2020:PRANWAN LADAW (25) LABAN SHANI NI NA MUNGGA

Karai Kasang e jaw ya ai hkye hkrang la ai chyeju kumhpa hpe kadai mi gingdan ai majaw lu la ai n rai; Karai Kasang a mai kaja ai, nhpaw n-ya jaw ya ai kumhpa san san sha re ai. Tinang shakut nna, chyang nna lu la ai, gingdan ai shabrai n re ai. Dai hkye hkrang la ai chyeju gaw yawng a matu kumhpa san san re ai, kabu chyeju dum ai myit hte hkap la ra ai lam sharin ya ai. Ndai dinghta ga na alai, tinang salu salat hkaw nna gingdan ai daram sha shabrai lu la mai ai. Bungli galaw ai, chyang sha ai, ngu ai hta lani mi hkying hkum kade galaw yang gumhpraw kade jaw na/ lu na, ngu jahpu manu dawdan masat nna jaw ai/ hkap la ai lam mi, galaw ra ai bungli hkying hkum kade, nhtoi kade galaw yang ngut lu ai hpe sawn maram nna ngut jang kade jaw na, nga, masat myit hkrum nna gumhpraw manu dawdan ai. Jan nna yawm nna n jaw ai/ n lu mai ai. Karai e laksan hkringsan da ai (lata la hkrum ai) amyu gaw Israel masha jahpan shang jang hkye hkrang la ai lam hpe chyalu lu la na lam myit mada ma ai. Hkye hkrang la hkrum na matu Karai Kasang kaw chyang nna kade hkam sharang ai, kade salat hkaw yang Karai e kade shaman jaw ra ai, ngu ai myit masa rawng ma ai.

Hkye hkrang la ai lam hpe jahpu manu hku sawn ai, chyang sha nna lu mai ai baw shadu ma ai hta n’ ga, kaga gale amyu masha ni hpe n kam garan ya ai myit rawng ma ai. Ndai zawn re ai myit masa hpe sharai ya na matu, Kabu Gara Shi-ga kaw na mabyin hku Madu Yesu sharin ya ai: Karai Kasang gaw masha amyu baw shagu hpe, grau nna, matsan mayan re ai ni hpe Shi a chyeju kumhpa nhpaw n-ya jaw ya ai, ngu ai lam re. Madu Yesu a sasana mahkrun hta, matsan masha ni, shut hpyit mara hta lup nan taw nga ai ni, daw hten ai ni, myi-kyaw ni, manggang kap ai ni, ndai zawn re ai ni hpe laksan aten jaw ai, yu gawn ai lam hpe mu lu ga ai. Chyum Laika chye dum ai, tara chye dum ai jaiwa ni, dinghpring dum ai Hparishe ni Yesu hpe myit n kap ma ai. Dai chye dum, dinghpring dum ai ni shadu ai gaw shanhte tara shadik ma ai majaw, hkye hkrang la ai lam lu nan lu na, Karai Kasang hpe dawjau ai, chyang ai majaw Karai gaw shanhte hpe gingdan ai shabrai shagrau nan shagrau ra ai, ngu, hkam la shut ma ai. Hkye hkrang la ai chyeju gaw yawng a matu rai tim, Karai Kasang gaw grau ra kadawn ai ni, mara hta lup taw nga ai ni hpe myit dum ya ai. Tinang kade akyu hpyi shakut ai rai tim, kaning re ai mai kaja amu ni galaw ai rai tim, tinang galaw ang ai amu hpe galaw ai lam sha rai nga ai. Manu shabrai hku n sawn ai, Karai a chyeju hpe shakawn let Karai hpe dawjau ra ga ai.

Isaiah tsun ai hte maren, Karai a myit maw ai lam gaw shinggyim masha ni e sawn ai hku n rai, tsawra matsan dum myit hte hpring ai, nga ai. Kasa Pawlu a matu si mat tim Karai a myit sha, hkrung nga ai rai tim Karai a myit sha re, nga ai. Anhte hta byin wa ai gam maka, mahkrum madup ni hta Karai Kasang hpe a’put a’ngun ngu na lam hpa n nga ai. Langai hpra e galaw ra ai sasana magam wuman Karai

e jaw da chyalu re. Wudang hpai ai lam hta langai wa gaw grau li ai hpai, kaga langai gaw grau tsang ai hpe hpai ai. Sut lu nga mai ai lam mung n bung, hkamja lam n bung, nga pyaw nga jamjau n bung hkat ai. A’put a’ngun ngu na lam n nga u ga. Kalang lang anhte gaw n hkru ai masha ni lawan wan si mat na ra chye ga ai. Grai mai kaja ai,

sumnung ai masha ni asak kadun mat ai majaw lahpawt ai ga tsun chye ga ai.

Myit sumru yu na lam:

* Kaga masha ni a sut lu nga pyaw ai lam hpe manawn chye ga ai kun?

