2021:PRAN WAN LADAW LABAN (26) NA CHYUM LAIKA

PRAN WAN LADAW HTA LABAN 26

September 26, 2021

CHYUM MUNGGA DAW 1

Bu Hkawm 11:25-29

Ya hti na gaw, Buhkawm laika hta na rai nga ai.

(Mawshe gaw amyu masha ni a agyi salang sanit shi hte hpe jahpawng la nna, Shawa Ginsum a grup e tsap shangun wu ai.) Madu gaw sumwi hte yu wa nna, Mawshe hta rawng ai atsam marai hta na la nhtawm, agyi salang sanit shi a ntsa de mara ya wu ai. Dai atsam marai shanhte a ntsa de yu hkrat wa jang, myihtoi htoi ma ai; dai kaw nna myihtoi bai n htoi lu ma ai. Dai salang hpung hta lawm ai, Eldad hte Medad mying ai marai lahkawng gaw, jahpan hta lawm ti mung, Ginsum de n sa ai sha dap e nga nga ma ai. Dai salang yan a ntsa de mung dai atsam marai yu hkrat wa nna, shan gaw dap kata e myihtoi htoi ma ai. Shaloi shabrang langai mi gat sa nna, Eldad yan Medad gaw dap kata e myihtoi htoi nga ma ai, nga nna Mawshe hpe tsun dan wu ai. Dai rai nna, shabrang apart kaw nna Mawshe a hkringmang tai ai, Nun a kasha Yawshu gaw, Nye a Madu, Mawshe e, shan hpe jahkring kau u, ngu nna Mawshe hpe tsun wu ai. Mawshe chyawm gaw, Nye a matu nang manawn nga nni? Madu a amyu masha yawng hte gaw, myihtoi hkrai rai nga mu ga; Madu gaw shi a atsam marai hpe shanhte yawng a ntsa de mara jaw ya u ga law, ngu nna tsun wu ai.

Karai Kasang a Mungga rai nga ai.

CHYUM MUNGGA DAW 2

Yaku 5:1-6

Ya hti na gaw, Kasa Yaku shagun dat ai laika hta na rai nga ai.

Sut su ai ni e, ngai nanhte hpe tsun ai ga hpe madat mara la mu: Nanhte a ntsa e du magang ra ai tsinyam majaw, hkrap shabam nga mu. Nanhte a sutgan mahkra yat mat wa nna, nanhte a hpun nba hpe manut e sha kau manu ai. Nanhte a ja hte gumhpraw hta pyi, nhkan jung nga ai; dai nhkan mung nanhte a mara a lam sakse hkam ya ai hte, nanhte a hkum shan hpe sha kau na ra ai. Shing rai, hpang jahtum na nhtoi ni a matu, wan grung ai zawn re ai sutgan hpe nanhte mahkawng da manit dai. Yu mu, nanhte a yi hkauna ni hpe dan shagun nhtawm, bungli galaw ai ni a shabrai hpe nanhte hkalem sha kau manit dai; dai ni a shabrai gaw jahtau nga ai hpe mada la mu; mam dan ai ni a garu ai nsen mung, zawnawng zawwa up ai Madu a na hta e hkrang shang wa sai hpe dum chye mu. Nanhte gaw ga ntsa e n dut n dang ai hku lu sha nna, pyaw daw hkrai kadaw myit dai; sat ai shani du ni ti mung, dusat dumyeng zawn, nanhte a myit dik hkra lu sha manit dai. Ding hpring ai ni hpe mung nanhte daw dan nna sat kau manu ai; shanhte gaw nanhte hpe hkum shingdang lu sai n rai.

Karai Kasang a Mungga rai nga ai.

KABU GARA SHIGA

Marku 9:38-43, 45, 47-48

Ya hti na gaw, Marku a laika hta na Kabu Gara Shiga rai nga ai.

Sape Yawhan gaw Yesu hpe, Sara e, anhte kaw n hkan nang ai masha langai mi na a amying hte nat shaden kau ai hpe anhte mu hkrup saga ai, rai ti mung, anhte kaw n hkan nang ai majaw, shi hpe hkum kau ga ai, ngu nna tsun wu ai. Yesu mahtang, Shi hpe hkum hkum kau mu: nye a amying hte lamik kumla galaw ai wa gaw, nye a lam hpe n kaja ai hte shatan kau na n rai. Anhte a gumlau maga e n nga ai wa gaw, anhte a hpang maga nga ai wa rai nga ai.

Nanhte hpe ngai teng teng tsun made ai gaw: Hkristu kaw hkan nang ai sape ni rai nga myit dai, nga nna nanhte hpe ntsin htinggap mi jaw ai wa kadai mung, shi a shabrai hpe n lu la na n rai.

Lam mi gaw, Ndai kam sham nga ai ma kaji ni hta na langai mi hpe, myit kataw shangun ai wa kadai rai ti mung, shi a du hta htumrin kaba noi nna, nawng hta kabai bang kau na gaw, shi a matu grau nna mai nga ai, na a lata nang hpe mara galaw shangun yang gaw dai hpe kahtam di kau u: lata lahkawng hkum ai hte ngarai mung na n si n krip ai wan de shang na hta, lata hten ai hte asak hkrung ai de shang na gaw grau mai nga ai. Na a lagaw nang hpe mara galaw shangun yang gaw, dai hpe kahtam di kau u; lagaw lahkawng hkum nga ai hte, ngarai mung de jahkrat kau ai hkrum na hta, lagaw hten ai hte asak hkrung ai de shang na gaw, grau mai nga ai. Na a myi nang hpe mara galaw shangun yang gaw, dai hpe malawk kau u; myi lahkawng maga hkum ai hte, byet n si nna wan mung n si n krip ai, 48ngarai mung de jahkrat kau ai hkrum na hta, myi maga sha nga ai hte, Karai Kasang a mungdan de nang shang na gaw, grau mai nga ai.

Madu a Kabu Gara Shiga rai nga ai.

2021:PRAN WAN LADAW LABAN (25) NA MUNGGA

Tara hkan ai majaw, dinghpring ai asak hkrung lam a majaw hpa akyu ni hpe hkam la lu na rai ta? Dinghta ga masha ni a matu, gumhpraw lu jang, arawng aya lu jang hpa mung galaw lu ai, myit pyaw myit dik ai lam hpe lu la mai ai, ngu, sawn la ma ai. Dinghpring ai asak mahkrun lata la ai wa gaw makam masham hte tara matsun ni hpe hkan shatup ai hta, machyi hkrum, asum hkam ra ai lam ni law law byin chye ai; ja gumhpraw hte arawng aya hpe sha madung da ai wa a matu masu magaw ai mung galaw na re; n tara ai amu ni mung galaw na re_ ndai dinghta ga na lu su nga-mu nga mai na ahkyak grau ai. Ndai asak hkrung mahkrun lahkawng hta na nang/ngai gara hpe lata la na kun? Lata la na lam Chyum Mungga ni hku nna lam jasan ya ai.

