2021:PRAN WAN LADAW LABAN (17) NA CHYUM LAIKA

PRAN WAN LADAW HTA LABAN 17

July 25, 2021

CHYUM MUNGGA DAW 1

2 Hkawhkam 4:42-44

Ya hti na gaw, Hkawhkam laika lahkawng hta na rai nga ai.

Bala-shalisha kaw nna masha langai mi gaw, Karai Kasang a masha wa Elisha hpang de sa du nna, shawng ngai ai muk-yaw mam hte galaw ai muk tawng hkun hte, nlung nnan sa jaw wu ai. Shaloi Elisha gaw, shawa masha ni hpe karan jaw mu, ngu wu ai. Shi a ali ama chyawm gaw, ndai gaw ngai masha latsa hpe kaning di karan jaw lu na rai ta? ngu nna htan yang, Elisha gaw, She karan jaw mu; Madu Karai Kasang Wa tsun ai: shanhte sha lu nna, naw ngam nga na ra ai, ngu nna dai ali ama hpe tsun wu ai. Shaloi dai ali ama gaw masha ni a man e karan tawn nna, shanhte sha ngut jang, Madu a ga hte maren shahpa naw ngam nga ai.

Karai Kasang a Mungga rai nga ai.

CHYUM MUNGGA DAW 2

Ehpesu 4:1-6

Ya hti na gaw, Ehpesu masha ni hpang de San Pawlu shagu dat ai laika hta na rai nga ai.

Karai Kasang nanhte hpe shaga la manit dai hte maren, Shi ra sharawng ai lam hta nanhte gingdan ai hte hkawm sa lu na matu, Hkristu Madu a jaw e ngai bawng dung ai wa Pawlu gaw, nanhte hpe shadut jahkat made ai.

Dai rai nna, myit grit nem ai hte sumnung shingdi ai lam hpe shatup nga mu; myit galu kaba nga nna, shada da a n-gun kya ai hpe tsawra ai myit hte hkam sharang la mu. Chyoi Pra ai Wenyi jaw ya ai myit hkrum myit ra ai lam hpe, ngwi pyaw simsa ai makyit sumri hte shangang shakang na matu shakut shaja nga mu.

Nanhte hpe shaga la ai shaloi,myit mada shara langai sha de shaga la manit dai hte maren, hkum hkrang langai sha hte Wenyi langai sha, kashin kamun lam langai sha rai nga ai; yawng mayawng a Kawa ngu ai Karai Kasang mung, langai sha rai nga ai. Shi gaw yawng mayawng a ntsa e up nga nna, yawng mayawng hta chyam wa ai hte lanu lahku ya nga ai.

Karai Kasang a Mungga rai nga ai.

KABU GARA SHIGA

Yawhan 6:1-15

Ya hti na gaw, Yawhan a laika hta na Kabu Gara Shiga rai nga ai.

Yesu gaw Tiberi ngu ai Galile nawng wora hkran de rap sa wa ai. Machyi makaw hkrum ai ni hta shi galaw dan ai lamik kumla ni hpe mu ai majaw masha wunawng kaba shi kaw hkan nang ma ai. Shaloi Yesu gaw bum de lung wa nna, Shi a sape ni hte rau dung nga ai. Dai aten hta Yuda masha ni a Shalai Dat ai poi ni wa sai. 

Yesu mada yu nna, masha wunawng kaba Shi kaw sa  wa ai hpe mu yang, Shi gaw Hpilip hpe, ndai ni sha na muk anhte kanang na sa mari na i? ngu nna san wu ai. Shing nga san ai gaw, Hpilip hpe chyam yu na matu rai nga ai. Hpilip gaw, gumhpraw lahkawng tsa a matu mari timung, masha hkum shagu, kachyi mi hpra, sha na pyi law na n rai, ngu nna htan wu ai. Shaloi, Shi a sape ni hta na Simun Petru a kanau Andre gaw, muk-yaw mam hte galaw ai muk tawng manga hte, ‘nga’ lahkawng lu ai lasha ma langai mi nang e nga ai; rai timung, ndai daram law ai masha ni a matu, kanang dang law na rai ta? ngu nna tsun dan wu ai.

Yesu gaw, masha ni hpe dung nga shangun mu, ngu mu ai. Dai yang e, tsingdu mung htat nga ai. Shingrai lasha hkying manga daram dung nga ma ai. Shaloi Yesu gaw, dai muk tawng ni hpe la nna, shakawn kungdawn nhtawm, dung nga ai ni hpe karan jaw wu ai; dai hte maren, nga hpe mung shanhte ra ai daram karan jaw mu ai. Shanhte sha hkru jang, Yesu gaw, Hpa mung n mat u ga, ngam ai ahkyep alep ni hpe hkan hta la mu, ngu nna, Shi a sape ni hpe tsun mu ai. Sape ni hkan hta la nna, dai muk tawng manga hta na, sha ai ni ngam ai ahkyep alep, mung shi lahkawng hpring tup lu la ma ai. Dai re ai majaw, Yesu madun ai lamik kumla hpe shawa masha ni mu jang shanhte gaw, gaja wa teng teng ndai wa gaw mungkan ga de du sa ai myihtoi rai nga ai, nga ma ai. Dai masha ni gaw, Shi hpe adip la nna, hkawhkam shatai na maw nga ai hpe, Yesu chye ai majaw, Shi hkrai sha dai bum de hprawng lung mat wa ai.

Madu a Kabu Gara shaga rai nga ai.

2021:PRAN WAN LADAW LABAN (16) NA MUNGGA

Amyu masha langai, mungdan langai rawt jat galu kaba wa na matu, “ningbaw kaja” ngu ai teng sha ra ahkyak ai. Kade kaja ai htung tara masat maka nga ai rai tim, ningbaw kaja n lu jang dai amyu masha ni, dai mungdan masha ni hta kawsi hpang gara ai masha ni law na, machyi makaw law na, hkawm sa hkawm wa matut mahkai yak na, majan hte mya lu mya sha ai, lagu lagan ai ni law na rai nga ai. Anhte a mungdan na yakhkak ai lam ni hpe yu nna kaja ai mung-up Du/ningbaw kaja kade ra ahkyak ai lam hpe dum ga ai.

