PRANWAN LADAW (21) LABAN SHANI NA MUNGGA

Amu magam lam ni hta awngdang ai gaw tinang galaw ai hta gade daram kam nna n-gun lu dat ai hta madung nga ai. N-gun lagaw dat let galaw na matu gaw shawng nnan tinang galaw ai hpe kam ra na re. Kam ai myit nga yang she galaw mayu ai myit mung rawng wa na rai nga ai.

Kasa Petru gaw Madu Yesu hpe Karai Kasang a Kasha, Hkye Hkrang la ai Wa re ngu kam ai hte maren, Nawku Hpung a Ningbaw ngu ai lit magam hpe n-gun atsam marai yawng hte sakjaw ap nawng lai wa sai rai yang, dai ni du hkra nawku hpung gaw matut nna rawt jat galu kaba wa ai re.

Kasa Petru hpe kasi la nna tinang galaw ging ai, galaw ra ai amu magam ni hpe teng sha akyu rawg ai, galaw ra ai, galaw ging ai ngu kam,sham myit kaba rawng let n-gun lagaw dat nna tinang a matu sha n-ga, masha yawng a matu mung akyu pru ai amu bungli ni hpe awngdang ai hte galaw sa wa lu u ga.

NANG, NGAI KANING NGU HTAI NA?

“Nang gaw Hkristu ngu ai ahkrung nga ai Karai Kasang a kasha rai nga ndai”

Dai ni na kabu gara shiga gaw sawn sumru yu ai hte hpaw tsun dan ai lam rai nga ai. Madu Yesu gaw masha ni Shi hpe kaning rai mu mada hkap la ai lam chye lu na matu shakut yu sai. Dai hte maren, Shi hte rau nga nga ai Sape manang ni hpe mung Shi Madu hpe kaning rai chye na ai, kadai re ngu hkap la ai hpe chye mayu ai hta n-ga, shanhte a ningmu, myit mada lam ni hpe mung shagrit da ya mayu nga ai. Karai Kasang a shaman chyeju hte Kasa Petru gaw Hkyela Madu Yesu Hkristu re ai hpe tsun shapraw lu sai. Tim, nau nna ai aten hta Kasa Petru gaw, Hkyela Madu nni nkri hkam na, si hkam na hte bai hkrung rawt wa na lam hpe n lu hkap la ai majaw Madu Yesu e daru sharin ai hkrum sai. Roma ni a lata kaw nna shanhte hpe hkye la na share shagan Hkristu gaw dai zawn rai nni nkri yu bak hkrum na, si hkam na hpe n chye na lu ai. Lama na Madu Yesu pyi dai zawn rai hkrum sha na rai yang, shanhte sape ni hta gaw kade daram jam jau sa na rai?

Dai hta grau ahkyak ai gaw, dai Hkyela Madu a prat masa, sape ni hpe kaning rai hkrum hkra wa na kun? Dai Sape ni Shi Madu hte naw rau nga na kun? Shanhte myit mada ai hte shai la ai majaw Madu Yesu hpe ngam kau da nna wa mat sa na kun? Sawn sumru yu na aten rai sai? Hkyela Madu gaw nni nkri hkam la na ngu ai hpe shanhte hkap la lu na i? Madu Yesu hte shi a Sasana magam hta hkan nang hkan sa ai majaw hpa wa mi lu la na rai?

