2020:CHYOI PRA AI HTINGGAW POI SHANI NA CHYUM LAIKA

CHYOI PRA AI HTINGGAW POI
December 27, 2020
CHYUM MUNGGA DAW 1

Sirak 3:3-7, 12-14

Ya hti na gaw, Sirak a laika hta na rai nga ai.
Kashu Kasha ni tinang a kawa hpe hkungga lara na lam, Karai Kasang hkang da nu ai; kanu gaw shi a shading sha ni a ntsa e up hkang na ahkang aya hpe Madu nan jaw da nu ai. Tinang a kawa hpe hkungga lara di ai wa gaw, shut hpyit mara shaprai kau ai amu hpe galaw nga ai; 5tinang a kanu hpe akaw alaw di ai wa mung, sutgan law law mahkawng da ai wa hte bung nga ai. Tinang a kawa hpe hkungga ai wa gaw, asak galu na ra ai; kanu a myit shadik shapyaw ai wa mung, Madu hpe madat mara nga ai. Ngai sha e, nwa asak kaba wa ai shaloi, shi hpe bau garum u; shi hkrung nga ai nhtoi mahkra hta, shi a matu yawn hkyen shara hkum tai e. Shi myit n gring wa ti mung, nang hkam kaja ai hte n-gun rawng ai wa gaw, nwa a myit n-gun kya ai hpe hkam sharang nna, shi hpe n gawn n sawn hkum di u; kaning rai nme law, nwa hpe sumnung shingdi ai hte galaw ya ai lam hpe galoimung malap kau ya na n rai; na a mara raw dat ya na lam tai na ra ai.
Karai Kasang a Mungga rai nga ai.

CHYUM MUNGGA DAW 2

Kolose 3:12-21

Ya hti na gaw, Kolose masha ni hpang de San Pawlu shagun dat ai laika hta na rai nga ai.
Hpu nau ni e, nanhte gaw Karai Kasang a lata la ai amyu rai nna, chyoi pra ai ni hte tsawra hkrum ai ni rai nga myit dai. Dai re ai majaw, matsan dum chye ai, mai kaja ai, myit nem ai, sumnung shingdi ai, myit galu kaba ai dagraw nga mu; nanhte a n-gun kya ai hpe shada da hkam sharang nna, mara langai ngai nga yang gaw, shada da raw dat hkat nga mu. Madu gaw nanhte a mara raw dat kau ai hte maren, nanhte mung shada da raw dat ya mu. Hpung jahtum e, dai yawng hte hpe matut da na the jahkum shatsup ya na matu tsawra ai myit hpe dagraw hpun nga mu. Nanhte a myit masin hta e mung, Hkristu a ngwi pyaw ai lam a up nga u ga; kaning rai n me law, hkum hkrang langai sha a daw shan ni tai lu hkra, nanhte hpe shaga la manit dai. Dai hta n-ga, chyeju dum ai myit nanhte hta e a rawng nga mu.
Hkristu mungga gaw, nanhte hta n taw n tsang a shanu nga u ga: hpaji byeng ya amyu myu hte nanhte shada da sharin shaga nna, shadum jahprang ya mu. Nanhte a kraw lawamg hta e Karai Kasang hpe chyeju dum let, shakawn kungdawn ga, mahkawn mangoi ga, wenyi hte seng ai laka ga hpe mahkawn mangoi nga mu. Nanhte hpa lam galaw myit yang, ga hte rai ti mung, amu hte rai ti mung, Madu Yesu a amying ningsang hta galaw nga nna, Shi a marang e Kawa Karai Kasang hpe chyeju dum nga mu. Numsha ni e, tinang a madu wa hkang ai hku hkan nga mu; dai gaw Madu a man e sut nga ai. 19La ni e, madu jan ni hpe tsawra nga nna, shanhte hpe sumnung shingdi ai hku galaw mu.  Ma ni e, kanu kawa ni hpe madat mara nga mu; dai gaw, Madu a man e sharawng awng ai lam rai nga ai. Kanu Kawa ni e nanhte a ma ni myit n kaji u ga, shanhe hpe ladu lai nna hkum hta ahkre nga mu.
Karai Kasang a Mungga rai nga ai.

Kabu Gara Shiga

Luka 2:22-40

Ya hti na gaw Luka a laika hta na Kabu Gara Shiga rai nga ai.
Mawshe a htung tara hte maren Maria a jasan jaseng ai nhtoi gu jang, ‘Shadang sha alat dai Madu a matu chyoi pra ai nga lu na’ nga nna, Madu a tara lam hta ka da ai majaw, ma Yesu hpe Madu kaw sa ap ya na matu mung, Madu a tara hta tsun da ai hte maren, U hkru du lahkawng, shing nrai, U ra lahkawng hpe hkungga nawng ya na matu mung, Maria yan Yosep gaw dai ma hpe Yerusalem mare de woi sa ma ai. Ya, Simun mying ai masha langai mi Yerusalem mare e nga ai, dai wa gaw Dinghpring ai hte tara hkungga nna, Israela hpe shalan shabran na lam myit mada nga ai wa rai nga ai. Chyoi Pra ai Wenyi mung shi a ntsa e nga nga ai. Simun gaw Madu Karai a Hkristu hpegarai n mu yang, si na n rai, nga nna Chyoi Pra ai Wenyihte madun dan ai lu la nu ai. Shi gaw Chyoi Pra ai Wenyi shadut ai a majaw, Nawku htingnu kata de du sa wu ai: kanu yan kawa gaw Ma Yesu hpe tara htung hte maren di ya na matu woi sa mua ai shaloi, Simun gaw shi a lata hte Ma hpe pawn la nna, Karai Kasang hpe shagrau sha-a let, N-gawn Madu e, Na a ga hte maren Na a shangun ma ngwi pyaw ai hte ya wa shangun dat nit ga law: kaning rai nme law, masha amyu shagu a man e nang lajang da nna, maigan amyu ni hpe jahtoi dan na Nhtoi hte, Na a amyu Israela a hpung shingkang rai nga ai, Na a hkye hkrang la ai lam hpe, nye a myi hte chyaw ngai mu lu se ai, nga nna tsun wu ai. 33Kanu yan Kawa gaw Ma Yesu a lam tsun ai ga a majaw mau nga ma ai. Simun mung shanhte hpe shaman ya nna, kanu Maria hpe, Yu u, ndai ma gaw, Israela masha ni hta na, law law a matu kataw shara hte, law law a matu rawt wa na lam mung, masha ni kau da na masha law law a kraw lawang na myit mang ai lam dan leng wa na ra ai; na a masin salum hta nan nhtu htinggrang na ra ai, ngu nna Maria hpe tsun wu ai.
Dai hta n-ga, Ashe amyu na Hpanuela a shayi sha, Anna ngu ai num myihtoi langai mi nga ai; Shi gaw asak grai kaba la sai; mahkawn aprat kaw nna sanit ning laman hta shi a madu wa hte nga nhtawm, ya asak matsat shi mali ning du ai gaida rai nga ai. Dai numsha gaw Nawku htingnu kaw na npru ai sha, lusha gam nna akyu hpyi ai hte, shani shana Nawku daw jau nga wu ai. Shi mung dai ahkying hta nan lai sa nna, Karai Kasang hpe chyeju dum shakawn let, Yerusalem a hkye hkrang la na lam myit mada ai ni yawng hte hpe, Ma Yesu a lam tsun dan mu ai. Maria yan Yosep gaw Madu a tara hte maren ra ai lam mahkra hpe hkan shatup nhtawm, Galile mung na shanhte nga ai Nazaret mare de bai wa ma ai. Ma Yesu gaw kaba wa ai hte n-gun atsam jat wa let, hpaji hparat hte hkum tsup wa nu ai; Karai Kasang a chyeju mung shi hta e a nga nga ai.
Madu a Kabu Gara Shiga rai nga ai.

