2022: MARIA HPE LAMU DE SHALUN LA AI POI SHANI NA CHYUM LAIKA

CHYOI PRA AI MARIA HPE LAMU DE SHALUN LA AI POI
August 14, 2022
CHYUM MUNGGA DAW 1

SHINGRAN 11:19; 12: 1-6, 10

Ya hti na gaw, Yawhan a Shingran Laika hta na rai nga ai.
Sumsing lamu hta e Karai Kasang a Chyoi Pra ai Htingnu hpaw malang nna, dai Htingnu kata e Ga Shaka Sumpu hpe mu lu ai. Bai sumsing lamu kata e mauhpa amu kaba dan pru ai gaw: Ajan lawai nna, shata kabye ai hte, shagan shi lahkawng kap ai janmau gup ai numsha langai mi dan pru ai. Shi gaw na-um nasin rai nna, shangai na matu shinggyim machyi ai majaw, jahtau hkrap nga ai. Bai mauhpa amu kaga sumsing lamu kata e dan pru ai gaw: Yu u, hkyeng ai baren numraw kaba dan pru ai; shi gaw baw sanit hte nrung shi tu nna, baw shagu hta ja kagup gup nga ai. Shi a nmai gaw lamu shagan htam masum hta na htam mi magawn la nna, ga de jahkrat dat wu ai. Kasha shangai maw ai numsha shi a kasha shangai dat jang, dai ma hpe sha kau na nga, baren numraw dai numsha a man e la tsap nga ai.
Shaloi dai numsha gaw, amyu baw shagu hpe hpri sumdoi hte up na ra ai shadang lasha hpe shangai wu ai; shi a kasha hpe Karai Kasang a man de mung, Shi a tingnyang a man de mung, gare shalun la wu ai; dai yang e Karai Kasang gaw shi a matu nga shara lajang da ya wu ai. Shaloi sumsing lamu kata na nsen kaba gaw, Ya gaw Karai Kasang a Hkristu up hkang na ahkang aya lu la nna, Madu Karai Kasang Shi a daru magam, hpung shingkang hte mungdan hpe lu la ai ahkying rai sai, nga nna tsun ma ai hpe ngai na nngai.
Karai Kasang a Mungga rai nga ai.

CHYUM MUNGGA DAW 2

1 KORINHTU 15:20-26

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hkristu si mat ai ni kaw na bai hkrung rawt wa sai rai nna, yup pyaw mat ai ni hta na shawng si ai asi tai wa sai. Masha langai mi a jaw e mung, si mat ai ni bai hkrung rawt wa na lam byin wa sai. Yawng mayawng gaw Adam hta e si mat wa ai hte maren, yawng mayawng gaw Hkristu hta e bai hkrung rawt wa na mara ai. Rai ti mung, langai hte langai tinang ang ai hku hte maren byin wa na ra ai: Hkristu gaw shawng si ai asi nnan re ai majaw shawng na ra ai; dai hpang Hkristu bai du ai ladaw e shi hte seng ai masha ni hkrung wa na mara ai.
Dai hpang e, hpang jahtum nhtoi du na ra ai. Dai shaloi e, Hkristu gaw daru magam, hpung shingkang hte ahkang aya mahkra hpe jahten kau nna, Kawa Karai Kasang kaw dai mungdan hpe ap ya na ra ai. Kaning ai nme law gumlau ni yawng hte hpe shi a lagaw npu e tawn da ai du hkra Shi up hkang nga na ra ai. Hpang jahtum na hpyen wa ngu ai si hkrung si htan gaw, jahten kau ai hkrum na ra ai; hpa majaw nga yang, yawng mayawng hte hpe Shi a lagaw npu e tawn da nu ai, ngu nna Chyum Laika hta ka da nga ai.
Karai Kasang a Mungga rai nga ai.

KABU GARA SHIGA

LUKA 1:39-56

Ya hti na gaw, Luka a Laika hta na Kabu Gara Shiga rai nga ai.
Maria gaw Yuda mung na bum ga e nga ai mare langai mi de alawan rawt nna, Zakari a nta de shang nhtawm, Elisabet hpe hkrum shaga wu ai. Maria hkrum shaga ai ga hpe Elisabet na la jang, shi a hkritung na ma gumlawt nga ai: Elisabet mung Chyoi Pra ai Wenyi hte hpring nna, nsen kaba hte jahtau let, Num sha ni hta nang a lu ndai; na a hkritung na ma mung a lu nga ai. Nye Madu a kanu ngai hpe sa kawan ai gaw hpa chyeju a jaw e rai ra ai i? Ngai nang hpe tsun de ga: Na a shakram ai ga nsen ngai na la ai hte rau, nye hkritung na ma kabu gara ai hte gumlawt nga ai. Madu shi hpe tsun ai ga dik wa na ra ai lam hpe kam sham ai numsha gaw ‘a’ lu nga ai, ngu nna tsun wu ai.
Shaloi Maria gaw, Nye a myit masin Madu hpe shagrau li ai; Nye a wenyi mung ngai hpe hkye la ai Madu Karai Kasang hta kabu gara li ai. Shi a mayam jan a myit nem ai hpe Shi mada yu nu ai. Atsam rawng ai wa gaw ngai hpe galu kaba ai galaw ya ni ai majaw, ya kaw nna shu mashi shu masha ngai hpe ‘a’ lu ai ngu na mani ai. Shi a myingningsang Chyoi Pra lu ai. Shi hpe hkrit kamyin ai ni a ntsa e, shu mashi shu masha du hkra, Shi a matsan dum ai myit a nga nga ai. Shi a lahpum hpe atsam hte ladawn dat nna, myit gumrawng nga ai ni hpe shabra kau nu ai. 
Du magam ni hpe tingnyang na jahkrat kau nna, myit nem ai ni hpe shagrau ya nu ai. Kawsi hkrum ai ni hpe kaja ai hte jahkru shakat nna, sut su ai ni hpe kaman dat dat nu ai. Anhte a ji wa ni hpe tsun da ai hte maren, Abraham hte shi a kashu kasha ni hpe, prat dingsa e matsan dum ai lam dum nga let, shi a shangun ma Israela hpe lanu lahku ya nu ai ngu nna Maria tsun ai. 56Maria gaw Elisabet hte rau shata masum dang nga nhtawm, nta de bai wa mat ai.
Madu a Kabu Gara Shiga rai nga ai.

2022: PRAN WAN LADAW LABAN (19) NA MUNGGA

“Nanhte hta hkrit tsang ai myit hkum rawng mu; kaning rai nme law, nanhte a Kawa gaw shi a mungdan nanhte hpe jaw mayu ai. Nanhte madu da ai sutgan ni hpe dut kau nna matsan masha ni hpe jaw kau mu. ….”. 

Kamsham myit hte asak hkrung na ahkyak ai lam sharin ya ai. Dăgam ai ga, ga-ndat, teng sha kam ging ai, ngu ai ndai ga-hkum ni gaw galăreng ni rai nga ai. Mungkan ga hte sutrai ni yawng a ntsa e, yu gawn reng hkang na lit shinggyim masha hpe jaw da ai lam; lit lu ai hte maren yu gawn hkang reng chye na ahkyak ai lam hpe mung shadum ya ai.