Hpang jahtum hta, Hkyela Madu Yesu hpe hkap la lu ai hte Shi a sharin shaga ai hpe grau chye na wa ai majaw rau anga nga masai. “Nanhte mahtang ngai hpe kadai wa rai nga ai, nga nga myit ta? Ngu ai ga san gaw anhte marai hkum shagu a prat hta htai ya ra ai ga san langai rai sai. Masha kaga ni tsun ai hpe sha anhte kam nga na n ra ai. Madu Yesu kadai re ai hpe anhte hkum nan dan dan leng leng chye madat ra nga ai. Ndai aten ladaw du hkra nang/ngai a prat hpe dai Madu kade daram galai shai ya sai kun? Dai ni na aten hta nang/ngai Shi Madu hpe kaning rai mu mada ai kun? Madu Yesu a hpang hkan nang nga ai, Shi Madu a manang rai nga ai anhte ni myit sumru yu na grai ahkyak sai. Nang/ngai a chye na hkap la ai lam gaw kaga masha ni hte mahku mara tawn da ai lam hpe akyu jaw ya na re. Tsun ga nga yang, Madu Yesu hpe matsan dum chye ai wa ngu nna mu mada hkam sha yu ai rai yang, dai matsan dum lama ai lam hpe kaga masha ni hte mung anhte garan jaw ya lu na rai nga ai. Kasa Petru zawn, Madu Yesu kadai re ai hpe pram di mu ai aten ni anhte hta mung nga na nhten. Karai Kasang a shaman chyeju hte dai chye na hkap la ai hpe dan dan leng leng chye mai nga ai. Grau ahkyak ai chyawm gaw, dai machye machyang gaw anhte hpe grau kaja ai, tsawra chye ai masha byin shangun sai kun? Anhte a prat hpe galai shai ya na, shading sharai ya na Madu Yesu hpe grau sung ai hte chye madat hkap la lu na matu anhte akyu hpyi ga law!

Sawn sumru yu mai ai lam; Ngai a Madu Yesu hpe chye na hkap la ai lam gaw grau grau sung wa ai kun? “Ngai kadai re ai ngu nang tsun n ta? Nga nna Madu Yesu, ngai hpe san yang Shi hpe htan ya na matu ngai a mahtai gaw hpa rai ta? Sung ai machye machyang mi rai na kun? Shing n rai. . .

PRANWAN LADAW (21) LABAN SHANI NA CHYUM LAIKA

PRANWAN LADAW HTA LABAN (21) 

27th August, 2017 

CHYUM MUNGGA DAW 1 

Esaia 22:19-23 

Ya hti na gaw myihtoi Esaia laika hta na rai nga ai.

Zawnawng zawwa up ai Madu gaw, hkawhkam hkaw a kunhting wa Sebna hpe tsun ai, Nang hpe aya jahkrat kau na de ai. Nang arawng sum mat na rin dai. Dai shani nye a mayam Hilkia a kasha Eliakim hpe ngai shaga nna, na a shingkyit shi hpe jaw kau nna, na a ahkang aya shi hpe jaw kau na we ai. Shi gaw Yerusalem masha ni hte Yuda mung a kawa tai na ra ai. Dawi dap hkawhkam npu e ahkang aya yawng ting ngai shi hpe jaw da na we ai.

Sumsaw yawng shi kyem da na ra ai. Shi hpaw sai hpe kadai n la kau lu na. Shi la da sai hpe kadai n hpaw lu na. Shi hpe maina hte dit shakap da ai zawn ngai shagrin da na we ai. Amyu dap a matu arawng sadang tingnyang shi tai na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 11:33-36

Ya hti na gaw Roma ni kaw San Pawlu shagun dat ai laika hta na rai nga ai.

Karai Kasang a sali wunli kade hkik hkam a hka! Karai Kasang a chye chyang ai hte byeng-ya kade sung nga a hka! Shi dawdan ai lam kadai n htai ya lu ai. Shi a jasat hpe kadai n dang sagawn ya lu ai.

Madu a myit hpe kadai dang chye a ta? Shi hpe hpaji jaw salang kadai nga a ta? Shi bai nhtang jaw ra hkra shi hpe kadai wa hpa sak jaw yu sata? Arai yawng mayawng gaw, shi kaw nna, shi a majaw, shi a matu pra nga ai. Shi kaw htani htana hpung shingkang a nga nga u ga law! Amen.

Ya hti ai gaw Karai Kasang a mungga rai nga ai.

KABU GARA SHIGA

Mahte 16:13-20

Ya hti na gaw Mahte a laika hta na Kabu Gara Shiga rai nga ai.

