2022: PRAN WAN LADAW LABAN (6) NA CHYUM LAIKA

PRANWAN LADAW HTA LABAN 6 
February 13, 2022
CHYUM MUNGGA DAW 1

YEREMIA 17:5-8

Ya hti na gaw, myihtoi Yeremia a Laika hta na rai nga ai.
Madu ning nga ai: Shinggyim masha hta shamyet shanat nna, tinang n-gun shaja let, Madu kaw nna Shi a myit masin kayin kau ai wa gaw, dagam dala hkrum ging ai wa rai nga ai: dai wa gaw zaibru jang e tu ai hpun chyahkraw hte bung nga nna, mai kaja ai lam du ai shaloi shi dai hpe n mu lu ai. Shi gaw nam mali hkan na hkraw ai shara hte, kadai n shanu lu ai jum ga hta nga nga na ra ai. Madu hta shamyet shanat nga nna, Shi hpe tinang a machyu shara shatai ai wa chyawm gaw, ‘a’ nga ai. Dai wa gaw hka masawn e hkai nna, hka kau e ru hkram ai hpun hte bung nga ai: dai gaw jan kahtet ai hpe n hkrit nga ai; de a alap mung n nip ai; jan ja ti mung tsang shara a nga ai: dai hpun gaw asi n si ai galoimung n nga lu ai.
Karai Kasang a Mungga rai nga ai.

CHYUM MUNGGA DAW 2

1 KORINHTU 15:12, 16-20

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.
Hpu nau ni e, Hkristu gaw si mat ai ni kaw na bai hkrung rawt wa sai lam hpe, anhte hkaw dan sayang gaw, si mat ai ni bai hkrung rawt wa ai lam n nga ai, nga nna nanhte hta na nkau mi kaning rai tsun lu myit ta? Si mat ai ni bai n rawt yang gaw Hkristu mung bai rawt wa sai n rai. Hkristu gaw bai n hkrung rawt sayang gaw, nanhte a makam masham kaman lila rai nga ai hte, nanhte a shut hpyit mara hta e naw lup mat manit dai. Dai hta kaga, Hkristu hta e yup pyaw mat ai ni mung sum mat ai hkrum wa sai. Hkristu hta e anhte myti mada ai gaw; ndai prat a matu chyu sha rai yang gaw, shinggyim masha yawng hta anhte grau nna matsan mayan hkrum ai ni rai nga ga ai.Raiti mung, Hkristu si mat ai ni kaw na teng teng bai hkrung rawt wa sai rai nna yup pyaw mat ai ni hta na shawng si ai asi tai wa sai.
Karai Kasang a Mungga rai nga ai.

KABU GARA SHIGA

LUKA 6:17, 20-26

Ya hti na gaw, Luka a Laika hta na Kabu Gara Shiga rai nga ai.
Dai aten hta e, Yesu gaw kasa shi lahkawng hte rau bum de na yu wa nna, Shi a sape hpung kaba hpawng nga ai layang e tsap nga ai. Yuda mung ting hte Yerusalem mare na mung, nammukdara makau na Turu hte Sidon kaw na mung, masha unawng uwa kaba Shi a ga madat la na hte, tinang a machyi makaw shamai la na matu dai shara e hpawng nga ma ai. Shaloi, Shi a sape ni hpe mada yu nna, Shi tsun mu ai gaw,: Matsan ai ni e, nanhte a lu myit dai; Karai Kasang a mungdan gaw nanhte a mungdan rai nga malit dai. Ya kawsi nga ai ni e, nanhte a lu myit dai; nanhte hkru kat lu na manit dai. Ya hkrap nga ai ni e nanhte alu myit dai, nanhte mani na marin dai. 
Masha ni gaw nanhte hpe n dawng n yawt ai hte, Masha Kasha a majaw nanhte hpe gawt shapraw kau nna, asawng di ai hte, nanhte a mying hpe n hpru n ru rai zingri ai shaloi nanhte a lu myit dai. Dai nhtoi hta e, kabu gumlawt nga mu; kaning rai nme law, nanhte a shabrai gaw sumsing lamu kata e kaba nga malit dai. Shanhte a kaji kawa ni mung dai zawn myithoi ni hpe di yu manu ai. Raiti mung, sut su ai ni e, nanhte tsang shara nga myit dai: nanhte gaw tinang a shalan shabran ai lu la manit dai. Ya hkru kat nga ai ni e, nanhte tsang shara nga myit dai; nanhte gaw kawsi ai hkrum na marin dai. Ya mani nga ai ni e, nanhte tsang shara nga myit dai: nanhte gaw sharung shayawt ai hte hkrap ngu hkrap ngoi ai hkrum na marin dai. Masha yawng mayawng nanhte hpe, kaja ai ngu nna shakawn yang, nanhte tsang shara nga myit dai. Shanhte a kaji kawa ni mung dai zawn n teng ai myihtoi ni hpe ngu yu manu ai.
Madu a Kabu Gara Shiga rai nga ai.

2022: PRAN WAN LADAW LABAN (5) NA MUNGGA

Karai a Mungga htawn tsun hkaw dan ai, sasana magam gun na matu laksan shaga la hkrum ai ni rai ma ai Isaiah, Kasa Petru, Kasa Pawlu_ ndai marai masum gara hku htan ya ma ta? Isaiah gaw, “Ngai awu asin re ai masha, ngai a shinglet mung n san n seng ai wa mi”, nga; Petru gaw Yesu hpe, “Ngai kaw na hka mat u; ngai gaw shut hpyit mara lu ai wa rai nngai” (Yesu hte kanawn na n gingdan ai), nga; Pawlu gaw, “Ngai gaw Nawku Hpung hpe zingri lai wa ai masha, Kasa ni hta kaji htum grau dik ai wa”, nga, htan tsun ma ai. Prat shagu na masha ni hpe Karai a Mungga htawn tsun hkaw dan na matu, Karai Kasang gaw masha kau mi hpe laksan shaga la nna shangun dat ai. Langai hpra gaw tinang n gingdan ai hpe yin la nna, Karai e nan shangun sai re majaw, kade yakhkak ai rai tim, Karai e jaw ya ai atsam marai chyeju kumhpa ni hpe madung kamhpa ra ai lam sharin ya ai.  

 Anhte shani shagu tsun lang ai ga hta, “Chyoi pra ai Nawku Hpung, chyoi pra ai shara, chyoi pra ai sumla, chyoi pra ai lamu ga….”, ngu nna tsun ga ai. Kaja wa rai yang, Nawku Hpung gaw shut hpyit mara kap ai ni hte kahkyin shabawn da ai masha ni she rai nga ai. Anhte dinghta ga e tsun ai, shamying ai chyoi pra ai, dinghpring ai, sanseng ai, … ngu ai ni gaw ru-pawt madung ninghpang a ӑsam kumla ӑdaw ӑchyen hkrai rai nga ai. Kaja wa ra n rawng, kuptsup ai, chyoi pra dinghprin ai wa hkum nan re ai, langai sha nga ai wa, dai Karai Kasang hpe Isaiah gaw, “Chyoi Pra, Chyoi Pra, Chyoi Pra” ngu nna shamying ai. Hpa kadai hte mung shadawn n mai ai, Shi chyu sha chyoipra ai laksan (unique) re ai Wa hpe tsun ai. Shinggyim masha yawng gaw dai “Chyoi Pra ai Wa” ai ӑhtoi ӑsam hkam la shajang na Karai e ra sharawng ai. Chyoi pra lu na matu Karai e saw shaga ai, “Na Madu Chyoi pra ai zawn chyoi pra nga mu” nga, Moshe hku nna Karai amyu masha ni hpe tsun ai. Hkye hkrang la ai lam gaw dai chyoi pra ai Karai Kasang a ӑsam maka, Shi a hpung shingkang garan hkam la lu ai lam she rai nga ai.  

