2020:PRAN WAN LADAW LABAN (15) NA MUNGGA

Mungkan hta lu su dik htum ngu masat da hkrum ai Bill Gates hpe anhte yawng na yu na ga ai. Bill Gates gaw lama wa lam hkawm let shi a gumhpraw dollar 100 je jahkrat kau ai rai yang, dai shi jahkrat kau ai gumhpraw dollar 100 hpe bai hta la na aten lu jaw ai da. Hpa majaw nga yang shi a shang gumhpraw gaw second mi hta dollar 300 shang taw ai majaw re. Jahkrat kau ai dollar 100 hpe hta la na matu nlaw htum aten second 3 dang aten jaw ra nna, dai second 3 re aten hpe shama kau ai rai yang shi a shang gumhpraw dollar 900 sum mat na majaw rai nga ai.

Dai ni na aten Mungkan Mungdan law law wa hta lu su, matsan shai hkat ai madang gaw nau law wa ai majaw mahkang law law wa byin nga ai lam shiga ni hta jahkring hkring mu lu, hti lu na ga ai. Hpa majaw lu su ai ni gaw grau grau lu su wa nna, matsan ai ni gaw grau grau matsan jat wa ai kun? anhte myit yu mai nga ai.

Lu su ai ni gaw shanhte a lu da ai ja sutgan ni hpe grau grau law jat wa hkra nga arang law law bang nna, nhkring nsa bungli galaw shakut nga ma ai. Shanhte a matu aten shajan ngu ai gaw n nga ai daram rai nga ai. Bai matsan ai ni gaw lu tawn da ai made hte myit dik nna nga chye ga ai. Lama, lu da ai hte hpe arang shatai nna bungli galaw yang sum kau na hpe hkrit chye ai majaw rai nga ai. Lu tawn da ai hpe grau law jat wa hkra galaw ai lam nnga ai sha n-ga, dai lu da ai hpe myit mu myit dik let jai sha shama kau chye nga ga ai.

America Mungdan a Shanglawt lu ai July 4 ya shana hta ma hkan nau ni hpe mawdaw hta htaw let wan shanan (fire works) gap kapaw ai lam hpe hkan woi yu hkawm nngai. Dai shaloi hpa baw mu lu ai i nga yang, wan shanan (fire works) gap kapaw pyaw chayi ai lam hpe matsan masha ni nga ai lawk ni hta grau mu mada nna, lu su sahti ni nga ai lawk hkan gaw pi n mu lu ai daram re.

Dai ni na kabu gara shiga hta Madu Yesu gaw, lu ai wa kadai hpe mung naw jat jaw nna, n lu ai wa kaw na shi naw la kau ya na lam tsun da nga ai. Anhte a prat hta Madu Karai Kasang bai jat jaw mayu ai ni rai nga ga ai kun? anhte lu ai hte kaw na Madu Karai bai la kau ya hkrum ai ni rai nga ga ai kun? myit yu hpa rai nga ai. Madu Karai Kasang grau nna jat jaw mayu ai ni byin tai lu hkra ga sau kaja ai kaw hkrat ai nli tum ni byin tai lu hkra matut shakut sa wa nga ga law.

2020:PRAN WAN LADAW LABAN (15) NA CHYUM LAIKA

PRANWAN LADAW  15

July 12, 2020

Chyum Mungga Daw I

Esaia 55:10-11

Ya hti na gaw Myihtoi Esaia laika hta na rai nga ai.

Kaning rai nme law, marang hte ahkyen gaw, lamu de na htu hkrat nna, dai de bai n wa ai sha, nli gat ai wa hpe nli, makan galaw ai wa hpe shahpa jaw lu hkra aga hpe madit let, matsun hte maku shaprut nna, asi si shangun ai zawn, nye n-gup kaw na pru ai mungga mung dai hte maren tai na ra ai, dai gaw ngai hpang de kaman nhtang wa na nrai, ngai ra ai hku shadik ya na ra ai, ngai shangun ai amu hta awng wa na ra ai.

Ya hti ai gaw Karai Kasang a mungga rai nga ai.

Chyum Mungga Daw II

Roma 8:18-23

Ya hti ai gaw Roma ni hpang de shagun dat ai laika hta na rai nga ai.

Kaning rai nme law, ndai aprat na tsin-yam tsindam gaw, anhte kaw e shadan shapraw na ra ai hpung shingkang hte shadawn n ging nga ai, ngai myit nga nngai. Nga yawng nga pra mung myit ndawt ai hte, Karai Kasnag a kashu kasha ni a paw pru na ra ai hpe ala nga ma ai. Dai nga yawng nga pra chyawm gaw, hten run lam npu e shagrit kau ai hkrum rai ti mung, tinang ra ai hku n re ai sha, nga yawng nga pra nan lala sharen da ngu ai hten mat ai kaw na shalawt dat ai hkrum nna, Karai Kasang a kashu kasha ni a pru lawt wa ngu ai hpung shingkang hta shang lu na, myit mada nga nna, dai hpe shagrit kau ai wa a majaw, shagrit kau ai hkam nga ai. Dai hta kaga, nga yawng nga pra ting gaw ya du hkra rau madai nga nna, gadau gadap rai nga ma ai hpe, anhte chye ga ai. Dai hta n-ga, Wenyi a chyeju nloi hpe hkam la sai ni anhte mung,anhte a kraw lawang hta e, anhte nan madai nga nna, anhte a hkum hkrang a htingrai htingrat ai lam ngu ai, kasha yin la na chyeju hpe, a la nga ga ai. 

