PU BA AI LAM NI GRAI LAW WA SAI KUN?

Yesu gaw anhte hpe san san rai nga nna akyu hpyi na hte prat hta ra kadawn ai matsun lam ni hpe tam lu na saw shaga nga ai.”

Mary gaw grai shakut myit tawn ai num rai nna laika hpaji lam hta jan mau 2, M.A 2 hte PhD mung lu da sai. Company langai mi hta mung ten tup bungli shang galaw nga ai num re. Shi a lahkawng ngu na PhD hpe lu na shakut wa ai aten hta gaw, bungli hte laika a majaw, pu ba ai lam ni grai law wa sai. Mani hpa tsun chyai na mung n dum sai. Shi gaw grai pawt ja wa sai. Myi lu lu rai n-ju ai myiman man wa sai. Hpang jahtum gaw shi a sara kaba dingla wa shi hpe rung gawk de shaga nna “Mary e, M.A hte PhD ni a majaw nang hki ba la nga ai. Asan sha re, na hkum nang dai hpaji jan mau ni hte sat la taw nga ai” ngu nu ai.

Dai sara kaba a hpaji jaw ai lam gaw dai ni hti ai kabu gara shiga hta Yesu shi a Sape ni hpe tsun ai ga hte mung bung nga ai. Shanhte hpe lahkawng yep yep rai shangun dat ai hpang Sape ni bai n htang wa let ‘galaw sai lam n lang hte hte, sharin shaga ya ai lam yawng’ Yesu hpe wa tsun dan nu ai. Sape ni gaw grai kyin ai majaw shat sha na aten pyi n mu da nu ai (31). Mi na sara kaba wa Mary hpe tsun ai zawn, ‘shanhte hkum hpe degree ni hte sat la taw nga ai’. Shanhte ban sa la na ra ai hpe Yesu dum chye ai majaw masha hte tsan ai de sa nna hkring sa na tsun sai. 

Kalang mi na jawngma ni a wutsauk hta laika ram ai jawngma gaw woi awn ai jau hpe, “Wajau e, anhte hpa rai hkring sa ra na rai, shawng de chyu sa na n rai i taw?” ngu wu ai. Dai gaw majan sum wa ai ten, hpa majaw htingnut na, shawng de she lung ga ngu nna tinang a du ni hpe tsun ai hpyen ma hte mung bung nga ai. Anhte hkum anhte kaja ai yaw shada lam hte lu lawm lam a majaw grai kyin chye nga ai. Anhte shawng de chyu hkawm sa mayu ai raitim kade sa na n chye ga ai. Yesu lu ai Sasana magam hta jan na ahkyak ai bungli gadai mung n lu ga ai. Dai hta Madu gaw, dai zawn rai ahkyak la ai bungli ni gaw myit ngwi simsa ai hte n rai yang n-ngut lu ai hpe chye ai. Ahkyak hkyak lajin ra ai lam ni mung sumru ya nna she hparan la mai nga ai. 

“Grai ahkyak ai” ngu ai lam ni gaw masha hta hkan nna shai hkat nga ai. Kanu Kawa ni a matu rai yang, lu su matsan kadai mi raitim, tinang a kashu kasha ni a shawng lam kaja lu hkra nga nna, shada tsawra chye na hkat na pyi she n dum hkra rai, grai kyin nga ma ai. Mungkan arung arai ni, lu la lam, awngdang lam, gum hkawng lam ni a ntsa myit machyu jung ai majaw, kun dinghku masha ni hta gaw hpa mung n ra ai zawn rai nga ai. San ra ai ga san ni, hkrum zup mayu ai myit ni nga tim shada tsun jahta na aten pyi n lu ma ai. Madu jan ni mung madu wa hpe jawp wa sai hte madu wa ni mung shinggan de manang ni hte she grau grau aten jahtum sai, ma ni mung manang ganawn mazum shut nna, tsa chyaru, nang hpam tsi mawan lu sha chye wa sai. Anhte mungkan ndai hta gara madang, kaning rai nna nga pra ai raitim, aten la nna grau kaja ai ningmu hte mada lu na matu dai ni na kabu gara shiga hta Yesu gaw anhte yawng hpe saw shaga nga ai. Anhte tinang chyu nga lu na aten tam nna myit sumru, akyu hpyi chye na ra nga ai. Tinang a prat hta jaw ai lam n tsa hkawm sa nga ai kun ngu ai hpe Karai Kasang hte chyu nga ai aten san ding lik yu mai nga ai. Kun dinghku kata, rau magam gun ai ni hte yak hkak shangun ai, galu kaba na pat shing dang ai lam ni gaw kaning re ai lam rai kun? Madu Hkristu sharin shaga ai zawn sha anhte a mayak manghkang ni, tinang a kraw kata na manghkang ni hpe hparan mahtai tam na ra ahkyak nga ai. Anhte a prat wa, masha ni hpe myit sawn ya na malai, shing jawng nna chyu nga nga ai kun? Tsawra matsan dum na malai ja gumhpraw hpe sha yu nga ai kun? “Machyi shim ai shara de sa nna” ngu ai hta anhte tsawra ai ni hte rau simsa ai hte nga lu na shara rai nna, anhte a shut shai nga ai prat a nga sa lam ni hpe shading sharai lu na Karai Kasang kaw nna n-gun atsam hpyi la na matu rai nga ai.

