2021:PRAN WAN LADAW LABAN (28) NA MUNGGA

(1) Ja gumhpraw, mungkan sutgan, arawng aya hte, (2) hpaji byeng-ya, dai lahkawng hta na langai sha lata la mai ai, ngu nna nang/ngai hpe lata la shangun yang, gara hpe mahtang lata la na rai ta? Tinang ra mayu ai, dawdan lata la ai hta hkan ai lam, Chyum Mungga ni hku nna shadum ya ai.

Shawng na langai hpe gaw n tara ai hku rai rai, gam kaja ai ngu nna rai rai, tinang n gingdan ai rai tim marai langai ngai e shagrau ai, sutli kumhtaw dagraw hkam la ai hku rai rai, tinang salu salat hkaw nna rai rai, lu la mai ai. Hpaji byeng-ya hpe mahtang masu magaw ai hku, n tara ai hku, sutli kumhtaw dagraw hkam la ai hku n mai byin ai. Baw-nu madang n hpring ai masha langai gaw salu salat kade hkaw nna shakut tim, tsang X sanpoi htai yang shagan (6) hte awng na n mai myit mada ai. Shakut ai daram awng na kun, hkrat na kun sha rai na re. Laika a nya dik ai San Yawhan Viani gaw sanpoi n mai awng ai masha rai tim, kaja dik ai jau tai wa ai. Masha ni a myit masin wenyi kraw kata na sung dik ai, yip da ai lam ni hpe mu chye ya ai (Lahkawng ngu na Chyum Mungga, Hebre Laika hte shadawn yu mai ai). Hpaji kungkyang ai Jau/Saradaw ni shi kaw sa mara raw la ma ai, mau hpa Wenyi a Chyeju/ Karai Kasang kaw na lu la ai hpaji n rai a hka! Adolf Hitler gaw masha sat hpaji hta kunghpan ai rai tim, jahtum e shi a hkum hpe shi gap sat ai kaw prat jahtum kau nu ai. 

Lam mi gaw, mungdan kau mi hta gumhpraw lu ai ni hpaji hpe mari la mai ai hku sawn la ma ai. Gumhpraw law law jaw nna tsang X sanpoi hta shagan 5/6 hte awng la lu nna, Engineer/ Doctor tai wa ma ai. N ging n dan ai sha Engineer/ Tsi Sarawun Doctor tai wa ai ni, masha law law hpe sat kau lu ai n rai ma hka! Nobel kumhpa shagrau hkrum ai Mother Theresa gaw M.A degree mung, Doctor degree mung n lu ai wa re. Rai ti mung, Karai Kasang e jaw ya ai nhtoi chyeju ni hpe hkam la ai majaw, India mungdan na matsan masha ni Sen/Wan hpe shalawt dat ya ai; asak matut ya ai; shanhte a arawng sadang hpe sharawt ya ai; masha a arawng sadang hte bung ai hku asak hkrung lu ma ai. Kaning re ai hpaji/ kaning re ai atsam hte rai ta?

A nya dik ai masha gaw ran rau she re; zet let dik ai masha mung ran rau she re. Masha law mi law, malawng maga gaw kahproi kanoi, grai wa n shai hkat ma ai. Salu salat hkaw, pu ba hkam nna ram ging ai hku hpaji madang shatsaw la na byin mai ai. Mungkan arawng aya, mungkan sutgan hpe marin ai gaw htenbya ai kaw du wa lu ai lam, Madu Yesu shadum ya ai. Dai majaw, Hpaji Byeng-ya Laika hta tsun da ai gaw matsaw tsang kaw na jaw ya ai kuptsup ai hpaji byeng-ya hpe grau manu shadan ai lam tsun da ai.  Sumsing sutgan, masha law law hpe chyeju kumhpa garan ya lu ai machye machyang grau ahkyak ai lam, Madu Yesu gaw mungkan sutgan lu su ai shabrang ma hpe tsun ai, “Na a sutgan ni hpe dut kau nna matsan masha ni hpe gam garan ya su, dai hpang ngai kaw hkan nang rit” nga ai. Madu Yesu Shi a hpang hkan nang ai majaw, Shi a sape tai ai majaw, dinghta ga na arawng aya, ja gumhpraw lu lawm lam asum hkam kau ai wa gaw, ndai dinghta ga a htam latsa hta n’ ga, n htum n wai ai sutgan mung lu la na lam tsun ai. Nang/ngai, kam ga ai kun?

Mungkan arawng aya, ja sutgan, pyaw hpa ni hpe marin ai a majaw, shada sat hkat ai majan kade she law ai. Dai zawn re ai marin myit a majaw, akyang lailen htenza ai lam kade she law, n tara ai amu ni kade she law rai nga ai. Kaga maga de yu yang, mungkan arawng aya hte sutgan hpe kau da nna Yesu a hpang hkan nang ai ni, masha law law hpe asak a chyeju kumhpa ni gam ya lu ma ai. Htenza nga ai mungkan myit masa hpe tsi shamai ya lu ai; hkye mawoi amu ni law law galaw lu ma ai.

2021:PRAN WAN LADAW LABAN (28) NA CHYUM LAIKA

PRAN WAN LADAW HTA LABAN 28

October 10, 2021

CHYUM MUNGGA DAW 1

Hpaji Byeng-ya 7:7-11

Ya hti na gaw, Hpaji Byeng-ya a laika hta na rai nga ai.

Ngai akyu hpyi nga yang, myit su ai chyeju ngai hpe jaw ya ni ai; ngai hpyi nem ai shaloi hpaji byeng-ya a atsam marai nye a ntsa de yu hkrat wa sai. Up hkang ai sumdoi hte hkawhkam tingyang hta grau nna, ngai Hpaji Byengya hpe ra sharawng nngai; dai hpe lu la jang, ja sutgan hpe hpa n nawn nngai. Dai hpaji myit hpe, manu dan dik ai lungseng hta grau nna manu shadan nngai; kaning rai nme law, ja mahkra gaw hpaji byeng-ya hte shabung yang gaw, zaibru latsup mi zawn sha rai nga ai; gumhpraw mung hkumpup hkumpa zawn sha rai nga ai. Hkam kaja ai hte hkum hkrang tsawm htap ai hta grau nna, Hpaji Byengya hpe ngai tsaw ra nngai; de a htoi tu kabrim ai hpung shingkang galoi mung n wai mat ai majaw, nhtoi hta grau nna shi hpe ra sharawng nga nngai. Hpaji Byeng-ya ngai hte rau nga yang, mai kaja ai baw hkum sumhpa ngai lu la nna, n dang hti hkra law la ai sutgan ni hpe, shi a lata na ngai hkam la ni ai.

Karai Kasang a Mungga rai nga ai.

CHYUM MUNGGA DAW 2

Hebre 4:12-13

Ya hti na gaw, Hebre masha ni hpang de shagun dat ai laika hta na rai nga ai.

