2020:LUSHA GAM LADAW LABAN (1) NA CHYUM LAIKA

LUSHA GAM AI LADAW LABAN (1)

March 1, 2020

Chyum Mungga Daw (1)

Npawt nhpang 2:7-9, 3:1-7

Ya hti na gaw Npawt nhpang laika hta na rai nga ai. 

Madu Karai Kasang gaw aga hta na ga yun hte shinggyim hkrang hpe shachyaw wu ai rai nna, dai masha a ladi hta hkrung nga ai nsoi nsa kawut bang ya ai: shaloi shinggyim masha gaw hkrung nga ai nsa wenyi rawng ai masha tai wa sai. Dai hpang, Madu Karai Kasang gaw, sinpraw maga na Edin ngu ai shara e, sun langai mi hkai lajang da wu ai: dai kaw e shi shachyaw ai shinggyim masha hpe nga shangun da wu ai. Ya Madu Karai Kasang gaw yu tsawm ai hte, sha na matu mai kaja ai hpun amyu myu hpe, ga hta nna tu shagun ai: dai sun ka-ang e asak jahkrung jaw ai hpun hte, kaja ai hte n kaja ai hpe chye ginhka shangun ai hpun mung tu nga ai. 

Ya lapu gaw, Madu Karai Kasang hpan da ai dusat nhprang mahkra hta hpaji grau rawng nga ai. Dai lapu gaw shawng na numsha hpe, ndai sun hta tu ai hpun mahkra hta na, nan nsha lu na myit dai, nga nna Karai Kasang kaja wa tsun sa ni? ngu nna Ewa hpe san wu ai.  Shaloi dai numsha gaw, ndai sun hta tu ai hpun ni a asi hpe an sha lu ga ai, rai timung, nan si ai n hkrum myit ga, sun a ka-ang e tu ai hpun a asi hpe nan n sha lu na myit dai; dai hpe mung hkum hkra mu, nga nna Karai Kasang tsun da nu ai, ngu nna lapu hpe htan ya wu ai. Dai rai nna lapu gaw, nan kaja wa teng teng n si na myit dai. 

Dai namsi hpe sha ai nhtoi hta nan a myi hpaw nna, kaja ai hte n kaja ai hpe chye ginhka na ra ai majaw, Karai Kasang zawn nan tai wa na marin dai; kaja wa Karai Kasang dai lam hpe chye chyalu rai nga ai, ngu nna dai numsha hpe tsun wu ai. Shaloi, hpun dai gaw sha na matu mai kaja nga ai mung, mada yu ai shaloi tsawm la ai hpe mung, hpaji lu la na matu masha ra sharawng ai hpun rai nga ai hpe mung, dai numsha mu jang, dai hpun hta na asi di sha wu ai: madu wa hpe mung shi gaw jaw wu ai rai nna, Adam mung sha wu ai. Dai shaloi shan lahkawng a myi hpaw wa nna, singgu krin rai nga ma ai hpe dum chye ma ai. Dai rai nna, shan gaw lakum lap chywi matut nna, tinang a matu dangpai galaw ma ai. 

Ya hti ai gaw Karai Kasang a mungga rai nga ai. 

Chyum Mungga Daw (2)

Roma 5:12-19

Ya hti na gaw Roma masha ni hpang de San Pawlu shagun dat ai laika hta na rai nga ai. 

Hpu nau ni e, Masha langai mi a jaw e shut hpyit mara mung¬kan ga e shang wa nna, mara a majaw si hkrung si htan shang nang wa ai hte maren, masha yawng mayawng mara kap nga ma ai majaw, nlang kaw e si hkrung si htan du bang wa sai. Mawshe a tara htung dingsa karai n nga yang, shut hpyit mara mungkan ga e nga nga sai; rai timung tara n da ai laman e mara shagun ai n nga ai.  Ngai tsun mayu ai gaw, Adam shut hpyit kau sai majaw, tara tawt lai ai amu n galaw ai ni a ntsa e pyi, Adam kaw nna Mawshe a aprat du hkra, si hkrung si htan up hkang nga sai: Adam gaw, “Du Na Ra Ai Wa” kumla rai nga ai.  Rai timung, chyeju kumhpa lam gaw, tara tawt lai ai lam zawn n rai; hpa majaw nga yang marai langai mi a jaw e yawng mayawng si mat sa yang gaw, Yesu Hkristu ngu ai masha langai mi a marang e, Karai Kasang a chyeju ningsang gaw, masha lanlak a matu grau nna law htam wa sai rai nga ai. 

Bai, dai chyeju kumhpa gaw, marai langai mi galaw ai shut hpyit mara hte grai shai nga ai; kaning rai nme nga yang tara tawt lai ai amu langai mi a jaw e, tara jeyang nhtawm daw dan ai lam byin pru sai. Ya e, tara tawt lai ai amu law law galaw ai hpang, ding hpring la lu hkra chyeju kumhpa pru wa sai. Dai hta kaga, marai langai mi tara tawt lai ai amu a majaw si hkrung si htan up hkang nga sa yang gaw, n taw n tsang ai chyeju ningsang hte, ding hpring shangun ai kumhpa hpe hkam la sai ni gaw, Yesu Hkristu ngu ai wa langai mi a marang e grau nna asak hkrung ai hte up hkang nga na ma ra ai. Dai rai nna, tara tawt lai ai amu langai mi a majaw, masha yawng hte gaw daw dan ai hkrum ma ai hte maren, ding hpring ai amu langai mi a jaw e, masha yawng mayawng ding hpring wa lu nna, asak sumdam lu la manu ai.19 Masha langai mi a n madat mara ai a majaw, nlang hte gaw mara kap ai ni tai wa sai hte maren, marai langai mi a madat mara ai lam a majaw, masha lanlak ding hpring ai ni tai lu na ma ra ai. 

Ya hti ai gaw Karai Kasang a mungga rai nga ai. 

KABU GARA SHIGA

Mahte 4:1-14

Ya hti na gaw Mahte a laika hta na Kabu Gara Shiga rai nga ai. 