Sawn sumru mai ai lam: Ngai a prat hta ya aten hpa baw byin nga ai kun? Simsa ai shara de sa nna prat hpe bai gram lajang na matu ngai sa na ra nga ai kun?

2018:PRANWAN LADAW LABAN (16) NA CHYUM LAIKA

PRAN WAN LADAW HTA LABAN 16

22nd July 2018

CHYUM MUNGGA DAW 1

Yeremia 23:1-6

Ya hti na gaw, myihtoi Yeremia a laika hta na rai nga ai.

Nye a udat shara hta sha nga ai sagu hpung ni hpe jahten shabra kau ai sagu rem ni gaw katut sha na mara ai, nga nna Madu tsun ai. Dai Majaw, Israela a Madu Karai Kasang gaw, nye a amyu masha ni bau nga ai sagu rem ni hpe sha-ang nna, ning nga ai; Nanhte gaw nye a sagu hpung hpe atsawm sha n woi awn ai hte shanhte hpe shabra kau nna, shaden kau mu ai majaw, nanhte a n hkru ai amu hte maren, ngai nanhte hpe teng teng ari dan jaw na ra ai, nga nna Madu Karai Kasang Wa tsun ai. Rai timung, ngai mungdan kaga de shaden kau ai, nye a sagu ni naw ngam nga ma ai; dai ni hpe ngai shinggyin la nna, tinang a udat shara de bai woi wa na nngai: dai yang e shanhte mayat maya wa nna, law htam wa na mara ai.

Shanhte hpe bau sin na sagu rem ni, ngai shanhte a ntsa tawn da nna, shanhte htawm hpang de hkrit kajawng nna mak mat na nrai; langai mi pyi mat mat na nrai; nga nna Madu tsun nga ai. Madu Karai Kasang ning nga ai; Yu u, Dawi a matu ‘Ding hpring ai makrung, ngai shatut na aten du na ra ai, dai wa gaw hkawhkam tai nga nna, hpaji byeng-ya hte up hkang na hte, dai mungdan hta e ding hpring ai hku daw dan na ra ai. Shi a prat hta Yuda mung hkye hkrang la ai hkrum nna, Israela gaw asim sha nga lu na ra ai. Dai wa hpe anhte a Ding Hpring Madu, ngu nna shamying ya na mara ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Ehpesu 2:13-18

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, shawng e nanhte maigan ngu ai ni gaw, Karai Kasang a mungdan hte tsan gang nga myit dai. Ya chyawm gaw, Hkristu Yesu hte matut mahkai hkrum nna, Shi a asai a marang e, nanhte, ni, wa manit dai. Dai Hkristu Madu gaw anhte a ngwi pyaw simsa ai lam rai nga ai; kaning rai nme law, Tara maigan masha ni hte Yuda masha ni, ndai amyu lahkawng hpe langai sha shatai let, an lahkawng hpe madin zawn jahka kau ai n dawng n yawt ai lam hpe Hkristu gaw sharun kau nu ai. Jep ai tara a matsun maroi hte htet da ai upadi ni hpe, shi a hkum shan hte shi htawm kau sai. Shingrai, shawng e amyu lahkawng rai nga ai ni hta na, masha langai sha hpe shi hpan tawn da nna, ngwi pyaw simsa ai hpe shabyin da nu ai.

Dai Hkristu gaw udang ntsa e n dawng n yawt ai lam hpe shaza kau ya nna, amyu lahkawng hpe Karai Kasang a matu hkum hkrang langai sha shatai da ai hte, Karai Kasang hte an lahkawng hpe htinglu htinglai ya wu ai. Shingrai, Hkristu Madu sa du nna, tsan gang nga ai nanhte hpe mung, ni nga ai ni hpe mung, ngwi pyaw simsa ai lam a kabu gara shiga hkaw tsun dan mi ai. An lahkawng gaw dai Hkristu a marang e, Wenyi langai sha hta e, Kawa hpang de shang wa na lam lu la saga ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 6:30-34

Ya hti na gaw, Marku a laika hta na Kabu Gara Shiga rai nga ai.

