2022: LUSHA GAM LADAW LABAN (3) NA CHYUM LAIKA

LUSHA GAM AI LADAW HTA LABAN 3
March 20, 2022
CHYUM MUNGGA DAW 1

PRU MAT WA AI 3:1-8a, 13-15

Ya hti na gaw, Pru Mat Wa Ai Laika hta na rai nga ai.
Dai aten hta e, Mawshe gaw shi a katsa Yehtru ngu ai Midian hkinjawng a sagu bainam hpung hpe rem nna nga nga ai. Dai hpung ni hpe nam mali jahtum de shi gawt sa wa ai rai nna, Horeb ngu ai Karai Kasang a bum de sa du ai. Shaloi Karai Kasang a lamu kasa gaw singwum hta shi kaw dan pru ai: dai hpe shi yu yu yang, wan grung nga timung singwum gaw n hkru mat nga ai. Dai rai nna, Mawshe gaw, Singwum hpa rai n hkru mat ai kun? Mauhpa lam kaba wora hpe ngai sa yu se ga, nga ai. 
Shi sit sa wa ai hpe madu mu yang, Karai Kasang gaw, Mawshe e, Mawshe e, nga nna dai singwum kata na shi hpe shaga ai: shi gaw, Nang e rai nga nngai, ngu nna htan wu ai. Shaloi Karai Kasang gaw, Nang de hkum sit nit; na a kyepdin raw kau u; dai nang kabye ai ga gaw chyoi pra ai ga rai nga ai, nga nna mung; Ngai gaw na nwa a Karai Kasang, Abraham a Karai Kasang, Isak a Karai Kasang, Yuku a Karai Kasang rai nga nngai, nga nna mung tsun wu ai. Dai rai nna, Mawshe gaw Karai Kasang hpe yu na hkrit wu ai majaw, shi a myiman magap da wu ai. 
Bai Madu gaw, Egutu mung e nye a amyu hkrum ai ru tsang lam hpe ngai mu se ai rai nna, shanhte a hpareng ni a majaw hkrap sharung ai nsen hpe ngai na ya mase ai: shanhte hkrum ai nni nkri hpe ngai chye nga nngai: shanhte hpe Egutu masha ni a lata na hkye hkrang la na hte ,dai mung kaw nna ja kat ai hte kaba nga ai, nga chyu hte lagat jahku lwi ai mung de woi wa na, ngai yu sa ring ngai. 
Shaloi, Mawshe gaw, Yu u, Israela a kashu kasha ni hpang de ngai sa du nna, Nanhte a nji nwoi ni a Karai Kasang gaw ngai hpe nanhte hpang de shangun dat nngai, ngu mawe yang, shanhte mung, Dai Karai Wa a mying ningsang kaning nga lu ta? Nga nna san yang, ngai kaning ngu bai htan na rai ta? ngu nna Karai Kasang hpe sun wu ai.Shaloi Karai Kasang gaw, NGAI A RAI NGA NNGAI; dai wa nan ngai rai nga nngai. NGAI A RAI NGA NNGAI nga ai wa gaw nanthe hpang de ngai hpe shangun dat ni ai, ngu nna Israela a kashu kasha ni hpe nang tsun na rin ndai, ngu nna Mawshe hpe tsun wu ai. Bai Karai Kasang gaw Mawshe hpe, Nanhte a nji nwoi ni a Karai Kasang, Abraham a Karai Kasang Isak a Karai Kasang, Yaku a Karai Kasang ngu ai Madu gaw, ngai hpe nanhte hpang de shangun dat ni ai, ngu nna Israela a kashu kasha ni hpe nang tsun na rai ndai: dai gaw htani htana nye a amying rai nga na li ai; dai gaw prat mi hte prat mi na nye a masat dingsat mying rai nga na lit ai.
Karai Kasang a Mungga rai nga ai.

CHYUM MUNGGA DAW 2

1KORINHTU 10:1-6, 10-12

Ya hti na gaw Korinhtu masha ni hpang de San Pawlu shagun dat ai Laika langai hta na rai nga ai.
Hpu nau ni e, Ndai lam langai mi hpe nanhte n chye n mai ai ngu nna, shadum dat nngai. Ngai tsun mayu ai lam gaw: Anhte a ji wa ni yawng gaw dai sumwi npu e gawp ma ai hte, nawng lapran hku rap sa wa ma ai. Shing rai, yawng hte gaw dai sumwi hte nawng hta e, Mawshe hte matut mahkai ai hkrum lu hkra kashin kamun hkam la ma ai. Shanhte yawng hte gaw dai mauhpa shahpa maren sha nna, dai mauhpa luhpa mung maren lu ma ai. Kaning rai nme law, shanhte kaw hkan nang ai mauhpa lunghkrung hta na shanhte lu ma ai rai nna, dai lunghkrung gaw Hkristu rai nga ai. Rai ti mung, shanhte hta na malaw maga hte hpe Karai Kasang n sharawng da mu ai rai nna, shanhte dai nam mali hkan e run byak mat ai hkrum ma ai. 
Anhte a ji wa ni gaw n kaja ai arai hpe myit marin nga ma ai zawn, anhte n marin u ga she, dai lam hte gaw anhte a matu shari tai wa masai. Shanhte nkau mi aput angun nga ma ai zawn, nanhte gaw aput angun hkum rai myit; dai ni gaw Jahten ai Wa a lata e hten byak ai hkrum manu ai. Dai lam yawng hte gaw shari tai u ga, shanhte hta byin wa sai rai nna, anhte hpe sharin achyin ya na matu ka da nga ai; kaning rai nme law, anhte a aprat hta e dai ahtik labau ni dik wa sai rai. Dai rai nna, marai langai ngai gaw jan rai tsap nga nngai, nga nna myit yang gaw, shi n kadawng u ga sadi ra ai.
Karai Kasang a Mungga rai nga ai.

KABU GARA SHIGA

LUKA 13:1-9

Ya hti na gaw, Luka a Laika hta na Kabu Gara Shiga rai nga ai.
Dai aten hta e, masha nkau mi Yesu kaw sa du nna, Pilatu gaw Galile masha nkau mi a asai hpe, shanhte nawng ya ai hkungga asai hte kayau kau ai lam, Shi hpe tsun dan mu ai. Shi shanhte hpe, Dai Galile masha ni shing re ai hkrum ma ai majaw, Galile masha yawng hta mara grau law ai ngu nna nanhte myit da mu ni? Dai nrai; ngai nanhte hpe tsun de ga: nanhte mung myit malai n lu yang gaw, nanhte nlang dai hte maren hten bya mat na marin dai. 
Ndai ga shadawn mung Shi tsun wu ai gaw: Masha langai mi shi a tsabyi sun hta hkai da ai maihpang hpun langai mi tu lu ai rai nna, dai hta na asi sa tam yang, n mu wu ai.  Dai rai nna shi gaw, Ngai masum ning tup dai maihpang hpun hta na asi sa tam ti mung, n mu we ai; dai hpe kran kau u; hpa rai ga lahpawt tu nga na a ta? Ngu nna sun lajang ai wa hpe tsun wu ai. Dai wa gaw, Madu e, dai ning sha gaw naw tu nga yu u ga; de a nhpang grup e ngai htu kapun nna hpun apawm na we ai: dai hpang asi si yang gaw tu nga u ga: asi n si yang gaw nang kran kau na rai nga ai, ngu nna madu hpe htan wu ai.
Madu a Kabu Gara Shiga rai nga ai.