Abraham hte Sarah gaw Karai Kasang hkum nan dăgam ai ga, ga-ndat, Karai a ga-sădi, masum hte hpe tup hkrak kamsham ma ai. Abraham gaw tinang hkau man nga ai buga hte makyin jinghku ni hpe kau da nna shi n chye ai buga de htawt nga hkawm ai; aru arat ni mung hti n dang hkra, shăgan ni zawn, zaibru zawn law htam na lam, lăgat ntsin hte nga-chyu lwi ai mungdan hpe madu la lu na lam… yawng hpe kam ai. Kasha n lu hkraw ai shaning law law lai mat ai rai tim, Karai a ndat ga hpe kam ding-yang. Jahtum e amyu ali tai na Isak hpe lu la tim, sat nna hkungga nawng ya shangun ai hpe mung, galaw nu ai. Karai Kasang gaw chyăsi kaw na asak bai prawn shăngun lu ai lam hpe kam ai. Abraham gaw shi a myi, shi a myit hte mu mada hkawn hkrang lu ai lam hpe tawt nna tau nau n chye ai lam ni dik wa na hpe kamsham ai. Dai majaw, shi a makam masham gaw shi hpe dinghpring shangun ai hte makam masham a jijum daju tai wa ai.

Dinghta ga ntsa shani shagu na asak mahkrun hta hkap share, shingjawng saw ai lam law la ai. Kălang lang chyip mak, nga, hkam sha ai aten ni hkrum kătut yu na ga ai. Shing re ai aten ni hta dinghpring ai lam, rap-ra tara, tsawra tara, dingman ai lam, jaw ai teng ai lam ni hpe manu jahpa shagrit kau nna lawt lu lam tam na kun? Shing n rai, kalang ta aw rai magawn amyat sha lu ai lam hpe lata la na kun? Grau grau nga yak wa ai ndai mungkan, ndai aprat hta Karai a ga-ndat ga-sadi ni hpe kam nga na kun?

Lam mi gaw “Hkum hkrit tsang mu” nga ai ga, shada matai dawp hkat, maw sha hkat, matsa jahpoi hkat, sat nat hkat, tara tawt lai shajang nga ai mungkan hpe Karai Kasang gaw mu ai kun, tara hkan ai, dinghpring ai ni a hkrap ngu hkrap ngoi ai nsen hpe gaw na ya ai kun? Makam masham ngu ai gaw shing re ai dinghta ga na mabyin ni hta, tinang hkum nan hkrum katut sha nga ai mahkrum madup ni a lapran, Karai a atsam, shi a dăgam ga, ga-ndat, Shi a n htum n wai ai tsawra myit, ndai tengman ai lam ni hpe lăshum lănoi di asak hkrung ai lam rai nga ai. Kamsham myit rawng ai wa a matu kaning re ai mi hkrum katut tim, kade mi ruyak jamjau ai rai tim, Karai Kasang a ga-sădi ni a majaw, shimlum ai hku nga lu ai, hkamjan lu ai rai nga ai. Heb. 11:1 hta tsun da ai, “Myit mada ai lam a shaman chyeju ni hkam la lu na lam hta, makam masham chyu sha hkam dahka di ya lu ai, nga ai. 

Anhte a myit nyan hpaji hte sawn lu, chye lu, mahtai jaw lu ai hta grau nna ga-san ni mahtang grau law ai, manghkang ni mung prut jat ding-yang re ai dinghta ga hta Madu gaw ning nga ai, “Sumsing lamu na nanhte a Kawa gaw nanhte hpe shi a mungdan jaw mayu ai; myit ru myit tsang hkum rai mi” nga ai. Karai a mungdan hta grau ai shagrau kumhpa hpa naw nga na ta? Kadai wa gingdan ai majaw hkam la lu na rai ta? 

“Lu ai yawng hpe dut kau nna matsan masha ni hpe jaw kau mu” ngu ai gaw dinghta ga na sutgan ni hta marin ai myit, manoi ai myit n galaw na lam hpe ngu ai re. Hkam la lu na Karai a mungdan, ngu ai hte shadawn yang dinghta ga e chyihkring chyihkra na pyaw hpa hte chyihkring chyihkra na matsan jamjau ai lam gaw hpa n re ai lam hpe shadum ya ai. Tinang hta ruyak jamjau grau ai ni hpe matsan dum garum ya chye na lam hpe mung sharin ya ai. Dinghta ga na arung arai ni hte sutgan ni hpe renghkang akyu jashawn chye ra ai lam, renghkang na lit lu ai masha hku nna akyu jashawn ra ai lam hpe mung shadum ya ai.

 Lădu lai myit ru myit tsang chye ga ai kun?

 Mungkan ga na sutrai sutgan ni a ntsa tinang gara hku mu mada a ta?

 Koi yen n mai byin wa ai manghkang ni a lapran hkamjan lu na matu tinang a makam masham kade gara hku garum  ya a ta? (Mahkrum madup ni hpe shada gam garan mai ai) 

2022: PRAN WAN LADAW LABAN (19) NA CHYUM LAIKA

PRANWAN LADAW LABAN 19
August 7, 2022
CHYUM MUNGGA DAW 1

HPAJI BYENG-YA 18:6-9

Ya hti nga gaw, Hpaji Byeng-ya a laika hta na rai nga ai.
Dai Shalawt Dat ai Shana a lam, anhte a ji woi ji wa ni hpe shawng nna tsun dan manu ai. Shing rai, Karai Kasang shanhte hpe dagam da ai hte maren, teng teng byin na ra ai lam anhte a ji wa ni mu chye nna, kam hpa ai myit kaba hte hkawm sa wa na ma ai. Na a amyu masha ni myit mada ai hte maren, ding hpring ai ni hkye hkrang la ai hkrum nna, n ding n man ai ni mahtang hten byak ai hkrum mat nu ai. Kaning rai nme law, anhte a hpyen ni hpe ari jaw ai amu a marang e, Nang anhte hpe na amyu masha ni shatai nna shagrau ya nit dai. Ding man ai ni a kashu kasha ni lagyim ai hku nna hkungga nawng ya ai shaloi, shanhte ga shaka da ma ai: Chyoi Pra ai ni gaw shaman ya ai hte hkrit hpa lam ni hpe, lang lata jawm hkam la na mara ai; shing rai, shanhte gaw ji woi ni a mahkawn ga hpe mahkawn mangoi nga ma ai.
Karai Kasang a mungga rai nga ai.

CHYUM MUNGGA DAW 2

HEBRE 11:1-2, 8-12

Ya hti na gaw, Hebre masha ni hpang de San Pawlu shagun dat ai laika hta na rai nga ai.
Makam masham ngu ai gaw, anhte myit mada ai chyeju lam ni teng teng lu la na hpe myit hkut shangun nga ai, garai n mu yu ai lam ni teng teng nga ai hpe tau chye shagun ai mung rai nga ai. Anhte a ji woi ji wa ni gaw shanhte a makam masham a majaw, sharawng awng ai lu la manu ai. 
Abraham gaw, shi hte shi a aru arat a sali wunli tai ma ra ai mungdan de, pru sa wa na matu shaga la ai hpe hkrum ai shaloi, kam sham ai hte madat sai; shi gade sa wa ai n chye ti mung, kam sham ai majaw, pru hkawm wa sai. Abraham gaw kam sham ai majaw, chyasam masha zawn Karai Kasang ndat da ai mungdan de sa nga nna, dai ga ndat hte maren sali wunli jawm hkam la lu ai Isak yan Yaku hte rau ginsum hta sha rawng nga ma ai. Kaning rai nme law, Karai Kasang shachyaw da nna, npawt nhpang grin nga ai mare hpe, shi myit mada nga ai. 11Sara mung aprat lai mat ti mung, kam sham ai a majaw, na um nasin rai wa lu na atsam lu la wu ai: kaning rai nme law, ga ndat tawn da ai wa kangka rai nga ai, ngu nna shi kam wu ai. Dai re ai majaw, la chyasi zawn re ai masha langai hta na, sumsing lamu na shagan ni hte, nammukdara makau na, n dang hti ai zaibru hta, grau law htam wa ai kashu kasha ni pra wa ma sai.
Karai Kasang a Mungga rai nga ai.

