LAM SHAGU HTA KARAI KASANG HPE KAM HPA NGA GA

Moi prat hta manggang kap ai masha daram matsan tsin yam ai n nga ai. Masha ni gaw dai ana shanhte kaw kap la na hpe si na daram hkrit nga ai. Manggang kap ai masha a prat gaw, hkrung nga ning len Ngarai di hkrat nga sai. Masha ni shi hpe n kam yu ai zawn, shi mung shi a hkum hpe n ju n dawng nga ai. “Ngai hpe chye chap ai ni a hkrit shara ngai tai nga nna, shinggan e ngai hpe mu ai ni koi hprawng ma ai. Si mat ai masha hpe zawn ngai malap kau ai hkrum nngai, di bu shaga zawn ngai tai nga nngai” (Shk kdn 31:11-12) nga nna manggang kap ai masha a hkam sha ai lam ka tawn da nga ai. Ndai zawn matsan tsin yam hkrum ai mang gang kap ai wa hpe Madu Yesu gaw, tsaw ra ai hte shi a lata ladawn nna ahtawk let shamai shatsai ya sai.

Anhte a prat hta mung, tsawra ai wa si mat ai, akajawng sha hkala hkrum nna, hkum hkrang daw hten mat ai, kawa tai ai wa bungli n lu mat ai hte kanu hta mawng ana byin ai lam chye la lu ai zawn re ai, yawn hkyen lam kaba hkrum hkra chye nga ai. Dai shaloi yawn hkyen myit ru myit tsang lam kaba gaw anhte a prat hpe ka-up kau chye nga ai. Manggang kap ai wa zawn anhte mung hkrit gari ai hte si mat na daram, hkam sha na re. Ndai yawn hkyen myit ru myit tsang lam ni gaw anhte a matu hpa lachyum pru nga a ta? Gara hku mung bai gram la n mai ai hten bya lam gaw n nga na re. Kaba dik ai hten bya lam gaw, myit mada shara n mu, myit daw myit htum ai anhte a myit sha rai nga ai. Dai zawn myit htum ai ten hta Madu Yesu hpang de kayin wa nna shi kaw sa shingbyi na sha ra ga ai. Shaloi shi a mungga, ga shadawn; “anhte lam shagu hta tsin yam tsin dam hkrum ga ai rai ti mung, gin wang n lu ga ai n rai, myit ru myit tsang hkrum ga ai rai ti mung, myit htum ga ai n rai, dai rai nna anhte n hki n sang ga ai sha, anhte a shinggan na wa hten bya hkrum rai ti mung, anhte a kata de na wa gaw, lani hte lani prat bai pra wa nga ai” (2 kor 4:8-9,16), “dai rai nna, shakyet tawn da ai hte maren, shaga la ai hkrum ai ni ngu ai, Karai Kasang hpe tsaw ra ai ni a matu mara, yawng mayawng mai kaja hkra jawm byin wa sai, anhte chye ga ai” (Rom 8:28) nga nna ka da ai hte maren shalan shabran ai hte myit mada shara anhte lu la na re. 

Shi hpe kam hpa tsaw ra ai ni a matu Karai Kasang gaw lam shagu hta kaja ai hku galaw ya ai hpe anhte chye nga ga ai. Dai gaw dai ni anhte hti ai mungga na kabu gara shiga rai nga sai.

Sawn sumru mai ai lam: Ya aten ngai nga ai uhpung uhpawng gin ra hta manggang kap ai ni zawn hkam sha nga ai ni, kadai ni rai nga ma ta? Masha ni shanhte hpe gara hku hkap la ma ta? Shanhte a ntsa na a myit masa gara hku rai ta? Madu Yesu manggang kap ai wa hpe shamai shatsai ya ai zawn, shanhte a matu hpa galaw ya lu na rai ta?

2018: PRANWAN LADAW LABAN (6) NA CHYUM LAIKA

Pranwan Ladaw Laban (6)

11th Feb 2018

CHYUM MUNGGA DAW 1

JAW JAU LAIKA 13:1-2, 45-46

Ya hti na gaw, Jaw Jau laika hta na rai nga ai.

