2020:LUSHA GAM LADAW LABAN (4) NA MUNGGA

Kashin Kamun a marang e, anhte gaw ningsin kaw nna shalawt dat hkrum ai majaw, Hkrung Rawt ai Hkristu hta htoi tu ai asak aprat hpe gawgap hkawm sa lu na, ngu ai gaw ndai Laban bat na mungga madung rai nga ai. 

Hkye La Madu hte asak a chyeju kumhpa ni hpe hkap la lu na matu, makam masham ninghtoi lu la na ahkyak madung rai nga ai. Makam masham lu ai rai yang sha, ndai dinghta ga e byin nga ai machyi makaw, matsan mayan, si wa lu ai lam, bai hkrung rawt lu na lam, dinghta ga na hpaji hku mahtai n jaw lu ai baw hpan ni hpe makam masham hta yawng hpe hkap la lu na rai nga ai. Yesu hkam la ai nni nkri, si hkam ai lam, bai hkrung rawt ai lam, ndai mabyin, Paska mungsung hta asak hkrung lu ai lam, dai gaw, Hkristan makam masham a htingdun (foundation) rai nga ai. Kashin Kamun hkam la ai shaloi, anhte gaw ninghtoi hpe lu la ai hta n-ga, shut hpyit mara a ning¬sin hkyuk htawng kaw na shalawt dat hkrum ga ai (Ehpe. 5:8). Tinang hkum nan mung ninghtoi tai wa ai. Kashin Kamun sau chya hkrum ai ni gaw ninghtoi a kasha ni tai na matu, shaga la hkrum ai ni tai wa ma ai (I Sam. 16:13); myi-kyaw ai shadang sha a myi hpe Yesu achya ya ai; anhte mung chya ya hkrum nna ninghtoi mu lu ga ai. Ninghtoi a ka¬sha ni teng ai rai yang, ninghtoi gaw mai kaja ai baw hpan shagu, tara rap-ra lam, tengman ai lam, dz., apu asi ni si jaw lu na, nga, San Pawlu shadum ai (Ehp 5:9). 

Kabu Gara Shi-ga kaw na shadang sha gaw (lai sai bat, Samari¬tan numjan zawn) Yesu kadai re, ngu ai hpe gau-ngwi ngwi rai nna she chye wa ai: shawng e gaw “masha langai mi”, hpang e, “myihtoi”, ngu; jahtum e “Madu” ngu nna chye la ai hte dingnyawm dagup nawku wu ai. Makam masham asak gaw hkrun lam re; chyipmak, nga, hkam sha ai aten, ung ang ai aten, chyam dinglik hkrum ai aten, myit rawt ai aten, lamik kumla mu lu ai zawn nga awng padang chyeju lu la ai aten, rawt lung yu yawm hkrat yu rai na re. Kadai hta mung maren rai nan nga lu ai n rai. Mahkrum madup ni kaw na rawt jat galu kaba wa ra ai. Asak hkrun lam hta mabyin ni kaw na maram hkaja let, Karai Kasang hpe tam let sha, rawt jat ngang kang wa lu ai. Akyu n hpyi ai sha, Madu Yesu hte n hkrum matut ai sha, makam masham asak hkrun lam greng ja wa lu na n byin mai ai. 

Sumru mai ai lam: 

- Myi kaja ninglen, mu la ang ai baw ni hpe n mu kau ai, n matang kau ai, masha ni hta mai kaja ai lam ni hpe n hkap la lu ai, jaw ai lam hpe ningdang nyet kau ai, dz. dz., hpa hpa nga ai kun? 

- Hkrit ai majaw, kaya ai majaw, jaw ai/ teng ai lam n tsun gwi ai, sakse n hkam ya gwi ai majaw, jaw ai/ teng ai maga na wa hpe gara hku machyi hkrum shangun sai kun? 

- Tara/ rit-kawp tara ni hpe atik anang shaja nna tsawra matsan dum ai amu hpe gara hku shayawm shagrit kau ya lai wa sai kun?

2020:LUSHA GAM LADAW LABAN (4) NA CHYUM LAIKA

LUSHA GAM AI LADAW LABAN (4)

March 22, 2020 

Chyum Mungga Daw (1)

1 Samuela 16:1, 6-7, 10-13

Ya hti na gaw Samuela a laika langai hta na rai nga ai. 

Madu gaw Samuela hpe tsun ai gaw: Na a ndum hta sau bang jahpring nna, sa wa su; nye a hkawhkam tai na matu, Betlehem masha Yese a kasha ni hta na ngai langai mi hpe san da sai majaw, shi hpang de ngai nang hpe shangun dat nngai, ngu wu ai. Samuela mung, Madu tsun ai hte maren galaw nna, Betlehem mare de sa du ai. Yese hte shi a kasha ni hpe, hkungga jaw ai poi de shi shaga mu ai. Ya shanhte du jang, Samuela gaw Eliaya hpe hkap yu nna, gaja wa, Madu e sau chya ya hkam na wa gaw, shi a man e tsap nga ai, nga nna myit lu ai. Madu chyawm gaw, shi a myiman hte shi a hkum shingyan hpe hkum yu et; ngai shi hpe n la we ai, masha yu yu ai hte maren Karai Kasang yu yu ai n rai; masha gaw ahpraw nsam sha yu chye nga ai; Karai Kasang chyawm gaw, myit masin she yu nga ai, ngu nna Samuela hpe tsun wu ai. 

Shing rai Yese gaw shi a kasha sanit, langai hpang langai hpe, Samuela a man de tsap pru shangun timung, Samuela gaw, ndai ni hpe Madu n la wu ai, ngu wu ai.11 Bai Samuela gaw, na nsha ni ndai hte sha rai ni? ngu nna Yese hpe san wu yang shi gaw, hpungdim shadoi langai mi gaw naw nga ai; shi gaw sagu rem nga ai, ngu nna tsun dan wu ai. Shaloi Samuela gaw, shi hpe shaga la na shangun dat u; shi garai n du yang, poi de shang dung na ga ai n rai, ngu nna Yese hpe tsun wu ai. Shing rai, dai kasha hpungdim hpe shaga la ma ai. Shi gaw myiman hkyeng nna, ahpraw tsawm ai shabrang wa hte hkum hkrang hking ai wa rai nga ai. Madu gaw, ndai wa re ai; rawt nna shi hpe sau chya ya u, ngu wu ai.  Samuela mung, shi a sau ndum la nna, shi hpe sau chya ya wu ai: dai shani kaw nna Madu a wenyi gaw Dawi a ntsa e dung nga ai. 

Ya hti ai gaw Karai Kasang a mungga rai nga ai. 

Chyum Mungga Daw (2)

Ehpesu 5:8-14 

Ya hti na gaw Ehpesu masha ni hpang de San Pawlu shagun dat ai laika hta na rai nga ai. 

Hpu nau ni e, nanhte shawng e nsin rai nga myit dai; ya gaw Madu hta nhtoi rai nga myit dai. Dai rai nna, nhtoi a kashu kasha ni zawn hkawm nga mu; kaning rai nme law, nhtoi hta hkawm ai ni gaw, mai kaja ai, ding hpring ai hte teng man ai lam hkrai hkan galaw nga ma ai. Madu ra sharawng ai lam hpa rai nga ai hpe hkrak sagawn yu nna, nsin hte seng ai, kaman lila re ai amu ni hpe n hkan galaw ai sha n-ga, dai amu ni gade wa n hkru a kaja rai nga ai hpe shadan dan mu. Kaning rai nme law, masha ni mayun mayaw e galaw ai lam ni gaw, ga hte tsun na pyi kaya kahpa lam rai nga ai. Rai timung, nhtoi hte shadan dan ai yawng hte gaw, dan dan leng leng mu lu ai rai nna, dan dan leng leng mu lu ai baw nhtoi tai nga lu ai. Dai majaw, “Yup pyaw ai wa e, rawt u; si ai kaw na bai rawt wa nu: shaloi Hkristu nang hpe jahtoi na ra ai,” nga nna tsun ai. 

