2022: PASKA LADAW LABAN (4) NA CHYUM LAIKA

PASKA LADAW HTA LABAN 4
May 8, 2022
CHYUM MUNGGA DAW 1

KASA 13:14, 43-52

Ya hti na gaw, Kasa Laika hta na rai nga ai.
Pawlu yan Barnaba gaw Perge kaw nna rawt sa wa nna, Pesidi mung na Anti -ok mare de du ma ai. Ya, Laban nhtoi e, tara jawng hta shang dung nga ma ai. Tara jawng na bra mat wa jang, Yuda masha ni hte Yuda hpung de kayin wa ai maigan masha ni law law wa, Pawlu yan Barnaba kaw hkan nang ma ai. Shan lahkawng shanhte hpe sharin shaga nna, Karai Kasang shanhte hpe jaw ai chyeju hte maren, kangka rai hkan sa lu na matu shadum jahprang ya mu ai. Hpang na Laban Nhtoi hta, Karai Kasang a Mungga na la na matu, mare ting, ganoi mahkra, wa zup hpawng nga ma ai. Yuda masha ni chyawm gaw, dai shawa hpawng hpe mu jang, manawn ai myit hte hpring chyat nga ma ai rai nna, Pawlu tsun ai lam hpe ndang hkat ai hte aroi ara ngu da mu ai. 
Pawlu yan Barnaba nden ja ai myit hte shanhte hpe htan ya nna, Karai Kasang a Mungga nanhte hpe shawng tsun dan na ra ga ai; rai ti mung, nanhte dai hpe n hkap hta la ai majaw, n htum n wai asak hte n ging n dan ai hku, nanhte nan daw dan la manit dai. Dai rai nna, maigan amyu ni hpang de anhte myi man kayin na saga ai. Kaning rai nme law: Lamu ga htum hkra nye a hkye hkrang la ai lam dep lu hkra, Ngai nang hpe maigan amyu ni a matu nhtoi shatai sade ai, nga nna Shi Madu anhte hpe hkang dat mani ai, ngu nna tsun mu ai. Maigan amyu ni dai na jang, kabu gara nga ai hte, Karai Kasang a mungga hpe shagrau sha-a ma ai, n htum n wai asak lu la na san da ai ni nlang hte mung, kam sham mat ma ai. Shing rai Karai Kasang a mungga gaw dai mung ting pri rai wa sai. 50Yuda masha ni chyawm gaw, tara hkungga nna arawng lu ai num ni hte dai mare na agyi ni hpe shadut nna, Pawlu yan Barnaba hpe zingri zingrat di shangun ai hte, shanhte a lamu ga jarit na shaden kau mu ai. 51Shan gaw tinang a lagaw na nhpu shanhte hpang maga ahpu kau da nna, Ikoni mare de du ma ai; 52sape ni chyawm gaw kabu gara ai hte, Chyoi Pra ai Wenyi hte hpring nga ma ai.
Karai Kasang a Mungga rai nga ai.

CHYUM MUNGGA DAW 2

SHINGRAN 7:9, 14-17

Ya hti na gaw, Yawhan a Shingran Laika hta na rai nga ai.
Tingnyang a man e nga ai Sagu Kasha gaw sagu rem wa zawn shanhte hpe bau sin na rai nna, asak a hka hpawk du hkra shanhte hpe lam woi madun na ra ai. Ngai Yawhan gaw, masha mungdan shagu hta na mung, baw lakung shagu hta na mung, amyu baw shagu hta na mung, ga amyu shagu hta na mung, kadai n dang hti lu ai unawng uwa kaba hpe ngai mu nngai: dai ni gaw hpraw ai hpun palawng bu hpun nna, tinang a lata hta namhtan hpun lakung lang let, tingnyang a man e mung, Sagu Kasha a man e mung tsap nga ma ai. Shaloi salang langai mi ngai hpe tsun ai gaw: Ndai masha ni rutsang kaba kata na hkrang pru wa nna, tinang a hpun palawng hpe Sagu Kasha a asai hta hkrut jahpraw la ai ni rai nga ma ai. Dai re ai majaw shanhte gaw Karai Kasang a tingnyang man e ningngai nga lu ma ai hte, Shi a Nawku Htingnu hta shani shana Shi hpe daw jau nga ma ai: tiingnyang hta dung ai wa mung, shanhte hpe Shi a nta e nga shangun na ra ai. 
Shanhte gaw hpang de galoimung kawsi hpang gara n hkrum na masai; jan shingna mung, hpa kahtet ai mung shanhte hpe hkra lu na n rai: kaning rai nme law, tingnyang ka-ang e nga ai Sagu Kasha gaw sagu rem wa zawn shanhte hpe bau sin na ra ai rai nna, asak a hka hpawk du hkra shanhte hpe lam woi madum dan na ra ai: Karai Kasang mung shanhte a myi hta na myi prwi yawng hpe tsai hkra katsut kau ya na ra ai.
Karai Kasang a Mungga rai nga ai.

KABU GARA SHIGA

YAWHAN 10:27-30

Ya hti na gaw, Yawhan a Laika hta na Kabu Gara Shiga rai nga ai.
Dai aten hta e, Yesu tsun ai gaw: Nye a sagu ni gaw Nye a nsen madat ma ai rai nna, Ngai shanhte hpe chye nngai; shanhte mung Nye a hpang hkan nang ma ai. Ngai shanhte hpe n htum n wai asak jaw da we ai rai nna, shanhte galoi mung hten bya ai hkrum na n rai; Nye a lata na shanhte hpe kadai mung kashun la ya lu na n rai. Shanhte hpe Nye a lata hta ap ya ai Nye a Wa gaw, yawng hta grau kaba nga ai rai nna, kadai mung Wa a lata na shanhte hpe kashun la ya lu na n rai. Ngai hte Nye Wa gaw langai sha rai nga ai.
Madu a Kabu Gara Shiga rai nga ai.

2022: PASKA LADAW LABAN (3) NA MUNGGA

Yawhan a Kabu Gara Shi-ga hte maren nga jang, Yesu gaw sape ni hpe masum ngu na lang shi a hkum hpe shadan dan ai, nga ai. Shawng na lahkawng lang, hkrung rawt sai Yesu hte hkrum katut ai rai tim, sape ni gaw hpa matut galaw na n chye; shanhte a aprat hte makan bungli, asak hkrung mahkrun, adaw achyen rai, ayai agai rai mat ai zawn hkam sha ma ai. Petru gaw kaga sape ni hpe matut woi awn ai, yawng a ningbaw tai ya ai hpe mu lu ai. Myit kaji garen nga ai sape ni hpe Yesu kalang bai kahkyin shabawn ya ai; shanhte hpe bai shadan dan nna shanhte a bungli madung hpa re ai lam sharai shajaw ya ai: shanhte gaw masha hkan hkwi ai ni, hkrung rawt sai Yesu a lam sakse hkam ya na gaw madung rai nga ai. Yesu gaw Petru hpe ningbaw galaw masat ya ai lam adan sha mu lu ga ai; Yesu gaw Sagu Rem Kaja re ai zawn, Petru hpe dai Sagu Rem arawng aya hte lit magam hpe ap ya da ai: “Nye sagu hpung hpe rem sin bau sin nga u”, nga ai. 

Mungkan e amying gumhkawng lai wa ai masha ni, Abraham Lincoln, Mother Theresa, Pope John Paul II,… ya na Sarabyin Francis, lani lana jang e byin tai wa ai n rai, shaning law law mai kaja ai lailen hkaja shaman shakyang nna, dai mai kaja ai lailen ni a majaw gumhkawng ma ai. Shut yu, kataw yu, dumhprut ai law law lang hkrum katut yu ai hpang, jaw ai, kaja ai maga shanang lu, grin lu ai ni rai ma ai. Sape ni gaw myit daw myit kaji nna nga ma ai. Hpa matut galaw na n chye; shanhte a aprat hpe azat kau ya ai zawn nga hkam sha na ma ai. Zingri sat kau hkrum ai Yesu a lam, bai hkrung rawt ai Yesu shanhte hpe madun dan ai lam, shingran mu nga na ma ai. Petru gaw mi shawng e galaw man ai kanbau magam re ai nga hkwi bungli de sa mat ai; kaga ni mung hkan nang ma ai. Shanhte a shaga la ai lam gaw masha hkwi na matu re. Dai majaw, shana tup shakut tim nga” n lu ma ai. Yesu shanhte kaw du nna Yesu a matsun ga hpe madat nna sumgawn jahkrat yang nga” law law lu la ma ai. 

Hkarang kawng e wan wut da nna nga “kakang da ai wa gaw Yesu re ai lam shanhte yu chye ma ai; nga” law law lu la ai mung Yesu a ga madat ai majaw re ai hpe dum ma ai. Yesu gaw sape ni hpa galaw ang ai n chye; ung ang nga ai aten hta, shanhte hpe prat a mahkrun lam matsun ya ai, shanhte shaga la hkrum ai prat mahkrun de sharai matsun ya ai. Sape ni zawn, anhte mung ruyak kyindut hkrum ai aten hta, manghkang kaba hkrum ai aten hta, hpa galaw na n chye, chyip mak nga hkam sha ai aten hkrum katut chye na ga ai. Yesu gaw anhte a asak hkrun lam re ai. Madu e lam matsun madun ai hpe hkam la chye na ahkyak ai. Myit mada shara n nga ai kaw na nga” law law magawn la lu ai sape ni zawn, yakhkak hkrum ai aten ni hta Yesu a matsun madun ya, lam madun ya na lam, akyu hpyi ap nawng chye ra ga ai. 