Madu Karai Kasang gaw Mawshe yan Arun hpe tsun wu ai gaw: Masha a hkum hta akawng ai, gyigu gu ai, pang rai hpraw ai byin yang gaw, dai wa hta manggang kap ai kumla rai nga ai. Dai wa a nma hpe yu ya na matu, hkinjawng Arun hpang de, shing n rai, shi a shadang sha hkinjawng langai ngai hpang de dai masha hpe woi sa lu na rai nga ai. Mangang kap ai wa gaw, je ai hpun palawng bu hpun let, kara hpyan ayai kau ra ai; lahta nten hpe shi magap kau nhtawm, n san n seng ai, n san n seng ai, ngu nna jahtau na rai wu ai. Ana dai garai n mai yang, shi hta awu asin a rai nga ai; shi gaw n san n seng ai rai nga nna, shi hkrai nga nga na ra ai: shi a nga shara gaw dap shinggan e rai na rai nga ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 KORINHTU 10:31- 11:1

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Tsawra ai hpu nau ni e, nanhte sha timung, lu timung, hpa galaw timung, Karai Kasang a hpung shingkang hpe tam let yawng mayawng hpe galaw nga mu. Masha yawng mayawng hkye hkrang la ai hkrum lu mu ga, ngai nye a akyu n tam ai sha, Malaw maga a akyu tam nga let, lam shagu hta nlang hte hpe myit shapyaw ya na matu ngai shakut nga nngai. Dai hte maren nanhte mung Yuda ni a matu raitim, Greka ni a matu raitim, Karai Kasang a Nawku Hpung a matu raitim, myit kataw shara galoi mung hkum tai nga myit. Ngai gaw Hkristu a kasi hpe yu la ai zawn, nanhte mung nye a kasi hpe yu la nna, hkan galaw ai ni tai nga mu.

Ya hti ai gaw, Karai Kasang a mungga rai nga ai.

KABU GARA SHIGA

MARKU 1: 40- 45

Ya hti na gaw, Marku a laika hta na Kabu Gara Shiga rai nga ai.

Manggang kap ai masha marai mi mung Yesu hpang de sa ai rai nna, lahput hput di let, Nang hkraw n yang gaw, ngai hpe shapra ya lu na rai nga ndai, ngu nna hpyi nem wu ai. 41Yesu gaw matsan dum ai hte Shi a lata ladawn let, shi hpe ahtawk nna, Ngai hkraw nga nngai, san pra wa nu, ngu wu ai. 42Shaloi jang dai manggang shi kaw nna prai mat nna, shi san pra mat ai. 43Shaloi Yesu gaw, de a lam kadai hpe mung, ga hkawm mi pyi nang n tsun u ga, sadi nga u; pru wa nna hkinjawng wa hpe na a hkum madun dan nhtawm, shanhte a matu sakse tai u ga, nang san pra ai a matu, 44Mawshe tawn da ai hte maren, hkungga wa nawng ya u, ngu nna dai wa hpe ginhtim da nhtawm tin tin shabawn dat wu ai. 45Shi mahtang pru wa nna dai hpe aja awa hkai dan ai hte dai lam hpe kajai gum hkawng dat wu ai. shingrai Yesu gaw, mare kata de leng leng n shang lu ai rai nna, nam mali hkan e a nga nga ai. shara magup hkan na ni mung, Shi hpang de sa du ma ai. 

Ya hti ai gaw, Madu a Kabu Gara Shiga rai nga ai.

2018: PRANWAN LADAW LABAN (5) NA MUNGGA

Hkristan ngu ai gaw Madu Yesu a hpang hkan ai ni rai nna n-gup ga hte sha n-ga amu bungli ni hte Madu Yesu a kasi hpe la nna hkan shatup ai ni re. Madu Yesu a hpang hkan nang ai shaloi tinang lata la ai asak aprat hta Karai Kasang hte htingbu wa hpe tsawra ai lam sakse hkam ai lam hpe madung dat galaw sa ai re.

Simon a kani gaw machyi makaw hkrum ai kaw nna mai tsai wa ai shaloi Madu Yesu hte Kasa ni hpe shi a nta hta dawjau ai hpe galaw lai wa sai re. Tinang a dum nta hta nga let dawjau ai lam gaw Madu Yesu a hpang hkan nang mai ai hpe kasi madun ya sai re.

Tinang nga ai shara, ang ai amu bungli hte tinang nga sa ai asak aprat hta Karai Kasang hte htingbu wa hpe dang di dang dep ai daram daw jau nna Madu Yesu a hpang hkan nang ai, jet ai Hkristan re ai hpe sakse hkam lu u ga.

