2022: PRAN WAN LADAW LABAN (22) NA MUNGGA

“Tinang hkum hpe tinang shăgrau shakawn ai wa kadai rai tim, shăgrit kau ai hkrum na ra ai; shăgrit shănyem ai wa chyawm gaw shagrau shagrawt ai hkrum na ra ai” (Lk). Sirak Laika hta tsun da ai gaw, “Myit tsaw myit dap ai wa a yawn madai ai ana hpe hpa e mung shamai ya lu na n rai; n kaja ai ru lămyi gaw shi hta jung nan taw ai, nga ai. Tinang hkum hpe shagrit shanyem lu ai wa gaw Karai a man e myi-man pa nna, shi a kundawn hkungga hpe mung sharawng awng ya na ra ai, nga ai.

Shagrit shanyem ai ningli gaw matsan masha, hpaji madang n nga ai ni matu sha n re ai; madang n ginhka, yawng gaw hkaja shăman shăkyang ai a marang e, sumnung shingdi ai myit rawng lu nna masha law law hpe akyu jaw ai zawn, masha law law kaw na akyu mung hkam la lu na rai nga ai.

Kalang mi na aten hta myit ana hte seng ai masha, myit Sarawun (Psychiatrist) kaw sa hkrum ai. Shi gaw arawng aya lu ai masha, ja gumhpraw mung n taw n tsang lu lang ai. Hkumhkrang hkam kaja ai lam mung lu ai. Rai tim, kaga masha ni hte kanawn mazum ai lam hta mung, madu jan hte kasha ni hte mung kanawn mazum n pyaw ai. Kanawn mazum lam hte seng nna manghkang law wa ai hpe dum ai majaw, tsi sara kaw du ai re. Tsi sara gaw shi a myit jasat hpe jep yu ai. Dinghku masha ni kaw na hkawt, kaga masha ni mung shi hpe hkung ga tsawra myit n madun ai, ngu, hkam sha lam hpe byin shangun lu ai mabyin ni san jep ai. Hpa mi san san, shi a maga jaw ai, dingman ai, kangka ai, kaja ai,.. ngu nna hkrai htan ya ai. Shi a maga hpa ra rawng ai lam n nga ai zawn hkrai htan ya ai da. Tawng marang mi hkrum hkat ai hpang, jahtum e tsi sara gaw shi hpe tsun ai, “Ngai nang hpe tsi shamai lu ai matsun n jaw lu sai; mai tsai mayu jang shagrit shanyem ai ningli hpe hkaja su” ngu matsun dat ai da.

Masha langai gaw ja gumhpraw, arawng aya lu ai majaw awng dang ai prat hpe lu la sai, ngu, n tsun lu ai. Ja gumhpraw arawng aya mi lu tim, kaga masha ni a kamhpa tsawra hkung ga ai myit ni hpe n lu la ai, hku hkau kanawn manang taw ai rai yang, gara hku mung kuptsup na n rai nga ai.

Kalang mi na aten hta Dominican mungdan na mabyin, nnang nawn kaba a majaw mare langai hten bya mat ai; hkye mawoi hpung gaw la kasha langai hpe mu hkrup ma ai. Kanu kawa hte kaga nta masha kadai hte mung jahkrup n byin ai, jahtum e jahkrai nta ginra de sa kau ma ai. America kaw na lauban langai mi sa mu matsan dum nna woi mat wa ai. Ma dai kaba wa yang chye chyang kunghpan wa nna lu su nga pyaw nu ai. Rai tim kanu kawa majing kadai ta? Gaw naw hkrung nga ma ai kun, ngu, myit lu ai majaw myit dik ai lam n nga ai. Kalang mi na aten hta shi hkungran maw ai numsha hte rau buga mungdan, Dominican de sa kawan ai. Mare găang lam kau e hpyi sha ai mawhpyi dingla langai hpe n myit mada ai mu hkrup nu ai: shi a du e gali da ai lakhpoi magri chyen gaw shi lu da ai magri lakhpoi a achyen rai taw ai hpe mu mau nu ai. Dingla dai hte loi mi jahta yu ai shaloi, kawa re ai lam hkrak chye la nu ai. Rai tim, sumtsaw a man e kaya ai majaw, shagrit shanyem n lu ai majaw, Dolla ahkyep loi jaw da nna America de bai htang wa ai.

Kawa hpe sa tam woi la na matu Domican de shi hkrai bai htang sa mat ai. Dingla wa hpyi sha sha di ai lam ding-yang, kaga masha ni, kaga mawhpyi ni hpe san sagawn yu ai shaloi, kade mi n na yang mawdaw langai adawt hkrup nna si mat sai lam hkap tsun dan ma ai da. N htum nni yawn hkyen kaba hkrum nu ai. Kawa majing hpe mawhpyi prat kaw na shalawt dat mayu ai n mai byin sai. Kawa hte hkrum yang kanu hte kahpu kanau ni a lam sagawn la lu na myit ai. Yawn myiprwi si hte America de bai htang wa mat nu ai. Kalang sha lu la shawng na mahkrum madup hta, shi a gumrawng gumtawng ai myit, sumtsaw a man e kaya ai myit, grau nna shagrit shanyem ai myit n rawng ai majaw, myit malai hpang hkrat nu ai. Tinang a ma prat na labau hpe nyet kau ai majaw, shagrit shanyem ai myit n madun lu ai majaw, sumtsaw a man kawa hpe nyet kau ai. Jahtum e n htum nni myit machyi na ai lam hpe hkam sha ra nu ai.

Kaja wa gaw shagrit shanyem lu ai masha hpe kadai hpa n di lu ai; shagrit shanyem ai wa hpe yu kaji jahpoi ai ni mahtang măna n htang tai ai. Shagrit shanyem lu ai gaw atsam kaba re; san seng ai myit hte shagrit shanyem lu ai wa gaw shi hta hpa n machyi dum ai. Lu lawm awng dang ai rai tim gumrawng gumtawng ai wa hpe shawa e yu matsat ai lam gaw adan sha rai nga ai. Shani shagu na mahkrum madup hta n shagrit shanyem lu ai majaw tinang hta machyi nan ai, matai dawp mayu ai, mara shagun n ma rai nna myit machyi, aju machyi ai lam hpe tinang hkum nan she shalaw shagrin ai hpe mu lu na ga ai.

Anhte hpa mi lu lu, kaning re ai awng dang ai lam mi lu lu, Karai hta n dun n noi ai rai yang, gumrawng gumtawng myit a majaw htenbya hkrum na ga ai. Si wa lu ai amyu re ai hpe dum mai ga ai. Lam shagu hta grit nyem ai myit hte Karai hpe chyeju dum ra ga ai. “Shagrit shanyem lu ai wa gaw Karai a man e myi-man pa lu ai” nga, Sirak hpaji jaw da ai. Madu Yesu mung, “Shagrit shanyem lu ai wa gaw shagrau sharawt hkrum na” nga ai.

 Tinang hkum hpe tinang gaw gumrawng gumtawng ai wa n re ai hku mu shajang ai. Dai gaw hpa hpa a majaw wa rai kun?
 Kaga masha ni tinang hpe jahpoi asawng, mara shagun wa ai aten hta tinang kaning re ai myit masa hku hkap la ai kun? Malawng maga gara hku tai htang chye ai kun?
 N kam hkam ai, pawt ja ai, matai dawp ai, myit machyi nan taw ai, n kam shaga n kam kanawn sai, ngu ai kumla ni gaw kaning re ai myit jasat rai ta?