Karai Kasang a mungga gaw hkrung nga ai hte, shabyin da lu nga ai: nshan lahkawng maga dai ai ntawng nhtu hta grau dai ai: myit masin hte wenyi hpe mung, nra hkrihkraw hte laswi hpe mung, dinghkren ginhka nna, kraw lawang na myit mang ai hte yaw shada ai lam ni hpe, jeyang hparan ya lu ai. Shi n mu lu hkra makoi da lu ai baw hpa mung n nga ai: yawng mayawng hte gaw shi a myi man e dan leng nga ai hte, asan brang lang rai nga ai rai nna, anhte shi a man e jahpan dan ra ga ai. 

Karai Kasang a Mungga rai nga ai.

KABU GARA SHIGA

Marku 10: 17-30. (10: 17-27)

Ya hti na gaw, Marku a laika hta na Kabu Gara Shiga rai nga ai.

Yesu gaw rawt sa wa maw ai shaloi, masha langai mi gat sa nna, Shi a man e lahput hput di let, Mai kaja ai Sara e, n htum n wai ai asak a sali wunli lu hkra, ngai hpa galaw ra a ta? ngu nna Shi hpe san wu ai. Yesu gaw, Ngai hpe mai kaja ai nga nna, hpa rai tsun n ta? Karai Kasang hta kaga mai kaja ai kadai mung n nga ai. Jep ai tara hta: Masha hkum sat, Masha num hkum shaw, Hkum lagu, N teng n man ai sakse hkum hkam, Maw sha map sha hkum rai et, Nnu yan nwa hpe hkungga lara di u, nga ai ga hpe nang chye nga ndai, ngu nna shi hpe tsun wu ai. Dai wa gaw, Sara e, dai yawng mayawng hte hpe ma aprat kaw nna ngai hkan shatup se ai, ngu nna Yesu hpe tsun wu ai. Yesu gaw shi hpe n-gaw n ja ai myit hte mada yu let, Lam langai mi nang naw ra nga ndai: Nang wa su, Lu malu hte dut kau nna, matsan mayan ni hpe karan jaw u; shing rai, sumsing lamu ntsa e nang sutgan lu na rit dai; ngai kaw mung sa hkan nang rit, ngu nna shi hpe tsun wu ai.  Dai wa mahtang Yesu a ga majaw myiman sum mat nna, myit yawn la ai hte bai wa mat ai: kaning rai nme law, shi sutgan law law lu ai wa rai nga ai. Yesu gaw kayin yu nna, Shi a sape ni hpe, Sut su ai ni gaw Karai Kasang a mungdan hta shang na matu, nachying yak la a hka gaw! ngu nna tsun mu ai. Sape ni mahtang Shi a ga majaw mau mahka ma ai. Dai rai nna Yesu gaw, Ngai sha ni e, Karai Kasang a mungdan hta shang na gaw, nachying yak la a hka gaw! Lu su ai wa gaw, Karai Kasang a mungdan hta shang loi ai hta, gawla-u gaw samyit na hku gale na grau loi nga ai, ngu nna shanhte hpe bai htan wu ai. Shanhte mahtang n dang tsun hkra mau mat let, Dai rai yang, Kadai wa mi hkye hkrang la ai hkrum lu na a ta? nga nna shada da tsun ma ai. Yesu mahtang shanhte hpe mada yu nna, Dai amu hpe masha n galaw lu ti mung, Karai Kasang galaw lu nga ai; kaning rai nme law, Karai Kasang gaw yawng mayawng hpe dang galaw nga ai, ngu nna tsun mu ai.

(Grau galu ai hku hti mayu jang lawu na daw 4 hti ra ai.)

(Marku 10:28-31) Petru gaw, Anhte mahkra hte hpe kau da nna, Nang kaw hkan nang saga ai; anhte gara hku rai na i? ngu nna Yesu hpe san wu ai. Yesu gaw, Nanhte hpe ngai teng teng tsun made ga, Nye a matu hte kabu gara shiga a matu mara, nta, kahpu kanau, kajan, kanu kawa, kashu kasha hte yi hkauna hte hpe kau da ai wa kadai raitimung, zingri zingrat hkrum ai hte hpawn, ndai prat hta e nta, kahpu kanau, kajan, kanu kawa, kashu kasha hte, yi hkauna hte hpe htam latsa n lu la na kadai n nga ai: htawmhpang prate n htum n wai asak lu la na ra ai, ngu nna sape ni hpe tsun mu ai.

Madu a Kabu Gara Shiga rai nga ai.

2021:PRAN WAN LADAW LABAN (27) NA MUNGGA

Nga mi nga, tu mi tu, hkrung mi hkrung a Madu nga ai lam; asak hkrung lam hte nga pra mayat maya lam hpe reng hkang ai tara nga ai lam; kun dinghku a chyoi pra ai manu dan ai lam, ndai hte hpe sharin la lu ga ai.

Anhte a prat, dai ni na prat hta masha a asak hpe kam ai hku manu dawdan ai; shangai shaprat mayat maya lam hpe kam ai hku di ma ai; n hkungran ai sha arau nga nga ai; kasha n ra mayu ai; rai tim ma kap wa jang hkri-wang kata na ma hpe sat kau ai; la shada, shing n rai, num shada madu wa madu jan zawn rai kanawn (same sex cohabitation/sodomy) nga ai; hkungran ga-sadi hpe jahten kau nna num/la kade lang mung jahka, kade lang mung bai la ai; hpung-up ni mung kahtap kahtap nna hkungran ya ai; ndai zawn re kaw na hkawt, Gumsan Magam Joe Biden hpe Chyoi Pra Hkum jaw mai n mai? Shinggyim lailen tara (moral law) hte seng ai ga-san ni, manghkang ni law la ai mungkan rai nga ai. 

Mungkan masha ni myit hpaji, tsi hpaji, tara upade hpaji, ndai zawn hpaji hpan grau grau madang tsaw wa ai hte maren, lahta na mabyin ni, manghkang ni hpe lachyum htai ai lam mung grau sung grau dam lada wa ai. Nawku Hpung e mahtai jaw, lam matsun, dawdan ya ai lam hta mungkan hpaji hte kahproi kanoi rai, shingjawng saw hkrum ding-yang rai nga ai. 

Mungkan mungdan ni hta Protestan law dik htum ai mungdan gaw American (USA) rai nga ai. Rai tim, gumsan magam lata shagu, Kahtawlik hpung masha ni a mae pa ni (Votes) malawng kadai hpe jaw ai, ngu ai hta hkan nna gumsan magam hpe lata la byin ai sakse ni law law nga ai. USA Saradaw ni a moral authority (Shinggyim lailen tara namnak) kade kaba ai lam hpe asan sha chye lu ai. 

