HKAP LA NA KUN, NINGDANG KAU NA KUN?

“Karai Kasang gaw shi a tengman ai tsawra myit anhte hpe hpaw tsun dan lu na matu Hpung shingkang arawng aya tawn kau nna anhte zawn masha sa tai la ai.”

Moi shawng de, hkawhkam marai mi gaw hkauna galaw sha ai shayi sha hte tsawra hkrup ai da! Dai shayi sha hpe hkungran la na gaw kachyi mi mung n mai byin ai hpe hkawhkam wa chye da nu ai. Hkawhkam ni yi sun hkauna galaw sha ai ni hte galoi n hkung ran ma ai. Shanhte hkawhkam hkawseng shada da sha she ta matut hkat ma ai. Raitim, hkawhkam shi gaw grai arawng aya kaba ai hte dai shayi sha hpe hkungran la nna woi da na matu mai byin ai hpe mung chye nga ai. 

Dai hta kaga lam langai mi hpe mung myit dum lu ai. Lama na dai hkauna galaw sha ai shayi sha hpe hkawhkam tai let la da ai rai yang, shan yan a hku hkau kanawn mazum ai lam hta lama mi gaw galoi mung ra ra rai nga na re. Shayi sha gaw hkawhkam hpe hkrit hkungga nga ai hte teng sha tsawra lu na n rai nga ai. Shan lahkawng a madang gaw manu mana tsan gang nga ai. Shayi sha gaw hkauna galaw sha ai sha rai nna hkawhkam wa hpe hkrit tsang let sha nga taw na re. Dai majaw hkawhkam wa gaw kaga lam bai myit yu nu ai. Hkawhkam aya kaw nna yu let, hkauna htu sha rai nna shi a tsawra myit hpe hpaw tsun dan yang gaw hkap la lu na re ngu myit lu nu ai. Raitim, shi dai zawn galaw ai rai yang masa lam gaw yawng shuk nna hten bya mat na re hpe hkawhkam wa dum chye lu ai. Shi a hkawhkam aya hpe sha nrai, shayi sha hpe mung sum mat na rai nga ai. Dai zawn rai galaw ai rai yang, shayi sha gaw dai daram mana ai bungli galaw ai nga myit la nna n hkap la na mai byin ai. Dai majaw hkawhkam wa mung shi galaw na lamang hte seng nna mang hkang nga nga sai. Hpang jahtum gaw, shan lahkawng a lapran na tengman ai tsawra myit hpe madun dan lu na matu yak hkak ai lam yawng hpe galaw sa na lam hkawhkam wa myit daw dan kau nu ai.

Raitim, ndai lam hpe ka ai laika ka sara wa gaw mabyin dai a hpang jahtum kaning rai ngut mat ai lam galoi mung n tsun dan sai. Hkawhkam wa a tsawra myit hpe hkap la ai kun? (snr) shayi sha dai, ning dang kau ai kun? Hte shan yan hkungran ta matut byin ai lam anhte n chye lu ai. Rai yang, n dai mabyin hta tsun dan mayu ai lam hpa baw nga ai kun? Laika ka ai wa a myit hta n dai lam ni nga na nhten!

Hkawhkam wa a shayi sha ntsa nga ai tsawra myit gaw nau kaba la ai majaw, hkawhkam aya hpe shayi sha hte galai kau na gwi gwi rai nga ai.

Ndai mabyin n htum ai, matut nna naw byin nga ai. N dai gaw tengman ai mabyin rai nna, jahtum hta hpa byin na n ka da ai. Hpa majaw nga yang, n dai gaw nang, ngai, masha yawng hpe tsawra ai Karai Kasang a tsawra myit a lam rai nga ai. Mabyin hta na hkawhkam gaw Karai Kasang rai nna, shayi sha gaw anhte marai hkum shagu rai nga ai.

Raitim, shai ai lam gaw, Karai Kasang gaw hkawhkam sha n rai, Karai Kasang nan rai nga ai. Shi a tsawra myit gaw htum n nga ai, hkawhkam wa shayi sha hpe tsawra ai hta anhte hpe grau tsawra nga ai. Karai Kasang gaw, Yesu Hkristu hta anhte zawn masha sa tai nna shi a tsawra myit hpe anhte hpe hpaw tsun dan ai. Anhte hkrak tup chye na hkam sha lu na hte, n dut n dang bai n htang lu na matu tsawra myit hpe madun dan sai. Mi na mabyin lam n ngut ai zawn, Karai Kasang hte anhte lapran na tsawra ai lam matut nna a nga nga na hte htum mat na n rai shi nga ai. Anhte marai hkum shagu gaw tinang hkum nan a mabyin hpe ka shangut la ai ni sha rai nga ai. Anhte Karai Kasang a tsawra myit hpe hkap la ai kun? (snr) ning dang kau ai kun hte mabyin htum ai shaloi, ngwi pyaw ai (snr) yawn hkyen ai hte ngut mat ai kun? anhte hte seng nga ai. Dai hta, Hkristu hkawhkam poi gaw anhte hpe ga san san na saw shaga nga ai.

“Mungkan ntsa hta Karai Kasang a mungdan hkum tsup wa na hte du wa lu na matu, tup hkrak re ai hpa lam wa ngai teng teng galaw nga ai kun?

2018:HKRISTU HKAWHKAM POI SHANI NA CHYUM LAIKA

HKRISTU HKAWHKAM POI

25th November 2018

CHYUM MUNGGA DAW 1

Daniela 7:13-14

Ya hti na gaw, myihtoi Daniela a laika hta na rai nga ai.

