2018: PASKA LADAW HTA LABAN (4) SHANI NA CHYUM LAIKA

PASKA LADAW HTA LABAN 4

22nd April 2018

CHYUM MUNGGA DAW 1

Kasa 4:8-12

Ya hti na gaw, Kasa laika hta na rai nga ai.

Yuda masha ni a hkinjawng agyi ni, du salang ni hte sara ni gaw, Yerusalem mare e nga nna, Kasa Petru yan Yawhan hpe san yu ma ai. Shaloi, Petru gaw Chyoi Pra ai Wenyi hte hpring nga nna, shanhte hpe tsun mu ai gaw: Mung masha ni a du agyi salang ni e, Ndai lagaw hten ai wa hpe matsan dum garum ai amu hte, shi kaning rai mai wa lu ai lam hpe, dai ni e an hpe san jep yu ai rai yang gaw, nanhte hte Israela amyu yawng hte hpe, ngai kabu gara ai hte tsun dan made ga: nanhte udang hta jen sat kau nna, Karai Kasang e si ai ni kaw na jahkrung sharawt la ai, Nazaret wa Yesu Hkristu a amying ningsang hte, ndai wa gaw nanhte a man e amai atsai tsap nga ai. Dai Yesu gaw, nanhte nta gaw ai ni lata kau ai nlung rai nga ti mung, ningjut jahtum na nlung tai wa sai. Shi hta kaga hkye hkrang la ai lam n nga sai; kaning rai nme law, ndai ga ntsa e masha ni hpe jaw ai amying shingteng mahkra hta na, Yesu ngu ai mying hta kaga, anhte hpe hkye hkrang la lu ai amying ningsang shaje kanang mung n nga sai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1Yawhan 3:1-2

Ya hti na gaw, Kasa Yawhan shagun dat ai laika langai hta na rai nga ai.

Ngai shu ngai sha ni e, Wa Karai Kasang gaw anhte hpe gade wa tsawra da mi hka! Karai Kasang a kashu kasha ni ngu nna anhte hpe shamying da mi ai; dai hte maren Shi a Kasha ni nan anhte rai nga ga ai. Mungga gaw shi hpe n hkap la ai majaw, anhte hpe mung n hkap la nga ai. Tsawra ai ni e, Karai Kasang a kasha ni anhte ya e rai nga ga ai, rai ti mung, htawm hpang e anhte hpa mi tai wa na ga ai hpe garai n shadan dan nga ai; dai hpe shadan dan ai shaloi, Madu Karai Wa hte bung na ga ai hpe sha anhte chye nga ga ai; kaning rai nme law, Shi hkum hpe nan anhte mu lu na ga ai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 10:11-18

Ya hti ai gaw, Kasa Yawhan a laika hta na Kabu Gara ai Shiga rai nga ai.

Yesu tsun ai gaw: Ngai gaw kaja ai sagu rem wa rai nga nngai: kaja ai sagu rem wa gaw, sagu ni a matu tinang a asak nawng ya kau ai. Nchyang wa chyawm gaw, sagu rem wa majing, n re ai hte, sagu ni hpe n madu ai majaw,chyahkyawn sa wa ai hpe mu jang, sagu ni hpe kau da nna hprawng mat wa chye ai; chyahkyawn mung sagu ni hpe amya sha nna, shabra kau nga ai. Dai wa gaw nchyang sha rai nga ai majaw, sagu ni a matu n tsang ai rai nna, hprawng mat wa ai. Ngai gaw kaja ai sagu rem wa rai nga nngai: nye a Wa gaw ngai hpe chye ai hte, ngai mung Wa hpe chye nngai zawn, nye a sagu ni hpe ngai chye nngai, nye a sagu ni mung ngai hpe chye ma ai. Dai sagu ni a matu mung nye a asak nawng ya kau nngai.

Ndai lawng hta n lawm ai sagu kaga mung ngai naw lu nngai. Dai sagu ni hpe mung ngai woi wa nna, shanhte nye a nsen hpe madat na mara ai; shaloi sagu hpung langai sha, sagu rem wa langai sha rai na ra ai. Ngai gaw nye a asak hpe bai lu la u ga ngu nna, asak nawng ya kau nngai majaw, nye Wa ngai hpe tsaw ra nga ai. Kadai rai ti mung nye a asak hpe kashun la kau lu ai n rai; nye a myit hte ngai nawng ya kau nngai. Nye a asak hpe nawng kau ya na ahkang hte, bai lu la na ahkang ngai lu nngai; ndai gaw, nye a Wa ngai hpe hkang da ai majaw rai nga ai.

Ya hti ai gaw, Madu a Kabu Gara Shiga rai nga ai.

HKRUNG RAWT SAI YESU GAW KANING RE HKUM HKRANG LU AI KUN?

M.V Toroshita mying ai hka sanghpaw kaji gaw gumhpraw dum kaw bungli galaw ai ni law law hpe htaw let, grai mying dang hkung ai pyaw chyai shara re ai Philippines mungdan na, Boracay Panglai hkinggau de sa wa nga yang, 1991 ning March shata 28 ya, Chyoipra ai mali ya shani lup mat wa sai. Dai hta si lawm mat ai ni a wenyi minla lam gamung shahta sai.

