2021:PRAN WAN LADAW LABAN (4) NA CHYUM LAIKA

Pranwan Ladaw Laban (4)
January 31, 2021
CHYUM MUNGGA DAW 1

Tara Jahprang 18:15-20

Ya hti na gaw, Tara Jahprang laika hta na rai nga ai.
Israela a kashu kasha ni hpe Mawshe tsun ai gaw: Na a Madu Karai Kasang gaw, na a hpu nau ni hta na, ngai zawn re ai myihtoi langai mi hpe, na a matu paw pru shangun na ra ai: dai wa a ga hpe nanhte madat lu na rai myit dai. Horeb bum e hpawng ai shani e, nang gaw na Madu Karai Kasang hpe hpyi nem let, Ngai n si n ga, ya hpang de nye a Karai Kasang a nsen ngai bai n na lu ni ga; dai wan kaba hpe mung ngai bai n mu ni ga, nga nna nang tsun nit dai. Shaloi Karai Kasang ngai hpe htan nna, Israela amyu masha ni tsun ai ga mahkra htap htuk nga malu ai.
Shanhte a kahpu kanau ni hta na nang zawn re ai myihtoi langai mi hpe, shanhte a matu ngai paw pru shangun na we ai rai nna, dai wa a n-gup hta nye a ga ngai hti bang na hte, ngai hkang da mada hte maren, shi shanhte hpe htawn tsun na ra ai. Nye a mying nsang hte shi htawn tsun ai nye a ga hpe, kadai wa n madat yang, dai wa hpe ngai deng na we ai. Rai ti mung, ngai n hkang da ai ga hpe, nye a amying gang nna tsun pru gwi ai myihtoi mung, hpara shaje a amying hte tsun pru ai myihtoi mung, si lu na rai nga ai, nga nna Madu Karai Kasang gaw ngai Mawshe hpe tsun nu ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 7:32-35

Ya hti na gaw, Korinhtu masha ni hpang de San Pawlu shangun dat ai laika langai hta na rai nga ai. 
Hpu nau ni e, nanhte gaw myit ru myit tsang n nga myit ga ngai ra nga nngai. Num n la ai wa gaw, Madu Karai Kasang hpe myit shapyaw ya na lam chyu sha tsang nga ai majaw, Madu a lam hta htep lahti hkan galaw shakut lu ai; num la ai wa chyawm gaw, mungkan lam ni hpe tsang nga ai hte, shi a madu jan hpe myit shapyaw ya na lam hkan galaw shakut ra ai majaw, myit kabrang nga lu ai. Dai hte maren, num n wa ai jan gaw, mahkawn hkawn ji zawn, shi a hkum hte wenyi chyoi pra lu na lam hpe chyu sha tsang nga ai majaw, Madu a lam hta htep lahti hkan galaw shakut lu ai. Num wa ai jan chyawm gaw mungkan lam ni hpe myit tsang nga ai hte, shi a madu wa hpe myit shapyaw ya na matu, htep lahti hkan galaw shakut ra ai. Ngai ning ngu tsun ai gaw, nanhte hpe lashoi the zawn shingdang da ai lam n rai, garum ai lam she rai nga ai: nanhte htap htuk jaw nga ai lam madun dan nna, Madu hpe n dut n dang daw jau lu myit ga tsun nga nngai.
Karai Kasang a Mungga rai nga ai.

KABU GARA SHIGA

Marku 1:21-28

Ya hti na gaw Marku a laika hta na Kabu Gara Shiga rai nga ai.
Yesu hte Shi a sape ni gaw Kaperna-um mare de shang ma ai. Shaloi jang laban nhtoi e shi shanhte a tara jawng hta shang nna sharin shaga nga ai. Shi sharin shaga ai lam hpe shanhte mau mat nga ma ai; kaning rai nme law, laika ka ai sara ni zawn nrai, daru magam ahkang lu ai wa zawn Shi shanhte hpe sharin shaga ya mu ai. Shaloi jang, shanhte a tara jawng hta e n san n seng nat kap ai masha marai mi lawm nga ai. Dai n seng ai nat jahtau nna, Nazaret na wa Yesu e, anhte nang hte hpa seng ga ta? anhte hpe jahten na nang sa du nni? nang kadai re ai ngai chye nga n ngai, ngu wu ai. Shaloi jang Yesu gaw, Atsim sha nga u; shi kaw nna pru wa u, ngu nna shi hpe daru kau wu ai. Dai rai nna, dai n seng ai nat gaw shi hpe bu kashan shangun nna, nsen kaba hte jahtau let shi kaw nna pru mat wa ai. Shaloi yawng hte gaw mau mahka nga nna, ndai gaw hpa rai nga a ta? ning nan sharin shaga ai lam rai I? daru magam ahkang hte n seng ai nat ni hpe pyi shi htet da nna, shanhte madat mara nga ma ai, nga nna shada da tsun hkat ma ai. Shaloi jang Galile mung ting na shara shagu hkan e, Shi a lam kajai gara gumhkawng pri rai wa sai.
Madu a Kabu Gara Shiga rai nga ai.

2021:PRAN WAN LADAW LABAN (3) NA MUNGGA

 "Karai Kasang a mungdan du ra ai; myit malai nna Kabu Gara Shiga hpe hkap la mu!" ngu ai gaw mungga madung rai nga ai. Karai a mungdan, myit malai, Kabu Gara Shi-ga_ langai hpra a lachyum hpe chye na ra ai. Shawng na lang madat la ai ni a matu, hpa gaw hpa re hpe yawng chye la na n mai byin ai; gau-ngwi ngwi, law law lang madat la hkan shaman nna sha chye na wa ai baw rai nga ai. Lachyum ni hpe chye na la ai hpang, hkan shatup sa na, ngu, dawdan hkan shaman tim pyi, gawng kya ai shinggyim masha ni, kade lang mung tawt lai shut shai chye ma ai. Dai majaw, myit malai ai amu kade lang mung galaw, kade lang mung sharai, dai Kabu Gara Shi-ga a chyeju kumhpa madung, Karai a n htum n wai tsawra matsan dum, hkye hkrang la ai lam hpe grit nem ai myit hte hkap la chye na lam gaw ahkyak dik htum ai re. Dai gaw mungga madung rai nga ai.

