PRANWAN LADAW (30) LABAN SHANI NA CHYUM LAIKA

PRAN WAN LADAW HTA LABAN 30

29th Oct, 2017

CHYUM MUNGGA DAW 1

Pru mat wa ai Laika 22:21-27

Ya hti na gaw Pru mat wa ai Laika hta na rai nga ai.

Tsasam manam hpe hkum shatsang zingri myit. Nanhte mung Egutu mung e, tsasam tai yu manit dai hpe dum mu. Gaida jan hte jahkrai nmai ni hpe sharu shatsang hkum rai myit. Lama rai jang, shanhte garum hpyi jahtau yang, ngai Madu htan ya na mawe ai. Ngai pawt nna nanhte hpe majan hta sum mat shangun na made ai. Nanhte a madu jan ni gaida da mat nna kasha ni jahkrai byin mat na mara ai. Nang hte rau nga ai nye amyu matsan mayan wa hpe, gumhpraw hkoi ya yang, gumhpraw hkoi sha ai wa zawn hkum rai et! Amyat hkum hpyi u. Na a htingbu wa nang kaw hpa jawng sa tang da yang, jan garai ndu yang bai ya kau u. Shi hkum shalum hpun na dai sha nga na lu ai. Shi hpe ngai matsan dum ai. Shi garum hpyi jahtau yang ngai madat ya na sha rai nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Htesaloni :5-10

Ya hti na gaw Htesaloni ni kaw shagun dat ai laika lan¬gai hta na rai nga ai.

Nanhte rau nga ai shaloi anhte mu na myit dai. Anhte gara hku nga dan ai. Nanhte a akyu tai na matu rai nga ai. Madu hpe kasi la mu. Anhte hpe kasi la mi. Nanhte nni nkri law law hkrum tim, Chyoi Pra ai Wenyi kaw na kabu gara hte dai mungga hpe hkap la mu. Makedonia hte Akaia mung n kam sham ai ni nlang a matu kasi kamang tai wa na myit dai. Madu a mungga sha Makedonia hte Akaia mung ting hkan nanhte kaw nna pru wa sai n rai. Karai Kasang hta nanhte a makam masham a lam mung shara shagu bra chyam du wa sai. Kaga mi anhte tsun shara n nga ai.

Shanhte nlang mung anhte hpe nanhte kaw du sa yang gara hku hkap la ai. Nat kabai kau nna Karai Kasang hpang de kayin shang wa ai. Shingrai, tengman ahkrung nga ai Karai Kasang hpe nawku daw jau ai. Lamu na bai du sa na Kasha hpe nanhte ala nga ai. Dai shi a Kasha Yesu gaw, si ai kaw na shi jahkrung sharawt la ai, du na ra ai Karai Kasang pawt sindawng ai kaw na anhte hpe hkye la ai wa rai nga ai, nga nna hkai tsun ma ai.

Ya hti ai gaw Karai Kasang a mungga rai nga ai.

KABU GARA SHIGA

Mahte 22:34-40

Ya hti na gaw Mahte a laika hta na Kabu Gara Shiga rai nga ai. 

Saduke ni hte Hparishe ni jawm dung nna, tara sara langai mi Yesu hpe ga san hte hkam na myit let san wu ai gaw, Sara e, jep ai tara grau kaba ai hkang da ai ga gaw gara mahtang rai ai kun? ngu wu ai. Yesu htan nna, Madu na Karai Kasang hpe na myit kraw lawang mahkra hte, na a myit masin mahkra hte tsawra lu na ndai, nga ai gaw grau kaba ai hte shawng na ga mung rai nga ai. Hpang na gaw, dai hte bung nna, Na htingbu wa hpe na a hkum hte maren tsawra lu na ndai, nga nna rawng nga ai. Ndai hkang da ai ga lahkawng gaw, jep ai tara mahkra hte, myihtoi ni a ga madung rai nga ai, ngu wu ai.

Ya hti ai gaw Madu a Kabu Gara shiga rai nga ai.

PRANWAN LADAW (29) LABAN SHANI NA MUNGGA

Madu Yesu dai ni na Kabu Gara Shiga hta tsun shadum ya ai lam langai gaw anhte hpe uphkang ai ni hpe tinang kaw nna jaw ra ai lit magam hpe nhprai na matu re. Mungkan a ngasat ngasa ai lam hpe hkan shatup ra ai sha n-ga anhte hte seng ai Wenyi lam hta hkan shatup ra ai hpe mung shadum ya nga ai.

