2021:LUSHAGAM LADAW LABAN (2) NA CHYUM LAIKA

LUSHA GAM AI LADAW HTA LABAN (2)
28th, CHYUM MUNGGA DAW 1

Npawt Nhpang 22:1-2, 9-13, 15-18

Ya hti na gaw, Npawt Nhpang laika hta na rai nga ai.
Karai Kasang gaw Abraham hpe chyam yu na matu, Abraham e, ngu nna shaga yang shi gaw, Nang nga nga nngai ngu nna htan wu ai. Shaloi Karai Kasang gaw, Nang tsawra ai na a shadang sha Isak hpe woi nna, Maria mung de sa su; ngai nang hpe madun dan na bum ntsa e, shi hpe wan nat hkungga di nna nawng ya e, ngu wu ai.
Abraham yan Isak gaw Karai Kasang madun ya ai shara de du jang, Abraham shi a lata ladawn nna, kasha hpe sat na nga, nhtu la lang wu ai. Shaloi Madu a lamu kasa gaw, Abraham, Abraham e, nga nna lamu de nna shaga pru ai. Abraham gaw, Nang nga nga nngai, ngu nna htan jang, lamu kasa gaw, Na a lata dai ma hpe hkum hkra et; hpa mung hkum di u; na a shadang sha shingtai hpe, ngai hpe n kam jaw na myit n rawng ndai majaw, nang Karai Kasang hpe hkrit hkungga ai gaw, ya ngai chye sade ai, mngu wu ai. Shaloi Abraham mada yu jang, shi a shingdu e sagu la langai mi sumwum hta nrung chya nna dau nga ai hpe mu wu ai.
Karai Kasang a Mungga rai nga ai.

CHYUM MUNGGA DAW 2

Roma 8:31-34

Ya hti na gaw, Roma masha ni hpang de San Pawlu shagun dat ai laika hta na rai nga ai.
Hpu nau ni e, Karai Kasang anhte hpang maga de lawm nga yang gaw, anhte hpe hpyen ni maga de kadai wa mi nga lu na a ta? Karai Kasang gaw Shi a Kasha hpe nan, lahpawt lama n di ai sha anhte a matu ap ya nu ai; dai daram hpu ging la ai kumhpa hte nawng, ra ai chyeju yawng mayawng Shi jaw na hpe, anhte ngang kang ai myit hte kam sham lu ga ai. Karai Kasang a lata la ai ni hpe kadai wa mi mara shagun lu na a ta? Karai Kasang gaw, mara n lu ai nga nna dat dat sayang gaw, daw dan lu ai wa kadai rai nga a ta? Hkristu Yesu mahtang rai na i? N rai law! Hkristu Yesu gaw anhte a matu si hkam sai; dai sha n rai, si mat ai ni kaw na jahkrung sharawt la hkrum nhtawm, Karai Kasang a hkra maga de dung nga let, anhte a matu hpyi htinglu ya nga ai.
Karai Kasang a Mungga rai nga ai.

KABU GARA SHIGA

Marku 9:2-10

Ya hti na gaw, Marku a laika hta na Kabu Gara Shiga rai nga ai.
Dai aten hta Yesu gaw Petru, Yaku hte Yawhan hpe shaga la nhtawm, tsaw ai bum de shanhte hpe hkrai woi lung wa mu ai. Shaloi shanhte a man e Shi a ahpraw nsam galai wa ai hte, Shi hpun palawng gaw kabrim kabram wa nna, nachying hpraw tu wa lu ai: ga ntsa na tsi chyaw ai wa kadai mung, dai daram hpraw jahtap lu na n rai.Mawshe yan Elia mung shanhte kaw dan pru ma ai: shan gaw Yesu hte ga tsun ma ai. Shaloi Petru gaw, Rabai e, ndai yang e nga na anhte a matu mai nga ai; nang e sum masum, Na a matu langai mi; Mawshe a matu langai mi, Elia a matu langai mi, anhte gap saga, ngu nna Yesu hpe tsun wu ai. Shanhte kahpra nga ma ai majaw, shi hpa tsun na hpe n chye nga ai. Dai shaloi, Sumwi du hkrat nna, shanhte hpe ka-up nhtawm, dai sumwi hta na nsen ngoi pru nna, Ndai wa gaw ngai tsawra ai, ngai sha rai nga ai; Shi a ga madat mara mu, nga ai. Ya akajawng sha, shanhte mada yu jang, Yesu hta kaga kadai hpe mung n mu manu ai. Dai bum de nna shanhte yu hkrat wa ai shaloi, Masha Kasha si ai ni kaw na garai n hkrung rawt wa yang, shanhte mu ai hpe mung n tsun dan mu ga, Yesu shanhte hpe ginhtim da mu ai. Shi hkang da ai ga hpe sape ni hkan shatup sai, rai timung, Si ai ni kaw na bai rawt wa na nga ai gaw, hpa nga ai rai lu hka? ngu nna shanhte hkrai shada da san hkat ma ai.
Madu a Kabu Gara Shiga rai nga ai.

2021:LUSHAGAM LADAW LABAN (1) NA MUNGGA

Chyum Laika book ting hpe "Ga-shaka" ngu shamying ai. Lachyum hpe loi daw tsun ga, nga yang, marai lahkawng a lapran, shing n rai hpung lahkawng a lapran na myit hkrum ga-sadi rai nga ai. Anhte ga matsan ai majaw, ga-sadi/ ga-shaka, ngu ai hpe mu hkrup ai hte lachyum tup n lu mai ai. Chye lu na matu, lhoi shakut tsun dan mayu ai; myit hkrum hkat ai, ngu ai shaloi jaw ai/ la ai lam rapra ra ai. Shinggyim masha ni hku nna Karai Kasang hpe kaning rai gingdan ai hpa mi jaw lu na rai ta?

Rai timung, Karai Kasang maga shinggyim masha amyu hpe ga-shaka a matu saw shaga ai. Karai Kasang hte Abraham, Isak, Yaku,Noah, David.... jahtum hta Yesu kaw kre ai. Karai Kasang maga sadi dung ai, shinggyim masha maga kade lang mung sadi n dung ai, shut ai. Ga-shaka a ru pawt, lachyum, yaw shada masing de htang wa na lam saw shaga ai.