 Chyoi pra dinghpring ai lam hpe anhte kade mi hkan shakut ai rai tim, ndai dinghta ga ntsa ra n rawng hkra kuptsup lu ai lam gaw n byin mai ai. N ging n dan ai shinggyim masha ni, shӑgrit shӑnyem ai myit hte, Karai e shӑchyoi shӑpra ya ai chyeju hpe hkam la na lam sha rai nga ai. Karai e magam gun laksan shaga la hkrum ai ni gaw shagrit shanyem ai myit hte, tinang a n gingdan ai lam hpe myit dum let, Karai e shӑngun ai bungli, shaga la hkrum ai a yaw shada lam hpe kangka ai hku dawjau lu na rai nga ai. Kasa Pawlu tsun ai hta, shi daram sawng ai masha, Karai a amyu masha ni hpe hkan rim zingri lai wa ai, mara htat ai wa hpe Karai e laksan shaga la nna, Karai a n htum n wai matsan dum shachyoi shapra ya ai chyeju ni hpe hkam la lu ai. Dai majaw, Pawlu gaw masha nlang Karai a matsan dum lӑma, mara raw dat ya ai chyeju, shachyoi shapra ya ai chyeju ni hkam la lu mu ga, shi a prat tingnawng hpe ma ya nawng da ai, ja ja shakut lai wa ai rai nga ai. 

 Petru hte rau, kaga manang ni mung Yesu e saw shaga ai lam hpe mau n ma, Yesu a yaw shada masing ni hpe tup hkra n chye na ai rai tim, shanhte hpe saw shӑga ai Yesu hpe kam ai majaw, shanhte a n ging n dan ai hpe n yu ai sha, Shi shangun ai bungli hpe galaw gunhpai na matu tawk hprut dawdan lu ma ai; lu mi lu hpe kau da nna Shi a hpang hkan nang ma ai. Hkristan hpung masha tai wa lu ai anhte yawng, Karai a laksan matsan dum mara dat ya ai chyeju hpe hkam la lu sӑ ga ai. Gingdan ga ai majaw n rai; chyoi pra ai asak aprat gawgap na matu shaga la hkrum sӑ ga ai. Yawng e shaga la hkrum ai, Karai e shangun ai bungli gaw ndai re: tinang hkrum katut ai masha ni, shani shagu hkrum shaga matut mahkai ai masha ni hpe shachyoi shapra ya na matu rai nga ai. Laksan magam gun mi n rai tim, yawng e galaw mai ai, galaw ang ai mung dai sha re. Yawng a matu sasana magam gaw masha yawng hpe hkan shachyoi shapra na matu re.Tinang hkum nan mung dinghpring chyoi pra lu na matu shakut let, mara kap ai masha re ai hpe dum ninglen, Karai e shachyoi shapra ya ai chyeju ni hpe kamhpa nna, shinggyim masha hte mabyin ni, mungkan ting hpe shachyoi shapra na matu shaga la hkrum ai ni rai ga ai, ngu ai gaw, yawng hte daw ai, seng ai shaga la lam madung re ai hpe myit dum mai ga ai.  

 San Pawlu gaw kamsham ai hpung masha ni hpe, “Sanpra ai masha ni” ngu  nna tsun lang ai. “Chyoi pra ai” ngu ai lachyum hpe gara hku chye na hkap la  lu sӑ ta?

 Tinang hta gawng kya ra rawng dum ai majaw, shawa bungli, shawa lit magam,  sasana magam ni hta shang lawm shamu shamawt n gwi, shingdu e hkrai nga  kau chye ai kun?

 Mungkan ting hpe shachyoi shapra na matu shaga la hkrum ai ni rai ga   yang, chyoi pra ai myit masin, arawn alai hpe shani shagu na mahkrum  madup hta galu kaba wa hkra gara hku hkan galaw mai a ta?

2022: PRAN WAN LADAW LABAN (5) NA CHYUM LAIKA

PRANWAN LADAW HTA LABAN 5
February 6, 2022
CHYUM MUNGGA DAW 1

ESAIA 6:1-8

Ya hti na gaw, myihtoi Esaia a Laika hta na rai nga ai.
Hkawhkam Uzziah si ai shaning hta, Madu gaw galu kaba nna tsaw htum ai tingnyang hta dung nga ai hpe ngai mu nngai; Shi lawai ai hpun nba Nawku Htingnu ting hpring nga ai. Shi a ntsa e Serahpin tsap nga ma ai: langai singkaw kru kru tu nga ma ai. Langai wa mi hpe, ‘Zawnawng zawwa up ai Madu gaw, San Pra, San Pra, San Pra rai nga ai. Ginding aga ting Shi a hpung shingkang hte hpring nga ai law.’ nga nna tsun ma ai. Shing nga tsun jahtau ai wa a nsen majaw chyinghka hkinbawng ni ashun awam nga nna, nta ting wan hkut hte hpring nga ai. 
Dai rai nna ngai gaw, ‘Ngai wa tsinyam hkrum lu nngai; ngai htum mat ni ai; ngai n san n seng ai nga nga nngai; rai ti mung, zawnawng  zawwa up ai Madu dai Hkawhkam wa hpe, nye myi hte nan mu lu se hka’.  Ngu nna tsun nngai. Shaloi, Serahpim langai mi gaw tawn kungri ntsa na, lakap hte matep la ai wan n-ga, shi a lata hte lang let ngai hpang de pyen sa wa ai. Dai wa nye a n-gup hpe ahtawk let, ‘Yu u, dai gaw na a nten hpe hkra sai; Na a mara hpe yeng seng kau sai; Nang shut hpyit ai hpe mung raw dat kau nu ai.’ nga ai. Bai, ‘Ngai kadai hpe shangun dat na i? 
Anhte a matu kadai wa sana i? nga nna Madu san ai nsen hpe ngai na nngai. Dai rai nna, ngai gaw, ‘Ngai nang e nga ai law, ngai hpe shangun dat rit.’ ngu nna htan we ai. 
Karai Kasang a Mungga rai nga ai.

CHYUM MUNGGA DAW 2

1 KORINHTU  15: 1-11

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.
Hpu nau ni e, Ngai nanhte hpe hkaw tsun dan nna nanhte mung hkam la sai hte, naw hkan nang yu ai, Kabu Gara Shiga a lam hpe, nanhte naw myit dum la na matu, ngai bai shapraw shandan de ai. Ngai nanhte hpe tsun dan yu ai mungga hpe, nanhte manat nga yang gaw, de a marang e hkye hkrang la ai hkrum lu na myit dai; dai hku n rai yang gaw nanhte a makam masham li la rai nga ai. Ngai hkam la sai grau ahkyak ai lam hpe, ngai shawng nnan e nanhte hpe ap ya sade ai: dai gaw, chyum laika ni tsun ai hte maren, Hkristu gaw anhte a shut hpyit mara a matu si hkam sai; lup makoi ai shi hkrum nhtawm masum ya nhtoi hta e, bai hkrung rawt wa sai. Shi gaw Kehpa kaw dan pru wa ai; dai hpang kasa shi lahkawng kaw dan pru mu ai; dai hpang lang lata sha, hpu nau manga tsa jan Shi hpe mu dat ma ai: Shanhte hta na malawng maga ya du hkra nga shajang ma ai; nkau mi chyawm gaw yup pyaw mat masai. Dai hpang Yaku kaw mung, kasa ni yawng kaw mung, Shi dan pru mu ai. Hpang jahtum e, ngai nhtoi n gu ai ma zawn re ai wa kaw Shi dan pru ni ai. Kaning rai nme law, kasa ni hta kaji htum ai wa ngai rai nga nngai; Karai Kasang a Nawku Hpung hpe ngai zingri zingrat di kau sai majaw, kasa ngu na pyi ngai n ging n dan nngai. Rai ti mung, Karai Kasang a chyeju majaw, ngai ndai hku byin lu nngai rai nga ai; Shi ngai hpe madun dan ai chyeju mung, ngai hta e Kaman lila n rai mat ni ai. Shanhte yawng hta ngai grau nna bungli gunhpai nngai; dai gaw ngai n rai, ngai hte rau a nga nga ai Karai Kasang a chyeju sha rai nga ai; rai ti mung, ahkyak ai lam gaw, shanhte hkaw dan ai mungga hpe, ngai mung hkaw dan nga ai; dai hpe nan nanhte kam sham manit dai.
Karai Kasang a Mungga rai nga ai.