England mungdan hpe Kahtawlik Nawku Hpung kaw nna jahka woi ai Hkawhkam Henry VIII__shi a hkungran num Catherine hpe jahka kau nna num kaga, Anne Bowleyn hte hkungran na ahkang hpyi ai hpe Sarabyin Clement VII e ahkang n jaw ai. Shi hkum hpe shi, England mungdan a ningbaw, England mungdan Nawku Hpung a ningbaw masat shagrau la ai. Ninghkap ai Jau/Saradaw ni law law htawng sharawng hkrum ai/ sat kau hkrum ma ai. Mying dan hkung dik ai marai lahkawng gaw Saradaw John Fisher hte Hkawhkam rung na Amu Madu Chancellor Thomas More, shan rai ma ai. England mungdan a reng dik htum ai hpaji ninghkrin yan gaw, Henry num jahka nna kaga bai la na lam hpe mung, England Nawku Hpung a ningbaw tai ai hpe mung, ninghkap ai majaw, sat kau hkrum ma ai. Dai gaw, Yawhan Baptista e Hkawhkam Herod hpe ninghkap ai hte bung ai. Henry VIII gaw num langai la, jahka kau rai, kahtap la la di ai; yawng hpe sat kau ai; kanu hpe du hkra sat kau ai wa re. Kaga masha law law hpe mung, ninghkap ai masha ni marai 70,000 jan hpe sat agrawm kau ai. 

Shinggyim lailen tara hte Chyum Laika hpe kam ai hku lachyum htai shapraw ai a marang e byin wa ai htenza lam ni Hkawmhkam Henry VIII hta asan sha mu lu ga ai. Asak Madu Karai Kasang re; yawng hpe hpan da ai Wa re. La langai, num langai rai hpan da ai. Hkungran mai ai mung la hte num a lapran e sha re. Sodom/ Gomora hpe wan marang hte nat kau ai hpe dum mai ga ai.

Yesu htan tsun ai ga gaw: ningpawt ninghpang e la hte num; shan gaw hkum shan langai sha tai wa ai. Adam gaw Ewa hpe tsun ai, “Ngai a nra na nra, ngai a shan na ashan” nga ai. Hkungran la/num jahka kau n mai ai lam Yesu gaw asan sha re ai mahtai jaw da ai.

Sawn sumru mai ai lam:
1. Dinghku de, hkungran na lam hkyen lajang hpang wa ai aten hta, hkungran sakramentu a lachyum hpe tang du hkra sharin hkaja/ lam matsun hkat ai kun?
2. “Ma kaji ni hpe ngai kaw du sa lam hkum shingdang mu”, nga ai hpe gara hku chye na a ta?
3. Kanu/kawa gasat shaja ai dinghku, shing n rai, hka bra mat ai rai yang, ngam ai kasha ni hta kade machyi mat lu ai a ta?
4. Chyum Mungga sasana magam dap hpe gara hku madi shadaw lawm a ta?

2021:PRAN WAN LADAW LABAN (27) NA CHYUM LAIKA

PRAN WAN LADAW HTA LABAN 27

October 27, 2021

CHYUM MUNGGA DAW 1

Npawt Nhpang 2:18-24

Ya hti na gaw, Npawt Nhpang laika hta na rai nga ai.

Madu Karai Kasang gaw, Lasha gaw shi hkrai nga na n mai ai; shi a amyu na nrum ntau shi a matu Ngai galaw na we ai, nga ai. Shaloi Madu Karai Kasang gaw nam mali na ashu ashan mahkra hpe mung, ntsa malen pyen ai u mahkra hpe mung ga hte shachyaw wu ai rai nna, dai ni hpe kaning ngu shamying na chye lu hkra, dai masha wa hpang de woi sa wu ai. Dai masha wa mung nsoi nsa rawng ai baw yawng hte hpe amying shingteng jaw wu ai hte maren, tinang nang e shingteng amying lu ma ai. Shaloi dai masha wa gaw yam nga mahkra hpe mung, ntsa malen pyen ai u mahkra hpe mung, nam mali na du sat nhprang mahkra hpe mung, amying shingteng jaw wu ai; rai timung, dai masha wa a amyu na nrum ntau garai n nga lu ai.

Dai majaw Madu Karai Kasang gaw dai masha wa hpe yup kaba hte shayup wu ai rai nna, shi yup pyaw nga yang, shi a garep nra langai mi shaw la nna, dai shara hta ashan hte shatup ya wu ai. Dai hpang Madu Karai Kasang gaw dai masha wa hta na shaw la ai garep nra hte shinggyim numsha hpe shachyaw wu ai rai nna, masha wa kaw woi wa ya wu ai. Dai masha wa gaw, Ya, masha ndai gaw, nye a nra hta na nra, nye a ashan hta na ashan rai nga ai: dai majaw shi hpe numsha ngu na rai nga ai; kaning rai nme law, shi gaw lasha hta na shaw la ai rai nga ai, nga ai. Dai re ai majaw, lasha gaw shi a kanu kawa hpe kau da nhtawm, shi a madu jan hta manoi nga na rai nna, shan lahkawng hkum shan langai sha tai lu na mara ai.

Karai Kasang a Mungga rai nga ai.

CHYUM MUNGGA DAW 2

Hebre 2:9-11

Ya hti na gaw, Hebre masha ni hpang de shagun dat ai laika hta na rai nga ai.

Madu Yesu gaw, Karai Kasang myit ra ai hte maren, masha yawng mayawng a matu si hkam u ga, tawng marang mi sha lamu kasa ni hta shagrit kau ai hkrum wu ai; ya e chyawm gaw, si hkrung si htan a nni nkri hpe hkam la wu ai majaw, hpun shingkang arawng sadang dagraw hkam la nu ai. Yawng mayawng a ntsa e up nna yawng a npawt rai nga ai Karai Kasang gaw, kashu kasha law law hpe hpung shingkang de woi wa yang, dai hkye hkrang la ai lam hta masha ni hpe woi ningshawng ai wa hpe, nni nkri hte jahkum shatsup na gaw, htap htuk nga ai. Shing rai, shachyoi shapra ya ai wa hte, shachyoi shapra hkrum ai ni gaw, amyu langai sha hta rum nga ma ai majaw, shanhte hpe hpu nau ni ngu nna, shi n kaya ai sha tsun nga ai.

Karai Kasang a Mungga rai nga ai.

KABU GARA SHIGA

Marku 10:2-16 or (10:2-12)

Ya hti na gaw, Marku a laika hta na Kabu Gara Shiga rai nga ai.

Hparishe masha nkau mi sa du nna, Yesu hpe chyam let, Masha gaw tinang a madu jan hpe jahka kau na, mai nga a ni? ngu nna san mu ai. Yesu gaw, Mawshe nanhte hpe kaning nga hkang da a ta? ngu nna htan wu ai. Shan hte gaw, Jahka ai laika ka da nna, tinang a madu jan hpe shabawn kau na ahkang Mawshe jaw da sai, ngu mu ai. Yesu gaw, Nanhte a myit ja malit dai majaw, Mawshe nanhte a matu dai tara tawn da nu ai. Rai ti mung, shawng npawt e, masha hpe hpan da ai shaloi, Karai Kasang gaw numsha hte lasha yan hpe hpan da mu ai. De a majaw, lasha gaw kanu kawa hpe kau da nna shan lahkawng gaw hkum shan langai sha tai lu na mara ai. Shing rai shan gaw, lahkawng rai nga ma ai n rai, hkum shan langai sha rai nga ma ai. Dai rai nna, Karai Kasang matut da nu ai hpe, masha gaw jahka kau lu na n rai, ngu nna tsun mu ai. Shanhte nta nhku de nga yang, sape ni ndai lam Yesu hpe bai san mu ai. Shaloi Yesu gaw, Tinang a madu jan hpe jahka kau nhtawm, num kaga hpe hkungran la ai wa kadai mung, shi a madu jan hpe shut nna num shaw ai wa tai nga ai. Numsha mung shi a madu wa hte hka mat nna, la kaga kaw num wa jang, la shaw ai amu galaw nga ai, ngu nna sape ni hpe tsun mu ai.

