2020:PASKA POI SHANI NA MUNGGA

“...Masha a hkum hkrang bai hkrung rawt na ra ai, n htum nwai asak nga ai, ndai lam ni hpe ngai kamsham ai” (Kasa ni a makam masham). N si lu hkra makawp maga lu ai tsi-hkrung tsi-nan hpe tam ai  ni moi prat na labau hta nga ai zawn, ya ndai prat na masha ni mung shakut chyam yu ma ai. N byin mai ai lam chye jang, asak 200-300 ning sha gaw hkrung lu hkra, ngu myit mada let shakut ai ni mung nga ma ai. Pharaoh (Egyip mung hkawhkam) ni gaw n si tsi tam n mu ai jahtum, shanhte si mat ai hpang hkum-tsawp n hten n yat ai baw tsi chya hkayawp nna lup kau shangun ma ai. Dai ni na prat du hkra “Mami” ngu shamying ai, hkraw kyip mat tim myiman naw yu chye lu ai nlung mang ni nga nga ai. Moi Miwa hkawhkam ni mung n si tsi tam shangun ma ai da. N lu wa jang si lu na, nga ai majaw tsi tam ai ni gaw kaga zunlawng mungdan de hprawng yen nga nan mat ma ai da.

Masha langai a prat hta hkamja lam a matu, tsi jahpu manu kade she jai lang ra ai, ngu ai hpe asak kaba wa magang grau chye wa ai. Yawng gaw si hkrit ma ai; sung dik ai kraw hta masha gaw tut e a’ hkrung nga mayu ai. Dinghta ga e asak hkrung nga nna lachyum n pru dum sai ni chyu sha si mat mayu ma ai. Lachyum pru ai hku asak hkrung nga lu na lam hte tut e ahkrung nga lu na lam (htani htana asak) hpe gara hku lu la mai ai lam, hpaji bawhpan law law nga ai. Sung dik ai kraw kata na myit tsang ai lam, myit dik hkap la lu ai lam hpe gaw hpungtang hpaji e n jaw ya lu ai; makam masham sharin shaga ai lam ni chyu sha jaw lu ai.

N si chye ai wenyi/numla nga ai lam hpe gaw kaga makam masham yawng ngu na daram shingran jaw lu ma ai. N htum n wai hkrung nga lu ai aprat nga ai lam hpe mung shingran jaw ai makam masham ni nga ai. Rai ti mung, “Masha a hkum-hkrang bai hkrung rawt lu na” ngu ai makam, kaga kaning re ai makam masham hta mung n nga ai. Jew makam masham hte Jew makam masham hta shachyaw mat wa ai Hkristan makam mashma hta sha mu lu ai. Dai gaw, “Kaman rai taw nga ai lup” a majaw rai nga ai. Sakse hkam ai Yawhan gaw, “...mu ai hte kamsham wu ai” nga ai. Kasa ni yawng mung hpang e Yesu hpe kade lang she mu lu ma ai. Shanhte sakse hkam ai lam gaw n shut n shai, shanhte hkum nan si hkam hkra hkra asak jaw ap nawng hkaw tsun ai a majaw re. Dai majaw, Kasa ni a makam masham hpe anhte mung kam ga ai re.

Kasa ni, Chyoi Pra Wenyi lu la ai hpang, shanhte a makam masham hpe sakse hkam ma ai. Dai Hkristu naw hkrung ai aten hta hkaw tsun ai, machyi makaw shamai ai, nat shaden kau ai, chyasi hpe jahkrung ai, ning re mai kaja amu ni hpe shanhte sakse hkam dan ma ai. Shi bai hkrung rawt ai lam a sakse ni rai ma ai hte, sakse hkam na matu shangun dat hkrum ai lam hkaw tsun ma ai. Ndai dinghta ga e asak matut hkrung nga na lam lachyum n pru dum ai ni gaw kadai ni ta? Kawsi hpang gara, matsan jamjau, machyi makaw, myit-ru shoi-hpa, myit daw myit htum, nga n pyaw dum ai, shing re ai bawhpan hkam sha ai ni law law nga na ma ai. Paska mungsung gaw anhte mungkan masha ni a ningmu, chye na hkap la ai lam, prat a matu dawdan ai lam, dz.dz., yawng hpe galai shai wa shangun lu ai. Ndai dinghta ga e nga pra ai prat a mahkrum madup yawng hpe lachyum jaw ya ai. Masha shagu kamsham lu nna Yesu hta asak jawm pawng ai a marang e, shaga la hkrum ai lam jahtum na bandung, makam masham a jahtum e hkam la na janmau gaw Hkristu hte rau hpung shingkang dagraw hkam la na, n htum n wai asak rai na, ngu ai lam re.

Ndai dinghta ga e pyi, shut hpyit mara a amu ni shinggyim masha a nga-mu nga-mai ai lam hpe kade she jahten sharun kau lu ai hpe anhte dum chye ga ai. Makam masham a apu asi re ai tsawra matsan dum chye ai myit, shawang tsawra myit gaw kade daram dam lada ai hkye hkrang la ai amu galaw lu ai hpe dum chye ga ai. Shut hpyit mara hte hka nna sha asak a chyeju kumhpa ni hpe hkam la lu na rai nga ai.

Sumru yu na lam ni:

- Hkrung rawt sai Hkristu hpe kamsham ai majaw, tinang a prat hta kaning re ai shaman chyeju, kaning re ai akyu ara kade hkam la sai?

- Tinang hkrung nga ai, masha tai nga ai lachyum pru dum ai kun? Myit kaji myit daw ai majaw lachyum n pru dum ai aten ni nga ai kun? Paska mungsung hta tinang gara hku jawm pawng nga ai kun?

- Kasa ni a prat na masha ni pyi hkrung rawt ai Yesu hpe n kam- sham ai ni law law nga ma ai. Kasa ni hte sape ni pyi ram ram yak ai hku sharin la ma ai. Tinang lu la sai makam masham hpe sakse hkam dan ai amu hta gara hku shang lawm na kun? Gara hku madi shadaw lawm na kun?

2020:PASKA POI SHANI NA CHYUM LAIKA

PASKA POI SHANI YESU BAI HKRUNG RAWT AI NHTOI

April 12, 2020

Chyum Mungga Daw (1)

Kasa laika 10:34, 37-43

Ya hti na gaw Kasa laika hta na rai nga ai.

Roma hpyen du Korneliu a nta e, Petru ga hpaw nna, hpawng nga ai ni hpe hkaw tsun dan ai gaw: Yawhan kashin kamun lam hkaw dan ai hpang, Galile mung kaw nna Yuda mung ting e kajai gara wa ai lam hpe, nanhte nan chye nga myit dai. Dai gaw, Nazaret na Yesu a lam rai nga ai. Karai Kasang gaw, Chyoi pra ai Wenyi hte mung, n-gun atsam hte mung, shi hpe chya ya wu ai. Karai Kasang dai Yesu hte rau nga nga ai majaw, mai kaja ai amu ni shi galaw nna, nat gung lau e zingri zingrat hkrum ai ni yawng mayawng hpe shamai ya let, kawan katsan hkawm nga ai. Shing rai, Yuda mung ting hte Yerusalem mare hta e, shi galaw ai amu yawng mayawng a sakse ni anhte rai nga ga ai: dai wa hpe nan shanhte hpun hta jen sat kau mu ai; Karai Kasang chyawm gaw masum ya nhtoi hta Shi hpe jahkrung sharawt la wu ai rai nna, mung masha yawng a man e n rai, Karai Kasang shawng e lata san da sai sakseni a man e sha, dai wa hpe dan pru shangun wu ai. Dai sakse ni gaw,si ai kaw na Shi bai hkrung rawt ai hpang e, Shi hte rau lu sha ai ni anhte nan rai nga ga ai. Shi Madu nan mung, hkrung ai ni hte si sai ni a tara agyi tai na matu, Karai Kasang san da ai wa rai nga sai lam, mung masha ni hpe tsun dan let sakse hkam ya na matu, shi anhte hpe hkang da mani ai. Myihtoi mahkra mung, Yesu a lam sakse hkam ya let, Shi hpe kam sham ai ni yawng, Shi a mying ningsang a marang e, mara raw dat kau ya ai hkrum na mara ai, nga nna tsun dan ma ai.

Ya hti ai gaw Karai Kasang a mungga rai nga ai.

Chyum Mungga Daw (2)

Kolose 3:1-4

Ya hti na gaw Kolose masha ni hpang de San Pawlu shagun dat ai laika hta na rai nga ai.

