MYIT MALAI NA JIN JIN RAI SAI KUN?

Karai Kasang a amu magam yawng gaw anhte hpe Shi Madu hpang de du hkra woi sa na matu sha rai nga ai. Karai Kasang ndai mungkan ntsa masha (1) hku asak naw hkrung ai aten hta, Shi galaw mat ai hkye hkrang la ai amu magam ni hpe kahtap nna, dai ni anhte a prat kata hta matut nna shabyin ya shangun nga ai. Anhte dai zawn shakut shaja nga let, sak hkrung hkawm sa nga ten, hpang jahtum Madu Yesu bai du sa wa ai shaloi she hkum tsup ai madang de du wa lu na ga ai. Chyum Mungga daw (1) hta Myihtoi Baruk a laika hpe hti ga ai. Myihtoi Baruk gaw lai wa sai shaning (B.C. 600), Madu Yesu grai n du sa shi ai aten kaw nna nga lai wa sai Myihtoi Yeremi a amu madu rai nga ai.

Myihtoi Yeremi hte Myihtoi Baruk yan gaw, shan a prat hta zingri zingrat law law hkrum sha lai wa masai. Mungdan up hkang ai ni hte mung shawa ni mung, Myihtoi ni a ga n hkap la ya ai majaw Yerusalem mare gaw hpyen ni a lata de du mat ai. Ndai Myihtoi yan mung Egatu mung de mayam hku rim woi mat ai hkrum nhtawm, dai shara kaw sha sat kau hkrum ai ngu, Chyum Laika Sara ni sawn nga ma ai.

Shanhte mayam prat hku masha ni a mungdan kata naw nga ten,  mung shawa masha ni hpe myit n-kataw na hku, n-gun jaw ga Myihtoi Baruk tsun ai: “Yerusalem e, sharung shayawt ai hte ru tsang ai a palawng hpe raw kau nna, Karai Kasang kaw na lu la ai, tsawm htap ai palawng lawai nhtawm, arawng shadang ngu ai jan mau hpe gup nga u.” 

Daw (2) hta, Kabu gara Shiga hpe nnan hkap la ai kaw nna ya du hkra, Karai Kasang a magam hta hkan shakut lawm ai gaw mai kaja ai lam rai nna, dai mai kaja ai lam mahkra gaw Hkristu bai du sa ai shaloi jahkrum jazup ya na lam San Pawlu n-gun jaw ai.

Chyum Mungga daw (1) hte daw (2) hpe asan chye na shangun ai gaw Kabu Gara Shiga nan rai nga ai. Kabu gara Shiga hta Kasa Luka gaw shawng nnan e mung-up du hkawhkam ni a amying hpe ka madun da ai. Dai aten ladaw hta Karai Kasang a Mungga gaw, nam mali e nga ai Yawhan Baptista kaw du ai. Yawhan gaw Karai Kasang a mungga hte maren Madu a lam shading lajang ra sai lam hkaraw shagu jahpring, magaw ai shading, machyawk marawk ni hpe ja pri shara na lam tsun shadum tim, mungdu salang ni n madat ya ma ai. Hpang jahtum shi hpe baw htau sat kau ma ai. Shi a ga madat ai ni law law wa gaw myit malai lu nna Karai Kasang maga de bai gayin wa lu ma ai.

Myit sumru yu mai ai lam

- Yawhan Baptista gaw, Madu Yesu du sa na lam hpe tau hkrau hkaw tsun shadum hkyen lajang ya nga ai. Chyum Mungga daw (1) hte (2) hta na shinggyim masha ni gaw Karai Kasang a Myihtoi ni a ga hpe na la tim, n hkap la ya ma ai majaw hkrat sum ai lam sharin la lu ga ai.

- Dai ni Yesu Madu a tara Mungga hpe n hkap la lu hkra pat shingdang ya ai gaw hpa baw ni wa rai ta?

- Myit malai let shading sharai na jin jin rai sai kun?

2018:DUSA LADAW LABAN (2) NA CHYUM LAIKA

DUSA LADAW HTA LABAN 2

9th December 2018

CHYUM MUNGGA DAW 1

BARUK 5:1-9

Ya hti na gaw, myihtoi Baruk a Laika hta na rai nga ai;