Yona gaw Karai Kasang hpe kamsham nawku ai wa re (Karai a magam gun langai, ngu mung n tsun da ai). Maigan masha, hpyen amyu masha ni myit malai nna asak hkrung lu mu ga, myihtoi bungli gan galaw shangun ai. Nineweh de shangun dat hkrum ai. Shi hprawng yen mat ai. Karai Kasang gaw Yona hpe pawt sindawng ai hte ari dam jaw ai n rai; shi hkum nan myit malai lu hkra, Karai a matsan dum mara raw dat ya ai hpe shi hkum nan hkam sha chye hkra, nga" kaba hpe mayu shangun ai; dai hpang, zaibru jang hka hkinggau e prat dat ya ai. Hkum nan myit malai lu ai hpang Nineweh masha ni hpe sa hkaw tsun yang, yawng gaw yawn hkyen myit malai lu, shanhte a n kaja ai lailen ni hpe shading sharai la lu ai majaw, Karai a ari dan kaw na lawt lu ma ai; Karai a hkye hkrang la ai chyeju san san she rai nga ai. Yona a Laika gaw maumwi laika baw hpan raitim, Karai a hkye hkrang la ai amu, masha amyu baw shagu a matu re ai lam hpe grai dan san ai hku ka da ai. Karai e laksan lata da ai Israel amyu masha ni gaw gumrawng gumtawng ai myit hte, Karai a hkye hkrang la ai chyeju kumhpa, gale amyu ni hpe n kam gam jaw ma ai; Karai a mungdan hta n kam shalawm la ma ai. Dai myit masa hpe tai htang sharin ya na matu, Yona a mabyin, shi galaw ai amu hku nna shadan shapra dan ai.

Anhte Jinghpaw Wunpawng amyu sha ni mung, "myu tsaw myit" nga, "Hkristan" nga, "ngai a, ngai na, anhte a, tinang a", ngu, kam ai hku arawng la, shakawng, kaga amyu sha ni hpe gaw grai matsat ai zawn ngu nna tsun jahta chye ga ai n rai a hka! "Hkristan/ Karai a mungdan" ngu ai ga-si ni hpe tinang ra ai hku, tinang maga shanang la grau mayu ai hku myit mang tsun shaga chye ga ai n rai a hka! "Jinghpaw Wunpawng" ngu nna, "Hkristan" ngu nna mung kaya-hpa, matsat-hpa, yawng e yu kaji kau hpa asam maka ni tinang amyu hta kade she law nga ai hpe myit dum let, "Myit malai lu mu" nga nna, Madu Yesu saw shaga ding-yang re. Karai a tsawra matsan dum myit/ Karai Kasang a mungdan gaw America hte Miwa hta mung, Jinghpaw hte Myen hta mung, Buddha, Islam, Hkristan hta mung, Kahtawlik hta mung kaba grau ai, ngu ai hpe myit dum ra ga ai. Yawhan, Andrea, Simun (Petru), shanhte gaw Yesu hpe Messiah hku mu la, chye la manu ai (shawng na laban bat). Yesu sharin shaga ai mungga hpe kamsham hkap la manu ai. Rai tim, shanhte gaw mi galaw nga ai kanbau amu de htang wa ma ai. San seng chyoi pra ai, dinghpring ai hku kanbau makan galaw sha na myit hkut lu ma ai. Grau mai kaja ai shaga la lam hpe n chye shi ma ai.

"Karai a mungdan du ra ai; myit malai lu nna Kabu Gara Shi-ga hpe hkap la mu!" ngu, saw shaga ai nsen gaw shinggyim masha yawng a matu maren sha rai nga ai. Rai tim, Simon, Adrea, Yaku, Yawhan_ shanhte hpe Yesu saw shaga ai, "Nye hpang hkan nang mi, masha hpe hkan hkwi ai ni shatai na nngai", ngu, saw shaga ai nsen gaw, lu mi lu hpe kau da nna, myit masin hkum hkrang, wenyi yawng nawng Madu a lata hta ap da let, sasana amu gun hpai na lam laksan saw shaga ai nsen re.Korentu masha ni hpang ka shagun ai Kasa Pawlu a sharin shaga lam mung, lahta e tsun mat wa ai lam hpe shadan shapra dan ai lam re.

Myit sumru yu na lam:

 Tinang hkum hpe tinang, rai dum ai myit, gumrawng gumtawng myit hpyau nga ai kun?

 Kaga masha ni a gawng kya ra rawng ai lam ni hpe chye na hkap la, garum mayu ai myit gaw rawng nga ai kun?

 Tinang byin dum chye dum ai, lu lawm ai sutgan ni hpe gam garan chye ga ai kun?

2021:PRAN WAN LADAW LABAN (3) NA CHYUM LAIKA

Pranwan Ladaw Laban (3)

January 24, 2021

CHYUM MUNGGA DAW 1

Yona 3:1-5, 10

Ya hti na gaw, myihtoi Yona a laika hta na rai nga ai.

Lahkawng lang ngu na hta Madu gaw Yona hpe shi a mungga tsun dan wu ai. Madu gaw, Rawt u; kaba la ai Niniwe mare de sa nna, ngai nang hpe hkang da ni ai the maren hkaw dan su, ngu wu ai. Shing rai Yona gaw Madu a ga hpe madat la nna, Niniwe mare de rawt sa wa sai. Ya Niniwe mare gaw nhtoi masun ya sat dam lada nna, nachying kaba la ai mare rai nga ai.

Yona gaw dai mare hta e lani sat hkawm nna, Nhtoi mali shi ya lai jang, Niniwe masha ni hten mat na ra ai, ngu nna jahtau tsun wu ai. Niniwe masha ni gaw Karai Kasang hpe kam sham ma ai rai nna, lusha gam na ladaw tawn da ma ai hte, kaji ai ni kaw nna kaba ai ni du hkra, lachyit nba bu hpun ma ai. Ya dai mare na ni gaw tinang a n hkru ai lam koi kau ai amu hpe, Karai Kasang mu wu ai rai nna, shanhte hpe ari jaw na lam, shi matsan dum ai hte tawn kau nna hpa n di mu ai.

Karai Kasang a Mungga rai nga ai.

CHYUM MUNGGA DAW 2

1 Korinhtu 7:29-31

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, ngai tsun mayu ai lam gaw: ahkying ladaw gying mat wa sai. Dai rai nna, num lu ai ni gaw n lu ai zawn rai wa manu ga. Hkrap ngu hkrap ngoi ai ni mung, yawn hkyen ai lam n nga ai zawn; kabu gara ai ni gaw kabu hpa lam n nga ai zawn; hpaga ga ai ni gaw tinang nan hpa n madu lu ai ni zawn rai wa manu ga. Bai nna, dai mungkan ga a ja sutgan hpe jum lang ai ni gaw, dai hta myit hkum manoi nga mu ga. Kaning rai nme law, ya anhte mu chye ai ndai mungkan ga gaw lai mat wa nga ai.

Karai Kasang a Mungga rai nga ai.

KABU GARA SHIGA

Marku 1:14-20

Ya hti na gaw Marku a laika hta na Kabu Gara Shiga rai nga ai.

