2019:MADU YESU KASHIN KAMUN HKAM AI POI

ANHTE A MADU KASHIN KAMUN HKAM AI POI

13rd January 2019

CHYUM MUNGGA DAW 1

ESAIA 42:1-4, 6-7

Ya hti na gaw, myihtoi Esaia a Laika hta na rai nga ai.

Madu ning nga nna tsun ai gaw: Yu mu, ndai wa gaw ngai shadaw ai nye a shangun ma, ngai lata la ai nye a tsaw ra ai wa rai nga ai: nye a Wenyi shi a ntsa e ngai bang da ya nngai; Shi gaw amyu baw ni hpe tara dara na ra ai. Shi jahtau na n rai; Shi a nsen hpe sharawt na n rai, mare lam hta e na shangun na n rai; Bye dip kau ai mai-aw hpe Shi n shadaw na hte, kachyi mi sha tu ai wanshinglet hpe sat kau na n rai: Shi gaw teng man ai hte tara ding ai hku shapraw na ra ai. Shi a tara ding ai lam ga ntsa e garai n grin nga yang, Shi n-gun yawm na n rai; gawng mung run na n rai; zunlawng ni Shi a tara hpe a mada nga na ra ai. Nang gaw myi kyaw ai ni hpe myi hpaw ya na hte, htawng hta dung nga ai ni hpe shapraw nna, nsin htawng hta dung ai ni hpe shalawt dat na matu, Ngai Madu nan ding hpring ai hte nang hpe shaga la nna, na a lata hpe shadaw let, nang hpe makawp maga nna, masha amyu ni a matu ga shaka, maigan amyu ni a matu nhtoi tai wa u ga, nang hpe san da de ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

KASA 10:34-38

Ya hti na gaw, Kasa Laika hta na rai nga ai.

Dai aten hta e, Petru ga hpaw nna tsun wu ai gaw: Karai Kasang masha a myiman n tau ai gaw, ya ngai kaja wa chye se ai: amyu baw shagu hta shi hpe hkrit hkungga ai hte, ding man ai amu galaw ai wa gaw, Shi kaw myiman pa nga ai. 36Nga yawng nga pra a Madu rai nga ai Yesu Hkristu a marang e, ngwi pyaw ai hte seng ai Kabu Gara shiga hkaw tsun dan u ga nga, Karai Kasang gaw Israela a kashu kasha ni hpang de Shi a mungga shagun dat wu ai.  Yawhan gaw Kashin Kamun lam hkaw ai hpang, Galile mung kaw nna Yuda mung ting kajai gara wa ai lam hpe, nanhte nan chye nga myit dai: Dai gaw Nazaret wa Yesu a lam rai nga ai; Karai Kasang gaw Chyoi Pra ai Wenyi hte mung, n-gun atsam hte mung, Shi hpe chye ya wu ai. Karai Kasang shi hte rau nga nga ai majaw, mai kaja ai amu shi galaw nna, gumlau nat e zingri zingrat hkrum ai ni yawng mayawng hte hpe shamai ya let, kawan katsan hkawm nga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 3:15-16. 21-22

Ya hti na gaw, Luka ka da ai hte maren, Kabu Gara Shiga hta na rai nga ai.

Masha ni chyawm gaw myit mada nga ma ai rai nna, Yawhan gaw Hkristu wa mi hkoi rai nga ai kun? Nga nna yawng mayawng gaw tinang a kraw kata e Shi a lam myit nga mayang; Yawhan gaw, ngai gaw nanhte hpe hka hte kashin kamun jaw de ai, rai ti mung, ngai hta atsam grau rawng ai wa gaw sa wa ra ai. Shi a kyepdin sumri raw na pyi ngai n ging nngai: Shi gaw Chyoi Pra Wenyi hta mung, wan hta mung nanhte hpe kashin kamun jaw na ra ai.

Masha nlang kashin kamun hkam la ma ai shaloi, Yesu mung kashin kamun hkam nhtawm, akyu hpyi nga yang, lamu hpaw wa nna dai Chyoi pra ai Wenyi gaw hkrang dan dan Shi a ntsa e hkrudu zawn yu hkrat wa nna, Nang gaw nye a tsaw ra ai Kasha rai nga ndai; Nang hta Ngai sharawng awng nngai law, nga nna lamu de nna nsen dan pru wa ai.

Ya hti ai gaw Madu a Kabu Gara Shiga rai nga ai.

KARAI A MAN HTA LANGAI SHA

Dai ni anhte yawng a matu Karai Kasang shadan dan ai poi hpe galaw nga ga ai. Hkawhkam masum hte sagu rem ni hpe Karai Kasang kasha shingtai shangai wa ai lam hpe Kawa Karai Kasang gaw shadan dan ai zawn dai ni gaw Yuda masha ni hta shawng nnan shaga hkrum ai ni rai nga ai. ‘Epiphany’ ngu ai ga si a lachyum gaw “shadan dan ai”, “madun dan ai” rai nga ai. Hkawhkam masum hpe ‘Magi’ ngu tsun ma ai. Greek ga si ‘Magos’ ga si kaw nna yu hkrat wa nna Englik ga si hku gaw ‘Magic’ ngu shaga ma ai. Ru pawt madung gaw ‘Magapati’ ga si kaw na yu hkrat wa nna de a lachyum gaw moi Persian makam masham hta Jau hpe shaming ai arawng ningsang rai nga ai. Chyum mungga hta dai hkawhkam marai masum a amying n ka da tim, chyum laika sawk sagawn ai ni tsun ai gaw Gaspa, Melchior hte Balthazar ni rai nga ai. Gaspa gaw ma Yesu hpe Lawban kumhpa sak jaw ai, Melchior gaw Arabia mungdan na hkawhkam rai nna ma Yesu hpe aja kumhpa sak jaw ai hte Balthazar gaw Tarse hte Egutu a hkawhkam rai nga nna ma Yesu hpe Mura kumhpa hpe sak jaw nga ai.

