2021:PASKA LADAW LABAN (3) NA MUNGGA

Shawng na bat hta, Yesu shawng na lang Sape ni hpe shadan dan ai lam Yawhan a Kabu Gara Shi-ga kaw na chye la sa ga ai; ndai bat hta gaw Luka a Laika kaw na mabyin ni hpe sumru yu na ga ai. “Dai lam ni tsun jahta nga ma yang Yesu gaw shanhte hpe shadan dan ai” Ema-u Mare de htang wa mat ai Sape marai lahkawng, hkrun lam ntsa Yesu a lam tsun jahta nga ma yang, Yesu shan hpe shadan dan ai; shan gaw mare de n matut hkawm ai sha Yerusalem de bai htang wa ma ai. Sape ni a hpawng hta dai lam tsun jahka dan ma yang Yesu gaw shanhte yawng hpe bai shadan dan ai. Yesu a lam tsun jahta shagu,

Missa aten hta, akyu hpyi ai aten hta, Chyum Mungga hti ai, tara hkaw ai, akyu hpyi hpawng hta,... Yesu hpe anhte n mu lu ga ai rai tim, Shi teng sha hpawng lawm ai. Paska ladaw hta hkrung rawt sai Yesu a lam hpe law law tsun jahta mai nga ai.

“Nanhte hpa rai myit ru myit tsang ai hte ung ang nga mi ta?” Myit ru masin kahpra na lam ni teng sha nga ai; ung ang na lam ni mung teng sha nga ai. Hpyen ni hpe gaw hkrit tsang ra, Yesu shanhte a Madu a lam, hkrung sai zawn nga gaw teng ai kun, ngu nna ung ang na sha rai nga ai. Sape ni hte naw nga ai aten ni hta “Hkum hkrit mi” nga nna law law lang tsun lai wa sai; rai tim, ya Shi hte arau n rai sai lam dum ma yang, hkrit wa ma ai. Anhte mung, Yesu a ga hpe kam ga ai, ngu tim, kaja wa sha myit ru myit tsang-hpa law law hkam sha na ga ai. Anhte a myi hte n mu lu ga ai rai tim, Shi Madu anhte hte galoi mung nga nga ai lam hpe shadum ya ai. Hkrung rawt sai Madu gaw hkum shan hte re ai lam, nga kakang sha dan nna masha teng ai lam hpe madun dan ai. Wenyi mungkan na re ai majaw, Karai Kasang mung re ai lam hpe madun dan ai.

“Nanhte gaw dai lam ni a sakse rai mi ai” Moshe e tau nau tsun da ai ga ai, kaga myihtoi ni sakse hkam dan ai lam yawng, Yesu hta dik wa ai lam, Hkristu gaw Hkye La Madu Messiah re ai lam ung ang shara n nga ai. Dai Hkristu a mying ningsang hta shut hpyit mara raw dat hkrum ai lam, hkye hkrang la ai lam majing gaw shut hpyit mara kaw na shalawt mdat hkrum ai hta dik wa ai lam rai nga ai. Chyeju hkam la sai ni yawng gaw Hkristu Yesu a lam sakse hkam ya ra ga ai.

2021:PASKA LADAW LABAN (3) NA CHYUM LAIKA

PASKA LADAW HTA LABAN 3
April 18, 2021
CHYUM MUNGGA DAW 1

Kasa 3:13-15, 17-19

Ya hti na gaw, Kasa laika hta na rai nga ai.
Petru gaw shawa masha ni hpe tsun ai gaw: Israela masha ni e, Abraham, Isak hte Yaku a Karai Kasang nga ai, anhte a ji wa ni a Karai Kasang gaw, Shi a Shangun Ma Yesu hpe yawng mayawng hta grau ai hpung shingkang jaw ya nu ai: nanhte mahtang dai Yesu hpe ap kau myit dai rai nna, Pilatu shi hpe dat kau na myit da yang, nanhte gaw Pilatu a man e dai wa hpe nyet kau myit dai. Dai chyoi pra ai hte ding hpring ai wa hpe nanhte mara shagun da nna, masha sat ai wa hpe mahtang hpyi la nhtawm, asak Madu hpe nan sat kau myit dai. Karai Kasang chyawm gaw si ai ni kaw na shi hpe jahkrung sharawt la nu ai: anhte mung dai lam a sakse ni rai nga ga ai.
Ya rai ti mung, hpu nau ni e, nanhte hte nanhte a du salang ni dai lam hpe n chye nna galaw kau ai hpe ngai chye nga nngai. Dai gaw, Karai Kasang a Hkristu nni nkri hkrum na ra ai nga nna, myihtoi ni yawng a n-gup hte, Karai Kasang shi nan tau tsun ai lam hpe hkan shadik ai rai nga ai. Dai rai nna, nanhte a shut hpyi mara raw mat na matu, myit malai lu nna, Karai Kasang hpang de kayin wa marit, ngu nna Petru hkaw tsun dan wu ai.
Karai Kasang a Mungga rai nga ai.

CHYUM MUNGGA DAW 2

1 Yawhan 2:1-5

Ya hti na gaw, Kasa Yawhan shagun dat ai laika langai hta na rai nga ai.
Ngai shu ngai sha ni e, nanhte shut hpyit mara n galaw myit ga, ndai shadum ai ga nanhte hpe ka dat nngai. Rai ti mung, masha langai ngai mara galaw hkrup sayang gaw, Kawa a man e anhte a matu htinglu htinglai ya ai wa anhte lu ga ai: dai wa gaw Yesu Hkristu ngu ai, ding hpring ai Madu rai nga ai.
Dai Yesu Madu gaw anhte a mara hpe la kau ya ai gawng malai hkungga rai nga ai; anhte a mara hpe sha n rai, mungkan ting a mara hpe mung shi gun la kau ya ai. 
Karai Kasang hkang da ai ga hpe anhte hkan shatup yang gaw, Shi hpe chye chyap nga ai hpe anhte chye lu ga ai. 
Ngai shi hpe chye chyap nngai nga nna, marai langai ngai tsun ti mung, Karai Wa hkang da ai ga hpe n hkan shatup yang, dai wa gaw tengman ai hpe n hkap la ai majaw, masu ai wa rai nga ai. Kadai rai ti mung, Karai Kasang a mungga hkan yang gaw, Madu a tsaw ra ai lam dai wa hta e kaja wa teng teng hkum tsup wa salu ai.
Karai Kasang a Mungga rai nga ai.