Dai yawn hkyen lam byin ai hpang lahkawng na rai yang, dai kaw si mat ai ni law malawng magam gun ai gumhpraw dum na chying hkyen hta zaibru hte hka madi ai lagaw hkang ni hpe shana zawng ai wa gaw mu ai da. Hkrat si mat ai hta ma kaji ni mung lawm nga ai. Dai byin ai hpang, zawng ai wa gaw dai rung de shana e shang na ning dang wu ai. Kaga sin langa wa mung dung hkum gaw shi chyu chyu n tsa de rawt wa nna, saboi n tsa e mara taw ai hpe mu wu ai. Mau ai hte dai dum hkum hpe bai jahkrat tawn da yang mi na zawn sha bai rawt wa nna bai taw taw ai da. N kam ai hte kalang mi bai jahkrat tawn wu ai. Dai dung hkum mung masum lang ngu na bai sharawt lung wa ai shaloi chyawm gaw hkrit ai hte shinggan de hprawng dum bre mat wa sai da!

Nanhte hta na kadai wa minla hpe mu yu sata? Minla gaw kaning san ai rai? Kabu gara shiga gaw Madu bai hkrung rawt ai hpang minla a lam tsun wa sai. Sape ni chyawm gaw kajawng ai hte hkrit gari mat ma ai rai nna, minla mu ga ai nga nna myit nga ma ai (24:37) Yesu gaw shanhte ung ang nga ai hpe shamat kaw na matu “Ngai hpe masawp yu mi, minla ngu ai gaw, ngai hpe nanhte mu ai zawn, ashan hte nnut nra rawng ai n rai” (39) ngu nna tsun mu ai. Madu gaw nga kakang hpe pyi sha dan hkra rai shi hta hkum hkrang nga ai lam madun dan sai. Hkrung rawt sai Hkristu gaw kaning re ai hkrum hkrang lu ai kun?

“Kadai wa sumsing lamu de lung wa mayu ai kun?” Ngu ai laika ka ai “Jim Auer” ka da ai hta, hkrung rawt sai Hkristu a hkum hkrang gaw moi na hte shai nga ai. Dai gaw minla mung n rai, hkum hkrang hte wenyi hka taw ai mung n rai, nga ai. Hkrung rawt sai Madu gaw sha lu ai, lu lu ai, raitim chying hka, shakum zawn re ai arung arai ni shi hpe n shing dang lu ai. Shi myit ra ai hte maren, paw dan lu ai, mat mat mai ai. Anhte a hkrung rawt ai hkum hkrang mung dai zawn rai na hpe tsun dan ai la mi rai kun.

Hkrung rawt sai Madu a dan pru dan ai lam gaw, Sape ni a htum mat hkyen nga ai makam masham hpe n-gun jaw ya ai rai sai. Shi gaw kaja wa Messiah rai nga ai kun? Kaja wa shi gaw si ai kaw na bai hkrung rawt sai kun? Sape ni gaw kamsham na hkrit ai zawn rai nga ai. Dai gaw kalang lang anhte hkrat sum ai aten na myit masa hte mung bung nga ai. Chyoipra ai wenyi gaw Nawku hpung hpe matut lam madun shatsam ya nga ai hpe anhte kamsham ga ai. Raitimung, kalang lang anhte a makam masham gaw myit ung ang lam a adawt ai hpe hkrum ga ai. Ga shadawn, machyi makaw mai tsai wa na matu nsim nsa akyu hpyi ai raitim, hpa mahtai mung n lu la ai. Anhte tsawra ai ni, anhte hpe manu mana machyi hkra galaw ya ai, (snr) n chye na ai aten ni hta Karai Kasang hpe n htan shai ai. Dai gaw anhte a makam masham gaw agung alau hte laja lana re ai mayak mang hkang ni hpe lai di nga ai. Makam masham ngu ai gaw ngwi pyaw ai aten raitim, ru yak aten hta raitim Karai Kasang hpe hkap la ai hte kamsham ai lam rai nga ai. Hta n ga, Karai Kasang hpe hkrit hkungga ai hte tsawra ai masha ni gaw mayak manghkang hte ung ang ai lam kaw na lawt lu na ngu n tsun lu ai hpe gashaka dingsa na Yoba a lam gaw anhte hpe sharin ya nga ai.

Sawn sumru mai ai lam;    Makam masham hpan masum nga ai ngu tsun ma ai. Agung alau hte mayak mang hkang n nga ai gaw ma chyai ai hte bung ai. Chyam yu hkrum ai shaloi ung ang myit mahtang dang kau ai rai yang hkalung ai makam masham rai nga ai. Ung ang ai hpe dang kau lu ai rai yang she jet ai makam masham rai nga ai. Ndai ni hta na ngai gara makam masham hpe mahtang lu da ai kun? Hpa majaw rai?

2018: PASKA LADAW HTA LABAN (3) SHANI NA CHYUM LAIKA

PASKA LADAW HTA LABAN 3

15th April 2018

CHYUM MUNGGA DAW 1

Kasa 3:13-15, 17-19

Ya hti na gaw, Kasa laika hta na rai nga ai.