Hpu nau ni e, nanhte Hkristu hte rau teng man ai asak de rawt wa manit dai rai, dai Hkristu gaw sumsing lamu hta Karai Kasang a hkra maga e dung nga ai majaw, lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu. Kaning rai nme law, nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung shi hte rau hpung shingkang hta dan pru na marin dai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 20:1-9

Ya hti na gaw Yawhan a laika hta na Kabu Gara Shiga rai nga ai.

Dai laban bat a shawng shani e, nhtoi garai n htoi yang, Maria Magdalena jau jau e lup de sa wa ai rai nna, lup chyinghka la ai nlung sit nga ai hpe mu wu ai.

Dai majaw, Simun Petru yan Yesu tsaw ra ai sape hpang de shi gat wa nhtawm, Madu hpe lup de na shanhte la

nna, kanang e tawn da mu ai hpe anhte n chye ga ai, ngu nna shan hpe tsun mu ai. Shaloi Petru yan kaga sape pru nna, lup de sa wa ma ai.  Shan rau gat sa wa yang, kaga sape Petru hpe gat lai kau da nna, lup de shawng sa du ai: shaloi shi gum yu yang, sumpan gin-yan taw nga ai sha mu wu ai; rai ti mung, shi kata de n shang ai. 

Simun Petru chyawm gaw shi a hpang e hkan gat nang nna, dai de du jang, kata de shang yu nga ai. Sumpan gin-yan taw nga ai hpe mung, baw na hpajet gaw sumpan hte rau n re ai, kaga ga rai nna, katsu taw nga ai hpe mung shi mu wu ai.

Dai majaw, lup de shang du ai kaga sape mung hkan shang wa nna, mu lu ai hte kam sham wu ai. Kaning rai nme law, Yesu gaw si ai ni kaw na bai hkrung rawt wa na ra ai, nga nna Chyum Laika hta rawng nga ai hpe, ndai ahkying du hkra shan n chye madat ma ai.

Ya hti ai gaw Madu a Kabu Gara Shiga rai nga ai.

2020:KUNGLA SHAMAN POI SHANI NA MUNGGA

Lu-sha jahkran ai ladaw kru ngu na Laban hta Yesu nni nkri hkam la ai, si hkam ai lam hpe myit dum shagrau ga ai.

Yesu gaw Shi a Mare de, awng padang ninglaw hte shang wa ai; anhte a Hkye La Madu Messiah gaw nni nkri hte sat kau ai hpe hkam la ngut nna bai hkrung rawt ai, ndai amu kaba ni hpe shatup na matu Yerusalem Mare de shang wa ai. Nni nkri hte si hkam ngut ai hpang sha, n si lu ai asak, htani htana asak hpe hkam la lu na, ngu ai, Paska a mungsung sharin shaga lam gaw Mungga madung rai nga ai.

Nni nkri hte yawn-hpa shoi-hpa, machyi makaw, n tara mara shagun hkrum ai/ jeyang hkrum ai, roi sha hkrum ai, dz. dz., re ai baw ni hpe yawng gaw koi yen shaja ma ai. Jahtum chyalai si wa na lam hpe yawng e hkrit ai. Dai mabyin ni yawng hpe shachyoi shapra ya ai, lachyum ningnan jaw ya ai gaw wudang hkungga hte bai hkrung rawt ai lam rai nga ai.

Messiah Hkye Madu gaw nni nkri hpe mung, si ai lam hpe mung, n hkam la ai sha hkye hkrang la ai amu hpe teng sha galaw lu ai; Karai e shabyin lu ai. Rai tim, wudang hkrun lam hku nna sha hkye hkrang la ai amu hpe shabyin da ya ai. Shut hpyit mara kade n kaja ai, kade daram ari dam kaba ai hpe hkam la ging ai lam, Esaiah kaw na “Karai a Shangun Ma” re ai Yesu gaw nni nkri hkam la ai, wudang hkungga shan tai wa ai. Shut hpyit mara hka wa’ ai hta lai jan ai lachyum ni hpe mung sharin ya ai. Dai gaw ning rai nga ai: “Manang wa/jinghku wa a matu tinang a asak hpe nawng kau ai hta grau ai tsawra myit gaw n nga ai” nga ai (Yn. 15:13).

Masha shagu, tinang nang a shut hpyit mara a matu hka wa’ ra ai/ wa’ ang ai. Dai a majaw, Yesu gaw dinghta ga na nni nkri yawn-hpa shoi-hpa, si lu ai lam, ndai ni hpe dawm kau ya ai lam n galaw ai; gara hku nna hkam la tawt lai awng dang lu na lam hpe kasi madun sharin ya ai. Dai majaw, “Ngai a hpang hkan nang mayu ai wa gaw tinang nang a wudang hpai let ngai a hpang hkan nang lu na”, nga, saw shaga ai (Mt 16:24).

Yesu sharin ya ai lam ni:

Tsawra myit gaw n ju n dawng ai hta atsam grau kaba ai;

Shagrit shanyem ai gaw gumrawng gumtawng ai hta atsam grau kaba ai; Mai kaja ai myit masin gaw pawt sindawng ai hta atsam grau kaba ai; Hkam sharang hkamjan lu ai gaw roi rip zingri ai ni hta atsam grau kaba ai; Wudang ntsa e mara raw dat ya ai ga gaw n tara ai hku mara shagun ai ni hta grau ai amu kaba ni galaw lu ai….. 

Anhte a prat hta kade kaning rai machyi hkam sha hkrat sum ga ai rai tim, myit daw asum jaw na lam n ra ai; nni nkri hkam la ai, n tara ai hku roi rip jeyang sat kau hkrum ai Madu a bai hkrung rawt ai lam hta, yawng mayawng hpe padang dip awng ninglaw lu la ai. 

Sumru mai ai lam: 

- Tinang hkum nan n tara ai hku jeyang hkrum ai, hpaga sum mat, n jaw n ang ai hku mara shagun da hkrum ai,… n dai zawn re ai mahkrum madup ni hta tinang gara hku hparan ga a ta? 

- Kadai e hkap di ai n rai_ hpa galaw tim n awng hkraw; machyi makaw hkrum kun; n myit mada ai hkala nba hkrum kun,.. shing re ai aten hta tinang a myit masin hpe gara hku sharai la ga ai kun? 

- Wudang a mungsung hpe tinang kalang lang sha pyi sung sung myit yu ga ai kun? 

2020:KUNGLA SHAMAN POI SHANI NA CHYUM LAIKA

KUNGLA SHAMAN AI LABAN

April 5, 2020

Chyum Mungga Daw (1)

Esaia 50:4-7

Ya hti na gaw myihtoi Esaia a laika hta na rai nga ai. 

Hki ba hkrum ai wa hpe shalan shabran ai ga chye tsun lu hkra, Madu gaw sharin achyin hkam la ai sape a shinglet ngai hpe jaw ni ai. Shi a ga na la na matu, jahpawt shagu shi ngai hpe jasu nga ai: sape wa madat la ai zawn ngai mung madat la lu u ga, Madu nye a na hpe hpaw ya ni ai. Ngai mahtang lata kau ai hte kanut mat wa ai nrai. Ngai gaw kayat ai ni hpe nye a shingma, shabyi mun baw ai ni hpe nye a shabyi, ap ya nngai: asawng asang di ai hte, mayen mahtaw bun ai kaw na nye a myiman kayin kau ai nrai.7 Kaning rai nme law, Madu gaw ngai hpe garum na ra ai; dai majaw asawng asang di ai lam ni gaw ngai hpe myit n jahtum kau nga ai. Ngai kaya kahpa n hkrum lu na ngai chye ai ma¬jaw, nye a myiman hpe mung, nhpai lung zawn ngai shatai da nngai. 

Ya hti ai gaw Karai Kasang a mungga rai nga ai. 

Chyum Mungga Daw (2)

Hpilipi 2:6-11

Ya hti na gaw Hpilipi masha ni hpang de San Pawlu shagun dat ai laika hta na rai nga ai. 