Ya hti ai gaw Karai Kasang a mungga rai nga ai.

Kabu Gara Shiga

Mahte 13:1-23 (Sh) Mahte 13:1-9

Ya hti na gaw Kasa Mahte ka da ai Kabu Gara Shiga hta na rai nga ai.

Dai shani jang, Yesu gaw dai nta na pru nhtawm, nawng makau e sa dung nga ai. Masha wunawng wuwa shi hpang de zup hpawng sa wa ma ai majaw, li langai mi hta shi shang dung nga ai rai nna, shawa masha ni mahkra gaw hkingau hta e tsap nga ma ai. Shaloi, lam law law wa ga shadawn hku hte shi shanhte hpe tsun mu ai gaw, Nli gat ai wa gaw nli gat na pru sa wa ai. Gat dat wu yang nkau mi gaw lam makau e hkrat nna, u ni dai hpe sa hta sha kau mu ai. Nkau mi gaw, ga n law ai lung rawk hta e hkrat wa nna, ga n htat ai majaw, ya jang tu pru ti mung, jan pru katen jang krau mat wa ai rai nna, ru n jung lu ai majaw hkraw mat wa ai. Nkau mi gaw ju hpun nhpang e hkrat nna, ju hpun ni tu kaba wa ai hte, dai hpe lim kau mu ai. Nkau mi gaw ga kaja hta hkrat wa nna, asi si wa ai: nkau mi dang latsa, nkau mi kru shi, nkau mi sumshi si mayat wa ai: na tu ai wa gaw na la u ga, ngu mu ai. Shaloi shi a sape ni sit wa nna, Ndai ni hpe hpa rai ga shadawn hte tsundan mu ta? ngu nna shi hpe san mu ai.

Shi htan nna, Sumsing lamu a mungdan a sung htum ai lam ni hpe chye na shara, nanhte a matu hku nga ma lit dai; wora ni a matu chye na shara n hku ma lu ai. Kaning rai nme law, lu ai wa kadai hpe mung naw jat jaw na rai nna, shi law wa na ra ai; n lu ai wa kaw na pyi shi lu ai hpe naw shaw la na ra ai. Dai rai nna, shanhte mu lamu n mu ai hte, na lana n na la nna, n chye na ma ai majaw, ga shadawn hku ngai shanhte hpe tsun dan ma we ai. Shing rai, Esaia tsun ai myihtoi ga gaw shanhte hta dik ang wa sai. Shi gaw, Nanhte na lana n chye na la na mu ai, Yu layu e n mu na mu ai, Kaning rai nme law, ndai amyu gaw, Tinang myi hte n mu lu na hte Na hte n na lu nna, Myit hte n chye na lu mu ga she, Shanhte myit n kayin lu nna, Ngai shanhte hpe n shamai mai lu hkra Shanhte a myit mak nga nna, Shanhte a na lahpang nga ai hte, Shanhte a myi pat nga ma lu ai, nga ai. 

Nanhte a myi mu lu ai hte, nanhte a na, na lu nga ma lit dai majaw, a nga myit dai. Nanhte hpe ngai teng teng tsun ma de ga, nanhte mu lu ai arai ni hpe myihtoi hte ding hpring ai masha law law wa, mu mayu ti mung, n mu ma ai; nanhte na lu ai lam ni hpe mung, na mayu ti mung, n na lu ma ai. Dai rai nna dai nli gat ai ga shadawn hpe madat la mu. 

Kadai mung, dai mungdan lam hpe na ninglen n chye la yang gaw, dai n hkru ai wa sa du nna, shi a myit hta gat ai nli hpe shaw la kau wu ai: dai gaw lam makau e gat ai nli hpe rai nga ai. Lung rawk hta gat ai nli a lam gaw, dai ga hpe na nna, shaloi jang kabu gara ai myit hte hta la wu ti mung, kraw hta e ru n jung ai majaw, ladaw mi sha nga nga nhtawm, dai mungga a majaw ru tsang ai hte zingri zingrat hkrum jang, shaloi e myit kataw re ai wa hpe rai nga ai. Ju hpun hta gat ai nli a lam gaw, dai ga hpe na la ti mung, ndai prat na myit tsang ai hte hkalem kau ai sut gan gaw, dai mungga hpe lim kau nna, asi n si lu ai wa hpe rai nga ai. Ga kaja hta gat ai nli a lam chyawm gaw, dai ga hpe na la nna hta la nu ai hte, gaja wa teng teng asi si nna,nkau mi dang latsa, nkau mi kru shi, nkau mi sumshi jat wa ai wa hpe, rai nga ai, ngu wu ai.

Ya hti ai gaw Madu a Kabu Gara Shiga rai nga ai.