KABU GARA SHIGA

LUKA 5:1-11

Ya hti na gaw, Luka a Laika hta na Kabu Gara Shiga rai nga ai.
Dai aten hta e, masha wunawng wuwa Karai Kasang a Mungga madat la na matu, Yesu kaw ginjup sa wa ma yang, Gene - saret nawng makau e Shi tsap nga ai rai nna, hka hkin gau de nna loi mi sit sa wa na matu shi hpe hpyi wu ai rai nna, dai li hta dung let, dai kaw nna shawa masha ni hpe sharin shaga wu ai. Shi ga tsun ngut jang, hka sung ai de sit sa nna, nga magawn la na matu, sumgawn ni hpe jahkrat dat mu, ngu nna Simun hpe tsun ai. Simun mahtang gaw, Madu e, mana tup anhte shakut ti mung, hpa n lu ga ai; rai timung, Na a ga a majaw sumgawn jahkrat na we ai, ngu nna htan wu ai. 
Shing rai jahkrat jang, shanhte gaw nga unawng kaba magawn hkrup lu ma ai; shanhte a sumgawn ni je wa malu ai rai nna, li kaga hta nga ai manang ni hpe sa garum na matu, dingsi shaga la ma ai. Shanhte sa garum nna, li lahkawng yan lup wa mangang hkra, bang jahpring mu ai. Simun Petru gaw dai hpe mu jang, Yesu a lagaw nhpang e hput di nna, Madu e, ngai hte hka mat wa su; ngai gaw mara kap ai masha rai nga nngai, ngu wu ai.9Kaning rai nme law, shing rai nga magawn la lu ai majaw, shi mung, mau mahka nga ma ai; 10Simun a manang yan, Zebedi a kasha Yaku hte Yawhan mung, dai zawn mau mat ma ai. Shaloi, Yesu gaw Simun hpe, Hkum hkrit et; ya kaw nna masha hpe hkan hkwi na rin dai, ngu wu ai. Shanhte a li yan hpe danam e sek da nhtawm, arai mahkra kau da nna, Shi kaw hkan nang ma ai.
Madu a Kabu Gara Shiga rai nga ai.

2022: PRAN WAN LADAW LABAN (4) NA MUNGGA

Yeremiah gaw asak 20 ning daram kaw nna myihtoi magam gun ai, shaning 40 daram, hkawhkam marai 4, ban mali chyaw chyaw, Karai a mungga hkaw tsun ai. Mungkan arawng aya hte sut lu nga mai lam hpe sha tam nna shawa masha ni a akyu ara hpe n woi awn ai hkawhkam ni, mung-du ni, jau/ hkinjawng/ jaiwa ni hpe shadum jahprang ai hte shut hpyit lam dam ai ni hpe sharin shaga na matu hkaw tsun lai wa ai. Shaning law law hkaw tsun tim, kadai mi n kam madat ya ai; shi hkum nan jawjau aru arat kaw na rai ninglen jau hkinjawng ni shi hpe matsat kau ma ai. Ntsa lam yu jang Yeremiah gaw sasana n awng dang ai, ngu na zawn, jahtum e Israel mungdan hten bya mat ai. Shi mung Egyip mung de hprawn woi mat hkrum ai. Shi a sasana magam kaman lila tai mat ai kun? Yesu Karai a Kasha hkum nan dinghta ga e Karai a mungdan a lam hkaw tsun ai; jahtum e, shi a sasana magam a majaw jen sat kau hkrum ai kaw kre mat ai. Myit malai lu nna sape tai ai masha marai kade sha ngam a ta? Masha ni a ningmu hta awng dang tim n awng dang tim, Karai e shangun ai bungli hpe asak aprat htum hkra kangka ai hku magam gun lai wa ai Yeremiah hte Yesu a shingdu e, Karai Kasang tsap nang ai; Karai a masing hpe kadai n jahten kau lu ai. Tsawra myit kaw na prut pru ai magam gaw tut a grin nga na rai nga ai.

Pranwan ladaw hpang ai kaw nna Madu Yesu a sasӑna magam hte seng nna hti sumru ga ai. Kawa Karai e shangun da ai sasana magam hpe madat mara hkan shatup ai; madat mara ai a jaw e, tengman ai lam hkaw tsun ai a jaw e, masha yawng e hkap la ma ai n rai. Tinang shimlum dum ai, pyaw dum ai, lu su nga mai ai kaw na myit kӑyin wa na lam, ӑhtu hkra ya ai zawn nga hkam la jang, mungga htawn ai wa hpe mara tam wa, hpyen tai wa ma ai. Yeremiah gaw prat tup, mungga htawn tsun ai a marang e n htum nni myit kaji garen hkrum ai. Shi a jinghku ni du hkra shi hpe n gawn n sawn, roi chyӑhkoi di wa ma ai. Yawn n ma. Shi a prat jahtum du hkra, Du Hkawhkam ni, jau/ hkinjawng, jaiwa ni, shawa masha ni shi hpe yen mat ma ai. Yesu mung, tengman ai lam hpe tsun ai rai tim, shi a buga masha ni hkum nan shi hpe n gawn n sawn di ma ai: Yosep a kasha she rai nga ai; Carpe-na-um Kahtawng kaw na hpa kaja ai baw pru lu a hka? Myihtoi praw pru na lam n mai byin ai, ngu, hkam la ma ai. Yesu gaw Bethlehem kaw shangai wa ai hpe shanhte n dum kau ma ai. Dai Hkristu hkum nan, ningdang nyet kau hkrum ai rai yang, anhte kaga ni ningdang nyet kau hkrum na lam hpa tsun shara n nga ai. Nang/ ngai, jaw ai teng ai hpe tsun ai majaw, n kam hkam ai ni mahtang tinang hpe n ju n dawng galaw wa lu ai. Anhte myit daw nna mai kaja ai amu ni matut galaw n kam hkra hkam sha wa chye ga ai.

Jaw ai teng ai  hpe tsun ai majaw, mai kaja ai amu galaw ai majaw zingri zingrat hkrum ai ni hta makam masham bungli a jaw e sha n rai, kanbau makan bungli, tara jeyang ai amu, dawdan ai amu, uphkang ai ni a magam bungli, mungmasa gaw sharawt ai ni,… zingri hkrum ai, htawng shӑrawng hkrum ai, sat kau hkrum ai ni law law nga ma ai. Anhte a mungdan na mabyin ni hpe shadawn yu mai ai. Tinang hkum nan hkrum katut yu ai mahkrum madup ni hpe sumru yu mai ga ai. Hpyen ni a tai htang ai lam sha n rai, ni htep dik ai dinghku masha ni, tinang a uhpung uhpawng masha ni, sai-daw sai-chyen ni nan, tinang hpe n ju n dawng, roi jahkroi galaw wa ai shaloi dik hkra hkam sha yak ai. Korintu Laika hta shadum ya ai mahtang, tinang galaw ai amu ni gaw tsawra myit kaw na prut pru wa ai teng yang, tinang galaw ai mai kaja ai amu ni a ӑpu ӑsi ni tut ӑgrin nga na lam hpe shadum ya ai. Kaning re ai mai kaja ai amu galaw tim, tsawra myit kaw na n re ai, tinang a arawng aya a matu, shakawn hkrum na matu, n kam hkam ai majaw, asum hkam ai, sat kau hkrum hkra rai tim, bum hpe htawt sit lu na daram makam masham rawng ai rai tim, tsawra myit, dawjau ai myit n rawng ai rai yang, kӑman lila sha tai mat lu ai lam, San Pawlu shadum ya ai.

 Teng ai, jaw ai tsun ai a marang e tinang hpe ninghkap ai, n ju n dawng  byin  wa ai aten ni hta tinang gara hku tai htang chye ai kun?

 Mai kaja ai amu galaw ai lam hta kade shakut tim ӑpu ӑsi kaja n mu lu ai shaloi,  dai ni na mungga tinang hpe gara hku lam matsun ninggun jaw ya a ta?

 Tinang tsun ai, shaga ai, hpaji jaw ai, galaw ai amu ni hta tsawra myit kaw na   prut pru ai n rai yang, tinang hkum hpe mung, kaga masha ni hpe mung, akyu   sum shangun ai lam ni kaning re baw ni shabyin ya lu a ta? 