Yesu kasa ni hpe san ai, Masha ni Masha Kasha hpe kadai re ai, nga ma ta? ngu wu ai. Shanhte gaw, nkau mi, Yawhan Baptista, kaga ni , Elia, bai kaga ni Yeremia, shing nrai, myihtoi langai ngai re ai, nga ma ai, ngu mu ai. Yesu gaw, nanhte ngai hpe kadai ngu myit ta? ngu wu ai. Simun Petru htan nna, Nang gaw Hkristu ngu ai hkrung nga ai Karai Kasang a Kasha rai nga ndai, ngu wu ai. Shaloi Yesu gaw, Bara-Yona Simun e, nang a lu ndai. Ashan asai nang hpe dai madun dan ai n rai. Lamu na nye Wa dai hpe madun dan ya ndai. Nang hpe ngai tsun de ga, nang Petru rai nga ndai hte, ndai lunghkrung ntsa e, nye a Hpung hpe ngai de da na we ai. Si du atsam dai hpe dang kau lu na n rai. Lamu mungdan a sumsaw ni ngai nang hpe ap ya na de ai. Dinghta ga hta nang gyit da mada gaw, lamu hta mung gyit da na ra ai. Dinghta ga hta nang raw maraw gaw, lamu hta mung raw kau dat na ra ai, ngu htan wu ai. Hkristu Shi rai nga ai hpe, kadai e mung n tsun dan mu ga, sape ni hpe ginhtim da mu ai.

Ya hti ai gaw Madu a Kabu Gara shiga rai nga ai.

MARIA HPE LAMU DE SHALUN LA AI POI SHANI NA MUNGGA

Karai Kasang gaw san seng san pra ai re ai majaw san seng san pra ai ni chyu sha Karai Kasang hte rau jawm pawng lu na re ngu ai hpe dai ni na poi shadum jahprang ya nga ai. Npawt shut hpyit mara nkap ai shangai wa ai sha n-ga, shi a prat tup hta mara nkap ai sha nga sa lu ai majaw wenyi hte hkum hkrang hpawn sumsing lamu de woi shalun la hkrum sai re.

Mara kap ai shinggyim masha ni mungkan ntsa hta nga pra ngut ai hpang jasan jaseng ai magam hpe galaw ngut ai shaloi she Karai Kasang hte jawm pawng lu ai rai nga ai. Dai majaw mara a mayam hta na lawt lu nna Karai Kasang hte rau Nu Maria zawn sak hkrung lu na matu ahkyak nga ai.

NA A GA HTE MAREN NGAI HTA BYIN WA U GA

Anhte a Kanu Maria hpe sumsing lamu de woi shalun la ai poi hpe myit dum galaw ai shaloi anhte hpe shadum jahprang ya ai lam langai gaw shinggyim masha langai hpra hta nga ai hkum hkrang hte wenyi hpe gawn lajang ra ai lam rai nga ai. Shinggyim masha ngu nna tai wa ai hte hkum hkrang hte Wenyi rau nga ai lam hpe anhte dum chye nga ai. Raitimung, kalang lang wenyi hte hkum hkrang hpe kaga ga gin hka da chye ga ai. Masha n kau mi rai yang wenyi sha ahkyak ai nga nna hkum hkrang hpe n gawn n sawn galaw chye nga ai. Dai ni na poi nhtoi gaw anhte hpe Karai Kasang jaw tawn da ai hkum hkrang gaw ahkyak nga ai lam hte ndai shinggyim hkum hkrang awu asin n kap hkra makawp maga ra ai lam shadum jahprang ya nga ai.

Chyoi pra ai Nu Maria gaw shi a sak prat hta e Karai kasang myit ra sharawng ai hte maren sak hkrung hkawm sa lai wa sai. Shi gaw npawt mara n kap ai sha Na-um-na-sin hkam la nna shangai wa sai rai tim, prat tup Karai Kasang myit ra ai hte maren nga sa ai lam gaw shi a kam sham ai hte myit daw dan nna shi a sak prat hpe ap nawng lai wa sai lam rai nga ai. Dai rai nna Nawku Hpung kaw nna kam ra ai lam ni nga nna sharin shaga ai ni hta Nu Maria gaw mungkan ga sak prat htum ai hte shi a wenyi hte hkum hkrang hpe lamu de woi shalun la hkrum ai lam mung lawm nga ai. Dai hpe Wasara¬byin Pius XII kaw na 1950 ning November shata praw 1 ya shani Tara shang ndau shana shabra lai wa sai.