Petru gaw shawa masha ni hpe tsun ai gaw: Israela masha ni e, Abraham, Isak hte Yaku a Karai Kasang nga ai, anhte a ji wa ni a Karai Kasang gaw, Shi a Shangun Ma Yesu hpe yawng mayawng hta grau ai hpung shingkang jaw ya nu ai: nanhte mahtang dai Yesu hpe ap kau myit dai rai nna, Pilatu shi hpe dat kau na myit da yang, nanhte gaw Pilatu a man e dai wa hpe nyet kau myit dai. Dai chyoi pra ai hte ding hpring ai wa hpe nanhte mara shagun da nna, masha sat ai wa hpe mahtang hpyi la nhtawm, asak Madu hpe nan sat kau myit dai. Karai Kasang chyawm gaw si ai ni kaw na shi hpe jahkrung sharawt la nu ai: anhte mung dai lam a sakse ni rai nga ga ai. 

Ya rai ti mung, hpu nau ni e, nanhte hte nanhte a du salang ni dai lam hpe n chye nna galaw kau ai hpe ngai chye nga nngai. Dai gaw, Karai Kasang a Hkristu nni nkri hkrum na ra ai nga nna, myihtoi ni yawng a n-gup hte, Karai Kasang shi nan tau tsun ai lam hpe hkan shadik ai rai nga ai. Dai rai nna, nanhte a shut hpyi mara raw mat na matu, myit malai lu nna, Karai Kasang hpang de kayin wa marit, ngu nna Petru hkaw tsun dan wu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 Yawhan 2:1-5

Ya hti na gaw, Kasa Yawhan shagun dat ai laika langai hta na rai nga ai.

Ngai shu ngai sha ni e, nanhte shut hpyi mara n galaw myit ga, ndai shadum ai ga nanhte hpe ka dat nngai. Rai ti mung, masha langai ngai mara galaw hkrup sayang gaw, Kawa a man e anhte a matu htinglu htinglai ya ai wa anhte lu ga ai: dai wa gaw Yesu Hkristu ngu ai, ding hpring ai Madu rai nga ai. Dai Yesu Madu gaw anhte a mara hpe la kau ya ai gawng malai hkungga rai nga ai; anhte a mara hpe sha n rai, mungkan ting a mara hpe mung shi gun la kau ya ai. Karai Kasang hkang da ai ga hpe anhte hkan shatup yang gaw, Shi hpe chye chyap nga ai hpe anhte chye lu ga ai. Ngai shi hpe chye chyap nngai nga nna, marai langai ngai tsun ti mung, Karai Wa hkang da ai ga hpe n hkan shatup yang, dai wa gaw tengman ai hpe n hkap la ai majaw, masu ai wa rai nga ai. Kadai rai ti mung, Karai Kasang a mungga hkan yang gaw, Madu a tsaw ra ai lam dai wa hta e kaja wa teng teng hkum tsup wa salu ai. 

Ya hti ai gaw, Karai Kasang a mungga rai nga ai.

KABU GARA SHIGA

Luka 24:35-48

Ya hti na gaw, Luka a laika hta na Kabu Gara Shiga rai nga ai.

Yesu bai hkrung rawt ai shani e sape lahkawng gaw Ema-u mare de sa wa ma ai. Yerusalem mare de bai wa nhtawm, shan sa wa nga yang byin ai lam ni hte, muk ahkyep karan jaw ai shaloi Yesu re ai chye lu ai hpe mung, kasa shi langai hpe tsun dan ma ai. Dai lam hte hpe shanhte jawm tsun nga yang, Yesu hkum nan shanhte a ka-ang e tsap nga nna, Nanhte ngwi pyaw nga myit ga, ngu nna shanhte hpe tsun mu ai. Sape ni chyawm gaw kajawng ai hte hkrit mat ma ai rai nna, Minla mu ga ai nga nna myit nga ma ai. Yesu gaw, Nanhte hpa rai myit ung ang nga myit ta? Ngai nan rai nga nngai, Nye lata hte lagaw hpe yu yu mu: ngai hpe masawp yu mi; minla ngu ai gaw, ngai hpe nanhte mu ai zawn, ashan hte nrut nra rawng ai n rai, nga nna sape ni hpe tsun nhtawm, shi a lagaw lata ni shanhte hpe madun dan mu ai. Shanhte gaw nau kabu lai nna n kam lu ai majaw, mau let tsap nga ma ai. Dai rai nna Yesu gaw, Nang e shahpa lama mi lu myit ni ? ngu nna shanhte hpe san mu ai. 

Shaloi nga kakang daw mi shanhte shi hpe jaw sha mu ai. Shi gaw dai la nna, shanhte a man e sha dan nga ai. Shaloi Yesu gaw, Mawshe a tara hta, myihtoi ni a laika hte Shakawn Kungdawn Laika hta mung, ngai hpe sha-ang nna ka da ai lam mahkra dik wa na rai nna, nanhte hte rau ngai naw nga yang, ngai nanhte hpe tsun ai mungga a lachyum ndai rai nga ai, ngu nna shanhte hpe tsun mu ai. Shaloi Chyum Laika ga ni hpe chye na lu na matu, shi shanhte a myit hpaw ya nna, Hkristu gaw nni nkri hkam la nna, masum ya nhtoi hta si ai ni kaw na bai hkrung rawt wa na ra ai, ngu nna ka da ai lam hpe mung myit dum nga mu. Yerusalem mare hta e hkaw hpang nga mu: nanhte gaw ndai lam ni a sakse ni rai nga myit dai, ngu nna Yesu gaw shi a sape ni hpe tsun dat mu ai.

Ya hti ai gaw, Madu a Kabu Gara Shiga rai nga ai.

