2019:PASKA LADAW LABAN (6) NA CHYUM LAIKA

PASKA LADAW HTA LABAN 6

May 26, 2019

CHYUM MUNGGA DAW 1

KASA 15: 1-2,22-29

Ya hti na gaw, Kasa Laika hta na rai nga ai.

Dai nhtoi hte hta e, Yuda mung na ni nkau mi sa du nna, hpu nau ni hpe sharin shaga let, Nanhte Mawshe a htung hte maren, matu gadoi lam n hkan yang gaw, hkye hkrang la ai kaw n du lu na myit dai, nga ma ai. De a majaw, bra na lam pru nna, Pawlu yan Barnaba dai ni hte grai ndang kalang hkat ma ai. Shing rai dai lam hpe jahkrup yu na matu hpu nau ni gaw Pawlu yan Barnaba hte shanhte hta na nkau mi hpe, Yerusalem mare de nga ai kasa ni hte salang ni hpang de shangun dat na san da ma ai.

Kasa ni hte salang ni gaw, hpung masha nlang hte bawng nna, shanhte hta na masha lata la nhtawm Pawlu yan Barnaba hte rau Antiok de shangun dat na lam myit hkrum ma ai. Dai hte maren hpu nau ni hta na myit su ai salang Banaba ngu ai Yuda hte Sila hpe lata la nna, shan a lata hta ka ya dat mu ai ga gaw: Anhte Kasa ni, Salang ni, Hpu nau ni gaw, Antiok mare hte Suri mung, Kiliki mung hkan e nga nga ai, maigan amyu hpu nau ni hpang de ngwi pyaw ga shana dat ga ai. Anhte kaw na pru wa ai ni nku mi gaw nanhte hpe ga hte shatsang nna myit gale galau di ya ai hpe anhte na lu saga ai. Dai masha ni anhte kaw na hpa amying ahkang n lu ma ai. Dai majaw anhte nlang bawng nna, malai ni hpe lata la nhtawm anhte a madu Yesu Hkristu a mying ningsang a majaw tinang asak pyi n lahpawt ai, anhte a tsaw ra ai Barnaba yan Pawlu hte rau, dai malai yan hpe nanhte hpang de shangun dat na, myit hkrum ga ai. Dai re ai majaw Yuda yan Sila hpe anhte shangun dat ga ai rai nna, shan a n-gup ga hte nan, laika hta rawng ai lam hte maren tsun dan na mara ai. Nanhte a matu gaw, hpara sumla ni hpe nawng ya ai shahpa hpe mung, asai rawng ai hte, du manat sat ai shan hpe mung, n se n sa ai amu hpe mung, nanhte koi gam lu na rai myit dai. Ndai ahkyak ai lam ni hta jan nna, grau ai lit kaga nanhte hpe n shangun na, nga nna Chyoi Pra ai Wenyi hte anhte myit hkrum ga ai. Dai hte hpe nanhte koi gam nga yang, mai kaja na rai malit dai. Hkam kaja nga myit ga law.

Ya hti ai gaw Karai Kasang a mungga rai nga ai.

CHYUM MUNGGA DAW 2

SHINGRAN 21;10-14, 22-23

Ya hti na gaw, Yawhan a Shingran Laika hta na rai nga ai.

Lamu kasa ngai hpe wenyi hta woi nawng mat wa ai hte, galu kaba, tsaw la ai bum ntsa de, woi du nna Karai Kasang kaw nna sumsing lamu de na yu hkrat wa ai Chyoi Pra ai Yerusalem Mare ngai hpe madun dan nngai. Dai mare hta Karai Kasang a hpung shingkang dan hkung ai hte de a htoi tu ala ai gaw pat zawn san seng nna hpu la ai lung seng hte bung nga ai. De a bunghku gaw galu kaba ai hte tsaw la nga ai: mare chyinghka shi lahkawng hpaw nga ai rai nna, chyinghka shagu hpe lamu kasa langai mi sin nga ai. Sinpraw maga de mare chyinghka masum, dingdung maga de chyinghka masum, dingda maga de chyinghka masum, sinna maga de chyinghka masum hpaw nga ai.

Dai mare a bunghku gaw npawt nlung shi lahkawng hta na langai mi a amying shingteng kap da nga ai. Dai mare kata e Nawku Htingnu hpe ngai n mu nngai; kaning rai nme law, chyahtum chyalai n-gun rawng ai Madu Karai Kasang hte Sagu Kasha gaw, dai mare a Nawku Htingnu rai nga ma ai. Dai mare hpe jahtoi ya na matu ajan mung, shata mung n ra nga ai. Karai Kasang a hpung shingkang dai mare hpe jahtoi ya nna, Sagu Kasha gaw de a pyeng ding rai nga ai.

Ya hti ai gaw Karai Kasang a mungga rai nga ai.

KABU GARA SHIGA

YAWHAN 14:23-29

Ya hti na gaw, Yawhan a Laika hta na Kabu Gara Shiga rai nga ai.

Dai aten hta Yesu Shi a sape ni hpe tsun ai gaw: Ngai hpe tsaw ra ai wa nye a ga matsun hkan shatup na ra ai: nye Wa mung dai wa hpe tsaw ra na wu ai rai nna an lahkawng gaw dai wa kaw sa nna shi hte rau hpawng de nga na ga ai. Ngai hpe n tsaw n ra ai wa nye a ga n hkan shatup nga ai. Dai hta kaga, nanhte na la lu ai mungga gaw nye a ga n rai li ai: ngai hpe shangun dat ai nye Wa a mungga rai nga lu ai. Ngai nanhte hte rau naw nga nga yang, ga ndai nanhte hpe tsun da ni ai. Nye Wa e nye a amying hte shangun dat na ra ai. Shalan shabran chye ai Chyoi Pra ai Wenyi gaw nanhte hpe tsun da ai ga yawng mayawng, nanhte hpe shadum jahprang ya na ra ai.

Nanhte kaw ngwi pyaw ap da ya nngai; nanhte hpe nye a ngwi pyaw jaw ya made ai: mungkan ga na ni n lu jaw ai ngwi pyaw ai gaw nanhte hpe ngai jaw ai kumhpa rai nga ai. Nanhte myit hkum ru mu; hkrit mung hkum hkrit mu. Ngai wa nna nanhte kaw bai sa na ring ngai, nga nna ngai tsun ai ga hpe nanhte na la manit dai. Nanhte ngai hpe tsaw ra myit dai rai yang gaw, Wa hpang de ngai wa ai majaw, nanhte kabu na rai myit dai; kaning rai nme law, Wa gaw ngai hta grau kaba nga ai. Dai amu byin pru wa ai shaloi nanhte kam sham lu myit ga, ya garai n byin pru yang ngai nanhte hpe tsun da made ai.

Ya hti ai gaw Madu a Kabu Gara Shiga rai nga ai.