KABU GARA SHIGA

Luka 24:35-48

Ya hti na gaw, Luka a laika hta na Kabu Gara Shiga rai nga ai.
Yesu bai hkrung rawt ai shani e sape lahkawng gaw Ema-u mare de sa wa ma ai. Yerusalem mare de bai wa nhtawm, shan sa wa nga yang byin ai lam ni hte, muk ahkyep karan jaw ai shaloi Yesu re ai chye lu ai hpe mung, kasa shi langai hpe tsun dan ma ai. Dai lam hte hpe shanhte jawm tsun nga yang, Yesu hkum nan shanhte a ka-ang e tsap nga nna, Nanhte ngwi pyaw nga myit ga, ngu nna shanhte hpe tsun mu ai. Sape ni chyawm gaw kajawng ai hte hkrit mat ma ai rai nna, Minla mu ga ai nga nna myit nga ma ai. Yesu gaw, Nanhte hpa rai myit ung ang nga myit ta? Ngai nan rai nga nngai, Nye lata hte lagaw hpe yu yu mu: ngai hpe masawp yu mi; minla ngu ai gaw, ngai hpe nanhte mu ai zawn, ashan hte nrut nra rawng ai n rai, nga nna sape ni hpe tsun nhtawm, shi a lagaw lata ni shanhte hpe madun dan mu ai. Shanhte gaw nau kabu lai nna n kam lu ai majaw, mau let tsap nga ma ai. Dai rai nna Yesu gaw, Nang e shahpa lama mi lu myit ni? ngu nna shanhte hpe san mu ai.
Shaloi nga kakang daw mi shanhte shi hpe jaw sa mu ai. Shi gaw dai la nna, shanhte a man e sha dan nga ai. Shaloi Yesu gaw, Mawshe a tara hta, myihtoi ni a laika hte Shakawn Kungdawn Laika hta mung, ngai hpe sha-ang nna ka da ai lam mahkra dik wa na rai nna, nanhte hte rau ngai naw nga yang, ngai nanhte hpe tsun ai Mungga a lachyum ndai rai nga ai, ngu nna shanhte hpe tsun mu ai. Shaloi Chyum Laika ga ni hpe chye na lu na matu, shi shanhte a myit hpaw ya nna, Hkristu gaw yubak nni nkri hkam la nna, masum ya nhtoi hta si ai ni kaw na bai hkrung rawt wa na ra ai, ngu nna ka da ai lam hpe mmung myit dum nga mu. Yerusalem mare hta e hkaw hpang nga mu: nanhte gaw ndai lam ni a sakse ni rai nga myit dai, ngu nna Yesu gaw shi a sape ni hpe tsun dat mu ai.
Madu a Kabu Gara Shiga rai nga ai.

2021:PASKA LADAW LABAN (2) NA MUNGGA

Shanhte gaw, hkrit ai majaw chyinghka pat nna nga nga ma ai: Yesu gaw Sape ni hpe “Hkum hkrit mi” nga, grai lang tsun da ai. Yesu a atsam hpe mung chye ma ai. Rai tim, shanhte hkrai rai sai, mngu, hkam sha ai majaw hkrit makoi nga ma ai. Hpa n shut ai. Hkan rim, gyit, adup abyen, zingri sat kau na lam yawng gaw hkrit ai hkrai re. Nanhte myit simsa nga mu! shimlum nga mu! Hkrit maja nga ai Sape ni kaw Yesu dan pru dan ai; myinla rai kun, shingran rai kun, ngu, ung ang ai lam n nga na matu Yesu gaw Shi a lagaw hte wunma hpe madun dan ai. Yesu gaw hkum shan hte nawng hkrung rawt sai lam hpe hkrak chye lu ai majaw, Sape ni kabu ma ai.

Ninggun kya ai masha ni, Karai a chyeju hte sha n rai yang, dinghta ga e mu lu na lu ai hta jan ai kaga mungkan a lam n chye lu ai. Sape ni a myit-ru myit-tsang ai lam hpe jahkoi kau na matu Yesu gaw shanhte hpe shadan dan ai. Karai e jaw ya ai simsa shimlum lam hta lai nna anhte tam la ai, shada jaw hkat lu ai simsa shimlum lam gaw n kup tsup lu ai. Kade kaning re ai hkrit-hpa tsang-hpa hta rai tim, Yesu jaw ya ai shimlum lam gaw galoi mung kamhpa ging nga ai.

Chyoi Pra Wenyi hpe hkap la mu! Wenyi asak hkrung lu na matu, Chyoi Pra Wenyi a chyeju kumhpa ni hkrak sha ra ga ai. Adam hte Ewa mhpe hpan ai shaloi, ga hkumpup hte hkrang shachyaw nna Karai e nsa kawut bang ai shaloi hkrung ai masha tai wa ai, nga ai. Hkrung rawt ai hpang Yesu jaw ya ai kumhpa ni hta, shawng na chyeju kumhpa mung rai nga ai. Ninggun kya ai masha ni, kalang sha hkam la nna prat tup a matu law sai, ram sai n rai. Kahtap kahtap nna hkam la ra ga ai. Yawn hkyen myit malai lu nna mara tawngban ai hte asak ningnan lu la ai; mara raw dat ya ai lam hkam la lu na matu, dai Chyoi Pra Wenyi kade ahkyak a ta? Shinggyim masha re ai Sape ni hpe shut hpyit mara raw dat ya na ahkaw ahkang jaw da ai, mau-hpa chyeju n rai a hka!

Htawma hpe tsun ai, “N mu tim kamsham ai ni a lu ma ai” Tinang a prat ting hta alak alai re ai Karai Kasang kaw na lamik kumla hpa langai mi mung mahkoi n hkam sha yu. Akyu hpyi ninglen ja lungseng n awng ai; machyi n mai hkraw ai; awng dang ai lam nau n mu lu ai,.... Nawku Hpung a sharin shaga lam ni, mungsung ni, n chye na ai lam kade she law; tinang hta byin lai wa ai mahkrum madup ni hta mung, makam masham mahkrun hku shadawn yu nna chye na hkap la yakhkak dum ai mabyin ni kade she law. Myihtoi Habakuk tsun ai, “Dinghpring ai ni gaw kamsham myit hte asak hkrung nga lu na”, nga ai.