2022:PRAN WAN LADAW LABAN (4) NA CHYUM LAIKA

PRANWAN LADAW HTA LABAN 4
January 30, 2022

YAREMIA  1:4-5,17-19

Ya hti na gaw, myihtoi Yeremia a Laika hta na rai nga ai.
Yuda hkawhkam Yoshia a lakhtak e Madu a Mungga ngai hpe tsun dan ni ai: Ngai nang hpe nnu a hkritung e garai n shachyaw yang pyi, nang hpe chye nngai: masha amyu ni a myihtoi tai na, ngai nang hpe aya dang da ni ai. Dai re majaw, nang gaw shingkyit kyit nna rawt u; ngai nang hpe hkang da mada, shanhte hpe tsun dan u; shanhte a man e ngai nang hpe n jahkrit shama kau u ga, shanhte hpe hkum hkrit et. Yu u, mungdan ting a man e mung, Yuda hkawhkam ni, de a du salang ni, de a hkinjawng ni hte mung masha ni a man e mung, Ngai nang hpe dai ni jang, bunghku kum ai mare, hpri shadaw hte magri shakum zawn n-gun shaja na de ai. Shanhte nang hpe hkap gasat ti mung, dang kau lu na n rai; kaning rai nme law nang hpe mawai la na matu, Ngai nang hte rau nga nga nngai, ngu nna Madu nan tsun nga ai.
Karai Kasang a Mungga rai nga ai.

CHYUM MUNGGA DAW 2

1 KORINHTU  12:31-13:1-13

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Grau kaja ai chyeju kumhpa ni hpe lu la hkra shakut nga mu. Dai rai nna grau htum ai lam langai mi, ngai nanhte hpe naw madun dan na made ai. Ngai gaw masha a ga hte lamu kasa ni a ga amyu myu hpe chye tsun ti mung, tsaw ra ai myit n rawng yang gaw, mahku rawng ai bau hte, ngoi gara ai shup sheng ngai tai nga nngai. Ngai myihtoi chye htoi ai hte, mung sung ga sung yawng mayawng hte, hpaji amyu hkum sumhpa chye chyang nga nna, bum ni hpe sit shangun lu hkra makam masham rawng nga ti mung, tsaw ra ai myit n rawng yang gaw, ngai hpa n rai nga nngai. Nye a arai mahkra hpe ngai gam kau nna, nye a hkum hpe pyi nat kau na matu ap kau ya timung, tsaw ra ai myit n rawng yang gaw, hpa akyu nga na n rai. Tsaw ra ai lam gaw, myit galu nga ai; sumnung shingdi nga ai; tsaw ra ai lam gaw manawn masham n nga ai; tinang a hkum hpe shagrau ai ga n tsun ai; gumrawng gumtawng n rawng ai; 5n sun n ang ai hku n galaw ai; tinang a akyu n tam ai; masin pawt wa ai n rai; mara n tam nga ai; n ding n man ai lam hta n kabu ai sha, teng man ai hte rau kabu gara nga ai. 
Tsaw ra ai lam gaw, tut nawng e masha a n-gun kya ai hpe magap da nga ai; tut nawng e htingbu wa hpe kam nga ai; tut nawng e shi a lam hpe myit mada nga ai; tut nawng e hkrum ang ai tsinyam hpe hkam sharang nga ai. Myihtoi htoi ai lam hkoi mat na ra ai; ga amyu myu chye tsun ai lam htum mat na ra ai; chye chyang ai lam mung hkoi mat na ra ai; tsaw ra ai lam chyawm gaw, htum mat chye ai n rai. Kaning rai nme law, daw chyen mi sha chye chyang nga ga ai; daw chyen mi sha myihtoi htoi ga ai; rai ti mung, hkum tsup ai lam du jang n hkum n tsup ai daw chyen hkoi mat na ra ai. Ngai ma kaji naw rai nga yang, ma ga ngai ga ai hte ma myit rawng nna, ma a myit yu ai hku ngai hkan nga nngai: ya ngai salang wa jang she, ma a lam hpe ngai tawn kau se ai. Ya gaw, n dan n leng ai hku jamna shingna hpe sha anhte naw mu nga ga ai; rai ti mung, dai shaloi e, myi man yawng let mu na ra ga ai. Ya gaw daw chyen mi sha ngai chyen mi sha ngai chye nngai; dai shaloi e, Karai Kasang ngai hpe chye chyang ai zawn, ngai mung chye na we ai. Ya, kam sham ai, myit mada ai hte, tsaw ra ai ngu ai lam masum dinggrin a nga nga na ra ai; rai ti mung, dai ni hta na grau kaba ai gaw, tsaw ra ai lam rai nga ai.
Karai Kasang a Mungga rai nga ai.

KABU GARA SHIGA

LUKA  4:21-30

Ya hti na gaw, Luka a Laika hta na Kabu Gara Shiga rai nga ai.
Dai aten hta e Yesu gaw, tara jawng hta e ga tsun hpaw nna, Dai ni nan nanhte madat nga yang, ndai ka da ai ga dik wa sai, ngu nna shanhte hpe tsun mu ai. Madat la ai ni yawng hte gaw, Shi a ga hpe ra sharawng nna, Shi a n-gup hta na pru ai chyeju ga a majaw mau nga ma ai. Shanhte gaw, Ndai wa gaw, Yosep a kasha n rai nga a ni? tsun shajang ma ai. Dai rai nna Shi gaw, Nanhte mahtang, ‘Tsi sara e, tinang hkum dai hpe shamai la u, nga nna ga shagawp hku ngai hpe tsun nhtawm, Anhte na ai hte maren, Kapernaum mare e shabyin ai amu hpe zawn, Nang na a buga e mung galaw dan u, nga nna ngai hpe tsun na marin dai. Bai Shi gaw, Nanhte hpe ngai teng teng tsun made ga: Kadai myihtoi rai ti mung tinang a buga e arawng n lu nga ai. 
Elia a aprat e, masum ning shata kru tup marang n htu ai hte jan ja nna, dai mung ting hkan e nachying hku hku hpang gara rai wa yang, Israela a amyu hta gaida law law nga ma ai: rai ti mung, shanhte hta na langai mi hpang de pyi Elia hpe n shangun dat wu ai; Sidun mung Zarehpa mare na gaida jan langai mi hpang de she shangun dat wu ai. Myihtoi Eslisha a aprat e mung, Israela amyu hta manggang kap ai masha law law nga ai, rai ti mung, shanhte hta na langai mi pyi san pra wa lu ai n rai; Siria masha Naman ngu ai wa chyu sha san pra wa lu ai, ngu nna shanhte hpe tsun mu ai. Dai tara jawng na ni yawng hte gaw dai lam na la jang, masin pawt bu ma ai. Shanhte rawt nna, mare shinggan de shi hpe shapraw nhtawm, dai mare de ai bum pungding de woi sa nna, n-gam mahka kaw nna Shi hpe kanawng jahkrat kau na maw ai. Shi chyawm gaw shanhte a ka-ang hku ga pru nna, sa mat wa ai.
Madu a Kabu Gara Shiga rai nga ai.

2022: PRAN WAN LADAW LABAN (3) NA MUNGGA

Babalon mungdan e mayam tai ai shaning law law a hpang, tinang a buga Palestine de bai du wa ai Israel amyu sha ni gaw Karai a Mungga hpe madat la na matu, hpawng kaba galaw ma ai. Nehemiah woi awn ya ai. Ezra (jau mung rai jaiwa mung rai) gaw Karai a tara mungga hti dan nna lachyum htai dan ai hpang, shawa masha gaw yawn hkyen myit malai lu ai majaw hkrap myi-prwi pru ma ai. Karai a tara matsun ni hpe hkan shatup yang shalawt dat ai chyeju, nga-mu nga-mai ai wunli hkam la lu ai majaw ja ja kabu ma ai. Karai a tara matsun ni gaw anhte hpe gyit hkang da na matu n re ai, anhte a nga-mu nga-mai lam hpe hkum pat shingdang na matu n rai; tengman ai lam ni hpe hkap la nna tara mahkrun hte maren asak hkrung ai rai yang, shalawt dat ai chyeju, shimlum simsa ai chyeju kumhpa ni hpe hkam la lu na rai nga ai. Hkristu dinghta ga e du sa ai lam, Shi a sasana magam gaw Kabu Mai ai Shi-ga hpe hkaw tsun na matu re. Grau nna dip sha hkrum ai matsan masha ni hpe shamai shatsai shalan shabran ya na matu re. Karai a tara matsun ni a lachyum hpe chye na hkan sa ai rai yang, Nawku Hpung hta shada dawjau ai baw hpan amyu myu hta shang lawm nna Hkristu a hkum hkrang hpe jawm gawgap lawm na rai nga ai.