Yawhan gaw ap kau hkrum ai hpang, Yesu gaw Galile mung de sa du nna, dai aten ladaw dik wa ai hte, Karai Kasang a mung dan gaw ni wa magang ra ai: myit malai lu nna, dai kabu gara shiga hpe kam sham nga mu, ngu nna Karai Kasang a kabu gara shiga hpe hkaw dan mu ai.

Galile nawng makau e garet hkawm nga yang, Simun hte Andre yan nau gaw, nawng hta e sumgawn kabai bang nga ai hpe, shi mu hkrup wu ai. kaning rai nme law, shan gaw nga hkan sha ai masha rai nga ai.

Shaloi Yesu gaw, Ngai kaw hkan marit, masha hpe hkan hkwi na masha, ngai nan hpe shatai na made ai, ngu nna shan hpe tsun mu ai. 

Shaloi jang shan gaw dai sumgawn ni hpe kau da nna, Shi kaw hkan nang ma ai. 

Bai, loi mi hkawm sa wa yang, Zebedi a kasha Yaku hte shi a kanau Yawhan yan hpe Shi mu hkrup mu ai; shan gaw dai li hta e tinang a sumgawn ni hpe kapa nna nga nga ma la ai. Shaloi jang Yesu gaw shan hpe shaga mu ai; dai rai nna shan gaw. Shan a kawa Zebedi hpe nchyang ni hte rau, dai li hta e jahti da nna shi kaw hkan nang ma ai.

Madu a Kabu Gara Shiga rai nga ai.

2021:PRAN WAN LADAW LABAN (2) NA MUNGGA

Yesu hpe kashin kamun jaw ai Yawhan gaw, Yesu lai sa wa ai hpe mu jang, shi a sape yan hpe tsun ai, "Yu mu, Karai a Sagu Kasha" ngu, shacyen ya ai. Dai yan hta na langai wa gaw Yesu hpang hkan sa nna san ai, "Rabi e, nang gara kaw nga a ta?" nga ai. Yesu saw shaga ai, "Hkan sa nna yu la u", nga ai. Yu la, madat la ngut ai htawm, Messiah, Sau Chya Hkrum ai Wa, Karai e laksan shangun dat ai masha, ngu ai hpe chye la nu ai. Dai mabyin gaw mungga madung re: Yesu a sape tai mayu ai wa gaw Yesu kadai re ai, kaning rai nga ai, shi a bungli madung hpa re ai lam atsawm sha chye la ra ai. Sharin hkaja la ngut jang, tinang mung, dai Hkristu a hpang kangka ai hte htep lahti hkan nang ra ai. Shi a sasana magam hta shang lawm ra ai.

Samuel gaw kanu yan kawa, asak grai kaba ai hpang lu la ai ma, kasha shingtai. Kanu n sim n sa akyu hpyi ai majaw lu ai ma; Karai hpe ga-sadi jaw da ai hte maren, Karai a shangun ma tai na matu ap nawng da ai. Dai majaw, jau kaba Eli a lata hta ap da ai. Makam masham hkrak sharin la lu ai. Karai Kasang shi hpe laklai ai hku shaga la ai: myihtoi magam gun let Karai a amyu masha hpe woi awn zinlum na matu re. Chyum Laika ting hta, Karai e laksan shaga la hkrum ai ni law law nga ma ai. Rai tim, yawng mayawng gaw Karai a shaga ai nsen hpe madat nna, tinang hpe Karai Kasang gara hku shangun lang mayu ai, ngu ai hpe tam la ra ma ai. Jau tai na, mama tai na, engineer tai na, tsi sara Doctor tai na, sun hkauna galaw na, mawdaw gau na, laksama galaw na,.... Karai e san da ya ai shaga lalam hkrai re ai hpe myit dum ra ga ai.

Yawng hta bung hkat ai lam gaw, sanseng chyoi pra ai aprat hpe gawgap nna, Karai a hpung shingkang a matu, Karai a mungdan a matu, tinang nang lata la ai 'sak hkrung mahkrun hku nna Karai Kasang hpe dawjau na, ngu ai hta, yawng gaw hkrum ai; langai sha re ai shaga la lam re. Ehpesu masha ni hpe shagun dat ai Kasa Pawlu a Laika gaw dai lam hpe madi nna shadum jahprang ya ai.

Tinang kaning re ai asak hkrun lam, kaning re ai hpan shaga la hkrum ai rai tim, Samuel zawn, Petru hte Andru yan nau zawn, "Madu e tsun rit, ngai nang e nga nga nngai; ngai hpe shangun et" ngu nna htan ya ra ga ai. Kalang mi sha htan jaw nna ngut ai baw n re ai. Ndai dinghta prat tup, Karai Kasang tinang hpe hpa matsun mayu ai, hpa byin shangun mayu ai lam myi/na chyaw chyaw mu la na la na n rai nga ai. Sape yan gaw Madu Yesu hpang hkan sa nna, Madu shi gara hku nga ai hpe sa yu la ma ai; Yesu hte tsun jahta shaga hkat nna lachyum chye la ai hpang, Yesu a sape tai lu na lam, sharin hkaja la lu ma ai.

Anhte langai hpra mung, Yesu hte ni ni htep htep asak hkrung nna, myit sumru ai, akyu hpyi ai, Yesu hte jahta shaga nna sha, sape kaja ni tai lu na rai nga ai. Matut nna sharin hkaja la ra ga ai. Tinang nang lata la ai 'sak hkrung mahkrun, shaga la ai lam hta Karai Kasang hpe madat mara dawjau lu na rai nga ai.

Myit sumru yu na lam:
 Shani shagu na mahkrum madup hta Karai Kasang a shaga la ai nsen hpe gara hku na la chye la lu na ga ta?
 Langai sha re ai, Hkristu a sape ni yawng, yawng hta bung ai shaga la ai lam madung hpe tinang kade manu shadan chye a ta?
 Shani shagu na mahkrum madup ni hta Karai Kasang hpe gara hku htan ya ga ta?