2022: PRAN WAN LADAW LABAN (22) NA CHYUM LAIKA

PRANWAN LADAW HTA LABAN 22
August 28, 2022
CHYUM MUNGGA DAW 1

SIRAK 3:19-21, 30-31

Ya hti na gaw, Sirak a laika hta na rai nga ai.
Ngai sha e, nang hte seng ang ai amu mahkra hpe, sumnung shingdi la ai hte hkan galaw nga u; shaloi kumhpaw kumhpa grai jaw ai wa hta, nang grau nna tsaw ra hkam la na ndai. Nang grau nna galu kaba wa jang, grau nna myit shagrit shanem nga u; shaloi Madu a man e sharawng awng ai lu la na rin dai. Kaning rai nme law, Madu a atsam galu kaba htum rai nga ti mung, myit grit nem ai ni hpe Shi hkap la na ra ai. 
Gumrawng gumtawng ai wa a arawn alai hpe, kadai n shading ya lu ai; hpa majaw nga yang, n hkru n kaja ai myit shi hta e ru jung nga ai. Myit su ai wa mahtang gaw ga shagawp hpe ra sharawng ai hte myit aru yu nga ai. Sharin shaga ai mungga madat mara ai wa mung, hpaji rawng ai sara ni hpe kabu shangun nga ai. 
Karai Kasang a Mungga rai nga ai.

CHYUM MUNGGA DAW 2

HEBRE 12:18-19, 22-24

Ya hti na gaw, Hebre masha ni hpang de San Pawlu shagun dat ai laika hta na rai nga ai.
Nanhte kanang e du sai hpe myit dum nga mu: Achyang amang re ai, nsin chyip mak re ai hte, laru ru nga yang, Sina Bum na wan grung nga ai de nanhte du manit dai n rai. Pahtau ngoi ai hte, ga jahtau ai nsen ngoi pru ai shara de nanhte n du manit dai: dai nsen hpe na la ai ni gaw, Ga hkaw mi anhte hpe bai hkum tsun rit, ngu nna hpyi nem ma ai. 
Nanhte chyawm gaw, Ziun bum hte, ahkrung nga ai Karai Kasang a mare ngu ai, sumsing lamu na Yerusalem mare de du manit dai. Dai yang e, hti na dang lu ai lamu kasa unawng kaba gaw, sumsing lamu a mungdan masha ni hte, kasha alat ni a Hpung ting hte rau, kabu gara rai du zuphpawng nga ma ai. Nanhte gaw yawng mayawng a tara agyi wa Karai Kasang kaw du manit dai; jahkum shatsup hkrum sai Chyoi Pra ai ni a wenyi ni hte jawm pawng nga manit dai. Ga shaka nnan gaw da ai, htinglu htinglai wa Yesu kaw nan nanhte du manit dai.
Karai Kasang a Mungga rai nga ai.

KABU GARA SHIGA

LUKA 14:1, 7-14

Ya hti na gaw, Luka a laika hta na Kabu Gara Shiga rai nga ai.
Yesu gaw laban nhtoi langai mi hta, Hparishe agyi langai mi a nta e shat sha na matu, shang dung nga yang shanhte shi hpe azi yu nga ma ai. Shaga da sai ni gaw reng grau ai dung shara ni lata la ai hpe Yesu mu jang, Shi shanhte hpe ga shadawn hku tsun mu ai gaw: Masha langai ngai nang hpe num hkurungran poi de shaga yang, reng grau ai shara hta hkum dung et; nang hta arawng grau lu ai wa hpe mung shi shaga sai nhten. Shaloi, poi madu sa nna, Ndai wa hpe shara yen ya u, ngu nna nang hpe tsun jang, nang grai kaya ai hte yawng a jahtum ai de htawt dung lu na ndai. Dai rai nna, masha nang hpe shaga yang, jahtum ai de sa dung nga u; shaloi poi madu sa nna, Jinghku wa e, reng grau ai shara de sit dung nga u, ngu nna nang hpe tsun jang, rau dung lawm ai ni yawng a man e nang arawng lu na rin dai. 
Tinang hkum hpe shagrau ai wa kadai mung, shagrit shanem ai hkrum na ra ai; tinang hkum hpe shagrit ai wa chyawm gaw, shagrau ai hkrum na ra ai, ngu wu ai. Shi hpe shaga ai wa hpe mung Yesu tsun ai gaw: Jahpawt shat, shing n rai, shana shat nang galaw daw ai rai yang, na a jinghku jingyu ni, nhpu nnau ni, mayu dama ni hte sut lu ai htingbu ni hpe hkum shaga et. Hpa majaw nga yang, shanhte mung nang hpe bai shaga daw nna, chyeju htang lu na mara ai. Nang poi galaw daw yang gaw, matsan mayan ni, jahten labye ni, lagaw hten ai ni hte myi kyaw ai ni hpe shaga la u; shing rai jang gaw, nang a lu nga ndai: shanhte nang hpe chyeju htang lu na ma ai n rai. Dai re ai majaw, ding man ai ni bai hkrung rawt wa ai shaloi, de a akyu chyeju nang hkam la na rin dai.
Madu a Kabu Gara Shiga rai nga ai.

2022: PRAN WAN LADAW LABAN (21) NA MUNGGA

“Gyip ai numshang hku shang mu”, ngu ai ga gaw masha yawng hpe shădum ai ga re. Lu su ai_ matsan ai; tara lam chye chyang kunghpan ai_ tara n chye ai; hpaji chye ai_ n chye ai; Du Hkawhkam, Sărabyin Săradaw Jau ni_ dărat dăroi, shawa hpung masha ni,… kadai n nga ja ja shakut nna sha sumsing mungdan de shang ningngai lu na lam shadum ya ai. Ya, ngu ai aten hta chye dum, kunghpan dum, lu su dum, chyoi pra dum ai ni bandung du mahka hpang hkrat ngam nga na tsang-hpa nga ai zawn, htawm hpang prat hta mi grit grau ai ni mahtang reng grau ai shara de du taw ai ni mung byin mai ai lam,  tsun shadum ai. Ya, ngu ai aten hta gumrawng dum, rai dum ai myit n rawng mai ai, aten tup Karai a chyeju hpe kamhpa nna shakut shaja ra ai lam mung dum ra ga ai.

Prangtai hte taukawp kăgat shingjawng hkat ai maumwi yawng e chye na ma ai: langai hpra hpe Karai e jaw da ai atsam n bung ai. Grai chyang dum ai prangtai gaw gan yup hkring la ai, nga yang, lanyan ai taukawp bandung de shawng du mat ai. Hkrun lam gălu, prat a bandung, nga jang, prangtai hte taukawp shada garum hkat ai rai yang sha prat a bandung de arau du lu na rai nga ai. Prangtai gaw kagat chyang ai rai tim, hka rap ra jang taukawp hpe kam ra ai. Yawng gaw shada shamyet shanat, garum shingtau hkat na hpe Karai e ra lajang da ai.

Yerusalem de lung wa ai Yesu hpe marai langai mi ga-san san ai, “Hkye hkrang la hkrum ai masha loi mi sha rai na kun?” nga ai. Yesu htan tsun ai, “Na atsam marai tup hte gyip ai chyinghka hku shang lu na matu shakut u” nga ai. Yesu sharin shaga ai lam ni gaw kaga chyum laika sara ni hkaw tsun ai hte n bung ai; kalang lang gaw grau pyi tara ja ai zawn nga, kadai n hkan lu na zawn nga ai, na yak ai baw ga ni mung lawm ai. Ga-shadawn, hkungran num/la hka n mai ai lam; lagaw lata shut shăngun jang kahtam di kau u, nga; shut ai wa hpe 490 lang du hkra mara dat ya ra ai lam; matai hkum dawp mu, hpyen wa hpe tsawra mu; ntsa palawng gashun la ya jang kata palawng hpe mung raw jaw kau u; Shi kaw hkan nang mayu ai wa wudang hpai ra ai, ni htep ai sape tai mayu jang dum nta, sun hkau-na, dinghku masha hpe kau da ra ai, dz., dz.