Sape ni gaw kuptsup ai kaw du lu na matu, myit daw myit hten ai aten, ung ang ai aten, kam shut ai aten, Madu hpe pyi hprawng shakram da, koi yen da ai aten ni nga lai wa ai. Madu bai hkrung rawt sai lam hpe pyi gau-ngwi ngwi sha chye wa, kamsham wa lu ma ai. Kamsham sai, ngu tim hpyen ni hpe hkrit ai majaw makoi nna mayun mayoi rai nga ma ai. Ningbaw, ngu nna san da hkrum ai Petru pyi gaw ung ang ai aten, hkrit gari ai aten, Madu hpe nyet kau ai aten, hpa n chye galaw hkra re ai majaw nga” hkwi sa ai da. Madu gaw sape ni a gawng kya ai lam hpe chye ya ai. Shanhte Shi hpe shut kau ai lam ni hpe mara n shagun ai. Petru hpe mung mara dat ya nna ningbaw shara hta matut shagrin ya ai: “Ngai a sagu hpung hpe bau sin u; sagu ni hpe sha-hpa jaw ua” nga, masum lang tsun ai. Ra n rawng ai hku Madu hpe tsawra ai lam, kangka ai myit hte tsawra na lam, Petru kaw na ga-sadi masum lang hpyi ai. 

Karai Kasang hte hkrum lu ai, hkrum mai ai shara gaw Nawku Jawng hkrai sha n re: kabu ai aten, yawn hkyen ai aten, ung ang ai aten, makan bungli galaw ai shara, pyaw-hpa hpa n mu lu ai shara, hkraw hkun dik ai shara, kaning re ai aten hte shara kaw rai tim, Karai Kasang hte matut mahkai lu ai. Karai Kasang hte hkrum matut lu jang yawng hpe galai shai wa shangun lu ai. Ruyak jamjau lam lama ma, myit daw myit hten hpa lama ma hkrum katut ai aten hta Si- Du hpe awng dang ai hpang a hkrung nga ai Yesu Madu hpe saw shaga na myit dum ga ai kun?

 Hkum hkrang wenyi akyu amyat kaba lama hkam la lu ai hpang, Madu a mai kaja ai lam hpe sakse hkam dan chye ga   ai kun?

 Yesu Madu gaw sape ni a gawng kya ai lam ni hpe chye madat ya ai; myit galu ai hte aten law law jaw nna shanhte hpe sharai ya ai. Anhte shada myit galu hkam sharang chye ga ai kun?

2022: PASKA LADAW LABAN (3) NA CHYUM LAIKA

PASKA LADAW HTA LABAN 3
May 1, 2022
CHYUM MUNGGA DAW 1

KASA 5:27-32, 40-41

Ya hti na gaw, Kasa Laika hta na rai nga ai.
Dai nhtoi hte hta e, hkinjawng agyi wa gaw kasa ni hpe san let, Nanhte hpe amying dai hte hpa mung hkum tsun mu, ngu nna anhte aja awa hkang da saga ai; nanhte mahtang Yerusalem mare ting e nanhte a sharin shaga lam pri di rai nna, dai wa a asai anhte a ntsa e mara ya na maw nga myit dai, ngu nna shanhte hpe tsun wu ai. Shaloi, Petru hte kasa ni htan mu ai gaw: Masha a ga madat na hta, Karai Kasang a ga mahtang grau madat na ga ai. Anhte a ji wa ni a Karai Kasang gaw nanhte wudang hta jen da sat kau ai Yesu hpe jahkrung sharawt dat nu ai. 
Israela amyu hpe myit malai lam hte mara raw ya ai lam hpaw ya na matu, Du Magam hte Hkye Hkrang la ai Madu shatai na nga, Karai Kasang gaw dai wa hpe Shi a hkra lata hte shagrau tawn nu ai. Anhte mung ndai lam mahkra a sakse ni rai nga ga ai; Shi a Mungga madat mara ai ni hpe Karai Kasang jaw ya ai Chyoi Pra ai Wenyi mung, dai hte a sakse rai nga ai, ngu mu ai.  Dai agyi salang hpawng gaw, kasa ni hpe kayet nna, Yesu a mying hte n sharin n shaga lu na lam hkang da nhtawm shanhte hpe dat dat ma ai. Shanhte chyawm gaw, Amying ningsang ndai a majaw, anhte kaya hkrum na ging nga ga ai, ngu nna myit la ma ai rai nna, kabu gara ai myit hte dai salang hpawng kaw na pru wa ma ai.
Karai Kasang a Mungga rai nga ai.

CHYUM MUNGGA DAW 2

SHINGRAN 5:11-14

Ya hti na gaw, Yawhan a Shingran Laika hta na rai nga ai.
Ngai Yawhan gaw shingran mu ai shaloi lamu kasa unawng kaba a nsen hpe ngai na la nngai; ndai ni mung, dusat amyu mali hte salang ni mung tinyang a grup yin e tsap nga ma ai. Dai ni gaw mun mi hta mun mi, hkying mi hta hkying mi lang law nga ma ai rai nna, shanhte gaw: ‘Sat kau hkrum ai Sagu Kasha gaw, hpung dagu, sutgan, hpaji byeng-ya, n-gun lagaw, arawng sadang, hpung shingkang hte shakawn kungdawn ai hpe hkam la na, ging dan nga ai law, nga nna nsen kaba hte tsun shakawn ma ai. 
Dai hta n-ga, lamu lahta tang na mung, ginding aga ntsa na mung, aga lawu na mung, nammukdara kata na mung, hpan da hkrum ai hkrung mahkrung hte gaw, Tingnyang hta dung nga ai wa hte, dai Sagu Kasha gaw, htani htana prat dingsa, shakawn kungdawn ai, arawng sadang hpung shingkang hte daru magam anga nga u ga law, nga nna shanhte tsun ma ai hpe mung ngai na nngai. Shaloi dusat amyu mali gaw, Amen, nga ma ai; salang ni mung dingnyawm nawku ma ai.
Karai Kasang a Mungga rai nga ai.

KABU GARA SHIGA

YAWHAN 21:1-19

Ya hti na gaw, Yawhan a Laika hta na Kabu Gara Shiga rai nga ai.
Yesu gaw Tiberi nawng makau e sape ni hpe Shi ahkum bai madun dan mu ai. Dai shaloi na madun dan ai lam gaw, ning rai nga ai: Simun Petru hte Marun Ma ngu ai Htawma, Galile mung Hkana kahtawng na Nahtanela, Zebedi a kasha yan hte kaga sape lahkawng rau nga ma ai. Shaloi, Simun Petru gaw, Ngai nga sa hkan na nngai, ngu nna shanhte hpe tsun wu ai. Shanhte gaw anhte mung hkan sa na ga ai, nga ma ai; dai shana shanhte gaw langai mi pyi n lu ma ai. Nhtoi htoi wa yang, Yesu gaw nawng hkingau ntsa e tsap nga ai: rai ti mung, sape ni gaw Yesu re ai n chye ma ai. Dai majaw, Yesu gaw, shanhte hpe, Ngai sha ni e, nanhte shahpa lama ma lu myit ni? ngu nna san wu ai; shanhte gaw, N lu ga ai, ngu nna Shi hpe htan mu ai. Shaloi Shi gaw, Dai li a hkra maga de sumgawn jahkat mu, shaloi lu na myit dai, ngu nna shanhte hpe tsun mu ai. Dai hte maren shanhte jahkrat nna, nga law law wa magawn la lu ai majaw, sumgawn pyi n gang lu ma ai. 
Dai rai nna, Yesu a tsaw ra ai sape gaw Madu she rai nga ai, ngu nna Petru hpe tsun wu ai. Simun petru dai hpe na la jang shi palawng lawai nna, nawng de gan shang wa ai. Kaga sape ni chyawm gaw, hkin-gau hte manga shi lam sha gang nga ai majaw nga hte hpring chyat re ai sumgawn garawt let, li kaji hte du wa ma ai. Shanhte gaw hkarang ntsa de du wa yang, nra wan mang hta, nga kakang da ai hte muk tawn da ai hpe mu ma ai. Shaloi, Yesu gaw, Ya nanhte lu la ai nga hta na la wa marit, ngu wu ai. Simun Petru li hta lung nna, nga kaba latsa e manga shi masum ting rawng ai sumgawn hpe, hkarang ntsa de karawt shalun wu ai. Dai hte wa law timung sumgawn gaw n je ai. Shaloi, Yesu gaw, Wa marit, Jahpawt shat wa sha maru, ngu nna shanhte hpe tsun wu ai. Shi Madu rai nga ai hpe sape ni chye mu ai majaw, shanhte hta na kadai mung, Nang kadai rai nta? ngu nna n san wam mu ai. 
Yesu gaw muk la nna sape ni hpe sa jaw mu ai; nga hpe mung dai hte maren sa jaw mu ai. Yesu Shi si ai ni kaw na bai hkrung rat ai hpang, sape ni hpe Shi a hkum madun dan ai hta na, ndai gaw masum lang ngu na rai nga ai. Ya shanhte jahpawt shat sha ngut jang, Yesu gaw Simun Petru hpe, Yawhan a kasha Simun e, ndai ni tsaw ra ai hta, nang Ngai hpe grau tsaw ra nni? ngu nna san wu ai. Shi gaw, Rai sa, Madu e, ngai Nang hpe tsaw ra nga nngai gaw Nang chye nga ndai ngu nna htan wu ai. Shaloi Yesu gaw, Nye a sagu kasha ni hpe bau nga u, ngu nna shi hpe tsun wu ai. Bai lahkawng lang, Yawhan a kasha Simun e, Nang ngai hpe tsaw ra nga nni? Ngu nna shi hpe san wu ai. Shi gaw, Rai sa, Madu e, ngai Nang hpe tsaw ra nga nngai gaw, Nang chye nga ndai ngu nna bai htan wu ai. Yesu gaw, nye a sagu ni hpe rem nga u, ngu wu ai. Bai masum lang, Yawhan a kasha Simun e, nang Ngai hpe tsaw ra nga nni? ngu nna san wu ai. Masum lang du hkra, Nang Ngai hpe tsaw ra nni? Nga nna shi hpe san wu ai majaw Petru myit yawn nna, Madu e, Nang gaw yawng mayawng hpe chye nga ndai, ngai Nang hpe tsaw ra nga nngai gaw, Nang chye nga ndai, ngu nna htan wu ai. Yesu gaw, Nye a sagu ni hpe bau nga u. Nang hpe Ngai kaja wa teng teng tsun de ga. Nang shabrang nga ai hte yang na a hkum hpe nang dai shingkyit kyit nna, sa mayu ai shara shagu de sa lu ndai: rai ti mung, nang dingla jang chyawm gaw, na a lata yan hpe nang lalam nna, masha kaga gaw nang hpe kyit ya nhtawm, nang n ra ai shara de woi sa wa na rin dai, ngu nna shi hpe tsun wu ai. Shing nga tsun ai gaw, Petru gaw kaning re ai si lam hte Karai Kasang a hpung shingkang shapraw lu na hpe, tau nna tsun ai rai nga ai. Ga dai tsun ngut jang, Yesu gaw, Petru hpe, Ngai kaw hkan nang rit, ngu wu ai.
Madu a Kabu Gara Shiga rai nga ai.