Ya hti ai gaw Karai Kasang a mungga rai nga ai. 

KABU GARA SHIGA

Yawhan 9:1, 6-9, 13-17, 34-38 

Ya hti na gaw Yawhan a laika hta na Kabu Gara Shiga rai nga ai. 

Lani mi hta Yesu hkawm sa wa nga yang, hkritung kaw nna myi kyaw ai wa langai mi hpe mu wu ai. Yesu gaw ga hta mayen prat bang nna, hkumpup galaw la nhtawm, dai wa a myi hta chya ya nna, Silum hka lawng hta sa kashin su, ngu nna shi hpe tsun dat wu ai: dai hte maren myi kyaw ai wa sa kashin nna, myi mu lu ai hte bai wa ai: (Silum ngu ai a ga lachyum, shangun dat ai, ngu ai rai.) Dai rai nna, shi a htingbu ni hte, shawng e shi hpyi sha ai shaloi mu yu ai ni gaw, ndai wa gaw nang e dung nga nna, hpyi sha ai wa n rai ni? nga ma ai. Nkau mi gaw, dai wa nan rai ai nga ma ai. Bai kaga nkau mi gaw dai wa n rai shi hte bung ai wa rai nga ai, nga ma ai. Dai wa chyawm gaw, ngai nan dai wa rai nga nngai, ngu nna tsun wu ai.

Dai rai nna shanhte gaw, shawng de myi n mu ai wa hpe Hparishe ni hpang de woi sa mu ai. Yesu hkumpup galaw la nna dai wa myi hpaw ya ai shani Laban nhtoi rai nga ai majaw, Hparishe ni gaw dai wa hpe, shi a myi kaning rai mu lu ai lam san ma ai. Dai wa gaw, Yesu ngu ai wa nye a myi hta hkumpup chya ya nna, ngai kashin kau jang mu wa ni ai, ngu nna shanhte hpe htan mu ai. Shaloi Hparishe nkau mi gaw dai Yesu gaw Laban nhtoi hpe tawt lai ai majaw, Karai Kasang kaw na du sa ai wa nrai, nga ma ai. Bai, nkau mi gaw, mara lu ai masha gaw, ning re ai lamik kumla kaning rai galaw lu na a ta? nga ma ai. Shing nga na myit nhkrum ma ai. Dai rai nna, shanhte gaw myi n mu ai wa hpe, na myi shi hpaw ya ai majaw, shi a lam nang kaning ngu da a ta? ngu nna bai tsan yang, shi gaw, dai wa gaw myihtoi rai nga ai, ngu nna bai htan wu ai.

Shaloi shanhte gaw, nang wa mi anhte hpe sharin ya nni? Nang gaw shangai wa kaw na shut hpyit mara hte hpring chyat nga ndai, ngu nna jawm htan nhtawm, dai wa hpe kanawng shapraw kau mu ai. Dai wa hpe shapraw kau ai lam Yesu na wu ai rai nna, shi hpe mu tam jang, Masha Kasha hpe nang kam sham nni? ngu nna san wu ai. Dai wa gaw, Madu e, dai Masha Kasha hpe ngai kam sham lu na matu, shi kadai re ai ngai hpe tsun dan rit ngu wu ai. Yesu gaw, dai Masha Ka¬sha hpe nang mu yu nit dai hta n-ga, ya nang hpe shaga ai gaw dai wa nan rai nga ai, ngu nna shi hpe htan wu ai. Shaloi dai wa gaw, Madu e, ngai kam sham nga nngai, ngu nna Yesu hpe nawku wu ai. 

Ya hti ai gaw Madu a Kabu Gara Shiga rai nga ai. 

2020:LUSHA GAM LADAW LABAN (3) NA MUNGGA

Ga-shagawp 28:13 hta ning nga da ai, “Na a mara hpe makoi magap da ai rai yang na prat hta awng dang ai lam galoi n lu mai na; mara hpe yin la nna jahka kau ai rai yang, Karai Kasang gaw matsan dum myit madun dan na”, nga ai. 

Yesu_ Samaritan numjan_ Hka-htung: 

Dai hkrum shaga hkat ai gaw, dai numjan hpe shi a kraw kata, sung dik ai shara hta makoi da, yip da ai lam hpe htawk shapraw dan lu hkra garum ya ai. Jahtum e dai numjan gaw mara hpe yin la nna prat ningnan hpe gawgap sa wa lu ai. 

Sararitan numjan gaw gawng kya ai masha yawng a gawng malai rai nga ai. Masha hkum shagu gaw tinang a shut hpyit mara hpe byin mai ai daram yip da magap da chye ai. Shut hpyit mara, ngu ai gaw ningsin bungli, makoi magap da mayu ai gaw mau-hpa n rai nga ai. Yesu gaw, shut hpyit mara hta lup nan taw nga ai jan hpe grai si mani ai hku hku tsun shaga ai. Amyu n bung, Jew hte Samaritan amyu lah¬kawng gaw galoi n hkau hkat mai ai; dai hta lai nna la hte num hkrai jahta hkat ai ngu ai gaw htung hking lailen hte mung nhtan shai ai rai nga ai. Yesu gaw mara kap ai jan hpe yu kaji ai ga, mara shagun ga, jey¬ang ai ga hpa n tsun ai. Madin shakum law law hpe hpya run kau nna, Samaritan numjan shi a mara hpe yin la lu hkra garum ya ai. 

Yesu gaw lu-hka hpyi ai kaw nna hpang ai; dai numjan gaw htung n nga ai, ngu ai hku htan ya ai; hka-htung mung sung la ai, nga ai. Kaja wa, masha a kraw kata kaw na hpang gara, ra shawng ai lam, hkam sha ai lam, myit maw ai lam ni sung la ai. Yesu hte tsun jahta hkat ai a marang e, Yesu gaw gau-ngwi rai dai numjan a sung la ai myit masin kraw lawang na lam ni hpe manaw shaw dan ai. Dai numjan, makoi magap n mai sai chye ai hta n ga, shi a shut hpyit mara ni hpe yin la ai. Dai gaw myit malai chyeju, hkye hkrang la ai chyeju hpe hkam la lu na hkinjang tai wa ai. 

Samaritan numjan gaw shi a kaya-hpa hpe dum chye ai shaloi kaya dum tim Yesu hpe hprawng shakram da ai lam n galaw ai; Shi mahtang Yesu kaw na asak jaw ai hka hpyi lu ra nu ai. Yesu kadai re ai lam chye la nu ai: shawng e gaw Jew masha re, ngu; dai hpang myihtoi she rai nga ai, ngu; jahtum e, Hkye La Madu Messiah she rai a hka, ngu nna chye na hkap la wa lu ai. 

Dai numjan gaw Messiah hpe hkrum katut ai lam, kabu gara ai myit hte mare de htang wa nna mare masha ni hpe tsun dan, sakse hkam dan ai. Shut hpyit mara hta lup nan lai wa ai dai numjan gaw Kabu Gara-shiga hkap la nna, kaga masha ni hpe bai htawn tsun dan sakse hkam dan lu ai shawng shawng na kamsham ai masha mung tai wa ai. 

Yawhan 4:14 hta tsun ai, “Ngai jaw ai hka hpe ja lu ai wa hta, dai wa a kraw kata hta hka-hpawk prut pru wa nna htani htana asak de du lu hkra kanawng sharawt na ra ai”. 

Ndai lu-sha jahkran ai ladaw hta akyu hpyi ai, lu-sha jahkran ai, pyaw poi ni hpe jahkran ai, gumhpraw jai lang sharam nna mahkawng da lu ai hpe matsan dum a mu hta jai lang na alu sak jaw ai, ndai zawn re ai amu ni galaw shakut ai gaw asak hka-hpawk prut pru ai shangun ai lam tai na rai nga ai. Asak a chyeju kumhpa ni hpe tinang shawng hkam la nna masha ni hpe gam garan ya lu na rai nga ai. 