“Tara ja dik ai, kadai wa hkan shatup lu na rai ta”, ngu, chye na la ai majaw ga-san san ai rai sam ai. San ging ai ga-san mung rai nga ai. Grau nna tara kunghpan ai hte dinghpring chyoi pra ai ni, ngu, shadu hkrum ai  Jau ni, Jaiwa ni, Hparishe ni hpe pyi Yesu gaw mana shachyoi kau ai, mara shagun ai, jeyang ga tsun ai; dai rai taw kadai wa mi hkye la hkrum sa na, ngu ai ga-san san na lam tai wa ai. 

Karai Kasang gaw masha a sung la ai kraw kata na myit mang ai lam hpe chye ya ai; Shi kaw na măkoi măgap da yip da lu ai hpa n nga ai. Anhte shada kadai wa kade dinghpring ai ngu she mu tim, Karai a man e n san seng ai ni kadai dai re, Karai sha chye ai. Tara chye ai wa gaw chye ai hku, n chye ai wa gaw n chye ai hku, jeyang hkrum na rai nga ai. Tara chye la jang hkan shatup ra na hpe hkrit ai majaw chye la hkaja la na n kam ai, lagawn ai wa mung, shing re ai myit magaw ai majaw, lagawn ai majaw, jeyang hkrum na rai nga ai. Hpaji n chye ai majaw, matsan ai majaw, tara matsun ni hpe law law n chye ai, hkan shatup na yak ai, n byin mai ai ni mung shanhte a madang hkan nna jeyang hkrum na rai nga ai. Yawng a matu bung ai lam gaw_ hkye hkrang la ai kaw du lu na matu tinang a machye machyang, tinang a madang, ninggun atsam, lu lawm lam, atsam marai tup hkra akyu jashawn nna gyip ai chyinghka hku shang lu na rai nga ai.  

Karai Kasang gaw Shi shawng e laksan hkringsan da ai Israel amyu sha ni hta lai nna mungkan ting na amyu masha yawng Yerusalem de sa du nawku na, Israel amyu sha ni hte maren, hkungga sa nawngjau na ra sharawng ai. Shing rai Karai Kasang hpe hkap la nawku dawjau ai ni hta na nkau mi hpe mung jau aya, nawngjau aya jaw na lam tsun da ai. Karai a mungdan gaw amyu masha yawng a matu rai nga ai. Sumsing mungdan hpe tinang amyu hkrai madu la mayu ai Israel amyu masha ni hpang hkrat ngam nga na lam hpe mung shaang nna shadum ai. 

Masha hkum shagu, shaman chyeju hkam la lu ai aten hta makam masham sari sadang hte nga lu ai rai tim, dinghpring ai hku nga lu ai rai tim, kadang wa kataw wa lu ai hpe myit dum mai ga ai. Gumrawng gumtawng ai myit n rawng ai sha, Karai a n htum n wai matsan dum myit, tsawra myit hpe kam hpa nna, atsam marai lu ai daram shakut shaja let hkye hkrang la ai chyeju hkam la ra ai lam, yawng hpe shadum ya ai.

  Sumsing mungdan de du ai lam mahkrun dumbret lam n nga ai, nga ai gaw hpa ngu ai rai ta?

  Gyip ai chyinghka, ngu ai, tinang baili baila ahtu agawng byin chye ai hpa hpa rai ta? Tinang tawt lai na yakhkak dum ai hpa hpa rai ta?

  Yesu a shadum ai ga a majaw tinang byin nga ai, nga-sa lailen hpe dinglik yu nna kaning re ai lam ni hta gawng kya ga a ta?

2022: PRAN WAN LADAW LABAN (21) NA CHYUM LAIKA

PRANWAN LADAW HTA LABAN 21
August 21, 2022
CHYUM MUNGGA DAW 1

ESAIA 66:18-21

Ya hti na gaw, myihtoi Esaia a Laika hta na rai nga ai.
Madu ning nga ai: Masha amyu ni hte, ga amyu baw kaga tsun ai ni mahkra hpe shinggyin na matu, ngai du sa nngai. Shanhte mung sa du nna, nye a arawng sadang hpe mu lu na mara ai. Ngai gaw shanhte hpe masat da ya nna, daw dan ai hta na lawt lu ai ni nkau mi hpe, masha amyu ni hpang de shangun dat na nngai: Ndan gap chye ai Tarshi, Pula, Luda amyu ni hpang de mung, Tubala yan Yawan hpang de mung, nye a lam garai n na yu ai hte, nye a hpung shingkang garai n mu lu ai, sumtsan mung na zunlawng ni hpang de mung, ngai shanhte hpe shangun dat na nngai. Shanhte mung maigan amyu ni hpe nye a hpung shingkang lam tsun dan na mara ai. 
Dai hta kaga, Israela masha ni gaw lusha hkungga hpe, san seng ai ban ni hta Madu a nawku htingnu de la sa ai hte maren, nanhte a kahpu kanau ni mahkra hpe gumra hta mung, leng hta mung, krau ntsa e mung, lawze hte gawla-uk ntsa e mung htaw nna, Madu kaw ap ya na nga, mung mi hte mung mi kaw na, Yerusalem mare na nye a Chyoi Pra ai bum de woi wa na mara ai, nga nna Madu tsun ai. Bai shanhte hta na nkau mi hpe, hkungga nawng jau ai agyi ni hte, Lewi masha ni a aya hta, ngai san da na nngai, nga nna Madu tsun ai.
Karai Kasang a Mungga rai nga ai.

CHYUM MUNGGA DAW 2

HEBRE 12:5-7, 11-13

Ya hti na gaw, Hebre masha ni hpang de San Pawlu shagun dat ai laika hta na rai nga ai.
Madu gaw nanhte hpe kasha ngu nna shaga let, shadum jahprang ai mungga hpe malap kau manit ni? Madu ning nga ai: Ngai sha e, Madu sharin ra ai hpe n gawn n sawn hkum rai et; Shi nang hpe daru yang hkum myit kaji et, Madu shi tsaw ra ai wa hpe sharin nga ai, Shi hkap la ai kasha yawng hpe ari dan jaw nga ai, nga nna nanhte hpe shadum jahprang ya wu ai. Dai rai nna, ari dan hkrum ai gaw nanhte hpe sharin ai lam langai mi rai nga ai: Karai Kasang gaw nanhte hpe kasha zawn galaw nga ai. Kawa e n daru sharin ai kasha kaning nga a ta? 
Ari dan hkam ai shaloi e, pyaw hpa zawn n rai, machyi la nga ai; rai ti mung, htawm hpang e she sharin hkam sha ai ni a matu, dai ari dan gaw ngwi pyaw ai hte ding hpring ai asi si shapraw ya nga ai. Dai rai nna, kya noi nga ai lata lahpum hte, n-gun n rawng ai lahput hpe jan di da mu; nanhte hkawm sa wa ai lam hpe shatsawm shading mu: shaloi, hten mat ai lagaw lata ni, hkrihkraw n kashai ai sha, n-gun atsam bai lu la na ra ai.
Karai Kasang a Mungga rai nga ai.

