2018: PRANWAN LADAW LABAN (2) NA MUNGGA

Madu Yesu Hkristu hte mu hkrum ai masha ni law law hte gaw Shi Madu a tsun shaga ai lam ni hte Shi a nga sat nga sa lam hpe mu la nna Shi a hpang hkan nang ai sape ni byin tai wa sai re. Hpa majaw nga yang tatut nga sa ai masha langai mi tsun shaga ai ga si ga ngau ni gaw numnak rawng nna na la ai ni a prat hpe galai shai lu ai re.

Dai ni na Kabu Gara shiga hta Madu Yesu a saw shaga ga hte maren Shi Madu nga ai shara de du nna shanhte a myi hte chyaw mu lu nna Madu Yesu gaw hkye hkrang la ai wa re ngu ai hpe teng sha chye la lu nna shanhte hkum nan kam sham ai sha n-ga, kaga masha (Petru) hpe Madu Yesu hpang de woi sa nna kamsham ai masha langai shabyin shatai ya lu sai re.

Madu Yesu a kasi hpe la nna anhte a kamsham ai lam hpe n-gup ga hte sha nrai, amu bungli hte sakse hkam lu nna tinang a htingbu wa hpe Madu Yesu a hpang de lam madun woi sa lu u ga.

SAK SE HKAM NGA GA

“Anhte a makam masham lam masha kaga ni hpe tsun dan na hpa majaw ung ang nga ga ta?”

Kalang mi na, dingla marai mi gaw tsi tsi lajang la na matu tsirung lung ai da. Tsi saranum mung shi hpe atsawm hkap tau shara lajang ya ngut ai hpang, tsirung na jahpan laika hta matsing da na matu ga san ni san wu ai. Shi san ai ga san langai mi gaw, “nang grau ra sharawng ai makam masham gaw hpa rai ta?” ngu san jang dai dingla gaw, tsi saranum hpe mada let, “ga san dai ngai hpe san ai majaw grai kabu sai, ngai galoi mung Kahtawlik hpung masha tai mayu lai wa sai, rai tim, kadai mung ngai hpe n san yu ma ai. Nang gaw yawng a shawng re”, ngu bai htan wu ai. Ndai gaw kaja wa byin ai lam rai nga ai.

Ndai mabyin gaw hpa majaw anhte a makam masham hpe masha kaga ni hte tsun garan dan na ung ang nga ga ta? shing nrai, Madu a kabu gara shiga gaw kaja wa kabu mai ai shiga re hpe anhte kam sham ai rai yang, hpa majaw kaga masha ni hpe n kam gam garan ai rai ta? nga nna anhte hpe san nga ai. Madu Yesu gaw anhte a masin salum a matu hpu ging htum ai sutgan kaba rai yang, hpa majaw Madu Yesu hta nga ai anhte a makam masham lam masha ni hpe n kam gam garan ai kun?

Dai ni na chyum mungga ni hta ndai lam ni lawm nga ai. Mungga daw 1 hta myihtoi Eli, shi a makam masham hpe shadang sha Samuela hpe hti dan ai lam, daw 2 hta kasa Pawlu shi a makam masham hpe Korinhtu masha ni hpe gam garan ai lam, kabu gara shiga hta, kashin kamun sara Yawhan gaw shi a makam masham hpe shi a Sape lahkawng hpe garan ya sai hte Andre gaw shi a kahpu Petru hpe bai gam garan ya sai lam ni hti lu nga ai. Ya, kabu gara shiga na Andre a lam bai sumru yu ga.

Yawhan a kabu gara shiga hta Andre a lam masum rawng nga ai. Lang shagu hta Andre gaw marai rai hpe Yesu hpang de woi wa nna makam masham gam garan ai lam ka da nga ai. Dai ni na mungga hta Andre gaw shi a kahpu Petru hpe Madu Yesu hpang de woi wa wu ai. Hpang jahtum Madu Yesu gaw Petru hpe shi a Nawku hpung de da na ‘lung hkrung’ tai na matu lata la sai. Dai hpang Andre gaw muk tawng (5) hte nga (2) lu ai ma kasha hpe Yesu hpang de woi wa nna, (Yn 6:9) Yesu mung dai hpe la nhtawm masha law law hpe shalaw jaw sha lu sai. Hpang jahtum, Andre gaw ‘Heleni’ myu sha ni hpe Yesu hpang de woi wa ai hte (Yn 12: 20-22) Madu Yesu mung shanhte hpe ahkyak ai lam ni sharin shaga na aten lu la sai.

Ndai lam ni gaw lahta na gasan ni de bai woi wa nga ai. Madu Yesu gaw anhte lu la mai ai manu dan dik ai sut gan re hpe kam sham ai rai yang, dai sut gan masha hpe hpa majaw n kam gam garan ai rai ta? “Masha kaga ni Madu Yesu hpe myit shang sha ai lam n nga ai majaw re” nga nna anhte mahtai jaw na re. Bai mi na tsirung lung ai dingla wa mung Yesu hpe chye mayu ai, Kahtawlik tai wa mayu ai lama rai yang, shawng shawng kaw nna hkan sagawn na rai nga ai re” nga nna myit ai ni mung lawm na re. Tsisaranum lama n san hkrup ai rai yang, dingla dai shi myit mada ai Kahtawlik tai mayu ai myit n hkum tsup ai sha si mat wa na rai nga ai. Tinang a makam masham hpe masha kaga hpe tsun dan, gam garan dan na ahkyak n re ngu myit ai ni kadai rai timung, dai ni na kabu gara shiga hpe sung sung myit yu mai nga ai. Andre, shi kahpu Petru hpe Yesu hpang de n woi wa ai rai yang, Petru gaw Madu Yesu, shi a Nawku hpung de da na lung hkrung galoi mung n byin wa na re. Andre, muk tawng hte ‘nga’ lu ai la kasha hpe Yesu hpang de n woi wa ai rai yang, shawa masha ni yawng mung kaw si hkrum nna, kabu gara shiga hta mung dai zawn rai Wenyi n-gun lu la hpa ahkyak ai mabyin n lawm mat na rai nga ai. Dai re ai majaw, anhte dai ni na kabu gara shiga gaw, tinang a makam masham masha kaga ni hpe gam garan lu hkra shakut shaja na matu anhte hpe saw shaga nga ai.