N tara ai uphkang masa, hpaga masa, roirip ai masa galoi mung nga nga ai dinghta ga e, roirip hkrum ai, dip kamyet gyit hkang da hkrum ai matsan masha ni prat shagu e nga nga na re. Wenyi a chyeju hte hpring ai Yesu gaw yawng hpe shalawt dat na lam, tara mungga hkaw tsun na matu du sa ai. Grau nna, dip sha roirip hkrum ai ni hpe shalawt dat na matu, uhpung uhpawng ni hta kaji grau, nun grau ai ni hpe shamai shatsai shalan shabran ya na matu re. N hkru n kaja ai lam yawng a ru ningpawt gaw shut hpyit mara rai nga ai. Shut hpyit mara, awu asin, n ju n dawng, manawn masham, ra mӑrin ai myit, tingkyeng akyu tam ai myit ni hpe n kau da kam ai ni a matu, Yesu a mungga madat la chye la tim, shalawt dat ai chyeju hkam la lu na n rai. “Matsan mayan ai ni kabu lu ma ai” ngu ai shaloi, myit masin wenyi hta shagrit shanyem lu ai ni, tinang hta ra kӑdawn nga ai lam hpe yin la lu ai ni rai ma ai. Renghkang ahkaw ahkang lu ai ni, mungkan sutgan ja gumhpraw lu su ai ni, hpaji chye dum ai ni mahtang, shanhte hta ra kӑdawn ai lam hpe dum chye hkap la na matu yak ai; lam shagu hpe ahkang aya hte, ja gumhpraw hte manghkang hpӑran na maga grau shӑnang chye ai majaw rai nga ai.

Matsan masha ni gara hku nga ma ta? Hpaji hparat sharin la na lam hta, bungli kaja lu la na lam hta, tara upade mahkrun hpe chye la na lam hta, hpaga ga na machye machyang the arang sharawt la na lam hta, machyi kaw hkrum ai aten ni hta, manghkang ni hkrum hkra ai aten hta, …. lam shagu hta chyan n dep masawp n dep re ai hpe chye ga ai. Kasa Luka a ningmu hta Sau chya hkrum ai Wa Hkristu a sasana magam, Shi a Kabu mai ai Shiga gaw matsan masha ni a matu madung re ai lam shadan dan ai rai nga ai. Dai ni mungkan ting e galaw nga ai hkye mawoi amu, tsawra matsan dum garum ya ai amu, shada garum shingtau madi shadaw hkat ai ladat ni, uhpung uhpawng ni (Hkristan Hpung ni, NGOs, INGOs, UNICEF, UN Organizations…) yawng gaw dai Hkristu galaw ai amu, sasana magam hpe matut shachyaw mat wa ai lam she rai nga ai. Labau gawn dat yang, yawng yawng a shawng e Kahtawlik Nawku Hpung kaw na hpang dat ai amu ni hpe kasi yu la nna mungkan masha ni uhpung kaga ni jat galaw mat wa ai rai nga ai. N lu n lawm ai ni a matu manam jarawp ni, mung shawa hpaji jawng hte Dakkasu ni, mung shawa tsirung ni, jahkrai ma ni hpe shalat ai ginra, manggang kap ai ni hpe lakawn ai ginra,dz., dz., Nawku Hpung kaw nna hpang dat ai hkrai re. Mungkan arawng aya lu ai ni, hpaji hparat kunghpan ai ni, sut lu su ai ni, matsan masha ni, lagaw lata hten ai ni, myi-kyaw ni, jahkrai ma ai, machyi makaw shoi chyum hkrum sha nga ai ni, gumgai dingla ni, kadai n nga, yawng gaw Hkristu hta matut mahkai jungnoi nga ai; shada hpa n daw hkat ai n rai. Yawng gaw shada shamyet shanat hkat ra ma ai. Yawng gaw Karai a man e manu dan ai.

Hkye hkrang la ai chyeju gaw yawng a matu re ai. Ja gumhpraw lu ai ni mung matsan masha ni hte kawsi hpang gara ai ni hpe, shanhte a shoi chyum ai hkrap nsen ni hpe shamai ya ai, garum ya ai, hkye mawoi lawm ai hku nna hkye hkrang la ai chyeju hpe hkam la na rai ma ai. Hpaji chye chyang kunghpan ai ni mung myit n hprang ai ni hpe, ahkaw ahkang n lu ai ni hpe hpaji sharin ya, garum ya ai a marang e, hkye hkrang la ai chyeju hkam la na rai ma ai. Yawng gaw Hkristu a adaw achyen hkrai re ai majaw, tinang nang lu la ai chyeju kumhpa ni hte atsam marai hpe akyu jashawn nna, Hkristu a hkumhkrang hpe gawgap ra ai lam, Korintu Laika kaw na sharin la lu ga ai.

Sut lu su nga-mai ai ni mung, Karai a man e matsan mayan rai nga ai lam, asak a chyeju hkum sumhpa Karai e jaw da ai hpe dum na; wenyi hta kawsi hpang gara ai myit, shagrit shanyem ai myit, madat mara chye ai myit, wenyi hte seng ai akyu ara ra kadawn nga ai hpe myit dum mai ai. Mungkan a man e matsan mayan re ai ni mung, maren shagrit shanyem chye ra ai, myit masin wenyi hta ra kadawn ai lam law law nga ai hpe myit dum ra ma ai. Rai tim, Karai a matsan dum myit mahtang, hkum hkrang hta matsan mayan re ai ni, tinang nang a shut hpyit mara hpe dum chye ai ni maga, shanang nna myi-man madun, matsan dum grau ai hpe dum mai ga ai.

 Langai hpra gaw kaga masha ni a matu kabu mai ai shi-ga gara hku gam  jaw gam ya ai nga ai kun?
 Masha ni myit daw-hpa, myit n pyaw-hpa tsun ai malawng rai taw nga  ai kun?
 Tinang hta kaji kadun grau ai, machye machyang hpang hkrat ai, n lu n  lawm ai ni hpe gara hku mu mada ai kun?

 Tinang lu la ai wenyi a chyeju kumhpa ni hpe akyu jashawn nna Hkristu  a hkumhkrang hpe gara maga hku gawgap lawm nga ai kun? 

2022:PRAN WAN LADAW LABAN (3) NA CHYUM LAIKA

PRANWAN LADAW HTA LABAN 3
January 23, 2022
CHYUM MUNGGA DAW 1

NEHEMIA 8:1-4a, 5-6, 8-10

Ya hti na gaw, myihtoi Nehemia a Laika hta na rai nga ai.
Dai nhtoi hte hta e, hkinjawng Ezra gaw, shata sanit a shawng shani e, chye na lu ai shawa hpawng numsha lasha mahkra a man e, tara laika hpe la shapraw wu ai. Jahpawt jau jau kaw nna jan pungding du hkra, Hka Chyinghka ndaw na dam lada ai shara e tsap let chye na lu ai numsha lasha ni a man e tara laika hti dan ai hte, mung masha ni yawng dai hpe madat mara nga ma ai. Chyare wa Ezra gaw shanhte shachyaw san da ai pinra ntsa e tsap nga wu ai. Shing rai Ezra gaw mung masha mahkra hta grau tsaw ai shara e tsap let, mung masha mahkra ni a man e dai tara laika hpe hpaw da nna, dai laika hpe hpaw ai shaloi, shanhte yawng hte gaw rawt tsap ma ai. Shaloi, Ezra gaw galu kaba re ai Madu Karai Kasang hpe shakawn kungdawn wu ai. Mung masha ni nlang hte gaw tinang a lata sharawt let, Amen, Amen, nga nna tsun nhtawm, ga du hkra gum dagup let Madu hpe nawku ma ai. 
Shingrai shanhte gaw, Karai Kasang a tara laika hpe dan dan leng leng hti nna, ga lachyum shapraw dan ai majaw, mung masha ni chye na ma ai. Mung masha ni dai tara laika ga hpe na jang hkrap ngu hkrap ngoi nga ma ai rai nna, munggyi Nehemia, hkinjawng hte chyare wa Ezra hte mung masha ni hpe sharin achyin nga ai. Lewi masha ni gaw, Dai ni nan, nanhte a Madu Karai Kasang a matu chyoi Pra ai shani rai nga ai; myit hkum yawn, hkrap mung hkum hkrap mu, ngu nna mung masha ni mahkra hpe tsun mu ai. Bai Ezra gaw, Sa wa mu; sau ai hpe sha mu, dwi ai hpe lu mu; n lu ai ni hpe gaw gam jaw mu: dai ni gaw Madu a chyoi pra ai shani rai nga ai; myit hkum kaji mu; Madu hta kabu gara ai gaw nanhte a n-gun atsam rai nga ai, ngu nna mung masha ni hpe jasim mu ai.
Karai Kasang a Mungga rai nga ai.