Nu Maria hpe shi a mai kaja ai sak hkrung lam mahkra a majaw Wa Karai Kasang gaw hpang jahtum na nhtoi hta anhte a hkum hkrang bai hkrung rawt na ahkying aten e hkam la lu na chyeju hpe tau nau nna jaw ya sai rai nga ai. Dai rai yang, anhte mungkan ga ntsa hta naw sak hkrung hkawm sa nga ai aten ni hta Wenyi lam hpe sha n rai, anhte a hkum hkrang hpe mung hkungga ai hte gawn lajang makawp maga ra ai, san seng ai lam hta nga sa ra ai lam shadum ya ai. Hta n-ga, masha shagu a hkum hkrang ahkrung nga ai hte si wa ai lam ni yawng hpe n-gawn n sawn galaw ai lam koi gam kau ra ai hpe shadum ya nga ai.

Dai ni hti ai kabu Gara shiga hta mung Nu Maria gaw Madu Karai Kasang hpe shakawn ai lam anhte na la ga ai. Nu Maria gaw shi a sak prat hta “Na a ga hte maren ngai hta byin wa u ga” nga ai ga hte maren Karai Kasang a mungga shi hta hpring chyat nga nna aten ladaw shagu Karai Kasang hte rau sha manoi nga let sak hkrung hkawm sa lai wa sai. Madu Yesu mung Udang ntsa hta Shi a kanu hpe anhte a matu jaw ya sai rai nga ai.

Dai rai yang, Nu Maria a kashu kasha ni rai nga ai an¬hte ni mung shi Kanu a kasi hpe yu let Karai a mungga hpe madat la nna Shi Madu hte rau sak hkrung nga sa lu na matu hte Nu Maria a san seng san pra ai hpe kasi la nna anhte a shinggyim hkum hkrang mung san seng wa lu hkra shakut shaja sa wa na mai kaja la nga ai. Nu Maria zawn, “Karai Kasang myit ra ai hte maren byin wa u ga” ngu nna myit hkut da let san seng san pra ai ni tai wa lu na anhte shakut shaja let sak hkrung hkawm sa wa ga law!

Sawn sumru yu mai ai lam: Karai Kasang jaw da sai anhte a hkum hkrang hpe makawp maga, sadi hkungga let nga pra nga ga ai kun? Nu Maria zawn, Karai Kasang a mungga madat la nna myit aru yu let san seng san pra ai hte sak hkrung hkawm sa wa na myit dum lu sai kun?

MARIA HPE LAMU DE SHALUN LA AI POI SHANI NA CHYUM LAIKA

CHYOI PRA AI MARIA HPE LAMU DE SHALUN LA AI POI

20th, August, 2017

CHYUM MUNGGA DAW 1

Shingran 11:19; 12:1-6. 10

Ya hti na gaw, Shingran laika hta na rai nga ai.

19Sumsing lamu hta e Karai Kasang a chyoi pra ai Htingnu hpaw malang nna, dai Htingnu kata e Ga shaka Sumpu hpe mu lu ai. Bai, sumsing lamu kata e mauhpa amu kaba dan pru ai gaw: Jan lawai nna shata kabye ai hte, shagan shi lahkawng kap ai janmau gup ai numsha langai mi dan pru ai. Shi gaw na-um nasin rai nna, shangai na matu shinggyim machyi ai majaw, jahtau hkrap nga ai.