 Hpaji Byeng-ya Laika hta tsun da ai lam ni, wudang ntsa e jen da hkrum ai Yesu hpe n tara ai masha ni, masu hkalem ai masha ni tsun ai: “Eliya shi hpe hkye la na kun, Karai Kasang shi hpe hkye la na kun, yu yu ga”, ngu ma ai. Kaja wa gaw Alexandra mare hte mungdan law law e chyam bra nga ai Karai Kasang hpe kamsham nna tara hkan ai Jew/Israel masha ni hpe maigan masha ni hte makam masham htak mat ai Jew/Israel masha ni e yu kaji nna roi jahkoi tsun jaw ai lam hpe ka da ai. Mungdan law law hta Greek amyu masha ni a htunghking laili laika, nga-sa lailen chyam bra nga ai aprat re; Karai a amyu masha ni law law mung Greek htung lailen hpe awng sharawng ai hte hkap la ai majaw, tinang a makam masham htung tara ni hpe nyet kau ma ai. Hpaji chye jang ram sai; ja gumhpraw hte arawng aya lu jang ram sai…dinghta ga e ngamu nga-mai lam hpe sha madung da mat wa ai majaw, makam masham hkan sa ai hpa akyu nga a ta? Zingri hkrum ai ni law law, nkau mi mung sat kau hkrum ma ai.

Shawng na Laban bat hta Yesu sharin ya ai lam_ hpung shingkang hkam la na matu, ndai dinghta prat hta nni nkri shawng hkam la ra ai, nga ai. N tara ai hku jeyang hkrum ai ni hpe jahtum e Karai Kasang hkye la ai lam sharin ya ai. Ndai Laban mungga hta Yesu sharin ya ai lam_ tinang nang a akyu amyat, ndai dinghta ga na nga-mu nga-mai ai lam hpe madung yaw shada nna Yesu a sape tai ai gaw shut ai lam sharin ya ai. Sape ni myit mada ai gaw ndai dinghta ga e padang ninglaw lu ai Messiah, arawng aya lu ai Du/ Hkawhkam. Dai majaw, Yesu shi nni nkri hkam la na lam, si hkam na lam tsun ai shaloi Petru gaw n madat kam ai. Yesu tsun ai nni nkri, si hkam na, bai hkrung rawt na, ngu ai lam hpe Sape ni n chye na ma ai; chye mung n kam chye na ma ai. Shan hte myit mada ai gaw shanhte a Sara, Yesu shi Du/Hkawhkam tai ai hte shanhte mung, arawng aya garan la nna kadai gaw gara magam dap a hkringmang tai lu na lam, hkrun lam ntsa e dangrang hkat ma ai.

 Du tai ai, arawng aya lu ai, ngu ai gaw masha ni hpe dawjau ai amu, tinang mahtang shanhte a mayam, yawng a mayam tai ai hta, dam lada dik ai hku dawjau lu ai lam re, ngu ai ningmu, Yesu gaw Sape ni hpe sharin ya ai. Dinghta ga na Du/Hkawhkam ni gaw masha ni hpe yam sha, reng hkang sha na sha myit ma ai. Yesu a Sape ni mahtang, Du/Hkawhkam tai ai, arawng aya lu ai, ngu ai gaw yawng a mayam, yawng hpe dawjau ai wa tai lu na lam tsun ai. Tinang hkum hpe shagrit shanyem nna yawng hpe dawjau lu ai wa gaw Karai a man e reng grau ai wa tai lu na, nga ai.

 Uhpung uhpawng hta kaji kadun ai ni, matsan dum garum ya ging ai ni, daw hten ai ni, gumgai dingla ni n kung ai ni, grau ra kadawn ai ni hpe yu gawn makawp maga madi shadaw ya lu na lam, Madu Yesu gaw ma kaji hta pawn nna, dai zawn gawng kya ai ni hpe hkap hkalum garum shingtau ai gaw Madu Shi hpe nan dawjau ai hte bung ai lam sharin ya ai. 

Sawn sumru mai ai lam:

1. Ma kaji ni hpe mada mara, lakawn ai myit rawng ga ai kun?  Shanhte tsun shapraw dan ai, ra sharawng ai lam ni hpe tau ya  chye ga ai kun?

2. Grau chye grau kung ai, arawng aya lama ma lu da ai rai yang,  yawng hpe dawjau ai wa tai ra ai, nga ai. Tinang nang a myit jasat  lailen hpe dinglik yu na.

3. Chyam dinglik hkrum ai aten ni hta, tara hpe n tawt lai hkra gara  hku shakut shaja lai wa sai lam, shada sakse hkam dan mai ai.

2021:PRAN WAN LADAW LABAN (25) NA CHYUM LAIKA

PRAN WAN LADAW HTA LABAN 25

September  19, 2021

CHYUM MUNGGA DAW 1

Hpaji Byeng-ya 2:12,17-20

Ya hti na gaw, Hpaji Byeng-ya laika hta na rai nga ai.

Tara n lang ai ni gaw, tinang a kraw lawang hta ning nga ma ai. Ding hpring ai wa gaw anhte hpe sharu shatsang ai hte, anhte a lam hpe ningdang kau ai majaw, shi hpe shinggrup nna htim ga. Anhte a tawt lai ai amu a majaw, shi anhte hpe daru shadum nna, ji woi ni a matsun maroi lam ni hpe n hkan shatup ai majaw, shi anhte a ntsa de mara shangun da nga ai. Ding hpring ai wa tsun ai ga tengman rai nga ai kun, naw yu yu ga; shi hta nan gara hku byin wa na hpe anhte la yu ga. kaning rai nme law, ding hpring ai wa gaw Karai Kasang a kasha rai yang gaw, dai Madu shi hpe maga nna, shi a hpyen ni a lata hta na shi hpe hkye mawai la na ra ai. Dai rai nna, shi hpe zingri nna, nni nkri jaw ai hku shi hpe chyam yu ga. Shingrai, shi a sumnung shingdi ai hte shakut sharang ai myit, gade wa galu kaba nga ai hpe anhte chye lu na ga ai. Dai ding hpring ai wa hpe kaya kahpa re ai hku anhte sat kau ga; kaning rai nme law, shi nan tsun sai hte maren, lam shagu hta e Karai Kasang shi hpe makawp maga la na ra ai, nga nna n hkru ai ni tinang a kraw hta e tsun nga ma ai.

Karai Kasang a Mungga rai nga ai.

CHYUM MUNGGA DAW 2

Yaku 3:16-4:3

Ya hti na gaw, kasa Yaku shagun dat ai laika hta na rai nga ai.