Israel amyu sha/mungdan hpe woi awn ai ningbaw gaw hkawhkam rai nga ai. Dai majaw, Hkawhkam hpe “Sagu-rem hkawhkam” ngu ai rai nga ai. Hkawhkam hta lai nna amyu masha/mungdan masha ni a ntsa e gawn reng ai, ahkaw ahkang kaba ai ni gaw jau ni rai ma ai. Mung Du hkawhkam hte jau ni gaw tinang nang a lu lawm lam, nga pyaw lam hpe sha tam nna mungchying sha ni a hkrap ngu hkrap ngoi madai ai nsen hpe n madat ya ma ai majaw, Yeremiah gaw dai sagu rem ni hpe daru sharin ai. Shanhte hpe Karai e kau da nna Karai e myit dik ai sagu-rem kaja, kuptsup ra n rawng ai sagu-rem kaja hpe jaw ya na lam, myihtoi htoi ai rai nga ai.

Dai kuptsup ra n rawng ai sagu-rem kaja gaw Hkawhkam Dawi a amyu matu kaw na prut pru na lam, Yeremiah myihtoi htoi da ai ga, Yesu hta dik wa tup wa ai lam, Kasa Marku madi madun ai. Yesu gaw shawa masha ni, kau da hkrum ai ni, matsan masha ni, machyi makaw hkrum ai ni, nat shung ai masha ni, mara hta lup taw ai ni, ndai zawn, daw hten ai, wun-ma kap ai, jung ai chyana ai sagu ni hpe lakawn ai, alak rai matsan dum lanu lahku ai wa rai nga ai. Sape Shi-lahkawng hpe mung, Yesu shi a myit masa bang ya nna grau kaji kadun ai ni hpang de shangun dat ai. Tinang a akyu amyat a matu n rai; ra kadawn ai ni a akyu amyat a matu shangun dat hkrum ma ai.

Karai Kasang gaw, Ga-shaka Dingsa kaw na sagu-rem aya lu ai Du/ Hkawhkam/ Jau ni hpe Nawku Htingnu hte rau hpya run kau nna, Ga-shaka Ningnan a sagu-rem ni hpe lata san da ai. Petru lunghkrung hta gawde da ai Nawku Hpung na sagu-rem ni rai ma ai. Dai majaw, jau/sara ni, Karai a magam gun ai ni gaw tinang a akyu amyat tam ai ni n rai; tinang dawjau ai hpung masha ni a akyu ara, shanhte hpe tsawra matsan dum chye ai ni rai ra ma ai. Tinang a akyu amyat a matu baw nawng ai ni, hpung masha ni a matsan mayan hkrap ngu hkrap ngoi ai nsen hpe n madat ai hpung woi hpung awn ai ni gaw Yeremiah e sadi jaw ai hkrum ai ningbaw ni hpa tai wa na rai ma ai.

Kaja ai sagu-rem wa gaw tinang a akyu amyat hpe n tam ai; sagu hpung a matu salat hkaw sai htaw nna asak nawng kau ai Hkristu Yesu nan re ai lam, San Pawlu madi madun ai. Tinang machyi hkam asum hkam nna sha, hka bra nga ai shinggyim masha ni hpe kahkyin la lu ai, simsa ai lam majing jaw ya lu ai, nga ai. Shinggyim uhpung uhpawng ni hta shai hkat gang hkran hkat ai lam hti n dang hkra law la ai_ amyu ga, myit jasat, makam, lu su matsan, ...kade she shai hkat. Hkristu hta sha kahkyin gumdin mai ai rai nga ai. Dai majaw, Yesu gaw yawng a “simsa lam” rai nga ai.

2021:PRAN WAN LADAW LABAN (16) NA CHYUM LAIKA

PRAN WAN LADAW HTA LABAN 16

July 18, 2021

CHYUM MUNGGA DAW 1

Yeremia 23:1-6

Ya hti na gaw, myihtoi Yeremia a laika hta narai nga ai.

Nye a udat shara hta sha nga ai sagu hpung ni hpe jahten shabra kau ai sagu rem ni gaw katut sha na mara ai, nga nna Madu tsun ai. Dai Majaw, Israela a Madu Karai Kasang gaw, nye a amyu masha ni bau nga ai sagu rem ni hpe sha-ang nna, ning nga ai; Nanhte gaw nye a sagu hpung hpe atsawm sha n woi awn ai hte shanhte hpe shabra kau nna, shaden kau mu ai majaw, nanhte a n hkru ai amu hte maren, ngai nanhte hpe teng teng ari dan jaw na ra ai, nga nna Madu Karai Kasang Wa tsun ai.

Rai timung, ngai mungdan kaga de shaden kau ai, nye a sagu ni naw ngam nga ma ai; dai ni hpe ngai shinggyin la nna, tinang a udat shara de bai woi wa na nngai: dai yang e shanhte mayat maya wa nna, law htam wa na mara ai. Shanhte hpe bau sin na sagu rem ni, ngai shanhte a ntsa tawn da nna, shanhte htawm hpang de hkrit kajawng nna mak mat na nrai; langai mi pyi mat mat na n rai; nga nna Madu tsun nga ai.

Madu Karai Kasang ning nga ai; Yu u, Dawi a matu ‘Ding hpring ai makrung, ngai shatut na aten du na ra ai, dai wa gaw hkawhkam tai nga nna, hpaji byeng-ya hte uphkang na hte, dai mungdan hta e ding hpring ai hku dawdan na ra ai. Shi a prat hta Yuda mung hkye hkrang la ai hkrum nna, Israela gaw asim sha nga lu na raai. Dai wa hpe anhte a Ding Hpring Madu, ngu nna shamying ya na mara ai.

Karai Kasang a Mungga rai nga ai.