* Tinang matsan jamjau hkrum ai aten ni hta kaning re ai myit masa hte hkam la ga ai kun?

* Yawng mayawng gaw Karai a chyeju hkrai rai nga ai. Karai e jaw ya ai made, tinang lu la ai chyeju kumhpa ni hte myit dik chye ra ga ai.

2020:PRANWAN LADAW (25) LABAN SHANI NA CHYUM LAIKA

 PRAN WAN LADAW HTA LABAN 25
September 20, 2020
CHYUM MUNGGA DAW 1

Esaia 55:6-9

Ya hti na gaw myihtoi Esaia a laika hta na rai nga ai.
Madu hpe mu lu ai aten e, shi hpe tam mu! Shi naw ni nga yang shi hpe hpyi shaga mu! Tara n lang ai wa gaw, tinang lam hpe, n hkru ai wa gaw tinang a myit lam hpe, kau da nna, Madu hpang de kayin wa u ga. Madu gaw dai wa hpe matsan dum na ra ai. Anhte a Karai Kasang hpang de kayin wa u ga. Shi mara hpe htum hkra raw dat kau ya na ra ai. 8Madu tsun ai, Ngai myit mang ai lam, nanhte myit mang ai hku n rai. Nanhte a lam ni, nye a lam zawn n rai, nga ai. Lamu gaw ga hta raw nga ai. Nye a lam ni mung, nanhte a lam n hta, grau tsaw nga ai, nga ai.
Karai Kasang a Mungga rai nga ai.

CHYUM MUNGGA DAW 2

Hpilipi 1:20–24, 27

Ya hti na gaw Hpilipi ni hpang de San Pawlu shagun dat ai laika hta na rai nga ai. Nanhte a akyu hpyi ai hte Yesu Hkristu a Wenyi a lanawn ya ai a marang e, ndai lam mung nye a hkye hkrang la ai lam tai na re ai, ngai chye nga nngai. Kaning rai n me law, Ngai asak hkrung ai gaw Hkristu nan rai nga ai, Si wa jang mung amyat rai nga ai. Raitim hkum hkrang hta naw hkrung nga yang, nye a bungli hta akyu kaja pru nga jang lata la na pyi yak rai nga li ai. Hkristu hte rau rai mat wa na ngai ra nngai. Grau kaja nga li ai. Hkum hkrang hte naw hkrung nga jang gaw, nanhte a matu grau akyu rai nga ai. Dai hta n-ga nanhte a arawn alai Hkristu hta Kabu Gara Shiga hte gingdan nga u ga. Shaloi, ngai nanhte kaw sa du hkrum ai raitim, tsan gang nga raitim, Wenyi langai sha hte lahpran tsap nga mu. Hkrsitu a Kabu Gara Shiga hte bung pre hkra rai nga mu.
Karai Kasang a Mungga rai nga ai.

KABU GARA SHIGA

Mahte 20:1-16

Ya hti na gaw Mahte a laika hta na Kabu Gara Shiga rai nga ai.
Lamu mungdan gaw, tsabyi sun hta amu galaw masha saw bang na, jahpawt jau pru sa wa ai nta madu hte bung nga ai. Lani mi gumhpraw lap mi jaw na hku, amu galaw ai ni hte bawng jahkut nhtawm tsabyi sun de shangun dat mu ai. Ahkying masum daram hta shi pru sa nna, gat hkan kaman nga ai masha kau mi hpe mu hkrup yang, nanhte dai sun de sa wa masu, ging dan ai hku jaw na made ai, ngu tsun mu ai. Shanhte mung, sa wa ma ai. Ahkying kru hte jahku hkan mung pru sa nna, dai hku bai di wu ai. Ahkying shi langai hta pru sa wa nna, tsap nga ai masha ni hpe mu jang, nanhte hpa rai nang e kaman tsap nga myit ta? ngu san mu ai. Shanhte gaw, kadai mung anhte hpe n saw myi ai, ngu mu ai. Shi gaw, nanhte mung sun de sa masu ngu mu ai. Shana de, sun madu gaw, amu galaw ai ni hpe shaga la nhtawm, hpang jahtum shang ai ni kaw nna shawng nnan shang ai ni gu hkra, shabrai jaw u, ngu nna shi a hpareng wa hpe tsun da wu ai. Shaloi ahkying shi langai e shang ai ni sa nna gumhpraw lap gu hkra la ma ai. Shawng shang ai ni du yang, grau lu la na myit nawn nga ma ai. Raitim, shanhte mung lap hpra sha lu shajang ma ai. Shing re ai majaw, shanhte gaw, hpang jahtum shang ai ni ndai ni gaw hkying hkum mi sha galaw ma ai. Anhte mahtang, jan ja hkam let, dai ni tup galaw ga ai mi, maren sha lu ai hku di ndai, ngu nta madu hpe put ngun ma ai. Shi gaw, shanhte na langai mi hpe, jinghku wa e, ngainang hpe n maw sha ai. Gumhpraw lap mi jaw na ngu an bawng hkut nna sa ndai n rai ni? Nang hte seng ai hpe la u. Hpang shang ai wa hpe nang hte maren jaw na ngai ra nngai. Nye arai hpe ngai ra ai hku n mai di a ni? Ngai kaja ai hku galaw ai hte nang myi akrawn lam nga a ni? ngu htan wu ai. Dai hte maren hpang hkrat ai ni shawng na mara ai. Shawng ai ni hpang hkrat na mara ai, ngu wu ai.
Madu a Kabu Gara shiga rai nga ai.