2021:PASKA LADAW LABAN (2) NA CHYUM LAIKA

PASKA LADAW HTA LABAN 2
April 11, 2021
CHYUM MUNGGA DAW 1

Kasa 4:32-35

Ya hti na gaw, Kasa Laika hta na rai nga ai.
Kam sham ai shawa hpung ting gaw myit mang langai sha rai nga ma ai: kadai mung, tinang lu ai arai hpe, nye a n tsun ai sha, yawng mayawng hpe jawm lang ma ai. Kasa ni mung Madu Yesu bai hkrung rawt ai lam hpe, atsam kaga hte sakse hkam ya ma ai rai nna, masha ni a man e shanhte mahkra myiman pa nga ma ai. Dai hta n-ga, hpung masha ni mhta kadawn ai masha langai mi pyi n nga ai; kaning rai nme law, ga htingra lu ai ni, nta lu ai ni kadai mung, dai dut nna lu la ai gumhpraw hpe, kasa ni kaw sa ap ya ma ai. Dai rai nna, kadawn ai wa kadai hpe mung, rap shara nna, karan jaw karan ya ma ai.
Karai Kasang a Mungga rai nga ai.

CHYUM MUNGGA DAW 2

1 Yawhan 5:1-6

Ya hti na gaw, Kasa Yawhan shagun dat ai laika langai hta na rai nga ai.
Tsawra ai ni e, Yesu gaw dai Hkristu nan rai nga ai, nga nna kam sham ai wa kadai rai timung, Karai Kasang a kasha rai nga ai. Kawa hpe tsawra ai wa gaw, Kawa e shaprat ai kasha mahkra hpe tsawra nga ai. Karai Kasang hpe tsawra ai hte, Shi hkang da ai ga hpe hkan shatup yang gaw, Karai Kasang a kashu kasha ni hpe anhte tsawra nga ga ai hpe chye lu ga ai.
Kaning rai nme law, Karai Kasang hkang da ai ga hpe hkan shatup ai gaw, Shi hpe tsawra ai lam madung rai nga ai. Shi hkang da ai ga mung yak la nga ai n rai: hpa majaw nga yang, Karai Kasang a kasha kadai rai ti mung, mungkan ga hpe dang kau nu ai. Mungkan ga hpe dang kau lu ai padang lam gaw anhte a makam masham rai nga mali ai. Kaning rai nme law, mungkan ga hpe kadai wa dang kau lu a ta? Yesu gaw Karai Kasang a Kasha rai nga ai hpe kam sham ai wa chyu sha, mungkan ga hpe dang kau lu ai.
Dai Yesu Hkristu gaw hka hte mung, sai hte mung sa du ai wa nan rai nga ai; hka hte sha n rai, hka hte mung sai hte mung Shi sa du nga ai. Chyoi Pra ai Wenyi mung tenman ai npawt rai nga ai majaw, dai wenyi nan shi a matu sakse hkam ya nga ai. 
Karai Kasang a Mungga rai nga ai.

KABU GARA SHIGA

Yawhan 20:19-31

Ya hti na gaw, Yawhan a laika hta na Kabu Gara Shiga rai nga ai.
Dai laban bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sayang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape ni mung Madu hpe mu lu yang, kabu gara nga ma ai. Bai, Yesu gaw, Nanhte ngwi pyaw nga myit ga; nye a Wa ngai hpe shangun dat ai hte maren, ngai mung nanhte hpe shangun dat made ai, ngu mu ai. Shing nga nhtawm sape ni a ntsa e nsa kawut nna, Chyoi Pra ai Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara hpe rai ti mung, nanhte shagun da yang gaw, dai mara naw nga na ra ai, ngu nna shanhte hpe tsun wu ai. Shing rai Yesu sa du ai shaloi, kasa shi lahkawng hta lawm ai, Marun Ma ngu ai Htawma gaw, shanhte hte rau n nga ang ai. Dai rai nna kaga sape ni shi hpe, Anhte gaw Madu hpe mu lu saga ai, ngu nna tsun dan mu ai. Htawma chyawm gaw, Shi a lata hta hpri hkang hpe ngai n mu, dai hpri hkang hta nye a layung n shawn yu, yang gaw, ngai n kam nngai, nga nna shanhte hpe tsun wu ai.
Dai hpang matsat ya du jang, Yesu a sape ni nhku e bai hpawng nga ma ai rai nna, Htawma mung shanhte hte rau lawm nga ai. Chyinghka la da ti mung, Yesu sa du nna, shanhte a ka-ang e tsap let, Nanhte ngwi pyaw nga myit ga law, ngu wu ai. Shaloi, shi gaw Htawma hpe, na a layung nang de ladawn nna, Nye a lata hpe yu yu u; na a lata ladawn nna Nye a karep hta bang yu u; n kam n sham ai myit hpe kau da nna, kam sham u, ngu wu ai.
Dai rai nna, Htawma gaw, nye a Madu, nye a Karai rai nga ndai, ngu nna shi hpe htan wu ai. Yesu gaw, Htawma, nang ngai hpe mu lu ai majaw, kam sham nit dai; n mu lu ti mung kam sham ai ni gaw a lu ma ai, ngu nna shi hpe tsun wu ai.
Ndai laika hta n ka da ai lamik kumla kaga law law mung, Yesu gaw shi a sape ni a man e galaw dan nu ai; rai ti mung, Yesu gaw Karai Kasang a Kasha hte dai Hkristu nan rai nga ai hpe kam sham nna, Shi a amying ningsang a marang e asak hkrung ai lu la myit ga, nga nna ndai hte wa ka tawn nga ai.
Madu a Kabu Gara Shiga rai nga ai.

2021:PASKA POI SHANI NA MUNGGA

“Lup hpungkraw” Yesu a sape ni, Shi hpe kamsham ai ni a matu, myit mada shara n nga sai zawn nga hkam sha na ma ai. Kadai hpe kam shamyet na matu n mu; Yuda makam masham ningbaw ni shanahte hpe sa rim la na gaw hkrit tsang ra. Ndai zawn rai ningsin chyip, nga ai aten hta, amyu shayi nkau mi lup de sa yu ma ai. Shanhte hpa myit lu nna sa yu ma ai kun? Kasa tai na ni, ningnan re ai Hkristan makam masham hpe woi awn ningbaw tai na ni pyi gaw hkrit makoi nna nga nga ma ai.

