2021:KUNGLA SHAMAN POI SHANI NA CHYUM LAIKA

KUNGLA SHAMAN POI
March 28, 2021
CHYUM MUNGGA DAW 1

Esaia 50:4-7

Ya hti na gaw, Esaia a laika hta na rai nga ai.
Hki ba hkrum ai wa hpe shalan shabran ai ga chye tsun lu hkra, Madu gaw sharin achyin hkam la ai sape ni a shinglet ngai hpe jaw ni ai. Shi a ga na la na matu, jahpawt shagu shi ngai hpe jasu nga ai: sape wa madat la ai zawn ngai mung madat la lu u ga, Madu nye a na hpe hpaw ya ni ai. Ngai mahtang lale kau ai hte kanut mat wa ai n rai. Ngai gaw kayet ai ni hpe nye a shingma, shabyi mun baw ai ni hpe nye a shabyi, ap ya nngai asawng asang di ai ni hte, mayen mahtaw bun ai kaw na nye a myiman kayin kau ai n rai. Kaning rai nme law, Madu gaw ngai hpe garum na ra ai; dai majaw, asawng asang di ai lam ni gaw ngai hpe myit n jahtum kau nga ai. Ngai gaw kaya kahpa n hkrum lu na, ngai chye ai majaw, nye myiman hpe mung nhpai lung zawn ngai shatai da nngai.
Karai Kasang a Mungga rai nga ai.

CHYUM MUNGGA DAW 2

Hpilipi 2:6-11

Ya hti na gaw, Hpilipi masha ni hpang de San Pawlu shagun dat ai laika hta na rai nga ai.
Hpu nau ni e, Hkristu Yesu gaw Karai Kasang nan rai nga timung, Karai Kasang hte maren rai nga na hpe n manoi nga ai sha, mayam madang hpe hkap la na matu, Karai a shingkang hpe raw tawn nna, shinggyim masha hte bung hkra tai wa sai.
Shingrai, masha a hkum shan hku anhte kaw dan pru nhtawm, Shi hkum hpe shagrit shanem nna, si ai du hkra madat mara nga ai, kaja wa, wudang hta si ai du hkra madat mara nga ai.
Rai ti mung, Karai Kasang gaw Shi hpe shagrau nna, amying yawng mayawng hta grau ai amying shingteng Shi hpe jaw da wu ai. Dai re ai majaw, sumsing lamu tang hta, ginding aga tsang hta na hte, lawu tsang na lahput yawng hte gaw, Yesu a amying hte hput di na mara ai. Dai hta n-ga, Kawa Karai Kasang a hpung shingkang a matu mara, Yesu Hkristu gaw Madu rai nga ai, nga nna shinglet yawng mayawng kajai gumhkawng nga na mara ai.
Karai Kasang a Mungga rai nga ai.

KABU GARA SHIGA

Marku 15:1-39

Ya hti na gaw, Marku a laika hta na, anhte a Madu Yesu Hkristu a nni nkri yubak lam rai nga ai.
Yesu Hkristu hpe rim la ai hpang jahpawt jau jau e, dai salang hpawng hta lawm ai hkinjawng agyi ni, du salang ni hte sara ni yawng hte gaw bawng hkut masai rai nna, Yesu hpe gyit nhtawm, Shi hpe dun wa nna, Pilatu kaw ap ya mu ai. Pilatu gaw shi jep yu nna, Nang Yuda ni a hkawhkam rai nga nni? ngu nna san yang, Yesu gaw, Nang tsun ai hte maren rai nga nngai, ngu nna htan wu ai. Hkinjawng agyi ni mahtang mara law law wa Shi hpe shagun ma ai. Dai rai nna Pilatu gaw, Nang hpa mung n htan ya nni? Shanhte nang hpe shagun ai mara gade wa law nga ai hpe yu yu u, ngu nna san wu ai, Yesu chyawm gaw ga hkaw mi pyi n htan wu ai rai nna, Pilatu grai mau nga ai. 

Dai poi a laman e, shanhte hpyi ai hte maren htawng rawng ai masha langai mi hpe Pilatu dat dat na htung nga ai. Dai aten e gumlau kabrawng ai hte masha sat ai hpung hta lawm ai, Baraba ngu ai wa langai mi htawng rawng nga ai.

Shaloi shawa masha ni lung wa nna, htung hte maren htawng rawng ai masha langai ngai hpe dat dat na hpyi ma ai. Pilatu mahtang gaw Yuda ni a hkawhkam hpe dat dat na nanhte ra nga myit ni? ngu nna shanhte hpe htan mu ai. Kaning rai nme law, manawn masham ai majaw, hkinjawng agyi ni Yesu hpe ap kau mu ai hpe shi chye nga ai. Hkinjawng agyi ni chyawm gaw, shanhte a matu Baraba hpe dat dat u ga, nga nna shawa masha ni hpe myit shadut yu mu ai. Pilatu mahtang shanhte hpe bai htan nna, Rai taw, Yuda ni hkawhkam ngu nna, nanhte tsun ai wa hpe ngai kaning di na rai ta? ngu wu ai, shanhte gaw, Wudang hta jen da u, nga nna bai jahtau ma ai.

Pilatu gaw, shi n hkru ai amu hpa galaw sata? ngu nna san mu ai. Shanhte mahtang, Wudang hta jen da u, nga nna grau jahtu bu ma ai. Pilatu gaw shawa masha ni hpe myit shapyaw ya mayu ai hte, shanhte a matu Baraba hpe dat ya nna, Yesu hpe anu kayat nhtawm, jen da ai hkrum u ga ap kau dat wu ai.

Shaloi hpyen la ni gaw, Pretorium ngu ai htingnu a wang kata de Yesu hpe woi wa nna, hpyen dap ting hpe shaga tawn mu ai. Shanhte gaw hkyeng ai hpun nba Shi hpe jahpun nna, ju kagup hkri nhtawm, Shi hpe shagup ya ma ai hte, Yuda ni a hkawhkam e, nang a lu nit ga law, ngu nna shi hpe asawng let shakram ma ai. Bai mai-aw yan hte Shi a baw hpe kayet nna, Shi hpe mayen mahtaw bun mu ai hte, lahput di let nawku ma ai. Yesu hpe asawng asang di ngut jang, hkyeng ai hpun nba hpe shanhte raw kau nna, shi a hpun palawng hpe jahpun ma ai. Shaloi, wudang hta Yesu hpe jen da na matu, shi hpe dun sa wa ai rai nna, shi a wudang hpe hpai ya u ga, nam kahtawng na wa nna, lai hkawm sa wa ai Alesandru yan Ruhpu a kawa, Simun ngu ai Kureni mung masha langai mi hpe shagwi ma ai.

Ya, Golgohta ngu ai shara de shanhte shi hpe dun du ma ai. Golgohta a ga lachyum gaw, Pungkum Kawng ngu ai rai lu ai. Shaloi mura hte tsabyi chyaru kayau nna, Yesu hpe jaw ma ai, rai ti mung, Shi n kam lu mu ai. Ya shanhte wudang hta e Shi hpe jen da nna, Shi a hpun palawng hpe karan tawn ai hte, langai hte langai la ang na matu hpai da da ma ai. Wudang hta shi hpe jen da ai gaw jahpawt ahkying jahku rai nga ai. Dai hta kaga, ‘Yuda ni a hkawhkam’ ngu nna shi a mara hpe madun ai laika ka shakap tawn mu ai.