2020:PRANWAN LADAW (24) LABAN SHANI NI NA MUNGGA

Gawng kya ra rawng ai, shut hpyit chye ai shinggyim masha shada matsan dum mara dat ya, hkyamsa jaw chye ra ga ai. N ju n dawng ai, pawt sindawng ai, matai dawp ai, ngu ai gaw shinggyim masha a zai ai amu, n hkru ai amu ni rai nga ai. Moi prat hta “Myi a matu myi, wa a matu wa” tai htang ai hpe jaw ai, tara ai hku sawn ma tim, Madu Yesu sharin ya ai lam gaw, “Matsan dum mara dat ya hkat mu!” nga ai.]

Shinggyim masha a majing malang myit gaw matai dawp na, hka tsaw-wawn tsaw, jan hkra tai htang ai n rai tim rap-ra ai hku, gingdan ai hku tai htang mayu ga ai. “Rap-ra tara” a mying hte shada matai dawp hkat ai mungkan, labau gawn n ma hkra law la ai: hpa lu la a hka? N ju n dawng ai, prat sanat hpyen tai hkat ai, jahkrum hkat n mai, kraw kata na machyi ai wunma hpe tsi shamai ya lu ai lam n nga ai. Shada jeyang sat hkat, nat hkat ai hku matai dawp hkat ai lam gaw htenza hten bya ai maga she law ai hpe labau gawn lu ga ai.  Shada tsawra kanawn mazum lu ai a marang e, myit pyaw myit dik lu ga ai. Matsan dum chye ai myit hte mara dat ya ai a akyu ara mahtang reng grau manu dan grau ai hpe dum mai ga ai. Tinang mara lu, jeyang katut ai aten, ga tsun shut shalai kau ai aten, hka daw ra ai aten, kade daram nji n-mu nga hkam sha ga ta? Hka madu e hka shayawm ya na, mara dat ya na, hkyamsa jaw ya na hpe gade she ra mayu ga ta?  Wa Sarabyin Francis tsun ai, “Matsan dum myit loi sha mi madun dan ai rai yang, ndai mungkan ga ntsa shimlum lam hte rap-ra tara hpe prut ja shangun lu ai” nga ai. India mung a shanglawt ningbaw Mahatma Gandhi tsun ai, “Gawng kya gying kya ai ni mara n dat ya lu ma ai. Mara dat ya ai, ngu ai gaw gying ja marai rawng ai ni a shakawn hpa ningja re; myi a matu myi, ngu nna tai htang ai lam gaw mungkan ting hpe myi kyaw shangun ai lam sha re” nga ai. Shan tsun ai ga bung bung nga re ai.

Mara raw dat ya ai, hkyamsa jaw ai, ngu ai hpe mungkan maga hku yu yang asum jaw ai lam, rap-ra tara hpe n gawn n sawn di kau ai zawn, gying kya ai ni a alai re ai zawn, mu na ma ai. Kaja wa nga yang, gying ja ai, marai rawng ai ni sha galaw lu ai amu re ai hpe dum mai ga ai. N tara ai lam, n ju n dawng ai, myit machyi ai lam hpe tsi shamai ya lu ai hte shada htingram hkat ai lam shabyin ya lu ai gaw mara dat ya, hkyamsa jaw ai lam sha re ai lam hpe Madu Yesu sharin ya ai. Hkristan jet ai rai yang, tsawra matsan dum, mara dat ya ai lam gaw Hkristu a sape jet ai lam a asam maka she rai nga ai. 

Kasa Paulu tsun shadum ai zawn, machyi hkam ai, asum hkam ai, si hkam hkra wa mi rai tim, dai Hkristu a arawng, amying shingteng a matu rai nga ai. Hkrung nga ga yang, dai Hkristu a mying ningsang hta shada tsawra dawjau, matsan dum mara dat ya ai, gaw sharawt ai, simsa shimlum lam ni hpe gaw sharawt ai ni tai ra ga ai.