2022: LUSHA GAM LADAW LABAN (2) NA MUNGGA

Ndai dinghta ga e mu lu ai baw, hkam sha lu ai baw yawng gaw galai shai lu ai, jahtum e htum mat hten mat ai kaw kre ai. Karai e shagrau ya na hpung shingkang, asak aprat ningnan gaw htenza mat lu ai n rai; myi na hte mung, myit hte mung, n hkawn hkrang lu ai sumsing mungdan na shabrai kumhpa gaw kaba la ai lam, Karai a ga-sadi gaw n shut n shai re ai lam hpe shadum ya ai. Petru, Yaku hte Yawhan, shanhte masum gaw asam galai shai wa ai, hpung shingkang hkam la ai Yesu hpe mu la ai lam hta, sumsing mungdan na hpung shingkang hpe praw rai gan mu la ma ai. Kasa Pawlu mung ning nga nna shadum ya ai, “Anhte a nta majing gaw sumsing mungdan e she re; sumsing mungdan kaw na yu sa ai hkye la Madu hpe anhte ala nga ga ai. Anhte a hten yat chye ai hkum hkrang hpe shi a htoi kabrim ai hpung shingkang hte shabung nna galai shai ya na ra ai” nga ai.

Lu su matsan ai n nga, gumhpraw hte arung arai ni hkoi shap lang shajang ga ai. Gumhpraw hkoi lang nna hka n wa ai ni mung law law, arai shap lang ai hpang lawan bai htang jaw n kam ai ni mung law law. Ga-sadi dung ai ni hpe kam ga ai. Ga-sadi n dung ai ni hpe matsat ga ai. Tinang hkum nan mung ga-sadi hprai ai lam law law nga yu sai lam hpe myit dum mai ga ai.

Abraham gaw Karai e jaw ai ga-sadi hpe chyip mak kam ai. Masha e sawn yu yang n byin mai ai lam hpe rai tim, Abraham gaw Karai Kasang hpe kam ding-yang sha re. N mai byin ai amu ni hpe mung Karai e shabyin lu ai lam shi kamsham ai. Dai majaw, Abraham gaw makam masham a ji-jum daju tai wa ai. Shi a aru arat ni Karai a shaman chyeju, sutli wunli hkam la lu ma ai. Abraham a amyu matu Israel amyu madu la lu na Kanan buga de hkum nan n du lu na rai tim, Karai Kasang gaw shi hpe praw rai, tsan kaw na mada mu shangun ai.

Karai Kasang Abraham a aru arat ni hpe jaw ai lamu, Egyip mundan kaw nna (ya na) Iraq mung du hkra dam lada dik ai; ya dai ni anhte chye ai hku rai yang, mungkan e sut su dik ai lamu ga, wan-sau pru dik htum ai buga she rai nga ai. Mungkan ting hte matut mahkai hpaga ga na matu kaja dik htum ai shara she rai taw nga ai. Prat sanat, Isarael amyu sha ni n kangka ai majaw, ya na Palestine buga loi sha mi madu la lu ma ai; Karai e masat ya ai mahtang dam pa dik, dut sha n ma ai wan-sau lamu ga hpe tat kau ma ai. Karai a maga ga-sadi dung ai majaw, dai nip rat du hkra, Israel myu sha ni hpe Karai e n malap kau ai. Lamu ga hkraw hkun dik ai buga, nhprang sut rai taw dik ai lamu ga e she nga nga ma tim, madang tsaw dik ai hku hkai sha lu ai hte hpaji kunghpan dik ai, sut su dik ai amyu naw tai lu ma ai.
Hkristu hpe kamsham ai ni gaw ningnan re ai Israel amyu masha, sutli kumhtaw dagraw la na amyu masha tai wa ma ai.

Anhte hte Karai a lapran shabung shadawn hkat na lam hpa n nga ai. Rai tim, kashin kamun a marang e Karai e jaw ai ga-shaka hta hkik hkam dik htum ai arawng sadang hpung shingkang jaw na lam tsun ai. Masha a maga gaw Karai a tara matsun ni hpe hkan shatup na ga-sadi hte ga-shaka shagrin da ai rai nga ai. Anhte Karai Kasang hpe ap nawng jaw kau ra ai gaw hpa mi n rai, Karai a maga jaw ya na shagrau kumhpa mahtang shadawn n mai kaba la nga ai.

Moi na Israel amyu ni sadi n dung ai zawn, anhte langai hpra mung Karai hpe jaw da ai ga-sadi tawt lai kau ai, hprai kau ai kade lang, kade she sawng ai, ngu ai hpe myit dum myit malai ra ga ai. Anhte shinggyim masha ni n kangka ai rai tim, Hkristu a marang e, Shi hta jung noi nga ai a marang e, Karai Kasang gaw kamsham ai ni hpe teng sha shagrau ya na lam n shut n shai rai nga ai.

Ndai dinghta ga e anhte chye lu ai pyaw-hpa yawng hpe tawt lai nna, Karai e hkyen lajang da ya ai sumsing mungdan hpe mada yu let, Karai a ga-sadi hpe n shut n shai kam ging ga ai. Tinang tsawra dik ai tinang a hkum, si mat hten mat ai kaw kre mat na rai tim, jahtum e ningnan re ai hkum hkrang bai lu la nna, hpung shingkang sutli dagraw hkam la lu na ga ai. Anhte a gingdan ai lam a majaw n rai, Hkristu a marang e sha anhte mung hpung shingkang hkam la na teng sha myit mada lu ga ai.

 Hkrat sum ai aten, machyi makaw yawn hkyen hkrum ai aten, myit htum myit daw ai aten ni hta tinang a prat jahtum na bandung hpe myit dum ga ai kun?

 Sut lu nga mai ai aten, hkam kaja ninggun rawng ai aten, pyaw hpa law law hkam la lu ai aten ni hta sumsing mungdan hte seng ai ga-sadi ni hpe malap mali byin chye ai kun?
 Yesu a wudang gaw Karai a n htum n wai tsawra ra ai myit a kumla re ai lam myit yu mai ga ai n rai a hka?

2022: LUSHA GAM LADAW LABAN (2) NA CHYUM LAIKA

LUSHA GAM AI LADAW HTA LABAN 2
March 13, 2022
CHYUM MUGGA DAW 1

NPAWT NHPANG 15:5-12, 17-18

Ya hti na gaw, Npawt Nhpang Laika hta na rai nga ai.
Dai nhtoi hte hta e, Karai Kasang gaw Abram hpe shinggan de woi shapraw nna, Sumsing lamu de mada yu u; dai shagan ni hpe nang dang hti yang gaw hti yu u: na a myu matu ni dai hte maren rai na mara ai, ngu nna shi hpe tsun wu ai. Abram mung Madu hpe kam sham wu ai rai nna, dai gaw shi a ding hpring ai lam ngu nna Madu sawn la ya wu ai. Bai Shi tsun wu ai gaw, Ndai mung hpe na a sali wunli shatai na matu, ngai nang hpe jaw sana nga nna, Hkaladea masha ni nga ai Ura mare kaw nna nang hpe shaga woi wa ai Madu ngai rai nga nngai, ngu wu ai.
Shaloi Abram gaw, Madu e, dai mung nye a Sali wunli tai na gaw, ngai kaning di chye lu na rai ta? ngu nna san wu ai. Madu gaw, Masum ning du ai dumsu upra langai mi, masum ning du ai bai nam yi langai mi, masum ning du ai sagu la langai mi hte u hkru du langai mi, ura kasha langai mi nye a matu la tawn u, ngu wu ai, Dai hte maren dai ni nlang hte hpe shi la tawn nna, hkum shagu hpe ka-ang brang brang di ga nhtawm, maga mi de chyen chyen di nna jahka tawn wu ai: u yan hpe chyawm gaw shi n ga wu ai. 11U matse ni dai mang de pyen hkrat ma timung, Abram dai ni hpe hkap gawn kau wu ai. 
Jan du wa jang, Abram gaw yup sha-up hkrum nna, ja htat ai nsin hta hkrit gari mat wa ai. Jan shang mat nna, nsin htat nga ai shaloi, wan hkut hku ai wan mang hte, wan tu ai shanan paw pru nna, shan chyen ni a lapran hku lai mat wa ai. Dai shani e Madu gaw Abram hte ga shaka tawm da nna, Egutu hka nu kaw nna Uhprat hka nu kaba du hkra dam ai lamu ga hpe, na a amyu matu ni hpe ngai jaw da se ai, ngu nna tsun wu ai.
Karai Kasang a Mungga rai nga ai.
 