Hpu nau ni e, Hkristu Yesu gaw Karai Kasang nan rai nga timung, Karai Kasang hte maren rai nga na hpe n manoi ai sha,7 mayam madang hpe hkap la na matu, Karai Kasang a hpung shingkang hpe raw tawn nna, shiggyim masha hte bung hkra tai wa sai. Shing rai ma¬sha a hkum shan hku anhte kaw dan pru nhtawm, shi hkum hpe shag¬rit shanem nna, si ai du hkra madat mara nga ai, gaja wa, Udang hta si ai du hkra madat mara nga ai. Rai timung, Karai Kasang gaw shi hpe shagrau nna, amying yawng mayawng hta grau ai amying shingteng shi hpe jaw da wu ai. Dai re ai majaw, sumsing lamu tang hta, ginding aga tsang hta na hte, lawu na tsang na lahput yawng hte gaw Yesu a amying hte hput di na mara ai. Dai hta n-ga, Kawa Karai Kasang a hpung shingkang a matu mara,11 Yesu Hkristu gaw Madu rai nga ai, nga nna shinglet yawng mayawng kajai gumhkawng na mara ai. 

Ya hti ai gaw Karai Kasang a mungga rai nga ai.

Kabu Gara Shiga

Mahte 27:11-54

Ya hti na gaw Mahte a laika hta na Madu Yesu a nni nkri hkrum lam rai nga ai. 

Madu Yesu hpe Roma munggyi wa Puntsiu Pilatu a man de woi jashawn mu ai; dai du kaba gaw, Nang Yuda ni a hkawhkam rai nga nni? ngu nna Shi hpe san wu ai. Yesu gaw, nang tsun ai hte maren rai nga nngai, ngu wu ai. Rai timung, hkinjawng agyi ni hte salang ni Yesu hpe mara shagun yang, shi hpa mung n htan wu ai.13 Shaloi Pilatu gaw, shanhte na a lam sakse gade wa hkam ya ai hpe n na n ni? ngu nna shi hpe tsun wu ai. Yesu mahtang ga hkaw mi n htan ya ai. Dai rai nna munggyi wa nachying mau nga ai. Dai Poi aten hta e, munggyi wa shawa masha ni ra ai hku hkan nna, htawng rawng ai masha langai ngai hpe dat ya na htung nga ai. Dai shaloi e, Baraba ngu ai, kajai gumhkawng ai bawng dung ai masha langai mi nga ai.17 Masha law law hpawng nga ai majaw, Pilatu gaw, Nanhte a matu dat ya na, kadai mahtang hpe ra myit ta? Baraba hpe ra myit ni? shing n rai, Hkristu ngu ai Yesu hpe ra myit ni? ngu nna shanhte hpe san wu ai.18 Kaning rai nme nga yang, manawn masham ai a majaw, shanhte Yesu hpe ap kau ma ai Pilatu chye nga ai.

Ya, tara tingnyang hta e shi dung nga yang, shi a madu jan shi kaw shangun dat nna, dai ding hpring ai wa hpe hpa mung hkum di u; dai ni pyi, yup mang hta e shi a majaw, ngai myit ru tsang grai hkrum ni ai, ngu nna htet dat wu ai. Hkinjawng agyi ni hte salang ni chyawm gaw Baraba hpe hpyi nna, Yesu hpe sat kau na, ngu nna shawa masha ni hpe shadut ma ai. Shaloi dai du kaba shanhte hpe san yu nna, ndai yan hta na nanhte a matu dat ya na, gara mahtang hpe ra myit ta? ngu nna san yang, shanhte gaw, Baraba hpe ra ga ai, ngu nna htan ya ma ai.22 Bai Pilatu gaw, Hkristu ngu ai Yesu hpe ngai kaning di na rai ta? ngu nna shanhte hpe tsun mu ai. Shanhte yawng, Udang hta jen da u, ngu mu ai. Bai shi gaw, Hpa majaw dai hku di na i? shi n hkru ai lam hpa galaw sa ta? ngu wu ai. Shanhte chyawm gaw, Udang hta jen da u, nga nna grau jahtau bu ma ai. Pilatu mahtang gaw, gara hku mung n dang lu ai hte, kabrawng kabrang byin wa ai hpe mu yang, hka la nna, shawa masha ni a man e lata kashin let, ndai ding hpring ai wa a asai hkaw kau ya ai gaw, nye a mara n rai sai; nanhte nan dai lit hpe hkap la mu, ngu wu ai.

Dai rai nna, masha yawng hte gaw, shi a asai anhte a ntsa e mung, anhte a shu sha ni a ntsa e mung mara nga u ga, ngu nna htan ma ai. Shaloi jang Pilatu gaw Baraba hpe, shanhte ra ai hte maren dat ya mu ai. Yesu hpe mahtang shi kayat nna, Udang hta jen da ai hkrum u ga, ap kau dat wu ai. Shaloi dai munggyi wa a hpyen ma ni gaw, Yesu hpe htingnu nhku de woi wa nna, dai hpyen dap na ni yawng hte hpe Yesu a man de shaga jahpawng tawn mu ai. Shanhte shi hpun palawng raw kau nna, ahkyeng nsan ai nba lawai ya mu ai; ju kagup mung shanhte hkri la nhtawm, shi a baw hta shagup ya nna, shi hkra lata e mai-aw yan mi jum shagun ma ai. Shaloi Yesu a man e lahput hput di let, shi hpe asawng nna, Yuda ni a hkawhkam wa e, nang galu kaba nga u ga law, ngu mu ai. Bai, shi hpe mayen mahtaw bun nht¬awm, dai mai-aw yan hpe shanhte la nna, shi a baw hpe gayat ya mu ai. Shanhte shi hpe asawng asang di ngut jang, hkyeng ai nba hpe raw kau nna, shi a hpun palawng hpe jahpun nhtawm, udang hta jen da na matu woi sa wa ma ai.

Shanhte pru sa wa yang, Simun mying ai Kureni mung masha langai mi hpe shanhte mu hkrup nna, shi hpe Yesu a udang hpai sha¬ngun ma ai. Ya Gol-go-hta ngu ai, Baw Pungkum mying ai shara de du jang, hka ai tsi hte hpaw ai tsabyi chyaru shi hpe jaw lu timung, Yesu dai hpe chyim yu nhtawm, n kam lu wu ai.35 Shi hpe udang hta jen da ngut jang, shanhte shi a hpun palawng hpe hpaida da ai hte jawm karan la ma ai. Shaloi dai yang e dung nga nna, shi hpe sin da mu ai. Shi a baw ntsa e “ndai Wa gaw Yuda ni a Hkawhkam, Yesu rai nga ai,” nga nna shi a mara madun ai laika hpe, shanhte shakap da ma ai.38 Yesu hte rau damya lahkawng hpe, hkra maga de langai mi, pai maga de langai mi jen da mu ai. Lam e lai sa wa ai ni mung, shi hpe asawng asang di nna, shanhte a baw hpe kanga let, “Nawku Htingnu hpe jahten sharun kau nna, masum ya laman hta, bai de lu na, nga ai wa e, Na hkum hpe nan hkye la u: nang Karai Kasang a Kasha rai yang gaw, udang hta na yu hkrat wa rit,” ngu mu ai. Hkinjawng agyi ni, tara sara ni hte salang ni mung, “Masha kaga hpe shi hkye la sai; ya, tinang a hkum hpe n hkye la lu a hka! Shi gaw Israela a Hkawhkam rai yang gaw, Udang hta na yu wa u ga; Shaloi anhte shi hpe kam sham na ga ai. Shi gaw Karai Kasang hpe kam hpa nga ai; Karai Kasang Shi hpe ra sharawng ai rai yang, ya shi hpe mawai la u ga: kaning rai nme law, ngai gaw Karai Kasang a Kasha rai nga nngai nga nna shi tsun da ni ai,” ngu nna Yesu hpe asawng let tsun mu ai.

