2019:PRANWAN LADAW HTA LABAN (19) NA CHYUM LAIKA

PRANWAN LADAW LABAN 19

August 11, 2019

CHYUM MUNGGA DAW 1

HPAJI BYENG-YA 18:6-9

Ya hti nga gaw, Hpaji Byeng-ya a laika hta na rai nga ai.

Dai Shalawt Dat ai Shana a lam, anhte a ji woi ji wa ni hpe shawng nna tsun dan manu ai. Shing rai, Karai Kasang shanhte hpe dagam da ai hte maren, teng teng byin na ra ai lam anhte a ji wa ni mu chye nna, kam hpa ai myit kaba hte hkawm sa wa na ma ai. Na a amyu masha ni myit mada ai hte maren, ding hpring ai ni hkye hkrang la ai hkrum nna, n ding n man ai ni mahtang hten byak ai hkrum mat nu ai. Kaning rai nme law, anhte a hpyen ni hpe ari jaw ai amu a marang e, Nang anhte hpe na a myu masha ni shatai nna shagrau ya nit dai. Ding man ai ni a kashu kasha ni lagyim ai hku nna hkungga nawng ya ai shaloi, shanhte ga shaka da ma ai: Chyoi Pra ai ni gaw shaman ya ai hte hkrit hpa lam ni hpe, lang lata jawm hkam la na mara ai; shing rai, shanhte gaw ji woi ni a mahkawn ga hpe mahkawn mangoi nga ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

HEBRE 11:1-2, 8-12

Ya hti na gaw, Hebre masha ni hpang de San Pawlu shagun dat ai laika hta na rai nga ai.

Makam masham ngu ai gaw, anhte myit mada ai chyeju lam ni teng teng lu la na hpe myit hkut shangun nga ai, garai n mu yu ai lam ni teng teng nga ai hpe tau chye shagun ai mung rai nga ai. 2Anhte a ji woi ji wa ni gaw shanhte a makam masham a majaw, sharawng awng ai lu la manu ai.

Abraham gaw, shi hte shi a aru arat a sali wunli tai na ra ai mungdan de, pru sa wa na matu shaga la ai hpe hkrum ai shaloi, kam sham ai hte madat sai; shi gade sa wa ai n chye ti mung, kam sham ai majaw, pru hkawm wa sai. Abraham gaw kam sham ai majaw, chyasam masha zawn Karai Kasang ndat da ai mungdan de sa nga nna, dai ga ndat hte maren sali wunli jawm hkam la lu ai Isak yan Yaku hte rau ginsum hta sha rawng nga ma ai. Kaning rai nme law, Karai Kasang shachyaw da nna, npawt nhpang grin nga ai mare hpe, shi myit mada nga ai. Sara mung aprat lai mat ti mung, kam sham ai a majaw, na-um nasin rai wa lu na atsam lu la wu ai: kaning rai nme law, ga ndat tawn da ai wa kangka rai nga ai, ngu nna shi kam wu ai. Dai re ai majaw, la chyasi zawn re ai masha langai hta na, sumsing lamu na shagan ni hte, nammukdara makau na, n dang hti ai zaibru hta, grau law htam wa ai kashu kasha ni pra wa ma sai.

Ya hti ai gaw Karai Kasang a mungga rai nga ai.

KABU GARA SHIGA

LUKA 12:32-48

Ya hti na gaw, Luka a laika hta na Kabu Gara Shiga rai nga ai.

Lang mi na Yesu Shi a sape ni hpe tsun mu ai gaw: Sagu hpung kaji e, hkum hkrit et: dai mungdan nanhte hpe jaw na, nanhte a Kawa myit sharawng nga ai. Nanhte lu ai arai dut kau nna, alu jaw mu; tinang a matu dingsa n chye ai gumhpraw jan galaw nna, lagut mung n du, manut e mung n sha lu ai, sumsing lamu e n htum n ma chye ai sutgan kyem da mu. Kaning rai nme law, nanhte a sutgan nga ai kaw, nanhte a myit masin mung nga na malit dai. Nanhte gaw nshang e shingkyit kyit nna, pyengding shatu let, tinang a madu hkungran poi de na bai wa nna, chyinghka wa akawk yang, shi hpe shaloi jang hpaw la lu hkra ala nga ai ni zawn, nanhte mung rai nga mu. Dai madu wa yang, maja nga ai ali ama ni gaw a lu ma ai. Ngai nanhte hpe teng teng tsun made ga: dai madu gaw Shi hkum shajin nna, shanhte hpe dung shangun nhtawm, shi nan shanhte hpe sa galaw jaw na mu ai.

Yup tung hpawa e rai ti mung, u goi mahka de rai ti mung, shing rai maja nga ma ai hpe wa mu yang gaw, dai ali ama ni a lu ma ai. Ndai hpe myit dum nga mu: gara ahkying aten hta lagut sa na hpe nta madu chye yang gaw, shi a maja nga nna, shi a nta de n tawk waw shang lu hkra, shi galaw na wu ai. 