2020:HKRISMAT POI SHANI NA CHYUM LAIKA

HKRISMAT POI SHANI
December 25, 2020
CHYUM MUNGGA DAW 1

Esaia 52:7-10

Ya hti na gaw myihtoi Esaia a laika hta na rai nga ai.
Kabu gara ai shiga gun nna, ngwi pyaw ai lam shana ai wa a lagaw, kade tsawm htap nga a hka Kaja ai shiga kajai gumhkawng ai hte, hkye hkrang la ai lam shana ya let, na a Karai Kasang up nga ai nga nna, Ziun hpe tsun shana ai wa a lagaw gaw, bum lang ntsa e gade tsawm htap nga a hka! 8Na a sin langa ni a nsen madat u; shanhte nsen sharawt nna kabu gara ai hte rau garu ma ai: kaning rai nme law, Madu gaw Ziun mare de nhtang wa ai hpe, tinang nan myi chyaw mu lu na ma ai. Yerusalem mare na katsi katsang shara ni e, mahkawn mangwi let rau garu mu; Madu gaw, Shi a amyu hpe shalan shabran ai hte, Yerusalem mare hpe hkye mawai la wu ai. Madu gaw, masha amyu baw ni mahkra a man e Shi a shyoi pra ai lahpum shadawng dan nna, anhte a Karai Kasang hkrang la ai lam gaw, lamu ga htum hkra dan leng wa sai.
Karai Kasang a Mungga rai nga ai.

CHYUM MUNGGA DAW 2

Hebre 1:1-6

Ya hti na gaw, Hebre masha ni hpang de San Pawlu shagun dat ai laika hta na rai nga ai.
Hpu nau ni e, Karai Kasang gaw moi na lakhtak hta, prat mi hte prat mi lam amyu myu hku nna, myihtoi ni a n-gup hte ji wa ni hpe ga tsun da nu ai. Ndai hpang jahtum na aten ladaw hta, Shi a Kasha a n-gup hte anhte hpe ga matsun jaw da mani ai. Dai Kasha hpe, sali wunli mahkra hkam la na matu, Karai Kasang san da ai rai nna, Shi a marang e ndai mungkan ga hpe hpan tawn da nu ai. Dai Kasha gaw, Karai Kasang a hpung shingkang tu kabrim ai nhtoi rai nga ai hte, Karai a atai a hkrang sumla rai nga nna, Shi hkang da ai mungga a atsam hte, Shi yawng mayawng hpe bau sin nga ai. Ya shut hpyit mara shatsai kau ya nna, matsaw ningtsang na daru magam a hkra maga de shi dung nga nna, lamu kasa ni hta Shi grau reng ai amying hkam la sai hte maren, shanhte hta Shi grau reng ai wa tai nga ai. Kaning rai nme law, ‘Ngai Sha Nang rai nga ndai; dai ni e Ngai Nang hpe shaprat sade ai’. Bai nna, ‘Ngai gaw Shi a Kawa tai nna, Shi gaw Ngai sha rai na ra ai’ nga nna Karai Kasang tsun ai ga hpe, gara lamu kasa hpe Shi tsun yu a ta? Dai hta kaga, Shi a Kasha Alat hpe Mungkan ga de jashawn dat ai shaloi , ‘Karai Kasang a lamu kasa ni yawng Shi hpe nawku mu ga’, nga nna tsun wu ai.
Karai Kasang a Mungga rai nga ai.

KABU GARA SHIGA

Yawhan 1:1-5, 9-14

Ya hti na gaw, Yawhan a laika hta na Kabu Gara Shiga rai nga ai.
Shawng npawt e Mungga nga nga ai: dai Mungga gaw Karai Kasang hte rau nga nga nna, dai mungga nan Karai Kasang rai nga ai. Dai Mungga gaw shawng npawt e Karai Kasang hte rau nga nga ai. Arai yawng mayawng hte gaw Shi a marang e tai wa ai rai nna, Shi n galaw lawm ai gaw langai pyi n nga ai. Shi hta e, asak daju rawng nga ai rai nna, dai asak gaw masha ni a nhtoi rai nga ai. Dai nhtoi gaw nsin hta htoi nga nna, nsin mahtang dai hpe n dang kau lu ai. Mungkan ga e shangai wa ai masha yawng hte hpe jahtoi ya ai Nhtoi nga nga sai. Shi gaw nhtoi majing rai nga ai. Shi gaw mungkan ga e nga nga ai hte, mungkan ga mung Shi a marang e tai wa sai; rai timung, mungkan ga gaw Shi hpe n chye wu ai.
Shi gaw shi a buga de du sa timung, Shi a baw sang ni shi hpe n hkap la ma ai. Shi a amying ningsang hpe kam sham nna, Shi hpe hkap la ai ni yawng hte hpe chyawm gaw, Karai Kasang a kasha ni tai lu na atsam Shi jaw da nu ai; 13dai ni gaw, asai the shaprat ai ni n rai, hkum shan a myit hte mung n rai, masha a myit maw ai lam hte mung n rai, Karai Kasang e shaprat ai ni she rai nga ma ai. Mungga gaw masha tai wa nna, anhte hte rau nga nga sai. Dai rai nna, Kawa hta na prat wa ai Kasha shingtai a hpung shingkang zawn, Shi a hpung shingkang hpe anhte mu lu saga ai.
Madu a Kabu Gara Shiga rai nga ai.

2020:DUSA LADAW LABAN (4) NA MUNGGA

Kasa Pawlu gaw Yesu hpe Adam ningnan hku nna mung, Maria hpe Ewa ningnan hku nna mung shadawn dan ai. Hkristu Yesu hta yawng mayawng hpe ningnan bai hpan shalat ai. Ningpawt Ninghpang Laika hta hpan da ai amu galaw ai aten hta, dai Wenyi gaw hka hpung a ntsa e pyen ka-up da ai, nga ai. Lamu Kasa gaw Maria hpe tsun ai, "Chyoi Pra Wenyi na ntsa e yu du nna nang hpe shingnip ka-up da na ra ai" nga ai. Ningpawt Ninghpang Laika hta Ewa gaw Karai a ga hpe n madat ai; shingrai ningpawat shut hpyit mara a majaw, nga yawng nga pra Karai e sing da ai lam htenza mat ai. Ningnan hpan shalat na matu Karai Kasang gaw Kasha shingtai hpe mungkan ga de shangun dat na maw yang, kanu tai ya na amyu shayi langai ra ai. Hkawn Jet, Hkawn Zin Maria gaw ning nga htan tsun ai, "Na ga hte maren ngai hta byin wa u ga", nga ai. Maria gaw shi a prat jahtum du hkra, kamsham myit kaba hte Karai e yaw sing ai amu yawng hta madat mara ai lam hte tup hkra hkan galaw nu ai.
Samuel Laika hta Dawi gaw Ga-shaka Sumpu/ Karai Kasang a machyu shara htingnu gap ya na sharawng ai, myit ai. Shi jaw mayu ai, lu ai chye mi hpe akyu jashawn nna Karai Kasang hpe htang jaw mayu ai. Karai Kasang a matu galaw ya mayu ai amu hte shadawn n mai ai, sawn yu n mai ai kumhpa, Karai Kasang shi hpe jaw na lam ga-sadi jaw ai. Nathangaw Dawi hpe tsun ai, "Karai Kasang gaw na a matu htingchying gap ya na ra ai; na htinggaw aru arat htani htana agrin nga na ra ai", nga ai. Anhte Karai Kasang a matu grai galaw sai, nga tim, Karai Kasang a man e hpa mi n rai nga ai. Karai Kasang e htang jaw na ra ai chyeju kumhpa mahtang shadawn n mai, sawn yu n lu ai hku kaba la ai. Karai Kasang hpe chyejuhtang chye ra ga ai; Karai a matu sakjaw ap nawng ai gaw kaman n tai na re. Prat shagu na Yuda/ Israel amyu masha ni la nga ai Messiah Hkye Madu gaw, dai Hkawn Zin kaw na shangai wa lu na hte, dai Hkristu a mungdan htum mat ai ngu, n nga na lam; Dawi hpe jaw da ai ga-sadi gaw Yesu hta dik wa ai lam, Kasa Luka madi madun ai.