2018: PASKA LADAW HTA LABAN (2) SHANI NA MUNGGA

Bai hkrung rawt sai Madu Yesu gaw myit daw myit hten let hkrit tsang nna makoi nga ai Shi a sape ni hpang de du sa nna ngwi pyaw sim sa ai hpe jaw ya let Chyoi Pra ai Wenyi hpe jaw ya sai re. Dai aten kaw nna sape ni a myit hta ung ang ai lam ni, hkrit tsang ai lam ni hte myit daw hten ai lam ni mat mat nna, Shi Madu hpe sakse hkam let tara mungga ni hpe hkaw tsun hpang wa sai re.

Bai hkrung rawt sai Madu Yesu gaw sape ni hte rau nga ai zawn anhte a makau kaw mung nga ai hpe dum shai nna anhte a hkrit tsang ai lam ni, myit daw hten ai lam ni hpe lai di lu let, ngwi pyaw sim sa ai hpe hkam la lu u ga Shi Madu hpe anhte a prat hta hkap la lu na matu shakut shaja sa wa lu u ga.

HKRUNG RAWT SAI MADU HTA KAMSHAM AI

Marai rai gaw nang hpe myi pat kau ya nna, na a shawng e nga ai ‘ hka pung ’ hta hka rawng n rawng san ai ngu ga. Lama mi nang galaw lu ai gaw hka pung de du hkra sa nna dai hta hka rawng n rawng chyam yu na. Dai hpe gaw mahkrum madup hte sharin la ai ngu ai.

Kaga langai mi nang di lu na gaw nlung kasha la nna dai hte kabai bang dat yu na. Hka pung hte hkra ai nsen na jang hka n rawng ai hpe nang chye nna, kapruk ai nsen na yang gaw hka rawng nga ai hpe chye lu na. Dai gaw sawn sumru nna machye machyang lu la ai lam rai nga ai. Masum ngu na lam langai mung nga ai. Dai gaw marai rai hpe yu shangun nna, hka rawng ai n rawng ai hpe bai tsun shangun na. Dai zawn re chye na ai gaw kam sham ai lam rai nga ai.

Mahkrum madup, sawn sumru yu ai lam hte kam sham ai lam gaw ndai prat hta machye machyang lu la na lam masum rai nga ai. Anhte gaw hkam sha lu ai mahkrum madup ni hta anhte myit hte sawn sumru yu ai hte, anhte a kraw salum hta kam sham ai hku nna sharin la Nga ai kun? Hpaji chye ai ni tawt sawn da ai hku rai yang anhte machye machyang a 80% hpe masha ni tsun tawn da ai lam hpe kam sham ai hku na sharin la lu ai da.

Anhte hta na masha loi mi sha mungkan de bu hkawm yu na re. Mungkan labau (World History) sharin ai shaloi, mungkan hta mungdan law law nga nna shanhte a shara ni, nga ai amyu sha ni a lam ni hpe mung chye la nga ai. Kaja wa sha du yu sai masha ni chyu sha mu yu sai lam ni, shanhte a nga sa lam, htunghkying ni hpe atsawm tsun dan lu ai. Shanhte a mahkrum madup hpe tsun dan ai shaloi, kam sham nna, dai mungdan ni hpe myit shingran mu lu nga ai. Shanhte tsun dan ai a majaw anhte mung du yu sai zawn rai hkam sha lu chye nga ai.

Anhte a makam masham machye machyang law malawng mung Chyoipra ai chyum laika anhte hpe tsun dan ai hta kam sham ai kaw na lu la ai. Chyum laika hta rawng ai masha ni Madu Yesu hte hkrum zup lu ai, shi a prat magam bungli hte shi sharin shaga ai hpe tsun dan ai.

Yesu si hkam ai hpang shi a sape ni gaw grai myit n pyaw ai, myit daw hten mat ai, hte hkrit gari nna makoi hprawng hkawm mat ai hpe bai myit yu ga. Raitim, Paska Poi manap hta shanhte hta lama mi byin wa sai. Nachying lak lai ai hku nna shanhte galai shai wa sai. Shanhte kaja wa nan kabu gara ngwi pyaw ai hte pru sa nna hkrung rawt sai Madu Yesu a lam tsun hkawm ma ai. Shanhte zingri zingrat sat kau na pyi n hkrit n tsang ai sha myit sharawng awng wa sai. Ndai ta latsup mi sha re ai masha ni a prat hte hpaw tsun ai lam gaw shinggyim labau hpe galai shai shangun sai. Ndai hpaji n sharin yu ai masha ni Yesu a bai hkrung rawt ai hpe masu hkawm ai ngu ga, shanhte hta na marai rai gaw, zingri na, sat kau na hkrit nna hpaw tsun dan kau na nhten.

Raitim, kadai mung dai zawn n-galaw ai. Hkung rawt sai Madu hpe sakse hkam ai lam gaw kachyi mi pyi myit ung ang ai lam, myit kaji ai lam n nga ai hta n-ga, grau grau she n–gun ja, atsam marai rawng ai hte hkaw tsun wa masai. Mau hpa lamik kumla galaw lu ai atsam pyi lu la ma ai. Kasa Htawma galaw ai zawn Yesu a garep hta layung anhte n hkra lu ai, Yesu a hkrung rawt ai hpe sape ni zawn n hkam sha lu ai rai tim, Chyoipra ai chyum laika a sakse hkam ai hpe kam sham lu nga ai.