San Paulu shadum ai hta, shut hpyit mara a majaw myit daw shara n nga ai lam, Kashin Kamun a marang e anhte gaw asak a hka-hpawk kaw na chyeju ni hpe ja lu na ahkaw ahkang lu ga ai majaw, Chyoi Pra Wenyi a kumhpa tut e hkam la lu ai lam tsun da ai. 

Sumru yu mai ai lam ni: 

- Sung dik ai tinang a kraw kata na wenyi a ana ahkya ni hpe chye lu hkra shakut mai ai; dum chye jang mara yin la nna myit malai shad¬ing sharai lu na matu, Madu Yesu hpang sit sa ra na rai nga ai. Akyu hpyi ai gaw dai nan rai sai. 

- Yesu zawn, amyu makam sham, lu su madang, kaning re ai n bung ai baw hpan masha ni hpe mung, hkap la kanawn mazum tsun jahta hkat na shajin da lu na kun? 

- Tinang hkrai chyoi pra dum nga na kun? Lu da ai dinghpring lam, makam masham kumhpa, lu da ai sutgan, chyeju kumhpa ni prut kaprawk nga ai rai yang, teng sha n gam garan ai nga lu na n rai. 

2020:LUSHA GAM LADAW LABAN (3) NA CHYUM LAIKA

LUSHA GAM AI LADAW LABAN (3)

March 15, 2020

Chyum Mungga Daw (1)

Pru mat wa ai laika 17:3-7

Ya hti na gaw Pru Mat Wa ai laika hta na rai nga ai. 

Israela a shawa hpung ting, Egutu mung de nna pru mat wa ai hpang, Re-hpi-dim e but nga ma ai; dai kaw e amyu masha ni hpang gara nna, Mawshe hpe aput let tsun mu ai gaw, anhte hte anhte a kashu kasha ni mung, anhte a yam nga ni mung, hpang gara ai hte si na matu, Egutu mung de na anhte hpe woi wa sa ni? ngu mu ai. Shaloi Mawshe gaw Madu hpe hpyi nem let, ndai amyu hpe ngai kaning di woi awn lu na rai ta? Ngai hpe nlung hte kabai sat kau na maw nga ma ai, ngu mu ai. Dai rai nna Madu gaw Mawshe hpe, Israela a agyi salang nkau mi hpe woi nna, dai amyu masha ni a shawng e sa wa su; dai hka nu hpe kayat ai dawhkrawng lang let sa wa su. Horeb bum na lunghkrung ntsa hta ngai na a man e tsap nga na ring ngai. Dai nlung hpe nang kayat na wu ai rai nna, amyu masha ni lu na matu, dai hta na hka lwi pru na ra ai ngu nna Madu tsun wu ai. Mawshe mung Israela a agyi salang ni a man e shing di galaw wu ai. Dai shara kaw e, Israela amyu masha ni gaw, Madu anhte hte rau nga nga ai kun, n nga nga ai kun, nga nna Madu hpe chyam dinglik yu ai majaw mung, Mawshe hpe aput nna ndang kalang hkat ai lam a majaw mung, shara dai hpe, Massah hte Moriba ngu ai amying lahkawng hte shamying ya mu ai. 

Ya hti ai gaw Karai Kasang a mungga rai nga ai. 

Chyum Mungga Daw (2)

Roma 5:1-2, 5-8 

Ya hti na gaw Roma masha ni hpang de San Pawlu shagun dat ai laika hta na rai nga ai. 

Hpu nau ni e, anhte a Madu Yesu Hkristu a marang e, kam sham ai hte ding hpring wa lu sa ga ai majaw, Karai Kasang hte hku hkau nga ga ai. Yesu Madu a marang e, anhte kam sham ai hte chyeju ningsang a prat hta shang lu sa ga ai; shing rai, Karai Kasang a hpung shingkang hpe myit mada nga ga ai majaw, nachying kabu sharawng awng nga ga ai. Dai myit mada ai gaw kaman lila n rai nga ai; kaning rai nme nga yang, anhte hpe jaw ya sai Chyoi pra ai Wenyi gaw, Karai Kasang a tsaw ra ai myit, anhte a masin salum hta e ru bang ya mani ai. Anhte hpa n byin lu ai shaloi, Karai Kasang lajang da ai aten hta, Hkristu gaw shut hpyit ai masha ni a matu si hkam sai. Gaja wa, ding hpring ai masha a matu si hkam na, ai n kam nga ga ai; mai kaja ai masha a matu, chyawm gaw, si hkam gwi na masha langai ngai nga nhten; rai timung, anhte mara kap nga ninglen, Hkristu anhte a matu si hkam ya ai gaw, Karai Kasang anhte hpe tsaw ra nga ai lam a sakse rai nga ai. 

Ya hti ai gaw Karai Kasang a mungga rai nga ai. 

KABU GARA SHIGA

Yawhan 4:5-15, 19-26, 39-42

Ya hti na gaw Yawhan a laika hta na Kabu Gara Shiga rai nga ai. 

Yesu gaw, Yaku e shi a kasha Yosep hpe jaw ai ga dachyawk makau na, Suhka nga ai, Samari mung na mare langai mi de du wu ai: dai yang e Yaku a hka htung nga nga ai.

Yesu gaw lam hkawm ba ai majaw, hka htung makau e dung nga ai. Dai aten gaw shani ka-ang ahkying shi lahkawng daram rai nga ai. Shaloi Samari numsha langai mi hka ja na pru sa ai. Yesu gaw, Ngai hpe hka jaw lu e, ngu nna shi hpe hpyi ai: shi a sape ni chyawm gaw shahpa mari na matu mare de sa mat ma ai. Dai Samari numsha gaw, Nang Yuda masha rai nga ndai; ngai Samari numsha hpe hpa majaw lu na hka hpyi n ta? ngu nna shi hpe tsun wu ai, kaning rai nme nga yang, Yuda hte Samari masha ni shada da n hku n hkau nga ma ai. Shaloi Yesu gaw, Karai Kasang a kumhpa hte, Ngai hpe hka jaw lu e nga nna nang kaw hpyi ai wa, kadai re hpe nang chye taw gaw, nang shi kaw hpyi nna, shi gaw nang hpe hkrung ai ntsin jaw na nit dai, ngu nna Yesu htan wu ai. Dai num¬sha mung, Madu e, Nang hka ja na rai hpa mung n lu ndai; hka htung mung sung nga ai; dai rai nna, dai hkrung ai ntsin hpe kanang na lu la n ta? Anhte a nji nwa Yaku gaw ndai hka htung anhte hpe jaw da mani ai rai nna, shi hkum nan hte shi a kashu kasha ni, shi a yam nga ni ndai hta na lu ma sai: nang gaw shi hta grau kaba n ni? ngu nna tsun wu ai. Shaloi Yesu gaw, ndai hka lu ai wa kadai mung, hpang bai gara na ra ai; ngai jaw ai hka lu ai wa chyawm gaw galoi mung hpang gara na n rai: dai ngai jaw ai hka gaw, htani htana asak lu na matu, dai wa hta e lwi pru ai hka hpawk tai na ra ai, ngu nna Yesu htan wu ai. Shaloi dai numsha gaw, ngai galoi mung hpang gara bai n hkrum na hte, nang de mung hka n sa ja ra u ga, hka dai ngai hpe jaw rit law. 