Dai rai nna, nanhte mung chyip chyip rai nga mu: kaning rai nme law, nanhte n shadu ai aten hta Masha Kasha du sa na ra ai, ngu nna tsun mu ai. Shaloi Petru gaw, Madu e, ndai ga shadawn gaw anhte hpe sha, shing n rai, yawng hpe tsun ai, rai nni? ngu nna san wu ai. Nta madu shi a kun dinghku ntsa e san tawn da nna, aten du jang lusha karan jaw lu na, kangka re ai myit su ai kunhting wa, kadai rai nga a ta? Shi a madu bai wa jang, shi hte seng ang ai bungli hkrak hkan galaw ai ali ama a nga ai.

Nanhte hpe ngai teng teng tsun made ai gaw, Dai madu gaw shi a arai mahkra a ntsa e dai shangun ma hpe san tawn da na wu ai. Shing n rai, dai ali ama gaw, Nye a Madu du wa na naw na la nga ai, nga nna shi a kraw kata e myit nga let, shangun ma manang ni numsha lasha hpe anu ajin di ai hte, lu nga sha nga nna, chyaru nang ai ni rai yang gaw, dai ali ama mada n hten ai nhtoi hte, n shadu ai ahkying hta, shi a madu du wa nna, dai wa hpe nhtum nni adup kau nhtawm, shi a kumhtaw dawm la ya nna, kangka n re ai ni hte rau tawn kau na ra ai. Tinang a madu a myit ra ai chye da ninglen, hpa mung n galaw n lajang ai ali ama gaw, law law lang anu kayet ai hkrum na ra ai: n chye nna kayat ging ai amu galaw kau ai ali ama chyawm gaw, loi mi sha anu kayat ai hkrum na ra ai. Law wa hkam la ai wa kaw na, law wa hpyi na ra ai. Law wa ap ya ai masha kaw na mung grau nna bai hpyi na mara ai.

Ya hti ai gaw Madu a Kabu Gara Shiga rai nga ai.

2019:PRANWAN LADAW HTA LABAN (18) MUNGGA

Madu Yesu shi du sa ai lam gaw mungkan ga a Sali wunli n rai, Karai Kasang a mungdan a Sali wunli jaw ya na matu re ai hpe dai ni anhte yawng hpe sharing ya nga ai. Dai majaw anhte ni yawng gaw shi mungdan a Sali wunli hpe shawng nnan tam nna, Karai Kasang ra sharawng ai hku hkan galaw na matu ahkyak la nga ai. Bai nammak lawhpa lam yawng hta na myit hpe shim shading nna koi gam ra ai lam mung anhte hpe sharing ya nga ai. Hpa majaw nga jang sutgan law htam wa ai hta, masha asak rawng ai nrai ai lam hpe dai ni hti na la lu ai chyum mungga hku nna anhte hpe sharing ya nga ai.

Angawk ai sahti wa a lam hku nna anhte hpe e, Yesu gaw a prat a shimlum lam hpe mungkan ga arung arai hku nna nrai ai sha sumsing mungdan a Sali wunli hta tam ra ai lam hpe anhte hpe sharin ya nga ai. Anhte a mungkan arung aria ni mung laga masha ni hpe garum ningtau lam hta jai lang ai re jang gaw akyu rawng ai lam rai nga ai. Raitim daini na Mungga hta e sahti wa gaw shi a sut gan hpe laga ni a matu n re sha shi a matu shi ip da ai, shi a matu sha myit ai lam hpe madun nga ai. Anhte langai hpra mung dai wa zawn n mai re ai lam hpe anhte hpe sharing ya nga ai. Anhte ni mung tinang a hkum hpe bai san yu nna, ngai gaw gara hku rai nna nga sa nga ai kun myit sumru yu nga ga.

2019:PRANWAN LADAW HTA LABAN (18) NA CHYUM LAIKA

PRANWAN LADAW HTA LABAN 18

August 4, 2019

CHYUM MUNGGA DAW 1

HPAJI NINGLI 1:2, 2:21-23

Ya hti na gaw, Hpaji Ningli laika hta na rai nga ai.

Kaman lila, kaman lila, nga nna Tara Hkaw Ningbaw Wa tsun nga ai. Kaman lila, Kaman lila, yawng mayawng kaman lila hkrai rai nga ai.

Masha langai ngai chye chyang ai hpaji hte, amu bungli amyu myu galaw shapraw ti mung, dai amu hta hpa n shakut lawm ai wa a matu htawng da ya ra ai majaw, dai mung kaman lila hte tsinyam kaba rai nga ai. 22Masha gaw jan a npu e amu galaw shaja nna, shi a shakut sharang ai lam a majaw, hpa akyu lu la a ta? Shi gaw shi a prat tup yawm hkyen ai hkrum sha nna, shi a amu bungli ru yak ai hkrai rai nga ai; gaja wa, shana e pyi shi myit mawai lu ai n rai. Dai mung kaman lila hku rai nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

KOLOSE 3:1-5, 9-11

Ya hti na gaw, Kolose masha ni hpang de San Pawlu shagun dat ai laika hta na rai nga ai.