3Bai, mauhpa amu kaga sumsing lamu kata e dan pru ai gaw:Yu u, hkyeng ai baren numraw kaba dan pru ai; shi gaw baw sanit hte nrung shi tu nna, baw shagu hta ja kagup gup nga ai. 4Shi a nmai gaw lamu na shagan htam masum hta na, htam mi magawn la nna, ga de jahgkrat dat wu ai. Kasha shangai maw ai numsha, shi a kasha shangai dat jang, dai ma hpe sha kau na nga, baren numraw dai numsha a man e la tsap nga ai.

5Shaloi dai numsha gaw, amyu baw shagu a ntsa e hpri sumdoi hte up na ra ai, shadang sha langai hpe shangai wu ai; shi a kasha hpe Karai Kasang a man de mung, Shi a tingnyang a man de mung gare shalun la wu ai. 6Dai numsha gaw nam mali de hprawng mat wa ai; dai yang e Karai Kasang gaw shi a matu nga shara lajang da ya wu ai. 10Shaloi sumsing lamu kata na nsen kaba gaw:

Ya gaw, Karai Kasang a Hkristu up hkang na ahkang aya lu la nna, Madu Karai Kasang Shi a daru magam, hpung shingkang hte mungdan hpe lu la ai ahkying rai sai, nga nna tsun ma ai hpe ngai na nngai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1Korinhtu 15: 20-26

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Hkristu si mat ai ni kaw na bai hkrung rawt sai rai nna, yup pyaw mat ai ni hta na, shawng si ai asi tai wa sai. Masha langai mi a jaw e mung, bai hkrung rawt wa na lam byin wa sai. Yawng mayawng gaw, Adam hta e si mat wa ai hte maren, yawng mayawng gaw Hkristu hta e bai hkrung rawt wa na mara ai.

Rai timung, langai hte langai tinang ang ai hku hte maren byin wa na ra ai: Hkristu gaw shawng si ai asi nnan re ai majaw, shawng na ra ai; dai hpang Hkristu bai du ai ladaw e, Shi hte seng ai masha ni hkrung wa na mara ai. Dai hpang e, Hpang jahtum Nhtoi du na ra ai. 

Dai shaloi e, Hkristu gaw daru magam, hpung shingkang hte ahkang aya mahkra hpe jahten kau nna, Kawa Karai Kasang kaw dai mungdan hpe ap ya na ra ai. Kaning rai nme law, Shi a hpyen ni yawng hte hpe, Shi a lagaw npu e tawn da ai du hkra, Shi up hkang nga na ra ai. Hpang jahtum na hpyen wa ngu ai si hkrung si htan gaw, jahten kau ai hkrum na ra ai; hpa majaw nga yang, yawng mayawng hte hpe shi a lagaw npu e tawn da nu ai, nga nna Chyum laika hta ka da nga ai. 

Ya hti ai gaw, Karai Kasang a mungga rai nga ai.

KABU GARA SHIGA

Luka 1: 39-56

Ya hti na gaw, Luka a laika hta na Kabu Gara Shiga rai nga ai.

Maria gaw, Yuda mung na bum ga e nga ai, mare langai mi de alawan rawt sa nna, Zakari a nta de shang nhtawm, Elisabet hpe hkrum shaga wu ai. Maria hkrum shaga ai ga hpe Elisabet na la jang, shi a hkritung na ma gumlawt nga ai. Elisabet mung, Chyoi pra ai Wenyi hte hpring nna, nsen kaba hte jahtau let, Numsha ni hta nang a lu ndai; na a hkritung na ma mung a lu nga ai. Nye a Madu a kanu ngai hpe sa kawan ai gaw, hpa chyeju a jaw e rai ra ai i? Ngai nang hpe tsun de ga: Na a shakram ai ga nsen ngai na la ai hte rau, nye hkritung na ma kabu gara ai hte gumlawt nga ai. Madu shi hpe tsun ai ga dik wa na ra ai lam hpe kam sham ai numsha gaw, a lu nga ai, ngu nna tsun wu ai.