2019:PASKA LADAW LABAN (5) NA MUNGGA

Asia Dan na amyu kaba re ai Miwa/Japan myu sha ni a makam hta “Yin-Yan” ngu ai grin ai tara maka lahkawng hpe hkap la ma ai: ndai dinghta ga e ninghtoi-ningsin, kaja ai-n kaja ai, pyaw hpa-myit ru hpa_ arau kapyawn nna nga nga ai, ngu ai, grin ai tara maka hpe hkap la ma ai. Lu su nga-mu nga-mai ai wa mung, hten bya wa lu ai, ruyak jamjau hkrum wa mai ai majaw, gumrawng n mai ai, nga ai. Matsan jamjau hkrum nga ai wa mung, lu su ngamai ai nhtoi ni du na ra ai, ngu myit mada let ninggun awai la mai ai.

Kasa Pawlu gaw shi du kawan ai hpung masha ni hpe ning ngu shadum ai, “Karai a mungdan de du shang lu na matu anhte gaw ruyak kyindut baw hpan ni hpe shawng hkam sharang tawt lai ra ai…” ngu nna ninggun jaw ga tsun hkawm ai. Masha langai a prat hta pyaw ai, mai hkam kaja ai, ngu ai mung chyaw chyaw grin nga lu ai n re ai zawn, myit ru ai, kyindut hkrum ai, ngu ai mung chyaw chyaw grin nga lu ai n rai. Madu Yesu hpe n chye ai ni a matu “Yin-Yan” ngu ai tara maka gaw grai nan akyu jaw lu ai rai nga ai: Yin hte Yana lapran rap shara nna hkam la asak matut lu ma ai. Rai tim, masha langai mi a prat hta “Yin” maga na mai kaja ai baw mahtang grau law hkam la lu nna, kaga langai wa a matu “Yan” maga na nji nmu ai baw malawng hkam la ai zawn nga jang, masha a prat hpe sum ai hku sha mu na re. Dai majaw, Japan mungdan hta tinang hkum hpe sat si ai ni law dik ai hpe chye lu ai.

Anhte Hkristan ni a matu “Yin-Yan” ngu ai grin ai tara maka hta lai jan nna Hkristu Madu gaw yawng mayawng hpe awng dang nna tut ahkrung nga ai, hpung shingkang dagraw hkam la ai hpang, Shi hpe kam sham ai ni yawng mung Shi zawn awng dang nna hpung shingkang dagraw hkam la na matu saw shaga ai, anhte hpe tut e tsawra ai, ngu ai hpe chye lu ai lam re. Sape ni hpe Shi ning nga ai, “Ngai sha ni e” nga ai. Karai a kasha ni, ngu ai amying shingteng hte arawng sadang hkam la lu sai ri yang, kaga hpa hpe naw marin ra ga ta? Hpa hpe naw hkrit tsang ra na ga ta? Anhte galoi mung myit pyaw myit dik nga lu na lam, myit ru myit machyi, nji nmu kaw na lawt lu na matu Madu Shi lam matsun jaw da ai. Dai gaw, “Ngai nanhte hpe tara matsun ningnan jaw de ai: nanhte shada tsawra nga mu!” nga ai re.

“Tsawra ai” ngu ai ga, shinggan e lang ai ga hta (sumrai laika, sumla hkrung, dz., dz.,) hkam sha lawm na hku shala dan ai majaw laika hti let, sumla hkrung yu let hkam sha nna myi-prwi si hkrat wa lu ai. Chyum Laika hta ka da ai “Tsawra ai” ngu ai ga kade lang hti hkrup ga tim kade mi n hkam sha chye ga ai. Rai ti mung, Chyum Laika hta lang da ai ga, “Tsawra ai”, ngu ai gaw kaba dik htum ai atsam ningja nan rai nga ai. Tinang a matu akyu a myat n tam ai, tinang tsawra ai wa a matu machyi hkam nna nawngjau dawjau ai, jaw ya ai, hka n ji ai, mara n matsing ya ai, hpyen wa hpe du hkra tsawra mara dat ya lu ai, dz., dz., Madu Yesu kaw na sharin la lu ai tsawra myit hte masha ni a myit jasat, nga sa madang, uhpung uhpawng… mungkan hpe galai shai ya lu ai masha ni law law nga ma ai. Shawng na Chyum mungga hta Kasa Pawlu gaw tsawra myit kabrat ai hte hkye hkrang la ai mungga hpe n sim nsa hkaw tsun ai, tai htang ninghkap ai ni a lapran hkaw tsun sharin shaga ai, Jew amyu n rai gale amyu, tara maigan masha ni hpe dai Kabu Gara Shi-ga hkaw tsun ai, wenyi a chyeju kumhpa ni hpe hkan gam jaw hkawm ai.

Anhte shada tsawra hkat nga ga yang, kaning re ai hpyen, agung alau, yakhkak ai amu ni hpe rai tim, si hkrung si htan hpe rai tim, dang kau lu na ga ai. Nang/ngai, tsawra myit jahpring da lu ga ai rai yang, kaning re ai shara, kaning re ai aten hta rai tim kabu lu na ga ai, hkam sharang lu na ga ai, myit mada lu na ga ai_ yawng mayawng hpe tsawra myit hte awng dang lu na lam Madu sharin ya ai. Kuptsup ai awng padang asak aprat ndai dinghta ga e hpang ai rai tim sumsing mungdan hta sha kuptsup ai hku hkam la na ga ai. Yawhan a Shingran Laika hta tsun da ai hte maren, yawn hkyen ai, kawsi hpang gara ai, myit machyi ai, n ju n dawng ai, hkrit tsang ai, ngu ai baw hpa n nga sa na hte, tsawra myit hta sha htani htana hkrung nga lu na ga ai.

Madu Yesu kaw na sharin hkam la ai ni a matu, YIN mung, YAN mung, ahkyak n rai mat ai. Shi Madu a tsawra myit hpe hkaja la nna, dai tsawra myit jahpring ya na lam tut e akyu hpyi nna asak a shaman chyeju ni hpe n-hpaw n-ya hkam la shajang ga.

2019:PASKA LADAW LABAN (5) NA CHYUM LAIKA

PASKA LADAW HTA LABAN 5

May 19, 2019

CHYUM MUNGGA DAW 1

KASA 14:21-27

Ya hti na gaw, Kasa Laika hta na rai nga ai.

Dai nhtoi hte hta e Pawlu yan Barnaba gaw Lustra hte Ikoni mare lam hku hkan nna, Anti-ok de bai wa ma ai. Shan bai wa nga yang, sape ni a myit shangang ya let, makam masham hpe kangka ai hte hkan shatup na matu shadum jahprang ya ma ai. Karai Kasang a mungdan hta garai n shang yang ru tsang ai lam law law hpe hkrum sha ra ga ai, ngu nna sharin da mu ai. Hpung shagu hta mung, hpung up salang lata la nhtawm, akyu hpyi ai hte lusha gam nna shanhte kam sham nga ai Madu a lata hta ap ya da mu ai. Shan gaw Pedisi mung ga sa wa nna, Pamhpuli mung de du ma ai. Dai yang e Perga mare hta mungga tsun dan nhtawm Atali de yu wa ma ai. Ya shan gun hpai lai wa sai amu a matu Karai Kasang a chyeju hta shan hpe ap ya nna, shangun dat ai Anti-ok mare de, shan dai shara kaw na li jawn nhtawm, bai du wa ma ai. Shan du wa jang, hpung masha ni hpe jahpawng tawn nna, Karai Kasang shan a lata hta galaw ai lam yawng mayawng hpe mung, maigan amyu ni hpe makam masham a chyinghka hpaw ya wu ai hpe mung, hkai dan ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

SHINGRAN 21:1-5

Ya hti na gaw, Yawhan a Shingran Laika hta na rai nga ai.