2021:PRAN WAN LADAW LABAN (2) NA CHYUM LAIKA

 Pran wan lawan Ladaw (2)
January 17, 2021
CHYUM MUNGGA DAW 1

1 Samuela 3:3-10, 19

Ya hti na gaw, Samuela a laika hta na rai nga ai.
Samuela gaw Madu a nawku nta hta, Karai Kasang a chyoi pra ai sumpu tawn da ai shara e yup nga yang, 4Madu shi hpe shaga wu ai. Samuela gaw, Nang e nga nngai, ngu nna htan wu ai. Shaloi hkinjawng agyi Eli hpang de gat sa nna, Nang shaga ai majaw, wa ring ngai, ngu wu ai. Eli gaw, Ngai n shaga ai; naw yup nga su, ngu nna tsun jang Samuela wa nna bai yup nga ai. Bai Madu gaw, Smmuela e, ngu nna shi hpe bai shaga wu ai. Shi mung rawt nna Eli hpang de sa nhtawm, Nang shaga ai majaw wa ring nngai, ngu wu yang, Eli gaw Ngai sha e, ngai n shaga ai; bai wa yup nga su, ngu dat wu ai. Ya Samuela gaw Madu a lam hpe atsawm sha garai n chye nga ai; Madu mung shi a mungga shi hpe garai n tsun dan wu ai.
Masum lang ngu na hta Madu gaw Samuela hpe shaga wu ai. Shi mung rawt nna Eli hpang de sa nhtawm, Nang shaga ai majaw wa ring ngai, ngu wu yang, dai ma hpe Madu shaga nga ai gaw Eli dum wu ai. Dai rai ai majaw Eli gaw, Naw wa yup nga su; ya na lang bai shaga jang, Madu e, tsun rit; na a shangun ma madat nga nngai, ngu nna htan u, ngu dat wu ai. Shing rai Samuela bai wa nna, shi a shara e yup nga ai. Shaloi Madu sa tsap nna, shawng na zawn, Samuela, Samuela nga nna, shaga wu ai. Samuela mung, Tsun rit; na a shangun ma madat nga nngai, ngu nna htan wu ai. Samuela kaba wa nna, Madu shi hte rau nga nga ai; shi n-gun matsing ai Madu a mungga langai mi pyi n nga ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 6:13-15, 17-20

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.
Hpu nau ni e, Masha a hkum hkrang gaw n se n sa ai amu a matu n re ai sha, Madu a matu rai nga ai; Madu mung dai hkum hkrang a matu rai nga ai. Karai Kasang gaw Madu Hkristu hpe jahkrung sharawt la sai rai nna, anhte hpe mung shi a n-gun atsam hte jahkrung sharawt la na mi ai. Nanhte a hkum hkrang ni Hkristu a daw shan ni rai nga ai hpe nanhte chye chyalu rai nga myit dai;
Madu Hkristu hte matut manoi nga ai wa gaw, nsa wenyi a lam hta Madu hte langai sha tai wa nga ai.
Dai rai nna, n se n sa ai amu hpe koi kau nga mu. Masha galaw ai shut hpyit mara kaga hte gaw, tinang a hkum hkrang a shinggan e galaw nga ai; n se n sa ai amu galaw ai wa chyawm gaw shi a hkum hkrang hpe nan shut hpyit da wu ai. Ya nanhte a hkum hkrang gaw Chyoi Pra ai Wenyi sa nga ai htingnu rai nga ai hpe nanhte chye nga myit dai. Nanhte tinang hkum hpe madu lu ai n rai; nanhte a matu jahpu manu jaw ya nna mari da sai ni rai nga myit dai. Dai re ai majaw, nanhte a hkum hkrang the Karai Kasang hpe shagrau sha-a nga mu law.
Karai Kasang a Mung rai nga ai.

KABU GARA SHIGA

Yawhan 1:35-42

Ya hti na gaw Yawhan a laika hta na Kabu Gara Shiga rai nga ai.
Bai hpang shani e, Yawhan hte shi a sape lahkawng rau tsap nga ma ai rai nna, Yesu lai sa wa nga yang, Yawhan gaw Shi hpe mada yu nna, Karai Kasang a sagu kasha hpe yu yu mu! Ngu mu ai. Dai sape yan gaw shi tsun ai ga na nna, Yesu kaw hkan sa ma ai. Yesu gaw gayin yu nna, dai yan hkan sa ai hpe mu wu yang, nan hpa tam myit ta? ngu nna hkap san mu ai. Shan gaw, Rabai e, nang ganang nga n ta? ngu nna Shi hpe n htang san mu ai. Yesu gaw, sa ma rit, shaloi nan mu na marin dai, ngu nna shan hpe tsun wu ai. Dai re ai majaw, shan hkan sa nna, Shi nga ai shara ganang re ai mung mu ma jang, dai shani tup Shi hte rau nga nga ma ai.
Yawhan tsun ai ga na nna, Shi kaw hkan sa ai yan hta na langai mi gaw, Simun Petru a kanau Andre rai nga ai. Dai wa gaw shi a kahpu Simun hpe shawng mu nna, an gaw Mesiah hpe mu saga ai, ngu nna shi hpe tsun dan ma ai. (Mesiah ngu ai ga lachyum gaw, Hkristu nga ai, rai nga ai) Shaloi Andre gaw Yesu hpang de shi hpe woi wa wu ai.  Yesu gaw shi hpe hkap yu nna, nang gaw Yawhan a kasha Simun rai nga ndai: nang kehpa ngu ai mying lu na rin dai, ngu wu ai. (Kehpa ngu ai lachyum gaw, lunghkrung nga ai, rai nga ai)
Madu a Kabu Gara Shiga rai nga ai.

2021:YESU KASHIN KAMUN HKAM LA AI POI SHANI NA MUNGGA

Hkrismat ladaw a jahtum, pranwan ladaw hpang ai nhtoi; kashin kamun hkam la ai aten hta asak aprat ningnan hpang wa ai lam hpe myit dum shangun ai. Kashin Kamun Sakramentu a marang e, Hkristu a adaw ashan tai wa ga ai. Chyum Mungga masum hte gaw, Karai Kasang hte daw ang nna Yesu kadai re ai, Anhte gaw kadai ni rai ga ai, ngu ai gasan ni hpe mahtai jaw ai re. Karai a n htum n wai ai tsawra matsan dum myit a marang e, shinggyim masha ni n tak sawn lu ai hku nna, Karai Kasang gaw shinggyim masha ni hpe hkye hkrang la ai. Asak hta grau manu dan ai hpa n nga sai; anhte hkam la lu sa ga ai hkye hkrang la ai chyeju kumhpa, asak a chyeju kumhpa ni a marang e, Karai Kasang hpe chyeju dum chyeju htang ding-yang rai ra ga ai. Kaja dik htum ai chyeju shakawn ai amu, Karai Kasang hpe tsawra ai lam hpe madun dan ai amu gaw, Karai Kasang a Mungga/ Shi a tara matsun ni hpe hkan shatup ai lam re, ngu ai gaw mungga madung rai nga ai.