Roma Laika hta mung, Kasa Pawlu tsun ai, aprat aban law law shinggang da ai, lachyum n htai lu ai Karai a mau-hpa mungsung hpe, ya aten hta shadan shapra dan sai, nga nna sakse hkam ya ai. Kabu Gara Shi-ga hta, dai Hkawn Zin gaw shi n myit mada yu ai, myit yu sawn yu n lu ai amu a matu mau dik ai majaw, "Dai gara hku byin lu na ta?", nga ai shaloi Lamu Kasa htan tsun ai, "Chyoi Pra Wenyi na ntsa du yu nna nang hpe shingnip ka-up da na ra ai", ngu, htan ya ai.

Anhte yawng, prat a matu yaw sing da nna asak hkrung ga ai; galai shai wa ai hta hkan nna masing lai ang jang lai ga ai; dawdan ai lam ding-yang galaw nga ra ga ai. Rai tim, anhte dum ai, n dum ai hku nna Karai kasang gaw anhte langai hpra a prat hta masing gran ya ai, jasu jahprang shadum ya ai, lam matsun ya ai.

Ahkyak dik ai gaw, tinang myit mada, sawn da, sing da nna shai wa ai aten hta Karai a lam matsun madun ai hpe kam ra ai lam re. Hkawn Zin Maria gaw, shi n chye madat ai rai tim, Karai Kasang ra sharawng ai lam re ai  hpe chye jang, "Na ga hte maren ngai hta byin wa u ga", ngu, Lamu Kasa hpe htan ya ai. Shi n ging n dan dum ai; kade li ai lit hpe gun ra ai lam n sawn lu ai. Dai Hkye La Madu, Karai a Kasha hpe kaning di lakawn na, matut nna gara hku hkan galaw ya ra na lam ni hpe n chye ai rai tim, kamsham myit tup hkra hte htan ya ai, hkan galaw na lam dawdan ai (Dai hta, Ewa ningnan rai wa ai).

Maria gaw Karai a Kanu tai wa na re ai majaw, agung alau ni, hkrit tsang-hpa ni, ruyak jamjau ai lam ni kaw na shalawt da hkrum ai n rai. Matut matut nna chyam dinglik hkrum ai, myit ung ang ai, ruyak jamjau lam ni hpe hkam sharang ra ai. Matsan mayan re prat, myit ru myit tsang ai lam ni hkrum ai lam mu lu ga ai. Anhte langai hpra mung, tinang a machye machyang atsam marai hte maren, tinang prat a matu sing da ai lam, yaw shada ai lam ni law law rai na re. Jahtum chyalai, Karai Kasang a yaw sing da ya ai gam maka, prat a maka hpe hkap la nna, Karai Kasang hpe sakjaw ap nawng chye ra ga ai. Karai Kasang a hpung shingkang a matu, Shi hpe tsawra dawjau ai amu ni kaman lila n tai ai lam, anhte myit lu sawn chye ai hta lai jan hkra Karai Kasang shagrau ya ai lam, Dawi hte dai Hkawn Zin Maria a mabyin kaw na sharin la mai ga ai.

Myit sumru yu na lam:
-Tinang nang a prat hta tinang n chye madat ai, n byin mayu ai ni byin  wa ai aten hta gara hku hkap htang chye a ta?
-Tinang ra mayu ai, byin mayu ai lam ni hkam la lu ai aten ni hta gara hku hkap la ga ai kun? Tinang a byin dum ai lam hta gumrawng shalai kau ai kun, Karai Kasang hpe mahtang shakawn ga ai kun? Karai Kasang hpe lahpawt dum ai myit hte sakjaw ap nawng ai kun, tsawra kamsham ai myit hte ap nawng dawjau ga ai kun?

2020:DUSA LADAW LABAN (4) NA CHYUM LAIKA

Dusa ladaw laban (4)
December 20, 2020
Chyum Mungga  Daw 1

2 Sam 7:1-5, 8-12, 16

Ya hti na gaw samuela a laika lahkawng hta na rai nga ai.
Ya, Hkawhkam Dawi gaw jut magup na shi a hpyen ni yawng a lata na, Madu a chyeju hte hkye la ai hkrum nna, shi a hkaw e ban sa lu ai shaloi, myihtoi Nahtan hpe shi tsun wu ai gaw: Yu u, ngai wa gaw marau hpun nta hta rawng nga ni ai; Karai Kasang a chyoi pra ai sumpu chyawm gaw sumpan sum hta e rawng nga ai. ngu wu ai. Shaloi Nahtan gaw, Madu nang hte rai nga ai rai nna, nang myit lu ai hte maren galaw u, ngu nna Dawi hkawhkam hpe htan ya wu ai. Rai ti mung, dai shana e pyi Madu a mungga Nahtan kaw du nna, tsun ai gaw, Nye a shagun ma Dawi hpe sa tsun su; Madu ning nga ai: Ngai sa nga na htingnu hpe nang galaw lu na masha rai n ni? 8Nye a amyu Israela a ntsa e up ai du tai na matu, nang sagu naw rem nga ai shaloi, sagu lawng hta na ngai nang hpe lata la sade ai. Nang sa wa ai shara magup de nang hte rau ngai nga nga nna, nang hpe hpyen ni nlang hpe na a man e ngai seng kau ya sade ai. Shing rai, ga ntsa na dan hkung ai ni a galu kaba ai amying zawn, ngai na a amying hpe mung, galu kaba shangun ya na de ai. 
Nye a amyu Israela matu mung, nga shara ngai tawn da nna, htawm hpang de shanhte shamu shamawt n re ai sha, tinang shara e nga grin lu hkra , ngai shanhte hpe shangang na we ai. Nye a Israela a ntsa e tara agyi ni hpe tawn da ai aprat e, n hkru n kaja ai ni zingri zingrat lu ai zawn, htawm hpang de zingri lu sana n rai; ngai shanhte hpe ban sa shangun na we ai. Nang hkum hpe ngai galu kaba shangun nna, na a amyu matu hpe mung ngai shagrin da ya sana. Na a amyu matu hte na a mungdan gaw nye a man e dinggrin a nga nga na ra ai: na a magam tingyang mung, htani htana dinggrin a nga nga na ra ai, ngu nna Madu gaw Nahtan hpe htawn tsun shangun wu ai.
Karai Kasang a Mungga rai nga ai.

Chyum Mungga Daw 2

Roma 16:25-27

Ya hti na gaw Roma masha ni hpang de san Pawlu shagun dat ai laika hta na rai nga ai.
Hpu nau ni e, Ngai hkaw dan ai kabu gara shiga hte maren hkan sa lu na matu, nanhte hpe shada shangang ya lu ai Karai Kasang kaw hpung shingkang a nga nga u ga law. Dai kabu gara shiga hpe ngai hkaw dan ai shaloi, Yesu Hkristu a lam hpe htawn shana ya nna, chyi n ma hpri n hpra kaw nna makoi magap da ai, hkye la ai mung sung ga sung hpe, ya e shadan dat nga ai hpe hkaw tsun dan nngai. Dai mung sung hpe anhte dan dan leng leng chye lu saga ai majaw, amyu shagu hpe makam masham a madat mara ai de shaga la na matu, masha yawng hte hpe dai mung sung lam hkaw dan na ra ai. Myithtoi laika ni dai lam hpe nan nan tau tsun dan ai hte, htani htana Karai Kasang Shi ra sharawng ai hku lajang da ai lam rai nga ai. Karai Kasang chyu sha hpaji hkum tsup nga ai rai nna, Yesu Hkristu a marang e Shi kaw htani htana hpung shingkang a nga nga u ga law. Amen.
Karai Kasang a Mungga rai nga ai.