Kaja wa sha, Yesu hpe wudang ntsa jen da ai shaloi, Yawhan hta lai nna kaga Sape ni hprawng yen mat ma ai; Petru gaw tsan tsan kaw na sa yu ai da. Kamsham ai amyu shayi ni gaw wudang nhpang e sa tsap yu lawm ma ai; dai hta n’ga, moi mang hkum tsawp hpe mung mawn sumli nna lup makoi mayang ai kaw mung lawm ma ai. Hpa lam a majaw rai rai, dai amyu shayi ni hpe shakawn ging ga ai: nden ja magrau grang ai, kamsham tsawra myit kaba ai, ngu, hkrak tsun lu ai. Petru hte Yawhan: Petru gaw hkrit makoi nga ai rai tim, teng sha, kaga Sape ni hpe zinlum woi ai; ngam ai Sape ni gara hku nga na, hpa galaw mai ai, ngu ai lam ni hpe matsun woi ai. “Lup hpungkraw” a lam na lu ai hte kajawng ai, myit kahpra ai, hpa byin sai kun, ngu ai lam, shi ningbaw wa chye ra ai. Dai majaw lup de kagat sa yu ai; myi chyaw sa mu tim hpa re ai n chye shi ai. Yawhan gaw mu ai hte lachyum chye na ai; dai majaw, shi ka da ai hta dai aten du hkra Sape ni kamsham myit ningra ai lam ka da ai.

Petru, Yawhan, amyu shayi ni: Petru gaw chye na myit hprang ai lam hta lanyan ai rai tim, tengman ai lam hpe chye lu hkra shakut ai, dawdan n shut na ahkyak ai lam shi chye ai. Sape ni dumbri dumbra n byin hkra woi zinlum ai; man e ang wa ai amu ni hpe lawan ladan galaw chye ai, dai majaw hkum nan lup de sa yu ai. Yesu hkrung rawt sai lam n tsun shapraw woi ai. Yawhan gaw myit hprang chye chyang lawan ai. Galoi mung ningbaw wa hpe shara jaw ai; lup de du yang Petru hpe shawng shang shangun ai. Mu ai hte kamsham ai rai tim, Yawhan mung, ningbaw wa n tsun shi yang “Yesu hkrung rawt sai”, ngu, n tsun shabrawng ai. Grit nyem ai myit rawng ai; ningbaw hpe hkung ga chye ai, shara jaw chye ai.

Ninggun kya ai amyu shayi ni hpe mung Karai Kasang gaw akyu jashawn ai. La ni n galaw lu ai, n gwi ai amu ni hpe dai amyu shayi ni galaw shatup ma ai. La ni dawdan gwi, galaw gwi na matu shanhte jasu jahprang ya ai, ninggun jaw madi shadaw ya ai. Hkrung rawt ai Madu a lam shawng shawng sakse hkam ya ai ni tai wa ma ai.

Myit sumru mai ai lam ni_

Tinang ang ai shara/ lit magam hpe woi awn ga yang tinang a gawng kya ai lam ni hpe dum chye yin la ga ai kun? Kade n gwi tim, hkrit ai rai tim, ningbaw langai mi galaw ra ai amu ni hpe lawan ladan galaw chye ga ai kun?

Uhpung uhpawng hta chye chyang kunghpan ai ni, bawnu grau sam ai ni, Yawhan kaw na hpa hpa kasi la mai a ta?

Amyu shayi ni Nawku Hpung hpe gawgap ai sasana magam ni hta kade ahkyak ai, kaning re ai myit jasat the shang lawm mai ai, ngu ai lam ni hpe myit sumru yu mai ai.

2021:PASKA POI SHANI NA CHYUM LAIKA

PASKA POI SHANI YESU BAI HKRUNG RAWT AI NHTOI
April 4, 2021
CHYUM MUNGGA DAW 1

Kasa Laika 10:34a, 37-43

Ya hti na gaw, Kasa Laika hta na rai nga ai.
Roma hpyen du Korinliu a nta e, Petru ga hpaw nna, shanhte hpe hkaw tsun dan ai gaw. Yawhan kashin kamun lam hkaw dan ai hpang, Galile mung kaw nna Yuda mung ting kajai gara wa ai lam hpe, nanhte chye nga myit dai: dai gaw, Nazaret na Yesu a lam rai nga ai. Karai Kasang gaw, Chyoi Pra ai Wenyi hte mung, n-gun atsam hte mung, shi hpe chya ya wu ai; Karai Kasang shi hte rau nga nga ai majaw, mai kaja ai amu ni shi galaw nna, nat gunglau e zingri zingrat hkrum ai ni yawng mayawng hpe shamai ya let kawan katsan hkawm nga ai.
Shing rai, Yuda mung ting hpe Yerusalem mare hta e, shi galaw ai amu yawng mayawng a sake ni anhte rai nga ga ai: dai wa hpe nan shanhte hpun hta jen sat kau mu ai; Karai Kasang chyawm gaw masum ya nhtoi hta shi hpe jahkrung sharawt la wu ai rai nna, mung masha yawng a man e n rai, Karai Kasang shawng de lata san da sai sakse ni a man e sha, dai wa hpe dan pru shangun wu ai. Dai sakse ni gaw, si ai kaw na Shi bai hkrung rawt ai hpang e, Shi hte rau lu sha ai ni anhte nan rai nga ga ai. Shi Madu nan mung, hkrung ai ni hte si ai ni nga sai lam, mung masha ni hpe tsun dan let sakse hkam ya let, Yesu hpe kam sham ai ni yawng, Shi a mying ningsang a marang e, mara raw dat kau ya ai hkrum na mara ai, ngu nna tsun dan
ma ai.
Karai Kasang a Mungga rai nga ai.

CHYUM MUNGGA DAW 2

Kolose 3:1-4

Ya hti na gaw, Kolose masha ni hpang de San Pawlu shagun dat ai laika hta na rai nga ai.
Hpu nau ni e, nanhte Hkristu hte rau tengman ai asak de bai rawt wa manit dai rai nna, dai Hkristu gaw sumsing lamu hta Karai Kasang a hkra maga e dung nga ai majaw lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu.
Kaning rai nme law, nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung shi hte rau hpung shingkang hta dan pru na marin dai.
Karai Kasang a Mungga rai nga ai.