Kasa shi lahkawng hte gaw, Yesu kaw bai du wa nna, shanhte galaw sai lam mahkra hte sharin shaga ai lam yawng, shi hpe tsun dan mu ai. Dai rai nna, Yesu gaw, Nam mali kata na machyi shim ai shara de nanhte hkrai sa nna, loi mi ban sa la mu,, ngu nna shanhte hpe tsun mu ai. Kaning rai nme law, sa sa wa wa rai nga ai ni gaw law la ma ai majaw Yesu hte shi a kasa ni, shat sha na ahkying pyi n lu ma ai. Dai rai nna, shanhte gaw nam mali na machyi shim ai shara de li hte sa wa ma ai. Rai timung, masha ni gaw shanhte pru sa wa ai hpe mu mada ai majaw, law law wa shanhte sa wa ai shara hpe chye wa ma ai. Dai majaw, mare shagu hkan na ni hkarang lam hku e gat sa wa nna, Yesu hte Shi a kasa ni a shawng e sa du ma ai. Shing rai, dai li kaw nna Yesu pru ai shaloi masha wunawng kaba hpe Shi mu mada lu ai. Shanhte gaw, sagu rem wa n lawm ai sagu hpung ni hte bung nga ma ai majaw, Shi shanhte hpe matsan dum nna, law law wa sharin shaga ya mu ai.

Ya hti ai gaw, Madu a Kabu Gara Shiga rai nga ai.

2018:PRANWAN LADAW LABAN (15) NA MUNGGA

Shinggyim masha ni gaw shada da garum shing tau na she sak hkrung nga sa mai ai ni re. Anhte a ganawn mazum ai lam ni gaw tinang a ra rawng gawng kya ai hpe ja hpring shatsup na matu sha byin mai nga ai. Tinang hta ning ra ai lam nnga mat wa ai shani hta ganawn mazum ai lam hten za mat chye nga ai. 

Madu Yesu gaw dai ni na Kabu Gara Shigga hta Shi a Sape ni hpe htet shana ai hta Karai Kasang hpe sha kam hpa na matu, kaga arung arai shajan hpe tawn da let Mungga hpe hkaw tsun na matu htet shana lai wa sai re. 

Tinang a lu ai ja gumhpraw, arung arai hte tinang a atsam marai nga nga ninglen Karai Kasang hpe ten shagu kam hpa lu na matu shakut shaja sa wa lu u ga.

MUNGGA HTA ASAK HKRUNG NGA GA

St. Francis Of Assisi

“Anhte yawng gaw Karai Kasang a Mungga hte sak hkrung ap nawng let kabu gara shiga shachyam shabra na shaga la hkrum saga ai.”

San Francis Assisi gaw sut su ai kun dinghku hta shangai wa ai. Ramma prat hta shi gaw pyaw hpa hkan let gumhpraw jai kaba ai wa mung rai nga ai. 1202 ning hta Assisi mare hte Perugia lapran hpyen tai wa sai hte Francis mung hpyen dap de shang nna gasat na rawt sa wa sai. Shi gaw rim hkrum mat nna ga hkyuk htawng hta bang da hkrum sai. Shi bai lawt lu wa ai shaloi, hkamja lam bai lu la na matu laning mi daram tsi lajang la ra sai. Bawng dung ai ten laja lana jep joi hkrum ai hte laning mi daram n-gun bai awai la ai ten ni gaw shi a prat hpe tsep kawp galai shai ya sai. Francis gaw shi a tsawm htap manu dan ai bu hpun mawn sumli ai hpe tawn kau nna bungli galaw sha ai matsan masha ni zawn bu hpun lawai let shingma hta mung kaba la ai wudang ahpraw hpe noi gali tawn sai. Dai hpang dum nta kaw na pru mat wa let Sehkam (ရေသ့) prat hpe la ai. Francis gaw manu mana sung ai tsawra matsan dum myit hpe lu la ai hte shinggyim uhpung kaw na kabai kau hkrum ai ni hpe garum hpang wa sai. Dai tsawra matsan dum myit gaw chyum laika kaw na sharin shaga ai lam lahkawng a majaw grau kaba wa ai hte sung wa sai. 

Langai ngu na gaw, Npawt nhpang laika kaw na “shinggyim masha shagu gaw Karai Kasang a hkrang sumla hte asam hte bung hkra hpan da hkrum ai” ngu ai rai nna lahkawng ngu na gaw, kasa Mahte a laika hta na, “ndai ni hta na kaji htum ai wa hpe nanhte galaw ai gaw Ngai hpe galaw ai rai ndai” nga ai lam lahkawng a majaw re da! Ya lawu de na mabyin lahkawng hpe yu let San Francis ndai sharin shaga ai lam lahkawng hta kaja wa hkawm sa wa ai hpe chye lu na re! 