Nat e gung lau ai hkrum na matu, dai Wenyi gaw Yesu hpe nam mali de woi sa wu ai. Ya, nhtoi mali shi ya, shana mali shi na tup, Yesu lusha gam ai hpang kawsi hkrum nga ai. Shaloi dai gung lau ai wa shi kaw du nna, Nang Karai Kasang a Kasha rai yang gaw, ndai nlung ni hpe Muk tai mu ga, nga nna hkang dat u, ngu wu ai. Yesu chyawm gaw, Masha gaw muk hte sha hkrung nga lu ai n rai; Karai Kasang a n-gup hta na pru ai mungga mahkra hte mung hkrung nga lu ai, nga nna ka da ai, ngu nna nat hpe htan ya wu ai. Shaloi nat gaw dai chyoi pra ai mare de Yesu hpe woi sa nna, nawku htingnu a nchyun e shadun da nhtawm, Nang Karai Kasang a Kasha rai yang gaw, na a hkum hpe le de jahkrat dat u; kaning rai nme law, nlung hta, na a lagaw n ahtu u ga, na a matu shi a lamu kasa ni hpe hkang da nna, shanhte a lata hta nang hpe pawn la na mara ai, nga nna Chyum Laika hta ka da ai, ngu nna tsun wu ai. 

Yesu gaw, Na a Madu Karai Kasang hpe nang chyam yu lu na n rai, nga nna ka da ai ga mung Chyum Laika hta rawng nga ai, ngu nna nat hpe htan ya wu ai. Bai, dai gung lau ai nat gaw, nachying tsaw ai bum ntsa de Yesu hpe woi lung nna, mungkan ga mungdan yawng mayawng hte, de a arawng sadang mahkra hpe madun dan nhtawm, Nang dingnyawm nna ngai hpe nawku yang gaw, ndai yawng mayawng hte hpe ngai nang hpe jaw na we ai, ngu wu ai. Shaloi Yesu gaw, Satan e, pru mat wa su; na a Madu Karai Kasang hpe nang nawku lu na rai nna, shi hpe chyu sha daw jau lu na ndai, nga nna Chyum Laika hta ka da ai, ngu nna shi hpe htan wu ai. Shaloi dai nat pru mat wa ai hte, lamu kasa ni Yesu hpe sa galaw daw ma ai. 

Ya hti ai gaw Madu a Kabu Gara Shiga rai nga ai. 

2020:PRAN WAN LADAW LABAN (7) NA MUNGGA

- Tara Jahprang 6:5 hta tsun da ai, “Na Madu, na Karai Kasang hpe na myit masin tup hkra tsawra lu na ndai”, nga ai.

- Jawjau 19:18 hta tsun da ai, “Na htingbu wa hpe na hkum hpe zawn tsawra lu na ndai”, nga ai.

- Mahte 5:44 hta Yesu tsun ai, “Ngai nanhte hpe tsun de ai: nanhte a hpyen ni hpe tsawra mu! Nanhte hpe zingri ai ni a matu akyu hpyi ya mu!” nga ai.

Shawng na Laban bat e sharin ya ai lam ni hpe matut sharin ya ai lam re.

1. Moi magri magra prat, hpyen hpe kaning di ra ai, ngu ai tara matsun ni__

- Israel amyu sha ni hkrai n rai, grup-yin na kaga amyu sha ni mung, masha langai ngai sat kau hkrum ai rai yang, dai htinggaw masha ni gaw masha sat ai wa hpe sat kau ai hku matai dawp na lit lu ai, ngu, hkam la ma ai. Law law lang mung mara lu ai wa gaw langai sha, matai dawp ai ngu yang langai hta jan nna sat kau ai, shada tai htang sat hkat ai amu matut matut nna galu mat wa ai, dai zawn jeyang hkat ai tara rai nga ai.

- Moshe a Tara, Bu Hkawm Laika hta (35:19) matai dawp ra ai, ngu nna matsun da ai.

- Dai zawn nga sharin shaga ai, Moshe a Tara, ai n hkrak ai lam ni law law-kaning rai Chyum Laika hta matsun da a hka? Moi na Karai Kasang hte ndai prat na Karai Kasang shai wa sai kun? Moi prat hta Karai Kasang grai ru ai yak ai, ya na prat hta chyamai wa ai kun? Myit yu hpa ni nga wa ai.

2 . Moshe a prat hta gaw mazut dik ai prat, machye machyang mung n law ai prat, “Asak a matu asak, myi a matu myi, lagaw a matu lagaw…(Trjhpr 19:21)” hta matsun ai lam gaw tara dik ai, jaw dik ai hku amyu masha yawng e hkap la ai aprat rai ma ai. Moshe a Tara matsun lawlaw hpe Karai e mung hkraw ya lawm ai zawn rai ngaai. Karai e nan matsun ai ga gaw n rai.

Dai ni na Chyum mungga Jawjau Laika hta rai jang, matai n dawp mai ai lam, tinang a htingbu wa hpe tinang a hkum hte maren tsawra lu na lam, Karai e nan Tara jahkrat ya ai. Dai aprat na masha ni a matu matai n dawp lu na, htingbu wa hpe tinang hkum hte maren tsawra lu na, ngu ai shaloi, ga-shaka hta lawm ai Irael amyu masha ni a lapran hkan ra ai tara hku sha hkam la ma ai (kaga amyu ni hpe mara n dat lu ai, matai dawp lu ai, dz., dz.).

3. Yesu a Tara Matsun hta (Mt. 5:44; Lk 6:27) hta, “Nanhte a hpyen ni hpe tsawra mu… nanhte hpe n ju n dawng ai ni hpe mai kaja ai amu ni galaw ya mu”, nga ai. Kasa ni hkum nan chye na kamsham hkap la na yak la ai.

Ndai zawn nga sharin shaga ai lam gaw kaga makam masham ni hta n nga ai. Hkristan ni chyu sha, ndai tara matsun hpe lu ai re. Yesu tsun ai ga ni hpe ka da ai hte raw raw lachyum hta la jang Yesu hpe tsun mayu ai, ngu hpe mung, ta-tut byin mai ai lam hte mung hprai shai wa lu ai__ Ga-shadawn, “Na shabyi bye ya ai wa hpe kaga maga mi mung naw ja ya u; na hpyen wa hpe tsawra u.....”

Yesu tsun lang ai a-ga gaw Israel/ Palestine e tsun lang ai lailen hku tsun ai rai nga ai. Tinang tsun mayu ai lam hpe grau namnak nga hkra, lai lai sawng sawng ngu tsun ai a’htung a’lai nga ai.