CHYUM MUNGGA DAW 2

Ehpesu 2:13-18

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, shawng e nanhte maigan ngu ai ni gaw, Karai Kasang a mungdan hte tsan gang nga myit dai. Ya chyawm gaw, Hkristu Yesu hte matut mahkai hkrum nna, Shi a asai a marang e, nanhte ni wa manit dai. Dai Hkristu Madu gaw anhte a ngwi pyaw simsa ai lam rai nga ai; kaning rai nme law, Tara maigan masha ni hte Yuda masha ni, ndai amyu lahkawng hpe langai sha shatai let, an lahkawng hpe madin zawn jahka kau ai n dawng n yawt ai lam hpe Hkristu gaw sharun kau nu ai. Jep ai tara a matsun maroi hte htet da ai upadi ni hpe, shi a hkum shanhte shi htawm kau sai. Shingrai, shawng e amyu lahkawng rai nga ai ni hta na, masha langai sha hpe shi hpan tawn da nna, ngwipyaw simsa ai hpe shabyin da nu ai. Dai Hkristu gaw udang ntsa e n dawng n yawt ai lam hpe shaza kau ya nna, amyu lahkawng hpe Karai Kasang a matu hkum hkrang langai sha shatai da ai hte, Karai Kasang hte an lahkawng hpe htinglu htinglai ya wu ai. Shingrai, Hkristu Madu sa du nna, tsan gang nga ai nanhte hpe mung, ni nga ai ni hpe mung, ngwi pyaw simsa ai lam a kabu gara shiga hkaw tsun dan mi ai. An lahkawng gaw dai Hkristu a marang e , Wenyi langai sha hta e, Kawa hpang de shang wa na lam lu la saga ai.

Karai Kasang a Mungga rai nga ai.

KABU GARA SHIGA

Marku 6:30-34

Ya hti na gaw, Marku a laika hta na Kabu Gara Shiga rai nga ai.

Kasa shi lahkawng hte gaw, Yesu kaw bai du wa nna, shanhte galaw sai lam mahkra hte sharin shaga ai lam yawng, shi hpe tsun dan mu ai. Dai rai nna, Yesu gaw, Nam mali kata na machyi shi mai shara de nanhte hkrai sa nna, loi mi ban sa la mu, ngu nna shanhte hpe tsun mu ai. Kaning rai nme law, sa sa wa wa rai nga ai ni gaw law la ma ai majaw Yesu hte shi a kasa ni, shat sha na ahkying pyi n lu ma ai. Dai rai nna, shanhte gaw nam mali na machyi shim ai shara de li hte sa wa ma ai. Rai timung, masha ni gaw shanhte pru sa wa ai hpe mu mada ai majaw, law law wa shanhte sa wa ai shara hpe chye wa ma ai. Dai majaw, mare shagu hkan na ni hkarang lam hku e gat sa wa nna, Yesu hte Shi a kasa ni a shawng e sa du ma ai. Shingrai, dai li kaw nna Yesu pru ai shaloi masha wunawng kaba hpe Shi mu mada lu ai. Shanhte gaw, sagu rem wa n lawm ai sagu hpung ni hte bung nga ma ai majaw, Shi shanhte hpe matsan dum nna, law law wa sharin shaga ya mu ai.

Madu a Kabu Gara Shiga rai nga ai.

2021:PRAN WAN LADAW LABAN (15) NA MUNGGA

Karai a magam gun ni (jau/sara ni), kaning re ai myit jasat hte magam gun ra ai lam myit yu shangun ai. Dingdung mungdan masha Amo gaw sagu rem amu hte labri hpun hkai nna kanbau makan galaw sha nga ai masha; Karai Kasang e shi hpe shaga la nna Dingda mungdan (Samaria) maga de sa myihtoi htoi shangun dat hkrum ai. Shi hkum nan kam tim n kam tim, bai, shi a mungga madat la na masha ni na ra tim n ra tim, Amo gaw hkaw tsun shadum jahprang ra ai. Dingdung mundan na masha ni gaw sut lu nga mai ai aten re ai majaw, Karai Kasang hpe malap mali di kau ma ai. Shada dip lu dip sha ai, matsan masha ni hpe n gawn n sawn di ai; nat-tawn nat-ra ni law wa ai. Ndai zawn makam masham hte akyang lailen htenza nga ai ni hpe chyasam masha re ai Amo gaw sa hkaw tsun ra ai. Amo hpe ja ja ninghkap ai ni gaw Betel mare na jau ni rai ma ai. Amo hkaw tsun ai majaw masha ni myit malai shajang ai rai yang, Betel mare nawku htingnu e jawjau ai jau ni lu lawm lam, shang gumhpraw yawm mat na rai nga ai. Dai jau ni gaw Karai hpe nawngjau ai rai tim, shara law law e nat hpara shaje ni hpe jawjau ai alai hpe hpa n nawn ya ma ai. Dai majaw Amaziah gaw, Amo hpe gawt shingtsang ai rai nga ai.

Kabu Gara Shi-ga hta, Sape 12 hpe Yesu shangun dat ai; Karai a mungdan du magang sai lam, myit malai lu nna dai Kabu Gara Shi-ga hpe hkap la na sape ni hkaw tsun ra ma ai. Sakse tai na matu, machyi masha ni hpe shamai lu ai atsam, nat ni hpe shaden kau lu ai atsam shanhte hpe jaw dat ai. Sape ni gaw shangun dat hkrum ai ni rai ma ai. Tinang nang a akyu amyat hkam sha na lam n rai; kanbau bungli galaw sha na matu shangun dat ai n rai. Ja gumhpraw hte kaga arung arai ni hpe madung kamhpa ai lam n galaw mu ga, Yesu shanhte hpe ginhtim da ai. Gumhpraw jan n gun na lam, a’tsang a’wang hkawm sa ra ai lam; shanhte lu sha na hte lang ra ai baw hpan ni hpe masha ni e hkap jaw madi shadaw ya ra na lam, matsun dat ai.

Karai magam gun ai ni kadai n nga, kanbau bungli galaw sha ai myit n mai rawng ai lam sharin ya ai. Mungga madat la ai ni gaw Karai magam gun ai ni hpe daw jaw, hkap tau garum ya ra ma ai. Ja gumhpraw atsam hpe madung n shatai ai, Karai e jaw ya ai bausin makawp maga cheju hte wenyi hte seng ai atsam ningja ni hpe madung kamhpa nna sasana amu galaw ra ai lam shadum ya ai.

Karai a magam gun ni gaw machyi masha ni, nat e yubak jaw hkrum ai ni hpe shalawt dat, shamai shatsai ai amu hpe galaw nan galaw ra ai lam shadum ya ai.