Kabu Gara Shiga

Luka 1:26-38

Ya hti na gaw luka a laika hta na Kabu Gara shiga rai nga ai.
Dai aten hta, Karai Kasang e shangun dat ai lamu kasa Gabriela gaw, Galile mung na Nazaret mare e nga ai. Dawi a myu na Yosep ngu ai wa mahtan da ai mahkawn hpang de sa du ai: dai mahkawn a amying chyawm gaw Maria ngu ai rai nga ai. Dai lamu kasa gaw Maria kaw du jang, Awe, chyeju hte hpring nga ndai; Madu nang the rau nga nga ai, ngu wu ai. Maria gaw dai ga majaw masin kahpra nna, Ndai shachyen ai ga gaw hpa ngu mayu ai i? nga nna myit aru yu nga ai. Shaloi lamu kasa gaw, Maria e, hkum hkrit et; nang Karai Kasang a man e myiman pa nit dai: yu u, nang na-um nasin rai wa nna, shadang sha shangai na rin dai; Shi a amying Yesu ngu nna, nang shamying ya na ru ai. Dai wa gaw galu kaba na ra ai rai nna, Tsaw Htum ai Wa a Kasha ngu ai hkam la na ra ai. Madu Karai Kasang mung Shi a kawa Dawi a tingnyang shi hpe jaw na wu ai rai nna, Shi gaw Yaku a nta ntsa e htani htana up nga na ra ai: Shi a mungdan mung htum ngu ai nga na n rai, ngu nna shi hpe tsun wu ai.
Maria chyawm gaw, Dai gaw kaning rai byin na a ta? Ngai la n chye ai hkawn jet rai nga nngai, ngu nna lamu kasa hpe tsun wu ai. Dai lamu kasa gaw, Chyoi Pra ai Wenyi na ntsa de du nna, Tsaw Htum ai Wa a atsam nang hpe shingnip ka-up na ra ai: dai re ai majaw, shangai na ra ai wa gaw, Chyoi Pra ai Wa, Karai Kasang a Kasha ngu ai hkam la na ra ai. Dai hta kaga, na a amyu jan Elizabet mung, gumgai rai sayang shadang sha na-um nasin hkum rai nga nna, maudung ngu ai num hta ya shata kru rai wa sai; kaning rai nme law, Karai Kasang n galaw lu ai hpa mung n nga ai, ngu nna shi hpe htan wu ai. Shaloi, Maria gaw, Yu u, Madu a shangun ma ngai rai nga nngai; na a ga hte maren ngai hta byin wa u ga, ngu nna lamu kasa hpe tsun wu ai.
Madu a kabu gara shiga rai nga ai.

2020:DUSA LADAW LABAN (3) NA MUNGGA

Mai Kaja ai Shi-ga hpe hkap la na lam; dai mai kaja dik ai shi-ga hpe shada htinglet jaw hkat let, kabu gara ai lam hpe tup hkra hkam la na lam re. Kabu gara, myit pyaw myit dik ai lam lu la mai ai hkinjang majing gaw, tinang nang a gawng kya ai lam hpe hkap yin la, shut hpyit mara lu ai wa re, ngu, hkam la nna shada dawjau ai amu galaw ai lam re. Tinang nang a n shawp n hkap ai lam ni hpe yin la nna, dai Hkye La Madu hpe saw shaga hkap la ai lam hta kabu gara ai lam majing lu la mai ai. I Htes 5:16 hta ning nga tsun da ai, "Galoi mung kabu nga mu!"

Kalang mi na aten hta Prassia (Ya na Germany) mung hkawhkam langai htawng rawng nga ai masha ni hpe sa kawan ai; bawng masha langai hpang langai  hpe, "Nang hpa mara lu ai majaw dam jaw hkrum a ta?", ngu, langai hpang langai hpe hkan san ai. Yawng gaw tinang hta hpa mara n nga ai, mara kata, sharen da hkrum ai lam mahtai jaw ma ai. Langai wa chyu sha, tinang a mara hpe yin la ai, htawng rawng ging ai majaw rawng ai lam htan ya ai. Shaloi, dai hkawhkam gaw htawng lit-hkam hpe tsun ai, "Mara n lu ai masha ni a lapran e dai mara lu ai wa hpe shanhte hte arau sharawng da na lachyum n pru ai; shi hpe shalawt dat ya u", ngu matsun dat ai da. Tinang a mara hpe yin la chye ai akyu n rai a hka?

Anhte yawng gaw pyaw mayu ga ai; kabu mayu ga ai; raitim, tinang nang tam la ai kabu  gara myit, myit pyaw ai lam gara mung n grin lu ai. Tinang ra mayu ai, byin mayu ai hpe gan lu la ai aten hta sha gan kabu lu ai, pyaw lu ai. Myit ru hpa, jahten sharun law la ai mungkan ntsa hta dai kabu gara ai lam gara hku grin lu na rai ta?

 Hkristan makam masham lu ai ni a matu, jet ai, grin ai kabu gara myit pyaw myit dik ai lam, Karai Kasang kaw na sha lu la mai ai. Dai gaw, Karai Kasang hte daw ang ai hku, jaw ang ai hku matut mahkai hkuhkau ai lam kaw na sha lu la mai ai re. Issiah Laika hta tsun da ai, 61: 10 hta, "Ngai Madu hta ja ja kabu gara na nngai; ngai a myit masin wenyi dai Madu hpe shakawn na nngai", nga ai.

Australia mungdan na Muslim langai mi, Ali Banat ngu mying ai wa, lu su dik ai. Asak 33 sha rai yang, Cancer (mawng) ana byin wa ai; laning mi jan jan sha nga lu sa na, nga nna Doctor hkap tsun dan ai. Ngam nga ai laning mi jan laman hpa galaw na rai ta? Shi kajawng mat ai rai tim, dai gaw Karai Kasang "Allah" kaw na kumhpa re, ngu shi hkap la ai. Ngam nga ai asak hkrung ladaw kadun la ai rai tim, manu dan dik ai, lachyum pru dik ai hku nga shalai kau na lam shi dawdan nu ai. Pyaw daw ni hpe n myit sai; shi lu mi lu hpe matsan dum garum hkye mawoi amu ni hta jai lang na lam dawdan kau ai. Shi ap nawng kau ai sutgan a majaw, matsan masha wan lam akyu hkam sha lu ma ai. Shi myit pyaw myit dik ai lam hkam la let, Doctor tsun ai hta lai jan hkra nga lu nna, myit pyaw myit dik ai hte si wa lu nu ai. Mungkan sutrai arawng aya, awngdang ai lam ni, gara mung jet ai, grin ai kabu gara ai lam hpe n jaw lu ai; gam jaw gam ya, masha shada dawjau ai amu hta sha, jet ai, grin ai myit pyaw myit dik ai lam lu la mai ai lam a sakse langai rai nga ai.

Shinggyim masha ni gaw, kabu gara ai lam, myit pyaw myit dik ai lam hpe tinang a shinggan de na tam hkawm ma ai. Kaja wa gaw tinang a myit masin kraw lawang kaw na tam la ra ai. Dai Hkye Madu gaw masha yawng hpe kabu shangun na matu du sa na ra ai lam, Isaiah a Laika hta tsun da ai. Yawhan sakse hkam ai gaw, "Nanhte a lapran e nga nga ai wa, shi hpe nanhte n chye n hkap la ai wa nga ai; shi a kyepdin sumri raw ya na pyi ngai n ging n dan ai" nga ai. Dai gaw Hkristu Yesu nan rai nga ai. Bai Yawhan tsun ai hta, "Shi du sa na hkrun lam hpe shading shatsawm mu" nga ai.

Karai Kasang hte daw ang ai hku, dingman dinghpring ai asak aprat gawgap nna sha, ngwi pyaw simsa ai lam majing lu la mai ga ai.

