KADE LANG MARA DAT YA NA RAI TA?

Dai ni na kabu gara shiga hpe madat la ai marang e anhte yawng hta dum hprang la lu ai lam, n chyi n mu nga ai lam ni byin pru na sai. Madu Yesu gaw, “sanit shi e htam sanit lang du hkra” mara raw ya mai ai lam tsun sharin sai. Anhte sak prat htum ai aten du hkra galaw na yak la nga ai. Matai bai htang na matu anhte shinggyim myit hta rawng nga ai. Dai myit jasat hpe byeng la lu na matu Madu gaw, “mara n dat ya hkraw ai mayam a gashadawn” hte anhte hpe sharin shaga sai.

Lama na, hka yawng rau kau ya ai hkawhkam wa a myit masa gaw grai kaja teng ai lam rai yang, hka raw dat kau ya hkrum ai rai tim, (shi lu la ra ai hka loi mi hpe ra mayu ai) dai mayam wa a lam gaw yawn hpa kaba rai nga sai. Shi gaw tsawra matsan dum chye ai hkawhkam wa a kyang lai len hpe yu la na ning dang kau sai. Dai majaw, shi gaw, ‘akyu n rawng ai yamti’ rai mat sai. Dai mayam hpe shi galaw ai amu hte dat dat kau dat ai rai yang,  hkawhkam wa arawng n lu, kaya hpa she rai na sai. Dai majaw, dai akyu n rawng ai mayam wa hpe htawng hta e bang da wu ai.

Ndai ga shadawn gaw kasa Mahte ka da ai Madu Yesu a sharin shaga ai lam hta na ‘uhpung uhpawng hte seng ai lam’ (Mt 18) hta na rai nga ai. Kasa Mahte kaw nna sharin ya mayu ai gaw, Uhpung Uhpawng kata, grau nna Hkristan ni a lapran shada da  kaning rai galaw, daw ra ai lam rai nga ai. Karai Kasang anhte marai hkum shagu hpe gawn lajang ai zawn anhte shada da mung galaw na ra ang ai. Kam sham ai ni anhte, mara a matu Madu Yesu a Sai hte raw dat kau ya hkrum sai anhte ni shada da a mara hpe mung masin salum kata na raw dat kau na ra ga ai.

Rai yang, gasan langai mi nga ai gaw, anhte a hpu nau wa hpe kade lang mara raw dat kau ya ai lam n rai, kaning rai mara raw dat kau ai lam rai sai. ‘Sanit shi e htam sanit lang’ mi nga tim, lam masum hpe ndai kaw mada yu ga!

Langai; nang chyu hkra machyi hkrum ai ngu n myit la ga. Kaga maga na ni hpe mung nang kaw nna hkra machyi shangun sai. Nang mung mara raw kau ya na matu ra kadawn nga ai. Lahkawng: Na a hkum hpe laja lana hkum myit la u, anhte yawng gaw mayam sha rai nga ai. Mara n dat ya chye ai mayam wa sha shi hkum shi grai ahkyak la ai rai nna dai gaw shaman chyeju kaw nna shi hpe dawm kau ya sai. Masum; Mara raw ya u! Galaw ngut ai hte rau, ngwi pyaw kabu gara ai hpe hkam sha nga ga!

Ningrum ningtau jan marai mi, shi a madu wa kaga num hte shut ai hpe sa mu hkrup la wu ai. Shi mara raw ya let madu wa hpe n ta de bai woi wa ai. Rai tim, madu wa gaw shi a ningrum ningtau jan dai mara dingsa hpe sha atsun nga ai majaw mau nga ai. Dai zawn atsun nga ai hpe n hkam sharang lu ai majaw, "nang raw kau sai dai mara hpe hpa majaw aten shagu hta bai tsun tsun rai nga a ta?" ngu nna san yu wu ai. Madu jan mung, ‘Re, nang hpe ngai mara dat kau ya ai hpe nang n malap kau u ga, ngai dai ga hpe atsun nga ai re’ da!!!

Sawn sumru mai ai lam; Nang a prat hta mara raw dat kau ya n lu ai lam kade daram nga ai kun? Mara raw dat kau ya tim, malap n lu ai sha galoi mung adum nga ai kun? Mara raw dat ya hkrum ai shaloi na hkam sha lam hpe bai sawn sumru yu ga!