2021:PRAN WAN LADAW LABAN (15) NA CHYUM LAIKA

PRAN WAN LADAW HTA LABAN 15

July 11, 2021

CHYUM MUNGGA DAW 1

Amo 7:12-15

Ya hti na gaw, Myihtoi Amo a laika hta na rai nga ai.

Hkinjawng wa Amazi gaw Amo hpe tsun ai gaw; Myihtoi wa e, Yuda mung de hprawng wa nu; dai yang e myihtoi htoi nna, asak bau nga u. Bahtela shara hta chyawm gaw, myihtoi hkum htoi et; dai gaw hkawhkam wa a chyoi pra ai shara hte, wunpawng htunghking rai nga ai, ngu nna tsun wu ai. Dai rai nna, Amo shi hpe htan ya ai gaw; Ngai gaw myihtoi wa n rai nngai; myihtoi kasha mung n rai nngai; yam nga rem nna, lakum si lajang ai wa rai nga nngai. Madu Karai Kasang mahtang, sagu hpung de nna ngai hpe lata nna, sa su; nye a amyu Israela hpe myihtoi htoi u nga nna ngai hpe hkang dat ai.

Karai Kasang a Mungga rai nga ai.

CHYUM MUNGGA DAW 2

Ehpesu 1:3-14. (3:1-10)

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, anhte a Madu Yesu Hkristu a Kawa rai nga ai Karai Kasang kaw hkungga shakawn a nga nga u ga: Shi gaw sumsing lamu lahta tang e, nsa wenyi hte seng ai shaman ya ai lam amyu myu hte, Hkristu hta e anhte hpe shaman ya mi ai.

Anhte gaw tsawra ai hte hpring tsup let, shi a man e chyoi pra ai ni hte maren rawng ai ni tai lu hkra, ginding aga garai n lat kaw nna, Shi anhte hpe Hkristu hta e lata la mani ai.

Shi a tsawra htum ai kasha hta e, anhte hpe jaw dat mi ai chyeju ningsang a lam hpe, anhte yawng shakawn kungdawn u ga, shi a shawang myit sharawng awng nga ai hte maren, Yesu Hkristu a marang e Shi a kasha ni tai lu hkra, Shi anhte hpe shawng nnan e san da mmani ai.

Dai Hkristu Yesu hta e anhte hkye hkrang la ai hkrum nna, Shi a asai hkaw kau ya ai a marang e anhte a shut hpyit mara raw dat kau ya ai akyu hpe lu la saga ai: dai daram Karai Kasang gaw shadawn n dang ai hku chyeju n hpaw n-ya anhte hpe karan jaw ya mani ai.

Karai Kasang gaw shawng npawt kaw nna, Shi a tsawra shawang myit hte Hkristu hta e yaw shada ai hte, madat ai aten du wa yang dik wa na ra ai, Shi a mungsung lam hpe anhte chye chyang wa lu na matu, Shi hpaji ningsang anhte hpe jaw ya mani ai. 10Dai mungsung lam chyawm gaw sumsing lamu tang na lam ni hpe mung, ginding aga na lam ni hpe, nga manga hte hpe, Hkristu hta e langai sha tai hkra gumhpawn tawn da na ra ai lam rai nga ai.

*(Grau galu ai hku hti jang, lawu na tsun matut na)

Kaja wa, dai Hkristu hta e anhte lata la ai hkrum nna, Karai Kasang a sali wunli amyu tai wa saga ai. Kaning rai nme law, Shi a shawang myit bawng hkut da ai hte maren, yawng mayawng a ntsa e up hkang nga nna lam mahkra hpe lajang da nga ai Karai Wa gaw, anhte a amyu hpe lata la mani ai. Dai rai nna, Shi myit ra ai hte maren, Hkristu garai n du yang, shi hpe shawng myit mada nga ai ni, anhte tai wa nna, Karai Kasang a hpung shingkang hpe shakawn kungdawn nga lu u ga, shi shawng nnan e anhte hpe san da mani ai. Nanhte mung dai Hkristu hta e lata la ai hkrum manit dai. Nanhte gaw hkye hkrang la ai lam a kabu gara shiga ngu ai, teng man ai mungga hpe na yu nna, kamsham manit dai shaloi e, Karai Kasang n dat da ai ChyoiPra ai Wenyi hte dazik shakap da ai hkrum manit dai. Dai Wenyi chyawm gaw, Karai Kasang a hpung shingkang arawng sadang law htam wa u ga matu, Madu Karai Kasang Shi a amyu masha ni hpe hkye mawai la ngut ai shaloi e Shi a sali wunli anhte lu la na lam a masat dingsat rai nga ai.

Karai Kasang a Mungga rai nga ai.

KABU GARA SHIGA

Marku 6:7-13

Ya hti na gaw, Marku a laika hta na Kabu Gara Shiga rai nga ai.

Yesu gaw, Shi a sape shi lahkawng hpe shaga la nhtawm, marai lahkawng yep yep di nna shangun dat mu ai hte, n san n seng ai nat ni hpe dang kau lu na ahkaw ahkang, Shi shanhte hpe jaw dat mu ai. 

Yesu gaw, dai sape ni hpe shadum jahprang let, Daw hkrawng hta kaga, hkrun lam a matu, sha hpa mung, htingba mung, shingkyit hta gumhpraw mung hkum lang mu. Nanhte mgaw hkyepdin din mai ai, rai timung, galai na matu palawng kaga hkum gun myit, ngu nna shanhte hpe shadum dat mu ai.

Dai hta n-ga, Yesu gaw, gara nta hta rai timung, nanhte shang yang, dai mare na pru wa ai nhtoi du hkra, dai nta hta e a nga nga mu. Gara shara hta e rai timung, nanhte hpe n hkap la nna, nanhte hpe n madat mara yang gaw, dai yang na pru wa let, shanhte hpang maga de sakse tai u ga, nanhte a lagaw lahpan hta kap ai ga nhpu hpe, ahpu sharun kau da mu, ngu nna sape ni hpe Yesu tsun damu ai. Shaloi shanhte pru wa nna, masha ni hpe myit malai lu na lam, hkaw dan ma ai; nat ni law law hte hpe shanhte sha den kau mu ai hte, machyi makaw hkrum ai ni law law hpe namman chya ya nna, shamai shatsai ya dat mu ai.