CHYUM MUNGGA DAW 2

1 KORINHTU 12:12-30

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.
Hpu nau ni e, Masha a hkum hkrang hta daw shan law law rawng nga ti mung, dai ni yawng hte gaw hkum hkrang langai sha jawm tai nga ma ai. Dai hte maren Hkristu mung, daw shan law law lu ai hkum hkrang langai sha zawn rai nga ai. Anhte yawng mayawng, Yuda ni hte Greka ni rai ti mung, mayam ni hte shanglawt ni rai ti mung, Wenyi langai sha hta e kashin kamun hkam la saga ai rai nna, anhte yawng jawm lu na matu dai Wenyi hpe jaw ya mani ai. Dai hkum hkrang chyawm gaw daw shan langai sha n rai, law law wa rai nga ai. Lagaw mahtang gaw, Ngai lata n rai nngai majaw hkum hte n seng nngai, nga nna tsun ti mung, hkum hte seng nga ai. Bai dai ana gaw, Ngai myi n rai nngai majaw, hkum hte n seng nngai nga nna tsun ti mung hkum hte seng nga ai. Hkum ting gaw myi chyu sha rai yang, na lu na lam kanang nga na a ta? Ana hkrai rai yang gaw, manam lu na lam kanang nga na a ta? Ya chyawm gaw Karai Kasang  Shi ra ai hte maren, daw shan langai hte langai hpe dai hkum hkrang hta jahkum shatsup tawn da nu ai. Daw shan yawng mayawng amyu mi sha rai yang gaw, hkum hkrang kanang nga na a ta? Ya ndai hku rai nga ai: daw shan law law nga ti mung, hkum hkrang langai sha rai nga ai. Myi gaw, Nang lata hpe ngai n ra nngai, ngu nna n tsun lu ai; abaw mung, Nan lagaw yan hpe ngai n ra ai ngu nna n tsun lu ai. 
Dai hta n-ga hkum hkrang na n-gun kya ai zawn re ai daw shan gaw lawm ra ai; hkum hkrang na grau n shareng ai daw shan ni hpe, anhte grau nna sadi sahka ai hte jahpun nga ga ai. Dai rai nna, anhte a n htap n htuk ai zawn re ai daw chyen ni hpe grau nna jahtuk shatsawm ga ai; htap htuk ai daw chyen ni mahtang gaw shatsawm n ra nga ai. Dai hkum hkrang hta n ru n ra n byin ai sha, daw shan ni shada da myit tsang hkat nga mu ga sha she Karai Kasang dai hkum hkrang hpe shabung shapre nna, arawng grit ai daw shan ni hpe grau nna arawng jaw mu ai. Shing rai, daw shan langai mi nji nmu hkrum yang yawng mayawng rau machyi dum ma ai; daw shan langai mi shagrau ai hkrum yang, yawng hte gaw rau kabu gara nga ma ai. Ya nanhte gaw Hkristu a hkum hkrang rai nga ai, rai ti mung, langai hte langai daw shan kaga ga rai nga myit dai. Nawhku Hpung hta e Karai Kasang gaw kasa ni hpe shawng na tsang hta san tawn da mu ai; tsang lahkawng hta myihtoi ni; tsang masum hta sara ni; dai hpang e lamik kumla galaw ai ni; dai hpang e machyi makaw shamai shatsai na chyeju lu la ai ni; shingdep shingtau ai ni; sharawng awng ai hte woi awn chye ai ni hte, ga amyu myu chye tsun ai ni hpe Shi san tsawn da manu ai. Yawng mayawng kasa rai nga a ni ? Myihtoi rai nga a ni ? Yawng mayawng hte wa sara rai nga a ni? Ga amyu myu chye tsun nga a ni? Yawng hte wa ga amyu myu a lachyum hpe htai dan lu a ni?
Karai Kasang a Mungga rai nga ai.

KABU GARA SHIGA

LUKA 1:1-4; 4:14-21

Ya hti na gaw, Luka a Laika hta na Kabu Gara Shiga rai nga ai.
Shawng nnan kaw nna tinang nan mu ai hte, dai mungga a magam gun hpai ai ni gaw anhte hpe hkai dan madan hte maren anhte a man e byin wa ai lam ni hpe masha law law wa ka da manu ai. Ngai mung dai lam yawng mayawng hpe npawt ndung hkren azin ayang san sagawn yu ni ai. Dai rai nna arawng lu ai Htawhpilu e, nang sharin la sai mungga teng man rai nga ai hpe kam lu u ga, na a matu dai lam mahkra hpe matut manoi rai ka da na ngai myit lu nngai.
Dai aten hta Yesu gaw, Wenyi a atsam hte Galile mung de bai wa nga ai rai nna dai ginwang shara magup hkan e Shi a lam kajai gumhkawng mat wa ai. Shanhte a tara jawng ni hta Shi sharin shaga ya nna, yawng hte gaw Shi hpe shagrau sha-a ma ai. Shaloi, Shi nga kaba wa ai Nazaret mare de du wa ai; Shi a htung hte maren Laban nhtoi e tara jawng hta Shi shang wa ai rai nna laika hti na rawt tsap wu ai. 
Shaloi myihtoi Esaia a laika Shi hpe jaw ma ai rai nna, dai laika hpaw yang ning nga ka da ai shara mu hkrup wu ai: Madu a Wenyi nye a ntsa e nga nga ai: Matsan mayan ni hpe Kabu Gara Shiga hkaw tsun na matu Shi ngai hpe namman chya ya ni ai. Bawng dung ai ni hpe sharawt lu na lam, myi kyaw ai ni hpe myi bai mu na lam, hkaw tsun na matu mung, zingri zingrat hkrum ai ni hpe dat dat shangun n hte Madu sharawng awng ai shaning hkaw tsun dan na matu mung, Shi ngai hpe shangun dat ni ai, nga nna hti wu ai. Dai laika katsu nna, tara jawng na nrum ntau wa hpe bai ya kau nhtawm, Shi dung nga ai: tara jawng na ni nlang hte gaw Shi hpe azi yu nga ai, Shaloi, Shi gaw: Dai ni nan nanhte madat nga yang, ndai ka da ai ga gaw dik wa sai, ngu nna shanhte hpe ga tsun hpaw wu ai.
Madu a Kabu Gara Shiga rai nga ai.

2022:PRAN WAN LADAW LABAN (2) NA MUNGGA

Israel mungdan hten bya mat ai hpang, Karai e masat ya ai lamu ga, Hkanan buga gaw kau da hkrum ai jahkrai ma zawn, shakram da hkrum ai mahkawn kasha zawn, shaning law law na mat ai. Kau mi Egyip de, kau mi Babylon de du mat ai. Isaiah a myihtoi ga hta Yerusalem hte Hkanan buga hpe bai gaw sharawt na lam, Karai Kasang mahtang Yerusalem, ngu ai shayi mahkawn hpe hkungran la na lam tsun ai. Kabu mai ai Shi-ga hta Yawhan gaw Yesu a shawng shawng na lamik kumla, Hkanan Kahtawng na hkungran poi na mabyin a lam tsun ai. Isaiah a ga dik wa sai lachyum rai nga ai. Sabyi chyaru dumhprut mat ai majaw kaya hpa tai wa ai kaw na, Yesu a kanu, Maria, hpyi htinglu ya ai a marang e, daw n ma hkra re ai sabyi chyaru ningnan lu la ai. Dai shani kaw nna hpang ai Yesu, Messiah, kaw na shaman chyeju ni, hkye hkrang la ai chyeju nhpaw n-ya hkam la lu na lam hpe madi ai. Kamsham ai ni gaw Karai a chyeju hpan hkum sumhpa n taw n tsang hkam la lu na lam, Korintu Laika hta mu lu ga ai. 