Sawn sumru mai ai lam:  Ngai a makam masham lam, ngai a kun dinghku, manaw manang hte htingbu ni hpe gam garan dan na matu ngai hpa majaw n kam a ta?

2018: PRANWAN LADAW LABAN (2) NA CHYUM LAIKA

PRAN WAN LAWAN LADAW (2)

14th JANUARY 2018

CHYUM MUNGGA DAW 1

1 Samuela 3:3-10, 19

Ya hti na gaw, Samuela a laika hta na rai nga ai.

Samuela gaw Madu a nawku nta hta, Karai Kasang a chyoi pra ai sumpu tawn da ai shara e yup nga yang,4Madu shi hpe shaga wu ai. Samuela gaw, Nang e nga nngai, ngu nna htan wu ai. Shaloi hkinjawng agyi Eli hpang de gat sa nna, Nang shaga ai majaw, wa ring ngai, ngu wu ai. Eli gaw, Ngai n shaga ai; naw yup nga su, ngu nna tsun jang Samuela wa nna bai yup nga ai. Bai Madu gaw, Smmuela e, ngu nna shi hpe bai shaga wu ai. Shi mung rawt nna Eli hpang de sa nhtawm, Nang shaga ai majaw wa ring nngai, ngu wu yang, Eli gaw Ngai sha e, ngai n shaga ai; bai wa yup nga su, ngu dat wu ai. Ya Samuela gaw Madu a lam hpe atsawm sha garai n chye nga ai; Madu mung shi a mungga shi hpe garai n tsun dan wu ai. 

Masum lang ngu na hta Madu gaw Samuela hpe shaga wu ai. Shi mung rawt nna Eli hpang de sa nhtawm, Nang shaga ai majaw wa ring ngai, ngu wu yang, dai ma hpe Madu shaga nga ai gaw Eli dum wu ai. Dai rai ai majaw Eli gaw, Naw wa yup nga su; ya na lang bai shaga jang, Madu e, tsun rit; na a shangun ma madat nga nngai, ngu nna htan u, ngu dat wu ai. Shing rai Samuela bai wa nna, shi a shara e yup nga ai. Shaloi Madu sa tsap nna, shawng na zawn, Samuela, Samuela nga nna, shaga wu ai. Samuela mung, Tsun rit; na a shangun ma madat nga nngai, ngu nna htan wu ai. Samuela kaba wa nna, Madu shi hte rau nga nga ai; shi n-gun matsing ai Madu a mungga langai mi pyi n nga ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 KORINHTU 6:13-15, 17-20

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, Masha a hkum hkrang gaw n se n sa ai amu a matu n re ai sha, Madu a matu rai nga ai; Madu mung dai hkum hkrang a matu rai nga ai. Karai Kasang gaw Madu Hkristu hpe jahkrung sharawt la sai rai nna, anhte hpe mung shi a n-gun atsam hte jahkrung sharawt la na mi ai. Nanhte a hkum hkrang ni Hkristu a daw shan ni rai nga ai hpe nanhte chye chyalu rai nga myit dai; Madu Hkristu hte matut manoi nga ai wa gaw, nsa wenyi a lam hta Madu hte langai sha tai wa nga ai. 

Dai rai nna, n se n sa ai amu hpe koi kau nga mu. Masha galaw ai shut hpyit mara kaga hte gaw, tinang a hkum hkrang a shinggan e galaw nga ai; n se n sa ai amu galaw ai wa chyawm gaw shi a hkum hkrang hpe nan shut hpyit da wu ai. Ya nanhte a hkum hkrang gaw Chyoi Pra ai Wenyi sa nga ai htingnu rai nga ai hpe nanhte chye nga myit dai. Nanhte tinang hkum hpe madu lu ai n rai;  Nanhte a matu jahpu manu jaw ya nna mari da sai ni rai nga myit dai. Dai re ai majaw, nanhte a hkum hkrang hte Karai Kasang hpe shagrau sha-a nga mu law.

Ya hti ai gaw, Karai Kasang a mung rai nga ai.

KABU GARA SHIGA

YAWHAN 1:35-42

Ya hti na gaw, Yawhan a laika hta na Kabu Gara Shiga rai nga ai.

