KAMSHAM AI HTE MADAT MARA AI MYIT

Esia hpe Karai Kasang shaga la ai lam na la lu ai. Esia gaw shingran hta Karai Kasang hpe mu ai. Ngai kadai hpe shangun dat na i? nga nna san ai nsen hpe shi na ai. “Ngai nang e nga nga nngai, ngai hpe shangun dat e” ngu shi htan wu ai. Shi gaw “Ngai dingnye lu nngai, ngai n san n seng ai n-gup tu ninglen Karai Kasang hpe mu lu se ai” nga nna tsun ai. Shaloi Seraphim langai mi gaw tawn hkungri ntsa na, lakap hte matep la ai wan n-ga hte shi a n-gup ahtawk let na mara hpe yen seng raw kau ya sai nga ai. Kasa Pawlu hpe mung Madu Yesu shaga la ai. Shi gaw kasa ni hta kaji htum ai wa re lam hte Karai Kasang a nawku hpung hpe zingri zingrat ai majaw kasa ngu na pyi n ging n dan ai nga ai. Raitim Karai Kasang a chye ju a majaw byin lu ai rai nga ai.

Kabu Gara shiga hta Madu Yesu gaw Simun hpe shaga la ai. Simun gaw shana ting nga hkwi tim nga n lu ai majaw ba ai hte sumgawn kashing taw nga ai shaloi Madu Yesu du sa wa ai.Yesu gaw Simun a hkali kaw shang nna dung let shawa masha ni hpe tara hkaw ai. Madu Yesu gaw yaw shada lam nga ai majaw Simun a hkali kaw shang ai. Yesu gaw sasana magam galaw na matu Simun hpe lajang ya ai rai nga ai. Karai Kasang gaw wenyi shagu hte shaga lam shagu hta ndai zawn galaw nga ai. Madu Yesu gaw shawa masha ni hpe tara hkaw ngut ai shaloi, hka sung ai de sit sa nna sumgawn jahkrat na matu Simun hpe tsun ai. Simun hte shi manang ni gaw ba ai raitim, shanhte hpe sumgawn jahkrat shagun ai wa gaw panglai a lam chye ai wa n rai tim, ya ten gaw nga hkwi na aten n re ai hpe shanhte chye nga tim, dai makau grup yin hta nga n nga ai hpe shanhte hkrak chye tim, shanhte gaw sumgawn hpe hka de jahkrat dat ai. Madu hpe kamsham kamhpa ai hte shi tsun ai hpe madat mara ai hte galaw ai. Dai majaw mau hpa lam byin wa ai. Dai lamik kumla a majaw shi mau mat ai hte Hkristu a mahkra dang chye ai, shi a nyan hpaji hpe chye la ai, Simun gaw shi a shaga la ai lam hte shi a n gring n dan ai lam hpe mu chye la ai.

Hkarang kawng de du ai hte Yesu a lagaw nhpang e hput di, dingnyawm nna “ngai gaw mara lu ai wa re, ngai kaw na pru mat u” ngu wu ai. Madu Yesu gaw Petru a hkrit myit hpe la kau ya ai hte shi a asak aprat matu, shi a sasana magam galaw na matu kasa hku nna lata la ai. Petru gaw arai mahkra hpe kau da nna shi kaw hkan nang mat ai. Sape ni yawng gaw Karai Kasang a mungdan a matu wenyi ni hpe hkwi ai masha ni tai wa ai. Petru gaw ba ai rai tim, madu Yesu tsun ai shaloi, bai shakut na myit masa nga ai. Masha law malawng gaw jam jau, yak hkak ai, hkrat sum ai ten bai n shakut ai sha asum jaw kau ai. Myit mada shara n nga tim, Yesu a ga hte maren galaw shakut na myit rawng ra ai.

Kasa ni gaw Madu Yesu a hpang hkan nang na matu jin jin re. Shanhte gaw yawng hpe kau da nna Yesu a hpang hkan mat ai. Esia, Pawlu hte Petru ni gaw shanhte hkum nan mara lu ai ni re ai, n ging n dan ai ni re nga nna shgrit shanyem let hkap yin la ai hpe mu lu ai. Karai Kasang a tsawra myit hte shanhte n myit mada ai aten hta shaga la hkrum ai. Karai Kasang gaw shanhte a mara ni hpe raw dat ya ai hte n-gun atsam jaw, garum ya ai, hte chyeju jaw ya nga ai hpe mu lu ai. Shi a chyeju hte shi shangun ai bungli ni hpe kangka ai hte galaw shakut lu ma ai.

Anhte a asak aprat hte sasana magam hta, kamsham myit hte madat mara myit gaw ra ahkyak dik, n nga n mai rai nga ai. Karai Kasang a man hta madat mara ai lam n nga yang gaw lam shagu akyu n nga ai, kaman re. Dai ni anhte yawng hpe mung Karai Kasang shaga nga ai.

2019:PRANWAN LADAW LABAN (5) NA CHYUM LAIKA

Pranwan Ladaw Laban 5

10th February 2019

CHYUM MUNGGA DAW 1

ESAIA 6:1-8

Ya hti na gaw, myihtoi Esaia a Laika hta na rai nga ai.

Hkawhkam Uzziah si ai shaning hta, Madu gaw galu kaba nna tsaw htum ai tingnyang hta dung nga ai hpe ngai mu nngai; Shi lawai ai hpun nba Nawku Htingnu ting hpring nga ai. Shi a ntsa e Serahpin tsap nga ma ai: langai singkaw kru kru tu nga ma ai. Langai wa mi hpe, ‘Zawnawng zawwa up ai Madu gaw, San Pra, San Pra, San Pra rai nga ai. Ginding aga ting Shi a hpung shingkang hte hpring nga ai law.’ Nga nna tsun ma ai. Shing nga tsun jahtau ai wa a nsen majaw chyinghka hkinbawng ni ashun awam nga nna, nta ting wan hkut hte hpring nga ai.

Dai rai nna ngai gaw, ‘Ngai wa tsinyam hkrum lu nngai; ngai htum mat ni ai; ngai n san n seng ai nga nga nngai; rai ti mung, zawnawng awwa up ai Madu dai Hkawhkam wa hpe, nye myi hte nan mu lu se hka’. Ngu nna tsun nngai. Shaloi, Serahpim langai mi gaw tawn kungri ntsa na, lakap hte matep la ai wan n-ga, shi a lata hte lang let ngai hpang de pyen sa wa ai. Dai wa nye a n-gup hpe ahtawk let, ‘Yu u, dai gaw na a nten hpe hkra sai; Na a mara hpe yeng seng kau sai; Nang shut hpyit ai hpe mung raw dat kau nu ai.’ nga ai. Bai, ‘Ngai kadai hpe shangun dat na i? Anhte a matu kadai wa sana i? nga nna Madu san ai nsen hpe ngai na nngai. Dai rai nna, ngai gaw, ‘Ngai nang e nga ai law, ngai hpe shangun dat rit.’ ngu nna htan we ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 15:1-11