Hkawhkam masum poi galaw ai marang e Hkristmas poi hpe ningmu langai hku nna jaw ya nga ai. Dai gaw Madu Yesu shangai chyinghkai wa ai gaw Yuda myu sha ni a matu sha nrai shinggyim masha yawng a matu shangai wa lam hpe shatup ya ai. Yuda masha ni hkap yin la ai hta hkyela Madu du sai ai gaw Yuda amyu masha ni a matu sha rai nga nna ngwi pyaw simsa lam hte hpung shingkang gaw ndai dinghta ga na matu sha rai nga ai ngu nna hkap yin la ma ai. Rai timung hkawhkam masum poi galaw ai marang e, Madu Yesu du sa wa ai gaw shinggyim masha yawng a matu du sa wa ai hpe shading sharai ya ai.

Dai ni hti ang ai mungga masum hte gaw shadan dan ai hpe madi madun nga ai. San Pawlu shadum ai hta “Dai mung sung lam lachyum gaw maigan amyu ni Yuda amyu ni hte rau ga ndat ai sali wunli hkam la lu nna, shanghte hte rau hkum hkrang langai sha tai wa ai hte, ga ndat ni hpe jawm lu jawm la ai ni tai wa nga ma ai”. Kabu gara shiga a marang e Karai Kasang gaw shagan kaba htoi tu shangun let tara maigan na hkawhkam ni hpe lam woi madun nna shangai wa sai hkyela Madu hpe sa nawku lu na chyeju hpe jaw ya sai. Madu Yesu gun sa wa ai kabu gara shiga hpe sagu rem ni hte hkawhkam ni na la lu ai zawn anhte mung dai hpe na la lu saga ai. Shanhte ni gaw hkrun lam kade mi yak hkak tim Ma Yesu hpe mu hkra sa du nawku ma ai. Laklai ai shagan kaba mu jang, hkyela Madu du sa na lam shanhte a hpung tang hpaji hte sawn yu nna hkrun lam, shara mi n bung tim ma Yesu kaw hkrum zup lu ai chyeju hpe hkap la lu sai. Madu Yesu hpe kamsham nawku ai anhte ni garan ginhka na matu nrai shada da Hkristu a man shada da hkuhkau tsawra na matu rai nga ai.

Dai ni na poi a marang e, myu n bung, shingra maka n bung tim Madu Yesu hta langai sha rai nga hpe shadum ya ai. Karai Kasang a man e langai sha rai nga nna shada ginhka ai, yu kaji ai lam hpe koi gam ra ga ai. Hkawhkam masum gaw masat kumla shagan hpe yu nna Madu hpe chye lu ai zawn Herod hkawhkam wa shi a arawng aya hpe makawp maga na matu chye nga timung n hkap la nu ai. Herod wa zawn dai ni anthe a uhpung uphawng hta lawm nga ai. Tinang tinggyeng a matu Madu hpe n shadan ai amu ni galaw nga ma ai. Hkawhkam masum gaw masat hkumla hpe mu nhtawm hkyela Madu hpe shadan shaleng ya sai. Anhte mung Madu Yesu hpe dinghku kata, uhpung uhpawng kata shadan shaleng sa wa ga.

2019:HKAWHKAM MASUM POI SHANI NA CHYUM LAIKA

HKAWHKAM MASUM POI

6th January 2019

CHYUM MUNGGA DAW 1

ESAIA 60:1-6

Ya hti na gaw, myihtoi Esaia a Laika hta na rai nga ai.

Yerusalem e, rawt u; htoi tu u; na a nhtoi du ra ai; Madu a hpung shingkang na a ntsa e dan hkung nga ai. Kaning rai nme law, nsin gaw ginding aga hpe, saiwan gaw na a ntsa e paw pru nna, Shi a hpung shingkang na a ntsa e dan pru na ra ai. Maigan amyu ni gaw na a nhtoi de, hkawhkam ni gaw na a nhtoi tu kabrim ai de du sa na mara ai. Baw sharawt nna, grup yin mada yu u; shanhte yawng zuphpawng nna nang hpang de du wa mara ai. Na a shadang sha ni gaw sumtsan mung de na wa mara ai. Na a shadang sha ni gaw sumtsan mung de na wa nna, na a shayi sha ni gaw ba wa ai hpe hkrum na mara ai. Shaloi, nang mu mada yang, na a myiman htoi kabrim na ra ai; na a myit masin kabu gara ai hte kaba wa na ra ai; kaning rai nme law, nammukdara a sutgan nang hpang de du wa na ra ai. Gawla-uk wunawng ni, Midian hte Ehpa Mung na gawlauk hkalung ni gaw, nang hpe ka-up na ra ai; Sheba mung na ni yawng du na mara ai; shanhte gaw aja hte lawban lang nna, Madu hpe shakawn kungdawn na lam kajai gumhkawng na mara ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

EHPESU 3:2-3A. 5-6

Ya hti na gaw, Ehpesu ni hpang de San Pawlu shagun dat ai Laika hta na rai nga ai.