Lusha jahkran ai ladaw hta, Ningpawt Ninghpang labau laika hti ga ai. Karai Kasang a hpan da ai amu ra n rawng; shinggyim masha a shut hpyit mara a majaw machyi makaw, si-hkrung si-htan, htenrun ai lam amyu baw shagu prut pru wa ai. Nbung laru, hka kaba mawru, ndai jahten sharun ai amu hpe Nat e galaw ai, ngu, moi prat na masha ni kam ma ai, hkap la ai lam hpe Chyum Laika ka ai wa gaw akyu jashawn lang ai maunwi re. Chyum Laika ka ai wa a ningmu hta, mungkan masha ni a shut hpyit mara a majaw, ngu, mahtai jaw ai. Jahtum chyalai, Karai Kasang maga shinggyim masha ni hpe matsan dum ai majaw, hka mawru hte n jahten sa na, nga, ga-sadi jaw ai. Shinggyim masha maga, shut hpyit mara n galaw na, ngu, htan ya ai baw rai ang ai.

Kasa Petru a shagun dat ai laika hta mung, lahta e tsun dan ai lam hte maren sha re ai. Ga-shaka hpe n gawn n sawn di ai, Karai Kasang a ga n madat ai, shut hpyit mara a majaw, Noah prat hta hka tung kaba nna mungkan hpe lim kau ai lam. Dai hpe kashin kamun sakramentu a kumla hku nna shadum jahprang ya ai. Kashin kamun a marang e, ningpawt shut hpyit mara hpe kashin kau ya ai rai tim, masha gaw kashin kamun sakramentu hkam la ai shaloi, Karai Kasang hte ga-shaka jaw hkat ai hpe tsun shapra dan ai.

Marku a Laika hta Yesu gaw zaibru jang e nhtoi mali-shi ya lusha jahkran akyu hpyi ai hte, Nat Satan e gunglau ai hpe hkam la ai lam tsun da ai. Karai Kasang hte ga-shaka jaw hkat, masat hkat na matu, shinggyim masha kaw na gawng malai tai ging ai kadai n nga ai. Yesu galaw ai amu yawng gaw, shinggyim masha yawng a gawng malai tai ai. Moshe gaw Karai Kasang ladawn jaw na ga-shaka hpe hkap la ging na matu, Sinnai Bum ntsa e shi hkrai nhtoi mali-shi ya akyu hpyi ai.

Lachyum gaw, Karai Kasang a maga ga-shaka a'grin nga ai. Prat shagu e, Shi a amyu masha ni hpe ga-shaka ga-sadi jaw hkat na lam saw shaga ai. Langai hpra hpe mung maren saw shaga ai. Ga-shaka hta shang lawm ai ni yawng, Karai Kasang a dinghku masha ni tai wa ai; shada mung hpu-nau ni tai wa ai; shada makawp maga zinlum hkat na lit mung lu wa ga ai.

Shawng na laban bat re ai hte maren, Karai Kasang hte anhte gara hku daw hkat ai, tinang nang Karai Kasang hpe ga-shaka htan da ai sadi-ga ni (kashin kamun hta) myit yu, shatlai lai lu na matu, ga-shaka hpang ai shara, Sinnai Bum lagaw, Noah a Sanghpaw Li, Zaibru Jang,... ru ninghpang de sa ai: lu-sha jahkran, tinang hkum hpe ningdang nyet kau ai amu ni, yawn hkyen myit malai lu na lam, ga-shaka hpe galaw shangang shagrin lu na matu re.

Myit sumru yu na lam:

 Tinang hpe gyit hkang da ai n hkru ai akyang lailen ni hpa hpa nga a ta? Dai gyit a'hkyen da ai sumri ni hpe dan di kau lu na matu gara hku shakut na myit da sa ta?

 Shinggyim masha shada jaw hkat, masat hkat ai ga-sadi/ ga-sha ka hte shadawn n mai ai ga-shaka Karai Kasang hte jaw hkat ai re. Ga- shaka a lachyum sung sung myit yu ga ai kun?

 Asak hte hkye hkrang la ai lam a hkridun gaw ga-shaka re ai lam myit dum ga ai kun?

2021:LUSHAGAM LADAW LABAN (1) NA CHYUM LAIKA

LUSHAGAM AI LADAW HTA LABAN (1)
February 21, 2021
CHYUM MUNGGA DAW 1

Npawt Nhpang 9:8-15

Ya hti na gaw, Npawt Nhpang a laika hta na rai nga ai.
Karai Kasang gaw Noa hte shi a shadang sha ni hpe tsun wu ai gaw: Yu mu, nanhte hte nanhte a kashu kasha ni hpe mung nye a ga shaka ngai tawn da nga nngai; nanhte hte rau sanghpawli na pru wa nna, ga ntsa e nanhte hte rau nga ai. a-u, yam nga, ashu ashan the hkrung nga ai amyu baw sumhpa hpe mung, dai ga shaka ngai tawn da nngai. Nanhte hte ngai tawn da ai ga shaka gaw, ga ndai rai nga ai: Htawm hpawng de sha-u ing ai hka hte hkrung mahkrung hte hpe ngai n jahtum kau na we ai; lamu ga hpe jahten kau na matu mung, sha-u bai n sha-ing na ni ai.
Bai, Karai Kasang tsun ai gaw: Ngai nanhte a lapran e mung, shu mashi shu masha prat dingsa ngai tawn da ai ga shaka a kumla gaw, Nye a n-goilatum sumwi hta ngai tawn sa se ai; dai gaw, ngai hte ginding aga a lapran e tawn da ai ga shaka hpe, myit dum lu na matu kumla tai na ra ai. Dai re ai majaw, ga ntsa e ngai lamu mu shangun ai shaloi, dai n-goilatum gaw samwi hta dan pru na ra ai. Shaloi ngai hte nanhte a lapran e mung, hkrung mahkrung a lapran e mung, ngai tawn da ai ga shaka hpe myit dum na ra ai.Shing rai, hkrung nga ai baw sumhpa hpe jahten kau na matu, htawm hpang de sha-u hka bai n sha-ing na ni ai.
Karai Kasang a Mungga rai nga ai.