Tinang nang a shut hpyit mara ni, tinang hta rawng ai n ju n dawng, manawn masham, malu ai, tinghkrai akyu tam ai lailen, n shawp n hkap ai lailen ni hpe hprang kau, a'gat kau, jasan jaseng nna sha dai Madu hpe hkap bawp la lu na rai nga ai. Wenyi asak hkrung lam hpe shachyoi shapra nna shajin da ai rai yang, dai Madu hpe hkrak chye lu na hte, Shi Madu hpe hkap bawp hkap hkalum la lu nna, jet ai, grin ai kabu gara simsa ai chyeju hkam la lu na ga ai.

Myit sumru yu na lam:

 Ngai a kabu gara ai lam gaw aten na na grin ai kun, myit n pyaw ai lam she law grau ai kun?

 Ngai a kabu gara ai lam, myit pyaw ai lam gaw byin mayu ai byin, lu  mayu ai lu jang sha myit pyaw ai rai kun? N byin n tai wa ai shaloi, lu mayu   ai n lu ai shaloi gara hku hkam sha ai, gara hku hkam la chye ai kun?

 Laban shagu Kabu Gara Shi-ga, ngu ai hpe madat la lu ninglen kabu gara myit pyaw myit dik ai lam hte tsan gang nga ai kun? Dai Hkristu tinang hte ani anawn e sha nga nga ai hpe n chye kau dat ai kun? Masat hkap la chye ra ga ai.

2020:DUSA LADAW LABAN (3) NA CHYUM LAIKA

Dusa ladaw laban (3)
December 13, 2020
Chyum Mungga Daw 1

Esaia 61:1-2, 10-11

Ya hti na gaw myihtoi Esaia a laika hta na rai nga ai.
Madu a Wenyi gaw nye a ntsa e dung nga ai; kaning rai nme law, matsan mayan ni hpe kabu gara shiga hkaw tsun dan na matu, Madu ngai hpe namman chya ya ni ai. Gawng run ai ni a nma hpe ahkyen kayawp na matu mung, bawng dung ai ni hpe shalawt dat na lam, gyit hkang hkrum ai ni hpe htawng chyinghka hpaw ya na lam hte, Madu sharawng awng ai shaning hkaw dan na matu mung, Shi ngai hpe shangun dat nngai. Ngai gaw Madu hta aja awa kabu gara nga nna, nye a myit masin nye a Karai Kasang hta sharawng awng nga li ai. Kaning rai nme law, la nnan gaw nampan shanghkawng gup ai zawn mung, num nnan lung seng ni hte shi a hkum hpe mawn sumli ai zawn mung, Madu gaw ngai hpe hkye hkrang la ai hpun palawng jahpun ya nna, dinghpring ai nba lawai ya ni ai. Lamu ga gaw apu pu shangun nna, sun gaw gat hkai ai nli hpe maku ku shangun ai hte maren, Madu gaw dinghpring ai hte shakawn kungdawn ai lam, amyu baw ni mahkra a man e tu pru shangun na ra ai.
Karai Kasang a Mungga rai nga ai.

Chyum Mungga Daw 2

1 Htesaloni 5:16-24

Ya hti na gaw Htesaloni masha ni hpang de san Pawlu shagun dat ai laika langai hta na rai nga ai.
Hpu nau ni e, tut nawng e kabu gara nga mu; n sim n sa akyu hpyi nga mu; lam shagu hta Karai Kasang hpe chyeju dum shakawn mu: kaning rai nme law, Hkristu Yesu hta e nanhte ndai lam hkan galaw na, Karai Kasang myit ra ai hku rai nga ai. Wenyi a jahtoi ya lam hpe hkum pat shadang kau mu; myihtoi htoi ai lam hpe n kaw n law hkum di myit; lama mi garai n galaw yang, myit sumru yu mu: shaloi mai kaja ai hpe lata la nna, n kaja ai lam baw sumhpa hpe koi gam nga mu. Ngwi pyaw ai npawt Karai Kasang nan nanhte hpe hkum dinghkum shachyoi shapra ya u ga; anhte a Madu Yesu Hkristu bai du sa ai shaloi e, nanhte a wenyi, myit masin hte hkum hkrang ting hpe, mara n kap hkra Shi makawp maga ya u ga. Nanhte hpe shaga la ai Karai Kasang gaw kangka nga ai rai nna, dai lam hpe Shi shabyin ya na ra ai.
Karai Kasang a Mungga rai nga ai.

Kabu Gara Shiga

Yawhan 1:6-8, 19-28

Ya hti na gaw Yawhan a laika hta na Kabu Gara shiga rai nga ai.
Karai Kasang e shangun dat ai, Yawhan mying ai wa langai mi du sa ai. Dai wa gaw, dai nhtoi a lam sakse hkam ya nna, masha yawng mayawng dai nhtoi a marang e kam sham lu mu ga, sakse sa tai na matu du sa ai. Shi gaw dai nhtoi n rai, dai nhtoi a lam sakse hkam ya na she du sa ai. Ya Yawhan hkam ya ai sakse lam gaw, da ndai rai nga ai: Yuda masha ni gaw Yerusalem mare de nna, hkinjawng ni hte Lewi masha ni hpe Yawhan hpang de shangun dat nna, Nang gaw kadai rai nga nta? ngu nna san shangun yang Yawhan gaw hpa n ip da ai sha teng man ai hku htan ya let, Ngai gaw Hkristu n rai nngai ngu wu ai.

Shaloi shanhte gaw, Dai rai yang gaw, Elia rai nga n ni? ngu nna san mu yang, shi gaw, N rai nngai, ngu wu ai. Bai shanhte gaw, Dai myihtoi wa rai nga n ni? Ngu nna san yang, Yawhan gaw, N rai nngai ngu nna bai htan wu ai. Dai rai nna shanhte gaw, Anhte hpe shangun dat ai ni hpe wa tsun dan lu na matu, nang kadai re ai hte hpa baw galaw ai lam hpe tsun dan rit, ngu nna bai san mu ai. Shaloi Yawhan gaw, Ngai gaw myihtoi Esaia tau tsun dan sai hte maren, ‘Madu a lam hpe shading ya mu nga nna, nam e jahtau ai wa a nsen rai nga nngai’ ngu mu ai. Dai dat kasa ni chyawm gaw Hparishe ni kaw na rai ma ai. Dai rai nna shanhte gaw, Nang gaw Hkristu mung n rai, Elia mung n rai, dai myithtoi wa mung n rai yang gaw, nang hpa majaw kashin kamun jaw nga nta? ngu nna san mu ai. Yawhan gaw, Ngai gaw hka hte kashin kamun jaw nngai; rai ti mung, nanhte n chye ai wa langai mi nanhte ka-ang e tsap nga ai. Dai wa gaw nye a hpang e du sa ai wa rai nga ai, shi a kyepdin sumri hpe pyi ngai n raw gying nngai, ngu nna shanhte hpe htan ya mu ai. Ndai lam ni gaw, Yawhan kashin kamun jaw ai shaloi, Yawdan hka wora hkran na Behtani kahtawng hta byin wa sai rai.
Madu a Kabu Gara shiga rai nga ai.

2020:DUSA LADAW LABAN (2) NA MUNGGA

Hkye La Madu du magang ra ai; dai Madu du sa na hkrun lam hpe shatsawm mu, shading sharai mu!” ngu ai ga gaw mungga madung re. Ndai dinghta ga na n hkru n kaja ai baw, myit n dawt ai, myit n dik ai lam ni law law, myit htum hpa law law a lapran e asak hkrung nga pra nga ga ai. Makam masham ngang ai ni a matu, mungkan e hpa byin nga ai rai tim, tinang a prat mahkrum madup hta kade mi myit ru jamjau ai rai tim, Karai a shalan shabran ai chyeju, lakawn lanawn ai chyeju ni n taw n tsang hkam la lu ma ai. Kamsham ai ni a matu myit mada lu ai lam a' nga nga ai. Dai Hkye La Madu hpe shani shagu hkrum katut lu na lam hte, prat a jahtum e man chyaw mu hkrum lu na lam, dai Madu hpe gingdan ai hku hkalum la lu na na lam, matsun madun ai ga gaw mungga madung rai nga ai.