Hpu nau ni e, ladu lai ai hku manawn masham ai hte, arawng sadang ra marit ai lam nga yang, kashuk kashak hte, n hkru n kaja ai amu amyu myu byin pru nga ai. Ntsa de na hpaji byeng-ya chyawm gaw, shawng e san pra san seng rai nga ai; dai hpang e, htinglu htinglai ya chye ai, sumnung shingdi ai hte, manang wa a akyu hpe tam nga ai; matsan dum la ai myit rawng nga nna, mai kaja ai amu amyu myu hpe hkan galaw nga ai; dai gaw, myiman n lata ai hte hpyi hpun n chye ai hpaji byeng-ya rai nga ai. Ngwi pyaw simsa ai hpe shabyin ai ni gaw, sumnung shingdi ai nli gat hkai da nna, dai hta na ding hpring chyoi pra ai asi law law si pru na ra ai. Nanhte hta e ga li ga law ai hte, dangrang hkat ai lam ni kanang na pru wa ma ta? Nanhte a daw shan ni hta e gasat nga ai, marin marit ai hte maren, n lu la ai majaw, sat kau na jin jin rai nga myit dai. Nanhte hta manawn ai myit n shadik lu ai majaw, kashun la na matu, ga law ai hte gasat nga myit dai. Nanhte akyu n hpyi ai majaw, ra ai hte maren n lu la myit dai. Nanhte hpyi timung, nanhte a pyaw daw lam ni hpe grau nna hkan lu na matu, n htap n htuk ai hte n ang ai hpe hpyi nga ai majaw, n lu la myit dai. 

Karai Kasang a Mungga rai nga ai.

KABU GARA SHIGA

Marku 9:30-37

Ya hti na gaw, Marku a laika hta na Kabu Gara Shiga rai nga ai.

Yesu hte shi a sape ni dai bum de nna yu wa ai hpang, Galile mung hku lai sa wa ai; rai timung, shi a sape ni hpe sharin achyin ya nga ai majaw, shi lai sa wa ai hpe kadai mung n chye la u ga, shi ra nga ai. Yesu shi a sape ni hpe, Masha Kasha gaw masha ni a lata de ap kau ai hkrum nna, shanhte shi hpe sat kau na mara ai hte, sat kau ai hpang  masun ya nhtoi hta shi bai hkrung rawt na ra ai, ngu nna tsun dan mu ai. Shanhte mahtang dai ga hpe n chye na timung, shi hpe san na hkrit nga ma ai. Dai hpang shanhte Kaperna-um de du ma ai. Nta nhku de rawng nga yang, Yesu shanhte hpe, Nanhte lam hkan e, hpa lam tsun hkat nga myit ta? ngu nna san mu ai.

Sape ni mahtang atsin sha nga ma ai; kaning rai nme law, Grau kaba ai wa kadai mahtang rai kun? nga nna lam hkan e tsun hkat masai. Shaloi Yesu dung nna, sape shi lahkawng hte hpe shaga la nhtawm shanhte hpe, Grau mayu ai wa kadai rai ti mung, yawng a hpang na wa hte, yawng a ali ama tai wa na ra ai, ngu nna tsun mu ai. Bai, ma kaji langai mi hpe Shi shaga la nna, sape ni a ka-ang e shatsap tawn wu ai; dai ma hpe magra let Yesu shanhte hpe, Ndai zawn re ai ma kaji langai mi hpe, nye a amying majaw hkap la ai wa kadai mung, ngai hpe hkap la ai sha n rai, ngai hpe shangun dat ai wa hpe she hkap la ai rai nga ai.

Madu a Kabu Gara Shiga rai nga ai.

2021:PRAN WAN LADAW LABAN (24) NA MUNGGA

Yesu kadai re ai, ngu ai hpe chye la lu ai gaw kabu lu ai lam a ningpawt hte asak hka-hpawk rai nga ai. Rai tim, jahtum chyalai hkye hkrang la ai lam tup hkrak lu la mai ai gaw wudang hkrun lam rai nga ai. Shoi chyum ai lam yawng a shingdu e, jahtum chyalai jeyang ai Karai Kasang a tsawra myit, Shi e hkye la na lam hpe myit mada lu ai gaw kaba dik ai ninggun hte shalan shabran chyeju rai nga ai.

 Mungmasa party langai ngai tinang hpe saw shaga ai rai yang, dai party a yaw shada bandung hte myit mada ai lam hpa hpa re ai hkrak chye ra ai hta lai nna, party a ningbaw gaw kadai kaning re ai masha re ai hpe hkrak chye ra ai. Tinang a akyu amyat kade pru wa na myit mada nna member shang na n shang na dawdan ra ai. Party shang nna hpa lachyum n pru ai, tinang a akyu sum mat ai ni law law nga ma ai. Kaja dik ai, jaw dik ai party, ningbaw mung grai kaja ai majaw party shang ai rai tim, mara kata htawng rawng ra ai, zingri sat kau hkrum ai ni mung lak lak rai nga ai. Tinang hpe sa asawng ai masha wa hpe kam ging ai n kam ging ai hkrak chye ra ai.

Yesu hpe kadai gara hku mu mu, shawa masha ni gara hku shadu nna tsun tsun, Sape 12 gaw Yesu kadai re ai, shi hpa majaw Sape ni hpe saw shaga ai lam, Sape ni gaw hkum nan chye na hkap la nna sha Yesu a grin ai Sape ni tai lu na rai ma ai. Lam mi gaw ningbaw wa hta byin wa na gam maka hte Shi hkam la na arawng aya hpung shingkang hpe Sape ni mung hkam la ra na ma ai. Madu hte rau nni nkri hkam la nna sha hpung shingkang hkam la lu na rai ma ai.

Petru gaw Yesu hpe hkye la ai wa, Messiah re ai lam tsun shapraw ai majaw, Yesu mung, kaga Sape ni mung kabu ma ai. Chye la ai hte sha n ram ai. Shi Madu a hpang htep lahti hkan nang hkan galaw ra na ma ai. Yesu shi Messiah re ai lam hpe chye la ai hpang, kaning re ai ladat hku shinggyim masha hpe hkye la lu na lam tsun shapraw hpang ai_ nni nkri hte wudang hkrun lam rai nga ai. Shawa masha ni zawn sha, Messiah gaw zingri zingrat hkrum na, asawng asang roi rip hkrum na, si hkam ra na lam tsun shapraw ai hte rau, Petru na kajawng ai. Dai zawn re ai gam maka gaw Hkye La Madu hte n ging ai, arawng aya shingkang shingwang hte hpyen ni hpe adip arip padang dip la nna awng padang hkam la ai hku, amyu masha ni hpe hkye hkrang la na lam myit mada ra sharawng ai rai nga ai.