Hpu nau ni e, Karai Kasang nanhte hpe jaw mayu ai chyeju lam, Shi nye a lata hta ap ya da sai hpe nanhte na la sai nhten; dai hta n-ga, dai mung sung ga sung hpe shingran ga hte ngaihpe shana dat ai gaw, nanhte na la sai hpe nawn da nngai. Ndai mung sung lam, ya apart e Shi a chyoi pra ai kasa ni hte myihtoi ni kaw, Wenyi a shadan dan ai hte maren, moi shawng na aprat ni hta e shinggyim masha kaw na shana ya mu ai. Dai mung sung lam a lachyum gaw maigan amyu ni Yuda amyu ni hte rau, ga ndat a sali wunli hkam la lu nna, shanhte hte rau hkum hkrang langai sha tai wa ai hte, ga ndat ni hpe jawm lu jawm la ai ni tai wa nga ma ai.

Ya hti ai gaw Karai Kasang a mungga rai nga ai.

KABU GARA SHIGA

MAHTE 2:1-12

Ya hti na gaw, Mahte ka da ai hte maren, Kabu Gara Shiga hta na rai nga ai.

Ya Herawt hkawhkam a lakhtak hta, Yuda mung na Betlehem mare e Yesu shangai wa ai hpang sinpraw mung na hpaji rawng ai masha ni Yerusalem mare de sa du ma ai rai nna, shangai wa sai Yuda Hkawhkam wa gaw kanang e nga a ta? Shi a shagan hpe sinpraw mung hta mu lu sai rai nna, Shi hpe nawku na matu sa du ga ai, nga san mu ai. Herawt hkawhkam dai ga hpe na jang , shi hte Yerusalem na ni yawng gaw myit kahpra mat ma ai rai nna, dai amyu na hkinjawng agyi ni hte tara sara ni yawng hpe jahpawng shinggyin da nhtawm, shanhte hpe Hkristu gaw kanang e shangai wa na a ta? nga nna san wu ai. Shanhte gaw, Yuda mung na Betlehem mare e shangai wa na ra ai; kaning rai nme law, myihtoi wa ka da ai gaw.  Yuda mung na Betlehem e, Yuda mung agyi ni hta kaji htum rai nga ndai n rai; nye a amyu Israela hpe woi rem na Du gaw, nang kaw nna pru wa na ra ai nga ai, ngu nna shi hpe tsun dan mu ai.

Shaloi Herawt gaw hpaji rawng ai ni hpe lagyim shaga la nna, dai shagan shanhte kaw dan pru ai aten hpe azin ayang san la nhtawm, Nanhte sa wa nna dai ma, kaji hpe azin ayang hkan tam mu; shi hpe mu jang ngai mung shi hpe sa nawku lu u ga, ngai hpe wa shana rit, ngu nna shanhte hpe Betlehem mare de sa shangun dat mu ai. Ya hkawhkam wa a ga na la jang, shanhte pru sa wa ma ai. Shaloi, yu mu, sinpraw mung e mu mada ai shagan gaw, shanhte a shawng e sa wa nna, ma kaji nga ai shara ntsa ang e hkring mat ai. Dai shagan hpe bai mu ai shaloi, shanhte nachying kabu gara nga ma ai. Dai nta de shang wa jang, ma kaji hte Shi a kanu Maria hpe mu ma ai rai nna, lahput hput di let, Shi hpe nawku ma ai. Tinang a sut sumpu ni hpe hpaw nna, Shi hpe aja, lawban hte mura ngu ai kumhpa sak jaw ma ai. Herawt hpang hku bai n wa mu ga, yup mang hta shanhte hpe madun dan ai majaw, shanhte gaw tinang a mungdan de lam kaga hku wa mat ma ai.

Ya hti ai gaw Madu a Kabu Gara Shiga rai nga ai.

HKRISTAN DINGHKU

Kawa Karai Kasang hkum nan Adam hte Ewa hpe hpan da nhtawm shingyim masha yawng dinghku ngu ai kaw nna shangai chyinghkai wa na matu shawng nnan ngu na shinggyim dinghku hpe hpan da ya sai. Shi a kasha shingtai hpe mung dai dinghku kata shinggyim hkumshan sa la shangun nna shangai wa sai. Dai ni, San Yawsep, Nu Maria, Madu Yesu htinggaw poi hta chyoi pra ai htinggaw ngu ai hta lam lahkawng hpe mu lu nga ai. (1) Dai marai masum hte Karai Kasang a yaw shada ai lam hpe n pat shing dang ai. (2) Hking ten shagu Karai Kasang hpe mung, shada da mung tsawra let garum ningtum jaw hkat nga ai. 1921 ning hta Wa Sarabyin Benedick (XV) hku nna Chyoi Pra ai htinggaw poi hpe gaw de da ya sai hte maren lawu na yaw shada lam ni lawm nga ai. Hkristan kun dinghku masha ni gaw Nazaret na Chyoi Pra ai hting gaw hpe tinang a prat hte san dinglik yu na matu, dai Chyoi Pra ai dinghku gaw Hkristan kun dinghku ni a matu Karai Kasang a ra sharawng ai hte kuptsup ai katsi kaja htinggaw tai na matu, shakut shaja ai lam magup hta awngdang wa na matu hte Karai Kasang hpe sha manoi manat let hkawm sa na matu rai nga ai. Dai ni, ndai poi nhtoi hta tinang a kun dinghku a matu akru hpyi la ra ai poi mung rai nga ai.

