AWM DAWM LU AI PRAT HPE MADU NGA GA AI KUN

Shawng de, grai sut su ai Sahti wa marai mi gaw shi a ja deng ga ni hpe shani shagu hti chyai nna sha nga ai da. Shi a n-ta htingnu makau e gaw, shanhpyi hkyepdin byeng chywi ai matsan masha marai mi nga nna shi gaw mahkawn hkawn let a pyaw sha nga nga ai. shi a mahkawn ai n sen gaw Sahti wa hpe masin pawt shangun nga ai. Lani mi hta, Sahti wa gaw dai matsan wa hpe ja deng ga loi mi jaw na myit lu nu ai. Shawng e gaw matsan ai wa mung grai kabu ai hte hkap la nna makoi da nu ai. Dai hpang marai rai mu mat nna la kau ya na tsang ai majaw shara htawt nna bai makoi da sai. Dai aten ni hta shi gaw mahkawn mung n lu mahkawn sai. Dai hpang, lani mi hta, shi gaw dai ja, deng ga ni a majaw shi mahkawn n lu mahkawn ai hpe dum la lu sai. Ja, deng ga ni hpe Sahti wa hpe bai jaw let, “na a rai ni hpe nang bai la nna, ngai a mahkawn mangwi ni hpe bai jaw rit” ngu sa tsun sai.

Sut su ai ni gaw wut shakum tsaw tsaw kum let shanhte hkum magawp maga ai raitim, matsan ai ni gaw hpa shakum mung n ra nga ai. Matsan ai ni gaw manam mung aloi sha hkap la nna, n ta hta shayup gwi ai. Sut su ai n ta de shang na matu gaw yak la ai hte shanhte a sut rai ni lagu la ya na, maza kau ya na, jahten kau ya na tsang ra nga ai. Tsun mayu ai gaw, sut su ai lam gaw anhte a awm dawm ahkaw ahkang hte ngwi pyaw lam hpe la kau ya chye ai.

Dai ni na kabu gara shiga hta mung, htani htana asak lu na matu hpa galaw ra na lam Madu Yesu hpe sa san ai shadang sha a lam lawm nga ai. Dai laika gaw, jep ai tara yawng hpe hkan shatup ai lam tsun shapraw sai majaw, Madu Yesu gaw lu malu hte hpe dut nna matsan ai ni hpe garan jaw u, dai hpang shi kaw hkan nang na ningdat nu ai. Shadang sha dai mung, Madu Yesu a ga hpe hta la na yak la ai majaw myit n pyaw let wa mat sai. Shingrai Yesu gaw, praw rai yu nna, shi a sape ni hpe, “sut su ai ni gaw, Karai Kasang a mungdan de shang na yak la nga a hka!” ngu nna tsun wu ai.

Maga mi hku nna tsun ga nga yang, matsan ai mung shaman chyeju lu la na matu ra kadawn ai lam n rai nga ai. Myit hta ra marin ai lam n nga ai matsan la wa gaw lu su nga na, shi a htingbu Sahti wa bai rai yang kaja wa matsan ai masha rai nga ai. Matsan ai ni rai timung, Karai Kasang hpang de gayin wa nna tinang hta grau ra kadawn nga ai htingbu wa hpe garum lu nga ai. Matsan mayan ai lam gaw Hkristan sari sadang tai wa sai. Kalang lang sut su ai ni tsun ai, “hpa majaw ngai a sut gan hpe garan ya lu na rai, ya na zawn sut su wa lu hkra ngai kade sha shakut kau sai, gam jaw ai rai yang shanhte hpe grau lagawn shangun ai lam she rai na re” nga nna tsun ai hpe mung na lu na re. Dai hpe bai n htang tsun lu na gaw, sut su nga mai ai lam ni yawng gaw, tinang a shakut shaja ai jaw e sha lu la ai mung n rai nga ai. Dai lam ni gaw masha ni hta grau grau akyu jan shangun nga ai.

Ndai hta tsun mayu ai gaw, tinang hta lu tawn da ai sut su lam n rai nga ai. Mun, sen, kahtap nna sut su ai rai tim dai hta nau n myit ai ni nga ai zawn, ja, deng ga loi mi sha lu tim manu mana myit ai ni nga chye nga ai. Sum mat, mat mat na sut gan n nga ai rai yang, myit ru yawn hkyen lam mung n nga na re. Lama na, anhte lu su ai lam (snr) mying gum hkawng ai hta myit machyu ai lam n nga yang gaw, anhte hpe machyi hkra galaw lu ai ni mung n nga na re.

Sawn sumru mai ai lam: wang lu wang lang rai nga lu na matu masha ni hpe gam jaw kau na yak la ai arung arai ngai lu ai kun?      

2018:PRANWAN LADAW LABAN (28) NA CHYUM LAIKA

PRAN WAN LADAW HTA LABAN 28

14th October 2018

CHYUM MUNGGA DAW 1

Hpaji Byeng-ya 7:7-11

Ya hti na gaw, Hpaji Byeng-ya a laika hta na rai nga ai.

Ngai akyu hpyi nga yang, myit su ai chyeju ngai hpe jaw ya ni ai; ngai hpyi nem ai shaloi hpaji byeng-ya a atsam marai nye a ntsa de yu hkrat wa sai. Up hkang ai sumdoi hte hkawhkam tingyang hta grau nna, ngai Hpaji Byeng-ya hpe ra sharawng nngai; dai hpe lu la jang, ja sutgan hpe hpa n nawn nngai. Dai hpaji myit hpe, manu dan dik ai lungseng hta grau nna manu shadan nngai; kaning rai nme law, ja mahkra gaw hpaji byeng-ya hte shabung yang gaw, zaibru latsup mi zawn sha rai nga ai; gumhpraw mung hkumpup hkumpa zawn sha rai nga ai. Hkam kaja ai hte hkum hkrang tsawm htap ai hta grau nna, Hpaji Byeng-ya hpe ngai tsaw ra nngai; de a htoi tu kabrim ai hpung shingkang galoi mung n wai mat ai majaw, nhtoi hta grau nna shi hpe ra sharawng nga nngai. Hpa Byeng-ya ngai hte rau nga yang, mai kaja ai baw hkum sumhpa ngai lu la nna, n dang hti hkra law la ai sutgan ni hpe, shi a lata na ngai hkam la ni ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Hebre 4:12-13

Ya hti na gaw, Hebre masha ni hpang de shagun dat ai laika hta na rai nga ai.