Shaloi Yesu gaw Petru hpe, “Satan e, ngai kaw na sit pru mat u” nga ai. Yesu hpe nat e hkalem ai, gunglau hpe dum mai ga ai: Satan gaw Yesu hpe tsun ai, “Nlung tawng hpe muk shatai nna sha u; ga de gumhtawn hkrat su, Lamu Kasa e hkap pawn la na; ngai hpe nawku jang mungkan sutgan arawng aya yawng jaw na…”. Yesu masha hkum shan sa dagraw la ai gaw mungkan masha yawng a malai gawng malai tai, nni nkri hkam nna si hkam ai hku, mungkan masha ni hpe hkye la na lam sing da ai maka gaw Kawa Karai myit ra ai lam rai nga ai.

Dai hpe chye na ai Yesu gaw hpyen ni a lata hta kade zingri hkrum tim, Isaiah a Laika na hte raw sha hkam la ai; Kawa Karai a tsawra myit hpe mung, Kawa e hkye la na lam hpe mung, Yesu gaw kamsham ai. Kawa e sing da ya ai maka hpe hkan lu na lam tsun ai. Anhte langai hpra, Karai e jaw da ai wudang lit n bung hkat ai; yawng gaw wudang hkrun lam hku nna chyu sha, hkye hkrang la hkrum na rai nga ai.

Machyi makaw hkrum ai aten hta, ruyak kyindut hkrum ai aten hta, masha ni a jahpoi asawng hkrum ai aten hta, n tara ai hku mara shagun hkrum ai aten hta, n tara ai hku jeyang hkrum ai aten hta, yawng e kau da hkrum ai aten hta, Ndai zawn re ai gam maka hkrum katut wa ai aten ni hta, Kawa Karai a tsawra myit hpe mung, Shi e hkye la na lam hpe mung, n shut n shai kam lu ai chyeju, ninggun atsam lu la mai ai lam, Yesu kaw nna sharin la lu ga ai.

Sawn sumru mai ai lam: 

(1) Koi yen n mai, n tara ai hku mara shagun hkrum, roi rip hkrum ai aten ni hta matai dawk ai hku tai htang chye ai kun? 

(2) Yesu madun dan ai kasi zawn, jahtum chyalai Kawa Karai a hkye la ai lam hpe madung kamhpa ga ai kun? Kasa Yaku tsun ai: Tatut hkan galaw ai hku nna tinang a makam masham lu ai lam sakse madun dan ra ai.

2021:PRAN WAN LADAW LABAN (24) NA CHYUM LAIKA

PRAN WAN LADAW HTA LABAN 24

September 12, 2021

CHYUM MUNGGA DAW 1

Esaia 50:5-9a

Ya hti na gaw, Esaia a laika hta na rai nga ai.

Madu gaw nye a na hpe hpaw ya ni ai. Ngai mahtang lale kau ai hte kanut mat wa ai n rai. Ngai gaw kayat ai ni hpe nye a shingma, shabyi mun baw ai ni hpe nye a shabyi ap ya nngai; asawng asang di ai ni hte, mayen mahtaw bun ai kaw na, nye a myiman hpe kayin kau ai n rai. Kaning rai nme law, Madu gaw ngai hpe garum na ra ai. Dai rai nna, asawng asang di ai lam ni gaw, ngai hpe myit n jahtum kau nga ai. Ngai kaya kahpa n hkrum lu na hpe ngai chye ai majaw, nye a myiman hpe nhpai lung zawn ngai shatai da nngai. Ngai mara n lu ai hpe madun dan lu ai wa gaw, nye a makau e nga ai. Dai rai nna, ngai hpe tang shawn mayu ai wa kadai rai timung, tara rung de sa nna tsun hkat ga. Ngai hpe mara shagun ai wa kadai rai ta? Dai wa gaw ngai hpe sa tsun ru ga. Yu u, Madu Karai Kasang ngai hpe garum na ra ai; ngai hpe daw dan na kadai gwi nga a ta?

Karai Kasang a Mungga rai nga ai.

CHYUM MUNGGA DAW 2

Yaku 2:14-18

Ya hti na gaw, Kasa Yaku shagun dat ai laika hta na rai nga ai.

Nye a hpu nau ni e, Marai langai ngai, Ngai gaw kam sham nga nngai, nga nna tsun timung, mai kaja ai amu bungli n galaw yang gaw, hpa akyu nga a ta? Makam masham gaw dai wa hpe hkye hkrang la lu a ni?  Hpu nau langai ngai, shing n rai, kajan langai ngai, hpun palawng atsawmsha n lu hpun ai hte, asak bau na shahpa n lu yang gaw, nanhte hta na masha langai mi gaw, Ngwi pyaw ai hte wa masit; lum nga mu, hkru hkra sha mu, ngu nna dai yan hpe tsun ti mung, hkum hte asak a matu ra nga ai hte maren, n jaw dat yang gaw, hpa akyu nga na a ta? Dai hte maren, Makam masham hta mai kaja ai amu bungli n lawm yang gaw chyasi rai nga ai. Dai zawn re ai hpu wa hpe ndai hku tsun na ra ai; Ngai gaw kam sham nga nngai; nang mahtang mai kaja ai amu bungli galaw nga ndai, nga nna nang tsun nit dai. Ya, mai kaja ai amu bungli langai mi pyi n galaw ai, na a makam masham ngai hpe madun dan rit; shaloi, ngai galaw ai mai kaja ai amu ni nang hpe madun dan ai hte, nye a kam sham ai lam madun na de ai.

Karai Kasang a Mungga rai nga ai.

KABU GARA SHIGA

Marku 8:27-35

Ya hti na gaw, Marku a laika hta na Kabu Gara Shiga rai nga ai.

Yesu hte shi a sape ni gaw, Kesare Hpilipi a grup yin na kahtawng ni hpe kawan na matu rawt sa wa ma ai. Shanhte hkawm sa wa nga yang, Yesu shi a sape ni hpe, masha ni, ngai hpe kadai wa re ai shadu nga ma ta? ngu nna san mu ai. Sape ni htan let, masha nkau mi gaw, Yawhan Baptista re ai; kaga hte gaw, Elia re ai; bai kaga hte gaw, myihtoi ni hta na langai mi rai nga ai, nga nna tsun ma ai, ngu nna shi hpe tsun dan mu ai. Bai Yesu shanhte hpe, nanhte mahtang ngai hpe kadai wa re ai, shadu nga myit ta? ngu nna san mu ai. Petru htan let, nang gaw Hkristu ngu ai Karai Kasang a Chyoi pra ai Wa rai nga ndai, ngu nna shi hpe tsun wu ai. Shaloi Yesu gaw, shi a lam kadai hpe mung n tsun dan u ga, shanhte hpe ginhtim da mu ai. Dai aten kaw nna, Masha Kasha gaw nni nkri law law wa hkrum nna, du salang ni, hkyingjawng agyi ni hte tara sara ni e nyet kau ai hkrum na hte, sat kau ai hkrum nhtawm, masum ya nhtoi hpang e bai hkrung rawt wa na lam, shi shanhte hpe sharin achyin hpang mu ai. 32Petru gaw, shi hpe woi la nna daru shadum wu ai. Yesu mahtang kayin wa ai hte, shi a sape ni hpe mada yu let, Petru hpe, Satan e, nye a hpang de sit mat wa u; Karai Kasang a lam hku n rai, masha a lam hku sha nang myit nga ndai, ngu nna daru kau wu ai. Bai shawa masha ni hte shi a sape ni hpe Yesu shaga la nna shanhte hpe tsun mu ai gaw; ngai hpang de hkan sa mayu ai wa kadai rai timung, tinang hkum hpe n dang kau nna, shi a wudang hpai let, ngai kaw hkan nang ru ga. Tinang asak hpe hkye la mayu ai wa kadai mung, asak sum na ra ai; nye a matu hte kabu gara shiga a majaw, asak sum ai wa chyawm gaw, dai hpe hkye la lu na wu ai.