Baptisma a lachyum hkrak gaw hka kata dip lup ai hpe ngu ai; dai dip lup ai lam a lachyum madung gaw ningpawt shut hpyit mara/ mara hpe kashin shaprai kau na matu re. Dai majaw, tinang a ga hku gale lang ai shaloi anhte gaw hka lup, ngu ai ga-si a malai, Kashin Kamun, ngu tsun lang ga ai re. Baw ntsa hka loi sha jaw bun nna kashin kamu jaw ga tsun yang kaning rai shut hpyit mara lawt lu na kun? Kaning rai Karai a kasha tai wa lu na kun? Isaiah a Laika hta tsun da ai, anhte shinggyim masha ni e sawn yu n lu ai, myit hku n hkawn lu ai lam hpe shabyin ya ai Karai Kasang she rai nga ai. Karai a hkye hkrang la ai masing mau-hpa wa n rai a hka!

Isaiah a Laika hta, matut nna Karai a shangun ma (Yawhan Baptista/ Yesu) galaw gun hpai na amu a lam tsun da ai. Karai a hkye hkrang la ai masing, mungkan masha ni a matu gran da ai masing awng nan awng ra ai, nga ai. Karai a shangun ma, ngu ai wa gaw, dinghta ga na n hkru n kaja ai baw, shut hpyit mara a ru pawt hpe gasat ra na. Kawsi hpang gara hkrum ai ni hpe lu-sha jaw ya na; shada htingram hkat ai hte simsa ai lam hpe gaw sharawt lu na, hkye hkrang la ai amu matut galaw gun hpai lu na. Kashin Kamun hkam la ai shaloi, Chyoi Pra Wenyi a chyeju kumhpa ni hpe hkam la ai a marang e, Karai Kasang a yaw sing ai amu ni hpe galaw gun hpai lu ai atsam ni lu la na rai nga ai. Marku Laika hta Karai Kasang e shaga ai nsen, "Nang gaw ngai tsawra ai Kasha rai lit dai; nang hta ngai sharawng awng nga li ai", ngu ai ga, Yesu shi galaw gun hpai ra na sasana hpe tsun ai rai nga ai. Yesu a sasana magam ting hta, Chyoi Pra Wenyi hte hpring ai, Chyoi Pra Wenyi a jasu jahprang ai chyeju hte Yesu gaw sasana amu gun hpai ai re. Isaiah a Laika hta tsun da hte maren, Yesu gaw kamsham ai hpung masha ni a matu mai kaja dik ai lu-sha hte daw ya na rai nga ai. Chyoi Pra Hkum Sakramentu lajang da ya ai hta, Isaiah ga dik wa lu ai rai nga ai. Wudang ntsa e jen noi si hkam nna bai hkrung rawt wa ai a marang e kaga Sakramentu ni hpe shabyin da ya ai rai nga ai. Hpang jahtum na Sakramentu gaw Chyoi Pra Wenyi hpe shangun dat ya ai, Ninggun Shaja Sakramentu rai nga ai.

Anhte Karai e shabyin ai amu, hkye hkrang la ai chyeju kumhpa ni hpe jahpu manu n jaw ai sha hkam la lu sa ga ai. Shinggyim hkum shan hte re ai Yesu hpe Karai shi a Kasha shatai la nu ai; dai maren sha re ai chyeju kumhpa hte shaga la ai lam anhte mung hkam la lu sa ga ai. Karai Kasang hpe gara hku chyeju htang na lam, Karai Kasang hpe gara hku nna tsawra madat mara ai hpe madun dan lu na lam, lahkawng ngu na Chyum Mungga hta Kasa Petru anhte hpe matsun ya ai.

Myit sumru yu na lam:
• Karai Kasang e shabyin da ai hkye hkrang la ai amu ni, Sakramentu ni hpe kamsham myit hte hkap la ga ai kun?
• Reng grau dik htum ai chyeju kumhpa ni lu la ninglen, prat hta myit n dik dum rai chye ga ai kun? Makam masham hte n htan shai ai hku sut lu nga mai lam tam kau sa ga ai kun?
• Jahpu manu n jaw ai hkye hkrang la ai chyeju kumhpa ni hkam la lu sa ga ai; Karai a shangun ma tai wa ai ni, sasana magam hta kade madang hku shang lawm ga ta?

2021:YESU KASHIN KAMUN HKAM LA AI POI SHANI NA CHYUM LAIKA

MADU YESU KASHIN KAMUN HKAM LA AI POI
JanUARY 10, 2021
Chyum Mungga Daw 1

Esaia 55:1-11

Ya hti na gaw, Myihtoi Esaia laika hta na rai nga ai.
Hpang kara hkrum ai ni yawng the e, ntsin nga ai de sa ma rit, gumhpraw n lu ai ni e, sa ma rit, mi nna lu sha mu; gaja wa, sa ma rit, gumhpraw mung, manu jahpu mung, n hkrat ai sha, tsabyi jahku the nga chyu hpe mari lu mu. Shahpa n re ai a matu, nanhte agumhpraw hpe mung, hkru kat n chye ai aria a matu, nanhte a n-gun hpe mung, hpa majaw ginlut kau nga myit ta? Nye a ga atsawm sha madat mara let, mai kaja ai hpe sha nna, nanhte a myit masin sau hpum ai hta awng sharawng nga mu ga. Na la nna ngai hpang de sa ma rit; madat mara mu, shing rai yang nanhte a myit masin hkrung nga na ra ai: ngai mung nanhte hte htani htana ga shaka tawn da nna, Dawi hta grin nga ai chyeju hpe nanhte hta shagrin da na nngai. Yu u, amyu baw ni a sakse wa tai na mung, amyu baw ni a du the up hkang ai wa tai na mung, ngai shi hpe san da ni ai. Nang n chye ai amyu hpe nang shaga la nna, nang hpe n chye ai amyu mung, na a Karai Kasang the Israela a Chyoi pra ai wa a majaw, nang hpang de gat bang wan a ra ai: kaning rain me law, shi gaw nang hpe shagrau shatsaw nga ai. 
Karai Kasang hpe mu lu ai aten e shi hpe tam mu: shi naw ni nga yang,shi hpe hpyi shaga mu: tara n lang ai wag aw shi a lam hpe, n hkru ai wa gaw shi a myit manga i hku kau da nna, Karai Kasang hpang de kayin wa u ga; shing rai yang shi gaw dai wa hpe matsan dum na ra ai; anhte a Karai Kasang hpang de mung kayin wa u ga; shi gaw mara hpe htum hkra raw dat kau ya na ra ai. 8Kaning rai nme law, ngai myit mang ai hku, nanhte myit mang ai hku n rai; nanhte a lam ni nye a lam ni zawn n rai, nga nna Karai Kasang tsun ai. Sumsing lamu gaw ginding aga hta tsaw nga ai the maren, nye a lam ni nanhte a lam ni hta, ngai myit mang ai hku, nanhte myit manga i hta, grau tsaw nga ai. Kaning rain me law, marang the ahkyen gaw, lamu de na htu hkrat nna, dai de bai n wa ai sha, nli gat ai wa hpe nli, makan galaw ai wa hpe nli, makan galaw ai wa hpe shahpa jaw lu hlra, aga hpe madit let, matsun the maku shaprut nna, asi si shangun ai zawn, nye n-gup kaw na pru ai Mungga mung, dai the maren tai na ra ai: dai gaw ngai hpang de Kaman nhtang wan a nrai; ngai ra ai hku shadik ya na ra ai; ngai shangun ai amu hta, awng wa na ra ai.
Karai Kasang a Mungga rai nga ai.