Tinang a hpyen hpe tinang tsawra ai jinghku wa hpe zawn kaning di n tsawra lu na re. Sharin ya ai lam hkrak gaw n ju n dawng ai myit hte dawp ai amu n galaw na lam, matai dawp hkat ai a marang e mara mayat jat law htam jat re ai masa kaw na lawt lu na lam sharin ya ai re.

Shabyi bye katut nna kaga maga mi hpe teng sha ja ya na lam Madu Yesu tsun mayu ai n rai. Kahtap machyi ai lam n nga hkra she koi yen ra. Kaja wa sharin ya mayu ai lam gaw: tinang hkum hpe maga ai, ngu ai shaloi mungkan masha ni zawn, gale amyu ni zawn, ra ai hta jan nna galaw ai lam n byin na matu she rai nga ai. Mt. 5:47, “Hpyi ai wa hpe jaw mu, sa hkoi ai ni hpe hkoi jaw na hkum ningdan…” ngu ai ga: Ka da ai hte maren hkan na matu n rai nga ai. Lagawn nna hpyi ai, masu magaw ai hku hpyi ai, hkoi ai ni hpe rai tim jaw mu, hkoi ya mu, ngu ai n rai.

Kaja wa ra kadawn ai ni hpe byin mai ai daram jaw na; bai jaw bai wa na n lu ai ni sa hkoi jang mung kaja wa ra kadawn ai wa hpe tinang byin mai ai daram garum ya ai,amyat n la ai hkoi jaw ai, bai wa lu na matu aten sharen da ya ai, dz., dz., matsan garum ya na lam sharin shaga ya ai lam she re.

4. Yesu shi hkum nan zingri zingrat hkam la nna wudang ntsa e jen noi si hkam ai gaw shi sharin shaga ai lam yawng hpe sakse tai ya nu ai.Mungkan e shada matai dawp hkat ai marang e shimlum ai, nga pyaw ai mungkan n tai lu ai. Mara dat ya nna tinang n hparan lu ai amu yawng hpe Karai a lata hta nawngda/ ma da ai lam chyu sha, simsa shimlum ai mungkan hpe gaw sharawt lu ai.

2020:PRAN WAN LADAW LABAN (7) NA CHYUM LAIKA

PRAN WAN LADAW HTA LABAN 7

February 23, 2020

CHYUM MUNGGA DAW 1

Jaw Jau ai laika 19:1-2, 17-18

Ya hti na gaw Jaw Jau ai laika hta na rai nga ai.

Madu nan Mawshe hpe tsun wu ai gaw: Israela a amyu ting hpe ning ngu tsun u: Ngai Madu, nanhte a Karai Kasang Chyoi pra nga nngai hte maren, nanhte mung chyoi pra nga mu. Na a nhpu nnau wa hpe n dawng n yawt ai myit hkum rawng u ga. Na a manang wa mara lu yang, shi hpe teng teng shadum jahprang na ra ai. Shing rai ai a majaw nang mara n lu na ndai. Na a amyu masha ni hpe nang hkum nan matai nhtang lu na; na a htingbu wa a mara hpe hkum matsing da u; na a htingbu wa hpe na a hkum hte maren, nang tsawra lu na ndai: Ngai gaw Madu rai nga nngai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Korinhtu 3:16-23

Ya hti na gaw Korinhtu masha ni hpang de San Pawlu shagun dat ai laikalangai hta na rai nga ai.

Hpu nau ni e, Nanhte gaw Karai Kasang a nawku htingnu rai nga nna, Karai Kasang a Wenyi nanhte hta e rawng nga ai hpe n chye nga myit ni? Marai langai ngai Karai Kasang a nawku htingnu hpe jahten sharun kau yang gaw, Karai Kasang dai wa hpe jahten sharun kau na ra ai; kaning rai nme law, Karai Kasang a nawku htingnu chyoi pra nga ai; nanhte mung dai htingu nan rai nga myit dai. Kadai rai timung, hkum myit shut mu: nanhte hta na marai langai ngai, ndai mungkan ga na hpaji madang hte sawn yu nna, ngai gaw hpaji rawng ai wa rai nga nngai, nga nna myit lu yang, hpaji byeng-ya majing lu la na matu, shi angawk angak tai wa na ra ai.

Hpa majaw nga yang, ndai mungkan ga a hpaji byeng-ya gaw, Karai Kasang a man e angawk angak rai nga ai. Dai rai nna, “ hpaji rawng ai ni hpe, tinang daw ai hpaji lam hta shi shanut kau nu ai” bai, “Hpaji rawng ai ni a myit mang ai lam kaman lila rai nga ai hpe Madu chye nga ai” nga nna Chyum Laika hta ka da nga ai. Shing rai masha a majaw hkum gumrawng nga mu. Yawng mayawng hte gaw nanhte hte seng nga ai.  Pawlu hte Apollo mung, Kehpa hte mungkan ga mung, hkrung mahkrung hte si hkrung si htan mung, ya e nga ai hte htawm hpang e nga pra na ra ai ni mung: dai yawng mayawng hte gaw nanhte hte seng ai baw hkrai rai nga ma ai. Nanhte mahtang Hkristu hte seng ai ni rai nga myit dai; Hkristu chyawm gaw Karai Kasang hte seng ai wa rai nga ai.

Ya hti ai gaw Karai Kasang a mungga rai nga ai.

KABU GARA SHIGA

Mahte 5:38-48

Ya hti na gaw Mahte a laika hta na Kabu Gara Shiga rai nga ai.

Yesu shi a sape ni hpe tsun mu ai gaw; Myi a matu myi, wa a matu wa, nga nna jaw da ai tara hpe nanhte na yu manit dai. Ngai nanhte hpe tsun made ai gaw: n hkru ai wa hpe hpa mung hkum tai mu. Na a hkra shabyi bye ai wa hpe, maga mi naw jaw ya u. Nang hpe tara dara nna, na a kata palawng la kau mayu ai wa hpe, na a ntsa palawng hpe mung jaw ya u. Nang hpe dip nna, deng mi sa shangun ai wa hte rau, deng lahkawng naw hkan sa u. Nang kaw hpyi ai wa hpe jaw u; nang kaw nna hkoi shap mayu ai wa hpe, hkum koi kau u. Na a baw sang wa hpe nang tsawra lu nna, na a hpyen wa hpe n dawng n yawt lu na ndai, nga nna tsun ai ga hpe nanhte na yu manit dai.