Shana na shingran hta ngai mu mada nna, Masha Kasha zawn san ai wa langai mi, summwi hta jawn let du sa ai hpe ngai mu se ai. Moi chyaloi nhkoi na, asak kaba dik ai Wa hpang de shi du jang, dai wa a man de shi hpe jashawn mu ai. Masha amyu baw shagu hte, ga amyu myu tsun ai ni yawng, shi hpe daw jau na matu, daru magam, hpung shingkang hte mungdan, shi hpe ap ya wu ai. Shi up hkang ai gaw n htum nwai, htani htana prat dingsa up hkang ai lam rai nga nna, shi a mungdan gaw hten byak lu ai mungdan n rai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Shingran Laika 1:5-8

Ya hti na gaw, Yawhan a Shingran laika hta na rai nga ai.

Yesu Hkristu gaw kangka re ai sakse wa, si mat ai ni hta na kasha alat, dinghta ga na hkawhkam ni hpe up ai Madu Magam rai nga ai. Shi anhte hpe tsawra nna, shi hkum nan a asai hte anhte a shut hpyit mara hpe raw dat ya mani ai;  Shi a Kawa Karai Kasang hpe daw jau na matu, anhte hpe hkawhkam amyu hte hkungga nawng ai amyu shatai da mani ai: dai Yesu Hkristu kaw hpung shingkang hte daru magam ahkang, htani htana e a nga nga u ga law. Amen. Yu mu, shi gaw summwi hta du sa wa nna, yawng mayawng mung, shi hpe galun ai ni mung, shi hpe hkap mu na mara ai rai nna, dinghta ga na amyu nlang hte gaw, shi a majaw sharung shayawt ai hte, htawm hpang de du na ra ai Wa, Mahkra dang chye ai Madu Karai Kasang tsun nga ai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 18:33-37

Ya hti na gaw, Yawhan a laika hta na Kabu Gara Shiga rai nga ai.

Pilatu gaw Yesu hpe, Nang Yuda masha ni a hkawhkam rai nga nni? ngu nna, san wu ai. Yesu gaw, dai gaw na a myit hte nang san nni? Shing n rai, masha kaga e nye a lam nang hpe tsun dan ma ni? ngu nna htan wu ai. Pilatu gaw, ngai Yuda masha rai nga a ni? Na a amyu masha ni hte Jau agyi ni gaw, nang hpe ngai kaw sa ap nga ma ai; nang hpa galaw shut nit ta? ngu nna bai san wu ai. Yesu gaw, Nye a mungdan gaw ndai mungkan ga na n rai li ai; nye a mungdan ndai mungkan ga na rai yang gaw, ngai Yuda masha ni a lata de n shang hkra, nye a ali ama ni gasat na masai; ya chyawm gaw, nye a mungdan ndai yang na n rai li ai, ngu nna Pilatu hpe htan wu ai. Dai re ai majaw Pilatu gaw, dai rai yang, nang teng teng hkawhkam rai nga n ni? ngu nna san wu ai. Yesu gaw, nang tsun ai hte maren, ngai teng teng Hkawhkam rai nga nngai: ngai gaw tengman ai a maga de sakse hkam ya ra nngai. Dai a matu ngai shangai chyinghkai wa ni ai hte, mungkan ga de du sa ring ngai: tengman ai hte seng ai ni yawng hte gaw, nye a ga nsen madat ma ai, ngu nna htan wu ai.

Ya hti ai gaw, Madu a Kabu Gara shiga rai nga ai.

2018:PRANWAN LADAW LABAN (33) NA MUNGGA

Npawt nhpang nga ai masha, arung arai ni yawng gaw hpang jahtum ngu ai aten ahkying teng sha nga na re. Shinggyim masha ni hta Karai Kasang jaw tawn da ai myit mang chye ai atsam hte dawdan lu ai ahkaw ahkang nga ai majaw tinang a asak aprat hpe du mayu ai shara de hkawm sa lu ai re.

Hpang jahtum na aten hta jeyang dawdan ai hpe hkrum ai shaloi makoi magap da lu ai lam nnga ai sha tinang a asak aprat hpe azin ayang teng sha mu lu na re. Kaja ai nkaja ai ngu ai hpe anhte hta dan dan leng leng mu lu na re. 

Mahkra hpe dang chye ai Karai Kasang hpe tengsha kamsham nna, tengman ai lam, jaw ai lam ni hte sak hkrung nga sa lu na matu shakut shaja sa wa lu u ga.

MALAP MALI RAI NGA GA AI KUN?

“Ya aten na anhte a Hkristan prat hpe atsawm nga sa ai hte hpang na prat a matu lajang da ga!”

1970 ning daram kaw nna masha uhpung uhpawng law law wa mungkan n dai shaning 2000 hta htum mat na nga nna tak sawn tsun ma ai. Makam masham uhpung law law mung shaning 2000 hta mungkan htum mat yang na matu nga nna lajang shachyip masai. Hpung malawm n kau mi rai yang, lu malu dut kau nna mungkan htum na shani a matu hkyen lajang ma ai. Ya dai ni anhte 2018 ning hta nga taw sai, dai shaloi na myihtoi htoi ai ni mung si mat ai ni lawm na sai, raitim mungkan htum ai shani aten gaw rai n du shi nga ai. 