Shi hte rau udang hta jen da hkrum ai damya yan mung, dai hte maren shi hpe aroi arip di mu ai. Ya Jan pungding madi ai kaw nna ahkying masum du hkra, mung ting e nsin chyip rai mat sai. Ahkying masum daram e Yesu gaw nsen kaba hte, Eli, Eli, Lama sa¬bak-htani nga nna jahtau wu ai: dai gaw, nye a Karai Wa e, nye a Karai Wa e, nang ngai hpe hpa rai kau da nga n ta? nga ai, rai lu ai. Dai makau e tsap nga ai ni nkau mi gaw dai hpe na la jang, Shi Elia hpe sha¬ga nga ai, nga ma ai. Shaloi jang shanhte hta na marai langai mi gat sa nna, hka kamu la nhtawm, kumba yan hta shakap nhtawm, lu na matu shi hpe jaw wu ai. Kaga ni mahtang gaw, Naw la u ga: Elia shi hpe sa hkye la na kun, anhte yu yu ga, nga ma ai. Bai Yesu gaw nsen kaba hte bai jahtau wu ai hpang, shi a wenyi hpe jahti kau wu ai. (Ya, yawng hput di let, jahkring mi myit sumru yu ra ai.) Shaloi nawku htingnu na nba grang, ntsa de nna hkren, ka-ang brang ga mat wa ai. Ginding aga mung ashun awam wa nna, lunghkrung ni ga mat wa ai; lup ni mung hpaw mahka wa nna, Chyoi pra ai ni a hkum tsawp law law wa rawt wa nga ma ai. Yesu bai hkrung rawt ai hpang, shanhte lup ni hta na pru wa nhtawm, dai chyoi pra ai mare de shang wa nna, masha law law hpe tinang nang a hkum madun dan ma ai. Hpyen latsa up ai du hte, shi hte rau Yesu hpe sin nga ai ni gaw, dai nnang nawn hte byin mabyin hpe mu jang, shanhte hkrit kahpra nna, kaja wa, ndai wa gaw Karai Kasang a Kasha nan rai nga ai, nga nna tsun ma ai.

Ya hti ai gaw Madu a Kabu Gara Shiga rai nga ai.

2020:LUSHA GAM LADAW LABAN (5) NA MUNGGA

Asak hkrung nga ai aprat, nni nkri hta, si ai hta, Yesu a bai hkrung rawt ai hta, nang/ ngai hpe shaga ai Karai Kasang a tsawra myit hpe mu la ga ai; dai gaw, Hkristu hte rau htani htana asak hpe hkam la lu na lam re. Lazaru hpe jahkrung sharawt dat ai lam gaw si-du hpe dang kau lu na Hkristu a atsam hpe madun dan ai, si chye si masha amyu ting hpe myit mada lam jaw ya ai kumla rai nga ai.

“Hkraw hkun ai nrut nra” Babylon e bawng amyu masha tai mat ai Karai a amyu masha, chyasi hte hpa n shai, myit mada shara n nga sai hta, dai nra sumpum a ntsa e nsa wenyi kawut ya ai shaloi, bai hkrung rawt shajang ai lam Ezekiel myihtoi htoi ai. Masha e n byin mai sai lam, Karai a amyu tinang a buga mundan de bai htang wa nga lu na lam hpe tsun ai. Wenyi hta asak hkrung na lam tsun ai re.

Yawhan gaw ndai Kabu Gara Shi-ga daw hpe Yesu Shi nni nkri hte si hkam nna bai hkrung rawt ai lam a matu Yerusalem de sa maw ai; dai aten na mabyin hku ka da ai (“Dai aten kaw na shanhte gaw Shi hpe sat kau na masing gran dat ma nu ai…” (11:53). Yesu tsun ai, “Ngai gaw bai hkrung rawt ai lam hte asak rai nga ai”ngu ai hta, Shi gaw bai hkrung na matu si ra ai, si ai hpang sha si-du hpe padang dip kau nna hkrung rawt dan na rai nga ai. Shaloi, Shi tsun ai, “Wa gaw si ai masha ni hpe jahkrung sharawt nna shanhte hpe asak jaw ai zawn, dai Kasha mung, Shi lata la ai ni kadai hpe mung asak jaw lu ai (5:21), ngu ai ga teng wa na rai nga ai.

Sharin la mai ai lam ni: Martha hte kanau Maria gaw Yesu du sa na hpe katu ai myit hte la nga ma ai…

“Madu e, Nang tsawra ai Lazaru grai machyi taw nga ai”: tsawra hku hkau ai majaw teng sha sa wa na myit mada let a’la nga ma ai. Yesu gaw tsan e she re; shi hpe tau la na mawdaw/ cycle n lu; phone hte shana atet shatsang na mung n mai; lawan n sa wa ai majaw Lazaru a matu grau grau tsang wa ma ai. Yesu gaw shi-ga na la ai hpang dai yang e lahkawng ya naw matut nga ai. Dai hpang Yerusalem de sa ai. Martha yan Maria a matu lani mi lai ai gaw laning mi na ai zawn nga hkam sha na ma ai. Jahtum e la gawm kau ma ai; Lazaru mung si mat ai. Si mat nna lup kau ai hpang mali ya, ngu na shani e sha Yesu du sa ai.

Martha gaw loi sha mi mara shagun ai nsen hte, “Madu e, nang aten dep an nau ni hte nga nga ai rai yang, Lazaru n si mat na wa”, ngu a’ ngun dan ai; rai tim, Yesu lama ma sha Jgaw naw galaw ya lu na hpe kam ai. Dai majaw, “Ya rai tim Nang Karai Kasang kaw na akyu hpyi ya ai rai yang, Karai e madat ya na ra ai”, ngu nna shi a makam hpe shapraw dan ai. Lup kau sai masha hpe bai jahkrung sharawt ya na hpe gaw mahkoi n myit mada sai n hten. Dai majaw Yesu tsun ai ga, “Lazaru bai hkrung rawt na ra ai” ngu ai shaloi Martha htan tsun ai ga, “Hpang jahtum na nhtoi hta…”.

Shaloi jang Yesu htan ai, “Ngai gaw bai hkrung rawt ai lam… ngai hpe kam sham ai wa n si lu na…” nga ai. Matut tsun ai hta, “Nang kam sham nit ni?” nga ai. Shaloi she Martha gaw, “Ngai kam se ai; nang gaw Karai a Kasha, mungkan hpe hkye la na Messiah Hkye La Madu”, ngu ai hpe chye na kamsham ni ai, ngu, htan ya ai.

Wenyi asak hkrun lam, Karai Kasang hte matut mahkai ai, makam masham asak hkrun lam a mungsung ni hpe gau-ngwi ngwi rai nna sha chye madat lu ga ai. Prat a mahkrum madup ni, tinang hkrum katut ai prat na mabyin ni hta kalang ta mahtai tup hkra n lu la mai ai. Karai a mungsung ni hpe tinang hkum nan myit sumru akyu hpyi dinglik yu let sha mahtai kaja lu la mai ai. Anhte malawng maga ya hpyi ya lu, ya jang mahtai ra mayu re ai majaw, mungsung a lachyum hpe tup chye na hkap la hkam sha na myit n galu chye ga ai; myit galu ai hte a’ la na n kam, byin chye ga ai.

Marhta zawn, mahkrum madup tsang hte tsang, tsawra kamhpa ai, akyu hpyi ai, myit mada ai, hkam sharang ai, chyeju hkam la mayu ai myit katu ai, ningsin chyip nga ai, myit mada shara htum sai, ngu na daram_ tsang hte tsang, jahtum e sha “Madu e, nang galaw ya ai rai yang hpa mung byin lu ai; hpa kaning she ngu ai hpe mung hkap la ai; nang Madu a lata hta ap ya ni ai,…” ngu nna tup hkrak kamhpa nawng da ai gaw kaja htum re ai lam sharin la lu ai.

Hkum shan hte sha a nga nga dingsa, anhte gaw hkum shan a matu sha grau myit dum, akyu hpyi chye na ga ai. Roma Laika hta San Pawlu sharin ya ai lam hta, ndai hkum shan hta lai jan nna wenyi asak hkrun lam de madang sharawt dat lu yang sha, grau kaja ai chyeju kumhpa, n si lu ai asak, lu la mai ai lam shadum ya ai. Chyum mungga masum hte gaw Karai a nsa wenyi, Hkristu a wenyi n rawng ai wa hta asak n rawng lu ai lam shadum ya ai. Dai Hkristu a wenyi hte jawm pawng nga jang sha n si lu ai asak lu la na lam sharin ya ai.

Myit sumru mai ai lam:

- “Ngai gaw hkrung rawt ai lam hte asak rai nga ai…” ngu ai ga na la ai hpang, ga dai hpe kade manu shadan lu ai kun? Kaga hkum shan akyu ara ni hpe mahtang grau manu shadan ga ai kun?

- Nang/ ngai, makam masham hkrun lam hta, hpyi ai chyeju n lu ai zawn nga hkam sha ai aten hta, myit malai yak dum ai shut hpyit mara, akyang alai hpe jahka kau na yak dum ai aten hta, myit daw nga ai aten hta, dz.dz., lup kata kaw rawng nan taw ai Lazaru zawn nga nga na kun?

- Lazaru hpe Yesu tsun ai, “Rawt pru su!..” Yesu a ga gaw Ezekiel a myihtoi ga hta grau na sha rai nga ai. Prat ningnang gawgap matut hkawm na saw shaga ai. Madat ya na kun? 