Ngai Yawhan gaw, sumsing lamu nna, ginding aga nnan hpe ngai mu nngai; shawng na lamu hte shawng na aga lai mat wa sai: nammukdara mung dai kaw e n nga sai. Shaloi chyoi pra ai mare ngu ai Yerusalem nnan gaw, la nnan a matu mawn sumli ai num nnan zawn, Karai Kasang a man kaw nna sumsing lamu de na yu hkrat wa ai hpe ngai mu nngai. Bai, dai tingnyang kata na nsen kaba gaw: ‘Yu mu, Karai Kasang a htingnu shinggyim masha ni hte rau nga nga nna, Shi shanhte kaw sa shanu na hte, shanhte gaw Shi a amyu ni tai na mara ai. Karai Kasang Shi hkum nan shanhte hte rau nga nga nna, shanhte a Karai Kasang tai na ra ai. Shi gaw shanhte a myi hta na myi prwi pru mapru katsut kau ya na ra ai; htawm hpang e si hkrung si htan n nga lu na sai; sharung shayawt ai hkrap ngu hkrap ngoi ai, hki si ba si ai mung n nga lu na sai: shawng na lam nga manga hte gaw, lai mat wa sai, nga nna tsun ai hpe ngai na nngai. Shaloi tingnyang hta dung nga ai Wa mung, yu u, yawng mayawng hte hpe, ngai ningnan bai gaw da nngai, nga nna tsun ai.

Ya hti ai gaw Karai Kasang a mungga rai nga ai.

KABU GARA SHIGA

YAWHAN 13:31-35

Ya hti na gaw, Yawhan a Laika hta na Kabu Gara Shiga rai nga ai.

Yuda Iskarut pru mat wa ai hpang, Yesu Shi a sape ni hpe tsun mu ai gaw: Masha Kasha gaw ya hpung shingkang dan hkung nga ai rai nna, Karai Kasang mung Masha Kasha hta hpung shingkang dan hkung nga ai. Karai Kasang Shi hkum nan Masha Kasha hpe shagrau ya na wu ai: rai sa, gade n na yang Shi hpe shagrau ya na ra ai. Ngai sha ni e, ngai nanhte hte hkring mi naw nga na nngai. Nanhte shada da tsaw ra nga mu, ngu nna tara nnan ngai nanhte hpe jaw da made ai: ngai nanhte hpe tsaw ra made ai zawn, nanhte mung shada da tsaw ra nga na rai myit dai. Shing rai nanhte shada da tsaw ra ai myit rawng nga yang gaw, nanhte nye a sape ni rai nga ai hpe masha yawng mayawng chye lu na mara ai.

Ya hti ai gaw Madu a Kabu Gara Shiga rai nga ai. 

2019:PASKA LADAW LABAN (4) NA MUNGGA

Anhte amyu sha ni rem ai dumsu yam-nga ni gaw madu a nsen loi loi na chye, madat chye ma ai; nam e majoi dat da ai nga dumsu ni gaw madu mu jang pyi hprawng mat ai daram zai ma ai. Madu Yesu Shi ning nga ai, “Ngai a sagu ni gaw ngai a nsen ginghka chye ma ai; ngai shaga jang shanhte nye hpang hkan nang ma ai”, ngu ai ga hpe anhte chye madat na yak tim, Palestine na Yesu a mungga madat ai ni gaw aloi sha chye na ma ai. Sagu rem sin ai ni gaw sagu hpung ni hpe shana de kadai mung kadai a sagu lawng de/ kalang lang kayau nna mung sharawng da ma ai. Jahpawt e, ushat pa de woi sa ten du jang tinang nang a sagu ni hpe shaga jahpawng la nna ushat pa de woi sa ma ai. Sagu langai hpra, madu a nsen hpe ginghka chye ai. Madu a hpang hkan ai, dai sagu ni gaw tsit lali ai udat de du ma ai; lu na hka mung mu lu ma ai; sharaw jahkyawn ni a hpyen kaw na lawt lu ma ai; asak a chyeju hkam la lu ma ai.

Anhte a prat na grup-yin hpe mada yu ga: tinang hpe saw shaga ai nsen ni law law re. Dai mari mu, dai lu sha mu, dai baw tsi grai kaja ai, dai galaw dat mu, kade sa ga, pyaw chyai ga, nga ai nsen baw hkum hkra re ai kaw na lata la she yak hkra law htam nga ai. Lata la shut mat ai majaw lu shut sha shut re ai baw nga ai zawn, masu hkalem ai wa a ga madat shut kau ai majaw hpaga sum mat ai, asak sum mat ai, dut sha kau hkrum ai, maw sha hkrum ai ni mung law law nga ma ai. Digital prat, IT prat hta hpa lam hta mung layung hte hkan kahtawk nna mahtai lu mai ai prat hta myi hte n mu lu ai baw, computer kaw na mahtai n shapraw lu ai baw rai jang, MAKAM MASHAM / WENYI lam-yan hpe n gawn n sawn di wa ai ni law law nga wa ma ai. NGO uhpung ni hte galu yu ai ni rai jang hpa galaw tim STRATEGIC PLANNING hkrai shaga wa ma ai. Sawn hpan hku nna mahtai n shapraw lu ai baw ni hpe kam ai myit n nga wa ai, shing n rai kam ai myit yawm mat ai, ndai zawn re ai grup-yin mungkan masa hta anhte nga nga ga ai re.

Hkristan masha ni a matu, nang kam tim n kam tim, Madu Yesu gaw hpung masha shagu hpe saw shaga ding yang re; Shi a ga madat na lam saw shaga ai, lam matsun ya ai gaw dingyang re. Mungkan hpaji madang, Technology, Hpungtang hpaji, IT madang, ndai ni kade madang tsaw rawt jat wa tim, mungkan masha ni hpe myit masin wenyi a akyu ara n jahpring ya lu ai. Machye machyang madang kade rawt jat wa tim mungkan e kawsi hpang gara ai masha law htam wa ai, ana zinli hpan grau law wa ai; hkyuk htawng rawng ai masha law htam wa ai; gashun gashe maw lu maw sha grau law htam wa ai; hkri-wang na ma ni hpe sat kau ai amu grau law wa ai; tsa-ya, kani-ya law htam wa ai; mungdan langai hte langai, amyu langai hte langai, n jaw n ang ai hku hpyen tai hkat, n ju n dawng hkat re ai lam ni law htam wa ai. Kadai a maga tsap na, kadai a policy hpe madi shadaw na, shinggyim masha hpe akyu jaw lu ai, kahkyin gumdin lu ai, shada kamhpa hkat lu ai, zinlum ai lam hpe galaw ya lu ai, shimlum lam simsa lam majing hpe jaw ya lu ai sharin shaga lam, tara masa, policy, kadai wa matsun lu ai kun? Gara gara mahtang jaw ai kun? Ngu ai ga-san baw hpan law law pru wa ai.