“Caesar” Hkaw Hkam uphkang ai ginra ni hta shi a hkrang sumla kap ai gumhpraw ni hpe jai lang ai a lachyum gaw ndai gumhpraw ni a madu gaw “Caesar” Hkaw Hkam wa re ai majaw Hkaw Hkam wa hpe shi hte seng ai kang hpe mung masha ni kaw nna jaw ra ai lit nga nga ai.

Karai Kasang a hkrang sumla hte shabung nna hpan tawn da hkrum ai anhte shinggyim masha ni gaw Karai Kasang hte seng ai majaw Karai Kasang a ra sharawng ai hpe hkan shatup galaw sa let Shi Madu kaw nna shaman chyeju hkam la lu ai a majaw mungkan hkrun lam hta mung, awngdang lu na matu shakut shaja sa wa lu u ga.

N HTANG WA AI TSAWRA MYIT

Hkawhkam wa hte ahkun hkansi jaw mai ai, n jaw mai ai hte seng nna Madu Yesu hpe Yuda ni san ai shaloi, Madu gaw hkrak dik ai mahtai langai jaw ya sai. ‘kehta hte seng ai hpe gaw kehta hpe ya mu, Karai Kasang hte seng ai hpe mung Karai Kasang hpe ya mu’! ndai gaw shanhte sa ai ga san a ading tawk mahtai gaw n rai nga ai. Madu Yesu shanhte hpe myit sawn shangun ai lam she re. Keh¬ta hte seng ai hpa rai? Karai Kasang hte seng ai mung hpa rai? Rai yang, Karai Kasang hte seng ai hpe kaning rai anhte jaw lu na rai?

Teng sha wa anhte yawng mayawng dai hpe myit yu ra nga ai. Madu Yesu jaw ya ai mahtai shawng na daw gaw loi la ai zawn rai nga ai. Mung chying sha kaja tai na matu bang ging ai ahkun hkansi ni bang rai tara hkan mai nga ai. Tim, hpang daw hpe gaw kaning di ga law? Kaning re ai lachyum hpe myit da nna tsun ai rai sai kun?

Yuda ni san ai gasan hpe htai ya na matu kaja dik ai gaw Npawt Nhpang laika hpe mahta na lam rai sai. Dai hta, “ shingrai Karai Kasang gaw shi a hkrang sumla hte maren, Karai Kasang gaw shi hpe hpan da wu ai: shinggyim la sha hte shinggyim numsha hpe shi hpan da wu ai”. (Npt. Nhp 1:27) nga nna anhte hti lu ga ai.

Anhte a hkum hkrang ting gaw Karai Kasang hte seng nga ai lam ngu chye madat lu ga ai. Anhte a salum, myit masin, nyan marai, wenyi, yawng hpe Karai hpan da ya ai. Anhte a sinwawp hpe mung, anhte marawp ai nbung hpe mung shi hpan da ya ai. Tsingdu pa de nga ai dumsu ni, anhte lu ai ‘nga-chyu’ bai tai na re ai tsingdu hpe mung Madu hpan da ya nga ai. Dai sha mung n rai, hkying ten shagu hta anhte hpe bau sin makawp maga ya nga ai.

Dai ni na kabu gara shiga gaw chyeju dum chyeju htang chye na matu anhte hpe sharin ya nga ai. Karai Kasang anhte hpe hpan da ai aten kaw nna, shaman chyeju ni jaw ya taw nga ai gaw, nau law nna hti n dang rai sai. Dai hpe dum hprang ai marang e, Karai Kasang hpe n sim n sa chyeju dum shakawn let, anhte a n-gup aga hte sha n rai, mai kaja ai hta sak hkrung hkawm sa ai marang e, Ka¬rai Kasang hpe mung tsawra let, anhte shada da mung tsawra let, chyeju dum mai nga ai. Karai Kasang hpe tsawra ai, masha kaga hpe tsawra ai ngu ai gaw, Karai Kasang hte seng ai hpe Shi hpe n htang jaw ai lam nan rai nga sai.

PRANWAN LADAW (29) LABAN SHANI NA CHYUM LAIKA

PRAN WAN LADAW HTA LABAN 29

22th Oct, 2017

CHYUM MUNGGA DAW 1

Esaia 45:1,4-6

Ya hti na gaw myihtoi Esaia a laika hta na rai nga ai.