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Ngai nanhte hpe hkaw tsun dan nna nanhte mung hkam la sai hte, naw hkan nang yu ai, Kabu Gara Shiga a lam hpe, nanhte naw myit dum la na matu, ngai bai shapraw shandan de ai. Ngai nanhte hpe tsun dan yu ai mungga hpe, nanhte manat nga yang gaw, de a marang e hkye hkrang la ai hkrum lu na myit dai; dai hku n rai yang gaw nanhte a makam masham li la rai nga ai. Ngai hkam la sai grau ahkyak ai lam hpe, ngai shawng nnan e nanhte hpe ap ya sade ai: dai gaw, chyum laika ni tsun ai hte maren, Hkristu gaw anhte a shut hpyit mara a matu si hkam sai; lup makoi ai shi hkrum nhtawm masum ya nhtoi hta e, bai hkrung rawt wa sai. Shi gaw Kehpa kaw dan pru wa ai; dai hpang kasa shi lahkawng kaw dan pru mu ai; dai hpang lang lata sha, hpu nau manga tsa jan Shi hpe mu dat ma ai: Shanhte hta na malawng maga ya du hkra nga shajang ma ai; nkau mi chyawm gaw yup pyaw mat masai.

Dai hpang Yaku kaw mung, kasa ni yawng kaw mung, Shi dan pru mu ai. Hpang jahtum e, ngai nhtoi n gu ai ma zawn re ai wa kaw Shi dan pru ni ai. Kaning rai nme law, kasa ni hta kaji htum ai wa ngai rai nga nngai; Karai Kasang a Nawku Hpung hpe ngai zingri zingrat di kau sai majaw, kasa ngu na pyi ngai n ging n dan nngai. Rai ti mung, Karai Kasang a chyeju majaw, ngai ndai hku byin lu nngai rai nga ai; Shi ngai hpe madun dan ai chyeju mung, ngai hta e Kaman lila n rai mat ni ai. Shanhte yawng hta ngai grau nna bungli gunhpai nngai; dai gaw ngai n rai, ngai hte rau a nga nga ai Karai Kasang a chyeju sha rai nga ai; rai ti mung, ahkyak ai lam gaw, shanhte hkaw dan ai mungga hpe, ngai mung hkaw dan nga ai; dai hpe nan nanhte kam sham manit dai.

Ya hti ai gaw Karai Kasang a mungga rai nga ai.

KABU GARA SHIGA

LUKA 5:1-11

Ya hti na gaw, Luka a Laika hta na Kabu Gara Shiga rai nga ai.

Dai aten hta e, masha wunawng wuwa Karai Kasang a mungga madat la na matu, Yesu kaw ginjup sa wa ma yang, Genesaret nawng makau e Shi tsap nga ai rai nna, hka hkin gau de nna loi mi sit sa wa na matu shi hpe hpyi wu ai rai nna, dai li hta dung let, dai kaw nna shawa masha ni hpe sharin shaga wu ai. Shi ga tsun ngut jang, hka sung ai de sit sa nna, nga magawn la na matu, sumgawn ni hpe jahkrat dat mu, ngu nna Simun hpe tsun ai. Simun mahtang gaw, Madu e, mana tup anhte shakut ti mung, hpa n lu ga ai; rai timung, Na a ga a majaw sumgawn jahkrat na we ai, ngu nna htan wu ai.

Shing rai jahkrat jang, shanhte gaw nga unawng kaba magawn hkrup lu ma ai; shanhte a sumgawn ni je wa malu ai rai nna, li kaga hta nga ai manang ni hpe sa garum na matu, dingsi shaga la ma ai. Shanhte sa garum nna, li lahkawng yan lup wa mangang hkra, bang jahpring mu ai. 8Simun Petru gaw dai hpe mu jang, Yesu a lagaw nhpang e hput di nna, Madu e, ngai hte hka mat wa su; ngai gaw mara kap ai masha rai nga nngai, ngu wu ai. Kaning rai nme law, shing rai nga magawn la lu ai majaw, shi mung, mau mahka nga ma ai;  Simun a manang yan, Zebedi a kasha Yaku hte Yawhan mung, dai zawn mau mat ma ai. Shaloi, Yesu gaw Simun hpe, Hkum hkrit et; ya kaw nna masha hpe hkan hkwi na rin dai, ngu wu ai. Shanhte a li yan hpe danam e sek da nhtawm, arai mahkra kau da nna, Shi kaw hkan nang ma ai.

Ya hti ai gaw Madu a Kabu Gara Shiga rai nga ai.

KAMSHAM MYIT HTE TSAWRA MYIT

Karai Kasang a mungga Yeremia kaw du nna “Ngai nang hpe kanu a hkritung e garai n sha chyaw yang pyi, ngai nang hpe chye ai, sha chyoi sha pra ai, ngai nang hpe myihtoi a ya dang da ai”. Karai Kasang hkang da mada hpe tsun dan na matu Karai Kasang gaw shi hte rau rai nga ai lam na la lu ai. Karai Kasang gaw anhte garai n shangai shi kaw nna anhte hpe chye ai, tsaw ra ai, shachyoi shapra da ai hte shi a Kabu gara shi ga hkaw tsun na matu lajang da nga ai.

San Pawlu gaw tsawra myit a lam tsun dan ai. Lawu na lam ni tinang hta nga ai kun myit sawn sumru yu ga. Karai Kasang a Kabu Gara shiga hpe hkaw tsun sakse hkam na matu gaw tsawra myit grai na hkyak ai. Tsawra ai myit gaw: myit galu kaba ai, sumnung shingdi ai, manawn masham n nga ai, grang ai ga n tsun ai, gumrawng gumtawng n rawng ai, nse nsa n galaw ai; tinang akyu n tam ai, masin pawt la ai htet n nga ai, mara n tam nga ai, n ding nman ai hta n kabu gara nga ai, yawng mayawng hpe hkam sharang ai, yawng mayawng hpe kamsham ai, yawng mayawng hpe myit mada nga ai hte yawng mayawng hta shakut sharang nga ai. Tsawra myit gaw galoi mung htak chye ai n rai. Makam, myit mada ai hte tsawra ai myit ngu ai lam masum nga ai, dai hte hta grau kaba ai gaw tsawra myit rai nga ai.

Anhte yawng gaw Karai Kasang hte tinang a htingbu manaw manang hpe tsawra myit majing hte tsawra ra ai. Kabu Gara shiga hta Israela masha ni tsawra myit n nga ai hpe mu lu ai. Yesu gaw shi nga kaba wa ai Nazareth mare de wa nna Laban nhtoi hta Tara jawng hta shang ai hte chyum mungga hti nna sharin shaga ai. Masha nlang hte gaw Yawsep a kasha n rai a ni nga nna tsun let Madu Yesu hpe yu kaji ai, Shi hpe n hkap la ai, Shi a ga hpe n madat ai. Dai majaw Karai Kasang gaw Yuda n re ai amyu sha ni hpang de myihtoi ni hpe shangun dat ai rai nga ai. Madu Yesu hpe hkap la kam sham ai lam n nga, tsawra myit n nga yang gaw chyeju n hkam la lu ai. Daini anhte shani shagu tsawra matsan dum myit hte sak hkrung ai kun? tinang hkum tinang san yu ga. Anhte a makau grup yin na masha ni hpe kaji ai magam bungli ni hta tsawra daw jau ai kun? Tsawra matsan dum myit hte kaji kadun ai ni, asak kaba ai ni, matsan mayan hkrum ai ni, machyi makaw, yak hkak jamjau nga ai ni hpe tsawra matsan dum magam bungli galaw ai kun?