Kalang mi na Francis gaw pa layang shara mi hta hkawm sa wa yang manggang kap ai wa hte sa katut wu ai. Shi gaw manggang ana hpe grai hkrit kajawng ai raitim dai masha hpang de sa wa nna ahpum dat nu ai. Hpang na lang gaw shi Missa hkungga sa lung ai shaloi rai nga ai. Dai shani hti ang ai kabu gara shiga gaw dai ni hti ai hte maren sha rai nga ai. Yesu a matsun rai nga ai, kabu gara shiga hkaw tsun hkawm ai shaloi hkrun lam a matu shahpa, gumhpraw hpa nlang ai sha sa u, ngu ai gaw Francis hpe shadum kajawng dat nu ai. Ndai matsun ga gaw Francis a prat hpe nnan bai galai shai ya sai. Shi gaw, shi a Sehkam (ရေသ့) prat hpe tawn kau nna, matsan mayan hkam let mare, kahtawng ni de kabu gara shiga hkaw tsun na rawt sa wa sai. Shi a laklai shai ai atsam ningja a majaw kaga la kasha ni mung shi a hpang hkan nang wa masai. Shata shagan ni hpe mada let yup nna masha ni jaw ai hpe lu sha let nga nga sai. Francis asak 27 ning hta, hpang hkan masha mung law wa ai hte Uhpung hpaw tawn na matu lam tam ai hpe Wasarabyin kaw na ahkaw ahkang mung lu la sai. Ndai uhpung uhpawng nnan gaw matsan mayan rai nga let matsan masha ni hpe daw jau lu na myit hkut da ai ni re. San Francis a prat labau gaw dai ni hti ai kabu gara shiga hta tsun mayu ai lam hpe madun ya nga ai. Dai ni na anhte a prat hta mung, shinggyim uhpung kaw na gawt kau, kabai kau hkrum ai matsan mayan ni hpe anhte a tsawra lanu lahku ya ai, daw jaw daw ya ai hte sakse hkam na ra kadawn nga ai. 

Sawn sumru mai ai lam; Dai ni na mungga e shadum ning dat ai hte maren, ngai nga ai shara hta, kaga masha ni hpang de kabu gara shiga hpe kaning rai sakse hkam hkaw tsun lu na rai? 

2018:PRANWAN LADAW LABAN (15) NA CHYUM LAIKA

PRAN WAN LADAW HTA LABAN 15

15th July 2018

CHYUM MUNGGA DAW 1

Amo 7:12-15

Ya hti na gaw, Myihtoi Amo a laika hta na rai nga ai.

Hkinjawng wa Amazi gaw Amo hpe tsun ai gaw; Myihtoi wa e, Yuda mung de hprawng wa nu; dai yang e myihtoi htoi nna, asak bau nga u. Bahtela shara hta chyawm gaw, myihtoi hkum htoi et; dai gaw hkawhkam wa a chyoi pra ai shara hte, wunpawng htunghking rai nga ai, ngu nna tsun wu ai. Dai rai nna, Amo shi hpe htan ya ai gaw; Ngai gaw myihtoi wa n rai nngai; myihtoi kasha mung n rai nngai; yam nga rem nna, lakum si lajang ai wa rai nga nngai. Madu Karai Kasang mahtang, sagu hpung de nna ngai hpe lata nna, sa su; nye a amyu Israela hpe myihtoi htoi u nga nna ngai hpe hkang dat ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Ehpesu 1:3-14. (3:1-10)

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, anhte a Madu Yesu Hkristu a Kawa rai nga ai Karai Kasang kaw hkungga shakawn a nga nga u ga: Shi gaw sumsing lamu lahta tang e, nsa wenyi hte seng ai shaman ya ai lam amyu myu hte, Hkristu hta e anhte hpe shaman ya mi ai. Anhte gaw tsawra ai hte hpring tsup let, shi a man e chyoi pra ai ni hte mara n rawng ai ni tai lu hkra, ginding aga garai n lat kaw nna, Shi anhte hpe Hkristu hta e lata la mani ai. Shi a tsawra htum ai kasha hta e, anhte hpe jaw dat mi ai chyeju ningsang a lam hpe, anhte yawng shakawn kungdawn u ga, shi a shawang myit sharawng awng nga ai hte maren, Yesu Hkristu a marang e Shi a kasha ni tai lu hkra, Shi anhte hpe shawng nnan e san da mani ai.

Dai Hkristu Yesu hta e anhte hkye hkrang la ai hkrum nna, Shi a asai hkaw kau ya ai a marang e anhte a shut hpyit mara raw dat kau ya ai akyu hpe lu la saga ai: dai daram Karai Kasang gaw shadawn n dang ai hku chyeju nhpaw n-ya anhte hpe karan jaw ya mani ai. Karai Kasang gaw shawng npawt kaw nna, Shi a tsawra shawang myit hte Hkristu hta e yaw shada ai hte, madat ai aten du wa yang dik wa na ra ai, Shi a mungsung lam hpe anhte chye chyang wa lu na matu, Shi hpaji ningsang anhte hpe jaw ya mani ai. Dai mungsung lam chyawm gaw sumsing lamu tang na lam ni hpe mung, ginding aga na lam ni hpe, nga manga hte hpe, Hkristu hta e langai sha tai hkra gumhpawn tawn da na ra ai lam rai nga ai.