Shani shagu na myit ru myit tsang-hpa amyu myu hta anhte kalang lang myit daw chye ga ai. Karai Kasang gaw mu ya, na ya nga ai kun, ngu, hkam sha chye ga ai. Isaiah a Laika hta ari dam hkrum sha nga ai, chyasam mung e bawng masha tai nga ai Israel amyu sha ni a lam, Yerusalem hte Palestine e ngam nga ai, maigan masha ni a uphkang ai npu e taw nga ai Karai a amyu masha ni a hkrap madai ai nsen hpe htan ya ai shalan shabran ga re. “Zaibru Dan/ zaibru jang, hkraw hkun ai hte shingran katsi ai lamu ga e Madu du sa na hkrun lam hpe nep lajang mu!” nga ai. Bai, “Kabu mai ai shi htawn shana mu!” nga ai. Madu du sa na, hpung shingkang hte du sa na n shut n shai re ai lam, tsun ai.

La jin sa ga ai kun? Kasa Petru shadum ai: “Anhte a matu lani mi, ngu hpe Karai Kasang a matu shaning hkying mi mung rai na; anhte shaning hkying mi, ngu ai hpe Karai Kasang a matu nhtoi lani mi sha rai yang rai na” nga ai. Dinghta ga na masha ni a matu sha nhtoi/shaning, ngu, nga ai. Karai a matu galoi mung maren sha, ya, ngu ai aten hkrai re ai lam tsun ai. Karai Kasang maga myit galu dik ai, yawng gaw myit malai lu nna hkye hkrang la hkrum na hpe sha ra sharawng ai lam; ya, dai ni, ngu ai aten hta (shani shagu) myit malai lu ra ai lam hpe shadum ya ai. Karai Kasang gaw, dinghta ga na n kaja ai baw mahkra hpe nat jahkat kau ai hpang, nga-yawng nga-pra hpe ningnan hpan shalat na lam, myit galu ai hte a'la majaw nga na lam, tsun shadum ya ai.

 Mungkan labau hta Karai a Kasha, Messiah du na ri ri rai sai lam, hpang jahtum na myihtoi re ai Yawhan Baptista gaw zaibru jang e hkaw tsun shadum ai. Esiah Laika hta tsun da ai ga hpe sha kahtap nna tsun ai: “Madu du sa na lam hpe hkyen lajang da mu!” nga ai. Yawhan hpe masha yawng gaw myihtoi kaba, reng grau dik ai Karai a shi-htawn masha hku mu ma ai; shi kaw na hka-lup hkam la ma ai. Rai tim, shi tsun ai, “Ngai a hpang e du sa ai wa gaw ngai hta grau ai Wa rai nga ai; shi a kyepdin sumri raw ya na pyi ngai n ging n dan nngai; Shi gaw nanhte hpe Chyoipra Wenyi hta kashin kamun jaw na ra ai” nga ai.

“Magyi magaw re ai hkrun lam hpe shading mu, bum hte hkaraw ni hpe kaput jahpring shara mu!” nga ai ga_ myit magaw ai, masu magaw ai, myit tsaw myit dap ai, gumrawng gumtawng ai, myit daw myit hten ai, myit masin atsam marai hkrat sum taw nga ai, ngu ai lam ni hpe sha’ang tsun da ai rai nga ai. Langai hpra hta kaning re ai maga n gyeng taw nga ai kun, dawn dawn jan jan rai taw nga ai kun, kaning re ai lam hta myit daw myit hten ra rawng nga ga ai kun? Ngu ai lam ni hpe myit sumru yu nna sharai shajaw la ra ai gaw tinang hkum nan rai nga ai.

Teng sha, anhte nga nga ai ndai dinghta ga gaw ningsin mungkan, n tara ai, masu magaw ai hte hpring ai, awu asin hte hpring ai mungkan ga rai nga ai. Karai Kasang gaw mungkan ningnan hpan shalat na, nga ai. Hkye La Madu gaw teng sha mungkan labau hta du sa nga lai wa nu ai; anhte hte galoi mung a’nga nga ai Emanuel Karai Kasang rai nga ai. Mungkan hte grup-yin e mu lu ai n hkru n kaja ai, n tara ai, n ju n dawng, manawn masham, shut hpyit mara a awu asin yawng hpe dang kau lu na lam, anhte langai hpra hta jaw bang da ya sai Karai a tsawra myit, krawwang kata na gying/ atsam ningja, wenyi a atsam ni rai nga ai. Lamu ga ningnan hpan shalat ai amu hta shang lawm shajang na lam, kamsham ai ni yawng hpe saw shaga ai.

Myit sumru yu na lam:

• Awu asin hte hpring ai mungkan ga, dinghta ga hte Karai a atsam, hpung shingkang, Karai a mada mara chyeju ni hpe mu lu ga ai kun?

• Myit daw myit hten nga ai masha ni hpe nang/ngai, shalan shabran ninggun jaw ga tsun chye ga ai kun?

  Tinang kade chye dum, kade shakut dum, kade kaja dum ai rai tim,    Yesu hte hka jang hpa mi gumrawng shara nga a hka!

2020:DUSA LADAW LABAN (2) NA CHYUM LAIKA

Dusa Ladaw Laban (2)

December 6, 2020

Chyum Mungga Daw 1

Esaia 40:1-5, 9-11 

Ya hti na gaw Myihtoi Esaia a laika hta na rai nga ai.

Nye a amyu hpe shalan shabran mu, shanhte hpe shalan shabran mu, nga nna nanhte a Karai Kasang tsun nga ai. Yerusalem mare hpe ngwi pyaw ga hte tsun mu: Shi a hpyen majan ngut wa sai, shi mara raw dat kau ai hkrum sai, n hkru ai amu a majaw Madu a lata na ari htam lahkawng hkam la nu ai, nga nna shi hpe jahtau tsun mu. Nsen langai mi jahtau ai gaw: “Nam mali e Madu a matu lam lajang da mu; zaibru jang e anhte a Karai Kasang a matu, nmaw lam shading mu. Hkaraw hkamwam shagu hpe kaput jahpring na ra ai; bum hte kawng shagu hpe shanem na ra ai; hkalik hkalawk re ai shara pri mat na ra ai; machyawk marawk re ai shara layang tai na ra ai. Shaloi Madu a hpung shingkang dan pru nna, masha yawng dai hpe mu lu na mara ai, nga nna Madu a n-gup tsun nga ai.  Ziun bum de kabu gara shiga htawn tsun ai wa e, tsaw ai bum de lung u. Yerusalem mare de kabu gara shiga shana ya ai wa e, nsen kaba hte jahtau tsun u. Yuda mare ni hpe, ‘Nanhte a Karai Kasang hpe mada yu mu, ngu nna n hkrit ai sha jahtau tsun u. Madu gaw hpung shingkang hte du nna, Shi a lahpum up nga na ra ai. Shi a awng padang kumhpa shi lang nna, shi lu la ai lanep shabrai shi a man e nga nga ai. Shi gaw sagu rem wa zawn shi a sagu hpung ni hpe rem na ra ai; sagu kasha ni hpe shinggyim la nhtawm, hpai pawn na ra ai; hkalung woi ai sagu kanu ni hpe mung, angwi sha woi wa na ra ai. 

Karai Kasang a Mungga rai nga ai.

Chyum Mungga Daw 2

2 Petru 3:8-14

Ya hti na gaw Kasa Petru shagun dat ai laika lahkawng hta na rai nga ai.