2020:PRAN WAN LADAW LABAN (14) NA MUNGGA

Anhte a sakhkrung hkawm sa lam hta shini shagu na kan bau magam lam ni hta sha bungli kyin chye nga ga ai. Shani shagu ndai zawn re magam bungli ni a majaw anhte hta myit ba, hkum ba byin chye nga ga ai. Kalang lang shani shagu na magam bungli ni a majaw hkiba lit li ai hte myit htum, myit daw ai lam ni mung byin chye nga ga ai. Dai zawn byin wa ai shaloi anhte hta pawt singdawng ai lam ni, n ju ndawng ai lam ni, mara tam ai lam ni byin pru chye ga ai. Grau nna Karai Kasang hpang de sit shang na, akyu hpyi na pi n kam wa chye ga ai.

Dai ni na Kabu Gara Shiga hta Madu Yesu gaw, "Hki ba la nna lit li gun ai ni yawng hte e, ngai kaw wa ma rit; ngai nanhte hpe ban sa shangun na ma de ai." nga nna anhte ga sadi jaw da nga ai. Laga makam masham ni hpe hka ja yu ai shaloi, Madu Yesu zawn hpang hkan ai ni hpe ndai zawn ga sadi jaw ai lam ni hpe n mu lu ga ai. Anhte hkap la kamsham ai Madu Yesu gaw kaja wa teng teng Karai Kasang rai nga ai sha n-ga, dai ni na aten du hkra sakhkrung let anhte hte rau nga nga ai hkrung ai Karai Kasang rai nga ai hpe anhte myit dum ra nga ga ai. Dai zawn asak hkrung ai Karai Kasang hpe lu da nga ninglen, anhte Shi hpe malap mali rai tawn da chye nga ga ai. Mungkan ga a ru yak lam ni a majaw sha Karai Kasang hpe shingdu tawn da kau chye nga ga ai.

Anhte a shani shagu na ru yak jam jau lam ni, hki ba lit li ai lam ni ma hkra hpe dai asak hkrung ai Karai Yesu hta e ap da ai rai yang shani shagu myit ngwi simsa ai shaman chyeju hpe hkam la lu na ga ai. Anhte hkum hpe san ra ai lam gaw, anhte a shani shagu na sakhkrung hkawm sa lam hta hkrum katut nga ai ru yak kindut, tsim yam tsim dam lam ni hpe Madu Yesu hta ap da ga sai kun ngu ai rai nga ai. Madu Yesu ga sadi jaw da ai hte maren na a prat hta hki ba lit li ai ten ni hta Madu Yesu hpang de sit shang garum hpyi ai rai yang kaja wa na a hki ba ai lam ni, myit ru myit tsang lam ni ma hkra hkoi mat nna Madu Yesu kaw na sim sa ai shaman chyeju hpe teng sha lu la na rai nga ai law.

2020:PRAN WAN LADAW LABAN (14) NA CHYUM LAIKA

PRANWAN LADAW  14

July 5, 2020

Chyum Mungga Daw I

Zehkaria 9:9-10

Ya hti ai gaw Myihtoi Zehkaria a laika hta na rai nga ai.

Ziun shayi sha e, nachying kabu gara nga u, Yerusalem shayi sha e, garu jahtau u, yu u, na a hkawhkam wa nang hpang de du ra ai: Shi gaw ding hpring nga nna, hkye hkrang la ai lam shapraw nu ai; Shi gaw sumnung ai myit rawng nna, lawze a ntsa e, rai sa, lawze kanu a kasha ntsa e jawn nga ai. Ngai gaw Ehprim a hpyen leng ni hte Yerusalem a gumra ni hpe jahtum kau na nngai; hpyen ndan mung agrawp kau ai hkrum na ra ai. Shi gaw maigan amyu ni hpe ngwi pyaw lam tsun dan nna, nammukdara kaw nna, nammukdara du hkra, Uhprat hka nu kaw nna, lamu ga htum hkra up nga na ra ai.

Ya hti ai gaw Karai Kasang a mungga rai nga ai.

Chyum Mungga Daw II

Roma 8:9, 11-13

Ya hti ai gaw Roma ni hpang de shagun dat ai laika hta na rai nga ai.

Nanhte hta e chyawm gaw Karai Kasang a Wenyi rawng nga myit yang gaw, nanhte hkum shan myit hta e n rai, Wenyi hta e nan rawng nga myit dai. Langai ngai gaw Hkristu a Wenyi n rawng yang dai wa shi hte n seng nga ai. Dai hta kaga, si mat ai ni kaw na Yesu hpe hkrung sharawt la ai wa a Wenyi gaw, nanhte hta e rawng nga a yang gaw, si mat ai ni kaw na Hkristu Yesu hpe hkrung sharawt la ai wa gaw, nanhte hta e rawng nga ai shi a Wenyi a lata hte nanhte a si chye ai hkum hkrang ni hpe mung, jahkrung ya na ma rin dai. Dai re ai majaw, hpu nau ni e, hkum shan a myit hkan nang na matu, hkum shan a hka kap ai ni anhte rai nga ga ai n rai; kaning rai nme law, hkum shan hte seng ai asak sha hkrung nga myit yang gaw, nanhte si na rai nga myit dai; rai ti mung, Wenyi hte hkum hkrang a arawn alai ni hpe nanhte sat kau myit yang gaw, nanhte hkrung nga na ma rin dai. 

Ya hti ai gaw Karai Kasang a mungga rai nga ai.

Kabu Gara Shiga

Mahte 11:25-30

Ya hti na gaw Kasa Mahte ka da ai Kabu Gara Shiga hta na ria nga ai.