Yesu hte rau damya lahkawng hpe mung, shi a hkra maga de langai mi, pai maga de langai mi jen da mu ai. Lam e lai wa ai ni mung, Shi hpe asawng asang ngu nna, tinang a baw hpe kanga let, Aha! Nawku Htingnu hpe run kau nna, masum ya laman e bai de lu ai wa e, Na hkum hpe nan hkye la nna, wudang hta na yu wa rit, ngu mu ai. Hkinjawn agyi ni the sara ni mung, dai hte maren asawng asang di let, masha kaga hpe shi hkye la ai; Shi hkum nan pyi n hkye la lu a hka! Shi hpe kam sham lu na matu, Israela a hkawhkam dai Hkristu gaw, anhte mu nga yang, wudang hta na ya yu hkrat wa u ga, nga nna shada da tsun ma ai. Yesu hte rau wudang hta jen da ai yan mung Shi hpe aroi arip ngu mu ai. Ya shani ka-ang e du yang, dai kaw nna ahkying masum du hkra, mung ting hta e nsin chyip rai mat ai; ahkying masum hta e, Yesu gaw nsen kaba hte, Eloi, Eloi, Lama sabakhtani? ngu nna jahtau wu ai; de a ga lachyum gaw, Nye a Karai Wa e, Nye a Karai Wa e, hpa majaw nang ngai hpe kau da nga n ta? nga ai rai lu ai.

Shaloi dai makau e tsap nga ai ni nkau mi gaw, Yu mu, Shi Elia hpe shaga nga ai, nga ma ai. Shaloi marai langai mi gat sa nna, hka kamu hpe tsabyi hkri hta tsing la nhtawm, mai-aw nren hta shakap nna, Yesu a n-gup hta jaw mu ai rai nna, ‘Elia Shi hpe sa shayu la na kun, naw yu yu ga, ngu nna tsun ma ai. Yesu mahtang nsen kaba hte jahtau let nsa hti mat sai.

Shaloi Nawku Htingnu na nba grang, ka-ang kren brang rai ga mat wa sai. Yesu gaw shing rai si mat ai hpe, shi a man e tsap nga ai hpyen latsa up ai du wa mu jang, Kaja wa, ndai wa gaw Karai Kasang a Kasha nan rai nga ai, ngu nna tsun ai.
Madu a Kabu Gara Shiga rai nga ai.

2021:LUSHAGAM LADAW LABAN (5) NA MUNGGA

Anhte tsun lang ai ga-sadi, ngu ai hta grau ahkyak ai, grau lachyum sung ai. Atang ahpa n galaw mai ai, tara shang re ai ga-sadi hpe ngu ai. Karai Kasang hte Abraham a lapran jaw hkat ai ga-shaka hpe yu ga_ Abraham gaw u ni hpe sat, gala’ ga ai; pai maga sumpum mi, hkra maga sumpum mi, maren rai garan da ai. Abraham gaw Karai Kasang tsun ai hte maren, sumpum da ai u mang ni a lapran hkawm lai ai. Lachyum gaw Karai maga sadi n dung jang Karai mahtang sat kau hkrum na, mang tai na; Abraham shut jang Abraham mung maren re ai gam maka de du na, ngu ai lachyum re. Sinai Bum lagaw e shawng na lang Karai Kasang hte lata la hkrum ai Israel amyu masha ga-shaka shagrin da ai. Ga-shaka a marang e Israel amyu sha gaw Karai a amyu masha tai wa ai; shanhte Karai a tara hkan shatup na lit lu ma ai. Karai Kasang maga shanhte hpe makawp maga ya na lit lu ai; Hkanan mungdan hpe madu la shangun na lit lu ai. Karai a maga galoi n shut ai; Israel masha ni gaw kade lang mung tara tawt lai shut hpyit kau ma ai. Karai Kasang maga ga-shaka kade lang matut htawt jaw tim, Israel amyu sha ni gashaka hta jaw da ai ga-sadi tawt lai ding-yang rai ma ai. Jahtum e, Karai Kasang gaw n lai lu ai, tut nawng a’grin nga na ningnan re ai ga-shaka jaw na lam myihtoi Ezekiel tsun ai. Dai gaw, Yesu a asai hte shagrin na Ga-shaka Ningnan rai nga ai.

“Anhte Yesu hpe mu hkrum mayu ga ai” Yawhan tsun ai “Greek/ Heleni” masha ni gaw Greek/Heleni ga shaga ai maigan masha kadai mung mai byin ai. Yuda makam masham hpe hkap la nna Moshe tara hkan ai ni re majaw, lit lu ai hte maren, Yerusalem nawku poi de sa lawm ai ni rai ma ai. Shanhte gaw Yesu a lam, Shi hkaw tsun ai, galaw dan ai lamik kumla ni a lam na yu ai majaw, Hpilip kaw sit sa nna, “Anhte Yesu hpe mu hkrum mayu ga ai”, ngu, hpyi shawn ma ai re. Yesu a sape tai mai na kun, ngu ai lachyum rai sam ai. Yesu gaw a’ding tawk ngu n htan ya ai: Shi hkam la na nni nkri a lam tsun hpaw dan ai. Shi a hpang hkan nang mayu ai ni yawng, Yesu shi hkam la na nni nkri ni hpe hkam la nna sha, hpung shingkang dagraw hkam la lu na lam tsun ai. Shanhte hpe jahkrit kau ai n rai, shingjawng saw ai lam sha re. Gwi yang hkan nang mi, ngu ai lachyum re.

Shi gaw Karai a Kasha rai ninglen, nni nkri hpe hkam la ai hku, madat mara ai lam hpe sharin la nu ai (Hebre): Adam Ewa a ningpawt shut hpyit mara_ “N madat mara ai; Karai Kasang hpe ninghkap ai” mara nan rai nga ai. Israel amyu sha ni gaw Karai hte jaw hkat ai ga-shaka hpe n gawn n sawn di kau ma ai; hten bya ai kaw du mat ma ai. Karai a Kasha hkum nan, Karai Karai a shangun ma hku, n madat mara ai lam hpe wudang ntsa e si hkam ai hku nna madun dan nu ai. Madat mara ai lam kade ahkyak ai lam hpe sharin la lu ga ai. Madat mara ai, ngu ai hta, machyi nan machyi hkam ra ai. Kashin kamun a marang e Karai hte ga-shaka jaw hkat ai anhte langai hpra, Karai a tara hpe madat ra ga ai.

Anhte yawng tara rap-ra ai lam hpe ra ga ai; kaga masha ni a ntsa tara ai hku hkan galaw ga ai kun? Karai kaw na shaman chyeju ni hpe hpyi la hkam la mayu ga ai; Karai Kasang a ntsa e anhte jaw da ai ga-sadi, nawku dawjau na, hkung ga madat mara na, ngu ai lam hpe n gawn n sawn di kau ai kade lang she rai a hka! Hpara shaje ni hpe naw ai, ngu ai hta, ja gumhpraw marin ai, nammak lawhpa myit rawng ai, tinang pyaw dum ai n kaja ai akyang lailen ni tsa, chyaru, kani, hpaida, facebook hkrai mada shaja nna Karai hte matut ai facebook gaw pat da, dai ni gaw hpara shaje n rai a hka?