PRANWAN LADAW (24) LABAN SHANI NA CHYUM LAIKA

PRAN WAN LADAW HTA LABAN 24

17th Sep, 2017

CHYUM MUNGGA DAW 1

Sirak 27:30. 28:1-7

Ya hti na gaw Sirak a laika hta na rai nga ai.

Sindawng masin pawt ai gaw, matsat shabat rai nga ai. Rai timung mara kap ai wa dai hta ahpum kap nga ai. Matai dawp ai ni gaw, Madu a matai hkam sha na maru ai. Madu mahtang shanhte a mara ni hpe azin ayang matsing da ya ai. Htingbu wa a shut ai hpe hkyamsa ya u. Shaloi nang hpyi yang, na a mara hpe mung hkyamsa ya na re. Htingbu wa hpe myit n si ai wa; Madu shamai ya ai hpe myit mada lu na kun? Manang ni hpe matsan n chye dum ai wa; tinang a mara ni a matu hkyamsa hpyi mai na kun? 

Tinang shinggyim masha wa, myit n si hkraw ai rai yang; shi a mara ni hpe kadai dat kau ya na rai ta? Jahtum ten hpe dum nna, hpyen myit kau da u. Si, hten bya lam hpe dum nna mara koi u! Tara lam ni hpe dum nna, htingbu wa hpe hkum n dawng et; Tsaw Htum ai wa a ga shaka hpe dum nna, mara hkyamsa nga u!

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 14:7-9

Ya hti na gaw Roma ni kaw San Pawlu shagun dat ai laika hta na rai nga ai.

Anhte hta kadai rai timung, tinang hkum a matu mara sha hkrung nga ai n rai. Kadai rai timung tinang hkum a matu mara sha si wa ai n rai. Hkrung nga yang gaw, Madu a lam anhte hkrung nga ga ai. Si wa yang mung Madu a lam anhte si wa ga ai. Hkrung timung, si timung, Madu hte anhte seng nga ga ai. Si mat ai ni hte hkrung nga ai ni hpe Madu nga lu hkra, Hkristu gaw si hkam nna bai hkrung rawt wa sai.

Ya hti ai gaw Karai Kasang a mungga rai nga ai.

KABU GARA SHIGA

Mahte 18:21-35

Ya hti na gaw Mahte a laika hta na Kabu Gara Shiga rai nga ai.

Petru Yesu kaw sit sa nna, Madu e, nye hpu nau wa ngai hpe bai shut shut rai yang gaw ngai kade lang, shi a mara raw kau nga lu na rai ta? Sanit lang du hkra rai ni? ngu wu ai. Yesu gaw, sanit lang du hkra sha n rai; sanit shi e htam sanit lang du hkra mai rai nga ai, ngai nang hpe tsun de ai, ngu wu ai. Dai rai nna, lamu mungdan gaw, shi a mayam ni hpe jahpan la mayu ai hkawhkam langai mi hte bung nga ai. Ga jahpan la yang, gumhpraw mun mi hka kap ai masha langai mi hpe, shi kaw woi sa mu ai. Hka wa na hpa mung shi n lu ai majaw shi hkum, shi a madu jan, kasha ni mung, shi lu malu yawng hte hpe mung, dut kau nna, hka wa u ga, nga nna shi a madu hkang da nga ai.

Mayam wa gaw, lahput hput di da nna, shi hpe nawku let, Ngai hpe matsan naw dum e law. Ngai mahkra nang hpe wa na de ai, ngu wu ai. Mayam madu wa mung shi hpe matsan dum nna dat dat wu ai. Hka mung raw kau ya ai.

Dai mayam wa pru nna, shi kaw peksan latsa sha hka kapai mayam manang langai mi hpe hkrum jang, shi hpe dun la nna mung, lahput hput di nna, ngai hpe matsan dum e law! Ngai nang hpe wa na de ai, ngu hpyi nem wu ai. Shi mahtang n hkraw ai. Hka wa kau ai aten du hkra htawng hta jahkrat da wu ai. Dai hpe manang mayam ni mu jang, shanhte grai myit yu machyi ma ai. Byin ai lam shanhte a madu hpe shana da mu ai. Shi a madu gaw shi hpe dai jang shaga la nna, N hkru ai mayam e, nang ngai hpe hpyi nem ai majaw, na a hka yawng ngai raw kau ya sade ai. 33 Ngai nang hpe matsan dum ai hte maren na mayam manang hpe matsan dum mai ndai n rai ni? ngu wu ai. Shi a madu mung masin pawt nna, hka wa tawng ai du hkra, pyada ni a lata de ap ya dat wu ai. Nanhte kadai rai tim, tinang hpu nau wa a mara hpe myit masin yawng hte n raw kau myit yang gaw, lamu na nye Wa mung, nanhte hpe tai na marin dai, ngu wu ai.