Dai aten hte hta Yesu gaw ga hpaw nna, Sumsing lamu hte ginding aga a Madu, Wa e; hpaji byeng-ya rawng ai ni hte myit kung hpan ai ni kaw na ndai lam nang makoi magap da nhtawm, ma kaji ni hpe madun dan ndai majaw, ngai nang hpe shakawn kungdawn nngai: rai sa, Wa e, nang tsaw ai hku, ndai rai nga lit dai. Nye Wa gaw arai yawng mayawng ngai hpe ap ya ni ai; Wa hta kaga, dai kasha hpe kadai mung nchye lu ai: dai Kasha hte, dai Kasha jahtoi ya mayu ai masha hta kaga, Wa hpe mung, kadai n chye lu ai. Hki ba la nna lit li gun ai ni yawng hte e, ngai kaw wa ma rit; ngai nanhte hpe ban sa shangun na ma de ai. Ngai gaw myit sumnung ai hte myit gyip nga nngai rai nna nye a kandang hpe hpai mu, nye a lam sharin la mu: dai rai yang nanhte a myit masin ban sa ai hkrum na ma lit dai: kaning rai nme law, nye a kandang hpai loi ai hte, nye a lit mung tsang nga li ai, ngu mu ai.

Ya hti ai gaw Madu a Kabu Gara Shiga rai nga ai.

2020:PRAN WAN LADAW LABAN (13) NA MUNGGA

Kalang mi na ma ngai mi gaw lu sha seng langai kaw na muk tawng mi hpe magra la nna hprawng mat wa ai. Shaloi seng madu a kasha gaw dai ma hpe hkan rim la nna dai ma hpai hprawng ai muk tawng hpe bai la kau ya nna shahkrit shagyeng na maw ai shaloi, lusha seng madu dingla wa gaw dai ma hpe yu matsan dum nna shi seng na kahtet hpoi hpoi re muk tawng masum jaw dat nna hpang de dai hku n galaw na lam ni hpe htet nna apyaw sha bai wa kau shangun ai.

Shaning law law na mat ai hpang dai lu sha seng madu wa gaw machyi kaba hkrum nna tsi rung lung ra mat nna ga lajang nna tsi ra mat ai madang de du mat ai. Tsi tsi nna bai mai hkam kaja wa ai majaw tsi rung na yu ai shaloi nta de tsi tsi manu du wa ai. Kasha gaw shi kawa a tsi tsi manu hpe mu nna grai myit ru mat ai. Shan wa a lusha seng hpe shani kaba hpaw nna grumhpraw tam tim shi kawa ai tsi tsi manu hpe lu wa na nre majaw, shan wa a nta hpe dut na wa na matu hkyen wa ai. Shi kawa hpe tsi tsi ya ai tsi du wa gaw hkawm chyai let dai seng kasha hpaw da ai dum nta dut na matu ndau laika shakap da ai hpe mu nna bai sagawn yu ai shaloi, moi shi hpe muk tawng masum jaw ai hkan wa re hpe chye mat ai. Hpang shani tsi rung kaw na laika bai du wa ai hpe kasha gaw hkap hpaw yu yang shi kawa a tsi tsi manu yawng hpe muk tawng masum wa kau ya sai lam mu hti lu ai.

Dai ni na chyum mungga daw langai hta Shunem mare na num langai gaw shanhte a nta shawng hku lai lai re ai chyasam masha hpe sharawng shara rai tsawra myit kaba hte hkap daw daw di wu ai, sha n-ga, dai chyasam wa hkring sa na matu yup gawk du hkra hkyen lajang da ya nga ai. Dai zawn lai ang shagu hkap daw, hkap hkalum la ai majaw jaw Myihtoi Elisha gaw asak kaba tim kashu kasha nlu ai shan la hpe shadang sha lu na lam shaman ga tsun ya lai wa sai.

Anhte a sak prat hta chyasam masha hpe hkum tsun, tinang hte ni gahtep ai machying jinghku, manaw manang ni hpe tsawra myit madun na pi grai yak nga ga ai. Karai Kasang a ra sharawng ai hku sak hkrung hkawm sa nga ga ai rai yang, anhte a prat hta mung shada tsawra manu shadan hkat chye ai, shada garum shingtau la chye ai ni byin wa na ga ai. Dai zawn htingbu wa hpe tsawra chye ai, ra gadawn nga ai ni hpe tsawra myit kaba hte garum la chye ai myit masin ni anhte hta rawng wa hkra Karai Kasang kaw akyu hpyi nga ga law.

2020:PRAN WAN LADAW LABAN (13) NA CHYUM LAIKA

PRAN WAN LADAW (13)

June 28, 2020

Chyum Mungga Daw (1)

2 Hkawhkam Laika 4:8-11, 14-16

Ya hti ai na gaw Hkawhkam laika 2 hta na rai nga ai.