Anhte kamsham ai kashu kasha ni a matu gaw YESU MADU hta lai nna kaga n nga sai. Shi chyu sha tsawra myit, tengman ai matsun ga, shimlum lam, shada kahkyin shabawn shamyet shanat hkat lu ai lam ni hpe sharin ya lu ai; jaw ya lu ai.

Dai Sagu Rem Yesu a nsen gara hku na lu na ga ta? Chyum Mungga hku nna, Sakramentu ni hku nna, nawku dawjau ai hku nna Madu a nsen hpe na lu ga ai. Akyu hpyi hpawng shagu hta Madu hte hkrum matut lu ga ai. Dai hta jan nna kaga mahkrun law law, mabyin law law hku nna Madu a nsen hpe na la lu na ga ai: kanu kawa, kanawn manang, htingbu wa_ shanhte a mai kaja ai shadum jahprang ga, lam matsun ga ni hku nna mung, Madu a nsen hpe na la mai ga ai. Bai, tinang a sung la ai kraw kata hta mung Madu gaw shaga bang ya ai_ n hkru n kaja ai lam ni hpe koi yen na lam, mai kaja ai amu galaw na matu jasu shadut ai nsen, mara raw dat hkyamsa jaw dat na lam shadum ai nsen, dz., dz., (dai zawn dai zawn). Nshut lu ai Madu a nsen hpe madat nna asak a chyeju kumhpa ni hpe hkam la ga.

2019:PASKA LADAW LABAN (4) NA CHYUM LAIKA

PASKA LADAW HTA LABAN 4

May 12, 2019

CHYUM MUNGGA DAW 1

KASA 13:14, 43-52

Ya hti na gaw Kasa Laika hta na rai nga ai.

Pawlu yan Barnaba gaw Perge kaw nna rawt sa wa nna, Pesidi mung na Anti -ok mare de du ma ai. Ya, Laban nhtoi e, tara jawng hta shang dung nga ma ai. Tara jawng na bra mat wa jang, Yuda masha ni hte Yuda hpung de kayin wa ai maigan masha ni law law wa, Pawlu yan Barnaba kaw hkan nang ma ai. Shan lahkawng shanhte hpe sharin shaga nna, Karai Kasang shanhte hpe jaw ai chyeju hte maren, kangka rai hkan sa lu na matushadum jahprang ya mu ai. Hpang na Laban Nhtoi hta, Karai Kasang a mungga na la na matu, mare ting, ganoi mahkra, wa zup hpawng nga ma ai. Yuda masha ni chyawm gaw, dai shawa hpawng hpe mu jang, manawn ai myit hte hpring chyat nga ma ai rai nna, Pawlu tsun ai lam hpe ndang hkat ai hte aroi ara ngu da mu ai.

Pawlu yan Barnaba nden ja ai myit hte shanhte hpe htan ya nna, Karai Kasang a mungga nanhte hpe shawng tsun dan na ra ga ai; rai ti mung, nanhte dai hpe n hkap hta la ai majaw, n htum n wai asak hte n ging n dan ai hku, nanhte nan daw dan la manit dai. Dai rai nna, maigan amyu ni hpang de anhte myi man kayin na saga ai. 47Kaning rai nme law: Lamu ga htum hkra nye a hkye hkrang la ai lam dep lu hkra, Ngai nang hpe maigan amyu ni a matu nhtoi shatai sade ai, nga nna Shi Madu anhte hpe hkang dat mani ai, ngu nna tsun mu ai. Maigan amyu ni dai na jang, kabu gara nga ai hte, Karai Kasang a mungga hpe shagrau sha-a ma ai, n htum n wai asak lu la na san da ai ni nlang hte mung, kam sham mat ma ai. Shing rai Karai Kasang a mungga gaw dai mung ting pri rai wa sai. Yuda masha ni chyawm gaw, tara hkungga nna arawng lu ai num ni hte dai mare na agyi ni hpe shadut nna, Pawlu yan Barnaba hpe zingri zingrat di shangun ai hte, shanhte a lamu ga jarit na shaden kau mu ai. Shan gaw tinang a lagaw na nhpu shanhte hpang maga ahpu kau da nna, Ikoni mare de du ma ai; sape ni chyawm gaw kabu gara ai hte, Chyoi Pra ai Wenyi hte hpring nga ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 

2 SHINGRAN 7:14-17

Ya hti na gaw, Yawhan a Shingran Laika hta na rai nga ai.

Ngai Yawhan gaw, masha mungdan shagu hta na mung, baw lakung shagu hta na mung, amyu baw shagu hta na mung, ga amyu shagu hta na mung, kadai n dang hti lu ai unawng uwa kaba hpe ngai mu nngai: dai ni gaw hpraw ai hpun palawng bu hpun nna, tinang a lata hta namhtan hpun lakung lang let, tingnyang a man e mung, Sagu Kasha a man e mung tsap nga ma ai. Shaloi salang langai mi ngai hpe tsun ai gaw: Ndai masha ni rutsang kaba kata na hkrang pru wa nna, tinang a hpun palawng hpe Sagu Kasha a asai hta hkrut jahpraw la ai ni rai nga ma ai. Dai re ai majaw shanhte gaw Karai Kasang a tingnyang man e ningngai nga lu ma ai hte, Shi a Nawku Htingnu hta shani shana Shi hpe daw jau nga ma ai: tiingnyang hta dung ai wa mung, shanhte hpe Shi a nta e nga shangun na ra ai. Shanhte gaw hpang de galoimung kawsi hpang gara n hkrum na masai; jan shingna mung, hpa kahtet ai mung shanhte hpe hkra lu na n rai: kaning rai nme law, tingnyang ka-ang e nga ai Sagu Kasha gaw sagu rem wa zawn shanhte hpe bau sin na ra ai rai nna, asak a hka hpawk du hkra shanhte hpe lam woi madum dan na ra ai: Karai Kasang mung shanhte a myi hta na myi prwi yawng hpe tsai hkra katsut kau ya na ra ai.

Ya hti ai gaw Karai Kasang a mungga rai nga ai.

KABU GARA SHIGA

YAWHAN 10:27-30

Ya hti na gaw, Yawhan a Laika hta na Kabu Gara Shiga rai nga ai.

Dai aten hta e, Yesu tsun ai gaw: Nye a sagu ni gaw Nye a nsen madat ma ai rai nna, Ngai shanhte hpe chye nngai; shanhte mung Nye a hpang hkan nang ma ai. Ngai shanhte hpe n htum n wai asak jaw da we ai rai nna, shanhte galoi mung hten bya ai hkrum na n rai; Nye a lata na shanhte hpe kadai mung kashun la ya lu na n rai. Shanhte hpe Nye a lata hta ap ya ai Nye a Wa gaw, yawng hta grau kaba nga ai rai nna, kadai mung Wa a lata na shanhte hpe kashun la ya lu na n rai. Ngai hte Nye Wa gaw langai sha rai nga ai.