Bai hpang shani e, Yawhan hte shi a sape lahkawng rau tsap nga ma ai rai nna, Yesu lai sa wa nga yang, Yawhan gaw Shi hpe mada yu nna, Karai Kasang a sagu kasha hpe yu yu mu! Ngu mu ai. Dai sape yan gaw shi tsun ai ga na nna, Yesu kaw hkan sa ma ai. Yesu gaw gayin yu nna, dai yan hkan sa ai hpe mu wu yang, nan hpa tam myit ta? ngu nna hkap san mu ai. Shan gaw, Rabai e, nang ganang nga n ta? ngu nna Shi hpe n htang san mu ai. Yesu gaw, sa ma rit, shaloi nan mu na marin dai, ngu nna shan hpe tsun wu ai. Dai re ai majaw, shan hkan sa nna, Shi nga ai shara ganang re ai mung mu ma jang, dai shani tup Shi hte rau nga nga ma ai.

Yawhan tsun ai ga na nna, Shi kaw hkan sa ai yan hta na langai mi gaw, Simun Petru a kanau Andre rai nga ai. Dai wa gaw shi a kahpu Simun hpe shawng mu nna, an gaw Mesiah hpe mu saga ai, ngu nna shi hpe tsun dan ma ai. (Mesiah ngu ai ga lachyum gaw, Hkristu nga ai, rai nga ai.) Shaloi Andre gaw Yesu hpang de shi hpe woi wa wu ai. Yesu gaw shi hpe hkap yu nna, nang gaw Yawhan a kasha Simun rai nga ndai: nang Kehpa ngu ai mying lu na rin dai, ngu wu ai. (Kehpa ngu ai lachyum gaw, lunghkrung nga ai, rai nga ai)   

Ya hti ai gaw, Madu a Kabu Gara Shiga rai nga ai.

HKAWHKAM MASUM POI SHANI NA MUNGGA

Madu Yesu Hkristu shangai wa ai shaloi Shi a makau grup yin na masha law law hte wa, Shi Madu hte nmu nhkrum ai raitim, sum tsan buga na du sa ai hkawhkam masum gaw Madu Yesu hpe mu hkrum lu wa sai.

Mahkra dang chye ai Karai Kasang gaw anhte hte rau galoi mung nga ai raitim Karai Kasang a garum ya ai hpe ra kadawn taw nga ai ni hte Karai Kasang hpe galoi mung dum shai ai sha Karai Kasang a matu aten jaw nna Karai Kasang hte mu hkrum mai nga ai.

Ndai Madu a shaning nnan hta e anhte ni yawng gaw ru yak jam jau ai raitim, nga mu nga mai ai raitim, anhte a makau grup yin hta Karai Kasang nga ai hpe dum shai nna Shi Madu hte mu hkrum let shaman chyeju hpe hkam la lu ai ngwi pyaw ai, kaja ai shaning teng sha anhte a matu byin tai wa lu u ga.

HPAJI CHYE AI NI KAW SHARIN LA GA

Hkawhkam masum poi gaw Hkrismat ladaw a hpang jahtum na poi rai nga ai. Ma Yesu hpe sa nawku hkungga ai Sinpraw mung na sa du ai masha marai 3 hpe Hkawhkam ni nga nna sha chye na hkap la ga ai. San Mahte chyu sha shanhte hpe ‘hpaji rawng ai masha ni’ (Mt 2:2) nga nna ka da sai. Shanhte gaw gunhpan ni n rai, ‘hpaji rawng ai ni’ (snr) ‘ myit jahtoi ya hkrum ai lamu shagan hpaji chye ai ni’ rai nga ma ai. Hpaji rawng ai masha ni a lam ka da ai mungga gaw anhte a prat hte gara hku matut mahkai lachyum pru nga a ta? San Mahte a kabu gara shiga hta hpaji rawng ai masha 3 gaw, nnan shangai wa ai ma hpe hkan sagawn tam hkawm ma ai lam rawng nga ai. Tam sagawn hkawm na matu nden ja myit hte shakut shaja myit lawm ra nga ai. “Shagan a hpang hkan nang da aw?” “ Hpa galaw na matu da i?” “Anhte gaw grai kyin ai, shani shagu dai shagan yu nga na ten n nga ai” nga nna shanhte a manang ni asawng asang nga na hpe mung anhte myit sawn ya yu mai ai. Rai tim, hpaji rawng ai masha 3 gaw Ma Yesu hpe mu ai du hkra hkan tam shakut sai.

Dai hte maren anthe a makam masham hta sadi dung ngang kang ai hte kam sham lu na matu mung, nden ja myit hte tinang hkum n dang nyet kau ai lam lawm ra nga ai. N teng n man n ding n hpring ai masha law la ai prat hta, masha yawng kaja ai nga tim Karai Kasang a myit ra ai lam hte n htan shai ai rai yang, tinang gaw kaja ai hku n mai hkap la nga ai. Matsan jam jau kade hkrum ai raitim, n ding n hpring ai ja sutgan hpe n mai marin nga ai. Sadi n dung hten bya ai dinghku law la ai rai tim, tinang gaw shada sadi dung nga lu hkra atsam dat shakut ra nga ai. kaja wa sha ja gumhpraw hpe sha madung da hkan tam ai anhte a prat hta myit ding man ai masha tai nga na matu n den ja marai rawng na ahkyak la nga ai. Kaga naw sharin la mai ai lam langai gaw, “ makam masham” hte seng ai lam re. “ shanhte lahput hput di let shi hpe nawku nna kumhpa ni hpe sak jaw mu ai.” Grai tsan ai Sinpraw mung de na hkawm sa wa ai raitim, shanhte a reng dik ai kumhpa, aja, lawban hte mura ngu ai kumhpa ni hpe gun sa wa ma ai lam rawng nga ai. Dai gaw shanhte a makam masham kumhpa rai sai. Kumhpa hte seng nna myit pyaw kabu hpa mabyin langai mi nga ai. Ndai mabyin hta; grai matsan ai raitim shada grai tsawra hkat ai ‘Jim’ hte ‘Delia’ ngu ai shan la nga ai da. Hkrismat aten du ai shaloi tinang a tsawra myit hpe kumhpaw kumhpa hta shadan shaleng mayu ma ai. Delia gaw shi a tsawm htap galu la ai kara hpe zen dut kau nna nrum ntau wa a matu nayi sumri mari wa ya ai. Jim mung shi a nari dut kau nna madu jan a matu tsawm htap la ai kara masit hte kara matep ni hpe kumhpa shatai na matu mari wa sai. Shan a kum hpa ni hpe hpaw yu dat ai shaloi, ma-am mat ma sai. Kumhpa dai ni hpe shan lahkawng n mai lang mat sai rai tim shan a tsawra myit ni gaw dai kumhpa ni hta grau tengman manu dan ai hpe chye la lu sai.