2020:LUSHA GAM LADAW LABAN (5) NA CHYUM LAIKA

LUSHA GAM AI LADAW LABAN (5)

March 29, 2020

Chyum Mungga Daw (1)

Ezekela 37:12-14

Ya hti na gaw myihtoi Ezekela a laika langai hta na rai nga ai. 

Madu Karai Kasang ning nga ai: nye a amyu e, nanhte a lup ni hpe ngai hpaw nna, nanhte hpe sharawt la nhtawm, Israela a mung de nhtang woi wa na nngai. Shing rai, nye a amyu e, nanhte a lup ni hpe ngai hpaw nna, nanhte hpe sharawt la ai shaloi e, ngai gaw Madu Karai Kasang rai nga ai hpe nanhte chye lu na marin dai.14 Nye a Wenyi hpe nanhte a kraw lawang hta ngai bang ya nna, nanhte asak hkrung nga na myit dai: nanhte a mungdan hta ngai nanhte hpe tawn da nna, ngai Madu nan ndai ga tsun da ai hte shatup nga ai hpe nanhte chye lu na marin dai, nga nna Madu tsun nga ai. 

Ya hti ai gaw Karai Kasang a mungga rai nga ai. 

Chyum Mungga Daw (2)

Roma 8:8-11

Ya hti na gaw Roma masha ni hpang de San Pawlu shagun dat ai laika hta na rai nga ai. 

Tsaw ra ai hpu nau ni e, Hkum shan myit hkan nang ai ni gaw, Karai Kasang awng sharawng ai ni tai lu ma ai. Nanhte gaw hkum shan myit n hkan nang myit dai: Karai Kasang a Wenyi nanhte hta e rawng nga ai majaw, Wenyi ra sharawng ai lam hkan nang nga myit dai. Ma¬sha langai ngai hta Hkristu a Wenyi n rawng yang, dai wa gaw Hkris¬tu hte n seng nga ai. Hkristu gaw nanhte hta e nga nga yang, hkum hkrang gaw shut hpyit mara a majaw si nga timung, wenyi mahtang ding hpring wa lu ai majaw, a hkrung nga ai. Dai hta kaga si mat ai ni kaw na Yesu hpe hkrung sharawt la ai wa a Wenyi gaw, nanhte hta e rawng nga yang gaw, si mat ai ni kaw na Yesu hpe hkrung sharawt la ai wa gaw, nanhte hta e rawng nga ai shi a Wenyi a lata hte, nanhte a si chye ai hkum hkrang ni hpe mung, asak nnan hte jahkrung ya na marin dai. 

Ya hti ai gaw Karai Kasang a mungga rai nga ai. 

KABU GARA SHIGA

Yawhan 11:3-7, 17, 20-30, 33-45 

Ya hti na gaw Yawhan a laika hta na Kabu Gara Shiga rai nga ai. 

Behtani kahtawng na Lazaru ngu ai wa langai mi machyi nga ai. Lazaru a kanau Marhta yan Maria gaw Yesu hpang de masha shan¬gun dat nna, Madu e, nang tsaw ra ai wa gaw machyi nga ai, ngu nna tsun dan mu ai.4 Yesu gaw dai ga na jang, dai machyi ai gaw si hkra machyi ai baw n rai; Karai Kasang shagrau sha-a hkrum u ga Karai Kasang a hpung shingkang matu byi nga ai, ngu nna tsun wu ai. Yesu chyawm gaw Marhta hpe mung, shi a kanau Maria hte shan a kayung Lazaru hpe mung grai tsaw ra wu ai. Rai timung, Lazaru machyi nga ai lam na jang, Yesu gaw shi nga ai shara e lahkawng ya naw hkring nga ai. Dai hpang shi gaw, anhte Yuda mung de bai sa saga, ngu nna sape ni hpe tsun mu ai. Shing rai shi Behtani kahtawng de du yang, Lazaru gaw lup hta rawng ai mali ya rai sai hpe shi na la wu ai. 

Yesu du ra ai hpe Marhta na jang, shi hpe sa tau la na matu sa wa ai; Maria chyawm gaw nta e naw dung nga ai. Shaloi Marhta gaw, Madu e, nang ndai kaw e nga ndai rai taw gaw, ngai yung n si na re ai.  Ya rai timung, Karai Kasang kaw nang hpyi ai lam hpa rai timung, shi nang hpe jaw na ra ai, ngai chye nngai, ngu wu ai. Shaloi Yesu gaw, N-yung wa bai rawt na ra ai, ngu wu ai. Marhta gaw, Hpang jahtum na nhtoi e bai hkrung rawt ai hta, shi mung bai rawt na ra ai hpe ngai chye nngai, ngu wu ai. Bai Yesu gaw, ngai gaw bai hkrung rawt ai hte asak hkrung ai lam rai nga nngai: ngai hpe kam sham ai wa kadai mung, si ai galoi mung n hkrum na ra ai, Ga ndai hpe nang kam sham n ni? ngu nna shi hpe tsun wu ai. Shaloi Marhta gaw, rai sa, Madu e, nang gaw mungkan ga de du sa sai, Hkristu ngu ai Karai Kasang a Ka-sha rai nga ndai hpe ngai kam sham nga nngai, ngu nna shi hpe htan wu ai. Shing nga nhtawm, shi a kanau Maria hpe lagyim shana nna, sara nang de nga nga nna, nang hpe shaga nga ai, ngu wu ai. Maria gaw dai ga na jang, alawan rawt nna Yesu hpang de sa wa ai. 

Maria gaw hkrap nga ai hpe mung, shi kaw hkan nang ai Yuda masha ni hkrap ngu hkap ngoi ma ai hpe mung, Yesu mu yang, shi yawn madai ai hte myit law ai rai nna, shi hpe kanang lup da myit ta? ngu nna san wu ai. Shan nau gaw, Madu e, sa yu rit, ngu nna htan mu ai. Yesu mung myi prwi pru nga ai. Dai majaw Yuda masha ni gaw, yu mu, shi gaw dai wa hpe gade tsaw ra nga a hka! Nga ma ai. Bai nkau mi gaw, myi n mu ai wa hpe myi hpaw ya lu ai ndai wa gaw, Laza¬ru n si u ga, shi hpa n chye di sai i? nga ma ai. Dai majaw, Yesu gaw shi a myit masin hta e yawn madai ai hte dai lup de sa du ai: dai lup gaw lungpu hku rai nga ai rai nna, nlung kaba hte pat da nga ai. Yesu gaw, nlung dai hpe galau kau mu, ngu wu ai. Shaloi si ai wa a kajan Marhta gaw, Madu e, ya gaw manam na sai; shi si ai mali ya rai sai, ngu nna tsun wu ai. 

Yesu gaw, nang kam sham yang gaw, Karai Kasang a hpung shingkang hpe mu lu na ra ai. Dai rai nna nlung dai hpe galau kau ma ai. Shaloi Yesu gaw lamu de mada yu nna, Wa e, nang nye a ga madat ya ndai majaw, ngai nang hpe chyeju dum shakawn nngai. Nang nye a ga hpe galoi mung madat ya nga ndai hpe ngai chye nngai; rai timung, nang ngai hpe shangun dat ndai hpe, ndai grup yin nga ai masha ni kam sham lu mu ga, ngai ning nga tsun nngai, nga ai. Shing nga tsun ngut jang, Yesu gaw, Lazaru e, pru wa rit law, nga nna nsen kaba hte jahtau dat wu ai. Shaloi si mat wa sai wa gaw, shi a lagaw lata hta sumpan yan ahkyen nna, myiman e mung hpajet kayawp ai hte pru wa ai. Yesu gaw, shi hpe raw nna dat dat mu, ngu nna shanhte hpe tsun mu ai.  Dai re ai majaw, Maria hpe sa shalan ai Yuda masha law law wa, Yesu galaw ai amu hpe mu jang, shi hpe kam sham ma ai.

Ya hti ai gaw Madu a Kabu Gara Shiga rai nga ai. 

2020:LUSHA GAM LADAW LABAN (4) NA MUNGGA

Kashin Kamun a marang e, anhte gaw ningsin kaw nna shalawt dat hkrum ai majaw, Hkrung Rawt ai Hkristu hta htoi tu ai asak aprat hpe gawgap hkawm sa lu na, ngu ai gaw ndai Laban bat na mungga madung rai nga ai. 