Madu gaw Kiru hpe hkawhkam tai na lata la sai. Masha amyu ni hpe gasat dang la na matu Madu shi hpe dang da sai. Hkawhkam ni hpe shayu kau na matu shi hpe shangun dat nu ai. Mare bunghku chyinghka ni hpe hpaw malang kau na atsam hte Madu shi hpe shadaw ya sai. Madu shi hpe tsun ai, Ngai lata la ai amyu, nye shangun ma Israela hpe garum la na, ngai nang hpe shangun dat de ai. Ngai hpe n chye ndai. Raitim ngai nang hpe mying kaba ya sade ai. Ngai nan Madu rai nga nngai. Ngai hta kaga Karai Kasang shaje n nga ai. Nang ngai hpe n chye tim, nang ra ai atsam jaw ya na de ai. Ndai hku ngai di ai gaw, mungkan jahtum du hproi hkra, ngai hta kaga Karai shaje n nga, ngai nan Madu Karai rai nga ai hpe, masha ni hkum shagu chye wa na matu rai nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Htesaloni 1:1-5

Ya hti na gaw Htesaloni ni kaw shagun dat ai laika lan¬gai hta na rai nga ai.

Pawlu, Sila hte Timoti kaw nna, Kawa Karai Kasang hte Madu Yesu Hkristu hta rai nga ai, Htesalonika nawku hpung masha ni hpang de shana dat ga ai: simsa ngwi pyaw chyeju nanhte rau a nga nga u ga law! Nanhte a matu Karai Kasang hpe chyeju shakawn ga ai. Akyu hpyi ai hta mung nanhte a matu shalawm ya ga ai. Nanhte Madu Yesu Hkristu hta ngangkang myit mada nga ai, tsawra myit hte bungli gun shaja nga ai, tinang a makam masham hpe magam shachyen ai hta shadan shaleng shaja nga ai lam ni hpe Kawa Karai Kasang a man e, n sim n sa adum nga ga ai.

Hpu nau ni e, Karai Kasang nanhte hpe tsawra ai hte shi a amyu ngu lata la manit dai hpe anhte chye ga ai. Nanhte kaw Kabu Gara Shiga du wa sai. Dai gaw ga kaman sha n rai, n-gun atsam rawng ai. Chyoi Pra Wenyi lawm ai. Maju jung ai hte de a teng man ai hpe hkap ai lam ni mung rai nga ai. Nanhte rau nga ai shaloi anhte hpe mu na myit dai. Anhte gara hku nga dan ai! Nanhte a akyu tai na matu rai nga ai.

Ya hti ai gaw Karai Kasang a mungga rai nga ai.

KABU GARA SHIGA

Mahte 22:15-21 

Ya hti na gaw Mahte a laika hta na Kabu Gara Shiga rai nga ai.

Hparishe ni pru sa nna, tinang ga hta hkam na matu Yesu hpe ga san ni hte gyam na bawng hkut da ma ai. Shanhte a masha nkau mi hte Herod a hpung na ni nkau mi hpe shangun dat mu ai. Shanhte gaw, Sara e, nang tengman ai sha tsun ndai. Masha ni a matu Karai Kasang a lam tengman ai lam sharin ya ndai. Kadai hpe agam ai lam n nga, masha myiman ntau ai ndai hpe anhte chye ga ai. Roma hkawhkam hpe hkansi mai bang a ni? N mai bang a ni? ngu mu ai. Raitim Yesu shanhte a n seng n hkru ai jasat myit hpe chye ya mu ai hte, sawt ai ni e, nanhte ngai hpe hpa rai chyam myit ta? Hkansi dengga dan yu mi! ngu mu ai. Shanhte gumhpraw lap mi la pru ma ai. Yesu gaw, kade a sumla hte dazik kap a ta? ngu san mu ai. Shanhte gaw hkawseng a sumla hte dazik re, ngu mu ai. Yesu gaw, dai rai yang, Hkawseng hte seng ai hpe hkawseng hpe jaw mu. Karai Kasang hte seng ai hpe Karai Kasang hpe ya mu, ngu mu ai.

Ya hti ai gaw Madu a Kabu Gara shiga rai nga ai.