KABU GARA SHIGA

LUKA 13: 22-30

Ya hti na gaw, Luka a laika hta na Kabu Gara Shiga rai nga ai.
Yesu gaw mare kahtawng langai hte langai de shang sa wa nna, sharin shaga let Yerusalem de lai sa wa ai. Shaloi masha langai mi gaw, Madu e, hkye hkrang la ai kaw du ai ni n law ma ni? ngu wu ai. Yesu gaw, Gyip ai chyinghka hku shang lu na matu, shaja mu: Ngai nanhte hpe tsun made ga, masha law law dai hku shang na matu tam ma ai, rai ti mung, n shang lu na nga na mara ai. Nta madu rawt nna chyinghka la kau sayang, nanhte shinggan e tsap nga nna, chyinghka akawk let, Madu e, anhte hpe hpaw la mi, nga nna hpyi yang, dai nta madu gaw, Nanhte kanang na pru ai ngai n chye nngai, ngu nna htan na ra ai. 
Shaloi nanhte gaw, Nang hte rau anhte lu sha sa ga ai; anhte a lam hkan e mung nang sharin shaga ya nit dai, ngu na marin dai. Dai nta madu chyawm gaw, Nanhte kanang na rai myit dai gaw ngai gaja wa n chye nngai; n hkru n kaja ai ni yawng hte e, ngai kaw na pru mat wa mu, ngu nna htan kau na myit dai. Abraham, Isak, Yaku hte myihtoi ni yawng, Karai Kasang a mungdan e nga nga ai hpe nanhte mu lu nna, nanhte hkum nan shinggan de shapraw kau ai hkrum ai shaloi, dai yang e hkrap ngu hkrap ngoi ai hte, wa urin udik ai, rai na ra ai. Dai shaloi, sinpraw sinna, dingdung dingda maga de na masha ni sa nna, Karai Kasang a mungdan hta ningngai nga na mara ai. Rai sa, hpang hkrat ai ni nkau mi gaw shawng na mara ai; shawng ai ni nkau mi mung, hpang hkrat na mara ai, ngu nna Yesu gaw shanhte hpe tsun ai.
Madu a Kabu Gara Shiga rai nga ai.

2022: MARIA HPE LAMU DE SHALUN LA AI POI SHANI NA MUNGGA

“Chyoi pra ai Nu Maria hpe Karai Kasang gaw sumsing mungdan de shălun la ai, ngu ai măbyin hpe poi galaw let Karai Kasang hpe shakawn ga ai. Kaja wa gaw dinghta ga e a hkrung nga ai nawku hpung masha shagu mung Karai e shălun la nna sha sumsing mungdan de du shang lu na rai nga ai. Kamsham nna Karai a ga madat ai, matsun ai tara mungga hte maren nga sa ai ni yawng, sumsing mungdan de shalun la hkrum na rai nga ai. Shălun la n hkrum ai rai yang, tinang a atsam hte kadai mi sumsing mungdan de lung byin na n rai. Kamsham ai ni yawng gaw sumsing mungdan de shălun la hkrum na lam hpe myit dum, myit mada lu na matu, kamsham myit hpe madi shadaw ya na matu ndai poi hpe galaw ga ai.

Chyum Laika hta Eliya hte Enok yan hpe sha, Karai e shăpoi la ai, nga, ka da ai. Nu Maria hpe Karai e shăpoi la ai lam Chyum Laika hta hpa n tsun da ai; rai tim, Shingran Laika hta ka da ai numjan gaw kăga n rai, Yesu a kanu hpe shăang ai lam hkrak htai la lu ga ai. Chyum Laika ka ai ni kadai mung Maria si mat ai lam, jahtum e gara hku byin ai lam n ka da ai rai tim, Shingran Laika na numjan gaw Yesu a kanu Maria hpe shaang ai lam hkrak tsun lu ga ai. Ndai lam hpe n shut n shai kam ra ai lam, 1950 hta sha Nawku Hpung e masat shăgrin dat ai re (moi prat kaw nna kamsham ai lam hpe masat shagrin ya ai lam sha re).

Nu Maria a chyoi pra ai lam ninghpang gaw Karai a ga hpe madat ya ai, Karai a Kasha Yesu a kanu tai na hkraw ya ai, “Na ga hte maren ngai hta byin wa u ga”, ngu, htan ya ai kaw nna hpang ai, wudang nhpang du hkra, dinghta prat tup madat mara ai. Karai e sing da ai hkye hkrang la ai amu hta Kasha Yesu hte ni htep dik htum ai hku shang lawm ai majaw, tsaw dik htum ai arawng aya hte shagrau hkrum ai rai nga ai (jan zawn htoi ai, shata ntsa e tsap ai, shagan sanit hte hkri ai janmau gup ai). Dai numjan gaw Nawku Hpung a gawng malai tai ai kumla rai nga ai.

Si ai amyu a ninghpang gaw Ga N MADAT AI majaw re; dai hpe tai htang ai lam gaw kuptsup ai madat mara lam rai nga ai. Yesu gaw Kawa Karai hpe kuptsup ai hku madat ya ai zawn sha, Nu Maria mung kuptsup ai hku madat mara nu ai. Dai majaw, Maria gaw si ari dam hte ru hka yubak kaw nna lawt lu ai rai nga ai.

Madat mara ai hta machyi hkam ra ai lam law law re ai hpe myit dum mai ga ai. Tinang mung sharawng ai baw, hkan galaw na n yak ai ga matsun hpe madat na loi ai rai tim, tinang n ra sharawng ai baw, n kam hkan galaw ai baw, machyi hkam ra ai, asum hkam ra ai baw hpe matsun yang madat mara na nachying yak la ai. Tinang kam ai, kamhpa ai masha a ga hpe madat na gade mi n yak dum na re; tinang n chye ai masha, kam mai n mai hkrak n tsun lu ai masha a ga hpe madat na yak ai. Dai hta, “Kamsham ai myit” ahkyak ai lam hpe shadum ya ai. Sumsing mungdan the seng ai mungsung ni hpe adan asan rai shingran mu lu na yakhkak ai rai tim, kamsham myit hte, dai mungsung ni hpe hkap la na rai nga ai.

Nu Maria gaw lamu Kasa e shi sa htawn ai shaloi kamsham ai majaw, “Amen” htan ya ai hte maren, shi a prat tup Karai e sing da ai amu ni hpe madat mara hkan shatup lu ai, machyi hkam lu ai, asum hkam lu ai lam gaw kamsham myit a nhkan e rai nga ai. Kamsham ai majaw, asak kaba, ma lu ten lai sai kana Elizabeth hkum li ai shata kru rai sai lam hpe kam nna, Maria gaw bum ga e nga ai kana hpang sa kawan ai. Shan lahkawng yan Karai e shăbyin ai mauhpa amu a jaw e Karai Kasang hpe shakawn ma ai. Elizabeth tsun ai, “Amyu shayi ni yawng hta nang gaw A Lu Grau ai Wa rai lit dai”, nga ai. Maria Karai hpe chyeju shakawn ai hta shi a grit nyem ai lam hpe mu ai Karai Kasang gaw shi hpe shărawt shăgrau ai, nga ai. Bai, “Shu mashi shu masha prat dingsa, nang hpe A Lu ai Jan, ngu na ma ai” nga ai.

Shagrit shanyem ai myit hte kamsham tsawra myit a majaw, Nu Maria gaw myit ru myit tsang hkrum sha ai law law lang, Yesu hpe shangai na matu gawng li let Bethlehem de bu hkawm ai, dumsu lawng hta ma shangai ai, dai hpang hpyen yen hkawm ra ai, n chye na ai law law a lapran kangka ai kanu tai ya ai, wudang hkrun lam hta hkan ai, kasha jen noi si hkam ai lam hta hkrap lawm nu ai,….. Makam masham hkrun lam hte nni nkri hkam ai lam hta Maria gaw Yesu a shawng shawng na sape rai nga ai. Korintu Laika hta tsun da ai hte maren, Yesu si ai kaw na bai hkrung rawt ai a marang e, si mat ai ni hta na shawng shawng si ai asi re, nga ai. Baw re ai Yesu a hpang, sape ni shachyaw mat wa na lam hta kanu Maria gaw shawng na sha rai nga ai. Ngam ai ni gaw hpang jahtum na nhtoi hta sharawt la hkrum na, nga ai.