Sawn sumru mai ai lam; Madu Yesu si mat ai hpang hte bai hkrung rawt ai hpang na sape ni a mahkrum madup hpe myit sumru yu ga. Ya aten ngai na prat gaw gara madang hta rai nga ai kun? Yesu si mat ai hpang na kun? (snr) bai hkrung rawt ai Paska hpang na kun?

2018: PASKA LADAW HTA LABAN (2) SHANI NA CHYUM LAIKA

PASKA LADAW HTA LABAN 2
8th April 2018
CHYUM MUNGGA DAW 1

Kasa 4:32-35

Ya hti na gaw, Kasa Laika hta na rai nga ai.
Kam sham ai shawa hpung ting gaw myit mang langai sha rai nga ma ai: kadai mung, tinang lu ai arai hpe, nye a n tsun ai sha, yawng mayawng hpe jawm lang ma ai. Kasa ni mung Madu Yesu bai hkrung rawt ai lam hpe, atsam kaga hte sakse hkam ya ma ai rai nna, masha ni a man e shanhte mahkra myiman pa nga ma ai. Dai hta n-ga, hpung masha ni hta kadawn ai masha langai mi pyi n nga ai; kaning rai nme law, ga htingra lu ai ni, nta lu ai ni kadai mung, dai dut nna lu la ai gumhpraw hpe, kasa ni kaw sa ap ya ma ai. Dai rai nna, kadawn ai wa kadai hpe mung, rap shara nna, karan jaw karan ya ma ai.
Ya hti ai gaw, Karai Kasang a mungga rai nga ai.

CHYUM MUNGGA DAW 2

1Yawhan 5:1-6

Ya hti na gaw, Kasa Yawhan shagun dat ai laika langai hta na rai nga ai.
Tsawra ai ni e, Yesu gaw dai Hkristu nan rai nga ai, nga nna kam sham ai wa kadai rai timung, Karai Kasang a kasha rai nga ai. Kawa hpe tsawra ai wa gaw, Kawa e shaprat ai kasha mahkra hpe tsawra nga ai. Karai Kasang hpe tsawra ai hte, Shi hkang da ai ga hpe hkan shatup yang gaw, Karai Kasang a kashu kasha ni hpe anhte tsawra nga ga ai hpe chye lu ga ai. Kaning rai nme law, Karai Kasang hkang da ai ga hpe hkan shatup ai gaw, Shi hpe tsawra ai lam madung rai nga ai. Shi hkang da ai ga mung yak la nga ai n rai: hpa majaw nga yang, Karai Kasang a kasha kadai rai ti mung, mungkan ga hpe dang kau nu ai. Mungkan ga hpe dang kau lu ai padang lam gaw anhte a makam masham rai nga mali ai.Kaning rai nme law, mungkan ga hpe kadai wa dang kau lu a ta? Yesu gaw Karai Kasang a Kasha rai nga ai hpe kam sham ai wa chyu sha, mungkan ga hpe dang kau lu ai. Dai Yesu Hkristu gaw hka hte mung, sai hte mung sa du ai wa nan rai nga ai; hka hte sha n rai, hka hte mung sai hte mung Shi sa du nga ai. Chyoi Pra ai Wenyi mung tenman ai npawt rai nga ai majaw, dai wenyi nan shi a matu sakse hkam ya nga ai.
Ya hti ai gaw, Karai Kasang a mungga rai nga ai.

KABU GARA SHIGA

Yawhan 20:19-31

Ya hti na gaw, Yawhan a laika hta na Kabu Gara Shiga rai nga ai.
Dai laban bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sayang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai. Shing nga tsun nhtawm, Shi a lata hte garep shanhte hpe madun dan wu ai. Sape ni mung Madu hpe mu lu yang, kabu gara nga ma ai. Bai, Yesu gaw, Nanhte ngwi pyaw nga myit ga; nye a Wa ngai hpe shangun dat ai hte maren, ngai mung nanhte hpe shangun dat made ai, ngu mu ai. Shing nga nhtawm sape ni a ntsa e nsa kawut nna, Chyoi Pra ai Wenyi hpe hkap la mu; kadai a shut hpyit mara hpe rai ti mung, nanhte raw dat yang gaw, raw mat na ra ai; kadai a shut hpyit mara hpe rai ti mung, nanhte shagun da yang gaw, dai mara naw nga na ra ai, ngu nna shanhte hpe tsun wu ai. Shing rai Yesu sa du ai shaloi, kasa shi lahkawng hta lawm ai, Marun Ma ngu ai Htawma gaw, shanhte hte rau n nga ang ai. Dai rai nna kaga sape ni shi hpe, Anhte gaw Madu hpe mu lu saga ai, ngu nna tsun dan mu ai. Htawma shyawm gaw, Shi a lata hta hpri hkang hpe ngai n mu, dai hpri hkang hta nye a layung n shawn yu, yang gaw, ngai n kam nngai, nga nna shanhte hpe tsun wu ai.
Dai hpang matsat ya du jang, Yesu a sape ni nhku e bai hpawng nga ma ai rai nna, Htawma mung shanhte hte rau lawm nga ai. Chyinghka la da ti mung, Yesu sa du nna, shanhte a ka-ang e tsap let, Nanhte ngwi pyaw nga myit ga law, ngu wu ai. Shaloi, shi gaw Htawma hpe, na a layung nang de ladawn nna, Nye a lata hpe yu yu u; na a lata ladawn nna Nye a karep hta bang yu u; n kam n sham ai myit hpe kau da nna, kam sham u, ngu wu ai. Dai rai nna, Htawma gaw, nye a Madu, nye a Karai rai nga ndai, ngu nna shi hpe htan wu ai. Yesu gaw, Htawma, nang ngai hpe mu lu ai majaw, kam sham nit dai; n mu lu ti mung kam sham ai ni gaw ‘a’ lu ma ai, ngu nna shi hpe tsun wu ai. Ndai laika hta n ka da ai lamik kumla kaga law law mung, Yesu gaw shi a sape ni a man e galaw dan nu ai; rai ti mung, Yesu gaw Karai Kasang a Kasha hte dai Hkristu nan rai nga ai hpe kam sham nna, Shi a amying ningsang a marang e asak hkrung ai lu la myit ga, nga nna ndai hte wa ka tawn nga ai.
Ya hti ai gaw, Madu a Kabu Gara Shiga rai nga ai.