Hkye La Madu hte asak a chyeju kumhpa ni hpe hkap la lu na matu, makam masham ninghtoi lu la na ahkyak madung rai nga ai. Makam masham lu ai rai yang sha, ndai dinghta ga e byin nga ai machyi makaw, matsan mayan, si wa lu ai lam, bai hkrung rawt lu na lam, dinghta ga na hpaji hku mahtai n jaw lu ai baw hpan ni hpe makam masham hta yawng hpe hkap la lu na rai nga ai. Yesu hkam la ai nni nkri, si hkam ai lam, bai hkrung rawt ai lam, ndai mabyin, Paska mungsung hta asak hkrung lu ai lam, dai gaw, Hkristan makam masham a htingdun (foundation) rai nga ai. Kashin Kamun hkam la ai shaloi, anhte gaw ninghtoi hpe lu la ai hta n-ga, shut hpyit mara a ning¬sin hkyuk htawng kaw na shalawt dat hkrum ga ai (Ehpe. 5:8). Tinang hkum nan mung ninghtoi tai wa ai. Kashin Kamun sau chya hkrum ai ni gaw ninghtoi a kasha ni tai na matu, shaga la hkrum ai ni tai wa ma ai (I Sam. 16:13); myi-kyaw ai shadang sha a myi hpe Yesu achya ya ai; anhte mung chya ya hkrum nna ninghtoi mu lu ga ai. Ninghtoi a ka¬sha ni teng ai rai yang, ninghtoi gaw mai kaja ai baw hpan shagu, tara rap-ra lam, tengman ai lam, dz., apu asi ni si jaw lu na, nga, San Pawlu shadum ai (Ehp 5:9). 

Kabu Gara Shi-ga kaw na shadang sha gaw (lai sai bat, Samari¬tan numjan zawn) Yesu kadai re, ngu ai hpe gau-ngwi ngwi rai nna she chye wa ai: shawng e gaw “masha langai mi”, hpang e, “myihtoi”, ngu; jahtum e “Madu” ngu nna chye la ai hte dingnyawm dagup nawku wu ai. Makam masham asak gaw hkrun lam re; chyipmak, nga, hkam sha ai aten, ung ang ai aten, chyam dinglik hkrum ai aten, myit rawt ai aten, lamik kumla mu lu ai zawn nga awng padang chyeju lu la ai aten, rawt lung yu yawm hkrat yu rai na re. Kadai hta mung maren rai nan nga lu ai n rai. Mahkrum madup ni kaw na rawt jat galu kaba wa ra ai. Asak hkrun lam hta mabyin ni kaw na maram hkaja let, Karai Kasang hpe tam let sha, rawt jat ngang kang wa lu ai. Akyu n hpyi ai sha, Madu Yesu hte n hkrum matut ai sha, makam masham asak hkrun lam greng ja wa lu na n byin mai ai. 

Sumru mai ai lam: 

- Myi kaja ninglen, mu la ang ai baw ni hpe n mu kau ai, n matang kau ai, masha ni hta mai kaja ai lam ni hpe n hkap la lu ai, jaw ai lam hpe ningdang nyet kau ai, dz. dz., hpa hpa nga ai kun? 

- Hkrit ai majaw, kaya ai majaw, jaw ai/ teng ai lam n tsun gwi ai, sakse n hkam ya gwi ai majaw, jaw ai/ teng ai maga na wa hpe gara hku machyi hkrum shangun sai kun? 

- Tara/ rit-kawp tara ni hpe atik anang shaja nna tsawra matsan dum ai amu hpe gara hku shayawm shagrit kau ya lai wa sai kun?

2020:LUSHA GAM LADAW LABAN (4) NA CHYUM LAIKA

LUSHA GAM AI LADAW LABAN (4)

March 22, 2020 

Chyum Mungga Daw (1)

1 Samuela 16:1, 6-7, 10-13

Ya hti na gaw Samuela a laika langai hta na rai nga ai. 

Madu gaw Samuela hpe tsun ai gaw: Na a ndum hta sau bang jahpring nna, sa wa su; nye a hkawhkam tai na matu, Betlehem masha Yese a kasha ni hta na ngai langai mi hpe san da sai majaw, shi hpang de ngai nang hpe shangun dat nngai, ngu wu ai. Samuela mung, Madu tsun ai hte maren galaw nna, Betlehem mare de sa du ai. Yese hte shi a kasha ni hpe, hkungga jaw ai poi de shi shaga mu ai. Ya shanhte du jang, Samuela gaw Eliaya hpe hkap yu nna, gaja wa, Madu e sau chya ya hkam na wa gaw, shi a man e tsap nga ai, nga nna myit lu ai. Madu chyawm gaw, shi a myiman hte shi a hkum shingyan hpe hkum yu et; ngai shi hpe n la we ai, masha yu yu ai hte maren Karai Kasang yu yu ai n rai; masha gaw ahpraw nsam sha yu chye nga ai; Karai Kasang chyawm gaw, myit masin she yu nga ai, ngu nna Samuela hpe tsun wu ai. 

Shing rai Yese gaw shi a kasha sanit, langai hpang langai hpe, Samuela a man de tsap pru shangun timung, Samuela gaw, ndai ni hpe Madu n la wu ai, ngu wu ai.11 Bai Samuela gaw, na nsha ni ndai hte sha rai ni? ngu nna Yese hpe san wu yang shi gaw, hpungdim shadoi langai mi gaw naw nga ai; shi gaw sagu rem nga ai, ngu nna tsun dan wu ai. Shaloi Samuela gaw, shi hpe shaga la na shangun dat u; shi garai n du yang, poi de shang dung na ga ai n rai, ngu nna Yese hpe tsun wu ai. Shing rai, dai kasha hpungdim hpe shaga la ma ai. Shi gaw myiman hkyeng nna, ahpraw tsawm ai shabrang wa hte hkum hkrang hking ai wa rai nga ai. Madu gaw, ndai wa re ai; rawt nna shi hpe sau chya ya u, ngu wu ai.  Samuela mung, shi a sau ndum la nna, shi hpe sau chya ya wu ai: dai shani kaw nna Madu a wenyi gaw Dawi a ntsa e dung nga ai. 

Ya hti ai gaw Karai Kasang a mungga rai nga ai. 

Chyum Mungga Daw (2)

Ehpesu 5:8-14 

Ya hti na gaw Ehpesu masha ni hpang de San Pawlu shagun dat ai laika hta na rai nga ai. 

Hpu nau ni e, nanhte shawng e nsin rai nga myit dai; ya gaw Madu hta nhtoi rai nga myit dai. Dai rai nna, nhtoi a kashu kasha ni zawn hkawm nga mu; kaning rai nme law, nhtoi hta hkawm ai ni gaw, mai kaja ai, ding hpring ai hte teng man ai lam hkrai hkan galaw nga ma ai. Madu ra sharawng ai lam hpa rai nga ai hpe hkrak sagawn yu nna, nsin hte seng ai, kaman lila re ai amu ni hpe n hkan galaw ai sha n-ga, dai amu ni gade wa n hkru a kaja rai nga ai hpe shadan dan mu. Kaning rai nme law, masha ni mayun mayaw e galaw ai lam ni gaw, ga hte tsun na pyi kaya kahpa lam rai nga ai. Rai timung, nhtoi hte shadan dan ai yawng hte gaw, dan dan leng leng mu lu ai rai nna, dan dan leng leng mu lu ai baw nhtoi tai nga lu ai. Dai majaw, “Yup pyaw ai wa e, rawt u; si ai kaw na bai rawt wa nu: shaloi Hkristu nang hpe jahtoi na ra ai,” nga nna tsun ai. 

Ya hti ai gaw Karai Kasang a mungga rai nga ai. 

KABU GARA SHIGA

Yawhan 9:1, 6-9, 13-17, 34-38 

Ya hti na gaw Yawhan a laika hta na Kabu Gara Shiga rai nga ai. 

Lani mi hta Yesu hkawm sa wa nga yang, hkritung kaw nna myi kyaw ai wa langai mi hpe mu wu ai. Yesu gaw ga hta mayen prat bang nna, hkumpup galaw la nhtawm, dai wa a myi hta chya ya nna, Silum hka lawng hta sa kashin su, ngu nna shi hpe tsun dat wu ai: dai hte maren myi kyaw ai wa sa kashin nna, myi mu lu ai hte bai wa ai: (Silum ngu ai a ga lachyum, shangun dat ai, ngu ai rai.) Dai rai nna, shi a htingbu ni hte, shawng e shi hpyi sha ai shaloi mu yu ai ni gaw, ndai wa gaw nang e dung nga nna, hpyi sha ai wa n rai ni? nga ma ai. Nkau mi gaw, dai wa nan rai ai nga ma ai. Bai kaga nkau mi gaw dai wa n rai shi hte bung ai wa rai nga ai, nga ma ai. Dai wa chyawm gaw, ngai nan dai wa rai nga nngai, ngu nna tsun wu ai.