CHYUM MUNGGA DAW 2

HPILIPI 3:17-21, 4:1

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai. 
Hpu nau ni e, Nanhte hpawm nna, ngai madun dan ai kasi hte maren hkan galaw nga mu. Anhte gaw nanhte a kasi ningli tai saga ai rai nna, dai zawn hkan nang ai ni hpe yu matsing nga mu. Kaning rai nme law, shawng e ngai nanhte hpe law law lang tsun dan nna, ya e pyi hkrap let nanhte hpe tsun dan nga nngai hte maren, Hkristu a Udang hte nhtan shai ai hku hkan galaw ai ni law law nga ma ai. Shanhte a chyahtum ai gaw hten byak ai rai nga ai; shanhte a Karai Kasang gaw tinang a kan rai nga ai; tinang a kaya kahpa hta gumrawng nga ma ai; dinghta ga na arai ni hpe hkrai myit tsang nga ma ai. 
Anhte a buga chyawm gaw sumsing lamu hta e rai nga ai; dai yang nna Madu Yesu Hkrsitu ngu ai Hkye Hkrang La ai Wa hpe anhte ala nga ga ai. Shi gaw arai yawng mayawng hpe Shi a npu e tawn da lu na atsam a marang e, anhte a grit nem ai hkum hkrang hpe ningnan galai nna, Shi a hpung shingkang rawng ai hkum hkrang hte bung hkra, shachyaw jahtap na ra ai. Dai rai nna, ngai tsaw rai ai hte sharawng awng nna, nye a kabu gara shara hte janmau rai nga ai, jinghku ni e, dai Madu hta dakan dakring rai nna tsap nga mu, ngai tsaw ra ai ni e.
Karai Kasang a Mungga rai nga ai.

KABU GARA SHIGA

LUKA 9:28b-36

Ya hti na gaw, Luka a Laika hta na Kabu Gara Shiga rai nga ai.
Dai aten hta e, Yesu gaw Petru, Yawhan, Yaku hte hpe woi wa nna, akyu hpyi na nga bum ntsa de lung wa ai. Akyu hpyi nga yang, Shi a myiman gaw ahpraw nsam galai mat nna, Shi a hpun palawng mung hpraw tu ai hte, kabrim kabram rai wa lu ai.Shaloi, Mawshe yan Elia ngu ai masha lahkawng, hpung shingkang hte dan pru nna, Yerusalem mare e shatup na ra ai, Shi lai wa na lam Shi hte ga tsun nga ma ai. 
Petru hte shi a manang yan gaw yup shamwi nga ma ai; rai ti mung, n yup ai sharang nna, Shi a hpung shingkang hte Shi hte rau tsap nga ai hpe mu ma ai. Dai yan gaw Yesu kaw na wa magang yang, Petru gaw, Madu e, ndai yang e nga na anhte a matu mai nga ai; nang e Na a matu langai mi, Mawshe a matu langai mi, Elia a matu langai mi, sum masum, anhte gap saga nga nna Yesu hpe tsun wu ai; rai ti mung, shi hpa tsun ai n chye wu ai. 
Dai ga tsun nga yang, sumwi du nna shanhte hpe ka-up wa nga ai: dai sumwi kata de shang lawm wa yang, shanhte hkrit nga ma ai. Dai sumwi hta na nsen ngoi pru wa nna, Ndai wa gaw, ngai Sha, ngai lata la ai Wa rai nga ai: Shi a ga madat mara mu, nga ai. Dai nsen ngoi pru wa ai hpang, Yesu shi hkrai nga ai hpe mu ma ai; sape ni mung atsin sha nga nna, shanhte mu ai lam ni hpe, dai aten hta kadai hpe mung n tsun dan ma ai. Madu a Kabu Gara Shiga rai nga ai.

2022: LUSHA GAM LADAW LABAN (1) NA MUNGGA

Hpa lu hpa sha na, hpa galaw na, ngu, shani shagu na matu myit tsang ra ga ai; grup-yin e shingjawng hkat ra ai lam ni law law, dangrang hkat ra ai lam ni law law re ai a lapran hkrung nga ga ai. Tinang lu lawm ai hta myit n dik, byin tai nga ai madang hta myit n dik lu ai majaw, myit n pyaw myit n dik rai shajang ga ai. Byin mayu, ra mayu re ai majaw nji n mu hkam sha ai kade she law a hka! Chyum Mungga ni hku nna sharin ya ai lam gaw ndai re: tinang byin tai nga ai daram, lu lawm ai daram myit dik myit pyaw chye na lam ahkyak ai. N lu n mai, n lang n mai re ai baw ni hpe lu da jang myit dik chye ai a majaw myit simsa lam lu la ai gaw manu dan dik ai. Wan-u hte wudang, zaibru jang hte katsi katsang nga ai shara, lu-sha gam ai amu hte mara dam hka wa ai amu, ndai ni gaw namak lawhpa hte agung alau ni hpe dang kau lu ai laknak kaja ni rai nga ai.

Dinghta prat hta n lu n mai, n lang n mai ai hpa hpa wa rai ta? Mahtai gaw law law re. Lu-hpa sha-hpa, dum nta hte machyu shara, manaw manang hte jinghku kaja ni, bu hpun nba, motorcycle, handphone, kaga law law rai nga ai. Lu-hpa sha-hpa, ngu ai shaloi, kaja wa hkum sai shan a matu ninggun tai ai baw hpan ni hpe lu sha na lata la mai ai zawn, manu grai laja ai baw, lu sha dan yang arawng madun lu ai baw mari sha mai nga ai.

Akyu jaw nna shangun lang mai ai baw motorcycle, hand phone lang mai ninglen, manu laja grau ai, model ningnan ni hpe mari lang nna gumrawng dan mai nga ai. Reng grau ai, kaba grau ai, tsawm grau ai, manu laja grau ai, dz., dz., grau ai grau ai ngu ai hpang shachyut nna ba kalawp si ai ni kade lang she rai a hka! Ra mayu lu mayu nna mahkawng da ai arai ni law law hpe kyem da ai na jang hpang e majoi kabai kau ra ai dinghku rai ni mung kade she law a hka!

Moshe gaw shawa masha ni hpe shadum ai__ Karai Kasang gaw chyeju yawng a ningpawt, chyeju madu majing re ai majaw, langai sha re ai Madu Karai Kasang hpe chyu sha nawku jawjau na lam htet matsun ai. Israel amyu masha a ru-pawt ninghpang hpe gawn dat yang, bu hkawm masha, lamu ga n lu ai, kaga amyu ni hpa n sawn ai, kaji kadun rai nga ai kaw na Egyip mung e amyu masha langai hku byin tai wa ai. Mayam prat kaw na mung hkye shalawt dat ai hkrum nna Kanan mung hpe kashun madu la lu ai Israel amyu, grit nyem ai myit hte Karai Kasang hpe nawku jawjau let chyeju htang chye na lam, Moshe matsun ai. Gumrawng gumtawng ai myit n rawng na lam shadum ya ai. Anhte kadai n nga, tinang byin tai nga ai, la lawm ai, hkam kaja ai, awng dang ai…. yawng hta gumrawng myit n rawng ai sha, Karai Kasang hpe chyeju dum shakawn ra ga ai.

Anhte bu hkawm na rai jang, hkrun lam a matu n gun n mai, ra nan ra ahkyak madung re ai arai ni hpe sha baw gun ga ai. Lit tsang lu ai daram shatsang nna hkrun lam hkawm ga ai. Yesu gaw mare kahtawng hte tsan hkran ai, shingran katsi ai shara de sa nna shi hkrai myit sumru akyu hpyi ai. Mungkan ga, dinghta ga hte seng ai lam ni yawng hpe kau da nna Karai Kasang hta myit maju jung let, wenyi a atsam marai jahpring la ai. Shi hkrai sha, Karai Kasang hte matut mahkai nna nga nga tim pyi nat satan a agung alau hpe hkrum katut ai. Nhtoi na wa jang hkum shan hta ra kadawn ai lam hpe ja ja hkam sha ai. Hkum sai shan hte myit masin a matu ra kadawn ai lam hpe dum wa ai aten hta agung alau mung ja dik ai aten rai nga ai.