2021:LUSHAGAM LADAW LABAN (5) NA CHYUM LAIKA

LUSHA GAM AI LADAW HTA LABAN 5
March 21, 2021
CHYUM MUNGGA DAW 1

Yeremia 31:31-34

Ya hti na gaw, myihtoi Yeremia a laika hta na rai nga ai.
Madu ning nga ai: Yu mu, Israela hte Yuda a nta atsa e ga shaka nnan tawn da na nhtoi du na ra ai.  Shanhte a kaji kawa ni hpe lata hte dun la nna, Egutu mung de na woi wa ai shaloi e, shanhte hte tawn da ai ga shaka hte maren n rai; kaning rai nme law, ngai shanhte a Madu rai nga ti mung, shanhte gaw nye a ga shaka dai run kau ma ai, nga nna Madu tsun ai.
Dai nhtoi ni du wa ai shaloi, Israela nta hte ngai ga shaka na gaw, da ndai rai nga ai: Nye a lata hpe shanhte a masin salum hta ngai hkai da nna, shanhte a myit hta ka da na we ai: ngai shanhte a Karai Kasang tai na nngai; shanhte mung nye a amyu tai na mara ai, nga nna Madu tsun ai.
Dai shaloi shanhte langai hte langai tinang a htingbu wa hte hpu nau wa hpe, Karai Kasang a lam hpe chye nga u, nga nna sharin achyin ya na ra ai n rai; kaji htum ai kaw nna  kaba htum ai du hkra, shanhte yawng hte gaw ngai hpe chye chyang wa na mara ai: shanhte a mara hpe ngai raw kau ya nna, shanhte shut hpyit ai hpe bai dum ya na ni ai n rai, nga nna Madu tsun ai.
Karai Kasang a Mungga rai nga ai.

CHYUM MUNGGA DAW 2

Hebre 5:7-9

Ya hti na gaw, Hebre masha ni hpang de shagun dat ai laika hta na rai nga ai.
Hpu nau ni e, Hkristu gaw ndai dinghta ga ntsa e naw hkrung nga ai shaloi, si ai kaw na shi hpe hkye mawai la lu ai Karai Kasang hpang de, hkrap ngu hkrap ngoi nna myi prwi law law hte hpyi jahtau wu ai. Shi gaw myit grit nnem ai madat mara ai majaw, shi hpyi ai ga hpe Karai Kasang hkap madat la ya sai. Hkristu gaw Kasha teng teng rai nga timung, nni nkri hkrum ai hku madat mara ai lam sharin la wu ai; shing rai; Shi hkum tsup wa ngut jang, shi a ga madat mara ai ni yawng mayawng a matu, htani htana hkye hkrang la ai a npawt daju tai nga ai.
Karai Kasang a Mungga rai nga ai.

KABU GARA SHIGA

Yawhan 12:20-33

Ya hti na gaw, Yawhan a laika hta na Kabu Gara Shiga rai nga ai.
Dai Paska poi a laman e, Yerusalem mare de lung wa ai ni hta Greek masha nkau mi lawm ma ai. Dai ni gaw Galile mung na Betsaida mare masha Hpilip kaw sa nna, Hkau e, anhte ga Yesu hte hkrum mayu ga ai, ngu nna tsun ma ai. Hpilip gaw Andru hpe sa tsun nna, Andru yan Hpilip gaw Yesu hpe sa tsun dan ma ai. Dai rai nna Yesu gaw, Masha Kasha a hpung shingkang dan hkung na ahkying du wa na ra ai. Nanhte hpe ngai kaja wa teng teng tsun made ai gaw: Mam nhkyep gaw ga hta hkrat nna n hten mat yang gaw, langai sha a rai nga ai; hten mat yang she asi law law si wa ai. Tinang a asak hpe tsawra ai wa gaw asak sum na ra ai. Ndai mungkan ga e tinang a asak hpe n dawng n yawt ai wa chyawm gaw, htani htana asak lu la hkra shi a asak hpe makawp maga nga ai. Ngai hpe daw jau ai wa gaw nye a hpang hkan nang ra ai; ngai nga ai shara e nye a shangun ma mung nga na ra ai.
Ya ngai nachying myit ru nga nngai: ngai kaning ngu tsun na i? Wa e, ndai ahkying hta na ngai hpe hkye hkrang la e. Raiti mung, n dai lam a majaw she ngai ndai ahkying de du wa ni ai rai nna, Wa e, na a mying nsang hpe shagrau u law, nga nna Hpilip yan Andru hpe Yesu tsun wu ai. Shaloi sumsing lamu de na nsen gaw, Ngai shagrau se ai rai nna, bai naw shagrau na we ai, nga nna ngoi pru ai. Dai yang e tsap hpawng nga nna na la ai ni gaw, Mu ngoi nga ai, tsun ma ai; nkau mi mung, Lamu kasa shi hpe ga tsun nga ai, nga ma ai. Yesu gaw, Dai nsen gaw nye a matu n rai, nanhte a matu she ngoi pru wa ai. Ndai mungkan ga gaw, ya jeyang daw dan ai hkrum nga ai. Ngai chyawm gaw ga de nna sharawt tawn da ai hkrum jang masha yawng hpe ngai hpang de woi la na we ai. Shing nga ai gaw, shi gara hku si na madun nna tsun ai rai nga ai.
Madu a Kabu Gara Shiga rai nga ai.

2021:LUSHAGAM LADAW LABAN (4) NA MUNGGA

N htum n wai tsawra matsan dum ai Karai Kasang, masha e myit yu sawn yu n lu ai ladat hku nna Karai Kasang gaw mungkan masha ni hpe hkye hkrang la ai; dai majaw, “Kabu gara mu!” ngu ai gaw, ndai Laban na mungga madung rai nga ai.

Shawng na Labau Laika hkai dan ai labau gaw Israel amyu masha ni hpe Karai Kasang gaw lai jan hkra tsawra ai. Israel masha ni mahtang chyeju n dum chye ai lam gawn dan ai labau re. Shanhte myit malai lu nna lam, Karai Kasang gaw myihtoi ni hku nna shadum jahprang dingyang galaw tim myit ja nna shut hpyit mara hta nan nga ma ai majaw, njahtum e mungdan ting jahten shabya hkrum ai; Yerusalem Nawku nHtingnu mung jahten sharun ya hkrum ai labau rai nga ai. Amyu masha ni mung bawng masha tai nna maigan mung e adip arip yam sha hkrum ma ai. Tsawra myit shadawn shadang n masat ai, Karai Kasang gaw, maigan mung e yam sha hkrum ai Shi a amyu masha ni hpe n kabai da ai. Shanhte myit malai lu na lam myithtoi ni hku nna shadum jahprang ya ai. Aten ladaw gu jang shanhte hpe kalang bai hkye mawoi la ai. Karai na n htum n wai ai, kangka ai tsawra myit a labau nan rai nga ai.

Kabu Gara Shi-ga hta Karai Kasang gaw, Shi a n htum n wai tsawra myit hpe Yesu hta dansan dik ai hku nna madun dan ai lam tsun da ai: n Karai Kasang gaw shinggyim masha ni hpe tsawra dik ai majaw, Kasha shingtai hpe mungkan ga a matu jaw kau ai, nga ai lam re. Gara hku ap jaw kau ai, nga yang, wudang ntsa hta jen noi si hkam shangun ai hku nna ap jaw kau ai lam re. Abraham gaw kasha shingtai hpe sat nna wan nat hkungga nawng ya gwi ai hte shadawn nna tsun dan ai lam re.

Nikodemu gaw tara sara, jaiwa, re ai majaw Yesu tsun ai ga, “Moshe nmgaw zaibru maling e magri lapu hpe sharawt da ai zawn, masha kasha gaw sharawt da hkrum na ra ai” ngu ai ga-yan hpe hkrak chye na ai. Rai tim mung, Shi n chye lu ai lam, hkap la yak ai lam gaw ndai re: “Masha nKasha” ngu ai shingteng gaw Messiah hpe tsun ai, hkye hkrang woi na nningbaw kaning rai jen noi si hkam lu na rai ta?, ngu ai lam re. Kaga hpaji ninghkrin ni zawn, Nikodemu nchye na hkap la ai lam gaw ndai re: Messiah hkye hkrang ningbaw gaw hpyen ni yawng hpe gasat dang kau nna awng padang ninglaw lu ai wa, ngu, myit mada ai. Israel amyu shi ni gaw Kaga amyu masha ni hpe up hkang reng sha lu na, ngu, shadu ai lam re.