Karai Kasang a mungdan gaw hkrung nga ai hte, shabyin da lu nga ai: nshan lahkawng maga dai ai ntawng nhtu hta grau dai ai: myit masin hte wenyi hpe mung, nra hkrihkraw hte laswi hpe mung, dinghkren ginhka nna, kraw lawang na myit mang ai hte yaw shada ai lam ni hpe, jeyang hparan ya lu ai. Shi n mu lu hkra makoi da lu ai baw hpa mung n nga ai: yawng mayawng hte gaw shi a myi man e dan leng nga ai hte, asan brang lang rai nga ai rai nna, anhte shi a man e jahpan dan ra ga ai. 

Ya hti ai gaw, Karai Kasang a mungga rai nga ai.

KABU GARA SHIGA

Marku 10:17-30 (10: 17-27)

Ya hti na gaw, Marku a laika hta na Kabu Gara Shiga rai nga ai.

Yesu gaw rawt sa wa maw ai shaloi, masha langai mi gat sa nna, Shi a man e lahput hput di let, Mai kaja ai Sara e, n htum n wai ai asak a sali wunli lu hkra, ngai hpa galaw ra a ta? ngu nna Shi hpe san wu ai. Yesu gaw, Ngai hpe mai kaja ai nga nna, hpa rai tsun n ta? Karai Kasang hta kaga mai kaja ai kadai mung n nga ai. Jep ai tara hta: Masha hkum sat, Masha num hkum shaw, Hkum lagu, N teng n man ai sakse hkum hkam, Maw sha map sha hkum rai et, Nnu yan nwa hpe hkungga lara di u, nga ai ga hpe nang chye nga ndai, ngu nna shi hpe tsun wu ai. Dai wa gaw, Sara e, dai yawng mayawng hte hpe ma aprat kaw nna ngai hkan shatup se ai, ngu nna Yesu hpe tsun wu ai. Yesu gaw shi hpe n-gaw nja ai myit hte mada yu let, Lam langai mi nang naw ra nga ndai: Nang wa su, Lu malu hte dut kau nna, matsan mayan ni hpe karan jaw u; shng rai, sumsing lamu ntsa e nang sutgan lu na rit dai; ngai kaw mung sa hkan nang rit, ngu nna shi hpe tsun wu ai.

Dai wa mahtang Yesu a ga majaw myiman sum mat nna, myit yawn la ai hte bai wa mat ai: kaning rai nme law, shi sutgan law law lu ai wa rai nga ai.  Yesu gaw kayin yu nna, Shi a sape ni hpe, Sut su ai ni gaw Karai Kasang a mungdan hta shang na matu, nachying yak la a hka gaw! ngu nna tsun mu ai. Sape ni mahtang Shi a ga majaw mau mahka ma ai. Dai rai nna Yesu gaw, Ngai sha ni e, Karai Kasang a mungdan hta shang na gaw, nachying yak la a hka gaw! Lu su ai wa gaw, Karai Kasang a mungdan hta shang loi ai hta, gawla-u gaw samyit na hku gale na grau loi nga ai, ngu nna shanhte hpe bai htan wu ai. Shanhte mahtang n dang tsun hkra mau mat let, Dai rai yang, Kadai wa mi hkye hkrang la ai hkrum lu na a ta? nga nna shada da tsun ma ai. Yesu mahtang shanhte hpe mada yu nna, Dai amu hpe masha n galaw lu ti mung, Karai Kasang galaw lu nga ai; kaning rai nme law, Karai Kasang gaw yawng mayawng hpe dang galaw nga ai, ngu nna tsun mu ai.

(Grau galu ai hku hti mayu jang lawu na daw 4 hti ra ai.)

Marku 10:28-31

Petru gaw, Anhte mahkra hte hpe kau da nna, Nang kaw hkan nang saga ai; anhte gara hku rai na i? ngu nna Yesu hpe san wu ai. Yesu gaw, Nanhte hpe ngai teng teng tsun made ga, Nye a matu hte kabu gara shiga a matu mara, nta, kahpu kanau, kajan, kanu kawa, kashu kasha the yi hkauna hte hpe kau da ai wa kadai raitimung, zingri zingrat hkrum ai hte hpawn, ndai prat hta e nta, kahpu kanau, kajan, kanu kawa, kashu kasha hte, yi hkauna hte hpe htam latsa n lu la na kadai n nga ai: htawm na prat e n htum n wai asak lu la na ra ai, ngu nna sape ni hpe tsun mu ai.

Ya hti ai gaw, Madu a Kabu Gara Shiga rai nga ai.

TSAWRA MYIT HTE SHA

“Tsawra myit hte sadi dung ai lam gaw ngwi pyaw ngang grin ai kun dinghku prat a matu ra ahkyak ai lam ni rai nga ai”

Jau marai mi gaw lai wa sai shaning loi mi hta shi hkungran da ya ai dinghku la marai mi hte bai hkrum zup ai. Shan lahkawng gaw hkrum zup lu ai majaw grai kabu pyaw ma ai. “zeng rai nga ai kun?” jau gaw san yu sai. “Grai kaja ai, ngai ya Company kaba langai mi kaw bungli mung lu da sai” nga htan ai. “Na a nta madu jan hte ma ni gaw taw?” ngu jau shi san yang, “dai gaw mang hkang rai nga ai, lai wa sai sanit ning daram hta an lahkawng hka bra mat saga ai” ngu myit n pyaw ai hte tsun dan sai. “Raitim, ma ni hpe gaw rau yang sa yu yu rai ai le” nga nna dinghku la dai tsun wa sai. Hpang e, jau shi chye la lu ai gaw, dinghku la dai kaga num langai mi hte bai nga taw sai da. Ndai zawn mabyin ni langai sha nrai, hka bra nga ai dinghku law law a lam mung rai nga ai. 