CHYUM MUMGGA DAW 2

1 Petru 3:18-22

Ya hti na gaw, Kasa Petru shagun dat ai laika langai hta na rai nga ai.
Hpu nau ni e, Hkristu gaw, shut hpyit mara a majaw, kalang sha mi si hkam nu ai; Karai Kasang hpang de anhte hpe woi wa lu hkra, shi ding hpring ai wa nan, n ding n hpring ai ni a matu nni nkri hkam la nu ai. Dai Hkristu gaw hkum shan hta sat kau hkrum ti mung, wenyi hta jahkrung sharawt la ai hkrum nu ai; dai wenyi hte nan pru wa yang, htawng hta rawng nga ai wenyi ni hpe shi a lam tsun shana dan nu ai. Dai wenyi ni gaw, moi shawng na Noa a prat e sanghpawli hpe naw shachyaw nga ai shaloi, Karai Kasang myit galu ai hte la nga ti mung n madat mara ai ni rai nga ma ai. Dai sanghpawli hta jawn ai ni marai matsat chyu sha, hka hku nna, hkye mawai la ai hkrum lu ma ai.
Dai hka gaw Kashin Kamun a kumla rai nga ai; kaning rai nme law, ya e nanhte mung kashin kamun hka hku rap nna, hkye hkrang la ai ni hkrum nga manit dai. Kashin Kamun dai gaw hkum shan hta kap ai hkagrwi hpe shatsai kau ya ai lam n rai; ding hpring ai myit kaw nna Karai Kasang hpe ga sadi jaw ai lam rai nga ai. Shing rai,Yesu Hkristu bai hkrung rawt ai a marang e, Kashin Kamun gaw nanhte hpe hkye hkrang la nga ai. Yesu Hkristu mahtang gaw sumsing lamu de shang wa n htawm, Karai Kasang a hkra maga e dung nga ai rai nna, lamu kasa ni, ahkaw ahkang lu ai ni hte, hpung shingkang rawng ai ni gaw, shi hpe madat mara nga ma ai.
Karai Kasang a Mungga rai nga ai.

KABU GARA SHIGA

Marku 1:12-15

Ya hti na gaw, Marku a laika hta na Kabu Gara Shiga rai nga ai.
Dai aten hta Wenyi gaw nam mali hkan de Yesu hpe woi shadut ai. Satan e gung lau ai; matse labye ni the rau nga nga nna, lamu kasa ni shi hpe galaw daw mu ai.
Yawhan hpe rim la ai hpang, Yesu gaw Galile mung de sa du nna, Karai Kasang a kabu gara shiga hpe tsun shana wu ai. Shi gaw, aten ladaw dik wa ai hte, Karai Kasang a mungdan ni wa magang ra ai; myit malai lu nna, kabu gara shiga hpe kam sham nga mu, ngu nna hkaw dan mu ai.
Madu a Kabu Gara Shiga rai nga ai.

2021:PRAN WAN LADAW LABAN (6) NA MUNGGA

Covid-19 hpe shinggyim masha ni hkrit dik ma ai; chyam bra kap loi ai majaw rai nga ai. Covid-19 hta grau hten bya shangun lu ai kaga ana ahkya ni law law naw nga ai. Covid mahtang mungkan ting chyam mat ai, bra lawan dik ai majaw, QUARANTINE ngu ai, kaga masha ni hte arau n nga mai ai, laksan garan nga shangun ai re. Chyum Laika hta lawm ai manggang ana, shaning hkying lam ru nna masha ni hkrit matsat ma ai (anhte a prat hta sha sawng nan shamai lu ai re). Manggang hta mung, C-19 hta mung, grau hkrit matsat ai baw gaw SHUT HPYIT MARA, ngu ai, wenyi a ana ahkya rai nga ai. Yesu dinghta ga de du sa ai gaw, Karai

Kasang a hkye hkrang la ai chyeju, dingman dinghpring ai lam, tara rap- ra ai lam, shada tsawra lakawn hkat na lam, hkum hkrang myit masin wenyi ting-nawng mai hkam kaja ai lam ni hpe jaw ya na matu re. "mai tsai sai lam jau hpe sa madun u!" nga ai. Mara raw sakramentu kade she ahkyak ai lam hpe shadum ya ai.

Jawjau Laika hta kadun sha mi rai tim, manggang kap ai masha ni a prat kade daram yawn hkyen shoi chyum hkam sha ai lam chye lu ai. Tinang tsawra ai nta masha ni, jinghku ni hte jahka kau hkrum ai; hpa makan bungli mung n mai galaw sha ai. Hpyi sha ra ai. Manggang hte kaga hkrit hpa ana ahkya hta lai jan nna, galoi prat hta rai tim, shawa masha hte, tinang hku hkau yu sai ni hte hka mat, ran mat nna myit kaji garen hkrum ai ni kade she nga ai; hkum hkrang ana a majaw n rai, kaga myit ru myit kaji ai baw hpan amyu myu a majaw rai nga ai. Kaga ni hte n bung hkat wa ai lam amyu myu a majaw rai nga ai.

Hkum hkrang ana ahkya hta jan nna, myit masin wenyi hta jung nan taw ai ana ahkya ni kade hkrit hpa she rai a hka! N ju n dawng ai myit, matai dawp mayu ai myit, mara n dat ya lu nna myit machyi nan taw ai, myit daw myit hten ai, kabu-hpa pyaw-hpa n hkam sha mat ai, myit mada ai lam n nga sai, grup-yin na mabyin ni hte masha ni hpe kaja ai n mu lu sai... dai zawn re ai myit masin wenyi a machyi makaw ana ahkya gaw shada kanawn mazum ai lam hta mung, Karai Kasang hte matut mahkai ai lam hta mung, kade dut dang tsan hkran mat ai lam hpe myit yu mai ga ai.

Dinghta ga ntsa na hten run htenza ai lam ni, shinggyim masha ni a shut hpyit mara ni hpe gingdan ai hku jeyang na she rai yang, Karai Kasang gaw nga mi nga, hkrung mi hkrung hpe jang a'grawp kau mai ai n rai a hka! Karai Kasang a n htum n wai ai tsawra myit hte hkye hkrang la ai amu, Kasha Yesu hta shadan dan sai. Dai hkye hkrang la ai amu matut galaw na lam, Nawku Hpung hpe gawde da ya sai. Langai hpra gaw, dai hkye hkrang la ai chyeju hpe grit nem ai myit, chyeju dum ai myit hte hkam la nna, dai Karai a hkye hkrang la ai masing hta shang lawm madi shadaw lawm na hpe Karai Kasang ra sharawng ai.

"Nang mai tsai sai lam jawjau ai jau kaw sa madun su", nga ai ga, hkye hkrang la ai amu hpe Karai Kasang hte shinggyim masha jawm galaw na Karai Kasang ra sharawng ai hpe a'san sha mu lu ai. Jau hpe sa madun yang manggap n kap sai, ngu nna jau e masat ndau shabra jang sha, mangang ana kaw na mai tsai ai wa ga shawa hpawng de bai htang wa lu na rai nga ai. San Augustin tsun ai ga, "Karai Kasang gaw hpan da ai amu galaw ai shaloi kadai mi shang lawm n ra ai; rai tim, hkye hkrang la ai amu magam hta shinggyim masha e shanglawm, lata gindun lawm na lam lajang da nu ai" nga ai.

Myit sumru yu na lam:
 Shinggyim masha ni hpe hkye hkrang la na matu Karai Kasang gaw hpa majaw hkum hkrang hte re ai Yesu hpe shangun lang a ta?
 Myit malai lu, n shut sa na, ngu, tawk hprut dawdan ai hte Karai Kasang gaw mara dat ya na chyalu; hpa majaw jau kaw mara sa raw ra ai kun?
 Kaga sakramentu ni a lam kade lang sung sung myit yu ga ta?

