2018: KUNGLA SHAMAN POI SHANI NA CHYUM LAIKA

KUNGLA SHAMAN POI

25th March 2018

CHYUM MUNGGA DAW 1

Esaia 50:4-7

Ya hti na gaw, Esaia a laika hta na rai nga ai.

Hki ba hkrum ai wa hpe shalan shabran ai ga chye tsun lu hkra, Madu gaw sharin achyin hkam la ai sape ni a shinglet ngai hpe jaw ni ai. Shi a ga na la na matu, jahpawt shagu shi ngai hpe jasu nga ai: sape wa madat la ai zawn ngai mung madat la lu u ga, Madu nye a na hpe hpaw ya ni ai. Ngai mahtang lale kau ai hte kanut mat wa ai n rai. Ngai gaw kayet ai ni hpe nye a shingma, shabyi mun baw ai ni hpe nye a shabyi ap ya nngai, asawng asang di ai ni hte, mayen mahtaw bun ai kaw na nye a myiman kayin kau ai n rai. Kaning rai nme law, Madu gaw ngai hpe garum na ra ai; dai majaw, asawng asang di ai lam ni gaw ngai hpe myit n jahtum kau nga ai. Ngai gaw kaya kahpa n hkrum lu na, ngai chye ai majaw, nye myiman hpe mung nhpai lung zawn ngai shatai da nngai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Hpilipi 2:6-11

Ya hti na gaw, Hpilipi masha ni hpang de San Pawlu shagun dat ai laika hta na rai nga ai.

Hpu nau ni e, Hkristu Yesu gaw Karai Kasang nan rai nga timung, Karai Kasang hte maren rai nga na hpe n manoi nga ai sha, mayam madang hpe hkap la na matu, Karai a shingkang hpe raw tawn nna, shinggyim masha hte bung hkra tai wa sai. Shingrai, masha a hkum shan hku anhte kaw dan pru nhtawm, Shi hkum hpe shagrit shanem nna, si ai du hkra madat mara nga ai, kaja wa, wudang hta si ai du hkra madat mara nga ai. 

Rai ti mung, Karai Kasang gaw Shi hpe shagrau nna, amying yawng mayawng hta grau ai amying shingteng Shi hpe jaw da wu ai. Dai re ai amajaw, sumsing lamu tang hta, ginding aga tsang hta na hte, lawu tsang na lahput yawng hte gaw, Yesu a amying hte hput di na mara ai. Dai hta n-ga, Kawa Karai Kasang a hpung shingkang a matu mara, Yesu Hkristu gaw Madu rai nga ai, nga nna shinglet Yawng mayawng kajai gumhkawng nga na mara ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 15:1-39

Ya hti na gaw, Marku a laika hta na, anhte a Madu Yesu Hkristu a nni nkri yubak lam rai nga ai.

Yesu Hkristu hpe rim la ai hpang jahpawt jau jau e, dai salang hpawng hta lawm ai hkinjawng agyi ni, du salamg ni hte sara ni yawng hte gaw bawng hkut masai rai nna, Yesu hpe gyit nhtawm, Shi hpe dun wa nna, Pilatu kaw ap ya mu ai. Pilatu gaw shi jep yu nna, Nang Yuda ni a hkawhkam rai nga nni? ngu nna san yang, Yesu gaw, Nang tsun ai hte maren rai nga nngai, ngu nna htan wu ai. Hkinjawng agyi ni mahtang mara law law wa Shi hpe shagun ma ai. 4Dai rai nna Pilatu gaw, Nang hpa mung n htan ya nni? Shanhte nang hpe shagun ai mara gade wa law nga ai hpe yu yu u, ngu nna san wu ai, Yesu chyawm gaw ga hkaw mi pyi n htan wu ai rai nna, Pilatu grai mau nga ai. Dai poi a laman e, shanhte hpyi ai hte maren htawng rawng ai masha langai mi hpe Pilatu dat dat na htung nga ai. Dai aten e gumlau kabrawng ai hte masha sat ai hpung hta lawm ai, Baraba ngu ai wa langai mi htawng rawng nga ai. Shaloi shawa masha ni lung wa nna, htung hte maren htawng rawng ai masha langai ngai hpe dat dat na hpyi ma ai. Pilatu mahtang gawYuda ni a hkawhkam hpe dat dat na nanhte ra nga myit ni? ngu nna shanhte hpe htan mu ai. Kaning rai nme law, manawn masham ai majaw, hkinjawng agyi ni Yesu hpe ap kau mu ai hpe shi chye nga ai. Hkinjawng agyi ni chyawm gaw, shanhte a matu Baraba hpe dat dat u ga, nga nna shawa masha ni hpe myit shadut yu mu ai. Pilatu mahtang shanhte hpe bai htan nna, Rai taw, Yuda ni hkawhkam ngu nna, nanhte tsun ai wa hpe ngai kaning di na rai ta? ngu wu ai, shanhte gaw, Wudang hta jen da u, nga nna bai jahtau ma ai. 