KABU GARA SHIGA

Yawhan 20:1-9

Ya hti na gaw, Yawhan a laika hta na Kabu Gara Shiga rai nga ai.
Dai laban bat a shawng shani e, nhtoi garai n htoi yang, Maria Magdalena jau jau e lup de sa wa ai rai nna, lup chyinghka la ai nlung sit mat nga ai hpe mu wu ai. Dai majaw shi gaw Simun Petru yan Yesu tsawra ai sape hpang de gat wa nhtawm, Madu hpe lup de na shanhte la nna, kanang e tawn da mu ai hpe anhte n chye ga ai, ngu nna, shan hpe tsun mu ai. Dai majaw Petru yan kaga sape pru nna, lup de sa wa ma ai. Shan rau gat sa wa yang, kaga sape gaw Petru hpe gat lai kau da nna, lup de shawng sa du ai. shaloi shi gum yu yang, sumpan gin-yan taw nga ai sha mu wu ai; rai ti mung, shi kata de n shang ai. Simun Petru chyawm gaw shi a hpang e hkan gat nang nna, dai de du jang, kata de shang yu nga ai. Sumpan ginyan taw nga ai hpe mung, baw na hpajet gaw sumpan hte rau n re ai, kaga rai nna katsu taw nga ai hpe mung, shi mu wu ai. 
Dai majaw, lup de shawng du ai, kaga sape mung hkan shang wa nna, mu lu ai hte kam sham wu ai. Kaning rai nme law, Yesu gaw si ai ni kaw na bai hkrung rawt wa na ra ai ngu nna, Chyum Laika hta rawng nga ai hpe ndai ahkying du hkra, shan n chye madat ma ai.
Madu a Kabu Gara Shiga rai nga ai.

2021:KUNGLA SHAMAN POI SHANI NA MUNGGA

Kungla: Israel amyu sha ni gaw awng padang ninglaw lu ai aten ni hta kungla lang sharawt nna kabu ai lam hpe madun dan ai alai nga ma ai. Yesu hpe awng padang ninglaw lu ai wa, Madu a mying ningsang the du sa ai wa hku nna hkap bawp la ma ai. Dai hpawng hta lawm ai ni sha, Yesu hpe jeyang ai aten hta, “Sat kau u, sat kau u, wudang hta jen da u” ngu nnga jahtau tsun ma ai. Karai a Kasha nan shing re ai hpe hkrum katut ai rai yang, anhte Yesu a hpang hkan nang ai ni mung dinghta ga e byin lu ai baw mahkra hpe hkam la na shajin da mai ga ai. Tinang awng dang ai aten, ja lungseng awng ai aten, hkam kaja ai aten, hkalung tsawm pu tsawm nga ai aten, yawng e ra ma ai, shakawn ma ai, jinghku tai ya kam ma ai. Tinang hkrat sum ai aten, machyi agrawm mat ai aten, kaya hkrum ai aten, masha ni e jahpoi asawn hkrum ai aten,... shingre ai aten ni hta garum hpyi na grai yak ai; manang tai jinghku tai ya na masha grai taw ai. Nni nkri hpe myit dum ai Laban: Kungla poi/ Palm Sunday hpe “Passion Sunday/ nni nkri hpe myit dum ai Laban” ngu nna mung tsun lu ai.

Nawku dawjau lamang hta daw lahkawng garan da ai_
(1) Shakawn shagrau hkrum ai lam
(2) Missa hkungga_ Yesu a nni nkri hte si hkam ai lam hpe myit dum shangun ai Chyum Laika ni hpe hti ai. Kungla Laban kaw na hpang ai Yesu si hkam ai bat manga ya shani du hkra na lamang ni hpe myit dum shangun ai. Kungla Laban kaw na hpang ai Yesu si hkam nna bai hkrung rawt ai Laban du hkra hpe “Chyoi pra ai Laban bat” ngu nna masat ga ai re. Shaning ting na nawku dawjau lamang ni yawng hta ahkyak dik htum ai, makam masham a akri madung hpe myit dum galaw ai nawku lamang ni re.

Hpilipi masha ni hpe shagun dat ai laika: Karai hkum nan masha sa tai hkam la ai, mayam madang hku, matsan dik ai aprat hpe hkam la ai; mara n lu sawng re ai wa n tara ai hku jeyang sat kau hkrum ai. Madang grit nem dik ai hku, wudang ntsa e jen sat kau hkrum ai. Ga yun tai na matu lup kau hkrum ai, masha yawng yawng a gam maka hpe hkam la ai.

Shinggyim masha ni hpe hkye la na matu, Hkye la Madu gaw nni nkri shoi chyum ai lam yawng hpe hkam la ai, shagrit shanem ai the wudang ntsa e si hkam ai du hkra, Kawa Karai hpe madat mara nu ai. Nni nkri, n tara ai lam hte si du, yawng hpe awng dang kau nu ai. Jahtum e, tsaw dik htum ai hku shagrau hkrum nu ai, nga nna ka da ai. Dai Hkristu hkam la ai nni nkri lam ni hpe myit dum nna anhte tara tawt lai, shut hpyit mara lu ai ni, hten bya chye ai amyu, htani htana si mat lu ai amyu, hpa wa gumrawng shara nga a ta? Dinghta ga e n tara ai hku jeyang hkrum ai, htawng hkrat mat ai, adip arip hkrum sha ai, jahpoi asawng hkrum sha ai, kaya hkrum ai, machyi makaw hkrum ai, kawsi hpang gara hkrum ai, matsan mayan ai, .... shingre ai lam ni hpe tinang gara kaning re ai myit masin hte hkap la tai htang ga ai kun? Tinang hpe hkye la ai Madu Karai Kasang hpe chyeju dum mai ga ai n rai a hka?

2021:KUNGLA SHAMAN POI SHANI NA CHYUM LAIKA

KUNGLA SHAMAN POI
March 28, 2021
CHYUM MUNGGA DAW 1

Esaia 50:4-7

Ya hti na gaw, Esaia a laika hta na rai nga ai.
Hki ba hkrum ai wa hpe shalan shabran ai ga chye tsun lu hkra, Madu gaw sharin achyin hkam la ai sape ni a shinglet ngai hpe jaw ni ai. Shi a ga na la na matu, jahpawt shagu shi ngai hpe jasu nga ai: sape wa madat la ai zawn ngai mung madat la lu u ga, Madu nye a na hpe hpaw ya ni ai. Ngai mahtang lale kau ai hte kanut mat wa ai n rai. Ngai gaw kayet ai ni hpe nye a shingma, shabyi mun baw ai ni hpe nye a shabyi, ap ya nngai asawng asang di ai ni hte, mayen mahtaw bun ai kaw na nye a myiman kayin kau ai n rai. Kaning rai nme law, Madu gaw ngai hpe garum na ra ai; dai majaw, asawng asang di ai lam ni gaw ngai hpe myit n jahtum kau nga ai. Ngai gaw kaya kahpa n hkrum lu na, ngai chye ai majaw, nye myiman hpe mung nhpai lung zawn ngai shatai da nngai.
Karai Kasang a Mungga rai nga ai.