Nu Maria gaw bu hkawm ai Nawku Hpung a kumla rai nga ai. Hpa n galaw ai zim rai nan nga ai n rai. Kasha Yesu hta byin ai mabyin ni hta hkan nna shamu shamawt hkawm ai. Kasha hte rau yakhkak ai lam ni hpe jamjau hkam lai wa nu ai. Kasha a jahtum na hkrun lam, wudang hkrun lam kaw hkan nang nu ai. Kasha wa dagraw la lu ai hpung shingkang hpe kanu mung hkam la na sut htuk dik nga ai. Maria gaw kuptsup ai sape re ai hte maren, Nawku Hpung a gawng malai kumla mung rai nga ai. Nawku Hpung a kanu nan mung rai nga ai. Kanu du ai kaw anhte kasha ni mung hkan du na ga ai. Ahkyak ai gaw anhte mung kamsham myit hte madat mara nna prat a hkrun lam matut hkawm lu na rai nga ai.

   Madat mara ai majaw machyi hkam ra ai, asum hkam ra ai, nga ai. Tatut prat a mahkrum madup ni hpe tsun jahta hkat mai ai.

 Chyoi pra ai Maria lamu de woi shalun la hkrum ai zawn, jahtum e kamsham ai ni mung shalun la hkrum na, nga ai. Tatut hta gara hku, kaning rai hkyen lajang na?

2022: MARIA HPE LAMU DE SHALUN LA AI POI SHANI NA CHYUM LAIKA

CHYOI PRA AI MARIA HPE LAMU DE SHALUN LA AI POI
August 14, 2022
CHYUM MUNGGA DAW 1

SHINGRAN 11:19; 12: 1-6, 10

Ya hti na gaw, Yawhan a Shingran Laika hta na rai nga ai.
Sumsing lamu hta e Karai Kasang a Chyoi Pra ai Htingnu hpaw malang nna, dai Htingnu kata e Ga Shaka Sumpu hpe mu lu ai. Bai sumsing lamu kata e mauhpa amu kaba dan pru ai gaw: Ajan lawai nna, shata kabye ai hte, shagan shi lahkawng kap ai janmau gup ai numsha langai mi dan pru ai. Shi gaw na-um nasin rai nna, shangai na matu shinggyim machyi ai majaw, jahtau hkrap nga ai. Bai mauhpa amu kaga sumsing lamu kata e dan pru ai gaw: Yu u, hkyeng ai baren numraw kaba dan pru ai; shi gaw baw sanit hte nrung shi tu nna, baw shagu hta ja kagup gup nga ai. Shi a nmai gaw lamu shagan htam masum hta na htam mi magawn la nna, ga de jahkrat dat wu ai. Kasha shangai maw ai numsha shi a kasha shangai dat jang, dai ma hpe sha kau na nga, baren numraw dai numsha a man e la tsap nga ai.
Shaloi dai numsha gaw, amyu baw shagu hpe hpri sumdoi hte up na ra ai shadang lasha hpe shangai wu ai; shi a kasha hpe Karai Kasang a man de mung, Shi a tingnyang a man de mung, gare shalun la wu ai; dai yang e Karai Kasang gaw shi a matu nga shara lajang da ya wu ai. Shaloi sumsing lamu kata na nsen kaba gaw, Ya gaw Karai Kasang a Hkristu up hkang na ahkang aya lu la nna, Madu Karai Kasang Shi a daru magam, hpung shingkang hte mungdan hpe lu la ai ahkying rai sai, nga nna tsun ma ai hpe ngai na nngai.
Karai Kasang a Mungga rai nga ai.

CHYUM MUNGGA DAW 2

1 KORINHTU 15:20-26

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hkristu si mat ai ni kaw na bai hkrung rawt wa sai rai nna, yup pyaw mat ai ni hta na shawng si ai asi tai wa sai. Masha langai mi a jaw e mung, si mat ai ni bai hkrung rawt wa na lam byin wa sai. Yawng mayawng gaw Adam hta e si mat wa ai hte maren, yawng mayawng gaw Hkristu hta e bai hkrung rawt wa na mara ai. Rai ti mung, langai hte langai tinang ang ai hku hte maren byin wa na ra ai: Hkristu gaw shawng si ai asi nnan re ai majaw shawng na ra ai; dai hpang Hkristu bai du ai ladaw e shi hte seng ai masha ni hkrung wa na mara ai.
Dai hpang e, hpang jahtum nhtoi du na ra ai. Dai shaloi e, Hkristu gaw daru magam, hpung shingkang hte ahkang aya mahkra hpe jahten kau nna, Kawa Karai Kasang kaw dai mungdan hpe ap ya na ra ai. Kaning ai nme law gumlau ni yawng hte hpe shi a lagaw npu e tawn da ai du hkra Shi up hkang nga na ra ai. Hpang jahtum na hpyen wa ngu ai si hkrung si htan gaw, jahten kau ai hkrum na ra ai; hpa majaw nga yang, yawng mayawng hte hpe Shi a lagaw npu e tawn da nu ai, ngu nna Chyum Laika hta ka da nga ai.
Karai Kasang a Mungga rai nga ai.

KABU GARA SHIGA

LUKA 1:39-56

Ya hti na gaw, Luka a Laika hta na Kabu Gara Shiga rai nga ai.
Maria gaw Yuda mung na bum ga e nga ai mare langai mi de alawan rawt nna, Zakari a nta de shang nhtawm, Elisabet hpe hkrum shaga wu ai. Maria hkrum shaga ai ga hpe Elisabet na la jang, shi a hkritung na ma gumlawt nga ai: Elisabet mung Chyoi Pra ai Wenyi hte hpring nna, nsen kaba hte jahtau let, Num sha ni hta nang a lu ndai; na a hkritung na ma mung a lu nga ai. Nye Madu a kanu ngai hpe sa kawan ai gaw hpa chyeju a jaw e rai ra ai i? Ngai nang hpe tsun de ga: Na a shakram ai ga nsen ngai na la ai hte rau, nye hkritung na ma kabu gara ai hte gumlawt nga ai. Madu shi hpe tsun ai ga dik wa na ra ai lam hpe kam sham ai numsha gaw ‘a’ lu nga ai, ngu nna tsun wu ai.
Shaloi Maria gaw, Nye a myit masin Madu hpe shagrau li ai; Nye a wenyi mung ngai hpe hkye la ai Madu Karai Kasang hta kabu gara li ai. Shi a mayam jan a myit nem ai hpe Shi mada yu nu ai. Atsam rawng ai wa gaw ngai hpe galu kaba ai galaw ya ni ai majaw, ya kaw nna shu mashi shu masha ngai hpe ‘a’ lu ai ngu na mani ai. Shi a myingningsang Chyoi Pra lu ai. Shi hpe hkrit kamyin ai ni a ntsa e, shu mashi shu masha du hkra, Shi a matsan dum ai myit a nga nga ai. Shi a lahpum hpe atsam hte ladawn dat nna, myit gumrawng nga ai ni hpe shabra kau nu ai. 
Du magam ni hpe tingnyang na jahkrat kau nna, myit nem ai ni hpe shagrau ya nu ai. Kawsi hkrum ai ni hpe kaja ai hte jahkru shakat nna, sut su ai ni hpe kaman dat dat nu ai. Anhte a ji wa ni hpe tsun da ai hte maren, Abraham hte shi a kashu kasha ni hpe, prat dingsa e matsan dum ai lam dum nga let, shi a shangun ma Israela hpe lanu lahku ya nu ai ngu nna Maria tsun ai. 56Maria gaw Elisabet hte rau shata masum dang nga nhtawm, nta de bai wa mat ai.
Madu a Kabu Gara Shiga rai nga ai.

2022: PRAN WAN LADAW LABAN (19) NA MUNGGA

“Nanhte hta hkrit tsang ai myit hkum rawng mu; kaning rai nme law, nanhte a Kawa gaw shi a mungdan nanhte hpe jaw mayu ai. Nanhte madu da ai sutgan ni hpe dut kau nna matsan masha ni hpe jaw kau mu. ….”. 