Pilatu gaw, shi n hkru ai amu hpa galaw sata? ngu nna san mu ai. Shanhte mahtang, Wudang hta jen da u, nga nna grau jahtau bu ma ai. Pilatu gaw shawa masha ni hpe myit shapyaw ya mayu ai hte, shanhte a matu Baraba hpe dat ya nna, Yesu hpe anu kayat nhtawm, jen da ai hkrum u ga ap kau dat wu ai. Shaloi hpyen la ni gaw, Pretorium ngu ai htingnu a wang kata de Yesu hpe woi wa nna, hpyen dap ting hpe shaga tawn mu ai. Shanhte gaw hkyeng ai hpun nba Shi hpe jahpun nna, ju kagup hkri nhtawm, Shi hpe shagup ya ma ai hte, Yuda ni a hkawhkam e, nang a lu nit ga law, ngu nna shi hpe asawng let shakram ma ai. Bai mai-aw yan hte Shi a baw hpe kayet nna, Shi hpe mayen mahtaw bun mu ai hte, lahput di let nawku ma ai. Yesu hpe asawng asang di ngut jang, hkyeng ai hpun nba hpe shanhte raw kau nna, shi a hpun palawng hpe jahpun ma ai. Shaloi, wudang hta Yesu hpe jen da na matu, shi hpe dun sa wa ai rai nna, shi a wudang hpe hpai ya u ga, nam kahtawng na wa nna, lai hkawm sa wa ai Alesandru yan Ruhpu a kawa, Simun ngu ai Kureni mung masha langai mi hpe shagwi ma ai. Ya, Golgohta ngu ai shara de shanhte shi hpe dun du ma ai. Golgohta a ga lachyum gaw, Pungkum Kawng ngu ai rai lu ai. Shaloi mura hte tsabyi chyaru kayau nna, Yesu hpe jaw ma ai, rai ti mung, Shi n kam lu mu ai. Ya shanhte wudang hta e Shi hpe jen da nna, Shi a hpun palawng hpe karan tawn ai hte, langai hte langai la ang na matu hpai da da ma ai. Wudang hta shi hpe jen da ai gaw jahpawt ahkying jahku rai nga ai. Dai hta kaga, ‘Yuda ni a hkawhkam’ ngu nna shi a mara hpe madun ai laika ka shakap tawn mu ai. 

Yesu hte rau damya lahkawng hpe mung, shi a hkra maga de langai mi, pai maga de langai mi jen da mu ai. Lam e lai wa ai ni mung, Shi hpe asawng asang ngu nna,tinang a baw hpe kanga let, Aha! Nawku Htingnu hpe run kau nna, masum ya laman e bai de lu ai wa e, Na hkum hpe nan hkye la nna, wudang hta na yu wa rit, ngu mu ai. Hkinjawn agyi ni hte sara ni mung, dai hte maren asawng asang di let, masha kaga hpe shi hkye la ai; Shi hkum nan pyi n hkye la lu a hka! Shi hpe kam sham lu na matu, Israela a hkawhkam dai Hkristu gaw, anhte mu nga yang, wudang hta na ya yu hkrat wa u ga, nga nna shada da tsun ma ai. Yesu hte rau wudang hta jen da ai yan mung Shi hpe aroi arip ngu mu ai. Ya shani ka-ang e du yang, dai kaw nna ahkying masum du hkra, mung ting hta e nsin chyip rai mat ai; ahkying masum hta e, Yesu gaw nsen kaba hte, Eloi, Eloi, Lama sabakhtani? ngu nna jahtau wu ai; de a ga lachyum gaw, Nye a Karai Wa e, Nye a Karai Wa e, hpa majaw nang ngai hpe kau da nga n ta? nga ai rai lu ai. Shaloi dai makau e tsap nga ai ni nkau mi gaw, Yu mu, Shi Elia hpe shaga nga ai, nga ma ai. Shaloi marai langai mi gat sa nna, hka kamu hpe tsabyi hkri hta tsing la nhtawm, mai-aw nren hta shakap nna, Yesu a n-gup hta jaw mu ai rai nna, ‘Elia Shi hpe sa shayu la na kun, naw yu yu ga, ngu nna tsun ma ai. Yesu mahtang nsen kaba hte jahtau let nsa hti mat sai. Shaloi Nawku Htingnu na nba grang, ka-ang kren brang rai ga mat wa sai. Yesu gaw shing rai si mat ai hpe, shi a man e tsap nga ai hpyen latsa up ai du wa mu jang, Kaja wa, ndai wa gaw Karai Kasang a Kasha nan rai nga ai, ngu nna tsun ai.

Ya hti ai gaw, Madu a Kabu Gara Shiga rai nga ai.

2018: LUSHA GAM AI LADAW LABAN (5) NA MUNGGA

Mungkan ntsa hta masha law law wa nga ai, raitim mung masha nkau mi a asak aprat gaw manang ni a matu lak lak lai lai akyu pru ai hpe mu lu ai. Masha langai mi galaw mai ai mai kaja ai lam gaw dai masha a ap nawng ai myit masin hte shakut shaja ai lam hta madung nna masha law law hte akyu hkam la lu nga ai.

Madu Yesu Hkristu nni nhkri yubak hkam nna si hkam ai a marang e masha law law hte hkye hkrang la hkrum sai re. Shi a asak hpe nawng jau nna galaw lai wa sai Madu a magam bungli a majaw masha law law hte akyu hkam la lu sai re.

Ndai lusha gam ai ladaw hta tinang a hkum hte myit hpe ndang nyet kau nna anhte galaw sa ai magam bungli ni gaw masha law law hte hpe akyu pru shangun ai magam bungli ni byin tai wa lu u ga.

KARAI KASANG KAW AP DA U

Anhte a tingkyeng myit ra ai lam mam nsi zawn si mat yang she asi law law si let nga lu na re.

