rai nga ai.
Ngai sha e, nang hte seng ang ai amu mahkra hpe, sumnung shingdi la ai hte hkan galaw nga u; shaloi kumhpaw kumhpa grai jaw ai wa hta, nang grau nna tsaw ra hkam la na ndai. Nang grau nna galu kaba wa jang, grau nna myit shagrit shanem nga u; shaloi Madu a man e sharawng awng ai lu la na rin dai. Kaning rai nme law, Madu a atsam galu kaba htum rai nga ti mung, myit grit nem ai ni hpe Shi hkap la na ra ai. 
Gumrawng gumtawng ai wa a arawn alai hpe, kadai n shading ya lu ai; hpa majaw nga yang, n hkru n kaja ai myit shi hta e ru jung nga ai. Myit su ai wa mahtang gaw ga shagawp hpe ra sharawng ai hte myit aru yu nga ai. Sharin shaga ai mungga madat mara ai wa mung, hpaji rawng ai sara ni hpe kabu shangun nga ai. 
Karai Kasang a Mungga rai nga ai.

CHYUM MUNGGA DAW 2

HEBRE 12:18-19, 22-24

Ya hti na gaw, Hebre masha ni hpang de San Pawlu shagun dat ai laika hta na rai nga ai.
Nanhte kanang e du sai hpe myit dum nga mu: Achyang amang re ai, nsin chyip mak re ai hte, laru ru nga yang, Sina Bum na wan grung nga ai de nanhte du manit dai n rai. Pahtau ngoi ai hte, ga jahtau ai nsen ngoi pru ai shara de nanhte n du manit dai: dai nsen hpe na la ai ni gaw, Ga hkaw mi anhte hpe bai hkum tsun rit, ngu nna hpyi nem ma ai. 
Nanhte chyawm gaw, Ziun bum hte, ahkrung nga ai Karai Kasang a mare ngu ai, sumsing lamu na Yerusalem mare de du manit dai. Dai yang e, hti na dang lu ai lamu kasa unawng kaba gaw, sumsing lamu a mungdan masha ni hte, kasha alat ni a Hpung ting hte rau, kabu gara rai du zuphpawng nga ma ai. Nanhte gaw yawng mayawng a tara agyi wa Karai Kasang kaw du manit dai; jahkum shatsup hkrum sai Chyoi Pra ai ni a wenyi ni hte jawm pawng nga manit dai. Ga shaka nnan gaw da ai, htinglu htinglai wa Yesu kaw nan nanhte du manit dai.
Karai Kasang a Mungga rai nga ai.

KABU GARA SHIGA

LUKA 14:1, 7-14

Ya hti na gaw, Luka a laika hta na Kabu Gara Shiga rai nga ai.
Yesu gaw laban nhtoi langai mi hta, Hparishe agyi langai mi a nta e shat sha na matu, shang dung nga yang shanhte shi hpe azi yu nga ma ai. Shaga da sai ni gaw reng grau ai dung shara ni lata la ai hpe Yesu mu jang, Shi shanhte hpe ga shadawn hku tsun mu ai gaw: Masha langai ngai nang hpe num hkurungran poi de shaga yang, reng grau ai shara hta hkum dung et; nang hta arawng grau lu ai wa hpe mung shi shaga sai nhten. Shaloi, poi madu sa nna, Ndai wa hpe shara yen ya u, ngu nna nang hpe tsun jang, nang grai kaya ai hte yawng a jahtum ai de htawt dung lu na ndai. Dai rai nna, masha nang hpe shaga yang, jahtum ai de sa dung nga u; shaloi poi madu sa nna, Jinghku wa e, reng grau ai shara de sit dung nga u, ngu nna nang hpe tsun jang, rau dung lawm ai ni yawng a man e nang arawng lu na rin dai. 
Tinang hkum hpe shagrau ai wa kadai mung, shagrit shanem ai hkrum na ra ai; tinang hkum hpe shagrit ai wa chyawm gaw, shagrau ai hkrum na ra ai, ngu wu ai. Shi hpe shaga ai wa hpe mung Yesu tsun ai gaw: Jahpawt shat, shing n rai, shana shat nang galaw daw ai rai yang, na a jinghku jingyu ni, nhpu nnau ni, mayu dama ni hte sut lu ai htingbu ni hpe hkum shaga et. Hpa majaw nga yang, shanhte mung nang hpe bai shaga daw nna, chyeju htang lu na mara ai. Nang poi galaw daw yang gaw, matsan mayan ni, jahten labye ni, lagaw hten ai ni hte myi kyaw ai ni hpe shaga la u; shing rai jang gaw, nang a lu nga ndai: shanhte nang hpe chyeju htang lu na ma ai n rai. Dai re ai majaw, ding man ai ni bai hkrung rawt wa ai shaloi, de a akyu chyeju nang hkam la na rin dai.
Madu a Kabu Gara Shiga rai nga ai.

2022: PRAN WAN LADAW LABAN (21) NA MUNGGA

“Gyip ai numshang hku shang mu”, ngu ai ga gaw masha yawng hpe shădum ai ga re. Lu su ai_ matsan ai; tara lam chye chyang kunghpan ai_ tara n chye ai; hpaji chye ai_ n chye ai; Du Hkawhkam, Sărabyin Săradaw Jau ni_ dărat dăroi, shawa hpung masha ni,… kadai n nga ja ja shakut nna sha sumsing mungdan de shang ningngai lu na lam shadum ya ai. Ya, ngu ai aten hta chye dum, kunghpan dum, lu su dum, chyoi pra dum ai ni bandung du mahka hpang hkrat ngam nga na tsang-hpa nga ai zawn, htawm hpang prat hta mi grit grau ai ni mahtang reng grau ai shara de du taw ai ni mung byin mai ai lam,  tsun shadum ai. Ya, ngu ai aten hta gumrawng dum, rai dum ai myit n rawng mai ai, aten tup Karai a chyeju hpe kamhpa nna shakut shaja ra ai lam mung dum ra ga ai.