Yerusalem e, sharung shayawt ai hte ru tsang ai a palawng raw kau nna, Karai Kasang kaw na lu la ai, n htum n wai hpung shingkang hte seng ai, tsawm htap ai palawng lawai nna, n htum n mat ai arawng sadang ngu ai janmau hpe, na a baw hta gup nga u. Kaning rai nme law, Karai Kasang gaw masha amyu baw shagu hpe na a hpung shingkang madun dan na ra ai: Karai Kasang nang hpe amying jaw nna, Ding Hpring ai Ngwi Pyaw Lam hte, Shakut Sharang ai a Arawng Sadang, nga nna nang hpe shamying ya na ra ai. Yerusalem e, tsaw la ai shara de rawt tsap nga nna, sinpraw maga de na a myiman yawng dat u; Chyoi pra ai Wa hkang da ai majaw, na a nsha ni sinpraw sinna maga de nna bai wa hpawng nga ma ai hpe mada yu u. Karai Kasang shanhte hpe myit dum ai majaw, shanhte kabu gara let nang hpang de sa du hpawng ma ai. Yerusalem mare kaw nna shanhte pru sa ai shaloi, hpyen ni shanhte hpe woi la nna, lagaw hku hkawm sa wa ma ai; ya, hkawhkam kasha ni hpe hpung shingkang hte hpai hkawm ai zawn, Karai Kasang shanhte hpe Nang hpang de bai woi wa ra ai. Tsaw la ai bum shagu hte, htani htana nga nga ai kawng ni hpe daw kau na ra ai; lamu ga hpe shara shatsawm na matu, hkaraw ni hpe kaput jahpring ya na ra ai, nga nna Karai Kasang daw dan nu ai. Israela gaw Karai Wa a hpung shingkang npu e ngwi pyaw ai hte hkawm sa lu na ra ai. Dai hta n-ga, maling ni hte manam pyaw hpun mahkra gaw, Karai Kasang a amying ahkang hte Israela hpe shingnip ka-up na ra ai; kaning rai nme law, Karai Kasang Shi a hpung shingkang a nhtoi hte, Israela hpe woi awn nna, Shi a matsan dum ai hte ding hpring ai chyeju hte, shanhte hpe makawp maga la na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

HPILIP 1:4-6, 8-11

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai.

Hpu nau ni e, Nanhte hpe dum shagu e nye a Karai Kasang hpe chyeju dum nga nngai. Kabu Gara Shiga hpe nanhte nnan hkap la ai kaw nna ya du hkra, Karai Kasang a magam hta hkan shakut lawm ai majaw, nanhte mahkra a matu ngai akyu hpyi ai shaloi, galoimung kabu gara ai myit hte akyu hpyi nga nngai. Nanhte hta e mai kaja ai amu galaw hpang ai Wa gaw, Yesu Hkristu du sa ai nhtoi du hkra, dai hpe jahkum shatsup ya na ra ai, ngai kam nga nngai.

Hkristu Yesu a n-gaw n wai ai hta ngai nanhte yawng hpe gade wa tsaw ra la nngai gaw, Karai Kasang nye a sakse rai nga ai. Dai rai nna, nanhte shada da tsaw ra ai myit jat htam wa nna, Karai Kasang a lam hpe grau nna chye chyang wa lu na matu, ngai ahpyi nga nngai. Shing rai, grau htap htuk ai lam hpe nanhte chye ginhka lu nna, Hkristu a nhtoi hta san seng ai hte ra n rawng ai hku tsap lu na myit dai. Dai nhtoi hta e, Karai Kasang kaw hpung shingkang arawng sadang nga nga u ga matu, Hkristu anhte hta e shapraw ai arawn alai kaja hte, nanhte hpring chyat wa lu na myit dai.

Ya hti ai gaw Karai Kasang a mungga rai nga ai.

KAGU GARA SHIGA

LUKA 3:1-6

Ya hti na gaw, Luka a Laika hta na Kabu Gara Shiga rai nga ai.

1Dai aten hta e, Roma hkawhkam Tiberiu gaw hkaw dung ai shi manga ning hta, Punsiu Pilatu gaw Yuda mung e munggyi galaw nna, Herawt gaw Galile mung de, shi a kanau Hpilip gaw Ituri hte Trakuni mung de, Lisaniu gaw Abili mung e du aya hkam la shajang ma ai shaloi, Anna yan Kayahpa gaw hkinjawng agyi galaw ai lakhtak e, Karai Kasang a mungga gaw, nam mali e nga ai Zakari a kasha Yawhan kaw du nga ai. Dai rai nna, Yawhan gaw Yawdan hka a grup yin na ginwang shagu de du hkawm nna, myit malai lu na kashin kamun lam hpe hkaw tsun dan nga ai: dai gaw, “Nam mali e tsun jahtau ai wa a nsen gaw: Madu a lam hpe lajang da mu; Shi a lam masun ni hpe shading mu.  Hkaraw shagu hpe kaput jahpring nna, Bum hte kawng shagu hpe daw kau na mara ai; Magaw ai lam ni hpe shading nna, Machyawk marawk re ai lam ni hpe shara lu na rai nga ai: Shaloi masha yawng hte gaw Karai Kasang a hkye hkrang la ai lam mu lu na mara ai,” nga nna myihtoi Esaia a laika hta ka da ai hte maren rai wa sai.