Madu a Kabu Gara Shiga rai nga ai.

2021:PRAN WAN LADAW LABAN (14) NA MUNGGA

Yesu gaw hkye hkrang la ai wa, tinang hpe hkye hkrang la lu ai asak Madu, ngu, hkap la ai kun n hkap la ai kun, ngu ai lam hte seng ai Chyum mungga ni rai nga ai. Karai Kasang hpe kamsham hkap la nawku ai, ngu ai, Israel amyu masha ni gaw tara hte nhtan shai nna mara hta lup nan taw ma ai. Myit malai n hkraw ma ai, gumlau ai; dai gumlau amyu masha hpe Ezekiel hkaw tsun shadum jahprang ai. Shanhte myit malai n lu hkraw ai jahtum hta Yerusalem jahten kau hkrum ai; amyu masha ni mung Babylon de mayam tai na matu woi la hkrum ma ai.

Yesu hkum nan shi a amyu masha ni kaw na praw pru ai, amyu bung ai shada hpe shawng myit malai mungga, Kabu Gara Shiga hkaw tsun ai. Karpena-um hte grup-yin e daju shatai nna hkye hkrang la ai amu galaw hpang ai. Tawng marang mi na ai hpang, shi a buga Nazareth de htang wa ai. Shi a mare buga masha ni hkum nan Yesu hpe n hkap la ma ai_ dai laksama wa a kasha, chyum jawng n lung yu ai masha, madang tsaw hpaji hpa n sharin la yu ai masha, lawu lahta kahpu kanau ni mung hpa mi n laklai ai ni rai ma ai, ... ngu ai hku, Yesu hpe hkye hkrang la ai Madu, Messiah hku n hkap la lu ma ai. Yesu hpe hkye la Madu Messiah hku n hkap la ai ni kadai dai rai ma ta?

Nazareth masha ni zawn, gumrawng gumtawng ai ni, mauhpa lamik kumla ni hpe mu yu na yu ninglen n kamsham ai ni, Mungkan hpaji chye dum ai ni, Chum Laika chye ai, ngu, rai dum ai ni; tara sara ni: shanhte gaw tinang sawn sumri shadawn yu mai ai baw hta lai jan ai wenyi mungkan a lam hpe n kam lu ai ni rai ma ai.

Hkungga nawng jau ai jau ni, tara shadik dum ai hparishe ni: Karai Kasang hte grai ni dum, chyoi pra dum ai ni rai ma ai. Jau mama ni, tara hkaw sara/sarama ni, makam masham uhpung uhpawng hpe woi awn ai ni, ja ja sadi ra ma ai. Mung-up hkawhkam Herod, Pilatu, Du/agyi salang ni: arawng aya lu nna kaga masha ni hpe reng sha ai ni, kadai hpe hpa n nawn, tinang a arawng aya hpe maga mayu ai ni, mungkan sutgan hta manoi ai ni rai ma ai. Yesu hpe Hkye La Madu Messiah hku hkap la ai ni kadai kaning re ai ni rai ma ta?

Sagu rem ai matsan masha ni Yesu shangai wa ai lam hpe shawng chye la sa nawku ai ni rai ma ai. Nga hkwi sha ai ni hte sun hkauna galaw sha ai ni: Malawng gaw matsan masha ni rai ma ai, Sape 12 mung lawm ma ai. Hpaji ninghkring marai masum Messiah hpe hkan tam nna mu la ma ai: hpaji chye ninglen, grau ai mabyin hte grau ai wa hpe hkan tam ma ai. Asuya magam gun kang hta masha Zake-u hte Mahte: makan bungli a majaw shang gumhpraw mahkrun kaja lu ma timung, reng grau ai sutgan, jet ai asak a kumhpa hpe tam ai ni, tinang a arawng aya, lu lawm lam ni hpe asum hkam gwi ai ni rai ma ai. Nikodemus hte Arimathia buga masha Joseph_ amyu htunghking makam masham a rapdaw salang yan rai ma ai: Yesu hpe hkap la ai majaw, kaga rapdaw salang ni, jau ni a n ju n dawng ai lam hpe hkrum na chyalu. Rai tim, Yesu maga tsap ya ding-yang, jahtum du hkra Yesu maga tsap ya ma ai.

Karai Kasang hpe kamsham ai, Hkye La Madu hpe hkap la sai rai tim, jahtum du hkra kangka ai hku hkan nang na matu Karai a atsam chyeju ra ai. Dai Madu hpe hkap la sai, ngu tim, shani shagu na sak hkrung mahkrun hta jaw ai, teng ai, dinghpring ai, tara ai, chyoi pra ai hte n jaw ai, n tara ai, masu magaw ai... ninghtoi amu hte ningsin amu gara hpe lata la na? Dawdan ai lam galaw ra ai. Law law lang, tinang a akyu amyat, pyaw ngawn mayu ai, lu lawm mayu ai nhkan e, kadun ai hku, shut hpyit mara hpe lata la ai; dai gaw Madu hpe nyet kau ai lam rai nga ai. Gawng kya ai shinggyim masha ni, kangka ai hku jahtum du hkra sadi dung na matu, Karai kaw na shaman chyeju, Karai a atsam hkam la ra ai lam, lahkawng ngu na Chyum mungga hta San Pawlu sharin ya ai.

2021:PRAN WAN LADAW LABAN (14) NA CHYUM LAIKA

PRAN WAN LADAW HTA LABAN 14

July 4, 2021

CHYUM MUNGGA DAW 1

Ezekela 2:2-5

Ya hti na gaw, Ezekela a laika hta na rai nga ai.

Dai Wenyi gaw, ngai hta shang nna, shi ngai hpe tsap shangun nngai. Shaloi Madu tsun ai ga hpe, ngai na la se ai. Madu tsun ai gaw; Masha Kasha e, ngai hpe gumlau ai Israela a kashu kasha ni hpang de ngai nang hpe shangun dat nngai. Shanhte gaw, dai ni du hkra, kaji kawa ni hte hpawn, ngai hpe tut nawng e gumlau nna, shut hpyit nga ma ai.