KABU GARA SHIGA

LUKA 12:32-48

Ya hti na gaw, Luka a laika hta na Kabu Gara Shiga rai nga ai.
Lang mi na Yesu Shi a sape ni hpe tsun mu ai gaw: Sagu hpung kaji e, hkum hkrit et: dai mungdan nanhte hpe jaw na, nanhte a Kawa myit sharawng nga ai. Nanhte lu ai arai dut kau nna, alu jaw mu; tinang a matu dingsa n chye ai gumhpraw jan galaw nna, lagut mung n du, manut e mung n sha lu ai, sumsing lamu e n htum n ma chye ai sutgan kyem da mu. Kaning rai nme law, nanhte a sutgan nga ai kaw, nanhte a myit masin mung nga na malit dai. 35Nanhte gaw nshang e shingkyit kyit nna, pyengding shatu let, tinang a madu hkungran poi de na bai wa nna, chyinghka wa akawk yang, shi hpe shaloi jang hpaw la lu hkra ala nga ai ni zawn, nanhte mung rai nga mu. Dai madu wa yang, maja nga ai ali ama ni gaw a lu ma ai. Ngai nanhte hpe teng teng tsun made ga: dai madu gaw Shi hkum shajin nna, shanhte hpe dung shangun nhtawm, shi nan shanhte hpe sa galaw jaw na mu ai. 
Yup tung hpawa e rai ti mung, u goi mahka de rai ti mung, shing rai maja nga ma ai hpe wa mu yang gaw, dai ali ama ni a lu ma ai. Ndai hpe myit dum nga mu: gara ahkying aten hta lagut sa na hpe nta madu chye yang gaw, shi a maja nga nna, shi a nta de n tawk waw shang lu hkra, shi galaw na wu ai. Dai rai nna, nanhte mung chyip chyip rai nga mu: kaning rai nme law, nanhte n shadu ai aten hta Masha Kasha du sa na ra ai, ngu nna tsun mu ai. Shaloi Petru gaw, Madu e, ndai ga shadawn gaw anhte hpe sha, shing n rai, yawng hpe tsun ai, rai nni? ngu nna san wu ai. Nta madu shi a kun dinghku ntsa e san tawn da nna, aten du jang lusha karan jaw lu na, kangka re ai myit su ai kunhting wa, kadai rai nga a ta? Shi a madu bai wa jang, shi hte seng ang ai bungli hkrak hkan galaw ai ali ama a nga ai.
Nanhte hpe ngai teng teng tsun made ai gaw, Dai madu gaw shi a arai mahkra a ntsa e dai shangun ma hpe san tawn da na wu ai. Shing n rai, dai ali ama gaw, Nye a Madu du wa na naw na la nga ai, nga nna shi a kraw kata e myit nga let, shangun ma manang ni numsha lasha hpe anu ajin di ai hte, lu nga sha nga nna, chyaru nang ai ni rai yang gaw, dai ali ama mada n hten ai nhtoi hte, n shadu ai ahkying hta, shi a madu du wa nna, dai wa hpe nhtum nni adup kau nhtawm, shi a kumhtaw dawm la ya nna, kangka n re ai ni hte rau tawn kau na ra ai. Tinang a madu a myit ra ai chye da ninglen, hpa mung n galaw n lajang ai ali ama gaw, law law lang anu kayet ai hkrum na ra ai: n chye nna kayat ging ai amu galaw kau ai ali ama chyawm gaw, loi mi sha anu kayat ai hkrum na ra ai. Law wa hkam la ai wa kaw na, law wa hpyi na ra ai. Law wa ap ya ai masha kaw na mung grau nna bai hpyi na mara ai.
Madu a Kabu Gara Shiga rai nga ai.

2022: PRAN WAN LADAW LABAN (18) NA MUNGGA

“Yawng mayawng gaw kăman lila”, (Hpaji Ningli). “Karai a man e sut su nga na malai, tinang a matu sutgan mahkawng da ai wa a gam măka hpe yu mu”, (Luka). “Nanhte gaw dinghta ga hte seng ai lam hta myit hkum manoi mu, sumsing mundan hte seng ai lam hta sha manoi nga mu!” (Kolose).

9/11 măbyin hpe dum na ga ai_ mungkan ting na hpăga ginjaw gindai, ngu tim n shut ai, kaba dik tsaw dik ai langchyi htingchying marun, nbungli langai hpra hte adawt agrawp kau ya ai. Bungli galaw masha 3000 jan si lawm ai; manu dan dik ai bungli matsing record yawng, masing yawng, hten lawm ai. Dai zawn byin lu na kadai tau nau shingran mu da a ta? 1994 a hpang na mungmasa sut-masa a majaw, Jinghpaw lauban ni law law a kajawng sha ngu na daram matsan mat ma ai; lungseng maw gaw tsăsam masha ni a lata de du mat ai. 2021 February praw 1 a hpang na mungmăsa sut-măsa a majaw a kajawng sha galai shai wa ai maka ni, kadai tau hkrau chye da a hka! A kajawng sha matsan mat shajang ai, a kajawng sha si jawng ai, Covid-19 a majaw n tau hkrau ai a kajawng sha ngu na daram si mat ai ni kade she law; kăga hkăla nba hte a kajawng sha si mat ai ni kade she law, tsun she n ma. 

Lăhta na mabyin ni hte kaga mabyin ni yawng gaw n grin ai dinghta ga na asak hte nga-mu nga-mai lam hpe shadum ya ai n rai a hka? Karai Kasang a man e sut su lam n tam, sumsing sutgan n mahkawng da ai ni a matu hpa hpe myit mada lu na rai ta?

Madu Yesu ga-shădawn hku tsun ai lauban a lam_ shi hpe kyang lailen n kaja ai, n tara ai, lagu ai, mawp ai ngu, hpa n tsun da ai. Langai mi sha shi hta ra kădawn ai: shi a prat masing hta Karai Kasang hpe shinggan da ai lam re. Karai Kasang hpe myit hta n bang da ai, hpang na prat a gam maka hpe n sawn shalawm ai masha ăngawk she rai nga ai. Tinang a asak hpe tinang n madu ai. Kade mi sădi săhka let nga ai rai tim, kade mi hkamja tara hkan ai rai tim, kade mi hpaji kunghpan ai rai tim, n myit mada ai a kajawng sha si wa lu ai.  

Dinghta ga na asak a nga-mu nga-mai lam, mungkan sutgan ja gumhpraw tam mahkawng ai, hpa n shut ai. Lu lawm hkra shakut ra ai; nga-mu nga-mai lam tam ra ai. Shut kaba gaw dinghta ga hte seng ai lam hta sha baw nawng da ai majaw, Karai Kasang mahtang yawng mayawng a Madu re ai lam, htawm hpang prat na n htum n wai ai asak aprat hpe n sawn shalawm ai lam re. Hpaji Ningli hta tsun da ai: kade mi n yup n sha măkan let bungli shăkut ai rai tim, tinang măkan let sălat hkaw nna lu mahkawng da ai sutgan ni, tinang si wa ai shani kaga masha ni gaw hpa mung n ba ai, salat n hkaw ai sha sutli dagraw hkam la ya ai; yawng mayawng kaman lila sha re, nga shadum ai. Dai kaman lila gaw hpa ta? Karai Kasang hpe tinang a prat, nga-mu nga-mai ai lam kaw na shinggan da ai lam rai nga ai.