Chyum mungga daw langai hta ramma ni hpe shadum ai lam lawm nga ai. Dinghku kata kashu kasha ni hku nna asak ugut gu sai kanu kawa ni hpe hkungga lara let tsawra na matu shadum jahprang da nga ai. Shanhte gaw kanu kawa ni hpe hkungga tsawra ai a marang e Karai Kasang shaman chyeju jaw ya nga ai lam hta (1) kashu kasha shangai shaprat na chyeju ni, (2) asak galu ai lu na hte (3) mara ni hpe raw dat hkyamsa lu na ni rai nga ai. Chyum mungga daw lahkawng hta San Pawlu shadum ai hta, “Ma ni e, kanu kawa ni hpe lam shagu hta madat mara nga mu: dai gaw dai Madu sharawng awng ai lam rai nga ai. Kanu kawa ni e, nanhte ma nihpe myit n kaji u ga shanhte hpe hkum jahten nga mu,” nga nna n-gun jaw shadum da ai hpe myit yu na hkan nang hkan sa wa ga. 

Madu a kabu gara shiga hta nawku hpung masha ni yawng hpe manu dan ai lam hpe tsun da nga ai. Chyoi pra htinggaw gaw makam masham hta ru jung ngaai  zawn Karai Kasang a tara ni hpe hkan shatup nga ai. “Shi a kanu yan kawa gaw, shalai wa ai poi ten du jang, shaning shagu Yerusalem mare de sa ma ai.” (Lk 2:41) Dai Chyoi pra htinggaw gaw Mawshe a tara hte maren, shaning shagu kyu hpyi sa nga ai hpe mu mada nga ai. Anhte kanu kawa lit magam hpe gun nga ai ni mung tinang a kashu kasha, kahpu kanau ni makam masham hta myit lawm sharawng awng wa na matu Nawku hpung a poi nhtoi ni, Missa Hkungga hte laban nawku zahpawng ni hta woi sa na lit nga ai hpe shadum nga ai.

Kalang mi hta hkawseng magam Cyrus, Persian hkawseng hpe gawde ai wa, gaw hkawseng shandang nta masha ni hpe rim la ma ai. Shaloi Cyrus wa gaw hkawseng shadang hpe san mu ai. “Ngai nang hpe dat dat yang, ngai hpe hpa jaw na nni” ngu nna san jang, shi gaw,”Ngai lu ai sutgan kaw nna ka-ang hkup jaw na nngai” nga nna htan wu ai. Bai “Ngai na a kashu kasha ni hpe dat dat jang, hpa jaw na nni” ngu nna san jang “Shi gaw, ngai lu ai sutgan lu malu hpe jaw na nngai” ngu nna htan wu ai. Hpang jahtum hku nna shi hpe san wu ai. “Ngai na a ningrum ningtau hpe dat dat jang gaw” ngu jang dai hkawseng shadang wa gaw, “ Hpung shingkang hte hpringzup ai Hkawhkam wa e, nye hkum nan sak jaw na nngai ngu nna htan wu jang, hkawhkam Cyrus wa gaw dinghku tsawra ai myit hpe mu chye lu sai majaw shanhte ni yawng hpe dat dat wu ai. Dinghku kata pyaw ai ten, yak ai ten nga na re raitim shada da tsawra let nga ai dinghku gaw lam shagu hta awng dang na rai nga ai. Chyoi pra ai htinggaw mung pyaw hpa lam ni hpe sha nrai myit htum myit tsang ai lam hte mung hpring zup nga ai. Raitim Karai Kasang hta kyu hpyi let sit sa wa ai majaw mau hpa lam ni hkrum sha nga ai. 

Madu Yesu Yerusalem hta ngam ta ai majaw kanu yan kawa myit ru myit tsang ai mung Karai Kasang jaw da sai lit hprai wa na re majaw rai nga ai. Chyoi pra ai Htinggaw poi a marang e kasi la mai ai lam hta Nawku hpung hte shinggyim uhpung uhpawng gaw htinggaw langai zawn gaw de da nga ai. Dinghku kata shinggyim ngasat ngasa lam hten run wa jang, shinggyim uhpung uhpawng hte nawku hpung mung hkrum sha na sha re. Dai majaw kashu kasha ni gaw Karai Kasang jaw da ai sutgan ni rai nga zawn, Karai Kasang hpe chye na tsawra daw jau na matu mung lam matsun madun ya let, tinang a dinghku gaw Karai Kasang a ra sharawng ai hpe shani shagu htep lahti hkan nang hkan sa wa ga law. 

Myit sumru yu mai ai lam Na a kun dinghku hta na tsawra myit hpe gara hku sakse hkam nga ai ku?

2018:CHYOI PRA AI HTINGGAW POI SHANI NA CHYUM LAIKA

CHYOI PRA AI HTINGGAW POI

30th December 2018

CHYUM MUNGGA DAW 1

SIRAK 3:3-7,14-17a

Ya hti na gaw, myihtoi Sirak a Laika hta na rai nga ai.

Kashu kasha ni tinang a kawa hpe hkungga lara na matu, Karai Kasang hkang da nu ai; kanu gaw shi a shadang sha ni a ntsa e up hkang na ahkang aya hpe Madu nan jaw da nu ai. Tinang a kawa hpe hkungga lara di ai wa gaw, shut hpyit mara shaprai kau ai amu hpe galaw nga ai; tinang a kanu hpe akaw alaw di ai wa mung, sutgan law law mahkawng da ai wa hte bung nga ai. Tinang a kawa hpe hkungga ai wa gaw, asak galu na ra ai; kanu a myit shadik shapyaw ai wa mung, Madu hpe madat mara nga ai. Ngai sha e, na nwa asak kaba wa ai sahloi, shi hpe bau garum nga u; shi hkrung nga ai nhtoi mahkra hta, shi a matu yawn hkyen shara hkum tai et. Shi a myit n gring wa timung, nang hkam kaja ai hte n-gun rawng ai wa gaw, nwa a myit n-gun kya ai hpe hkam sharang nna, shi hpe n gawn n sawn hkum di u; kaning rai nme law, nwa hpe sumnung shingdi ai hte galaw ya ai lam hpe galoi mung malap kau ya na n rai; na a mara raw dat ya na lam tai na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

KOLOSE 3:12-21

Ya hti na gaw, Kolose masha ni hpang de San Pawlu shagun dat ai Laika hta na rai nga ai.