2022: PASKA LADAW LABAN (2) NA MUNGGA

“Simsa shimlum lam nanhte hte nga nga u ga! Chyoi Pra Wenyi hpe hkam la mu; shut hpyit mara raw dat ya mu! N mu tim kamsham ai ni gaw ah lu ma ai…” Ahkyak ai ga lareng ni rai nga ai. Yuda salang ni hpe Hkrit ai, shimlum lam ra kadawn dum dik ai aten hta Yesu gaw sape ni a ga-ang e praw pru nna, “Hkum hkrit mi; nanhte simsa nga mi ga; shimlum lam nanhte hte nga nga u ga”, ngu ai ga hpe na lu ai sape ni a matu, dai hta grau manu dan ai hpa n nga sai rai nga ai. Dai hta n-ga, Chyoi Pra Wenyi hpe hkam la nna ningnan hpan shalat ai masha tai na lam, Madu e matsun ai. Dai Wenyi hpe hkam la lu ai hte rau, sape ni gaw wenyi hta e kashin kamun hkam la ai ni, dai Wenyi e sau chya hkrum ai ni tai lu na ma ai. Dai majaw, ningnan hpan shalat ai hkrum nna Hkristu Yesu a lam sakse hkam dan lu na ma ai. Dai Hkritu a ahkaw ahkang hte, sape ni gaw shut hpyit mara raw dat ya na ahkaw ahkang lu la ma ai. Hkye hkrang la ai chyeju n-hpaw n-ya hkam la lu ai lam n rai a hka? 

Anhte mungdan masha ni law law hkrit tsang nna nga nga ma ai; hprawng hkawm ra ma ai; htingbu mungdan hkan, grau shimlum dum ai shara hkan e shingbyi machyu nga ma ai. Sape ni zawn, tinang a mungdan kata na masha shada hpe hkrit ra ma ai. Hkrit tsang nna nga nga ai ni a matu Hkristu shi hkum nan shimlum lam re ai__ “hkum hkrit mi” nga ai. Grup yin e kaning rai byin nga ai rai tim, “Nanhte simsa nga mi ga” nga, Shi tsun ai. Si-du hpe dang kau nna bai hkrung rawt ai Hkristu gaw shi hpe kamsham ai ni hte arau sha nga nga ai. “N mu lu tim kamsham ai ni ah lu ma ai” nga, Madu tsun ai.

Marai langai hpra a prat hta mung, tinang a makam masham gănan ăgrawp mat na daram, makam masham chyam dinglik hkrum ai aten ni nga na re. Machyi makaw kaba rai na kun; kam ging ai masha ni tinang hpe lelau di kau ai, kau da ai rai kun; myit mada let shakut shaja ai lam hta hkrat sum mat ai rai na kun; myit daw-hpa, hkrit tsang ra dik ai aten ni hkrum katut chye ai. Shing re ai aten hta nan rai sai, hkrung rawt sai Madu hpe saw shaga na aten, “Hkum hkrit u; simsa ai lam nang hte a nga nga u ga”, ngu ai ga hpe hkap madat la na aten. Myit mada shara hpa n nga sai, ngu, hkam sha ai aten hta, “Ahkrung nga ai Madu e, Nang ngai hte rau a nga nga ai hpe kam sham nngai; na a shimlum lam, simsa ai lam jaw ya e; ngai hta byin ai gam maka mahkra, nang Madu a lata hta ap ya da nngai” ngu tsun lu na rai kun? N mu lu tim kamsham ai wa gaw ah lu ai. 

Karai a Kasha, shi hkum hpe shi Masha Kasha, ngu ai wa, dai Yesu gaw sape ni hpe shut hpyit mara raw dat ya lu ai ahkaw ahkang jaw ya aim au-hpa hkye hkrang la ai chyeju n rai a hka? Karai Kasang chyu sha mara raw ya lu ai; masha shada mara raw ya lu ai ahkaw ahkang jaw ya da ai, jau aya jaw ya ai hkye hkrang la ai chyeju a matu ja ja chyeju dum shakawn ra ga ai. Jau ni Misssa galaw ai, mara raw ya ai, Mungga htawn ai, Sakramentu langai ngai jaw ai, akyu hpyi shaman ya ai, dz. Dz., Yesu Shi a ahkaw ahkang, Shi a gawng malai tai nna galaw ai amu hta Yesu hpe mu mada lu ga ai kun? Nawku Hpung a ahkaw ahkang hte tsun shaga, sharin shaga, shadum jahprang ai hpe hkam măna madat mara ai myit hte hkap la lu ga ai kun? N mu lu tim kamsham ai wa gaw ah lu ai. 

Simsa shimlum ai lam hpe hkam la lu na matu, tinang hpe mara shagun hpa lama ma n nga hkra, tinang mung masha ni a mara hpe dat dat ya lu na rai nga ai. Karai Kasang hte tinang a lapra dut dang ai lam lama ma, ăgam hkat na lam lama ma n nga ai rai yang sha, simsa ai lam hpe tup hkra hkam sha lu na rai nga ai. Karai a man e gingdan ai hku tsap dan lu na masha kadai nga a hka! Mau-hpa, Karai a tsawra matsan dum ai, Shi a hkye hkrang la ai chyeju a majaw sha, n ging n dan ai rai tim, kamsham ai myit hte, shagrit shanyem ai myit hte Karai a mara raw dat ya ai cheju kumhpa, muk a asam hku nna tinang a kraw de shang wa ai Chyoi Pra Hkum hpe hkam la lu ai, kade mau-hpa Karai a matsan dum amu ni she re a hka! N mu lu tim kamsham ai wa gaw a lu ai. 

 N mu lu ai rai tim kamsham ai, ngu ai hpa wa rai ta? Prat a mahkrum hpe mung, sawn sumru bawngban mai nga ai.

 Mara raw Sakramentu a jaw e Karai Kasang hpe chyeju dum chye ga ai kun?

 Karai a n htum n wai tsawra myit hte shinggyim masha ni a shadawn shadang masat chye ai tsawra myit kade wa shai a hka?

2022: PASKA LADAW LABAN (2) NA CHYUM LAIKA

PASKA LADAW HTA LABAN 2
April 24, 2022
CHYUM MUNGGA DAW 1

KASA 5:12-16

Ya hti na gaw, Kasa Laika hta na rai nga ai.
Kam sham ai masha nlang hte gaw, myit langai sha hte Sawlumon mying ai jarawp hta zuphpawng nga ai. Masha gale kadai mung shanhte a zuphpawng hta n lawm wam ma ai; mung masha ni chyawm gaw shanhte hpe sha-a ma ai rai nna, kam sham ai numsha lasha hpung kaba, Madu kaw jat bang wa ma ai. Ya, Kasa ni a lata hta lamik kumla hte mauhpa amu law law wa, mung masha ni a man e byin dan nga ai. Dai rai nna, Petru lai sa wa yang, langai ngai a ntsa e shi a shingnip sha pyi hkra u ga nga nna, machyi makaw hkrum ai ni hpe mare lam makau de hpai shapraw, yup ku ni hte panep ni hta tawn da shajang ma ai. Dai hta kaga, Yerusalem grup yin ginwang hkan na mare ni kaw nna mung, masha law law wa machyi ai ni hte nat shang zingri ai ni hpe woi nna, du sa shajang ma ai: dai ni yawng hte gaw shamai shatsai ai hkrum ma ai.
Karai Kasang a Mungga rai nga ai.

CHYUM MUNGGA DAW 2

SHINGRAN 1:9-11a, 12-13, 17-19

Ya hti na gaw, Yawhan a Shingran Laika hta na rai nga ai.
Anhte nlang Yesu hte matut mahkai ai hkrum nga ga ai rai nna, ngai Yawhan gaw nanhte a hpu nau wa rai nga nngai: shing rai nanhte a nni nkri, nanhte a mungdan, nanhte shakut sharang ai lam hta mung, ngai hkan lawm nga nngai. Ngai gaw Karai Kasang a mungga hkaw dan ai hte Yesu a matu sakse hkam ya ai majaw, Patmu ngu ai zunlawng hta nga nga nngai. Madu a nhtoi langai mi hta Wenyi a jaw e ngai nawng mat wa ai rai nna, nang mu ai hte maren laika hta ka da u nga nna, nye a shingdu de pahtau zawn ngoi ai nsen hpe ngai na la se ai. 
Dai ngai hte shaga ai nsen hpe mu lu hkra, ngai kayin yu nngai. Shingrai kayin yu yang ja pyengding sanit hte dai pyengding ni a ka-ang e Masha Kasha zawn san ai wa langai mi hpe ngai mu nngai: dai wa gaw lahkre du ai palawng galu bu hpun nna, sinda hta ja shingkyit kyit nga ai. Dai wa hpe mu jang, Shi a lagaw nhpang e si ai wa zawn ngai kadawng taw mat nngai. Shi gaw Shi a hkra lata nye a ntsa e mara ya nna, ngai hpe tsun ai gaw: Hkum hkrit et; Ngai gaw Ningshawng Wa mung, Jahtum Wa mung rai nga ai hte, Ahkrung nga ai Wa rai nga nngai. Ngai si mat wa sai rai ti mung, ya e htani htana prat dingsa ngai a hkrung nga nngai: si hkrung si htan mungdan a sumsaw hte katsan ga na sumsaw hpe ngai lang nngai. Dai re ai majaw nang mu lu sai hpe mung, ya byin nga ai hpe mung, htawm hpang de du na ra ai lam hte hpe mung, ka da u, nga ngai hpe tsun ni ai.
Karai Kasang a Mungga rai nga ai.