Lai wa sai shaning loi mi hta, Catherine Marshall gaw ‘Karai Kasang hpe anhte kam gwi ai aten' ngu mying ai laika ngau hpe ka da sai. Dai hta e, sin wawp ana a majaw, shata kru daram machyi nna yup ra ntsa kaw taw kau sai lam ka da ai. Tsi mawan hte akyu hpyi ya ai lam gaw n shamai lu ai. Shi gaw nachying wa myit daw hten taw nga ai. Lani mi hta masha marai mi gaw laika pa kasha langai sa jaw ai. Dai hta e ana ahkya amyu mi a majaw matsat ning tup machyi makaw hkrum nga ai Sasana magam gun num marai mi a lam lawm nga ai. Shi gaw hpa majaw Karai Kasang dai zawn yawn hkyen lam byin shangun ai hpe n chye madat nga ai hte shi mai tsai wa nna, Sasana magam bungli galaw na matu shani shagu akyu hpyi nga ai. Raitim, shi hta laklai wa ai lam n nga ai majaw, lani mi hta gaw “rai sa Karai Kasang e, ngai asum jaw ni ai, n kaja na ra sharawng ai rai yang mung nang hte sha seng sai” ngu marawn jahtau nu ai. Bat lahkawng na ai hpang shi atsawm sha mai mat sai.

Catherine Marshall dai laika pa kaji hpe makau kaw tawn da sai. Dai hti lu ai lam a majaw mau nga ai. Laklai hkam sha ai lam chyawm n nga ai. Raitim, ndai mabyin hpe ngai n malap na re” nga tsun sai. Dai hpang lahpawt mi hta Catherine shi mung mi na mama zawn rai sha, “Karai Kasang e, hkam kaja na matu ngai hpyi ai grai ba la sai. Machyi na raitim, mai wa na raitim Na a myit sha re”; ngu marawn jahtau mu ai. Dai aten kaw nna shi a hkam kaja lam bai lu la wa ai nga Catherine tsun dan sai.

Ndai mabyin lahkawng gaw Madu Yesu sharin nga ai, ‘mam nhkyep gaw, ga hta hkrat nna, hten mat yang she, asi law law si wa ai,’ ngu ai lam re. Anhte a tingkyeng myit ra ai lam si mat jang she Karai Kasang a matu anhte asi si lu na rai nga ai.

Kaja wa sha, ndai lam ni gaw nang hte ngai a shani shagu na prat hta kaning rai lachyum pru nga a ta? Mai byin na lam n kau mi hpe sumru yu ga! Anhte a hkungran makyit sumri hpran wa hkyen nna shinggan masha garum na raitim gumrawng la ai majaw kadai hpe mung n tsun kam ai ngu ga! Anhte a tingkyeng myit ra ai lam si ra ai ngu ai gaw tinang a gumrawng myit hpe shamyit kau nna manang hpe garum hpyi ai lam re. Anhte a hku hkau dik manang ni gaw lu lai sha lai ai majaw tsun shadum tim n kam hkap la ai zawn re ai ni nga ai ngu ga! Tinang a tingkyeng myit ra ai lam hpe si ra ai ngu ai gaw, tinang a mang hkang hpe hkap la nna tsi lajang na lam tam ai rai nga ai. Tinang a manang (snr) kahpu kanau marai rai, tinang hpe machyi shangun ai shaloi, shanhte a ntsa n lu shaga daw jau lu mat ai ngu ga, asi  si lu na matu kraw kata kaw na mara raw ya let tsawra myit hte kalang mi bai tsun shaga daw jau lu na lam rai nga ai. Dai ni na kabu gara shiga anhte hpe saw shaga ai lam gaw; anhte a prat hpe Karai Kasang a lata hta tsep kawp ap tawn da nna Karai Kasang shi myit ra ai hte maren byin na matu anhte a hkang jaw na lam re!

Sawn sum ru mai ai lam: Ya aten ngai hta kaning re ai yak hkak ai lam lu nga a ta? Dai yak hkak mang hkang lam ntsa ngai a myit masa gaw hpa rai a ta? Karai Kasang hpang de dai ru yak ai lam hpe ap tawn da nna Karai Kasang myit ra ai hte maren galaw lu na ahkang jaw na matu hpa lam wa ngai hpe gang dun tawn nga a ta?

2018: LUSHA GAM AI LADAW LABAN (5) NA CHYUM LAIKA

LUSHA GAM AI LADAW HTA LABAN 5

18th March 2018

CHYUM MUNGGA DAW 1

Yeremia 31:31-34

Ya hti na gaw, myihtoi Yeremia a laika hta na rai nga ai.

Madu ning nga ai: Yu mu, Israela hte Yuda a nta ntsa e gashaka nnan tawn da na nhtoi du na ra ai. Shanhte a kaji kawa ni hpe lata hte dun la nna, Egutu mung de na woi wa ai shaloi e, shanhte hte tawn da ai gashaka hte maren n rai; kaning rai nme law, ngai shanhte a Madu rai nga ti mung, shanhte gaw nye a gashaka dai run kau ma ai, nga nna Madu tsun ai. Dai nhtoi ni du wa ai shaloi, Israela nta hte ngai gashaka na gaw, da ndai rai nga ai:  ye a lata hpe shanhte a masin salum hta ngai hkai da nna, shanhte a myit hta ka da na we ai: ngai shanhte a Karai Kasang tai na nngai; shanhte mung nye a amyu tai na mara ai, nga nna Madu tsun ai. 

Dai shaloi shanhte langai hte langai tinang a htingbu wa hte hpu nau wa hpe, Karai Kasang a lam hpe chye nga u, nga nna sharin achyin ya na ra ai n rai; kaji htum ai kaw nna kaba htum ai du hkra, shanhte yawng hte gaw ngai hpe chye chyang wa na mara ai: shanhte a mara hpe ngai raw kau ya nna, shanhte shut hpyit ai hpe bai dum ya na ni ai n rai, nga nna Madu tsun ai. 