Karai Kasang hpe shinggan da nna nga-mu nga-mai lam hte shimlum lam tam ai wa hpe Madu tsun ai, “Masha ăngawk e, dai na jang na nsa wenyi hpe dawm kau ya na ra ai; nang lu da ai sutgan ni kadai a matu tai na ta?” nga ai. Masha a labau hta sutgan mak hpyau ai, arawng aya marin hpyau ai ni, jahtum e hten bya shajang ai mabyin ni law law nga ai. Mungkan sutgan, ja gumhpraw ra kadawn ai lam n nga ai, n taw n tsang lu ninglen myit pyaw myit dik ai lam n nga lu ai majaw, tsa chyaru hte kaga nanghpam amyu myu a mayam tai mat ai ni law law, myit daw myit htum nna tinang hkum hpe tinang sat si ai law law nga ma ai. Wenyi asak hkrung lam hta kăman, hka n rawng ai htung hte bung ai. Karai Kasang gaw tsawra myit hpan bang da ya ai; tinang nga-mu nga-mai lam sha tam nna shada tsawra dawjau garum shingtau hkat ai myit masa n nga ai rai yang, kade lu su tim lachyum n pru na rai nga ai. Shimlum lam majing hte myit pyaw myit dik lam majing gaw Karai Kasang kaw na sha lu la mai ai lam, sharin la lu ga ai.

Kolose Laika hta tatut hkan shăman mai ai lam ni hpe shadum ya ai: n se nsa ai myit hte amu ni hpe koi yen na lam, sutgan marin ai myit hpe koi yen na lam, mungkan sutgan marin ai gaw hpara shaje hpe naw ai amu re ai lam, masu magaw amu ni hpe koi yen na lam ni  hpe shadum ya ai. Anhte a myit majing gaw shut hpyit mara awu asin wa she rai tim, Hkristu hta e masha ningnan tai wa ai. Dai awu asin ni hpe gawng kau nna Hkristu a gawng asam hpe bu hpun la sa ga ai, nga ai.    

 Mungkan sutgan hte ja gumhpraw, nga-mu nga-mai lam hpe gara hku mu mada hkap la chye ga ta?

 Tinang a hkamja lam jahtet kau na daram lu lai sha lai kau   ai kade lang galaw hkrup sa ga ta? Pyaw lai nna manghkang   shabyin yu sai kun?

 Madu tsun e, “Masha ăngawk” ngu ai shaloi tinang mung kade lang ăngawk yu sai hpe myit yu na.

2022: PRAN WAN LADAW LABAN (18) NA CHYUM LAIKA

PRANWAN LADAW HTA LABAN 18
July 31, 2022
CHYUM MUNGGA DAW 1

HPAJI NINGLI 1:2; 2:21-23

Ya hti na gaw, Hpaji Ningli laika hta na rai nga ai.
Kaman lila, kaman lila, nga nna Tara Hkaw Ningbaw Wa tsun nga ai. Kaman lila, Kaman lila, yawng mayawng kaman lila hkrai rai nga ai. Masha langai ngai chye chyang ai hpaji hte, amu bungli amyu myu galaw shapraw ti mung, dai amu hta hpa n shakut lawm ai wa a matu htawng da ya ra ai majaw, dai mung kaman lila hte tsinyam kaba rai nga ai. Masha gaw jan a npu e amu galaw shaja nna, shi a shakut sharang ai lam a majaw, hpa akyu lu la a ta? Shi gaw shi a prat tup yawm hkyen ai hkrum sha nna, shi a amu bungli ru yak ai hkrai rai nga ai; gaja wa, shana e pyi shi myit awai lu ai n rai. Dai mung kaman lila hku rai nga ai.
Karai Kasang a Mungga rai nga ai.

CHYUM MUNGGA DAW 2

KOLOSE 3:1-5, 9-11

Ya hti na gaw, Kolose masha ni hpang de San Pawlu shagun dat ai laika hta na rai nga ai.
Nanhte gaw Hkristu hte rau teng man ai asak de bai rawt wa manit dai majaw, Hkrsitu gaw Karai Kasang a hkra maga e dung nga ai lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu. Nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung Shi hte rau hpung shingkang hta dan pru na marin dai. Dai re ai majaw, dinghta ga na arawn alai hpe nanhte hta e jasim tawm kau mu: dai arawn alai gaw, nse nsa ai amu, awu asin re ai, ngang kayut ai, n kaja ai hpe marin marit ai myit hte, hpara sumla hpe nawku ai hte bung nga ai, nammak lawhpa lam ni rai nga ma ai. 
Shada da masu magaw ga hkum tsun myit. Nanhte a gawng shingyan dingsa hte rau, arawn alai dingsa hpe mung raw kau nna, gawng shingyan nnan hpe dagraw la manit dai. Dai gawng shingyan nnan gaw, Hpan Wa Ningsang a hkrang sumla hte grau nna bung wa magang, Karai Kasang hpe chye chyang ai hta grau nna kup tsup wa magang rai nga ai. Shaloi e, Yuda masha hte Greka masha, matu gadoi hkam ai wa hte matu gadoi n hkam ai wa, garing garang re ai masha hte Skuti masha, mayam wa hte shanglawt wa ngu nna, n mai ginhka ai: Hkristu chyu sha nga ai: Shi gaw yawng mayawng rai nga ai hte, yawng mayawng hta e nga nga ai.
Karai Kasang a Mungga rai nga ai.

KABU GARA SHIGA

LUKA 12:13-21

Ya hti na gaw, Luka a laika hta na Kabu Gara Shiga rai nga ai.
Lang mi na, shawa hpawng kata de masha langai mi gaw, Sara e, ngai hpu wa hpe ngai hte sali wunli karan la na lam tsun ya e, ngu nna Yesu hpe tsun wu ai. Yesu gaw, Jinghku wa e, nan a ntsa e tara agyi hte hparan wa tai na, ngai hpe kadai san da a ta? ngu nna shi hpe htan wu ai. Shaloi shawa masha ni hpe Yesu tsun ai gaw: Nammak lawhpa ai myit mahkra hpe hkap shadang lu hkra, sadi ai hte maja nga mu. Kaning rai nme law, masha gaw sutgan law law lu ti mung, dai sutgan shi a asak hpe rem sin nga ai n rai, ngu mu ai. Ndai ga shadawn mung Yesu hkai dan wu ai: Sahti langai mi a yi hkauna gaw nsi naisi hkai nmai grai kaja lu ai. Dai rai nna, dai wa gaw, Ngai kaning di na i? nye a nsi naisi shinggyin da na shara ngai n lu nngai, ngu nna myit yu nga ai. 
Shaloi shi gaw, Ngai ning rai galaw na we ai: nye a mam dum dingsa ni hpe ngai run kau nna, grau kaba ai galaw na we ai: dai ni hta nye a nsi naisi hte sut rai mahkra hpe ngai shinggyin da nhtawm, ngai hkum hpe ning ngu na we ai: Nye a myit masin e, shaning law law a matu, arai kaja law law hpe nang mahkawng da nit dai. Myit hkum ru sa; lu nu, sha nu. Pyaw pyaw rai nga u, ngu nna tsun na nngai, nga ai. Shaloi Karai Kasang gaw dai sahti wa hpe, Masha angawk e, dai na jang na a asak hpe dawm la kau ya na ra ai: dai rai nna, nang mahkawng shachyip da ai arai ni gaw, gade a matu tai na ra ta? ngu wu ai. Tinang a matu sutgan mahkawng da nhtawm, Karai Kasang hta n lu n su ai wa gaw, dai zawn re ai masha rai nga ai, ngu nna Yesu shanhte hpe tsun mu ai.
Madu a Kabu Gara Shiga rai nga ai.