Ya hti ai gaw Madu a Kabu Gara Shiga rai nga ai.

2019:PASKA LADAW LABAN (3) NA MUNGGA

Tinang tsawra kamhpa ai kanu, shing n rai, kawa si mat ai hpang nhtoi law law myit kaji garen hkrum ga ai. Si mat ai kanu kawa hpe shingran a mu nga ai; yupmang hta sha pyi gaw bai mu mayu ga ai. Shingran/yupmang hta jan nna bai mu lu na lam n mai byin sai; ndai prat hta n hkrum lu sai, ngu ai hta ja ja yawn hkyen ga ai re. Rai tim, si mat ai kanu kawa gaw Karai a mungdan hta ningngai nga na sai, ngu, kam ai myit hte shalan shabran myit shadik la ga ai. Yesu a sape ni mung shanhte a Madu, shanhte a Sara gaw aprat kaga, mungdan kaga de du mat sai, shanhte hte arau bai nga lu na n byin mai sai, ngu, hkam la nna myit kaji garen nga ma ai aten re. Dai majaw, shanhte hkau man ai nga hkwi bungli de bai htang mat wa ma ai. Yesu shanhte hpe shaga da ai gaw masha hkan hkwi ai ni tai na matu she re hpe malap kau ma ai. Rai tim Yesu gaw kahtap kahtap rai nna shanhte hpe shi a hkum hkrang bai shadan dan ai: shanhte Shi hpe n mu tim Shi gaw shanhte hte galoi mung a nga nga ai lam hpe sharin ya ai.

“Ngai sha ni, nanhte sha na matu nga lu hkwi la mi ni?” ngu, san ai; shanhte htan ai, “Hpa mung n lu ga ai”, nga ai. Shaloi, “Sumgawn hpe li a hkra maga de jahkrat mu!”, nga ai. Matsun ai hte maren hkan galaw ma yang, mau n ma rai hkra, sumgawn je na daram nga law law magawn la lu la ma ai. Shanhte myit kaji garen let bungli galaw ai aten hta sha na pyi n lu, rai; shanhte a matsan mayan re ai lam hpe Madu gaw mu ya ai, chye ya ai, garum ya mayu ai. Nga law law magawn la lu ai lam hta sape ni madat mara ai majaw re; bai, laklai ai shaman chyeju re, ngu ai lam hpe sharin ya ai. Ndai mahkrum madup a majaw, Simon Petru hte manang ni, moi gaw sumgawn hte nga hkwi aria yawng kau da nna Yesu hpang hkan nang sai re wa, ya Yesu hpe n mu lu ai hpang nga hkwi bungli bai galaw ma ai. Sha na pyi n lu ma ai. Yesu shanhte hpe shangun na bungli gaw nga hkwi bungli n rai; masha hkan hkwi ai ni tai na matu she re. Yawhan sakse hkam ai hku rai yang Yesu bai hkrung rawt ai hpang, dai lang gaw masum ngu na lang, shanhte hpe shadan dan ai, rai nga ai. 

Anhte mung maren sha, law law lang, yakhkak hkrum wa ai aten hta Yesu gaw anhte hte gaw nga nga ai kun, anhte a ruyak ai lam ni hpe n mu n chye ya ai kun, hpa rai tsan gang nga ai kun, ngu nna myit daw chye ga ai. Makam masham n lu la shi a aten na zawn myit mang nga sa chye ga ai. Teng sha, Shi anhte hte galoi mung a nga nga ai; anhte hta ra kadawn ai lam ni hpe Shi teng sha chye ya ai, ngu ai lam hpe kalang bai shadum la nna ninggun awai la ga.

Kasa Laika hta, Kasa ni gaw makam masham hte hpring ai majaw masha hkan hkwi ai ni tai ma ai. Sasana bungli galaw ma yang hpyen law law hte hkrum katut ma ai; zingri zingrat ai hkrum ma ai. Rai ti mung, Wenyi ninggun hpring ma ai majaw, ru ai yak ai, jahpoi asawng hkrum ma ai rai tim, kabu gara ai myit hte Mungga hpe matut hkaw tsun hkawm lu ma ai. Anhte langai hpra mung, makam masham hte Wenyi a atsam marai, Madu Yesu a shaman chyeju ni hpe hkam la nna myit masin ningnan, aprat ningnan gaw sharawt nga ga; sasana bungli hta shang lawm nga ga, ngu, ninggun jaw dat ai.

Sawn sum ru mai ai lam: Hkristan marai langai hpra a matu “Madu Yesu gaw kadai rai ta?”

2019:PASKA LADAW LABAN (3) NA CHYUM LAIKA

PASKA LADAW HTA LABAN 3

5 May, 2019

CHYUM MUNGGA DAW 1

KASA 5:27-32, 40-41

Ya hti na gaw, Kasa Laika hta na rai nga ai.

Dai nhtoi hte hta e, hkinjawng agyi wa gaw kasa ni hpe san let, Nanhte hpe amying dai hte hpa mung hkum tsun mu, ngu nna anhte aja awa hkang da saga ai; nanhte mahtang Yerusalem mare ting e nanhte a sharin shaga lam pri di rai nna, dai wa a asai anhte a ntsa e mara ya na maw nga myit dai, ngu nna shanhte hpe tsun wu ai. Shaloi, Petru hte kasa ni htan mu ai gaw: Masha a ga madat na hta, Karai Kasang a ga mahtang grau madat na ga ai. Anhte a ji wa ni a Karai Kasang gaw nanhte wudang hta jen da sat kau ai Yesu hpe jahkrung sharawt dat nu ai. Israela amyu hpe myit malai lam hte mara raw ya ai lam hpaw ya na matu, Du Magam hte Hkye Hkrang la ai Madu shatai na nga, Karai Kasang gaw dai wa hpe Shi a hkra lata hte shagrau tawn nu ai. Anhte mung ndai lam mahkra a sakse ni rai nga ga ai; Shi a mungga madat mara ai ni hpe Karai Kasang jaw ya ai Chyoi Pra ai Wenyi mung, dai hte a sakse rai nga ai, ngu mu ai.

Dai agyi salang hpawng gaw, kasa ni hpe kayet nna, Yesu a mying hte n sharin n shaga lu na lam hkang da nhtawm shanhte hpe dat dat ma ai.

Shanhte chyawm gaw, Amying ningsang ndai a majaw, anhte kaya hkrum na ging nga ga ai, ngu nna myit la ma ai rai nna, kabu gara ai myit hte dai salang hpawng kaw na pru wa ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

SHINGRAN 5:11-14

Ya hti na gaw, Yawhan a Shingran Laika hta na rai nga ai.