Myit sumru yu na lam:
* Pawt sindawng loi ai kun? Manang wa myit n pyaw ai lam gaw tinang mung gara hku shut da sai kun?
* Matai dawp mayu ai myit hpe gara hku reng hkang ga ai kun?
* Kasa Paulu tsun ai si wa ai rai tim, hkrung nga ai rai tim dai Hkristu a matu, ngu ai hpa wa rai ta?

2020:PRANWAN LADAW (24) LABAN SHANI NA CHYUM LAIKA

PRAN WAN LADAW HTA LABAN 24
September 13, 2020
CHYUM MUNGGA DAW 1

Sirak 27:30, 28 :1-7

Ya hti na gaw Sirak a laika hta na rai nga ai.
 Sindawng masin pawt ai gaw, matsat shabat rai nga ai. Rai timung mara kap ai wa dai hta ahpum kap nga ai. Matai dawp ai ni gaw, Madu a matai hkam sha na maru ai. Madu mahtang shanhte a mara ni hpe azin ayang matsing da ya ai. Htingbu wa a shut ai hpe hkyamsa ya u. Shaloi nang hpyi yang, na a mara hpe mung hkyamsa ya na re. Htingbu wa hpe myit n si ai wa; Madu shamai ya ai hpe myit mada lu na kun? Manang ni hpe matsan n chye dum ai wa; tinang a mara ni a matu hkyamsa hpyi mai na kun? Tinang shinggyim masha wa, myit n si hkraw ai rai yang; shi a mara ni hpe kadai dat kau ya na rai ta? Jahtum ten hpe dum nna, hpyen myit kau da u. Si, hten bya lam hpe dum nna mara koi u! Tara lam ni hpe dum nna, htingbu wa hpe hkum n dawng et; Tsaw Htum ai wa a ga shaka hpe dum nna, mara hkyamsa nga u!
Karai Kasang a Mungga rai nga ai.

CHYUM MUNGGA DAW 2

Roma 14:7-9

Ya hti na gaw Roma ni kaw San Pawlu shagun dat ai laika hta na rai nga ai.
Anhte hta kadai rai timung, tinang hkum a matu mara sha hkrung nga ai n rai. Kadai rai timung tinang hkum a matu mara sha si wa ai n rai. Hkrung nga yang gaw, Madu a lam anhte hkrung nga ga ai. Si wa yang mung Madu a lam anhte si wa ga ai. Hkrung timung, si timung, Madu hte anhte seng nga ga ai. Si mat ai ni hte hkrung nga ai ni hpe Madu nga lu hkra, Hkristu gaw si hkam nna bai hkrung rawt wa sai.
Karai Kasang a Mungga rai nga ai.

KABU GARA SHIGA

Mahte 18:21-35

Ya hti na gaw Mahte a laika hta na Kabu Gara Shiga rai nga ai.
Petru Yesu kaw sit sa nna, Madu e, nye hpu nau wa ngai hpe bai shut shut rai yang gaw ngai kade lang, shi a mara raw kau nga lu na rai ta? Sanit lang du hkra rai ni? ngu wu ai. Yesu gaw, sanit lang du hkra sha n rai; sanit shi e htam sanit lang du hkra mai rai nga ai, ngai nang hpe tsun de ai, ngu wu ai. Dai rai nna, lamu mungdan gaw, shi a mayam ni hpe jahpan la mayu ai hkawhkam langai mi hte bung nga ai. Ga jahpan la yang, gumhpraw mun mi hka kap ai masha langai mi hpe, shi kaw woi sa mu ai. Hka wa na hpa mung shi n lu ai majaw shi hkum, shi a madu jan, kasha ni mung, shi lu malu yawng hte hpe mung, dut kau nna, hka wa u ga, nga nna shi a madu hkang da nga ai. Mayam wa gaw, lahput hput di da nna, shi hpe nawku let, Ngai hpe matsan naw dum e law. Ngai mahkra nang hpe wa na de ai, ngu wu ai. Mayam madu wa mung shi hpe matsan dum nna dat dat wu ai. Hka mung raw kau ya ai. 
Dai mayam wa pru nna, shi kaw peksan latsa sha hka kap ai mayam manang langai mi hpe hkrum jang, shi hpe dun la nna du kaw magra let, nye hka ya wa e! ngu wu ai. Mayam manang mung, lahput hput di nna, ngai hpe matsan dum e law! Ngai nang hpe wa na de ai, ngu hpyi nem wu ai. Shi mahtang n hkraw ai. Hka wa kau ai aten du hkra htawng hta jahkrat da wu ai. Dai hpe manang mayam ni mu jang, shanhte grai myit yu machyi ma ai. Byin ai lam shanhte a madu hpe shana da mu ai. Shi a madu gaw shi hpe dai jang shaga la nna, N hkru ai mayam e, nang ngai hpe hpyi nem ai majaw, na a hka yawng ngai raw kau ya sade ai. Ngai nang hpe matsan dum ai hte maren na mayam manang hpe matsan dum mai ndai n rai ni? ngu wu ai. Shi a madu mung masin pawt nna, hka wa tawng ai du hkra, pyada ni a lata de ap ya dat wu ai. Nanhte kadai rai tim, tinang hpu nau wa a mara hpe myit masin yawng hte n raw kau myit yang gaw, lamu na nye Wa mung, nanhte hpe tai na marin dai, ngu wu ai.
Madu a Kabu Gara shiga rai nga ai.