Nanhte gaw Hkristu hte rau teng man ai asak de bai rawt wa manit dai majaw, Hkrsitu gaw Karai Kasang a hkra maga e dung nga ai lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu. Nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung Shi hte rau hpung shingkang hta dan pru na marin dai. Dai re ai majaw, dinghta ga na arawn alai hpe nanhte hta e jasim tawm kau mu: dai arawn alai gaw, nse nsa ai amu, awu asin re ai, ngang kayut ai, n kaja ai hpe marin marit ai myit hte, hpara sumla hpe nawku ai hte bung nga ai, nammak lawhpa lam ni rai nga ma ai.

Shada da masu magaw ga hkum tsun myit. Nanhte a gawng shingyan dingsa hte rau, arawn alai dingsa hpe mung raw kau nna, gawng shingyan nnan hpe dagraw la manit dai. Dai gawng shingyan nnan gaw, Hpan Wa Ningsang a hkrang sumla hte grau nna bung wa magang, Karai Kasang hpe chye chyang ai hta grau nna kup tsup wa magang rai nga ai.

Shaloi e, Yuda masha hte Greka masha, matu gadoi hkam ai wa hte matu gadoi n hkam ai wa, garing garang re ai masha hte Skuti masha, mayam wa hte shanglawt wa ngu nna, n mai ginhka ai: Hkristu chyu sha nga ai: Shi gaw yawng mayawng rai nga ai hte, yawng mayawng hta e nga nga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 12:13-21

Ya hti na gaw, Luka a laika hta na Kabu Gara Shiga rai nga ai.

Lang mi na, shawa hpawng kata de masha langai mi gaw, Sara e, ngai hpu wa hpe ngai hte sali wunli karan la na lam tsun ya e, ngu nna Yesu hpe tsun wu ai. Yesu gaw, Jinghku wa e, nan a ntsa e tara agyi hte hparan wa tai na, ngai hpe kadai san da a ta? ngu nna shi hpe htan wu ai. Shaloi shawa masha ni hpe Yesu tsun ai gaw: Nammak lawhpa ai myit mahkra hpe hkap shadang lu hkra, sadi ai hte maja nga mu. Kaning rai nme law, masha gaw sutgan law law lu timung, dai sutgan shi a asak hpe rem sin nga ai n rai, ngu mu ai. Ndai ga shadawn mung Yesu hkai dan wu ai: Sahti langai mi a yi hkauna gaw nsi naisi hkai nmai grai kaja lu ai. Dai rai nna, dai wa gaw, Ngai kaning di na i? nye a nsi naisi shinggyin da na shara ngai n lu nngai, ngu nna myit yu nga ai.

Shaloi shi gaw, Ngai ning rai galaw na we ai: nye a mam dum dingsa ni hpe ngai run kau nna, grau kaba ai galaw na we ai: dai ni hta nye a nsi naisi hte sut rai mahkra hpe ngai shinggyin da nhtawm, ngai hkum hpe ning ngu na we ai: Nye a myit masin e, shaning law law a matu, arai kaja law law hpe nang mahkawng da nit dai. Myit hkum ru sa; lu nu, sha nu. Pyaw pyaw rai nga u, ngu nna tsun na nngai, nga ai. Shaloi Karai Kasang gaw dai sahti wa hpe, Masha angawk e, dai na jang na a asak hpe dawm la kau ya na ra ai: dai rai nna, nang mahkawng shachyip da ai arai ni gaw, gade a matu tai na ra ta? ngu wu ai. Tinang a matu sutgan mahkawng da nhtawm, Karai Kasang hta n lu n su ai wa gaw, dai zawn re ai masha rai nga ai, ngu nna Yesu shanhte hpe tsun mu ai.

Ya hti ai gaw Madu a Kabu Gara Shiga rai nga ai.

2019:PRANWAN LADAW HTA LABAN (17) MUNGGA

Sape ni gaw madu Yesu kaw sit sa nna akyu hpyi ai lam sharing ya na matu hpyi shawn nga ai. Shanhte ni Yesu kyu hpyi ai hpe mung, Yawhan gaw shi a sape ni hpe akyu gara hku hpyi ra ai lam sharing ai lam hpe mu mada ma ai hte maren shanhte hpe mung sharing ya na matu hpyi shawng nga ai. Shanhte hpyi ai hte maren Yesu gaw Madu a akyu hpyi ga hpe sharing ya ai.

Matut manoi re nna shi gaw shi a sape ni hpe kyu hpyi ai ten hta hkan sa na matu myit masa hpe mung sharing ya nga ai. Madu akyu hpyi ga hta e anhte ni Karai Kasang hpe Wa ngu nna shaga nna, Shi a mungdan du wa na matu anhte ni hpyi nga ga ai. Bai dai hta anhte ni shani shagu ra ai malu masha hpe jaw ya na matu mung, mara raw ya na matu mung, bai chye mawoi la na matu mung hpyi nga ga ai. Anhte ni gaw nkup tsup ai ni re majaw Karai Kasang kaw nna mara raw dat ya na matu mung, shada da mung mara raw dat ya na matu mung ra nga ai. Bai anhte ni gaw nkaja ai lam hta na anhte hpe makawp maga la na matu ma ra nga ai.