Prangtai hte taukawp kăgat shingjawng hkat ai maumwi yawng e chye na ma ai: langai hpra hpe Karai e jaw da ai atsam n bung ai. Grai chyang dum ai prangtai gaw gan yup hkring la ai, nga yang, lanyan ai taukawp bandung de shawng du mat ai. Hkrun lam gălu, prat a bandung, nga jang, prangtai hte taukawp shada garum hkat ai rai yang sha prat a bandung de arau du lu na rai nga ai. Prangtai gaw kagat chyang ai rai tim, hka rap ra jang taukawp hpe kam ra ai. Yawng gaw shada shamyet shanat, garum shingtau hkat na hpe Karai e ra lajang da ai.

Yerusalem de lung wa ai Yesu hpe marai langai mi ga-san san ai, “Hkye hkrang la hkrum ai masha loi mi sha rai na kun?” nga ai. Yesu htan tsun ai, “Na atsam marai tup hte gyip ai chyinghka hku shang lu na matu shakut u” nga ai. Yesu sharin shaga ai lam ni gaw kaga chyum laika sara ni hkaw tsun ai hte n bung ai; kalang lang gaw grau pyi tara ja ai zawn nga, kadai n hkan lu na zawn nga ai, na yak ai baw ga ni mung lawm ai. Ga-shadawn, hkungran num/la hka n mai ai lam; lagaw lata shut shăngun jang kahtam di kau u, nga; shut ai wa hpe 490 lang du hkra mara dat ya ra ai lam; matai hkum dawp mu, hpyen wa hpe tsawra mu; ntsa palawng gashun la ya jang kata palawng hpe mung raw jaw kau u; Shi kaw hkan nang mayu ai wa wudang hpai ra ai, ni htep ai sape tai mayu jang dum nta, sun hkau-na, dinghku masha hpe kau da ra ai, dz., dz.

“Tara ja dik ai, kadai wa hkan shatup lu na rai ta”, ngu, chye na la ai majaw ga-san san ai rai sam ai. San ging ai ga-san mung rai nga ai. Grau nna tara kunghpan ai hte dinghpring chyoi pra ai ni, ngu, shadu hkrum ai  Jau ni, Jaiwa ni, Hparishe ni hpe pyi Yesu gaw mana shachyoi kau ai, mara shagun ai, jeyang ga tsun ai; dai rai taw kadai wa mi hkye la hkrum sa na, ngu ai ga-san san na lam tai wa ai. 

Karai Kasang gaw masha a sung la ai kraw kata na myit mang ai lam hpe chye ya ai; Shi kaw na măkoi măgap da yip da lu ai hpa n nga ai. Anhte shada kadai wa kade dinghpring ai ngu she mu tim, Karai a man e n san seng ai ni kadai dai re, Karai sha chye ai. Tara chye ai wa gaw chye ai hku, n chye ai wa gaw n chye ai hku, jeyang hkrum na rai nga ai. Tara chye la jang hkan shatup ra na hpe hkrit ai majaw chye la hkaja la na n kam ai, lagawn ai wa mung, shing re ai myit magaw ai majaw, lagawn ai majaw, jeyang hkrum na rai nga ai. Hpaji n chye ai majaw, matsan ai majaw, tara matsun ni hpe law law n chye ai, hkan shatup na yak ai, n byin mai ai ni mung shanhte a madang hkan nna jeyang hkrum na rai nga ai. Yawng a matu bung ai lam gaw_ hkye hkrang la ai kaw du lu na matu tinang a machye machyang, tinang a madang, ninggun atsam, lu lawm lam, atsam marai tup hkra akyu jashawn nna gyip ai chyinghka hku shang lu na rai nga ai.  

Karai Kasang gaw Shi shawng e laksan hkringsan da ai Israel amyu sha ni hta lai nna mungkan ting na amyu masha yawng Yerusalem de sa du nawku na, Israel amyu sha ni hte maren, hkungga sa nawngjau na ra sharawng ai. Shing rai Karai Kasang hpe hkap la nawku dawjau ai ni hta na nkau mi hpe mung jau aya, nawngjau aya jaw na lam tsun da ai. Karai a mungdan gaw amyu masha yawng a matu rai nga ai. Sumsing mungdan hpe tinang amyu hkrai madu la mayu ai Israel amyu masha ni hpang hkrat ngam nga na lam hpe mung shaang nna shadum ai. 

Masha hkum shagu, shaman chyeju hkam la lu ai aten hta makam masham sari sadang hte nga lu ai rai tim, dinghpring ai hku nga lu ai rai tim, kadang wa kataw wa lu ai hpe myit dum mai ga ai. Gumrawng gumtawng ai myit n rawng ai sha, Karai a n htum n wai matsan dum myit, tsawra myit hpe kam hpa nna, atsam marai lu ai daram shakut shaja let hkye hkrang la ai chyeju hkam la ra ai lam, yawng hpe shadum ya ai.

  Sumsing mungdan de du ai lam mahkrun dumbret lam n nga ai, nga ai gaw hpa ngu ai rai ta?

  Gyip ai chyinghka, ngu ai, tinang baili baila ahtu agawng byin chye ai hpa hpa rai ta? Tinang tawt lai na yakhkak dum ai hpa hpa rai ta?

  Yesu a shadum ai ga a majaw tinang byin nga ai, nga-sa lailen hpe dinglik yu nna kaning re ai lam ni hta gawng kya ga a ta?