Madu a Kabu Gara shiga rai nga ai.

2021:PRAN WAN LADAW LABAN (23) NA MUNGGA

Karai Kasang gaw kaji kadun ai ni, dip sha roi sha hkrum ai ni a maga tsap ai; masha yawng hpe hkye la mayu ai. Myihtoi ni a prat hta, Yesu du sa ai aten hta, ndai prat hte htawm na prat hta Karai Kasang gaw galoi mung hkye hkrang la ai Wa rai nga ai.

N tara ai hte hpring chyat nga ai mungkan ga, shada roi rip dang sha hkat nga ai mungkan ga, kawsi hpang gara, machyi makaw hte matsan mayan re ai masha ni law la ai ndai dinghta ga ntsa, Karai a hkye hkrang la ai amu hpe gara hku hkai dan na rai ta? Karai a hkye hkrang la ai amu hpe gaw mu lu ga ai kun? Tinang hkum nan Karai a hkye hkrang la ai chyeju ni hpe gaw hkam sha dum nga ai kun? Ndai zawn re ga-san ni law law pru wa na re.

Maigan amyu masha ni a roi rip dang sha ai hpe kahtap kahtap rai nna hkrum sha ai Karai a amyu masha ni, grau nna mungdan shamat kau ai hpang Babylon e bawng masha tai nna myit daw myit htum nga ai Israel masha ni a matu, Isaiah a mungga gaw teng sha shalan shabran ga, lawt lu na lam a myit mada shara tai wa ai.

Kaja wa mung, labau hta dai bawng dung ai amyu masha ni, gasat nna gumlan na n rai; mau-hpa mabyin hku shanhte gaw tinang a buga de apyaw sha rai bai htang wa lu ma ai. Kaga myihtoi ni tsun da ai Karai a ga-sadi ni mung labau hta dik wa ai hkrai re.

Jahtum chyalai, Yesu du sa ai aten hta Karai a hkye hkrang la ai amu ni hpe law law mu lu ai. Yesu gaw daw hten ai ni, ga n shaga lu ai ni myi-kyaw ai ni hte kaga ana ahkya yawng kaw na machyi hkrum ai ni hpe shamai shatsai ya ai. Matsan masha ni, madang nyem dik ai masha ni hpe malawng maga hkan gawn ai; shanhte hpe Karai a mungsung lam ni hkaw tsun dan ai. Wenyi hta matsan mayan hkrum ai ni hpe shalan shabran ya ai, shalawt dat ya ai. Isaiah tsun da ai zaibru dan hta hka lwi tung na lam tsun ai ga, hkye hkrang la ai amu nhpaw n-ya hkam la lu ma ai.

Dinghta ga ntsa e sha nga nga dingsa, machyi makaw, yawn hkyen shoi-hpa, n tara dip sha hkrum ai lam ni, hpyen law la ai dinghta  ga na masha ni hkye hkrang la ai chyeju teng sha hkam la ra ma  ai. Madu Yesu hte hkrum katut ai wa a matu, shi hpe kamsham nna  shi hta jung noi let asak hkrung ai wa a matu, ruyak jamjau ai lam  ni a lapran, yawn-hpa shoi-hpa ni a lapran, hkamjan lu ai; shalan  shabran ai lam lu la mai ai. N ju n dawng ai, prat hpe machyi dum  ai, prat hpe asum jaw ai,… ndai zawn re ai kaw na lawt lu ai, simsa  ai hku nga lu ai, mara dat ya chye ai, ndai zawn re ai hkye hkrang  la ai chyeju ni hpe hkam la lu ai.

Kamsham ai masha langai gaw Yesu a hkye hkrang la ai chyeju  ni hpe gam garan ya lu ai masha mung tai wa lu ai. Kasa Yaku tsun  ai hte maren, mai kaja ai bungli hte tinang a makam hpe garan  jahka nna asak n hkrung lu ai. Tatut amu hkan galaw ai rai yang  sha makam masham gaw asak hkrung lu ai. Lu su matsan mayan, amyu ru-sai hte makam hta hkan nna madang garan ginhka ai lam gaw dinghta ga na myit jasat; ginhka ai lam n nga ai yawng hpe  tsawra manu shadan ai lam gaw jet ai makam masham rai nga ai.

Sawn sumru mai ai lam:

Tinang hkum nan shalawt dat ai, hkye hkrang la ai chyeju ni hpe hkam sha nga sai kun?

Myit daw myit hten ai, myit machyi ai, matai dawk mayu ai… shing re ai baw hpe hkam sha ai malawng rai kun? Shing rai jang Yesu hta mahtai tam ra sai.

2021:PRAN WAN LADAW LABAN (23) NA CHYUM LAIKA

PRAN WAN LADAW HTA LABAN 23

September 5, 2021

CHYUM MUNGGA DAW 1

Esaia 35:4-7a

Ya hti na gaw, myihtoi Esaia a laika hta na rai nga ai.

Nden ja ai myit rawng nga nna, hkum hkrit nga mu, ngu nna myit htum ai ni hpe tsun mu. Yu mu, nanhte a Karai Kasang gaw matai tai na matu mung, shi kaw na ari jaw na matu mung, du na ra ai; nanhte hpe hkye hkrang la na matu shi nan du na ra ai.

Dai shaloi e, myi hten ai ni, myi mu lu nna, na n na ai ni, na lu na mara ai. Lagaw hten ai wa gaw, shan nga zawn gumtawng lu nna, ma-a ai wa a shinglet mahkawn mangwi na ra ai. Kaning rai nme law, hkraw hkun ai shara e, hka hpawk hpaw nna, zaibru jang e hka lwi na ra ai. Kahtet kabrim ai zai bru jang hta hka ing nga nna, hkraw hkun ai hta hka hpawk hpaw na ra ai.

Karai Kasang a Mungga rai nga ai.