Ya hti ai gaw Madu a Kabu Gara shiga rai nga ai.

PRANWAN LADAW (23) LABAN SHANI NA MUNGGA

Karai Kasang gaw shinggyim masha hpe tsawra ai majaw hpan tawn da nna shani shana ra nga ai chyeju ni hpe jaw ya nga ai. Dai rai yang Karai Kasang a tsawra myit kaba a jaw e hpan da hkrum ai shinggyim masha ni mung tsawra myit hta mahta nna sakhkrung nga sa ra na re.

Dai ni na Karai Kasang a mungga ni hta tsawra myit hpe madun dan na matu shadum jahprang da sai re. Grau nna tinang hte ganawn mazum ai manaw manang ni shut shai ai aten hta shut shai ai lam a majaw mara matut nna nbyin na matu hte shada da prinem ai hpe lu la na matu shakut ra na hpe mung shadum da sai re.

Nhkum tsup ai shinggyim masha re ai majaw shut shai ai lam anhte hta law law nga wa ai aten ahkying hta tsawra myit hpe madung da nna shada da shading sharai grum shingtau lu na matu shakut shaja sa wa ga.

HPU NAU MYIT HTE SHARAI HKAT GA

Jau tai jawng de rai n shang shi ai shawng shaning hta e, motorcycle dingsa langai mi ngai mari la ai. Rai timung, Ah Wa gaw ngai hpe shi a mawdaw lang na ahkang jaw ai majaw, motorcycle nau n jawn byin ai. Dai majaw, ngai na manang wa hpe Dollar 250 hte dut jaw kau ai. Gumhpraw jaw na re ngu ala yu ai raitim, shi ngai hpe galoi mung n jaw mat sai. An lahkawng a lapran pawt hkat ai lam n byin shangun mayu ai majaw, shi hpe ading tawk gaw n tsun yu ai. Ya aten dai lam hpe ngai bai myit yu ai rai yang, ngai a mara re hpe asan sha mu lu sai. Ngai hku nna atsam dat let gumhpraw hpe ading tawk hpyi ang sai rai nga ai.

Dai ni na kabu gara shiga hta Madu Yesu tsun ai ndai lam rai nga ai. “na n hpu n nau wa nang hpe shut hpyit kau yang gaw, shi hpang de sa nhtawm, nan lahkawng hkrai chyaw rai di nna, shi a mara hpe madun u” nga Madu Yesu tsun da nga ai hte shi Madu nan dai zawn galaw sai. Shi myit n hkrum ai lam nga yang, dai wa hpe nan shi Madu tsun nga ai. Pharishe ni hte tsun shaga hkat ai hta n dai lam ni hpe anhte law law lang na yu ga ai.

Ndai kabu gara shiga a shawng daw hta, mat mat ai sagu kasha a gashadawn hpe anhte na lu ga ai. “nanhte kaning ngu myit da mu ta? masha langai ngai sagu latsa lu nna, dai hta na langai dam mat yang, dai jahku shi jahku hpe bum lang hkan e shi tawn da nhtawm, dam mat ai hpe sa tam ga ai, n rai ni? Dai hte maren, ndai ma kaji langai mi hpe pyi jahten kau ai hkrum na gaw, sumsing lamu hta nga ai nye Wa gaw, n hkraw nga ai. (Mt 18:12, 14).