Dai majaw anhte gaw akyu ga tsun ai shaloi myit lawm ai hte hkan tsun ra nga ai. Dai majaw prat hta Shi Madu hpang de sit sa na matu galoi mung shakut nga ga. Anhte dinghta nga na kawa ni hpe gaw tinang a kasha ni ra ai hpe jaw nga yang, sumsing lamu e nga ai anhte a Wa gaw anhte hpe galoi mung n kabai da ai re hpe kam hpa nna shi madu sharing ya ai akyu ga hte maren shakut shaja nna prat hpe gaw gap sa nga ga.

2019:PRANWAN LADAW HTA LABAN (17) NA CHYUM LAIKA

PRANWAN LADAW HTA LABAN 17

July 28, 2019

CHYUM MUNGGA DAW 1

NPAWT NPANG 18:20-32

Ya hti na gaw, Npawt Nhpang laika hta na rai nga ai.

Madu gaw Abraham hpe tsun ai gaw: Sodom mare hta Gomorra mare a ntsa e mara gade wa shagun ma hka! Shanhte a shut hpyit ai gaw kaba la nga ai majaw, ya ngai sa yu nna, ngai kaw hkrang pru ai nsen hte maren, shanhte gaja wa galaw ai n galaw ai gaw ngai yu yu na we ai; n galaw ai rai yang mung ngai chye na we ai, ngu nna tsun wu ai. Abraham kaw sa manam ai ni gaw myiman kayin nna Sodom maga de sa wa ma ai; Abraham chyawm gaw Madu a man e naw tsap nga ai. Shaloi Abraham gaw sit sa nna, Ding hpring ai ni hpe n kaja ai ni hte rau, gaja wa nang jahten kau na wu ni? Dai mare hta e ding hpring ai masha manga shi a majaw, dai mare hpe matsan dum ai hte n jahten ai, n da lu n ni?

Ding hpring ai ni hte n kaja ai ni hpe maren yubak jahkrum na gaw, nang hte tsan nga u ga; rai sa, dai gaw nang hte, tsan nga u ga: ga ntsa ting a Tara Agyi Wa gaw ding man ai hku galaw na n rai ni? Ngu nna tsun wu ai. Dai rai nna Madu gaw, Sodom mare kata e ding hpring ai masha manga shi hpe ngai mu yang gaw, dai ni a majaw, shara ting hpe ngai shalai kau na we ai, ngu wu ai. Bai Abraham gaw, Ngai ga nhpu hte dap sha rai nga nngai, rai ti mung, Nang Madu hpe ngai bai hpyi nem nngai: ding hpring ai masha manga shi hta manga yawm nga nhten; shing rai masha manga yawm ai majaw, mare ting hpe jahten na wu ni? ngu nna bai tsun yang, Dai mare hta marai mali shi manga ngai mu we yang gaw, dai shara hpe ngai n jahten na nngai, ngu wu ai.

Bai Abraham gaw, Dai mare e mali shi nang mu hkrup na nhten, ngu nna kahtap tsun yang, Madu gaw, Dai mali shi a majaw ngai n jahten na we ai, ngu mu ai. Bai Abraham gaw, Nye a Madu masin hkum pawt et, ngai naw tsun we ga: dai mare hta marai sumshi nang mu hkrup na nhten, ngu yang gaw, Madu gaw, Marai sumshi ngai mu yang gaw, ngai n di na nngai, ngu wu ai. Bai Abraham gaw, Nye a Madu hpe ngai naw tsun na nngai; dai mare hta marai hkun mu hkrup na nhten, bai ngu wu yang, shi gaw, Dai marai hkun a majaw ngai n jahten na nngai, ngu wu ai. 32Bai Abraham gaw, Nye a Madu masin hkum pawt et; ndai lang mi sha ngai naw tsun n ga: dai mare hta marai shi mu hkrup na nhten, ngu yang, Madu gaw, Dai marai shi a majaw dai shara hpe ngai n jahten na nngai, ngu wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

KOLOSE 2:12-14

Ya hti na gaw, Kolose masha ni hpang de San Pawlu shagun dat ai laika hta na rai nga ai.

Nanhte kashin kamun hkam ai shaloi, Hkristu hte rau lup kau ai hkrum manit dai; dai hta n ga, si mat ai ni kaw na Hkristu hpe jahkrung sharawt la ai Karai Kasang a atsam hpe, nanhte kam sham ai a marang e, kashin kamun hkam ai shaloi, Hkristu hte rau sharawt la ai hpe mung hkrum manit dai. Nanhte gaw tara tawt lai ai hte, matu gadoi n hkam ai majaw, chyasi ni rai nga ti mung, Karai Kasang anhte a shut hpyit mara mahkra hpe raw dat kau ya nna, Hkristu hte rau nanhte hpe jahkrung ya manit dai. Karai Kasang gaw tara hta hkang da ai hte maren n hkan nna, anhte wa ra ai hka hpe shaprai kau ya sai; wudang hta e dai hpe dit shakap let, Shi dai hpe yeng seng kau nu ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 11:1-13

Ya hti na gaw, Luka a laika hta na Kabu Gara Shiga rai nga ai.