Ngai mahtang nanhte hpe tsun made ai gaw: nanhte a hpyen ni hpe tsawra mu; nanhte hpe zingri zingrat ai ni a matu akyu hpyi mu; shing rai yang gaw, sumsing lamu na nanhte a Kawa a kashu kasha ni tai wa na marin dai. Kaning rai nme law, n kaja ai ni hte kaja ai ni a ntsa e shi a jan hpe pru shangun nga ai; dinghpring ai ni hte n ding n hpring ai ni a ntsa e marang jahtu ya mu ai. Nanhte hpe tsawra ai ni hpe chyu sha tsawra yang gaw, nanhte hpe hpa shakawn shara nga a ta? Kang hta ai ni mung dai hte maren galaw ma ai n rai ni? Nanhte a nhpu nnau ni hpe sha hkrum shaga yang gaw, hpa shagrau shara nga na myit ta? Dai majaw, sumsing lamu na nanhte a Kawa kup tsup nga ai hte maren, nanhte mung kup tsup rai nga mu.

Ya hti ai gaw Madu a Kabu Gara shiga rai nga ai.

2020:PRAN WAN LADAW LABAN (6) NA MUNGGA

Madu Yesu dinghta ga de du sa ai lam gaw, Moshe a Tara hte myihtoi ni a sharin shaga ai lam ni hpe shayat kau, shayawm kau na matu n rai; shakup shatsup ya na matu she du sa ai, nga ai. Galoi prat, gara mungdan, uhpung kaw rai tim, tara kata ai, tara upade n tawn ai n nga lu ai. Masha shada kanawn mazum ai lam hta jaw ang ai hku kanawn mazum lu na matu rai nga ai. Tara n jahkrat da jang n rap ra ai lam law law, shinggyim hpawng hta hkrup mara re ai masa nga wa na sha rai nga ai.

Tara ngu ai, upade ngu ai kade kaja ai hku ka jahkrat matsun ya ai rai tim, “Tsawra Myit/Matsan Dum Myit” ngu ai n lawm ai rai yang, n kup tsup lu ai. Moi prat hte Yesu a prat na masha ni a matu “Moshe a Tara” hpe ra n rawng ai, reng grau dik htum ai hku shadu ma ai; rai tim kup tsup ai n rai. Tara hpe hpya run kau na matu n rai, jahkum shatsup ya na matu she Yesu gaw dinghta ga de sa du ai.

Yesu gaw Karai a mungdan masha ni kaning re ai tara hpe hkan shatup ra ai lam sharin ya ai___

Yesu a prat e jau, jaiwa, hparishe ni gaw Moshe a Tara hta lai jan nna, tara matsun law law jat da ya ma ai. Dai majaw, masha ni tara hkan n mai hkra lit shali da ya ma ai. Grau nna laika n chye ai ni, matsan masha ni, moshe a tara hpe hkan shatup na n mai byin ai kaw du mat wa ai.

Yesu gaw Tara Kanu (10), Moshe a Tara hpe hpya run kau na matu n rai, jahpring shatsup ya na matu she du sa ai, nga ai. Karai Kasang hpe tup hkra tsawra lu na hte tinang a htingbu wa hpe tinang a hkum hte maren tsawra lu na, dai hta tara yawng hpe shajup shabawn da ai, nga ai.

Tara Kanu (10) hpe tawt lai ai, ngu ai shaloi, tsawra myit hte mung, rap-ra tara hpe mung, tawt lai ai lam she rai nga ai. Rap-ra tara hpe sha ting ting ngu hkan shatup nna matsan dum n chye ai rai yang “Myi a matu myi, wa a matu wa,”ngu nna matai dawp htang na rai nga ai. Yesu mahtan ning nga ai, “Na hpyen wa hpe nang tsawra lu na ndai’, nga ai.

Yawhan 13:34 hta tsun da ai, “Ngai nanhte hpe tara ningnan jaw de ai: nanhte shada tsawra mu”, nga ai. Dai gaw, tara nga manga hpe shatup ya ai nan rai nga ai. Kaja wa sha sumsing lamu na Kawa langai a kasha hkrai rai yang, shada tsawra matsan dum hkat chye shajang ai raiyang, tsawra ra ai tara matsun hta jan nna kaga hpa tara mung matsun ra na n rai nga ai. Shinggyim masha shada a lapran e byin ai manghkang yawng gaw “Shada tsawra mu” ngu ai tara hpe tawt ai majaw rai nga ai.

2020:PRAN WAN LADAW LABAN (6) NA CHYUM LAIKA

PRAN WAN LADAW HTA LABAN 6

February 16, 2020

CHYUM MUNGGA DAW 1

Sirak 15:15-20

Ya hti na gaw Sirak a laika hta na rai nga ai.

Ngai sha e, Nang myit ra yang gaw, tara lam ni hpe hkan lang nna, Karai Kasang ra sharawng ai hpe, kangka ai hte hkan shatup lu na ndai. Karai Kasang gaw na a man e wan hte hka hpe tawn da sai: na a lata ladawn nna, nang grau ra ai mahtang hpe lata la u. Asak hkrung lam hte si htan lam hpe, masha a man e tawn da sai rai nna, shi lata la ai mahtang shi hpe jaw na ra ai. Madu a hpaji byeng-ya nachying sung la ai: shi mahkra dang chye ai hte yawng mayawng hpe mu mada nga lu ai. Karai Kasang gaw shi hpan da ai masha shagu hpe shi a myi hte mada yu nna, masha galaw ai amu mahkra hpe shi matsing da nga ai. Madu Karai Wa gaw masha kadai hpe mung shut hpyit mara galaw shangun ai n rai; tara tawt lai na matu mung, shi ahkang jaw wu ai n rai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Korinhtu 2 6-10

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, mungkan hpaji hparat hte ngai n hkaw dan ai ngu timung, Hkristan nga sat nga sa ai lam hta kung hpan wa sai ni hpe, hpaji byeng-ya amyu mi hkaw tsun dan ga ai: ndai mungkan ga na hpaji byengya n rai; hten bya hkrum magang ra ai, ndai mungkan ga hpe up hkang ai du ni a hpaji byengya mung n re ai sha, Karai Kasang a hpaji byeng-ya nan rai nga ai. Dai gaw, Karai Kasang e makoi magap da nna, shi a sung la ai hpaji hparat rai nga ai.