PRANWAN LADAW (28) LABAN SHANI NA MUNGGA

Dai ni na Kabu Gara Shiga hta anhte myit sumru mai ai lam gaw Karai Kasang jaw ya ai laklai ai ahkaw ahkang lu da ai ni gaw dai ahkaw ahkang hpe manu shadan let ashung jashawng ai rai yang she akyu pru na lam hpe hkungran daw sha poi de shaga la hkrum nna, nsa nna hpang de lu na ahkaw ahkang hpe jasum kau ai masha ni hte bung nga ai.

Bai nna n-ging ndan ai raitim jaw ya ai shaman chyeju hpe manu shadan nna njai lang ai rai yang shamat kau chye ai hpe hkungran daw sha poi de htap hkuk ai bu hpun palawng hpe mawn sumli ai lam nnga ai sha du sa nna gawt kau hkrum ai masha hte bung nga ai.

Nawku hpung kata kaw nga ai anhte ni gaw kaga masha ni nlu mai ai laklai ai shaman chyeju ni law law lu la ai hpe dum shai nna manu shadan jai lang ai hte grau nna n-ging ndan ai sha jaw ya ai shaman chyeju ni hpe tup hkrak hkam la na matu tinang kaw nna manu shadan ai hte gingdan hkra shakut shaja sa wa lu u ga.

SHAGA LA HKRUM AI LAW TIM, LATA LA HKRUM AI NI NLAW MA AI

Dai ni na kabu gara shiga hta, htani htana hkye hkrang la ai lam hte seng nna ahkyak ai lam lahkawng anhte hpe tsun dan sai.

Shawng nnan, masha hkum shagu hpe hkye hkrang la na matu Kawa Karai e jaw ya sai. Htani htana ngwi pyaw simsa nga lu na matu kadai hpe mung shing gang da ai lam n nga ai. Gashadawn hta rai yang, lata la hkrum ai amyu masha, Israela ni hpe shawng ap jaw ya ai lam gamoi ga na lu sai. Shanhte ningdang kau ai hpang e chyawm gaw yawng mayawng a matu rai nna kadai hpe mung n-ngam da sai. Dai re ai majaw, Kawa Karai gaw, shinggyim masha yawng hpe saw shaga sai.

Lahkawng ngu na hta, mi na lam hpe grau chye madat hkra sanglang dan na lam rai sai. Marai hkum shagu hpang na prat a daw sha poi de shaga la hkrum ai shaloi, dai poi de sa du dung na matu ahkaw ahkang lu sa ga ai. Ahkaw ahkang lu sai ni rai ga ai hte maren, hkungran poi madu hpyi lajin ai lam hpe tang tup hkan galaw na ra ga ai.

Karai Kasang gaw Shi tsawra ai kasha, anhte ni hpe Shi a tsawra myit hte shinggrup kawan da ai tengman ai lam hpe shawng nnan hku nna anhte hpe hpaw tsun dan sai. Shi tsawra ai kasha langai mi hpe mung n yawm ai sha dai htani htana ngwi pyaw kabu gara ai dawsha poi de du dung na matu Karai Wa ra sharawng nga ai. Ndai ahkyak ai tengman ai lam hpe anhte marai hkum shagu chye ai hte sha n ram ai, Kawa Karai a tsawra myit hpe chyeju dum ai myit, kabu gara ai hte shagrau shakawn na mung ra ai. Dai hta n-ga, masha shagu gaw Kawa Karai hpe kam sham let sak hkrung hkawm sa nna Kawa Karai e saw shaga ai hpe hkum tsup hkra bai htang lu na rai nga ai. Raitim, teng tup n htan shai ai mung mai byin nga ai. Masha law law a myit hpe shadik ya nna kaja ai Hkristan prat hte nga sa na hta tara shakya kau ya chye ai. Karai Kasang gaw tsawra matsan dum mara raw ya ai majaw, anhte mung mai byin ai daram sha galaw ga, ap nawng ai hta mung ram daw galaw yang mai sai ngu ai myit rawng chye ga ai. Hkrak tsun ga nga yang, dai ni kaw nna galai shai na matu galaw yang mai ai raitim, hpawt ni kaw nna (snr) hpang de she ngu ai myit anhte hta nga chye ai. Hta n-ga, Karai Kasang a shaga la ai lam hpe anhte a htap htuk manu ai hta hkan nna galaw chye ga ai hte Hkristu Madu hkum nan galaw lai wa sai tsawra ai myit hte n rai nga ai.