Ma Yesu a matu anhte gun sa na kumhpa gaw hpa rai ta? Ndai ladaw laman anhte a myit masin wenyi hpe sharai lajang ai ten hkrum sha ai yak hkak ai lam hte kabu pyaw ai lam ni mahkra gaw anhte a kam sham ai myit a sung htum ai kumhpa rai sai. Ja gumhpraw arung arai hkrai n rai ra ai. Raitim, anthe a prat hta manu dan hpu reng ai sutgan rai ra ai. Ga shadawn; ja sutgan hte mari la n lu ai tsawra myit, tinang lu ai ahkying aten, atsam marai, shada matsan dum mara raw ya ai… lam ni, mai rai nga ai. Hpang jahtum kasi la mai ai gaw, hpaji rawng ai masha ni, sumtsan buga kaw nna Ma Yesu hpe hkan tam ai hta ruyak jam jau hkam sharang nna shakut ai zawn, anhte mung Madu Yesu hte rau asak hkrung nga lu na matu atsam marai dat hkam sharang ra ai lam rai nga ai.

Sawn sumru mai ai lam;   Ngai a hpu reng dik htum ai, Madu Yesu hpe jaw na kumhpa gaw hpa rai ta? Hpaji rawng ai masha ni madun da ai, marai dat shakut shaja ai kasi kaja hpe ngai gara hku hkap la hkan sa lu na rai ta? Ngai a prat hta makam masham hpe sakse hkam na matu, grau nna jaw/n jaw ai hpe lata ra wa ai aten ni hta ngai a makam masham sharin shaga ai hte maren hkrak lata la na nden myit ngai hta rawng ai kun?

2018 HKAWHKAM (3) POI SHANI NA CHYUM LAIKA

HKAWHKAM MASUM POI

7 JANUARY, 2018

CHYUM MUNGGA DAW 1

ESAIA 60:1-6

Ya hti na gaw, Esaia a laika hta na rai nga ai.

Yerusalem e, rawt u; htoi tu u; na a nhtoi du na ra ai; Madu a hpung shingkang na a ntsa e dan hkung nga ai: Kaning rai nme law, nsin gaw ginding aga hpe, saiwan gaw amyu baw ni hpe ka-up nga ai, rai ti mung, Madu gaw, na a ntsa e paw pru nna, Shi a hpung shingkang na a ntsa e dan pru na ra ai. Maigan amyu ni gaw na a nhtoi de, hkawhkam ni gaw na a nhtoi tu kabrim ai de du sa na mara ai. Baw sharawt nna, grup yin mada yu mu; shanhte yawng zuphpawng nna, nang hpang de du wa mara ai. Na a shadang sha ni gaw sumtsan mung de na wa nna, na a shayi sha ni gaw ba wa ai ni hpe hkrum na mara ai. 

Shaloi, nang mu mada yang, na a myiman htoi kabrim na ra ai; na a myit masin kabu gara ai hte kaba wa na ra ai; kaning rai nme law, nammukdara a sutgan nang hpang de kayin wa nna, maigan amyu ni a arung arai ni nang hpang de du na ra ai. Gawla-uk wunawng ni, Midian hte Ehpa Mung na gawla-uk hkalung ni gaw, nang hpe ka-up na ra ai; Sheba mung na ni yawng du na mara ai; shanhte gaw aja hte lawban lang nna, Madu hpe shakawn kungdawn na lam kajai gumhkawng na mara ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

EHPESU 3:2-3a,  5-6

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, Karai Kasang nanhte hpe jaw mayu ai chyeju lam, Shi nye a lata hta ap ya da sai hpe nanhte na lu sai nhten; dai hta n-ga , dai mung sung ga sung hpe shingran ga hte ngai hpe shana dat ai gaw, Nanhte na la sai hpe nawn da nngai. Ndai mung sung lam, ya aprat e Shi a chyoi pra ai kasa ni hpe myihtoi ni kaw , Wenyi a shadan dan ai hte maren , moi shawng na aprat ni hta e shinggyim masha kaw n shana yu mu ai. Dai mung sung a lachyum gaw, maigan amyu ni Yuda amyu ni hte rau, ga ndat a sali wunli hkam la lu nna, shanhte hte rau hkum hkrang langai sha tai wa ai hte, ga ndat ni hpe jawm lu jawm la ai ni tai wa nga ma ai.