Shaloi Maria gaw: Nye wenyi mung ngai hpe hkye la ai Madu Karai Kasang hta kabu gara li ai. Shi a mayam jan a myit nem ai hpe shi mada yu nu ai. Atsam rawng ai wa gaw ngai hpe galu kaba ai galaw ya ni ai, majaw, ya kaw nna shu mashi shu masha, ngai hpe a lu ai ngu na mani ai. Shi a mying ningsang chyoi pra lu ai. Shi hpe hkrit kamyin ai ni a ntsa e, shu mashi shu masha du hkra, shi a matsan dum ai myit a nga nga ai. Shi a lahpum hpe atsam hte ladawn dat nna, myit gumrawng nga ai ni hpe shabra kau nu ai. Du magam ni hpe tingnyang na jahkrat kau nna, myit nem ai ni hpe shagrau ya nu ai.

Krawsi hkrum ai ni hpe kaja ai hte jahkru shakat nna, sut su ai ni hpe kaman dat dat nu ai. Anhte a ji wa ni hpe tsun da ai hte maren, Abraham hte shi a kashu kasha ni hpe, prat dingsa e matsan dum ai lam dum nga let, shi a shangun ma Israela hpe lanu lahku ya nu ai, ngu nna Maria tsun wu ai. Maria gaw Elisabet hte rau shata masum dang nga nhtawm, nta de bai wa mat ai.

Ya hti ai gaw, Madu a Kabu Gara shiga rai nga ai.

PRANWAN LADAW (19) LABAN SHANI NA MUNGGA

Anhte yawng hta lu ai aten ahkying gaw maren mara sha raitimmung, ndai aten ahkying hpe nbung ai hku jai lang nna lu la ai akyu ara gaw shai nga ai. Dai rai yang tinang a aten ahkying hpe manu dan ai hku jai lang na matu gaw ahkyak nga ai.

Madu Yesu gaw Shi galaw ra ai amu bungli ni gade law ai rai tim Kawa Karai Kasang hte matut mahkai ai akyu hpyi ai lam hpe aten ahkying la nna galaw sa ai hpe dai ni na Kabu Gara ai shiga hta kalang mi bai mu lu nga ai.

Karai Kasang gaw anhte ra ai chyeju ni hpe jaw ya mai ai hta sha n-ga tengman ai lam hta hkawm sa lu na matu lam madun ya mai hpe myit hta dum shai let tinang lu ai ahkying aten hpe amu bungli galaw ai hta sha n-ga akyu hpyi ai lam ni hta mung jai lang lu na matu shakut shaja sa wa ga.

MADU YESU HTA KAM SHAMYET NGA GA

Anhte a prat hta mayak jam jau, yak hkak ai lam, chyam dinglik hkrum ai, ning dat ai lam amyu myu e bung adawt ai hpe hkrum sha yu na re. Dai mayak manghkang jam jau hkrum wa ai ten (lup mat wa ai) hta anhte kaning rai na ga ta?

Shawng nnan, dai ru yak jam jau lam (nbung laru) hpe chye na ahkyak ai. Nbung laru kade daram kaba ai hpe n chye jang hkrit tsang ai lam gaw htam lahkawng rai na re. Dai majaw lamu marang shiga dap ni Nbung laru ni hpe mying shamying jaw ai rai ang sai. Mying shamying ngut sai hpang hkyen lajang ai lam galaw wa sai. Dai hte maren, anhte a mayak manghkang ni hpe magam bungli hta byin ai mayak, kun dinghku hta byin ai, ngai a myit jasat majaw byin ai, ngai a shut ai lam, dai zawn rai nna chye hkap la na ahkyak ai. Shaloi she kaning rai shawng nnan galaw sa wa na chye lu na re.

Lahkawng ngu na hta, Madu Yesu hpe matsing nna hkap la na ra ai. Anhte ni kade byin tai ai rai tim hkaleng kaba hpe n dang adawt na re. Adawt tim kaman li la sha rai na re. Hpan Madu anhte hpe sa du garum la lu na matu saw shaga ga. Anhte a shakut shaja ai lam ni hpe Madu hta ap nawng let Madu Karai hpe kam shamyet nga ga. Madu gaw anhte hpe kabai da na n rai, hkrat sum shangun na n rai. 