Ya hti ai gaw Madu a Kabu Gara Shiga rai nga ai.

2018:DUSA LADAW LABAN (1) NA MUNGGA

Dai ni gaw nawku daw jau ai shata hti laika a shaning nnan nhtoi rai nga ai rai nna du sa ladaw a shawng nnan na laban shani mung rai nga ai. Madu Yesu Hkristu du sa na hpe anhte hkyen lajang ai aten ladaw ngu nna nawku hpung kaw nna san da ya ai ladaw rai nga ai.

Dai ni na aten hta kaja wa sha Madu Karai Kasang anhte a lapran hta du sa wa ai rai yang Karai Kasang hte mu hkrum ai mahkrum madup gaw anhte a matu kabu pyaw hpa ai lam rai na kun? Shing nrai hkrit tsang ai lam rai na kun ngu ai gaw anhte a lai wa sai aten na nga sat nga sa ai lam hta madung na rai nga ai.

Mai kaja ai lam hpe hkan shatup nga sa nna Karai Kasang hte mu hkrum ai mahkrum madup gaw anhte a matu kabu pyaw hpa re ai mahkrum madup byin tai wa lu na matu shakut shaja lu u ga.

SHADING SHARAI GA

Du sa ladaw laban (1) gaw, Nawku Hpung a nawku daw jau ai ladaw shanan ningnan hpang ai aten nan rai nga mali ai. Ntsa lam tsun ga nga yang, Nawku Hpung hta nawku daw jau ai lam ladaw hpan manga nga mali ai: 1. Du Sa Ladaw, 2. Hkristmas Ladaw, 3. Pranwan Ladaw, 4. Lusha Gam Ladaw, hte 5. Paska Ladaw ni rai nga ai.

Dai ni na Ja Chyum Mungga ni hpe hti yu ai shaloi, daw (1) hta, Madu Karai Kasang gaw Israela hte Yuda dap hpe sha-ang nhtawm, Shi tsun da ai ga mahkra shadik ai hku nna, “ding hpring ai Madu,” hte dinghpring ai hku dawdan up hkang ai aten du na re lam tsun ai. Daw (2) hta, Madu Yesu gaw Shi a Chyoi pra Wenyi ni hte rau bai du sa ai shaloi, nang ngai anhte yawng gaw mara n kap ai hku tsap nga lu u ga, anhte shada da tsawra let Madu Yesu bai du sa wa ai hpe myit malai lu let, jin jin rai ala nga na matu tsun shadum ya ai.

Kabu gara shiga hta mung, Masha Kasha (Yesu) gaw daru magam hpung shingkang kaba hte nawng, summwi hte hpawn rai bai du sa ai hpe mu lu na re lam tau hkrau tsun dan nga ai. Dai nhtoi gaw mahkam htim ai zawn, a kajawng sha nang ngai kaw e n du n pru u ga, sadi maja let nga ra ai lam shadum ya ai. Masha Kasha a man hta gingdan ai hku tsap lu na matu, akyu hpyi let, ahkying aten shagu hta maja nga na lam shadum ya ai. Dai ni na Ja Chyum Mungga yawng hpe ginchyum dat ga nga yang, Madu Yesu hpang jahtum bai du sa na lam hpe madung tsun shadum ya nga ai.

Myit sumru yu mai ai lam

- Adventu aten ladaw a lachyum gaw “Karai Kasha Yesu Madu hpe Kawa Karai Kasang hku nna mungkan masha ni yawng hpe hkye hkrang la na matu, yu sa shangun dat ai majaw, Yesu du sa wa ra ai lam hpe shadum ya ai.

-Bai, anhte hku nna, anhte hpe hkye hkrang la na matu Hkye La Madu hpe jaw ya ai majaw, kabu chyeju dum let, chyeju shakawn ra ga ai.

-Chyeju dum ai hku nna, Karai Kasang hpe hkungga tsawra let, Shi a Mungga ningli ni hpe madat mara hkan sa ra ai.

-Anhte a masin salum ni hta n kaja ai myit masa, akyang lailen ni n rawng hkra, myit masin ni hpe shading sharai let, jasan jaseng da ra ai.

-Nang Yesu du sa wa ai hpe jin jin ala nga sai kun?

2018:DUSA LADAW LABAN (1) NA CHYUM LAIKA

DUSA LADAW HTA LABAN 1

2nd December 2018

CHYUM MUNGGA DAW 1

YEREMIA 33: 14-16

Ya hti na gaw, myihtoi Yeremia Laika hta na rai nga ai.