Dinghta ga na masha shagu gaw lapu a chye’ da hkrum ai hkrai rai nga nai. Lapu a labu/gung hta grau ai shut hpyi mara gaw, masha a wenyi hpe nsat lu ai hte, htani htana si nan nga shangun lu ai. Wudang ntsa e jen noi nsi hkam nna bai hkrung rawt wa ai hte asak ningnan jaw ya ai lam hpe Nikodemu gaw gau ngwi ngwi chye wa ai. Dai majaw, Yesu hpe Pilatu a man e jawm jeyang ma yang, Nikodemu gaw Yesu maga tsap lawm ai; Yesu a hkum tsawp hpe lup maw ai aten hta manam pyaw ai baw hpun sau tsi law hkra hkap jaw ai. Yesu si hkam ai hku nna madun dan ai tsawra myit hta grau ai hpa n nga sai. Karai Kasang a tsawra matsan dum ai myit shadawn shadang n nga ai; mara raw dat ya na galoi mung jin jin sha re. Masha shagu myit malai lu nna hkyamsa tawngban chye ra ai. San Pawlu a shagun dat ai laika hta dai lam ni hpe sakse hkam dan ai.

Lu-sha gam ai ladaw hta, Karai a mau-hpa amu ni hpe shakawn ai hta jan nna, nawku dawjau ai hta jan nna, tinang hkum nan wudang hkrun lam hta nni nkri hkam lawm na, marin ai myit, pyaw hpa tam ai, ndai zawn re ni hpe nyet kau na, n shawp n hkap ai baw ni hpe dan di gwi na mung ahkyak ai.

2021:LUSHAGAM LADAW LABAN (4) NA CHYUM LAIKA

LUSHA GAM AI LADAW HTA LABAN 4

March 14, 2021

CHYUM MUNGGA DAW 1

2 Hkawhkam Labau 36:14-16, 19-23

Ya hti na gaw, Hkawhkam Labau Laika lahkawng hta na rai nga ai.

Dai nhtoi hte hta e, hkinjawng agyi ni hte mung masha ni yawng hte gaw, maigan amyu ni a n tsawm n htap ai lam shagu hpe hkan nna, grai wa shut hpyit nga ma ai. Yerusalem mare hta e Madu shachyoi shapra da ai, shi a nta hpe mung awu asin di kau mu ai. Shanhte kaji kawa ni a Madu Karai Kasang gaw, Shi a amyu hpe mung shi shanu nga ai shara hpe mung matsan dum nga ai majaw, n sim n sa langai hpang langai hpe shi a kasa ni hpe shanhte hpang de shangun dat wu ai. Raitimung shanhte gaw Karai Kasang a kasa ni hpe aroi arip di kau ai hte, shi a ga hpe n kaw n law di nna, shi a myihtoi ni hpe asawng asang di kau mu ai. Dai rai nna, hkye hkrang la na lam n hku hkra, Madu a pawt sindawng ai gaw shi a amyu masha ni ntsa e kahtet bu nga ai.

Babelon mung na shahte a hpyen ni gaw Karai Kasang a nta hpe nat kau ai hte, Yerusalem mare bunghku hpe run kau nna, hkawhkam htingnu ni mahkra hpe nat kau nhtawm, de a manu dan ai arung arai nlang hte hpe shaza kau mu ai. Nhtu n hkum ai ni hpe Babelon mare de bawng dun wa mu ai rai nna, shanhte gaw Persia mungdan up hkang ai aten du hkra, Babelon hkawhkam wa hte shi a kasha ni a mayam ni rai nga ma ai. Shing rai, Yeremia a n-gup hta Madu tsun ai ga dik wa msai. Madu ning nga ai: Israela lamu ga gaw laban shaning ni hpe shatup na mara ai; dai mungdan gaw de a katsi katsang re ai nhtoi mahkra hta ban nga nna, sanit shi ning du hkra hkam nga ai. Ya Yeremia htawn tsun ai Madu a ga dik wa na matu, Persia hkawhkam Kuru hkaw dung ai shawng shaning hta e, Madu gaw shi a myit hpe shadut ya nna, shi gaw shi a mungdan ni hproi hkra hkang dat ai laika shabra dat wu ai. Dai laika hta ka ai gaw: Persia hkawhkam Kuru ning nga ai: Sumsing lamu mna Madu Karai Kasang gaw ga ntsa na mungdan ni mahkra hpe nye a lata hta ap ya ni ai; Yuda mung Yerusalem mare hta me, shi a matu nta langai mi galaw na, shi ngai hpe hkang da ni ai. Ya shi hte seng ai amyu masha kadai mung, Madu Karai Kasang shi hte rau nga nga nna, Yerusalem mare de shi lung wa u ga, ngu nna ka dat wu ai.

Karai Kasang a Mungga rai nga ai.

CHYUM MUNGGA DAW 2

Ehpesu 2:4-10

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, nachying matsan dum chye ai Karai Kasang gaw, tsaw ra ai myit kaba hte anhte hpe tsaw ra mi ai rai nna, shut hpyit mara e anhte chyasi zawn tai nga ai shaloi, Hkristu hte hpawn Shi anhte hpe jahkrung la mani ai: Shi a chyeju the sha anhte hkye hkrang la ai hkrum manit dai. dai hta n-ga Karai Kasang gaw, Hkristu Yesu hta anhte hpe matsan dum ai a mrang e, Shi a chyeju gade wa galu gaba htum nga ai hpe, prat dingsa e madun dan na matu, Hkristu Yesu hte hpawn anhte hpe sharawt la nna, sumsing lamu lahta tang e Hkristu hte rau anhte hpe hkaw dung shagun mani ai.

Kaning rai nme law, makam masham a marang e chyeju hte sha nanhte hkye hkrang la ai hkrum manit dai: dai gaw anhte kaw na n rai; tinang galaw ai magam bungli a majaw mung n rai; Karai Kasang a kumhpaw kumhpa sha rai nga ai.

Dai rai nna, ndai lam hta kadai mung gumrawng gumtawng shara n nga ai: hpa majaw nga yang, shawng npawt e Karai Kasang yaw shada ai hte maren, mai kaja ai bungli lam hta anhte hkawm nga u ga, Hkristu Yesu hta e anhte hpan da hkrum nna, Karai Kasang shi nan shachyaw da ai magam bunli anhte rai nga ga ai.

Karai Kasang a Mungga rai nga ai.

KABU GARA SHIGA

Yawhan 3:14-21

Ya hti na gaw, Yawhan a laika hta na Kabu Gara Shiga rai nga ai.

Nikodemu mying ai Hparishe langai mi shana e Yesu kaw sa nna, Madu shi hpe tsun ai gaw: Mawshe gaw nam mali e lapu hpe sharawt da ai zawn, kam sham ai ni nlang hte gaw Masha Kasha hta htani htana asak lu la hkra, dai masha kasha mung sharawt da ai hkrum na ra ai. Kaning rai nme law, Karai Kasang a Kasha hpe kam sham ai ni nlang hte gaw hten bya n hkrum ai sha htani htana asak lu la mu ga nga Karai Kasang Shi a Kasha Shingtai hpe jaw kau ai du hkra mungkan ga hpe tsaw ra wu ai. Mungkan ga hpe daw dan na matu Karai Kasang dai Kasha hpe mungkan ga de shangun dat wu ai n rai; mungkan ga gaw shi a marang e hkye hkrang la ai hkrum lu na she shangun dat wu ai.