Ya lani mi hta e Elisha gaw Shunem mare de lai sa wa ai; dai yang e arawng lu ai numsha langai mi nga ai; shi gaw Elisha hpe hkap galaw daw wu ai: shing rai, shi gaw galoi mung dai lam hku lai wa yang, dai nta hta shang manam nga ga ai. Bai dai numsha gaw madu wa hpe, Yu u, ndai hku lai lai re ai wa gaw, Karai Kasang a chyoi pra ai masha rai nga ai hpe, ngai dum se ai. Dai rai nna bunghku ntsa e gawk kaji langai mi galaw nna, shi a matu yup ku, sha ku, lahkum hte pyengdin ni tawn da ga: shing rai an kaw shang manam yang, dai gawk hta shang yup na ra ai, ngu wu ai. Gaja wa dai lam hku bai lai ai shani e, shi dai gawk hta shang nna, yup nga ai. Dai rai nna Elisha gaw, Ataw, shi a matu hpa galaw na ga ta? ngu nna san wu yang, Gehazi gaw, Gaja wa, shi kasha n lu nga ai, madu wa mung dingla sai, ngu wu ai. Shaloi Elisha gaw, Bai shaga u, ngu wu yang, num jan gaw chyinghka lam e tsap nga ai. Shing rai myihtoi wa gaw, Nang htaning, ndai aten hta e, shadang sha ba na rin dai, ngu wu ai. Numsha gaw, Nye madu, Karai Kasang a masha wa e, na nchyang jan hpe masu ga hkum tsun et, ngu nna htan wu ai.

Ya hti ai gaw Karai Kasang a mungga rai nga ai.

Chyum Mungga Daw (2)

Roma 6:3-4,8-11

Ya hti na gaw Roma laika hta na rai nga ai.

Dai hta kaga, Hkristu Yesu hta e baptizma hkam ai ni anhte nlang hte gaw, shi a si hkam ai hta baptizma hkam nga ga ai hpe, nanhte n chye nga myit ni? Dai re ai majaw, Hkristu gaw Kawa a hpung shingkang hte si mat ai ni kaw na hkrung sharawt la ai hkrum wu ai hte maren, anhte mung asak sumdam ningnan hta e rawt hkawm wa lu hkra, dai baptizma hkam ai hta e, anhte si hkam nna shi hte rau lup makoi ai hkrum sa ga ai.

Si mat ai ni kaw na hkrung sharawt la hkrum ai Hkristu gaw, galoi mung bai n si lu na hte, si hkrung si htan gaw galoi mung shi hpe n madu lu na nu ai, anhte chye ga ai majaw, Hkristu hte rau si hkam ga yang gaw, anhte shi hte rau mung hkrung nga lu na ga ai, ngu nna anhte kam sham nga ga ai. Kaning rai nme law, shi a si hkam ai gaw, yubak a majaw kalang sha mi si hkam ai, rai nga ai; bai rawt hkrung ai chyawm gaw, Karai Kasang a man e a hkrung nga ai lam rai nga ai.  Dai hte maren nanhte mung, yubak hte si hka mat ai ni rai nga ma nit dai rai nna, Hkristu Yesu hta e Karai Kasang a man e a hkrung nga ai ni rai nga ga ai, ngu nna myit la mu.

Ya hti ai gaw Karai Kasang a mungga rai nga ai.

Kabu Gara Shiga

Mahte 10:37-42

Ya hti na gaw Mahte a Kabu Gara Shiga hta na rai nga ai.

Kadai mung,ngai hpe tsaw ra ai hta, kanu kawa hpe grau nna tsaw ra ai wa gaw, ngai hte n ging n dan nga ai: ngai hpe tsaw ra ai hta,shayi shadang sha hpe grau nna tsaw ra ai wa mung,ngai hte n ging n dan nga ai. Tinang a wudang hpai let,nye a hpang e n hkan ai wa gaw,ngai hte n ging n dan nga ai. Tinang a asak hpe lahpawt ai wa gaw,asak sum na ra ai: nye a jaw e,tinang asak jasum ai wa chyawm gaw,asak mu la na ru ai. Nanhte hpe hkap hkalum la ai wa gaw,ngai hpe mung hkap hkalum la ai; ngai hpe hkap hkalum la ai wa mung,ngai hpe shangun dat ai wa hpe hkap hkalum la ai rai nga ai. myihtoi a myi man hpe tau nna myihtoi hpe hkap hkalum la ai wa gaw,myihtoi a shabrai lu la na ru ai; ding hpring ai wa a myi man hpe tau nna,ding hpring ai wa hpe hkap hkalum la ai wa gaw,ding hpring ai wa a shabrai lu la na ru ai. Masha langai ngai gaw,sape a myi man hpe tau nna, ndai ma kaji langai ngai hpe,ntsin katsi htinggap mi sha jaw wu yang,dai wa gaw shi a shabrai n lu la na nu ai n rai,nga nna ngai nanhte hpe teng teng tsun nngai, ngu mu ai.

Ya hti ai gaw Madu a Kabu Gara ai shiga rai nga ai.