Anhte a prat, modern prat hta kaja wa ra ai, akyu jashawn ra ai baw, n lu n mai ai hta lai jan nna, gat rai dut ai ni hpe maram yu ga: ndai baw grau sau ai, mu grau ai, tsawm grau ai, reng grau ai; ndai baw hpan grau kaja ai, grau reng ai ngu nna mung, ndai baw wora baw hpe lu mu, sha mu, bu hpun mu, shapyaw la mu… nga nna mari lang ai ni hpe gunglau ai ladat law law nga nga ai. Pyaw hpa lam ni mung law law; lata la mai ai hpan mung law law re ai aprat rai nga ai. Ra ahkyak madung ni gaw hpa hpa wa rai ta?

Wandap, wan-u, wudang, ndai ni gaw hpa hpa hpe shadum ai rai ta? Kawsi hpang gara ai, machyi makaw, nni nkri, yawn hkyen shoi-hpa, myit kaji karen ai, hkrat sum ai, myit daw ai, kaya hkrum ai…. ndai zawn re baw ni a kumla rai nga ai. Tinang n ra sharawng ai, koi kau mayu ai rai tim, masha langai a prat hta kahtap kahtap nna hkrum katut ga ai. Dai wudang hkrun lam a jahtum e si mat nna wan-u zawn ga numhpu tai mat na ga ai. Karai a man e hpa wa gumrawng shara nga a ta?

Moshe gaw shalawt dat hkrum ai Israel amyu masha ni hpe shanhte a ji-jum daju a ru-pawt hpe gawn dan ai: matsan mayan bu hkawm ai amyu, lamu ga n lu ai amyu she re ai. Matsan mayan re ai amyu matu kaw na hkrawn hkrat ai hpe Karai e matsan dum sharawt shagrau da ai lam myit dum shangun ai. Prat ban shagu na makam masham a kasha ni mung, masha a ru pawt gaw ga numhpu kaw na re ai, ga numhpu tai ai kaw kre na lam myit dum ra ga ai. Ga numhpu kaw na asak ningnan prut pru nna n htum n wai ai, pyaw hpa n htum ai lu ai asak aprat hpe myit mada lu na matu, lu-sha gam ai ladaw nhtoi mali-shi ya masat da ya ai. Masha hta ra ahkyak dik htum ai hpa hpa sha re ai, ngu ai lam hpe myit sumru nna, mungkan ga a agung alau ni hpe ningdang nyet kau lu na lam shakut la mai ai aten ladaw gaw lu-sha gam ladaw rai nga ai. Karai a man e pyet pyet taw nna gumrawng gumtawng myit, rai dum ai myit, nammak lawhpa hte marin ai myit ni hpe renghkang lu na lam shakut ra ai aten ladaw rai nga ai.

 Dai ning na lu-sha gam ladaw hta kaning re ai baw n kaja ai lailen ni hpe kau da na myit lu a ta?
 Dinghta ga a lam hta shingjawng lawm nna ba kalawp si ai baw hpa hpa wa rai a ta?

2022: LUSHA GAM LADAW LABAN (1) NA CHYUM LAIKA

LUSHA GAM AI LADAW HTA LABAN 1
March 16, 2022
CHYUM MUNGGA DAW 1

TARA JAHPRANG 26:4-10

Ya hti na gaw, Tara Jahprang Laika hta na rai nga ai.
Israela masha ni yawng hte hpe Mawshe ning nga ai: Hkinjawng agyi wa gaw shawng myin ai nsi naisi amyu shagu hpe na a lata na la nna, na a Madu Karai Kasang a tawn hkungri a man e tawn da na rai wu ai. Shaloi na a Madu Karai Kasang a man e nang tsun na gaw: Nye wa gaw brak hkawm ai Arame masha rai nga ai; shi gaw n law n htam ai masha ni hte rau Egutu mung de yu wa nna, galu kaba ai hte atsam rawng nna law htam ai amyu tai wa lu hkra, dai yang e shingbyi nga ai.
Egutu masha ni chyawm gaw anhte hpe n htum nni zingri zingrat ai hte, aja awa yam sha kau mi ai. Shaloi anhte a ji wa ni a Madu Karai Kasang hpang de anhte hpyi jahtau saga ai rai nna, Madu anhte a nsen madat mara ya ai hte, anhte hkrum ai bungli lit hte nni nkri hpe yu ya mi ai. Dai rai nna, Madu gaw n-gun ja ai lata hte ladawn dat ai lahpum, hkrithpa lam law law hte lamik kumla mauhpa amu madun nna, Egutu mung na anhte hpe shaw woi wa nhtawm, nga chyu hte lagat jahku lwi ai ndai mungdan hta woi shawn tawn da mani ai. Ya, Madu e, Nang ngai hpe jaw ai yi hkauna a shawng myin ai nsi naisi ngai la sa ring ngai, ngu nna na a Madu Karai Kasang a man e nawng let, Shi hpe dingnyawm nawku na rai ndai.
Karai Kasang a Mungga rai nga ai.

CHYUM MUNGGA DAW 2

ROMA 10:8-13

Ya hti na gaw, Roma masha ni hpang de San Pawlu shagun dat ai Laika hta na rai nga ai.
Hpu nau ni e, Chyum Laika hpa tsun a ta? ‘Dai Mungga gaw nang hte htep rai nga ai; na a n-gup hte kraw lawang hta e rawng nga ai,’ dai gaw anhte hkaw tsun dan ai makam masham rai nga ai. Shingrai, ‘Yesu gaw Madu rai nga ai,’ nga nna na a n-gup ga hte hkap hta la nna, Karai Kasang si mat ai ni kaw na Shi hpe hkrung sharawt la ai hpe, na a myit masin hta kamsham yang gaw, nang hkye hkrang la ai hkrum na rin dai. Kaning rai nme law, myit masin mahkra hte kam sham yang gaw, ding hpring ai lu la na ra ai; n-gup ga hte dai makam masham hpe hkap hta la yang gaw hkye hkrang la ai hkrum na ra ai. 
Chyum Laika gaw Shi hpe kam sham ai ni yawng mayawng hte gaw kaya kahpa n hkrum na ra ai, nga nna tsun ai. shaloi, Yuda ni hte Greka masha ni hpe n ginhka nga ai: dai Madu gaw yawng mayawng a ntsa na Madu langai sha rai nga ai; Shi hpe shaga ai ni yawng mayawng hpe garum na matu, Shi chyeju sutgan hte hpring nga ai. Shingrai, Madu a mying ningsang hpe shaga ai masha kadai mung hkye hkrang la ai kaw du lu na ra ai.
Karai Kasang a Mungga rai nga ai.