Kamsham myit hte asak hkrung na ahkyak ai lam sharin ya ai. Dăgam ai ga, ga-ndat, teng sha kam ging ai, ngu ai ndai ga-hkum ni gaw galăreng ni rai nga ai. Mungkan ga hte sutrai ni yawng a ntsa e, yu gawn reng hkang na lit shinggyim masha hpe jaw da ai lam; lit lu ai hte maren yu gawn hkang reng chye na ahkyak ai lam hpe mung shadum ya ai.

Abraham hte Sarah gaw Karai Kasang hkum nan dăgam ai ga, ga-ndat, Karai a ga-sădi, masum hte hpe tup hkrak kamsham ma ai. Abraham gaw tinang hkau man nga ai buga hte makyin jinghku ni hpe kau da nna shi n chye ai buga de htawt nga hkawm ai; aru arat ni mung hti n dang hkra, shăgan ni zawn, zaibru zawn law htam na lam, lăgat ntsin hte nga-chyu lwi ai mungdan hpe madu la lu na lam… yawng hpe kam ai. Kasha n lu hkraw ai shaning law law lai mat ai rai tim, Karai a ndat ga hpe kam ding-yang. Jahtum e amyu ali tai na Isak hpe lu la tim, sat nna hkungga nawng ya shangun ai hpe mung, galaw nu ai. Karai Kasang gaw chyăsi kaw na asak bai prawn shăngun lu ai lam hpe kam ai. Abraham gaw shi a myi, shi a myit hte mu mada hkawn hkrang lu ai lam hpe tawt nna tau nau n chye ai lam ni dik wa na hpe kamsham ai. Dai majaw, shi a makam masham gaw shi hpe dinghpring shangun ai hte makam masham a jijum daju tai wa ai.

Dinghta ga ntsa shani shagu na asak mahkrun hta hkap share, shingjawng saw ai lam law la ai. Kălang lang chyip mak, nga, hkam sha ai aten ni hkrum kătut yu na ga ai. Shing re ai aten ni hta dinghpring ai lam, rap-ra tara, tsawra tara, dingman ai lam, jaw ai teng ai lam ni hpe manu jahpa shagrit kau nna lawt lu lam tam na kun? Shing n rai, kalang ta aw rai magawn amyat sha lu ai lam hpe lata la na kun? Grau grau nga yak wa ai ndai mungkan, ndai aprat hta Karai a ga-ndat ga-sadi ni hpe kam nga na kun?

Lam mi gaw “Hkum hkrit tsang mu” nga ai ga, shada matai dawp hkat, maw sha hkat, matsa jahpoi hkat, sat nat hkat, tara tawt lai shajang nga ai mungkan hpe Karai Kasang gaw mu ai kun, tara hkan ai, dinghpring ai ni a hkrap ngu hkrap ngoi ai nsen hpe gaw na ya ai kun? Makam masham ngu ai gaw shing re ai dinghta ga na mabyin ni hta, tinang hkum nan hkrum katut sha nga ai mahkrum madup ni a lapran, Karai a atsam, shi a dăgam ga, ga-ndat, Shi a n htum n wai ai tsawra myit, ndai tengman ai lam ni hpe lăshum lănoi di asak hkrung ai lam rai nga ai. Kamsham myit rawng ai wa a matu kaning re ai mi hkrum katut tim, kade mi ruyak jamjau ai rai tim, Karai Kasang a ga-sădi ni a majaw, shimlum ai hku nga lu ai, hkamjan lu ai rai nga ai. Heb. 11:1 hta tsun da ai, “Myit mada ai lam a shaman chyeju ni hkam la lu na lam hta, makam masham chyu sha hkam dahka di ya lu ai, nga ai. 

Anhte a myit nyan hpaji hte sawn lu, chye lu, mahtai jaw lu ai hta grau nna ga-san ni mahtang grau law ai, manghkang ni mung prut jat ding-yang re ai dinghta ga hta Madu gaw ning nga ai, “Sumsing lamu na nanhte a Kawa gaw nanhte hpe shi a mungdan jaw mayu ai; myit ru myit tsang hkum rai mi” nga ai. Karai a mungdan hta grau ai shagrau kumhpa hpa naw nga na ta? Kadai wa gingdan ai majaw hkam la lu na rai ta? 

“Lu ai yawng hpe dut kau nna matsan masha ni hpe jaw kau mu” ngu ai gaw dinghta ga na sutgan ni hta marin ai myit, manoi ai myit n galaw na lam hpe ngu ai re. Hkam la lu na Karai a mungdan, ngu ai hte shadawn yang dinghta ga e chyihkring chyihkra na pyaw hpa hte chyihkring chyihkra na matsan jamjau ai lam gaw hpa n re ai lam hpe shadum ya ai. Tinang hta ruyak jamjau grau ai ni hpe matsan dum garum ya chye na lam hpe mung sharin ya ai. Dinghta ga na arung arai ni hte sutgan ni hpe renghkang akyu jashawn chye ra ai lam, renghkang na lit lu ai masha hku nna akyu jashawn ra ai lam hpe mung shadum ya ai.

 Lădu lai myit ru myit tsang chye ga ai kun?

 Mungkan ga na sutrai sutgan ni a ntsa tinang gara hku mu mada a ta?

 Koi yen n mai byin wa ai manghkang ni a lapran hkamjan lu na matu tinang a makam masham kade gara hku garum  ya a ta? (Mahkrum madup ni hpe shada gam garan mai ai) 

2022: PRAN WAN LADAW LABAN (19) NA CHYUM LAIKA

PRANWAN LADAW LABAN 19
August 7, 2022
CHYUM MUNGGA DAW 1

HPAJI BYENG-YA 18:6-9

Ya hti nga gaw, Hpaji Byeng-ya a laika hta na rai nga ai.
Dai Shalawt Dat ai Shana a lam, anhte a ji woi ji wa ni hpe shawng nna tsun dan manu ai. Shing rai, Karai Kasang shanhte hpe dagam da ai hte maren, teng teng byin na ra ai lam anhte a ji wa ni mu chye nna, kam hpa ai myit kaba hte hkawm sa wa na ma ai. Na a amyu masha ni myit mada ai hte maren, ding hpring ai ni hkye hkrang la ai hkrum nna, n ding n man ai ni mahtang hten byak ai hkrum mat nu ai. Kaning rai nme law, anhte a hpyen ni hpe ari jaw ai amu a marang e, Nang anhte hpe na amyu masha ni shatai nna shagrau ya nit dai. Ding man ai ni a kashu kasha ni lagyim ai hku nna hkungga nawng ya ai shaloi, shanhte ga shaka da ma ai: Chyoi Pra ai ni gaw shaman ya ai hte hkrit hpa lam ni hpe, lang lata jawm hkam la na mara ai; shing rai, shanhte gaw ji woi ni a mahkawn ga hpe mahkawn mangoi nga ma ai.
Karai Kasang a mungga rai nga ai.

CHYUM MUNGGA DAW 2

HEBRE 11:1-2, 8-12

Ya hti na gaw, Hebre masha ni hpang de San Pawlu shagun dat ai laika hta na rai nga ai.
Makam masham ngu ai gaw, anhte myit mada ai chyeju lam ni teng teng lu la na hpe myit hkut shangun nga ai, garai n mu yu ai lam ni teng teng nga ai hpe tau chye shagun ai mung rai nga ai. Anhte a ji woi ji wa ni gaw shanhte a makam masham a majaw, sharawng awng ai lu la manu ai. 
Abraham gaw, shi hte shi a aru arat a sali wunli tai ma ra ai mungdan de, pru sa wa na matu shaga la ai hpe hkrum ai shaloi, kam sham ai hte madat sai; shi gade sa wa ai n chye ti mung, kam sham ai majaw, pru hkawm wa sai. Abraham gaw kam sham ai majaw, chyasam masha zawn Karai Kasang ndat da ai mungdan de sa nga nna, dai ga ndat hte maren sali wunli jawm hkam la lu ai Isak yan Yaku hte rau ginsum hta sha rawng nga ma ai. Kaning rai nme law, Karai Kasang shachyaw da nna, npawt nhpang grin nga ai mare hpe, shi myit mada nga ai. 11Sara mung aprat lai mat ti mung, kam sham ai a majaw, na um nasin rai wa lu na atsam lu la wu ai: kaning rai nme law, ga ndat tawn da ai wa kangka rai nga ai, ngu nna shi kam wu ai. Dai re ai majaw, la chyasi zawn re ai masha langai hta na, sumsing lamu na shagan ni hte, nammukdara makau na, n dang hti ai zaibru hta, grau law htam wa ai kashu kasha ni pra wa ma sai.
Karai Kasang a Mungga rai nga ai.