HKRISTU GAW AHKRUNG NGA AI

Ndai mabyin gaw num kasha marai mi a lam rai nna, shi a kanu yan kawa gaw makam masham kaba la ai raitim ngwi pyaw ai lam gaw shut ai nga ai (Puritan masa) hpe grau hkan ai Hkristan ni rai ma ai. Laban shani shagu, htingbu kasha ni hte nta shing gan de gin sup pyaw ai aten, shi kanu gaw myi jat sha shakap la rai Chyum laika hpe hkying hkum law

law lagawn na daram hti taw nga nga re ai. Nhtoi law law lai mat ai hpang, num kasha dai tsun na shakut sai. “Nu e, sumsing lamu kata gaw kaning san ai kun i? ngu san yang kanu gaw, ‘ya na zawn sha re, ngai sha e’ ngu bai htan ai. Shaloi num kasha gaw, ‘Nu e, Sumsing lamu kata hta ndai zawn sha rai yang, ngai gaw “Ngarai” de she sa mat na ’ngu tsun dat ai da.

Num kasha shi hta teng man ai, jaw ai Hkristan ningmu rawng nga ai. Kaja ai ngu ai gaw kabu gara ai hte san seng ai lam hpe shi dum chye da nu ai.

Hkristan makam masham gaw ‘Paska Poi’ a majaw kabu gara ai, myit mada ai hte awng dang ai lam rai nga ai. Bai hkrung rawt ai lam a majaw, anhte a yubak hkam sharang ai lam gaw lachyum rawng nga ai, si ai hta n htum ai sha Madu Yesu zawn bai hkrung rawt na Hkristu sharin shaga ai hte maren awng padang lu la na re hpe anhte chye la lu sai. San Pawlu ka da ai hte maren, “Hkristu gaw bai n hkrung rawt a yang gaw, anhte a hkaw dan ai ga kaman li la rai nga ai hte, nanhte a makam masham mung kaman li la sha rai nga ai” (1 kor 15: 14) nga ai. Paska poi gaw myit dum galaw ai lam sha n rai, moi na hpe masat shagrau da ai lam n rai, abyin nga ai lam langai rai nga ai. Hkristu gaw ahkrung nga ai. Dai re ai majaw, anhte hpe ten shagu ningdat nga ai lam gaw, shani shagu na anhte a n sa sa ai, amu bung li galaw ai, matsan dum yu lajang ai, tsawra ai hte hkyela ai lam hku nna Hkristu hpe ahkrung nga  shangun ai rai nga ai.

“ Shani shagu na Madu hte hkrum zup ai ” mying ai laika buk hpe ka ai ‘ David Rosage ’ gaw dai laika buk hta, shi nam mare lam maw hta ‘ mawdaw ’ jak a sau pung magap kapaw ga mat nna jak sau yawng hkaw mat ai hte jam jau hkrum taw ai da. Gam mi arawng, truck mawdaw du wa nna gawt ai wa gaw shi hpe garum la sai. La kasha dai shi a mawdaw  hpe deng law law garawt la ya sai. Ni dik htum ai seng langai de du ai shaloi la dai gaw, jak byen sara shaga ya ai, hkying hkum loi rai jang mawdaw mung kaja mat ai. David shi a hkrun lam bai matut lu ai. Mawdaw garawt ya nna garum la sai la shabrang hpe gumhpraw jaw na nga ai shaloi, hpang de lam ntsa jam jau hkrum ai ni hpe bai n htang garum mu,’ nga nna sha tsun sai. Jak byen sara mung shi lang kau sai sau manu sha la ya ai. Shi tsun ai gaw, “ruyak jam jau hkrum nga ai ni kaw nna amyat n kam la ai” da!

Kaja wa sha anhte a makau grupyin hta ting kyeng n myit ai sha ra kadawn nga ai ni hpe ahkying aten, sut gan, tinang ning tawn ai hte garum la sai masha kaja law law nga nga ai. Dai zawn re ai garum matsan dum la na myit, tatut magam ni gaw kaja wa sha Hkristu gaw dai ni nan ahkrung nga ai lam madun ya ai kaja dik ai sak se rai nga ai.