Ya hti ai gaw, Karai Kasang a mungga rai nga ai.

CHYUM MUNGGA DAW 2

Hebre 5:7-9

Ya hti na gaw, Hebre masha ni hpang de shagun dat ai laika hta na rai nga ai.

Hpu nau ni e, Hkristu gaw ndai dinghta ga ntsa e naw hkrung nga ai shaloi, si ai kaw na shi hpe hkye mawai la lu ai Karai Kasang hpang de, hkrap ngu hkrap ngoi nna myi prwi law law hte hpyi jahtau wu ai. Shi gaw myit grit nem ai madat mara ai majaw, shi hpyi ai ga hpe Karai Kasang hkap madat la ya sai. Hkristu gaw Kasha teng teng rai nga ti mung , nni nkri hkrum ai hku madat mara ai lam sharin la wu ai; shing rai; Shi hkum tsup wa ngut jang, shi a ga madat mara ai ni yawng mayawng a matu, htani htana hkye hkrang la ai a npawt daju tai nga ai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 12:20-33

Ya hti na gaw, Yawhan a laika hta na Kabu Gara Shiga rai nga ai.

Dai Paska poi a laman e, Yerusalem mare de lung wa ai ni hta Greka masha nkau mi lawm ma ai. Dai ni gaw Galile mung na Betsaida mare masha Hpilip kaw sa nna, Hkau e, anhte gaw Yesu hte hkrum mayu ga ai, ngu nna tsun ma ai. Hpilip gaw Andru hpe sa tsun nna, Andru yan Hpilip gaw Yesu hpe sa tsun dan ma ai. Dai rai nna Yesu gaw, Masha Kasha a hpung shingkang dan hkung na ahkying du wa na ra ai. Nanhte hpe ngai kaja wa teng teng tsun made ai gaw: Mam nhkyep gaw ga hta hkrat nna n hten mat yang gaw, langai sha a rai nga ai; hten mat yang she asi law law si wa ai. Tinang a asak hpe tsawra ai wa gaw asak sum na ra ai. Ndai mungkan ga e tinang a asak hpe n dawng n yawt ai wa chyawm gaw, htani htana asak lu la hkra shi a asak hpe makawp maga nga ai. Ngai hpe daw jau ai wa gaw nye a hpang hkan nang ra ai; ngai nga ai shara e nye a shangun ma mung nga na ra ai. 

Ya ngai nachying myit ru nga nngai: ngai kaning ngu tsun na i? Wa e, ndai ahkying hta na ngai hpe hkye hkrang la e. Rai ti mung, n dai lam a majaw she ngai ndai ahkying de du wa ni ai rai nna, Wa e, na a mying nsang hpe shagrau u law, nga nna Hpilip yan Andru hpe Yesu tsun wu ai. Shaloi sumsing lamu de na nsen gaw, Ngai shagrau se ai rai nna, bai naw shagrau na we ai, nga nna ngoi pru ai. Dai yang e tsap hpawng nga nna na la ai ni gaw, Mu ngoi nga ai, tsun ma ai; nkau mi mung, Lamu kasa shi hpe ga tsun nga ai, nga ma ai. Yesu gaw, Dai nsen gaw nye a matu n rai, nanhte a matu she ngoi pru wa ai. Ndai mungkan ga gaw, ya jeyang daw dan ai hkrum nga ai. Ngai chyawm gaw ga de nna sharawt tawn da ai hkrum jang, masha yawng hpe ngai hpang de woi la na we ai. Shing nga ai gaw, shi gara hku si na madun nna tsun ai rai nga ai. 

Ya hti ai gaw, Madu a Kabu Gara Shiga rai nga ai.

2018: LUSHA GAM AI LADAW LABAN (4) NA MUNGGA

Karai Kasang gaw mahkra hpe dang chye nna mai kaja ai lam mahkra a npawt daju re ai majaw lam magup hta hpring tsup ai Wa re ai majaw anhte shinggyim masha ni a garum shingtau ai hpe nra ai re. Karai Kasang hpe kamsham ra gaw Karai Kasang a matu nre ai sha ra rawng gawng kya ai shinggyim masha ni a matu sha rai nga ai.

Karai Kasang hpe kamsham ai wa gaw htani htana asak lu na re ai hpe dai ni na Kabu Gara Shiga hta anhte hpe shinggyim masha ni a matu Shi a kasha hpe jaw ya sai re. Karai Kasang hpe kamsham ai a majaw anhte ra ai chyeju baw sumhpa hpe lu la ai sha n-ga, Shi Madu lam woi ningshawng ai hta ndut ndang nga sa lu na re.

Ndai lu sha gam ladaw hta anhte galaw sa ai nawku magam ni hte shani shana na jaw jau ai lam ni hpe galaw sa let kamsham myit hpe shangang shakang lu nna ra ai chyeju ni hpe hkam la lu ai ladaw anhte yawng a matu byin tai wa u ga.

SHADAWN SHADANG NNGA AI TSAWRA MYIT

Karai Kasang a tsawra myit gaw shadawn shadang n nga ai!