2021:PRAN WAN LADAW LABAN (6) NA CHYUM LAIKA

Pranwan Ladaw Laban (6)

February 14, 2021

CHYUM MUNGGA DAW 1

Jaw Jau Laika 13:1-2, 45-46

Ya hti na gaw, Jaw Jau laika hta na rai nga ai.

Madu Karai Kasang gaw Mawshe yan Arun hpe tsun wu ai gaw: Masha a hkum hta akawng ai, gyigu gu ai, pang rai hpraw ai byin yang gaw, dai wa hta manggang kap ai kumla rai nga ai. Dai wa a nma hpe yu ya na matu, hkinjawng Arun hpang de, shing n rai, shi a shadang sha hkinjawng langai ngai hpang de dai masha hpe woi sa lu na rai nga ai. Mangang kap ai wa gaw, je ai hpun palawng bu hpun let, kara hpyan ayai kau ra ai; lahta nten hpe shi magap kau nhtawm, n san n seng ai, n san n seng ai, ngu nna jahtau na rai wu ai. Ana dai garai n mai yang, shi hta awu asin a rai nga ai; shi gaw n san n seng ai rai nga nna, shi hkrai nga nga na ra ai: shi a nga shara gaw dap shinggan e rai na rai nga ai.

Karai Kasang a Mungga rai nga ai.

CHYUM MUNGGA DAW 2

1Korinhtu 10:31- 11:1.

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Tsawra ai hpu nau ni e, nanhte sha ti mung, lu ti mung, hpa galaw ti mung, Karai Kasang a hpung shingkang hpe tam let yawng mayawng hpe galaw nga mu. Masha yawng mayawng hkye hkrang la ai hkrum lu mu ga, ngai nye a akyu n tam ai sha, malaw maga a akyu tam nga let, lam shagu hta nlang hte hpe myit shapyaw ya na matu ngai shakut nga nngai. Dai hte maren nanhte mung Yuda ni a matu raitim, Greka ni a matu raitim, Karai Kasang a Nawku Hpung a matu raitim, myit kataw shara galoi mung hkum tai nga myit. Ngai gaw Hkristu a kasi hpe yu la ai zawn, nanhte mung nye a kasi hpe yu la nna, hkan galaw ai ni tai nga mu.

Karai Kasang a Mungga rai nga ai.

KABU GARA SHIGA

Marku 1:40-45

Ya hti na gaw Marku a laika hta na Kabu Gara Shiga rai nga ai.

Manggang kap ai masha marai mi mung Yesu hpang de sa ai rai nna, lahput hput di let, Nang hkraw n yang gaw, ngai hpe shapra ya lu na rai nga ndai, ngu nna hpyi nem wu ai. Yesu gaw matsan dum ai hte Shi a lata ladawn let, shi hpe ahtawk nna, Ngai hkraw nga nngai, san pra wa nu, ngu wu ai. Shaloi jang dai manggang shi kaw nna prai mat nna, shi san pra mat ai. Shaloi Yesu gaw, de a lam kadai hpe mung, ga hkawm mi pyi nang n tsun u ga, sadi nga u; pru wa nna hkinjawng wa hpe na a hkum madun dan nhtawm, shanhte a matu sakse tai u ga, nang san pra ai a matu, Mawshe tawn da ai hte maren, hkungga wa nawng ya u, ngu nna dai wa hpe ginhtim da nhtawm tin tin shabawn dat wu ai. Shi mahtang pru wa nna dai hpe aja awa hkai dan ai hte dai lam hpe kajai gum hkawng dat wu ai. shingrai Yesu gaw, mare kata de leng leng n shang lu ai rai nna, nam mali hkan e a nga nga ai. shara magup hkan na ni mung, Shi hpang de sa du ma ai.

Madu a Kabu Gara Shiga rai nga ai.

2021:PRAN WAN LADAW LABAN (5) NA MUNGGA

Machyi makaw, myit ru shoi-hpa ni, yawn hkyen ai lam ni, hten mat si mat ai lam, ndai dinghta ga hte gara hku daw hkat a ta? Nawhpu hte htingke; matsawn hte mapre zawn; hka hte nga zawn; hka n mai ai hku nna daw hkat ma ai re. Karai a Kasha Yesu hkum nan, machyi makaw, yawn hkyen shoi hpa, bu ba ai, yawng hpe hkam la ninglen, shinggyim masha ni hpe shamai shatsai ai amu ni, shalawt dat ai amu ni, kadun ai hku, hkye hkrang la ai amu hkan galaw ya ai. Dai gaw shi a sasana amu, Kawa Karai e shangun dat ai lam a yaw shada lam rai nga ai. Yesu hkum nan mung prat a jahtum maga, shoi chyum hkrum nna si wa ai lam hpe hkam la ai. Dinghta ga a wora hkran, Karai e jaw na, ngu ai sumsing mundan hta sha, myit ru shoi-hpa, machyi makaw, si-hkrung si-htan ai kaw na lawt lu na rai nga ai. Karai Kasang hta gaw da ai myit mada shara majing rai nga ai. Dai gaw mungga madung re.

Yoba Laika hta, dinghta ga ntsa asak hkrung nga pra ai gaw n dan ai; masha a prat asum maga she malawng ai hku ka da ai. Kadun ai hku htai ga nga yang, Karai hta dun ai myit mada ai lam n nga yang, masha a prat gaw kaman lila sha re ai lam hpe tsun mayu ai re. Yoba a Laika ting hpe hti yu yang, dinghta ga na shoi chyum hpa ni a mahtai hpe tam ai; masha kaja, n kaja ai ni, yawng gaw machyi makaw shoi chyum hkrum ai. De a mahtai hpe tup hkra n htai dan lu tim, adaw achyen lu la ai mahtai gaw, Karai Kasang hta myit mada ai lam hte hpun dim da ai lam chye lu ai. Ga-shaka Dingsa book ting hta asan re ai lachyum tup n chye lu ai.

Ga-shaka Ningnan prat, Yesu hta mahtai tup lu la ga ai. Machyi makaw shoi chyum lam ni hpe Karai Kasang shabyin ai n rai; mabyin ni yawng n rai tim, malawng maga shinggyim masha ni hkum nan galaw la ai, shalaw la ai, zingri hkat ai majaw, n ju n dawng, tsawra myit hkyet ai majaw byin taw, grin nga nga ai manghkang ni malawng she rai nga ai. Madu Yesu a sasana, hkye hkrang la ai magam hta hkum hkrang a machyi makaw ana ahkya ni hpe shamai ya ai sha n rai, myit masin wenyi hpe gyit hkang ai nat ni a lata kaw na mung shalawt dat ai. Shut hpyit lam dam ai ni, myit malai lu na lam, dinghpring chyoi pra ai lam hpe sharin ya nna, shada tsawra dawjau ai hta shalan shabran majing, lawt lu ai lam majing lu la mai ai lam, sharin ya ai. Myit malai lu ai ni hpe mara raw dat ya ai ga tsun ai mung law law lang.