KARAI KASANG HPE ATEN JAW GA

“Yesu zawn simsa ai aten la nna, tinang hkum hte mung, Karai Kasang hte mung, matut mahkai akyu hpyi na matu, anhte hpe saw shaga nga ma ai”

Dai ni na kabu gara shiga hta Madu Yesu shi chyu pru sa nna, akyu hpyi ai lam hpe anhte na lu sai. “Yesu gaw, shi hta na atsam pru wa ai hpe, shi a myit hta shaloi jang dum chye wu ai” (Mk 5:30) nga nna mung ka da nga ai. Shi hkum shi dai Wenyi atsam bai jahpring na aten la ra nga ai. Dai majaw, Kawa Karai Kasang hte matut mahkai na matu shi pru sa nna, akyu hpyi matut mahkai ai lam gaw, Shi a amu magam bai galaw lu na n-gun atsam bang la ai lam rai nga ai. Masha ni hte amu magam rau galaw ai gaw n-gun atsam shaw kau ai hte mung bung nga ai. Dai re ai majaw, Madu Yesu zawn anhte mung, myit sumru ai, akyu hpyi ai a marang e, Karai Kasang hte hkrum zup lu nna, shi kaw na lu la ai n-gun atsam hte anhte amu magam kaja galaw lu na re. “Ngai kaning rai galaw lu na i? Ngai hkrai sha nga na aten pyi tam n mu ai, ra ai lam law la nga ai hte kaning rai nna machyi shim ai shara de sa lu na i?” nga nna san mayu na re.

Mabyin langai mi nga ai, Ingalik ni a hka sanghpaw hpyen hkrum ai ten hta, “Yawng zim” rai nga na shadum ai dingsi n sen ngoi ai da. Dai dingsi n sen a lachyum gaw, “Nang galaw nga ai bungli jahkring u! asim sha nga nna, nang du nga ai shara masa hpe maram yu u! Nyan ladat shaw nna galaw ang ai hpe galaw u!” ngu ai re da. Dai sadi jaw ai bau garai n lu galaw ai ten hta, sanghpaw la nkau mi sha, hpa galaw ang ai hpe dum chye lu ma ai da. Chyahkring mi hkring nna myit la ai aten hpa baw galaw lu ma ai hpe dum chye lu ma ai. Dai sadi jaw ai bau n sen a majaw masha hkying lam a asak hkye la lu ai hte gumhpraw wan kahtap sum mat na kaw nna lawt lu sai. 

Anhte a shani shagu na prat hta mung dai zawn ahkyak ahkya kyin dut ai hkrum chye ga ai. Anhte hpa galaw na hpe mung kalang ta n dum chye lu ga ai. “Anhte hpa galaw lu na?” nga nna marawn jahtau na re. Kaja wa sha galaw ra ai lam gaw; kade kyin ai raitim, chyahkring mi asim sha nga na ten la chye ra nga ai. Dai asim sha nga ai ten hta tinang hkum a lam bai maram yu nna myit kraw lawang na n sen hpe madat yu ra ai. Hpa majaw nga yang, anhte asim sha nga ai ten hta anhte a kraw lawang na Karai Kasang anhte hpe ga shaga ai majaw rai nga ai. Shing nrai, Madu Yesu zawn, masha yawng naw yup pyaw nga ai ten rawt nna jahpawt manap a ngwi pyaw simsa ai ten hta akyu hpyi n-gun la mai nga ai. Dai zawn rai yang, shani ting na anhte galaw sa ra ai amu magam ni hpe Madu hte rau kabu gara myit pyaw ai hte galaw la lu na re. Grau nna, Karai Kasang a mungga atsam hte anhte hkrum ang ai Manghkang ni hpe hpran la lu na re. 

Sawn sumru mai ai lam: Shani shagu ngai galaw ra ai magam bungli ni hpe galaw lu na matu, Karai Kasang a hpaji atsam lu la u ga, ngai kade lang hkring sa nna Karai Kasang a man e asim sha nga yu sata?

2018: PRANWAN LADAW LABAN (5) NA CHYUM LAIKA

PRANWAN LADAW LABAN (5)

4th FEBRUARY 2018

CHYUM MUNGGA DAW 1

YOBA 7:1-4, 6-7

Ya hti na gaw, Yoba a laika hta na rai nga ai.

Yoba gaw shi a jinghku ni hpe htan nna tsun ai gaw: Dinghta ntsa na masha a prat gaw, majan pa na ruyak shoihpa prat, n rai nga a hka i? Masha a nhtoi ni gaw nchyang wa a nhtoi ni zawn rai nga ai, n rai ni? Mayam wa gaw shingnip hpe ndawt la ai hte, shabrai sha ai wa gaw shabrai la na aten hpe myit mada nga ai zawn, Ngai gaw shata law law wa ru yak hkrum sha nngai; nji nmu hpring ai shana gaw, nye a matu san da nga ai. 