CHYUM MUNGGA DAW 2

Hpilipi 2:6-11

Ya hti na gaw, Hpilipi masha ni hpang de San Pawlu shagun dat ai laika hta na rai nga ai.
Hpu nau ni e, Hkristu Yesu gaw Karai Kasang nan rai nga timung, Karai Kasang hte maren rai nga na hpe n manoi nga ai sha, mayam madang hpe hkap la na matu, Karai a shingkang hpe raw tawn nna, shinggyim masha hte bung hkra tai wa sai.
Shingrai, masha a hkum shan hku anhte kaw dan pru nhtawm, Shi hkum hpe shagrit shanem nna, si ai du hkra madat mara nga ai, kaja wa, wudang hta si ai du hkra madat mara nga ai.
Rai ti mung, Karai Kasang gaw Shi hpe shagrau nna, amying yawng mayawng hta grau ai amying shingteng Shi hpe jaw da wu ai. Dai re ai majaw, sumsing lamu tang hta, ginding aga tsang hta na hte, lawu tsang na lahput yawng hte gaw, Yesu a amying hte hput di na mara ai. Dai hta n-ga, Kawa Karai Kasang a hpung shingkang a matu mara, Yesu Hkristu gaw Madu rai nga ai, nga nna shinglet yawng mayawng kajai gumhkawng nga na mara ai.
Karai Kasang a Mungga rai nga ai.

KABU GARA SHIGA

Marku 15:1-39

Ya hti na gaw, Marku a laika hta na, anhte a Madu Yesu Hkristu a nni nkri yubak lam rai nga ai.
Yesu Hkristu hpe rim la ai hpang jahpawt jau jau e, dai salang hpawng hta lawm ai hkinjawng agyi ni, du salang ni hte sara ni yawng hte gaw bawng hkut masai rai nna, Yesu hpe gyit nhtawm, Shi hpe dun wa nna, Pilatu kaw ap ya mu ai. Pilatu gaw shi jep yu nna, Nang Yuda ni a hkawhkam rai nga nni? ngu nna san yang, Yesu gaw, Nang tsun ai hte maren rai nga nngai, ngu nna htan wu ai. Hkinjawng agyi ni mahtang mara law law wa Shi hpe shagun ma ai. Dai rai nna Pilatu gaw, Nang hpa mung n htan ya nni? Shanhte nang hpe shagun ai mara gade wa law nga ai hpe yu yu u, ngu nna san wu ai, Yesu chyawm gaw ga hkaw mi pyi n htan wu ai rai nna, Pilatu grai mau nga ai. 

Dai poi a laman e, shanhte hpyi ai hte maren htawng rawng ai masha langai mi hpe Pilatu dat dat na htung nga ai. Dai aten e gumlau kabrawng ai hte masha sat ai hpung hta lawm ai, Baraba ngu ai wa langai mi htawng rawng nga ai.

Shaloi shawa masha ni lung wa nna, htung hte maren htawng rawng ai masha langai ngai hpe dat dat na hpyi ma ai. Pilatu mahtang gaw Yuda ni a hkawhkam hpe dat dat na nanhte ra nga myit ni? ngu nna shanhte hpe htan mu ai. Kaning rai nme law, manawn masham ai majaw, hkinjawng agyi ni Yesu hpe ap kau mu ai hpe shi chye nga ai. Hkinjawng agyi ni chyawm gaw, shanhte a matu Baraba hpe dat dat u ga, nga nna shawa masha ni hpe myit shadut yu mu ai. Pilatu mahtang shanhte hpe bai htan nna, Rai taw, Yuda ni hkawhkam ngu nna, nanhte tsun ai wa hpe ngai kaning di na rai ta? ngu wu ai, shanhte gaw, Wudang hta jen da u, nga nna bai jahtau ma ai.

Pilatu gaw, shi n hkru ai amu hpa galaw sata? ngu nna san mu ai. Shanhte mahtang, Wudang hta jen da u, nga nna grau jahtu bu ma ai. Pilatu gaw shawa masha ni hpe myit shapyaw ya mayu ai hte, shanhte a matu Baraba hpe dat ya nna, Yesu hpe anu kayat nhtawm, jen da ai hkrum u ga ap kau dat wu ai.

Shaloi hpyen la ni gaw, Pretorium ngu ai htingnu a wang kata de Yesu hpe woi wa nna, hpyen dap ting hpe shaga tawn mu ai. Shanhte gaw hkyeng ai hpun nba Shi hpe jahpun nna, ju kagup hkri nhtawm, Shi hpe shagup ya ma ai hte, Yuda ni a hkawhkam e, nang a lu nit ga law, ngu nna shi hpe asawng let shakram ma ai. Bai mai-aw yan hte Shi a baw hpe kayet nna, Shi hpe mayen mahtaw bun mu ai hte, lahput di let nawku ma ai. Yesu hpe asawng asang di ngut jang, hkyeng ai hpun nba hpe shanhte raw kau nna, shi a hpun palawng hpe jahpun ma ai. Shaloi, wudang hta Yesu hpe jen da na matu, shi hpe dun sa wa ai rai nna, shi a wudang hpe hpai ya u ga, nam kahtawng na wa nna, lai hkawm sa wa ai Alesandru yan Ruhpu a kawa, Simun ngu ai Kureni mung masha langai mi hpe shagwi ma ai.

Ya, Golgohta ngu ai shara de shanhte shi hpe dun du ma ai. Golgohta a ga lachyum gaw, Pungkum Kawng ngu ai rai lu ai. Shaloi mura hte tsabyi chyaru kayau nna, Yesu hpe jaw ma ai, rai ti mung, Shi n kam lu mu ai. Ya shanhte wudang hta e Shi hpe jen da nna, Shi a hpun palawng hpe karan tawn ai hte, langai hte langai la ang na matu hpai da da ma ai. Wudang hta shi hpe jen da ai gaw jahpawt ahkying jahku rai nga ai. Dai hta kaga, ‘Yuda ni a hkawhkam’ ngu nna shi a mara hpe madun ai laika ka shakap tawn mu ai.