Lang mi na Yesu gaw shara mi hta akyu hpyi nga ai rai nna, shi hpyi ngut jang, shi a sape langai mi gaw, Madu e, Yawhan gaw shi a sape ni hpe akyu hpyi na sharin ya ai zawn, anhte hpe mung sharin ya mi, ngu nna Yesu hpe tsun wu ai. Shaloi shi gaw, Nanhte akyu hpyi yang, ning ngu mu: Wa e, Na a mying ningsang Chyoi Pra nga lit ga; Na a mungdan du wa ru ga.

Anhte ra ai lusha gaw, shani shagu anhte hpe jaw mi. Anhte hpe shut ai ni yawng mayawng a mara, anhte raw kau ya ga ai majaw, anhte a mara hpe mung raw kau ya mi. Agung alau nga ai de anhte hpe hkum du shangun mi, ngu nna sape ni hpe tsun mu ai. Bai Shi shanhte hpe, Nanhte hta na langai mi jinghku lu ai rai nna, yuptung e shi kaw sa nhtawm, Jinghku wa e, muk tawng masum ngai hpe gan hkoi ya e; nye a jinghku wa hkrum lam de na ngai kaw du ra ai rai nna, shi hpe jaw sha na hpa mung n lu nngai, ngu yang, nhku de na wa gaw, Ngai hpe hkum shatsang et; chyinghka mung la kau se ai; ngai sha ni mung ngai hte rau yup ma sai: nang hpe jaw na ngai n rawt lu ni ai, ngu nna hkap htan ya ai. 

Ngai nanhte hpe tsun made ga, jinghku re ai nga nna, n rawt jaw hkraw ti mung, shi akroi anoi hpyi nga ai majaw, dai wa hpe ra mara rawt jaw na wu ai. Bai, nanhte hpe ngai tsun made ai gaw, Hpyi mu, shaloi lu la na myit dai; tam mu, shaloi nanhte mu na myit dai; akawk mu, shaloi nanhte a matu hpaw ya na ra ai. Kaning rai nme law, hpyi ai wa kadai mung lu la ai; tam ai wa mung mu la ai; akawk ai wa hpe mung hpaw ya na ra ai. Nanhte hta kadai kawa mung, kasha gaw muk hpyi yang, nlung jaw na wu ni? Nga hpyi yang, nga a malai lapu jaw na wu ni? Udi hpyi yang, n gaw gawk jaw na wu ni? Dai rai nna, nanhte n hkru ai ni pyi, tinang a kasha ni hpe kaja ai kumhpa chye jaw yang gaw, dai hta grau nna sumsing lamu na Kawa gaw, shi kaw hpyi ai ni hpe dai Chyoi Pra ai Wenyi jaw na ra ai, ngu nna sape ni hpe Yesu tsun mu ai.

Ya hti ai gaw Madu a Kabu Gara Shiga rai nga ai.

2019:PRANWAN LADAW HTA LABAN (16) MUNGGA

Daini hti ai chyummungga hta Yesu kahtawng langai mi de shang ai shaloi Marhta ngu ai numsha langai mi shi a nta hta shi hpe hkap la ai lam hti na la lu ga ai. Marhta hta Maria ngu ai kanau langai mi nga ai. Shi gaw Yesu a lagaw nhpang e dung nga let, shi a ga hpe madat nga ai hpe hti na la lu nga ai. Marhta gaw daw jau ai magam bungle galaw kyin nga ai shaloi shi hpe garum na matu shi kanau hpe tsun ya na matu tsun ai shaloi, Maria gaw kaja ai kumhtaw lata la nu ai nga na tsun ai. Dai gaw anhte ni hpe dai ni mungga hku nna anhte nang, ngai yawng a prat hta galaw ra ai lam law law hta shi madu a Mungga hte madat na sak hkrung ra ai lam hpe madun ya nga ai. Bai galaw daw jau ai ten hta myit galu kaba ai myit hte dawjau ya ra ai lam hpe sharing ya nga ai. Dai majaw dai ni na mungga hku nna tinang a prat hpe bai myit sumru yu ga. Shi a mungga hta manoi nga ai kun?

2019:PRANWAN LADAW HTA LABAN (16) NA CHYUM LAIKA

PRANWAN LADAW HTA LABAN 16

July 21, 2019

CHYUM MUNGGA DAW 1

NPAWT NHPANG 18:1-10a

Ya hti na gaw, Npawt Nhpang laika hta na rai nga ai.

Abraham gaw shani jan ja ai aten e, shi a sum chyinghka kaw dung nga yang, Madu gaw Mamre a wamyi hpun makau e shi kaw dan pru nga ai.