Anhte kup tsup ai hku hpung shingkang lu la na matu, moi chyaloi nhkoi kaw nna Karai Kasang yaw shada ai lam rai nga ai. Ndai prat na up hkang ai du ni kadai mung, dai hpaji hparat hpe n chye ma ai; chye taw gaw, hpung shingkang arawng sadang mahkra a Madu magam hpe, shanhte Wudang hta n jen da na ma ai. Rai timung, Chyum Laika hta ka da nga ai hte maren, “Myi e n mu, na hte n na yu nna, masha a myit hta n hkawn n pru ai lam, Karai Kasang gaw shi hpe tsaw ra ai ni a matu lajang da nu ai,” nga nna tsun dan ga ai. Karai Kasang gaw Wenyi a lata hte ndai hpaji hparat hpe anhte kaw shapraw shadan da mi ai. Dai Wenyi mahtang Karai Kasang a sung htum ai du hkra yawng mayawng hte hpe sagawn yu nga ai.

Ya hti ai gaw Karai Kasang a mungga rai nga ai.

KABU GARA SHIGA

Mahte 5:20-22, 27-28, 33-34, 37

Ya hti na gaw Mahte a laika hta na Kabu Gara Shiga rai nga ai.

Yesu shi a sape ni hpe tsun mu ai gaw: Tara Sara ni hte Hparishe ni hta, nanhte grau dinghpring ai n rai myit yang gaw, sumsing lamu a mungdan hta nanhte kaja wa n shang lu na myit dai. Masha hpe hkum sat mu; sat kau ai wa gaw jeyang daw dan ai hkrum na ra ai, nga nna anhte a ji wa ni hpe jaw da ai tara nanhte na yu manit dai. Ngai mahtang nanhte hpe tsun made ai gaw; tinang a kahpu kanau hpe n ju n dawng let masin pawt ai wa kadai rai timung, jeyang ai hkrum lu na. Masha num hkum shaw et, nga nna tsun da ai ga hpe nanhte na yu manit dai. Ngai mahtang nanhte hpe tsun made ai gaw; kayut ai myit hte numsha hpe yu yu ai wa gaw, shi a myit hta, dai numsha hte num shaw ai amu galaw nu ai. Bai, masu let nang n dagam lu na ndai; nang ga sadi jaw da ai hte maren Madu kaw nang hkan shadik lu na ra ai, nga nna nanhte a nji nwa ni hpe jaw da ai tara lam hpe nanhte na yu manit dai. Ngai mahtang nanhte hpe tsun made ai gaw; dagam da ai ga hpa rai timung hkum tsun nga myit. Nanhte a ga gaw, rai yang gaw re ai, n rai yang gaw n re ai, ngu nna tsun mu; dai hta lai ai ga n lang hte gaw n kaja ai wa hte seng nga ai.

Ya hti ai gaw Madu a Kabu Gara Shiga rai nga ai.

2020:PRAN WAN LADAW LABAN (5) NA MUNGGA

Mai kaja ai amu, matsan dum chye ai amu, jaw lu jaw sha chye ai amu…. Kade manu dan ai lam Isaiah a Laika hta tsun da ai: “Shaloi, jahpawt manap e rawt lung wa ai ninghtoi zawn nang mung htoi wa lu na rin dai; na a wunma hpye hkang mung a’lawan mai tsai lu na ra ai”, nga ai.

Mai kaja ai baw, san tsawm ai baw yawng hpe ninghtoi a amu ni, ngu shamying ga ai; n hkru n kaja ai baw yawng hpe ningsin a amu ni, ngu nna amyu htunghking shagu hta, makam masham shagu hta tsun lang ma ai. Arawng sadang lu ai baw yawng hpe shadan dan mayu ga ai; hkrit ai baw, kaya ai baw yawng ningsin hta she byin ai, mayun mayoi rai nna sha shabyin ai.

Karai Kasang hkum nan, shinggyim amyu hpe shadan dan shagu ngu na daram, wan shinglam zawn, htoi kabrim ai ninghtoi zawn rai nna shadan dan ai. Bai, Yesu hkum nan mung shara law law hta shi ninghtoi re ai lam tsun da ai:

- “Mungga gaw ninghtoi majing rai ai hte yawng hpe jahtoi ya ai” (Yn. 1:9)

- “Ngai gaw mungkan a ninghtoi rai li ai” (Yn. 8:12; 9:5)

- “Shi a myi-man jan zawn htoi wa ai; shi a palawng mung ninghtoi zawn htoi wa ai” (Mt. 17:2)

- Yawhan Baptista mung, anhte mung, ninhtoi n rai ga timung, jan a marang e htoi lu ai shata zawn, anhte mung ninghtoi tai lu na ga ai: “Nanhte gaw mungkan a ninghtoi rai mi ai; mungkan a jum rai mi ai..” nga ai.

Anhte wunpawng sha ni hta htinggaw mying langai gaw “Jum” ngu ai mi nga ai. Chyum Laika e tsun ai lachyum hkan ai gaw n rai ang ai. Rai tim kadai amyu n nga, moi prat hta gaw jum a manu dan ai lam hpe chye ma ai. Anhte a prat hta jum hpe manu hpa hpa hte mari la mai timung, jum a akyu rawng ai lam, manu dan ai lam hkrat mat, yawm mat ai lam n nga ai. Kaga jat na n tsun ra sai.

Anhte Hkristu a sape ni, Karai a kasha ni, jum zawn yawng hpe namchyim jaw ya ai ni, hten yat mat wa ai kaw na makawp maga ya ai ni tai ra ga ai. Yawng hpe akyu jaw ya ai ni tai ra ga ai. Shawng na chyum mungga daw hta matsun da ai lam ni hpe shatup ra ga ai.

Ninghtoi, ngu ai n nga mat ai rai yang, anhte kade nga yak na lam hpe sawn yu mai ga ai. Ningsin chyip re ai shara, aten hta kaning di n hkawm lu ga ai. Hpungtang hpaji ninghkrin ni tsun ai, jan ninghkawng a ninghtoi n htoi ya ai ngap mat ai rai yang, hpa kaning re ai hpun kawa namlaw namlap mung n tu lu ai, de a marang e shinggyim masha hte ashu ashan ni gaw si htum mat lu ai, nga tsun ma ai. Ninghtoi a manu dan ai lam, ahkyak ai lam ni hpe mung kaga mi jat tsun n ra sai.