2020:PRAN WAN LADAW LABAN (12) NA MUNGGA

"Hkum tsawp hpe sha sat kau lu nna, myit masin hpe n sat kau lu ai ni hpe hkum hkrit mu," 

Shinggyim masha ngu ai gaw tinang hpe masha ni n ju n dawng mat na, nyet kau na grai hkrit chye nga ga ai. Dai hta sha n-ga, anhte dai zawn hkrit ai ni nan mung masha wa hpe nyet kau chye nga ga ai. Manang wa ai kaja ai arawn alai ni hpe gaw anhte n she shakawn chye ai sha n-ga, dai masha wa ai gawng kya ai lam hpe tam nna ma ra shagun, asawng asang, jahpoi ahpyak chye nga ga ai. Manang wa ai mai kaja ai lam ni hpe malap da nna, dai manang wa ai gawngkya ai lam ni hpe chyu sawk tam nna shatan ai, n jaw nteng ai hku tsun jahpyak chye ga ai,

Ndai zawn re lam ni gaw anhte shinggyim u hpu u hpawng hta shani shagu, aten shagu ngu na daram nan mu lu nga ga ai. Dai gaw anhte a makam masha lam hte kade naw gawngkya nga ai ngu ai lam hpe madun ai lam rai nga ai. Ndai zawn re lam ni gaw, dai ni na ahte a prat hta sha nrai, Madu Yesu Shi nan mung law law lang hkrum sha lai wa sai hpe chyum laika hta anhte mu lu nga ga ai. Madu Yesu kade mi mai kaja ai lam hpe galaw ai raitim, masha law malawng gaw kaja ai hku n mu lai wa ma ai. Madu Yesu  mai kaja ai magam bungli ni hpe galaw dan ai raitim, n kaja ai hku chyu sha mu nna mara shagun lai wai sha n-ga, hpa jahtum U Dang ntsa e jen sat kau ai du hkra hkrum sha lai wa ai.

Dai ni na chyum munga daw langai Myihtoi Yeremia laika hta tinang gaw kaja ai amu magam sha galaw nga ding sha, masha ni kade mi shatan nhkan, asawng jahpoi ai raitim, hpa hkrit ra na lam nnga ai lam, Karai Kasang gaw dinghpring ai ni maga galoi mung nga ai lam hpe tsun da nga ai. Dai re majaw mai kaja ai magam bungli galaw ai lam hta masha wa ai tsun jahpoi, jahpyak n hkrit ntsang ai sha dai mai kaja ai lam ni hpe galaw sa wa ra nga ga ai. Karai Kasang gaw mai kaja ai magam bungli galaw ai ni hpe galoi mung gabai da, shingdu tawn da na nrai nga ai.

Dai ni na Kabu Gara Shiga hta hkum tsawp hpe sha sat kau lu nna, myit masin hpe n sat kau lu ni hpe hkum hkrit mu, nga nna asan sha tsun da nga ai. Dai majaw anhte a sakhkrung lam hta masha wa tsun jahpoi asawng, shatan nhkan ai hpe sha hkrit nna mai kaja ai lam ni hpe n galaw mat ai rai yang, anhte a matu hkrat sum lam kaba rai nga mali ai. Anhte a sakhkrung hkawm sa lam hta matut nna Karai Kasang ra sharawng ai amu magam rai nga ai, mai kaja ai lam ni hpe sha galaw gunhpai shakut let sakhkrung hkawm sa nga ga, Karai Kasang grau htum ai shaman chyeju anhte jaw ya na rai nga ai.

2020:PRAN WAN LADAW LABAN (12) NA CHYUM LAIKA

Pran Wan Ladaw Lapan 12

June 21, 2020

Chyum Mungga Daw Langai

Yeremia 20:10-13

Masha ni a shatan nhkan ai hpe ngai na lu nngai; shoihpa shoirang shara magup rai nga ai: nye a makyin jinghku ni pyi mara shagun mu, anhte shi hpe mara shagun na ga ai; shi hpe matai dawp lu nhten, nga nna ngai hpe gyam yu ai ni tsun ma ai. Raiti mung Karai Kasang gaw, gum shem ai share wa zawn ngai hpang maga e rai nga ai: dai majaw ngai hpe zingri zingra ai ni yawng, n dang lu nna, kadawng mat na ma ra ai. Shanhte gaw myit su ai hku n hkan ai majaw, grai kaya kahpa hkrum nna, prat dingsa e n malap kau lu hkra, arawng sadang sum na mara ai. Ding hpring ai ni hpe dinglik yu nna, myit masin hte kraw lawang hpe chye lu ai, zaw nawng zaw wa up ai Karai Kasang e, nye a amu hpe na a man e ngai shapraw dan ai lam ngai mu lu n ga. Karai Kasang hpe mahkawn magoi mu, Karai Kasang hpe shakawn kungdawn mu, Shi gaw n hkru ai ni a lata kaw na matsan mayan ni a myit masin hpe mawai lu nu ai.

Ya hti ai gaw Karai Kasang a Mungga rai nga ai.

Chyum Mungga Daw Lahkawng

Roma 5:12-16

Ya hti na gaw Roma liaka hta na rai nga ai.

Dai rai nna, masha langai mi a jaw e yubak gaw mungkan ga e shang wa nna, yubak a majaw si hkrung si htan shang nang wa ai hte maren, yawng mayawng yubak kap nga ma ai, majaw, masha nlang kaw e si hkrung si htan du bang wa sai. Kaning rai nme law, dai jep ai tara da ai du hkra yubak gaw mungkan ga e nga nga sa ti mung, jep ai tara n nga ai laman e, yubak shagun ai, ngu ai, n nga ai. Shing nga rai ti mung, Adam a tawt lai ai lam hte maren yubak n galaw ai ni a ntsa e pyi, Adam kaw nna Mawshe a aprat du hkra si hkrung si htan up hkang nga sai: Adam chyawm gaw, du na ra wa a kumla rai nga ai. Rai ti mung, tawt lai ai lam zawn, chyeju kumhpa lam rai nga ai n rai; kaning rai nme law, marai langai mi a shut hpyit ai jaw e ga daga si mat ma sa yang gaw, Karai Kasang a chyeju hte, Yesu Hkristu ngu ai masha langai mi a chyeju hte jaw ai kumhpaw kumhpa gaw, lanlak a matu grau nna law htam wa na rai nga sai.