KABU GARA SHIGA

YAWHAN 20:19-31

Ya hti na gaw, Yawhan a Laika hta na Kabu Gara Shiga rai nga ai.
Dai laban bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sayang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape ni mung, Madu hpe mu lu yang, kabu gara nga ma ai. Bai, Yesu gaw, Nanhte ngwi pyaw nga myit ga; Nye Wa Ngai hpe shangun dat ai hte maren, Ngai mung nanhte hpe shangun dat made ai, ngu mu ai. Shing nga nhtawm sape ni a ntsa e Shi a nsa kawut nna, Chyoi pra ai. Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara rai timung, nanhte shagun da yang gaw, dai mara naw nga na ra ai ngu nna shanhte hpe tsun mu ai. 
Shing rai Yesu sa du ai shaloi, kasa shi lahkawng hta lawm ai marun ma ngu ai Htawma gaw, shanhte rau n nga ang ai. Dai rai nna kaga sape ni Shi hpe, Anhte gaw madu hpe mu lu saga ai, ngu nna tsun dan mu ai. Shi chyawm gaw, Shi a lata hta hpri hkang hpe ngai n mu, dai hpri hkang hta nye a layung ngai n shawn yu, Shi a garep hta nye a lata n bang yu yang gaw, ngai n kam n sham na nngai, ngu nna shanhte hpe tsun wu ai. Dai hpang matsat ya du jang, shi a sape ni nhku e bai hpawng nga ma ai rai nna, Htawma mung shanhte hte rau lawm nga ai. Chyinghka la da ti mung, Yesu sa du nna, shanhte a ka-ang e tsap let, nanhte ngwi pyaw nga myit ga law, ngu wu ai. Shaloi, shi gaw Htawma hpe, Na a layung nang de ladawn nna, Nye a lata hpe yu yu u; na a lata ladawn nna, nye a garep hta bang yu u; n kam n sham ai myit hpe kau da nna, kam sham nga u, ngu wu ai. Dai rai nna, Htawm gaw, nye a Madu, nye a Karai Kasang rai nga ndai, ngu nna Shi hpe htan wu ai. Yesu gaw, Htawma, nang Ngai hpe mu lu ai majaw kam sham nit dai; n mu lu ti mung kam sham ai ni gaw a lu ma ai, ngu nna shi hpe tsun wu ai. Ndai laika hta n ka da ai lamik kumla kaga law law mung, Yesu gaw Shi a sape ni a man e galaw dan nu ai; rai ti mung, Yesu gaw Karai Kasang a Kasha Hkristu rai nga ai hpe anhte kam sham nna Shi a amying ningsang a marang e asak hkrung ai lu la myit ga, nga nna, ndai hte wa ka tawn nga ai.
Madu a Kabu Gara Shiga rai nga ai.

2022: PASKA POI SHANI NA MUNGGA

“Shanhte gaw Shi hpe wudang ntsa jen sat kau ma ai; masum ya ngu na nhtoi hta Karai Kasang Shi hpe jahkrung sharawt dat ai hte, Karai e lata san da ai anhte hpe madun dan nu ai; anhte gaw dai lam ni a sakse ni rai ga ai. Shi gaw yawng hpe jeyang na matu Karai e san da ai Wa rai nga ai. Yesu hpe kamsham ai ni yawng, Shi a mying ningsang hta shut hpyit mara raw dat ya ai hkrum na ma ai” (Kasa Laika). Petru hte Kasa ni gaw Yesu hte arau nga yu ma ai; Shi tsun ai, galaw ai amu yawng mu la, na la ai ni rai ma ai. Jahtum chyalai, Yesu wudang e jen sat hkrum ai aten hta hprawng yen makoi mat ai ni rai ma ai. Hkrung rawt ai Hkristu hpe shanhte mu la ma sai: “Yesu Hkristu bai hkrung rawt sai” ngu ai makam masham gaw, Kasa ni n hkrit n kang sakse hkam dan lu na matu, nden marai jaw ya ai.

Lup mahka hpe pat da ai lungbyen, asak Madu lup kata hta rawng nan na matu pat da ai. Masum ya, ngu na nhtoi hta Shi bai hkrung rawt na lam tau nau tsun da ai. Tengman ai lam hpe dip kamyet makoi da ai lungbyen, masu magaw ai ni akyu jashawn ai dai lungbyen, asak Madu hpe mung, tengman ai lam hpe mung, n kamyet n shingdang lu ai. Dai lungbyen gaw sit mat ai lam, kaman byin taw ai lup a lam Magdalena hte kaga amyu shayi ni Kasa ni hpe wa shana dan ma ai. Teng ai lam chye lu na matu Petru hte Yawhan lup de sa yu ma ai. Yawhan gaw mu la ai hte Madu hkrung rawt sai lam hpe chye la ai rai tim, Petru gaw hpa re hkrak n chye tsun wu ai.

Kasa ni a prat hta amyu shayi nit sun ai ga hpe “Num/ma ga” ngu nna manu shadan ya ma ai. Ahkyak ai, teng ai jaw ai, ngu masat hkap la na matu la ni a n-gup kaw na pru ai, masat ya ai rai ra ai. Maria Magdalena hte manang ni gaw ahkyak dik ai, manu dan dik ai kabu-hpa shi-ga, “Madu bai hkrung rawt sai lam” shawng shawng na sakse ni tai wa lu ma ai. Kaja wa teng ai, ngu nna Kabu Gara Shi-ga ka ai ni yawng dai amyu shayi ni a lam ka da ma ai. Kabu Gara Shi-ga nan gawng kya ai amyu shayi ni a sari sadang, shanhte hpe kam ging ai lam, shanhte hta galaw lu ai atsam ni rawng ai lam shanhte hpe shagrau sharawt da ai. Ga-shaka Ningnan hta shara law law e ka da ai lam mu lu ai. Dip da hkrum ai, madang shagrit da hkrum ai amyu shayi ni hpe shalawt dat ai gaw Ga-shaka Ningnan a aprat na Chyum Laika sara ni nan rai ma ai.

Jaw ai, teng ai mabyin ni hpe hpa e mung shingdang yip da, kamyet da lu na n rai. Anhte a mungdan masa hpe yu ga. Lai sai shaning law law, mung shawa masha ni hpe masu sha, roi sha, dang sha ai masa hku up sha lai wa ai. Adip arip re ai hku nna, jahkrit shama ai masa hku nna up sha lai wa ai. Yesu a lup mahka hpe pat da ai lungbyen zawn rai nga ai. Shaning na wa magang, masu da yip da ai lam ni dan dawng pru wa ai. N tara ai masa, roi rip ai masa hpe n hkap la lu ai mung shawa masha ni a shamu shamawt lam ni hpe 2021-2022 laman adan sha mu lu ai. Jahtum e tengman ai lam gaw awng padang lu la na sha rai nga ai.

Teng ai, jaw ai maga tsap ai majaw roi rip zingri hkrum ai ni law law nga ma ai. Sat kau hkrum ai ni mung law law rai ma ai. Hkristu hkum nan, dai tengman ai lam hpe sakse hkam ai a marang e wudang ntsa jen sat kau hkrum ai. Hkristu gaw si ai kaw na bai n hkrung rawt ai rai yang, Hkristu hpe kamsham ai ni gaw yawng hta sum dik htum ai ni tai na, nga nna San Pawlu tsun ai. Shinggyim masha labau hta, tengman ai lam maga tsap ai majaw, sakse hkam ai majaw, zingri hkrum tim, sat kau hkrum ai ni law law nga lai wa sai; kaman lila n tai ai. Jahtum e awng padang lu la ai sha re.

Kasa ni gaw dai tengman ai lam hpe hkrak chye la sai majaw, hkrung rawt sai Hkristu a lam n hkrit n kang hkaw tsun sakse hkam dan lu ma ai. Kamsham ai ni yawng gaw dai Hkristu a mying ningsang hta shut hpyit mara raw dat ya hkrum na lam, Kasa ni n hkrit n kang sakse hkam, hkaw tsun dan ma ai.  Kolose Laika hta shadum ai, ndai n grin ai dinghta ga a lam hta myit manoi ai lam n galaw na lam, agrin nga ai sumsing mungdan hte seng ai lam hpe myit maju jung let, asak sumdan ningnan hta hkawm sa ra ai lam saw shaga ai. Anhte a asak majing, dai Hkristu hta kyem da ai, nga ai.

Si-Du hpe awng dang ai htawm bai hkrung rawt ai Hkristu hta yawng mayawng a lachyum, manu, ningnan tai wa ai. Hkristu hpe kamsham ai ni a matu, ndai dinghta ga e hpa mi hkrum ai rai tim, hpa mi hkrat sum ai rai tim, kaya hkrum ai rai tim, machyi makaw hte jahtum e hkrat sum si mat ai rai tim, dai ni yawng hpe lachyum ningnan htai ga ai; manu dawdan ai shadawn shadang kaga she rai sai. Dinghta ga na masha ni mu ai, sawn ai, shen ai hku n rai: anhte a asak Hkristu hta e jawm pawng ai majaw, sum ai ngu ai n nga; si mat ai ngu ai n nga. Ningnan hpan shalat hkrum ai ni tai lu ga ai; lam shagu hta awng dang ai ni, myit mada lu ai ni tai wa ga ai. 

 N mai lu ai ana lu jang, myit mada shara n nga ai zawn nga   ai aten hta, hpa galaw tim sum ai, ngu, hkam sha ai aten hta,   Paska mungsung hpe myit sumru yu ga ai kun?
 Hkristu hta asak jawm pawng ga ai, ngu ai hpa ngu ai rai ta?
 Mungkan ga, dinghta ga e byin ai awng dang lam, hkrat    sum lam, pyaw ai, ruyak kyindut hkrum ai,… ndai lam    mahkra hta dinghta ga na jang n lang ai sha, makam masham  mahkrun hku sawn shen ai, ngu ai hpa wa rai ta? 