2020:PRANWAN LADAW (23) LABAN SHANI NI NA MUNGGA

Mungga madung:  :  Shada shadum jahprang, shading sharai ya hkat ra ai. Jet ai tsawra myit rawng ai rai yang, kaga masha ni a nga-mu nga-mai lam tam ai, manang wa hten bya wa na hpe n ra sharawng ai. Shut hpyit lam dam ai wa hpe nden ja ai myit hte shadum ya, sharai ya ai.

Masha gaw masha hte bung ai hku nga ra ai; dusat a nga- a lailen hte shabung nna nga n mai ai. Masha hte bung na matu, machye machyang, htunghking, makam masham, tara, dz. dz., hkaja nna hkan nang ra ai.

Kanu kawa gaw kasha ni hpe ma kaji aten kaw nna machye machyang hte tara matsun ni sharin ya dingyang, tara matsun ni hte nga-sa lailen hta shut shai wa jang sharai ya ding-yang rai nga ai. Kaji ten hta n sharai ya lu ai rai yang, kaba ai hpang htunghking tara, mungdan a tara, makam masham tara ni hpe tawt lai shut hpyit nna hten bya ai prat, manu n dan ai masha a prat de du mat lu ai. Kanu kawa hta lai jan nna yawng gaw shada sharai ya hkat ai lit lu ma ai.  Ezekiel Laika hta myihtoi wa gaw Israel amyu ting a ntsa e, Karai a amyu masha ni hpe shadum jahprang shading sharai ya na lit lu ai lam tsun da ai. Shut hpyit lam dam ai masha hpe shadum jahprang shading sharai ya na lit, nang/ngai yawng a lit re ai lam; shut taw nga ai hpe mu ninglen tsun shadum ai lam n galaw jang, tinang a mara byin wa lu ai.

Mahte a Laika hta mung maren sha tsun da ai lam hpe mu lu ai. N shut n kataw chye ai masha n nga ai. Tinang mahtang shut taw ai pyi n dum, tinang mahtang jaw dum ai aten mung nga ga ai. Shing re ai aten hta shadum jahprang hkrum jang shagrit shanyem ai myit, kabu ai myit hte hkap la ra ga ai. Shada shadum jahprang sharai ya hkat ai amu n loi ai. Rai timung, lit nan lu ga ai hpe Madu Yesu sharin ya ai. Yawng gaw Karai a nta htinggaw langai kaw na kashu kasha ni hkrai rai nga ai. 

Law law lang, anhte gaw tsawra myit hte shading sharai ya na malai, shatan ai ga, jahpoi ai ga mahtang tsun chye ga ai. Kalang lang gaw tsawra myit hte tsun shadum tim manang wa gaw n htang hku tinang hpe hpyen zawn shadu wa ai aten ni mung nga na re. Hpa mi ngu tim, tsawra myit jet ai rai yang, manang wa hten bya ai lam hta n kabu lawm na re; Hkristan myit masin hte tsun shadum shading sharai na lit lu ga ai. Madat tim, n madat tim, tsun shadum na lit lu ai hpe myit dum ra ga ai. Manang wa hpe tsun shadum na loi ai daram, tinang hpe manang wa shadum ya ai aten hta hkap la sharai la na grau yak ai n rai a hka!

Kade yak ai amu rai tim, shadum ga tsun na yak ai hta tinang mahtang shadum ga hpe hkap la na grau yak ai she ngu tim, akyu hpyi ai amu hte awng dang lu ai lam hpe mung tsun da ai, “Nanhte myit hkrum let akyu hpyi ai rai yang, Karai Kasang gaw teng sha madat ya na”, nga ai.

Myit sumru yu na lam:

* Grup-yin e mu lu ai n tara ai amu ni, shada roi rip hkat ai amu ni, masu magaw re ai amu ni hta hpyen n kam shalaw ai majaw atsin  sha nga kau ga ai kun? 

* Hkristan shagu gaw myihtoi a amu galaw ra ai, n jaw n ang ai, n tara  ai, roi rip hkrum ai, ndai zawn re ai lam hta kade lang tsun shadum yu sai kun?

* Tinang hpe masha ni, manang ni shadum sharai ya ai aten hta kaning re ai myit masin hte hkap la ga ai kun?