Ndai zawn anhte myit sharawng ai hte galaw chye ai hpe kabu gara shiga hpang jahtum daw hta sadi jaw da sai. Hkungran poi sa hpun palawng n bu hpun ai rai yang, poi madu hkawhkam wa e gawt shapraw kau ai hpe hkrum sha na rai nga ai. Hkristu a hpang hkan nang ai yawng mayawng hte gaw dai Madu hpyi lajin ai tsawra myit hte daw jau na magam bungli ni hpe n-galaw ai rai yang jet ai sape ngu tsun lu na n rai. Mying hkam Hkristan/ Kahtawlik, myit malai n lu ai shut hpyit ai wa hte anhte lapran na dingman ai wa, ni gaw ndai hpung hta lawm nga ai.

Kaja wa sha, Hkristu a hpang hkan nang na gaw n-loi la ai. Sape tai na lam hta manu jahpu hkrat ang ai lam nga ai. Ap nawng shakut ai hte sak jaw na mung ra nga ai. Kalang lang, anhte jaw ang ai manu gaw, mungkan tang pyaw lam mung rai chye ai, ahkying aten hta hkan nna anhte a Asak mung rai na nhten. Raitimung, anhte lu la na kumhpa gaw grai kaba la ai hte, htani htana, Kawa, Kasha, Chyoipra ai Wenyi Karai Kasang hte ning ngai nga lu na rai nga ai.

Sawn sumru mai ai lam; Ngai lama dai hkungran poi de saw shaga hkum ai wa rai yang, kaning re ai saw shaga hkrum ai wa hte ngai bung nga a ta? Hpa majaw rai? Ya aten ngai hpa galaw na ra ang ai kun?

PRANWAN LADAW (28) LABAN SHANI NA CHYUM LAIKA

PRAN WAN LADAW HTA LABAN 28

15th Oct , 2017

CHYUM MUNGGA DAW 1

Esaia 25:6-10

Ya hti na gaw myihtoi Esaia a laika hta na rai nga ai.

Zawnawng zawwa up ai Madu gaw, ndai bum ntsa e, amyu baw yawng a matu, sau ai lu sha hte tsabyi machyen poi galaw na ra ai. Dai poi hta kaja dik lusha hte tsabyi machyen jet lu sha na mara ai. Ndai bum ntsa e, masha amyu yawng a yawn hkyen myiman magap shi gun kau na ra ai. 8 Madu magam gaw si atsam hpe shamyik kau nu ai. Madu gaw, myiprwi yawng katsut kau na ra ai. Shi a amyu hkam sha ai kaya kahpa hpe ga ningtsa ting na shaprai kau na ra ai. Madu shi nan tsun da nu ai.

Dai byin yang, masha shagu tsun na gaw, shi anhte a Karai Kasang rai nga ai. Shi hta anhte kam hpa ga ai rai nna, anhte hpe mawai la mani ai. Shi gaw, Madu rai nga ai. Shi hta anhte kam shamyet ai majaw, anhte hpe hkye la mani ai hte ya anhte kabu gara pyaw nga ga ai, nga na mara ai. Madu gaw Ziun Bum makawp maga na ra ai. Moba mung hpe chyawm, yihku hpe ngahkyi hte gayau ai zawn, kabye kayau kau na ru ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Hpilipi 4:12-14, 19-20

Ya hti na gaw Hpilipi ni kaw San Pawlu shagun dat ai laika hta na rai nga ai.

Ngai hta ra ahkyak ai hte grau jan lu ai hte hpe ngai chye nngai. Ndai hpe chye masam lu ni ai majaw, gara, galoi, hkru ai, kawsi ai, nau law lu, n law lu, raitim ngai myit krem nngai. Ngai hpe Hkristu jaw ya ai atsam hte, n-gun lu nna, galoi, hpa lam, yawng hpe ngai dang hkam lu nngai. Raitim, ngai tsinyam hkrum yang, nanhte bang garum ai gaw, grai nan akyu rawng malit dai. Hkristu Yesu hta n taw n tsang ai sutgan hte, nye Karai Kasang nanhte hta ra ai mahkra shatsup ya na ra ai. Anhte a Karai Kasang, Wa hte, hpung shingkang prat dingsa nga nga u ga law. Amen.

Ya hti ai gaw Karai Kasang a mungga rai nga ai.

KABU GARA SHIGA

Mahte 22:1-14

Ya hti na gaw Mahte a laika hta na Kabu Gara Shiga rai nga ai.