Ndai gashadawn ngut ai hte nan, dai ni hti ai mungga, hpu nau myit hte sharai hkat na lam, hpe hti lu sai. Dai hpang, “Madu e, nye hpu nau wa ngai hpe bai shut shut rai yang gaw, ngai kade lang shi a mara raw kau nga lu na rai ta? sanit lang du hkra rai ni? Ngu wu ai. Yesu gaw, sanit lang du hkra sha n rai, sanit shi e htam sanit lang du hkra, mai rai nga ai, ngai nang hpe tsun de ai, ngu nna Petru san ai hpe Madu Yesu htai ya ai hpe anhte hti lu na re. (Mt 18:21-22)

Ndai hta anhte mu mada ai gaw, dai ni na mungga ‘hpu nau myit hte sharai hkat na lam’ hpe mara dat ya na lam ka da ai mungga lahkawng hte kasa Mahte ka shinggrup da ai hpe mu lu ai. Tsun dan mayu ai lam gaw, marai rai anhte hpe shut shai wa ai rai yang, shi hpe shawng anhte si mani ai hte tsun shaga yu na, dai hpang shi hpe mara raw ya na lam rai sai.

Hpa majaw nga yang, masha ni hpe si mani ai hte tsun shaga na, mara raw ya na lam gaw n loi la nga ai. Karai Kasang a garum la ai hpe anhte ra kadawn ga ai. Dai re majaw, si mani ai hte tsun shaga chye na, dingman ai hte nga pra nna anhte myit kraw kata kaw na nan mara raw ya lu na matu ra nga ai shaman chyeju ni hpe wa Karai Kasang kaw nna hpyi la ga!

PRANWAN LADAW (23) LABAN SHANI NA CHYUM LAIKA

PRAN WAN LADAW HTA LABAN 23

10th Sep, 2017

CHYUM MUNGGA DAW 1

Ezekela 33:7-9 

Ya hti na gaw myihtoi Ezekela a laika hta na rai nga ai.

Masha kasha e, Israela dap ntsa e sin ai wa tai na matu, ngai nang hpe san da ni ai. Nye a n-gup ga madat nna, nye a ga hte shanhte hpe shadum jahprang u; Ngai gaw tara n lang ai wa hpe, Tara n lang ai wa e, nang hkrak si lu na ndai, ngu nna tsun yang, nang dai wa hpe, shi a lam na nhtang wa hkra, n shadum yang, tara n lang ai wa tinang a mara hta si wa timung, shi a sai hpe na lata na ngai hpyi la na nnagi. Tara n lang ai wa hpe shi a lam na yang, dai wa gaw shi a mara hta si wa timung, nang gaw na a asak hpe hkye la nu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

Roma 13:8-10 

Ya hti na gaw Roma ni kaw San Pawlu shagun dat ai laika hta na rai nga ai. 

Shada da tsawra ai hta kaga, kadai hte mung hpa hka hkum kap mu. Masha kaga hpe tsawra ai gaw jep ai tara hpe shatup ngut nu ai. Masha num hkum shaw, masha hkum sat, hkum lagu, myit hkum marin, nga ai hte htet da ai ga kaga naw nga ayang gaw, dai hte gaw, Na a htingbu wa hpe na a hkum hte maren nang tsawra lu na ndai, nga ai ga langai sha hte gumhpawn nga ai. Tsawra ai gaw htingbu wa hpe n hkru n hkra galaw yu ai n rai. Dai rai, tsawra ai gaw jep ai tara a shatup shadik ai lam rai nga ai. 

Ya hti ai gaw Karai Kasang a mungga rai nga ai.

KABU GARA SHIGA

Mahte 18:15-20

Ya hti na gaw Mahte a laika hta na Kabu Gara Shiga rai nga ai. 

Na nhpu nnau wa nang hpe shut hpyit kau yang, shi hpang de sa nhtawm, nan lahkawng hkrai chyaw rainna, shi a mara hpe madun u. Na a ga madat la yang gaw, nhpu nnau wa hpe mawai la lu nu ai. Na a ga n madat la yang gaw, marai langai lahkawng hpe naw shaga la nna, hpa hku hpa lam rai timung, sakse lahkawng masum a n-gup ga hte daw dan ya mu. Shanhte a ga n madat hkraw yang gaw, dai Hpung hpe sa shana ya mu. Dai Hpung hpe mung n madat hkraw yang gaw, tara maigan wa hte kang hta ai wa zawn na a man e, shi rai u ga. Ngai hkrak tsun made ga, Dinghta ga hta nanhte gyit da mada gaw, lamu hta mung gyit da ai hkrum na mara ai. Dinghta ga hta nanhte raw maraw gaw, lamu hta mung raw kau hkrum na mara ai. 19 Nanhte hpe tsun made ga, Nanhte hta na marai lahkawng dinghta ga hta e, myit hkrum da ai hte hpa lam hpe mung hpyi yang gaw, lamu na nye Wa gaw shan a matu hpyi ai lam shatup ya na mu ai. 20 Marai lahkawng masum, nye a mying hpe gang nna, zuphpawng nga ma yang, dai yang shanhte a ka-ang e, ngai mung lawm nga nngai, ngu mu ai. 