Yu mu, Israela dap hta Yuda dap hpe sha-ang nna ngai tsun ai ga kaja mahkra hpe, ngai shadik na aten du na ra ai, nga nna Madu tsun wu ai.  Dai shani, dai aten e, Dawi a matu Ding Hpring ai Makrung hpe ngai shatut nna, dai wa gaw mungdan kata e ding hpring ai hku daw dan na ra ai. Ndai aprat e Yuda mung hkye hkrang la ai hkrum nna, Yerusalem mare gaw asim sha nga lu na ra ai; dai mare hpe Ding Hpring ai Madu nga nna shamying ya na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 HTESALONI 3:12-4:2

Ya hti na gaw, Htesaloni masha ni hpang de San Pawlu shagun dat ai laika langai hta na rai nga ai.

Hpu nau ni e, Anhte a Madu Yesu Shi a chyoi pra ai ni yawng hte rau bai du sa ai shaloi, Wa Karai Kasang a man e nanhte mara n kap ai hku tsap nga lu hkra, Madu gaw nanhte a myit masin hpe chyoi pra ai lam hta shangang shakang ya u ga;  nanhte hpe anhte tsaw ra nga ga ai hte maren, Madu gaw nanhte hta e, shada da tsaw ra ai hte masha yawng hte hpe tsaw ra ai myit shalaw jahtam ya u ga. Bai lam mi gaw, hpu nau ni e, Karai Kasang hpe myit shadik ya na matu, nanhte kaning rai hkawm sa wa na lam hpe anhte madun dan sai hte maren, nanhte hkawm sa nga myit dai; ya, dai hta grau nna kup tsup wa lu myit ga, Madu Yesu hta nanhte hpe hpyi nem nna shadut jahkat dat ga ai. Madu Yesu a ahkaw ahkang hte, nanhte hpe gara hku hkang da saga ai lam, nanhte nan chye nga myit dai.

Ya hti ai gaw Karai Kasang a mungga rai nga ai.

KABU GARA SHIGA

LUKA 21:25-28. 34-36

Ya hti na gaw, Luka a Laika hta na Kabu Gara Shiga rai nga ai.

Dai aten hta e, Yesu Shi a sape ni hpe tsun mu ai gaw: Jan, shata, shagan ni hta lamik kumla dan pru na ra ai; nammukdara hta hka leng ni a wu kadu ai nsen a majaw, ga ntsa na masha amyu mahkra myit mau ai hte ru tsang ai hkrum na ra ai: masha ni gaw mungkan ga e byin wa na ra ai amu ni hpe myit tau nna hkrit wa ai majaw, htan mat na mara ai. Dai shaloi e Masha Kasha gaw, daru magam hte hpung shingkang kaba hte nawng , summwi hte du sa ai hpe shanhte mu na mara ai. Dai lam ni byin hpang wa jang, baw sharawt mada yu mu; kaning rai nme law, nanhte a hkye hkrang la ai lam du na ni wa ra ai.

Raitimung, lu lai sha lai, chyaru nang ai hte, ding hta ga myit ru tsang ai lam ni a majaw, nanhte a myit masin li nga nna, dai nhtoi gaw mahkam htim ai zawn, nanhte a ntsa e akajawng sha n du pru u ga sadi nga mu; kaning rai nme law, dai nhtoi gaw ga ntsa ting e nga nga ai ni nlang hte a ntsa e, shing rai du na ra ai. Dai rai nna, byin wa na ra ai lam ni yawng hta na nanhte lawt lu nna, Masha Kasha a man e tsap lu ging ai ni tai lu myit ga, akyu hpyi let, ahkying aten shagu hta a maja nga mu.

Ya hti ai gaw Madu a Kabu Gara Shiga rai nga ai.

HKAP LA NA KUN, NINGDANG KAU NA KUN?

“Karai Kasang gaw shi a tengman ai tsawra myit anhte hpe hpaw tsun dan lu na matu Hpung shingkang arawng aya tawn kau nna anhte zawn masha sa tai la ai.”

Moi shawng de, hkawhkam marai mi gaw hkauna galaw sha ai shayi sha hte tsawra hkrup ai da! Dai shayi sha hpe hkungran la na gaw kachyi mi mung n mai byin ai hpe hkawhkam wa chye da nu ai. Hkawhkam ni yi sun hkauna galaw sha ai ni hte galoi n hkung ran ma ai. Shanhte hkawhkam hkawseng shada da sha she ta matut hkat ma ai. Raitim, hkawhkam shi gaw grai arawng aya kaba ai hte dai shayi sha hpe hkungran la nna woi da na matu mai byin ai hpe mung chye nga ai. 