Shawng na Chyum mungga, Yoba Laika hta, masha a prat gaw mayam hte bung ai, nga ai; htawm hpang prat a matu myit mada na lam hpa n nga ai hku hpun dim da ai. Yesu mahtang nchyang mayam a mu, manu shabrai n la, yawng hpe shamai shatsai ya ai; wenyi hta kawsi hpang gara ai ni hpe jahkru shakat ya ai. Yesu gaw n sim n sa, hkring sa ten n lu hkra pu ba hkam ai. Dai daram rai tim, shana tup mung Kawa Karai Kasang hte matut mahkai ga shaga hkat ai, akyu hpyi ninggun la ai lam hpe sharin la mai ga ai. Mayam hte bung ai dinghta ga na aprat hpe Yesu shachyoi shapra ya ai.

Kasa Pawlu mung Korintu Laika hta tsun da ai, dai Kabu Gara Shi-ga hkaw tsun sharin shaga ai amu a mayam tai hkam la ai, manu shabrai n la ai mayam tai hkam ai, nga ai. Masha law dik na la lu mu ga, hkye hkrang la ai chyeju dam lada dik ai hku law htam dik ai hku hkam la lu mu ga, nga nna, mungga madat ai ni, madat la mayu ai ni yawng a mayam tai hkam ai. Dai mayam tai hkam ai lam hpe Yesu hte bung hkra, kadai e shangun ai majaw n rai, hkum nan ra sharawng ai myit hte mayam tai hkam ai lam hpe mu lu ai.

Dinghta ga na shut hpyit mara, awu asin, n tara ai, n shawp n hkap ai hte hpring nga ai; machyi makaw shoi chyum lam ni hte hpring nga ai. Nang/ ngai, kaning re ai myit jasat hte hkam la ai rai kun? Aput a-ngun hkrai ngu, tinang matsan mayen re ai, tsi la n mai ai ana, n tara ai ni a anu ashin adip arip re ai kata, lachyum n pru hkam sha kau ai, ngu sawn la na kun? N tara ai hku hkam sha ra ai lam ni (machyi makaw matsan mayen kaw na hkawt) nga tim, lachyum pru ai hku, a'put a'ngun n ngu ai sha, kabu ai myit hte hkam la chye ga ai kun?

Yesu hte Kasa Pawlu madun dan ai kasi hpe yu la nna, Hkristan masha shagu gaw mai kaja ai amu, shada tsawra lakawn lanawn, hkye mawoi ai amu ni hta shang lawm nna sasana amu gun mai ai n rai a hka! Myit sumru yu na lam ni lahta na lam ni sha rai nga ai.

2021:PRAN WAN LADAW LABAN (5) NA CHYUM LAIKA

Pranwan ladaw laban (5)
February, 2021
CHYUM MUNGGA DAW 1

Yoba 7:1-4, 6-7

Ya hti na gaw Yoba a laika hta na rai nga ai.
Yoba gaw shi a jinghku ni hpe htan nna tsun ai gaw: Dinghta ntsa na masha a prat gaw, majan pa na ruyak shoihpa prat, n rai nga a hka i? Masha a nhtoi ni gaw nchyang wa a nhtoi ni zawn rai nga ai, n rai ni? Mayam wa gaw shingnip hpe ndawt la ai hte, shabrai sha ai wa gaw shabrai la na aten hpe myit mada nga ai zawn, ngai gaw shata law law wa ru yak hkrum sha nngai; nji nmu hpring ai shana gaw, nye a matu san da nga ai. “Galoi wa me shana lai nna, ngai yup rawt lu na i?” nga nna yup kaleng let ngai tsun nga nngai. “Shana aten bai du na, gade lanyan nga a hka!” nga nna yup rawt ai hpang ngai tsun nga nngai. Shani tup nsin sin wa ai ahkying du hkra, ngai gale galau hkrai rai nga nngai. Nye a nhtoi ni gaw da danghkyam hta grau lawan nna, nye a matu myit mada shara n tawn da ai sha lai mat wa sai. Nye a asak gaw nbung rai nga ai hpe dum nga u; nye a myi gaw mai kaja ai hpe bai mu sana n rai.
Karai Kasang a Mungga rai nga ai.

CHYUM MUNGGA DAW 2

1Korinhtu 9:16-19, 22-23

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, Kabu Gara ai Shiga hpe ngai hkaw dan ai majaw, nye a matu arawng mala shara n nga ai: kaning rai nme law, dai hpe hkaw dan ai gaw ngai galaw ang ai amu rai nga li ai: ngai n hkaw dan yang gaw, ari hkrum ging ai wa tai nga nngai. Dai amu hpe nye a myit hte ngai galaw sa yang gaw, ngai shabrai hpyi lu nngai; rai ti mung, nye a myit hte dai lit hpe n hkam la ai majaw, nye a lata hta ap ya sai amu hpe hkan galaw ai sha rai nga nngai. Dai rai jang, nye a shabrai gaw hpa rai nga a ta? Ngai hkaw dan ai shaloi, jahpu n hpyi ai sha Kabu Gara Shiga hpe hkaw sharin na gaw nye a shabrai rai nga li ai: dai Kabu Gara Shiga hkaw dan ai majaw, ngai lu la ang ai shabrai hpe n hkap la nngai.
Shing rai, ngai gaw kadai wa a shangun ma n rai ti mung, dang lu ai daram masha law law hpe woi bang la lu hkra, yawng mayawng a shangun ma ngai tai nga nngai.
N-gun kya ai ni a matu n-gun kya ai wa zawn ngai tai nga nngai. Nkau mi hpe lam langai hte hkye hkrang la lu hkra, masha yawng mayawng hta lam yawng hpe ngai hkan shatup nngai. Dai Kabu Gara Shiga a matu ndai lam yawng hte hpe ngai naw hkan galaw nga nngai.
Karai Kasang a Mungga rai nga ai.