Yesu ga shadawn hte tsun mu ai gaw, lamu mungdan gaw, kasha a matu hkungran poi shachyip ai hkawhkam wa hte bung ai. Shaga da sai ni hpe poi de sa na bai shaga la na, mayam ni hpe shangun dat wu ai. Raitim, n sa hkraw ma ai. Mayam kaga hpe bai shangun dat nna numhtet ai gaw, yu mu, nye poi jin jin rai sai. Hpum sau ai nga sat nna yawng jin jin rai sai. Hkungran poi de sa marit, ngu nna shaga da sai ni hpe sa tsun mu, ngu wu ai. Dai ga hpe hpa n nawn ya mu ai. Langai gaw tinang hkauna de, kaga gaw, arai dut ai de, sa mat wa ma ai. Ngam ai ni rai jang, shi a mayam hpe rim la nna, aroi arip di sat kau mu ai. Hkawhkam wa grai pawt bu ai. Luksuk ni hpe shangun dat nna masha sat ai ni hpe jahten kau mu ai hte shanhte a mare hpe nat kau ya wu ai. 

Dai hpang shi a mayam ni hpe tsun ai, Nye a hkungran poi jin jin rai sai. Raitim, shaga da ai ni n ging masai. Lam mashe shagu hkan pru sa nna, mu hkrup ai ni kadai hpe mung poi de shaga wa marit, ngu mu ai. Dai mayam ni gaw nmaw lam de pru sa nna, mu ai yawng, kaja n kaja, shaga jahpawng la ai hte poi hta masha chyat dung nga sai. Hkawhkam wa, dung nga ai ni hpe kawan yu na, shang wa ai. Hkungran hpun palawng n bu hpun ai la langai mi hpe mu hkrup wu ai. Shi gaw, jinghku wa e, hkungran hpun palawng n bu hpun ai, nang e, kaning rai shang lu n ta? ngu wu ai. Shi atsin sha nga ai. Shaloi hkawhkam wa gaw, shi a ali ama ni hpe, shi a lagaw lata gyit hkang nna, shinggan, nsin de jahkrat bang kau mu, ngu wu ai. Dai yang shi wa utik hkrap nga ai. Shaga la ai ni law tim, lata hkam ai ni n law ma ai, ngu mu ai.

Ya hti ai gaw Madu a Kabu Gara shiga rai nga ai.

PRANWAN LADAW (27) LABAN SHANI NA MUNGGA

Karai Kasang gaw tsawra matsan dum njin ai wa re ai majaw shinggyim masha ni ra rawng gawng kya ai ahkying aten ni hta myit galu kaba let mara raw dat ya nga ai. Shi a ra sharawng ai lam gaw shinggyim masha ni tinang a shut shai ai lam hpe dum shai nna shading sharai la lu na matu re.

Anhte shinggyim masha ni kaja ai hte nkaja ai hpe ginghka chye ai hte tinang ra sharawng ai hpe lata la nna galaw sa lu ai atsam hpe Karai Kasang jaw ya sai rai yang tinang lu ai ndai atsam hpe jai lang nna Karai Kasang a kaja ai Kashu Kasha ni byin tai wa lu na matu shakut shaja ra na re. Bai nna, tinang galaw ai amu magam kaw nna byin pru ai kaja ai hte nkaja ai matu mara ni hpe mung hkam la ra na re.

Karai Kasang a tsawra matsan dum chye ai shingnyip hta anhte hpe jaw ya ai atsam marai ni hpe jai lang let tinang galaw ai amu magam hpe teng sha lit la nna Karai Kasang a kaja ai kashu kasha ni byin tai wa na matu shakut shaja lu u ga.

GALAI SHAI NA GAW YA TEN RE

Dai ni na kabu gara shiga hta lawm ai Madu Yesu hkai dan ai gashadawn gaw asan sha zawn nga tim, gashaka dingsa ting hpe gin chyum dat ya ai lam mung rai nga ai.