Yuda amyu sha ni a mau mwi hta nga yang, Karai Kasang masha hpe hpan da na shaloi, tingyang makau kaw tsap nga ai lamu sagya ni hpe bawngban yu ai da. Tara rap ra lam a lamu sagya gaw, ‘Hkum hpan u, shi gaw shi a shinggyim manang ni hpe nhkru dik ai amu yawng galaw na ra ai, Yak la ai hte zai dik ai, masu magaw ai hte n kaja ai masha sha tai na re” ngu ai. Tengman ai lam a lamu sagya mung, ‘Hkum hpan u, shi gaw kahpu kanau ni hta n-ga,  nang hpe pyi masu malen, shut na ra ai,’ bai ngu ai da. ‘Hkum hpan u, shi gaw na a man hta n san seng ai lam galaw nna nang hpe mung n hkungga na ra ai,’ ngu nna Chyoi pra ai a lamu sagya bai tsun ai. Shaloi, matsan dum ai lam a lamu sagya gaw shawng de htawt tsap rai nna, ‘Sumsing lamu na wa e, hpan da u, shi mara galaw nna tengman ai, san pra ai lam ni kaw nna tsan wa yang, ngai shi hpe atsawm sha lakawn la nna, tsawra ai ga hte Nang hpang de bai woi wa na nngai’ ngu tang shawn ai da. Dai hte kaja wa sha Karai Kasang mung matsan dum ai lamu sagya tsun ai hte maren shinggyim masha hpe hpan da nu ai da.

Ndai maumwi gaw kaja wa sha Hkristu a mungga rai nga ai, ‘Karai Kasang gaw shi a kasha shingtai hpe jaw kau ai du hkra, mungkan ga hpe tsawra wu ai. Mungkan ga hpe tara dara u ga nga nna, Karai Kasang gaw dai kasha hpe mungkan ga de shangun dat wu ai n rai; mungkan ga gaw shi a marang e hkyehkrang la ai hkrum lu na she, shangun dat wu ai,’ (Yh 3:16-17) nga ai lam hpe shaleng ya nga ai.

Karai Kasang hte shi lata la ai amyusha ni hpe shi a nrum ntau shatai ai lam hpe myit yu ga! ‘Dai amyusha ni kade wa myit ja, n hkru ai rai tim, Karai Kasang galoi n kabai da ai. Egutu na shalawt la ai hpang, dai amyu sha ni, Mawshe hte shi hpe aput angun nga lai wa sai. Ntuk rawng ai lapu ni hpe shanhte a ka-ang de shangun dat ai hku nna Karai Kasang gaw ari jaw sai. Raitim, matsan dum ai hte, magri lapu galaw jun tawn na Mawshe hpe hkang da nu ai. Lapu achye hkrum ai ni dai hpe mada nna mai tsai wa lu sai. Madu Yesu mung dai magri lapu kumla zawn shi hkum hpe Udang ntsa hta jen da hkrum sai. Dai majaw dai ni na kabu gara shiga hta Yesu gaw; “Mawshe gaw nam maling e lapu hpe sharawt da ai zawn, masha kasha hta kamsham ai nlang hte gaw htani htana asak lu la hkra, masha kasha mung sharawt da ai hkrum na ra ai” nga nna tsun da sai.

Kalang lang, anhte a Karai Kasang gaw grai matsan dum ai hte myit mai ai ngu mu mada chye ai. Ndai zawn rai nga yang, n kangka ai masha ni gaw shut hpyit mara law law galaw let Karai Kasang a matsan dum lama ai hte kaja ai hpe maroi ya chye ai. Raitim dai gaw Karai Kasang Shi hpan da ai arung arai ni hpe tsawra ai lam nan rai nga ai. Shi a n htum ai hte galu ai tsawra myit gaw galai shai na matu ahkang jaw nga ai. Dai majaw nnan bai garam lajang na matu, lusha gam ladaw zawn re ai hpe anhte lu ga ai. Karai Kasang a myit masa hte anhte a myit masa kade wa shai nga a hka! Shinggyim masha ni hta gaw “hpang jahtum lang” ngu ai nga ai. Madu jan (snr) madu wa gaw loi li sadi ndung ai lam hpe mara raw ya lu ai raitim, galoi mung matut nna ashut nga ai rai yang dai gaw hpang jahtum nga byin wa nna hka bra ai kaw du na re. Karai Kasang hte gaw dai zawn n rai nga ai. Karai Kasang a tsawra ai myit gaw shadawn shadang n nga ai. Shadawn shadang nga ai tsawra myit gaw tsawm nna, byin nna, grai pyaw chye nna, tsawra ai ngu mai ai. Nang mung “ngai lama anya nna hkrit na zawn san yang tsawra hkrum na i” ngu san yu u.

Anhte hpe Karai Kasang tsawra ai gaw shadawn shadang n nga ai hte hpa mi rai rai (mara lu ai rai tim) shi a tsawra ai hpe jahkring kau ya n lu ai. Wa Jau John Powell S.J ka da ai zawn, “Ngai nang hpe tsawra mayu ai, dai sha re. Ngai nang hpe sha tsawra mayu ai. Nang lama ngai hpe ngam da na raitim, ngai nang hpe n jahkring da na re. Nang hpe awmdawm ahkang jaw na nngai, raitim nang hpe ngai galoi mung tsawra nga na nngai.”

Sawn sum ru mai ai lam; Ngai a ningrum ningtau jan/ wa, kashu kasha ni, Nawku hpung masha ni, myit kam let ap da sai ni ntsa nga ai tsawra myit hte, ngai hte kaga masha ni a ntsa tawn da ai Karai Kasang a tsawra myit hpe hpa hte shadawn lu na rai? Gara masa hku nna ngai ra kadawn, gawng kya nga ai kun? Shadawn shadang n nga ai tsawra lu na matu ngai na  hkum hpe kaning rai grau kaja wa hkra galaw lu na rai?