Dai hta kaga lam langai mi hpe mung myit dum lu ai. Lama na dai hkauna galaw sha ai shayi sha hpe hkawhkam tai let la da ai rai yang, shan yan a hku hkau kanawn mazum ai lam hta lama mi gaw galoi mung ra ra rai nga na re. Shayi sha gaw hkawhkam hpe hkrit hkungga nga ai hte teng sha tsawra lu na n rai nga ai. Shan lahkawng a madang gaw manu mana tsan gang nga ai. Shayi sha gaw hkauna galaw sha ai sha rai nna hkawhkam wa hpe hkrit tsang let sha nga taw na re. Dai majaw hkawhkam wa gaw kaga lam bai myit yu nu ai. Hkawhkam aya kaw nna yu let, hkauna htu sha rai nna shi a tsawra myit hpe hpaw tsun dan yang gaw hkap la lu na re ngu myit lu nu ai. Raitim, shi dai zawn galaw ai rai yang masa lam gaw yawng shuk nna hten bya mat na re hpe hkawhkam wa dum chye lu ai. Shi a hkawhkam aya hpe sha nrai, shayi sha hpe mung sum mat na rai nga ai. Dai zawn rai galaw ai rai yang, shayi sha gaw dai daram mana ai bungli galaw ai nga myit la nna n hkap la na mai byin ai. Dai majaw hkawhkam wa mung shi galaw na lamang hte seng nna mang hkang nga nga sai. Hpang jahtum gaw, shan lahkawng a lapran na tengman ai tsawra myit hpe madun dan lu na matu yak hkak ai lam yawng hpe galaw sa na lam hkawhkam wa myit daw dan kau nu ai.

Raitim, ndai lam hpe ka ai laika ka sara wa gaw mabyin dai a hpang jahtum kaning rai ngut mat ai lam galoi mung n tsun dan sai. Hkawhkam wa a tsawra myit hpe hkap la ai kun? (snr) shayi sha dai, ning dang kau ai kun? Hte shan yan hkungran ta matut byin ai lam anhte n chye lu ai. Rai yang, n dai mabyin hta tsun dan mayu ai lam hpa baw nga ai kun? Laika ka ai wa a myit hta n dai lam ni nga na nhten!

Hkawhkam wa a shayi sha ntsa nga ai tsawra myit gaw nau kaba la ai majaw, hkawhkam aya hpe shayi sha hte galai kau na gwi gwi rai nga ai.

Ndai mabyin n htum ai, matut nna naw byin nga ai. N dai gaw tengman ai mabyin rai nna, jahtum hta hpa byin na n ka da ai. Hpa majaw nga yang, n dai gaw nang, ngai, masha yawng hpe tsawra ai Karai Kasang a tsawra myit a lam rai nga ai. Mabyin hta na hkawhkam gaw Karai Kasang rai nna, shayi sha gaw anhte marai hkum shagu rai nga ai.

Raitim, shai ai lam gaw, Karai Kasang gaw hkawhkam sha n rai, Karai Kasang nan rai nga ai. Shi a tsawra myit gaw htum n nga ai, hkawhkam wa shayi sha hpe tsawra ai hta anhte hpe grau tsawra nga ai. Karai Kasang gaw, Yesu Hkristu hta anhte zawn masha sa tai nna shi a tsawra myit hpe anhte hpe hpaw tsun dan ai. Anhte hkrak tup chye na hkam sha lu na hte, n dut n dang bai n htang lu na matu tsawra myit hpe madun dan sai. Mi na mabyin lam n ngut ai zawn, Karai Kasang hte anhte lapran na tsawra ai lam matut nna a nga nga na hte htum mat na n rai shi nga ai. Anhte marai hkum shagu gaw tinang hkum nan a mabyin hpe ka shangut la ai ni sha rai nga ai. Anhte Karai Kasang a tsawra myit hpe hkap la ai kun? (snr) ning dang kau ai kun hte mabyin htum ai shaloi, ngwi pyaw ai (snr) yawn hkyen ai hte ngut mat ai kun? anhte hte seng nga ai. Dai hta, Hkristu hkawhkam poi gaw anhte hpe ga san san na saw shaga nga ai.

“Mungkan ntsa hta Karai Kasang a mungdan hkum tsup wa na hte du wa lu na matu, tup hkrak re ai hpa lam wa ngai teng teng galaw nga ai kun?

2018:HKRISTU HKAWHKAM POI SHANI NA CHYUM LAIKA

HKRISTU HKAWHKAM POI

25th November 2018

CHYUM MUNGGA DAW 1

Daniela 7:13-14

Ya hti na gaw, myihtoi Daniela a laika hta na rai nga ai.