*(Grau galu ai hku hti jang, lawu na tsun matut na)

Kaja wa, dai Hkristu hta e anhte lata la ai hkrum nna, Karai Kasang a sali wunli amyu tai wa saga ai. Kaning rai nme law, Shi a shawang myit bawng hkut da ai hte maren, yawng mayawng a ntsa e up hkang nga nna lam mahkra hpe lajang da nga ai Karai Wa gaw, anhte a amyu hpe lata la mani ai. Dai rai nna, Shi myit ra ai hte maren, Hkristu garai n du yang, shi hpe shawng myit mada nga ai ni, anhte tai wa nna, Karai Kasang a hpung shingkang hpe shakawn kungdawn nga lu u ga, shi shawng nnan e anhte hpe san da mani ai. Nanhte mung dai Hkristu hta e lata la ai hkrum manit dai. Nanhte gaw hkye hkrang la ai lam a kabu gara shiga ngu ai, teng man ai mungga hpe na yu nna, kam sham manit dai shaloi e , Karai Kasang n dat da ai Chyoi Pra ai Wenyi hte dazik shakap da ai hkrum manit dai. Dai Wenyi chyawm gaw, Karai Kasang a hpung shingkang arawng sadang law htam wa u ga matu, Madu Karai Kasang Shi a amyu masha ni hpe hkye mawai la ngut ai shaloi e Shi a sali wunli anhte lu la na lam a masat dingsat rai nga ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 6:7-13

Ya hti na gaw, Marku a laika hta na Kabu Gara Shiga rai nga ai.

Yesu gaw, Shi a sape shi lahkawng hpe shaga la nhtawm, marai lahkawng yep yep di nna shangun dat mu ai hte, n san n seng ai nat ni hpe dang kau lu na ahkaw ahkang, Shi shanhte hpe jaw dat mu ai. Yesu gaw, dai sape ni hpe shadum jahprang let, Daw hkrawng hta kaga, hkrun lam a matu, sha hpa mung, htingba mung, shingkyit hta gumhpraw mung hkum lang mu. Nanhte gaw hkyepdin din mai ai, rai timung, galai na matu palawng kaga hkum gun myit, ngu nna shanhte hpe shadum dat mu ai.

Dai hta n-ga, Yesu gaw, gara nta hta rai timung, nanhte shang yang, dai mare na pru wa ai nhtoi du hkra, dai nta hta e a nga nga mu. Gara shara hta e rai timung, nanhte hpe n hkap la nna, nanhte hpe n madat mara yang gaw, dai yang na pru wa let, shanhte hpang maga de sakse tai u ga, nanhte a lagaw lahpan hta kap ai ga nhpu hpe, ahpu sharun kau da mu, ngu nna sape ni hpe Yesu tsun da mu ai. Shaloi shanhte pru wa nna, masha ni hpe myit malai lu na lam, hkaw dan ma ai; nat ni law law hte hpe shanhte shaden kau mu ai hte, machyi makaw hkrum ai ni law law hpe namman chya ya nna, shamai shatsai ya dat mu ai. 

Ya hti ai gaw, Madu a Kabu Gara Shiga rai nga ai.

2018:PRANWAN LADAW LABAN (14) NA MUNGGA

Anhte a sak prat hkrun lam hta kalang marang myit daw myit hten ai lam ni, asum jaw kau mayu ai lam ni byin pru chye na ga ai. Grau nna tinang hku na gaw grai shakut dum sai raitim, tinang a kanu kawa, manaw manang ni, jinghku jingyu ni kawn tinang galaw shakut ai lam ni hpe tang ndu dum ya ai, hkang nhkang ai hku mu ya ai. Dai zawn re ai ten ni hta anhte myit daw myit hten ai zawn nga hkam sha wa nna, matut galaw mayu, shakut mayu ai lam ni nnga wa ai.

Daini na Kabu Gara Shiga hta Madu Yesu hpe Shi a buga na manaw manang ni, jinghku jingyu ni, buga masha ni nan nhkap la ai hpe anhte mu hti lu ga ai. Laksama sara wa ai kasha, shanhte rau nga nna laksama sha galaw sha ai masha wa nga nna Madu Yesu tsun ai lam ni hpe nlu hkap la ma ai.  Dai zawn Shi a buga jinghku jingyu ni, manaw manang ni, buga masha ni nhkap la ai a majaw shinggyim masha myit hku nga yang Madu Yesu mung myit n pyaw ai lam, myit daw myit hten byin ai lam teng sha nga lai wa na re. Dai zawn Shi hpe Shi a buga masha ni nhkap la ai raitim, Madu Yesu gaw tsawra myit kaba hte machyi makaw hkrum ai ni hpe shamai shatsai ya lai wa sai.

Anhte mung daini na Kaba Gara Shiga hpe n-gun la nna, anhte a sak hkrun lam hta manang wa yu kaji ai, tinang hpe n hkap la ai raitim, tsawra myit hpe shawng lam tawn nna kanawn mazum sak hkrung hkawm sa wa ai rai yang anhte galaw sa wa ai magam bungli ni ma hkra gaw awngdang ai lam hpe lu na na rai nga ai law.