KABU GARA SHIGA

LUKA 12:32-48

Ya hti na gaw, Luka a laika hta na Kabu Gara Shiga rai nga ai.
Lang mi na Yesu Shi a sape ni hpe tsun mu ai gaw: Sagu hpung kaji e, hkum hkrit et: dai mungdan nanhte hpe jaw na, nanhte a Kawa myit sharawng nga ai. Nanhte lu ai arai dut kau nna, alu jaw mu; tinang a matu dingsa n chye ai gumhpraw jan galaw nna, lagut mung n du, manut e mung n sha lu ai, sumsing lamu e n htum n ma chye ai sutgan kyem da mu. Kaning rai nme law, nanhte a sutgan nga ai kaw, nanhte a myit masin mung nga na malit dai. 35Nanhte gaw nshang e shingkyit kyit nna, pyengding shatu let, tinang a madu hkungran poi de na bai wa nna, chyinghka wa akawk yang, shi hpe shaloi jang hpaw la lu hkra ala nga ai ni zawn, nanhte mung rai nga mu. Dai madu wa yang, maja nga ai ali ama ni gaw a lu ma ai. Ngai nanhte hpe teng teng tsun made ga: dai madu gaw Shi hkum shajin nna, shanhte hpe dung shangun nhtawm, shi nan shanhte hpe sa galaw jaw na mu ai. 
Yup tung hpawa e rai ti mung, u goi mahka de rai ti mung, shing rai maja nga ma ai hpe wa mu yang gaw, dai ali ama ni a lu ma ai. Ndai hpe myit dum nga mu: gara ahkying aten hta lagut sa na hpe nta madu chye yang gaw, shi a maja nga nna, shi a nta de n tawk waw shang lu hkra, shi galaw na wu ai. Dai rai nna, nanhte mung chyip chyip rai nga mu: kaning rai nme law, nanhte n shadu ai aten hta Masha Kasha du sa na ra ai, ngu nna tsun mu ai. Shaloi Petru gaw, Madu e, ndai ga shadawn gaw anhte hpe sha, shing n rai, yawng hpe tsun ai, rai nni? ngu nna san wu ai. Nta madu shi a kun dinghku ntsa e san tawn da nna, aten du jang lusha karan jaw lu na, kangka re ai myit su ai kunhting wa, kadai rai nga a ta? Shi a madu bai wa jang, shi hte seng ang ai bungli hkrak hkan galaw ai ali ama a nga ai.
Nanhte hpe ngai teng teng tsun made ai gaw, Dai madu gaw shi a arai mahkra a ntsa e dai shangun ma hpe san tawn da na wu ai. Shing n rai, dai ali ama gaw, Nye a Madu du wa na naw na la nga ai, nga nna shi a kraw kata e myit nga let, shangun ma manang ni numsha lasha hpe anu ajin di ai hte, lu nga sha nga nna, chyaru nang ai ni rai yang gaw, dai ali ama mada n hten ai nhtoi hte, n shadu ai ahkying hta, shi a madu du wa nna, dai wa hpe nhtum nni adup kau nhtawm, shi a kumhtaw dawm la ya nna, kangka n re ai ni hte rau tawn kau na ra ai. Tinang a madu a myit ra ai chye da ninglen, hpa mung n galaw n lajang ai ali ama gaw, law law lang anu kayet ai hkrum na ra ai: n chye nna kayat ging ai amu galaw kau ai ali ama chyawm gaw, loi mi sha anu kayat ai hkrum na ra ai. Law wa hkam la ai wa kaw na, law wa hpyi na ra ai. Law wa ap ya ai masha kaw na mung grau nna bai hpyi na mara ai.
Madu a Kabu Gara Shiga rai nga ai.

2022: PRAN WAN LADAW LABAN (18) NA MUNGGA

“Yawng mayawng gaw kăman lila”, (Hpaji Ningli). “Karai a man e sut su nga na malai, tinang a matu sutgan mahkawng da ai wa a gam măka hpe yu mu”, (Luka). “Nanhte gaw dinghta ga hte seng ai lam hta myit hkum manoi mu, sumsing mundan hte seng ai lam hta sha manoi nga mu!” (Kolose).

9/11 măbyin hpe dum na ga ai_ mungkan ting na hpăga ginjaw gindai, ngu tim n shut ai, kaba dik tsaw dik ai langchyi htingchying marun, nbungli langai hpra hte adawt agrawp kau ya ai. Bungli galaw masha 3000 jan si lawm ai; manu dan dik ai bungli matsing record yawng, masing yawng, hten lawm ai. Dai zawn byin lu na kadai tau nau shingran mu da a ta? 1994 a hpang na mungmasa sut-masa a majaw, Jinghpaw lauban ni law law a kajawng sha ngu na daram matsan mat ma ai; lungseng maw gaw tsăsam masha ni a lata de du mat ai. 2021 February praw 1 a hpang na mungmăsa sut-măsa a majaw a kajawng sha galai shai wa ai maka ni, kadai tau hkrau chye da a hka! A kajawng sha matsan mat shajang ai, a kajawng sha si jawng ai, Covid-19 a majaw n tau hkrau ai a kajawng sha ngu na daram si mat ai ni kade she law; kăga hkăla nba hte a kajawng sha si mat ai ni kade she law, tsun she n ma. 

Lăhta na mabyin ni hte kaga mabyin ni yawng gaw n grin ai dinghta ga na asak hte nga-mu nga-mai lam hpe shadum ya ai n rai a hka? Karai Kasang a man e sut su lam n tam, sumsing sutgan n mahkawng da ai ni a matu hpa hpe myit mada lu na rai ta?

Madu Yesu ga-shădawn hku tsun ai lauban a lam_ shi hpe kyang lailen n kaja ai, n tara ai, lagu ai, mawp ai ngu, hpa n tsun da ai. Langai mi sha shi hta ra kădawn ai: shi a prat masing hta Karai Kasang hpe shinggan da ai lam re. Karai Kasang hpe myit hta n bang da ai, hpang na prat a gam maka hpe n sawn shalawm ai masha ăngawk she rai nga ai. Tinang a asak hpe tinang n madu ai. Kade mi sădi săhka let nga ai rai tim, kade mi hkamja tara hkan ai rai tim, kade mi hpaji kunghpan ai rai tim, n myit mada ai a kajawng sha si wa lu ai.  

Dinghta ga na asak a nga-mu nga-mai lam, mungkan sutgan ja gumhpraw tam mahkawng ai, hpa n shut ai. Lu lawm hkra shakut ra ai; nga-mu nga-mai lam tam ra ai. Shut kaba gaw dinghta ga hte seng ai lam hta sha baw nawng da ai majaw, Karai Kasang mahtang yawng mayawng a Madu re ai lam, htawm hpang prat na n htum n wai ai asak aprat hpe n sawn shalawm ai lam re. Hpaji Ningli hta tsun da ai: kade mi n yup n sha măkan let bungli shăkut ai rai tim, tinang măkan let sălat hkaw nna lu mahkawng da ai sutgan ni, tinang si wa ai shani kaga masha ni gaw hpa mung n ba ai, salat n hkaw ai sha sutli dagraw hkam la ya ai; yawng mayawng kaman lila sha re, nga shadum ai. Dai kaman lila gaw hpa ta? Karai Kasang hpe tinang a prat, nga-mu nga-mai ai lam kaw na shinggan da ai lam rai nga ai.