Shana na shingran hta ngai mu mada nna, Masha Kasha zawn san ai wa langai mi, summwi hta jawn let du sa ai hpe ngai mu se ai. Moi chyaloi nhkoi na, asak kaba dik ai Wa hpang de shi du jang, dai wa a man de shi hpe jashawn mu ai. Masha amyu baw shagu hte, ga amyu myu tsun ai ni yawng, shi hpe daw jau na matu, daru magam, hpung shingkang hte mungdan, shi hpe ap ya wu ai. Shi up hkang ai gaw n htum nwai, htani htana prat dingsa up hkang ai lam rai nga nna, shi a mungdan gaw hten byak lu ai mungdan n rai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Shingran Laika 1:5-8

Ya hti na gaw, Yawhan a Shingran laika hta na rai nga ai.

Yesu Hkristu gaw kangka re ai sakse wa, si mat ai ni hta na kasha alat, dinghta ga na hkawhkam ni hpe up ai Madu Magam rai nga ai. Shi anhte hpe tsawra nna, shi hkum nan a asai hte anhte a shut hpyit mara hpe raw dat ya mani ai;  Shi a Kawa Karai Kasang hpe daw jau na matu, anhte hpe hkawhkam amyu hte hkungga nawng ai amyu shatai da mani ai: dai Yesu Hkristu kaw hpung shingkang hte daru magam ahkang, htani htana e a nga nga u ga law. Amen. Yu mu, shi gaw summwi hta du sa wa nna, yawng mayawng mung, shi hpe galun ai ni mung, shi hpe hkap mu na mara ai rai nna, dinghta ga na amyu nlang hte gaw, shi a majaw sharung shayawt ai hte, htawm hpang de du na ra ai Wa, Mahkra dang chye ai Madu Karai Kasang tsun nga ai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 18:33-37

Ya hti na gaw, Yawhan a laika hta na Kabu Gara Shiga rai nga ai.

Pilatu gaw Yesu hpe, Nang Yuda masha ni a hkawhkam rai nga nni? ngu nna, san wu ai. Yesu gaw, dai gaw na a myit hte nang san nni? Shing n rai, masha kaga e nye a lam nang hpe tsun dan ma ni? ngu nna htan wu ai. Pilatu gaw, ngai Yuda masha rai nga a ni? Na a amyu masha ni hte Jau agyi ni gaw, nang hpe ngai kaw sa ap nga ma ai; nang hpa galaw shut nit ta? ngu nna bai san wu ai. Yesu gaw, Nye a mungdan gaw ndai mungkan ga na n rai li ai; nye a mungdan ndai mungkan ga na rai yang gaw, ngai Yuda masha ni a lata de n shang hkra, nye a ali ama ni gasat na masai; ya chyawm gaw, nye a mungdan ndai yang na n rai li ai, ngu nna Pilatu hpe htan wu ai. Dai re ai majaw Pilatu gaw, dai rai yang, nang teng teng hkawhkam rai nga n ni? ngu nna san wu ai. Yesu gaw, nang tsun ai hte maren, ngai teng teng Hkawhkam rai nga nngai: ngai gaw tengman ai a maga de sakse hkam ya ra nngai. Dai a matu ngai shangai chyinghkai wa ni ai hte, mungkan ga de du sa ring ngai: tengman ai hte seng ai ni yawng hte gaw, nye a ga nsen madat ma ai, ngu nna htan wu ai.

Ya hti ai gaw, Madu a Kabu Gara shiga rai nga ai.

2018:PRANWAN LADAW LABAN (33) NA MUNGGA

Npawt nhpang nga ai masha, arung arai ni yawng gaw hpang jahtum ngu ai aten ahkying teng sha nga na re. Shinggyim masha ni hta Karai Kasang jaw tawn da ai myit mang chye ai atsam hte dawdan lu ai ahkaw ahkang nga ai majaw tinang a asak aprat hpe du mayu ai shara de hkawm sa lu ai re.

Hpang jahtum na aten hta jeyang dawdan ai hpe hkrum ai shaloi makoi magap da lu ai lam nnga ai sha tinang a asak aprat hpe azin ayang teng sha mu lu na re. Kaja ai nkaja ai ngu ai hpe anhte hta dan dan leng leng mu lu na re. 

Mahkra hpe dang chye ai Karai Kasang hpe tengsha kamsham nna, tengman ai lam, jaw ai lam ni hte sak hkrung nga sa lu na matu shakut shaja sa wa lu u ga.

MALAP MALI RAI NGA GA AI KUN?

“Ya aten na anhte a Hkristan prat hpe atsawm nga sa ai hte hpang na prat a matu lajang da ga!”