Ya hti ai gaw, Karai Kasang a mungga rai nga ai.

KABU GARA SHIGA

MAHTE 2:1-12

Ya hti na gaw, Mahte a laika hta na Kabu Gara Shiga rai nga ai.

Ya, Herawt hkawhkam a lakhtak hta, Yuda mung na Betlehem mare e Yesu shangai wa ai hpang, Sinpraw mung na hpaji rawng ai masha ni Yerusalem mare de du sa ma ai rai nna, Shangai wa ai Yuda hkawhkam wa gaw ganang e nga a ta? Shi a shagan hpe Sinpraw mung hta mu lu sai rai nna, Shi hpe Nawku na matu sa du ga ai, nga nna san mu ai. Herawt hkawhkam dai ga hpe na jang, shi hte Yerusalem na ni yawng gaw myit kahpra mat ai rai nna, Dai amyu na hkinjawng agyi ni hte tara sara ni yawng hpe jahpawng Shinggyim da nhtawm, shanhte hpe, Hkristu gaw ganang e shangai wa na a ta? nga nna san wu ai. Shanhte gaw, Yuda mung na Batlehem mare e shangai wa na ra ai; kaning rai nme law, myihtoi wa ka da ai gaw, Yuda mung na nang Batlehem e, Yuda agyini hta kaji htum rai nga ndai n rai; nye a amyu Israela hpe woi rem na Du gaw, nang kaw nna pru wa na ra ai’ nga ai, ngu nna shi hpe tsun dan mu ai.

Shaloi Herawt gaw hpaji rawng ai ni hpe lagyim shaga la nna, dai shagan shanhte kaw dan pru ai aten hpe azin ayang san la nhtawm, Nanhte sa wa nna, dai ma kaji hpe azin ayang hakn tam mu; shi hpe mu jang ngai mung shi hpe sa Nawku lu u ga, ngai hpe wa shana rit, ngu nna shanhte hpe Batlehem mare de sa shangun dat mu ai. Ya, hkawhkam wa a ga na la jang, shanhte pru sa wa ma ai. Shaloi, yu mu, Sinpraw mung e mu mada ai shagan gaw, shanhte a shawng e sa wa nna, ma kaji nga ai shara ntsa ang e hkring mat ai.  Dai shagan hpe bai mu ai shaloi, shanhte nachying kabu gara nga ma ai.  Dai nta de shang wa jang, ma kaji hte Shi a kanu Maria hpe mu ma ai rai nna, lahput hput di let Shi hpe Nawku ma ai. Tinang a sut sumpu ni hpe hpaw nna, Shi hpe Aja, Lawban hte mura ngu ai kumhpa sak jaw ma ai.  Herawt hpang hku bai n wa mu ga, yup mang hta shanhte hpe madun dan ai majaw, shanhte gaw tinang a mung de lam kaga hku wa mat ma ai.

Ya hti ai gaw, Madu a Kabu Gara Shiga rai nga ai.

CHYOI PRA AI HTINGGAW POI SHANI NA MUNGGA

Shinggyim masha ni gaw shangai wa ai kaw nna si ai du hkra machye machang ni hpe hka ja la ai rai yang kaji nga ai aten, shawng nnan na shaning ni gaw ahkyak nga ai re. Tinang mu la, na la ai mahkrum madup ni kaw nna tinang hpe sharin achyin ya ai a majaw rai nga ai.

Madu Yesu a kanu Nu Maria hte kawa San Yoseph ni a, kaja ai akyang lailen, sat lawat ni gaw shinggyim asak hpe sa dagraw la ai Madu Yesu a asak apart hta kaja ai kasi hpe madun lai wa sai ngu ai hpe kadai mung ndang nmai na re.

Anhte a tsun shaga ai, nga sat nga sa ai hte akyang lai len ni gaw tinang a kashu kasha ni hte makau grup yin na ni hpe kaja ai kasi hpe madun ya nna Chyoi Pra ai Htinggaw zawn anhte a kun dinghku hpe san seng san pra ai kun dinghku byin tai wa lu na matu shakut shaja sa wa lu u ga.

HKUNGRAN MAKYIT SUMRI MALI

 Lani mi hta Jau marai mi gaw shi hkungran dat ya ai num yan la hte bai hkrum ai majaw, shan a dinghku kaning rai nga ai kun, ngu sa yu ai shaloi, “Wa Jau e, hkungran ai lam hta makyit sumri (3) ting nga ai hpe mu tam sai,” nga nna salang wa bai htan ya ai da! Jau mung mau mat ai hte, “Oh, garai nna yu shi ai le, hpa baw wa mi rai ta? ngu bai san yang, “mahtan da ai makyit sumri, hkungran ai makyit sumri hte jam jau jam hkau hkam sha ai makyit sumri, ni rai ma ai,” nga bai tsun dan sai. Majoi shahta let tsun ai raitim, tengman ai lam mung rawng nga ai. Num hte la, Nawku jawng kaw tsawm tsawm htap htap hkungran mawn sumli nna la ngut ai hpang, kanu kawa tai ai dinghku lam gaw nam pan nep ai lam n rai, ru yak shoi hpa law nga ai. Rai timung, “shada tsaw ra myit gam garan, yu lakawn hkat ai” ngu ai numbat mali ngu na makyit sumri nga ai rai yang, kun dinghku a lit magam ni tsang mat wa lu na re. 