Abraham mada yu nga yang, shi a makau e masha marai masum tsap nga ma ai. Dai ni hpe mu jang, sa tau la na, sum chyinghka nna gat sa nhtawm, ga de dingnyawm dagup let tsun wu ai gaw, Nye a madu e, na a man e ngai myiman pa nngai rai yang gaw, na a mayam wa kaw na hkum lai sa wa et; 4ntsin loi mi la sa ya de ga; nanhte a lagaw kashin kau ngut jang, dai hpun npu e naw sa nga mu: 5muk n-gup mi mung ngai naw la sa na nngai; shingrai nanhte garai n lai sa wa yang, n-gun loi awai la mu: kaning rai nme law, dai a matu nanhte a mayam wa kaw nanhte du sa manit dai, ngu wu ai. Shanhte mung, Nang tsun ai hte maren di u, ngu mu ai.

Shaloi Abraham gaw sum kata e nga ai Sara hpang de alawan gat shang wa nna, Muk shadung jare masum alawan gan gumchya nhtawm muk pa kaba u, ngu nna tsun da wu ai. Bai Abraham gaw dumsu hpung de gat sa nhtawm, nu nu nai rai hpum sau ai dumsu kasha dun wa nna, shangun ma hpe ya mu ai; dai wa mung alawan sat lajang wu ai. Shing di htawbat hte nga chyu mung, shi lajang ai dumsu kasha mung shi la nna, shanhtea man e baw jaw mu ai: Abraham chyawm gaw dai hpun npu shanhte a makau e tsap nga ai; shanhte mung sha nga ma ai. Shaloi shanhte gaw, Na a madu jan Sara gaw kanang nga a ta? ngu nna san mu ai. Abraham gaw, Wora sum e nga ai, ngu nna htan wu ai. Shanhte hta na langai wa gaw, Htaning ndai aten hta nang hpang de ngai teng teng bai du na ring ngai rai nna, na a madu jan Sara gaw shadang sha lu na ra ai, ngu nna tsun wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

KOLOSE 1:24-28

Ya hti na gaw, Kolose masha ni hpang de San Pawlu shagun dat ai Laika hta na rai nga ai.

Ya nanhte a matu mara ngai tsinyam tsindam hkrum ai majaw, kabu gara nga nngai. Hpa majaw, kabu gara nga nngai nga yang, ndai tsinyam tsindam a marang e, Hkristu a hkum hkrang rai nga ai Nawku hpung a matu, dai Madu naw hkrum ra ai yubak nni nkri hpe, nye a hkum shan hta e ngai jahkum shatsup nga nngai. Nanhte hpe Karai Kasang a mungga htawn shana ya na matu, Karai Kasang ngai hpe ahkang jaw da ai shaloi, Nawku Hpung a ali ama ngai tai wa ni ai. Ngai htawn shana ai mungga gaw: moi chyaloi nhkoi prat mi hte prat mi Karai Kasang makoi magap da nna, ya e Shi a amyu masha ni hpe shadan ai mung sung rai nga ai.

Karai Kasang gaw Shi a chyoi pra ai ni hpe dai mung sung madun dan nna, de a hpung shingkang hte manu dan ai sutgan gade wa galu kaba ai gaw, tara maigan masha ni hpe madun dan ai mung Shi ra nga ai. Dai mung sung gaw, Hkristu gaw nanhte hte rau nga nga nna, nanhte hpung shingkang lu la na myit mada shara Shi rai nga ai. Dai Hkristu a lam hpe nan anhte hkaw dan nga ga ai. Masha shagu hte hpe Hkrsitu hta e jahkum shatsup na matu, Shi a hpaji byeng-ya hte nanhte yawng hte hpe shadum jahprang ai hte sharin shaga nga ga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 10:38-42

Ya hti na gaw, Luka a laika hta na Kabu Gara Shiga rai nga ai.

Lang mi na Yesu gaw kahtawng langai mi hta shang wu ai: Marhta ngu ai numsha langai mi mung, shi a nta hta Yesu hpe hkap la wu ai. Dai numsha gaw Maria ngu ai kanau langai mi lu ai: shi gaw Madu a lagaw nhpang e dung nga let shi a ga madat nga ai. Marhta chyawm gaw galaw jaw ai amu law law a majaw myit kyin dum nga ai: dai rai nna, shi sit sa nhtawm, Madu e, ngai nau gaw galaw jaw ai amu hta ngai hpe hkrai sha rap di da ai hpe nang hpa n nawn n ni? ngai hpe garum na, shi hpe tsun datya e, ngu wu ai. Shaloi Madu gaw Marhta, Marhta nang gaw amu lam law law a majaw myit ru nna tsang nga ndai; rai ti mung, ra ai gaw loi li sha rai nga ai; hkrak nga yang langai mi sha ram nga ai. Maria gaw kaja htum ai kumhtaw lata la nu ai rai nna, dai hpe shi kaw na shaw la kau ya lu na n rai, ngu nna Marhta hpe htan wu ai.

Ya hti ai gaw Madu a Kabu Gara Shiga rai nga ai.