CHYUM MUNGGA DAW 2

Yaku 2:1-5

Ya hti na gaw, Kasa Yaku shagun dat ai laika hta na rai nga ai.

Nye a hpu nau ni e, hpung shingkang lu ai anhte a Madu Yesu Hkristu hpe kam sham manit dai majaw, myiman lata ai hku masha hpe hkum ginhka mu.

Ga shadawn tsun jang, Ja lachyawp chyawp nna, reng ai hpun palawng bu hpun ai masha langai mi hte, n tsawm ai hpun palawng bu hpun ai matsan mayan masha langai mi, nanhte a nawku jawng hta shang wa ma ai.

Shaloi dai reng ai hpun palawng bu hpun ai wa hpe, nanhte hkungga ai hte hkap tau nna, salang wa e, chyeju hte ndai lahkum hta dung nga u, ngu nna tsun myit dai.

Raitim, dai matsan mayan re ai wa hpe, Wo nang e tsap nga u; shing n rai, nye a lagaw nhpang e ga hta dung nga u, nga nna tsun myit dai. Dai zawn galaw yang, nanhte a myit hta e masha ni hpe ginhka nna, n ding n man ai hku daw dan ai tara agyi ni tai wa myit dai.

Ngai tsawra ai hpu nau ni e, madat mara la mu; Kam sham ai sutgan hta lu su wa na hte, Karai Kasang hpe tsawra ai ni a matu shi madat da ai mungdan a Sali wunli hpe hkam la lu u ga, Karai Kasang gaw mungkan ga a man e matsan mayan ni hpe lata la manu ai, n rai ni?

Karai Kasang a Mungga rai nga ai.

KABU GARA SHIGA

Marku 7:31-37

Ya hti na gaw, Marku a laika hta na Kabu Gara Shiga rai nga ai.

Yesu gaw Turu ginwang de nna pru jang, Sidun mare hprang nna, Dekapoli ginwang ka-ang hku lai sa wa nhtawm, Galile nawng de sa du ai. Shaloi na lahpang nna, ma-a ai masha langai mi hpe, shanhte shi hpang de woi sa mu ai rai nna, dai wa a ntsa e lata mara ya na hpyi nem wu ai. Yesu gaw shawa masha kaw nna dai wa hpe hkrai woi sa nhtawm, shi a na lashing hku layung shawn bang ai hte, mayen mahtaw nhtawm, shi a shinglet hpe mung ahtawk ya wu ai. Shaloi Yesu gaw lamu de mada yu nna, dai wa hpe E-hpa-hta ngu nna madai let tsun wu ai; dai gaw, Hpaw wa u, ngu ai rai. Shaloi jang shi a na hpaw wa ai hte, shi a shinglet lakung hpyan mat wa nna, ga dan dan tsun lu ai. Dai lam kadai hpe mung n tsun dan mu ga, Yesu shanhte hpe ginhtim da ai; rai timung, shi ginhtim da magang shanhte grau nna hkai dan magang rai nga ma ai.

Shawa masha ni mung, nachying mau mat ma ai rai nna, shi yawng mayawng hte hpe mai kaja ai hku galaw nga ai, na lahpang ai ni hpe na lu shangun nna, n chye shaga ai ni hpe ga tsun shangun lu ai, nga ma ai.

Madu a Kabu Gara shiga rai nga ai.

2021:PRAN WAN LADAW LABAN (22) NA MUNGGA

“Tara Kanu 10” hta lai jan ai Moshe a Tara: Karai e jaw ai Tara Kanu 10 gaw masha yawng a sung dik ai kraw kata hta Karai e dawk bang da ya chyalu rai nga ai. N jaw ai, n tara ai, masu magaw manawn masham,... gara mung shinggyim masha hpe akyu n jaw ai lam kraw hta nan dum ai hkrai re. Karai a Tara matsun ni hpe grau tang du ai hku tsawra hkung ga chye na matu, Moshe gaw kaga tara matsun ni law law hpe jaw da ai. Hka Nan buga hpe shang madu la lu ai hpang, kaning di nna Karai a Tara matsun ni hpe hkan shatup na lam Tara Jahprang Laika hku nna Moshe shadum jahprang ai.

Kaja wa mung moi prat, magri magra prat hta amyu masha ni hpe kahkyin shabawn ai, amyu masha langai makyit mahkai ngang kang shangun ai gaw Moshe a tara rai nga ai. Kaga amyu masha ni a makam masham htung hking tara madang nyem ma ai. Tara matsun ni gaw shinggyim masha a akyu ara na matu rai nga ai. Karai e matsun ai tara, makam masham htung tara hta lai nna shinggyim masha ni hkan ra ai tara baw hpan ni law law naw nga ai: mung up asuya a tara upade, amyu htung hking hte seng ai lailen tara, asusya shada, mungdan langai hte langai matut mahkai hkat lu na tara,... moi na Israel masha ni a matu gaw kaga kaning re ai tara hpe mung bawnu hta n bang da ai; yawng mayawng hpe Moshe a tara, makam masham htung tara lailen hku sha jeyang dawdan ma ai.

Prat galu magang, makam masham htung tara ni jat magang rai nga ai. Yesu a prat hta Moshe a tara matsun ni, kaga makam masham ningbaw ni e jat da ai tara matsun law la ai; tara hpe laja lana hkan shatup ai ni gaw Hparishe ni rai ma ai. Hpa kaning re ai tara mi rai tim, masha hpe akyu jaw ra ai; dai tara hte masha hpe gyit da hkang da ai rai yang, tara dai gaw lachyum n pru na rai nga ai. Ga-shadawn, Moshe a tara hta wa shan n sha mai ai, sep n kap ai nga n sha mai ai, sai n sha mai ai, kaga amyu n bung ai chyasam masha ni hte num jaw num la n mai ai, .... Moi prat buga ginra hta hkan nna jaw ai rai tim, dai ni na prat hta gaw n jaw mat sai rai nga ai. Hpa kaning re ai tara matsun ni mung, masha shada tsawra hkung ga manu shadan hkat ai lam hpe n byin shangun lu ai rai yang, lachyum n pru ai lam, Yesu hkum nan madi madun dan ai.

Hparishe ni, tara sara jaiwa ni kade mi tara shadik dum ma ai rai tim, kaga masha ni hpe yu kaji ai, manawn masham ai, tinang hkum hpe tinang grai chyoi pra dum ai, tara matsun ni hpe hkan shatup ai majaw dinghpring ai lam hpe lu la ai, ngu shanhte shadu ma ai. Dai majaw, Yesu shanhte hpe htan tsun ai, “Masha e sha bang dat ai lu-sha kaw na masha hpe awu asin byin shangun lu ai n rai; kraw lawang kaw prut pru ai nse nsa, n ju n dawng, manawn masham, ja gumhpraw lu-sha marin ai, pyaw hpa marin ai,... ndai ni e sha masha hpe awu asin byin shangun ai, nga ai.