Chyum Mungga Daw 2

1 Yawhan 5:1-9

Ya hti na gaw, Yawhan a shagun dat ai laika langai hta na rai nga ai.
Yesu gaw Hkristu nan rai nga ai, nga nna kamsham ai wa kadai raitimung, Karai Kasang kaw na shaprat ai wa tai nga ai rai nna, dai shaprat ai wa hpe tsawra ai wa kadai raitimung, shi kaw na shaprat hkrum ai wa hpe mung tsawra wu ai. Karai Kasang hpe tsawra nga ai the, she a hkangda ai ga hpe hkan galaw ga yang gaw, Karai Kasang a kashu kasha ni hpe mung anhte tsawra nga ga ai hpe, anhte chye nga ga ai. Kaning rain me law, Karai Kasang a hkangda ai ga hpe hkan galaw ai lam gaw, shi hpe tsawra ngu ai lam rai nga ai; shi a hkangda ai ga chyawm gaw, yak la nga ai n rai. Karai Kasang kaw nna shaprat ai wa kadai raitimung, dai mungkan ga hpe dang kau nu ai; padang lam chyawm gaw, anhte a makam masham rai nga mali ai. Yesu gaw Karai Kasang a Kasha rai nga ai, ngu nna kamsham ai wa sha n rai yang gaw, mungkan ga hpe dang kau ai wa, kadai rai nga a ta? Dai wa gaw hka hte mung, asai hte mung sa du nna, Yesu Hkristu ngu ai nan rai nga ai: hka hta sha n rai, hka hta e raitimung, asai hta e raitimung, shi sa du nga ai. Dai Wenyi gaw tengman ai npawt rai nga ai majaw, dai Wenyi nan sakse hkam nga ai. Kaning rain me law, masum the ngu ai gaw, Wenyi mung, ahka mung, asai mung sakse hkam ya ma ai rai nna, dai masum the gaw langai sha rai nga ma ai. Masha a sakse anhte hkam ga yang gaw, Karai Kasang a sakse dai hta grau nna kaba nga ai: kaning rain me law, Karai Kasang shi a Kasha hpe sakse hkam ya ai gaw, nga nna Karai Kasang a sakse lam rai nga ai.
Karai Kasang a Mungga rai nga ai.

Kabu Gara Shiga

Marku 1:7-11

Ya hti na gaw Marku a laika hta na Kabu Gara Shiga rai nga ai.
Shaloi shi gaw, Ngai hta n-gun grau rawng ai wa gaw, nye a hpang e du na ra ai: shi a kyepdin sumri hpe ngai gum raw na pyi ging nga nngai n rai. 8Ngai gaw nanhte hpe hka hta Kashin Kamun jaw masade ai, raitimung, dai wa gaw, nanhte hpe chyoi pra ai Wenyi hta kashin kamun jaw na marin dai, ngu nna hkaw dan mu ai. 9Dai nhtoi hte hta e Yesu gaw, Galile mung, Nazaret mare de na sa du nna Yawhan a lata hte Yawdan hka hta e Kashin Kamun hkam la wu ai. 10Shaloi jang, dai hka hta na shi pru lung wa yang sumsing lamu gaw ga malang wa ai hte, dai Wenyi gaw hkrudu zawn, shi a ntsa e yu wa ai hpe, shi mu wu ai rai nna, Nang gaw ngai tsawra ai Kasha rai nga ndai; nang hta ngai sharawng awng nngai law, nga ai nsen gaw lamu de na ngoi pru ai.
Madu a Kabu Gara Shiga rai nga ai.

2021:HKAWHKAM MASUM POI SHANI NA MUNGGA

Ehpesu Laika hta tsun da ai, "Karai Kasang e jahtim da ai masing, shawng shawng na masha ni n chye lu ai lam ni hpe, ya, Kasa ni hte myihtoi ni hpe shadan dan sai; makam masham a shinggan na maigan masha ni, Yesu Hkristu hta, Jew/ Israel amyu sha ni hte rau sutli kumhtaw jawm dagraw hkam la ai ni tai wa ma sai...." nga ai. Hkawhkam marai masum, ngu tim, shanhte gaw mung-up hkawhkam ni n rai ma ai. Reng grau dik ai, Karai Kasang e hpaw madun dan ai lam, mungkan ting hpe uphkang ai hkawhkam ni a Hkawhkam, Bethlehem kaw shangai wa sai, ngu ai lam hpe shagan a hpang hkan nang mu tam la ma ai. Dai zawn hpaji rawng ai, Karai Kasang hpe tam ai ni re ai majaw, shanhte hpe hkawhkam masum, ngu nna shagrau ya ai lam re. Karai Kasang e shadan dan ai lam hpe hkan tam ai ni, Karai e shabyin ai amu nlang hte hpe hkap la ai ni yawng mung, "hkawhkam" ngu ai arawng aya lu mai ai lam shadum ya ai.

Isaiah Laika hta tsun da ai lam, Babylon e mayam tai ai kaw nna bai lawt wa ai Israel amyu masha ni, Yerusalem Nawku Htingnu de lung kawan ma ai lam tsun da ai. Mungkan ga gaw awu asin hte hpring ai, ningsin e ka-up da ai mungkan re ai lam; Karai e shadan dan ai Ninghtoi kaba hpe gale amyu masha ni mung mu lu nna, amyu baw shagu Karai Kasang hpe nawku dawjau lu na lam hpe tsun da ai.