Kasha hpe kam sham ai wa gaw daw dan ai n hkrum lu ai; n kam n sham ai wa chyawm gaw, Karai Kasang a Kasha a mying nsang hpe n kam n sham ai majaw, ya e pyi daw dan ai hkrum nga ai. Nhtoi gaw mungkan ga de shang sai, rai ti mung, masha ni a arawn alai n hkru n kaja nga ai majaw shanhte gaw nhtoi hta nsin hpe grau tsawra ma ai: ndai lam a majaw shanhte daw dan ai hkrum nga ma ai. Kaning rai nme law, n hkru n kaja ai masha ni gaw tinang galaw ai amu dan pru na hkrit nna, nhtoi de n sit sa wa ma ai. Dingman ai wa chyawm gaw, tinang a amu shagu hpe Karai Kasang myit ra ai hku hkan galaw ai gaw, dan pru na matu nhtoi de sit sa wa ma ai.

Madu a Kabu Gara Shiga rai nga ai.

2021:LUSHAGAM LADAW LABAN (3) NA MUNGGA

Anhte kashin kamun hkam la ai nhtoi hta, Karai mKasang a Wenyi anhte hta jaw bang ya ai majaw, anhte gaw Karai a htingnu ni tai wa ga ai. - Karai e sharawng awng ai hku asak hkrung nga sa ai lam gaw, tengman ai hku Karai Kasang hpe nawku dawjau mai lam re. - Yesu gaw Karai Kasang sharawng ai hku nga sa ai lam hta manhte a kasi tai wa ai; wudang ntsa e si hkam ai aten du hkra madat mmara nu ai.

Anhte Karai Kasang hpe n nawku ai, n shakawn ai, n jawjau ai rai tim, Karai Kasang hta hpa ra kadawn ai lam n nga ai. Shinggyim masha ni hpe hpa tara langai mung n matsun ai hku, hpa mung n hpyi shawn ai mhku shinggyim masha ni hpe majoi dat da ai rai yang, shinggyim masha ni shada kade roi sha hkat na, kade daram nga yak ai dinghta ga tai wa na, ngu ai gaw tak n shut n re. Hpan madu, asak madu hpe chye chyang mtsawra lu na lam, Karai Kasang gaw Moshe hku nna Shi lata la ai amyu masha hpe gara hku nawku jawjau ra ai lam matsun ya ai. Missa hta “Anhte a Madu Karai Wa hpe chyeju dum ga law!” ngu ai shaloi shawa e htan tsun ai, “Dai gaw jaw ang ai, sut htuk ai lam rai nga ai” (ya na akyu hpyi ga ningnan)_ jaw ai, galaw ang ai galaw ging ai amu, sut ai htuk ai amu, ngu ai lachyum re. Kaga amyu masha ni jawjau ai hpara shaje ni gaw madu n re ai, hpan madu asak madu n re ai; dai tengman ai langai sha re ai Karai hpe jawjau ra ai; gara hku jawjau nawku ra ai lam hpe matsun ya ai. Jahtum chalai na jawjau ai lam gaw wudang hkungga, kuptsup ai hkungga, Yesu nawng ya ai hkungga rai na ra ai.

Yesu gaw Nawku Htingnu e jawjau amu galaw ai ni hpe mara shagun ai n rai; jawjau amu kaw na amyat tam sha ai, hpaga amu galaw ai ni a nammak lawhpa myit rawng ai ni hpe mara shagun ai lam re. Yerusalem Htingnu hpe hpya run kau nna, masum, ngu na nhtoi hta Htingnu Ningnan hpe bai gaw sharawt na lachyum gaw Shi hkum nan Htingnu re ai lam hpe tsun ai. Dusat yam-nga sagu bainam ni hpe sat nna hkungga nawng ai lam hkring mat nna hkungga nawngjau ai lam ningnan hpe Yesu hkum nan gawde da na lam rai nga ai. Wudang hkungga hte Yesu Shi nawng ya ai myit masin hkungga, Kawa Karai a ga hpe madat mara ai hkungga langai sha tai wa ai.

Karai Kasang hpe gingdan ai nawku dawjau lu ai masha kadai n nga ai. Kashin kamun hkam la ai shaloi, Yesu gaw Karai a wenyi anhte hpe jaw ya ai. Dai majaw, anhte gaw dai Wenyi hta, Yesu hte langai sha tai nna sha, Karai hpe nawku dawjau lu ga ai. Yesu a madat mara ai lam, shi galaw ai amu ni, yawng gaw hkungga rai nga ai. Anhte madat mara lu na matu lam matsun madung gaw Karai a Tara Kanu (10) rai nga ai. Anhte n hkan nna Karai Kasang hta hpa machyi wa ai lam n nga ai; n hkan ai a marang e byin wa lu ai shinggyim masha ni a manghkang kade she sawng na ta? Tara hkan ai a marang e, shimlum lam, rap-ra tara, simsa ai lam kaw du lu ai n rai a hka!

Moshe e tsun dan hti dan ai Tara Kanu (10) hpe kup tsup shangun ai gaw Yesu e matsun ai tara ningnan rai nga ai: “Ngai nanhte hpe tsawra ai zawn sha nanhte shada tsawra nga mu”, nga ai re. Yesu a tsawra myit gaw Karai hpe tsawra ai myit hte shinggyim masha ni hpe tsawra ai myit gaw langai sha tai wa ai.

Myit sumru yu na lam ni_
1. Nawku jawng, htingnu ni, akyu hpyi shara ni, teng sha ahkyak ai; shawng shawng na Nawku Hpung gaw dai baw hpan ni hpa n lu ai, n nga ai shaning 300 ning daram nga lai wa ai. Ahte a prat hta rai tim, nawku jawng gap na ahkang n lu ai mungdan buga law law nga ai. Nawku jawng nga tim sa nawku na n mai byin ai ni law law nga ma ai_ maigan mung hkan bungli galaw ai ni, machyi makaw hkrum ai ni, sharen da hkrum ai ni, dz. dz. Ahkyak grau dik ai gaw tinang a kraw salum na nawku htingnu re ai lam hpe dum nga ga ai kun?

2. Anhte sak jaw ai alu gumhpraw, missa hta ap ya ai alu kumhpa ni gaw anhte a salu salat a gawng malai tai ai, tsawra myit hte chyeju dum ai myit masin hpe shadan dan ai kumla n rai a hka! Laban nawku alu/ missa alu kade manu dan ai hpe dum ai rai yang maji nga na kun? (nawku sa ai aten kaga lahkawn alu gaw grau law mat nna nawku alu gaw grit yawm chye ai, gaw jaw nga ai kun?)

3. Nawku dawjau ai, hkungga nawng ai kaw shang lawm ai, alu sak jaw ai... shing rai tim, Karai a matsun ga, Mungga hpe n madat la ai, masha shada tsawra kahkyin gumdin ai lam hpe n shabyin la lu ai rai yang, shada zinlum ai lam, hku hkau wa ai lam n shabyin la lu ai rai yang, kuptsup ai nawku amu n tai lu ai hpe dum ra ga ai.

4. Yesu gaw Nawku Htingnu hpe jasan jaseng ai: anhte langai hpra a sung dik ai kraw kata na n san n seng ai baw ni_ masu magaw, manawn masham, n ju n dawng, nammak lawhpa, ... grit nyem ai myit hte Yesu e jasan jaseng ya na lam ahkang jaw ang ai. Myit malai ai lam majing byin lu na matu, tinang a kraw kata na n san n seng ai maza ni hpe shawng ye jasan nna sha, kaga mai kaja ai amu ni galaw lu na rai nga ai.