Tsawra myit gaw galoi mung htak chye ai n rai. Makam, myit mada ai hte tsawra ai myit ngu ai lam masum nga ai, dai hte hta grau kaba ai gaw tsawra myit rai nga ai.Anhte yawng gaw Karai Kasang hte tinang a htingbu manaw manang hpe tsawra myit majing hte tsawra ra ai. Kabu Gara shiga hta Israela masha ni tsawra myit n nga ai hpe mu lu ai. Yesu gaw shi nga kaba wa ai Nazareth mare de wa nna Laban nhtoi hta Tara jawng hta shang ai hte chyum mungga hti nna sharin shaga ai. Masha nlang hte gaw Yawsep a kasha n rai a ni nga nna tsun let Madu Yesu hpe yu kaji ai, Shi hpe n hkap la ai, n kam sham ma ai. “Kadai myi htoi mung ti nang buga e arawng n lu ai, myi man n lu ai” ngu Yesu tsun ai. Israela ni a myit ja ai n kam n sham ai a majaw Karai Kasang a chyeju n hkam la lu ma ai lam Yesu gaw Ga shaka dingsa na mabyin lam lahkawng hpe tsun dan ai.

Eliah a prat hta masum ning e shata kru tup jang, dai mung ting hku hku hpang gra wa ai. Israela amyu hta gaida ni law law nga ai rai timung Sidon mung, Zarep hta mare na gaida jan langai mi kaw she Eliah hpe shangun dat ai. Dai gaida jan gaw Israel myusha n rai nga ai. Elisha a apart hta mung hkap la ai, Shi a ga hpe n madat ai. Dai majaw Karai Kasang gaw Yuda n re ai amyu sha ni hpang de myihtoi ni hpe shangun dat ai rai nga ai. Madu Yesu hpe hkap la kam sham ai lam n nga, tsawra myit n nga yang gaw chyeju n hkam la lu ai.

Myit sumru mai ai lam

Daini anhte shani shagu tsawra matsan dum myit hte sak hkrung ai kun? tinang hkum tinang san yu ga. Anhte a makau grup yin na masha ni hpe kaji ai magam bungli ni hta tsawra daw jau ai kun? Tsawra matsan dum myit hte kaji kadun ai ni, asak kaba ai ni, matsan mayan hkrum ai ni, machyi makaw, yak hkak jamjau nga ai ni hpe tsawra matsan dum magam bungli galaw ai kun?

2019:PRANWAN LADAW LABAN (4) NA CHYUM LAIKA

Pranwan Ladaw hta Laban 4

3rd February 2019

CHYUM MUNGGA DAW 1

YAREMIA 1:4-5, 17-19

Ya hti na gaw, myihtoi Yeremia a Laika hta na rai nga ai.

Yuda hkawhkam Yoshia a lakhtak e Madu a mungga ngai hpe tsun dan ni ai: Ngai nang hpe nnu a hkritung e garai n shachyaw yang pyi, nang hpe chye nngai: masha amyu ni a myihtoi tai na, ngai nang hpe aya dang da ni ai. Dai re majaw, nang gaw shingkyit kyit nna rawt u; ngai nang hpe hkang da mada, shanhte hpe tsun dan u; shanhte a man e ngai nang hpe n jahkrit shama kau u ga, shanhte hpe hkum hkrit et. Yu u, mungdan ting a man e mung, Yuda hkawhkam ni, de a du salang ni, de a hkinjawng ni hte mung masha ni a man e mung, Ngai nang hpe dai ni jang, bunghku kum ai mare, hpri shadaw hte magri shakum zawn n-gun shaja na de ai. Shanhte nang hpe hkap gasat ti mung, dang kau lu na n rai; kaning rai nme law nang hpe mawai la na matu, Ngai nang hte rau nga nga nngai, ngu nna Madu nan tsun nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 12:31, 13:1-13

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Grau kaja ai chyeju kumhpa ni hpe lu la hkra shakut nga mu. Dai rai nna grau htum ai lam langai mi, ngai nanhte hpe naw madun dan na made ai. Ngai gaw masha a ga hte lamu kasa ni a ga amyu myu hpe chye tsun ti mung, tsaw ra ai myit n rawng yang gaw, mahku rawng ai bau hte, ngoi gara ai shup sheng ngai tai nga nngai. Ngai myihtoi chye htoi ai hte, mung sung ga sung yawng mayawng hte, hpaji amyu hkum sumhpa chye chyang nga nna, bum ni hpe sit shangun lu hkra makam masham rawng nga ti mung, tsaw ra ai myit n rawng yang gaw, ngai hpa n rai nga nngai. Nye a arai mahkra hpe ngai gam kau nna, nye a hkum hpe pyi nat kau na matu ap kau ya timung, tsaw ra ai myit n rawng yang gaw, hpa akyu nga na n rai. Tsaw ra ai lam gaw, myit galu nga ai; sumnung shingdi nga ai; tsaw ra ai lam gaw manawn masham n nga ai; tinang a hkum hpe shagrau ai ga n tsun ai; gumrawng gumtawng n rawng ai; n sun n ang ai hku n galaw ai; tinang a akyu n tam ai; masin pawt wa ai n rai; mara n tam nga ai; n ding n man ai lam hta n kabu ai sha, teng man ai hte rau kabu gara nga ai.

Tsaw ra ai lam gaw, tut nawng e masha a n-gun kya ai hpe magap da nga ai; tut nawng e htingbu wa hpe kam nga ai; tut nawng e shi a lam hpe myit mada nga ai; tut nawng e hkrum ang ai tsinyam hpe hkam sharang nga ai. Myihtoi htoi ai lam hkoi mat na ra ai; ga amyu myu chye tsun ai lam htum mat na ra ai; chye chyang ai lam mung hkoi mat na ra ai; tsaw ra ai lam chyawm gaw, htum mat chye ai n rai. Kaning rai nme law, daw chyen mi sha chye chyang nga ga ai; daw chyen mi sha myihtoi htoi ga ai; rai ti mung, hkum tsup ai lam du jang n hkum n tsup ai daw chyen hkoi mat na ra ai. Ngai ma kaji naw rai nga yang, ma ga ngai ga ai hte ma myit rawng nna, ma a myit yu ai hku ngai hkan nga nngai: ya ngai salang wa jang she, ma a lam hpe ngai tawn kau se ai. Ya gaw, n dan n leng ai hku jamna shingna hpe sha anhte naw mu nga ga ai; rai ti mung, dai shaloi e, myi man yawng let mu na ra ga ai. Ya gaw daw chyen mi sha ngai chyen mi sha ngai chye nngai; dai shaloi e, Karai Kasang ngai hpe chye chyang ai zawn, ngai mung chye na we ai. Ya, kam sham ai, myit mada ai hte, tsaw ra ai ngu ai lam masum dinggrin a nga nga na ra ai; rai ti mung, dai ni hta na grau kaba ai gaw, tsaw ra ai lam rai nga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 4:21-30

Ya hti na gaw, Luka a Laika hta na Kabu Gara Shiga rai nga ai.