2018: LUSHA GAM AI LADAW LABAN (4) NA CHYUM LAIKA

LUSHA GAM AI LADAW HTA LABAN 4

11st March 2018

CHYUM MUNGGA DAW 1

2 Hkawhkam Labau 36:14-16, 19-23.

Ya hti na gaw, Hkawhkam Labau Laika lahkawng hta na rai nga ai.

Dai nhtoi hte hta e, hkinjawng agyi ni hte mung masha ni yawng hte gaw, maigan amyu ni a n tsawm n htap ai lam shagu hpe hkan nna, grai wa shut hpyit nga ma ai. Yerusalem mare hta e Madu shachyoi shapra da ai, shi a nta hpe mung awu asin di kau mu ai. Shanhte kaji kawa ni a Madu Karai Kasang gaw, Shi a amyu hpe mung shi shanu nga ai shara hpe mung matsan dum nga ai majaw, n sim n sa langai hpang langai hpe shi a kasa ni hpe shanhte hpang de shangun dat wu ai. Rai ti mung shanhte gaw Karai Kasang a kasa ni hpe aroi arip di kau ai hte, shi a ga hpe n kaw n law di nna, shi a myihtoi ni hpe asawng asang di kau mu ai. Dai rai nna, hkye hkrang la na lam n hku hkra, Madu a pawt sindawng ai gaw shi a amyu masha ni ntsa e kahtet bu nga ai. 

Babelon mung na shahte a hpyen ni gaw Karai Kasang a nta hpe nat kau ai hte, Yerusalem mare bunghku hpe run kau nna, hkawhkam htingnu ni mahkra hpe nat kau nhtawm, de a manu dan ai arung arai nlang hte hpe shaza kau mu ai. Nhtu n hkum ai ni hpe Babelon mare de bawng dun wa mu ai rai nna, shanhte gaw Persia mungdan up hkang ai aten du hkra, Babelon hkawhkam wa hte shi a kasha ni a mayam ni rai nga ma ai. Shing rai, Yeremia a n-gup hta Madu tsun ai ga dik wa sai. Madu ning nga ai: Israela lamu ga gaw laban shaning ni hpe shatup na mara ai; dai mungdan gaw de a katsi katsang re ai nhtoi mahkra hta ban nga nna, sanit shi ning du hkra hkam nga ai. Ya Yeremia htawn tsun ai Madu a ga dik wa na matu, Persia hkawhkam Kuru hkaw dung ai shawng shaning hta e, Madu gaw shi a myit hpe shadut ya nna, shi gaw shi a mungdan ni hproi hkra hkang dat ai laika shabra dat wu ai.Dai laika hta ka ai gaw: Persia hkawhkam Kuru ning nga ai: Sumsing lamu na Madu Karai Kasang gaw ga ntsa na mungdan ni mahkra hpe nye a lata hta ap ya ni ai; Yuda mung Yerusalem, mare hta e, shi a matu nta langai mi galaw na, shi ngai hpe hkang da ni ai. Ya shi hte seng ai amyu masha kadai mung, Madu Karai Kasang shi hte rau nga nga nna, Yerusalem mare de shi lung wa u ga, ngu nna ka dat wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Ehpesu 2:4-10

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, nachying matsan dum chye ai Karai Kasang gaw, tsaw ra ai myit kaba hte anhte hpe tsaw ra mi ai rai nna, shut hpyit mara e anhte chyasi zawn tai nga ai shaloi, Hkristu hte hpawn Shi anhte hpe jahkrung la mani ai: Shi a chyeju hte sha anhte hkye hkrang la ai hkrum manit dai. Dai hta n-ga Karai Kasang gaw, Hkristu Yesu hta anhte hpe matsan dum ai a mrang e, Shi a chyeju gade wa galu gaba htum nga ai hpe , prat dingsa e madun dan na matu, Hkristu Yesu hte hpawn anhte hpe sharawt la nna, sumsing lamu lahta tang e Hkristu hte rau anhte hpe hkaw dung shagun mani ai. 

Kaning rai nme law, makam masham a marang e chyeju hte sha nanhte hkye hkrang la ai hkrum manit dai: dai gaw anhte kaw na n rai; tinang galaw ai magam bungli a majaw mung n rai; Karai Kasang a kumhpaw kumhpa sha rai nga ai. Dai rai nna, ndai lam hta kadai mung gumrawng gumtawng shara n nga ai: hpa majaw nga yang, shawng npawt e Karai Kasang yaw shada ai hte maren, mai kaja ai bungli lam hta anhte hkawm nga u ga, Hkristu Yesu hta e anhte hpan da hkrum nna, Karai Kasang shi nan shachyaw da ai magam bunli anhte rai nga ga ai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 3:14-21

Ya hti na gaw, Yawhan a laika na Kabu Gara Shiga rai nga ai.

Nikodemu mying ai Hparishe langai mi shana e Yesu kaw sa nna, Madu shi hpe tsun ai gaw: Mawshe gaw nam mali e lapu hpe sharawt da ai zawn, kam sham ai ni nlang hte gaw Masha Kasha hta htani htana asak lu la hkra, dai masha kasha mung sharawt da ai hkrum na ra ai. Kaning rai nme law, Karai Kasang a Kasha hpe kam sham ai ni nlang hte gaw hten bya n hkrum ai sha htani htana asak lu la mu ga nga Karai Kasang Shi a Kasha Shingtai hpe jaw kau ai du hkra mungkan ga hpe tsaw ra wu ai. Mungkan ga hpe daw dan na matu Karai Kasang dai Kasha hpe mungkan ga de shangun dat wu ai n rai; mungkan ga gaw shi a marang e hkye hkrang la ai hkrum lu na she shangun dat wu ai. 