2021:LUSHAGAM LADAW LABAN (3) NA CHYUM LAIKA

LUSHA GAM AI LADAW HTA LABAN 3

March 7, 2021

CHYUM MUNGGA DAW 1

Pru Mat Wa ai laika 20:1-3, 7-8, 12-17

Ya hti na gaw, Pru Mat Wa ai laika hta na rai nga ai.

Ndai mungga mahkra hpe Karai Kasang tsun wu ai gaw: Ngai gaw, Egutu mung hte mayam tai nga ai nta na nang hpehkye shaw la ai, na a Madu Karai Kasang rai nga nngai. Ngai hta Karai Kasang shaje hpe hkum naw hkum ku et. Na a Madu Karai Kasang a mying nsang hpe kaman lila hkum gang hkum tsun et; Kaning rai nme law, shi a mying nsang hpe kaman lila tsun ai wa hpe, Madu gaw mara shagun na ra ai. Laban nhtoi hpe shachyoi shapra na, dai nhtoi hpe dum u.

Na a Madu Karai Kasang nang hpe jaw ai ga hta, na a asak galu lit ga, na nnu yan nwa hpe hkungga lara di u. Masha hpe hkum sat u. Masha num hkum shaw et. Masha rai hkum lagu et. Na a htingbu manang wa a lam n teng n man ai sakse hkum hkam u. Na a htingbu wa a nta hpe ra marit ai myit hkum rawng et; shi a madu jan hpe mung, shi a numsha lasha hpe mung, shi a dumsu lawze hpe mung, shi a lu ai aria mahkra hpe mung, ra marit ai myit hkum rawng et, nga nna Madu Karai Kasang tsun da nu ai.

Karai Kasang a Mungga rai nga ai.

CHYUM MUNGGA DAW 2

1 Korinhtu 1:22-25

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, Yuda masha ni gaw lamik kumla hpyi ma ai; Greek ni mahtang hpaji byeng-ya tam ma ai: anhte chyawm gaw Wudang hta jen da hkrum ai Hkristu a lam hpe hkaw dan ga ai. Dai wa gaw, Yuda ni a man e myit kataw shara, maigan amyu ni a man e angawk angak rai nga ai. Rai ti mung, shaga la hkrum ai Yuda ni hte Greek masha ni a matu mara, dai Hkristu gaw Karai Kasang a atsam hte, Karai Kasang a hpaji byeng-ya rai nga ai. Kaning rai nme law, Karai Kasang kaw na angawk angak re ai lam gaw masha a hpaji byeng-ya hta grau nga ai; Karai Kasang a n-gun kya ai gaw masha a n-gun atsam hta grau nga ai.

Karai Kasang a Mungga rai nga ai.

KABU GARA SHIGA

Yawhan 2:13-25

Ya hti na gaw, Yawhan a laika hta na Kabu Gara Shiga rai nga ai.

Dai aten hta Yuda masha ni a Shalai Poi du wa ra ai rai nna, Yesu gaw Yerusalem mare de lung wa sai. Shaloi nawku htingnu e sagu , dumsu, uhkru du dut ai ni hte, gumhpraw jak sha ai ni dung nga ma ai hpe shi mu wu ai rai nna, 15shingri hte galaw ai lasik la nhtawm, shanhte mahkra hpe mung, sagu dumsu ni hpe mung dai nta na shachyut kau nu ai; gumhpraw jak sha ai ni a gumhpraw hpe shi ayai kau ya ai hte, shanhte a ku ni hpe kanawng kadawng kau ya ai hte, shanhte a ku ni hpe mung, Ndai rai ni la wa mu; nye a, Wa a nta hpe hpaganta hkum shatai mu, ngu nna tsun mu ai. Dai shaloi, Na nta hta manoi ai nja nhpra myit gaw, ngai hpe sha kau na ra ai, nga nna ka da ai ga hpe sape ni dum ma ai. Shing re ai majaw Yuda masha ni gaw, Nang ndai zawn galaw na ahkaw ahkang lu ai gaw, anhte chye lu na matu, hpa baw lamik kumla madun mdan lu na ta? ngu nna Yesu hpe san mu ai. Yesu gaw, Ndai mhtingnu hpe hpya kau mu; masum ya laman e ngai dai hpe msharawt na we ai, nga nna shanhte hpe htan mu ai.

Shing nga ai majaw Yuda masha ni gaw, Ndai nawku htingnu hpe mali shi ning tup galaw sai; nang chyawm gaw masum ya laman e sharawt lu na wu ni? ngu mu ai. Rai ti mung, Yesu tsun ai gaw, shi a hkum hkrang ngu ai htingnu hpe sha-ang mnna, tsun ai rai nga ai. Dai re ai majaw si ai ni kaw na jahkrung sharawt la ai hkrum ai shaloi, sape ni gaw shi shing nga tsun ai mga hpe myit dum ai rai nna, Chyum laika hpe mung, Yesu tsun mda ai ga hpe mung kam sham ma ai. Dai shalai Poi nhtoi ni a mlaman e, Yerusalem mare hta Yesu naw nga nga yang, masha mlaw law wa shi madun dan ai lamik kumla mu lu ai majaw, mshi a mying nsang hpe kam sham ma ai. Yesu chyawm gaw mshanhte hpe n kam wu ai; masha yawng mayawng a lam shi mchye ai majaw, masha a kraw kata e hpa baw myit rawng nga mai hpe chye da wu ai rai nna, masha wa a lam hpe kadai mung msakse hkam ya na shi n ra wu ai.

Madu a Kabu Gara Shiga rai nga ai.

2021:LUSHAGAM LADAW LABAN (2) NA MUNGGA

Tinang kamsham hkap la ai lam ni, manu shadan ai lam ni gaw tinang myit mada da ai akyu ara ni hte tai shai nna kaga ga rai byin wa ai aten hta gara hku hkam sha na rai ta? Dai gaw, tinang a makam masham hpe teng sha shingjawng saw (challenge) galaw wa ai hpe myit dum mai ai. Myit hpe a'myaw a'mya byin shangun lu ai n rai a hka! Jahtum chyalai, Karai Kasang hpe kamsham ai, Shi sharin ya ai lam ni hte Shi jaw ai gasadi ni hpe matut kam ai, myit mada kamhpa na lam hpe shangut ya lu ai. Shing re ai aten ni hta, tinang hku nna mung hpa n chye dawdan, hpa mahtai shapraw n mai ai aten hta, "Nang Madu shabyin ya ai lam hpe ngai hkap la nngai; koi yen n lu ai amu, byin wa ai maka hpe hkap la nngai" ngu, Karai Kasang hpe gara hku htan ya mai ai lam, Ningpawt Ninghpang Laika hte Kabu Gara Shi-ga e sharin ya ai. "Karai Kasang gaw anhte a maga kap ai rai yang, kadai wa anhte hpe hpyen tai zahte tam lu na ta?" nga, San Pawlu madi madun ai.

Karai Kasang gaw Abraham hpe laksan shaga la ai; shu mashi shu masha hti n dang hkra law dik na lam; langai sha re ai Isak hku nna mayat wa na ga-shaka lu la ai wa re. Dai kasha shingtai hpe sat nna wan nat hkungga nawng ya shangun ai (moi prat na masha ni galaw ai htung lailen hpe shangun lang da ai labau maumwi) shaloi, "Myit mada ai lam ni kre mat na sai, Karai Kasang hpe kam shut sai", ngu, teng sha hkam sha mai ai. Shi a makam masham shingjawng saw hkrum nu ai.