Dai aten hta e Yesu gaw, tara jawng hta e ga tsun hpaw nna, Dai ni nan nanhte madat nga yang, ndai ka da ai ga dik wa sai, ngu nna shanhte hpe tsun mu ai. Madat la ai ni yawng hte gaw, Shi a ga hpe ra sharawng nna, Shi a n-gup hta na pru ai chyeju ga a majaw mau nga ma ai. Shanhte gaw, Ndai wa gaw, Yosep a kasha n rai nga a ni? tsun shajang ma ai. Dai rai nna Shi gaw, Nanhte mahtang, ‘Tsi sara e, tinang hkum dai hpe shamai la u, nga nna ga shagawp hku ngai hpe tsun nhtawm, Anhte na ai hte maren, Kapernaum mare e shabyin ai amu hpe zawn, Nang na a buga e mung galaw dan u, nga nna ngai hpe tsun na marin dai. Bai Shi gaw, Nanhte hpe ngai teng teng tsun made ga: Kadai myihtoi rai ti mung tinang a buga e arawng n lu nga ai.

Elia a aprat e, masum ning shata kru tup marang n htu ai hte jan ja nna, dai mung ting hkan e nachying hku hku hpang gara rai wa yang, Israela a amyu hta gaida law law nga ma ai: rai ti mung, shanhte hta na langai mi hpang de pyi Elia hpe n shangun dat wu ai; Sidun mung Zarehpa mare na gaida jan langai mi hpang de she shangun dat wu ai. Myihtoi Eslisha a aprat e mung, Israela amyu hta manggang kap ai masha law law nga ai, rai ti mung, shanhte hta na langai mi pyi san pra wa lu ai n rai; Siria masha Naman ngu ai wa chyu sha san pra wa lu ai, ngu nna shanhte hpe tsun mu ai. Dai tara jawng na ni yawng hte gaw dai lam na la jang, masin pawt bu ma ai. Shanhte rawt nna, mare shinggan de shi hpe shapraw nhtawm, dai mare de ai bum pungding de woi sa nna, n-gam mahka kaw nna Shi hpe kanawng jahkrat kau na maw ai. Shi chyawm gaw shanhte a ka-ang hku ga pru nna, sa mat wa ai.

Ya hti ai gaw Madu a Kabu Gara Shiga rai nga ai.

GALAI SHAI RA AI

Hkaw tsun ninghkring Saradaw Massilon tsun ai langai nga ai.

“Nawku Jawng kaw na wa ai shaloi, ‘Saradaw gaw tara hkaw grai byin ai, grai hkrak ai’ ngu masha ni tsun na n ra ai. Shanhte ni Nawku Jawng kaw na pru wa ai shaloi, ‘Ngai kaja wa lama ma rawt galaw sana, galai shai sana’ nga ai hpe tsun shangun mayu ai” nga ai.

Nehemia laika hta Babylon kaw shaning law law bawng dung ai kaw nna shanhte a mung de bai du wa ai hpang Israela shawa hpawng na numsha lasha mahkra a man e jahpawt jau jau kaw nna jan pungding du hkra Karai Kasang a tara laika hpe hti dan ai hte lachyum shapraw dan ai lam na lu ai. Tara laika hpe hpaw ai shaloi masha nlang hte gaw rawt tsap ma ai. Ezra gaw Karai Kasang hpe shakawn kungdawn ai hte masha ni nlang hte gaw lata sharawt let “Amen… Amen” nga nna gadu hkra gum dagup let Karai Kasang hpe nawku ma ai. Karai Kasang a Tara mungga hpe na ai shaloi shanhte myit yawn myit malai, hkrap ngu hkrap ngoi ma ai hte Karai Kasang a myit ra ai, Shi a mungga hte maren sak hkrung na matu myit daw dan ma ai. Israela masha ni gaw munnga hpe madat la nna hkap la ma ai. Madu Yesu gaw Laban shani shagu Tara Jawng de sa ai. Shi gaw galoi mung n hprai ga ai. Madu Yesu hti ai chyum laika gaw Isaiah laika 61:1-2 hta na rai nga ai. Hkyela Madu du sa na lam, kabu gara shiga rai nga ai. Dai Madu gaw kabu gara lam hte shalawt dat na lam rai nga ai. Madu Yesu tsun ai gaw ya nanhte na la lu ai ga gaw dai ni nan dik wa sai ngu nna hkaw tsun wu ai.

Korinhtu hpung masha ni hpang de shagun dat ai laika hta “anhte gaw Hkristu a hkum hkrang rai nga ai lam na la lu ai. Hkum hkrang gaw langai sha rai nga nna daw shan law law rai nga ai. Hkum hkrang langai sha tai na matu wenyi langai sha hta e kashin kamun hkam saga ai. Karai Kasang a mungga a marang e anhte gaw hkristu a hkum hkrang ni tai wa sai. Hkristu a hkum hkrang re ai nawku hpung hpe gaw gap ra ai. Hkristu a hkum hkrang re ai nawku hpung hta lawm ai ni yawng gaw grai ahkyak ai ni re, san seng san pra ra ai, myit hkrum myit ra kahkyin gumdin ra ai. Dai ni na Karai Kasang a Mungga ni hta Shi a Mungga hpe shagrit shanem ai myit, chyeju dum ai myit hte madat la ra ai, kamsham ra ai, hkungga lara ra ai hte hti myit sumru yu nna tinang a asak aprat, nga sat ngasa hpe galai shai nna sak hkrung ra ai lam anhte hpe shadum ya nga ai. Hpa majaw nga yang Karai Kasang a Mungga tengman nga ai hte Shi hkum nan anhte marai hkum shagu hpe shaga nga ai lam hpe tsun ai. Karai Kasang a Mungga madat la nna galai shai ai lam n nga yang hpa akyu nga na n rai.

Myit sumru mai ai lam: Nye a prat hta ngai kamsham ai Karai Kasang hpe gara hku sakse madun nga ai kun?

2019:PRANWAN LADAW LABAN (3) NA CHYUM LAIKA

PRANWAN LADAW HTA LABAN 3

27th January 2019

CHYUM MUNGGA DAW 1

NEHEMIA 8:1-4a, 5-6, 8-10

Ya hti na gaw, myihtoi Nehemia a Laika hta na rai nga ai.