Kasha hpe kam sham ai wa gaw daw dan ai n hkrum lu ai; n kam n sham ai wa chyawm gaw, Karai Kasang a Kasha a mying nsang hpe n kam n sham ai majaw, ya e pyi daw dan ai hkrum nga ai. Nhtoi gaw mungkan ga de shang sai, rai ti mung, masha ni a arawn alai n hkru n kaja nga ai majaw shanhte gaw nhtoi hta nsin hpe grau tsawra ma ai: ndai lam a majaw shanhte daw dan ai hkrum nga ma ai. Kaning rai nme law, n hkru n kaja ai masha ni gaw tinang galaw ai amu dan pru na hkrit nna, nhtoi de n sit sa wa ma ai. Dingman ai wa chyawm gaw, tinang a amu shagu hpe Karai Kasang myit ra ai hku hkan galaw ai gaw, dan pru na matu nhtoi de sit sa wa ma ai.

Ya hti ai gaw Madu a Kabu Gara Shiga rai nga ai.

KADE DARAM KAM NGA GA AI KUN?

Madu Yesu a Mungga hte Magam bungli ni a lachyum chyena na lam gaw Chyoipra ai Wenyi hpe garum hpyi jahtau na lam chyu sha rai nga ai.

Lama na nang wa dai Madu Yesu a mungga hte shi hpe mu ai ni kaw na langai mi rai yang, kam sham ai masha nang tai na kun?

Dai ni na kabu gara shiga hpe yu yu ga! Gumhpraw byan sha ai ni hte gat dut ai ni hpe gawt kau ai hpang Yuda salang ni shi hpe san ma ai, ‘Nang ning rai galaw ai gaw, anhte hpe hpa lamik kumla madun dan na ta?’ Yesu bai htai ya ai gaw; ‘Ndai hting-nu hpra kau mu, masum ya laman e ngai dai hpe sharawt na we ai’ nga jang ‘masum ya laman sharawt lu na wu ni, ndai Nawku hting-nu hpe mali shi kru ning galaw ai re;’ nga nna salang ni bai san ma ai. Ndai lam tsun ngut ai hpang kasa Yawhan gaw; ‘Yesu tsun ai gaw, shi a hkum hkrang ngu ai hting-nu hpe sha ang nna nga ai,’ ngu nna ka da sai. Gashadawn langai mi bai yu yu ga!  Kungla shaman poi shani, lawze kasha jawn nna Yerusalem mare de lung wa ai lam ka da ai hta, kasa Yawhan gaw; “dai lam ni hpe shawng e gaw shi a sape ni n chye na ma ai, raitim Yesu gaw hpung shingkang hte bai hkrung rawt ai hpang she, shi hpe sha ang nna shing nga ka da ai hpe mung chye ma ai,” (Yh 12:16) nga nna ka da ai.

Ndai lam ni hpe chye na na matu hpang e sape ni hta hpa byin wa sai rai? Madu Yesu tsun da ai hte maren byin wa sai. Madu Yesu rai n si hkam ai ten hta, ‘Ngai wa e nye a amying hte shangun dat na ra ai, shalan shabran ai wa nga ai; Chyoipra ai wenyi gaw, nanhte hpe lam matsun sharin ya nna, ngai nanhte hpe tsun da ai ga yawng mayawng nanhte hpe shadum shahprang ya na ra ai’ (Yh 14:26) nga nna tsun da sai.

Lai wa sai laban hta, makam masham n-gun rawng ai, n-gun kya ai lam hpe anhte sagawn yu saga ai. Makam masham n-gun ja nga ai ten, anhte a prat gaw tsawm htap ai ngu hkam sha tim, n-gun kya wa ai ten hta gaw yak hkak ai chyu mu lu na re. Madu Yesu a makau kaw nga ai ni hta mung dai zawn sha rai nga ai. Madu Yesu hta nga ai makam masham gaw anhte yawng hta tsaw dik rai nga ai. Madu Yesu a hpang hkan nang ai sape ni a yaw shada lam mung shai ai hte shanhte a makam masham mung grai san seng hkra n rai nga ai. Madu Yesu hpe mu ai hte mungga ni na la ai hpang myit shuk ai lam law law nga na sai. Yesu bai hkrung rawt ai hpang, gasadi jaw da sai hte maren Chyoipra ai wenyi kumhpa lu la sai lam ni hpe asan sha chye na wa sai.

Sawn sumru mai ai lam;    Madu Yesu hta nga ai ngai a makam masham kade daram rai nga ai kun? Myit shuk yak hkak ai ten, prat hta byin ai lam, masha ni hpe chye na na matu Chyoipra ai wenyi hpe garum hpyi nga ai kun?

2018: LUSHA GAM AI LADAW LABAN (3) NA MUNGGA

Karai Kasang hpan tawn da ai shinggyim masha ni gaw Shi a mai kaja ai hpe hkrang shapraw madun dan na matu ra sharawng ai hte maren ra nga ai chyeju ni hpe jaw ya sai re. San seng san pra ai Karai Kasang hpe anhte hta hkap la lu na matu gaw anhte a hkum hpe jasan jaseng ai magam hpe galaw nna san seng ai hkum hkrang hta she Karai Kasang a hkrang sumla hpe madun dan lu na re.

Lu sha gam ai ladaw hta anhte hkum hkrang hpe awu asin di ai amu bungli ni hpe koi gam ai sha n-ga, myit masin salum kaw nna nkaja ai myit masa lam ni hpe yeng seng kau let Karai Kasang nga ai htingnu byin tai wa let shi a hpung shingkan hpe hkrang shapraw nga sa lu u ga.