(Marku 10:13-16) Masha ni mung shanhte a ma kaji ni hpe shaman ya u ga nga nna, Yesu hpang de shanhte hpe woi sa ma ai: sape ni mahtang shanhte hpe daru kau mu ai. Yesu dai hpe mu jang, n yu ra ai rai nna, Ma ni hpe ngai hpang de sa shangun maru; shanhte hpe hkum shadang mu; kaning rai nme law, Karai Kasang a mungdan gaw dai zawn re ai ni a mungdan rai nga ai. Nanhte hpe ngai teng teng tsun made ga: Karai Kasang a mungdan hpe ma kaji zawn n hkap la ai wa kadai rai ti mung, dai hta e kaja wa n shang lu na ra ai, ngu nna shanhte hpe tsun mu ai. Shaloi Yesu gaw dai ma kaji ni hpe pawn la nna, shanhte a ntsa e lata mara ya let shaman ya mu ai.

Madu a Kabu Gara Shiga rai nga ai.

2021:PRAN WAN LADAW LABAN (26) NA MUNGGA

Karai Kasang a Wenyi, Karai a chyeju kumhpa ni hpe Kahtawlik hpung masha ni hte Hkristu hpe Ñdan rai hkap la kamsham ai ni chyu sha, lu la mai ai n re. Tengman dinghpring ai lam, sanseng chyoi pra ai lam, ningli kaja mai kaja ai baw yawng, Madu Yesu Shi a hkrai re ai hte, Yesu Shi hpe n chye ai ni, adan rai kamsham ai ni n rai tim, sanseng chyoi pra dinghpring ai lam hkan shatup ai ni gaw, Yesu Shi a maga re ai, hpyen n tai lu ai hte jinghku ni rai ma ai lam sharin la lu ga ai. Masha amyu shagu, hkye hkrang la hkrum na hpe Karai Kasang ra sharawng ai. Hkye hkrang la hkrum mayu jang, hkrun lam hta shingdang ai kadai hpe rai tim, hpa hpe rai tim, kade tsawra manu shadan ai hpe rai tim, jahka kau gwi ra ai.

Masha shagu gaw tinang nang a makam masham hpe shagrau shareng chye ai. Manghkang gaw, tinang hte n bung ai kaga wa a makam hpe hpa n nawn, manu n shadan ya ai, jahpoi pyi jahpoi kau chye ai manghkang re. Hkristan hpung ni hta pyi kaga hpung masha ni hta rawng ai mai kaja ai lailen, galaw ai mai kaja ai bungli ni, mai kaja ai sharin shaga lam ni hpe n hkap la kam, rai nna, shada n kaw n law di chye ga ai n rai a hka!  Aaron gaw tap hta shaga jahpawng da ai masha hpawng hta n lawm ai, tap shinggan e nga ai masha marai lahkawng myi-htoi htoi ai mu jang, shan hpe jahkring kau na lam Moshe hpe tsun ai. Rai tim Moshe gaw dai yan hpe n hkum pat ai; masha yawng wa myihtoi tai lu yang grau she mai, nga ai. Yesu a Sape ni mung, shanhte a hpawng hta n lawm ai masha langai Yesu a mying gang nna nat shaden kau ai hpe hkum pat na lam Yesu hpe tsun dan ma ai. Yesu htan ai, Shi a mying gang lang ai masha gaw Shi a hpyen n tai lu ai, nga ai.

 Yesu hpe tup hkra n chye ai, makam masham n bung ai rai tim, Hkristan hpung masha ni hpe hku hkau chye ai, kanawn mazum pyaw ai, madi shadaw ya chye ai gale masha ni hpe myit yu mai ga ai. Bukda, Hindu, Islam n nga, Hkristan hpung masha ni hpe garum chye, makawp maga, madi shadaw chye ai ni grai nga ma ai. Tsinyam hkrum sha ai aten hta amyu hpung n ginhka, Hkristan ni mung masha kaja rai ma ai, ngu, hkam la nna madi shadaw ya chye ma ai. Shanhte ni teng sha, Madu Yesu kaw na shaman chyeju n lu la ai n nga na; grau nna, hkye hkrang la ai chyeju kumhpa ni hpe pyi hkam la lu na rai ma ai.

   

Tinang hte makam masham bung ai, amyu bung ai rai tim, sai daw sai chyen, ni dik ai jinghku rai tim, kahpu kanau rai tim, dik nna tinang a hkum daw chyen rai tim, hkye hkrang la ai chyeju hkam la lu na mahkrun hpe pat shingdang ya ai, tinang a wenyi asak hkrung lam hpe jahten ya lu ai, dingbai dingna jaw ai rai jang, kade hku hkau ai masha hpe rai tim, kanawn mazum ai lam jahkring kau ra ai hpe mung shadum ya ai. Masha chyu sha n rai, tinang hpe teng sha wenyi lam shadam ya ai arawng aya, ja gumhpraw, sutgan, makan bungli, hpa mi rai rai, tawk hprut dan di kau ra ai lam, Madu Yesu tsun shadum ai_ myi tum malawk kau u, lagaw lata dan di kabai kau u… nga ai.

Sawn sumru mai ai lam:

1. Makam masham n bung, hpung n bung ai ni hpe kaning re ai  myit masa hte kanawn mazum ga ta? Shanhte hta rawng ai  mai kaja ai lailen, htung tara ni hpe shakawn chye ga ai kun?

2. Yesu hpe adan asan rai kamsham hkap la ai ni n rai tim, kaja ai amu, dingman dinghpring ai amu, tsawra matsan dum ai amu ni galaw ma ai rai yang, shanhte ni Yesu hta gara hku dun noi, jung noi nga ma ta? 

3. Karai a hkye hkrang la ai chyeju masha amyu shagu, yawng e hkam la mai hkra, Karai e gara hku lam madun ya a ta?

2021:PRAN WAN LADAW LABAN (26) NA CHYUM LAIKA

PRAN WAN LADAW HTA LABAN 26

September 26, 2021

CHYUM MUNGGA DAW 1

Bu Hkawm 11:25-29

Ya hti na gaw, Buhkawm laika hta na rai nga ai.