Hpu nau ni e, Nanhte gaw Karai Kasang a lata la ai amyu rai nna, chyoi pra ai ni hte tsaw ra hkrum ai ni rai nga myit dai. Dai re ai majaw, matsan dum chye ai, mai kaja ai, myit nem ai, summung shingdi ai, myit galu kaba ai dagraw nga mu; nanhte a n-gun kya ai hpe shada da hkam sharing nna, mara langai ngai nga yang gaw, shada da raw dat hkat nga mu. Madu gaw nanhte a mara raw dat kau ai hte maren, nanhte mung shada da raw dat ya mu Hpang jahtum e, dai yawng hte hpe matut da na hte jahkum shatsup ya na matu tsaw ra ai myit hpe dagraw hpun nga mu. Nanhte a myit masin hta e mung, Hkristu a ngwi pyaw ai lam a up nga u ga; kaning rai nme law, hkum hkrang langai sha a daw shan ni tai lu hkra, nanhte hpe shaga la manit dai. Dai hta n-ga chyeju dum ai myit nanhte hta e arawng nga mu. Hkristu a mungga gaw nanhte hta n taw n tsang ai shanu nga u ga: hpaji byengya amyu myu hte nanhte shada da sharin shaga nna, shadum jahprang ya mu. Nanhte a kraw lawang hta e Karai Kasang hpe chyeju dum let, shakawn kungdawn ga, mahkawn mangoi ga, wenyi hte seng ai laka ga hpe mahkawn mangoi nga mu.

Nanhte hpa lam galaw myit yang, ga hte rai ti mung, amu hte rai ti mung, Madu Yesu a amying ningsang hta galaw nga nna, Shi a marang e Kawa Karai Kasang hpe chyeju dum nga mu. Numsha ni e, tinang a madu wa hkang ai hku hkan nga mu; dai gaw Madu a man e sut nga ai. La ni e, Madu jan ni hpe tsaw ra nga nna, shanhte hpe kajet kaje hkum rai nga myit. Ma ni e, kanu kawa ni hpe lam shagu hta madat mara nga mu: dai gaw, Madu a man e sharawng awng ai lam rai nga ai. Kanu kawa ni e, nanhte a ma ni myit n kaji u ga, shanhte hpe hkum jahten nga mu.

Ya hti ai gaw Karai Kasang a mungga rai nga ai.

KABU GARA SHIGA

Luka 2:41-52

Ya hti na gaw, Luka ka da ai hte maren, Kabu Gara Shiga hta na rai nga ai.

Shi a kanu yan kawa gaw, shalai wa ai poi ten du jang, shaning shagu Yerusalam de sa ma ai. Dai ma gaw shi lahkawng ning du jang, dai poi a htung hte maren shanhte lung wa ma ai; Dai nhtoi hte shalai ngut nna bai wa ma yang, dai ma Yesu gaw Yerusalam e hti nga mat ai; kanu yan kawa chyawm gaw dai nchye ma ai. Rau wa manang hpung hta lawm wa nhtawm nga nna myit kau ma ai majaw, shan gaw lani shat wa nna, mayu dama ni hte chye chyap ai ni kaw shi hpe hkan tam ma ai. Dai ma hpe nmu jang, shan gaw shi hpe hkan tam let, Yerusalam mare de nhtan sa ma ai. Ya masum ya na wa sayang she, dai nawku htingnu kata, sara ni a ka-ang e, shanhte a ga madat la nna, shanhte hpe jasan let, dung nga ai hpe, shan sa mu mu ai.

Shi a ga na mana ni gaw, shi a myit kung ai hpe mung, shi htan ai ga a majaw mung mau nga ma ai. Shi hpe mu jang shan mau mat ma ai rai nna, shi a kanu gaw sha e, hpa rai an e ningdi mi ta? Yu u, nwa hte an myit ru myit tsang ai hte nang hpe hkan tam nga ga ai, ngu nna shi hpe tsun wu ai. Shi gaw, hpa rai ngai hpe tam myi ta? nye Wa hte seng ai lam hta ngai nga lu mai ai, nan n chye myit ni? Ngu nna shan hpe htan wu ai. Raitimung, shi shan hpe tsun ai ga gaw, shan n chye na ma ai. Shi chyawm gaw shan hte rau yu wa nna, Nazaret mare de du wa ai; shan a apu e mung shi taw nga ai; Shi a kanu gaw dai ga ma hkra hpe shi kaw hta matsin da wu ai. Yesu gaw hpaji bengya kung hpan wa ai hte, gawng shingran kaba wa nna, Karai Kasang a man e mung, masha a man e mung mi man pa wa nga ai.

Ya hti ai gaw Madu a Kabu Gara Shiga rai nga ai.

2018:HKRISMAT POI SHANI NA CHYUM LAIKA

HKRISMAT POI SHANI 

DECEMBER 25, 2018

CHYUM MUNGGA DAW I

ESAIA 62:11-12

Ya htei na gaw, myithtoi Esaia a laika hta na rai nga ai.

Madu gaw, mungkan htum hkra ning nga ai: Yu u, nang hpe hkye hkrang la ai wa du ra ai; hkam ging ai shabrai shi a lahta hta shi lang nna, karan jaw ai hkumhpa shi a man e rai nga ai, ngu nna Zium shayi sha hpe tsun mu. Shing rai amyu baw ni gaw shanhte hpe, Chyoi pra ai Amyu, Madu a lata hte Hkye Hkrang la hkrum ai amyu, ngu nna shamying na maru ai: nang hpe mung, masha marit ai Mare, Shanu Nga Mai ai Mare nga nna shamying na mara ai.