Shanhte a kashu kasha ni mung, myit ja ai hte ngai hpe n kaw n law di ni ai rai nga ma ai. Ngai nang hpe shanhte hpang de shangun nna, nang gaw, Madu ning nga ai, ngu nna shanhte hpe tsun u. Shanhte gaw gumlau ai amyu rai nga nna, madat timung, n madat timung, shanhte hta e myihtoi nga nga ai hpe shanhte chye lu na mara ai.

Karai Kasang a Mungga rai nga ai.

CHYUM MUNGGA DAW 2

2 Korinhtu 12:7-10

Ya hti na gaw, Korinhtu masha ni hpang de San Pawlu shagun dat ai laika lahkawng hta na rai nga ai.

Karai Kasang ngai Pawlu hpe madun dan ai, kaba dik htum shingran lam a majaw, ngai nau wa n gumrawng u ga, ngai hpe abyen na matu, satan a salung sala ngu ai, nye a hkum shan hta ju ai aju ngai hkrum nga nngai; shing rai, ngai, nau wa myit n kaba nngai. Ngai gaw dai hta na lawt lu na matu, Madu hpe masum lang akyu hpyi nga nngai.

Dai rai nna Shi gaw, Nye a chyeju gaw, na a matu ram nga ai; kaning rai nme law, masha n-gun gaw kya ai hte nye a n-gun atsam hkum tsup nga ai, nga nna Madu ngai mhpe tsun ni ai. Dai re ai majaw, Hkristu a n-gun atsam, nye a ntsa e, a up nga u ga, nye a n-gun kya ai lam hta ngai grau nna shakawng nga nngai. Dai rai nna, Hkristu a jaw e hkam sharang ai, nye a n-gun kya ai, asawng asang ai, kyin dut ai, zingri zingrat ai hte, nni nhkri re ai lam ni hta ngai kabu nga nngai. Kaning rai nme law, ngai n-gun kya nga yang, n-gun atsam rawng nga nngai.

Karai Kasang a Mungga rai nga ai.

KABU GARA SHIGA

Marku 6:1-6

Ya hti na gaw, Marku a laika hta na Kabu Gara Shiga rai nga ai.

Yesu gaw Shi a buga de du wa ai; Shi a sape ni mung Shi kaw hkan nang ma ai.

Laban nhtoi du jang, tara jawng hta e shi sharin shaga hpang nga ai. Yesu a ga madat la ai ni malawng maga gaw, myit na kahpra ma ai. Shanhte gaw, Ndai wa gaw dai lam mahkra hpe kanang na lu la a ta? Shi lu la ai hpaji byengya gaw hpa baw rai nga a ta? Shi gaw anhte a laksama wa chyu sha rai nga ai; Maria a kasha hte, Yaku, Yosep, Yuda hte Simun a kahpu kanau mung rai nga ai, n rai ni? Shi a kanu kanau ni mung anhte hte rau nang e nga nga ma ai n rai ni? Nga nna Shi a lam hta myit kataw wa ma ai.

Yesu mahtang, Myihtoi gaw tinang a buga hta, tinang a mayu dama ni hte, tinang a nta hta n rai jang she, arawng lu nga ai, ngu nna shanhte hpe tsun mu ai. Machyi makaw hkrum ai n kau mi a ntsa e lata mara nna shamai ya ai hta kaga, dai yang e hpa magam amu hpe mung, shi n galaw lu ai. Shanhte a n kam n sham ai myit a majaw shi mau nga ai.

Madu a Kabu Gara Shiga rai nga ai.

2021:PRAN WAN LADAW LABAN (13) NA MUNGGA

Machyi ai, si ai, ngu ai gaw Karai e hpan da ai lam n re ai, ningpawt shut hpyit mara a majaw re ai mlam Hpaji Byeng-ya Laika hta tsun da ai. Grai ninggun lu hpa gaw ndai re. Karai a gawng shing-yan hte shabung nna masha hpe hpan da ai; shut hpyit mara a majaw sum mat ai n si lu ai asak hpe Yesu bai shaprawn ya ai. Yesu gaw machyi masha ni hpe shamai shatsai ya ai hta lai nna, si mat ai masha ni hpe jahkrung sharawt ya ai hta, asak Madu re ai lam, shi hpe kamhpa ai ni asak hkrung nga lu na lam sharin ya ai.

Dinghta ga e hkrung nga dingsa, machyi makaw, nni nkri, yawn hkyen shoi-hpa amyu hkum sumhpa hkrum katut na ga ai. Yesu hpe kamsham ai ni, shi hpang sit sa hpyi nem ai ni hpe Yesu galoi n kau da ai; hkum hkrang, myit masin ana ahkya, wenyi a ana ahkya shut hpyit mara, myit masin wenyi machyi si ai,... ndai zawn re hten bya lam yawng kaw na shalawt dat hkrum na lam, Chyum Mungga masum hte kaw na sharin la lu ga ai. Nawku jawng reng hkang ai salang wa gaw, asak 12 ning re ai kasha si maw ai majaw, shagrit shanem ai myit hte Yesu kaw hkum nan sa du hpyi nem ai. Kaga Yuda salang ni, makam mmasham ningbaw ni hpa ngu na, gara hku shatan jahpyak na lam hpe n matang ai, shagrit shanem ai myit hte Yesu hpe sa hkrum ai. Mare de n du shi yang masha nkau mi shi hpe bai hkap shingdang ma ai, “Ningsha si mat sai; Sara hpe hpa hkum shatsang sa”, nga ai.

12 ning tup sai htaw ana kap ai numjan mung, htung tara madin, amyu shayi ni hpe gyit hkang da ai tara, hkrit kaya ai lam ni kaw na lamat pru wa ai; Yesu a palawng nchyan hpe sa ahtawk ai. Numsha ni la langai hpe dai hku n mai galaw ai; dai hta grau ai gaw sai htaw ana lu ai numsha re ai majaw, makam masham htung hta n san n seng ai wa rai nga ai. Hkrit kaya hpa, gyit hkang ai tara ni kaw na lamat pru ai; Yesu hpe ahtawk hkra ai jang e mai tsai mat ai. Yesu gaw, shinggyim masha ni hpe n jaw n ang ai hku gyit da ai tara ni, htung lailen ni kaw na shalawt dat ya ai wa rai nga ai; yawng hta grau nna si ai kaw kre shangun ai shut hpyit mara kaw na shalawt dat ya na matu re.