“Galoi wa me shana lai nna, ngai yup rawt lu na i?” nga nna yup kaleng let ngai tsun nga nngai. “Shana aten bai du na, gade lanyan nga a hka!” nga nna yup rawt ai hpang ngai tsun nga nngai. Shani tup nsin sin wa ai ahkying du hkra, ngai gale galau hkrai rai nga nngai. Nye a nhtoi ni gaw da danghkyam hta grau lawan nna, nye a matu myit mada shara n tawn da ai sha lai mat wa sai. Nye a asak gaw nbung rai nga ai hpe dum nga u; nye a myi gaw mai kaja ai hpe bai mu sana n rai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 KORINHTU 9:16-19, 22-23

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, Kabu Gara ai Shiga hpe ngai hkaw dan ai majaw, nye a matu arawng mala shara n nga ai: kaning rai nme law, dai hpe hkaw dan ai gaw ngai galaw ang ai amu rai nga li ai: ngai n hkaw dan yang gaw, ari hkrum ging ai wa tai nga nngai. Dai amu hpe nye a myit hte ngai galaw sa yang gaw, ngai shabrai hpyi lu nngai; rai ti mung, nye a myit hte dai lit hpe n hkam la ai majaw, nye a lata hta ap ya sai amu hpe hkan galaw ai sha rai nga nngai. Dai rai jang, nye a shabrai gaw hpa rai nga a ta? Ngai hkaw dan ai shaloi, jahpu n hpyi ai sha Kabu Gara Shiga hpe hkaw sharin na gaw nye a shabrai rai nga li ai: dai Kabu Gara Shiga hkaw dan ai majaw, ngai lu la ang ai shabrai hpe n hkap la nngai. 

Shing rai, ngai gaw kadai wa a shangun ma n rai ti mung, dang lu ai daram masha law law hpe woi bang la lu hkra, yawng mayawng a shangun ma ngai tai nga nngai. N-gun kya ai ni a matu n-gun kya ai wa zawn ngai tai nga nngai. Nkau mi hpe lam langai hte hkye hkrang la lu hkra, masha yawng mayawng hta lam yawng hpe ngai hkan shatup nngai. Dai Kabu Gara Shiga a matu ndai lam yawng hte hpe ngai naw hkan galaw nga nngai.

Ya hti ai gaw, Karai Kasang a mungga rai nga ai.

KABU GARA SHIGA

MARKU 1:29-39

Ya hti na gaw, Marku a laika hta na Kabu Gara Shiga rai nga ai.

Shaloi jang dai tara jawng hta na pru wa nhtawm, shanhte gaw Yaku yan Yawhan hte rau Simun yan Andre a nta de shang wa ma ai. Ya Simun a kani hkali bu nna kaleng taw nga ai; shaloi jang shanhte gaw shi a lam Yesu hpe tsun dan mu ai. Shaloi Yesu sit sa nna, Shi a lata jum let shi hpe sharawt wu ai. Dai hkali mung kawp mat nna, shi shanhte hpe galaw daw mu ai. Ya, jan shang nna shana ahkying du jang, shanhte gaw machyi makaw hkrum ai ni hte nat kap ai ni nga manga hte hpe, Shi hpang de sa hpai tawn mu ai. Dai rai nna mare ting, dai chyinghka lam makau e sa zup hpawng nga ma ai. Shing rai ana ahkya amyu myu hte machyi ai masha law law hpe Shi shamai shatsai ya nna, nat law law hpe mung shaden kau mu ai; Shi gaw Hkristu rai nga ai hpe, nat ni chye nga ma ai majaw, Shi shanhte hpe ga tsun na ahkang n jaw mu ai. 

Jahpawt manap jau jau e, nhtoi grai nhtoi yang, Shi rawt pru nna, nam na machyi shim ai shara de sa wa nhtawm, dai yang e akyu hpyi nga ai. Shaloi Simun hte shi hte rau nga ai ni Shi hpe hkan tam nga ma ai: Shanhte Shi hpe hkrum nna, nlang hte gaw nang hpe tam nga ma ai, ngu nna Shi hpe tsun mu ai. Yesu gaw, grup yin hkan na mare kahtawng ni hta e ngai hkaw dan lu u ga, shara kaga de anhte sa wa sa ga; dai lam majaw ngai sa du nngai, ngu nna shanhte hpe tsun mu ai. Shaloi, Galile mung ting na shanhte a tara jawng ni hta e, Shi sa hkaw dan nna, nat ni hpe shaden kau mu ai. 

Ya hti ai gaw, Madu a Kabu Gara Shiga rai nga ai. 

2018: PRANWAN LADAW LABAN (4) NA MUNGGA

Karai Kasang a hkum tsup ai tsawra myit hpe shut hpyit mara kaba galaw nna myit malai lu let Karai Kasang hpang de bai nhtang wa ai masha ni gaw tinang hkum hpe dinghpring dingman dum ai masha ni hta grai nna chye na lu, hkam la lu ai re. Hpa majaw nga ai shaloi tinang gaw mara nlu ai wa re, dingman ai wa re nga nna tsun ai ni gaw galai shai na matu nmai byin nga ai. Galai shai ai ngu ai gaw tinang a ra rawng gawng kya ai hpe dum shai ai ni hta she mai byin nga ai.