Masum ngu na hta; makam masham hte n den ja myit rawng ga. Karai Kasang hpe N kam sham ai sha tinang a n-gun atsam hpe kam ai rai yang anhte hkrat sum ai de du na re. Aten na na hkam lu na n rai. Madu Yesu hta anhte myit machyu nga na ahkyak ai. Anhte dang di galaw lu ai lam ni law law hpe awngdang hkra galaw lu nna kabu myit pyaw ai hte kalang lang gum rawng ai myit ni byin pru na nhten. Shaloi dai amu magam ni awngdang hkra garum chyeju jaw ai Madu Karai hpe anhte malap kau chye ai. Shi Madu hte ni htep na malai grau grau tsan wa chye ai. Anhte a prat hpe nden ja ai hte hkawm sa nna Madu Karai hpe myit machyu da ai marang e awngdang lu na lam chyum ga anhte hpe shadum ya nga ai.

Sawn sumru yu mai ai lam; Nang/Ngai a prat hta n dang kau lu ai Nbung laru/ hka leng kaba ni nga lai wa sai kun? Dai aten hta anhte a Hkali (Prat) hta Madu Yesu hpe tam mu ai kun? Shi Madu e jaw ya ai simsa ngwi pyaw ai hpe hkam sha lu sai kun?

PRANWAN LADAW (19) LABAN SHANI NA CHYUM LAIKA

PRANWAN LADAW HTA LABAN (19)

13th August, 2017

CHYUM MUNGGA DAW 1

1 Hkawhkam 19:9-13

Ya hti na gaw Hkawhkam laika langai hta na rai nga ai.

Elia gaw lungpu langai mi de du nna dai hta shingbyi nga ai. Madu a ga shi kaw du nna, Elia e, nang e hpa galaw nga nta? ngu san wu ai. Elia gaw, Ngai wa, zawnawng zawwa, up ai Karai Kasang Madu a lam grai myit kahtet ni ai. Israela kashu ni, na a ga shaka kau da nna Na a tawn hkungri ni hpe run kau ai hte, Na a myihtoi ni hpe sat kau ma ai. Ngai chyu sha hti nga ni ai. Ngai hpe mung sat kau na tam nga ma ai, nga ai.

Madu gaw, pru u, dai bum ntsa e, Madu man e tsap nga u, ngu wu ai. Madu lai wa nna, grai ja ai nbung gaw, bum ni hpe jahka kau nna, lunghkrung ni hpe agrawp kau mu timung, Madu gaw dai nbung laru hta lawm nga ai n rai. Laru wai nna, nnang nawn nawn ai. Raitim Madu dai hta n lawm ai. Nnang nawn hpang wan grung wa ai. Madu dai wan hta mung lawm ai n rai. 

Wan hpang, angwisha nga ai nsen shara nga ai. Elia dai na jang, tinang myiman hpe hpajawng hte lawai magap nhtawm, lungpu mahka e sa pru tsap nga ai. 

Ya hti ai gaw Karai Kasang a mungga rai nga ai.

CHYUM MUNGGA DAW 2

2Roma 9:1-5

Ya hti na gaw Roma ni kaw San Pawlu shagun dat ai laika hta na rai nga ai. 

Hkristu hte tengman ai ga ngai tsun nngai; n masu nngai. Chyoi Pra ai Wenyi hte matut nga ai nye kraw myit ngai hpe hkam dahka jaw nga ai. 

Ngai jahpaw tsun mayu ai mahtang, Nye amyu hpu nau ni gaw Isralea masha rai nga ma ai. Kasha yin la ai akyu, hpung shingkang, ga shaka, tara jaw ai shingran, daw jau ai lam, ga ndat ni, shanhte lu ma ai. Ji wa ni gaw, shanhte a ji wa ni rai nga ma ai. Masha labau hku gawn yang, Hkristu gaw shanhte kaw na rai nga ai. Shi gaw yawng mayawng a ntsa e htani htana a nga nga ai Karai Kasang rai nga ai. 