(Mawshe gaw amyu masha ni a agyi salang sanit shi hte hpe jahpawng la nna, Shawa Ginsum a grup e tsap shangun wu ai.) Madu gaw sumwi hte yu wa nna, Mawshe hta rawng ai atsam marai hta na la nhtawm, agyi salang sanit shi a ntsa de mara ya wu ai. Dai atsam marai shanhte a ntsa de yu hkrat wa jang, myihtoi htoi ma ai; dai kaw nna myihtoi bai n htoi lu ma ai. Dai salang hpung hta lawm ai, Eldad hte Medad mying ai marai lahkawng gaw, jahpan hta lawm ti mung, Ginsum de n sa ai sha dap e nga nga ma ai. Dai salang yan a ntsa de mung dai atsam marai yu hkrat wa nna, shan gaw dap kata e myihtoi htoi ma ai. Shaloi shabrang langai mi gat sa nna, Eldad yan Medad gaw dap kata e myihtoi htoi nga ma ai, nga nna Mawshe hpe tsun dan wu ai. Dai rai nna, shabrang apart kaw nna Mawshe a hkringmang tai ai, Nun a kasha Yawshu gaw, Nye a Madu, Mawshe e, shan hpe jahkring kau u, ngu nna Mawshe hpe tsun wu ai. Mawshe chyawm gaw, Nye a matu nang manawn nga nni? Madu a amyu masha yawng hte gaw, myihtoi hkrai rai nga mu ga; Madu gaw shi a atsam marai hpe shanhte yawng a ntsa de mara jaw ya u ga law, ngu nna tsun wu ai.

Karai Kasang a Mungga rai nga ai.

CHYUM MUNGGA DAW 2

Yaku 5:1-6

Ya hti na gaw, Kasa Yaku shagun dat ai laika hta na rai nga ai.

Sut su ai ni e, ngai nanhte hpe tsun ai ga hpe madat mara la mu: Nanhte a ntsa e du magang ra ai tsinyam majaw, hkrap shabam nga mu. Nanhte a sutgan mahkra yat mat wa nna, nanhte a hpun nba hpe manut e sha kau manu ai. Nanhte a ja hte gumhpraw hta pyi, nhkan jung nga ai; dai nhkan mung nanhte a mara a lam sakse hkam ya ai hte, nanhte a hkum shan hpe sha kau na ra ai. Shing rai, hpang jahtum na nhtoi ni a matu, wan grung ai zawn re ai sutgan hpe nanhte mahkawng da manit dai. Yu mu, nanhte a yi hkauna ni hpe dan shagun nhtawm, bungli galaw ai ni a shabrai hpe nanhte hkalem sha kau manit dai; dai ni a shabrai gaw jahtau nga ai hpe mada la mu; mam dan ai ni a garu ai nsen mung, zawnawng zawwa up ai Madu a na hta e hkrang shang wa sai hpe dum chye mu. Nanhte gaw ga ntsa e n dut n dang ai hku lu sha nna, pyaw daw hkrai kadaw myit dai; sat ai shani du ni ti mung, dusat dumyeng zawn, nanhte a myit dik hkra lu sha manit dai. Ding hpring ai ni hpe mung nanhte daw dan nna sat kau manu ai; shanhte gaw nanhte hpe hkum shingdang lu sai n rai.

Karai Kasang a Mungga rai nga ai.

KABU GARA SHIGA

Marku 9:38-43, 45, 47-48

Ya hti na gaw, Marku a laika hta na Kabu Gara Shiga rai nga ai.

Sape Yawhan gaw Yesu hpe, Sara e, anhte kaw n hkan nang ai masha langai mi na a amying hte nat shaden kau ai hpe anhte mu hkrup saga ai, rai ti mung, anhte kaw n hkan nang ai majaw, shi hpe hkum kau ga ai, ngu nna tsun wu ai. Yesu mahtang, Shi hpe hkum hkum kau mu: nye a amying hte lamik kumla galaw ai wa gaw, nye a lam hpe n kaja ai hte shatan kau na n rai. Anhte a gumlau maga e n nga ai wa gaw, anhte a hpang maga nga ai wa rai nga ai.

Nanhte hpe ngai teng teng tsun made ai gaw: Hkristu kaw hkan nang ai sape ni rai nga myit dai, nga nna nanhte hpe ntsin htinggap mi jaw ai wa kadai mung, shi a shabrai hpe n lu la na n rai.

Lam mi gaw, Ndai kam sham nga ai ma kaji ni hta na langai mi hpe, myit kataw shangun ai wa kadai rai ti mung, shi a du hta htumrin kaba noi nna, nawng hta kabai bang kau na gaw, shi a matu grau nna mai nga ai, na a lata nang hpe mara galaw shangun yang gaw dai hpe kahtam di kau u: lata lahkawng hkum ai hte ngarai mung na n si n krip ai wan de shang na hta, lata hten ai hte asak hkrung ai de shang na gaw grau mai nga ai. Na a lagaw nang hpe mara galaw shangun yang gaw, dai hpe kahtam di kau u; lagaw lahkawng hkum nga ai hte, ngarai mung de jahkrat kau ai hkrum na hta, lagaw hten ai hte asak hkrung ai de shang na gaw, grau mai nga ai. Na a myi nang hpe mara galaw shangun yang gaw, dai hpe malawk kau u; myi lahkawng maga hkum ai hte, byet n si nna wan mung n si n krip ai, 48ngarai mung de jahkrat kau ai hkrum na hta, myi maga sha nga ai hte, Karai Kasang a mungdan de nang shang na gaw, grau mai nga ai.

Madu a Kabu Gara Shiga rai nga ai.

2021:PRAN WAN LADAW LABAN (25) NA MUNGGA

Tara hkan ai majaw, dinghpring ai asak hkrung lam a majaw hpa akyu ni hpe hkam la lu na rai ta? Dinghta ga masha ni a matu, gumhpraw lu jang, arawng aya lu jang hpa mung galaw lu ai, myit pyaw myit dik ai lam hpe lu la mai ai, ngu, sawn la ma ai. Dinghpring ai asak mahkrun lata la ai wa gaw makam masham hte tara matsun ni hpe hkan shatup ai hta, machyi hkrum, asum hkam ra ai lam ni law law byin chye ai; ja gumhpraw hte arawng aya hpe sha madung da ai wa a matu masu magaw ai mung galaw na re; n tara ai amu ni mung galaw na re_ ndai dinghta ga na lu su nga-mu nga mai na ahkyak grau ai. Ndai asak hkrung mahkrun lahkawng hta na nang/ngai gara hpe lata la na kun? Lata la na lam Chyum Mungga ni hku nna lam jasan ya ai.