KABU GARA SHIGA

LUKA 4:1-13

Ya hti na gaw, Luka a Laika hta na Kabu Gara Shiga rai nga ai.
Dai aten hta e, Yesu gaw Chyoi Pra ai Wenyi hte hpring let, Yawdan hka nna bai wa yang, dai Wenyi e nam mali de nhtoi mali shi ya tup woi hkawm wu ai rai nna, nat e gunglau ai hkrum wu ai. Dai nhtoi mahkra a laman e Shi hpa mung n sha ai rai nna, jahtum ai de kraw si wu ai. Dai rai nna Nat gaw, Nang Karai Kasang a Kasha rai yang gaw, ndai nlung hpe muk tai u ga tsun u, ngu nna Shi hpe tsun wu ai. Yesu htan let, Masha gaw muk hte sha hkrung nga lu na n rai, nga nna ka da nga ai, ngu wu ai. 
Bai, Nat gaw Shi hpe tsaw ai shara de woi lung nna, mungkan ga na mungdan nlang hpe myi grip mi hta madun dan nna, Ndai ahkang aya mahkra hte, dai mungdan ni a hpung shingkang hpe ngai nang hpe jaw na de ai: dai gaw ngai hpe ap ya ni ai rai nna, ngai jaw mayu ai wa kadai hpe mung jaw lu nngai. Dai re ai majaw, nye a man e nang nawku yang gaw, ndai yawng mayawng na a tai na ra ai, ngu nna Shi hpe tsun wu ai. Shaloi Yesu gaw, Dai Madu na a Karai Kasang hpe nang nawku lu na rai nna, Shi hpe hkrai daw jau lu na ndai, nga nna ka da nga ai, ngu nna htan wu ai. 
Bai, Nat gaw Yerusalem mare de Shi hpe woi sa nna, Nawku Htingnu a nchyun e shadun tawn nhtawm, Nang Karai Kasang a Kasha rai yang gaw, Na a hkum hpe nang de nna le ra de jahkrat dat u; kaning rai nme law, Nang hpe bau sin na, Na a matu Shi a lamu kasa ni hpe Shi hkang da nu ai; Bai, Nlung hta Na a lagaw n ahtu u ga, shanhte a lata hta Nang hpe pawn la na mara ai, nga nna ka da nga ai, ngu wu ai. Yesu gaw, Dai Madu na a Karai Kasang hpe nang chyam yu lu na n rai, nga nna rawng ai, ngu nna htan wu ai. Nat gaw agung alau lam mahkra shatup ngut jang, bai sa ang ai aten du hkra Shi kaw na pru wa ai.
Madu a Kabu Gara Shiga rai nga ai.

2022: PRAN WAN LADAW LABAN (8) NA MUNGGA

“Hpung kaja kaw na ӑsi kaja si jaw ai; mai ja ai sӑlum kaw na mai ja ai ӑga tsun shapraw ya ai” nga ai. Mai ja ai salum hta htun bang da ai sutgan kaja ni shapraw ya ai a marang e, madat la, na la ai ni myit pyaw lu ai; shalan shabran hkrum ai; hpaji mӑchye mӑchyang jat la lu ai. “Marai langai ngai ga n tsun shӑpraw dingsa, masha dai wa hpe hkum shakawn” (Sirak Laika). Masha langai gaw shi kadai kaning re ai hpan re ai hpe shun ai rai jang gaw tsun shaga, tsun jahta ai hta re, nga ai. Shӑni shӑgu anhte tsun shӑga ga ai, jӑhta ga ai. Tsun shut, shaga shut ai lam n nga hkra, kade daram sӑdi ra ai lam; n-gup kaw na pru wa ai ga gaw kraw kata myit masin kaw hpa rawng ai lam hpe shadawng dan ai majaw, myit masin mai ra ai, ja ra ai lam sharin la lu ga ai. Masha lӑngai a prat hta shut kӑtaw, myi-man kang ra ai law law lang rai na re. San Pawlu shadum ai hta, “Gӑloi myit hkum daw mu”, nga ai. Anhte gawng kya ai hta, Hkristu a marang e awng padang hkam la lu na ga ai, nga ai. 

Ga n shaga lu ai masha, na hpang ai masha, myit n gring ai masha ni hte matut mahkai hkat na yak la ai. Ga n shӑga chye ai ma-ngha’ hkrap ai shaloi chyu’ jaw kanu hta lai nna kaga ni gaw n chye ya ai. Shani shagu shada tsun jahta nna tinang a kraw hta rawng ai machye machyang hte hkam sha lam ni hpe n-gup ӑga hku tsun shapraw dan lu ai gaw kaba la ai chyeju wa n rai a hka? Karai e jaw da ai chyeju kumhpa rai ninglen, n jaw n ang ai hku akyu jashawn kau ai a marang e, shada matut mahkai yak mat ai, manghkang byin ai kade lang she rai a hka! Shada matut mahkai hkat ai gaw ӑhkyak dik ai majaw, laksan hpaji sharin la ai ladat nga wa ai rai nga ai. Dai hpe “Social Communication”, ngu ai rai nga ai. Master degree, Doctorate degree du hkra, gumhpraw law law, aten law law ma hkam nna sharin la ra ma ai. Sirak mung, Yesu mung, San Pawlu mung, SociaCommunication M.A degree, Doctor degree hkam la na matu Dakkasu jawng lung na lam n matsun ai. Shanhte matsun ya, lam madun ya ai lam gaw myit gring ai masha shagu, yawng e hkan dep lu ai, hkaja la mai ai lam hpe tsun ai she rai ma ai. 

Dinghta ga ntsa e tatut mahkrum madup ni hta, Social Communication hpaji madang tsaw ai hku sharin la, degree janmau lu da nna tsun shӑga n pyaw, jӑhta n pyaw ai ni mung law law nga ma ai. Degree lu ai ni da, n lu ai ni da, ru-pawt madung re ai, htingdun madung gaw ndai re: myit masin kraw lawang sanseng ai; tsawra myit hte hpring ai; sumnung shingdi ai; garum chye ai myit rawng ai; kaga masha ni a chye na hkap la lu ai madang hte hkam sha chye ai lam hpe sawn shen chye ai, dz. dz., kaja ai baw ni hpe htūn bang da ai myit masin salum lu na ahkyak grau ai. Social Communication/ masha shada, uhpung uhpawng shada matut mahkai kanawn mazum hpaji, accademic manu n dan ai, jawng lung n ra ai, ngu mayu ai n rai. Janmau degree lu da ninglen gumrawng gumtawng ai, myit n sanseng ai, myit magaw ai, tinang a matu, tinang a amyu masha a matu sha, tinang a makam masham hpung a matu sha, gumhpraw lu lawm lam a matut sha, ngu nna hpaji hpe akyu jashawn lang ai rai yang, kade lӑchyum pru na rai a hka! Yawng hpe shachyoi shӑpra ya ai gaw Karai a Mungga nan rai nga ai.

Ra rawng ai lam n nga sawng, n shut sawng, kadai mung n byin lu na re. Tinang nang a prat hpe myit yu tim kade lang tsun shut shaga shut, ngu ai she nga ai. Anhte a kraw hta kaja ai, n kaja ai kayau nna rawng shajang ga ai. N hkru n kaja ai lam a ru-pawt majing gaw shut hpyit mara re ai; sat kau lu ai bӑlen gaw shut hpyit mara re ai. Hkristu a bai hkrung rawt ai a marang e, “ӑchye’ sat lu ai bӑlen gara de rai mat sa ta?” nga ai. Galoi myit n daw ai sha, tinang a hkum hpe mung, kaga masha ni a gawng kya ai lam ni hpe mung, myit n daw ai, Karai a Mungga hte shachyoi shӑpra la dingyang rai nna asak hkrung nga ra ai lam, sharin la lu ga ai. Kraw kata kaw na pru ai ga, “Mai mai, ja ja” ngu nna shakram hkat shaja ga.

 Ra ai hta jan nna tsun shaga chye ga ai kun? Tsun ra jahta ra ai kaw hpa  mung n tsun, n jahta lawm rai nna nga kau chye ga ai kun?

 Manu shabrai n jaw ra ai sha, social communication-shada matut mahkai  lu ai chyeju kumhpa kaba re ai lam myit yu ga ai kun?

 Shut chye ga ai majaw, sharai ding-yang di gwï ga ai kun?