Kabu gara shiga hta, Madu gaw hkungran ta matut ai hta agrin nga na hte jahka kau n mai ai lam ja ja tsun lai wa sai. Dai gaw, mara kata ma kasha ni hte uhpung uhpawng hpe dinghku hka bra ai marang e, machyi hkra shangun ai a majaw rai nga ai. Npawt nhpang laika hta tsun shapraw da ai, “lamu ga nnan lat kaw nna, lasha hte numsha yan hpe shi hpan da nu ai. De a majaw lasha gaw kanu kawa hpe kau da nna, shan lahkawng gaw hkum shan langai sha tai lu na mara ai. Shing rai shan gaw, lahkawng rai nga ma ai n rai, hkum shan langai sha rai nga ma ai”, ngu ai hpe Madu Yesu gaw la kap nna tsun dan ai marang e, hkungran num yan la hpe jahka ai, jahten ai lam yawng hpe ninghkap ai moi na sharin shaga ai hpe chye shangun sai. Num/la shaw ai lam gaw hkungran num yan la a manoi nga ai hpe jahten sharun ya ai majaw shut ai lam rai nga ai. Grau nna, lama wa num hte la, shan yan ra sharawng ai kaga marai rai hte hkum shan kanawn mazum ai rai yang, manawn masham myit, n-ju n-dawng myit, lit n la ai lam ni gaw, gin lum da ya ai makyit sumri hpe dan di kau ya ai rai sai. Teng sha tsun ga nga yang, hkum tsup dik ai hkungran ai lam n nga lu ai. Hpa majaw nga yang, hkum tsup dik ai ngu ai num/ la n nga ai majaw re. Raitim, hkungran ta matut ai lam gaw Karai Kasang a tsaw dik myit yaw shada da ai lam rai nga ai. Dai hkungran ai lam hta, hkrat sum ai lam, manghkang, ga sadi run ai lam ni hpe gaw koi kau n mai na re. Raitim, tsawra matut manoi nga ai rai yang, ru yak manghkang, n bung laru kade ja ai raitim, prat gaw a grin nga lu na re. Tsawra myit gaw hkungran ai lam a npawt nhpang rai nga ai. 

Raitim, teng man ai, sung grin ai tsawra myit gaw kalang ta byin pru wa ai n rai nga ai. Dai gaw manghkang ni, gawng kya ai lam ni a lapran kaw nna tut pru wa hkra galaw la ra ai rai nga ai. Machyi hkrum ai (snr) ningma kaba lu la ai nga yang, jet ai yawn hkyen lam hte bai shamai la na ra ahkyak nga ai. Ningma hkang grai law wa ai rai yang, kanawn mazum lam a tsawm htap ai hpe jahten kau ya na rai nga ai. Marai rai hpe kaja wa sung sung tsawra ai nga ai hta myit masin kaba hte “ngai shut sai, tawngban ai” ngu tsun let kaja wa myit malai na ra ai zawn, shut hpyit ai ningrum ningtau wa hpe mung mara raw ya lu ai atsam nga na ra nga ai. Dai hta e, yak hkak ai lam nga nga ai. “Sadi n dung ai madu wa hpe kaning rai mara raw ya lu na, ngai gaw mana n re ai”. Madu wa mung tsun na re, “myit gasup ai madu jan hte ngai kaning rai nna rau nga lu sana rai? Ndai ni gaw yawn hpa mabyin ni rai nna, Hkristan sharin shaga ai hte rai yang, tsi hka lu ra ai aten ni nan rai nga ai. Rai timung, kangka sadi dung ai a matu akyu nga nga ai. Dai gaw mayak manghkang ni hkrum wa ai kun dinghku prat hpe tsi shamai ya lu ai. Dinghku shang sai ni hte shadang sha, shayi sha ni yawng hpe tsawra myit hte sadi dung ai lam gaw ngwi pyaw ngang grin ai lam dinghku prat hta ra ahkyak ai lam dai ni na kabu gara shiga gaw shadum ya nga ai. 

Sawn sumru yu mai ai lam: 

Dinghku num hte la ni; Ningrum ningtau tai nga ai an yan a n-gun lu hpa kaja ai lam ni hte gawng kya ai lam ni gaw hpa wa mi rai nga ai kun?

Dinghku shang na hkyen nga ai ni; kun dinghku prat hta hkrum katut na ruyak jam jau ai lam ni hpe an a shada tsawra ai myit gaw hkam sharang, ngang kang lu na rai kun?

2018:PRANWAN LADAW LABAN (27) NA CHYUM LAIKA

PRAN WAN LADAW HTA LABAN 27

7th October 2018

CHYUM MUNGGA DAW 1

Npawt Nhpang 2:18-24

Ya hti na gaw, Npawt Nhpang laika hta na rai nga ai.

Madu Karai Kasang gaw, Lasha gaw shi hkrai nga na n mai ai; shi a amyu na nrum ntau shi a matu Ngai galaw na we ai, nga ai. Shaloi Madu Karai Kasang gaw nam mali na ashu ashan mahkra hpe mung, ntsa malen pyen ai u mahkra hpe mung ga hte shachyaw wu ai rai nna, dai ni hpe kaning ngu shamying na chye lu hkra, dai masha wa hpang de woi sa wu ai. Dai masha wa mung nsoi nsa rawng ai baw yawng hte hpe amying shingteng jaw wu ai hte maren, tinang nang e shingteng amying lu ma ai. Shaloi dai masha wa gaw yam nga mahkra hpe mung, ntsa malen pyen ai u mahkra hpe mung, nam mali na du sat nhprang mahkra hpe mung, amying shingteng jaw wu ai; rai timung, dai masha wa a amyu na nrum ntau garai n nga lu ai.