Tsawra ai jinghku ni e, Madu a man e nhtoi langai mi gaw shaning hkying mi hte maren rai nga ai; shaning hkying mi mung nhtoi langai mi hte bung nga ai: ndai lam langai sha hpe galoi mung hkum malap kau mu. Masha nkau mi gaw, Madu lanyan nga ai, nga nna myit ma ai hte maren; Madu gaw shi a ga ndat hpe shadik na matu lanyan nga ai n rai. Rai ti mung, yawng mayawng myit malai lu nna, kadai raitimung, hten bya ai n hkrum mu ga, Shi nanhte hpe matsan dum sharang nga ai. Madu a nhtoi chyawm gaw lagu lagut zawn du na ra ai. Dai nhtoi hta e sumsing lamu kadu ai nsen hte lai mat na rai ai; arai guji guyang ni, kahtet lai ai hta krawp ayai mat wa nna, aga hte dai hta nga ai yawng mayawng hte gaw, hkru hkat mat na ra ai. 

Shing rai, arai yawng mayawng krawp ayai mat ai hkrum na teng nga ai majaw, nanhte kaning re ai masha tai na ra ai hpe myit yu mu. Karai Kasang a nhtoi hpe nanhte myit mada la nga let, Chyoi Pra ai hte tara sharawng  ai masha ni tai ra myit dai. Dai nhtoi hta e sumsing lamu wan hkru ai hta krawp ayai mat nna, arai guji guyang kahtet lai ai byawng mat na ra ai. Shing rai byin wa ti mung, Karai Wa ga ndat da ai hte maren, dinghpring rawng ai sumsing lamu nnan hte ginding aga nnan hpe, anhte myit mada nga ga ai. Dai rai nna, tsawra ai jinghku ni e, Madu nanhte hpe ngwi pyaw ai hte hkap la lu u ga, myi mada let ala nga ai laman ndai hta e, shut hpyit mara hte agang chyalang n kap lu hkra shakut sharang nga mu.

Karai Kasang a Mungga rai nga ai.

Kabu Gara Shiga

Marku 1:1-8

Ya hti na gaw Marku a laika hta na Kabu Gara shiga rai nga ai.

Yu mu, na a man e na a lam lajang magang na, Nye a kasa hpe ngai shangun dat we ai: Nam mali e jahtau ai nsen gaw: Madu a lam lajang da mu, Shi a lam masun ni hpe shading mu, nga nna, myihtoi Esaia a laika hta ka da ai hte maren, nam mali hkan e Yawhan Baptista paw pru nna, shut hpyit mara raw mat lu mu ga, myit malai kumla madum dan ai kashin kamun lam hpe hkaw dan wu ai. Dai rai nna, Yuda mung ting na hte, Yerusalem hkan na yawng hte gaw, Yawhan hpang de pru sa wa nna, tinang a shut hpyit mara hpe shapraw dan let, shi a lata hte Yawdan hka hta e kashin kamun hkam la ma ai. Yawhan gaw gawla-u mun hte da ai hpun palawng hpe bu hpun nna, shi nshang e shanhpyi shingkyit kyit nga ai: dinggam-yaw hte nam na lagat jahku hpe shi lu sha nga ai. Shaloi shi gaw, Ngai hta n-gun grau rawng ai wa gaw, nye a hpang e du na ra ai: shi a kyepdin sumri hpe ngai gum raw ya na pyi, n ging n dan nga nngai. Ngai gaw nanhte hpe hka hte kashin kamun jaw ma sade ai, rai ti mung, dai wa gaw nanhte hpe Chyoi Pra ai Wenyi hte kashin kamun jaw na marin dai, ngu nna Yawhan hkaw dan wu ai.

Madu a kabu gara shiga rai nga ai.

2020:DUSA LADAW LABAN (1) NA MUNGGA

“Galoi mung sadi maja nga mu! Shi a kajwang sha du wa ai aten hta yup malap taw ai hpe mu nna dam jaw ai n katut na lam a maja nga mu!” (Marku a Kabu Gara Shi-ga). Dai gaw madung rai nga ai. Shana aten hta hpyen dap camp hpe sin maja duty ang ai hpyen-la ni yup pyaw taw ai rai yang, camp ting a shim-lam kade tsang-hpa rai na a hka! Duty ang ai ni yup taw nga ai hpe lit lu ai Du wa mu chye kau ai rai yang, kade kaba ai ari jaw na hpe dum mai ga ai. Wan hpyen, nbung laru hpyen, nnang nawn hpyen, kap lawan ai ana zinli, dz. dz., du maw mawn ai hpyen a lam mung-shawa masha ni hpe sadi jaw ninglen, myit mi amu, hkyen maja ai lam n galaw da nna jahten sharun ai mabyin du jang hprawng na, maga na, ngu ai gaw n mai byin ai. Hten-bya asak sum mat ai kaw na lawt lu na matu hkyen shajin da ai rai yang sha, tinang a dum nta sutgan hte asak hpe shalawt dat lu na rai nga ai.

Dai ning July 2 ya shani Gwi-hka Maw kaw byin lai wa ai lam, bum daw hkrat wa ai majaw, lungseng hta masha 180 hkawt hpe ga kaput sat kau ai. Mungdan asuya hku nna sadi jaw ai lam, shadum ai lam ni galaw da sai rai tim, …. Bum daw hkrat wa maw ai aten na kumla ni hpe kadai n sa mu kau ai. Aten tup hkan yu hkawm, maja woi ai, hkan yu gawn hkawm na masha san da ai lam n nga ai majaw, masha dai daram law hkra asak sum mat shajang ai. 

Sadi maja shangun ai lam n galaw ai majaw kunrai, dum nta, sutgan, masha… hkrat sum mat ai law law nga ai zawn, sadi jaw da ninglen, maja woi nga ninglen, n kaw ya ai majaw, maja ai lam chyahkring sha mi gan hprai kau ai laman hpyen du wa ai, htenza ai lam du wa ai majaw asak sum mat ai ni mung lak lak law ai hpe chye ga ai.

Isaiah Laika hta Babylon kaw na tinang mungdan buga de bai htang wa lu ai Karai a amyu masha ni ban hte ban, Karai a sadi jaw ai ga, myihtoi ni a ga hpe n madat ai majaw, mungdan hten-bya mat ai; bawng masha tai mat ra ai, dai lam ni hpe dum hprang wa ai hte, myit malai tawngban ga tsun ma ai. Karai a mau-hpa hkye hkrang la ai amu hpe shakawn ma ai. Shut kau sai mara ni hpe yin la ai hte, matut nna, Karai Kasang e ninggun ningnan ban ya na lam, shamai shatsai ya ai chyeju jaw ya na lam, Karai a man e pyet pyet taw nna akyu hpyi ai nsen re.

San Pawlu shadum ai hta, anhte gaw wenyi hte seng ai chyeju kumhpa ni law hkra, ram ging hkra, Karai Kasang jaw da chyalu re. Anhte a makam masham, dai Hkristu kadai re ai lam tup hkra mu chye lu ai nhtoi hpe ala nga ga yang, tinang hkum hpe maga la na, hten-bya ai kaw na lawt lu na lam, lu da ai machye machyang nyan hpaji ni hpe akyu jashawn ra ai lam, matsun ya ai.