Anhte a Nawku daw jau shata hti laika shaning htum wa ai aten, dai ni na kabu gara shiga gaw, mi na tau nau hkaw tsun ai lam ni yawng hpe hka katsi hte jaw shazim kau ai zawn rai sai. Madu Hkristu tsun ai ga hpe madat yu ga! “Raiti mung, dai shani hte ahkying hpe dai wa hta kaga, kadai mung n chye lu ai, lamu na kasa ni hte dai kasha pyi dai hpe n chye lu ma ai” (Mk 13:32) Mungkan htum na lam hpe sawn sumru let aten jahtum na malai, ya aten na anhte a prat hpe Hkristan ajet ni zawn nga sa na Madu Yesu gaw shatsam ga tsun nga ai. Ahkyak ai gaw “Ya aten” nan rai nga ai. 

Kalang mi na jau marai mi gaw shi manang wa hte ‘Tennis’ gin sup nga ai. Hkring sa la ai ten hta shan jahta chyai let manu mana sung ai hku jahta hkat let, dai manang wa gaw, “Wajau e, ya an gin sup nga ai ten mungkan htum wa ai ngu ga, nang kaning di na? Lahput hput di let akyu hpyi kap rai na kun?” nga san yang, jau gaw jahkring mi mau rai nna, “ngai gaw matut gin sup nga na re” ngu htan ya sai. Tsun mayu ai gaw, anhte ni gaw mungkan htum na hpe hpa hkrit tsang shara n nga nga ai. Lama tsang ga nga yang, anhte a makam masham hta, Hkristan nga sa lam hte maren hkawm sa nga ai kun? tsang mai nga ai. Chyum laika hta ka da ai hte maren, hpang jahtum nhtoi hta, “ra kadawn nga ai ni hpe hpa galaw daw jau sai rai? nga ai gasan hte anhte ni gaw jeyang hkrum na rai nga ai. (Mt 25:32---)

Ngarai wan hta jam jau hkrum sha nga ai shadang sha langai a lam nga ai. Dai ngarai wan hta na shi hpe hkye la na matu Karai Kasang hpe shani shagu marawn jahtau hpyi nem nga ai da. Karai Kasang mung shi a hpyi shawn ai n sen na ai majaw dai masha mungkan n tsa hta kaja ai magam bungli kade daram galaw sai kun lamu kasa hpe san yu wu ai. Lamu kasa mung sumsing lamu na kaba dik ai Computer hta jahpan mada yu yang, shadang la sha dai, shi a matsan ai htingbu wa hpe shakau hkyeng n htan loi mi gam jaw yu sai hpe mu tam ai da. ‘kaja dik sai’, Karai Kasang gaw tsun nna, dai shakau hkyeng ni sumri hte gyit let shi hpang de shanem ya wu ai. Lamu kasa mung dai rit sumri hpe jahkrat ya ai hte dai la wa mung jum magra la sai. Dai hpang lamu kasa mung gang shalun la magang sai. Shadang sha dai lawt lung wa ai hpe kaga manang ni mu jang wawt ni kap ai zawn shi a lagaw hta hkan noi nang ma ai. Shanhte grai li wa ai hte, Sumsing mungdan hte ngarai di lapran du ai shara, sumri di mat nna yawng ngarai di de bai hkrat bang mat sai. Dai la wa gaw shi hkum nan mung, manang ni hpe mung n lu hkye la ai gaw shi galaw da ai mai kaja ai magam bungli gaw n law la ai majaw re.

Anhte gaw kaning rai na law? Ngarai wan kaw nna lawt lu na daram mai kaja ai amu magam bungli galaw da sai kun? Nawku dau jau shaning n dai shata hta htum sai hte anhte hkum dinglik yu nna wenyi a matu lama ma galaw na ra nga ai. Ngai ra sharawng ai lam, ra kadawn ai lam, myit pyaw hpa lam hta sha myit machyu nga ai kun? Karai Kasang a matu, kun dinghku hte kaga masha ni a matu ngai hta aten nga ai kun? Tsaw ra ai, ngwi pyaw simsa ai Hkristan u hpung u hpawng gaw gap ai hta, ngai shang lawm nga ai kun? (snr) masha kaga ni myit machyi hpa, myit n pyaw na lam ngai rai nga kun? Ya aten anhte galaw ai lam yawng mayawng hta htani htana hte seng ai akyu ara lawm nga ai. Tara jeyang ai lam gaw, anhte mungkan n tsa hta lata la ai lam, daw dan ai lam hte galaw kau sai lam ni hpe Karai Kasang shagrin dat ya ai lam sha rai nga ai. Ya anhte gat hkai ai gaw hpang e dan la na matu re!

Sawn sumru mai ai lam; Ra kadawn nga ai ni hpe tsawra matsan dum myit ngai madun nga ai kun? (snr) Ngai a makau na jam jau hkrum sha nga ai ni hpe malap tawn da nna ngai a ra kadawn ai lam, kun dinghku a matu chyu sha myit nna kyin nga ai kun?

2018:PRANWAN LADAW LABAN (33) NA CHYUM LAIKA

PRAN WAN LADAW HTA LABAN 33

18th November, 2018

CHYUM MUNGGA DAW 1

Daniela 12:1-3

Ya hti na gaw,myihtoi Daniela a laika hta na rai nga ai.