2022: PRAN WAN LADAW LABAN (8) NA CHYUM LAIKA

PRANWAN LADAW HTA LABAN 8

February 27, 2021
CHYUM MUNGGA DAW 1

SIRAK 27:4-7

Ya hti na gaw, Sirak a Laika hta na rai nga ai.
Mam hpe hking hta hking ai shaloi, nsan dawng pru ai hte maren, ga tsun hkat ai shaloi, masha a mara dan pru nga ai. Di bu sama gaw shi galaw ai di bu ni hpe wan hta chyam yu ai zawn, masha kaja ai ai n kaja ai kun, shi ga tsun ai shaloi chye lu ga ai. Sun hta hkai tawn ai hpun hta na namsi hpe yu nna, dai sun kaja ai n kaja ai chye lu ai hte maren, masha tsun ai ga a majaw, shi kraw lawang na myit mang ai lam hpe chye lu nga ai. Masha hpe shakawn mayu yang, shi ga garai n tsun yang hkum shakawn nga mu; kaning rai nme law, shi tsun ai ga a majaw, shi a lam hpe chye lu ga ai.
Karai Kasang a Mungga rai nga ai.

CHYUM MUNGGA DAW 2

1KORINHTU 15:54-58

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.
Hpu nau ni e, Ndai hten mat chye ai hkum hkrang gaw n hten n mat chye ai hpe dagraw nga ai hpe, ndai si mat chye ai mung, n si n mat chye ai hpe dagraw ngut jang she, ‘Si hkrung si htan gaw mayu kau ai hkrum nu ai; awng dang lu saga ai’ nga nna, Chyum Laika hta ka da ai ga dik wa na ra ai. Si hkrung si htan e, na a padang ninghkaw kanang nga nga a ta? Si hkrung si htan e, na a balen kanang nga nga a ta? Si hkrung si htan a balen gaw shut hpyit mara rai nga ai; shut hpyit mara a n-gun atsam chyawm gaw dai jep ai tara kaw na rai nga ai. Rai ti mung, Karai Kasang gaw, anhte a Madu Yesu Hkristu a marang e anhte hpe awng dang shangun ai majaw, Shi hpe chyeju dum shakawn nga ga. Dai re ai majaw, ngai tsaw ra ai hpu nau ni e, dakring dalang nga nga mu; myit hkum htum mu; nanhte gun hpai ai amu gaw, Madu hta e kaman lila n rai nga ai dum chye nna, dai Madu a bungli hpe tut nawng e shakut sharang let galaw nga mu.
Karai Kasang a Mungga rai nga ai.

KABU GARA SHIGA

Luka 6:39-45

Ya hti na gaw, Luka a Laika hta na Kabu Gara Shiga rai nga ai.
Dai aten hta Yesu Shi a sape ni hpe ga shadawn tsun mu ai gaw: Myi kyaw ai wa gaw myi kyaw ai wa hpe lam woi madun lu a ni ? Shan lahkawng nhkun hta hkrat na ma ai, n rai ni ? Sape ni gaw sara hta grau ai n rai; hkum hkra sharin la sai sape kadai mung shi a sara zawn rai na ra ai. Tinang a myi hta rawng ai hpuntawng hpe n myit yu ai mi, na a nhpu nnau a myi hta rawng ai nbun hpe, hpa rai yu nga nta? Tinang myi hta rawng ai hpuntawng hpe pyi n mu ai wa mi, Hpu nau wa e, na myi hta rawng ai nbun hpe ngai naw lai kau ya de ga, nga nna nhpu nnau wa hpe kaning rai tsun lu n ta? Hpyi hpun ai wa e, Na a myi hta na hpuntawng hpe shawng lai kau u; dai hpang, na nhpu nnau wa a myi hta rawng ai nbun hpe lai kau ya na, nang asan sha mu na rin dai. Kaja ai namsi hpun gaw n kaja ai asi galoimung n si ai; kaja ai asi si ai hpundaw mung n nga ai. Dai rai nna, hpun shagu hpe tinang a asi yu nna chye ginhka lu nga ai: ju hpun hta na maihpang si kadai n di la lu ai; ju singwum hta na mung tsabyi si hpe kadai n di la lu ai. Kaja ai wa gaw, shi a kraw lawang hta mahkawng da ai kaja ai lam ni hta na, kaja ai hpe shapraw dan ai; n kaja ai wa chyawm gaw, shi mahkawng da ai n kaja ai hta na, n kaja ai lam hpe shapraw dan ai: kaning rai nme law, myit masin hta hpring chyat nga ai kaw na, n-gup hte tsun pru nga ai.
Madu a Kabu Gara Shiga rai nga ai.

2022: PRAN WAN LADAW LABAN (7) NA MUNGGA

“Nanhte a hpyen ni hpe tsawra mu; nanhte hpe n ju n dawng ai ni hpe mai kaja ai baw hte htang jaw mu; matsa jaw ai ni hpe shaman ga tsun jaw mu; nanhte hpe roi jahkroi di ai ni a matu akyu hpyi ya mu!” Yesu hpe shingran jaw ai hkawhkam Dawi gaw shi a asak hkan tam ai kӑtsa majing Sawl hpe sat kau lu ninglen, “Madu e sau chya ya ai wa hpe ngai lӑta n du na nngai” nga ai.  Kӑtsa dingla wa hpe mara raw dat ya ai lam madun dan ai; kӑtsa dingla Sawl ja ja myit malai ai. Moshe a tara hta tinang machyi hkrum ai daram, hpyen wa hpe mӑtai dawp mai ai lam tsun da ai. Yesu tsun ai tsawra ai lam hte daw nna tsun ai hpe yawng e na mau na ma ai. Hkap la na yak dik ai ga rai nga ai. Galoi prat na kadai amyu masha wa tim hkap la hkan shatup na yak la ai. Hkap la hkan shatup ai hta, tinang a tsawra myit jet ai lam sakse madun dan lu na rai nga ai. 

1832 hta Fransik mung Paris Mare kaba na sasana tsirung hta byin lai wa ai mabyin_ kanhkyeng htawkdang ana zinli a majaw masha law law si arum ai aten ladaw. Tsirung e magam gun ai Mama langai hpe amu galaw ai masha langai n kam hkam ai myit hte pawt sindawng let kincha ga amyu myu hte matsa ai. Mama gaw ga n htan sawng, shi galaw ra ai duty matut galaw ai. Lani mi hta dai amu galaw ai masha mung tsirung rawng ra wa ai. Tsirung up gaw shara n man sai lam, kadai hpe n hkap la lu sai lam tsun ai. Mama gaw dai shi hpe matsa ai wa rai taw nga ai hpe mu jang, shi a gawk makau shara langai lajang ya nna shi hkum nan tsi lakawn ya ai. 4-5 ya hta machyi mai wa ai; shi hpe lakawn ai Mama n du sa ai majaw san sagawn yu yang, shi roi jahkroi ngu tsun jaw ai Mama shi hpe tsi lakawn ai majaw chyeju dum ga, mara dat ya na lam hpyi nem na myit ai. Rai tim, mama dai gaw ana kap la nna si mat sai, ngu, hkap tsun dan ma yang, yawn n ma, tinang hkum hpe mung gaya dum, chyeju dum ga n tsun dat lu ai majaw ja ja yawn mat ai da. Kaja wa tatut rai jang, tinang a hpyen re ai chye jang tau nau yen kau na shakut ga ai. Nan nan hpyen re ai masha hte hkrum katut tsun jahta hkat na hkinjang n nga ai daram she rai na re. Shani shagu na mahkrum madup, tatut mahkrum madup hta gaw tinang hte rau nga ai ntsa masha shada, nawng e kanawn mazum ai masha, bungli rau galaw ai masha, bungli masa a majaw bai hkrum hkrum re ai masha ni hte manghkang byin ai law malawng n rai a hka? Hpa baw mannghkang ta? N kam hkam ai, myit machyi nan mat ai, shaga n kam mat ai, kaja ai lam n kam tsun ai hta n’ ga, shi hpe sari jahpoi lu ai daram jahpoi na, shatan na, n-gup hku gaw “mara dat ya ai”, ngu tim, kraw hta gaw mara dat ya na yak ai; shi a ntsa kaja n mu lu sai…. yawng hta dai zawn byin chye ai rai nga ai. Tsan ai hpyen hte n rai, ni htep ai masha ni a lapran byin ai law malawng.