Madu Yesu a Kanu yan Kawa, san Yosep hte Nu Maria mung, shan a kasha gaw lak lai ai ‘ma’ re ai lam chye nga ai rai tim, Ma Yesu hpe bau maka ai lam hta ruyak jam jau lam law law hpe rau jawm hkam sha lai wa masai. Ga shadawn, manam jarawp hta nga shara n lu mat ai majaw nga shara yak hkak ai, dumsu lawng hta ma shangai la ra ai, ma chyangai shangai ngut ai hte rau Herod hkawhkam gaw Ma Yesu hpe sat na tam ai majaw shan nu wa ni htawt hprawng hkawm ra wa sai. Ndai lam ni gaw Madu Yesu a kanu yan kawa mung kaja wa yak hkak ai lam ni hpe hkrum sha lai wa sai hpe madun ya nga ai. Ndai zawn kun dinghku a yak hkak ai hpe hkam la let, Yesu gaw dai hting gaw hpe shachyoi shapra ya sai. Kun dinghku ngu ai gaw mungkan ntsa de sa du ai ma chyangai ni yawng hpe alum ala tsawra matsan dum yu lakawn la na Karai Kasang lajang da ai shara nan rai nga ai. Dai majaw masha ni tsun ai hta kun dinghku (Family) ngu ai Ingalik ga a lachyum mung; (Father and Mother, I love you) “ Nu yan Wa hpe ngai tsaw ra ai” ngu ai da!

Dinghku shang sai numsha/la sha ni gaw, shangai wa na ra ai tinang a kashu kasha ni hpe yu lajang bau maka na lit magam hpe gun hpai ra ma ai. Dai gaw dinghku num/la ni hpe Karai Kasang shaga la ai lam (snr) shanhte a matu Karai Kasang yaw shada ai lam rai nga ai. Dai lit hpe n-gun hpai ai rai yang, Karai Kasang a man e ahkyak dik ai lit magam hpe lam mi hku, shan yan hprai ai lam rai sai. Dai hte maren, kashu kasha ni mung kanu kawa ni hpe hkungga lara, madat mara na matu Karai Kasang saw shaga nga ai. Kanu kawa ni gaw, Karai Kasang a malai ni rai nna, shi hte magam bungli jawm galaw ai ni mung rai nga ai. Shanhte hpe kaja ai kasi kamang a madun nga na Karai Kasang myit mada ra sharawng nga ai. Anhte kanu kawa ni sadi n dung hkat ai, tsa chyaru nang dan ai, shada marawn jahtau ga law gayet hkat dan ai rai yang, kashu kasha ni kaw nna anhte hpa myit mada shara nga na rai ta? kashu kasha ni a galu kaba lam gaw kanu kawa hta mung hkan nga ai. Rai timung, kashu kasha ni hpe jahkrit shama, dam jaw, adup kayet na matu n rai, tsaw ra ai myit hte madat mara chye lu hkra shanhte hpe kasi kaja madun na gaw ahkyak dik rai nga ai. 

Sawn sumru mai ai lam;   Kanu kawa ni; kashu kasha ni hpe bau maka shapan shalat ai hta kaning re ai yak hkak lam ni hkrum katup nga ai kun? kaning re ai masa lam ni hku nna kanu kawa kaja n tai kau sai kun? kashu kasha ni hpe gara masa hku nna kasi kaja madun dan sai kun?

Kashu Kasha ni; Kanu kawa ni lam madun sharin shaga ai kasi kaja ni a ntsa, anhte gara hku hkap la hkan sa nga ai kun? Gara hku ning hkap nga sa nga ai kun? Kanu kawa ni a ntsa anhte a myit jasat, galaw sa nga ai lam ni hpe kaja hkra galai la lu na kun? 

CHYOI PRA AI HTINGGAW POI SHANI NA CHYUM LAIKA

CHYOI PRA AI HTINGGAW POI

31st DECEMBER, 2017

CHYUM MUNGGA DAW 1

SIRAK 3:3-7, 12-14

Ya hti na gaw, Sirak a laika hta na rai nga ai.

Kashu Kasha ni tinang a kawa hpe hkungga lara na lam, Karai Kasang hkang da nu ai; kanu gaw shi a shadang sha ni a ntsa e up hkang na ahkang aya hpe Madu nan jaw da nu ai. Tinang a kawa hpe hkungga lara di ai wa gaw, shut hpyit mara shaprai kau ai amu hpe galaw nga ai; tinang a kanu hpe akaw alaw di ai wa mung, sutgan law law mahkawng da ai wa hte bung nga ai. Tinang a kawa hpe hkungga ai wa gaw, asak galu na ra ai; kanu a myit shadik shapyaw ai wa mung, Madu hpe madat mara nga ai. Ngai sha e, nwa asak kaba wa ai shaloi, shi hpe bau garum u; shi hkrung nga ai nhtoi mahkra hta, shi a matu yawn hkyen shara hkum tai e. Shi myit n gring wa ti mung, nang hkam kaja ai hte n-gun rawng ai wa gaw, nwa a myit n-gun kya ai hpe hkam sharang nna, shi hpe n gawn n sawn hkum di u; Kaning rai nme law, nwa hpe sumnung shingdi ai hte galaw ya ai lam hpe galoimung malap kau ya na n rai; na a mara raw dat ya na lam tai na ra ai.

Ya hti ai gaw, Karai Kasang a mungga rai nga ai.

  

CHYUM MUNGGA DAW 2

KOLOSE 3:12-21

Ya hti na gaw, Kolose masha ni hpang de San Pawlu shagun dat ai laika hta na rai nga ai.