Nang Madu Karai Kasang daw da ai aten hta e, na a amyu masha ni hpe makawp maga ai Du Magam Mikelu rawt pru na ra ai. Masha amyu ni shawng nga pra wa ai kaw nna dai aten du hkra, galoi n byin yu ai, ru tsang ai aten du na ra ai. Dai aten hta e, Jahpan laika hta mying lawm ai, na a amyu masha ni lawt lu na mara ai. Ga nhpu hta yup pyaw nga ai ni law law wa, yup hprang na mara ai; nkau mi gaw htani htana asak lu la nna, nkau mi gaw htani htana kaya kahpa hte arawng hpoi ai hkrum na mara ai. Myitsu ai ni gaw sumsing lamu a nhtoi zawn htoi tu kabrim na mara ai; masha law law hpe dinghpring ai maga de woi awn ai ni mung, shagan ni zawn htani htana prat dingsa e htoi tu na mara ai. 

Ya hti ai gaw, Karai Kasang a mungga rai nga ai.

CHYUM MUNGGA DAW 2

Hebre 10:11-14,18

Ya hti na gaw, Hebre masha ni hpang de shagun dat ai laika hta na rai nga ai.

Hkungga nawng ai Jau kadai mung, shani shagu daw jau let, shut hpyit mara hpe galoi mung n raw kau ya lu ai, shagu hkungga amyu sha hpe law law lang kahtap nawng ya ma ai. Yesu Hkristu chyawm gaw, shut hpyit mara raw kau ya lu ai hkungga langai sha hpe nawng ya ngut jang, prat dingsa a matu Karai Kasang a hkra maga de dung nga sai; dai shata hta e, shi a hpyen ni shi a lagaw n-pu e tawn da ai du hkra shi la nga ai. Dai rai nna, shut hpyit mara raw dat ya ngut sai rai yang gaw, mara a matu hkungga nawng shara n nga na sai. 

Ya hti ai gaw, Karai Kasang a mungga rai nga ai.

KABU GARA SHIGA

Marku 13:24-32

Ya hti na gaw, Marku a laika hta na Kabu Gara Shiga rai nga ai.

Dai nhtoi ni hta e, ru tsang ai amyu myu byin ai hpang de, jan gaw sin mat wa nna, shata mung nip mat na ra ai; shagan ni mung lamu de na di hkrat mat nna, sumsing lamu hta e nga ai atsam ni gaw gari ashun wa na mara ai. Dai shaloi e, Masha Kasha gaw daru magam hte hpung shingkang hte nawng, summwi ni hta e du sa ai hpe, shanhte mu na mara ai. Dai shaloi e, Karai Kasang shi a lamu kasa ni hpe shangun dat nna, aga htum ai kaw nna lamu htum ai du hkra, nbung mali maga de na, shi a lata la ai ni hpe jahprawng la na maru ai.

Dai hta kaga, maihpang hpun hpe yu nna chye la mu; de a lakung lakying ni majawm wa nna lap prut wa jang, nlum ta ni wa ra ai hpe nanhte chye nga myit dai. Dai hte maren, dai lam ni byin hpang wa ai hpe nanhte mu ai shaloi, shi gaw chyinghka lam makau e ni wa ra ai hpe, chye nga mu. Nanhte hpe ngai teng teng tsun made ga; Ya pra nga ai ndai amyu masha ni garai n lai mat yang, dai lam yawng mayawng hte byin wa na ra ai. Sumsing lamu hte ginding aga lai mat wa timung, nye a ga gaw n lai mat na li ai. Rai timung, dai shani hte ahkying hpe, Wa hta kaga, kadai mung n chye lu ai; lamu kasa ni hte dai Kasha pyi dai hpe n chye lu ma ai.

Ya hti ai gaw, Madu a Kabu Gara shiga rai nga ai.

2018:PRANWAN LADAW LABAN (32) NA MUNGGA

Anhte galaw sa ai amu magam malawng maga gaw anhte a myit kraw lawang hta npawt hpang nga ai. Tinang myit hkawn ai amu bungli hpe gaw kade mi yak hkak ai raitim nbyin byin hkra galaw chye nga ai.

Gai da jan jaw ai alu gaw nlaw la ai raitim, shi lu malu yawng hpe jaw ya sai re. Karai Kasang hpe kamsham ai myit kaja wa sha rawng ai re majaw, shi lu malu yawng hpe alu jaw ya na matu mai byin ai lam re. Ahkyak ai gaw kade mi garum lu ai, alu lu jaw ai ngu ai hta anhte a myit hta kaja wa sha garum mayu ai, jaw mayu ai myit gaw grau ahkyak nga ai.

Karai Kasang hpe tengsha kamsham ai, manang wa hpe kaja wa sha tsawra ai myit masa hpe anhte gaw gap lu nna mai kaja ai amu bungli ni hpe grau grau nna galaw sa wa lu u ga.

TSEP KAWP JAW YA AI

Ndai laban na kabu gara shiga gaw, gam jaw ya ai lam rai nga ai. Sut su ai ni law law wa shanhte hta jan ai sa bang ai ten, matsan mayan re ai gaida jan marai mi a dingsen lahkawng hpe alu sumpu hta sa bang ai hpe Hkristu gaw shakawn ai hpe na la sai. Dai matsan gaida gaw Madu Yesu a shakawn shagrau ai hpe hkam la lu nu ai. Shi a matsan mayan re ai hta na lu malu ma hkra hpe, “shi a nsa bau na arai yawng hpe” shi alu bang ai majaw rai nga ai. Masha shagu gaw kade daram matsan ai, ra kadawn nga ai rai tim, gam jaw gam ya na mai byin nga ai lam Madu Yesu sharin ya ai rai sai. Kadai mung n lu gam jaw na daram matsan chyaren re ai mi n nga ai!