Shawng nnan, Gashaka dingsa hpe anhte hti yu ai shaloi, shingwang zawn re ai hpe anhte mu lu ga ai. Amyu masha ni mai kaja ai hte sak hkrung nga yang, Karai Kasang shanhte hpe shaman ya ai. Raitim, nau n na ai ten hta Karai Kasang hpe malap wa let kaga amyu masha ni a nanat hpra hpe nawku wa ma ai. Shaloi, myit malai lu let shi hpang de bai n htang wa na matu, Karai Kasang shanhte hpe ari bai jaw ai. Dai zawn rai byin wa yang, amyu masha ni gaw Karai Kasang a matsan dum lama ai hpe bai hpyi nem ai rai nna, mai kaja ai prat hta nga sa na matu bai shakut wa ma ai. Raitimung, aten ladaw loi mi na yang, shut hpyit mara bai galaw ai rai nna, shing wang zawn shanhte ni bai gayin wa sai.

Ndai lam a ginchyum hpe dai ni na gashadawn hta anhte mu lu ga ai. Sabyin sun madu gaw Karai Kasang rai nga ai. Sabyi (Israela) hpe atsawm sha hkai let bau maka kaba wa na matu grai shakut sai. Dai hpang, sun galaw sha ai ni hpe shap ya ai. Sun madu wa hkrun lam hkawm mat wa ai shaloi, Gashaka dingsa na Israela masha ni zawn lam n she shang wa ma ai. Nta madu wa shangun dat ai shangun ma ni hpe mung jam jau jaw ma ai. Sun madu wa a kasha hpe pyi sat kau ya ma ai.

Kaja wa sha sun madu wa a kasha gaw, Madu Yesu hpe hkrang shala ya ai rai nna, sun hpe shap ai ni gaw dai aten na nawku hpung woi ni hpe hkrang shadan dan ai rai sai. Gashaka dingsa ten hta Karai Kasang shangun dat ai san pra ai masha ni hpe amyu masha ni n hkap la ai ten galaw ai zawn sha, Madu Yesu hpe n hkap la ai ni hpe mung Karai Kasang gaw ari dan jaw na rai nga ai. Shaloi, asi law law si hkra shakut lu ai ni hte shara bai galai kau na rai nna, Madu Karai hpe hkap la ai Yuda hte Tara maigan masha ni mung mai byin nga ai.

Sun madu wa myit galu ai hpe anhte mu lu sa ga ai. Sun shap galaw ai ni shangun ma ni hpe aroi arip di ai shaloi, nta madu wa kalang ta ari jaw ai lam n nga ai. Hta n-ga, san pra ai ni hte myihtoi ni hpe bai shangun nna mai kaja ai hta sak hkrung lu na matu bai shangun dat ai. Raitim, galai shai na matu shaning law law na mat ai hpang she Karai Kasang shanhte hpe ari jaw nu ai. Ndai  lam hpe yu yang, kaja wa sha, Karai Kasang gaw myit galu kaba ai hpe anhte mu lu ga ai. Moi shawng de Yuda amyu masha ni hpe zawn anhte hpe mung lang hte lang shaman ya nga na rai nga ai. Tim, anhte hpe mai kaja ai sak hkrung lam hta hkawm sa na matu Madu Karai ra sharawng nga ai. Anhte a prat rawt jat galu kaba na matu galoi mung shakut shaja ra nga ai. Anhte hta galai shai kau ra ai lam ni hpe galai shai na aten gaw ‘ya shaloi’ nan rai sai.

PRANWAN LADAW (27) LABAN SHANI NA CHYUM LAIKA

PRANWAN LADAW HTA LABAN 27

8th Oct, 2017

CHYUM MUNGGA DAW 1

Esaia 5:1-7 

Ya hti na gaw myihtoi Esaia a laika hta na rai nga ai. 

Ngai tsawra ai wa a tsabyi sun hpe lakap nna, tsawra ai wa hpe mahkawn ga hte mahkawn n-ga. Ngai tsawra ai wa gaw sau kawng e tsabyi sun langai lu ai. Shi dai hpe htu lajang nna, nlung ni rawm kau nhtawm, kaja htum ai tsabyi ru ni hkai da wu ai. Sun ka-ang kaw langchyi tsabyi shup htumrin tawk da ai.

Tsabyi si kaja si na shi myit mada ai. Raitim tsabyi chyalam hkrai si nga a hka! Yerusalem na ni hte Yuda masha ni e, ngai hte nye a tsabyi sun lapran hparan ya mi. Nye tsabyi sun a matu ngai naw galaw ra ai hpa nga a ta? Ngai tsabyi si lu la na myit mada yang, hpa rai tsabyi chyalam si a ta?