Ya hte ai gaw Karai Kasang a mungga rai nga ai.

CHYUM MUNGGA DAW II

TITU 3:4-7

Ya hti na gaw, Titu hpang de san Pawlu shangun dat ai laika hta na rai nga ai.

Hpu nau ni e, anhte a Hkye La ai Madu Karai Kasang a mai kaja ai hte tsawra ai myit gaw, anhte a ntsa e yu hkrat wa ai shaloi, anhte hkum nan galaw ai dinghpring ai magam bungli a majaw nre ai sha, Shi a matsan dum ai chyeju a majaw she Shi anhte hpe hkye hkarang la mi ai: Kaja wa nan bai shangai shangun ai hte, Chyoi pra ai Wenyi a myit nnan galai bang ya ai Kashin Kamun lam hta e, Shi anhte hpe hkye hkrang la mi ai.

Shi gaw anhte a Hkye La ai Madu Yeus Hkristu a marang e, dai Chyoi Pra ai Wenyi hpe anhte a ntsa e ntaw n tsang ru bun ya wu ai. dai rai nna, Shi a chyeju hte ding hpring ai hkrum lu ga ai majaw, htani htana asak lu la na lam hpe myit mada lu hkra anhte sali wunli hkam la ai ni rai nga ga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 2:15-20

Ya hti na gaw, Luka ka da ai hte maren, Kabu GAra Shiga hta na rai nga ai.

Dai aten hta e, sagu rem ni Betlehem mare du hkra sa nna, Madu anhte hpe tsun madun ya ai, ndai byin wa ai amu hpe anhte sa hpu yu saga, ngu nna shada da tsun ma ai. Shing rai shanhte tin tin sa wa nna, dai yang e Maria yan Yosep hpe mung, dumsu wakang hta kalaeng taw nga ai ma chyangai hpe mung mu ma ai. Shi hpe mu ma yang, dai ma a lam shanhte hpe shana dan sai hte maren, shanhte tsun kajai dat ma ai. Na la lu ai ni yawng hte mung, sagu rem ai ni shanhte hpe tsun dan ai ga a majaw mau nga ma ai.

Maria chyawm gaw dai ga mahkra hpe matsing la nna, shi a myit hta e sumru yu nga ai. Sagu rem ai ni mung, shanhte hpe tsun dan sai hte maren, na la ai hte mu la ai lam mahkra a majaw, Karai Kasang hpe shakawn kungdawn shagrau sha-a let bai wa ma ai.

Ya hti ai gaw Madu a Kabu Gara Shiga rai nga ai.

2018:HKRISMAT YUP TUNG MISSA NA CHYUM LAIKA

YUP TUNG MISSA

CHYUMMUNGGA DAW 1

ESAIA 9:1-6

Ya hti na gaw, myithtoi Esaia a Laika hta na rai nga ai.

Nsin hta hkawm nga ai amyu gaw, nhtoi kaba hpe mu lu ma ai; si hkrung si hta mungda a shingnip kata e shanu nga ai ni a ntsa e, nhtoi dawng pru wa sai. Nang gaw shanhte a ngwi pyaw ai hpe shalaw nna, shanhte a kabu gara ai hpe jat ya mu ai: Nmut ta e masha ni kabu gara ai hte, lanep karan ai ni kabu jahtau ai zawn shanhte na a man e kabu gara nga ma ai. Kaning rai nme law, shanhte hpe shaba ai let, kahpa ntsa e mara ai kandang hte, hpareng wa a ri hpe, Midian lakhtak e byin ai zawn nang agrawp kau nu ai. 

Hpyen luksuk ni a hpyen kyepdin hte, sai galu ai hpun nba yawng wan hta hkat na mara ai. Kaning rai nme law, anhte a matu kasha shangai nna, anhte hpe shadang sha jaw mi ai: shi a kahpa ntsa e up ai ahkang aya mara nga na rai nna, shi a amying hpe, Mauhpa ai hku Hpaji Daw ai Wa, Daru Magam Karai Wa, Htani Htana Kawa, Ngwi Pyaw Madu, ngu nna shamying na mu ai, shi a ahkang aya hte, shi tawn da ai ngwi pyaw lam gaw law htam wa nnam, htum ngu ai n nga na sai: Dawi a tingyang ntsa e dung let, dai mungdan hpe shi shagrin tawn da nna, tara hte dinghpring ai hktu hkan ai majaw, dai gaw htani htana prat dingsa e grin nga na ra ai, Zaw nawng zaw wa up ai Madu a sharawng awng ai myit dai lam hpe shabyin nu ai.

Ya hti ai gaw Karai Kasang a mungga rai nga ai.

CHYUM MUNGGA DAW II

TITU 2:11-14

Ya hti na gaw, Titu hpang de San Pawlu shagun dat ai laika hta na rai nga ai.

Hpu nau ni e, Tara n hkrungga ai myit hte, mungkan ga na marin marit ai hpe kau da nhtawm, sadi sahka rai nna, dingman ai hte chyoi pra ai lam ni hpe hkan nang lu hkra, anhte hpe sharin ya na matu, anhte a Hkye La ai Madu Karai Kasang a chyeju gaw, masha yawng kaw dan pru wa sai.