2022: PASKA POI SHANI NA CHYUM LAIKA

PASKA POI SHANI (YESU BAI HKRUNG RAWT AI NHTOI)
April 17, 2022
CHYUM MUNGGA DAW 1

KASA LAIKA 10:34a, 37-43

Ya hti na gaw, Kasa Laika hta na rai nga ai.
Dai aten hta e, Petru ga hpaw nna, shanhte hpe hkaw tsun dan mu ai gaw. Yawhan kashin kamun lam hkaw dan ai hpang, Galile mung kaw nna, Yuda mung ting kajai gara wa ai lam hpe, nanhte nan chye nga myit dai: dai gaw, Nazaret na Yesu a lam rai nga ai. Karai Kasang gaw, Chyoi Pra ai Wenyi hte mung, n-gun atsam hte mung, Shi hpe chya ya u ai; Karai Kasang shi hte rau nga nga ai majaw, mai kaja ai amu ni Shi galaw nna, nat gumlau e zingri zingrat hkrum ai ni yawng mayawng hpe shamai ya let kawan katsan hkawm nga ai. Shing rai, Yuda masha ni a mung hta e mung, Yerusalem mare hta mung, shi galaw ai amu yawng mayawng a sakse ni anhte rai nga ga ai: dai wa hpe nan shanhte hpun hta jen sat kau mu ai; Karai Kasang chyawm gaw masum ya nhtoi hta Shi hpe jahkrung sharawt la wu ai rai nna, mung masha yawng a man e n rai, Karai Kasang shawng e lata san da sai sakse ni a man e sha, dai wa hpe dan pru shangun wu ai. 
Dai sakse ni gaw, si ai kaw na Shi bai hkrung rawt ai hpang e, Shi hte rau lu sha ai ni anhte nan rai nga ga ai. Shi Madu nan mung, Hkrung ai ni hte si sai ni a tara agyi tai na, Karai Kasang san da ai wa rai nga sai lam, mung masha ni hpe tsun dan let sakse hkam ya na matu, Shi anhte hpe hkang da mani ai. Myihtoi mahkra mung Shi a mying ningsang a marang e, mara raw dat kau ya ai hkrum na mara ai, nga nna tsun dan ma ai.
Karai Kasang a Mungga rai nga ai.
  
CHYUM MUNGGA DAW

2 KOLOSE 3:1-4 (or) 1Cor 5:6b-8

Ya hti na gaw, Kolose masha ni hpang de San Pawlu shagun dat ai Laika hta na rai nga ai.
Hpu nau ni e, Nanhte Hkristu hte rau teng man ai asak de bai rawt wa manit dai majaw, Hkristu gaw, Karai Kasang a hkra maga e dung nga ai lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu. Kaning rai nme law, nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung Shi hte rau hpung shingkang hta dan pru na marin dai.
Karai Kasang a Mungga rai nga ai.

KABU GARA SHIGA

YAWHAN 20:1-9 (or) Mt 28:1-11

Ya hti na gaw, Yawhan a Laika hta na Kabu Gara Shiga rai nga ai.
Dai laban bat a shawng shani e, nhtoi garai n htoi yang, Maria Magdalena jau jau e lup de sa wa ai rai nna, lup chyinghka la ai nlung sit mat nga ai hpe mu wu ai. Dai majaw shi gaw Simun Petru yan Yesu tsaw ra ai sape hpang de gat wa nhtawm, Madu hpe lup de na shanhte la nna, kanang e tawn da mu ai hpe anhte n chye ga ai, ngu nna, shanhte hpe tsun mu ai. Dai majaw Petru yan kaga sape pru nna, lup de sa wa ma ai. Shan rau gat sa wa yang, kaga sape gaw Petru hpe gat lai kau da nna, lup de shawng sa du ai:shaloi shi gum yu wu yang, sumpan gin-yan taw nga ai sha mu wu ai; rai ti mung, shi kata de n shang ai. 
Simun Petru chyawm gaw shi a hpang e hkan gat nang nna, dai de du jang, kata de shang yu wu ai. Sumpan gin-yan taw nga ai mung, baw na hpajet gaw sumpan hte rau n re ai, kaga ga rai nna katsu taw nga ai mung, shi mu wu ai. Dai majaw, lup de shawng du ai, kaga sape mung hkan shang wa nna, mu lu ai hte kam sham wu ai. 9Kaning rai nme law, Yesu gaw si ai ni kaw na bai hkrung rawt wa na ra ai nga nna, Chyum laika hta rawng nga ai hpe ndai ahkying du hkra, shanhte n chye madat ma ai.
Madu a Kabu Gara Shiga rai nga ai.

2022: CHYOI PRA AI BAT MANGA YA SHANI NA CHYUM LAIKA

Chyum Mungga Daw Langai

Esaia 52:13- 53:12

Yu mu, nye a shangun ma gaw awng wa na ra ai: shi gaw shagrau shatsaw hkrum ai hte, hpung shingkang rawng nna, nachying galu kaba na ra ai.Na a lam masha law law wa mau mahka nga ma ai: shi a myiman gaw masha a myiman hta, shi a gawng shing-yan gaw shinggyim masha ni a hkum hkrang hta, ahpraw nsam grau hten wa ai;shingrai shi gaw, amyu baw law law hpe kamawng shabra kau na ra ai; hkawhkam ni mung shi a man e tinang n-gup pat kau na mara ai: kaning rai nme law, shanhte hpe garai n tsun dan ai lam shanhte mu lu nna, garai n na yu ai lam chye na lu na mara ai.
Anhte shana ya ai shiga hpe, kadai kamsham a ta? Yehowa a lahpum, kadai hpe shadan dan a ta?Kaning rai nme law, Yehowa a shangun ma gaw, shi a man e matsun zawn mung, hkraw hkun ai ga na maku zawn mung, tu prut nga ai: shi gaw gawng shingyan mung, ahpraw nsam mung, tsawm htap ai n rai: shi hpe yu yang, tsawra mai ai myiman ningchya n rawng nga ai.Shi gaw masha ni e shatan nhkan ai hte, n kaw n law di ai hkrum nga ai: yawnhkyen hkrum ai hte nji nmu chye ai wa, shi rai nga ai: myiman kayin kau hkrum ai wa zawn shi rai nga nna, shatan nhkan hkrum nga ai; anhte mung shi hpe hpa n nawn ga ai.Gaja wa, shi gaw anhte a ana ahkya gun kau ya nna, anhte a yawnhkyen ai hpe, hpai kau nu ai; shi gaw Karai Kasang a lata hte ari ahpri, adup htwi ai hte nni nkri hkrum sha ai wa rai nga ai, nga nna anhte mahtang myit nawn ga ai.Raitimung, shi gaw anhte a tara tawt lai ai a jaw e hkala nba hkrum nna, anhte shut hpyit ai a majaw ahpye a lam hkrum sha nga ai: anhte ngwi pyaw nga lu hkra, shi ari ahpri hkrum sha nga ai; shi a nma majaw, anhte mai tsai lu ga ai.Anhte yawng sagu zawn lam dam mat saga ai; langai hte langai tinang lam hkan mat ga ai: Yehowa chyawm gaw anhte mahkra a yubak mara hpe, shi a ntsa e mara da nu ai.Shi adip arip hkrum timung, nni nkri hkrum yang, n-gup n hpaw ai nga nga ai; sat na matu dun sa wa ai sagu kasha zawn, mun rep ai wa a man e, atsin sha nga ai sagu zawn, shi n-gup n hpaw ai nga nga ai.N tara ai hku dawdan ai hte shi hpe shapraw kau ma ai: shi gaw, nye a amyu masha ni tara tawt lai ai majaw, hkrung nga ai ni a ga hta na htawm kau ai hkrum nna, shanhte a gawng malai hkungga tai wa ai gaw, shi a rau ram manang ni hta kadai wa mahtang chye gawn lu a ta?Shanhte gaw, tara tawt lai ai ni hte rau shi a matu lup galaw da nna, sut mahkawng da ai wa hpe zawn, makoi mayang di mu ai: raitimung, shi gaw adip arip hpa n galaw ai hte, shi a n-gup hta hkalem hkalau ai hpa mung n rawng nga ai.Yehowa chyawm gaw shi hpe ahpye a lam di na ra nna, machyi shangun wu ai; nang gaw, shi a myit masin hpe gawng malai hkungga shatai ngut jang she, shi gaw shi a aru arat hpe mu lu na ra ai; shi a nhtoi ni galu wa nna, Yehowa ra ai hku shi a lata hta awng wa na ra ai:Shi myit masin a shakut sharang ai a akyu shi mu lu nna, myit dik na ra ai: nye a dinghpring ai shangun ma gaw, shi chye chyang ai nyan hte, masha law law hpe dinghpring shangun na ra ai rai nna, shanhte a yubak mara hpe shi nan gunhpai na ra ai.Dai re ai majaw ngai gaw, daru magam rawng ai ni hte rau, shi hpe kamhtaw karan jaw nna, shi gaw n-gun atsam rawng ai ni hte rau, lanep karan na ra ai: kaning rai nme law, shi gaw si du hkra shi a myit masin hpe ru kau nna, tara tawt lai ai ni hta hti lawm nga ai: raitimung shi gaw; masha law law a yubak hpe gunhpai nna, tara tawt lai ai ni a matu mara htinglu htinglai ya ai.

Chyum Mungga Daw Lahkawng

Hebre 4:14-16, 5:7-9

Dai rai nna, sumsing lamu de hkrang shang wa sai hkinjawng agyi kaba ngu ai, Karai Kasang a Kasha Yesu gaw anhte lu ga ai majaw anhte yin la ai nawku htung hta maju jung nga ga.Kaning rai nme law, anhte a gawngkya ai lam hpe matsan n chye dum ai hkinjawng agyi wa anhte lu ga ai n rai; lam shagu hta anhte zawn gunglau hkrum yu timung, yubak mara n kap ai hkinjawng agyi wa she lu ga ai.Dai rai nna, matsan dum ai hkam la lu na hte, kyindut ai aten e shadaw shalan ai chyeju mu lu hkra, chyeju tingyang man de, anhte nden ja ai myit hte sit shang wa ga.
Kasha wa teng nga ai raitimung, nni nkri hkrum ai hte madat mara ai lam sharin la yu ai;dai hte hkum tsup wa lu ngut jang, shi gaw, shi a ga madat mara ai ni yawng mayawng a matu, htani htana hkyehkrang la ai a npawt tai wa ai hte,Melhkizedek a hkringhtawng lam hte maren hkinjawng agyi rai nga ai, ngu nna Karai Kasang gaw shi hpe amying dang da wu ai.