2022: PRAN WAN LADAW LABAN (17) NA MUNGGA

Hpyi mu! Tam mu! Akawk mu! Myit n daw ai sha hpyi ai, tam ai, akawk ai rai yang, tinang ra măyu ai lam hpe hkrak lu la na lam Madu tsun ai. Karai Kasang gaw mai kăja dik htum ai Kawa re ai majaw, tsawra kamhpa myit tup hkra hte hpyi ai wa hpe n jaw ai n nga na, nga nna Madu tsun ai. Tinang hpe akyu n jaw ai, hten bya lam byin shăngun na rai yang, ra mayu, byin mayu ai hta grau akyu rawng ai baw hpe mahtang jaw chye ai Kawa re ai lam, Madu shărin ya ai. Abraham gaw tsawra kamhpa myit kaba hte Karai Kasang kaw akyu hpyi htinglu ai; Abraham gaw akyu hpyi ai lam hta kaja dik ai kăsi ningli tai wa ai. Hkristan masha shagu, kaga masha ni hta ra kadawn ai lam a matu akyu hpyi htinglu ya chye ai ni tai ra ai lam hpe mung sharin ya ai. 

Akyu hpyi ai ngu ai gaw, hpyi ai wa hte jaw ai wa, shan lahkawng a lapran tsun shăga hkat ai amu re. Tinang hku hkau ai wa kaw na lăma ma hpyi na agam ai myit n nga ai rai tim, n hku n hkau ai masha kaw na lăma ma gărum hpyi na teng sha agam na rai nga ai. Hku hkau ai myit gaw hkrit kăya, agam ai myit, n kam n tsen ai myit hpe jăhkoi kau ya ai. Abraham gaw Karai Kasang hte hkau man ai majaw, wan nat sat kau hkrum maw ai Sodom hte Gomora mare masha ni a matu mara, kahtap kahtap nna hpyi htinglu ya ai. Jăhtum e, dai mare dinghpring ai masha marai 10 pyi n tam mu ai jang Abraham asum jaw ai; masha kaja kadai n nga ai majaw, Sodom/ Gomora wan nat kau hkrum ai.  
 Abraham gaw Karai Kasang a man e ja ja shagrit shanem lu ai: “Ngai ga numhpu hte dap sha she rai nngai” nga nna hpyi nem ai. Hpyi htinglu ya na gingdan ai n re ai hpe shi dum ai. Rai tim, grit nyem ai myit hte mung, tsawra kamhpa ai myit hte mung, myit n daw myit galu let mung, akyu hpyi htinglu ya ai. 

Kuptsup ai myit masa hte akyu hpyi ai; prat shagu na masha ni a matu kasi ningli tai wa ai. Kalang mi na aten hta San Benedict hte manang ni gaw kănau kăjan San Scolastica kaw sa kăwan ai. Wenyi asak hkrun lam hte seng nna shăna jan du hkra jahta hkat ma ai. Jan du wa ai majaw shi a jawng de htang wa maw ai. Kanau tsun ai, “Shana tup jahta ga, rai hkum wa” nga ai. Benedict n hkraw ya ai majaw kanau Scolastica gaw kahpu myit lai na lam akyu hpyi kap di ai. A kajawng sha mu she dem rai mărang lăja lăna htu wa ai majaw, Benedict hte manang ni nta n mai wa mat ai. Shana tup wenyi asak hkrun lam woi jahta nna jahpawt e she kahpu hpe tsun ai, “Ya wa mai sai” ngu dat dat ai da. Dai hpang kade n na yang Scolastica si mat nna lamu de lung mat wa ai hpe kahpu mu dat ai. Akyu hpyi ai atsam n rai a hka! Kanau gaw Karai Kasang hte grau hkau man ai lam hpe Benedict chye la nu ai.  

Akyu hpyi ai hte seng nna shinggyim masha atai hpe dagraw hkam la ai Yesu gaw tut akyu hpyi ai lam, Chyum Laika hta law law ka da ai. Kawa Karai Kasang hte langai sha tai ai hte maren, masha mung re ai Yesu gaw akyu hpyi ai hta Kawa Karai hte hku hkau lam hpe gawgap ai. Kawa a myit ra ai lam hpe tam ai, shadik ai. Mahattama Gandi tsun ai, “Akyu n hpyi ai rai yang, myit masin wenyi maza wa ai; akyu hpyi ai hte sha myit masin wenyi hpe jasan jaseng la lu ai” nga ai. Akyu hpyi ai, ngu ai gaw gawng kya ai shinggyim masha a myit masin wenyi a atsam marai hpe shădaw shăngang ai. Myit masin san seng yang sha kădai hte manghkang n nga lu na rai nga ai. Manghkang byin wa yang mung, Karai a masing hpe chye na hkap la lu hkra, nden marai hpe shaja ai.

Law mălawng anhte gaw lu mayu, ra mayu, byin tai mayu ai lam ni hpe hpyi ga ai; akyu hpyi ninglen n ra mayu ai, n byin mayu ai ni hkrum katut chye ga ai. Shing re ai aten hta akyu hpyi ai lachyum n pru sai, ngu na kun? Myit masin wenyi a atsam ningja hpe mahtang jaw ya ai lam hpe myit dum chye ga ai kun? Ja gumhpraw, arawng aya hpyi nna lu la ai a marang e grau ai htenza ai lam byin wa lu ai hpe gaw myit yu ga ai kun?

Ahkyak grau ai gaw akyu hpyi ai a marang e Karai Kasang hte grau hkau man wa na, myit masin wenyi san seng nga na, Karai a tsawra myit hte makawp maga ai chyeju ni hpe hkam la lu nna Karai Kasang hta shimlum lam majing, simsa ai lam majing hpe hkam la lu na, hkamjan lu ai chyeju, manghkang ni hpe hpăran chye ai myit hprang ai chyeju,…dai ni gaw kata na ningja hpe grau dai, grau ningtawn shangun ai n rai a hka? 

  Shani shagu na akyu hpyi ga tsun yang hpa hpa hpe malawng hpyi a ta?
  Myit mada ai akyu ni n lu la ai, ngu ai aten hta myit daw chye ai kun?
  Myit masin san seng na matu akyu hpyi shaja ai kun?