  

Philippine mung dan hta, “El Shadai” ngu ai amying hte masha law law hpe woi awn nna Wenyi hte seng ai mai kaja ai lam galaw woi ai, grai mying dan hkung ai, ‘Mike Velarde’ ngu ai wa nga ai. Shi a prat masa galai shai mat ai mung myit shang sha hpa lam langai rai nga ai. 1982 ning hta shi a  magam bungli rai nga ai ‘lamu ga hte n ta dut, mari ai’ hta bungli hkrat sum mat wa nna ja gumhpraw (hka) hpyi na ni mung aten shagu shi a n ta de sa taw ai ten rai nga ai. Shi hta jaw ra ai hka gumhpraw wan 120 Pesos (Peso= Philippine gumhpraw), Dollar hte rai yang US $ sen 40 daram hka kap nga sai. Shi gaw manu mana myit htum daw mat ai hte Karai Kasang hpang de gayin wa sai. Dai hpang Wajau ni hpe saw shaga let, shi hta loi li ngam ai gumhpraw hte “Asak a Wenyi” sharin hpawng ni, shata man man galaw ai, masha law law shang lawm ai ‘Missa hkungga ni’, ‘shamai shatsai akyu hpyi hpawng shing ra’ ni hpe woi galaw hpaw hpang wa sai. Shi hta lu ai gumhpraw yawng ngu na Peso 50,000 hpe madi shadaw alu shatai nna, Kahtawlik shamai shatsai shawa kyu hpyi zup hpawng kaba hpe “Araneta” mying ai shara hta galaw sai hte hpa baw byin wa sai kun tak yu ga! 

Dai shawa kyu hpyi hpawng kaba galaw na shawng na bat e sha, sut su ai hpaga dingga masha n kau mi shi a lamu ga, htingra n ta ni hpe Peso wan 60 jaw nna mari la ya sai. Dai aten kaw nna ‘Mike Velarde’ a gam maka rawt lung wa sai. Shi gaw Karai Kasang a hpung shingkang lam hpe Radio hta htawn shana ai, Television hta mung hkaw tsun ai, Manila mare kaba na ‘Luneta’ mying ai wang kaba hta bat shagu shawa kyu hpyi hpawng kaba hta hkaw tsun ai hte shaman chyeju ni gaw lamu marang htu ai zawn htu hkrat wa sai. 

Ndai gaw kabu gara shiga hta na matsan gaida zawn rai, hkum nan hta ra kadawn ai rai tim, gam jaw gam ya na myit kaba ai wa a mabyin langai mi rai nga ai. Ahkyak ai gaw hpa rai ta nga yang, jaw ya ai wa a yawshada lam rai nga ai. Anhte hpe tsun dan mayu ai lam gaw, akyu pru ai hte shakawn ging na matu, anhte gam jaw gam ya ai lam hta ap nawng ai, (asum hkam ai) lam lawm ra ai. Anhte a gam jaw gam ya ai hte machyi hkrum ai hte hpawn rai ra ai. 

Kabu gara shiga hta na sut su ai ni hta n dai lam n lawm ai. Lajang da ai (snr) jan ai hpe sha jaw ma ai. Dai hpe yu yang, shang gumhpraw law law lu ai ni gaw gam jaw gam ya ai hta, shang gumhpraw n law ai ni daram n bang lu ai zawn rai nga ai. Laiwa sai shaning loi mi hta, “The Rachel’s Foundation” kaw nna sawk sagawn da ai hpe dip shabra shana ai lam galaw sai. America mungdan na kun dinghku ni hta, shang gumhpraw laning mi US $ 3,000 a n pu de shang ai ni gaw shanhte lu ai hta na 60%, US $ 5,000 a npu de shang ai kun dinghku ni gaw shang gumhpraw yawng a 82%, shang gumhpraw US $ 10,000 hte 20,000 lapran shang ai ni gaw 1.9% hpe shawang tsawra alu bang ma ai da. Ndai sawk sagawn jahpan hpe America mung hta galaw ma ai re. Mungkan ting hta lama galaw ai rai tim, mahtai gaw maren sha mi rai kun?

Anhte shawang alu gumhpraw bang ai shaloi, anhte myit hpe shatsam ya ai gaw hpa wa rai na kun? Anhte a mying, kun dinghku, Company a mying prat tup dip shakap da ya na matu rai kun? Anhte alu bang ai majaw ahkun hkanse shayawm ya ai majaw kun? (maigan de gaw shawang alu law law bang ai majaw ahkun hkanse shayawm hta ai lam ni nga ai) Shing rai, tinang a n tsa na masha kaba ni hpe kumhpa jaw ai gaw shara kaja (snr) ahkaw ahkang lama ma bai ra nna kun? Dai lam ni lama anhte myit hpe shatsam ai rai yang, anhte a jaw ya ai lam gaw myit htingkup ai lam rai nga ai, tsep kawp jaw ya ai lam n rai nga ai. “Nang alu jaw n yang gaw, masha ni a shakawn ai ga lu la lu u ga, tara jawng ni hta, lam hkan e mung, sawt ai masha ni galaw ai zawn, na a man e pahtau hkum dum shangun u; .... nang mahtang alu jaw n yang gaw, na a hkra lata galaw ai amu hpe pai lata n chye lu u ga; shingrai na a alu jaw ai amu n dan n leng ai hta rai nga lu na rai nna, n dan n leng ai shara hpe mu lu ai, na a N wa gaw, nang hpe bai htang na rin dai” (Mt 6:2-4) nga nna Madu Yesu anhte hpe sharin ya sai. 