Karai Kasang hpe shinggan da nna nga-mu nga-mai lam hte shimlum lam tam ai wa hpe Madu tsun ai, “Masha ăngawk e, dai na jang na nsa wenyi hpe dawm kau ya na ra ai; nang lu da ai sutgan ni kadai a matu tai na ta?” nga ai. Masha a labau hta sutgan mak hpyau ai, arawng aya marin hpyau ai ni, jahtum e hten bya shajang ai mabyin ni law law nga ai. Mungkan sutgan, ja gumhpraw ra kadawn ai lam n nga ai, n taw n tsang lu ninglen myit pyaw myit dik ai lam n nga lu ai majaw, tsa chyaru hte kaga nanghpam amyu myu a mayam tai mat ai ni law law, myit daw myit htum nna tinang hkum hpe tinang sat si ai law law nga ma ai. Wenyi asak hkrung lam hta kăman, hka n rawng ai htung hte bung ai. Karai Kasang gaw tsawra myit hpan bang da ya ai; tinang nga-mu nga-mai lam sha tam nna shada tsawra dawjau garum shingtau hkat ai myit masa n nga ai rai yang, kade lu su tim lachyum n pru na rai nga ai. Shimlum lam majing hte myit pyaw myit dik lam majing gaw Karai Kasang kaw na sha lu la mai ai lam, sharin la lu ga ai.

Kolose Laika hta tatut hkan shăman mai ai lam ni hpe shadum ya ai: n se nsa ai myit hte amu ni hpe koi yen na lam, sutgan marin ai myit hpe koi yen na lam, mungkan sutgan marin ai gaw hpara shaje hpe naw ai amu re ai lam, masu magaw amu ni hpe koi yen na lam ni  hpe shadum ya ai. Anhte a myit majing gaw shut hpyit mara awu asin wa she rai tim, Hkristu hta e masha ningnan tai wa ai. Dai awu asin ni hpe gawng kau nna Hkristu a gawng asam hpe bu hpun la sa ga ai, nga ai.    

 Mungkan sutgan hte ja gumhpraw, nga-mu nga-mai lam hpe gara hku mu mada hkap la chye ga ta?

 Tinang a hkamja lam jahtet kau na daram lu lai sha lai kau   ai kade lang galaw hkrup sa ga ta? Pyaw lai nna manghkang   shabyin yu sai kun?

 Madu tsun e, “Masha ăngawk” ngu ai shaloi tinang mung kade lang ăngawk yu sai hpe myit yu na.

2022: PRAN WAN LADAW LABAN (18) NA CHYUM LAIKA

PRANWAN LADAW HTA LABAN 18
July 31, 2022
CHYUM MUNGGA DAW 1

HPAJI NINGLI 1:2; 2:21-23

Ya hti na gaw, Hpaji Ningli laika hta na rai nga ai.
Kaman lila, kaman lila, nga nna Tara Hkaw Ningbaw Wa tsun nga ai. Kaman lila, Kaman lila, yawng mayawng kaman lila hkrai rai nga ai. Masha langai ngai chye chyang ai hpaji hte, amu bungli amyu myu galaw shapraw ti mung, dai amu hta hpa n shakut lawm ai wa a matu htawng da ya ra ai majaw, dai mung kaman lila hte tsinyam kaba rai nga ai. Masha gaw jan a npu e amu galaw shaja nna, shi a shakut sharang ai lam a majaw, hpa akyu lu la a ta? Shi gaw shi a prat tup yawm hkyen ai hkrum sha nna, shi a amu bungli ru yak ai hkrai rai nga ai; gaja wa, shana e pyi shi myit awai lu ai n rai. Dai mung kaman lila hku rai nga ai.
Karai Kasang a Mungga rai nga ai.

CHYUM MUNGGA DAW 2

KOLOSE 3:1-5, 9-11

Ya hti na gaw, Kolose masha ni hpang de San Pawlu shagun dat ai laika hta na rai nga ai.
Nanhte gaw Hkristu hte rau teng man ai asak de bai rawt wa manit dai majaw, Hkrsitu gaw Karai Kasang a hkra maga e dung nga ai lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu. Nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung Shi hte rau hpung shingkang hta dan pru na marin dai. Dai re ai majaw, dinghta ga na arawn alai hpe nanhte hta e jasim tawm kau mu: dai arawn alai gaw, nse nsa ai amu, awu asin re ai, ngang kayut ai, n kaja ai hpe marin marit ai myit hte, hpara sumla hpe nawku ai hte bung nga ai, nammak lawhpa lam ni rai nga ma ai. 
Shada da masu magaw ga hkum tsun myit. Nanhte a gawng shingyan dingsa hte rau, arawn alai dingsa hpe mung raw kau nna, gawng shingyan nnan hpe dagraw la manit dai. Dai gawng shingyan nnan gaw, Hpan Wa Ningsang a hkrang sumla hte grau nna bung wa magang, Karai Kasang hpe chye chyang ai hta grau nna kup tsup wa magang rai nga ai. Shaloi e, Yuda masha hte Greka masha, matu gadoi hkam ai wa hte matu gadoi n hkam ai wa, garing garang re ai masha hte Skuti masha, mayam wa hte shanglawt wa ngu nna, n mai ginhka ai: Hkristu chyu sha nga ai: Shi gaw yawng mayawng rai nga ai hte, yawng mayawng hta e nga nga ai.
Karai Kasang a Mungga rai nga ai.

KABU GARA SHIGA

LUKA 12:13-21

Ya hti na gaw, Luka a laika hta na Kabu Gara Shiga rai nga ai.
Lang mi na, shawa hpawng kata de masha langai mi gaw, Sara e, ngai hpu wa hpe ngai hte sali wunli karan la na lam tsun ya e, ngu nna Yesu hpe tsun wu ai. Yesu gaw, Jinghku wa e, nan a ntsa e tara agyi hte hparan wa tai na, ngai hpe kadai san da a ta? ngu nna shi hpe htan wu ai. Shaloi shawa masha ni hpe Yesu tsun ai gaw: Nammak lawhpa ai myit mahkra hpe hkap shadang lu hkra, sadi ai hte maja nga mu. Kaning rai nme law, masha gaw sutgan law law lu ti mung, dai sutgan shi a asak hpe rem sin nga ai n rai, ngu mu ai. Ndai ga shadawn mung Yesu hkai dan wu ai: Sahti langai mi a yi hkauna gaw nsi naisi hkai nmai grai kaja lu ai. Dai rai nna, dai wa gaw, Ngai kaning di na i? nye a nsi naisi shinggyin da na shara ngai n lu nngai, ngu nna myit yu nga ai. 
Shaloi shi gaw, Ngai ning rai galaw na we ai: nye a mam dum dingsa ni hpe ngai run kau nna, grau kaba ai galaw na we ai: dai ni hta nye a nsi naisi hte sut rai mahkra hpe ngai shinggyin da nhtawm, ngai hkum hpe ning ngu na we ai: Nye a myit masin e, shaning law law a matu, arai kaja law law hpe nang mahkawng da nit dai. Myit hkum ru sa; lu nu, sha nu. Pyaw pyaw rai nga u, ngu nna tsun na nngai, nga ai. Shaloi Karai Kasang gaw dai sahti wa hpe, Masha angawk e, dai na jang na a asak hpe dawm la kau ya na ra ai: dai rai nna, nang mahkawng shachyip da ai arai ni gaw, gade a matu tai na ra ta? ngu wu ai. Tinang a matu sutgan mahkawng da nhtawm, Karai Kasang hta n lu n su ai wa gaw, dai zawn re ai masha rai nga ai, ngu nna Yesu shanhte hpe tsun mu ai.
Madu a Kabu Gara Shiga rai nga ai.