Ya hti ai gaw Madu a Kabu Gara shiga rai nga ai.

PRANWAN LADAW (22) LABAN SHANI NA MUNGGA

Dai ni na Kabu Gara shiga hta Madu Yesu shadum jahprang ai hta na langai mi gaw masha langai ra sharawng ai hpe lu na matu gaw gingdan ai manu jahpu hpe jaw ra ai lam rai nga ai. Shi Madu hkum nan shing gyim masha ni hpe hkye hkrang la ai lam hta nni nhkri yubak hpe hkam la let Wudang ntsa hta si hkam ai hpe hkum hkra lai wa sai re.

Dai majaw shi a nchyang mayam byin tai na matu gaw tinang hkum hpe ndang nyet kau let Wudang hpe hpai ra na lam tsun shadum da sai re. Anhte n-gun la mai ai gaw ru yak jam jau ai lam hpe tinang hkrai sha nre ai sha Madu Karai Kasang gaw anhte hte rau nga nna ra nga ai chyeju ni hpe teng sha jaw ya ai a jaw e lai di mai nga ai.

Shani shana anhte galaw sa ai amu magam lam ni hta n-gun atsam hpe dat let awngdang ai chyeju hpe lu la ai sha n-ga Madu Yesu a hpang hkan ai lam hta mung Karai Kasang a shaman chyeju a jaw e ruyak jam jau ai lam hpe hkam jan lu nna Shi Madu a jet ai ali ama ni tai let htani htana asak hpe lu la u ga.

WUDANG HPAI NNA NGAI KAW HKAN NANG MARIT

Dai ni hti ai kabu gara shiga hta, Madu Yesu gaw nni nkri yubak hkam la let, si hkrum ai hte masum ya nhtoi hta bai hkrung rawt wa na lam, sape ni hpe tsun dan ai shaloi, kasa Petru gaw, “Madu e, dai nang hta n byin u ga; dai gaw Nang hpe galoi n hkra lu na rai’ ngu nna ningdang sai. Petru a ga hpe na la lu ai shaloi Madu Yesu gaw; “Satan e, nye hpang de sit mat wa u, Karai Kasang hte seng ai lam n rai, masha hte seng ai lam hpe sha nang myit nga ndai majaw, nye a matu myit kataw shara nang rai nga ndai, ngu nna tsun wu ai.

Mi na ga ni hpe tsun ai shaloi, Kasa Petru hpa hpe myit taw ai kun? Shi hpe yu yang, myit sumnum ai hpe mu na re. Shi Madu Yesu hpe tsawra nga ai hte si mat na n ra sharawng nga ai. Tim, shi myit mang ai lam gaw mungkan lam yan hta rai nga ai. Yawng a mai kaja ai lam a matu, marai mi a prat hpe ap nawng kau ai lam shi rai n chye na shi nga ai.

Madu Yesu daru dat ai ga hpe yu yang, Petru tsun ai ga a majaw Shi Madu myit htum mat ai zawn re ai. Karai Kasang hta kam sham ai Petru a makam hta shi a Nawku Hpung hpe de tawn da mayu nga ai. Tim, dai aten hta, mungkan ga hpe hkye la na Karai Kasang a masing rai nga ai, sak jaw ap nawng ra ai lam, Madu Yesu a si hkam ai lam, hpe Petru n myit kau ai. Tim, Petru hta byin pru ai lam gaw, lama na, Madu Yesu sat kau hkrum na rai yang, shi hte kaga sape ni mung arau hkam sha lawm na hpe shi myit taw nga ai.