Makam masham tara hkan shatup ai, akyu hpyi man man, Sakramentu ni hpe man man hkam la ai, nga nna, masu magaw, hkalem hkalau, maw lu maw sha, n ju n dawng re ai rai yang, sawt ai masha she tai na sha rai nga ai. Makam masham htung lailen, tara matsun ni hpe hkan shatup ai rai yang, kaja wa tsawra matsan dum mara raw dat ya chye ai ni rai ra ai. Makam masham hkan shatup ai hte kraw kata na san seng ai myit masa bung hkat ra ai.

Makam masham mying gang nna amyu gin hka, sai gin hka, sut lu madang gin hka, hpung gin hka, rai nga yang, jet ai makam masham lailen n rai nga ai. Karai Kasang hpe kamsham nawku dawjau ai, makam masham tara hkan ai amu gaw myit masin kraw lawang kaw na prut pru ai amu rai ra ai.

2021:PRAN WAN LADAW LABAN (22) NA CHYUM LAIKA

PRAN WAN LADAW HTA LABAN 22
August 29, 2021
Chyum Mungga Daw 1

Tara Jahprang 4:1-2, 6-8

Ya hti na gaw, Tara Jahprang laika hta na rai nga ai.
Mawshe shawa masha ni mahkra hpe tsun mu ai gaw: Israela amyu e, asak hkrung nga lu nna, nanhte a nji nwa ni a Madu Karai Kasang jaw da ai mungdan hta, shang madu lu hkra, nanhte hkan shatup na matu, ngai sharin achyin da ai matsun maroi ga hte tara lam ni hpe madat mara la mu.
Ngai nanhte hpe hkang da ai tara hta, kaga langai mi pyi jat lu na n rai; dai tara hta na langai mi pyi yet kau lu na n rai; Ngai nanhte hpe hkang da sai hte maren, nanhte a Madu Karai Kasang a tara matsun tup, nanhte hkan shatup lu na rai myit dai.
Dai rai nna, dai ga mahkra hpe sadi sahka ai hte hkan shatup nga mu. Shing rai, maigan amyu ni hpe nanhte a hpaji byengya hta kung hpan ai lam madun dan na myit dai. Ndai matsun maroi ga mahkra hpe shanhte na yu ai shaloi, Kaja wa, ndai galu kaba ai amyu gaw, hpaji byeng-ya hkum tsup ai hte, kung hpan nga ai amyu rai nga ai, nga nna nanhte a lam kajai tsun na mara ai. Dai gaw teng nga ai; kaning rai nme law, anhte a Madu Karai Kasang hpang de anhte hpyi jahtau ai shaloi, Shi anhte hte ni nga ai zawn, galu kaba ai amyu kaga ni hta, dai zawn re ai Karai Kasang kadai lu a ta? Dai hta kaga, dai ni ngai nanhte hpe tawn da ai tara ding hpring ai daram, amyu kaga ni hta, dai zawn re ai matsun maroi ga hte hkang da ai tara hpe, kadai wa lu a ta?
Karai Kasang a Mungga rai nga ai.

Chyum Mungga Daw 2

Yaku 1:17-18, 21-22, 27

Ya hti na gaw, Kasa Yaku shagun dat ai Laika hta na rai nga ai.
Hpu nau ni e, Kaja ai hte hkum tsup ai kumhpa yawng hte gaw, ntsa de na rai nga ai hte, nhtoi hkum ai a Kawa kaw nna yu hkrat wa nga ai; Shi hta e gale galau re ai hte, kayin kaye re ai shingnip rawng nga lu ai n rai. Shi hpan da ai baw mahkra hta e, shawng ngai ai nsi naisi zawn anhte tai wa lu na matu, Shi myit ra ai hku hkan let, tengman ai mungga a marang e, Shi anhte hpe shaprat dat mi ai. Nanhte a kraw lawang hta e hkai da ai mungga nanhte hpe hkye hkrang la lu ai rai nna, sumnung ai myit hte dai hpe hkap hkam la nga mu. Nanhte gaw tinang hkum hpe n hkalem myit ga, dai mungga hpe madat la ai ni sha n rai, dai hpe hkan galaw ai ni nan tai nga mu. Ya, kyindut hkrum ai jahkrai nmai ni hte gaida, gaina ni hpe kawan katsan nna, mungkan ga a awu asin re ai hpe koi kau yang gaw, Kawa Karai Kasang a man e san seng ai hte ra n rawng ai hku, nanhte a makam masham hpe hkan shatup nga myit dai.
Karai Kasang a Mungga rai nga ai.

KABU GARA SHIGA

Marku 7:1-8, 14-15, 21-23

Ya hti na gaw, Marku a laika hta na Kabu Gara ai Shiga rai nga ai.
Ya, Yerusalem mare na lung wa ai Hparishe ni hte tara sara nkau mi gaw, Yesu kaw sa du nna, Shi a sape nkau mi, lata nkashin ai sha, awu asin ngu ai hte shat sha nga ma ai hpe mu hkrup ma ai. Hparishe ni hte Yuda masha ni mahkra gaw, ji wa ni a matsun maroi hkan nga ma ai rai nna, lata hpe atsawm sha n kashin kau yang gaw, shat n sha ma ai; gat de nna bai wa jang, hkum garai n shin yang, shanhte n sha yu ma ai. Dai hta n-ga, gawm ni, di ni hte magri ban wa ni hpe kashin kau ai hte, dai zawn re ai htung hking law law hpe shanhte hkran ra ma ai. Dai rai nna, Hparishe ni hte tara sara ni gaw, Na a sape ni, hpa majaw ji wa ni a matsun maroi hpe n hkan ai sha, awu asin re ai lata hte shat sha nga ma ta? ngu nna Yesu hpe san ma ni.
Yesu gaw, Esaia ka da ai myihtoi ga gaw, nanhte hpyi hpun ai ni hta gaja wa teng wa sai: dai myihtoi wa ka da ai gaw: Ndai amyu gaw tinang a nten hte ngai hpe hkungga lara ti mung. Shanhte a myit masin ngai hte tsan gang malu ai:
Masha a ga matsun hpe sha htawn sharin shaga nga ma ai majaw, Shanhte ngai hpe kaman lila nawku nga ma ai, nga nna rawng nga ai. Nanhte gaw Karai Kasang a hkang da ai ga hpe kau da nhtawm, masha a matsun maroi lam ni hpe sha hkan nga myit dai, ngu nna shanhte htan ya mu ai.14Shawa masha ni hpe Yesu bai shaga la nna, shanhte hpe tsun mu ai gaw: Nanhte yawng ngai hpe madat la nna, ndai lam hpe chye na la mu: Masha a shinggan e nga nna, shi kata de shang wa ai hpa rai ti mung, shi hpe awu asin di kau lu ai nrai; masha a kraw kata de nna pru wa ai mahtang gaw, masha hpe awu asin di kau lu ai. Kaning rai nme law, masha a kraw kata de nna, n kaja ai myit mang ai, nse nsa amu galaw na, lagu na, masha sat na, num shaw na, law hpa ai, nju n dawng ai, hkalem ai, ngang kayut ai, manawn masham ai, shatan nhkan ai, gumrawng ai hte, angawk re ai myit pru wa ai. Dai n hkru ai lam nlang hte gaw kata de nna pru wa ai hte, masha hpe awu asin di kau wu ai.
Madu a Kabu Gara Shiga rai nga ai.