KABU GARA SHIGA

Marku 1:29-39

Ya hti na gaw Marku a laika hta na Kabu Gara Shiga rai nga ai.
Shaloi jang dai tara jawng hta na pru wa nhtawm, shanhte gaw Yaku yan Yawhan hte rau Simun yan Andre a nta de shang wa ma ai. Ya Simun a kani hkali bu nna kaleng taw nga ai; shaloi jang shanhte gaw shi a lam Yesu hpe tsun dan mu ai.Shaloi Yesu sit sa nna, Shi a lata jum let shi hpe sharawt wu ai. Dai hkali mung kawp mat nna, shi shanhte hpe galaw daw mu ai. Ya, jan shang nna shana ahkying du jang, shanhte gaw machyi makaw hkrum ai ni hte nat kap ai ni nga manga hte hpe, Shi hpang de sa hpai tawn mu ai. Dai rai nna mare ting, dai chyinghka lam makau e sa zup hpawng nga ma ai. Shing rai ana ahkya amyu myu hte machyi ai masha law law hpe Shi shamai shatsai ya nna, nat law law hpe mung shaden kau mu ai; Shi gaw Hkristu rai nga ai hpe, nat ni chye nga ma ai majaw, Shi shanhte hpe ga tsun na ahkang n jaw mu ai. Jahpawt manap jau jau e, nhtoi grai nhtoi yang, Shi rawt pru nna, nam na machyi shim ai shara de sa wa nhtawm, dai yang e akyu hpyi nga ai. Shaloi Simun hte shi hte rau nga ai ni Shi hpe hkan tam nga ma ai: shanhte Shi hpe hkrum nna, nlang hte gaw nang hpe tam nga ma ai, ngu nna Shi hpe tsun mu ai. Yesu gaw, grup yin hkan na mare kahtawng ni hta e ngai hkaw dan lu u ga, shara kaga de anhte sa wa sa ga; dai lam majaw ngai sa du nngai, ngu nna shanhte hpe tsun mu ai. Shaloi, Galile mung ting na shanhte a tara jawng ni hta e, Shi sa hkaw dan nna, nat ni hpe shaden kau mu ai.
Madu a Kabu Gara Shiga rai nga ai.

2021:PRAN WAN LADAW LABAN (4) NA MUNGGA

"Shi gaw ahkaw ahkang hte sharin shaga ai; kaga jaiwa (Tara sara) ni hte n bung ai" nga ai. Tara Jahprang Laika hta Moshe gaw Israel amyu sha ni hpe htet ai, "Ngai hte bung ai myihtoi hpe nanhte a amyu matu kaw na sharawt ya na ra ai; nanhte shi a ga hpe madat lu na mi ai", nga ai. Moshe si mat ai hpang Karai Kasang gaw myihtoi langai hpang langai, marai law law hpe shangun dat ya ai. Jahtum na Karai a myihtoi kaba gaw Yesu hta dik wa ai, ngu ai gaw mungga madung re.

"Ahkaw ahkang" ngu ga yang, dai hpa hpe ngu ai rai ta? Jinghpaw ga hku nna tsun shaga ka lang ai shaloi lachyum hkra n hkra, loi tset sha hkra ai zawn nga ai. Amyu ga matsan ai majaw re. Dai ahkaw ahkang gaw, English hku tsun jang "authority" ngu ai mahtang she re. "Tsun lu ai, galaw lu ai, daru lu ai, dawdan lu ai..." ngu ai ningmawng lu ai hpe ngu ai re. Kaga jau ni, jaiwa ni, hparishe ni, sharin shaga ai ni gaw Karai Kasang hte seng nna, makam masham sharin shaga ai lam hta, tengman ai lam a madu hku nna n tsun lu ma ai. Karai Kasang hpa ngu tsun ai, kadai myihtoi gara hku tsun da ai, shamyet shanat nna, mahta nna tsun shaga sharin shaga ma ai. Yesu gaw shi sharin shaga ai lam, tengman ai lam a madu hku nna nan tsun shaga ai lam, dai gaw, kaga ni hte shai dik ai lam re. Mungga madat ai ni ginhka chye lu ma ai. Nat hpe pyi daru dat yang, Nat gaw madat ya ai, nga ai. Nat ngu ai gaw Karai Kasang a hpyen, Karai Kasang a kasaha ni a hpyen re ai majaw, Karai a mungdan gawgap na matu du sa ai Yesu, shi a sasana magam hpang wa ai aten hta nan, Yesu hpe gunjang ai. Dai mung, nawku jawng kaw nan rai nga ai. Nat gaw jahkrit shama re ai ladat hpe n lang ai. Grai sumnung ai wa zawn, Yesu hpe shakawn abawk sha ai ladat lang ai hpe dum ra ga ai.

Karai a nta, Karai Kasang nga ai, ngu ai nawku jawng, akyu hpyi ai shara hta nat satan bungli galaw ai: Nawku Hpung kata hta, shakut sharang hpawng hta, makam masham hte seng ai zuhpawng ni hta, num-hpung, ram-hpung, sara ni a hpawng, kanang e mung nat gaw sa hpawng lawm lu ai hpe dum ra ga ai. Yesu hte man chyaw, Nat gaw masha hta shang nna bungli galaw ai: Nat Satan a n-gup, lagaw lata, nang/ngai byin lu ai hpe dum ra ga ai. Nat Satan gaw nang/ ngai, kadai hta mung shang nna mai kaja ai bawngban lam, mai kaja ai masing, tsawra kahkyin gumdin ai amu ni hpe hkan jahten, hkan shanut ya lu ai hpe dum mai ga ai. Nang/ ngai kade lang, gara hku lawm kau sa ga a ta?

Masha a shinggan e byin ai Nat Satan a amu ni hkrit-hpa kumla ni hpe adan sha ginhka chye lu ga ai; masha a kraw, masin salum hta shang nna galaw ai amu ni hpe ginhka chye lu na yak ai. Nat Satan gaw nawku jawng sa lawm ai; Yesu hpe shakawn dan masu ai hpe myit dum mai ga ai. Nang/ ngai, kadai n nga, tinang kade mai kaja ai amu, hkyen da ai masing yaw shada ai lam kade kaja ai rai tim, tinang a arawng na matu, tinghkrai akyu amyat a matu, kaga masha ni hpe shagrit kau ai, kaga masha ni/ uhpung uhpawng shawa a akyu ara hpe jahten ai rai yang, kahkyin gumdin ai amu hpe jahten ai mahtang tai ai rai yang, Nat Satan gaw nang/ ngai hpe akyu jashawn shangun lang sai mahkoi rai kun? Teng sha myit yu ra wa ga ai.

Nat gaw hpaji sung ai; kawa na, jahkrit na, sat na, ngu ai baw she rai tim, si mani dik ai ladat hku mung hkalem chye ai. Karai Kasang a kasha ni kanbau makan galaw sha ai hta, lu mayu byin mayu ai hkrun lam tam ai hta, machyi makaw mai tsai lam tam ai hta, teng sha ladat amyu myu hku masu hkalem lu ai hpe dum mai ga ai. Dai majaw, ja lungseng she awng na rai yang,??? hpaga awng na she rai yang, ??? machyi makaw kaw na she mai na rai yang, ??? hpa mung hpa hkan galaw chye ma ai n rai a hka?