Nang gaw myihtoi rai nga ndai hpe ngai dum se ai: anhte a ji wa ni gaw ndai bum ntsa e nawku masai; nanhte Yuda masha ni chyawm gaw, Yerusalem mare e chyu sha Karai Kasang hpe nawku mai ai, nga nna tsun myit dai, ngu wu ai. Yesu gaw, numsha e, nye a ga hpe kam sham u: ndai bum e mung n rai; Yerusalem mare e mung n re ai, Wa hpe nawku na aten du na ra ai. Nanhte Samari masha ni taw tinang nchye na ai hpe nawku myit dai; anhte chyawm gaw tinang chye ai hpe nawku ga ai: kaning rai nme law, hkye hkrang la ai lam Yuda amyu hta na pru ra ai. Rai timung, ding man ai hku nawku ai ni gaw, wenyi hta mung, teng man ai hta mung, Wa hpe nawku na aten du wa ra ai rai nna, ya e pyi rai nga ai: Wa gaw shing rai nawku ai ni hpe tam nga ai. Karai Kasang gaw wenyi rai nga ai: shi hpe nawku ai ni gaw wenyi hta mung, teng man ai hta mung, nawku lu na rai nga ai ngu nna shi hpe tsun wu ai. Dai numsha gaw, Hkristu ngu ai Karai Kasang san da ai wa du na ra ai hpe ngai chye nngai; dai wa du jang, shi anhte hpe lam magup tsun madun na ra ai, ngu wu ai. Shaloi Yesu gaw, nang hte ga tsun nga ai, ngai gaw dai wa nan rai nga ai, ngu nna shi hpe tsun wu ai.

Dai rai nna dai numsha gaw, shi a ntsin di bu tawn kau da nna mare de bai wa nhtawm, mare masha ni hpe, ngai galaw ai lam yawng ngai hpe tsun dan ya ai wa hpe sa yu marit; dai wa gaw Hkristu rai na kun, ngu nna wa tsun mu ai. Dai mare na Samari masha law law wa, dai numsha sakse hkam ya ai ga a majaw, Yesu hpe kam sham ma ai. Dai rai nna Samari masha ni Yesu hpang de du jang, shanhte hte nga nga na hpyi ma ai majaw, dai yang e lahkawng ya shi hkring nga ai. Yesu nan tsun ai ga a majaw mung kam sham ai ni grau law jat wa ma ai. Dai ni gaw dai numsha hpe, ya gaw, na a ga majaw chyu sha kam sham ai n rai sa ga ai: anhte nan na lu nna, ndai wa gaw, mungkan ga a hkye hkrang la ai Madu teng teng rai nga ai hpe anhte chye saga ai, ngu mu ai. 

Ya hti ai gaw Madu a Kabu Gara Shiga rai nga ai. 

2020:LUSHA GAM LADAW LABAN (2) NA MUNGGA

Ja lungseng awng ai aten, hpaga awng ai aten, nai mam kaja ai shaning, san poi awng ai aten, dz. dz., awng dang ai aten ni hta kabu n ma rai ga ai. Hkrat sum ai aten, kaya kahpa hkrum ai aten, manghkang hkrum ai aten, … kade she myit ru myit kaji ai. Grin ai hpa mung n nga ai. Anhte hkrum ai mahkrum madup ni hta, yawn ai, kabu ai, … lachyum nga ai kun? 

Karai Kasang gaw Abram/ Abraham hpe shaga nna, shi n chye n hkau man ai buga ningnan de htawt sit nga na lam, galu kaba awng dang ai amyu matu a ji gindai, shaman chyeju a ru-pawt tai lu na lam tsun ai. Abraham gaw Shaga la hkrum ai hte Palestine de htawt sit na lam shangun dat hkrum ai. Abraham gaw chyip mak kam sham ai hte madat mara ai. 

Abraham a amyu matu kaw na hkrawn hkrat ai Yesu gaw masha majing: Kashin Kamung hkam ai aten hta Kawa Karai shi hpe tsun ai, “Ndai gaw ngai tsawra ai Kasha…” Kawa Karai shi hpe galaw shangun ai amu, matsun ga hpe chye lu hkra tam ra ai. Dai majaw shi akyu hpyi ai aten law law jaw ai; Kawa Karai hte matut mahkai ai. Grau nna, Yerusalem de sa na maw ai; shi a prat hpang jahtum maga, hpang jahtum hkaw tsun sakse hkam dan na matu, hpyen ni e ninghkap ai lam laja lana hkrum na aten a matu, zingri sat kau hkrum na aten a matu… hkyen lajang da na lam, Tabor Bum de lung nna ja ja akyu hpyi ai. 

Kawa Karai gaw Yesu hkum nan hpe mung, shi hpe kam sham ai sape ni a matu mung, ninggun jaw na matu laklai ai kumla madun dan ai. Ruyak kyindut nji n-mu kade mi sawng ai rai tim, Karai Kasang hte rau re ai lam, mu mada nga ai lam hpe hkam sha shangun ai ga gaw ndai rai nga ai: “Ndai gaw ngai tsawra ai nye kasha rai nga ai”, nga ai ga re. Anhte hta byin wa ai lam ni yawng hkra hta Karai e n chye ai, n gawn ai shalai kau ai hpa n nga ai: “Ngai Kawa nanhte hte a nga nga ai; ngai nanhte hpe tsawra ai, ngai a kasha ni rai mi ai”, ngu ai hta grau ai shalan shabran ninggun jaw ga hpa mi naw nga na rai ta? 

Teng sha, Yesu gaw prat a jahtum maga, shi hkum nan ung ang na zawn nga, Kawa e kau da hkrum ai zawn nga hkam sha nu ai (“Wa e, Wa e, nang hpa rai ngai hpe kau da nit ta?”). Shi dai daram machyi ai majaw lachyum tup hkra n chye na ai, ung ang ai rai tim nsa hti maw ai aten hta, “Wa e, na lata hta nye wenyi hpe ap ya/ ma ya de ai” nga nna Kawa e shabyin ai amu yawng hpe shatup da ya nu ai, si wa ai aten du hkra madat mara nu ai. 

Hki ba lit li ai aten, myit ru myit tsang, yawn hkyen ai aten, myit htum na zawn nga ai hkrum sha ai aten ni hta kanawn manang ni a chye madat ya ai, madi shadaw ninggun jaw ai ga, byin mai ai daram garum ya ai lam ni teng sha ninggun kaba rai nga ai. Rai tim, sung dik ai hku hkam sha ai lam ni, kaning re ai ninggun jaw ga ni mung kaman sha, majoi shalan ya ai ga, kaja ai maga galai shai shangun ai lam n byin mai ai, ngu hkam sha ai aten ni nga na re. Myit mada lu na lam hpa n nga sai, ngu, chyipmak nga hkam sha ai aten hta teng sha myit daw lu ai, hkrat sum lu ai. 

Shing re ai madang de n du lu hkra, byin jang sha Karai kam kam na n re ai, galoi mung akyu hpyi ra ai lam Madu Yesu hkum nan kasi madun dan nu ai. Lamu kaw na ngoi pru ai nsen mung, “Shi a ga hpe madat mu!” nga ai. Yesu sape ni hpe tsun ai ga yawng hpe tsun ai, “Hkum hkrit mi; rawt mu!” nga ai. Yesu a ga hpe madat ga ai rai yang, kaning re ai ruyak jamjau hkrum ga tim, kaning re ai mangh¬kang hkrum katut ga tim, n hkrit ra ai; asum n jaw, n kadang taw, rawt hkawm dingyang rai lu na re. 

Ndai dinghta ga e hkam sha ra ai shut hpyit mara dam galaw nga ga yang, masha tai ai a lachyum, mahkrum madup ni a lachyum, ma¬sha e mahtai n jaw lu ai ruyak kyindut ni a lachyum, ndai yawng hpe mahtai jaw ai gaw hpung shingkang dagraw hkam la ai Yesu rai nga ai. Hkrung rawt nna hpung shingkang hkam la ai Hkristu a asak hta jawm pawng ai ni galoi mung myit mada let asak hkrung nga lu na rai nga ai. 