San Pawlu gaw, shut hpyit mara hpe tai lu, dang kau lu ai lam mahkrun hpe madun dan ai. Tsawra matsan dum garum shingtau hkat ai amu re. Palestine e hku hku ai majaw shat hpa n sha ai ni a matu Pawlu gaw Korintu masha ni kaw na alu hpyi lajin ya ai. Shada tsawra matsan dum chye ai, garum shingtau hkat ai amu gaw tinghkeng myit, ra marin ai myit, n ju n dawng ai myit ni hpe tsi shamai ya lu ai lam hpe shadum ya ai

2021:PRAN WAN LADAW LABAN (13) NA CHYUM LAIKA

PRAN WAN LADAW HTA LABAN 13
June 27, 2021
CHYUM MUNGGA DAW 1

Hpaji Byeng-ya 1:13-15, 2:23-24

Ya hti na gaw, Hpaji Byeng-ya laika hta na rai nga ai.
Madu Karai Kasang gaw si hkrung si htan lam hpe, n shabyin da sai rai nna, hkrung nga ai ni hpe jahten shabya ai lam shi ra sharawng ai n rai. Nga yawng nga pra ahkrung nga na matu, Karai Kasang shanhte hpe hpan da nu ai majaw, sat kau lu ai agung shanhte hta n rawng nga ai; katsan ga na ni mung ndai dinghta ga ntsa e ahkang aya n lu ma ai; kaning rai me law, ding hpring ding man ai lam htani htana e agrin nga ai. Madu Karai Kasang gaw Shi a ahpraw nsam hte bung hkra shinggyim masha hpe shachyaw da sai rai nna, dai masha wa hpe si n chye ai hku shi hpan da nu ai. Raitimung, nat a manawn masham myit a majaw, si hkrung si htan mungkan ga e shang wa nna, nat a hpang maga hkan lawm nga ai ni gaw, dai lam hpe chye chyang wa na mara ai.
Karai Kasang a Mungga rai nga ai.

CHYUM MUNGGA DAW 2

2 Korinhtu 8:7, 9, 13-15

Ya hti na gaw, Korinhtu masha ni hpang de San Pawlu shagun dat ai laika lahkawng hta narai nga ai.
Nanhte gaw makam masham hte ga shaga ai hta,chye chyang ai hte shakut sharang ai lam amyu myu hta, anhte hpe tsawra ai lam hta mung, ndai lam shagu hta hkum tsup nga myit dai.
Dai rai nna, (Yerusalem mare na matsan mayan ai hpung masha ni hpe bau garum ai.) ndai tsawra dum ai lam hta, nanhte dang ai daram garum ya na hpe myit mada nga ga ai.
Ndai amu hta e, masha kaga hpe kyindut ai shaloi garum ya ai majaw, nanhte nan kyindut hkrum na hpe ngai tsun nga nngai n rai; maren mara rai na lam hpe ngai myit nga nngai. Ya e, nanhte a jan gaw shanhte a taw ai hta shang lu na rai nga ai. Dai hku galaw yang, maren mara rai na ra ai. Shing rai, ‘Law law hta la ai wa jan ai n rai, Loi mi hta la ai wa mung naw ra nga ai n rai,’ nga nna Chyum Laika hta ka da ai hte maren dik wa na ra ai.
Karai Kasang a Mungga rai nga ai.

KABU GARA SHIGA

Marku 5:21-43

Ya hti na gaw, Marku a laika hta na Kabu Gara Shiga rai nga ai.
Yesu gaw, li hte wora hkran de bai rap wa yang, masha unawng uwa kaba Shi kaw sa hpawng ma ai. Dai nawng makau e, Shi naw nga ai. shaloi, tara jawng agyi ni hta na, Ya-iru mying ai masha langai mi sa du nna, Yesu hpe mu jang, shi a lagaw nhpang e dingnyawm nna, Nye a shayi sha kaji si wa magang nga ai; shi bran wa nna, naw ahkrung nga na matu, shi a ntsa lata sa mara ya rit, ngu nna akroi anoi shi hpe hpyi nem wu ai. Dai rai nna mYesu shi hte rau sa wa ai; masha wunawng kaba mung, Yesu kaw hkan gum bawm nna, shanhte gaw shi hpe kanawng matep hkra mmu ai. Shi lahkawng ning tup sai htaw machyi ai numsha langai mi mung lawm nga ai, shi gaw tsi sara law law a lata hta nni nkri law law wa hkrum ai hte, shi lu malu mahkra hpe shama kau timung, n mai mat lu ai sha, grau nna yak wa lu ai. mDai num sha gaw Yesu a lam na yang, shawa hpawng hta e Madu a shingdu maga de sa du nna, Shi a hpun palawng hpe ahtawk wu ai. Kaning rai n me law, shi gaw, Dai Sara wa a hpun palawng hpe chyu sha ngai ahtawk lu jang, ngai mai wa na nngai, nga ai. Shaloi jang, sai htaw ai a npawt pat mat wa nna, shi a atsu atsam mai mat ai hpe, shi a myit hta e dum chye wu ai. Yesu gaw Shi hta na atsam pru wa ai hpe, Shi a myit hta shaloi jang chye dum ai majaw, dai shawa hpawng de kayin yu let, Nye a hpun palawng hpe kadai ahtawk ya sai i? ngu nna san mu ai. Dai rai nna, Shi a sape ni gaw, shawa masha ni Nang hpe kanawng matep hkra nga ai hpe, Nang mu nhtawm e, Ngai hpe kadai ahtawk ya a ta? naw nga n hka i? ngu nna Shi hpe htan mu ai. 32Yesu mahtang, shi hpe ahtawk ai kadai re ai chye na matu naw kayin yu nga ai.
Shaloi dai numsha gaw, shi hta byin ai amu hpe chye chyang mai majaw, hkrit gari let sit sa nna, Yesu a man e dingnyawm mnhtawm, shi a lam mahkra hte hpe tengman ai hku tsun dan wu ai. Yesu mahtang, shayi sha e, na a kam sham ai gaw nang hpe shamai ya nit dai; nang machyi ai ana ahkya hta na lawt lu nna, mngwi pyaw ai hte wa nu, ngu nna shi hpe tsun dat wu ai. Yesu dai ga hpe naw tsun nga yang, Dai tara jawng agyi a nta de na, masha nkau mi sa du nna, Na a shayi sha si mat sai; dai Sara hpe hpa majaw naw shatsang nga n ta? ngu mu ai. Yesu mahtang, mdai masha ni tsun ai ga hpe na jang, hkum hkrit et; kamsham ai mmyit sha rawng u, ngu nna tara jawng agyi wa hpe tsun wu ai.
Shaloi, Petru, Yaku hte Yaku a kanau Yawhan hta kaga, shi kaw mhkan nang na ahkang kadai hpe mung n jaw mu ai. Ya, dai tara magyi a nta de, du yang, kaming kamawng re ai, hkrap ngu hkrap ngoi ai hte sharung shayawt kaba hpe Yesu mada mu wu ai.
Shi nhku de shang wa yang, nanhte hpa rai nga myit ta? Ma gaw si ai n rai, yup pyaw nga ai, ngu nna shanhte hpe tsun mu ai. Shanhte chyawm gaw shi hpe asawng asang ngu kau mu ai. Yesu mahtang yawng hte hpe shaden kau ngut jang, dai ma a kanu yan kawa hte shi a manang masum hpe shaga la nna, dai ma taw nga ai shara de shang wa ma ai. Shaloi, dai ma a lata hpe mShi jum nna, Talihta Kumi, ngu wu ai; de a ga lachyum gaw, Ma e, ngai nang hpe tsun de ai, Rawt u, ngu ai rai lu ai. Shaloi jang dai numsha ma rawt hkawm wa ai; shi a aprat gaw shi lahkawng ning rai nga ai. Shingrai shanhte nachying mau mahka mat ma ai.
Dai lam hpe kadai mung n chye mu ga, Yesu shanhte hpe grai ginhtim da mu ai; dai hta kaga, ma hpe shahpa jaw na shi htet da mu ai.
Madu a Kabu Gara Shiga rai nga ai.