Madu Yesu Hkristu du sa ai shaloi dingman dinghpring dum ai masha ni gaw Shi Madu hpe nhkap la ai ni law law nga mat wa ai raitim, mara lu ai ni, nat satan a agung alau hkrum ai ni, nkaja ai masha ni chyawm gaw Karai Kasang a shaman chyeju hpe hpang gara ai a majaw Madu Yesu re ai ngu ai hpe mu chye nna shanhte hta ra ai shaman chyeju ni hpe hkam la lu lai wa sai re.

Shinggyim masha a ra rawng gawng kya ai a majaw nhkum ntsup ga ai re ngu nna dum shai lu na matu hte, galai shai lu na matu Karai Kasang hpang de sit shang nna ra ai shaman chye ju hpe hkam la lu u ga.

KARAI KASANG A MUNGDAN

“Kashin Kamun hkam la sai Hkristan yawng gaw, Hkristu a hkum hkrang (Nawku Hpung) hpe gaw gap na matu shaga la hkrum ai ni rai nga ai.”

Masha hta kap nga ai n kaja ai nat ni hpe Jau ni gawt shapraw kau ai hpe mu yu, na yu sa na re. Dai zawn mi chyaw mu lu ai shaloi nat gawt shapraw kau ai lam hpe atsawm n chye na ai raitim, kaning re ai atsam hte nat kap ai masha ni bai kaja wa ai hpe mau nga ma ai. Dai ni na kabu gara shiga hta na masha ni zawn “ndai gaw hpa rai nga a ta?” ngu nna tsun chye ma ai. Madu Yesu, n hkru ai nat ni hpe shaden kau lu ai, (Nawku hpung hpe mung jaw da sai) dai ahkang aya a grau sung ai lachyum gaw hpa rai nga a ta?

Dai lachyum gaw, Adam a prat kaw nna shinggyim masha ni hpe yam sha lai wa sai, Nat satan a mungdan hten run magang wa sai hte Karai Kasang a mungdan lam hpaw wa sai lachyum rai nga ai. Madu Yesu shi a prat hta Karai Kasang a mungdan hpe hpaw hpang tawn da ai rai yang, Satan a mungdan dai ni du hkra hpa majaw n-gun ja dingyang rai nga a ta? sawn yu mai nga ai. Mahtai jaw ga nga yang, Karai Kasang a mungdan gaw, kalang ta akajawng sha byin lu ai lam n rai nga ai. Kalang mi sha byin ai mabyin mung n rai, prat mi hte prat mi matut manoi gaw gap mat wa ra ai prat labau a mabyin rai nga ai. Dai hpe jahkum jatsup na matu Madu Yesu gaw anhte hpe lit shatsam da sai. Dai re ai majaw, “Na mungdan du wa ru ga!” nga nna anhte “Madu a akyu hpyi ga” hta matut manoi hpyi nga ga ai re. 

Karai Kasang a mungdan hpe hpun bawng hte shabung yu ga. Madu Yesu gaw Sumsing mungdan hpun bawng hpe hkai da ya sai. Raitim, Madu Yesu gaw dai hpun hpe nam hpun bang na, hka jaw na hte tsan lajang na magam bungli anhte hpe ngam da ya sai. Karai Kasang ra sharawng ai hku tu kaba wa lu hkra, yu lajang na mung anhte yawng a lit rai nga ai. Dai hpang anhte ga san kaga bai san yu mai nga ai. “Hpa majaw Karai Kasang a mungdan alawan n du wa ai kun?” (snr) “hpa majaw Satan a mungdan alawan n htum mat ai kun?” Mahtai gaw; anhte galaw ang ai daram bungli n galaw ai majaw rai na re. Ga shadawn; anhte marai kade wa, Madu Yesu anhte hpe tsawra ai zawn, shada da tsawra nga ga ai kun? Madu tsawra ai zawn masha kaga hpe tsawra n chye ai gaw anhte a hpyen wa, htingbu wa hpe sha nrai, anhte kun dinghku kata hta mung hkrat sum ai lam rai nga ai. Prat hkrun lam na matu amu magam ni hta sha myit jung nga ai majaw, dinghku masha ni a ra kadawn ai hpe gaw malap mali yu shalai kau chye nga ai. 