Dai majaw, Nawku Hpung gaw tsun shaga sharin shaga, lam matsun na ningmawng/ ahkaw ahkang teng sha lang lu ai; ra wa ai hta hkan nna authority lang ai re. Ga shadawn, laklai ai mau-hpa kumla ni galaw shadan dan ai shara/ masha nga wa ai aten ni hta, Nawku Hpung gaw azin ayang sawk sagawn ngut ai hpang, "Karai Kasang kaw na re ai/ n re ai; byin mai ai/ n byin mai ai" ngu, tara shang ndau laika shapraw jang, hpung masha ni gaw teng sha madat mara hkan shatup ra ai. Nat gaw, ja lungseng awng hkra mung mahkoi lam madun ya, machyi masha mai tsai hkra mung mahkoi galaw dan: rai tim, akyu hkam sha dum ai masha ni hpe Nat gaw shi a masha shatai kau lu ai; Karai Kasang hpe kamsham ai myit adaw achyen sha ngam hkra (shing n rai tsep kawp), makam masham hpe azat kau ya na sha re.

Yawng a ntsa e ningmawng/ autority lu ai Yesu hpe kamsham madat mara na ahkyak ai. Tinang a prat hta kaning re ai gam maka hkrum katut tim, lu mayu ai n lu, byin mayu ai n byin, mai mayu ai n mai rai tim, Madu Yesu a renghkang ai npu, shi sharin ya ai lam ni hpe manoi manat, shi san da ai Nawku Hpung hpe madat mara, rai nna Karai a mungdan na kasha ni tai nga lu mi ga.

Myit sumru yu na lam:
 Manghkang hkrum ai aten ni hta yam tawt, ta maka yu shangun, u nhtoi wa nhtoi ngu lata ai, shing re ai agun alau hkrum yu ai kun?
 Lu mayu ai n lu, byin mayu ai n byin, mai mayu n mai,... ndai zawn re ai aten ni hta kaning re ai agung alau hkrum chye ai kun?
 Nawku Hpung a akyu, shawa akyu, ngu nna bungli hpan amyu myu hta shang shamu shamawt ai aten ni hta, shawa hpe zinlum ai lam madung n rai a hka?

2021:PRAN WAN LADAW LABAN (4) NA CHYUM LAIKA

Pranwan Ladaw Laban (4)
January 31, 2021
CHYUM MUNGGA DAW 1

Tara Jahprang 18:15-20

Ya hti na gaw, Tara Jahprang laika hta na rai nga ai.
Israela a kashu kasha ni hpe Mawshe tsun ai gaw: Na a Madu Karai Kasang gaw, na a hpu nau ni hta na, ngai zawn re ai myihtoi langai mi hpe, na a matu paw pru shangun na ra ai: dai wa a ga hpe nanhte madat lu na rai myit dai. Horeb bum e hpawng ai shani e, nang gaw na Madu Karai Kasang hpe hpyi nem let, Ngai n si n ga, ya hpang de nye a Karai Kasang a nsen ngai bai n na lu ni ga; dai wan kaba hpe mung ngai bai n mu ni ga, nga nna nang tsun nit dai. Shaloi Karai Kasang ngai hpe htan nna, Israela amyu masha ni tsun ai ga mahkra htap htuk nga malu ai.
Shanhte a kahpu kanau ni hta na nang zawn re ai myihtoi langai mi hpe, shanhte a matu ngai paw pru shangun na we ai rai nna, dai wa a n-gup hta nye a ga ngai hti bang na hte, ngai hkang da mada hte maren, shi shanhte hpe htawn tsun na ra ai. Nye a mying nsang hte shi htawn tsun ai nye a ga hpe, kadai wa n madat yang, dai wa hpe ngai deng na we ai. Rai ti mung, ngai n hkang da ai ga hpe, nye a amying gang nna tsun pru gwi ai myihtoi mung, hpara shaje a amying hte tsun pru ai myihtoi mung, si lu na rai nga ai, nga nna Madu Karai Kasang gaw ngai Mawshe hpe tsun nu ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 7:32-35

Ya hti na gaw, Korinhtu masha ni hpang de San Pawlu shangun dat ai laika langai hta na rai nga ai. 
Hpu nau ni e, nanhte gaw myit ru myit tsang n nga myit ga ngai ra nga nngai. Num n la ai wa gaw, Madu Karai Kasang hpe myit shapyaw ya na lam chyu sha tsang nga ai majaw, Madu a lam hta htep lahti hkan galaw shakut lu ai; num la ai wa chyawm gaw, mungkan lam ni hpe tsang nga ai hte, shi a madu jan hpe myit shapyaw ya na lam hkan galaw shakut ra ai majaw, myit kabrang nga lu ai. Dai hte maren, num n wa ai jan gaw, mahkawn hkawn ji zawn, shi a hkum hte wenyi chyoi pra lu na lam hpe chyu sha tsang nga ai majaw, Madu a lam hta htep lahti hkan galaw shakut lu ai. Num wa ai jan chyawm gaw mungkan lam ni hpe myit tsang nga ai hte, shi a madu wa hpe myit shapyaw ya na matu, htep lahti hkan galaw shakut ra ai. Ngai ning ngu tsun ai gaw, nanhte hpe lashoi the zawn shingdang da ai lam n rai, garum ai lam she rai nga ai: nanhte htap htuk jaw nga ai lam madun dan nna, Madu hpe n dut n dang daw jau lu myit ga tsun nga nngai.
Karai Kasang a Mungga rai nga ai.

KABU GARA SHIGA

Marku 1:21-28

Ya hti na gaw Marku a laika hta na Kabu Gara Shiga rai nga ai.
Yesu hte Shi a sape ni gaw Kaperna-um mare de shang ma ai. Shaloi jang laban nhtoi e shi shanhte a tara jawng hta shang nna sharin shaga nga ai. Shi sharin shaga ai lam hpe shanhte mau mat nga ma ai; kaning rai nme law, laika ka ai sara ni zawn nrai, daru magam ahkang lu ai wa zawn Shi shanhte hpe sharin shaga ya mu ai. Shaloi jang, shanhte a tara jawng hta e n san n seng nat kap ai masha marai mi lawm nga ai. Dai n seng ai nat jahtau nna, Nazaret na wa Yesu e, anhte nang hte hpa seng ga ta? anhte hpe jahten na nang sa du nni? nang kadai re ai ngai chye nga n ngai, ngu wu ai. Shaloi jang Yesu gaw, Atsim sha nga u; shi kaw nna pru wa u, ngu nna shi hpe daru kau wu ai. Dai rai nna, dai n seng ai nat gaw shi hpe bu kashan shangun nna, nsen kaba hte jahtau let shi kaw nna pru mat wa ai. Shaloi yawng hte gaw mau mahka nga nna, ndai gaw hpa rai nga a ta? ning nan sharin shaga ai lam rai I? daru magam ahkang hte n seng ai nat ni hpe pyi shi htet da nna, shanhte madat mara nga ma ai, nga nna shada da tsun hkat ma ai. Shaloi jang Galile mung ting na shara shagu hkan e, Shi a lam kajai gara gumhkawng pri rai wa sai.
Madu a Kabu Gara Shiga rai nga ai.