Yesu hte rau damya lahkawng hpe mung, shi a hkra maga de langai mi, pai maga de langai mi jen da mu ai. Lam e lai wa ai ni mung, Shi hpe asawng asang ngu nna, tinang a baw hpe kanga let, Aha! Nawku Htingnu hpe run kau nna, masum ya laman e bai de lu ai wa e, Na hkum hpe nan hkye la nna, wudang hta na yu wa rit, ngu mu ai. Hkinjawn agyi ni the sara ni mung, dai hte maren asawng asang di let, masha kaga hpe shi hkye la ai; Shi hkum nan pyi n hkye la lu a hka! Shi hpe kam sham lu na matu, Israela a hkawhkam dai Hkristu gaw, anhte mu nga yang, wudang hta na ya yu hkrat wa u ga, nga nna shada da tsun ma ai. Yesu hte rau wudang hta jen da ai yan mung Shi hpe aroi arip ngu mu ai. Ya shani ka-ang e du yang, dai kaw nna ahkying masum du hkra, mung ting hta e nsin chyip rai mat ai; ahkying masum hta e, Yesu gaw nsen kaba hte, Eloi, Eloi, Lama sabakhtani? ngu nna jahtau wu ai; de a ga lachyum gaw, Nye a Karai Wa e, Nye a Karai Wa e, hpa majaw nang ngai hpe kau da nga n ta? nga ai rai lu ai.

Shaloi dai makau e tsap nga ai ni nkau mi gaw, Yu mu, Shi Elia hpe shaga nga ai, nga ma ai. Shaloi marai langai mi gat sa nna, hka kamu hpe tsabyi hkri hta tsing la nhtawm, mai-aw nren hta shakap nna, Yesu a n-gup hta jaw mu ai rai nna, ‘Elia Shi hpe sa shayu la na kun, naw yu yu ga, ngu nna tsun ma ai. Yesu mahtang nsen kaba hte jahtau let nsa hti mat sai.

Shaloi Nawku Htingnu na nba grang, ka-ang kren brang rai ga mat wa sai. Yesu gaw shing rai si mat ai hpe, shi a man e tsap nga ai hpyen latsa up ai du wa mu jang, Kaja wa, ndai wa gaw Karai Kasang a Kasha nan rai nga ai, ngu nna tsun ai.
Madu a Kabu Gara Shiga rai nga ai.

2021:LUSHAGAM LADAW LABAN (5) NA MUNGGA

Anhte tsun lang ai ga-sadi, ngu ai hta grau ahkyak ai, grau lachyum sung ai. Atang ahpa n galaw mai ai, tara shang re ai ga-sadi hpe ngu ai. Karai Kasang hte Abraham a lapran jaw hkat ai ga-shaka hpe yu ga_ Abraham gaw u ni hpe sat, gala’ ga ai; pai maga sumpum mi, hkra maga sumpum mi, maren rai garan da ai. Abraham gaw Karai Kasang tsun ai hte maren, sumpum da ai u mang ni a lapran hkawm lai ai. Lachyum gaw Karai maga sadi n dung jang Karai mahtang sat kau hkrum na, mang tai na; Abraham shut jang Abraham mung maren re ai gam maka de du na, ngu ai lachyum re. Sinai Bum lagaw e shawng na lang Karai Kasang hte lata la hkrum ai Israel amyu masha ga-shaka shagrin da ai. Ga-shaka a marang e Israel amyu sha gaw Karai a amyu masha tai wa ai; shanhte Karai a tara hkan shatup na lit lu ma ai. Karai Kasang maga shanhte hpe makawp maga ya na lit lu ai; Hkanan mungdan hpe madu la shangun na lit lu ai. Karai a maga galoi n shut ai; Israel masha ni gaw kade lang mung tara tawt lai shut hpyit kau ma ai. Karai Kasang maga ga-shaka kade lang matut htawt jaw tim, Israel amyu sha ni gashaka hta jaw da ai ga-sadi tawt lai ding-yang rai ma ai. Jahtum e, Karai Kasang gaw n lai lu ai, tut nawng a’grin nga na ningnan re ai ga-shaka jaw na lam myihtoi Ezekiel tsun ai. Dai gaw, Yesu a asai hte shagrin na Ga-shaka Ningnan rai nga ai.

“Anhte Yesu hpe mu hkrum mayu ga ai” Yawhan tsun ai “Greek/ Heleni” masha ni gaw Greek/Heleni ga shaga ai maigan masha kadai mung mai byin ai. Yuda makam masham hpe hkap la nna Moshe tara hkan ai ni re majaw, lit lu ai hte maren, Yerusalem nawku poi de sa lawm ai ni rai ma ai. Shanhte gaw Yesu a lam, Shi hkaw tsun ai, galaw dan ai lamik kumla ni a lam na yu ai majaw, Hpilip kaw sit sa nna, “Anhte Yesu hpe mu hkrum mayu ga ai”, ngu, hpyi shawn ma ai re. Yesu a sape tai mai na kun, ngu ai lachyum rai sam ai. Yesu gaw a’ding tawk ngu n htan ya ai: Shi hkam la na nni nkri a lam tsun hpaw dan ai. Shi a hpang hkan nang mayu ai ni yawng, Yesu shi hkam la na nni nkri ni hpe hkam la nna sha, hpung shingkang dagraw hkam la lu na lam tsun ai. Shanhte hpe jahkrit kau ai n rai, shingjawng saw ai lam sha re. Gwi yang hkan nang mi, ngu ai lachyum re.

Shi gaw Karai a Kasha rai ninglen, nni nkri hpe hkam la ai hku, madat mara ai lam hpe sharin la nu ai (Hebre): Adam Ewa a ningpawt shut hpyit mara_ “N madat mara ai; Karai Kasang hpe ninghkap ai” mara nan rai nga ai. Israel amyu sha ni gaw Karai hte jaw hkat ai ga-shaka hpe n gawn n sawn di kau ma ai; hten bya ai kaw du mat ma ai. Karai a Kasha hkum nan, Karai Karai a shangun ma hku, n madat mara ai lam hpe wudang ntsa e si hkam ai hku nna madun dan nu ai. Madat mara ai lam kade ahkyak ai lam hpe sharin la lu ga ai. Madat mara ai, ngu ai hta, machyi nan machyi hkam ra ai. Kashin kamun a marang e Karai hte ga-shaka jaw hkat ai anhte langai hpra, Karai a tara hpe madat ra ga ai.