Dai majaw Madu Karai Kasang gaw dai masha wa hpe yup kaba hte shayup wu ai rai nna, shi yup pyaw nga yang, shi a garep nra langai mi shaw la nna, dai shara hta ashan hte shatup ya wu ai. Dai hpang Madu Karai Kasang gaw dai masha wa hta na shaw la ai garep nra hte shinggyim numsha hpe shachyaw wu ai rai nna, masha wa kaw woi wa ya wu ai. Dai masha wa gaw, Ya, masha ndai gaw, nye a nra hta na nra, nye a ashan hta na ashan rai nga ai: dai majaw shi hpe numsha ngu na rai nga ai; kaning rai nme law, shi gaw lasha hta na shaw la ai rai nga ai, nga ai. Dai re ai majaw, lasha gaw shi a kanu kawa hpe kau da nhtawm, shi a madu jan hta manoi nga na rai nna, shan lahkawng hkum shan langai sha tai lu na mara ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Hebre 2: 9-11

Ya hti na gaw, Hebre masha ni hpang de shagun dat ai laika hta na rai nga ai.

Madu Yesu gaw, Karai Kasang myit ra ai hte maren, masha yawng mayawng a matu si hkam u ga, tawng marang mi sha lamu kasa ni hta shagrit kau ai hkrum wu ai; ya e chyawm gaw, si hkrung si htan a nni nkri hpe hkam la wu ai majaw, hpun shingkang arawng sadang dagraw hkam la nu ai. Yawng mayawng a ntsa e up nna yawng a npawt rai nga ai Karai Kasang gaw, kashu kasha law law hpe hpung shingkang de woi wa yang, dai hkye hkrang la ai lam hta masha ni hpe woi ningshawng ai wa hpe, nni nkri hte jahkum shatsup na gaw, htap htuk nga ai. Shing rai, shachyoi shapra ya ai wa hte, shachyoi shapra hkrum ai ni gaw, amyu langai sha hta rum nga ma ai majaw, shanhte hpe hpu nau ni ngu nna, shi n kaya ai sha tsun nga ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 10:2-16 (10:2-12)

Ya hti na gaw, Marku a laika hta na Kabu Gara Shiga rai nga ai.

Hparishe masha nkau mi sa du nna, Yesu hpe chyam let, Masha gaw tinang a madu jan hpe jahka kau na, mai nga a ni? ngu nna san mu ai. Yesu gaw, Mawshe nanhte hpe kaning nga hkang da a ta? ngu nna htan wu ai. Shanhte gaw, Jahka ai laika ka da nna, tinang a madu jan hpe shabawn kau na ahkang Mawshe jaw da sai, ngu mu ai. Yesu gaw, Nanhte a myit ja malit dai majaw, Mawshe nanhte a matu dai tara tawn da nu ai. Rai ti mung, shawng npawt e, masha hpe hpan da ai shaloi, Karai Kasang gaw numsha hte lasha yan hpe hpan da mu ai. De a majaw, lasha gaw kanu kawa hpe kau da nna, shan lahkawng gaw hkum shan langai sha tai lu na mara ai. Shing rai shan gaw, lahkawng rai nga ma ai n rai, hkum shan langai sha rai nga ma ai. Dai rai nna, Karai Kasang matut da nu ai hpe, masha gaw jahka kau lu na n rai, ngu nna tsun mu ai. Shanhte nta nhku de nga yang, sape ni ndai lam Yesu hpe bai san mu ai. Shaloi Yesu gaw, Tinang a madu jan hpe jahka kau nhtawm, num kaga hpe hkungran la ai wa kadai mung, shi a madu jan hpe shut nna num shaw ai wa tai nga ai. Numsha mung shi a madu wa hte hka mat nna, la kaga kaw num wa jang, la shaw ai amu galaw nga ai, ngu nna sape ni hpe tsun mu ai. 

(Marku 10:13-16)

Masha ni mung shanhte a ma kaji ni hpe shaman ya u ga nga nna, Yesu hpang de shanhte hpe woi sa ma ai: sape ni mahtang shanhte hpe daru kau mu ai. Yesu dai hpe mu jang, n yu ra ai rai nna, Ma ni hpe ngai hpang de sa shangun maru; shanhte hpe hkum shadang mu; kaning rai nme law, Karai Kasang a mungdan gaw dai zawn re ai ni a mungdan rai nga ai. Nanhte hpe ngai teng teng tsun made ga: Karai Kasang a mungdan hpe mai kaji zawn n hkap la ai wa kadai rai ti mung, dai hta e kaja wa n shang lu na ra ai, ngu nna shanhte hpe tsun mu ai. Shaloi Yesu gaw dai ma kaji ni hpe pawn la nna, shanhte a ntsa e lata mara ya let shaman ya mu ai.

Ya hti ai gaw, Madu a Kabu Gara Shiga rai nga ai.

2018:PRANWAN LADAW LABAN (26) NA MUNGGA

Hkyik hkam ai amu magam ni gaw kaji kajaw re ai kaw nna npawt hpang ai ngu ai hpe nmai malap na re. Kaji ai amu bungli ni hta pyi nkang ka ai masha gaw amu bungli kaba ni hta kangka na matu gaw nmai byin nga ai. 