Lahkawng ngu na Chyum Mungga daw hta San Pawlu gaw Yesu Hkristu hte shi a wudang a lam sha hkaw tsun ai, nga ai. Kahkyin gumdin ai lam ningra nga ai Korintu masha ni hpe shading sharai lam matsun ya lu ai gaw wudang sha re ai lam tsun ai__ tsaw ra myit hte asak hkrung nga lu na lam, shada mara raw dat hkat chye na lam, shagrit shanem ai hte kaga masha ni hpe akyu jaw ai lam sha tsun shaga hkan galaw na lam ni rai nga ai. Shing di ai rai yang, anhte hta rawng ai gumrawng gumtawng ai myit, tingkyeng akyu tam ai myit ni hpe shamai shatsai ya lu na rai nga ai.

Kashin kamun hte ninggun shaja hkam la ai a jaw e, Hkristan masha ni gaw Chyoi PraWenyi hta asak hkrung ai, dai Wenyi a myit jasu jahprang ai chyeju lu la ga ai. Shut hpyit mara hta lup nan mat ai rai yang, Karai hte hka mat ai a jaw e, tinang a prat sinchip mat lu ai, hpoi mat ai jum hte bung mat wa lu ai. Mungkan ga a jum, mungkan ga a ninghtoi tai nna n mu lu ai, sumsing mungdan na Kawa Karai a hpung shingkang arawng sadang hpe shagrau ya na mai kaja nga ai.

2020:PRAN WAN LADAW LABAN (5) NA CHYUM LAIKA

PRAN WAN LADAW HTA LABAN 5

February 9, 2020

CHYUM MUNGGA DAW 1

Esaia 58:7-10

Ya hti na gaw myihtoi Esaia a laika hta na rai nga ai.

Madu ning nga ai: krawsi hkrum ai wa hpe lusha jaw nna, nta n lu ai matsan mayan wa hpe shingbyi shara tam jaw mu; hpun palawng n lu ai wa hpe shabu jahpun nna, tinang a baw sang ni hte htingbu htingbyen ni hpe hkum koi kau mu. Shing rai na a nhtoi gaw, jahpawt manap na nhtoi zawn htoi wa nna, na a nma hta ashan alawan bai tu na ra ai; na a ding hpring ai lam na a shawng e sa wa nna, Madu a hpung shingkang na hpang e sin langa tai na ra ai. Shaloi nang shaga yang, Madu htan na ra ai; nang hpyi jahtau yang, Ngai nang e nga nga nngai, ngu nna shi tsun na ra ai. Nang gaw, dip sha ai hpe mung, n teng n man ai hku mara shagun ai hte, n hkru ai ga hpe mung, na a kata na la kau ya nna, krawsi hkrum ai wa hpe na a shat jaw sha ai hte, nni nhkri hkrum ai wa hpe shalan shabran ya ai rai yang, na a nhtoi gaw nsin hta htoi wa nna, na a sin mak ai gaw jan pungding zawn htoi tu na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Korinhtu 2:1-5

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, ngai nanhte kaw nnan sa du ai shaloi, grai tsawm madat pyaw ai ga hku, mungkan hpaji hparat hte, Karai Kasang a teng man ai lam nanhte hpe hkaw dan ni ai n rai. Ngai nanhte hte rau nga nga ai shaloi, Yesu Hkristu a lam, rai sa, Wudang hta jen da hkrum ai Hkristu a lam hta kaga, ngai hpa mung n tsun shana na nga nna myit da se ai. Dai shaloi e, nye a n-gun atsam hpe n kam hpa ai sha, hkrit gari kaba hte nanhte kaw du sa nngai. Ngai nanhte hpe tsun ai ga hkaw dan ai kabu gara shiga gaw, shalen chye ai hpaji byeng-ya ga n re ai sha, Chyoi pra ai Wenyi a atsam rawng ai sakse ga rai nga ai. Dai re ai majaw, nanhte a makam masham gaw, masha a hpaji hparat hte n rai, Karai Kasang a atsam hte sha grin nga lu ai.

Ya hti ai gaw Karai Kasang a mungga rai nga ai.

KABU GARA SHIGA

Mahte 5:13-16

Ya hti na gaw Mahte a laika hta na Kabu Gara Shiga rai nga ai.

Yesu shi a sape ni hpe tsun mu ai gaw: nanhte gaw mungkan ga a jum rai nga myit dai; jum mahtang hpoi mat yang gaw, hpa hte jashum ya lu na rai ta? Shinggan de kabai kau nna, masha ni e kabye ai hta kaga, hpa asung n shang lu ai. Nanhte gaw mungkan ga a nhtoi rai nga myit dai. Bum ntsa e de da ai mare hpe shinggang kau lu na n rai. Pyending shatu nhtawm, hpai bung npu e kadai ntawn da ai; nta masha yawng hpe jahtoi ya na matu, pyending shadun hta tawn da ma ai. Dai rai nna, masha ni gaw nanhte a kaja ai amu ni hpe mu lu nna, sumsing lamu na nanhte a Kawa hpe shagrau sha-a lu mu ga, shanhte a man e nanhte a nhtoi jahtoi ya mu.

Ya hti ai gaw Madu a Kabu Gara shiga rai nga ai.

MA YESU HPE NAWKU HTINGNU DE AP YA AI POI SHANI NA MUNGGA

Myihtoi Maliki Laika Madu Yesu rai n du sa shi ai aten, shaning tsa hku tau nau tsun da ai ga re: “Dai nanhte a’la nga ai ga-shaka a madu gaw Nawku Htingnu e a’kajawng sha du pru na ra ai” nga ai. Shi hpe kadai mi shingdan da lu na n rai; shi gaw ja hpe jasan ai wa, ja hpe ju galip ai wan rai na ra ai, nga ai.                       Kaja wa dai Madu du sa ai shaloi, shawa masha ni, mungkan masha ni n chye kau dat ma ai. Nawku Htingnu e shani shana akyu hpyi nna nga nga dinghpring ai masha (nawngjau aya lu ai wa rai sam ai), Isarael hpe shalan shabran ai wa du na nhtoi hpe a’la dingda nga ai wa, Simeon ngu ai wa dai Htingnu e nga nga ai.Bai, shi zawn dinghpring ai gaida jan, asak 84 rai sai. Shan gaw dai du sa na wa, Karai a ga-shaka hpe n sim n sa, akyu hpyi let a’la nga ma ai. Shan chyu sha mu lu ai, chye lu ai ahkaw ahkang lu la ma ai.