Sawn sumru mai ai lam; Ngai ra kadawn nga  ai shaloi dai zawn matsan dum nna  garum la sai ni gaw kadai wa rai nga ta? Ngai a prat hta dai amu ni gaw kaning rai hkrum hkra sai kun? Ngai a prat hta kaja wa Hkristu ahkrung nga ai lam kaning rai sak se hkam lu na rai i?

2018: PASKA POI SHANI NA CHYUM LAIKA

PASKA POI SHANI YESU BAI HKRUNG RAWT AI NHTOI

1st April 2018

CHYUM MUNGGA DAW 1

Kasa Laika 10:34a, 37-43

Ya hti na gaw, Kasa Laika hta na rai nga ai.

Roma hpyen du Korinliu a nta e, Petru ga hpaw nna, shanhte hpe hkaw tsun dan ai gaw. Yawhan kashin kamun lam hkaw dan ai hpang, Galile mung kaw nna Yuda mung ting kajai gara wa ai lam hpe, nanhte chye nga myit dai: dai gaw, Nazaret na Yesu a lam rai nga ai. Karai Kasang gaw, Chyoi Pra ai Wenyi hte mung, n-gun atsam hte mung, shi hpe chya ya wu ai; Karai Kasang shi hte rau nga nga ai majaw, mai kaja ai amu ni shi galaw nna, nat gunglau e zingri zingrat hkrum ai ni yawng mayawng hpe shamai ya let kawan katsan hkawm nga ai. 

Shing rai, Yuda mung ting hpe Yerusalem mare hta e, shi galaw ai amu yawng mayawng a sake ni anhte rai nga ga ai: dai wa hpe nan shanhte hpun hta jen sat kau mu ai; Karai Kasang chyawm gaw masum ya nhtoi hta shi hpe jahkrung sharawt la wu ai rai nna, mung masha yawng a man e n rai, Karai Kasang shawng de lata san da sai sakse ni a man e sha, dai wa hpe dan pru shangun wu ai. Dai sakse ni gaw, si ai kaw na Shi bai hkrung rawt ai hpang e, Shi hte rau lu sha ai ni anhte nan rai nga ga ai. Shi Madu nan mung, hkrung ai ni hte si ai ni nga sai lam, mung masha ni hpe tsun dan let sakse hkam ya let, Yesu hpe kam sham ai ni yawng, Shi a mying ningsang a marang e, mara raw dat kau ya ai hkrum na mara ai, ngu nna tsun dan ma ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Kolose 3:1-4

Ya hti na gaw, Kolose masha ni hpang de San Pawlu shagun dat ai laika hta na rai nga ai.

Hpu nau ni e, nanhte Hkristu hte rau tengman ai asak de bai rawt wa manit dai rai nna, dai Hkristu gaw sumsing lamu hta Karai Kasang a hkra maga e dung nga ai majaw lamu mungdan na lam ni hpe tam nga mu. Ga ntsa na lam ni hpe myit hkum manoi mu; ntsang mungdan a lam ni hpe myit manoi nga mu. Kaning rai nme law, nanhte si mat ai ni rai nga myit dai rai nna, nanhte a asak Hkristu hte rau Karai Kasang hta e kyem da nga ai. Anhte a asak ngu ai Hkristu gaw dan pru wa ai shaloi e, nanhte mung shi hte rau hpung shingkang hta dan pru na marin dai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 20:1-9

Ya hti na gaw, Yawhan a laika hta na Kabu Gara Shiga rai nga ai.

Dai laban bat a shawng shani e, nhtoi garai n htoi yang, Maria Magdalena jau jau e lup de sa wa ai rai nna, lup chyinghka la ai nlung sit mat nga ai hpe mu wu ai. Dai majaw shi gaw Simun Petru yan Yesu tsawra ai sape hpang de gat wa nhtawm, Madu hpe lup de na shanhte la nna, kanang e tawn da mu ai hpe anhte n chye ga ai, ngu nna, shan hpe tsun mu ai. Dai majaw Petru yan kaga sape pru nna, lup de sa wa ma ai. Shan rau gat sa wa yang, kaga sape gaw Petru hpe gat lai kau da nna, lup de shawng sa du ai. 

Shaloi shi gum yu yang, sumpan gin-yan taw nga ai sha mu wu ai; rai ti mung, shi kata de n shang ai. Simun Petru chyawm gaw shi a hpang e hkan gat nang nna, dai de du jang, kata de shang yu nga ai. Sumpan ginyan taw nga ai hpe mung, baw na hpajet gaw sumpan hte rau n re ai, kaga rai nna katsu taw nga ai hpe mung, shi mu wu ai. Dai majaw, lup de shawng du ai, kaga sape mung hkan shang wa nna, mu lu ai hte kam sham wu ai.Kaning rai nme law, Yesu gaw si ai ni kaw na bai hkrung rawt wa na ra ai ngu nna, Chyum Laika hta rawng nga ai hpe ndai ahkying du hkra, shan n chye madat ma ai.

Ya hti ai gaw, Madu a Kabu Gara Shiga rai nga ai.

2018: KUNGLA SHAMAN POI SHANI NA MUNGGA

Dai ni laban bat hpe kungla shaman poi shing nrai Madu Yesu Hkristua a nni nhkri yu bak hkam ai laban nhtoi rai nga ai. Madu Yesu gaw hkawhkam rai nna Yerusalem mare de shang wa ai shaloi masha wunawng gaw Shi Madu hpe kabu gara let hkap tau la sai re.