NINGDANG KAU AI HKRUM KATUT WA YANG

“Masha ni anhte hpe ning hkap raitim, anhte matut tsawra nga yang, dai tsawra myit gaw apu pu asi si wa na rai nga ai”

1960 ning, Africa dan na Sudan mungdan hta makam masham hpe zingri zingrat ai lam ni byin pru wa sai. Paride Taban mying ai shan chyang Hkristan marai mi gaw dai hkrit hpa lam kaw nna hprawng let ‘Uganda’ mung de du sai. Dai kaw nga nga ai ten, Jau tai jawng lung ai hte jau aya hkam la lu sai. Simsa ai lam nga wa ai ten, Sudan mung dan de Jau tai let bai wa sai. Shi gaw jau ginwang shara mi hta bungli shatsam hkrum ai raitim, Africa hpung masha ni gaw shan chyang Jau hpe rai n mu yu shi ai majaw teng teng Jau re ai lam hpe n kam wu ai. Shawng de na Jau ni gaw shan hpraw ai, shanhte hpe lu sha, tsi mawan, hpun palawng jaw ma ai raitim, ya na Jau wa gaw shanhte zawn matsan masha rai nga ai. Grau nna yak ai gaw, Jau Taban kaw nna No. 2 Vatican Zuphpawng kaba a galai shai ai lam ni hpe mung shachyen ya ai lam rai nga ai. Dai galai shai ai lam gaw, dai masha ni hpe grai gin jang nga ai. Shanhte shada da, “Ndai masha shachyang wa gaw anhte a Nawku tawn hpe mung ting wang di kau nna Missa hkungga hpe mung anhte a myusha ga hte nawng ya nga ai, shi gaw Jau n rai na re” nga nna tsun ma ai da. Manu mana yak hkak ai hte shakut kau ngut ai hpang she hpung masha ni dai Jau Taban hpe hkap la ma ai. 

Dai ni na kabu gara shiga hta amyu sha ni Madu Yesu hpe n hkap la ai lam hte mung ndai mabyin gaw bung nga ai. Madu a amyu sha ni mung, “shi gaw anhte zawn sha bungli galaw sha ai wa nrai? Anhte hta jan nna kaning rai Karai Kasang hpe chye lu na rai? Shi hkum shi hpa shadu ai kun?” nga nna myit na nhten. Nazareth mare na masha ni chyu sha kaning rai laksama la wa mi Karai Kasang hpe chye lu na rai, nga nna mau ma ai. Shawng shawng na Hkristan ni a aten hta mung, Celsus mying ai wa mung, “nanhte hpung hpe woi de ai wa gaw nam mare na hpa n chye ai laksama la wa sha re mi”, nga nna Hkristan ni hpe asawng asang ngu ai da.

Yesu a aten na masha ni shi hpe n hkap la ai rai yang, anhte a prat hta masha ni anhte hpe n hkap la ai rai yang hpa mau na shara n nga na re. Shanhte ni Yesu Hkristu hpe n hkap la ai gaw shanhte hta grau nna chye chyang ai majaw sha nrai, Yesu a sharin shaga ai lam gaw shanhte hpung woi ni a sharin shaga ai lam hte n htan shai ai majaw mung rai na re. Yesu gaw, shanhte a nga sa lam ni, myit mang ai lam ni, myit masa ni galai kau na ning dat ai hte, mungdan lam sharin ya ai, tsawra matsan dum na matu, tengman tara hkan na matu hte mara raw dat hkyam sa jaw chye na matu lam madun ya lai wa sai.

Dai ni na anhte a aten hta mung, shinggyim ahkaw ahkang lam, prat hpe manu shadan na lam, hkritung ma sat ai lam ni, masha dut sha ai lam ni, mungkan ga hpe jahten sharun ai lam ni hpe ning hkap tsun ai shaloi, anhte hkum nan mung n hkap la ai, ningdang hkrum sha lu na re. Anhte a kun dinghku kata ni hta mung, anhte a lata la ai lam ni rai nga ai, dinghku de ai, amu bungli tam galaw ai, jau, mama tai na lam ni gaw ngam ai ni hte n htan shai wa ai shaloi, n hkap la ai sha ningdang ai lam ni pru wa jang mau na lam gaw n nga na re. Ndai zawn rai ningdang kau ya ai lam ni byin wa ai ten, anhte gaw hkam sha lu na, pawt sindawng ai hte n-gun daw nna masin n si ai ni byin wa na re. Madu Yesu mung dai zawn sha hkam sha lai wa sai, raitim galoi mung asum n jaw ai lam anhte dum chye ra nga ai. Madu gaw shi kade lang mi ningdang hkrum ai raitim, shi a Sape ni a majaw raitim, tut nawng tsaw ra nga ai. 

Sawn sumru mai ai lam: Ningdang, n hkap la hkrum ai hpe ngai galoi hkam sha lai sai kun? Dai ningdang hkrum ai lam gaw dai ni na ngai a prat hta hpa baw byin shangun sai rai?