Kabu gara shiga a hpang daw hta, sak jaw ap nawng na, ra kadawn ai hpe Madu Yesu sanglang dan sai. Anhte marai langai hpra hpe tsun ai lam ndai hta anhte mu hti lu sa ga ai. Madu tsun ai gaw; “Ngai hpang de sa wa mayu ai wa kadai rai timung, tinang a hkum hpe nyet kau lu na rai nna, shi a wudang hpai let, Ngai kaw hkan nang ru ga,” nga ai.

‘Tinang hkum hpe nyet kau lu na rai ai’ ngu ai gaw hpa lachyum rai ta? Dai gaw, Karai Kasang sharawng awng ai hte tinang myit ra ai lam yan lapran lata ra ai aten ni hta rai nga ai. Bai nna, Karai Kasang sharawng awng ai lam, hkan nang hkan galaw ai ten, tinang hta ap nawng gun hpai ra ai lam ni law law byin pru wa ai rai nna, Karai Kasang anhte hpe galaw shangun mayu ai lam ni hpe galaw lu na matu tinang myit sharawng ai hpe tawn kau ai lam ni mung rai nga ai.

Madu Yesu madi madun ai hte maren, ndai hta ahkyak ai gaw anhte hkum nan hte anhte a hkring htawng nan rai nga ai. Dai gaw, Karai Kasang anhte hpe masat da ya ai lam yan, shani shagu na sak prat hta byin shangun mayu ai Karai Kasang a masing ni hpe mung shalawm ra nga ai. Anhte lata la ai lam mai kaja dik ai shaloi, Karai Kasang anhte a matu lajang da ya ai ngu dum chye ga ai. Anhte myit ra ai lam hpe lata la ai shaloi, Karai Kasang lajang da ya ai lam hpe myit htum mat chye ai. Karai Kasang lajang da ya ai hpe anhte tup hkrak hkan sa ai shaloi, anhte rai n shangai shi ai aten kaw nna Karai Kasang masat da ya ai hkrang sumla hte maren anhte kung hpan wa ga ai. Dai hkrang sumla hta anhte matut manoi galu kaba wa ai rai yang, kaga masha ni hte n bung ai sha Karai Kasang hte grau ni htep wa nna, dai lam ni yawng gaw anhte salum hpe kabu myit pyaw shangun na ra ai.

‘Tinang a asak hpe hkye la mayu ai kadai mung, dai sum mat na lu ai; nye a jaw e tinang a asak sum ai wa chyawm gaw, dai hpe mu lu na ru ai”. Madu Yesu tsun ai gaw, san seng san pra lam, mungkan ga a ngwi pyaw lam hta grau ai lam rai nga ai.

“Karai Kasang anhte yawng hpe san pra wa na lam sharawng awng nga ai” nga nna kasa Pawlu tsun da sai. Dai gaw kadun dik tsun ai lam rai sai.

PRANWAN LADAW (22) LABAN SHANI NA CHYUM LAIKA

PRANWAN LADAW HTA LABAN 22

3rd Sep, 2017

CHYUM MUNGGA DAW 1

Yeremia 20:7-10

Ya hti na gaw myihtoi Yeremia a laika hta na rai nga ai.

Madu e, nang ngai hpe shagwi nna ngai hkam la sai. Nang n-gun ja grau nna dang nit dai. Ngai shani shanang asawng asang hkrum ai. Nlang hte ngai hpe roi la ma ai. Ngai ga tsun shagu shabam nngai. Kashun kashe, hten bya hkrai lam, ngu jahtau tsun nngai. Madu a mungga a majaw ngai hta, shatan nhkan hte jahpoi shara shani shagu tai nga ai. Madu hta hpa nna, shi a mungga n tsun sana, ngu tim, nye myit kraw hta wan zawn hkru nna, nye nrut nra ni hta grung nga ai majaw, nye a myit kadau kadap nna n sharang lu nngai. Masha ni a shatan n hkan ngai na lu nngai.

Shoihpa shoirang shara magup rai nga ai. Nye a makyin jinghku ni pyi, mara shagun mu. Anhte shi hpe mara shagun na ga ai. Anhte shi hpe lau lu nna, dang kau lu na nhten. Shi hpe matai dawp lu na nhten, nga nna ngai hpe gyam yu ai ni tsun ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 12:1-2

Ya hti na gaw Roma ni kaw San Pawlu shagun dat ai laika hta na rai nga ai.