Chyum Laika chye dik ai jau ni, jaiwa (tara sara) ni Yesu hpe n chye dat ma ai. Dai jau ni hte jaiwa ni Yesu kaba wa ai hpang law law lang hkrum katut ma tim, Karai a ga- shaka re ai hpe n hkap la lu ai hte, hpyen tai nna Yesu hpe jen sat kau shangun ai ni tai ma ai. Yesu gaw gawng kya ai masha hkum shan dagraw la ai, ma hkalung langai tai lai wa ai; shi sharin shaga ai lam ni gaw dai prat na hparishe ni, Jau ni, jaiwa ni hpe wan hte ju galip ya ai hte bung ai. Shanhte n hkam lu ma ai. Shanhte Yesu hpe kam ai hku zingri sat ma ai; shi a sharin shaga ai lam ni hpe hkan pat shingdang ma ai. Hkrung rawt ai wa a atsam hte Kasa ni matut hkaw tsun ma ai. Kadai wa shingdang lu na a hka?

Anhte mung, dai Karai a ga-shaka re ai Yesu a lam law law sharin hkam la sa ga ai; Yesu hpe labau maumui na masha langai hku sha sawn la kau ga ai kun? Dai rai yang, anhte mung hparishe ni, Yesu a prat na jau ni, jaiwa ni hte maren tai wa lu ga ai.

Yesu hta byin ai lam ni hpe bau kawa Yosep hte kanu Maria, shan n chye madat ai, myit hta sawn hkrang lu ai lam n nga tim mabyin ni hpe kraw hta kyem da ma ai, nga ai. Anhte prat ting hkaja ga tim, lachyum tup hkra n chye lu na ga ai. Anhte a n chyang ai lam ni, myit ja ai, ai n kam ai, dinghta myit n tsai lu ai, dz., dz., re ai shut hpyit mara ni hpe ju galip kau na shangun ga.

Lahkawng ngu na Chyum Mungga daw, Hebre Laika hta tsun da ai_ shi gaw anhte a kahpu ba majing, gawng kya ai shinggyim masha ni hpe chye ya ai, matsan dum chye dik ai wa, chye na dik ai wa re. Dai Karai a ga-shaka hpe kam sham hkap la nna, shi hte rau, tinang nang a hkum Karai Kasang hpe ap nawng (ma ya) lu na ga ai.

MA YESU HPE NAWKU HTINGNU DE AP YA AI POI SHANI NA CHYUM LAIKA

MA YESU HPE NAWKU HTINGNU DE UP YA POI 

Feb 2,2020

CHYUM MUNGGA DAW

1 Malahki 3:1-4

Ya hti na gaw myihtoi Malahki a laika hta na rai nga ai.

1Madu Karai Kasang ning nga tsun wu ai gaw; yu mu, nye a kasa hpe ngai shangun dat na nngai. Shi gaw nye a man e lam lajang na ra ai. Shaloi nanhte hkan tam ai Madu gaw, Shi a nawku htingnu de akajawng sha du na ra ai. Nanhte ra marit nga ai ga shaka a kasa gaw, kaja wa shi du sa ra ai, nga nna zaw nawng zaw wa up ai Madu tsun ai. 2Rai timung, shi du ai nhtoi hpe kadai hkam sharang lu na rai ta? Shi paw pru yang, kadai tsap nga lu na rai ta? Kaning rai nme nga yang, shi gaw janghkam wa a wan hte, rai hkrut ai wa a sapya zawn rai nga ai. 3Janghkam wa dung let, gumhpraw hpe jasan jaseng ai hte maren, shi mung tingyang hta dung let, Lewi a kashu kasha ni hpe jen yu nna, aja hte gumhpraw zawn, shanhte hpe jet shangun na ra ai. Shing rai, shanhte gaw ding hpring ai hku hkan nna, Madu hpe hkungga nawng ya na mara ai. 4Dai shaloi e, Yuda hte Yerusalem masha ni yawng nawng ya ai hkungga gaw, moi chyaloi nhkoi na aten e zawn, Madu ra sharawng ai kumhpa tai na rai ai, nga nna mahkra dang chye ai Madu tsun wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Hebre 2:14-18

Ya hti na gaw Hebre masha ni hpe shagun dat ai laika hta na rai nga ai.

14Hpu nau ni e, Karai Kasang shi a kashu kasha shatai ai ni yawng hte gaw, masha a hkum shan hte sai maren hkan dagraw ai zawn, Yesu mung, si hkam ai a marang e, si lam up ai gumlau nat hpe shabyak kau lu na hte, 15si lam hpe hkrit ai majaw, prat tup yam nga ai ni yawng hpe shalawt dat na matu, masha a hkum shan hpe dagraw hkam la nu ai. 16Kaja wa teng teng, lamu kasa ni hpe hkap garum na Shi sa ai n rai, Abraham a aru arat hpe hkap garum na she shi sa ai rai nga ai. 17Dai re ai majaw, Yesu gaw Karai Kashang hte seng ai lam hta, matsan dum chye ai hte kangka re ai, hkungga nawng ai agyi tai nna, shinggyim masha ni a matu, mara raw ai gawng malai hkungga jaw lu u ga, lam shagu hta shi a kahpu kanau ni hte bung hkra Shi tai na ra ai. 18Kaning rai nme law, agung alau hkrum let, Shi hkum nan nni nkri hkrum yu sai majaw, agung alau hkrum ai ni hpe Shi shalan shabran lu nga ai.

Ya hti ai gaw Karai Kasang a mungga rai nga ai.

KABU GARA SHIGA 

Luka 2: 22-32

Ya hti na gaw Luka a laika hta na Kabu Gara Shiga rai nga ai.