2022: PRAN WAN LADAW LABAN (17) NA CHYUM LAIKA

PRANWAN LADAW HTA LABAN 17
July 24, 2022

CHYUM MUNGGA DAW 1

NPAWT NHPANG 18:20-32

Ya hti na gaw, Npawt Nhpang laika hta na rai nga ai.
Madu gaw Abraham hpe tsun ai gaw: Sodom mare hte Gomorra mare a ntsa e mara gade wa shagun ma hka! Shanhte a shut hpyit ai gaw kaba la nga ai majaw, ya ngai sa yu nna, ngai kaw hkrang pru ai nsen hte maren, shanhte gaja wa galaw ai n galaw ai gaw ngai yu yu na we ai; n galaw ai rai yang mung ngai chye na we ai, ngu nna tsun wu ai. Abraham kaw sa manam ai ni gaw myiman kayin nna Sodom maga de sa wa ma ai; Abraham chyawm gaw Madu a man e naw tsap nga ai. Shaloi Abraham gaw sit sa nna, Ding hpring ai ni hpe n kaja ai ni hte rau, gaja wa nang jahten kau na wu ni? Dai mare hta e ding hpring ai masha manga shi a majaw, dai mare hpe matsan dum ai hte n jahten ai, n da lu n ni? 
Ding hpring ai ni hte n kaja ai ni hpe maren yubak jahkrum na gaw, nang hte tsan nga u ga; rai sa, dai gaw nang hte, tsan nga u ga: ga ntsa ting a Tara Agyi Wa gaw ding man ai hku galaw na n rai ni? Ngu nna tsun wu ai. Dai rai nna Madu gaw, Sodom mare kata e ding hpring ai masha manga shi hpe ngai mu yang gaw, dai ni a majaw, shara ting hpe ngai shalai kau na we ai, ngu wu ai. Bai Abraham gaw, Ngai ga nhpu hte dap sha rai nga nngai, rai ti mung, Nang Madu hpe ngai bai hpyi nem nngai: ding hpring ai masha manga shi hta manga yawm nga nhten; shing rai masha manga yawm ai majaw, mare ting hpe jahten na wu ni? ngu nna bai tsun yang, Dai mare hta marai mali shi manga ngai mu we yang gaw, dai shara hpe ngai n jahten na nngai, ngu wu ai.
Bai Abraham gaw, Dai mare e mali shi nang mu hkrup na nhten, ngu nna kahtap tsun yang, Madu gaw, Dai mali shi a majaw ngai n jahten na we ai, ngu mu ai. Bai Abraham gaw, Nye a Madu masin hkum pawt et, ngai naw tsun we ga: dai mare hta marai sumshi nang mu hkrup na nhten, ngu yang gaw, Madu gaw, Marai sumshi ngai mu yang gaw, ngai n di na nngai, ngu wu ai. Bai Abraham gaw, Nye a Madu hpe ngai naw tsun na nngai; dai mare hta marai hkun mu hkrup na nhten, bai ngu wu yang, shi gaw, Dai marai hkun a majaw ngai n jahten na nngai, ngu wu ai. Bai Abraham gaw, Nye a Madu masin hkum pawt et; ndai lang mi sha ngai naw tsun n ga: dai mare hta marai shi mu hkrup na nhten, ngu yang, Madu gaw, Dai marai shi a majaw dai shara hpe ngai n jahten na nngai, ngu wu ai.
Karai Kasang a Mungga rai nga ai.

CHYUM MUNGGA DAW 2

KOLOSE 2:12-14

Ya hti na gaw, Kolose masha ni hpang de San Pawlu shagun dat ai laika hta na rai nga ai.
Nanhte kashin kamun hkam ai shaloi, Hkristu hte rau lup kau ai hkrum manit dai; dai hta n ga, si mat ai ni kaw na Hkristu hpe jahkrung sharawt la ai Karai Kasang a atsam hpe, nanhte kam sham ai a marang e, kashin kamun hkam ai shaloi, Hkristu hte rau sharawt la ai hpe mung hkrum manit dai. Nanhte gaw tara tawt lai ai hte, matu gadoi n hkam ai majaw, chyasi ni rai nga ti mung, Karai Kasang anhte a shut hpyit mara mahkra hpe raw dat kau ya nna, Hkristu hte rau nanhte hpe jahkrung ya manit dai. Karai Kasang gaw tara hta hkang da ai hte maren n hkan nna, anhte wa ra ai hka hpe shaprai kau ya sai; wudang hta e dai hpe dit shakap let, Shi dai hpe yeng seng kau nu ai.
Karai Kasang a Mungga rai nga ai.

KABU GARA SHIGA

LUKA 11:1-13

Ya hti na gaw, Luka a laika hta na Kabu Gara Shiga rai nga ai.
Lang mi na Yesu gaw shara mi hta akyu hpyi nga ai rai nna, shi hpyi ngut jang, shi a sape langai mi gaw, Madu e, Yawhan gaw shi a sape ni hpe akyu hpyi na sharin ya ai zawn, anhte hpe mung sharin ya mi, ngu nna Yesu hpe tsun wu ai. Shaloi shi gaw, Nanhte akyu hpyi yang, ning ngu mu: Wa e, Na a mying ningsang Chyoi Pra nga lit ga; Na a mungdan du wa ru ga. Anhte ra ai lusha gaw, shani shagu anhte hpe jaw mi. Anhte hpe shut ai ni yawng mayawng a mara, anhte raw kau ya ga ai majaw, anhte a mara hpe mung raw kau ya mi. Agung alau nga ai de anhte hpe hkum du shangun mi, ngu nna sape ni hpe tsun mu ai. Bai Shi shanhte hpe, Nanhte hta na langai mi jinghku lu ai rai nna, yuptung e shi kaw sa nhtawm, Jinghku wa e, muk tawng masum ngai hpe gan hkoi ya e; nye a jinghku wa hkrum lam de na ngai kaw du ra ai rai nna, shi hpe jaw sha na hpa mung n lu nngai, ngu yang, nhku de na wa gaw, Ngai hpe hkum shatsang et; chyinghka mung la kau se ai; ngai sha ni mung ngai hte rau yup ma sai: nang hpe jaw na ngai n rawt lu ni ai, ngu nna hkap htan ya ai. 
Ngai nanhte hpe tsun made ga, jinghku re ai nga nna, n rawt jaw hkraw ti mung, shi akroi anoi hpyi nga ai majaw, dai wa hpe ra mara rawt jaw na wu ai. Bai, nanhte hpe ngai tsun made ai gaw, Hpyi mu, shaloi lu la na myit dai; tam mu, shaloi nanhte mu na myit dai; akawk mu, shaloi nanhte a matu hpaw ya na ra ai. Kaning rai nme law, hpyi ai wa kadai mung lu la ai; tam ai wa mung mu la ai; akawk ai wa hpe mung hpaw ya na ra ai. Nanhte hta kadai kawa mung, kasha gaw muk hpyi yang, nlung jaw na wu ni? Nga hpyi yang, nga a malai lapu jaw na wu ni? Udi hpyi yang, n gaw gawk jaw na wu ni? Dai rai nna, nanhte n hkru ai ni pyi, tinang a kasha ni hpe kaja ai kumhpa chye jaw yang gaw, dai hta grau nna sumsing lamu na Kawa gaw, shi kaw hpyi ai ni hpe dai Chyoi Pra ai Wenyi jaw na ra ai, ngu nna sape ni hpe Yesu tsun mu ai.
Madu a Kabu Gara Shiga rai nga ai.

2022: PRAN WAN LADAW LABAN (16) NA MUNGGA

“Masha gaw sha-hpa hte sha asak hkrung lu ai n rai; Karai Kasang a n-gup kaw na pru ai mungga hte mung hkrung lu na rai nga ai”. Lăchyum gaw hkumhkrang lu-sha hte sha n ram ai, wenyi a lu-sha mung ra ai, ngu ai lam re. Bai, lam mi gaw_ mănam, grau nna n chye ai tsăsam wa hpe hkălum la ai amu gaw Karai a shagrau ai hpe hkam la lu ai lam sharin ya ai. “Ngai mănam tai hkawm ai aten hta nanhte ngai hpe hkap bawp hkălum la mi ai….” Nga, Madu tsun ai.

Asak 15 ning daram re ai brang lawn langai, Myitkyina kaw na tsan dik ai mare buga masha, jawng matut lung na matu Myitkyina de du ai. Myitkyina mare e wam hkawm yang lwidwi si sumpum dut taw nga ai hpe shi mu hkrup ai. Sha mayu ai hkrak, gumhpraw n jaw ai namsi lahkawng masum mi hta la kau ya ai da. Hkawm manang wa shi hpe tsun ai_ “Manang wa, nang gumhpraw n jaw ai hta la ya ai wa i!” ngu yang shi htan tsun ai, “Shi gaw grai lu majaw sumpum da ai she rai nga ai” ngu ai da. Moi gaw bum-ga nam kăhtawng hkan e dut/mari ngu ai ga-si hpe n chye ai ni law law nga ma ai. Dai ni na prat du hkra, bumga nam kahtawng law law e lai sa lai wa manam ni hpe shat majoi daw ai alai naw grin nga ai. Myo mare hte ni wa magang dai zawn re ai alai mat wa  magang rai nga ai.