Shadang la marai mi gaw shi prat hta galoi mung n pyaw ai da. Grau sawng ai gaw hpa majaw dai zawn rai n pyaw ai hpe shi n chye lu ai lam rai nga ai. Dai gaw shi a mara re ai lam shi a manang shi hpe tsun dan sai. Shi gaw aten tup shara shagu de amu bungli kyin hkawm ai wa rai nga ai. Shi hku nna hkring sa aten n lu ai hte Karai Kasang hpan da ai tsawm htap la ai masha ni hpe yu chyai lu na aten nan nlu nga ai. Shi a manang numsha marai mi gaw shi a kawa a lam shi hpe tsun dan ai. Numsha dai tsun ai hta, kawa gaw shi a kahpu hte hpai kasup chyai ai hpe tut nawng yu yu rai nga ai da. Shawng nnan e gaw, kawa hpe, asak aprat kaba wa sai, tsawm htap lam n nga sai, hku nna sha mu mada ai. Raitim lani mi hta, kawa hpe yu nga ai shaloi, shawng de galoi mung n mu hkrup ai kaja ai hte n kaja ai lam ni, alak mi re ai lai len ni, tsun shaga ai lam ni hpe mu mau ai hte, “nye wa kaning re ai hpe ngai chye sai hte grai tsawra mat ni ai, kabu pyaw dik ai majaw marawn jahtau mayu ni ai, Karai Kasang hpe mung chye ju dum dik ai hte, ngai aten la nna tengman ai lam mu la lu ni ai”, nga nna tsun ai. 

Dai ni na kabu gara shiga gaw, anhte hpe nau n tin shachyut na matu saw shaga nga ai. Masha ni hpe atsawm hkrak chye, mu lu na hte Madu Yesu anhte hpe tsawra ai zawn anhte mung masha ni hpe tsawra chye na matu saw shaga nga ai. Shaloi she anhte a lapran hta Karai Kasang a mungdan hpe gaw gap lu na rai nna, dai mungdan hpe gaw gap na atsam rai nga ai Hkristu a simsa ai kabu gara ai hte tsawra ai mung anhte hte rau a nga nga na re!

Sawn sumru mai ai lam: Pawt sin dawng ai, manghkang law ai hte tara rap ra ai lam n nga ai ya ndai aten na masa hta, ngai hta rawng nga ai Hkristu a atsam hte Karai Kasang a mungdan hpe ngai gaw gap lu na re, ngu, ngai kaja wa kamsham nga ai kun?

2018: PRANWAN LADAW LABAN (4) NA CHYUM LAIKA

PRANWAN LADAW LABAN (4)

28th JANUARY 2018

CHYUM MUNGGA DAW 1

TARA JAHPRANG 18:15-20

Ya hti na gaw, Tara Jahprang laika hta na rai nga ai.

Israela a kashu kasha ni hpe Mawshe tsun ai gaw: Na a Madu Karai Kasang gaw, na a hpu nau ni hta na, ngai zawn re ai myihtoi langai mi hpe, na a matu paw pru shangun na ra ai: dai wa a ga hpe nanhte madat lu na rai myit dai. Horeb bum e hpawng ai shani e, nang gaw na Madu Karai Kasang hpe hpyi nem let, Ngai n si n ga, ya hpang de nye a Karai Kasang a nsen ngai bai n na lu ni ga; dai wan kaba hpe mung ngai bai n mu ni ga, nga nna nang tsun nit dai. Shaloi Karai Kasang ngai hpe htan nna, Israela amyu masha ni tsun ai ga mahkra htap htuk nga malu ai. 

Shanhte a kahpu kanau ni hta na nang zawn re ai myihtoi langai mi hpe, shanhte a matu ngai paw pru shangun na we ai rai nna, dai wa a n-gup hta nye a ga ngai hti bang na hte, ngai hkang da mada hte maren, shi shanhte hpe htawn tsun na ra ai. Nye a mying nsang hte shi htawn tsun ai nye a ga hpe, kadai wa n madat yang, dai wa hpe ngai deng na we ai. Rai ti mung, ngai n hkang da ai ga hpe, nye a amying gang nna tsun pru gwi ai myihtoi mung, hpara shaje a amying hte tsun pru ai myihtoi mung, si lu na rai nga ai, nga nna Madu Karai Kasang gaw ngai Mawshe hpe tsun nu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 KORINHTU 7:32-35

Ya hti na gaw, Korinhtu masha ni hpang de San Pawlu shangun dat ai laika langai hta na rai nga ai.