Dai ni na kabu gara shinga hta Madu Yesu tsun ai hta na Shi a hpang hkan nang ai wa hpe hka gawm mi jaw ya ai wa gaw shaman chyeju teng sha lu na re hpe na la lu ga ai. Hka gawm mi gaw nra ai wa a matu, hka ntaw ntsang lu ai wa matu gaw manu jahpu nnga ai daram raitim mung, hka hpang gara ai wa a matu gaw manu dan dik ai, ahkyak dik htum rai nga ai.

Tinang a htingbu wa hpe garum shingtau ai lam ni hta myit masin kaja bang tawn da lu nna manang wa a ra kadawng ai lam ni hta kaji ai amu bungli kaw hpang nna kaba ai amu bungli ni hta shang lawm lu na matu shakut shaja sa wa lu u ga.

TENGMAN AI LAM HTA TSAP NA GA AI KUN?

San Thomas More a lam na la na re. Thomas gaw Oxford dakkasu hta hpaji sharin la nna jan mau lu la ai hpang, mung shawa uphkang rung hta amu shang galaw sai. Shi gaw magam gun ai hta grai lawan ai hte reng rawt lung wa sai. 1529 ning, Henry hkawhkam VIII gaw shi hpe England mung dan a Hkring mang daju aya hte shagrau da sai. Dai hpang myit n pyaw hpa tsin yam Thomas More a prat hta byin wa sai.

Hkawhkam Henry VIII shi a hkawhkam jan hpe jahka kau nna tara n shang ai kalang mi bai num langai mi hpe hkungran la sai. Shi a hkungran ai lam hpe ninghkap ai ni nga ai majaw, hkawhkam wa gaw arawng aya lu ai du kaba ni hpe shi a bai hkungran ai lam gaw tara shang ai, ngu ai gashaka laika hta dagam nna ta masat mahkret shangun sai.  Lama na dai laika hta ta masat ka na ningdang ai du kaba ni gaw mungdan hpe gumle gumlau di ai ni re ngu masat nna rim na lam Henry Hkawhkam wa ga shana dat sai. 

Thomas More hpang de gashaka laika hpai sa ai wa gaw Lord Norfolk rai nga ai. Kade daram tsun shanem yu ai rai tim, Thomas More myit galai ai lam n nga, ta masat mahkret na ning dang kau sai. Hpang jahtum gaw Lord Norfolk wa mung myit htum wa ai hte shi manang Thomas hpe “n dai hkungran ai lam tara shang/ n shang ngai mung n chye ai, rai tim Thomas e, nang kaw lata masat ka da ai ni a mying hpe yu yu u, nang shanhte hpe chye nga ai le, anhte galaw ai zawn nang n lu galaw ai kun? Hku hkau kanawn mazum lam a matu le” nga nna tsun sai. Thomas More gaw shi a kraw kata hta chye taw nga ai, shut ai lam hpe n dagam lu ai hte ta masat lekmat ka na ningdang kau sai. Dai hpang Thomas More gaw rim hkrum sai hte, 1535 ning July 6 ya shani sat kau hkrum sai. 

Dai ni na kabu gara shiga hta, anhte a lagaw, lata, myi ni hpe kahtam dut kau, malawk kau na Madu Yesu gaw kaja wa n tsun nga ai. Madu Yesu gaw, shi a prat na masha ni chye na lu hkra tsun ai sha rai nga nna, sak jaw ap nawng ai lam galaw let, shut hpyit mara hpe koi yen kau nna Karai Kasang a mungdan de du shang lu hkra shakut na matu shadum ai lam rai nga ai. Thomas More a mabyin hta raitim, tinang hkum hpe ap nawng kau ai, baw daw sat kau na raitim, ngangkang ai hte nga lai wa sai. Shi rim hkrum ai hpang e, shi a kasha hpang de laika ka da ai hta shi a myit kraw kata hta mung grai myit yak ai lam byin pru sai. 

Dai hta;

Tsawra ai sha Meg e,   

Ngai gawng kya ai hte manu mana hkrit kajawng nga ai ndai aten hta rai tim, Karai Kasang hpe kam shut na lam gaw n nga na re. N bung laru hpe mu jang kamsham myit kya wa ai hte hka de lup wa ai kasa Petru, Madu Yesu hpe bai shaga ai hte shi a lata hte bai dun sharawt la ya ai hpe myit dum nna, ngai mung Hkristu a garum shingtau la na hpe kam sham let hpyi nem nga nngai. Dai re majaw tsawra dik ai she e, Ah Wa hta byin wa na re ai lam ni a majaw ngai sha a myit hta ru yak ai lam n byin nu ga. Karai Kasang myit ra ai hta kaga hpa mug n byin lu ai. Hpa mi byin ai raitim, kade n kaja ai mi zawn raitim, teng sha kaja dik ai lam re ngu Ah Wa hkap la nngai. 

Tsawra ai Wa, Thomas More,

Dai ni na kabu gara shiga gaw ndai gasan ni tinang hkum hpe san na matu saw shaga nga ai. Shut hpyit mara de woi sa wa ai agung alau lam ni hpe tawt lai lu na ngai kade wa n-gun ja nga ta? Kade daram yak hkak, jahkrit shama ai raitim, tinang a tengman ai kamsham myit a n tsa ngang ngang tsap lu na ngai n-gun rawng nga ai kun? Karai Kasang a mungdan a matu ngai hta na manu dan dik ai lam hpe asum hkam na ngai ra sharawng nga ai kun?

2018:PRANWAN LADAW LABAN (26) NA CHYUM LAIKA

PRAN WAN LADAW HTA LABAN 26

30th September 2018

CHYUM MUNGGA DAW 1

Bu Hkawm 11:25-29

Ya hti na gaw, Buhkawm laika hta na rai nga ai.