22Mawshe a tara hte maren Maria a jasan jaseng ai nhtoi gu jang, “ Shadang sha alat Madu a matu chyoi pra ai ngu lu na” ngu nna, 23Madu a tara hta ka da ai majaw, Ma Yesu hpe Madu kaw sa ap ya na matu mung, Madu a tara hta tsun da ai hte maren, 24uhkru du lahkawng, shing n rai, u ra lahkawng hkungga nawng ya na matu mung, Maria yan Yosep dai Ma hpe Yerusalem mare de woi sa ma ai. 25Ya, Simun mying ai masha langai mi Yerusalem mare e nga ai; dai wa gaw ding hpring ai hte tara hkungga nna, Israela hpe shalan shabran na lam myit mada nga ai wa rai nga ai. Chyoi Pra ai Wenyi mung shi a ntsa e nga nga ai. 26Shi gaw, Madu a Hkristu hpe garai n mu yang, si na n rai, nga nna Chyoi Pra ai Wenyi hte madun ai lu la nu ai. 27Dai wa gaw Chyoi Pra ai Wenyi a chyeju hte Nawku Htingnu kata de du sa wu ai; kanu yan kawa gaw Ma Yesu hpe tara htung hte maren di ya na matu, woi sa mu ai. shaloi, 28Simun gaw shi a lata hte dai ma hpe pawn la nna, Karai Kasang hpe shagrau sha-a let, tsun wu ai gaw; 29N-gawn Madu e, Na a ga hte maren Na a ali ama hpe, ngwi pyaw ai hte ya e wa shangun lu na ndai; kaning rai nme law, 30masha amyu shagu a man e Nang lajang da nna, 31maigan amyu ni hpe jahtoi dan na nhtoi hte, 32Na a amyu Israela a hpung shingkang lam rai nga ai, Na a hkye hkrang la ai lam hpe, nye a myi hte chyaw ngai mu lu se ai, nga nna tsun wu ai.

Ya hti ai gaw Madu a Kabu Gara Shiga rai nga ai

2020:PRAN WAN LADAW LABAN (3) NA MUNGGA

Isaiah tsun da ai ga, Zebulun, Nahptali, amyu masha hpan law law kayau nga ai buga hta ninghtoi htoi tu sai, nga ai ga Yesu galaw ai amu hta dik wa sai lam, Kabu Gara Shi-ga e sakse hkam ya ai. Yerusalem gindai dun masa hpe tawt nna, Israel amyu masha ni sha n rai, maigan amyu masha ni mung, Karai a mungga hpe na la lu ma ai, ngu ai lam re. Yesu gaw yawng hpe myit malai lu shajang na lam saw shaga ai.

“Galile”, Yerusalem hte tsan gang ai, maigan hpyen ni Israel hpe padang dip la dap jung ai buga, maigan sai kayau ai masha ni law law nga ai buga re. Dai majaw ningsin chyip, re ai buga ngu hkam la ma ai. Shing rai, ningsin chyip re ai buga hta ninghtoi kaba htoi tu wa ai, ngu ai gaw Karai a amyu masha ni a matu n mai byin ai, ngu na daram sawn kau ma ai. Buga masha ni hpe mung Yerusalem grup-yin na masha ni e yu kaji da ma ai. N tak ai buga, shara, masha ni hta Karai a chyeju n- hpaw n-ya jaw ya ai.

Kade kabu hpa re, nga yang “Nai mam dan la shu la ai aten na zawn kabu lu na ma ai”; “Hpyen ni hpe padang dip la lu ai shaloi lanep garan la lu ai shaloi kabu ai zawn kabu lu na ma ai”, nga ai. Isaiah tsun da ai ga gaw shi a prat hta mung, hpang shaning law law, tsa ning hti nna mung n teng wa ai. Maigan hpyen langai hpang langai Galile hpe madu la dap jung lai wa ma ai. Jahtum e Yerusalem gindai dun myit masa rawng ai ni a manoi ai myit, rai dum ai myit, myit mada lu ai lam, ndai ni yawng hpe agrawp kau ya ai gaw Yeruslem Mare hte Israel mungdan jahtum e hten run mat ai, mungdan mung shamat kau ai kaw kre mat ai. Dai gaw sin chyip dik ai lam rai nga ai.

Messiah/ Hkye La Madu hpe la dingda nga ai Israel amyu masha ni shadu ai gaw, dai Messiah hpyen ninggun atsam kaba hte hpyen ni yawng hpe gasat dang, padang dip la lu nna shingkang shingwang kaba dik ai mungdan bai gaw sharawt woi na Messiah hpe a’la lai wa ma ai.

Shinggyim amyu masha ni, dai sin dik htum ai, chyip mak dik ai shara_ ndai dinghta ga rai nga ai. Shut hpyit mara hte hpring ai mungkan ga: shinggyim masha ni gaw jet ai ninghtoi (chye chyang ai lam), kabu gara ai lam (myit pyaw myit dik lam), awm dawm/ freedom (tinang myit shadang lu ai) lam_ ndai ni hpe tam ai; ningsin hta abram tam nna n lu la mai ai hte bung ai. Hkristu Yesu chyu sha, dai lam ni hpe jaw ya lu ai.

Yesu du sa nna Kabu Gara Shi-ga hkaw tsun hpang ai lam gaw Isaiah tsun da ai ga dik wa na matu hpang wa ai re (John Paul II gaw dai mabyin hpe myit sumru yu na matu rosary a mungsung langai re ai lam masat da ya ai re).

Yesu dinghta ga e du sa ai aprat hpe ashin yu yang, mungkan gaw sin chyip dik ai aprat; Yuda masha ni hpe shagri brep hkra Roman amyu e dip sha, up hkang ai prat, Roman shingkang shingwan kaba dik ai prat, mayam law dik ai prat, n tara ai lam, sutmarin ai, hkumshan pyaw hpa lam hta ladu lai ai prat_ Roman Empire prat re. Shing re ai aprat hta Ninghtoi Kaba gaw mungkan ga e htoi tu wa ai re.

Madu Yesu a shalan shabran ai mungga ni, dip sha hkrum ai masha ni, matsan masha ni a maga tsap ya ai, maga ya ai sharin shaga lam ni, tsawra tara, rap-ra tara, ndai ni gaw shinggyim amyu masha hpe lawt lu ai lam majing jaw ya ai. Simsa ai lam, shim lum ai lam ajet jaw ya ai. Shaloi sha myit pyaw myit dik ai lam hpe lu la na rai ga ai. Sape ni hpe shaga la ai lam: Yesu Shi galaw ai amu ni hpe matut galaw na matu re; anhte yawng mung sape tai wa ga ai hte, Kasa ni galaw ai amu matut galaw ra ga ai. 2019 ning October e shadut ya ai ga: “Kashin kamung hkam la ai hte shangun dat hkrum ga ai”, nga ai.