2018:PRANWAN LADAW LABAN (14) NA CHYUM LAIKA

PRAN WAN LADAW HTA LABAN 14 

8th July 2018

CHYUM MUNGGA DAW 1

Ezekela 2:2-5

Ya hti na gaw, Ezekela a laika hta na rai nga ai.

Dai Wenyi gaw, ngai hta shang nna, shi ngai hpe tsap shangun nngai. Shaloi Madu tsun ai ga hpe, ngai na la se ai. Madu tsun ai gaw; Masha Kasha e, ngai hpe gumlau ai Israela a kashu kasha ni hpang de ngai nang hpe shangun dat nngai. Shanhte gaw, dai ni du hkra, kaji kawa ni hte hpawn, ngai hpe tut nawng e gumlau nna, shut hpyit nga ma ai.  Shanhte a kashu kasha ni mung, myit ja ai hte ngai hpe n kaw n law di ni ai rai nga ma ai. Ngai nang hpe shanhte hpang de shangun nna, nang gaw, Madu ning nga ai, ngu nna shanhte hpe tsun u  gaw gumlau ai amyu rai nga nna, madat timung, n madat timung, shanhte hta e myihtoi nga nga ai hpe shanhte chye lu na mara ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

2 Korinhtu 1 :7-10

Ya hti na gaw, Korinhtu masha ni hpang de San Pawlu shagun dat ai laika lahkawng hta na rai nga ai.

Karai Kasang ngai Pawlu hpe madun dan ai, kaba dik htum ai shingran lam a majaw, ngai nau wa n gumrawng u ga, ngai hpe abyen na matu, satan a salung sala ngu ai, nye a hkum shan hta ju ai aju ngai hkrum nga nngai; shing rai, ngai, nau wa myit n kaba nngai. Ngai gaw dai hta na lawt lu na matu, Madu hpe masum lang akyu hpyi nga nngai. Dai rai nna Shi gaw, Nye a chyeju gaw, na a matu ram nga ai; kaning rai nme law, masha n-gun gaw kya ai hte nye a n-gun atsam hkum tsup nga ai, nga nna Madu ngai hpe tsun ni ai. Dai re ai majaw, Hkristu a n-gun atsam, nye a ntsa e, a up nga u ga, nye a n-gun kya ai lam hta ngai grau nna shakawng nga nngai. Dai rai nna, Hkristu a jaw e hkam sharang ai, nye a n-gun kya ai, asawng asang ai, kyindut ai, zingri zingrat ai hte, nni nhkri re ai lam ni hta ngai kabu nga nngai. Kaning rai nme law, ngai n-gun kya nga yang, n-gun atsam rawng nga nngai.

Ya hti ai gaw, Karai Kasang a mungga rai nga ai.

KABU GARA SHIGA

Marku 6:1-6

Ya hti na gaw, Marku a laika hta na Kabu Gara Shiga rai nga ai.

Yesu gaw Shi a buga de du wa ai; Shi a sape ni mung Shi kaw hkan nang ma ai. Laban nhtoi du jang, tara jawng hta e shi sharin shaga hpang nga ai. Yesu a ga madat la ai ni malawng maga gaw, myit na kahpra ma ai. Shanhte gaw, Ndai wa gaw dai lam mahkra hpe kanang na lu la a ta? Shi lu la ai hpaji byengya gaw hpa baw rai nga a ta? Shi gaw anhte a laksama wa chyu sha rai nga ai; Maria a kasha hte, Yaku, Yosep, Yuda hte Simun a kahpu kanau mung rai nga ai, n rai ni? Shi a kanu kanau ni mung anhte hte rau nang e nga nga ma ai n rai ni? Nga nna Shi a lam hta myit kataw wa ma ai. Yesu mahtang, Myihtoi gaw tinang a buga hta, tinang a mayu dama ni hte, tinang a nta hta nrai jang she, arawng lu nga ai, ngu nna shanhte hpe tsun mu ai. Machyi makaw hkrum ai nkau mi a ntsa e lata mara nna shamai ya ai hta kaga, dai yang e hpa magam amu hpe mung, shi n galaw lu ai. Shanhte a n kam n sham ai myit a majaw shi mau nga ai.

Ya hti ai gaw, Madu a Kabu Gara shiga rai nga ai.

2018:PRANWAN LADAW LABAN (13) NA MUNGGA

Karai Kasang gaw tsawra myit kaba hte shinggyim masha ni hpe hpan tawn da ai hte maren shinggyim masha ni nga mu nga mai ai hpe ra sharawng ai lam gaw dai ni na chyum mung ga ni sakse hkam ai hpe mu lu nga ai.

Mahkra dang chye ai Karai Kasang ndang di ndang dep ai lam nnga ai majaw Karai Kasang hpe kamsham ai ni, Shi madu myit ra sharawng ai masha ni a matu hkrit tsang hpa lam nnga na re. Hpa majaw nga yang anhte a ru yak jam jau ai lam ni, myit tsang pu ai lam ni hpe Karai Kasang a atsam hte teng sha lai di lu nga ai.