Man-chyaw n hkrum katut ai hpyen ni a matu akyu hpyi ya na, myit malai mu ga, ngu, akyu hpyi ya kam na ga ai. Loi mung loi ai. Koi yen n mai kanawn mazum nga ai masha ni hpe tinang n ju sai, myit machyi mat sai, ngu jang, shaman ga tsun jaw na gaw raw rap; mai kaja ai baw hte htang jaw na, akyu hpyi ya na, ngu ai gaw grau yak ai chyawm she rai nga ai. Mara dat ya ai, matai n dawp na, jahpoi shatan ga n tsun na, ngu ai shaloi, kaja wa tinang machyi hkra hkungga shatai nawng ya na lam hpe Madu e ra sharawng ai. Kaja wa tsi shamai ya lu ai mung dai lam mi sha nga ai. Tinang a myit masin hpe shawng n  tsi shamai ai sha, tinang hpe shut da ai wa myit kayin wa na, shi a lailen hpe sharai ya na, galai shai wa shangun na lam kade mi myit mada lu na rai ta? Tinang tsawra ai masha a matu pu ba hkam na re; shi ra ai hpa hpe rai tim jaw na, galaw ya na jin jin rai na re. Aten ma hkam nna lakawn ya, makau e nga ya kam na re. Tinang maga kade sum machyi tim, sum ai, machyi mat ai, ngu, aput a’ngun n tsun na re. Dai gaw masha a manan maka, manan lailen rai nga ai. Tinang tsawra ai wa kaw na tsawra kamhpa myit hkam la lu jang tinang myit pyaw myit dik sai_ dai nan shabrai lu la sai rai nga ai. 

Dai majaw, Madu Yesu tsun ai gaw, “Manu shabrai n myit mada ai, chyeju htang hkam la na lam hpe n myit mada ai sha mai kaja ai galaw mu” nga, ai tara ningnan jaw ai rai nga ai. Ndai dinghta ga na sawn shen jang lang jang gaw hkap la na yak na rai nga ai. Wenyi hte daw ai, matut manoi ai sawn-shen jang lang nna lam shagu hpe shadawn lang dawdan ra ai lam Madu e sharin ya ai. Lahta na lam hpe Kasa Pawlu ӑdan rai sharin ya ai. Dinghta ga na mӑnan mӑka lailen, dinghta ga e lang ai sawn-shen jang hpe sha akyu jashawn ga yang, ga-yun hte shӑchyaw da ai Adam hte bung na lam; matsaw lӑhta ga na yu sa ai Adam ningnan a alai maka, sumsing mungdan na sawn-shen jang hpe lang let lam shagu hpe hpӑran dawdan ra ai lam Korintu Laika kaw na chye la lu ga ai.

 Tinang hpe mӑrai langai ngai shut da ai, roi chyӑhkoi di ya ai, ngu, hkam sha   ai shaloi mӑchyi nan taw chye ai kun? Gӑra hku tai htang ai malawng rai kun?

 Mӑchyi hkam, ӑsum hkam nna hkungga shatai nawng ya ai lam gaw jet  dik ai mӑra raw dat ya ai lam re, nga ai. Kade lang hkan galaw yu sa ta?

2022: PRAN WAN LADAW LABAN (7) NA CHYUM LAIKA

PRANWAN LADAW HTA LABAN 7 

February 20, 2022
CHYUM MUNGGA DAW 1

1 SAMUELA 26:2, 7-9, 12-13, 22-23

Ya hti na gaw, Samuela a Laika langai hta na rai nga ai.
Sawlu rawt nna, san da ai Israela masha hkying masum hte rau, Zihpa nam de Dawi hpe tam na nga yu wa ma ai.Shing rai Dawi yan Abisai gaw shanhte a dap de shana e sa wa ma ai; shaloi Sawlu dap ka-ang e yup nga Nawku nna, shi a ri gaw baw nhtung e ga hta jung da ai hpe mu hkrup ma ai; Abna hte shi a hpyen la ni grup yin e yup nga ma ai. Shaloi, Abisai gaw, Karai Kasang na a hpyen wa hpe dai ni na a lata hta ap ya ra ai. Dai rai nna aga de hkrang hkra ngai dai ri hte kalang mi sha shi hpe galun htinggrang kau we ga; lahkawng lang pyi n kahtap ra nngai, ngu nna Dawi hpe hpyi wu ai. Dawi chyawm gaw, shi hpe hkum sat u; Madu a namman chya hkam ai wa hpe, kadai wa mi mara n kap ai hku hkra lu na rai ta? ngu nna Abisai hpe daru kau wu ai. 
Shaloi Dawi gaw Sawlu a baw nhpang na ri hte ntsin namtau hpe la nna, shan lahkawng wa ma ai. Kadai mung n mu n na dat mu ai; kadai sha mung n dum ma ai; kaning rai nme law, Madu gaw shanhte hpe yup kaba hte shayup mu ai majaw, shanhte yawng yup pyaw nga ma ai. Dawi gaw hkaraw wora hkran de rap nhtawm, tsawmra mi san ai bum pungding e tsap da nna, Sawlu hpe jahtau shaga wu ai. Dawi gaw, Hkawhkam wa a ari nang e rai nga ai; ma langai mi hpe sa la shangun u. Madu gaw kadai hpe rai timung, tinang a ding hpring ai hte kangka ai lam hpe hkan nna, akyu htang jaw na ra ai. Dai ni e, Madu gaw nang hpe nye a lata hta ap kau nit dai, rai timung, Shi a namman chya hkam ai wa hpe ngai n hkra nngai, ngu nna tsun wu ai.
Karai Kasang a Mungga rai nga ai.

CHYUM MUNGGA DAW 2

1 KORINHTU 15:45-49

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.
Hpu nau ni e, Shawng na masha Adam gaw asak hkrung ai shinggyim masha tai wa ai, nga nna ka da nga ai; hpang jahtum na Adam chyawm gaw asak jahkrung ya ai wenyi rai nga ai. Jahkrung ya ai wenyi lu ai wa gaw shawng nga ai n rai; dinghta hkum tsawp lu ai wa mahtang shawng nga nga ai; dai hpang e jahkrugn ya ai wenyi bai nga ai. Shawng na masha gaw ga nhpu hte galaw sai majaw, dainghta ahpraw nsam hpe dagraw la sai. Hpang na masha chyawm gaw sumsing lamu na rai nga ai. Anhte ga ntsa e nga ai shaloi, dai dinghta masha hte maren rai nga ga ai; Sumsing lamu hta e nga ai shaloi, Sumsing lamu na masha hte maren rai nga ga ai. Dai rai nna, dinghta masha a ahpraw nsam hpe anhte dagraw la sai hte maren, sumsing lamu na masha a ahpraw nsam hpe mung anhte dagraw la na ra ga ai.
Karai Kasang a Mungga rai nga ai.