(Mawshe gaw amyu masha ni a agyi salang sanit shi hte hpe jahpawng la nna, Shawa Ginsum a grup e tsap shangun wu ai.) Madu gaw sumwi hte yu wa nna, Mawshe hta rawng ai atsam marai hta na la nhtawm, agyi salang sanit shi a ntsa de mara ya wu ai. Dai atsam marai shanhte a ntsa de yu hkrat wa jang, myihtoi htoi ma ai; dai kaw nna myihtoi bai n htoi lu ma ai. Dai salang hpung hta lawm ai, Eldad hte Medad mying ai marai lahkawng gaw, jahpan hta lawm ti mung, Ginsum de n sa ai sha dap e nga nga ma ai. Dai salang yan a ntsa de mung dai atsam marai yu hkrat wa nna, shan gaw dap kata e myihtoi htoi ma ai. Shaloi shabrang langai mi gat sa nna, Eldad yan Medad gaw dap kata e myihtoi htoi nga ma ai, nga nna Mawshe hpe tsun dan wu ai. Dai rai nna, shabrang apart kaw nna Mawshe a hkringmang tai ai, Nun a kasha Yawshu gaw, Nye a Madu, Mawshe e, shan hpe jahkring kau u, ngu nna Mawshe hpe tsun wu ai. Mawshe chyawm gaw, Nye a matu nang manawn nga nni? Madu a amyu masha yawng the gaw, myihtoi hkrai rai nga mu ga; Madu gaw shi a atsam marai hpe shanhte yawng a ntsa de mara jaw ya u ga law, ngu nna tsun wu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Yaku 5:1-6

Ya hti na gaw, Kasa Yaku shagun dat ai laika hta na rai nga ai.

Sut su ai ni e, ngai nanhte hpe tsun ai ga hpe madat mara la mu: Nanhte a ntsa e du magang ra ai tsinyam majaw, hkrap shabam nga mu. Nanhte a sutgan mahkra yat mat wa nna, nanhte a hpun nba hpe manut e sha kau ma nu ai. Nanhte a ja hte gumhpraw hta pyi, nhkan jung nga ai; dai nhkan mung nanhte a mara a lam sakse hkam ya ai hte, nanhte a hkum shan hpe sha kau na ra ai. Shing rai, hpang jahtum na nhtoi ni a matu, wan grung ai zawn re ai sutgan hpe nanhte mahkawng da manit dai. Yu mu, nanhte a yi hkauna ni hpe dan shagun nhtawm, bungli galaw ai ni a shabrai hpe nanhte hkalem sha kau manit dai; dai ni a shabrai gaw jahtau nga ai hpe mada la mu; mam dan ai ni a garu ai nsen mung, zawnawng zawwa up ai Madu a na hta e hkrang shang wa sai hpe dum chye mu. Nanhte gaw ga ntsa e n dut n dang ai hku lu sha nna, pyaw daw hkrai kadaw myit dai; sat ai shani du ni ti mung, dusat dumyeng zawn, nanhte a myit dik hkra lu sha manit dai. Ding hpring ai ni hpe mung nanhte daw dan nna sat kau manu ai; shanhte gaw nanhte hpe hkum shingdang lu sai n rai.

Ya hti ai gaw, Karai Kasang a mungga rai nga ai.

KABU GARA SHIGA

Marku 9:38-43. 45. 47-48

Ya hti na gaw, Marku a laika hta na Kabu Gara Shiga rai nga ai.

Sape Yawhan gaw Yesu hpe, Sara e, anhte kaw n hkan nang ai masha langai mi na a amying hte nat shaden kau ai hpe anhte mu hkrup saga ai, rai ti mung, anhte kaw n hkan nang ai majaw, shi hpe hkum kau ga ai, ngu nna tsun wu ai. Yesu mahtang, Shi hpe hkum hkum kau mu: nye a amying hte lamik kumka galaw ai wa gaw, nye a lam hpe n kaja ai hte shatan kau na n rai. Anhte a gumlau maga e n nga ai wa gaw, anhte a hpang maga nga ai wa rai nga ai. Nanhte hpe ngai teng teng tsun made ai gaw: Hkristu kaw hkan nang ai sape ni rai nga myit dai, nga nna nanhte hpe ntsin htinggap mi jaw ai wa kadai mung, shi a shabrai hpe n lu la na n rai.

Lam mi gaw, Ndai kam sham nga ai ma kaji ni hta na langai mi hpe, myit kataw shangun ai wa kadai rai ti mung, shi a du hta htumrin kaba noi nna, nawng hta kabai bang kau na gaw, shi a matu grau nna mai nga ai, na a lata nang hpe mara galaw shangun yang gaw dai hpe kahtam di kau u: lata lahkawng hkum ai hte ngarai mung na n si n krip ai wan de shang na hta, lata hten ai hte asak hkrung ai de shang na gaw grau mai nga ai. Na a lagaw nang hpe mara galaw shangun yang gaw, dai hpe kahtam di kau u; lagaw lahkawng hkum nga ai hte, ngarai mung de jahkrat kau ai hkrum na hta, lagaw hten ai hte asak hkrung ai de shang na gaw, grau mai nga ai. Na a myi nang hpe mara galaw shangun yang gaw, dai hpe malawk kau u; myi lahkawng maga hkum ai hte, byet n si nna wan mung n si n krip ai, ngarai mung de jahkrat kau ai hkrum na hta, myi maga sha nga ai hte, Karai Kasang a mungdan de nang shang na gaw, grau mai nga ai.

Ya hti ai gaw, Madu a Kabu Gara Shiga rai nga ai.

2018:PRANWAN LADAW LABAN (25) NA MUNGGA

Mai kaja ai mahkra hte hpring tsup ai Karai Kasang a yaw shada, ra sharawng ai gaw anhte shinggyim masha ni a rasharawng ai hte shai chye nga ai. Shinggyim masha ni a myit gyip ai majaw dam lada ai hku mu chye na matu yak hkak nga ai.