Dai rai nna shanhte gaw, shawng de myi n mu ai wa hpe Hparishe ni hpang de woi sa mu ai. Yesu hkumpup galaw la nna dai wa myi hpaw ya ai shani Laban nhtoi rai nga ai majaw, Hparishe ni gaw dai wa hpe, shi a myi kaning rai mu lu ai lam san ma ai. Dai wa gaw, Yesu ngu ai wa nye a myi hta hkumpup chya ya nna, ngai kashin kau jang mu wa ni ai, ngu nna shanhte hpe htan mu ai. Shaloi Hparishe nkau mi gaw dai Yesu gaw Laban nhtoi hpe tawt lai ai majaw, Karai Kasang kaw na du sa ai wa nrai, nga ma ai. Bai, nkau mi gaw, mara lu ai masha gaw, ning re ai lamik kumla kaning rai galaw lu na a ta? nga ma ai. Shing nga na myit nhkrum ma ai. Dai rai nna, shanhte gaw myi n mu ai wa hpe, na myi shi hpaw ya ai majaw, shi a lam nang kaning ngu da a ta? ngu nna bai tsan yang, shi gaw, dai wa gaw myihtoi rai nga ai, ngu nna bai htan wu ai.

Shaloi shanhte gaw, nang wa mi anhte hpe sharin ya nni? Nang gaw shangai wa kaw na shut hpyit mara hte hpring chyat nga ndai, ngu nna jawm htan nhtawm, dai wa hpe kanawng shapraw kau mu ai. Dai wa hpe shapraw kau ai lam Yesu na wu ai rai nna, shi hpe mu tam jang, Masha Kasha hpe nang kam sham nni? ngu nna san wu ai. Dai wa gaw, Madu e, dai Masha Kasha hpe ngai kam sham lu na matu, shi kadai re ai ngai hpe tsun dan rit ngu wu ai. Yesu gaw, dai Masha Ka¬sha hpe nang mu yu nit dai hta n-ga, ya nang hpe shaga ai gaw dai wa nan rai nga ai, ngu nna shi hpe htan wu ai. Shaloi dai wa gaw, Madu e, ngai kam sham nga nngai, ngu nna Yesu hpe nawku wu ai. 

Ya hti ai gaw Madu a Kabu Gara Shiga rai nga ai. 

2020:LUSHA GAM LADAW LABAN (3) NA MUNGGA

Ga-shagawp 28:13 hta ning nga da ai, “Na a mara hpe makoi magap da ai rai yang na prat hta awng dang ai lam galoi n lu mai na; mara hpe yin la nna jahka kau ai rai yang, Karai Kasang gaw matsan dum myit madun dan na”, nga ai. 

Yesu_ Samaritan numjan_ Hka-htung: 

Dai hkrum shaga hkat ai gaw, dai numjan hpe shi a kraw kata, sung dik ai shara hta makoi da, yip da ai lam hpe htawk shapraw dan lu hkra garum ya ai. Jahtum e dai numjan gaw mara hpe yin la nna prat ningnan hpe gawgap sa wa lu ai. 

Sararitan numjan gaw gawng kya ai masha yawng a gawng malai rai nga ai. Masha hkum shagu gaw tinang a shut hpyit mara hpe byin mai ai daram yip da magap da chye ai. Shut hpyit mara, ngu ai gaw ningsin bungli, makoi magap da mayu ai gaw mau-hpa n rai nga ai. Yesu gaw, shut hpyit mara hta lup nan taw nga ai jan hpe grai si mani ai hku hku tsun shaga ai. Amyu n bung, Jew hte Samaritan amyu lah¬kawng gaw galoi n hkau hkat mai ai; dai hta lai nna la hte num hkrai jahta hkat ai ngu ai gaw htung hking lailen hte mung nhtan shai ai rai nga ai. Yesu gaw mara kap ai jan hpe yu kaji ai ga, mara shagun ga, jey¬ang ai ga hpa n tsun ai. Madin shakum law law hpe hpya run kau nna, Samaritan numjan shi a mara hpe yin la lu hkra garum ya ai. 

Yesu gaw lu-hka hpyi ai kaw nna hpang ai; dai numjan gaw htung n nga ai, ngu ai hku htan ya ai; hka-htung mung sung la ai, nga ai. Kaja wa, masha a kraw kata kaw na hpang gara, ra shawng ai lam, hkam sha ai lam, myit maw ai lam ni sung la ai. Yesu hte tsun jahta hkat ai a marang e, Yesu gaw gau-ngwi rai dai numjan a sung la ai myit masin kraw lawang na lam ni hpe manaw shaw dan ai. Dai numjan, makoi magap n mai sai chye ai hta n ga, shi a shut hpyit mara ni hpe yin la ai. Dai gaw myit malai chyeju, hkye hkrang la ai chyeju hpe hkam la lu na hkinjang tai wa ai. 

Samaritan numjan gaw shi a kaya-hpa hpe dum chye ai shaloi kaya dum tim Yesu hpe hprawng shakram da ai lam n galaw ai; Shi mahtang Yesu kaw na asak jaw ai hka hpyi lu ra nu ai. Yesu kadai re ai lam chye la nu ai: shawng e gaw Jew masha re, ngu; dai hpang myihtoi she rai nga ai, ngu; jahtum e, Hkye La Madu Messiah she rai a hka, ngu nna chye na hkap la wa lu ai. 

Dai numjan gaw Messiah hpe hkrum katut ai lam, kabu gara ai myit hte mare de htang wa nna mare masha ni hpe tsun dan, sakse hkam dan ai. Shut hpyit mara hta lup nan lai wa ai dai numjan gaw Kabu Gara-shiga hkap la nna, kaga masha ni hpe bai htawn tsun dan sakse hkam dan lu ai shawng shawng na kamsham ai masha mung tai wa ai. 

Yawhan 4:14 hta tsun ai, “Ngai jaw ai hka hpe ja lu ai wa hta, dai wa a kraw kata hta hka-hpawk prut pru wa nna htani htana asak de du lu hkra kanawng sharawt na ra ai”. 

Ndai lu-sha jahkran ai ladaw hta akyu hpyi ai, lu-sha jahkran ai, pyaw poi ni hpe jahkran ai, gumhpraw jai lang sharam nna mahkawng da lu ai hpe matsan dum a mu hta jai lang na alu sak jaw ai, ndai zawn re ai amu ni galaw shakut ai gaw asak hka-hpawk prut pru ai shangun ai lam tai na rai nga ai. Asak a chyeju kumhpa ni hpe tinang shawng hkam la nna masha ni hpe gam garan ya lu na rai nga ai. 

San Paulu shadum ai hta, shut hpyit mara a majaw myit daw shara n nga ai lam, Kashin Kamun a marang e anhte gaw asak a hka-hpawk kaw na chyeju ni hpe ja lu na ahkaw ahkang lu ga ai majaw, Chyoi Pra Wenyi a kumhpa tut e hkam la lu ai lam tsun da ai. 

Sumru yu mai ai lam ni: 

- Sung dik ai tinang a kraw kata na wenyi a ana ahkya ni hpe chye lu hkra shakut mai ai; dum chye jang mara yin la nna myit malai shad¬ing sharai lu na matu, Madu Yesu hpang sit sa ra na rai nga ai. Akyu hpyi ai gaw dai nan rai sai. 

- Yesu zawn, amyu makam sham, lu su madang, kaning re ai n bung ai baw hpan masha ni hpe mung, hkap la kanawn mazum tsun jahta hkat na shajin da lu na kun? 

- Tinang hkrai chyoi pra dum nga na kun? Lu da ai dinghpring lam, makam masham kumhpa, lu da ai sutgan, chyeju kumhpa ni prut kaprawk nga ai rai yang, teng sha n gam garan ai nga lu na n rai. 

2020:LUSHA GAM LADAW LABAN (3) NA CHYUM LAIKA

LUSHA GAM AI LADAW LABAN (3)

March 15, 2020

Chyum Mungga Daw (1)

Pru mat wa ai laika 17:3-7

Ya hti na gaw Pru Mat Wa ai laika hta na rai nga ai. 