Hpu nau ni e, nanhte gaw myit ru myit tsang n nga myit ga ngai ra nga nngai. Num n la ai wa gaw, Madu Karai Kasang hpe myit shapyaw ya na lam chyu sha tsang nga ai majaw, Madu a lam hta htep lahti hkan galaw shakut lu ai; num la ai wa chyawm gaw, mungkan lam ni hpe tsang nga ai hte, shi a madu jan hpe myit shapyaw ya na lam hkan galaw shakut ra ai majaw, myit kabrang nga lu ai. Dai hte maren, num n wa ai jan gaw, mahkawn hkawn ji zawn, shi a hkum hte wenyi chyoi pra lu na lam hpe chyu sha tsang nga ai majaw, Madu a lam hta htep lahti hkan galaw shakut lu ai. Num wa ai jan chyawm gaw mungkan lam ni hpe myit tsang nga ai hte, shi a madu wa hpe myit shapyaw ya na matu, htep lahti hkan galaw shakut ra ai. Ngai ning ngu tsun ai gaw, nanhte hpe lashoi hte zawn shingdang da ai lam n rai, garum ai lam she rai nga ai: nanhte htap htuk jaw nga ai lam madun dan nna, Madu hpe n dut n dang daw jau lu myit ga tsun nga nngai.

Ya hti ai gaw, Karai Kasang a mungga rai nga ai.

KABU GARA SHIGA

MARKU 1:21-28

Ya hti na gaw, Marku a laika hta na Kabu Gara Shiga rai nga ai.

Yesu hte Shi a sape ni gaw Kaperna-um mare de shang ma ai. Shaloi jang laban nhtoi e shi shanhte a tara jawng hta shang nna sharin shaga nga ai. Shi sharin shaga ai lam hpe shanhte mau mat nga ma ai; kaning rai nme law, laika ka ai sara ni zawn nrai, daru magam ahkang lu ai wa zawn Shi shanhte hpe sharin shaga ya mu ai. Shaloi jang, shanhte a tara jawng hta e n san n seng nat kap ai masha marai mi lawm nga ai. Dai n seng ai nat  jahtau nna, Nazaret na wa Yesu e, anhte nang hte hpa seng ga ta? anhte hpe jahten na nang sa du nni? nang kadai re ai ngai chye nga n ngai, ngu wu ai. Shaloi jang Yesu gaw, Atsim sha nga u; shi kaw nna pru wa u, ngu nna shi hpe daru kau wu ai. Dai rai nna, dai n seng ai nat gaw shi hpe bu kashan shangun nna, nsen kaba hte jahtau let shi kaw nna pru mat wa ai. Shaloi yawng hte gaw mau mahka nga nna, ndai gaw hpa rai nga a ta? ning nan sharin shaga ai lam rai I? daru magam ahkang hte n seng ai nat ni hpe pyi shi htet da nna, shanhte madat mara nga ma ai, nga nna shada da tsun hkat ma ai. Shaloi jang Galile mung ting na shara shagu hkan e, Shi a lam kajai gara gumhkawng pri rai wa sai. 

Ya hti ai gaw, Madu a Kabu Gara Shiga rai nga ai.

2018: PRANWAN LADAW LABAN (3) NA MUNGGA

Madu Yesu gaw Shi a shawng e du sa ai datkasa Yawhan Baptista rim hkrum ai shiga hpe na lu ngut ai hpang aten ahkying ram sai lam hte Karai Kasang a Mungdan du magang ra ai majaw myit malai lu nna Kabu Gara Shiga hpe kam sham na matu hkaw tsun hpang wa sai re. 

Hkyen lajang ai aten ladaw ngut ai hpang tatut magam bungli galaw sa na matu ahkyak ai hpe mu lu ai hta n-ga Karai Kasang a Kabu Gara Shiga hpe htawn shana na matu Shi Madu hkrai nre ai sha Shi a hpang hkan nang na matu Sape ni hpe shaga la nna lit shatsam lai wa sai re.

Anhte lai di taw nga ai shani shagu na aten ahkying ni hta jet ai myit malai lu nna Kabu Gara Shiga hpe kamsham ai sha n-ga, anhte a makam masham hta sakhkrung nga sa ai lam gaw manang wa a matu Kabu Gara Shiga byin tai lu na matu shakut shaja sa wa lu u ga.

NAWKU HPUNG HTE NGAI

“Tengman ai makam masham gaw Masha ni hpe atsawm chye na lu na matu garum ya ai”

Lani mi hta salang marai mi gaw shi a kanu hpe, “ngai nawku jawng sa ai hpe lam lahkawng a majaw jahkring kau sana; (1) ngai masha ni hpe yu n lu ai hte (2) masha ni mung ngai hpe yu n lu ai majaw re,” nga a put a ngun ngu wu ai. kanu mung shi hpe yu let myit shalan shabran ya ai hku nna tsun ai gaw; “ngai sha e, lam lahkawng a majaw nang nawku jawng de bai sa ra na re, (1) nang asak (55) ning rai sai hte (2) nang gaw ginwang up jau rai nga ai majaw re” ngu wu ai.