2019:PRANWAN LADAW HTA LABAN (15) MUNGGA

“N htum n wai asak lu la hkra ngai kaning rai na rai ta?” ndai gaw tara sara langai mi Yesu hpe dinglik chyam yu ai ga rai nga ai. Bai Yesu gaw tara laika hta kaning nga rawng nga ta nga nna Shi hpe san ai snhaloi, “dai Madu,, na a Karai Kasang hpe, na a kraw lawang mahkra hte, na a myit masin mahkra hte, na a n-gun lagaw mahkra hte, na a myit mang mahkra hte, nang tsawra lu na ndai; na htingbu wa hpe mung na a hkum hte maren tsawra lu na ndai nga ai, ngu nna htan wu ai lam anhte hti na la lu nga ai. Ndai lam gaw ten ai re lam re ai hpe Yesu teng nga ai hpe sharing ya nga ai. Bai nna dai ni na mung ga hku nna tinang htingbu ngu ai kadai re nga ai hpe madun sharing ya nga ai. Tinang a grup yin hta garum ya ra ai, ra kadawn ai ni hpe garum ai hpe tinang a htingbu majing re ai lam sharing ya nga ai. Dai zawn garum ai hta masha lata nna garum ai hku nre yawng gaw karai kasang a kasha ni chyu re ngu ai myit masa hte garum ya ra nga ai. Anhte ni yawng masha ni hpe karai kasang a tsawra myit hpe shalen ya lu ai ni byin tai hkra shakut nga ga.

2019:PRANWAN LADAW HTA LABAN (15) NA CHYUM LAIKA

PRANWAN LADAW HTA LABAN (15)

July 14, 2019

CHYUM MUNGGA DAW 1

TARA JAHPRANG 30:10-14

Ya hti na gaw, myihtoi tara jahprang laika hta na rai nga ai.

Mawshe gaw shawa masha ni hpe ning nga ai: Nang gaw na a Madu Karai Kasang a nsen madat nna, ndai tara laika hta ka da ai hkang da ai ga hte matsun maroi ga ni hpe hkan shatsup let, na a Madu Karai Kasang hpang de na a myit masin hte kraw lawang mahkra hte kayin wa yang gaw, Madu gaw na nji nwa ni hta awng sharawng ai zawn na a akyu matu nang hta mung awng sharawng na ra ai. 11Dai ni ngai nang hpe hkang da ai matsun maroi gaw, nang n hkan lu hkra yak ai n rai; nang n dep lu hkra tsan la ai mung n rai.

Dai tara hpe anhte madat nna hkan shatup lu hkra, sumsing lamu de kadai lung nna anhte hpang de dai hpe la sa na i? nga nna nang san na gaw, dai tara sumsing lamu de nga ai n rai. Dai tara anhte madat nna hkan sa shatup lu hkra, Nammukdara wora hkran kadai rap nna, anhte hpang de la sa na i? nga nna nang san na matu mung, dai tara Nammukdara wora hkran de nga ai n rai. 14Dai mungga gaw nang hkan lu na matu, nang hte htep rai nga ai: na a n-gup hta mung, na a kraw lawang hta mung, rawng nga lit dai.

Ya hti ai gaw Karai Kasang a mungga rai nga ai.

CHYUM MUNGGA DAW 2

KOLOSE 1:15-20

Ya hti na gaw, kolose masha ni hpang de San Pawlu shagun dat ai Laika hta na rai nga ai.

Hpu nau ni e, Hkristu gaw myi e n mu lu ai Karai Kasang a hkrang sumla rai nga ai hte, hpan da ai baw yawng mayawng hta na alat ningshawng rai nga ai. Sumsing lamu hte ginding aga hta nga ai yawng mayawng hte gaw, Hkristu hta e hpan tawn da nga sai: mu lu ai baw sha n ga, anhte n mu m lu ai hkawhkam tingnyang hta dung ai ni, ahkaw ahkang lu ai ni, up hkang na aya lu ai ni hte, hpung dagu rawng ai ni nlang hte gaw, Hkristu a marang e, shi a matu mara, hpan tawn da nga sai; hpa mung garai n hpan da yang, shi nga nga sai hte, yawng mayawng gaw shi a majaw grin nga ai.

Nawku Hpung gaw Hkristu a hkum hkrang rai nga nna, Shi mahtang de a abaw rai nga ai. Shi gaw lam shagu hta kaba htum ai ningbaw ningla tai u ga, dai Hpung a npawt nhpang rai nga ai hte, si mat ai ni kaw na alat ningshawng wa rai nga ai. Kaning rai nme law, kawa myit ra ai majaw, Hkristu hta e Karai Kasang a atai hkum hkum tsup tsup rawng nga sai. Yesu Hkristu udang hta si hkam nna htingrai htingrat ya ai shaloi, Karai Kasang gaw yawng mayawng hpe shi hkum hte htinglu htinglai ya nga ai: rai sa, sumsing lamu e nga ai hte hpe rai ti mung, ginding aga e nga ai hte hpe rai ti mung, Hkristu a lata e htinglu htinglai ya nga ai hpe Karai Kasang lajang da wu ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 10:25-37

Ya hti na gaw, Luka a laika hta na Kabu Gara Shiga rai nga ai.