2020:PRANWAN LADAW (23) LABAN SHANI NA CHYUM LAIKA

PRAN WAN LADAW HTA LABAN 23
Sept 6, 2020
CHYUM MUNGGA DAW 1

Ezekela 33:7-9

Ya hti na gaw myihtoi Ezekela a laika hta na rai nga ai.
Masha kasha e, Israela dap ntsa e sin ai wa tai na matu, ngai nang hpe san da ni ai. Nye a n-gup ga madat nna, nye a ga hte shanhte hpe shadum jahprang u; Ngai gaw tara n lang ai wa hpe, Tara n lang ai wa e, nang hkrak si lu na ndai, ngu nna tsun yang, nang dai wa hpe, shi a lam na nhtang wa hkra, n shadum yang, tara n lang ai wa tinang a mara hta si wa timung, shi a sai hpe na lata na ngai hpyi la na nnagi. Tara n lang ai wa hpe shi a lam na yang, dai wa gaw shi a mara hta si wa timung, nang gaw na a asak hpe hkye la nu ai. Karai Kasang a Mungga rai nga ai.

CHYUM MUNGGA DAW 2

Roma 13:8-10

Ya hti na gaw Roma ni kaw San Pawlu shagun dat ai laika hta na rai nga ai.
Shada da tsawra ai hta kaga, kadai hte mung hpa hka hkum kap mu. Masha kaga hpe tsawra ai gaw jep ai tara hpe shatup ngut nu ai. Masha num hkum shaw, masha hkum sat, hkum lagu, myit hkum marin, nga ai hte htet da ai ga kaga naw nga ayang gaw, dai hte gaw, Na a htingbu wa hpe na a hkum hte maren nang tsawra lu na ndai, nga ai ga langai sha hte gumhpawn nga ai. Tsawra ai gaw htingbu wa hpe n hkru n hkra galaw yu ai n rai. Dai rai, tsawra ai gaw jep ai tara a shatup shadik ai lam rai nga ai.
Karai Kasang a Mungga rai nga ai.

KABU GARA SHIGA

Mahte 18:15-20

Ya hti na gaw Mahte a laika hta na Kabu Gara Shiga rai nga ai.
Na nhpu nnau wa nang hpe shut hpyit kau yang, shi hpang de sa nhtawm, nan lahkawng hkrai chyaw rai nna, shi a mara hpe madun u. Na a ga madat la yang gaw, nhpu nnau wa hpe mawai la lu nu ai. Na a ga n madat la yang gaw, marai langai lahkawng hpe naw shaga la nna, hpa hku hpa lam rai timung, sakse lahkawng masum a n-gup ga hte daw dan ya mu. Shanhte a ga n madat hkraw yang gaw, dai Hpung hpe sa shana ya mu. Dai Hpung hpe mung n madat hkraw yang gaw, tara maigan wa hte kang hta ai wa zawn na a man e, shi rai u ga. Ngai hkrak tsun made ga, Dinghta ga hta nanhte gyit da mada gaw, lamu  hta mung gyit da ai hkrum na mara ai. Dinghta ga hta nanhte raw maraw gaw, lamu hta mung raw kau hkrum na mara ai. Nanhte hpe tsun made ga, Nanhte hta na marai lahkawng dinghta ga hta e, myit hkrum da ai hte hpa lam hpe mung hpyi yang gaw, lamu na nye Wa gaw shan a matu hpyi ai lam shatup ya na mu ai. Marai lahkawng masum, nye a mying hpe gang nna, zuphpawng nga ma yang, dai yang shanhte a ka-ang e, ngai mung lawm nga nngai, ngu mu ai.
Madu a Kabu Gara shiga rai nga ai.

2020:PRANWAN LADAW (22) LABAN SHANI NI NA MUNGGA

Dai ni na Kabu Gara shiga hta Madu Yesu shadum jahprang ai hta na langai mi gaw masha langai ra sharawng ai hpe lu na matu gaw gingdan ai manu jahpu hpe jaw ra ai lam rai nga ai. Shi Madu hkum nan shing gyim masha ni hpe hkye hkrang la ai lam hta nni nhkri yubak hpe hkam la let Wudang ntsa hta si hkam ai hpe hkum hkra lai wa sai re.

Dai majaw shi a nchyang mayam byin tai na matu gaw tinang hkum hpe ndang nyet kau let Wudang hpe hpai ra na lam tsun shadum da sai re. Anhte n-gun la mai ai gaw ru yak jam jau ai lam hpe tinang hkrai sha nre ai sha Madu Karai Kasang gaw anhte hte rau nga nna ra nga ai chyeju ni hpe teng sha jaw ya ai a jaw e lai di mai nga ai.

Shani shana anhte galaw sa ai amu magam lam ni hta n-gun atsam hpe dat let awngdang ai chyeju hpe lu la ai sha n-ga Madu Yesu a hpang hkan ai lam hta mung Karai Kasang a shaman chyeju a jaw e ruyak jam jau ai lam hpe hkam jan lu nna Shi Madu a jet ai ali ama ni tai let htani htana asak hpe lu la u ga.