Sumru mai ai lam: 

- Tinang myit ru yawn hkyen hkrum ai, chyipmak nga hkam sha lai wa ai kade lang, gara hku tawt lai wa lu ai, ngu ai lam ni hpe myit sumru yu nna chyeju dum mai ai. 

- Abraham zawn, nang/ ngai, yawng gaw Karai a shaga la hkrum ai hte Karai e shangun da ai amu ni (mission) lu ga ai. Abraham zawn, grup-yin na masha ni shaman chyeju jaw ya lu ai chyeju hka-hpawk tai ya na kade she mai? 

- Karai Kasang anhte hpe shaga la ai lam gaw, “Chyoi pra dinghpring ai prat gawgap na matu rai nga ai (Roma).

2020:LUSHA GAM LADAW LABAN (2) NA CHYUM LAIKA

LUSHA GAM AI LADAW LABAN (2)

March 8, 2020. 

Chyum Mungga Daw (1)

Npawt nhpang 12:1-4

Ya hti na gaw Npawt nhpang laika hta na rai nga ai. 

Madu gaw Abram hpe, tsun wu ai gaw: Na a bu ga hte na a amyu na nwa a nta de nna pru nhtawm, ngai nang hpe madun dan na mung de sa wa su. Ngai nang hpe amyu kaba shatai na de ai: nang hpe ngai shaman ya de ai hte, na a amying hpe ngai galu kaba shangun na rai nna, shaman chyeju lu la na matu, masha ni na a amying hpe gang la na mara ai. Nang hpe shaman ai wa hpe ngai shaman ya na we ai; nang hpe n gawn n sawn di kau ai wa hpe, ngai dagam kau na nngai. Ga ntsa na amyu baw shagu gaw na a marang e gumring gumrat ai chyeju hkam la na ma ra ai, ngu nna Madu gaw Abram hpe shaga la wu ai. Dai rai nna, Abram gaw, Madu shaga wu ai hte maren, pru sa wa ai. 

Ya hti ai gaw Karai Kasang a mungga rai nga ai. 

Chyum Mungga Daw (2)

2 Timohti 1:8-10

Ya hti na gaw Saradaw Timohti hpe San Pawlu shagun dat ai laika lahkawng hta na rai nga ai. 

Hkristu Yesu a kasa rai nga ai, ngai Pawlu gaw, ngai sha Timohti hpe ga shana dat nngai. Karai Kasang jaw ai n-gun atsam hpe kam hpa let, Kabu Gara Shiga a majaw nang hkrum ang ai ru tsang ai hpe hkam sharang la u. Karai Kasang gaw, anhte a magam bungli a majaw n rai, shi yaw shada ai hte maren, shi a chyeju hte anhte hpe hkye hkrang la nna, chyoi pra ai ni tai wa lu na matu, shi anhte hpe shaga la nna, chy¬oi pra ai ni tai wa lu na matu, shi anhte hpe shaga da ma ni ai. Dai chyeju lam, moi chyaloi nhkoi kaw nna Hkristu Yesu hta e shi anhte hpe jaw da mani ai; rai timung, anhte a Hkye la Madu Yesu Hkristu ga ntsa e paw pru ai majaw, ya e shadan shaleng dat nu ai. Kaning rai nme law, Yesu Madu gaw si hkrung si htan a atsam hpe jahten kau ya nna, dai Kabu Gara Shiga a marang e asak hkrung ai lam hpe mung, htani htana nhten n bya re ai lam hpe mung, shi shadan dan nu ai. 

Ya hti ai gaw Karai Kasang a mungga rai nga ai.

KABU GARA SHIGA

Mahte 17:1-9

Ya hti na gaw Mahte a laika hta na Kabu Gara Shiga rai nga ai. 

Yesu gaw, Petru, Yaku hte shi a kanau Yawhan hpe shaga la nna, tsaw ai bum ntsa de shanhte hpe hkrai woi lung mu ai. Shaloi shanhte a man e shi a hpraw nsam galai mat nna, shi a myiman jan zawn htoi kabrin ai hte, shi a hpun palawng hkyen zawn hpraw tu wa ai. Dai hta n-ga, Mawshe yan Elia mung, Yesu hte ga shaga ai hpe shanhte dan mu lu ma ai. Shing rai Petru gaw, Madu e, ndai yang e anhte nga nga na, gade pyaw la a hka! Nang hkraw n yang gaw, nang e ginsum masum, na a matu langai mi, Mawshe a matu langai mi, Elia a matu langai mi, anhte gap sa ga, ngu nna Yesu hpe tsun wu ai. Petru gaw dai ga naw tsun nga yang, htoi tu sumwi shanhte hpe ka-up nga ai hte, dai sumwi hta na nsen ngoi pru nna, ndai wa gaw, ngai sharawng awng ai, nye a tsaw ra ai Kasha rai nga ai; shi hpe madat mara nga mu, nga ai. Sape ni dai ga hpe na jang, ga de dingyawm dagup nna, nachying hkrit gari nga ma ai Shaloi Yesu gaw shanhte hpe sa ahtawk nna, rawt mu, hkum hkrit nga myit, ngu mu ai.8 Shanhte mada yu jang, Yesu hta kaga kadai hpe mung n mu lu ma ai. Ya dai bum de nna shanhte yu hkrat wa nga yang, Yesu gaw, Masha Kasha si ai ni kaw na garai n hkrung rawt yang, ndai shingran hpe kadai hpe mung hkum tsun dan mu, ngu nna shanhte hpe hkang dat mu ai. 

Ya hti ai gaw Madu a Kabu Gara Shiga rai nga ai.

2020:LUSHA GAM LADAW LABAN (1) NA MUNGGA

Lu-sha jahkran ai ladaw, ngu ai gaw myit malai lu shajang nna Karai Kasang hte mung, shada mung, hku hkau kanau mazum ai lam htenza mat wa ai hpe sharai ai aten rai nga ai. 

Agung alau gaw grup-yin e galoi mung nga nga ai; tinang a kraw kaw na mung prut pru dingrun rai nga ai. Ndai Laban bat Chyum Mungga ni hku nna agung alau ni hpe gara hku shadip dang kau lu na lam matsun ya ai. 

Sirak 21:1-2 hta ning nga sadi jaw da ai, “…. Lapu achye’ ai kaw na lawt hkra hprawng ai zawn, shut hpyit mara kaw na tsan tsan hprawng u; shut hpyit mara de sit sa ai rai yang, dai gaw nang hpe achye’ ya na ra ai…. Wenyi law law hpe jahten kau lu ai” nga ka da ai. Kaja wa lapu gaw masha a asak hpe sha jahten lu ai; shut hpyit mara mahtang wenyi hpe sat kau lu ai rai nga ai. 

Ewa gaw hkum da ai namsi hpun de sit sa ai majaw, agaung alau hkrum nna namsi di sha kau nu ai; Adam mung Ewa a ga madat hkrup ai majaw, masha gaw si chye ai amyu tai wa ai. Rai tim, Roma Laika hta ka da ai hte maren, Adam ningnan Yesu gaw Kawa Karai a ga hpe madat mara ai majaw, shut hpyit mara hte si-du hpe dang kau nna si chye ai shinggyim amyu hpe htani asak hkrung lu ai chyeju jaw ya ai.

Yesu gaw kawsi hpang gara hkrum ai: 

Anhte kawsi let yup-ra shang ai marai kade nga a ta? Lu sha bu hpun na jan hkra lu ga ai kun? Ra ai hta jan nna kan she kaba hkra sha nga ga ai kun? Ra ai hta lai lai jan jang bu hpun mawn sumli nga ga ai kun? Kawsi let yup-ra shang ai ni, hpun nba mala la n lu ai ni, shanhte hpe gam ya chye ga ai kun? Ndai shachyoi shapra ai ladaw hta lu-sha sha¬yawm, gumhpraw jai shayawm, pyaw poi shayawm re ai baw ni shay¬awm mai ai aten ladaw rai nga ai.