Ya hti ai gaw Karai Kasang a mungga rai nga ai.

Kabu Gara Shiga

Mahte 10:26-33

Ya hti na gaw Mahte a Kabu Gara ai Shiga hta na rai nga ai.

Dai re ai majaw shanhte hpe hkum hkrit mu: kaning rai nme law,magap da nna, n pru n dan lu na arai gaw n nga ai; makoi da nna n chye na lu na arai mung n nga ai. Ngai nanhte hpe nsin kata e tsun dan ai lam hpe,nhtoi hta e tsun dan mu: nanhte na hta e na la ai lam hpe,nta ntsa nna hkaw dan mu. Hkum tsawp hpe sha sat kau nna,myit masin hpe n sat kau lu ai ni hpe hkum hkrit mu:myit masin hte hpawn hkum tsawp hpe ngarai mung hta e jahten kau lu ai wa hpe grau nna hkrit nga mu. U tsa lahkawng hpe peksan langai mi hte dut kau lu ai, n rai ni? nanhte a Kawa a myit hte n rai yang gaw,dai ni hta na langai mi pyi ga de n hkrat ma ai. Nanhte a baw na kara singgawng mahkra hpe mung, hti da nu ai. Dai re ai majaw,hkum hkrit myit: u tsa law law hta nanhte grau nna hpu nga myit dai. Kadai rai ti mung,masha ni a man e ngai hpe yin la ai wa hpe,Sumsing lamu e nga ai,nye Wa a man e dai wa hpe ngai yin la na we ai. masha ni a man e ngai hpe nyet kau ai wa hpe chyawm gaw,sumsing lamu e nga ai, nye Wa a man e, dai wa hpe ngai nyet kau na we ai.

Ya hti ai gaw Madu a Kabu Gara ai Shiga rai nga ai.

2020:CHYOI PRA AI HKUM HTE SAI POI SHANI NA MUNGGA

Anhte shinggyim masha ni sha n-ga, du sat du myeng asak hkrung mahkrung ma hkra gaw malu masha sha nna sha asak hkrung ga ga ai. Malu masha ningra wa yang anhte a hkumhkrang hta na n-gun atsam ni htum yawm mat wa nna, hpa jahtum asak pyi si htum wa chye nga ai. Shinggyim u hpung u hpang hta malu masha ni taw wa (hku hku) wa ai shaloi n-ru n-ra ni byin wa ai, ga-li ga-law ni byin wa ai, hpang jahtum majan byin gasat gala ni du hkra byin wa chye nga ai. Lai wa sai ten anhte a Jinghpaw buga hta Yu-li hku a majaw anhte a myu sha ni law law wa tinang a mare kahtawng buga ni hpe tawn kau da nna, malu masha grung ai, galaw lu galaw sha mai ai shara buga ni hte htawt sit mat wa ra ai hpe anhte mu hkrum, na yu saga ai.

Dai ni na laban gaw Madu Yesu a Chyoipra ai Hkum hte Sai Poi nhtoi rai nga malai ai, Chyoipra ai hkum hta Madu Yesu teng teng nga nga ai hpe Nawku hpung a sharin shaga ai hta sha n-ga, San Pra ai masha ni law law wa mung sakse hkam lai wa sai. Dai ni na aten du hkra mungkan mungdan shara shagu hta Chyoipra ai Hkum kawn, hpungtan hpaji ninghkring ni sawk sagawn nlu ai lamik kumla law law hpe madun dingyang rai nga ai.

Dai ni na Kabu Gara Shiga hta "Ngai gaw sumsing lamu de na du yu wa ai, hkrung ai mung rai nga ai," nga nna Madu Yesu nan tsun lai wa ai hpe anhte na la saga ai. Shi a Hkum hpe sha ai ni gaw htani htana ahkrung nga ai asak hpe lu la na nga nna Shi Madu nan ga sadi jaw da lai wa sai. Anhte a hkum hkrang sakhkrung lam a matu malu masha ni gaw ahkyak rai nga ai zawn, Chyoi pra ai Hkum gaw, Madu Yesu hpe hkap la kamsham sai Kathawlik hpung masha ni a matu kri madung rai nga ai. Anhte a makam masham, wenyi malu masha a matu Chyoi pra ai Hkum gaw madung rai nga ai. Chyoi pra ai Hkum hte hka mat ai rai yang anhte a makam masham mung si mat na sha rai nga mali ai. Jau nga ai shara ni hta Misa hkungga lawm nna Chyoi pra ai Hkum hpe hkam la lu hkra shakut ra ga ai. Nawku hpung a sharin shaga tara ni hta mung Pasaka ladaw hta Chyoi pra ai Hkum hpe hkam la u nga sharin shaga da nga ai. Dai gaw Jau ni hte hte tsan ai, Misa hkungga lawm na nmai byin ai hpung masha ni hpe nlaw htum laning mi hta kalang sha gaw shakut nna Chyoi pra ai Hkum hpe hkam la matsun ai rai nga ai. Chyoi pra Hkum hte hka yang Madu Yesu hte hka mat ai hte bung nga ai. 