Anhte yawng tara rap-ra ai lam hpe ra ga ai; kaga masha ni a ntsa tara ai hku hkan galaw ga ai kun? Karai kaw na shaman chyeju ni hpe hpyi la hkam la mayu ga ai; Karai Kasang a ntsa e anhte jaw da ai ga-sadi, nawku dawjau na, hkung ga madat mara na, ngu ai lam hpe n gawn n sawn di kau ai kade lang she rai a hka! Hpara shaje ni hpe naw ai, ngu ai hta, ja gumhpraw marin ai, nammak lawhpa myit rawng ai, tinang pyaw dum ai n kaja ai akyang lailen ni tsa, chyaru, kani, hpaida, facebook hkrai mada shaja nna Karai hte matut ai facebook gaw pat da, dai ni gaw hpara shaje n rai a hka?

2021:LUSHAGAM LADAW LABAN (5) NA CHYUM LAIKA

LUSHA GAM AI LADAW HTA LABAN 5
March 21, 2021
CHYUM MUNGGA DAW 1

Yeremia 31:31-34

Ya hti na gaw, myihtoi Yeremia a laika hta na rai nga ai.
Madu ning nga ai: Yu mu, Israela hte Yuda a nta atsa e ga shaka nnan tawn da na nhtoi du na ra ai.  Shanhte a kaji kawa ni hpe lata hte dun la nna, Egutu mung de na woi wa ai shaloi e, shanhte hte tawn da ai ga shaka hte maren n rai; kaning rai nme law, ngai shanhte a Madu rai nga ti mung, shanhte gaw nye a ga shaka dai run kau ma ai, nga nna Madu tsun ai.
Dai nhtoi ni du wa ai shaloi, Israela nta hte ngai ga shaka na gaw, da ndai rai nga ai: Nye a lata hpe shanhte a masin salum hta ngai hkai da nna, shanhte a myit hta ka da na we ai: ngai shanhte a Karai Kasang tai na nngai; shanhte mung nye a amyu tai na mara ai, nga nna Madu tsun ai.
Dai shaloi shanhte langai hte langai tinang a htingbu wa hte hpu nau wa hpe, Karai Kasang a lam hpe chye nga u, nga nna sharin achyin ya na ra ai n rai; kaji htum ai kaw nna  kaba htum ai du hkra, shanhte yawng hte gaw ngai hpe chye chyang wa na mara ai: shanhte a mara hpe ngai raw kau ya nna, shanhte shut hpyit ai hpe bai dum ya na ni ai n rai, nga nna Madu tsun ai.
Karai Kasang a Mungga rai nga ai.

CHYUM MUNGGA DAW 2

Hebre 5:7-9

Ya hti na gaw, Hebre masha ni hpang de shagun dat ai laika hta na rai nga ai.
Hpu nau ni e, Hkristu gaw ndai dinghta ga ntsa e naw hkrung nga ai shaloi, si ai kaw na shi hpe hkye mawai la lu ai Karai Kasang hpang de, hkrap ngu hkrap ngoi nna myi prwi law law hte hpyi jahtau wu ai. Shi gaw myit grit nnem ai madat mara ai majaw, shi hpyi ai ga hpe Karai Kasang hkap madat la ya sai. Hkristu gaw Kasha teng teng rai nga timung, nni nkri hkrum ai hku madat mara ai lam sharin la wu ai; shing rai; Shi hkum tsup wa ngut jang, shi a ga madat mara ai ni yawng mayawng a matu, htani htana hkye hkrang la ai a npawt daju tai nga ai.
Karai Kasang a Mungga rai nga ai.

KABU GARA SHIGA

Yawhan 12:20-33

Ya hti na gaw, Yawhan a laika hta na Kabu Gara Shiga rai nga ai.
Dai Paska poi a laman e, Yerusalem mare de lung wa ai ni hta Greek masha nkau mi lawm ma ai. Dai ni gaw Galile mung na Betsaida mare masha Hpilip kaw sa nna, Hkau e, anhte ga Yesu hte hkrum mayu ga ai, ngu nna tsun ma ai. Hpilip gaw Andru hpe sa tsun nna, Andru yan Hpilip gaw Yesu hpe sa tsun dan ma ai. Dai rai nna Yesu gaw, Masha Kasha a hpung shingkang dan hkung na ahkying du wa na ra ai. Nanhte hpe ngai kaja wa teng teng tsun made ai gaw: Mam nhkyep gaw ga hta hkrat nna n hten mat yang gaw, langai sha a rai nga ai; hten mat yang she asi law law si wa ai. Tinang a asak hpe tsawra ai wa gaw asak sum na ra ai. Ndai mungkan ga e tinang a asak hpe n dawng n yawt ai wa chyawm gaw, htani htana asak lu la hkra shi a asak hpe makawp maga nga ai. Ngai hpe daw jau ai wa gaw nye a hpang hkan nang ra ai; ngai nga ai shara e nye a shangun ma mung nga na ra ai.
Ya ngai nachying myit ru nga nngai: ngai kaning ngu tsun na i? Wa e, ndai ahkying hta na ngai hpe hkye hkrang la e. Raiti mung, n dai lam a majaw she ngai ndai ahkying de du wa ni ai rai nna, Wa e, na a mying nsang hpe shagrau u law, nga nna Hpilip yan Andru hpe Yesu tsun wu ai. Shaloi sumsing lamu de na nsen gaw, Ngai shagrau se ai rai nna, bai naw shagrau na we ai, nga nna ngoi pru ai. Dai yang e tsap hpawng nga nna na la ai ni gaw, Mu ngoi nga ai, tsun ma ai; nkau mi mung, Lamu kasa shi hpe ga tsun nga ai, nga ma ai. Yesu gaw, Dai nsen gaw nye a matu n rai, nanhte a matu she ngoi pru wa ai. Ndai mungkan ga gaw, ya jeyang daw dan ai hkrum nga ai. Ngai chyawm gaw ga de nna sharawt tawn da ai hkrum jang masha yawng hpe ngai hpang de woi la na we ai. Shing nga ai gaw, shi gara hku si na madun nna tsun ai rai nga ai.
Madu a Kabu Gara Shiga rai nga ai.