2020:PRANWAN LADAW (22) LABAN SHANI NA CHYUM LAIKA

PRANWAN LADAW HTA LABAN 22

August 30, 2020

CHYUM MUNGGA DAW 1

Yeremia 20:7-10

Ya hti na gaw myihtoi Yeremia a laika hta na rai nga ai.

Madu e, nang ngai hpe shagwi nna ngai hkam la sai. Nang n-gun ja grau nna dang nit dai. Ngai shani shanang asawng asang hkrum ai. Nlang hte ngai hpe roi la ma ai. Ngai ga tsun shagu shabam nngai. Kashun kashe, hten bya hkrai lam, ngu jahtau tsun nngai. Madu a mungga a majaw ngai hta, shatan nhkan hte jahpoi shara shani shagu tai nga ai. Madu hta hpa nna, shi a mungga n tsun sana, ngu tim, nye myit kraw hta wan zawn hkru nna, nye nrut nra ni hta grung nga ai majaw, nye a myit kadau kadap nna n sharang lu nngai. Masha ni a shatan n hkan ngai na lu nngai.

Shoihpa shoirang shara magup rai nga ai. Nye a makyin jinghku ni pyi, mara shagun mu. Anhte shi hpe mara shagun na ga ai. Anhte shi hpe lau lu nna, dang kau lu na nhten. Shi hpe matai dawp lu na nhten, nga nna ngai hpe gyam yu ai ni tsun ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 12:1-2

Ya hti na gaw Roma ni kaw San Pawlu shagun dat ai laika hta na rai nga ai.

Hpu nau ni e, anhte hpe Karai Kasang matsan dum ai lam kaba la nga ai. Ngai nanhte hpe shadum nngai. Nanhte a hkum hpe chyoi pra hkrung nga ai hkungga di nna, Karai Kasang kaw nawng ya nga mu. Shi hta sharawng awng ai ni tai nna myit jung let daw jau nga mu. Dai gaw nanhte jaw mai ai tengman ai nawku daw jau lam rai nga ai. Mungkan jasat madang hpe nanhte hkum myit hkan myit. Karai Kasang hpe nanhte a myit masin tup hkren galai kau ya shangun mu. Shaloi Karai Kasang myit ra ai lam hpe chye lu na myit dai. Mai kaja lam gara re ai; Madu ra sharawng ai lam hte kup tsup lam hpe ginhka la lu na myit dai.

Ya hti ai gaw Karai Kasang a mungga rai nga ai.

KABU GARA SHIGA

Mahte 16:21- 27

Ya hti na gaw Mahte a laika hta na Kabu Gara Shiga rai nga ai.

Yesu Hkristu gaw, Yerusalem mare sa lu na, agyi salang ni, jau agyi ni hte laika ka sara ni a lata hta e nni nkri law law hkrum nna, sat kau hkam nhtawm, masum ya nhtoi hta e, bai hkrung rawt na lam, sape ni hpe madun dan hpang wu ai. Petru gaw, shi hpe shaga la nna, Madu e, dai nang hta n byin u ga, Dai nang hpe galoi n hkan hkra lu na rai, nga nna jet nga ai. Shi Petru hpang gayin nna, satan e, nye a hpang de sit mat wa u. Karai Kasang hte seng ai lam n rai, masha hte seng ai lam hpe sha myit nga ndai. Nye a matu myit kataw shara nang rai nga ndai, ngu wu ai. Yesu shi a sape ni hpe, Ngai hpang de sa mayu ai wa kadai mung, tinang hkum hpe nyet kau na rai nna, tinang udang hpai let, ngai kaw hkan nang ru ga. Tinang asak hkye mayu ai wa kadai mung, dai sum mat lu na re. Nye a jaw e tinang asak sum kau ai wa chyawm gaw dai hpe mu lu na ra ai. Masha gaw nga yawng nga pra kawm dawm amyat lu la ninglen, tinang asak sum mat yang gaw, shi a matu hpa akyu nga lu ta? Masha gaw hpa gawng malai hkungga hte wa, tinang a asak hpe shaw la lu na a ta? Dai masha kasha gaw, Kawa a hpung shingkang hte shi a lamu kasa ni hte nawng du na ra ai. Dai shaloi tinang galaw ai hte maren, langai the langai hpe bai htang na ra ai.

Ya hti ai gaw Madu a Kabu Gara shiga rai nga ai.

2020:PRANWAN LADAW (21) LABAN SHANI NI NA MUNGGA

 Amu magam lam ni hta awngdang ai gaw tinang galaw ai hta gade daram kam nna n-gun lu dat ai hta madung nga ai. N-gun lagaw dat let galaw na matu gaw shawng nnan tinang galaw ai hpe kam ra na re. Kam ai myit nga yang she galaw mayu ai myit mung rawng wa na rai nga ai.