Du sa ladaw hte Hkrismat ladaw na Laban mungga hpe maram yu yang, Karai a hkye hkrang la ai amu ni, Hkye la Madu Messiah, Hkristu a lam hpe madung shadan dan ai hpe mu lu ga ai. Yesu kashin kamun hkam la ngut ai hpang, Yesu gaw sasana magam gun hpang ai. Yesu a sasana magam hta ni htep dik ai hku hkan galaw gunhpai lawm ai wa gaw kanu hkum nan rai nga ai. Dai majaw, hkye hkrang la ai masing hta kanu Maria kade ahkyak ai lam hpe dai ni na Laban mungga hku nna shadum ya ai. Messiah du sa ai aten hta sabyi chyaru hte nsi nai mam ni nhpaw n-ya law htam na lam Ga-shaka Dingsa hta tsun da ai. Amo 9:13; Hoseah 2:29. Hkye La Madu du sa ai shaning 2000 jan wa sai. Mungkan ga e kawsi hpang gara, hku hku ai, machyi makaw, hkrap ngu hkrap ngoi nsen ni law jat ding-yang. Dai hpe gara hku ngu na rai ta?

Hkye La Madu du sa ai shaning 2000 ning jan wa sai. Kawsi hpang gara hte hkrap ngu hkrap ngwoi madai ai nsen ni hkoi mat ang sai; rai tim, dai yawng ӑ nga nga ai. Gara hku htai na rai ta? Yesu gaw kaman kaw nna sabyi chyӑru shatai ai n rai; Shi shabyin mayu ai amu hta kaga masha ni shang lawm, lit la garum ya na, shada garum hkat ai hku nna shang lawm na hpe ra sharawng ai. Yawng a shawng, kanu e lӑjin ya ai; dai hpang, Shangun ma ni, hpӑjau hpӑla ni madat mara shang lawm ma ai; Nga nga chyӑlu lu-hka hpe akyu jӑshawn nna tsa shabyin ya ai. Karai a mungdan du nga sai majaw Karai Kasang gaw lamu de na sha-hpa hkum sumhpa marang htu ai zawn htu jahkrat ya na n rai. Ruyak shoi-hpa ni, nni nkri lam ni hpe “Hkoi ma nu ga, mat ma nu ga” ngu, n galaw na re. Nga nga chyӑlu dinghta ga na sha-hpa ni hte kaga mungkan sut-gan ni hpe shada gam garan chye na, ladat shaw garum shingtau hkat ai myit masin Karai e jaw ya na re; akyu hpyi ai mung galaw ra ai.  N tara ai, n hkru n kaja ai myit masin a apu asi ni re ai law-hpa myit, marin myit, jaw n ja sha n ma re ai myit masin ni a majaw manghkan hkum hkra nga nga ding-yang re.

Karai a chyeju kumhpa hkam la lu ai ni, hkye hkrang la hkrum ai ni gaw dinghpring ai hku asak hkrung, bungli galaw sha na hpe Karai Kasang ra sharawng ai lam Isaiah Laika hta hkrak tsun da ai. Yawng yawng gaw dinghpring shajang ai rai yang, tsawra myit rawng shajang ai rai yang, ndai dinghta ga e kawsi hpang gara, hkrap ngu hkrap ngwoi nsen ni hkoi mat na sha rai nga ai. Dai majaw, yawng yawng gaw sasana magam hta shang lawm, madi shadaw lawm ra ai lam rai nga ai. Tinang  hpa kaning re madang hta nga ai rai tim, hpa makan bungli galaw sha ai rai tim, hkungran poi na mayam ni, hpӑjau hpӑla ni zawn, Karai a mau-hpa amu hta shang lawm na Karai Kasang ra sharawng ai. Sasana galaw lu ai atsam, hkye hkrang la ai amu hpe anhte galaw gunhpai ga yang, ra kadawn ai ninggun atsam wenyi a chyeju kumhpa hkum sumhpa, Karai e jaw ya na lam, Korintu Laika hta shadum da ai.

 “Karai a chyeju, hkye hkrang la ai chyeju nhpaw n-ya law htam nga  ai”, ngu ai hpe nang gara hku chye na a ta?
 Yesu gaw sabyi chyaru shalaw jahtam ya ai, ningnan hpan ya ai, ngu ai kaw na hpa hpa sharin hkaja la lu sa ta?
 Hkristan langai hpra a wenyi mahkrun, hkye hkrang la ai chyeju ni hkam la na lam hta Yesu a kanu Maria kade ahkyak a ta? 

2022:PRAN WAN LADAW LABAN (2) NA CHYUM LAIKA

PRAN WAN LADAW HTA LABAN 2
January 16, 2022
CHYUM MUNGGA DAW 1

ESAIA 62:1-5

Ya hti na gaw, myihtoi Esaia a Laika hta na rai nga ai.
Yerusalem mare a ding hpring ai lam, pyengding zawn htoi tu nga ai du hkra, ngai Ziun a lam hta atsin sha nga na nrai, Yerusalem mare a matu kaman nga na n rai. Dai aten hta, maigan amyu ni na a ding hpring ai hpe, hkawhkam ni mahkra na a arawng sadang hpe, mu mada nna, Madu a n-gup na pru ai mying nnan hte nang hpe shamying na mara ai. Nang gaw Madu a lata hta, tsawm htap ai shanghkawng na a Karai Kasang a lata hta, hkawhkam janmau tai na rin dai. Htawm hpang de nang hpe, Mare Dingsa ngu nna mung, na a mungdan hpe, Katsi Katsang shara ngu nna mung shamying sana n rai; nang hpe Ngai Sharawng Awng ai Jan, na a mungdan hpe, Hkungran sai Num Nnan ngu nna shamying na mu ai; kaning rai nme law, Madu gaw nang hta awng sharawng nna, na a mungdan gaw hkungran madu lu na ra ai.Shabrang wa gaw mahkawn hte hkungran ai zawn, na a shadang sha ni gaw nang hte hkungran na mara ai; la nnan gaw num nnan a majaw kabu gara nga ai hte maren, na a Karai Kasang na a majaw kabu gara nga na ra ai.
Karai Kasang a Mungga rai nga ai.

CHYUM MUNGGA DAW 2

1 KORINHTU 12:4-11

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.
Hpu nau ni e, Ya, chyeju kumhpa amyu myu nga ti mung, dai ni hpe karan jaw ai Wenyi gaw langai sha rai nga ai. Daw jau ai lam amyu myu nga ti mung, Madu langai sha hpe anhte daw jau nga ga ai. Mauhpa atsam amyu myu nga ti mung, yawng mayawng hta e dai lam mahkra hpe shabyin ai Karai Kasang gaw langai sha rai nga ai. Rai ti mung, akyu chyeju lu la u ga she, dai Wenyi gaw langai hte langai hta e shi a atsam hpe shapraw shadan dan nga ai. Dai rai nna langai mi gaw wenyi atsam hte hpaji mungga chye tsun ai; kaga wa gaw, dai Wenyi garum ai hte chye chyang ai mungga tsun lu ai; kaga wa gaw dai Wenyi a jaw e makam masham; kaga wa gaw Wenyi langai sha a jaw e machyi makaw shamai shatsai na ahkang, hkam la shajang ma ai.  Langai mi gaw lamik kumla galaw dan lu ai; kaga wa gaw myihtoi chye htoi nga ai; kaga wa gaw wenyi ni hpe chye ginhka lu ai; kaga wa gaw ga amyu myu a lachyum hpe shapraw dan lu ai: dai lam yawng hte hpe Wenyi langai sha e nan shabyin wu ai rai nna, Shi myit ra ai hte maren, langai hte langai hpe karan jaw mu ai.
Karai Kasang a Mungga rai nga ai.