Shing rai, gumring grumrat rawng ai myit mada lam hpe ala nga let, galu kaba htum ai Karai Kasang hte anhte a Hkye La ai Madu Yesu Hkristu a hpung shingkang dan pru na lam hpe, anhte myit mada nga ga ai. Dai Yesu Hkristu gaw, n hkru n kaja ai lam mahkra hta na anhte hpe hkyen hkrang la nna, Shi hkum nan a matu san da ai amyu hte, kaja ai magam bungli hkan galaw ai amyu hpe jasan jaseng lu hkra, Shi hkum dai hpe anhte a matu ap kau ya nu ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 2:1-14

Ya hti na gaw, Luka ai Laika hta na Kabu GAra ai Shiga ria nga ai.

Dai aten hta e, mungkan ting hpe jahpan la na matu, Roma Hkawhkam Augustu amying jaw dat wu ai hte maren, Suri mung hta Kureniu gaw myinggyi galaw nga yang, dai jahpan hpe shang la ai rai Shaloi masha yawng hte gaw amying shalawm na matu, tinang a mare de wa ma ai. Yosep mung, Dawi a aru arat rai nga ai majaw, Galile mung na Nazaret mare kaw nna, Yuda mung na Betlehem ngu ai Dawi a mare de shi mahtan da ai Maria hte rau, amying shalawm na matu lung wa ma ai: Maria chyawm gaw na-um nasin hkum rai nga ai.

Dai yang e nga yang, shangai nhtoi gu nna, shadang sha alat shangai wa sai; dai ma hpe sumpan hte kayawp nhtawm, ushat wakang hta kalaeng tawn da mu ai: kaning rai nme law, manam jarawp hta shanhte a matu nga shara n nga malu ai.

Ya, dai ginwang e shagu rem ai masha ni udat shara e nga nna, shanhte a sagu hpung ni hpe shana e sin nga ma ai. Shaloi, Madu a Lamu Kasa shanhte a makau e tsap nga nna, Madu a hpung shingkang shanhte a grup yin e htoi kabrim wa ai rai nna shanhte nachying hkrit gari mat ma ai. Dai lamu kasa chyawm gaw, Hkum hkrit myit, madat la mu, nachying kabu gara ai shiga, ngai nanhte kaw gun sa ring ngai: dai ni na nhtoi hta e, Hkristu Madu ngu ai Hkyen La ai Wa gaw, Dawi a mare hta nanhte a matu shangai wa sai. Nanhte shi hpe chye lu na matu, hkumla ndai rai na ra ai: ma chyangai langai mi sumpan hte kayawp nna, ushat wakang hta kaleng nga ai hpe nanhte mu lu na marin dai, ngu nna shanhte hpe tsun mu ai

Shaloi dai Lamu Kasa hte rau, lamu na wunawng uwa kaba akajawngsha dan pru nna, Karai Kasang hpe shakawn kungdawn let Matsaw lahta tang e, Karai Kasang gaw hpung shingkang rawng nga u ga; ga ntsa e mung Shi sharawng awng ai ni hta, ngwi pyaw ai gaw a nga nga u ga law, ngu nna tsun ma ai.

Ya hti ai gaw Madu a Kabu Gara Shiga ria nga ai.

SHADA GARUM SHINGTAU LET MA YESU HPE HKAP TAU GA

Du sa ladaw a hpang jahtum na laban nhtoi shani gaw Hkristmas poi a chyinghka lam mahka ang ang kaw du nga sai re majaw Nawku Hpung hku nna anhte hpe du sa wa na Mesiah hte Chyoi pra ai Kanu Maria yan hpe madung myit dum sumru yu na matu matsun nga ai.

Chyum Mungga daw (1) hta Myihtoi Mihka gaw anhte hpe manu dan dik ai kumhpa a lam hpe kata lam hpaw madun dan nhtawm, manu dan dik htum ai kumhpa hpe yawng myit mada ala nga ai ngwi pyaw simsa ai lam hpe gun sa wa ya ai. Daw (2) hta, Madu Yesu gaw shinggyim baw sang shagu a matu hkye hkrang la ai lam hpe gara hku gun sa wa ya ai lam hpe sanglang dan ya ai re. Dai gaw Kawa Karai Kasang a myit ra ai lam hpe kata lam galoi mung madat mara ai lam nan nan rai nga ai.

Kabu gara shiga hta, Nu Maria gaw tinang hte ni htep hku hkau ai jinghku ni hpe garum shingtau la ai lam hku nna Karai Kasang a tsawra lam hpe nhtang jaw ai hku madun dan ai lam hpe mu lu ai. Anhte mung ndai Chyum Mungga ni hta Hkye La Madu du sa wa na lam hpe na la lu saga ai. Ndai Madu hpe htap htuk dik ai hku hkap la lu na matu gaw tinang hte ni nawn ai ni hpe garum shingtau ai lam, ra kadawn ai ni hpe garum ya let, kabu gara ala nga ai lam rai nga ai. Myit sumru yu mai ai lam Nang hku nna n hpa galaw na rai ta?

2018:DUSA LADAW LABAN (4) NA CHYUM LAIKA

DUSA LADAW HTA LABAN 4

23rd December 2018

CHYUM MUNGGA DAW 1

MIHKA 5:2-5a

Ya hti na gaw, myihtoi Mihka a Laika hta na rai nga ai.