Mungga madung daw hta tsun lai wa sai hte maren, anhte a prat gam maka hta mung myit daw myit hten na zawn nga, myit mada shara n nga mat sai zawn, myit ding myit san ai, shagrit shanem ai lailen, garum chye matsan dum chye ai myit jasat, makam masham hta htep lahti hkan shatup ai,... kaman lila, ngu nna hkam sha na zawn nga ai kade lang ngu she byin yu a hka! Tinang sawn shut tak shut, sing shut nna byin wa ai manghkang ni a majaw, kaga a' nga amsha ni hpe mara rut, di kau ai rai yang, dai gaw sawng dik sai.

Sawn hpan hpaji gaw jaw ai mahtai law law jaw lu ai rai tim, masha shada kanawn mazum ai lam, kraw sindai kaw na prut pru ai hkam sha lam hte kanawn mazum ai lam hpe hpungtang hpaji mung, computer mung, myit dik ai mahtai n jaw ya lu na re. Shada sindun kanawn mazum nna tsawra hku-hkau magyep kap let myit masa galu kaba wa ra ai: prat htum hkra sharin hkaja shaman shakyang la ra ga ai. Abraham gaw Karai Kasang hte matut mahkai ai lam hta, chyip mak kamsham ai, kamhpa ai, "Karai e jaw ai, Karai hpe tup hkra htang jaw na; Karai e shi hpe matut shaman ya na" ngu, hkam la nna, Karai Kasang hpe kamsham tsawra ai lam, kangka ai lam madun dan lu ai. Shi gaw chyam dinglik ai lam hpe tawt lai awng dang nna shaman chyeju a kaji kawa tai wa ai.

Petru gaw, Yesu a mau-hpa atsam mu ai shaloi, "Nang gaw Karai a Kasha rai lit dai" nga ai. Yesu mahtang, shi nni nkri hkam la ra na, hpyen ni a lata hta sat kau hkrum na lam tsun shapraw dan ai shaloi, Petru gaw myit kataw ai: "Dai nang kaw n byin u ga" nga ai. Mungkan ga na kawsi hpang gara, machyi makaw, nni nkri kadai mung koi yen n lu ai; dai gam maka hpe Karai a Kasha nan dinghta ga de yu sa nna anhte hte maren rai hkam la lai wa ai. Yesu madung sharin ya mayu ai lam: ndai dinghta prat hta si ai kaw kre mat na n re ai lam, hpang na prat hta ndai hkum hkrang galai shai mat nna, htani htana hpung shingkang hkam la lu na lamsharin ya ai, myit mada shara jaw ya ai.

Kaga lam mi gaw, "Yesu shanhte hpe Tabor Bum de woi lung wa nna akyu hpyi ai" nga ai. Shani shagu anhte mu man nga ai, pyaw ai, yawn ai, shani shagu na mahkrum madup ni hpe gan tawn jahkring da nna, Karai Kasang hte matut mahkai akyu hpyi ra ai lam sharin ya ai. Karai Kasang hpe "Nang-Ngai" ngu tsun jahta, mahku mahkau gawgap la na ahkyak ai lam sharin ya ai. Bum ntsa kaw nna lawu de, pa layang de mada dat yang she lawu dinghta ga na lam hpe grau mu chye wa nna, lahta tsang matsaw ga na Karai Kasang a lam sharin la lu na rai nga ai.

Dinghta ga na ru ai yak ai lam ni, shingjawng saw ai lam ni hpe asum jaw kau ai rai yang, tinang hten byak ai kaw du mat lu ai; dai shingjawng saw ai lam ni hpe tawt lai awng dang lu jang, tinang tsawm htap wa lu ai, myit masin hkum hkrang galai wa lu ai lam, Madu Yesu hpung shingkang hkam la ai mabyin hku nna anhte hpe sharin ya ai. San Pawlu a ninggun jaw ga hpe lashum tek nna makam masham hpe hkan shaman shakyang la na kaja dik ai hpe mu lu ai: "Karai Kasang gaw anhte a maga kap nang ai she rai yang, anhte hpe kadai mi hpyen tai lu na ta?", nga ai.

Myit sumru yu na lam:

 Tinang kamsham hkap la ai chyoi pra ai lailen ni_ dinghpring ai, myit ding ai, tsawra chye ai, jaw lu jaw sha garum shingtau chye ai, shagrit shanem mara dat ya chye ai, ndai zawn re ai mai kaja ai ningli ni hpe agun alau hkrum ai aten ni hta, Abraham zawn, Yesu zawn, arai Kasang hpe gara hku htan ya ga a ta?

 Ruyak kyin dut hkrum ai aten ni hta, myit ung ang ai aten ni hta gara hku nna Karai Kasang hpe kangka ai hku tsawra dawjau lai wa yu ga ta?

 Pyaw ai aten, myit daw myit htum ai aten, aten n lata shani shagu akyu hpyi chye ga ai kun?

2021:LUSHAGAM LADAW LABAN (2) NA CHYUM LAIKA

LUSHA GAM AI LADAW HTA LABAN (2)
28th, CHYUM MUNGGA DAW 1

Npawt Nhpang 22:1-2, 9-13, 15-18

Ya hti na gaw, Npawt Nhpang laika hta na rai nga ai.
Karai Kasang gaw Abraham hpe chyam yu na matu, Abraham e, ngu nna shaga yang shi gaw, Nang nga nga nngai ngu nna htan wu ai. Shaloi Karai Kasang gaw, Nang tsawra ai na a shadang sha Isak hpe woi nna, Maria mung de sa su; ngai nang hpe madun dan na bum ntsa e, shi hpe wan nat hkungga di nna nawng ya e, ngu wu ai.
Abraham yan Isak gaw Karai Kasang madun ya ai shara de du jang, Abraham shi a lata ladawn nna, kasha hpe sat na nga, nhtu la lang wu ai. Shaloi Madu a lamu kasa gaw, Abraham, Abraham e, nga nna lamu de nna shaga pru ai. Abraham gaw, Nang nga nga nngai, ngu nna htan jang, lamu kasa gaw, Na a lata dai ma hpe hkum hkra et; hpa mung hkum di u; na a shadang sha shingtai hpe, ngai hpe n kam jaw na myit n rawng ndai majaw, nang Karai Kasang hpe hkrit hkungga ai gaw, ya ngai chye sade ai, mngu wu ai. Shaloi Abraham mada yu jang, shi a shingdu e sagu la langai mi sumwum hta nrung chya nna dau nga ai hpe mu wu ai.
Karai Kasang a Mungga rai nga ai.

CHYUM MUNGGA DAW 2

Roma 8:31-34

Ya hti na gaw, Roma masha ni hpang de San Pawlu shagun dat ai laika hta na rai nga ai.
Hpu nau ni e, Karai Kasang anhte hpang maga de lawm nga yang gaw, anhte hpe hpyen ni maga de kadai wa mi nga lu na a ta? Karai Kasang gaw Shi a Kasha hpe nan, lahpawt lama n di ai sha anhte a matu ap ya nu ai; dai daram hpu ging la ai kumhpa hte nawng, ra ai chyeju yawng mayawng Shi jaw na hpe, anhte ngang kang ai myit hte kam sham lu ga ai. Karai Kasang a lata la ai ni hpe kadai wa mi mara shagun lu na a ta? Karai Kasang gaw, mara n lu ai nga nna dat dat sayang gaw, daw dan lu ai wa kadai rai nga a ta? Hkristu Yesu mahtang rai na i? N rai law! Hkristu Yesu gaw anhte a matu si hkam sai; dai sha n rai, si mat ai ni kaw na jahkrung sharawt la hkrum nhtawm, Karai Kasang a hkra maga de dung nga let, anhte a matu hpyi htinglu ya nga ai.
Karai Kasang a Mungga rai nga ai.