Myit hta dun let jaw ya ai lam gaw matsan ai ni a lit hpe grau sawng shangun ai lam rai nga ai. Hpa majaw shanhte matut matsan ai, grau nna pyi matsan jat wa ai rai? Dai zawn rai jaw ya ai marang e, garum ai hpe sha ala ai ni, byin shangun sai kun? Jahkring jahkra ra ai lam, kalang marang ra ai hpe sha garum jaw ya ai majaw kun? Grau nna n kaja ai lam gaw shanhte tam la na yak ai arai ni hpe ra marin ai myit grau byin shangun ai. 

Matsan mayan re ai ni hpe garum gam jaw ya ai Hkristan ni a lit magam hpe akyu pru ai hku nna galaw lu na lam langai mi gaw, Hpaji sharin ya ai (snr) tinang lagaw tsap galaw sha lu na lam matsun, hpaji jaw, sharin ya ai hpe galaw mai nga ai. Miwa myu sha ni a ga malai nga ai: ‘masha hpe Nga langai mi jaw sha yang lani mi gaw lu nga na, raitim, Nga hkwi ai hpaji sharin ya ai rai yang prat tup nga pra lu na re” da!!

Sawn sumru mai ai lam; Ngai a gam jaw ya ai lam gaw kaning rai nga sai kun? Ngai a shawang tsawra myit jaw ya ai lam hpe hkam la ai ni hta kaning rai akyu pru wa sai kun?

2018:PRANWAN LADAW LABAN (32) NA CHYUM LAIKA

PRAN WAN LADAW HTA LABAN 32

11st November 2018

CHYUM MUNGGA DAW 1

1 Hkawhkam 17:10-16

Ya hti na gaw, Hkawhkam laika langai hta na rai nga ai.

Myihtoi Elia gaw Madu a ga na la jang, rawt sa nna, Sidun mung na Za-rep-hta mare de wa ai; mare chyinghka lam de du jang, gaida jan langai mi hpun hta nga ai rai nna, Elia gaw, Ngai lu na ntsin loi mi sa jaw rit, ngu nna shi hpe shaga ai. Shi gaw ntsin sa la wa nga yang, Elia gaw, muk hkyep mi mung la sa rit, ngu nna bai hpyi dat wu ai. Shaloi dai gaida jan gaw, Na a Madu Karai Kasang hkrung nga ai hte maren, ngai muk pa mi pyi n lu nngai; dibu hta muk shadung latup mi hte, namtau hta namman kaji mi sha rawng nga ai. Ngai hpun hkyep langai lahkawng sa hta nna, dai muk hpe nye a matu, ngai sha a matu mung, shadu ngut jang, an lahkawng sha nna, si na saga ai , ngu nna Elia hpe htan wu ai.

Bai Elia gaw, hkum tsang et, nang tsun ai hte maren, wa galaw jang, nye a matu muk pa kaji shawng shadu nna, sa jaw rit; dai hpang na a matu mung, nsha a matu mung shadu tawn u; hpa majaw nga yang, Israela a Madu Karai Kasang ning nga ai; Madu gaw ga ntsa e marang htu shangun ai shani du hkra, Dibu na muk shadung mung yawm mat na n rai; Namtau na namman mung yawm na n rai, nga ai, ngu nna shi hpe htawn tsun wu ai. Dai gaida jan Elia a ga hte maren, wa galaw wu ai. Shi mung, dai myihtoi wa mung, shi a kasha mung, laning mi tup sha nga lu ma ai. Madu gaw Elia a n-gup hta htawn tsun sai hte maren, dibu na muk shadung ma mat ai n rai, namtau na namman mung yawm mat wa ai n rai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Hebre 9: 24-28

Ya hti na gaw, Hebre masha ni hpang de shagun dat ai laika hta na rai nga ai.

Hkristu gaw, sumsing lamu na chyoi pra ai shara majing a kasi kumla hku nna, masha a lata hte galaw tawn ai chyoi pra ai shara kata de n shang sai; Shi gaw, Karai Kasang a man e dan pru nna, anhte a matu htinglu htinglai ya na nga, sumsing lamu kata de nan shang wa sai. Ga shaka Dingsa hta, ningbaw tai ai Jau Kaba gaw, tinang a sai n re ai asai hte, dai chyoi pra ai shara de laning hte laning shang ra ai zawn, Hkristu gaw shi hkum hpe law law lang hkungga nawng ya ra ai n rai; law law lang nawng ya ra ai rai yang gaw, ginding aga lat kaw nna shi law law lang si hkam ra na nu ai. Rai timung, Hkristu gaw dai hku n galaw ai sha, shi hkum hpe hkungga nawng ya ai a marang e, shut hpyit mara hpe la kau ya na matu, ndai prat a jahtum ai de, shi kalang mi sha dan pru nu ai. Ya hpang de kalang mi bai dan pru ai shaloi, mara la kau ya na matu n rai, shi hpe myit mada la nga ai ni hpe, hkye hkrang la ai a shabrai kumhpa jaw na matu, shi dan pru na ra ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 12:38-44 (12:41-44)

*( Gadun ai hku hti jang, lawk 2 chyu sha hti ra ai.)

Ya hti na gaw, Marku a laika hta na Kabu Gara Shiga rai nga ai.

*(Lawk1)  Yesu nawku htingnu nhku de sharin shaga nga yang, shi tsun mu ai gaw; Tara sara ni hpe sadi nga mu; shanhte palawng galu hpun nna hkawm sa mayu ai; gat hkan e hkungga ai hte shachyen ai, tara jawng ni hta grau reng ai lahkum ni hpe mung, poi hkan e grau ai dung shara ni hpe mung grai ra nga ma ai. Shanhte gaw gaida gaina ni lu da ai hpe sha shama let, masha a man e arawng tam ai hku galu galang akyu hpyi ma ai. Dai ni gaw, daw dan ai shaloi, kaba htum ai yubak hkrum na mara ai, ngu mu ai.