Madu ning nga ai: Nang Betlehem Ehprat e, Yuda amyu law law hta nang kaji nga ti mung, Isarela amyu hpe up na Madu gaw, nye a matu nang kaw paw pru na ra ai: dai wa gaw moi chyaloi nhkoi kaw nna paw pru ai wa rai nga ai. Dai rai nna, shinggyim machyi ai numsha kasha shaprat ai aten du hkra, Madu shanhte hpe ap kau na ra ai: dai shaloi e naw ngam nga ai shi a kahpu kanau ni gaw, Israela kashu kasha ni hte rau nhtang wa na mara ai. Dai wa gaw tsap nga nna, Madu a n-gun hte mung, shi a Madu Karai Kasang a mying ningsang a daru magam hte mung, shi a sagu hpung hpe bau na ra ai: shanhte mung grin nga na mara ai; kaning rai nme law, shi gaw lamu ga htum hkra galu kaba wa na ra ai. Dai wa gaw anhte a ngwi pyaw Madu tai na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

HEBRE 10:5-10

Ya hti na gaw, Hebre masha ni hpang de San Pawlu shagun dat ai Laika hta na rai nga ai.

Hpu nau ni e, Hkristu gaw ndai mungkan ga de du sa yang, ning nga tsun wu ai gaw: Hkungga hte kumhpa hpe nang n ra nga ndai; Nang nye a matu hkum hkrang lajang da nit dai: Hkum dingyawng nat ai hkungga hte, mara raw ai hkungga hpe, Nang n ra sharawng ndai; Shaloi e, Laika shabawn hta nye a lam ka da nga ai gaw: Karai Kasang e, nang e nga nga nngai; Nang myit ra ai hku hkan galaw na, ngai sa du ring ngai, Jep ai tara hta hkungga nawng ai lam hkang da ti mung, Shi gaw, Shagu hkungga, kumhpaw kumhpa, hkum dingyawng nat ai hkungga hte, mara raw ai hkunga hpe nang n ra sharawng nga ndai, nga nna shawng tsun nu ai. Dai hpang, Ngai nang e nga nga nngai; myit ra ai hku hkan galaw na ngai du sa ring ngai, nga nna bai tsun ai. Dai rai nna, hpang na lam hpe shagrin na matu, shi shawng na lam hpe yeng seng kau wu ai. Shing rai, Karai Kasang myit ra ai hku re ai majaw, Yesu Hkristu a hkum hkrang hpe lang lata sha nawng ya ai a marang e, anhte gaw shachyoi shapra ai hkrum saga ai.

Ya hti ai gaw Karai Kasang a mungga rai nga ai.

KABU GARA SHIGA

LUKA 1:39-45

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Maria gaw Yuda mung na bum ga e nga ai mare langai mi de alawan rawt sa nna, Zakari a nta de shang nhtawm, Elisabet hpe hkrum shaga wu ai. Maria hkrum shaga ai ga hpe Elisabet na la jang, shi a hkritung na ma gumlawt nga ai. Elisabet mung Chyoi Pra ai Wenyi hte hpring nna, nsen kaba hte jahtau let, Numsha ni hta nang a lu ndai; na a hkritung na ma mung a lu nga ai. Nye a Madu a kanu ngai hpe sa kawan ai gaw hpa chyeju a jaw e rai ra ai i? Ngai nang hpe tsun de ga: Na a shakram ai ga nsen ngai na la ai hte rau, nye hkritung na ma kabu gara ai hte gumlawt nga ai. Madu shi hpe tsun ai ga dik wa na ra ai lam hpe kam sham ai numsha gaw ‘a’ lu ai, ngu nna tsun wu ai.

Ya hti ai gaw Madu a Kabu Gara Shiga rai nga ai.

KABU GARA NGA GA

Dai ni na ja Chyum Mungga daw (1) hta Ziun shayi sha, Israela, hte Yerusalem shayi sha ni hpe myit masin mahkra hte kabu gara nga na lam Myihtoi Zephani n-gun jaw ai. Bai nna, Daw (2) hta San Pawlu gaw Hpilipi hpung masha ni hpe shagun dat ai laika hta mung, Madu Karai Kasang du sa wa na ni magang wa ra ai majaw kabu gara nga na lam ndau tsun shana ya ai.

Hpang jahtum Luka a kabu gara shiga hta Kashin Kamun sara Yawhan gaw shi hta grau ai atsam rawng ai wa du sa wa na ra ai lam, dai Wa gaw Chyoi pra Wenyi hta mung, wan hta mung Kashin Kamun jaw na re lam hkaw tsun nga ai. Ndai prat dep mungkan daw de, anhte shinggyim masha ni law she law htam wa nna, kaja ai ni nga ai zawn, n hkru n kaja ai ni mung gayau gaya rai nga pra sak hkrung nga ga ai. Masha law ai majaw, mare shinggan de maza mala mung law law sum pum taw nga ai. Dai maza mala bum de masha shagu n sa ma ai. Raitim, lam maw ntsa hkan na nanghpam ya ni, kanu kawa nhkum ai lam maw ntsa na jahkrai ma ni hte matsan shayen re ai ni chyu she dai maza sumpum hpe alai let kaja ai arai nkau mi hpe ahpre alai la let, kan bau ma ai re.

Dai ni na ja Chyum Mungga daw (3) hte hpe gin chyum dat ga nga yang, Karai Kasang mung, maza sum pum hte bung ai mungkan ga kata kaw na anhte Shi a kashu kasha ni hpe lata shaw la na re majaw, kabu gara let shada tsawra let, du sa wa na Madu Karai Kasang hpe kam sham myit kaba hte la nga na lam n-gun jaw ai.

Myit sumru yu mai ai lam

Nang ngai shut hpyit mara kade kap ai rai tim, Karai Kasang tsawra ai majaw hkye hkrang la ai chyeju jaw ya ai lam hpe gara hku hkap la nga ai kun? Gara hku chyeju bai htang jaw na kun? Nang hpe Karai Kasang tsawra matsan dum ai zawn na a manang wa hpe mung tsawra matsan dum garum shingtau ya nga ai kun?