KABU GARA SHIGA

LUKA 6:27-38

Ya hti na gaw, Luka a Laika hta na Kabu Gara Shiga rai nga ai.
Dai aten hta e, Yesu Shi a sape ni hpe tsun mu ai gaw: Nanhte madat mara la ai ni hpe ngai tsun made ga, Nanhte a hpyen ni hpe tsaw ra mu; nanhte hpe n dawng n yawt ai ni hpe kaja ai hku galaw mu; nanhte hpe dagam ai ni hpe kaja ai hku galaw mu; nanhte hpe dagam ai ni hpe shaman ya mu; nanhte hpe aroi arip di ai ni a matu akyu hpyi mu. Na a shabyi maga mi bye ai wa hpe maga mi naw ja ya u; na a palawng galu la kau ai wa hpe, na a lawnghkoi mung hkum ndang u. Nang kaw hpyi ai wa kadai hpe mung jaw u; na a arung arai la kau ya ai wa kaw bai hkum hpyi nu. Masha ni nanhte hpe hkan galaw na, nanhte ra ai hte maren, nanhte mung dai zawn shanhte hpe hkan galaw mu. Nanhte hpe tsaw ra ai ni hpe sha tsaw ra yang gaw, nanhte a matu hpa akyu nga a ta? mara kap ai ni mung tinang hpe tsaw ra ai ni hpe tsaw ra ma ai. Nanhte hpe kaja ai hku galaw ai ni hpe sha, kaja ai hku galaw htang yang gaw, nanhte a matu hpa akyu nga a ta? mara kap ai ni mung dai zawn galaw ma ai. 
Bai htang lu na zawn re ai ni hpe sha hkoi shap ya yang gaw, nanhte a matu hpa akyu nga a ta? Mara kap ai ni pyi, hkoi ya ai made bai lu la hkra mara kap ai ni hpe hkoi shap ya nga ai. Dai rai nna, nanhte gaw, nanhte a hpyen ni hpe tsaw ra mu; shanhte hpe kaja ai hku galaw mu; myit hpa mung n ru ai sha hkoi shap ya mu; shing rai jang nanhte e shabrai kaba wa na hte, Tsaw Htum ai Wa a kasha ni mung nanhte tai na marin dai; kaning rai nme law, shi gaw chyeju malap kau ai ni hte, n hkru n hkra re ai ni hpe malawm magawm di mu ai. Nanhte a Kawa matsan dum chye ai hte maren, nanhte mung matsan chye dum mu. N jeyang ai nga mu; shing rai jang, nanhte jeyang ai n hkrum na myit dai: n daw dan ai nga mu, shing rai jang nanhte daw dan ai n hkrum na madai: mara dat kau mu; shing rai jang nanhte dat kau ai hkrum na myit dai. Jaw mu; shingrai jang nanhte hpe jaw na marin dai: hpring kabrat hkra anin garin, man ai dang hte nanhte a lahpyen e shanhte jaw na mara ai: kaning rai nme law, nanhte hteng ya ai dang hte, nanhte hpe bai hteng ya na marin dai.
Madu a Kabu Gara Shiga rai nga ai.

2022: PRAN WAN LADAW LABAN (6) NA MUNGGA

Karai Kasang hta myit mada ai, Shi hpe myit manoi kamhpa ai wa gaw lwi nga ai hka kau e tu ai namsi hpun hte bung ai; masha a atsam hte dinghta ga na arawng aya, ja sutgan hpe madung kam shamyet shanat ai wa gaw hkraw hkun ai lamu ga e tu ai namsi hpun hte bung ai; lamu hpawng, marang n htu ya jang hkraw si mat ai, nga, Yeremiah tsun shadum ai. Luka a Laika hta, maren re ai lam hpe tsun ai. Dinghta ga na ja sutgan, sut lu nga mai ai lam hta myit dik dum nna, myit masin wenyi hta sut su ra ai lam hpe n dum, mungkan pyaw hpa hta sha myit dik dum ai ni a matu, sut su nga mai ai lam gaw dingnye she rai nga ai. Hpang na prat e hkam la na n htum n wai ai asak chyeju kumhpa hpe myit mada ai lam n nga ai rai yang, Hkristu hpe kamsham hkap la ai ni, yawng hta sum dik htum ai ni tai na; rai tim, Hkristu a bai hkrung rawt ai lam a jaw e, Hkristu hte rau hpung shingkang hkam la lu na, ngu, myit mada ai ni a matu htani htana grin ai sutgan hkam la na ni re ai lam, Korintu Laika hta tsun da ai. Tinang myit mada ai, kamsham ai hte maren, shabrai lu shajang na rai nga ai.

Shinggyim masha ni a hpaji hte shalat da ai, shangun lang mai ai, akyu jaw ai arung arai baw hpan law law nga ai: Mawdaw, Cycle, TV., Internet, Handphone, Computer, Nbung-li,... Kamhpa ging ai lam law nga ai. Rai tim, masha e shalat nna akyu jashawn ai arai ni a majaw, accident ni a majaw, asak sum mat ai masha kade she law! Tinang kamhpa manoi manat ai ja gumhpraw a nhkan e asak sum mat, hten bya mat ai masha kade she law! Tinang shalat da ai arung arai ni hpe shangun lang let akyang lailen hten bya nga ai ni kade she law! Wenyi asak du hkra sum mat ai kaw du lu ai n rai a hka! Dai ni na prat, shani shagu na shi-ga ni hta maling wan hkru ai, hka tung kaba wa ai, nbung laru kaba, nnang nawn, Covid ana zinli hte kaga tsi tam n mu shi ai ana ni, hpyen majan, shada sat hkat nat hkat,… n myit mada ai a kӑjawng sha byin wa ai mabyin ni a majaw, kadai e n hkye la lu ai asak sum mat shajang ai n rai a hka! Dinghta ga e tinang kamhpa ai baw arung arai, ja sutgan, manaw manang, Du Hkawhkam, … hpa e kadai e mung shimlum lam tup n jaw lu ai. Dai ni Du tai nga tim, hpawt ni htawng de zut rai byin chye nga ai. Lu su awng dang nga ai kaw na n myit mada ai mabyin ni a majaw a kajawng sha matsan mat ai, hka kap mat ai ni kade she law!

Grau nna n htum n wai asak a chyeju kumhpa ni hpe hkam la na lam, hkye hkrang la ai chyeju hkam la na lam hta dinghta ga na hpa atsam e mung tinang hpe shalawt dat lu ai n rai nga ai. Karai e jaw ya ai atsam marai chyeju ni a marang e sha, tinang a myit masin wenyi hte akyang lailen hpe shading sharai, renghkang lu na rai nga ai. Matsan ai ni kabu lu ma ai, wunli lu ai ni rai ma ai, ngu ai shaloi, dinghta ga e matsan mayan rai nga na hpe sharawng ra ai, n ngu mayu ai. Matsan masha ni mahtang ra kadawn ai lam law law nga ai, masha ni e garum ya na, asuya, uhpung uhpawng ni a garum ya na hpe kamhpa ra ai ni rai ma ai. “Ra kadawn ai” ngu ai hpe atsam hkam sha chye na ma ai. Dai majaw, wenyi a shaman chyeju ni hkam la na matu myit masin jin jin rai chye ma ai. Dinghta ga e arawng aya lu ai ni, ja gumhpraw hpe kam ai hku jai lu, ayai lu ai ni, pyaw hpa law law hpe hkam sha lu ai ni mahtang, ruyak kyindut, ra kadawn ai lam nau n chye hkam sha ma ai. Dai majaw mung, wenyi hte daw ai akyu ara ni hpe kawsi hpang gara ai myit rawng lu na yak ma ai. Dai majaw, shara mi hta Yesu tsun ai, “Lu su ai masha sumsing mungdan de du na hta, gawlauk gaw sӑmit na hku shoi gale na grau loi ai” nga ai.

Matsan ninglen gumrawng gumtawng ai ni mung nga ma ai; lu su ninglen shagrit shanyem chye ai ni mung nga ma ai. Dinghta ga e lu ai/ n lu ai, kamhpa na masha hte arung arai ni lu ai/ n lu ai, yawng gaw Karai a man e grit nyem ai myit hte shimlum lam majing, Karai kaw na sha lu mai ai hpe dum mai ga ai. Yawng mayawng hta Karai Kasang hpe madung kamhpa shamyet shanat ra ai lam, Chyum Mungga ni hku nna shadum ya ai. 

 Matsan mayan ai hte ruyak shoi-hpa hkrum ai shaloi kaning re ai myit masin hte hkamjan lu na ta?

 Tinang lu lawm kamhpa ai arung arai, ja sutgan ni a majaw ding-nye n tai wa na lam hpa lam ni hta sadi koi yen kau ang ai kun?

 Tinang hpe myit masin wenyi, akyang lailen jahten ya ai arung arai ni hpa hpa lu a ta? Tinang kamhpa shamyet shanat ai masha rai tim, tinang  hpe Karai Kasang hte tsan gang mat shangun ai masha ni kadai kadai rai  ta?