Tsăsam manam hpe hkap bawp, yup shara jaw, shat jaw sha dat na n galaw mai ai lam law law nga ai. Rai tim, shabrai kumhpa n myit mada ai, ra kadawn nga ai masha hpe mu hkrup ang katut jang hkap hkălum dawjaw ai amu gaw mai kaja ai lam, Karai a shagrau ai chyeju hkam la na n shut n shai re ai lam, Chyum mungga ni hku nna sharin ya ai. Dai gaw, makam masham kaw na prut pru ai amu kaja rai nga ai. Kamsham myit mada ai ningli grung ja ra ai lam hpe sharin la lu ga ai.

“Abram gaw mai-o hpun shingnip e nga nga yang” ngu ai lachyum gaw shani chyingtung e akyu hpyi nga ai, makam masham kaba ai wa re ai lam hpe tsun ai. Makam masham rawng ai la kaja langai gaw lani mi hta n law htum masum lang akyu hpyi, Karai hpe chyeju dum shakawn ai re. “Nta wang numshang e” ngu ai lachum gaw lai sa lai wa manam ni hpe hkap bawp la lu na matu, ngu ai re. Tsăsam manam marai masum, shanhte n-gup n hpaw shi yang, shanhte hta ra kadawn ai lam ni hpe Abraham chye ya ai majaw, shi shawng ga hpaw hkap hkălum ai. Lu-sha grung grung dawjaw dat ai lam gaw shi hta mai kaja ai myit rawng ai, makam masham kaba ai majaw rai nga ai. Abraham gaw n myit mada ai hku chyeju htang katut nu ai: kasha lu ten grai lai mat ai aten hta she shădang sha lu na lam na la ai.

Anhte hku hkau ai shada jaw lu jaw sha, shada dawjau hkat chye ga ai. Lu-sha hta sha baw nawng da ga ai kun? Jawm lu sha ai aten hta tsun jahta hkat ai ga manu dan la ai; manu dan ra ai lam hpe gaw myit dum ga ai kun? Shada madat hkat ga ai kun? Kaga ni hpe shaga ten n jaw ai, tinang hkrai ladu lai shaga kau ai kun? Yawng hpe akyu jaw ai ga, yawng e madat mai ai ga, shada hkung ga tsawra ai lam hpe madun ai ga ni tsun ai a marang e, akyu chyeju law law jaw ya lu ai. Jawm lu sha ga yang, Madu Yesu mung lu sha ai ni hte arau re ai hpe myit dum mai ga ai.

Martha gaw lu-sha lăjang ai hta lai nna kaga lam ni a majaw myit law bu ai. Dai majaw, mănam hpe kau da nna tsun jahta hkat ai lam ahkyak ai hpe malap kau ai. Martha hprai kau ai amu hpe Maria kapa ya ai: Yesu hte jăhta hkat ai, Yesu kaw na wenyi hte seng ai lam ni hpe hkaja la ai, madat la ai lam hpe madung shătai ai. Masha hta hkum hkrang a matu sha-hpa ra kădawn ai zawn, wenyi a matu lu-sha naw ra ai lam, Madu Yesu sharin ya ai.

San Pawlu tsun ai hta mungsung ni hpe Karai e hpaw tsun dan ai, jahtum e kuptsup ai hku Madu Yesu hpaw tsun sharin ya ai, nga ai. Karai gaw Shi a sut su ai kaw na shinggyim masha ni hpe jaw ya mayu ai, shăgrau jaw măyu ai lam hpe Hkristu hta hpaw dan, yan dan sai, nga ai. Hkristu Yesu tsun hpaw dan ai a marang e, Yesu shi a lam, shi sharin ya ai mungga ni hpe hkaja hkan shatup ai a marang e, sawn n dep ai Karai Kasang kaw na sutli wunli hkam la lu na lam, Kasa Pawlu sharin ya ai.

 Rau lu rau sha let shaga jahta hkat yang Karai Kasang hpe dum ga ai kun? Yawng hpe zinlum ai, yawng myit pyaw ai baw shaga ga ai kun?
Manam daw chye ai myit gade rawng ga ta?
Mungga gaw wenyi a sha-hpa ngu ai hpa rai ta?

2022: PRAN WAN LADAW LABAN (16) NA CHYUM LAIKA

PRANWAN LADAW HTA LABAN 16
July 17, 2022
CHYUM MUNGGA DAW 1

NPAWT NHPANG 18:1-10

Ya hti na gaw, Npawt Nhpang laika hta na rai nga ai.
Abraham gaw shani jan ja ai aten e, shi a sum chyinghka kaw dung nga yang, Madu gaw Mamre a wamyi hpun makau e shi kaw dan pru nga ai. Abraham mada yu nga yang, shi a makau e masha marai masum tsap nga ma ai. Dai ni hpe mu jang, sa tau la na, sum chyinghka nna gat sa nhtawm, ga de dingnyawm dagup let tsun wu ai gaw, Nye a madu e, na a man e ngai myiman pa nngai rai yang gaw, na a mayam wa kaw na hkum lai sa wa et; ntsin loi mi la sa ya de ga; nanhte a lagaw kashin kau ngut jang, dai hpun npu e naw sa nga mu: muk n-gup mi mung ngai naw la sa na nngai; shingrai nanhte garai n lai sa wa yang, n-gun loi awai la mu: kaning rai nme law, dai a matu nanhte a mayam wa kaw nanhte du sa manit dai, ngu wu ai. Shanhte mung, Nang tsun ai hte maren di u, ngu mu ai. 
Shaloi Abraham gaw sum kata e nga ai Sara hpang de alawan gat shang wa nna, Muk shadung jare masum alawan gan gumchya nhtawm muk pa kaba u, ngu nna tsun da wu ai. Bai Abraham gaw dumsu hpung de gat sa nhtawm, nu nu nai rai hpum sau ai dumsu kasha dun wa nna, shangun ma hpe ya mu ai; dai wa mung alawan sat lajang wu ai. Shing di htawbat hte nga chyu mung, shi lajang ai dumsu kasha mung shi la nna, shanhte a man e baw jaw mu ai: Abraham chyawm gaw dai hpun npu shanhte a makau e tsap nga ai; shanhte mung sha nga ma ai. Shaloi shanhte gaw, Na a madu jan Sara gaw kanang nga a ta? ngu nna san mu ai. Abraham gaw, Wora sum e nga ai, ngu nna htan wu ai. Shanhte hta na langai wa gaw, Htaning ndai aten hta nang hpang de ngai teng teng bai du na ring ngai rai nna, na a madu jan Sara gaw shadang sha lu na ra ai, ngu nna tsun wu ai.
Karai Kasang a Mungga rai nga ai.

CHYUM MUNGGA DAW 2

KOLOSE 1:24-28

Ya hti na gaw, Kolose masha ni hpang de San Pawlu shagun dat ai Laika hta na rai nga ai.
Ya nanhte a matu mara ngai tsinyam tsindam hkrum ai majaw, kabu gara nga nngai. Hpa majaw nga yang, ndai tsinyam tsindam a marang e, Hkristu a hkum hkrang rai nga ai Nawku hpung a matu, dai Madu naw hkrum ra ai yubak nni nkri hpe, nye a hkum shan hta e ngai jahkum shatsup nga nngai. Nanhte hpe Karai Kasang a Mungga htawn shana ya na matu, Karai Kasang ngai hpe ahkang jaw da ai shaloi, Nawku Hpung a ali ama ngai tai wa ni ai. Ngai htawn shana ai Mungga gaw: moi chyaloi nhkoi prat mi hte prat mi Karai Kasang makoi magap da nna, ya e Shi a amyu masha ni hpe shadan ai mung sung rai nga ai. 
Karai Kasang gaw Shi a chyoi pra ai ni hpe dai mung sung madun dan nna, de a hpung shingkang hte manu dan ai sutgan gade wa galu kaba ai gaw, tara maigan masa ni hpe madun dan ai mung Shi ra nga ai. Dai mung sung gaw, Hkristu gaw nanhte hte rau nga nga nna, nanhte hpung shingkang lu la na myit mada shara Shi rai nga ai. Dai Hkristu a lam hpe nan anhte hkaw dan nga ga ai. Masha shagu hte hpe Hkrsitu hta e jahkum shatsup na matu, Shi a hpaji byeng-ya hte nanhte yawng hte hpe shadum jahprang ai hte sharin shaga nga ga ai.
Karai Kasang a Mungga rai nga ai.