1970 ning daram kaw nna masha uhpung uhpawng law law wa mungkan n dai shaning 2000 hta htum mat na nga nna tak sawn tsun ma ai. Makam masham uhpung law law mung shaning 2000 hta mungkan htum mat yang na matu nga nna lajang shachyip masai. Hpung malawm n kau mi rai yang, lu malu dut kau nna mungkan htum na shani a matu hkyen lajang ma ai. Ya dai ni anhte 2018 ning hta nga taw sai, dai shaloi na myihtoi htoi ai ni mung si mat ai ni lawm na sai, raitim mungkan htum ai shani aten gaw rai n du shi nga ai. 

Anhte a Nawku daw jau shata hti laika shaning htum wa ai aten, dai ni na kabu gara shiga gaw, mi na tau nau hkaw tsun ai lam ni yawng hpe hka katsi hte jaw shazim kau ai zawn rai sai. Madu Hkristu tsun ai ga hpe madat yu ga! “Raiti mung, dai shani hte ahkying hpe dai wa hta kaga, kadai mung n chye lu ai, lamu na kasa ni hte dai kasha pyi dai hpe n chye lu ma ai” (Mk 13:32) Mungkan htum na lam hpe sawn sumru let aten jahtum na malai, ya aten na anhte a prat hpe Hkristan ajet ni zawn nga sa na Madu Yesu gaw shatsam ga tsun nga ai. Ahkyak ai gaw “Ya aten” nan rai nga ai. 

Kalang mi na jau marai mi gaw shi manang wa hte ‘Tennis’ gin sup nga ai. Hkring sa la ai ten hta shan jahta chyai let manu mana sung ai hku jahta hkat let, dai manang wa gaw, “Wajau e, ya an gin sup nga ai ten mungkan htum wa ai ngu ga, nang kaning di na? Lahput hput di let akyu hpyi kap rai na kun?” nga san yang, jau gaw jahkring mi mau rai nna, “ngai gaw matut gin sup nga na re” ngu htan ya sai. Tsun mayu ai gaw, anhte ni gaw mungkan htum na hpe hpa hkrit tsang shara n nga nga ai. Lama tsang ga nga yang, anhte a makam masham hta, Hkristan nga sa lam hte maren hkawm sa nga ai kun? tsang mai nga ai. Chyum laika hta ka da ai hte maren, hpang jahtum nhtoi hta, “ra kadawn nga ai ni hpe hpa galaw daw jau sai rai? nga ai gasan hte anhte ni gaw jeyang hkrum na rai nga ai. (Mt 25:32---)

Ngarai wan hta jam jau hkrum sha nga ai shadang sha langai a lam nga ai. Dai ngarai wan hta na shi hpe hkye la na matu Karai Kasang hpe shani shagu marawn jahtau hpyi nem nga ai da. Karai Kasang mung shi a hpyi shawn ai n sen na ai majaw dai masha mungkan n tsa hta kaja ai magam bungli kade daram galaw sai kun lamu kasa hpe san yu wu ai. Lamu kasa mung sumsing lamu na kaba dik ai Computer hta jahpan mada yu yang, shadang la sha dai, shi a matsan ai htingbu wa hpe shakau hkyeng n htan loi mi gam jaw yu sai hpe mu tam ai da. ‘kaja dik sai’, Karai Kasang gaw tsun nna, dai shakau hkyeng ni sumri hte gyit let shi hpang de shanem ya wu ai. Lamu kasa mung dai rit sumri hpe jahkrat ya ai hte dai la wa mung jum magra la sai. Dai hpang lamu kasa mung gang shalun la magang sai. Shadang sha dai lawt lung wa ai hpe kaga manang ni mu jang wawt ni kap ai zawn shi a lagaw hta hkan noi nang ma ai. Shanhte grai li wa ai hte, Sumsing mungdan hte ngarai di lapran du ai shara, sumri di mat nna yawng ngarai di de bai hkrat bang mat sai. Dai la wa gaw shi hkum nan mung, manang ni hpe mung n lu hkye la ai gaw shi galaw da ai mai kaja ai magam bungli gaw n law la ai majaw re.

Anhte gaw kaning rai na law? Ngarai wan kaw nna lawt lu na daram mai kaja ai amu magam bungli galaw da sai kun? Nawku dau jau shaning n dai shata hta htum sai hte anhte hkum dinglik yu nna wenyi a matu lama ma galaw na ra nga ai. Ngai ra sharawng ai lam, ra kadawn ai lam, myit pyaw hpa lam hta sha myit machyu nga ai kun? Karai Kasang a matu, kun dinghku hte kaga masha ni a matu ngai hta aten nga ai kun? Tsaw ra ai, ngwi pyaw simsa ai Hkristan u hpung u hpawng gaw gap ai hta, ngai shang lawm nga ai kun? (snr) masha kaga ni myit machyi hpa, myit n pyaw na lam ngai rai nga kun? Ya aten anhte galaw ai lam yawng mayawng hta htani htana hte seng ai akyu ara lawm nga ai. Tara jeyang ai lam gaw, anhte mungkan n tsa hta lata la ai lam, daw dan ai lam hte galaw kau sai lam ni hpe Karai Kasang shagrin dat ya ai lam sha rai nga ai. Ya anhte gat hkai ai gaw hpang e dan la na matu re!