*(Lawk 2) Lani mi na Yesu gaw, alu sumpu ang e man yawng nna dung nga yang, shawa masha ni dai alu sumpu hta e gumhpraw bang ma ai hpe yu nga ai. Sut su ai ni law law wa, law law sa bang ma ai. Shaloi, matsan mayan re ai gaida jan langai mi sa nna, peksan langai mi ging ai, magri dingsen lahkawng bang nu ai. De a majaw, Yesu shi a sape ni hpe shaga la nna, nanhte hpe ngai teng teng tsun made ga; ndai matsan mayan re ai gaida jan gaw, alu sumpu hta e bang da ai ni yawng hta, grau nna bang dat nu ai. Hpa majaw nga yang, shanhte yawng tinang lu ai hta na jan ai hpe sha bang da ma ai; shi chyawm gaw, kaji mi lu ai hta na lu malu mahkra hpe, rai sa, asak bau na mahkra hpe pyi bang kau nu ai.

Ya hti gaw, Madu a Kabu Gara ai shiga rai nga ai.

MYIT SUM NUNG AI NI GAW

San pra ai ni hta anhte a matu ahkyak ai shiga nga nga ai. Shanhte mung anhte zawn sha gawng kya ai hte mara kap ai ni re lam tsun dan nga ai. Raitim, Karai Kasang a tsawra myit hte n-gun atsam gaw shanhte hpe hkye la nga ai. Anhte hpe matut nna shakut shaja nga na n-gun jaw ya ai hte anhte hpe garum la na re lam shadum ya nga ai. Hta n-ga, Hkristu a hpang hkan nang ai ni majing zawn sha sak hkrung ai rai yang, mau hpa kumhpa teng sha lu la na re lam hpe mung anhte hpe shadum ya nga ai.   

Dai ni anhte shagrau hkungga myit dum galaw nga ai Sanpra ai ni gaw, si ai hte hkrung ai ni, nang, ngai, dai A lu ai lam hpe hkan shadik nga sa ai ni rai nga ai. Wenyi hta matsan mayan rai nga ai ni gaw, A lu ma ai. Shanhte gaw kade daram yak hkak ai hta rai tim shanhte a makam masham hpe shadan shaleng ma ai. Shanhte a myit hta, sumnum ai hte shagrit shanem ai ni rai nga ma lu ai.

Yawn hkyen hkrum ai ni gaw, A lu ma ai. Yawn hkyen ai gaw teng man ai myit malai lam hpe byin shangun ai, shagrit shanem ai myit hte Karai Kasang a matsan dum myit hta matut manoi kam shamyet shangun sai. Shanhte shalan shabran ai hkrum nna mungdan kumhpa lu la na ra ai.

Myit sum nung ai ni gaw, A lu ma ai. Myit sumnum ai ni gaw Karai Kasang hpe asim sha ap nawng nga ai ni rai ma ai, roi rip ai hpe hkam sharang lu nna, tinang a wenyi hta lu da ai hpe myit galu kaba ai hte shakut sharang ai hte shanhte a ruyak jam jau ai hta kabu pyaw nga lu ma ai. Dinghpring ai hpe kaw si hpang kara nga ai ni gaw, A lu ma ai. Anhte a ding hpring ai hpe ra sharawng ai myit gaw Karai Kasang myit ra ai hpe galaw na ra sharawng ai hte rau sha rai nga ai.

Hkristan marai hkum shagu gaw sanpra ai masha tai na mai byin nga ai ni rai nga ai. Anhte yawng hta bung ai yaw shada lam nga ai. Anhte gaw sanpra ai ni tai na matu shaga la hkrum saga ai. Ndai lam a matu Karai Kasang gaw anhte hpe mungkan ga hta shaprat da sai hte shi a hpung shingkang hte ngwi pyaw ai hpe garan la lu na matu mung rai nga ai.  A lu ai lam hta nga sa lu na aten shagu shakut shaja ai marang e, anhte a hkam sha ai lam ni, zingri zingrat hkrum ai lam ni, yak hkak ai lam ni gaw Karai Kasang hta grau nna kam sham wa lu na matu hte shada mung tsawra matsan dum chye wa nna hpang na prat hta Madu hpe myiman chyaw hkrum zup ai shaloi kumhpa kaba hpe lu la na rai nga ai. 

Sawn sumru mai ai lam; San pra ai tai lu na matu shakut shaja sa nga ai shani shagu na ngai a prat hta gara ‘A lu ai lam’ gaw ngai hpe sung htum ning gun jaw nga ai kun?

2018:SAN PRA AI NI YAWNG A POI SHANI NA CHYUM LAIKA

SAN PRA AI NI YAWNG MAYAWNG A POI 

4th November 2018

CHYUM MUNGGA DAW 1

Shingran 7:2-4, 9-14

Ya hti na gaw, Shingran laika hta na rai nga ai.