 Hpaji Byeng-ya Laika hta tsun da ai lam ni, wudang ntsa e jen da hkrum ai Yesu hpe n tara ai masha ni, masu hkalem ai masha ni tsun ai: “Eliya shi hpe hkye la na kun, Karai Kasang shi hpe hkye la na kun, yu yu ga”, ngu ma ai. Kaja wa gaw Alexandra mare hte mungdan law law e chyam bra nga ai Karai Kasang hpe kamsham nna tara hkan ai Jew/Israel masha ni hpe maigan masha ni hte makam masham htak mat ai Jew/Israel masha ni e yu kaji nna roi jahkoi tsun jaw ai lam hpe ka da ai. Mungdan law law hta Greek amyu masha ni a htunghking laili laika, nga-sa lailen chyam bra nga ai aprat re; Karai a amyu masha ni law law mung Greek htung lailen hpe awng sharawng ai hte hkap la ai majaw, tinang a makam masham htung tara ni hpe nyet kau ma ai. Hpaji chye jang ram sai; ja gumhpraw hte arawng aya lu jang ram sai…dinghta ga e ngamu nga-mai lam hpe sha madung da mat wa ai majaw, makam masham hkan sa ai hpa akyu nga a ta? Zingri hkrum ai ni law law, nkau mi mung sat kau hkrum ma ai.

Shawng na Laban bat hta Yesu sharin ya ai lam_ hpung shingkang hkam la na matu, ndai dinghta prat hta nni nkri shawng hkam la ra ai, nga ai. N tara ai hku jeyang hkrum ai ni hpe jahtum e Karai Kasang hkye la ai lam sharin ya ai. Ndai Laban mungga hta Yesu sharin ya ai lam_ tinang nang a akyu amyat, ndai dinghta ga na nga-mu nga-mai ai lam hpe madung yaw shada nna Yesu a sape tai ai gaw shut ai lam sharin ya ai. Sape ni myit mada ai gaw ndai dinghta ga e padang ninglaw lu ai Messiah, arawng aya lu ai Du/ Hkawhkam. Dai majaw, Yesu shi nni nkri hkam la na lam, si hkam na lam tsun ai shaloi Petru gaw n madat kam ai. Yesu tsun ai nni nkri, si hkam na, bai hkrung rawt na, ngu ai lam hpe Sape ni n chye na ma ai; chye mung n kam chye na ma ai. Shan hte myit mada ai gaw shanhte a Sara, Yesu shi Du/Hkawhkam tai ai hte shanhte mung, arawng aya garan la nna kadai gaw gara magam dap a hkringmang tai lu na lam, hkrun lam ntsa e dangrang hkat ma ai.

 Du tai ai, arawng aya lu ai, ngu ai gaw masha ni hpe dawjau ai amu, tinang mahtang shanhte a mayam, yawng a mayam tai ai hta, dam lada dik ai hku dawjau lu ai lam re, ngu ai ningmu, Yesu gaw Sape ni hpe sharin ya ai. Dinghta ga na Du/Hkawhkam ni gaw masha ni hpe yam sha, reng hkang sha na sha myit ma ai. Yesu a Sape ni mahtang, Du/Hkawhkam tai ai, arawng aya lu ai, ngu ai gaw yawng a mayam, yawng hpe dawjau ai wa tai lu na lam tsun ai. Tinang hkum hpe shagrit shanyem nna yawng hpe dawjau lu ai wa gaw Karai a man e reng grau ai wa tai lu na, nga ai.

 Uhpung uhpawng hta kaji kadun ai ni, matsan dum garum ya ging ai ni, daw hten ai ni, gumgai dingla ni n kung ai ni, grau ra kadawn ai ni hpe yu gawn makawp maga madi shadaw ya lu na lam, Madu Yesu gaw ma kaji hta pawn nna, dai zawn gawng kya ai ni hpe hkap hkalum garum shingtau ai gaw Madu Shi hpe nan dawjau ai hte bung ai lam sharin ya ai. 

Sawn sumru mai ai lam:

1. Ma kaji ni hpe mada mara, lakawn ai myit rawng ga ai kun?  Shanhte tsun shapraw dan ai, ra sharawng ai lam ni hpe tau ya  chye ga ai kun?

2. Grau chye grau kung ai, arawng aya lama ma lu da ai rai yang,  yawng hpe dawjau ai wa tai ra ai, nga ai. Tinang nang a myit jasat  lailen hpe dinglik yu na.

3. Chyam dinglik hkrum ai aten ni hta, tara hpe n tawt lai hkra gara  hku shakut shaja lai wa sai lam, shada sakse hkam dan mai ai.

2021:PRAN WAN LADAW LABAN (25) NA CHYUM LAIKA

PRAN WAN LADAW HTA LABAN 25

September  19, 2021

CHYUM MUNGGA DAW 1

Hpaji Byeng-ya 2:12,17-20

Ya hti na gaw, Hpaji Byeng-ya laika hta na rai nga ai.

Tara n lang ai ni gaw, tinang a kraw lawang hta ning nga ma ai. Ding hpring ai wa gaw anhte hpe sharu shatsang ai hte, anhte a lam hpe ningdang kau ai majaw, shi hpe shinggrup nna htim ga. Anhte a tawt lai ai amu a majaw, shi anhte hpe daru shadum nna, ji woi ni a matsun maroi lam ni hpe n hkan shatup ai majaw, shi anhte a ntsa de mara shangun da nga ai. Ding hpring ai wa tsun ai ga tengman rai nga ai kun, naw yu yu ga; shi hta nan gara hku byin wa na hpe anhte la yu ga. kaning rai nme law, ding hpring ai wa gaw Karai Kasang a kasha rai yang gaw, dai Madu shi hpe maga nna, shi a hpyen ni a lata hta na shi hpe hkye mawai la na ra ai. Dai rai nna, shi hpe zingri nna, nni nkri jaw ai hku shi hpe chyam yu ga. Shingrai, shi a sumnung shingdi ai hte shakut sharang ai myit, gade wa galu kaba nga ai hpe anhte chye lu na ga ai. Dai ding hpring ai wa hpe kaya kahpa re ai hku anhte sat kau ga; kaning rai nme law, shi nan tsun sai hte maren, lam shagu hta e Karai Kasang shi hpe makawp maga la na ra ai, nga nna n hkru ai ni tinang a kraw hta e tsun nga ma ai.

Karai Kasang a Mungga rai nga ai.

CHYUM MUNGGA DAW 2

Yaku 3:16-4:3

Ya hti na gaw, kasa Yaku shagun dat ai laika hta na rai nga ai.

Hpu nau ni e, ladu lai ai hku manawn masham ai hte, arawng sadang ra marit ai lam nga yang, kashuk kashak hte, n hkru n kaja ai amu amyu myu byin pru nga ai. Ntsa de na hpaji byeng-ya chyawm gaw, shawng e san pra san seng rai nga ai; dai hpang e, htinglu htinglai ya chye ai, sumnung shingdi ai hte, manang wa a akyu hpe tam nga ai; matsan dum la ai myit rawng nga nna, mai kaja ai amu amyu myu hpe hkan galaw nga ai; dai gaw, myiman n lata ai hte hpyi hpun n chye ai hpaji byeng-ya rai nga ai. Ngwi pyaw simsa ai hpe shabyin ai ni gaw, sumnung shingdi ai nli gat hkai da nna, dai hta na ding hpring chyoi pra ai asi law law si pru na ra ai. Nanhte hta e ga li ga law ai hte, dangrang hkat ai lam ni kanang na pru wa ma ta? Nanhte a daw shan ni hta e gasat nga ai, marin marit ai hte maren, n lu la ai majaw, sat kau na jin jin rai nga myit dai. Nanhte hta manawn ai myit n shadik lu ai majaw, kashun la na matu, ga law ai hte gasat nga myit dai. Nanhte akyu n hpyi ai majaw, ra ai hte maren n lu la myit dai. Nanhte hpyi timung, nanhte a pyaw daw lam ni hpe grau nna hkan lu na matu, n htap n htuk ai hte n ang ai hpe hpyi nga ai majaw, n lu la myit dai. 