Ndai lam hta hpu nau ni na htat ai majaw, yawn hkyen kaba atsu atsam tut nye kraw e hkam sha nga nngai. Hkristu hte hka nna dagam dala wa hkrum hkra pyi ngai hpu nau ni a myihpaw lam hta teng sha shakut ra da we ai. Amen

Ya hti ai gaw Karai Kasang a mungga rai nga ai.

KABU GARA SHIGA

Mahte 14:22-33

Ya hti na gaw Mahte a laika hta na Kabu Gara Shiga rai nga ai. 

Yesu gaw shawa masha ni hpe garai nshabawn dat yang, sape ni hpe li shajawn nna, shi shawng e wora hkran de rap mat wa shangun wu ai. Shawa masha ni hpe shabawn dat kau nhtawm, akyu hpyi na matu bum ntsa de shi hkrai lung wa ai. Shi chyu sha atsim e dai kaw hti nga ai. Hkarang kaw nna li mung tsawmra gang mat wa sai. Nbung nsun ai majaw hkaleng li hpe kayat shadang nga ai. Shana ahkying ladaw mali hta e, shanhte hpang de nawng ntsa lam hku hkawm let hkan nang ai. Nawng ntsa e shi hkawm ai hpe sape ni mu yang, kajawng nna, dai minla rai nga ai, nga nna hkrit gari ai hte marawn ma ai. Shaloi Yesu gaw, myit apyaw sha nga mu, ngai she rai nngai. Hkum hkrit myit, ngu tsun mu ai. Petru mahtang htan nna, Madu e, Nang rai n yang gaw, hka ntsa hku Nang kaw sa du lu na, ngai hpe shaga la e, ngu wu ai. Yesu gaw , sa rit, ngu wu ai. Petru li hta na yu nna, hka ntsa hkawm let, Yesu hpang de sa wa ai. Raitim nbung hpe mu jang, shi hkrit nga ai. Dai rai hka hta lup wa ai hte, shi gaw, Madu e, ngai hpe sai la e, ngu jahtau wu ai.

Yesu gaw lata ladawn nna, shi hpe dun la let, ai n kam ai wa e, hpa majaw nang kam shut nga nta! ngu tsun wu ai. Shan li hta shang jang nbung num mat wa ai. Li kata nga ai ni gaw shi hpe nawku nna, Nang gaw Karai Kasang a Kasha kaja teng rai nga ndai, nga ma ai.

Ya hti ai gaw Madu a Kabu Gara shiga rai nga ai.

YESU HPUNG SHINGKANG MADUN AI POI SHANI NA MUNGGA

Karai Kasang gaw mahkra dang chye ai, mahkra hpe dang di dang dep ai wa re ai majaw Shi Madu jaw ya mai ai ngwi pyaw simsa ai, shimlum ai lam gaw arawng sadang nga ai, atsam marai hte hpring ai, ndang tsun hkra lu su nga mai ai masha ni jaw ya lu ai hta tsun ndang hkra kaba la nga ai. Hpan da hkrum ai shinggyim masha ni gaw hpan wa ningsang Karai Kasang a man e kaja wa sha kaji kadun ai ni rai na re.

Madu Yesu ahpraw nsam galai nna Kawa Karai Kasang tsawra ai Kasha re ngu mu chye la ai hte shanhte a matu ngwi pyaw simsa ai hte shimlum ai mahkrum madup lu la ai gaw Kasa ni a matu gaw ahkyak ai hte manu dan la nga ai. Ndai mahkrum madup hpe gaw shanhte ni Madu Yesu hte rau shaning shachyaw nna nga sa mat wa ai hpang lu la ai chyeju langai rai nga ai. 

Karai Kasang gaw anhte langai hpra hpe lam amyu myu hku nna shaga la ai rai yang Kasa ni zawn Karai Kasang hpe kamhpa let Shi a tengman ai lam hta hkawm sa nna Shi Madu jaw ya ai ngwi pyaw simsa ai hte shim lum ai lam hta prat tup nga sa lu u ga.