Dai majaw tsawra ai Nu Wa Hpunau ni e anhte a hkum hkrang sakhkrung lam a matu malu masha ni hpe shani shagu lu sha nga ai ra ai zawn, anhte a Wenyi sakhkrung lam a matu mung mai byin ai made, Chyoi pra ai Hkum hpe nawku dawjau, let hkam la nga ga ngu n-gun jaw dat lu nngai.

2020:CHYOI PRA AI HKUM HTE SAI POI SHANI NA CHYUM LAIKA

2020:CHYOI PRA AI HKUM HTE SAI POI

Chyum Mungga Daw Langai

Tara Jahprang 8:2-3, 14b-16a

Ya hti na gaw Tara Jahprang Laika hta na rai nga ai.

Na a Karai Kasang nang hpe shagrit chyam yu nna, shi a hkang da ai ga hpe hkan nang mayu ai myit rawng ai n rawng ai chye lu hkra; lai mat wa sai mali shi ning tup woi hkawm ai nam mali lam dingdung hpe dum nga u. Shi nang hpe shagrit nna kawsi jahkrum ai hte, shinggyim masha gaw muk hte sha hkrung nga lu ai n rai, Karai Kasang a n-gup na pru mapru hte hkrung nga lu ai gaw nang chye lu hkra nga, nang mung n mu yu, na nji nwa ni mung n mu yu ai manna hte nang hpe bau nit dai.

Egutu mung mayam tai ai nta na nang hpe shaw woi wa ai wa; wan lapu hte n-gaw gawk sawng nna lu na ntsin kata, kawsi hpang gara let, dai hkrit hpa mali kaba a kaang hku nang hpe woi wa nna, nhpai lung kring hta na ntsin shapraw jaw ai wa; nang hpe shagrit chyam yu nna, hpang jahtum e nang hpe chyeju madun na nga, na a nji nwa ni pyi n chye ai manna hte dai nam mali kata e nang hpe bau maka ai na Karai Kasang hpe nang hkum malap kau et.

Ya hti ai gaw Karai Kasang a mungga rai nga ai.

Chyum Mungga Daw Lahkawng

Kawrinhtu 10:16-17

Ya hti na gaw Kawrinhtu ni hpang de shagun dat ai laika langai hta na rai nga ai.

Anhte shaman nga ai, a nga ai gawm gaw, Hkristu a asai hte kanawn mazum ai lam rai nga ai n rai ni? Anhte ahkyep alep nga ai muk gaw, Hkristu a hkum hkrang hte kanawn mazum ai lam rai nga ai n rai ni? Kaning rai nme law, anhte law law wa rai ga ti mung, muk tawng langai sha rai nga ai hte, anhte yawng dai muk tawng langai sha hta jawm sha ga ai majaw, anhte hkum hkrang langai sha rai nga ga ai.

Ya hti ai gaw Karai Kasang a mungga rai nga ai.

Kabu Gara Shiga

Yawhan 6:51-58

Ya hti na gaw Kasa Yawhan a laika hta na Kabu Gara Shiga rai nga ai.

Ngai gaw sumsing lamu de na du yu wa ai, hkrung ai muk rai nga nngai: muk ndai sha ai wa kadai mung, htani htana a hkrung nga na ra ai: mungkan ga a asak hkrung nga na matu, ngai jaw ai muk chyawm gaw, nye a shan rai nga li ai, ngu nna shanhte hpe htan mu ai. Dai re ai majaw Yuda masha ni, Ndai wa gaw, kaning di nna anhte hpe shi a ashan jaw sha lu na a ta? nga nna shada da tsun hkat ma ai. Dai rai nna Yesu gaw, Ngai nanhte hpe gaja wa teng teng tsun ma de ga, Masha Kasha a ashan nanhte n sha, shi a asai hpe mung n lu myit yang gaw, nanhte hta asak n rawng lu ai. Nye a ashan sha nna, nye a asai lu ai wa gaw, htani htana asak lu la nu ai: dai wa hpe mung, hpang jahtum na nhtoi hta ngai sharawt la na we ai: kaning rai nme law, Nye a ashan gaw teng man ai shahpa rai li ai; Nye a asai mung, teng man ai luhpa rai li ai. Nye a ashan sha nna,Nye a asai lu ai wa gaw, ngai hta rawng nga ai; dai wa hta mung Ngai rawng nga nngai. A hkrung nga ai Nye Wa gaw, Ngai hpe shangun dat ai rai nna, Ngai gaw Wa a majaw hkrung nga nngai hte maren, Ngai hpe sha ai wa mung, Nye a majaw hkrung nga na ra ai. Ga ndai gaw sumsing lamu de nna du yu wa ai muk rai nga ai: nji nwa ni sha nna si wa ai muk zawn n rai: ndai muk sha ai wa gaw, htani htana a hkrung nga na ra ai, ngu nna shanhte hpe tsun mu ai.

Ya hti ai gaw Madu a Kabu Gara Shiga rai nga ai.