Karai Kasang a man e kaba dik htum ai masha gaw shinggyim masha a man hta kaji kadun ai zawn re ai ni rai nga ai. Myit shagrit shanem chye ai, manang wa hpe tsawra myit madun chye ai, manang wa a akyu ara a matu sakjaw ap nawng chye ai wa gaw Karai Kasang a man hte kaba dik ai ni rai nga ai. Hpa majaw nga yang Karai Kasang a man e kaba dik htum ai ngu ai hpe tinang masat la, tam la nmai nga ai. Bai nna kaba dik htum ai byin hkra nga nna yaw shada let nmai shakut la nga ai.

Anhte a asak aprat hta kaji dik htum ai ni hpe garum shing tau let Karai Kasang hpe kam sham daw jau let Karai Kasang man hta kaba dik htum ai ni byin tai lu u ga.

GRAU HTUM AI WA

“Karai Kasang a mungdan hta kaba htum ai ngu na ni gaw ma kaji ni rai nga ai”

Kalang mi hta grai sut su ai hte masha ni hpe mung grai garum tsawra chye ai masha langai mi nga ai. Shi gaw, shi a mani shapyaw chye ai, kaja ai kasi hte shawang tsawra myit kaba a majaw mying dan hkung ai wa rai nga ai. Masha ni myit ru yawn hkyen hkrum ai aten shi kaw sa nna myit shapyaw la lu ma ai. Shi gaw kaja ai hku sha mu mada chye ai ngu masha ni hkap la ma ai. Lani mi akajawng sha shi si mat ai majaw, hku hkau chye ai masha ni mau mat ma ai. Bai nna, masha ni n ju nna sat kau ai kun, hpa majaw si wa ai rai kun? Shadu ai lam law law nga nga sai. Dai aten, shi hpa majaw si mat ai hpe daw dan la lu nna shana dat ai majaw masha ni grau mau mat sai. Shi hkum shi sat si ai da!

Na ai hte, masha ni n kam lu ma ai. Dai daram, chye pyaw ai masha wa kaning rai hkum nan sat si mat ai kun? Raitim, hpang de chye la lu ai gaw, shi gaw loi mi pyi pyaw lu ai masha n rai ai da. Shi masha ni hpe mani pyaw hkra galaw ai gaw, shi a kraw kata hta nga ai garen gari lam, myit machyi ai ni hpe magap makoi da lu na matu rai nga ai. Shi gaw manu mana myit yawn hkyen nna, n kaja ai ningmu hte sha yu ai wa mung re da. Raitim, shi gaw kung zet ai wa re ngu madun lu na matu mani pyaw hpa tsun jahta let shakut lai wa sai. Shi naw kaji nga yang, pyaw pyaw sha rai nga chye ai wa rai nna dai zawn rai n nga yang masha ni shi hpe myit htum myit daw mat na hpe mung hkrit nga ai majaw a pyaw sha rai nga dan lai wa sai.

Myit pyaw lu na matu hka hpung yawt ai wa gaw hkrit nna rai rai, masha ni mu mada u ga ngu nna rai rai, n-gun atsam kaba dat let hpung yawt shakut sai. Anhte law law wa dai zawn rai chye nga ai. Grau nna chye chyang, kung zet ai wa gaw hka de amai sha yu wa nna grau kaja ai hku hpung yawt ai wa byin tai lu na re. Dai majaw, anhte hkum hpe ap tawn da let shakut sa wa na ra ahkyak nga ai. Ndai mungkan ga a n-gun atsam gaw shagyeng shama nna lu ma ai. Tinang hkum nan n-gun dat, ja gumhpraw ma hkam, kaga masa ni hku nna dip da lu jang she, masha (snr) masa lam lama ma gaw tinang myit ra ai zawn rai wa na re.

Dai zawn re ai hpe, jawngma n kau mi manang wa hpe aroi ara di ya ai jawng wang hta, daru magam grai lang ai kanu kawa nga ai nta hta, hpung woi ningbaw ni hpung masha ni hpe grai dip da ai shaloi, sut masa galaw shakut ai ni a lapran, mungdan shada htingrai htingrat tsun shaga ai ten ni hta mu lu na re.

Sape ni shanhte shada, gadai wa grau dik rai na kun nga tsun jahta ai hpe Yesu chye ai lam dai ni na kabu gara shiga hta lawm nga ai. N-gun atsam rawng dik kadai rai? Madu Yesu gaw ma kaji langai mi hpe shaga la nna, shanhte a kaang e shatsap tawn n htawm, dai ma hpe pawn la let, “Makaji ni hta na ndai zawn re ai ma marai mi hpe, nye a mying majaw hkap la ai wa kadai mung ngai hpe hkap la nga ai”, ngu tsun wu ai. Karai Kasang a mung dan hta kaba htum ai ngu na wa gaw dai zawn rai san seng ai ma kaji rai nga ai. Ma kaji ni hta shanhte shada n ju n dawng rai na, mying kaba gum rawng shangun na hpa degree, sut su ai lam, awng dang ai lam n nga nga ai. Anhte hpe ging hka ya ai lam lama ma hpe galoi mung a tam nga chye nga ai. Raitim, anhte hta nga ai garen gari lam hte hkrit kajawng ai lam ni hpe hkap la ai rai yang, zin lum ai lam hpe tam na mai nga ai. Anhte hkrit kajawng ai rai yang, n-gun atsam, daru magam hpe tam chye nna, shada madat mara ai lam n nga mat sai. Raitim, anhte kaja wa madat la ai rai yang, yawng a kraw kata hta rawng ai, hkrit kajawng ja ai lam hpe mu tam na re. Ma kaji ni gaw ga shaga n chye shi ai ten rai tim, masha ni hte matut mahkai na myit rawng nga nna, machyi la hkrum ai rai tim, lawan bai shalan shabran la chye nga ai. Shanhte gaw, tinang hkum maga la na, (snr) mayam byin nga na matu, sut su ai lam, daru magam, arawng sadang, lit magam, hkrang sumla hpa mung n lu nga ai.