1. “Nlung tawng hpe muk tawng shatai nna sha u!” 

Kaja wa sha ja lungseng, nhprang sut rai ni hpe muk tawng shatai la ai ladat a majaw n shawp n hkap, dip sha dang sha, masu magaw, dz. dz., re amu ni kade hkan nang wa ai hpe myit dum mai ga ai. Gumhpraw shabyin loi ai ladat a majaw sat hkat nat hkat, kashun gashe majan byin ai lam hpe dum mai ga ai. N jaw a ang ai, n tara ai hku kanbau makan galaw nga ai ni kade she law nga a hka? 

2. “Ga de gumhtawn hkrat u, lamu kasa nang hpe hkap pawn la na ra ai!” 

Masha gaw ga-yun hte shachaw da ai hkumhkrang rai nga ai; machyi makaw hkrum chye ai, hkala nba hkrum chye ai, si chye ai amyu rai nga ai. Karai Kasang e jaw da chyalu atsam ni law law lu ga ai rai tim, masat ya da ai shadawn shadang nga ai. Makam masham a marang e, Karai a mying hte, tinang sadi sahka n nga ai, tinang a hkamja lam, asak galu na lam n sadi ai sha majoi mi share nga ga ai kun? Myit yu mai ga ai. Sadi maja ra ai daram n shatup ai majaw, mawdaw, cycle ac-cident byin nna hkala ai, si mat ai ni kade she nga. Jak, motor baw gawt hkawm yang sadi ra ai lam ni hpe tara jahkrat masat ya ninglen cycle bawgup pyi n kam gup ya nna hkala si ai marai kade she nga. Lu lai sha lai, sha shut nna si mat ai marai kade she nga. Dum nta sun hkauna pawng sha kau nna hka n wa byin ai ni kade she nga. Tinang n kang ka ai, sadi ra ai tara n hkan nna ru yak jamjau hkrum jang Karai Kasang hpe mara shagun na kun?

3. “Ngai a man e dingnyawm dagup nawku u, mungkan sutgan yawng na a rai lu na!” 

Ja htu seng shap makan galaw sha ai ni kau mi nat mayun jaw jaw di ma ai, nga ai mung na yu na mi ai. 

Du Salang ahkaw ahkang hpe n jaw n ang ai hku, n tara ai hku akyu jashawn nna masu sha, maw sha ai ni law law nga ai hpe dum chye na mi ai. 

Tinang a atsam marai machye machyang ni: shingni hpaji, dum sha¬pyaw chye ai, gawng shing-yan tsawm ai, ninggun ja ai, dz. dz., Karai e jaw da ai atsam marai ni hpe n jaw n ang ai hku, tingkyeng akyu amyat a matu hkrai galaw ai, makam masham sari sadang hte tai shai ai, shut hpyit mara hte myit masin wenyi htenza hkam nna arawng lu, ja gum¬hpraw lu ai rai yang,. .. Du aya lu la ai,…dai mung nat hpe nawku ai hte bung nga ai.

Myit sumru mai ai lam: 

Karai Kasang jaw da ai asak a chyeju kumhpa ni, atsam marai myit nyan hpaji ni hpe chyeju dum chye ga ai kun? Tinang a hkamja lam hpe mung, kaga wa a asak hte nga-mu nga-mai ai lam hpe mung, hkung ga manu shadan chye ga ai kun? Lu ai hte hpe myit dik chye ga ai kun? Karai a tsawra myit hte jahka kau gwi hkra rai nna lu su nga-mu nga-mai ai lam hte arawng aya tam shajang nga ga ai kun?

2020:LUSHA GAM LADAW LABAN (1) NA CHYUM LAIKA

LUSHA GAM AI LADAW LABAN (1)

March 1, 2020

Chyum Mungga Daw (1)

Npawt nhpang 2:7-9, 3:1-7

Ya hti na gaw Npawt nhpang laika hta na rai nga ai. 

Madu Karai Kasang gaw aga hta na ga yun hte shinggyim hkrang hpe shachyaw wu ai rai nna, dai masha a ladi hta hkrung nga ai nsoi nsa kawut bang ya ai: shaloi shinggyim masha gaw hkrung nga ai nsa wenyi rawng ai masha tai wa sai. Dai hpang, Madu Karai Kasang gaw, sinpraw maga na Edin ngu ai shara e, sun langai mi hkai lajang da wu ai: dai kaw e shi shachyaw ai shinggyim masha hpe nga shangun da wu ai. Ya Madu Karai Kasang gaw yu tsawm ai hte, sha na matu mai kaja ai hpun amyu myu hpe, ga hta nna tu shagun ai: dai sun ka-ang e asak jahkrung jaw ai hpun hte, kaja ai hte n kaja ai hpe chye ginhka shangun ai hpun mung tu nga ai. 

Ya lapu gaw, Madu Karai Kasang hpan da ai dusat nhprang mahkra hta hpaji grau rawng nga ai. Dai lapu gaw shawng na numsha hpe, ndai sun hta tu ai hpun mahkra hta na, nan nsha lu na myit dai, nga nna Karai Kasang kaja wa tsun sa ni? ngu nna Ewa hpe san wu ai.  Shaloi dai numsha gaw, ndai sun hta tu ai hpun ni a asi hpe an sha lu ga ai, rai timung, nan si ai n hkrum myit ga, sun a ka-ang e tu ai hpun a asi hpe nan n sha lu na myit dai; dai hpe mung hkum hkra mu, nga nna Karai Kasang tsun da nu ai, ngu nna lapu hpe htan ya wu ai. Dai rai nna lapu gaw, nan kaja wa teng teng n si na myit dai. 

Dai namsi hpe sha ai nhtoi hta nan a myi hpaw nna, kaja ai hte n kaja ai hpe chye ginhka na ra ai majaw, Karai Kasang zawn nan tai wa na marin dai; kaja wa Karai Kasang dai lam hpe chye chyalu rai nga ai, ngu nna dai numsha hpe tsun wu ai. Shaloi, hpun dai gaw sha na matu mai kaja nga ai mung, mada yu ai shaloi tsawm la ai hpe mung, hpaji lu la na matu masha ra sharawng ai hpun rai nga ai hpe mung, dai numsha mu jang, dai hpun hta na asi di sha wu ai: madu wa hpe mung shi gaw jaw wu ai rai nna, Adam mung sha wu ai. Dai shaloi shan lahkawng a myi hpaw wa nna, singgu krin rai nga ma ai hpe dum chye ma ai. Dai rai nna, shan gaw lakum lap chywi matut nna, tinang a matu dangpai galaw ma ai. 

Ya hti ai gaw Karai Kasang a mungga rai nga ai. 

Chyum Mungga Daw (2)

Roma 5:12-19

Ya hti na gaw Roma masha ni hpang de San Pawlu shagun dat ai laika hta na rai nga ai. 

Hpu nau ni e, Masha langai mi a jaw e shut hpyit mara mung¬kan ga e shang wa nna, mara a majaw si hkrung si htan shang nang wa ai hte maren, masha yawng mayawng mara kap nga ma ai majaw, nlang kaw e si hkrung si htan du bang wa sai. Mawshe a tara htung dingsa karai n nga yang, shut hpyit mara mungkan ga e nga nga sai; rai timung tara n da ai laman e mara shagun ai n nga ai.  Ngai tsun mayu ai gaw, Adam shut hpyit kau sai majaw, tara tawt lai ai amu n galaw ai ni a ntsa e pyi, Adam kaw nna Mawshe a aprat du hkra, si hkrung si htan up hkang nga sai: Adam gaw, “Du Na Ra Ai Wa” kumla rai nga ai.  Rai timung, chyeju kumhpa lam gaw, tara tawt lai ai lam zawn n rai; hpa majaw nga yang marai langai mi a jaw e yawng mayawng si mat sa yang gaw, Yesu Hkristu ngu ai masha langai mi a marang e, Karai Kasang a chyeju ningsang gaw, masha lanlak a matu grau nna law htam wa sai rai nga ai. 