Mahte gaw, shawng shawng na myihtoi ni tsun da ai ga, grau nna Isaiah Laika hta tsun da ai ga gaw shangai chyinghkai wa ai, dai Hkristu Yesu hta teng sha dik wa sai lam hpe tsun hpaw dan ai. Yesu hta madun dan ai, Karai shi a hkum hpe shi shadan dan ai lam gaw masha amyu baw shagu a matu re ai lam hpe sharin ya ai. Bai, hpaji ninghkrin marai masum, Karai Kasang galaw ai amu hpe hkan tam ai ni hte tai shai nna, hkawhkam Herod gaw, gumrawng gumtawng ai majaw, Karai Kasang e shabyin ai amu hpe ningdang nyet kau ai. Herod gaw, tinang a machye machyang, arawng aya, ja gumhpraw hpe manoi ai, matsan dum n chye ai, Karai Kasang nan madun dan hkra rai tim n hkap la lu ai majaw, dai asak Madu jaw ya mayu ai asak a chyeju ni hpe tat kau nu ai. Hkristu Yesu gaw Ninghtoi majing rai nga ai; Gintawng Shagan majing rai nga ai. Sumsing mungdan de matut bu hkawm ai hkrun lam hta, dai ninhtoi a lam madun ai hpe hkam la ra ga ai. Ndai dinghta prat hta sinchyip, sinmak rai, ruyak jamjau hkrum ai, hka hkrum ai, tinang hta byin wa ai mabyin ni hpe n chye na ai majaw ung ang ai, ning re ai prat hta teng sha, Yesu Hkristu a matsun madun ai lam ra kadawn ga ai.

Myit sumru yu na lam:

 Anhte law mi law, Hkristan makam masham hpe n tam la ga ai; kanu kawa kaw na lu ai ni she law ga ai. Kashin kamun sakramentu a marang e hkam la lu ai shaman chyeju ni a jaw e, kanu kawa hpe mung, Karai  Kasang hpe mung, kade lang, gara hku chyeju htang ga a ta?

 Kashin kamung hkam la lu ga ai majaw, shaga la hkrum ai lit madung  nga ai; mungkan masha ni hpe ninhtoi jahtoi ya na lam re. Kasi kaja  madun ga ai kun? Masha ni hpe myit kataw shangun ai ningsin  mahtang tai kau ai kade lang she rai kun?

 Prat hkrun lam hta ningsin chyip, nga ai gam maka hkrum katut wa ai aten ni hta, gara hku sharai la lu ai lam ni hpe myit yu na.

2021:HKAWHKAM MASUM POI SHANI NA CHYUM LAIKA

HKAWHKAM MASUM POI

January 3, 2021

Chyum Mungga Daw 1

Esaia 60:1-6

Ya hti na gaw, Myihtoi Esaia a laika hta na rai nga ai.

Yerusalem e, rawt u; htoi tu u; na a nhtoi du na ra ai; Madu a hpung shingkang na a ntsa e dan hkung nga ai: Kaning rai nme law, nsin gaw ginding aga hpe, saiwan gaw amyu baw ni hpe ka-up nga ai, rai ti mung, Madu gaw, na a ntsa e paw pru nna, Shi a hpung shingkang na a ntsa e dan pru na ra ai. Maigan amyu ni gaw na a nhtoi de, hkawhkam ni gaw na a nhtoi tu kabrim ai de du sa na mara ai. Baw sharawt nna, grup yin mada yu mu; shanhte yawng zuphpawng nna, nang hpang de du wa mara ai. Na a shadang sha ni gaw sumtsan mung de na wa nna, na a shayi sha ni gaw ba wa ai ni hpe hkrum na mara ai. 

Shaloi, nang mu mada yang, na a myiman htoi kabrim na ra ai; na a myit masin kabu gara ai hte kaba wa na ra ai; kaning rai nme law, nammukdara a sutgan nang hpang de kayin wa nna, maigan amyu ni a arung arai ni nang hpang de du na ra ai. Gawla-uk wunawng ni, Midian hte Ehpa Mung na gawla-uk hkalung ni gaw, nang hpe ka-up na ra ai; Sheba mung na ni yawng du na mara ai; shanhte gaw aja hte lawban lang nna, Madu hpe shakawn kungdawn na lam kajai gumhkawng na mara ai.

Karai Kasang a Mungga rai nga ai.

Chyum Mungga Daw 2

Ehpesu 3:2-3a, 5-6

Ya hti na gaw, Ehpesu masha ni hpang de san Pawlu shagun dat ai laika hta na rai nga ai.

Hpu nau ni e, Karai Kasang nanhte hpe jaw mayu ai chyeju lam, Shi nye a lata hta ap ya da sai hpe nanhte na lu sai nhten; dai hta n-ga , dai mung sung ga sung hpe shingran ga hte ngai hpe shana dat ai gaw, 3nanhte na la sai hpe nawn da nngai. Ndai mung sung lam, ya aprat e Shi a chyoi pra ai kasa ni hpe myihtoi ni kaw , Wenyi a shadan dan ai hte maren , moi shawng na aprat ni hta e shinggyim masha kaw n shana yu mu ai. Dai mung sung a lachyum gaw, maigan amyu ni Yuda amyu ni hte rau, ga ndat a sali wunli hkam la lu nna, shanhte hte rau hkum hkrang langai sha tai wa ai hte, ga ndat ni hpe jawm lu jawm la ai ni tai wa nga ma ai.

Karai Kasang a Mungga rai nga ai.

Kabu Gara Shiga

Mahte 2:1-12

Ya hti na gaw Mahte a laika hta na Kabu Gara shiga rai nga ai.

Ya, Herawt hkawhkam a lakhtak hta, Yuda mung na Betlehem mare e Yesu shangai wa ai hpang, Sinpraw mung na hpaji rawng ai masha ni Yerusalem mare de du sa ma ai rai nna, shangai wa ai Yuda hkawhkam wa gaw ganang e nga a ta? Shi a shagan hpe Sinpraw mung hta mu lu sai rai nna, Shi hpe Nawku na matu sa du ga ai, nga nna san mu ai. Herawt hkawhkam dai ga hpe na jang, shi hte Yerusalem na ni yawng gaw myit kahpra mat ai rai nna, dai amyu na hkinjawng agyi ni hte tara sara ni yawng hpe jahpawng Shinggyim da nhtawm, shanhte hpe, Hkristu gaw ganang e shangai wa na a ta? nga nna san wu ai. Shanhte gaw, Yuda mung na Batlehem mare e shangai wa na ra ai; kaning rai nme law, myihtoi wa ka da ai gaw, Yuda mung na nang Batlehem e, Yuda agyini hta kaji htum rai nga ndai n rai; nye a amyu Israela hpe woi rem na Du gaw, nang kaw nna pru wa na ra ai’ nga ai, ngu nna shi hpe tsun dan mu ai. 