Ngai Yawhan gaw shingran mu ai shaloi lamu kasa unawng kaba a nsen hpe ngai na la nngai; ndai ni mung, dusat amyu mali hte salang ni mung tinyang a grup yin e tsap nga ma ai. Dai ni gaw mun mi hta mun mi, hkying mi hta hkying mi lang law nga ma ai rai nna, 12shanhte gaw: ‘Sat kau hkrum ai Sagu Kasha gaw, hpung dagu, sutgan, hpaji byeng-ya, n-gun lagaw, arawng sadang, hpung shingkang hte shakawn kungdawn ai hpe hkam la na, ging dan nga ai law, nga nna nsen kaba hte tsun shakawn ma ai. Dai hta n-ga, lamu lahta tang na mung, ginding aga ntsa na mung, aga lawu na mung, nammukdara katana mung, hpan da hkrum ai hkrung mahkrung hte gaw, Tingnyang hta dung nga ai wa hte, dai Sagu Kasha gaw, htani htana prat dingsa, shakawn kungdawn ai, arawng sadang hpung shingkang hte daru magam anga nga u ga law, nga nna shanhte tsun ma ai hpe mung ngai na nngai. 14Shaloi dusat amyu mali gaw, Amen, nga ma ai; salang ni mung dingnyawm nawku ma ai.

Ya hti ai gaw Karai Kasang a mungga rai nga ai.

KABU GARA SHIGA

YAWHAN 21:1-19

Ya hti na gaw, Yawhan a Laika hta na Kabu Gara Shiga rai nga ai.

Yesu gaw Tiberi nawng makau e sape ni hpe Shi ahkum bai madun dan mu ai. Dai shaloi na madun dan ai lam gaw, ning rai nga ai: Simun Petru hte Marun Ma ngu ai Htawma, Galile mung Hkana kahtawng na Nahtanela, Zebedi a kasha yan hte kaga sape lahkawng rau nga ma ai. Shaloi, Simun Petru gaw, Ngai nga sa hkan na nngai, ngu nna shanhte hpe tsun wu ai. Shanhte gaw anhte mung hkan sa na ga ai, nga ma ai; dai shana shanhte gaw langai mi pyi n lu ma ai. Nhtoi htoi wa yang, Yesu gaw nawng hkingau ntsa e tsap nga ai: rai ti mung, sape ni gaw Yesu re ai n chye ma ai.

Dai majaw, Yesu gaw, shanhte hpe, Ngai sha ni e, nanhte shahpa lama ma lu myit ni? ngu nna san wu ai; shanhte gaw, N lu ga ai, ngu nna Shi hpe htan mu ai. Shaloi Shi gaw, Dai li a hkra maga de sumgawn jahkat mu, shaloi lu na myit dai, ngu nna shanhte hpe tsun mu ai. Dai hte maren shanhte jahkrat nna, nga law law wa magawn la lu ai majaw, sumgawn pyi n gang lu ma ai.

Dai rai nna, Yesu a tsaw ra ai sape gaw Madu she rai nga ai, ngu nna Petru hpe tsun wu ai. Simun petru dai hpe na la jang shi palawng lawai nna, nawng de gan shang wa ai. 8Kaga sape ni chyawm gaw, hkin-gau hte manga shi lam sha gang nga ai majaw nga hte hpring chyat re ai sumgawn garawt let, li kaji hte du wa ma ai. Shanhte gaw hkarang ntsa de du wa yang, nra wan mang hta, nga kakang da ai hte muk tawn da ai hpe mu ma ai. Shaloi, Yesu gaw, Ya nanhte lu la ai nga hta na la wa marit, ngu wu ai. Simun Petru li hta lung nna, nga kaba latsa e manga shi masum ting rawng ai sumgawn hpe, hkarang ntsa de karawt shalun wu ai. Dai hte wa law timung sumgawn gaw n je ai. Shaloi, Yesu gaw, Wa marit, Jahpawt shat wa sha maru, ngu nna shanhte hpe tsun wu ai. Shi Madu rai nga ai hpe sape ni chye mu ai majaw, shanhte hta na kadai mung, Nang kadai rai nta? ngu nna n san wam mu ai.

Yesu gaw muk la nna sape ni hpe sa jaw mu ai; nga hpe mung dai hte maren sa jaw mu ai. Yesu Shi si ai ni kaw na bai hkrung rat ai hpang, sape ni hpe Shi a hkum madun dan ai hta na, ndai gaw masum lang ngu na rai nga ai. Ya shanhte jahpawt shat sha ngut jang, Yesu gaw Simun Petru hpe, Yawhan a kasha Simun e, ndai ni tsaw ra ai hta, nang Ngai hpe grau tsaw ra nni? ngu nna san wu ai. Shi gaw, Rai sa, Madu e, ngai Nang hpe tsaw ra nga nngai gaw Nang chye nga ndai ngu nna htan wu ai. Shaloi Yesu gaw, Nye a sagu kasha ni hpe bau nga u, ngu nna shi hpe tsun wu ai. Bai lahkawng lang, Yawhan a kasha Simun e, Nang ngai hpe tsaw ra nga nni? Ngu nna shi hpe san wu ai. Shi gaw, Rai sa, Madu e, ngai Nang hpe tsaw ra nga nngai gaw, Nang chye nga ndai ngu nna bai htan wu ai. Yesu gaw, nye a sagu ni hpe rem nga u, ngu wu ai. Bai masum lang, Yawhan a kasha Simun e, nang Ngai hpe tsaw ra nga nni? ngu nna san wu ai.

Masum lang du hkra, Nang Ngai hpe tsaw ra nni? Nga nna shi hpe san wu ai majaw Petru myit yawn nna, Madu e, Nang gaw yawng mayawng hpe chye nga ndai, ngai Nang hpe tsaw ra nga nngai gaw, Nang chye nga ndai, ngu nna htan wu ai. Yesu gaw, Nye a sagu ni hpe bau nga u. Nang hpe Ngai kaja wa teng teng tsun de ga. Nang shabrang nga ai hte yang na a hkum hpe nang dai shingkyit kyit nna, sa mayu ai shara shagu de sa lu ndai: rai ti mung, nang dingla jang chyawm gaw, na a lata yan hpe nang lalam nna, masha kaga gaw nang hpe kyit ya nhtawm, nang n ra ai shara de woi sa wa na rin dai, ngu nna shi hpe tsun wu ai. Shing nga tsun ai gaw, Petru gaw kaning re ai si lam hte Karai Kasang a hpung shingkang shapraw lu na hpe, tau nna tsun ai rai nga ai. Ga dai tsun ngut jang, Yesu gaw, Petru hpe, Ngai kaw hkan nang rit, ngu wu ai.

Ya hti ai gaw Madu a Kabu Gara Shiga rai nga ai.

2019:PASKA LADAW LABAN (2) NA MUNGGA

Chyum Mungga daw langai hta, moi shawng kaw nna nawku hpung hta hkristan masha ni a myit mang jawm pawng ai hpe shadan shaleng ya ai sha n ga, shanhte rau myit hkrum rapra let Madu Yesu a kasa ni hkaw tsu ai hpe kamsham ai hte shada kahpu, kanau tsawra myit, salum n-gin hka ai sha jawm pawng nga nna, san seng sanpra ai uhpung uhpawng langai zawn tinggyeng myit nrawng ai, rau jawm tara shadik nna rau lu, rau sha, rau kyuhpyi let pyaw pyaw zuphpawng nga lai wa sai hpe mung chye lu ai. Shawng na hkristan masha ni a lai akyang hpe yu nna, anhte hpe Hkristu hta sha madung da let kun dinghku hta mung, uhpung uhpawng hta mung, gara hku nga sa ra ai hpe sharin ya ai Mungga mung rai nga ai, Myit hkrum myitra ai lam hta sha Karai a hpung shingkang shadan shaleng lu nga ai. Madu Yesu a kasa ni mung yak hkak ai lam amyu myu a lapran, Karai Kasang a namik kumla amyu myu hte mauhpa amu ni hpe matut manoi shdan dan ma ai.