2021:PRAN WAN LADAW LABAN (21) NA MUNGGA

Shekem, ngu ai shara gaw Abraham, Isak, Yaku, ji-jum ni a ginru ginsa labau shara rai nga ai. Amyu sha lam-yan hte makam masham lam-yan a matu ahkyak ai hkrum zup shara rai nga ai. Karai Kasang hte Abraham ga-shaka jaw hkat ai buga, Abraham a amyu matu hpe jaw da ai buga rai nga ai. Egyip mung e shaning tsa ru nna mayam tai hkrum ai hpang, zaibru jang e shaning 40 ning bu hkawm ai hpang, jahtum e, Yawshu woi awn ai Karai a amyu masha gaw dai buga de du shang madu la lu ma ai. “Yawshu” ngu ai ga-si hte “Yesu” ngu ai ga-si lachyum langai sha re ai hpe dum ra ga ai. Karai e jaw ai lamu ga de du shang madu la lu ai hte rau, Karai hpe mahtang jaw jau na kun, buga masha ni jaw jau ai Karai Kasang shaje ni hpe jaw jau na kun, lata la mu, nga nna Yawshu tsun ai. Yawshu hte shi a htinggaw amyu matu ni gaw Karai Kasang hpe sha jaw jau na lam tsun ai shaloi, kaga ngam ai amyu matu ni mung, Karai Kasang hpe jaw jau na lam, Karai shaje ni hpe kau da na lam ga-sadi jaw ma ai. Shingrai, Israel amyu masha ni Karai hte ga-shaka bai shagrin ma ai.

Yesu tsun ai ga, “Ngai a shan gaw sha-hpa majing; ngai a sai gaw lu-hpa majing” ngu ai ga na la jang, shi kaw hkan nang ai masha unawng na pat kau nna Yesu hte hka mat wa ma ai, nga ai. Yesu shi tsaw ai, hkaw dan ai ga ni hkap la kamsham ging ai hku mau-hpa muk shalaw jaw ai, kaga mau-hpa lamik kumla ni mu ma ai rai tim, jahtum chyalai, shi a shan sha ra ai, shi a sai lu ra ai, ngu ai hta Yesu hpang n hkan nang gwi ai majaw hka mat ma ai. Yesu gaw sape 12 hpe san ai, “Nanhte gaw...?” ngu ai shaloi Petru htan ai, “Madu e, anhte kadai kaw chye hkan na rai ta? Nang gaw asak jaw ai mungga lu ai hte Karai a Chyoi Pra ai Wa rai lit dai” ngu, htan ya ai. Asai ashan kaw na prut pru ai ga n rai; wenyi e jasu jahprang ai chyeju lu ai majaw, Petru gaw shing ngu htan ya lu ai rai nga ai.

Shawa masha hpe Yesu tsun ai, “hkum sai shan gaw hpa akyu n jaw lu ai; ngai tsun ai ga gaw wenyi hte asak rai nga ai” nga ai.

Wenyi hte seng ai lam hpe tsun yang, masha ni gaw ndai dinghta ga na sawn shen lu ai baw hku myit la ai rai yang, wenyi a lam kaning di chye lu na n re ai lam hpe ngu ai re. Wenyi lam hpe gaw wenyi a mahkrun hku sha chye na hkap la mai ai. Mungkan lam hku shadawn sawn shen nna wenyi asak a lam chye na hkap la lu na n mai byin ai. “Ngai a shan sha-hpa majing, ngai a sai gaw lu-hpa majing” ngu ai shaloi, Yesu gaw ading tawk tsun ai; gumwai ga hku tsun ai n rai. Dai majaw, ga dai hpe n hkap la lu ai ni shi kaw na hka mat wa ai shaloi, shanhte hpe n shingdang ai. Yesu gaw kamsham ai ni shi a shan hpe sha mai hkra, shi a asai hpe lu mai hkra, hkungga nawng jau ai ladat hku nna shabyin na rai nga ai. Petru gaw dai hpe tau nau chye da ai n rai tim, Yesu tsun ai yawng gaw teng man ai lam hpe tsun ai; n shut n shai kam ging ai, ngu, hkam la ai. Shi a shagrit shanem ai myit, shi n chye madat tim Yesu gaw asak jaw ai mungga hkaw tsun ai, ngu hkrak sha kamsham ai majaw, Petru gaw jaw ai hpe lata la lu ai lam rai nga ai.

Karai Kasang hte matut mahkai ai, wenyi mungkan a lam sharin hka ja hkam la ai shaloi, teng sha shagrit shanem ai myit rawng ra ga ai. Anhte n chye na lu ai mungsung ni hpe kam ging ai wa (Yesu) hte shi e san da ai Nawku Hpung e tsun ai gaw kam ging ai, ngu ai majaw kamsham hkap la ga ai re. Sakramentu ni a lam hpe kaning re ai hpungtang hpaji, myit hpaji, sawn hpan hpaji hte mahtai shapraw ya na n mai byin ai. Kam ging ai majaw, kam ai, ngu ai hta jan na n nga sai. Yawshu hpe Israel amyu matu shagu htan ya ai, “Anhte mung nang zawn, Karai hpe sha hkap la jaw jau na ga ai” ngu, ga-sadi jaw ninglen, buga na nat hpara/ Karai shaje ni hpe nawku jawjau ai mara kahtap kahtap nna shut hpyit ma ai.

Sakramentu ni hpe hkam la ai anhte mung, Karai Kasang hpe sha kamsham nawku jaw jau na, ngu ai ga-sadi jaw da ninglen, anhte a prat hta kaga hpara shaje ni hpe nawku jawjau ai lam kade lang she galaw kau ga ai: marin ai, ju malu ai, tinang ra mayu ai byin mayu ai maga shanang nna Hkristan myit jasat nga-sa lailen hte mung, makam masham hte mung, nhtan shai nna hkan galaw kau chye ga ai. Yesu kaw na gan hka mat ai kade lang she rai a hka! Hkungga nawng jau ai Missa lawm shagu, Yawshu zawn, Kasa Petru zaw, asak jaw ai Madu hpe sha lata la na ga ai; shi a tara mungga ni hpe madat mara na ga ai, ngu, ga-sadi bai kahtap jaw jaw di ga ai.