2021:PRAN WAN LADAW LABAN (12) NA MUNGGA

Covid ana zinli gara hku byin wa ai kun? Anhte a mungdan masha ni shaning law law matsan jamjau nga ai hta mung masa a kajawng sha galai shai wa nna shada hkrit tsang hkat ra ai; mungdan hpe up ai she nga yang mung masha ni hpe majoi sat agrawm kau wa ai; n tara ai masha ni wa, tara ai, dinghpring ai ni hpe mara shagun jeyang ma ai; dinhpring ai ni matsan jamjau hkrum nna masu magaw ai ni sut su nga pyaw nga ma ai. Ndai zawn mungkan e byin nga ai mungkan ga na masa hpe yu nna myit daw hpa byin chye ga ai. Ndai zawn, mahtai jaw na yak hkak ai hta Yoba gaw shi hta byin ai mahkrum madup kaw na mahtai shapraw shakut ai.

Myi hte mu lu ai jan, shata, shagan, lamu marang ni a lam hpe pyi yu gawn mahtai n jaw lu ai Yoba gaw Karai Kasang hpe hpa ngu n htan ya lu nu ai. Hpang jahtum, marai langai hpra hta byin wa ai gam maka ni hta, Karai Kasang hpe tsawra kamhpa myit, Karai e sing da ai maka hpe aput a-ngun n galaw ai sha hkap la ai gaw jaw dik sai, nga, sharin ya ai. Yoba gaw shi hta byin wa ai prat a maka hpe hkap la ai a marang e, jahtum hta mi lu ai sutgan, kashu kasha ni hta htam lahkawng n-ga bai lu la ai. Chyam dinglik hkrum ai aten ni hta myit n daw ai, Karai a mai kaja ai lam hpe kam ding-yang re ai ni kaman n tai na lam hpe sharin ya ai.

Panglai (Galile Nawng) hpe rap nga ai aten hta nbung laru hkrum katut ai Sape ni gaw sanghpaw kasha n lup mat na matu, asak lawt daw shakut shaja ma ai. Shing re ai aten hta yup pyaw nga ai Madu hpe jasu la nna, “Madu e, anhte lup magang wa nga ai; nang hpa n matang ai kun? Hpa n galaw ya ai kun?” ngu, loi pawt ai, angun ai hku tsun dan ma ai. Yesu gaw nbung laru hpe shawng shazim kau nna sape ni hpe daru ai, “Nanhte hpa rai dai daram hkrit mi ta? Nanhte a kamsham myit kanang du mat a ta?” nga ai.

Anhte ni mung, chyam dinglik ai hkrum ai aten hta, n myit mada ai hten bya lam, manghkang kaba hkrum ai aten hta, machyi jamjau hkrum ai aten hta, Karai Kasang gaw mu nga ai kun? Tinang a akyu hpyi ga hpe gaw madat ya nga ai kun? Grup yin e byin nga ai mung masa, sut-masa, ana zinli, sat hkat nat hkat rai nga ai aten hta anhte myit mada ra sharawng ai hku Karai Kasang hpa n galaw ya ai, ngu nna aput angun tsun chye ga ai. Yesu a sape ni gaw shanhte a madu, shanhte a sara, asak madu shanhte hte arau sha rai nga ninglen, lup si mat na grai tsang kau ma ai; dai majaw Yesu shanhte hpe daru ai.

Galoi kaning re ai aten hta rai tim, anhte a Madu, dai Hkristu hte arau sha myit masin shabawn nna asak hkrung nga ga ai rai yang, Shi hpe kamsham ai ni kaya n hkrum na, nga ai ga hpe kam ai rai yang, grup yin e hpa wa byin nga tim, tinang hkum nan machyi jamjau hkrum sha ai rai tim, Madu hte arau rai nga ga ai, ngu ai hpe hkrak tup kam ai rai yang, myit ru hkrit tsang myit daw ai lam n nga na rai nga ai. Korintu Laika hta San Pawlu shadum ya ai mung, Hkristu a tsawra myit a marang e, anhte yawng a matu si hkam nu ai, nga ai. Yesu Madu hta asak sumdan ningnan lu la saga ai. Hkrung tim dai Madu a matu, si tim dai Madu a matu rai ra ga ai, nga ai.