Sawn sumru mai ai lam; Ra kadawn nga ai ni hpe tsawra matsan dum myit ngai madun nga ai kun? (snr) Ngai a makau na jam jau hkrum sha nga ai ni hpe malap tawn da nna ngai a ra kadawn ai lam, kun dinghku a matu chyu sha myit nna kyin nga ai kun?

2018:PRANWAN LADAW LABAN (33) NA CHYUM LAIKA

PRAN WAN LADAW HTA LABAN 33

18th November, 2018

CHYUM MUNGGA DAW 1

Daniela 12:1-3

Ya hti na gaw,myihtoi Daniela a laika hta na rai nga ai.

Nang Madu Karai Kasang daw da ai aten hta e, na a amyu masha ni hpe makawp maga ai Du Magam Mikelu rawt pru na ra ai. Masha amyu ni shawng nga pra wa ai kaw nna dai aten du hkra, galoi n byin yu ai, ru tsang ai aten du na ra ai. Dai aten hta e, Jahpan laika hta mying lawm ai, na a amyu masha ni lawt lu na mara ai. Ga nhpu hta yup pyaw nga ai ni law law wa, yup hprang na mara ai; nkau mi gaw htani htana asak lu la nna, nkau mi gaw htani htana kaya kahpa hte arawng hpoi ai hkrum na mara ai. Myitsu ai ni gaw sumsing lamu a nhtoi zawn htoi tu kabrim na mara ai; masha law law hpe dinghpring ai maga de woi awn ai ni mung, shagan ni zawn htani htana prat dingsa e htoi tu na mara ai. 

Ya hti ai gaw, Karai Kasang a mungga rai nga ai.

CHYUM MUNGGA DAW 2

Hebre 10:11-14,18

Ya hti na gaw, Hebre masha ni hpang de shagun dat ai laika hta na rai nga ai.

Hkungga nawng ai Jau kadai mung, shani shagu daw jau let, shut hpyit mara hpe galoi mung n raw kau ya lu ai, shagu hkungga amyu sha hpe law law lang kahtap nawng ya ma ai. Yesu Hkristu chyawm gaw, shut hpyit mara raw kau ya lu ai hkungga langai sha hpe nawng ya ngut jang, prat dingsa a matu Karai Kasang a hkra maga de dung nga sai; dai shata hta e, shi a hpyen ni shi a lagaw n-pu e tawn da ai du hkra shi la nga ai. Dai rai nna, shut hpyit mara raw dat ya ngut sai rai yang gaw, mara a matu hkungga nawng shara n nga na sai. 

Ya hti ai gaw, Karai Kasang a mungga rai nga ai.

KABU GARA SHIGA

Marku 13:24-32

Ya hti na gaw, Marku a laika hta na Kabu Gara Shiga rai nga ai.

Dai nhtoi ni hta e, ru tsang ai amyu myu byin ai hpang de, jan gaw sin mat wa nna, shata mung nip mat na ra ai; shagan ni mung lamu de na di hkrat mat nna, sumsing lamu hta e nga ai atsam ni gaw gari ashun wa na mara ai. Dai shaloi e, Masha Kasha gaw daru magam hte hpung shingkang hte nawng, summwi ni hta e du sa ai hpe, shanhte mu na mara ai. Dai shaloi e, Karai Kasang shi a lamu kasa ni hpe shangun dat nna, aga htum ai kaw nna lamu htum ai du hkra, nbung mali maga de na, shi a lata la ai ni hpe jahprawng la na maru ai.

Dai hta kaga, maihpang hpun hpe yu nna chye la mu; de a lakung lakying ni majawm wa nna lap prut wa jang, nlum ta ni wa ra ai hpe nanhte chye nga myit dai. Dai hte maren, dai lam ni byin hpang wa ai hpe nanhte mu ai shaloi, shi gaw chyinghka lam makau e ni wa ra ai hpe, chye nga mu. Nanhte hpe ngai teng teng tsun made ga; Ya pra nga ai ndai amyu masha ni garai n lai mat yang, dai lam yawng mayawng hte byin wa na ra ai. Sumsing lamu hte ginding aga lai mat wa timung, nye a ga gaw n lai mat na li ai. Rai timung, dai shani hte ahkying hpe, Wa hta kaga, kadai mung n chye lu ai; lamu kasa ni hte dai Kasha pyi dai hpe n chye lu ma ai.

Ya hti ai gaw, Madu a Kabu Gara shiga rai nga ai.