Madu Yesu shi a Sasana magam galaw hpang wa ai shaloi, Petru, Andre, Yaku, Yawhan hte kaga masha ni hpe “masha hpe hkan hkwi na masha” ni tai wa na matu shaga la sai. Dai ni na kabu gara shiga hta rawng ai hte maren, Madu a Sape ni gaw, masha ni shanhte hpe ra ai raitim, n ra ai raitim, myit htum let raitim, Shi Sumsing lamu de lung wa mat ai hpang ngam da ai “Hkye hkrang la ai” magam bungli hpe matut galaw lai wa masai. Hpung masha ni gaw hpung woi ningbaw hpe, pawt ja ai, sut gan marin ai, jahkrum la n mai ai, ladat nnan n hkap la ai… nga nna ya sha sha mara shagun ai hpe na lu ga ai. Shanhte a gum rawng ai, myit marin ai hte n kam hkam ai myit ni gaw, shanhte Jau, Saradaw ni hpe myi kyaw shangun ai zawn, shanhte woi awn ai hpung masha ni hpe mung, myi kyaw shangun ya lu nga ai. Rai timung, Madu Yesu gaw, shi hpe masum lang nyet kau ai, n-ging n dan ai Petru hpe shi a Nawku Hpung, gaw de ai lung hkrung shatai da nna, n hkum n tsup ai ni hpe shaga la ai lam madun dan sai. Shinggyim masha ni re majaw shanhte mung shut chye na re. Raitim Karai Kasang shanhte hpe shaga la sai shaman chyeju hta kam hpa let tinang a Shinggyim gawng kya lam ni hpe tawt lai lu hkra n sim n sa shakut na matu lit nga malu ai. Nawku hpung hta sagurem ai ni a gawng kya lam a majaw masha n kau mi a makam masham hpe jahten kau ya lu nga ai, raitim, kaja ai sagurem ni gaw masha law law a myit masin hpe makam masham lam de bai woi wa na atsam kaba nga ai hpe mung mu lu nga ai. N nga mat sai Wasarabyin Yawhan XXIII hte Wasarabyin Yawhan Pawlu II ni hpe myit yu ga. Shanhte a tsawra shagrit shanem ai hte masha hpe kabu mani pyaw shangun ai lam ni gaw, kaga makam masham Uhpung kaw na masha ni a masin salum hpe pyi dang la lu nga ai. 

Tengman ai makam masham gaw, Nawku hpung a ningbaw ni hta nga ai atsam marai ni hpe, shanhte kaja tim, n kaja tim, chye na lu na garum ya nga ai. Hpung masha ni gaw Nawku hpung hpe dinglun na ahkang lu nga ai. Raitim, anhte kadai hpe a put a ngun di nga ai kun, nga ai hpe chye na mung ahkyak nga ai. Anhte hkum nan gaw Nawku hpung rai nga ai majaw, anhte hkum anhte sha tsun la nga ai hpe kalang lang n dum chye kau ga ai. Nawku hpung hpe anhte hte n seng ai zawn tsun shaga ai lam gaw, machyi ai tinang a ta layung hpe tinang a hkum hkrang daw chyen n shadu ai sha a put a ngun di ai hte bung nga ai. Nawku hpung hte anhte a mahku mara lam gaw, hkungran ai lam hte mung bung nga ai. Pyaw la ai hkungran ladaw ngut ai hpang, hkungran ai lam gaw pyaw nna sha nga na n rai, dai hta jan ai dinghku num yan la jawm shakut sha ra ai lam re ai hpe dum la mai ai. Dai hte maren, hpung woi ningbaw ni hte hpung masha ni mung rau jawm galaw ra nga ai. Ga san gaw; tinang hte seng ai lam galaw sai kun? Tinang galaw ra ai lam hpe gaw kaja wa chye ai kun? Nawku hpung woi ni chyu sha n rai, kashin kamun hkam la sai marai hkum shagu gaw tsawra matsan dum myit hte dai Yesu Hkristu a hkum rai nga ai Nawku hpung hpe gaw gap na shaga la hkrum sai ni hkrai rai nga ga ai hpe myit dum mai nga ai. 

Sawn sumru mai ai lam: Nawku hpung masha marai mi hku nna galaw ra ai lit magam ni hpe ngai chye nga ai kun? Nawku hpung masha ni zet let ai, ap nawng ai hte Nawku hpung shamu shamawt lam ni hta kabu gara shang lawm lu hkra ngai gara hku garum ya lu na rai ta?