Shaloi Herawt gaw hpaji rawng ai ni hpe lagyim shaga la nna, dai shagan shanhte kaw dan pru ai aten hpe azin ayang san la nhtawm, Nanhte sa wa nna, dai ma kaji hpe azin ayang hakn tam mu; shi hpe mu jang ngai mung shi hpe sa Nawku lu u ga, ngai hpe wa shana rit, ngu nna shanhte hpe Batlehem mare de sa shangun dat mu ai. Ya, hkawhkam wa a ga na la jang, shanhte pru sa wa ma ai. Shaloi, yu mu, Sinpraw mung e mu mada ai shagan gaw, shanhte a shawng e sa wa nna, ma kaji nga ai shara ntsa ang e hkring mat ai. Dai shagan hpe bai mu ai shaloi, shanhte nachying kabu gara nga ma ai. Dai nta de shang wa jang, ma kaji hte Shi a kanu Maria hpe mu ma ai rai nna, lahput hput di let Shi hpe Nawku ma ai. Tinang a sut sumpu ni hpe hpaw nna, Shi hpe Aja, Lawban hte mura ngu ai kumhpa sak jaw ma ai. Herawt hpang hku bai n wa mu ga, yup mang hta shanhte hpe madun dan ai majaw, shanhte gaw tinang a mung de lam kaga hku wa mat ma ai.   

Madu a Kabu Gara shiga rai nga ai.

2020:CHYOI PRA AI HTINGGAW POI SHANI NA MUNGGA

Anhte shada kanawn mazum tsun shaga ai alai, tsawra hkung ga manu shadan hkat ai lam ni hpe shadan shapraw dan ai alai, prat hte prat n bung hkat ai. Sinna mungdan masha ni shada hkrum hkat yang ahpawm apup hkat ma ai; sinpraw mung na masha ni gaw shada nshang kaw na baw lawm, gumba baw ngum, di nna hkung ga jaw ai lam galaw ma ai. Kadai kaning re ai amyu htunghking, galoi aprat hta mi rai rai, manu n hkrat ai, grin nga ai lam gaw ndai re: shada tsawra hkung ga manu shadan, madat mara tau ya chye ai, zinlum makawp maga hkat ai, dz. dz. re ai baw ni re. Karai a mungga gaw dai lam ni hpe ra n rawng ai hku sharin ya ai. Dai mai kaja ai myit masa, arawn alai ni hpe sharin hkaja shaman shakyang na sut htuk dik ai shara gaw langai hpra a nta/ kun dinghku re. Yesu, Maria, Yosep ni a chyoi pra ai htinggaw gaw aprat aban shagu na masha ni a matu kasi kamang tai wa ai.

Missa akyu hpyi ga madung hta grai lachyum pru ai hku, jau gaw akyu hpyi ya ai: Karai Kasang gaw dinghta ga hpe hpan da ai hte asak hpe prut pru shangun nna, shinggyim masha dinghku hpe hpan da ai hta Karai a hpan da ai amu hpe magum bu da nu ai, nga ai. Aten ladaw gu jang Kasha Yesu hpe mungkan ga de shangun dat ya ai; dai Karai a Kasha gaw shinggyim masha a tsawra myit hpe shachyoi shapra ya na matu, amyu htunghking tara, makam masham a htung tara hte, shingra tara a manan maka/(grin ai) tara hpe madat mara let, kun dinghku a manu dan ai lailen a lam madun dan nu ai, nga ai. Sirak Laika hte Kolose Laika, lahkawng yan gaw chyoi pra san seng ai dinghku, shada tsawra madat hkam mana, shada tau hkat chye ai, kahkyin gumdin, zinlum ai lam, tinang kadai a ntsa e gara hku lit lu ai lam, ndai lam ni hpe sharin ya ai. Galoi prat e mung grin nga lu na sharin shaga lam ni re.

Luka a Kabu Gara Shi-ga hta masha majing tai wa ai Hkristu gaw, masha majing hku, dinghku langai hta nga kaba wa ai lam ka da ai. Makam masham htung tara hte Israel amyu masha ni a htung tara npu e, kanu yan kawa a lakawn lanawn ai, uphkang ai npu e kaba wa ai lam hpe ka da ai. Hpang e Kasa Pawlu gaw Galati Laika hta, Tara npu e taw ai ni hpe shalawt dat na matu, dai Hkristu gaw tara a npu e nga lai wa ai, nga ai. Dai Hkristu kaw na kuptsup ai madat mara ai a'lai hpe sharin la lu na lam re.

Dai ni na prat hta dinghku a shinggan kaw na sharin hkaja la lu ai lam hpan yawng ngu na daram lu la mai ai; rai tim, tsawra myit hpe shaman shakyang la ai lam, tinang nang a dinghku kaw na sha lu la mai ai. T.V, Radio, handphone, poi shingra hpawng shingra amyu myu, dai ni kaw na hpan amyu myu sharin hkaja la lu ga timung, nta langai kaw na dinghku masha ni hpe myit masin garan kau ya ai, shada matut mahkai kanawn mazum ai lam hpe kade jahka kau ya ai lam hpe dum mai ga ai. Yawng hpe sharin achyin, lam matsun, renghkang, zinlum na lit madung gaw kanu kawa yan lit lu ma ai. Hkam mana madat mara na, hkung ga lara di na gaw kasha ni a lit rai nga ai. Kadai kaning re ai machye machyang hpaji lu ai rai tim, makam masham n lawm ai sha, Karai Kasang hpe shinggan kau nna grin ai tsawra myit, simsa shim lum ai lam n lu mai ai.

Hten byak nga ai kun dinghku langai kaw na kashu kasha ni gaw tsawra myit, shada mara raw ya hkat na lam, hkung ga manu shadan hkat, shada kam hpa shamyet shanat mai ai lam hpe lu la na myit mada shara n nga ai daram re. Kanu kawa kaja jang sha, kasha kaja ni hpe myit mada lu ai. Greng ja ai dinghku ni law yang sha, greng ja ai mare kahtawng ni tai wa lu ai, greng ja ai mare kahtawng, ninggun ja ai mungdan tai wa lu ai. Kun dinghku a chyoi pra san seng ai lam, manu dan ai lam hpe jahten sharun ai, lam shadam ai baw hpan ni, dinghku hpe hpya run kau lu ai hkinjang ni law law nga ai prat hta, chyingring ai dinghku, san seng chyoi pra ai lailen ni hpe hkaja shaman shakyang lu na lam, ndai chyoi pra ai dinghku poi nhtoi na Chyum Mungga ni hpe madat la nna shaman chyeju ni hpe hkam la mai ga ai.

Myit sumru yu mai ai lam:
• Kanu kawa tai ai ni, kasha ni, kahpu kanau ni, ngwi pyaw simsa shimlum ai dinghku, greng ai, ja ai dinghku byin tai lu na matu, tinang gara hku madi shadaw lawm ai kun?
• Greng ja ai dinghku langai byin tai lu na matu, makam masham ahkyak dik ai lam dum ga ai kun?
• Anhte a prat hta, kun dinghku a san seng chyoi pra ai lam hpe jahten sharun lu ai hkrit tsang-hpa ni gaw hpa hpa ni rai ta?