Jan praw maga de na pru lung wa nna, ahkrung nga ai Karai Kasang a dazik lang ai lamu kasa kaga hpe: ngai Yawhan mu nngai. Dai lamu kasa gaw, anhte a Karai Kasang a shangun ma ni hpe, kahtan e dazik garai n shakap yang, aga hpe mung, nammukdara hpe mung, hpun ni hpe mung hkum jahten kau mu, nga nna lamu ga hte nammukdara hpe jahten shabya na ahkang lu ai lamu kasa mali hpe, nsen kaba hte jahtau wu ai. Shaloi, dazik shakap hkam la ai ni hpe hti ai jahpan ngai na nngai: Israela kashu kasha ni a amyu yawng hta na, sen mi mun mali e hkying mali dazik shakap ai hkam la masai. Dai hpang, yu u, mungdan shagu hta na mung, baw lakung shagu hta na mung, amyu baw shagu hta na mung, ga amyu shaga ai hta na mung, kadai n dang hti lu ai, masha unawng kaba hpe ngai mu nngai. Ndai ni gaw hpraw ai hpun palawng bu hpun nna, tinang a lata hta namhtan hpun lakung lang let, Tingnyang a man e mung, Sagu Kasha a man e mung, tsap nga ma ai. Shanhte gaw, nsen kaba hte jahtau let, Tingnyang hta dung nga ai anhte a Karai Kasang hte Sagu Kasha gaw, Awng Dang nga u ga law, nga ma ai.

Bai, lamu kasa yawng hte gaw dai Tingnyang hpe shinggrup let, salang ni hte dusat mali a grup yin e kawan tsap nga ma ai. Shaloi, shanhte gaw Tingnyang a man e dingnyawm dagup nna, Karai Kasang hpe nawku let, Amen. Shakawn kungdawn ai, hpung shingkang, hpaji byeng-ya, chyeju dum ya ai, arawng sadang, ahkang aya hte, n-gun atsam gaw, Karai Kasang kaw a nga nga u ga law. Amen, nga nna tsun ma ai. Shaloi, salang ni hta na langai mi gaw, Hpun palawng ahpraw bu hpun ai ndai ni gaw, kadai ni rai nga ma ta? Kanang na pru wa ma ta? nga nna ngai hpe hkap san nngai. Ngai gaw, Nye a Madu e, nang chye nga ndai, ngu nna shi hpe htan wu ai. Shaloi shi tsun ai gaw: Ndai ni gaw, zingri zingrat kaba hpe hkam sharang ngut nna, Tinang a hpun palawng hpe Sagu Kasha a asai hta hkrut jahpraw la ai ni rai nga ma ai. 

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 Yawhan 3:1-3

Ya hti na gaw, Yawhan shagun dat ai laika langai hta na rai nga ai.

Karai Kasang a kashu kasha ni anhte hpe ngu shamying mi ai majaw, Kawa gaw anhte hpe gade wa tsawra da mi hka! Shi a kashu kasha ni nan anhte rai nga ai. Dai rai nna, mungkan ga gaw shi hpe n chye wu ai majaw, anhte hpe mung n chye n hkap la ma ai. Tsawra ai ni e, Karai Kasang a kashu kasha ni, anhte ya e rai nga ga ai; hpang e anhte hpa tai na, garai n shadan dan nga ai. Dai hpe shadan dan ai shaloi, anhte Shi hte maren bung na ga ai lam hpe anhte chye nga ga ai; hpa majaw nga yang, Karai Kasang shi hkum nan nga nga ai hte maren, anhte shi hpe mu lu na ga ai. Ndai lam hpe myit mada ai masha yawng hte gaw, Hkristu Madu chyoi pra nga ai hte maren, tinang a hkum hpe shachyoi shapra ya ra ai.

Ya hti ai gaw, Karai Kasang a mungga rai nga ai.

KABU GARA SHIGA

Mahte 5:1-12

Ya hti na gaw, Mahte a laika hta na Kabu Gara Shiga rai nga ai.

Yesu gaw masha unawng uwa hpe mu jang, bum ntsa de lung wa ai; dai yang e shi dung nga yang, shi sape ni shi a makau de sit sa wa ma ai. Shaloi Yesu shanhte hpe sharin shaga let, tsun wu ai gaw: Myit masin hta matsan mayan ai ni gaw, ngwi pyaw nga ma ai; lamu mungdan gaw shanhte a mungdan rai nga malu ai. Myit sumnung ai ni gaw ngwi pyaw nga ma ai; shanhte mungkan ga hpe madu lu na mara ai. Yawn hkyen hkrum ai ni gaw ngwi pyaw nga ma ai; shanhte shalan shabran ai hkrum na mara ai. Dinghpring ai hte krawsi hpang gara ai ni gaw ngwi pyaw nga ma ai; shanhte gaw hkru kat wa na mara ai. Matsan dum chye ai ni gaw ngwi pyaw nga ma ai; shanhte matsan dum la ai hkrum na mara ai.

Myit san seng ai ni gaw ngwi pyaw nga ma ai; shanhte gaw Karai Kasang hpe mu lu na mara ai. Ngwi pyaw sim sa ai hpe shabyin ai ni gaw ngwi pyaw nga ma ai; shanhte hpe Karai a kasha ni ngu shamying na mara ai. Dingman ai lam a majaw, zingri zingrat hkrum ai ni gaw ngwi pyaw nga ma ai; lamu mungdan gaw shanhte a mungdan rai nga malu ai. Nye a amying majaw masha ni nanhte hpe asawng zingri zingrat di ai hte, n teng n man ai hku mara amyu myu shagun da ai shaloi, nanhte ngwi pyaw nga myit dai: lamu mungdan hta e nanhte a shabrai kumhpa kaba nga malit dai majaw, kabu gara nna, ngwi pyaw nga mu.

Ya hti ai gaw, Madu a Kabu Gara shiga rai nga ai.