Si ai masha hpe bai chyahkrung sharawt la ai Karai Kasang hpe kamsham myit kaba rawng let Shi hpang de sit shang nna Shi Madu ra sharawng ai lam hta sak hkrung nga sa let anhte ra kadawn ai ahkying aten hta Karai Kasang a lak lai ai shaman chyeju hpe hkam la lu u ga.

MAGAM BUNGLI N LAWM AI MAKAM GAW GAMAN LI LA

“Tinang hkum nan shakut ai ni hpe Karai Kasang mung garum la ai”

Laru kaba wa ai nhtoi langai mi hta, hka kaba wa nna mare ting hpe mayu sha kau ai. Gumgai marai mi, nta kata ngam rawng taw nga ai. Shi mung shat gawk na hkuwat hta tsap taw nga yang, hkali langai du wa ai. Dai li gawt sa ai wa gaw; ‘hkyela lu na matu li n tsa de lung wa rit’ ngu wu ai. ‘Rai sai law, Madu Yesu ngai hpe hkyela na ngai kam nngai’ ngu wu ai. Dai wa mung baw sha ga-ngat let li gawt mat wa sai. Hpang shani, hka hpungla gaw nta n tsa htap de du wa nna hkali langai bai du wa ai hte shi hpe hkye la na tsun tim dai gumgai gaw, Madu shi hpe hkyela na kam ai majaw li hta hkan nang na n dang nu ai. Hpang shani e gaw, hka grau kaba wa ai hte nta numgaw pyi du sai. Gumgai dai hpe mung tsinyam hkye ai ‘Helicopter’ na masha ni mu ai hte shi hpe hkyela na sumri jahkrat ya ai rai tim, Madu Karai hkyela na kamsham ai majaw n hkraw ai sha ngam nga da sai. Hpang shani e gaw hka kaba wa ai hte nta ting lup mat nna gumgai dai mung hka hta lup si mat sai.

Sumsing lamu de du ai shaloi, shi gaw San Petru hpe, “kata de ngai n shang shi yang, lajin laroi ga shawng tsun mayu nngai, Karai Kasang ngai hpe hkyela na kamsham ai raitim, ngai hpe hka lup si shangun ai” ngu wu ai. San Petru mung mau mat ai hte shi hpe, “Madu gaw hkali lahkawng hte Helicopter langai sa dat sai le, dai hta jan grau nna Madu na a matu hpa jan galaw ya lu na ngai mung n chye sai” ngu nu ai da.

Dai ni na kabu gara shiga hta mung, garum la na ra ai masha lahkawng a lam lawm ai. Dai yan mung Karai Kasang hpe kam shamyet ai hte mi na gumgai kamsham ai hte gaw tsawm ra mi shai nga ai. Shawng na wa gaw numsha marai mi re. Madu Yesu shi hpe shamai shatsai ya na hpe kamsham ai raitim, lama ma galaw ra na hpe shi chye lu wu ai. Nta kata hta sha n nga nga ai. Shamai shatsai hkrum lu na matu Yesu hpang de sa wa sai. Yairu a mabyin mung dai zawn sha rai nga ai. Shi a kasha hpe Yesu shamai ya na kamsham ai hte sha n rai, shi hkum nan Madu hpang de sa nna, shi a kasha hpe shamai ya na matu nta de hkan nang na saw shaga wu ai. Shi a kasha gaw grai machyi ai majaw Madu Yesu hpe sa hkrum lu na matu n mai byin ai.

Dai lahkawng yan gaw Madu Yesu hpe kamsham ai hte sha n rai, shanhte galaw ra ai lam galaw ma ai. Shanhte yu maya galaw ai raitim, Karai Kasang gaw shanhte ra ai shamai shatsai chyeju jaw ya sai. Dai gaw anhte ni lagawn lamawn rai, dung nga nna Karai Kasang anhte a matu galaw ya na lamik kumla hpe la taw nga n mai ai, ngu ai lam re. Anhte hkum hkye hkrang la lu na matu Karai Kasang jaw da ai yu maya atsam marai hpe sung lang na ra nga ai. Dai yu maya atsam marai ni gaw mayak mahkak aten ladaw hta Karai Kasang hpang de sit shang nna lawan ladan garum ya na hpyi lajin chye nga ai. Dai zawn rai sha Karai Kasang gaw anhte ra kadawn ai shaloi anhte hpe garum la na re.

Sawn sumru mai ai lam; Madu hta kamsham ai myit, ngai hta kade rawng ai rai? Mayak manghkang ni ngai na prat hta du wa ai shaloi, ngai hta kaning rai myit masa nga ai rai? Karai Kasang ngai hpe garum hkyela na matu a la nga ai kun? (snr) dai mang hkang ni hta na lawt lu na matu ngai lama ma galaw na shakut sai kun?