Yesu gaw Shi bai hkrung rawt na kasa ni a lapran dan dan ai shloi, ngwi pyaw simsa lam Shi jaw ya sai hte maren anhte a kaang e mung, Shi hpe nmu lu ai raitim kamsham ai myit a marang e Shi a simsa lam anhte lu la saga ai. Nmu lu tim kamsham ai gaw alu ma ai nga nna Madu Yesu tsun da sai. Anhte gaw Karai a Chyum Mungga ni mung jahkring hkring na la lu sai, nawku hpung a sharin ya ai makam masham tara ga ni mung sharin hkam la lu sai. Madu Yesu a hkum hte Sai hpe mung Chyoi Pra ai Sacramentu a marang e hkam la lu sai ni rai ga ai majaw kamsham ai lam hta nmai ningra nga ai. Madu Yesu hte rau rai sai ni re majaw lu la sai makam masham hpe n gun atsam hte sakse hkam ai rai ra sai. Madu Yesu hkrung rawt ai gaw anhte a mayak mahkak, jam jau lam ni hpe jahkoi kau, jasim kau ya na matu nre nga ai. Anhte a jamjau ai mayak lam ni gaw makam masham hku yu ga nga yang san seng wa na matu jasan jaseng ya ai lam re sha n ga Karai Kasang ga ndat da ai Sumsing hta myit mada nga na matu rai nga ai.

Si ai kaw nna hkrung rawt sai htani htanaa asak daju Madu Yesu gaw Shi a ahkang aya hpe kasa ni hpe jaw da sai hte maren, kasa ni kaw nna pra hkrat wa sai sape ni hku nna mung, Karai a Mungdan lam hpe n-gup aga hku, amu magam hku mung, shadan shaleng madun ya sai majaw kamsham ai hpung masha ni grau law wa sai. Dai ni anhte ni mung, Kashin Kamun sacramentu hkam la ai shaloi lu da sai ahkang aya hte maren Karai Kasang a Mungdan lam hpe anhte n-gup aga, magam bungli hku, shadan shaleng na lit nga ga ai ni re.

Sawn sum ru mai ai lam: Ngai hkam la lu sai Makam Masham hpe gara hku sakse hkam nga ai kun?

2019:PASKA LADAW LABAN (2) NA CHYUM LAIKA

PASKA LADAW HTA LABAN 2

28 April, 2019

CHYUM MUNGGA DAW

1 KASA 5: 12-16

Ya hti na gaw, Kasa Laika hta na rai nga ai.

Kam sham ai masha nlang hte gaw, myit langai sha hte Sawlumon mying ai jarawp hta zuphpawng nga ai. Masha gale kadai mung shanhte a zuphpawng hta n lawm wam ma ai; mung masha ni chyawm gaw shanhte hpe sha-a ma ai rai nna, kam sham ai numsha lasha hpung kaba, Madu kaw jat bang wa ma ai. Ya, Kasa ni a lata hta lamik kumla hte mauhpa amu law law wa, mung masha ni a man e byin dan nga ai. Dai rai nna, Petru lai sa wa yang, langai ngai a ntsa e shi a shingnip sha pyi hkra u ga nga nna, machyi makaw hkrum ai ni hpe mare lam makau de hpai shapraw, yup ku ni hte panep ni hta tawn da shajang ma ai. Dai hta kaga, Yerusalem grup yin ginwang hkan na mare ni kaw nna mung, masha law law wa machyi ai ni hte nat shang zingri ai ni hpe woi nna, du sa shajang ma ai: dai ni yawng hte gaw shamai shatsai ai hkrum ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

SHINGRAN 1:9-11a. 12-13. 17-19

Ya hti na gaw, Yawhan a Shingran Laika hta na rai nga ai.

Anhte nlang Yesu hte matut mahkai ai hkrum nga ga ai rai nna, ngai Yawhan gaw nanhte a hpu nau wa rai nga nngai: shing rai nanhte a nni nkri, nanhte a mungdan, nanhte shakut sharang ai lam hta mung, ngai hkan lawm nga nngai. Ngai gaw Karai Kasang a mungga hkaw dan ai hte Yesu a matu sakse hkam ya ai majaw, Patmu ngu ai zunlawng hta nga nga nngai. Madu a nhtoi langai mi hta Wenyi a jaw e ngai nawng mat wa ai rai nna, nang mu ai hte maren laika hta ka da u nga nna, nye a shingdu de pahtau zawn ngoi ai nsen hpe ngai na la se ai. Dai ngai hte shaga ai nsen hpe mu lu hkra, ngai kayin yu nngai. Shingrai kayin yu yang ja pyengding sanit hte dai pyengding ni a ka-ang e Masha Kasha zawn san ai wa langai mi hpe ngai mu nngai: dai wa gaw lahkre du ai palawng galu bu hpun nna, sinda hta ja shingkyit kyit nga ai.

Dai wa hpe mu jang, Shi a lagaw nhpang e si ai wa zawn ngai kadawng taw mat nngai. Shi gaw Shi a hkra lata nye a ntsa e mara ya nna, ngai hpe tsun ai gaw: Hkum hkrit et; Ngai gaw Ningshawng Wa mung, Jahtum Wa mung rai nga ai hte, Ahkrung nga ai Wa rai nga nngai. Ngai si mat wa sai rai ti mung, ya e htani htana prat dingsa ngai a hkrung nga nngai: si hkrung si htan mungdan a sumsaw hte katsan ga na sumsaw hpe ngai lang nngai. Dai re ai majaw nang mu lu sai hpe mung, ya byin nga ai hpe mung, htawm hpang de du na ra ai lam hte hpe mung, ka da u, nga ngai hpe tsun ni ai.

Ya hti ai gaw Karai Kasang a mungga rai nga ai.

KABU GARA SHIGA

YAWHAN 20: 19-31

Ya hti na gaw, Yawhan a Laika hta na Kabu Gara Shiga rai nga ai.

Dai laban bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sayang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape ni mung, Madu hpe mu lu yang, kabu gara nga ma ai. Bai, Yesu gaw, Nanhte ngwi pyaw nga myit ga; Nye Wa Ngai hpe shangun dat ai hte maren, Ngai mung nanhte hpe shangun dat made ai, ngu mu ai. Shing nga nhtawm sape ni a ntsa e Shi a nsa kawut nna, Chyoi pra ai. Wenyi hpe hkap la mu; 23kadai a shut hpyit mara hpe raitimung, nanhte raw dat yang gaw, raw mat na ra ai; kadai a shut hpyit mara rai timung, nanhte shagun da yang gaw, dai mara naw nga na ra ai ngu nna shanhte hpe tsun mu ai.