Sawn sumru mai ai lam: Ngai a sak hkrung nga sa lam (snr) masha kaga hte kanawn mazum lam ni hta ngai a arawng sadang (snr) hpa arawng aya mung n nga ai hpe jai lang nga ai kun?

2018:PRANWAN LADAW LABAN (25) NA CHYUM LAIKA

PRAN WAN LADAW HTA LABAN 25

23rd September 2018

CHYUM MUNGGA DAW 1

Hpaji Byeng-ya 2:12,17-20

Ya hti na gaw, Hpaji Byeng-ya laika hta na rai nga ai.

Tara n lang ai ni gaw, tinang a kraw lawang hta ning nga ma ai. Ding hpring ai wa gaw anhte hpe sharu shatsang ai hte, anhte a lam hpe ningdang kau ai majaw, shi hpe shinggrup nna htim ga. Anhte a tawt lai ai amu a majaw, shi anhte hpe daru shadum nna, ji woi ni a matsun maroi lam ni hpe n hkan shatup ai majaw, shi anhte a ntsa de mara shangun da nga ai. Ding hpring ai wa tsun ai ga tengman rai nga ai kun, naw yu yu ga; shi hta nan gara hku byin wa na hpe anhte la yu ga. kaning rai nme law, ding hpring ai wa gaw Karai Kasang a kasha rai yang gaw, dai Madu shi hpe maga nna, shi a hpyen ni a lata hta na shi hpe hkye mawai la na ra ai. Dai rai nna, shi hpe zingri nna, nni nkri jaw ai hku shi hpe chyam yu ga. Shingrai, shi a sumnung shingdi ai hte shakut sharang ai myit, gade wa galu kaba nga ai hpe anhte chye lu na ga ai.  Dai ding hpring ai wa hpe kaya kahpa re ai hku anhte sat kau ga; kaning rai nme law, shi nan tsun sai hte maren, lam shagu hta e Karai Kasang shi hpe makawp maga la na ra ai, nga nna n hkru ai ni tinang a kraw hta e tsun nga ma ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Yaku 3:16- 4:3

Ya hti na gaw, kasa Yaku shagun dat ai laika hta na rai nga ai.

Hpu nau ni e, ladu lai ai hku manawn masham ai hte, arawng sadang ra marit ai lam nga yang, kashuk kashak hte, n hkru n kaja ai amu amyu amyu byin pru nga ai. Ntsa de na hpaji byeng-ya chyawm gaw, shawng e san pra san seng rai nga ai; dai hpang e, htinglu htinglai ya chye ai, sumnung shingdi ai hte, manang wa a akyu hpe tam nga ai; matsan dum la ai myit rawng nga nna, mai kaja ai amu amyu myu hpe hkan galaw nga ai; dai gaw, myiman n lata ai hte hpyi hpun n chye ai hpaji byeng-ya rai nga ai. Ngwi pyaw simsa ai hpe shabyin ai ni gaw, sumnung shingdi ai nli gat hkai da nna, dai hta na ding hpring chyoi pra ai asi law law si pru na ra ai. Nanhte hta e ga li ga law ai hte, dangrang hkat ai lam ni kanang na pru wa ma ta? Nanhte a daw shan ni hta e gasat nga ai, marin marit ai hte maren, n lu la ai majaw, sat kau na jin jin rai nga myit dai. Nanhte hta manawn ai myit n shadik lu ai majaw, kashun la na matu, ga law ai hte gasat nga myit dai. Nanhte akyu n hpyi ai majaw, ra ai hte maren n lu la myit dai. Nanhte hpyi timung, nanhte a pyaw daw lam ni hpe grau nna hkan lu na matu, n htap n htuk ai hte n ang ai hpe hpyi nga ai majaw, n lu la myit dai.

Ya hti ai gaw, Karai Kasang a mungga rai nga ai.

KABU GARA SHIGA

Marku 9:30-37

Ya hti na gaw, Marku a laika hta na Kabu Gara Shiga rai nga ai.

Yesu hte shi a sape ni dai bum de nna yu wa ai hpang, Galile mung hku lai sa wa ai; rai timung, shi a sape ni hpe sharin achyin ya nga ai majaw, shi lai sa wa ai hpe kadai mung n chye la u ga, shi ra nga ai. Yesu shi a sape ni hpe, Masha Kasha gaw masha ni a lata de ap kau ai hkrum nna, shanhte shi hpe sat kau na mara ai hte, sat kau ai hpang  masum ya nhtoi hta shi bai hkrung rawt na ra ai, ngu nna tsun dan mu ai. Shanhte mahtang dai ga hpe n chye na timung, shi hpe san na hkrit nga ma ai. Dai hpang shanhte Kaperna-um de du ma ai. Nta nhku de rawng nga yang, Yesu shanhte hpe, Nanhte lam hkan e, hpa lam tsun hkat nga myit ta? ngu nna san mu ai.

Sape ni mahtang atsinsha nga ma ai; kaning rai nme law, Grau kaba ai wa kadai mahtang rai kun? nga nna lam hkan e tsun hkat masai. Shaloi Yesu dung nna, sape shi lahkawng hte hpe shaga la nhtawm shanhte hpe, Grau mayu ai wa kadai rai ti mung, yawng a hpang na wa hte, yawng a ali ama tai wa na ra ai, ngu nna tsun mu ai. Bai, ma kaji langai mi hpe Shi shaga la nna, sape ni a ka-ang e shatsap tawn wu ai; dai ma hpe magra let Yesu shanhte hpe, Ndai zawn re ai ma kaji langai mi hpe, nye a amying majaw hkap la ai wa kadai mung, ngai hpe hkap la ai sha n rai, ngai hpe shangun dat ai wa hpe she hkap la ai rai nga ai.

Ya hti ai gaw, Madu a Kabu Gara Shiga rai nga ai.