Kabu Gara Shiga

Yawhan 18:1- 19:42

Yesu gaw dai ga tsun ngut jang, shi a sape ni hte rau pru wa nna, Kedron hkaraw wora hkran de rap sa ma ai: dai yang e sun nga nga ai rai nna, shi gaw sape ni hte dai de shang wa ma ai.Yesu gaw shi a sape ni hte law law lang dai de a sa ga nga ai majaw, shi hpe ap kau na wa Yuda mung, dai shara hpe chye da wu ai.Dai rai nna Yuda gaw, hpyen langa ni hte, Hkinjawng agyi ni hte Hparishe ni kaw na, hpyenbu ni hpe lu la jang, pyengdin, shanan, ri nhtu hte rai nna, dai de sa wa ma ai.Yesu gaw, shi hta byin wa ra ai lam yawng hpe chye wu ai majaw sit sa nna, Nanhte kadai hpe tam myit ta? ngu nna shanhte hpe san mu ai.Shanhte gaw, Nazaret na Yesu hpe tam ga ai, nga nna shi hpe htan ma ai. Yesu gaw, Ngai nan rai nga nngai, ngu nna shanhte hpe tsun mu ai. Shi hpe ap kau na wa Yuda mung dai ni hte rau tsap nga ai.Dai rai nna shi gaw, Ngai nan rai nga nngai, ngu wu yang, dai ni gaw hpang de kanut wa nna, ga hta kadawng taw mat ma ai.

Bai shi gaw, Kadai hpe tam myit ta? ngu nna shanhte hpe bai san mu yang, shanhte gaw, Nazaret na Yesu hpe tam ga ai, nga nna bai htan ma ai.Yesu gaw, Ngai nan rai nga nngai, ngu nna nanhte hpe ngai tsun masade ai: ngai hpe tam ai rai myit yang gaw, ndai ni gaw wa manu ga, ngu nna htan wu ai:dai gaw, Nang ngai e jaw ai ni hta na, langai mi hpe muk ngai n shayet kau nngai, nga nna shawng de shi tsun ai ga dik wa na matu, rai nga ai.Simun Petru gaw nhtu hpye nga ai rai nna, dai hpe shaw nhtawm, hkinjawng agyi wa a mayam hpe kahtam nna, dai wa a hkra maga na ana di mat lu ai: dai mayam a amying gaw Malhku ngu ai rai lu ai.

Dai re ai majaw Yesu gaw, Na a nhtu dai hpe n-ga hta shawn bang kau u: nye Wa ngai e jaw ai gawm hpe ngai n lu na rai ni? ngu nna Petru hpe tsun wu ai.Shaloi hpyen ma ni, hpyenbu wa hte, Yuda masha ni a agyi ni gaw, Yesu hpe rim la nna gyit ngut jang, Anna hpang de shawng woi wa mu ai:kaning rai nme law, shi gaw dai shaning e hkinjawng agyi tai ai, Kayapa a katsa wa rai nga ai.

Dai Kayapa gaw, Amyu masha ni a matu masha langai mi si yang grau mai ai, nga nna Yuda ni hpe hpaji daw ya ai wa rai nga ai.Shaloi Simun Petru hte kaga sape langai mi gaw, Yesu kaw hkan nang ma ai. Dai kaga sape wa gaw, hkinjawng agyi hte chye chyap ai rai nna, hkinjawng agyi wa a nta npan de, Yesu hte rau hkan shang nang ai:Petru chyawm gaw shinggan maga chyinghka lam makau e hti tsap nga ai. Dai majaw hkinjawng agyi wa hte chye chyap ai sape kaga gaw pru nna, chyinghka sin ai num hpe tsun nhtawm, Petru hpe shashawn la wu ai.Shaloi chyinghka sin ai num gaw, Nang mung dai wa a sape ni hta na langai mi rai n ni? ngu nna Petru hpe san wu ai. Shi gaw, N rai nngai, ngu nna htan wu ai.Dai shaloi kashung ai majaw, mayam ni hte agyi ni gaw, nra hte wan wut nna, wan kra let tsap nga ma ai: Petru mung dai ni hte rau tsap nna, wan kra nang nga ai.Shaloi hkinjawng agyi wa gaw Yesu hpe, shi a sape ni a lam hte shi sharin shaga ai lam, san wu ai.Yesu gaw, Ga ntsa e ngai dan dan leng leng hkaw tsun ni ai: Yuda masha nlang zuphpawng ai Tara jawng ni hta mung, nawku Htingnu hta mung ngai tut tut sharin shaga ni ai: makoi magap nna ngai hpa mung n hkaw n tsun nngai.Nang ngai e hpa rai san n ta? Ngai kaning ngu hkaw tsun nngai gaw, na la ai ni hpe san yu u; ngai tsun ai ga hpe shanhte chye ma ai, ngu nna htan wu ai.Shing ngu wu yang makau e tsap nga ai agyi langai mi gaw Yesu hpe kahpret nna, Hkinjawng agyi wa mi ting hpe, nang shing nga htan lu n ni? ngu wu ai.Yesu gaw, Ngai tsun ai ga n kaja yang gaw, n kaja ai ngu nna sakse hkam u; ga kaja she ngai tsun ai rai yang me, nang hpa rai ngai hpe kahpret n ta? ngu nna htan wu ai.Dai rai nna Anna gaw, gyit da nga ai ta, shi hpe hkinjawng agyi Kayapa hpang de sa bang shangun dat wu ai.Simun Petru chyawm gaw wan kra let tsap nga ai. Shaloi shanhte gaw, Nang mung shi a sape ni hta na rai n ni? ngu nna shi hpe san mu ai. Shi gaw, N rai nngai, ngu nna nyet kau wu ai.Petru e kahtam nna, na di ai wa hte hpunau daw ai, hkinjawng agyi a mayam langai mi mung, Nang sun e dai wa hte rau nga ndai hpe, ngai mu nngai, n rai ni? ngu wu ai.Dai majaw Petru bai nyet kau wu ai: dai shaloi jang u goi ra ai.Bai shanhte gaw Yesu hpe, Kayapa kaw nna Pretori Htingnu de sa bang mu ai: dai ten gaw jahpawt manap jau e rai nga ai: shanhte gaw awu asin re ai n hkrum ai sha, dai Shalai wa poi sha lu na matu, tinang dai Htingnu nhku de n shang ma ai.

Dai re ai majaw Pilat gaw shanhte nga ai de pru nna, Ndai wa hta nanhte hpa mara shagun mu ta? ngu nna san wu ai.Shaloi shanhte gaw Ndai wa n kaja ai amu galaw ai wa n rai yang gaw, anhte nang kaw sa bang na ga ai n rai, ngu nna htan mu ai.Dai re ai majaw Pilat gaw, Nanhte dai shi hpe la nna nanhte a tara hte maren jeyang mu, ngu nna shanhte hpe htan wu ai. Yuda masha ni, Anhte gaw kadai hpe sat na ahkang mung n lu ga ai, ngu nna bai htan mu ai.Shanhte shing nga ai gaw, Yesu shi kaning re ai lam hte si hkam lu na, nga nna kumla jaw let, tsun da ai ga dik wa na matu, rai nga ai.Dai majaw Pilat gaw Htingnu kata de bai shang nna, Yesu hpe shaga la nhtawm, Nang Yuda masha ni a hkawhkam rai nga n ni? ngu nna shi hpe san wu ai.Yesu gaw, Dai gaw na a myit hte nang san n ni? shing n rai, masha kaga e nye a lam nang hpe tsun dan ma ni? ngu nna htan wu ai.

Pilat gaw, Ngai Yuda masha rai nga a ni? Na a amyu masha ni hte hkinjawng agyi ni gaw, nang hpe ngai kaw sa ap nga ma ai; nang hpa galaw shut nit ta? ngu nna htan wu ai.Yesu gaw, Nye a mungdan gaw ndai mungkan ga na n rai li ai; nye a mungdan ndai mungkan ga na re ai rai yang gaw, ngai Yuda masha ni a lata de n shang hkra, nye a ali ama ni gasat na masai: ya chyawm gaw nye a mungdan ndai yang na n rai li ai, ngu nna htan wu ai.Dai re ai majaw Pilat gaw, Rai taw, nang hkawhkam teng nga n ni? ngu nna san wu ai. Yesu gaw, Nang tsun ai hte maren ngai Hkawhkam teng nga nngai: dai ngu nna tengman ai a maga de sakse hkam na matu, ngai shangai jinghkai wa ni ai hte, mungkan ga de du sa ring ngai: tengman ai hte seng ai ni nlang hte gaw, nye a ga nsen madat ma ai, ngu nna htan wu ai.Pilat gaw, Tengman ngu ai gaw hpa rai ta? ngu nna shi hpe tsun wu ai. Shing nga nhtawm Yuda masha ni kaw shi bai pru nna, Ndai wa hta hpa mara mung ngai n mu nngai.Raitimung, Shalai wa poi e masha langai mi ngai nanhte hpe dat ya ga ai htung, nanhte hta nga ai hte maren, Yuda masha ni a Hkawhkam wa hpe nanhte e dat ya na, nanhte ra myit ni? ngu nna san wu ai.Shaloi shanhte gaw, Dai wa hpe n rai, Baraba hpe dat ya mi, nga nna bai jahtau tsun ma ai: Baraba chyawm gaw damya rai nga ai.