Dai nhtoi hte hta e, hkinjawng Ezra gaw, shata sanit a shawng shani e, chye na lu ai shawa hpawng numsha lasha mahkra a man e, tara laika hpe la shapraw wu ai. Jahpawt jau jau kaw nna jan pungding du hkra, Hka Chyinghka ndaw na dam lada ai shara e tsap let chye na lu ai numsha lasha ni a man e tara laika hti dan ai hte, mung masha ni yawng dai hpe madat mara nga ma ai. Chere wa Ezra gaw shanhte shachyaw san da ai pinra ntsa e tsap nga wu ai. Shing rai Ezra gaw mung masha mahkra hta grau tsaw ai shara e tsap let, mung masha mahkra ni a man e dai tara laika hpe hpaw da nna, dai laika hpe hpaw ai shaloi, shanhte yawng hte gaw rawt tsap ma ai. Shaloi, Ezra gaw galu kaba re ai Madu Karai Kasang hpe shakawn kungdawn wu ai. Mung masha ni nlang hte gaw tinang a lata sharawt let, Amen, Amen, nga nna tsun nhtawm, ga du hkra gum dagup let Madu hpe nawku ma ai. Shingrai shanhte gaw, Karai Kasang a tara laika hpe dan dan leng leng hti nna, ga lachyum shapraw dan ai majaw, mung masha ni chye na ma ai. Mung masha ni dai tara laika ga hpe na jang hkrap ngu hkrap ngoi nga ma ai rai nna, munggyi Nehemia, hkinjawng hte chyare wa Ezra hte mung masha ni hpe sharin achyin nga ai. Lewi masha ni gaw, Dai ni nan, nanhte a Madu Karai Kasang a matu chyoi Pra ai shani rai nga ai; myit hkum yawn, hkrap mung hkum hkrap mu, ngu nna mung masha ni mahkra hpe tsun mu ai. Bai Ezra gaw, Sa wa mu; sau ai hpe sha mu, dwi ai hpe lu mu; n lu ai ni hpe gaw gam jaw mu: dai ni gaw Madu a chyoi pra ai shani rai nga ai; myit hkum kaji mu; Madu hta kabu gara ai gaw nanhte a n-gun atsam rai nga ai, ngu nna mung masha ni hpe jasim mu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 KORINHTU 12:12-30

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Masha a hkum hkrang hta daw shan law law rawng nga ti mung, dai ni yawng hte gaw hkum hkrang langai sha jawm tai nga ma ai. Dai hte maren Hkristu mung, daw shan law law lu ai hkum hkrang langai sha zawn rai nga ai. Anhte yawng mayawng, Yuda ni hte Greka ni rai ti mung, mayam ni hte shanglawt ni rai ti mung, Wenyi langai sha hta e kashin kamun hkam la saga ai rai nna, anhte yawng jawm lu na matu dai Wenyi hpe jaw ya mani ai. Dai hkum hkrang chyawm gaw daw shan langai sha n rai, law law wa rai nga ai. Lagaw mahtang gaw, Ngai lata n rai nngai majaw hkum hte n seng nngai, nga nna tsun ti mung, hkum hte seng nga ai. Bai dai ana gaw, Ngai myi n rai nngai majaw, hkum hte n seng nngai nga nna tsun ti mung hkum hte seng nga ai. Hkum ting gaw myi chyu sha rai yang, na lu na lam kanang nga na a ta? Ana hkrai rai yang gaw, manam lu na lam kanang nga na a ta? Ya chyawm gaw Karai Kasang Shi ra ai hte maren, daw shan langai hte langai hpe dai hkum hkrang hta jahkum shatsup tawn da nu ai. Daw shan yawng mayawng amyu mi sha rai yang gaw, hkum hkrang kanang nga na a ta? Ya ndai hku rai nga ai: daw shan law law nga ti mung, hkum hkrang langai sha rai nga ai. Myi gaw, Nan lata hpe ngai n ra nngai, ngu nna n tsun lu ai; abaw mung, Nan lagaw yan hpe ngai n ra ai ngu nna n tsun lu ai.

Dai hta n-ga hkum hkrang na n-gun kya ai zawn re ai daw shan gaw lawm ra ai; hkum hkrang na grau n shareng ai daw shan ni hpe, anhte grau nna sadi sahka ai hte jahpun nga ga ai. Dai rai nna, anhte a n htap n htuk ai zawn re ai daw chyen ni hpe grau nna jahtuk shatsawm ga ai; htap htuk ai daw chyen ni mahtang gaw shatsawm n ra nga ai. Dai hkum hkrang hta n ru n ra n byin ai sha, daw shan ni shada da myit tsang hkat nga mu ga sha she Karai Kasang dai hkum hkrang hpe shabung shapre nna, arawng grit ai daw shan ni hpe grau nna arawng jaw mu ai. Shing rai, daw shan langai mi nji nmu hkrum yang yawng mayawng rau machyi dum ma ai; daw shan langai mi shagrau ai hkrum yang, yawng hte gaw rau kabu gara nga ma ai. Ya nanhte gaw Hkristu a hkum hkrang rai nga ai, rai ti mung, langai hte langai daw shan kaga ga rai nga myit dai. Nawhku Hpung hta e Karai Kasang gaw kasa ni hpe shawng na tsang hta san tawn da mu ai; tsang lahkawng hta myihtoi ni; tsang masum hta sara ni; dai hpang e lamik kumla galaw ai ni; dai hpang e machyi makaw shamai shatsai na chyeju lu la ai ni; shingdep shingtau ai ni; sharawng awng ai hte woi awn chye ai ni hte, ga amyu myu chye tsun ai ni hpe Shi san tsawn da manu ai. Yawng mayawng kasa rai nga a ni? Myihtoi rai nga a ni? Yawng mayawng hte wa sara rai nga a ni? Ga amyu myu chye tsun nga a ni? Yawng hte wa ga amyu myu a lachyum hpe htai dan lu a ni?

Ya hti ai gaw Karai Kasang a mungga rai nga ai.

KABU GARA SHIGA

LUKA 1:1-4; 4:14-21

Ya hti na gaw, Luka a Laika hta na Kabu Gara Shiga rai nga ai.

Shawng nnan kaw nna tinang nan mu ai hte, dai mungga magam gun hpai ai ni gaw anhte hpe hkai dan madan hte maren anhte a man e byin wa ai lam ni hpe masha law law wa ka da manu ai. Ngai mung dai lam yawng mayawng hpe npawt ndung hkren azin ayang san sagawn yu ni ai. Dai rai nna arawng lu ai Htawhpilu e, nang sharin la sai mungga teng man rai nga ai hpe kam lu u ga, na a matu dai lam mahkra hpe matut manoi rai ka da na ngai myit lu nngai. Dai aten hta Yesu gaw, Wenyi a atsam hte Galile mung de bai wa nga ai rai nna dai ginwang shara magup hkan e Shi a lam kajai gumhkawng mat wa ai. Shanhte a tara jawng ni hta Shi sharin shaga ya nna, yawng hte gaw Shi hpe shagrau sha-a ma ai. Shaloi, Shi nga kaba wa ai Nazaret mare de du wa ai; Shi a htung hte maren Laban nhtoi e tara jawng hta Shi shang wa ai rai nna laika hti na rawt tsap wu ai.