Hpu nau ni e, nanhte gaw Karai Kasang a lata la ai amyu rai nna, chyoi pra ai ni hte tsawra hkrum ai ni rai nga myit dai. Dai re ai majaw, matsan dum chye ai, mai kaja ai, myit nem ai, sumnung shingdi ai, myit galu kaba ai dagraw nga mu; Nanhte a n-gun kya ai hpe shada da hkam sharang nna, mara langai ngai nga yang gaw, shada da raw dat hkat nga mu. Madu gaw nanhte a mara raw dat kau ai hte maren, nanhte mung shada da raw dat ya mu. Hpung jahtum e, dai yawng hte hpe matut da na hte jahkum shatsup ya na matu tsawra ai myit hpe dagraw hpun nga mu. Nanhte a myit masin hta e mung, Hkristu a ngwi pyaw ai lam a up nga u ga; kaning rai n me law, hkum hkrang langai sha a daw shan ni tai lu hkra, nanhte hpe shaga la manit dai. Dai hta n-ga, chyeju dum ai myit nanhte hta e a rawng nga mu. 

Hkristu mungga gaw, nanhte hta n taw n tsang a shanu nga u ga: hpaji byeng ya amyu myu hte nanhte shada da sharin shaga nna, shadum jahprang ya mu. Nanhte a kraw lawang hta e Karai Kasang hpe chyeju dum let, shakawn kungdawn ga, mahkawn mangoi ga, wenyi hte seng ai laka ga hpe mahkawn mangoi nga mu. Nanhte hpa lam galaw myit yang, ga hte rai ti mung, amu hte rai ti mung, Madu Yesu a amying ningsang hta galaw nga nna, Shi a marang e Kawa Karai Kasang hpe chyeju dum nga mu. Numsha ni e, tinang a madu wa hkang ai hku hkan nga mu; dai gaw Madu a man e sut nga ai. La ni e, madu jan ni hpe tsawra nga nna, shanhte hpe sumnung shingdi ai hku galaw mu. Ma ni e, kanu kawa ni hpe madat mara nga mu; dai gaw, Madu a man e sharawng awng ai lam rai nga ai. Kanu Kawa ni e nanhte a ma ni myit n kaji u ga, shanhe hpe ladu lai nna hkum hta ahkre nga mu.

Ya hti ai gaw, Karai Kasang a mungga rai nga ai.

KABU GARA SHIGA

LUKA 2:22-40

Ya hti na gaw, Luka a laika hta na Kabu Gara Shiga rai nga ai.

Mawshe a htung tara hte maren Maria a jasan jaseng ai nhtoi gu jang, ‘Shadang sha alat dai Madu a matu chyoi pra ai nga lu na’ nga nna, Madu a tara lam hta ka da ai majaw, ma Yesu hpe Madu kaw sa ap ya na matu mung, Madu a tara hta tsun da ai hte maren, U hkru du lahkawng, shing nrai, U ra lahkawng hpe hkungga nawng ya na matu mung, Maria yan Yosep gaw dai ma hpe Yerusalem mare de woi sa ma ai.  Ya, Simun mying ai masha langai mi Yerusalem mare e nga ai, dai wa gaw Dinghpring ai hte tara hkungga nna, Israela hpe shalan shabran na lam myit mada nga ai wa rai nga ai. Chyoi Pra ai Wenyi mung shi a ntsa e nga nga ai. Simun gaw Madu Karai a Hkristu hpe garai n mu yang, si na n rai, nga nna Chyoi Pra ai Wenyi hte madun dan ai lu la nu ai. Shi gaw Chyoi Pra ai Wenyi shadut ai a majaw, Nawku htingnu kata de du sa wu ai: kanu yan kawa gaw Ma Yesu hpe tara htung hte maren di ya na  matu woi sa ma ai shaloi, Simun gaw shi a lata hte Ma hpe pawn la nna, Karai Kasang hpe shagrau sha-a let, N-gawn Madu e, Na a ga hte maren Na a shangun ma ngwi pyaw ai hte ya wa shangun dat nit ga law: Kaning rai nme law, masha amyu shagu a man e nang lajang da nna, Maigan amyu ni hpe jahtoi dan na Nhtoi hte, Na a amyu Israela a hpung shingkang rai nga ai, Na a hkye hkrang la ai lam hpe, nye a myi hte chyaw ngai mu lu se ai, nga nna tsun wu ai. Kanu yan Kawa gaw Ma Yesu a lam tsun ai ga a majaw mau nga ma ai. Simun mung shanhte hpe shaman ya nna, kanu Maria hpe, Yu u, ndai ma gaw, Israela masha ni hta na, law law a matu kataw shara hte, law law a matu rawt wa na lam mung, Masha ni kau da na masha law law a kraw lawang na myit mang ai lam dan leng wa na ra ai; na a masin salum hta nan nhtu htinggrang na ra ai, ngu nna Maria hpe tsun wu ai. 