KABU GARA SHIGA

Marku 9:2-10

Ya hti na gaw, Marku a laika hta na Kabu Gara Shiga rai nga ai.
Dai aten hta Yesu gaw Petru, Yaku hte Yawhan hpe shaga la nhtawm, tsaw ai bum de shanhte hpe hkrai woi lung wa mu ai. Shaloi shanhte a man e Shi a ahpraw nsam galai wa ai hte, Shi hpun palawng gaw kabrim kabram wa nna, nachying hpraw tu wa lu ai: ga ntsa na tsi chyaw ai wa kadai mung, dai daram hpraw jahtap lu na n rai.Mawshe yan Elia mung shanhte kaw dan pru ma ai: shan gaw Yesu hte ga tsun ma ai. Shaloi Petru gaw, Rabai e, ndai yang e nga na anhte a matu mai nga ai; nang e sum masum, Na a matu langai mi; Mawshe a matu langai mi, Elia a matu langai mi, anhte gap saga, ngu nna Yesu hpe tsun wu ai. Shanhte kahpra nga ma ai majaw, shi hpa tsun na hpe n chye nga ai. Dai shaloi, Sumwi du hkrat nna, shanhte hpe ka-up nhtawm, dai sumwi hta na nsen ngoi pru nna, Ndai wa gaw ngai tsawra ai, ngai sha rai nga ai; Shi a ga madat mara mu, nga ai. Ya akajawng sha, shanhte mada yu jang, Yesu hta kaga kadai hpe mung n mu manu ai. Dai bum de nna shanhte yu hkrat wa ai shaloi, Masha Kasha si ai ni kaw na garai n hkrung rawt wa yang, shanhte mu ai hpe mung n tsun dan mu ga, Yesu shanhte hpe ginhtim da mu ai. Shi hkang da ai ga hpe sape ni hkan shatup sai, rai timung, Si ai ni kaw na bai rawt wa na nga ai gaw, hpa nga ai rai lu hka? ngu nna shanhte hkrai shada da san hkat ma ai.
Madu a Kabu Gara Shiga rai nga ai.

2021:LUSHAGAM LADAW LABAN (1) NA MUNGGA

Chyum Laika book ting hpe "Ga-shaka" ngu shamying ai. Lachyum hpe loi daw tsun ga, nga yang, marai lahkawng a lapran, shing n rai hpung lahkawng a lapran na myit hkrum ga-sadi rai nga ai. Anhte ga matsan ai majaw, ga-sadi/ ga-shaka, ngu ai hpe mu hkrup ai hte lachyum tup n lu mai ai. Chye lu na matu, lhoi shakut tsun dan mayu ai; myit hkrum hkat ai, ngu ai shaloi jaw ai/ la ai lam rapra ra ai. Shinggyim masha ni hku nna Karai Kasang hpe kaning rai gingdan ai hpa mi jaw lu na rai ta?

Rai timung, Karai Kasang maga shinggyim masha amyu hpe ga-shaka a matu saw shaga ai. Karai Kasang hte Abraham, Isak, Yaku,Noah, David.... jahtum hta Yesu kaw kre ai. Karai Kasang maga sadi dung ai, shinggyim masha maga kade lang mung sadi n dung ai, shut ai. Ga-shaka a ru pawt, lachyum, yaw shada masing de htang wa na lam saw shaga ai.

Lusha jahkran ai ladaw hta, Ningpawt Ninghpang labau laika hti ga ai. Karai Kasang a hpan da ai amu ra n rawng; shinggyim masha a shut hpyit mara a majaw machyi makaw, si-hkrung si-htan, htenrun ai lam amyu baw shagu prut pru wa ai. Nbung laru, hka kaba mawru, ndai jahten sharun ai amu hpe Nat e galaw ai, ngu, moi prat na masha ni kam ma ai, hkap la ai lam hpe Chyum Laika ka ai wa gaw akyu jashawn lang ai maunwi re. Chyum Laika ka ai wa a ningmu hta, mungkan masha ni a shut hpyit mara a majaw, ngu, mahtai jaw ai. Jahtum chyalai, Karai Kasang maga shinggyim masha ni hpe matsan dum ai majaw, hka mawru hte n jahten sa na, nga, ga-sadi jaw ai. Shinggyim masha maga, shut hpyit mara n galaw na, ngu, htan ya ai baw rai ang ai.

Kasa Petru a shagun dat ai laika hta mung, lahta e tsun dan ai lam hte maren sha re ai. Ga-shaka hpe n gawn n sawn di ai, Karai Kasang a ga n madat ai, shut hpyit mara a majaw, Noah prat hta hka tung kaba nna mungkan hpe lim kau ai lam. Dai hpe kashin kamun sakramentu a kumla hku nna shadum jahprang ya ai. Kashin kamun a marang e, ningpawt shut hpyit mara hpe kashin kau ya ai rai tim, masha gaw kashin kamun sakramentu hkam la ai shaloi, Karai Kasang hte ga-shaka jaw hkat ai hpe tsun shapra dan ai.

Marku a Laika hta Yesu gaw zaibru jang e nhtoi mali-shi ya lusha jahkran akyu hpyi ai hte, Nat Satan e gunglau ai hpe hkam la ai lam tsun da ai. Karai Kasang hte ga-shaka jaw hkat, masat hkat na matu, shinggyim masha kaw na gawng malai tai ging ai kadai n nga ai. Yesu galaw ai amu yawng gaw, shinggyim masha yawng a gawng malai tai ai. Moshe gaw Karai Kasang ladawn jaw na ga-shaka hpe hkap la ging na matu, Sinnai Bum ntsa e shi hkrai nhtoi mali-shi ya akyu hpyi ai.

Lachyum gaw, Karai Kasang a maga ga-shaka a'grin nga ai. Prat shagu e, Shi a amyu masha ni hpe ga-shaka ga-sadi jaw hkat na lam saw shaga ai. Langai hpra hpe mung maren saw shaga ai. Ga-shaka hta shang lawm ai ni yawng, Karai Kasang a dinghku masha ni tai wa ai; shada mung hpu-nau ni tai wa ai; shada makawp maga zinlum hkat na lit mung lu wa ga ai.

Shawng na laban bat re ai hte maren, Karai Kasang hte anhte gara hku daw hkat ai, tinang nang Karai Kasang hpe ga-shaka htan da ai sadi-ga ni (kashin kamun hta) myit yu, shatlai lai lu na matu, ga-shaka hpang ai shara, Sinnai Bum lagaw, Noah a Sanghpaw Li, Zaibru Jang,... ru ninghpang de sa ai: lu-sha jahkran, tinang hkum hpe ningdang nyet kau ai amu ni, yawn hkyen myit malai lu na lam, ga-shaka hpe galaw shangang shagrin lu na matu re.

Myit sumru yu na lam:

 Tinang hpe gyit hkang da ai n hkru ai akyang lailen ni hpa hpa nga a ta? Dai gyit a'hkyen da ai sumri ni hpe dan di kau lu na matu gara hku shakut na myit da sa ta?

 Shinggyim masha shada jaw hkat, masat hkat ai ga-sadi/ ga-sha ka hte shadawn n mai ai ga-shaka Karai Kasang hte jaw hkat ai re. Ga- shaka a lachyum sung sung myit yu ga ai kun?

 Asak hte hkye hkrang la ai lam a hkridun gaw ga-shaka re ai lam myit dum ga ai kun?