Shaloi myihtoi Esaia a laika Shi hpe jaw ma ai rai nna, dai laika hpaw yang ning nga ka da ai shara mu hkrup wu ai: Madu a Wenyi nye a ntsa e nga nga ai: Matsan mayan ni hpe Kabu Gara Shiga hkaw tsun na matu Shi ngai hpe namman chya ya ni ai. Bawng dung ai ni hpe sharawt lu na lam, myi kyaw ai ni hpe myi bai mu na lam, hkaw tsun na matu mung, zingri zingrat hkrum ai ni hpe dat dat shangun na hte Madu sharawng awng ai shaning hkaw tsun dan na matu mung, Shi ngai hpe shangun dat ni ai, nga nna hti wu ai. Dai laika katsu nna, tara jawng na nrum ntau wa hpe bai ya kau nhtawm, Shi dung nga ai: tara jawng na ni nlang hte gaw Shi hpe azi yu nga ai, Shaloi, Shi gaw: Dai ni nan nanhte madat nga yang, ndai ka da ai ga gaw dik wa sai, ngu nna shanhte hpe ga tsun hpaw wu ai. 

Ya hti ai gaw Madu a Kabu Gara Shiga rai nga ai.

MADAT MARA NGA GA

Dai ni na laban nhtoi gaw Madu Yesu shawng nnan ngu na lamik kumla hpe shabyin ai chyum mungga rai nga ai. Hkanan mung na hkungran poi hta Madu Yesu gaw hka kaw nna tsabyi chyaru hpe shabyin shatai ai lam rai nga ai. Yuda htung tara hta hkungran poi hta tsabyi chyru gaw n lawm n mai rai nga ai, hkungran poi mung sanit ya na nga ai. Makyin jinghku ni yawng sa du nna kabu aw law lawm ma ai. Sa du ai shawa masha ni hpe shangwi shapyaw na gaw lit kaba rai nga ai. Hkungran poi langai mi hta tsabyi chyaru ma jang gaw, la nnan hte num nnan yan kaya kahpa hkrum ai sha n ga, sali wunli n lu ai ngu sawn la ma ai. Dai hpe chye ya nga ai Nu Maria mu wu jang, kasha Yesu gaw shi tsun yang hkraw na re hpe kam ai majaw, “Shanhte tsabyi chyaru n lu mat sai” ngu nna tsun wu ai. Ndai gaw kanu a tsawra myit hpe chye lu nga ai. Kanu ni gaw tinang kashu kasha ni kaya kahpa hkrum na galoi n ra sharawng nga ai. Kasha a aten rai n du timung, kasha a myit hpe chye ya majaw mau hpa lamik kumla hpe shabyin sai. Dai daram hka taw ai shara kaw nlung yam kru hta hka jahpring na gaw grai yak na re, raitim dai hta grau yak ai lam dai yam kru hta tsabyi chyaru hpring hkra jahpring na gaw n mai byin nga ai. Dai hkungran poi gaw Madu Yesu a garum ya ai atsam hte rau sha ngwi ngwi pyaw pyaw shangut la lu ai. Manam daw ai lam gaw Yuda htung hta grai ahkyak nga ai. Ya na zawn tsabyi chyru htum mat jang sari hpoi ai lam nga ai. Raiti mung Madu gaw dai poi hta shang lawm nga ai majaw, hkungran la yan num sari hpoi na kaw na lawt lu ma ai. Ndai galan 20,30 shang ai hkayambu ni shadun da ai gaw Yuda masha ni shat rai n sha shi yang hte ngut ai hpang (sh) jasan jaseng na matu shadun tawn ai rai nga ai. Madu gaw dai zawn re hka yam ni shahpring ngut ai hte poi up hpang sa jaw na matu matsun dat u ai. Hka kaw nna tsabri shabyin ai gaw Madu Yesu kanu hpe madat mara ai lam hpe madun ai rai nga ai. 

Ndai lamik kumla sha n ga Madu Yesu lamik kumla amyu myu hpe galaw lai wa sai. Shi Madu hpe kam hpa tsawra let sak hkrung hkawm sa jang yak hkak wa tim awng dang ai lam lu na gaw teng sha rai nga ai. Chyum mungga langai hta myihtoi Esaia tsun da ai hta Yerusalem hpe shakawn da ai hpe chye lu ai. Num nnan hte shabung da ai gaw Karai Kasang shanu nga na shara rai ai. Pyending a yan jahtoi shatu na matu tsun da nga ai. Dai Madu Yesu a marang e hkum tsup sai rai nga ai. Yerusalem mare kaw si hkam nna si ai ni kaw nna bai hkrung rawt wa sai rai nga ai.

Chyum mungga daw lahkawng hta chyeju kumhpa amyu myu gaw Chyoi pra Wenyi a marang e hkam la ai raitimung Madu langai sha hpe dau jaw nga ga ai. Wenyi langai hta na sha byin wa ai rai nna, shi myit ra ai hte maren langai hte langai hpe karan jaw nga ai. Anhte galaw lu ai atsam gaw Chyoi pra ai Wenyi jaw ai chyeju ni hkrai rai nga ai. Hpa mung gawngba na n nga ai. Hkam la lu chyeju ni hpe shada da garan jaw na a hkyak dik rai nga ai.

Myit sumru mai ai lam: Anhte a prat hta Madu Yesu zawn madat mara ai hte kade daram hkapla hkawm sa nga ai kun?

2019:PRANWAN LADAW LABAN (2) NA CHYUM LAIKA

Pranwan Ladaw Hta Laban (2)

20th January 2019

CHYUM MUNGGA DAW 1

ESAIA 62:1-5

Ya hti na gaw, myihtoi Esaia a Laika hta na rai nga ai.

Yerusalem mare a ding hpring ai lam, pyengding zawn htoi tu nga ai du hkra, ngai Ziun a lam hta atsin sha nga na nrai, Yerusalem mare a matu kaman nga na n rai. Dai aten hta, maigan amyu ni na a ding hpring ai hpe, hkawhkam ni mahkra na a arawng sadang hpe, mu mada nna, Madu a n-gup na pru ai mying nnan hte nang hpe shamying na mara ai. Nang gaw Madu a lata hta, tsawm htap ai shanghkawng na a Karai Kasang a lata hta, hkawhkam janmau tai na rin dai. Htawm hpang de nang hpe, Mare Dingsa ngu nna mung, na a mungdan hpe, Katsi Katsang shara ngu nna mung shamying sana n rai; nang hpe Ngai Sharawng Awng ai Jan, na a mungdan hpe, Hkungran sai Num Nnan ngu nna shamying na mu ai; kaning rai nme law, Madu gaw nang hta awng sharawng nna, na a mungdan gaw hkungran madu lu na ra ai. Shabrang wa gaw mahkawn hte hkungran ai zawn, na a shadang sha ni gaw nang hte hkungran na mara ai; la nnan gaw num nnan a majaw kabu gara nga ai hte maren, na a Karai Kasang na a majaw kabu gara nga na ra ai.

Ya hti ai gaw Karai Kasang a mungga rai nga ai. 

CHYUM MUNGGA DAW 2

1 KORINHTU 12:4-11

Ya hti na gaw, Korinhtu masha ni hpang de San Pawlu shagun dat ai Laika langai hta na rai nga ai.