Dai ni na nhtoi gaw Chyoi Pra ai Laban bat a shawng nnan na nhtoi mung rai nga ai. Madu Yesu gaw nni nhkri yu bak hkam nna wu dang ntsa si hkam ngut ai hpang bai hkrung rawt ai Paska a mungsung hpe myitdum nna kalang mi bai galaw ai Chyoi Pra ai laban bat rai nga ai.

Madu Yesu hpe Hkristu Hkawhkam ngu nna hkap la sai anhte ni gaw ngwi pyaw ai aten ahking hta sha n-ga, ru yak jam jau hkrum ai aten ahking hta rai tim Karai Kasang hte nhka ai sha, galoi mung manoi manat let sak hkrung nga sa lu u ga.

SIMSA LAM A HKAWHKAM

Ndai shalai wa ai poi hta Yerusalem mare de lung wa na matu Yesu  gaw nachying ja ai share shagan myit ra na re. Kam ging na daram pyi n rai nga ai . Kasa Yawhan a kabu gara shiga hta “Ya shalai wa ai poi du wa nna masha law law wa Yerusalem mare de lung wa ma ai .... Dai majaw shanhte gaw Yesu hpe tam nna .... Nanhte kaning rai timung shi nga ai shara chye yang gaw, madun lu na re ai, ngu nna hkang da ma sai” (Yh 11:55-57)  ngu nna  ka da ai.

Dai gaw Madu Yesu kaja wa Yerusalem mare de shang wa na matu lajang sai. Madu Yesu du shang wa ai lam hte masha ni shi hpe hkap hkalum la ai a grau sung ai lachyum gaw hpa wa rai ta? Madu Yesu mare kata de du shang wa ai hpe bai yu yu ga! Kasa Yawhan tsun da ai, ‘ Shaloi Yesu gaw lawze kasha mu nna jawn wu ai; dai gaw Ziun shayi sha e, hkum hkrit et, yu u , na a hkawhkam gaw lawze kasha jawn nna du sa ra ai, nga nna ka da ai hte maren rai nga ai’ (Yh 12: 14- 15) Yesu mare de shang wa ai shaloi, masha law law namhtan hpun lakung ni daw lang nna shi hpe sa tau la let; “Hawsana ! Dai Madu a mying hte du sa ai wa ngu ai, Israela a hkawhkam gaw a nga u ga law, ngu nna garu ma ai: (Yh 12:13) kasa

Yawhan gaw ndai lam hpe alak mi rai tsun dan let hpung dim sai. Dai gaw, ‘Dai lam ni hpe shawng e gaw shi a sape ni n chye ma ai , rai ti mung Yesu gaw hpung shing kang lu la ai hpang e she shi hpe sha ang nna shing nga ka da ai mung, dai hku raw shanhte shi hpe di nu  ai mung dum chye ma ai. (Yh 12: 16)

Madu Yesu, Yerusalem mare de shang wa ai a grau sung ai lachyum wa hpa rai ta?

Masha nkau mi chyawm gaw lawze kasha nga ai majaw mani hpa shatai kun? Raitim dai aten hta, lawze ngu ai gaw simsa lam rai nna hpyen gasat na hpyen la htaw ai gumra hte chyawm gaw n bung nga ai. Hkyela Madu (Messiah) gaw lawze kasha jawn let Yerusalem mare de shang na lam Zahkari gaw myi htoi htoi da sai. Yesu gaw Zahkari a myi htoi lam hpe shatup sai. Dai zawn galaw ai a marang e ahkyak ai lam lahkawng hpe Yesu gaw tsun dan sai, shi gaw Hkyela Madu (Messiah) re ai lam hte hkye hkrang la ai magam gaw kaning rai na lam hpe chye shangun sai.

• Simsa ai hte lawze kasha hta jawn let Yerusalem mare de shang wa ai majaw masha ni myit da ai hta myit yu na lam shang wa sai. Dai gaw, Hkyela Madu gaw Majan gasat ai hkawhkam n rai na re ngu ai hpe shaleng ya sai. Madu Yesu a hkye hkrang la ai hte seng ai myit ai lam gaw;

• Majan sum ai ni a daw jau ai hpe hkam la na matu du sa ai n rai nga ai. Shi gaw lahput hput di let shi a sape ni a lagaw kashin ya na du sa ai.

• Masha ni hpe zup hpawng la nna kaga myu sha ni hte gasat na matu du sa ai nrai. Shi gaw masha ni hpe zup hpawng la nna matsan ai, kawsi hpang gara ai, n dawng n yawt ai hte n tara ai lam yawng hpe gasat na matu du sa ai re.

• Madu Yesu gaw masha ni hpe jahpoi asawng na matu nrai, mara raw ya na hte hkyela na matu du sa ai rai nga ai.

• Yesu gaw masha ni a myit mang da ai lam hpe jahtau kaw na matu n rai, raitim shanhte n myit mada lu ai lam hku nna hkum tsup ya na she du sa ai rai nga ai.

• Shi a hpang hkan na matu masha ni hpe laja lana amying jaw na matu n rai, saw shaga na matu she du sa ai rai nga ai.

Sawn sum ru mai ai lam:    Ndai lam ni yawng gaw ngai a matu hpa lachyum pru nga a ta? Madu Yesu hpe ngai a prat hta pru chye tawn da ai lam gaw ya aten ngai hpe kaning rai ningdat nga ai kun?