Hpu nau ni e, anhte hpe Karai Kasang matsan dum ai lam kaba la nga ai. Ngai nanhte hpe shadum nngai. Nanhte a hkum hpe chyoi pra hkrung nga ai hkungga di nna, Karai Kasang kaw nawng ya nga mu. Shi hta sharawng awng ai ni tai nna myit jung let daw jau nga mu. Dai gaw nanhte jaw mai ai tengman ai nawku daw jau lam rai nga ai. Mungkan jasat madang hpe nanhte hkum myit hkan myit. Karai Kasang hpe nanhte a myit masin tup hkren galai kau ya shangun mu. Shaloi Karai Kasang myit ra ai lam hpe chye lu na myit dai. Mai kaja lam gara re ai; Madu ra sharawng ai lam hte kup tsup lam hpe ginhka la lu na myit dai.

Ya hti ai gaw Karai Kasang a mungga rai nga ai.

KABU GARA SHIGA

Mahte 16:21- 27

Ya hti na gaw Mahte a laika hta na Kabu Gara Shiga rai nga ai. 

Yesu Hkristu gaw, Yerusalem mare sa lu na, agyi salang ni, jau agyi ni hte laika ka sara ni a lata hta e nni nkri law law hkrum nna, sat kau hkam nhtawm, masum ya nhtoi hta e, bai hkrung rawt na lam, sape ni hpe madun dan hpang wu ai. Petru gaw, shi hpe shaga la nna, Madu e, dai nang hta n byin u ga, Dai nang hpe galoi n hkan hkra lu na rai, nga nna jet nga ai. Shi Petru hpang gayin nna, satan e, nye a hpang de sit mat wa u. Karai Kasang hte seng ai lam n rai, masha hte seng ai lam hpe sha myit nga ndai. Nye a matu myit kataw shara nang rai nga ndai, ngu wu ai. Yesu shi a sape ni hpe, Ngai hpang de sa mayu ai wa kadai mung, tinang hkum hpe nyet kau na rai nna, tinang udang hpai let, ngai kaw hkan nang ru ga. Tinang asak hkye mayu ai wa kadai mung, dai sum mat lu na re. Nye a jaw e tinang asak sum kau ai wa chyawm gaw dai hpe mu lu na ra ai. Masha gaw nga yawng nga pra kawm dawm amyat lu la ninglen, tinang asak sum mat yang gaw, shi a matu hpa akyu nga lu ta? Masha gaw hpa gawng malai hkungga hte wa, tinang a asak hpe shaw la lu na a ta? Dai masha kasha gaw, Kawa a hpung shingkang hte shi a lamu kasa ni hte nawng du na ra ai. Dai shaloi tinang galaw ai hte maren, langai the langai hpe bai htang na ra ai.

Ya hti ai gaw Madu a Kabu Gara shiga rai nga ai.

PRANWAN LADAW (21) LABAN SHANI NA MUNGGA

Amu magam lam ni hta awngdang ai gaw tinang galaw ai hta gade daram kam nna n-gun lu dat ai hta madung nga ai. N-gun lagaw dat let galaw na matu gaw shawng nnan tinang galaw ai hpe kam ra na re. Kam ai myit nga yang she galaw mayu ai myit mung rawng wa na rai nga ai.

Kasa Petru gaw Madu Yesu hpe Karai Kasang a Kasha, Hkye Hkrang la ai Wa re ngu kam ai hte maren, Nawku Hpung a Ningbaw ngu ai lit magam hpe n-gun atsam marai yawng hte sakjaw ap nawng lai wa sai rai yang, dai ni du hkra nawku hpung gaw matut nna rawt jat galu kaba wa ai re.

Kasa Petru hpe kasi la nna tinang galaw ging ai, galaw ra ai amu magam ni hpe teng sha akyu rawg ai, galaw ra ai, galaw ging ai ngu kam,sham myit kaba rawng let n-gun lagaw dat nna tinang a matu sha n-ga, masha yawng a matu mung akyu pru ai amu bungli ni hpe awngdang ai hte galaw sa wa lu u ga.

NANG, NGAI KANING NGU HTAI NA?