Bai, dai chyeju kumhpa gaw, marai langai mi galaw ai shut hpyit mara hte grai shai nga ai; kaning rai nme nga yang tara tawt lai ai amu langai mi a jaw e, tara jeyang nhtawm daw dan ai lam byin pru sai. Ya e, tara tawt lai ai amu law law galaw ai hpang, ding hpring la lu hkra chyeju kumhpa pru wa sai. Dai hta kaga, marai langai mi tara tawt lai ai amu a majaw si hkrung si htan up hkang nga sa yang gaw, n taw n tsang ai chyeju ningsang hte, ding hpring shangun ai kumhpa hpe hkam la sai ni gaw, Yesu Hkristu ngu ai wa langai mi a marang e grau nna asak hkrung ai hte up hkang nga na ma ra ai. Dai rai nna, tara tawt lai ai amu langai mi a majaw, masha yawng hte gaw daw dan ai hkrum ma ai hte maren, ding hpring ai amu langai mi a jaw e, masha yawng mayawng ding hpring wa lu nna, asak sumdam lu la manu ai.19 Masha langai mi a n madat mara ai a majaw, nlang hte gaw mara kap ai ni tai wa sai hte maren, marai langai mi a madat mara ai lam a majaw, masha lanlak ding hpring ai ni tai lu na ma ra ai. 

Ya hti ai gaw Karai Kasang a mungga rai nga ai. 

KABU GARA SHIGA

Mahte 4:1-14

Ya hti na gaw Mahte a laika hta na Kabu Gara Shiga rai nga ai. 

Nat e gung lau ai hkrum na matu, dai Wenyi gaw Yesu hpe nam mali de woi sa wu ai. Ya, nhtoi mali shi ya, shana mali shi na tup, Yesu lusha gam ai hpang kawsi hkrum nga ai. Shaloi dai gung lau ai wa shi kaw du nna, Nang Karai Kasang a Kasha rai yang gaw, ndai nlung ni hpe Muk tai mu ga, nga nna hkang dat u, ngu wu ai. Yesu chyawm gaw, Masha gaw muk hte sha hkrung nga lu ai n rai; Karai Kasang a n-gup hta na pru ai mungga mahkra hte mung hkrung nga lu ai, nga nna ka da ai, ngu nna nat hpe htan ya wu ai. Shaloi nat gaw dai chyoi pra ai mare de Yesu hpe woi sa nna, nawku htingnu a nchyun e shadun da nhtawm, Nang Karai Kasang a Kasha rai yang gaw, na a hkum hpe le de jahkrat dat u; kaning rai nme law, nlung hta, na a lagaw n ahtu u ga, na a matu shi a lamu kasa ni hpe hkang da nna, shanhte a lata hta nang hpe pawn la na mara ai, nga nna Chyum Laika hta ka da ai, ngu nna tsun wu ai. 

Yesu gaw, Na a Madu Karai Kasang hpe nang chyam yu lu na n rai, nga nna ka da ai ga mung Chyum Laika hta rawng nga ai, ngu nna nat hpe htan ya wu ai. Bai, dai gung lau ai nat gaw, nachying tsaw ai bum ntsa de Yesu hpe woi lung nna, mungkan ga mungdan yawng mayawng hte, de a arawng sadang mahkra hpe madun dan nhtawm, Nang dingnyawm nna ngai hpe nawku yang gaw, ndai yawng mayawng hte hpe ngai nang hpe jaw na we ai, ngu wu ai. Shaloi Yesu gaw, Satan e, pru mat wa su; na a Madu Karai Kasang hpe nang nawku lu na rai nna, shi hpe chyu sha daw jau lu na ndai, nga nna Chyum Laika hta ka da ai, ngu nna shi hpe htan wu ai. Shaloi dai nat pru mat wa ai hte, lamu kasa ni Yesu hpe sa galaw daw ma ai. 

Ya hti ai gaw Madu a Kabu Gara Shiga rai nga ai. 

2020:PRAN WAN LADAW LABAN (7) NA MUNGGA

- Tara Jahprang 6:5 hta tsun da ai, “Na Madu, na Karai Kasang hpe na myit masin tup hkra tsawra lu na ndai”, nga ai.

- Jawjau 19:18 hta tsun da ai, “Na htingbu wa hpe na hkum hpe zawn tsawra lu na ndai”, nga ai.

- Mahte 5:44 hta Yesu tsun ai, “Ngai nanhte hpe tsun de ai: nanhte a hpyen ni hpe tsawra mu! Nanhte hpe zingri ai ni a matu akyu hpyi ya mu!” nga ai.

Shawng na Laban bat e sharin ya ai lam ni hpe matut sharin ya ai lam re.

1. Moi magri magra prat, hpyen hpe kaning di ra ai, ngu ai tara matsun ni__

- Israel amyu sha ni hkrai n rai, grup-yin na kaga amyu sha ni mung, masha langai ngai sat kau hkrum ai rai yang, dai htinggaw masha ni gaw masha sat ai wa hpe sat kau ai hku matai dawp na lit lu ai, ngu, hkam la ma ai. Law law lang mung mara lu ai wa gaw langai sha, matai dawp ai ngu yang langai hta jan nna sat kau ai, shada tai htang sat hkat ai amu matut matut nna galu mat wa ai, dai zawn jeyang hkat ai tara rai nga ai.

- Moshe a Tara, Bu Hkawm Laika hta (35:19) matai dawp ra ai, ngu nna matsun da ai.

- Dai zawn nga sharin shaga ai, Moshe a Tara, ai n hkrak ai lam ni law law-kaning rai Chyum Laika hta matsun da a hka? Moi na Karai Kasang hte ndai prat na Karai Kasang shai wa sai kun? Moi prat hta Karai Kasang grai ru ai yak ai, ya na prat hta chyamai wa ai kun? Myit yu hpa ni nga wa ai.

2 . Moshe a prat hta gaw mazut dik ai prat, machye machyang mung n law ai prat, “Asak a matu asak, myi a matu myi, lagaw a matu lagaw…(Trjhpr 19:21)” hta matsun ai lam gaw tara dik ai, jaw dik ai hku amyu masha yawng e hkap la ai aprat rai ma ai. Moshe a Tara matsun lawlaw hpe Karai e mung hkraw ya lawm ai zawn rai ngaai. Karai e nan matsun ai ga gaw n rai.

Dai ni na Chyum mungga Jawjau Laika hta rai jang, matai n dawp mai ai lam, tinang a htingbu wa hpe tinang a hkum hte maren tsawra lu na lam, Karai e nan Tara jahkrat ya ai. Dai aprat na masha ni a matu matai n dawp lu na, htingbu wa hpe tinang hkum hte maren tsawra lu na, ngu ai shaloi, ga-shaka hta lawm ai Irael amyu masha ni a lapran hkan ra ai tara hku sha hkam la ma ai (kaga amyu ni hpe mara n dat lu ai, matai dawp lu ai, dz., dz.).

3. Yesu a Tara Matsun hta (Mt. 5:44; Lk 6:27) hta, “Nanhte a hpyen ni hpe tsawra mu… nanhte hpe n ju n dawng ai ni hpe mai kaja ai amu ni galaw ya mu”, nga ai. Kasa ni hkum nan chye na kamsham hkap la na yak la ai.

Ndai zawn nga sharin shaga ai lam gaw kaga makam masham ni hta n nga ai. Hkristan ni chyu sha, ndai tara matsun hpe lu ai re. Yesu tsun ai ga ni hpe ka da ai hte raw raw lachyum hta la jang Yesu hpe tsun mayu ai, ngu hpe mung, ta-tut byin mai ai lam hte mung hprai shai wa lu ai__ Ga-shadawn, “Na shabyi bye ya ai wa hpe kaga maga mi mung naw ja ya u; na hpyen wa hpe tsawra u.....”