Dai hta n-ga, Ashe amyu na Hpanuela a shayi sha, Anna ngu ai num myihtoi langai mi nga ai; Shi gaw asak grai kaba la sai; mahkawn aprat kaw nna sanit ning laman hta shi a madu wa hte nga nhtawm, ya asak matsat shi mali ning du ai gaida rai nga ai. Dai numsha gaw Nawku htingnu kaw na npru ai sha, lusha gam nna akyu hpyi ai hte, shani shana Nawku daw jau nga wu ai. Shi mung dai ahkying hta nan lai sa nna, Karai Kasang hpe chyeju dum shakawn let, Yerusalem a hkye hkrang la na lam myit mada ai ni yawng hte hpe, Ma Yesu a lam tsun dan mu ai. Maria yan Yosep gaw Madu a tara hte maren ra ai lam mahkra hpe hkan shatup nhtawm, Galile mung na shanhte nga ai Nazaret mare de bai wa ma ai. Ma Yesu gaw kaba wa ai hte n-gun atsam jat wa let, hpaji hparat hte hkum tsup wa nu ai; Karai Kasang a chyeju mung shi hta e a nga nga ai. 

Ya hti ai gaw, Madu a Kabu Gara Shiga rai nga ai.

ASAK DAJU KARAI A MUNGGA

Dai ni na kabu gara shiga gaw, chyaloi n hkoi kaw nna Karai Kasang a mungga a nga nga sai rai nna, dai mungga a marang e, yawng mayawng gaw byin wa tai wa sai lam, dai mungga gaw nga yawng nga pra a asak daju rai nga ai hte Shinggyim masha ni a matu nhtoi majing rai nga ai lam, anhte hpe kalang mi bai shadum ya nga ai. Dai hta n ga, “dai mungga gaw masha a hkum shan dagraw la nna, chyeju hte teng man ai hpring let, anhte hta nga nga yu sai rai nna, Kawa hta na Kasha shingtai a hpung shingkang zawn, anhte shi a hpung shingkang hpe, mu lu sa gaw ai” (Yn 1:14) nga ai mungga hku nna, daru magam hpung shingkang atsam mahkra hte hpring ai Karai a Mungga/ Karai a nsa Wenyi masha a hkum shan dagraw la nna masha tai wa sai, anhte a asak aprat a n pawt n hpang labau hpe mung bai shadum ya nga ai. 

“Karai Kasang gaw moi na lakhtak e, myihtoi ni a n gup hte, ga htap law law hta, ji wa ni hpe ga tsun da nhtawm e, nhtoi ladaw na hpang jahtum ai hta, Kasha a n gup hte anhte hpe ga matsun jaw da ma ni ai. Dai kasha hpe yawng mayawng a Sali wunli hkam la ai wa tai na shi san da nu ai rai nna, shi hte mung nga yawng nga pra galaw da nu ai. Shi gaw Karai Kasang a hpung shingkang a ningchya hte, shi a gawng shing-yan a hkrang sumla rai nga ai rai nna, shi a mungga atsam hte yawng mayawng hte hpe bau sin da ai shut hpyit mara hpe jasan jaseng kau ngut jang, matsaw ningtsang na daru magam a hkra maga de shi dung nga ai” (Heb 4:1-3) hku nna mung, dai ni anhte a prat hta Karai Kasang gaw, Shi a Kasha shingtai Yesu hpe Shi a n-gup aga shatai nna mungkan ga hpe shadum ya nga ai. Kaning rai nme law, Karai a mungga ahkrung nga ai hte atsam rawng nga ai hpe kam hpa let, dai mungga hpe hkap la hkan sa ai ni nlang, dai mungga a nhtoi hte shalan shabran ai, myit mada shara nnan, n-gun atsam nnan lu la nna masha nnan tai wa ma ai. (Kasa Pawlu, Maria Magdalena, myi nmu na n na ai ni, ma-a ai ni , kasa ni, prat shagu na san pra ai masha ni, anhte a prat na Mama kaba Teresa  zawn re ai ni)

Shani shagu Karai Kasang a mungga hpe akyu hpyi myit masa hte hti sumru yu ai mung, dai mungga a n htoi hte mau hpa n-gun atsam law law lu la nna, ngwi pyaw hkam ja ai ten hta raitim, machyi makaw yawn hkyen hkrum ai ten hta rai tim, shi Madu hta kam hpa let, ngwi pyaw simsa ai hte asak hkrung lu ma ai. Dai gaw Karai a mungga teng sha anhte a Asak Daju re ai lam hpe shaleng ya nga ai.

Hkrismat poi du shagu, mawn sumli da ai wushat wakang hta galeng taw nga ai ma chyangai Yesu a shaman da ai sumla hpe anhte sa nawku kyu hpyi ga ai. Yesu, dai ni du hkra ma chyangai zawn naw galeng nga ai majaw n rai, dai wa kang hta galeng nga ai Madu Yesu gaw, prat shagu na masha amyu baw shagu hpe hkap hkalum la nga ai hte, ga shaga nga ai kumla rai nga ai. Mungkan ga a asak Madu rai nga ai Yesu mungkan ga de shawng nnan yu sa ai shaloi, manam jarawp hta shara n nga nna, dumsu wulawng hta matsan mayan shangai wa sai. Hkrismat hta sha nrai, shani shagu Madu Yesu gaw anhte a kraw lawang hta shangai wa nna anhte hte rau nga na ra sharawng nga ai. 

Sawn sumru mai ai lam; Nang kaning re ai shara hpe Madu Yesu a matu lajang da ya na kun? Anthe a masin salum gaw, Karai Kasang shanu nga ai shi a htingnu rai nga ai. Rap ra tara n nga, sadi n dung, tinang akyu lu jang masha asak hpe hpa n nawn, tsawra matsan dum lam n nga, shada chyu jeyang hparan hkat ai,….. Damya lung pu mahtang rai kun?