Dai re ai majaw Pilat gaw Yesu hpe gang la nna kayat wu ai.Hpyen masha ni mung ju hpun hte kagup hkri la nhtawm, shi a baw hta shagup ya nna, palawng ahkyeng mung shi hpe jahpun mu ai:shing di nhtawm, shi hpang de shanhte sit sa nna, Yuda ni a Hkawhkam e, nang a lu nit ga law, nga nna tsun let shi hpe kahpret ma ai.Shaloi Pilat gaw shinggan de bai pru nna, shanhte hpe, Yu mu, ndai wa hta hpa mara mung ngai n mu nngai gaw, nanhte chye lu myit ga, ngu nna ngai shi hpe nanhte hpang de shapraw dan made ai, ngu wu ai.Yesu mung, ju kagup gup ai hte palawng ahkyeng hpun let pru wa ai. Shaloi Pilat gaw, Ndai masha wa hpe yu mu! ngu nna shanhte hpe tsun mu ai.

Dai majaw hkinjawng agyi ni hte du agyi ni gaw shi hpe mu jang, Wudang hta jen da u, jen da u, nga nna jahtau ma ai. Shaloi Pilat gaw, Nanhte nan shi hpe la nna jen da mu; ngai gaw shi hta hpa mara mung n mu nngai, ngu nna shanhte hpe tsun mu ai.Shaloi Yuda masha ni gaw, Anhte mung tara lu ga ai; ndai wa gaw shi hkum hpe Karai Kasang a Kasha hpyi hpun ai a majaw, dai tara hte maren si ging nga ai, ngu nna shi hpe htan mu ai.Pilat gaw dai ga na ai majaw grau hkrit nga ai rai nna,Htingnu nhku de bai shang nhtawm, Yesu hpe, Nang kanang na rai n ta? ngu nna san wu ai. Yesu chyawm gaw ga hkaw mi muk n htan wu ai.

Dai majaw Pilat gaw, Nang ngai hte ga n tsun hkraw n ni? Ngai nang hpe dat dat lu ai ahkang hte, wudang hta jen da lu ai ahkang lu nngai, nang n chye n ni? ngu nna shi hpe tsun wu ai.Yesu gaw, Nang hpe ntsa de nna, ahkang jaw da sai n rai taw gaw, nye a ntsa e hpa ahkang mung, nang n lu na ndai: dai majaw ngai hpe nang kaw sa ap ya ai wa gaw, yubak grau kaba lu ai, ngu nna, shi hpe htan wu ai.Shing nga ai majaw Pilat gaw Yesu hpe dat dat na lam tam nga ai: Yuda masha ni mahtang, Nang dai wa hpe dat dat n yang gaw, nang Kehta hkawhkam a jinghku n rai nit dai: tinang dai tinang hkum hpe hkawhkam shatai la ai wa gaw, Kehta hkawhkam hte nhtan shai ai wa rai nga ai, nga nna jahtau ma ai.Pilat gaw dai ga na jang, Yesu hpe woi shapraw nhtawm, Hebre ga hte Gabahta ngu ai Nlung nep ai shara e tara tingnyang hta dung nga ai.Ya, Shalai wa poi a matu shachyip ai nhtoi rai nga ai hte, hkying kru daram mung rai sai. Shaloi Pilat gaw Yuda masha ni hpe, Nanhte a hkawhkam wa hpe yu yu mu, ngu mu ai.

Dai re ai majaw shanhte gaw, La kau u, la kau u, wudang hta jen da kau u! nga nna jahtau ma ai. Bai Pilat gaw, Nanhte a Hkawhkam wa hpe wudang hta ngai jen da na rai ni? ngu nna shanhte hpe san wu ai. Shaloi hkinjawng agyi ni gaw, Kehta hkawhkam hta kaga, anhte hkawhkam n lu ga ai, ngu nna htan mu ai

Dai re ai majaw Yesu hpe wudang hta jen da kau mu ga nga, shanhte a lata de ap ya kau wu ai.Dai rai nna shanhte gaw Yesu hpe woi dun wa mu ai: Yesu gaw shi a wudang shi dai hpai nna, Pungkum ngu ai shara de pru sa wa ai; dai shara hpe Hebre ga hte Golgohta nga ma ai:shanhte gaw dai yang e shi hpe wudang hta jen da ma ai; shi hte rau marai lahkawng hpe mung, maga mi de langai ngai di jen da mu ai rai nna, Yesu gaw dai yan a lapran e rai nga ai.Pilat mung masat dingsat laika ka la nna wudang hta shakap da wu ai. Dai ka ai gaw, Yuda ni a Hkawhkam Nazaret wa Yesu, nga ai rai lu ai.

Yesu hpe jen da ai shara gaw mare hte mung ni nga ai hte, dai laika hpe Hebre ga, Latin ga, Heleni ga hte ka da nga ai majaw, Yuda masha law law wa dai masat dingsat laika hpe hti ma ai.Shing nga ka da ai majaw, Yuda masha ni a hkinjawng agyi ni gaw, Pilat hpe, Yuda ni a Hkawhkam nga nna hkum ka, Ngai gaw Yuda masha ni a Hkawhkam rai nngai, nga nna shi tsun ai, ngu nna she ka u, ngu nna sa tsun mu ai.Pilat gaw, Ngai ka ai hku ngai ka da se ai, ngu nna htan mu ai.

Hpyen masha ni gaw Yesu hpe jen da ngut jang, shi a hpun palawng hpe la nna, mali brang di ga karan nhtawm, hpyen masha langai mi e daw daw la mu ai: dai kata palawng hpe mung shing di na maw mu ai: raitimung, kata palawng gaw shakung n rawng ai, lawng du nna htum hkra da ai rai nga ai.

Dai majaw shanhte gaw, Palawng ndai hpe anhte n gang je ai sha, kadai mahtang la ang na gaw hpaida da ga, nga nna shada da tsun ma ai; dai gaw, Shanhte nye a hpun nba hpe shada karan la nna, Nye a kata palawng hpe mung hpaida da ma ai, nga nna laika hta rawng ai ga dik wa na matu rai nga ai.Dai majaw hpyen masha ni shingrai galaw ma ai. Ya Yesu a wudang makau e shi a kanu hte, kanu a nau na Klopa a madu jan Mari hte, Magdala Mari hte tsap nga ma ai.Dai majaw Yesu gaw kanu hte shi tsawra ai sape, makau e tsap nga ma ai hpe, mu wu yang, kanu hpe, Numsha e, ning sha hpe yu u, ngu wu ai.Dai sape hpe mung, Ning nu hpe yu u, ngu wu ai. Dai shani kaw nna dai sape gaw, Yesu a kanu hpe shi a nta e woi tawn da wu ai.

Dai hpang Yesu gaw amu mahkra ngut sai hpe chye wu jang, Ngai hpang kara nngai, nga nna laika shadik na matu tsun wu ai.Dai yang e ntsin hkri hte hpring nga ai di bu langai mi dung nga ai: dai majaw shanhte gaw hka kamu hta ntsin hkri jahpring la nhtawm, maiaw ndung hta shakap nna, shi a n-gup hta gawn ya mu ai.Yesu gaw dai ntsin hkri hkap lu ngut jang, Ngut ma sali ai, nga nhtawm, baw nga di nna, nsa jahti kau wu ai.Dai shani gaw shachyip ai nhtoi rai nga ai hte, hpang shani mung Laban nhtoi kaba rai nga ai majaw, laban nhtoi e wudang hta mang n noi nga u ga, Yuda masha ni gaw dai ni a lagaw kayat daw nna, dai mang ni hpe htawm kau na, Pilat kaw ahkang hpyi ma ai.

Dai majaw hpyen masha ni sa nna, shi hte rau jen da ai yan a lagaw hpe kayat daw ya mu ai:Yesu kaw du yang, shi si mat boi sai hpe shanhte mu ma ai majaw, shi a lagaw hpe gaw n daw ya mu ai:raitimung hpyen masha langai mi gaw, shi a garep hpe ri hte galun waw ya wu ai rai nna, shaloi jang sai hte ntsin pru wa ai.

Dai lam mu ai wa gaw sakse hkam wu ai rai nna, shi a sakse gaw tengman lu ai: nanhte mung kamsham lu myit ga, tengman ai ga shi tsun nga ai gaw, shi dai chye nga ai.Kaning rai nme law, dai lam byin ai gaw, Shi a nra langai mi muk daw na n rai, nga ai laika ga dik wa na matu rai nga ai.Bai laika langai mi hta, shanhte galun waw ai wa hpe shanhte mu lu na maru ai, nga ai.

Dai hpang, Yuda masha ni hpe hkrit ai majaw, mayun de nna Yesu a sape tai nga ai, Aramahti mare na Yosep ngu ai wa gaw, Yesu a hkum tsawp hpe shayu la na, Pilat kaw ahkang hpyi wu ai; Pilat mung ahkang jaw dat wu ai: dai re ai majaw shi sa nna dai hkum tsawp shayu la wu ai.Shawng de shana e shi kaw sa chyai ai, Nikodi mung sa ai rai nna, mura hte achyaw kayau ai manam pyaw ai baw, joi sumshi dang la sa ai.Shaloi shan gaw Yesu a hkum tsawp hpe la nhtawm, Yuda masha ni a makoi mayang ai hking hte maren, manam pyaw ai baw hte sumpan e kayawp ahkyen mu ai.Shi hpe jen da kau ai shara e sun langai mi nga ai: dai sun e masha langai mi hpe muk garai n makoi yu ai lup ningnan langai mi nga ai.Yuda masha ni a shachyip ai nhtoi rai nga ai hte, lup dai mung ni nga ai majaw, shan gaw Yesu hpe dai yang e tawn da mu ai.