Ya nye sun hpe ngai kaning di na tsun made ga. Nhpan hpe run kau na. Masha ni sa sha kau na mara ai. Ngai bunghku hpe hpya kau na. Kabye kaya di kau mu ga. Ngai sun hpe shakrin kau na. Kadai mung lakung krum shatsawm nna ga kapun ya na n rai. Ju hpun amyu myu tu pru na ra ai. Ngai summwi ni hpe hkang da na. Sun ntsa e marang n htu u ga! Zawnawng zawwa up ai Madu a tsabyi sun chyawm gaw, Israela amyu ni rai nga ai. Shi tsawra ai hkai bawng gaw, Yuda masha ni rai nga ma ai. Shi gaw tara ding ai hku myit mada timung, adip arip hkrai mu nga ai. Dinghpring ai hpe myit mada tim jahtau shabam ai hkrai na nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Hpilipi 4:6-9 

Ya hti na gaw Hpilipi ni kaw San Pawlu shagun dat ai laika hta na rai nga ai.

Hpa lam hta mung myit hkum ru hkum tsang myit. Lam shagu hta akyu hpyi nna, tawngban ai hte shakawn kungdawn let, nanhte hpyi mahpyi hpe Karai Kasang kaw shana dan nga mu. Chye chyang ai lam yawng hta grau ai Karai Kasang a ngwi pyaw ai gaw, nanhte a myit masin, myit mang hpe, Hkristu Yesu hta e bau sin na ra ai. Bai hpu nau ni e, hpa teng man ai, htap htuk ai, dinghpring ai, san seng ai, sharawng awng ai, sha ram ai, arawng lam lama ma, shakawn kungdawn lam lama ma, nga a yang gaw, ndai hte hpe tinang myit kraw hta a shanu nga shangun mu. Nanhte ngai kaw na sharin hkap la ai hte na yu, mu yu, ai lam hte hpe hkan galaw nga mu, Ngwi pyaw ai npawt Karai Kasang nanhte rau a nga nga na ra ai .

Ya hti ai gaw Karai Kasang a mungga rai nga ai. 

KABU GARA SHIGA

Mahte 21:33-43

Ya hti na gaw Mahte a laika hta na Kabu Gara Shiga rai nga ai.

Ga shadawn madat la mu! Nta madu langai mi tsabyi sun hkai sharam da ai. Grup yin nhpan kum da ai. Tsabyi htung da, langchyi gap da, di nna sun galaw ni hpe shap ya ai. Kaga mung de shi hkawm mat wa ai. Si ngai ten du jang, si sa la na, sun galaw ni hpang mayam ni hpe dat dat ai. Sun galaw ni shi a mayam ni hpe rim la nna, langai mi hpe anu kayat, langai mi hpe sat kau, langai mi hpe nlung kabai di ai. Shawng na hta grau law mayam ni hpe shangun dat timung, sun galaw ai ni shawng na zawn di kau ma ai. Dai hpang shi gaw, Ngai sha hpe rai jang shanhte hkungga na ma ai, nga nna, kasha hpe shangun dat wu ai. Sun galaw ni kasha hpe hkap mu jang, ndai wa gaw, Sali wunli dagraw na wa rai nga ai. Gai! Shi hpe sat kau ga, shi a sali wunli anhte la kau ya ga, nga nna shada da tsun dup ma ai. Shanhte shi hpe rim la nna, sun shinggan de shapraw nna sat kau mu ai. Sun madu bai du wa yang ndai sun galaw ni hpe kaning di na wu ta? ngu san mu ai. Shanhte gaw, dai n hkru ai ni hpe n hkru ai hku jahten kau na mu ai. Aten ram jang, shi hpe si jaw lu ai ni hpe masha gale hpe sun htawt shap na ra ai, ngu shi hpe htan mu ai. Yesu shanhte hpe tsun mu ai gaw, Wahpang gaw ai ni lata kau ai nlung gaw, jut jahtum na nlung tai wa sai. Dai gaw, Madu a majaw byin wa sai rai nna, anhte a man e mau hpa amu rai nga ai, nga ai ga hpe laika hta nanhte kalang mi pyi n hti yu myit ni? Ngai nanhte hpe tsun made ga. Karai Kasang a mungdan gaw, nanhte kaw na shaw la kau nna, asi shapraw lu na amyu hpe jaw kau na ru ai.

Ya hti ai gaw Madu a Kabu Gara shiga rai nga ai.