Hpu nau ni e, Ya, chyeju kumhpa amyu myu nga timung, dai ni hpe karan jaw ai Wenyi gaw langai sha rai nga ai. Daw jau ai lam amyu myu nga ti mung, Madu langai sha hpe anhte daw jau nga ga ai. Mauhpa atsam amyu myu nga ti mung, yawng mayawng hta e dai lam mahkra hpe shabyin ai Karai Kasang gaw langai sha rai nga ai. Rai timung, akyu chyeju lu la u ga she, dai Wenyi gaw langai hte langai hta e shi a atsam hpe shapraw shadan dan nga ai. Dai rai nna langai mi gaw wenyi atsam hte hpaji mungga chye tsun ai; kaga wa gaw, dai Wenyi garum ai hte chye chyang ai mungga tsun lu ai; kaga wa gaw dai Wenyi a jaw e makam masham; kaga wa gaw Wenyi langai sha a jaw e machyi makaw shamai shatsai na ahkang, hkam la shajang ma ai. Langai mi gaw lamik kumla galaw dan lu ai; kaga wa gaw myihtoi chye htoi nga ai; kaga wa gaw wenyi ni hpe chye ginhka lu ai; kaga wa gaw ga amyu myu a lachyum hpe shapraw dan lu ai: 11dai lam yawng hte hpe Wenyi langai sha e nan shabyin wu ai rai nna, Shi myit ra ai hte maren, langai hte langai hpe karan jaw mu ai.

Ya hti ai gaw Karai Kasang a mungga rai nga ai.

KABU GARA SHIGA

YAWHAN 2:1-12

Ya hti na gaw, Yawhan a Laika hta na Kabu Gara Shiga rai nga ai.

Dai aten hta e, Galile mung na Hkana mare hta num hkungran ai poi galaw nga ma ai rai nna, Yesu a kanu gaw dai poi hta lawm nga ai; Yesu hpe mung Shi a sape ni hte nawng, dai poi de shaga la mu ai. Tsabyi chyaru ma mat jang, Yesu a kanu gaw, shanhte tsabyi chyaru n lu mat sai, ngu nna tsun wu yang, Yesu gaw: Nu e, nang hpa majaw ngai hpe san n ta?

Nye a ahkying garai n du li ai, ngu nna Shi hpe htan wu ai. Shi a kanu chyawm gaw, Shi nanhte hpe tsun ai hte maren hkrak hkan galaw nga mu, ngu nna shangun ma ni hpe tsun mu ai. Dai yang e, Yuda ni a jasan jaseng ai htung hkan shatup na matu, nlung yam kru hpe shadun tawn ma ai; dai yam shagu hta dang lahkawng masum daram shang lu ai. Yesu gaw, ndai yam ni hta hka ja bang jahpring mu, ngu nna shangun ma ni hpe tsun jang, shanhte hka ntsin dem rai hkra hka ja bang ma ai. Shaloi, Yesu gaw, Ya kamai la nna, poi up wa hpe sa jaw mu, ngu nna shanhte hpe tsun jang, shanhte sa jaw ma ai. Poi up wa gaw, tsabyi chyaru tai mat ai ntsin hpe chyim yu jang dai hpe kanang na la ai hpe n chye da wu ai, hka ja ai ma ni chyu sha chye ma ai. Dai rai nna, la nnan wa hpe shaga la nna, Masha kadai mung grau mu ai tsabyi chyaru shawng jaw lu ma ai; masha ni ram ram lu ai hpang she n mu ai baw jaw ma ai: nang gaw grai mu ai tsabyi chyaru hpe ya du hkra kyen da ndai, ngu wu ai. Shing rai Yesu gaw, Galile mung na Hkana mare hta shawng nnan e lamik kaumla galaw dan hpang nna, Shi a hpung shingkang madun dan wu ai; Shi a sape ni mung Shi hpe kam sham nga ma ai. Dai hpan Shi gaw, kanu kanau ni hte Shi a sape ni hte nawng, Kaperna-um mare de yu wa nna, dai yang e mung, gade ya wa n hkring nga ma ai.

Ya hti ai gaw Madu a Kabu Gara Shiga rai nga ai.

NANG GAW NYE A TSAWRA KASHA

Madu Yesu Hkristu gaw asak (30) ning hpring sai rai nga ai. Yuda myu sha ni a htung tara hta e asak sumshi ning hpring jang she masha kaba jahpan shang sai rai nga ai. Ndai asak sumshi ning laman hta Madu Yesu gaw laksama amu galaw let kanu yan kawa hpe garum nna Nazareth mare hta nga kaba lai wa sai. Israela mungdan hta shaning masum tsa daram myihtoi ngu n paw pru ai. Karai Kasang hpe shut hpyit kau ai mara ni hpe myit malai lu na matu tsun shadum na Mawshe, Isaiah, Yeremiah, Yona zawn rai myihtoi ni n paw pru sai. Ya gaw kashin kamun sara Yawhan bai Madu Yesu a lam shajin na matu bai paw pru wa sai. Yawhan a hpung shingkang kaba la ai hpe Madu Yesu tsun ai hta, “Nanhte hpe ngai tsun made ai gaw, Numsha kaw na shangai ai ni hta Yawhan hta grau kaba ai langai mi mung n nga ai.” (Lk 7:28) Masha wunawng wuwa Yawhan hpang de hkan nang wa nna, myit malai lu na matu hkaw tsun ai lam gaw Madu Yesu shi a kabu gara shiga hkaw tsun hpang wa ai lam hpe myit dum shangun nga ai.

Madu Yesu kashin kamun hkam na n ra nga ai. Hpa majaw kashin kamun hkam ai kun? Dai gaw Madu shi hkum nan shagrit shanem ai hpe madun ai, shi hpang hkan ai ni yawng mung kashin kamun hkam ra ai, shi hpang hkan ai yawng gaw langai sha rai nga ai hpe madun mayu ai re. Yawhan tsun ai hta, “Shi gaw Chyoi pra Wenyi hta mung, wan hta mung nanhte hpe kashin kamun jaw na ra ai.” Dai Wenyi gaw Chyoi pra wenyi hpe tsun mayu ai rai nna wan gaw Karai Kasang hpe tsun mayu ai rai nga ai. Madu Yesu kashin kamun hkam ai marang e Chyoi pra ai Trinita hpe shawng nnan shadan dan ai. Madu Yesu a hkye hkrang la ai lam hta shanhte ni marai masum jawm pawng nga ai hpe madun dan ai rai nga ai. Chyum mungga ni hta Wenyi hte wan seng nna law law lang mu lu nga ai. Ga shaka dingsa kawn ga shaka nnan du hkra Karai Kasang gaw wan a marang e chye lu ai zawn, Chyoi pra Wenyi a lam matsun ai hpe mu lu nga ai. (Npawt Ninghpang 15:17) hta “Jan shang mat nna nsin htat nga shaloi, yu u, wan hkut hku ai wan mang hte, wan tu ai shanan paw pru nna shan chyen ni a lapran hku lai mat wa ai,” Bai, Pru mat wa ai laika 3:2 hta “Shaloi Karai Kasang a lamu kasa gaw, singwum hta wan grung ai hte shi kaw dan pru ai: dai hpe shi yu yu wu yang, yu u, wan grung nga timung singwum n hkru mat ai kun, mau hpa lam kaba wora hpe ngai sa yu se ga, nga ai”. Yawhan madi madun ai gaw Madu Yesu gaw kaja wa Karai Kasang rai nga ai rai nga ai.