2022: CHYOI PRA AI BAT MALI YA SHNAI NA CHYUM LAIKA

Chyum Mungga Daw Langai

Esaia 61:1-3,6,8-9

Madu Karai Kasang a Wenyi gaw nyea ntsa e dung nga ai; kaning rai nme law nga yang, matsan mayan ni hpe kabu gara shiga hkaw tsun dan na matu, Yehowa ngai hpe namman chya ya ni ai; gawng run ai ni a nma hpe ahkyen kayawp na matu mung, bawngdung ai ni hpe shalawt dat na lam, gyit hkang hkrum ai ni hpe htawng chyinghka hpaw ya na lam, hkaw dan na hte, Karai Kasang sharawng awng ai shaning hte, anhte a Karai Kasang matai dawp ai shani hpe, hkaw dan na matu mung, yawnhkyen hkrum ai ni hpe shalan shabran na matu mung, Ziun mare hta sharung shayawt ai ni hpe, wan dap a malai nampan shanghkawng, sharung shayawt ai a malai kabu gara ai namman, myit kaji ai malai kabu gara ai hpun palawng jaw na matu mung, shi ngai hpe shangun dat nngai; shingrai, Karai Kasang gaw arawng sadang lu la na matu, shanhte gaw, shi hkai da ai dinghpring ai hpun ni ngu ai mying, mying na mara ai. Nanhte chyawm gaw, Karai Kasang a hkinjawng ni, nga nna mung, Anhte a Karai Kasang a ali ama ni, nga nna mung, mying na marin dai:
Kaning rai nme law, ngai Karai Kasang gaw malang ai tara hpe sharawng nna, kashu kashe hte n hkru ai hpe ndawng nngai: tengman ai hku hkan let, ngai shanhte hpe nhtang jaw nna, htani htana ga shaka shanhte hte tawn da na nngai.Shanhte a kashu kasha ni gaw maigan amyu ni hta, shanhte a matu mara ni, amyu baw ni hta, kajai gumhkawng ai hkrum na mara ai; shanhte gaw, Yehowa shaman ai aru arat ni rai nga ma ai, nga nna shanhte hpe mu ai ni nlang, yin la na mara ai.

Chyum Mungga Daw Lahkawng

Shinran Laika 1:5-8

kangka re ai sakse wa, si mat ai ni hta na kasha alat, dinghta ga na hkawhkam ni hpe up ai Madu Yesu Hkristu kaw nna mung, chyeju hte ngwi pyaw ai gaw nanhte hta anga nga malit ga. Anhte hpe tsawra nna, shi hkum nan a asai hte anhte a yubak kaw na anhte hpe raw dat mi ai hte,shi a Kawa Karai Kasang a matu anhte hpe mungdan amyu hte hkinjawng amyu shatai ai wa kaw, hpung shingkang hte daru magam ahkang gaw, htani htana e anga nga u ga law. Amen.Yu mu, shi gaw sumwi hte du sa wa nna, myi yawng mayawng mung, shi hpe galun baw ai ni mung, shi hpe hkap mu na mara ai rai nna, dinghta ga na amyu nlang hte gaw, shi a majaw sharung shayawt na mara ai. Rai sa, Amen.Ngai gaw Alhpa mung rai nga nngai, Omega mung rai nga nngai, nga nna ndai aprat e, moi na aprat e anga nga ai hte, htawmhpang du na ra ai wa, Chyahtum chyalai n-gun rawng ai Madu Karai Kasang gaw tsun nga ai.

Kabu Gara Shiga

Luka 4:16-21

Shaloi, shi nga kaba wa ai Nazaret mare de du wa ai; shi a htung hte maren laban nhtoi e dai tara jawng hta shi shang wa ai rai nna, laika hti na rawt wu ai.Shaloi myihtoi Esaia a laika shi hpe jaw wu ai rai nna, dai laika hpaw yang, ning nga ka da ai shara mu hkrup wu ai;Madu a Wenyi nye a ntsa e nga nga ai: Matsan mayan ni hpe kabu gara shiga hkaw tsun na matu, shi ngai hpe naman chya ni ai: Bawngdung ai ni hpe shalawt lu na lam, Myikyaw ai ni hpe myi bai mu na lam, hkaw tsun na matu mung, Zingri zingrat hkrum ai ni hpe dat dat shangun na hte,Madu a sharawng awng ai shaning hkaw tsun dan na matu mung, shi ngai hpe shangun dat ni ai, nga ai.Dai laika katsu nna, tara jawng sin ai wa hpe bai ya kau nhtawm, shi dung nga ai: tara jawng na ni nlang hte gaw shi hpe azi yu nga ma ai.Shi gaw, Ndai ka da ai ga gaw dai ni nan nanhte a na hta dik mat sai, ngu nna shanhte hpe ga tsun hpaw wu ai.

2022: KUNGLA SHAMAN POI SHANI NA MUNGGA

Karai majing, masha majing re ai, marai mi, atai mi re ai Yesu gaw, Isaiah a Laika hta na auba hte maren, kaja wa nni nkri, zingri zingrat hkam la, dik hkra machyi hkam la, wudang ntsa e jen sat ai hpe hkam la nna shinggyim amyu a shut hpyit mara ding-nye hpe wa’ shaprai kau ya ai. Kawa Karai e gran da ya ai hkye hkrang la ai masing hpe Yesu gaw, si ai du hkra madat mara ai a marang e, kuptsup ra n rawng ai hkungga hpe nawng ya lu ai rai nga ai. Dai wudang hkungga hte muk-sabyi chyaru hpe, “Ndai gaw nye a hkum; ndai gaw nye a sai” ngu nna nawng ya ai, wudang hkungga hte langai sha shatai da ya ai. Missa nawng shagu, Yesu a tsawra myit hte shi a nni nkri hpe dum ya mi, nga, hpyi lajin ai. Mungkan masha ni hkrum katut hkam sha shajang ai ruyak kyintdut, matsan jamjau ai lam ni, machyi hkrum shoi chyum hkrum sha ai a lachyum, hkye hkrang la ai kaw du lu na matu, manu jahpu tai wa lu ai lam sharin ya ai.

Yawn hkyen shoi chyum jamjau n hkrum yu ai masha kadai n nga ai: matsan mawhpyi kaw na lauban, Du, Hkawhkam, hpaji chye ai n chye ai, ma kaji dingla gumgai, …. kadai n lawt lu ai. Shatan nhkan, mara shagun, jahpoi asawng ai hpe n hkrum kătut yu ai masha mung kădai n nga ai. Tinang a’nya ai majaw, htauli htaula n nga ai, sădi măja ai lam n galaw ai majaw hkrat sum machyi hkrum ai lam lăma ma byin yang tinang a măra rai sai, ngu, hkam la sharang kau mai ai. Kaga marai langai ngai a ra rawng ai lam a majaw rai rai, dingsang manawn ai majaw rai rai, tinang hkrup sha jang kade she pawt, majoi sharang shalai n kam na re. N jaw ai, n tara ai hku mara shagun hkrum, jahpoi asawng katut, ari dam katut ai shaloi kade she măchyi dum ai rai a hka? 

Kungla Poi Laban na Chyum Mungga ni gaw Chyoi Pra ai Laban bat ting, Yesu hta byin na nni nkri hpe gumhpawn myit dum ai lam rai nga ai. Nawku dawjau shaning ting hta ahkyak dik, manu dan dik ai nawku lamang ni rai nga ai. Dai majaw, Chyoi Pra ai Mali ya, Manga ya hte Kru ya shana na nawku dawjau lamang ni hpe n hprai ai sha sa lawm ging ai hpe myit dum ra ga ai__ nni nkri, si hkam ai, bai hkrung rawt ai, mabyin masum gaw laman masum yan mi hte bung ai.

Dinghta prat hta pyaw ai, shagrau hkrum ai, awng dang ai, shakawn hkrum ai aten ni nga ai zawn, yawn hkyen hkrum ai, shatan jahpoi hkrum ai, kaya hkrum ai, machyi hkrum ai, hkrat sum ai, …. hpa mi hkrum hkrum, jahtum chyalai awng padang hte ngut kre ra ga ai. Paska mungsung a lachyum hpe shaning shagu myit dum galaw ga ai a marang e, tinang nang a prat hta byin ai kabu-hpa yawn-hpa, yawng hpe Madu Yesu hte langai sha jawm pawng let, hkamjan lu ai, myit mada ai lam lu la ai hte, galoi mung myit rawt nga lu na rai ga ai.

Wudang ntsa e joi da hkrum ai lagut damya hpe yu yu ga. Prat galu, n hkru n kaja ai amu galaw ai masha, mara kaba ai masha. Wudang ntsa e jen da hkrum ai aten, nsa naw dun nga ai aten hta myit malai lu nna San Pra ai masha pyi tai lu nu ai. Karai a mungdan de du shang lu na matu Madu Yesu gaw shinggyim masha ni kaw na hpan lahkawng sha hkap la shangun ai__ “Myit malai lu mu; Kabu Gara Shi-ga hpe hkap la mu!” nga ai. Dai lagut damya gaw nsa naw dun nga yang hkap la nu ai. Shi a mara a majaw ari dam hkam la ai lam hpe shi tsun shapraw ai, dai hpang, “Madu e, na mungdan hta ngai hpe myit dum ya e” ngu, kamsham ai myit hte hpyi nem ai. Yesu htan tsun ai, “Dai ni jang nang paradizu/ sumsing mungdan e ningngai lu na rin dai” nga ai.

Madu Yesu a n htum n wai tsawra matsan dum mara raw dat ya ai lam hpe kamsham ging ga ai. Yuda Iskariot daram mara kaba ai rai tim, myit malai tawngban ai rai yang, mara raw dat ya ai hkrum na rai nga ai. Petru shi a madu, shi a sara hpe masum lang ting nyet kau ai; hkrap myi-prwi-si hkaw let myit malai ai lam hpe madun ai. Nang/ ngai, Madu Yesu hpe nyet kau ai kade lang she galaw kau sa hka? Makam masham a majaw kabu lu ai, akyu amyat lu la ai aten ni hta Karai Kasang hpe shakawn chyeju dum ga tsun chye ga ai; makam masham a majaw, tinang kam ai n galaw lu, asum hkam ra ai, hpaga sum na zawn re ai, tinang gaya hkrum na zawn re ai aten ni hta, machyi hkrum na zawn re ai aten hta, tinang na makam masham hte bung pre ai hku dawdan lata la gwi ga ai kun?

 Madu Yesu hkam la ai nni nkri, tinang a matu re ai lam, tinang a shut hpyit mara a majaw re ai hpe kade lang myit dum yu a ta?

 Nni nkri, yawn hkyen shoi-hpa ni gaw Hkristan makam masham a adaw