“Nang gaw Hkristu ngu ai ahkrung nga ai Karai Kasang a kasha rai nga ndai”

Dai ni na kabu gara shiga gaw sawn sumru yu ai hte hpaw tsun dan ai lam rai nga ai. Madu Yesu gaw masha ni Shi hpe kaning rai mu mada hkap la ai lam chye lu na matu shakut yu sai. Dai hte maren, Shi hte rau nga nga ai Sape manang ni hpe mung Shi Madu hpe kaning rai chye na ai, kadai re ngu hkap la ai hpe chye mayu ai hta n-ga, shanhte a ningmu, myit mada lam ni hpe mung shagrit da ya mayu nga ai. Karai Kasang a shaman chyeju hte Kasa Petru gaw Hkyela Madu Yesu Hkristu re ai hpe tsun shapraw lu sai. Tim, nau nna ai aten hta Kasa Petru gaw, Hkyela Madu nni nkri hkam na, si hkam na hte bai hkrung rawt wa na lam hpe n lu hkap la ai majaw Madu Yesu e daru sharin ai hkrum sai. Roma ni a lata kaw nna shanhte hpe hkye la na share shagan Hkristu gaw dai zawn rai nni nkri yu bak hkrum na, si hkam na hpe n chye na lu ai. Lama na Madu Yesu pyi dai zawn rai hkrum sha na rai yang, shanhte sape ni hta gaw kade daram jam jau sa na rai?

Dai hta grau ahkyak ai gaw, dai Hkyela Madu a prat masa, sape ni hpe kaning rai hkrum hkra wa na kun? Dai Sape ni Shi Madu hte naw rau nga na kun? Shanhte myit mada ai hte shai la ai majaw Madu Yesu hpe ngam kau da nna wa mat sa na kun? Sawn sumru yu na aten rai sai? Hkyela Madu gaw nni nkri hkam la na ngu ai hpe shanhte hkap la lu na i? Madu Yesu hte shi a Sasana magam hta hkan nang hkan sa ai majaw hpa wa mi lu la na rai?

Hpang jahtum hta, Hkyela Madu Yesu hpe hkap la lu ai hte Shi a sharin shaga ai hpe grau chye na wa ai majaw rau anga nga masai. “Nanhte mahtang ngai hpe kadai wa rai nga ai, nga nga myit ta? Ngu ai ga san gaw anhte marai hkum shagu a prat hta htai ya ra ai ga san langai rai sai. Masha kaga ni tsun ai hpe sha anhte kam nga na n ra ai. Madu Yesu kadai re ai hpe anhte hkum nan dan dan leng leng chye madat ra nga ai. Ndai aten ladaw du hkra nang/ngai a prat hpe dai Madu kade daram galai shai ya sai kun? Dai ni na aten hta nang/ngai Shi Madu hpe kaning rai mu mada ai kun? Madu Yesu a hpang hkan nang nga ai, Shi Madu a manang rai nga ai anhte ni myit sumru yu na grai ahkyak sai. Nang/ngai a chye na hkap la ai lam gaw kaga masha ni hte mahku mara tawn da ai lam hpe akyu jaw ya na re. Tsun ga nga yang, Madu Yesu hpe matsan dum chye ai wa ngu nna mu mada hkam sha yu ai rai yang, dai matsan dum lama ai lam hpe kaga masha ni hte mung anhte garan jaw ya lu na rai nga ai. Kasa Petru zawn, Madu Yesu kadai re ai hpe pram di mu ai aten ni anhte hta mung nga na nhten. Karai Kasang a shaman chyeju hte dai chye na hkap la ai hpe dan dan leng leng chye mai nga ai. Grau ahkyak ai chyawm gaw, dai machye machyang gaw anhte hpe grau kaja ai, tsawra chye ai masha byin shangun sai kun? Anhte a prat hpe galai shai ya na, shading sharai ya na Madu Yesu hpe grau sung ai hte chye madat hkap la lu na matu anhte akyu hpyi ga law!

Sawn sumru yu mai ai lam; Ngai a Madu Yesu hpe chye na hkap la ai lam gaw grau grau sung wa ai kun? “Ngai kadai re ai ngu nang tsun n ta? Nga nna Madu Yesu, ngai hpe san yang Shi hpe htan ya na matu ngai a mahtai gaw hpa rai ta? Sung ai machye machyang mi rai na kun? Shing n rai. . .