Karai Kasang a Mungga rai nga ai.

KABU GARA SHIGA

Marku 9:30-37

Ya hti na gaw, Marku a laika hta na Kabu Gara Shiga rai nga ai.

Yesu hte shi a sape ni dai bum de nna yu wa ai hpang, Galile mung hku lai sa wa ai; rai timung, shi a sape ni hpe sharin achyin ya nga ai majaw, shi lai sa wa ai hpe kadai mung n chye la u ga, shi ra nga ai. Yesu shi a sape ni hpe, Masha Kasha gaw masha ni a lata de ap kau ai hkrum nna, shanhte shi hpe sat kau na mara ai hte, sat kau ai hpang  masun ya nhtoi hta shi bai hkrung rawt na ra ai, ngu nna tsun dan mu ai. Shanhte mahtang dai ga hpe n chye na timung, shi hpe san na hkrit nga ma ai. Dai hpang shanhte Kaperna-um de du ma ai. Nta nhku de rawng nga yang, Yesu shanhte hpe, Nanhte lam hkan e, hpa lam tsun hkat nga myit ta? ngu nna san mu ai.

Sape ni mahtang atsin sha nga ma ai; kaning rai nme law, Grau kaba ai wa kadai mahtang rai kun? nga nna lam hkan e tsun hkat masai. Shaloi Yesu dung nna, sape shi lahkawng hte hpe shaga la nhtawm shanhte hpe, Grau mayu ai wa kadai rai ti mung, yawng a hpang na wa hte, yawng a ali ama tai wa na ra ai, ngu nna tsun mu ai. Bai, ma kaji langai mi hpe Shi shaga la nna, sape ni a ka-ang e shatsap tawn wu ai; dai ma hpe magra let Yesu shanhte hpe, Ndai zawn re ai ma kaji langai mi hpe, nye a amying majaw hkap la ai wa kadai mung, ngai hpe hkap la ai sha n rai, ngai hpe shangun dat ai wa hpe she hkap la ai rai nga ai.

Madu a Kabu Gara Shiga rai nga ai.

2021:PRAN WAN LADAW LABAN (24) NA MUNGGA

Yesu kadai re ai, ngu ai hpe chye la lu ai gaw kabu lu ai lam a ningpawt hte asak hka-hpawk rai nga ai. Rai tim, jahtum chyalai hkye hkrang la ai lam tup hkrak lu la mai ai gaw wudang hkrun lam rai nga ai. Shoi chyum ai lam yawng a shingdu e, jahtum chyalai jeyang ai Karai Kasang a tsawra myit, Shi e hkye la na lam hpe myit mada lu ai gaw kaba dik ai ninggun hte shalan shabran chyeju rai nga ai.

 Mungmasa party langai ngai tinang hpe saw shaga ai rai yang, dai party a yaw shada bandung hte myit mada ai lam hpa hpa re ai hkrak chye ra ai hta lai nna, party a ningbaw gaw kadai kaning re ai masha re ai hpe hkrak chye ra ai. Tinang a akyu amyat kade pru wa na myit mada nna member shang na n shang na dawdan ra ai. Party shang nna hpa lachyum n pru ai, tinang a akyu sum mat ai ni law law nga ma ai. Kaja dik ai, jaw dik ai party, ningbaw mung grai kaja ai majaw party shang ai rai tim, mara kata htawng rawng ra ai, zingri sat kau hkrum ai ni mung lak lak rai nga ai. Tinang hpe sa asawng ai masha wa hpe kam ging ai n kam ging ai hkrak chye ra ai.

Yesu hpe kadai gara hku mu mu, shawa masha ni gara hku shadu nna tsun tsun, Sape 12 gaw Yesu kadai re ai, shi hpa majaw Sape ni hpe saw shaga ai lam, Sape ni gaw hkum nan chye na hkap la nna sha Yesu a grin ai Sape ni tai lu na rai ma ai. Lam mi gaw ningbaw wa hta byin wa na gam maka hte Shi hkam la na arawng aya hpung shingkang hpe Sape ni mung hkam la ra na ma ai. Madu hte rau nni nkri hkam la nna sha hpung shingkang hkam la lu na rai ma ai.

Petru gaw Yesu hpe hkye la ai wa, Messiah re ai lam tsun shapraw ai majaw, Yesu mung, kaga Sape ni mung kabu ma ai. Chye la ai hte sha n ram ai. Shi Madu a hpang htep lahti hkan nang hkan galaw ra na ma ai. Yesu shi Messiah re ai lam hpe chye la ai hpang, kaning re ai ladat hku shinggyim masha hpe hkye la lu na lam tsun shapraw hpang ai_ nni nkri hte wudang hkrun lam rai nga ai. Shawa masha ni zawn sha, Messiah gaw zingri zingrat hkrum na, asawng asang roi rip hkrum na, si hkam ra na lam tsun shapraw ai hte rau, Petru na kajawng ai. Dai zawn re ai gam maka gaw Hkye La Madu hte n ging ai, arawng aya shingkang shingwang hte hpyen ni hpe adip arip padang dip la nna awng padang hkam la ai hku, amyu masha ni hpe hkye hkrang la na lam myit mada ra sharawng ai rai nga ai.

Shaloi Yesu gaw Petru hpe, “Satan e, ngai kaw na sit pru mat u” nga ai. Yesu hpe nat e hkalem ai, gunglau hpe dum mai ga ai: Satan gaw Yesu hpe tsun ai, “Nlung tawng hpe muk shatai nna sha u; ga de gumhtawn hkrat su, Lamu Kasa e hkap pawn la na; ngai hpe nawku jang mungkan sutgan arawng aya yawng jaw na…”. Yesu masha hkum shan sa dagraw la ai gaw mungkan masha yawng a malai gawng malai tai, nni nkri hkam nna si hkam ai hku, mungkan masha ni hpe hkye la na lam sing da ai maka gaw Kawa Karai myit ra ai lam rai nga ai.

Dai hpe chye na ai Yesu gaw hpyen ni a lata hta kade zingri hkrum tim, Isaiah a Laika na hte raw sha hkam la ai; Kawa Karai a tsawra myit hpe mung, Kawa e hkye la na lam hpe mung, Yesu gaw kamsham ai. Kawa e sing da ya ai maka hpe hkan lu na lam tsun ai. Anhte langai hpra, Karai e jaw da ai wudang lit n bung hkat ai; yawng gaw wudang hkrun lam hku nna chyu sha, hkye hkrang la hkrum na rai nga ai.