KABU GARA SHIGA

YAWHAN 2:1-12

Ya hti na gaw, Yawhan a Laika hta na Kabu Gara Shiga rai nga ai.
Dai aten hta e, Galile mung na Hkana mare hta num hkungran ai poi galaw nga ma ai rai nna, Yesu a kanu gaw dai poi hta lawm nga ai; Yesu hpe mung Shi a sape ni hte nawng, dai poi de shaga la mu ai. Tsabyi chyaru ma mat jang, Yesu a kanu gaw, shanhte tsabyi chyaru n lu mat sai, ngu nna tsun wu yang, Yesu gaw: Nu e, nang hpa majaw ngai hpe san n ta? Nye a ahkying garai n du li ai, ngu nna Shi hpe htan wu ai. Shi a kanu chyawm gaw, Shi nanhte hpe tsun ai hte maren hkrak hkan galaw nga mu, ngu nna shangun ma ni hpe tsun mu ai. Dai yang e, Yuda ni a jasan jaseng ai htung hkan shatup na matu, nlung yam kru hpe shadun tawn ma ai; dai yam shagu hta dang lahkawng masum daram shang lu ai. Yesu gaw, ndai yam ni hta hka ja bang jahpring mu, ngu nna shangun ma ni hpe tsun jang, shanhte hka ntsin dem rai hkra hka ja bang ma ai. Shaloi, Yesu gaw, Ya kamai la nna, poi up wa hpe sa jaw mu, ngu nna shanhte hpe tsun jang, shanhte sa jaw ma ai. Poi up wa gaw, tsabyi chyaru tai mat ai ntsin hpe chyim yu jang dai hpe kanang na la ai hpe n chye da wu ai, hka ja ai ma ni chyu sha chye ma ai. Dai rai nna, la nnan wa hpe shaga la nna, Masha kadai mung grau mu ai tsabyi chyaru shawng jaw lu ma ai; masha ni ram ram lu ai hpang she n mu ai baw jaw ma ai: nang gaw grai mu ai tsabyi chyaru hpe ya du hkra kyen da ndai, ngu wu ai. Shing rai Yesu gaw, Galile mung na Hkana mare hta shawng nnan e lamik kaumla galaw dan hpang nna, Shi a hpung shingkang madun dan wu ai; Shi a sape ni mung Shi hpe kam sham nga ma ai. Dai hpan Shi gaw, kanu kanau ni hte Shi a sape ni hte nawng, Kaperna-um mare de yu wa nna, dai yang e mung, gade ya wa n hkring nga ma ai.
Madu a Kabu Gara Shiga rai nga ai.

2022:YESU KASHIN KAMUN HKAM AI POI SHANI NA MUNGGA

Lahkawng ngu na Isaiah tsun ai myihtoi ga, “Karai Kasang gaw a’hkrung nga ai, ӑ grin nga ai Wa re ai hte maren, Shi n shabyin lu ai hpa mung n nga ai. Karai Kasang gaw nga mi nga hpe hpan ai Wa re ai hte maren, Israel amyu sha ni hpe hkye hkrang la ai amu kadai mi n shingdang lu ai. Karai Kasang gaw (Babylon e bawng masha tai ai) Israel hpe hkye nan hkye la na; hpa majaw nga yang, Israel amyu sha ni gaw Karai e shangun da ai bungli lu ma ai; dai Karai a mauhpa hkye hkrang la ai amu hpe mungkan ting chye lu hkra sakse hkam ya na lit lu ma ai. Luka a Laika hta, Yawhan Baptista kashin kamung jaw ai lam, Hkye La Madu hpe nan kashin kamun jaw nna, Yesu gaw Karai a Kasha majing re ai lam, shinggyim masha ni hpe shachyen ya ai. Kasa Laika hta Kasa Petru gaw Yesu a lam, maigan masha Korneli hpe sakse hkam dan ai. Hkye hkrang la ai chyeju kumhpa gaw masha amyu baw shagu a matu re ai lam, tsun hpaw dan ai.

Babylon mungdan e mayam tai, bawng masha tai nna nga nga ai Israel amyu sha ni makam masham hte htung hking lailen shamat kau na tsang hpa byin nga ai. Tinang a mungdan Palestine buga de bai htang wa lu na myit mada shara n nga ai aten hta Isaiah a myi-htoi ga gaw myit rawt hpa nan rai nga ai. Yerusalem e ngam nga ai matsan mayan masha ni a matu mung myit ninggun lu hpa rai nga ai. Amyu ting a shut hpyit mara a majaw amyu ting hten bya ai kaw du mat tim, Karai a n htum n wai tsawra myit a majaw, Karai Kasang gaw masha hku nna n byin mai ai hpe byin hkra shatai ya na ra ai. Dik hkra myit daw nga ai Karai a amyu masha ni hpe, “Nanhte mara dam hkam la lai ladaw hpring sai”, nga ai.

Israel amyu sha ni gingdan ma ai majaw Karai e hkye la ai n rai; Karai a ga-sadi a majaw hte, bai shanhte gaw maigan amyu yawng hpe Karai a hkye hkrang la ai amu a lam sakse hkam dan lu na, shing re ai majaw shanhte hpe bai hkye la na rai nga ai. Dai gaw, anhte kadai rai tim, tinang a mai kaja lam a majaw, tinang gingdan ai majaw n rai, langai hpra hpe Karai a tsawra matsan dum myit san san hte hkye hkrang la hkrum ai rai nga ai. Kashin kamun hkam la ai ni yawng mung, makam masham hpe sakse hkam dan ai amu, sasana majen je ai amu hta shang lawm madi shadaw lawm na lit lu ai lam hpe shadum ya ai.

Yesu kashin kamun hkam la ai aten hta kaba dik htum ai sakse gaw Karai Kasang shi hkum nan kaw na re ai. Awu asin a mayam tai ai, hka wa ra ai shinggyim amyu sha a gawng malai tai ai Yesu gaw, masha ningnan, Adam ningnan tai wa ai: “Ndai gaw ngai tsawra ai ngai a kasha rai nga ai”, nga ai ga hta nan, shinggyim amyu ting hpe hkye hkrang la na lam Karai e tsun hpaw dan ai ga rai nga ai. Yesu gaw shinggyim masha yawng a gawng malai tai ya ai majaw, Shi kashin kamun hkam la ai gaw ahkyak ai. Dai ngut nna sha Karai a mungdan a lam hkaw tsun hpang wa ai. Dai lam hpe Kasa Laika hta Kasa Peteru sakse hkam ya ai. Yesu gaw Kabu mai ai Shi-ga hkaw tsun hkawm let, mai kaja ai amu ni galaw ai hte, nat a gyit hkang da hkrum ai ni hpe shalawt dat ya ai, nga ai. 

Shut hpyi mara awu asin kata na shinggyim masha ni hpe shalawt dat ya ai. Kashin kamun hkam la sai ni yawng mung, makam masham shachyam shabra ai, sasana majen je amu hta shang lawm madi shadaw lawm na lit lu ma ai. Israel amyu masha ni gaw Karai a hkye hkrang la ai mau-hpa amu ni hpe mungkan masha ni a man e sakse hkam dan na lit kaba lu ai zawn, anhte yawng mung kanbau amu hta lai nna, Karai a mai kaja ai lam, Shi myi-man n lata ai, amyu baw yawng hpe hkye la mayu ai lam sakse hkam dan ra ga ai.  Dai ngu yang, tinang hkum nan hkye hkrang la hkrum ai hpe myit dum nna, kabu chyeju dum ai lam hpe madun dan ra ga ai. Tinang hkum nan mai kaja ai masha, mungkan ga na hkrit hpa ni hpe awng dang lu ai wa, Karai a tsawra lata la hkrum ai wa re ai lam hpe shani shagu na asak hkrung mahkrun hta sakse hkam dan ra ga ai. Masha yawng hpe tsawra matsan dum ai myit hte mai kaja ai amu galaw ai ni, ruyak jamjau hkrum ai ni hpe, shut hpyit lam dam ai ni hpe hkye mawai shalawt dat ai ni tai ra ga ai.

 Kashin kamun a marang e hkam la lu ai wenyi a shaman chyeju ni hpe  myit dum ai lam shani shagu na asak hkrung mahkrun hta gara hku  madun dan ga ta?

 Kashin kamun sakramentu gaw tinang hpe Yesu hte mung, shada hte  mung, Hkristu a sasana magam hte mung, gara hku matut mahkai nga ai  kun?

 Sasana majen je ai bungli hta langai hpra gara madang hku, kaning ning  rai nna shang lawm madi shadaw lawm nga ai kun?