Shing rai Yesu sa du ai shaloi, kasa shi lahkawng hta lawm ai marun ma ngu ai Htawma gaw, shanhte rau n nga ang ai. Dai rai nna kaga sape ni Shi hpe, Anhte gaw madu hpe mu lu saga ai, ngu nna tsun dan mu ai. Shi chyawm gaw, Shi a lata hta hpri hkang hpe ngai n mu, dai hpri hkang hta nye a layung ngai n shawn yu, Shi a garep hta nye a lata n bang yu yang gaw, ngai n kam n sham na nngai, ngu nna shanhte hpe tsun wu ai. Dai hpang matsat ya du jang, shi a sape ni nhku e bai hpawng nga ma ai rai nna, Htawma mung shanhte hte rau lawm nga ai. Chyinghka la da ti mung, Yesu sa du nna, shanhte a ka-ang e tsap let, nanhte ngwi pyaw nga myit ga law, ngu wu ai. Shaloi, shi gaw Htawma hpe, Na a layung nang de ladawn nna, Nye a lata hpe yu yu u; na a lata ladawn nna, nye a garep hta bang yu u; n kam n sham ai myit hpe kau da nna, kam sham nga u, ngu wu ai. Dai rai nna, Htawm gaw, nye a Madu, nye a Karai Kasang rai nga ndai, ngu nna Shi hpe htan wu ai. Yesu gaw, Htawma, nang Ngai hpe mu lu ai majaw kam sham nit dai; n mu lu ti mung kam sham ai ni gaw a lu ma ai, ngu nna shi hpe tsun wu ai. Ndai laika hta n ka da ai lamik kumla kaga law law mung, Yesu gaw Shi a sape ni a man e galaw dan nu ai; rai ti mung, Yesu gaw Karai Kasang a Kasha Hkristu rai nga ai hpe anhte kam sham nna Shi a amying ningsang a marang e asak hkrung ai lu la myit ga, nga nna, ndai hte wa ka tawn nga ai.

Ya hti ai gaw Madu a Kabu Gara Shiga rai nga ai.

2019:PASKA POI SHANI NA MUNGGA

Madu Yesu si ai kaw nna bai hkrung rawt sai kabu gara shiga gaw Maria Madalena hte Kasa ni shawng nnan mu hkrup ai Kaman re ai lup lawng a marang e htawn tsun ai shiga a majaw sha nrai nga ai. Raitim, dai mahkrum madup a marang e anhte Nawku hpung a makam masham gaw dai hta e rau bai hkrung rawt wa sai rai nga ai. Dai ni na kabu gara shiga gaw, Madu Yesu hkrung rawt ai hpang na mabyin hpe e grau shadan shaleng ya nga ai. Madu Yesu a hkrung rawt ai lam gaw nawku hpung, nawku daw jau lam a mungsung gasung sha nrai nga ai, Anhte yawng a matu hkrung rawt sai asak nnan mung rai nga ai.

Dai Madu a nni nhkri lam, si hkam ai lam, hkrung rawt ai lam hpe myit dum let shi hte rau sak hkrung ai, dai sak hkrung lam hpe masha ni hpe bai sakse hkam ya lu ai ni rai ra ai. Anhte lu la sai makam masham hpe garan kachyan ai lam nnga yang Karai Kasang a asak nnan hta hkrung rawt ai ni nrai na ga ai, Shinggim masha myit hte shi madu a hkrung rawt ai lam mungsung gasung hpe hkrak tup nchye na lu raitim, shi a kasa ni hpe bai yu dat yu ga, Kasa ni hkrit tsang myit kaba hte ala nga ten Madu Yesu a hkrung rawt sai hpungshing kang gaw shanhte a myit hten ai lam mahkra hpe shazim kau ya nna, simsa lam hte nhtoi nnan de kayin wa shangun ai kup sup ai lam byin wa sai. Madu Yesu si du hpe dang kau ai awng padang gaw anhte a matu hkum zup ai npawt madung makam masham hpe jaw ya ai sha n ga, mara ningsin htawng chyinghka hpe hpaw kau ya nna asak nnan de bai shangai chyinghkai ya ai chyeju hpe mung lu la saga ai. Yesu a hkrung rawt wa ai lam gaw anhte hkum anhte mung nnan bai hkrung rawt lu hkra shi Madu woi sa nga ai sha n ga, dai Madu a Chyoi Pra ai Karai a asak hta bai shang lawm lu ai ahkaw ahkang lu ai ni mung rai nga saga ai. Dai hkrung rawt ai lam gaw anhte a manu shadan ai lam hpe grau madang tsaw ai de sit shang shangun nga ai. Ga shadawn, shani shagu anhte galaw ai magam bungli hta myit lawm, hkum lawm tsawra myit bang let ap nawng ai lam mung rai nga ai.

Daini na Kabu Gara shiga hta na maria Madalena a Madu Yesu hpe tsawra kamsham ai hpe myit sumru yu yang, anhte prat hta mung Madu Yesu hpe tsawra kam sham myit nrawng yang, anhte a kamsham myit ningra wa yang, Madu Yesu a hkrung rawt lam hpe (Maria Madalena) zawn anhte sakse hkam lu na n re, lachyum n nga ai sakse sha rai wa na. Madu Yesu a sape ni hkum nan Shi Madu a hkrung rawt ai lam hpe myit ug ang lai wa sai. Madu Yesu a chyeju nhtoi a marang, aten ladaw lai hpang she chye na kamsham wa ma ai. Dai re majaw anhte a kamsham tsawra myit gaw Madu Yesu a mungsung gasung ni hta shang lawm lu ai.

Paska poi ngu ai gaw, moi Egudu mung mayam prat na lawt pru wa zawn, myit nhkrum nra hte shada chye na shut ai lam, myit daw myit hten let myit mada lam nnga mat ai, anhte a myit tsang lam ni a majaw Karai Kasang hte tsan gang mat sai shingim masha ni hpe Karai Kasang hte bai mahkru mara lam n-nan jaw ya sai makam masham poi mung rai ai hte maren, mara mayam prat na lawt pru wa sai anhte ni hpe laikyang dingsa de galoi bai n-hkayin lu ai Karai Kasang a chyeju asak nnan hta hkrung rawt sai ni mung rai ga ai. Misa hkungga hta shang lawm sai ni anhte yawng gaw Chyoi Pra Hkum a marang e, Madu Yesu a hkrung rawt sai mungsung gasung hta shang lawm ai rai ga ai.

Dai re majaw, anhte nawku hpung gaw Paska Poi hpe ahkyak dik ai makam masham a npawt madung awng padang poi kaba hku ahkyak la, nawku daw jau ai. Anhte a makam masham hpe Yesu si ai kaw na bai hkrung rawt ai lam nlawm yang lachyum shapraw sakse hkam nmai ga ai. Paska a Kabu Gara, myit mada, simsa ai hte asak n-nan, nhtoi n-nan gaw shinggim masha yawng a matu rai sai.

Sawn sum ru mai ai lam: Karai Kasang gaw Na a prat hta Paska a Kabu Gara ai hpe lu la na ra sharawng ai hpe chye nga u. Nang lu la ai Kabu Gara lam manang ni hpe gam garan nga ai kun? Myit yu ga.