Kasa Petru gaw Madu Yesu hpe Karai Kasang a Kasha, Hkye Hkrang la ai Wa re ngu kam ai hte maren, Nawku Hpung a Ningbaw ngu ai lit magam hpe n-gun atsam marai yawng hte sakjaw ap nawng lai wa sai rai yang, dai ni du hkra nawku hpung gaw matut nna rawt jat galu kaba wa ai re.

Kasa Petru hpe kasi la nna tinang galaw ging ai, galaw ra ai amu magam ni hpe teng sha akyu rawg ai, galaw ra ai, galaw ging ai ngu kam,sham myit kaba rawng let n-gun lagaw dat nna tinang a matu sha n-ga, masha yawng a matu mung akyu pru ai amu bungli ni hpe awngdang ai hte galaw sa wa lu u ga.

2020:PRANWAN LADAW (21) LABAN SHANI NA CHYUM LAIKA

PRANWAN LADAW HTA LABAN (21) 
August 23, 2020
CHYUM MUNGGA DAW 1

Esaia 22:19-23

Ya hti na gaw myihtoi Esaia laika hta na rai nga ai.
Zawnawng zawwa up ai Madu gaw, hkawhkam hkaw a kunhting wa Sebna hpe tsun ai, Nang hpe aya jahkrat kau na de ai. Nang arawng sum mat na rin dai. Dai shani nye a mayam Hilkia a kasha Eliakim hpe ngai shaga nna, na a shingkyit shi hpe jaw kau nna, na a ahkang aya shi hpe jaw kau na we ai. Shi gaw Yerusalem masha ni hte Yuda mung a kawa tai na ra ai. Dawi dap hkawhkam npu e ahkang aya yawng ting ngai shi hpe jaw da na we ai.
Sumsaw yawng shi kyem da na ra ai. Shi hpaw sai hpe kadai n la kau lu na. Shi la da sai hpe kadai n hpaw lu na. Shi hpe maina hte dit shakap da ai zawn ngai shagrin da na we ai. Amyu dap a matu arawng sadang tingnyang shi tai na ra ai.
Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 11:33-36

Ya hti na gaw Roma ni kaw San Pawlu shagun dat ai laika hta na rai nga ai.
Karai Kasang a sali wunli kade hkik hkam a hka! Karai Kasang a chye chyang ai hte byeng-ya kade sung nga a hka! Shi dawdan ai lam kadai n htai ya lu ai. Shi a jasat hpe kadai n dang sagawn ya lu ai.
Madu a myit hpe kadai dang chye a ta? Shi hpe hpaji jaw salang kadai nga a ta? Shi bai nhtang jaw ra hkra shi hpe kadai wa hpa sak jaw yu sata? Arai yawng mayawng gaw, shi kaw nna, shi a majaw, shi a matu pra nga ai. Shi kaw htani htana hpung shingkang a nga nga u ga law! Amen.
Ya hti ai gaw Karai Kasang a mungga rai nga ai.

KABU GARA SHIGA

Mahte 16:13-20

Ya hti na gaw Mahte a laika hta na Kabu Gara Shiga rai nga ai.
Yesu kasa ni hpe san ai, Masha ni Masha Kasha hpe kadai re ai, nga ma ta? ngu wu ai. Shanhte gaw, nkau mi, Yawhan Baptista, kaga ni , Elia, bai kaga ni Yeremia, shing nrai, myihtoi langai ngai re ai, nga ma ai, ngu mu ai. Yesu gaw, nanhte ngai hpe kadai ngu myit ta? ngu wu ai. Simun Petru htan nna, Nang gaw Hkristu ngu ai hkrung nga ai Karai Kasang a Kasha rai nga ndai, ngu wu ai. Shaloi Yesu gaw, Bara-Yona Simun e, nang a lu ndai. Ashan asai nang hpe dai madun dan ai n rai. Lamu na nye Wa dai hpe madun dan ya ndai. Nang hpe ngai tsun de ga, nang Petru rai nga ndai hte, ndai lunghkrung ntsa e, nye a Hpung hpe ngai de da na we ai. Si du atsam dai hpe dang kau lu na n rai. Lamu mungdan a sumsaw ni ngai nang hpe ap ya na de ai. Dinghta ga hta nang gyit da mada gaw, lamu hta mung gyit da na ra ai. Dinghta ga hta nang raw maraw gaw, lamu hta mung raw kau dat na ra ai, ngu htan wu ai. Hkristu Shi rai nga ai hpe, kadai e mung n tsun dan mu ga, sape ni hpe ginhtim da mu ai.
Ya hti ai gaw Madu a Kabu Gara shiga rai nga ai.