Dai aten hta e, sara langai mi gaw Yesu hpe chyam dinglik yu na matu, rawt tsap nga nna, Madu e, htani htana asak lu la hkra, ngai hpa galaw ra a ta? ngu nna san wu ai. Yesu gaw, Tara hta kaning nga nna ka da nga a ta? Nang gara hku hti lu n ta? nga nna tsun jang, dai sara wa gaw,

Dai Madu na a Karai Kasang hpe, na a myit masin mahkra hte, na a wenyi mahkra hte, na a n-gun atsam mahkra hte, na a myit mang mahkra hte tsaw ra lu na ndai; na a htingbu wa hpe mung na a hkum hte maren tsaw ra lu na ndai, ngu nna htan wu ai. Yesu gaw, nang htan ya ai ga teng nga ai: shing rai hkan galaw nga u, shaloi nang asak hkrung na rin dai, nga nna shi hpe tsun wu ai.

Rai ti mung, dai wa gaw shi a ding man ai myit hpe madun dan mayu nna, Nye a htingbu wa gaw kadai rai nga a ta? ngu nna bai san wu ai.

Yesu gaw, masha langai mi Yerusalem mare nna Yerihko mare de yu wa nga yang, damya hkrum wu ai: dai ni gaw shi a hpun palawng raw kau nna, nhtum nni di kayat nhtawm, ganoi noi si sa yang she, shi hpe kau da nna wa mat ma ai. Hkinjawng langai mi dai lam hku lai sa ang nna, dai wa hpe mu jang, koi kau da wu ai. Dai hte maren lewi masha langai mi mung, dai yang du nna dai wa hpe mu timung, koi kau da wu ai. Raitimung, Samari masha langai lam hkawm sa wa yang, dai wa kaw du nna, shi hpe mu jang, matsan yu dum ai.

Shi hpang de sit sa nna, shi a nma ni hta namman hte tsabyi chyaru ru bun nhtawn, kayawp ahkyen wu ai. Dai hpang shi a gumra hta shajawn nhtawn, manam nta langai mi de shi hpe lakawn wa nna, lajang ya wu ai.

Hpang shani e shi gumhpraw lap lahkawng shaw nna, dai manam nta madu hpe ya let tsun wu ai gaw: Ndai wa hpe yu lajang ya rit; shi a majaw ndai hta jan nna ma ai gumhpraw hpe, ngai bai wa jang she, nang hpe jaw na we ai, ngu da wu ai. Ya nang myit yu ai hte maren, dai masha masum hta na damya hkrum ai wa hte htingbu daw ai wa gaw, kadai mahtang rai nga a ta? ngu nna sara wa hpe htan wu ai. Yesu gaw, Nang mung dai zawn wa galaw nga u, ngu nna shi hpe tsun dat wu ai.

Ya hti ai gaw Madu a Kabu Gara Shiga rai nga ai.

2019:PRANWAN LADAW HTA LABAN (14) MUNGGA

Moses gaw shi hpe garum na matu salang sanit shi hpe lata la ai. Madu Yesu mung shi hkum nan sa du na shara de shi a shawng e sape sanit shi san la nna Karai Kasang a mungdan lam hkaw tsun na matu shangun dat ai lam hpe anhte ni na la, hti la lu nga ga ai. Yesu gaw shanhte hpe lahkawng yep di nna sa dat nna, hkrum lam hta shanhte gara hku hkawm sa ra ai lam mung matsun dat ai lam hpe anhte ni hti, na la lu nga ai. Dai zawn mungga hkaw tsun hkawm ai ten hta nga ra ai myit masa hpe mung, dum ra ai lam hpe mung shadum ya nga ai. Dai shanhte hkawm ai hkrum lam gaw nampan sun hta e hkawm sa ai zawn n rai nga ai hpe, “Chyahkyawn ni a ka-ang de Sagu kasha hpe zawn”, ngai nanhte hpe shangun dat made ai nga nna tsun da nga ai. Dai gaw shanhte ni nju ai masha ni e nyet kau ai ni hkrum katut ra na hpe shadum ya ai lam rai nga ai.

Yesu shi hkum nan mung Yerusalem hta nyet kau ai hkrum na hte maren shi a sape ni mung dai zawn hkrum na re nga ai. Ndai gaw shanhte sha n rai, anhte yawng sasana magam gun ni yawng dum shai ra ai lam rai nga ai. Raitim daini anhte hti ai mungga hta Madu Yesu shi a sape ni kabu gara ai myit hte bai wa nna shanhte galaw sai lam hpe Shi Madu hpe tsun dan ai lam na la lu nga ai.

Dai shaloi Madu Yesu sharing ya ai lam anhte galoi ma dum ra nga ai, dai gaw nat ni nanhte a ga madat ai majaw hkum kabu mit; nanhte a mying sumsing lamu hta ka da nga ai majaw she, kabu nga mu ngu sharing ya nga ai. Dai lam ni hpe anhte ni galoi mung dum nna hkan sa ra nga ai.