2021:PRAN WAN LADAW LABAN (3) NA MUNGGA

 "Karai Kasang a mungdan du ra ai; myit malai nna Kabu Gara Shiga hpe hkap la mu!" ngu ai gaw mungga madung rai nga ai. Karai a mungdan, myit malai, Kabu Gara Shi-ga_ langai hpra a lachyum hpe chye na ra ai. Shawng na lang madat la ai ni a matu, hpa gaw hpa re hpe yawng chye la na n mai byin ai; gau-ngwi ngwi, law law lang madat la hkan shaman nna sha chye na wa ai baw rai nga ai. Lachyum ni hpe chye na la ai hpang, hkan shatup sa na, ngu, dawdan hkan shaman tim pyi, gawng kya ai shinggyim masha ni, kade lang mung tawt lai shut shai chye ma ai. Dai majaw, myit malai ai amu kade lang mung galaw, kade lang mung sharai, dai Kabu Gara Shi-ga a chyeju kumhpa madung, Karai a n htum n wai tsawra matsan dum, hkye hkrang la ai lam hpe grit nem ai myit hte hkap la chye na lam gaw ahkyak dik htum ai re. Dai gaw mungga madung rai nga ai.

Yona gaw Karai Kasang hpe kamsham nawku ai wa re (Karai a magam gun langai, ngu mung n tsun da ai). Maigan masha, hpyen amyu masha ni myit malai nna asak hkrung lu mu ga, myihtoi bungli gan galaw shangun ai. Nineweh de shangun dat hkrum ai. Shi hprawng yen mat ai. Karai Kasang gaw Yona hpe pawt sindawng ai hte ari dam jaw ai n rai; shi hkum nan myit malai lu hkra, Karai a matsan dum mara raw dat ya ai hpe shi hkum nan hkam sha chye hkra, nga" kaba hpe mayu shangun ai; dai hpang, zaibru jang hka hkinggau e prat dat ya ai. Hkum nan myit malai lu ai hpang Nineweh masha ni hpe sa hkaw tsun yang, yawng gaw yawn hkyen myit malai lu, shanhte a n kaja ai lailen ni hpe shading sharai la lu ai majaw, Karai a ari dan kaw na lawt lu ma ai; Karai a hkye hkrang la ai chyeju san san she rai nga ai. Yona a Laika gaw maumwi laika baw hpan raitim, Karai a hkye hkrang la ai amu, masha amyu baw shagu a matu re ai lam hpe grai dan san ai hku ka da ai. Karai e laksan lata da ai Israel amyu masha ni gaw gumrawng gumtawng ai myit hte, Karai a hkye hkrang la ai chyeju kumhpa, gale amyu ni hpe n kam gam jaw ma ai; Karai a mungdan hta n kam shalawm la ma ai. Dai myit masa hpe tai htang sharin ya na matu, Yona a mabyin, shi galaw ai amu hku nna shadan shapra dan ai.

Anhte Jinghpaw Wunpawng amyu sha ni mung, "myu tsaw myit" nga, "Hkristan" nga, "ngai a, ngai na, anhte a, tinang a", ngu, kam ai hku arawng la, shakawng, kaga amyu sha ni hpe gaw grai matsat ai zawn ngu nna tsun jahta chye ga ai n rai a hka! "Hkristan/ Karai a mungdan" ngu ai ga-si ni hpe tinang ra ai hku, tinang maga shanang la grau mayu ai hku myit mang tsun shaga chye ga ai n rai a hka! "Jinghpaw Wunpawng" ngu nna, "Hkristan" ngu nna mung kaya-hpa, matsat-hpa, yawng e yu kaji kau hpa asam maka ni tinang amyu hta kade she law nga ai hpe myit dum let, "Myit malai lu mu" nga nna, Madu Yesu saw shaga ding-yang re. Karai a tsawra matsan dum myit/ Karai Kasang a mungdan gaw America hte Miwa hta mung, Jinghpaw hte Myen hta mung, Buddha, Islam, Hkristan hta mung, Kahtawlik hta mung kaba grau ai, ngu ai hpe myit dum ra ga ai. Yawhan, Andrea, Simun (Petru), shanhte gaw Yesu hpe Messiah hku mu la, chye la manu ai (shawng na laban bat). Yesu sharin shaga ai mungga hpe kamsham hkap la manu ai. Rai tim, shanhte gaw mi galaw nga ai kanbau amu de htang wa ma ai. San seng chyoi pra ai, dinghpring ai hku kanbau makan galaw sha na myit hkut lu ma ai. Grau mai kaja ai shaga la lam hpe n chye shi ma ai.

"Karai a mungdan du ra ai; myit malai lu nna Kabu Gara Shi-ga hpe hkap la mu!" ngu, saw shaga ai nsen gaw shinggyim masha yawng a matu maren sha rai nga ai. Rai tim, Simon, Adrea, Yaku, Yawhan_ shanhte hpe Yesu saw shaga ai, "Nye hpang hkan nang mi, masha hpe hkan hkwi ai ni shatai na nngai", ngu, saw shaga ai nsen gaw, lu mi lu hpe kau da nna, myit masin hkum hkrang, wenyi yawng nawng Madu a lata hta ap da let, sasana amu gun hpai na lam laksan saw shaga ai nsen re.Korentu masha ni hpang ka shagun ai Kasa Pawlu a sharin shaga lam mung, lahta e tsun mat wa ai lam hpe shadan shapra dan ai lam re.

Myit sumru yu na lam:

 Tinang hkum hpe tinang, rai dum ai myit, gumrawng gumtawng myit hpyau nga ai kun?

 Kaga masha ni a gawng kya ra rawng ai lam ni hpe chye na hkap la, garum mayu ai myit gaw rawng nga ai kun?

 Tinang byin dum chye dum ai, lu lawm ai sutgan ni hpe gam garan chye ga ai kun?