KABU GARA SHIGA

LUKA 10:38-42

Ya hti na gaw, Luka a laika hta na Kabu Gara Shiga rai nga ai.
Lang mi na Yesu gaw kahtawng langai mi hta shang wu ai: Marhta ngu ai numsha langai mi mung, shi a nta hta Yesu hpe hkap la wu ai. Dai numsha gaw Maria ngu ai kanau langai mi lu ai: shi gaw Madu a lagaw nhpang e dung nga let shi a ga madat nga ai. Marhta chyawm gaw galaw jaw ai amu law law a majaw myit kyin dum nga ai: dai rai nna, shi sit sa nhtawm, Madu e, ngai nau gaw galaw jaw ai amu hta ngai hpe hkrai sha rap di da ai hpe nang hpa n nawn n ni? ngai hpe garum na, shi hpe tsun dat ya e, ngu wu ai. Shaloi Madu gaw Marhta, Marhta nang gaw amu lam law law a majaw myit ru nna tsang nga ndai; rai ti mung, ra ai gaw loi li sha rai nga ai; hkrak nga yang langai mi sha ram nga ai. Maria gaw kaja htum ai kumhtaw lata la nu ai rai nna, dai hpe shi kaw na shaw la kau ya lu na n rai, ngu nna Marhta hpe htan wu ai.
Madu a Kabu Gara Shiga rai nga ai.

2022: PRAN WAN LADAW LABAN (15) NA MUNGGA

“Na Madu, Na Karai Kasang hpe na myit masin wenyi tup hkra hte, na ninggun atsam up hkra, na myit marai tup hkra hte tsawra lu na. Dai hpang, na htingbu wa hpe na hkum hte maren tsawra lu na”(Luka). “Madu a Mungga hpe hkan shatup lu na lam, dai Mungga gaw nang hte ăni sha nga nga ai; na a n-gup hte na salum hta nga nga ai. (Tara Jahprang).

Du/ Hkawhkam ni gaw shanhte a asak sin makawp maga na hpyenla ni hpe laksan hkringsan san da ma ai. Dai hpyenla ni gaw shanhte sin makawp ai Du/Hkawhkam a matu ra wa ai aten hta si hkam ra ma ai. Tsawra myit hte rai kun? Mahkoi n rai! Hpa mi ngu tim shanhte gaw asak ap nawng nna Du/ Hkawhkam a asak lawt hkra măga na, ra wa jang si hkam na, ngu ai ga-sădi hkam la da ai majaw rai nga ai. Dai majaw, shabrai kumhpa mung tsaw grau ma ai. Tsawra myit hte, ngu tsun na yak ai.

Asak a madu, chyeju yawng mayawng a madu re ai Karai Kasang mahtang, shi a tsawra myit a jaw e hpan da ai shinggyim masha kaw na tsawra ai myit, kangka ai hku dawjau ai myit masin tup hkra hpyi la ai, myit mada ai gaw jaw ai, rapra ai lam rai nga ai. Karai e hpan da ai amu, tsawm ai, kaja ai, mu ai, dwi sau ai, pyaw ai, yawng Karai Kasang kaw na hkrai rai nga ai. Dai mai kaja ai baw ni hpe mu nna Karai Kasang a mai kaja ai lam hpe dum chye hte Karai Kasang hpe tsawra chyeju htang ging ga ai. Rai tim, shinggyim masha ni mahtang dinghta ga na pyaw-hpa tsawm-hpa ni hta myit maju dun, len mat ai majaw, n mu lu ai Karai Kasang hpe hpa n nawn di chye ma ai.

Sumtsaw marai lahkawng a lapran na kanawn mazum lam hpe yu yu ga_ shada tsawra myit tup hkra jaw hkat lu ai gaw kuptsup dik ai rai nga ai. Loi yawm mat ai zawn, lu mai ai aten tup n jaw jang, galaw ya lu ai baw tup hkra n galaw ya jang, n tsen ai myit shang wa jang,… kade she machyi hkat dum ai hpe hkam sha yu mai ai. Tinang tsawra ai wa a matu hpa mi galaw ya ya, sharawng awng ai hte galaw ya ai; aten jaw ai; kade yak tim yak ai hku n sawn ai; kade ba kalawp tim ba ai, ngu n tsun ai; ra wa jang asak hpe pyi n lahpawt ai sha, tinang tsawra ai wa a matu hpa mung galaw ya gwi ai n rai a hka! Tsawra hkat lu ai majaw kabu ai hta grau ai hpa naw nga na ta? Shinggyim masha hpe ra mi ra yawng jaw da ai Karai Kasang gaw, masha kaw na tup hkra re ai tsawra myit hkam la na lam tara matsun jaw da ai. Tara matsun n jaw da ai rai yang, shinggyim masha gaw lam dam nna grit grau ai hpan da amu ni hpe mahtang grau tsawra ai de du mat lu ai.

Dai tara matsun, Karai a Mungga hpe tsan tsan de tam hkawm n ra ai lam, Tara Jahprang hta tsun da ai: nang hte ăni sha nga nga ai; na n-gup hte na salum hta nga nga ai, nga ai. Myi-hprap wan, tsi mawan lang, hkai-rem… tara mahkrun hte tai shai nna akyu jashawn shagu, manghkang byin wa ai. Tinang a asak du hkra lawm mat lu ai. Dinghta ga na manan tara hpe tawt lai shagu manghkang hkrum sha lu ai. Shingra manan tara (Taba Wa Taya) gaw anhte hte ăni sha nga nga ai zawn sha, Karai a tara matsun mung anhte hte ăni sha nga nga ai. Tinang a myit masin hta rawng nga chyălu tara matsun hpe yin la nna n-gup aga hku tsun shapraw, chyeju shakawn na lam, Tara Jahprang e shadum ya ai.

Myen ga-malai nga ai: “Sa n kam jang tsan ai, sa kam jang ăni sha re” nga ai. Hpa mi galaw law, Karai Kasang hpe dum ai, Shi a tara matsun ni hte shăbung nna nga sa ai rai yang, myit hta yak dum ai lam hpa n nga ai, myit pyaw myit dik ai lam lu la mai ai. Kangka ai myit n rawng ai masha, ow kap le kap re ai masha gaw myit madung n nga ai majaw, awng dang lam de mung n du lu ai.

Htingbu wa/jinghku wa, ngu ai shaloi, tinang a gărum shingtau ai hpe ra taw nga ai masha shăgu gaw tinang a htingbu wa re ai lam, Madu Yesu sharin ya ai. Amyu măsha n ginhka, makam masham n ginhka, tinang a man e ruyak jamjau nga ai masha shăgu gaw tinang a htingbu wa re ai lam, Madu Yesu sharin ya ai. 

Yawng mayawng hta Karai Kasang hpe nambat langai shara jaw nna tsawra lu na, nga ai hpe hkan shatup na lam   kade shakut a ta?

Marin ai myit, mak ai malu ai myit hte Karai Kasang hpe  mung, kaga masha ni hpe mung, tsawra lu na kun? 

Masha amyu madang ginhka ai myit tinang hta kade kaba  ai madang rai ta?