2018: LUSHA GAM AI LADAW LABAN (3) NA CHYUM LAIKA

LUSHA GAM AI LADAW HTA LABAN 3

4th March 2018

CHYUM MUNGGA DAW 1

Pru Mat Wa ai 20:1-3. 7-8. 12-17

Ya hti na gaw, Pru Mat Wa ai laika hta na rai nga ai.

Ndai mungga mahkra hpe Karai Kasang tsun wu ai gaw: Ngai gaw, Egutu mung hta mayam tai nga ai nta na nang hpe hkye shaw la ai, na a Madu Karai Kasang rai nga nngai. Ngai hta Karai Kasang shaje hpe hkum naw hkum ku et. Na a Madu Karai Kasang a mying nsang hpe kaman lila hkum gang hkum tsun et; Kaning rai nme law, shi a mying nsang hpe kaman lila tsun ai wa hpe, Madu gaw mara shagun na ra ai. Laban nhtoi hpe shachyoi shapra na, dai nhtoi hpe dum u. 

Na a Madu Karai Kasang nang hpe jaw ai ga hta, na a asak galu lit ga, na nnu yan nwa hpe hkungga lara di u. Masha hpe hkum sat u. Masha num hkum shaw et. Masha rai hkum lagu et. Na a htingbu manang wa a lam n teng n man ai sakse hkum hkam u. Na a htingbu wa a nta hpe ra marit ai myit hkum rawng et; shi a madu jan hpe mung, shi a numsha lasha hpe mung, shi a dumsu lawze hpe mung, shi a lu ai arai mahkra hpe mung, ra marit ai myit hkum  rawng et, nga nna Madu Karai Kasang tsun da nu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Korinhtu 1:22-25

Ya hti na gaw, Korinhtu masha ni hpang de San Pawlu shagun dat ai laika hta na rai nga ai.

Hpu nau ni e, Yuda masha ni gaw lamik kumla hpyi ma ai; Greka ni mahtang hpaji byeng-ya tam ma ai: anhte chyawm gaw Wudang hta jen da hkrum ai Hkristu a lam hpe hkaw dan ga ai. Dai wa gaw, Yuda ni a man e myit kataw shara, maigan amyu ni a man e angawk angak rai nga ai. Rai ti mung, shaga la hkrum ai Yuda ni hte Greka masha ni a matu mara, dai Hkristu gaw Karai Kasang a atsam hte, Karai Kasang a hpaji byeng-ya rai nga ai. Kaning rai nme law, Karai Kasang kaw na angawk angak re ai lam gaw masha a hpaji byeng-ya hta grau nga ai; Karai Kasang a n-gun kya ai gaw masha a n-gun atsam hta grau nga ai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 2:13-25

Ya hti na gaw, Yawhan a laika hta na Kabu Gara Shiga rai nga ai.

Dai aten hta Yuda masha ni a Shalai Poi du wa ra ai rai nna, Yesu gaw Yerusalem mare de lung wa sai. Shaloi nawku htingnu e sagu , dumsu, uhkru du dut ai ni hte, gumhpraw jak sha ai ni dung nga ma ai hpe shi mu wu ai rai nna, shingri hte galaw ai lasik la nhtawm, shanhte mahkra hpe mung, sagu dumsu ni hpe mung dai nta na shachyut kau nu ai; gumhpraw jak sha ai ni a gumhpraw hpe shi ayai kau ya ai hte, shanhte a ku ni hpe kanawng kadawng kau ya ai hte, shanhte a ku ni hpe mung, Ndai rai ni la wa mu; nye a Wa a nta hpe hpaga nta hkum shatai mu, ngu nna tsun mu ai. Dai shaloi, Na nta hta manoi ai nja nhpra myit gaw, ngai hpe sha kau na ra ai, nga nna ka da ai ga hpe sape ni dum ma ai. Shing re ai majaw Yuda masha ni gaw, Nang ndai zawn galaw na ahkaw ahkang lu ai gaw, anhte chye lu na matu, hpa baw lamik kumla madun dan lu na ta? ngu nna Yesu hpe san mu ai. Yesu gaw, Ndai htingnu hpe hpya kau mu; masum ya laman e ngai dai hpe sharawt na we ai, nga nna shanhte hpe htan mu ai. 

Shing nga ai majaw Yuda masha ni gaw, Ndai nawku htingnu hpe mali shi ning tup galaw sai; nang chyawm gaw masum ya laman e sharawt lu na wu ni? ngu mu ai. Rai ti mung, Yesu tsun ai gaw, shi a hkum hkrang ngu ai htingnu hpe sha-ang nna, tsun ai rai nga ai. Dai re ai majaw si ai ni kaw na jahkrung sharawt la ai hkrum ai shaloi, sape ni gaw shi shing nga tsun ai ga hpe myit dum ai rai nna, Chyum laika hpe mung, Yesu tsun da ai ga hpe mung kam sham ma ai. Dai shaloi Poi nhtoi ni a laman e, Yerusalem mare hta Yesu naw nga nga yang, masha law law wa shi madun dan ai lamik kumla mu lu ai majaw, shi a mying nsang hpe kam sham ma ai. Yesu chyawm gaw shanhte hpe n kam wu ai; masha yawng mayawng a lam shi chye ai majaw, masha a kraw kata e hpa baw myit rawng nga ai hpe chye da wu ai rai nna, masha wa a lam hpe kadai mung sakse hkam ya na shi n ra wu ai.

Ya hti ai gaw, Madu a Kabu Gara Shiga rai nga ai.