Yesu tsun lang ai a-ga gaw Israel/ Palestine e tsun lang ai lailen hku tsun ai rai nga ai. Tinang tsun mayu ai lam hpe grau namnak nga hkra, lai lai sawng sawng ngu tsun ai a’htung a’lai nga ai.

Tinang a hpyen hpe tinang tsawra ai jinghku wa hpe zawn kaning di n tsawra lu na re. Sharin ya ai lam hkrak gaw n ju n dawng ai myit hte dawp ai amu n galaw na lam, matai dawp hkat ai a marang e mara mayat jat law htam jat re ai masa kaw na lawt lu na lam sharin ya ai re.

Shabyi bye katut nna kaga maga mi hpe teng sha ja ya na lam Madu Yesu tsun mayu ai n rai. Kahtap machyi ai lam n nga hkra she koi yen ra. Kaja wa sharin ya mayu ai lam gaw: tinang hkum hpe maga ai, ngu ai shaloi mungkan masha ni zawn, gale amyu ni zawn, ra ai hta jan nna galaw ai lam n byin na matu she rai nga ai. Mt. 5:47, “Hpyi ai wa hpe jaw mu, sa hkoi ai ni hpe hkoi jaw na hkum ningdan…” ngu ai ga: Ka da ai hte maren hkan na matu n rai nga ai. Lagawn nna hpyi ai, masu magaw ai hku hpyi ai, hkoi ai ni hpe rai tim jaw mu, hkoi ya mu, ngu ai n rai.

Kaja wa ra kadawn ai ni hpe byin mai ai daram jaw na; bai jaw bai wa na n lu ai ni sa hkoi jang mung kaja wa ra kadawn ai wa hpe tinang byin mai ai daram garum ya ai,amyat n la ai hkoi jaw ai, bai wa lu na matu aten sharen da ya ai, dz., dz., matsan garum ya na lam sharin shaga ya ai lam she re.

4. Yesu shi hkum nan zingri zingrat hkam la nna wudang ntsa e jen noi si hkam ai gaw shi sharin shaga ai lam yawng hpe sakse tai ya nu ai.Mungkan e shada matai dawp hkat ai marang e shimlum ai, nga pyaw ai mungkan n tai lu ai. Mara dat ya nna tinang n hparan lu ai amu yawng hpe Karai a lata hta nawngda/ ma da ai lam chyu sha, simsa shimlum ai mungkan hpe gaw sharawt lu ai.

2020:PRAN WAN LADAW LABAN (7) NA CHYUM LAIKA

PRAN WAN LADAW HTA LABAN 7

February 23, 2020

CHYUM MUNGGA DAW 1

Jaw Jau ai laika 19:1-2, 17-18

Ya hti na gaw Jaw Jau ai laika hta na rai nga ai.

Madu nan Mawshe hpe tsun wu ai gaw: Israela a amyu ting hpe ning ngu tsun u: Ngai Madu, nanhte a Karai Kasang Chyoi pra nga nngai hte maren, nanhte mung chyoi pra nga mu. Na a nhpu nnau wa hpe n dawng n yawt ai myit hkum rawng u ga. Na a manang wa mara lu yang, shi hpe teng teng shadum jahprang na ra ai. Shing rai ai a majaw nang mara n lu na ndai. Na a amyu masha ni hpe nang hkum nan matai nhtang lu na; na a htingbu wa a mara hpe hkum matsing da u; na a htingbu wa hpe na a hkum hte maren, nang tsawra lu na ndai: Ngai gaw Madu rai nga nngai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Korinhtu 3:16-23

Ya hti na gaw Korinhtu masha ni hpang de San Pawlu shagun dat ai laikalangai hta na rai nga ai.

Hpu nau ni e, Nanhte gaw Karai Kasang a nawku htingnu rai nga nna, Karai Kasang a Wenyi nanhte hta e rawng nga ai hpe n chye nga myit ni? Marai langai ngai Karai Kasang a nawku htingnu hpe jahten sharun kau yang gaw, Karai Kasang dai wa hpe jahten sharun kau na ra ai; kaning rai nme law, Karai Kasang a nawku htingnu chyoi pra nga ai; nanhte mung dai htingu nan rai nga myit dai. Kadai rai timung, hkum myit shut mu: nanhte hta na marai langai ngai, ndai mungkan ga na hpaji madang hte sawn yu nna, ngai gaw hpaji rawng ai wa rai nga nngai, nga nna myit lu yang, hpaji byeng-ya majing lu la na matu, shi angawk angak tai wa na ra ai.

Hpa majaw nga yang, ndai mungkan ga a hpaji byeng-ya gaw, Karai Kasang a man e angawk angak rai nga ai. Dai rai nna, “ hpaji rawng ai ni hpe, tinang daw ai hpaji lam hta shi shanut kau nu ai” bai, “Hpaji rawng ai ni a myit mang ai lam kaman lila rai nga ai hpe Madu chye nga ai” nga nna Chyum Laika hta ka da nga ai. Shing rai masha a majaw hkum gumrawng nga mu. Yawng mayawng hte gaw nanhte hte seng nga ai.  Pawlu hte Apollo mung, Kehpa hte mungkan ga mung, hkrung mahkrung hte si hkrung si htan mung, ya e nga ai hte htawm hpang e nga pra na ra ai ni mung: dai yawng mayawng hte gaw nanhte hte seng ai baw hkrai rai nga ma ai. Nanhte mahtang Hkristu hte seng ai ni rai nga myit dai; Hkristu chyawm gaw Karai Kasang hte seng ai wa rai nga ai.

Ya hti ai gaw Karai Kasang a mungga rai nga ai.

KABU GARA SHIGA

Mahte 5:38-48

Ya hti na gaw Mahte a laika hta na Kabu Gara Shiga rai nga ai.

Yesu shi a sape ni hpe tsun mu ai gaw; Myi a matu myi, wa a matu wa, nga nna jaw da ai tara hpe nanhte na yu manit dai. Ngai nanhte hpe tsun made ai gaw: n hkru ai wa hpe hpa mung hkum tai mu. Na a hkra shabyi bye ai wa hpe, maga mi naw jaw ya u. Nang hpe tara dara nna, na a kata palawng la kau mayu ai wa hpe, na a ntsa palawng hpe mung jaw ya u. Nang hpe dip nna, deng mi sa shangun ai wa hte rau, deng lahkawng naw hkan sa u. Nang kaw hpyi ai wa hpe jaw u; nang kaw nna hkoi shap mayu ai wa hpe, hkum koi kau u. Na a baw sang wa hpe nang tsawra lu nna, na a hpyen wa hpe n dawng n yawt lu na ndai, nga nna tsun ai ga hpe nanhte na yu manit dai.

Ngai mahtang nanhte hpe tsun made ai gaw: nanhte a hpyen ni hpe tsawra mu; nanhte hpe zingri zingrat ai ni a matu akyu hpyi mu; shing rai yang gaw, sumsing lamu na nanhte a Kawa a kashu kasha ni tai wa na marin dai. Kaning rai nme law, n kaja ai ni hte kaja ai ni a ntsa e shi a jan hpe pru shangun nga ai; dinghpring ai ni hte n ding n hpring ai ni a ntsa e marang jahtu ya mu ai. Nanhte hpe tsawra ai ni hpe chyu sha tsawra yang gaw, nanhte hpe hpa shakawn shara nga a ta? Kang hta ai ni mung dai hte maren galaw ma ai n rai ni? Nanhte a nhpu nnau ni hpe sha hkrum shaga yang gaw, hpa shagrau shara nga na myit ta? Dai majaw, sumsing lamu na nanhte a Kawa kup tsup nga ai hte maren, nanhte mung kup tsup rai nga mu.

Ya hti ai gaw Madu a Kabu Gara shiga rai nga ai.