Israela a shawa hpung ting, Egutu mung de nna pru mat wa ai hpang, Re-hpi-dim e but nga ma ai; dai kaw e amyu masha ni hpang gara nna, Mawshe hpe aput let tsun mu ai gaw, anhte hte anhte a kashu kasha ni mung, anhte a yam nga ni mung, hpang gara ai hte si na matu, Egutu mung de na anhte hpe woi wa sa ni? ngu mu ai. Shaloi Mawshe gaw Madu hpe hpyi nem let, ndai amyu hpe ngai kaning di woi awn lu na rai ta? Ngai hpe nlung hte kabai sat kau na maw nga ma ai, ngu mu ai. Dai rai nna Madu gaw Mawshe hpe, Israela a agyi salang nkau mi hpe woi nna, dai amyu masha ni a shawng e sa wa su; dai hka nu hpe kayat ai dawhkrawng lang let sa wa su. Horeb bum na lunghkrung ntsa hta ngai na a man e tsap nga na ring ngai. Dai nlung hpe nang kayat na wu ai rai nna, amyu masha ni lu na matu, dai hta na hka lwi pru na ra ai ngu nna Madu tsun wu ai. Mawshe mung Israela a agyi salang ni a man e shing di galaw wu ai. Dai shara kaw e, Israela amyu masha ni gaw, Madu anhte hte rau nga nga ai kun, n nga nga ai kun, nga nna Madu hpe chyam dinglik yu ai majaw mung, Mawshe hpe aput nna ndang kalang hkat ai lam a majaw mung, shara dai hpe, Massah hte Moriba ngu ai amying lahkawng hte shamying ya mu ai. 

Ya hti ai gaw Karai Kasang a mungga rai nga ai. 

Chyum Mungga Daw (2)

Roma 5:1-2, 5-8 

Ya hti na gaw Roma masha ni hpang de San Pawlu shagun dat ai laika hta na rai nga ai. 

Hpu nau ni e, anhte a Madu Yesu Hkristu a marang e, kam sham ai hte ding hpring wa lu sa ga ai majaw, Karai Kasang hte hku hkau nga ga ai. Yesu Madu a marang e, anhte kam sham ai hte chyeju ningsang a prat hta shang lu sa ga ai; shing rai, Karai Kasang a hpung shingkang hpe myit mada nga ga ai majaw, nachying kabu sharawng awng nga ga ai. Dai myit mada ai gaw kaman lila n rai nga ai; kaning rai nme nga yang, anhte hpe jaw ya sai Chyoi pra ai Wenyi gaw, Karai Kasang a tsaw ra ai myit, anhte a masin salum hta e ru bang ya mani ai. Anhte hpa n byin lu ai shaloi, Karai Kasang lajang da ai aten hta, Hkristu gaw shut hpyit ai masha ni a matu si hkam sai. Gaja wa, ding hpring ai masha a matu si hkam na, ai n kam nga ga ai; mai kaja ai masha a matu, chyawm gaw, si hkam gwi na masha langai ngai nga nhten; rai timung, anhte mara kap nga ninglen, Hkristu anhte a matu si hkam ya ai gaw, Karai Kasang anhte hpe tsaw ra nga ai lam a sakse rai nga ai. 

Ya hti ai gaw Karai Kasang a mungga rai nga ai. 

KABU GARA SHIGA

Yawhan 4:5-15, 19-26, 39-42

Ya hti na gaw Yawhan a laika hta na Kabu Gara Shiga rai nga ai. 

Yesu gaw, Yaku e shi a kasha Yosep hpe jaw ai ga dachyawk makau na, Suhka nga ai, Samari mung na mare langai mi de du wu ai: dai yang e Yaku a hka htung nga nga ai.

Yesu gaw lam hkawm ba ai majaw, hka htung makau e dung nga ai. Dai aten gaw shani ka-ang ahkying shi lahkawng daram rai nga ai. Shaloi Samari numsha langai mi hka ja na pru sa ai. Yesu gaw, Ngai hpe hka jaw lu e, ngu nna shi hpe hpyi ai: shi a sape ni chyawm gaw shahpa mari na matu mare de sa mat ma ai. Dai Samari numsha gaw, Nang Yuda masha rai nga ndai; ngai Samari numsha hpe hpa majaw lu na hka hpyi n ta? ngu nna shi hpe tsun wu ai, kaning rai nme nga yang, Yuda hte Samari masha ni shada da n hku n hkau nga ma ai. Shaloi Yesu gaw, Karai Kasang a kumhpa hte, Ngai hpe hka jaw lu e nga nna nang kaw hpyi ai wa, kadai re hpe nang chye taw gaw, nang shi kaw hpyi nna, shi gaw nang hpe hkrung ai ntsin jaw na nit dai, ngu nna Yesu htan wu ai. Dai num¬sha mung, Madu e, Nang hka ja na rai hpa mung n lu ndai; hka htung mung sung nga ai; dai rai nna, dai hkrung ai ntsin hpe kanang na lu la n ta? Anhte a nji nwa Yaku gaw ndai hka htung anhte hpe jaw da mani ai rai nna, shi hkum nan hte shi a kashu kasha ni, shi a yam nga ni ndai hta na lu ma sai: nang gaw shi hta grau kaba n ni? ngu nna tsun wu ai. Shaloi Yesu gaw, ndai hka lu ai wa kadai mung, hpang bai gara na ra ai; ngai jaw ai hka lu ai wa chyawm gaw galoi mung hpang gara na n rai: dai ngai jaw ai hka gaw, htani htana asak lu na matu, dai wa hta e lwi pru ai hka hpawk tai na ra ai, ngu nna Yesu htan wu ai. Shaloi dai numsha gaw, ngai galoi mung hpang gara bai n hkrum na hte, nang de mung hka n sa ja ra u ga, hka dai ngai hpe jaw rit law. 

Nang gaw myihtoi rai nga ndai hpe ngai dum se ai: anhte a ji wa ni gaw ndai bum ntsa e nawku masai; nanhte Yuda masha ni chyawm gaw, Yerusalem mare e chyu sha Karai Kasang hpe nawku mai ai, nga nna tsun myit dai, ngu wu ai. Yesu gaw, numsha e, nye a ga hpe kam sham u: ndai bum e mung n rai; Yerusalem mare e mung n re ai, Wa hpe nawku na aten du na ra ai. Nanhte Samari masha ni taw tinang nchye na ai hpe nawku myit dai; anhte chyawm gaw tinang chye ai hpe nawku ga ai: kaning rai nme law, hkye hkrang la ai lam Yuda amyu hta na pru ra ai. Rai timung, ding man ai hku nawku ai ni gaw, wenyi hta mung, teng man ai hta mung, Wa hpe nawku na aten du wa ra ai rai nna, ya e pyi rai nga ai: Wa gaw shing rai nawku ai ni hpe tam nga ai. Karai Kasang gaw wenyi rai nga ai: shi hpe nawku ai ni gaw wenyi hta mung, teng man ai hta mung, nawku lu na rai nga ai ngu nna shi hpe tsun wu ai. Dai numsha gaw, Hkristu ngu ai Karai Kasang san da ai wa du na ra ai hpe ngai chye nngai; dai wa du jang, shi anhte hpe lam magup tsun madun na ra ai, ngu wu ai. Shaloi Yesu gaw, nang hte ga tsun nga ai, ngai gaw dai wa nan rai nga ai, ngu nna shi hpe tsun wu ai.

Dai rai nna dai numsha gaw, shi a ntsin di bu tawn kau da nna mare de bai wa nhtawm, mare masha ni hpe, ngai galaw ai lam yawng ngai hpe tsun dan ya ai wa hpe sa yu marit; dai wa gaw Hkristu rai na kun, ngu nna wa tsun mu ai. Dai mare na Samari masha law law wa, dai numsha sakse hkam ya ai ga a majaw, Yesu hpe kam sham ma ai. Dai rai nna Samari masha ni Yesu hpang de du jang, shanhte hte nga nga na hpyi ma ai majaw, dai yang e lahkawng ya shi hkring nga ai. Yesu nan tsun ai ga a majaw mung kam sham ai ni grau law jat wa ma ai. Dai ni gaw dai numsha hpe, ya gaw, na a ga majaw chyu sha kam sham ai n rai sa ga ai: anhte nan na lu nna, ndai wa gaw, mungkan ga a hkye hkrang la ai Madu teng teng rai nga ai hpe anhte chye saga ai, ngu mu ai. 

Ya hti ai gaw Madu a Kabu Gara Shiga rai nga ai.