Machyi makaw hkrum ai aten hta, ruyak kyindut hkrum ai aten hta, masha ni a jahpoi asawng hkrum ai aten hta, n tara ai hku mara shagun hkrum ai aten hta, n tara ai hku jeyang hkrum ai aten hta, yawng e kau da hkrum ai aten hta, Ndai zawn re ai gam maka hkrum katut wa ai aten ni hta, Kawa Karai a tsawra myit hpe mung, Shi e hkye la na lam hpe mung, n shut n shai kam lu ai chyeju, ninggun atsam lu la mai ai lam, Yesu kaw nna sharin la lu ga ai.

Sawn sumru mai ai lam: 

(1) Koi yen n mai, n tara ai hku mara shagun hkrum, roi rip hkrum ai aten ni hta matai dawk ai hku tai htang chye ai kun? 

(2) Yesu madun dan ai kasi zawn, jahtum chyalai Kawa Karai a hkye la ai lam hpe madung kamhpa ga ai kun? Kasa Yaku tsun ai: Tatut hkan galaw ai hku nna tinang a makam masham lu ai lam sakse madun dan ra ai.

2021:PRAN WAN LADAW LABAN (24) NA CHYUM LAIKA

PRAN WAN LADAW HTA LABAN 24

September 12, 2021

CHYUM MUNGGA DAW 1

Esaia 50:5-9a

Ya hti na gaw, Esaia a laika hta na rai nga ai.

Madu gaw nye a na hpe hpaw ya ni ai. Ngai mahtang lale kau ai hte kanut mat wa ai n rai. Ngai gaw kayat ai ni hpe nye a shingma, shabyi mun baw ai ni hpe nye a shabyi ap ya nngai; asawng asang di ai ni hte, mayen mahtaw bun ai kaw na, nye a myiman hpe kayin kau ai n rai. Kaning rai nme law, Madu gaw ngai hpe garum na ra ai. Dai rai nna, asawng asang di ai lam ni gaw, ngai hpe myit n jahtum kau nga ai. Ngai kaya kahpa n hkrum lu na hpe ngai chye ai majaw, nye a myiman hpe nhpai lung zawn ngai shatai da nngai. Ngai mara n lu ai hpe madun dan lu ai wa gaw, nye a makau e nga ai. Dai rai nna, ngai hpe tang shawn mayu ai wa kadai rai timung, tara rung de sa nna tsun hkat ga. Ngai hpe mara shagun ai wa kadai rai ta? Dai wa gaw ngai hpe sa tsun ru ga. Yu u, Madu Karai Kasang ngai hpe garum na ra ai; ngai hpe daw dan na kadai gwi nga a ta?

Karai Kasang a Mungga rai nga ai.

CHYUM MUNGGA DAW 2

Yaku 2:14-18

Ya hti na gaw, Kasa Yaku shagun dat ai laika hta na rai nga ai.

Nye a hpu nau ni e, Marai langai ngai, Ngai gaw kam sham nga nngai, nga nna tsun timung, mai kaja ai amu bungli n galaw yang gaw, hpa akyu nga a ta? Makam masham gaw dai wa hpe hkye hkrang la lu a ni?  Hpu nau langai ngai, shing n rai, kajan langai ngai, hpun palawng atsawmsha n lu hpun ai hte, asak bau na shahpa n lu yang gaw, nanhte hta na masha langai mi gaw, Ngwi pyaw ai hte wa masit; lum nga mu, hkru hkra sha mu, ngu nna dai yan hpe tsun ti mung, hkum hte asak a matu ra nga ai hte maren, n jaw dat yang gaw, hpa akyu nga na a ta? Dai hte maren, Makam masham hta mai kaja ai amu bungli n lawm yang gaw chyasi rai nga ai. Dai zawn re ai hpu wa hpe ndai hku tsun na ra ai; Ngai gaw kam sham nga nngai; nang mahtang mai kaja ai amu bungli galaw nga ndai, nga nna nang tsun nit dai. Ya, mai kaja ai amu bungli langai mi pyi n galaw ai, na a makam masham ngai hpe madun dan rit; shaloi, ngai galaw ai mai kaja ai amu ni nang hpe madun dan ai hte, nye a kam sham ai lam madun na de ai.

Karai Kasang a Mungga rai nga ai.

KABU GARA SHIGA

Marku 8:27-35

Ya hti na gaw, Marku a laika hta na Kabu Gara Shiga rai nga ai.

Yesu hte shi a sape ni gaw, Kesare Hpilipi a grup yin na kahtawng ni hpe kawan na matu rawt sa wa ma ai. Shanhte hkawm sa wa nga yang, Yesu shi a sape ni hpe, masha ni, ngai hpe kadai wa re ai shadu nga ma ta? ngu nna san mu ai. Sape ni htan let, masha nkau mi gaw, Yawhan Baptista re ai; kaga hte gaw, Elia re ai; bai kaga hte gaw, myihtoi ni hta na langai mi rai nga ai, nga nna tsun ma ai, ngu nna shi hpe tsun dan mu ai. Bai Yesu shanhte hpe, nanhte mahtang ngai hpe kadai wa re ai, shadu nga myit ta? ngu nna san mu ai. Petru htan let, nang gaw Hkristu ngu ai Karai Kasang a Chyoi pra ai Wa rai nga ndai, ngu nna shi hpe tsun wu ai. Shaloi Yesu gaw, shi a lam kadai hpe mung n tsun dan u ga, shanhte hpe ginhtim da mu ai. Dai aten kaw nna, Masha Kasha gaw nni nkri law law wa hkrum nna, du salang ni, hkyingjawng agyi ni hte tara sara ni e nyet kau ai hkrum na hte, sat kau ai hkrum nhtawm, masum ya nhtoi hpang e bai hkrung rawt wa na lam, shi shanhte hpe sharin achyin hpang mu ai. 32Petru gaw, shi hpe woi la nna daru shadum wu ai. Yesu mahtang kayin wa ai hte, shi a sape ni hpe mada yu let, Petru hpe, Satan e, nye a hpang de sit mat wa u; Karai Kasang a lam hku n rai, masha a lam hku sha nang myit nga ndai, ngu nna daru kau wu ai. Bai shawa masha ni hte shi a sape ni hpe Yesu shaga la nna shanhte hpe tsun mu ai gaw; ngai hpang de hkan sa mayu ai wa kadai rai timung, tinang hkum hpe n dang kau nna, shi a wudang hpai let, ngai kaw hkan nang ru ga. Tinang asak hpe hkye la mayu ai wa kadai mung, asak sum na ra ai; nye a matu hte kabu gara shiga a majaw, asak sum ai wa chyawm gaw, dai hpe hkye la lu na wu ai.

Madu a Kabu Gara shiga rai nga ai.