Mahte Laika hta tsun da ai, “Nta madu, bungli madu gaw sumtsan de bu hkawm mat ai” nga ai. Dai gaw, Yesu shi sumsing lamu de lung mat wa ai, amu galaw ai ni hpe bungli htet matsun da ai, n dum n chye ai aten hta madu bai du wa na lam, ndai lam ni hpe tsun ai re. Ndai mungkan ga, dinghta ga hpe kadai n madu ai; tinang a asak hpe mung tinang n madu ai. Anhte shinggyim masha ni chye na hkam la shut ai, sawn la shut ai majaw, ndai mungkan e manghkang kade she shalaw jat ya nga a hka! Dai gaw, “Ngai, ngai a, ngai a dum nta, ngai a gumhpraw, nye myit, … ngai ngai, ngai a,.. ngu ai myit nau hpyau wa jang, chyahtum chyalai madu gaw Karai Kasang she re, ngu ai hpe malap kau ai a marang e, shada kashun kashe nga, myit magaw maw sha hkat, mara n dat ya lu ai,…ndai zawn byin nga ai mungkan ga re.  Nawku dawjau shaning htum nna nawku dawjau shaning ningnan hpang wa ai aten hta, Karai a man e pyet pyet taw chye ai myit masin, ngai ngai, ngai a…. ngu ai tingkyeng myit masin hpe reng hkang let, Karai e jaw da ya ai wenyi hte seng ai chyeju kumhpa ni hpe tang du hkra akyu jashawn nna, nawku dawjau shaning htum hkra myit masin ningnan hte aprat ningnan gaw sharawt na lam, chyum mungga ni hku nna yawng hpe saw shaga ai. “Aten tup la maja nga nna, Hkrist kadai re ai lam tup hkra mu chye lu ai nhtoi galoi rai na” kadai n chye lu ai. Dai majaw, “Ala majaw nga mu” nga ai re.

San Thomas Aquinas (Angelic Doctor) hpe “Super Brain”, lak lai dik ai, sung dik ai bawnu lu ai masha hku masat ma ai. Kalang mi na aten hta shi ka nga ai laika n ka ngut shi ai lam, matut ka na lam manang ni shadum ya ma ai. Shaloi shi htan ai, “Karai Kasang kadai kaning re ai Wa re ai hpe ngai praw, rai, gan mu la ni ai; ngai kade ba hkam nna ka da ai laika buk ni wa hpa n rai mat ai; dai majaw n matut ka kam ni ai” ngu, htan ya ai da.

Shaning 2020 htum hkra nga lu na kun? Shaning 2021 htum hkra nga lu na kun? Tinang a gam maka hpe kadai mi tau nau n tsun lu ai; langai hpra gaw shaning htum na nhtoi hti ala nga na malai, aten tup maja let nga sa na lam gaw madung re.

Myit sumru yu na lam:

* Tinang lu ai sutgan mahkra, arai yawng mayawng, tinang hte seng      ai yawng gaw Karai Kasang jaw da ai hkrai re ai lam myit dum ga ai     kun? Tinang a hkum, machye machyang, sut-rai ni hpe kaning re ai     myit masin hte akyu jashawn nga ga ai kun?

* Madu majing bai du wa ai aten hpe ya sha sha myit dum ga ai kun?*  Madu bai du wa ai nhtoi hpe hkrit ai myit hte ala nga ga ai kun, shing    n rai, kabu sharawng ai myit hte ala nga ga ai kun?

2020:DUSA LADAW LABAN (1) NA CHYUM LAIKA

DUSA LADAW HTA LABAN (1)

November 29, 2020

CHYUM MUNGGA DAW 1

Esaia 63:16-17, 64:1, 3-8.

Ya hti na gaw myihtoi Esaia a Laika hta na rai nga ai. 

Madu e, Nang nan anhte a Wa rai nga ndai; moi chyaloi nhkoi kaw nna Na a mying nsang hpe, Hkye Hkrang La ai Wa ngu nna tsun nga ai. Madu e, Na a lam kaw nna anhte hpe hpa majaw shadam n ta? Nang hpe n hkrit hkungga hkra, anhte a myit masin hpe hpa majaw shaja ya n ta? Na a ali ama ni ngu ai, Na a sali wunli amyu ni a matu bai wa rit.

Madu e, sumsing lamu hpe hpaw malang nna, yu wa rit law. Nang du sa jang Na a man e bum ni ashun gari nga na mara ai. Moi chyaloi nhkoi e, anhte myit mada ai hta grau ai hkrit hpa amu Nang shapraw ai shaloi, Nang yu wa nna, bum ni gaw Na a man e ashun gari masai. Nang hpe myit mada ai wa a matu, Nang zawn chyeju madun ai Karai Kasang kaga hpe, kadai mung n na yu ai hte, myi hte mung n mu yu ai. Dinghpring ai lam galaw nna, Na a lam dum ai ni hpe, Nang lam madun dan ndai. Anhte shut hpyit ai shaloi, Nang pawt sindawng nit dai; anhte na na wa Nang hpe gumlau saga ai.

Anhte yawng n san n seng ai wa zawn tai wa saga ai; anhte a dinghpring ai lam mahkra, aging chyalang re ai hpun nba hte bung nga ai. Anhte yawng namlap zawn nyip mat nna, anhte a shut hpyit ai gaw nbung zawn anhte hpe ahpawt kau mani ai. Na a mying nsang hpe shaga ai wa hte, Nang hpe manoi manat na matu tinang a hkum hpe shadut ai wa kadai mung n nga ai; hpa majaw nga yang, Nang gaw Na a myiman hpe makoi kau nna, anhte a shut hpyit ai hta anhte hpe tawn da mani ai. Raitimung Madu e, Nang gaw anhte a Kawa rai nga ndai; anhte gaw ga kagam rai nga ga ai, Nang gaw di bu sama rai ndai; anhte yawng Na a lata a amu rai nga ga ai.

Karai Kasang a Mungga rai nga ai.

CHYUM MUNGGA DAW 2

1 Korinhtu 1:3-9

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

Tsawra ai hpu nau ni e, anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw nanhte hta e a nga nga ma lit ga law. Yesu Hkristu a marang e nanhte hkam la ai chyeju mahkra a majaw, ngai tut nawng e Karai Kasang hpe chyeju dum nga nngai. Lam amyu myu hku nna Karai Kasang shi a chyeju kumhpa ni anhte hta shalaw shahtam sai majaw, ngai chyeju dum nga nngai. Kaning rai nme law, nanhte a sara ni n-gup atsam shagu hte hkaw dan lu ai majaw, chye chyang ai lam shagu hta nanhte hkum tsup nga myit dai; Hkristu a matu sakse hkam ya ai lam ni mung, nanhte hta e dan leng wa sai. Shing rai, anhte a Madu Yesu Hkristu a paw pru na lam ala let nga nga yang, hpa chyeju kumhpa mung n kadawn nga myit dai; anhte a Madu Yesu Hkristu a nhtoi e mung, mara shagun shara n nga hkra, Shi nanhte hpe shangang shakang na marin dai. Hpa majaw nga yang, Karai Kasang nan Shi a Kasha Yesu Hkristu hte matut mahkai nga lu na matu, nanhte hpe shaga la manit dai; dai Karai Kasang chyawm gaw kangka re ai wa rai nga ai.

Karai Kasang a Mungga rai nga ai.

KABU GARA SHIGA

Marku 13:33-37

Ya hti na gaw Marku a laika hta na Kabu Gara Shiga rai nga ai.

Yesu Shi a sape ni hpe tsun mu ai gaw: Sumsing lamu hte ginding aga lai mat wa na, ahkying aten hpe nanhte n chye nga myit dai majaw, sadi nna maja nga mu. Dai lam gaw, tsan tsan mung de hkawm sa wa ai masha hte bung nga ai: dai wa gaw shi a nta hpe kau da yang, shi a ali ama ni hpe arai mahkra ap ya nna, langai hte langai hpe bungli karan jaw da ai; chyinghka sin ai wa hpe mung. Maja nga u, ngu nna hkang da nu ai. Dai nta madu gaw, nrim e, yup tung e, u goi hpawa e, jahpawt manap e, galoi e bai du wa na ra ai hpe nanhte n chye da myit dai majaw, a maja nga mu. Shing n rai, Shi akajawng sha wa du nna, nanhte n dum shami yup nga ai hpe wa mu na ra ai. Nanhte hpe ngai tsun ai the maren, yawng hte hpe ngai tsun nga nngai: a maja nga mu.

Madu a Kabu Gara Shiga rai nga ai.