Masha nlang kashin kamun hkam la ma ai shaloi, Yesu mung kashin kamun hkam la nhtawm, akyu hpyi nga ai nga nna lawm nga ai. Madu Yesu gaw ahkyak ai amu galaw maw jang akyu hpyi ai lam hpe galaw ai. Dai gaw shinggyim masha mung rai nga majaw Karai Wa gaw ra ai hpe hpyi ai rai nga ai. Shagrit shanem ai myit hte Kawa Karai Kasang a hkye hkrang la lam hpe htep lahti hkan sa ai rai nga ai. Dai hpe sumsing lamu nna ngoi kadu ai nsen hte, “Nang gaw nye a tsawra ai kasha rai nga ndai, Nang hta sharawng awng nga nngai (Lk 3:22) ngu Karai Kasang shaga ai nsen hpe na lu nga ai.

Yawhan jaw ai kashin kamun gaw myit malai lu nna Madu hpang de sit sa wa ai lam rai nna Madu Yesu jaw ai kashin kamun gaw npawt shut hpyit mara raw dat yeng seng kau ya nna Kawa Karai Kasang a kasha ni, myihtoi ni hte Jau Hkinjawng a hkringhtawng dagraw la na chyeju ni hpe hkam la lu nga ai. Kashin kamun hkam ai ni gaw bai shangai wa nna prat nnan de galai shai wa ai. (Ephesu 4:22) hta shawng na nanhte a arawng alai hte maren, myit marin marit nna hkalem hkalau ai hte hten mat wa ai gawng shingyan dingsa hpe raw kau u, nga nna tsun da nga ai. Kashin kamun hkam ai hte maren anhte ni gaw Karai kasang a kasha ni hku nna n prai nmat ai dazik dip shakap hkrum sai hte rau nat satan a amu mahkra hpe koi gam kau ra sai. Gawng shing-yan nnan ngu ai gaw Madu Yesu a tara ni hpe hkan shatup ra nga ga ai. Kashin kamun hkam ai majaw anhte ni yawng gaw Madu Yesu a tsin yam tsin dam, si hkrung si htan hte bai hkrung rawt ai hta mung shang lawm nga ga ai. Shani shagu Madu Yesu hte udang hpai let kasi kaja madun ai hpung masha tai hkra shakut nga ga. 

Myit sumru mai ai lam Madu Yesu a matu ngai a myit masin hpe gara hku lajang da ra ata?

2019:MADU YESU KASHIN KAMUN HKAM AI POI

ANHTE A MADU KASHIN KAMUN HKAM AI POI

13rd January 2019

CHYUM MUNGGA DAW 1

ESAIA 42:1-4, 6-7

Ya hti na gaw, myihtoi Esaia a Laika hta na rai nga ai.

Madu ning nga nna tsun ai gaw: Yu mu, ndai wa gaw ngai shadaw ai nye a shangun ma, ngai lata la ai nye a tsaw ra ai wa rai nga ai: nye a Wenyi shi a ntsa e ngai bang da ya nngai; Shi gaw amyu baw ni hpe tara dara na ra ai. Shi jahtau na n rai; Shi a nsen hpe sharawt na n rai, mare lam hta e na shangun na n rai; Bye dip kau ai mai-aw hpe Shi n shadaw na hte, kachyi mi sha tu ai wanshinglet hpe sat kau na n rai: Shi gaw teng man ai hte tara ding ai hku shapraw na ra ai. Shi a tara ding ai lam ga ntsa e garai n grin nga yang, Shi n-gun yawm na n rai; gawng mung run na n rai; zunlawng ni Shi a tara hpe a mada nga na ra ai. Nang gaw myi kyaw ai ni hpe myi hpaw ya na hte, htawng hta dung nga ai ni hpe shapraw nna, nsin htawng hta dung ai ni hpe shalawt dat na matu, Ngai Madu nan ding hpring ai hte nang hpe shaga la nna, na a lata hpe shadaw let, nang hpe makawp maga nna, masha amyu ni a matu ga shaka, maigan amyu ni a matu nhtoi tai wa u ga, nang hpe san da de ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

KASA 10:34-38

Ya hti na gaw, Kasa Laika hta na rai nga ai.

Dai aten hta e, Petru ga hpaw nna tsun wu ai gaw: Karai Kasang masha a myiman n tau ai gaw, ya ngai kaja wa chye se ai: amyu baw shagu hta shi hpe hkrit hkungga ai hte, ding man ai amu galaw ai wa gaw, Shi kaw myiman pa nga ai. 36Nga yawng nga pra a Madu rai nga ai Yesu Hkristu a marang e, ngwi pyaw ai hte seng ai Kabu Gara shiga hkaw tsun dan u ga nga, Karai Kasang gaw Israela a kashu kasha ni hpang de Shi a mungga shagun dat wu ai.  Yawhan gaw Kashin Kamun lam hkaw ai hpang, Galile mung kaw nna Yuda mung ting kajai gara wa ai lam hpe, nanhte nan chye nga myit dai: Dai gaw Nazaret wa Yesu a lam rai nga ai; Karai Kasang gaw Chyoi Pra ai Wenyi hte mung, n-gun atsam hte mung, Shi hpe chye ya wu ai. Karai Kasang shi hte rau nga nga ai majaw, mai kaja ai amu shi galaw nna, gumlau nat e zingri zingrat hkrum ai ni yawng mayawng hte hpe shamai ya let, kawan katsan hkawm nga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 3:15-16. 21-22

Ya hti na gaw, Luka ka da ai hte maren, Kabu Gara Shiga hta na rai nga ai.

Masha ni chyawm gaw myit mada nga ma ai rai nna, Yawhan gaw Hkristu wa mi hkoi rai nga ai kun? Nga nna yawng mayawng gaw tinang a kraw kata e Shi a lam myit nga mayang; Yawhan gaw, ngai gaw nanhte hpe hka hte kashin kamun jaw de ai, rai ti mung, ngai hta atsam grau rawng ai wa gaw sa wa ra ai. Shi a kyepdin sumri raw na pyi ngai n ging nngai: Shi gaw Chyoi Pra Wenyi hta mung, wan hta mung nanhte hpe kashin kamun jaw na ra ai.

Masha nlang kashin kamun hkam la ma ai shaloi, Yesu mung kashin kamun hkam nhtawm, akyu hpyi nga yang, lamu hpaw wa nna dai Chyoi pra ai Wenyi gaw hkrang dan dan Shi a ntsa e hkrudu zawn yu hkrat wa nna, Nang gaw nye a tsaw ra ai Kasha rai nga ndai; Nang hta Ngai sharawng awng nngai law, nga nna lamu de nna nsen dan pru wa ai.

Ya hti ai gaw Madu a Kabu Gara Shiga rai nga ai.