PRANWAN LADAW (13) LABAN SHANI NA MUNGGA

“Tinang a wudang n-hpai ai sha nye a hpang hkan nang ai wa gaw ngai hte n-ging dan nga ai” ngu ai chyum mungga gaw shani shagu na anhte a mabyin masa ni hpe shadum jahprang ya nga ai. Tinang du mayu ai, lu mayu ai, byin mayu ai hpe tinang a n-gun astam hte sha lu la mai nga ai. 

Madu Yesu gaw tinang a akyu ara a matu sha nrai, manang ni a akyu ara ni a matu du hkra a-gun atsam dat na matu galoi mung shadum jahprang ya nga ai. Hkristan wuhpung wuhpung hta manang ni a matu gloi mung myit shalawm ya ra nga ai. 

Tinang a htingbu wa hpe garum shingtau na matu ngu nna shakut shaja sa ai lam hta shawng nnan tinang a matu tinang lit la chye ai hte hpang ra na re. Tinang a hkum hpe tinang kawn lajang lu ai, tinang ra ai lam ni hpe tinang tam la lu ai, tinang a lagaw hta tinang tsap lu ai ahkying aten du wa ai shaloi mung manang wa hpe garum shingtau lu na matu shakut shaja lu u ga.

N-NI N-KRI HKRUN LAM

Dai ni na kabu gara shiga hta na saw shaga ai lam ni hpe ga gin chyum yang, “nni nkri” hkam sharang ai ngu lu na nhten. Kabu gara shiga hta na kasa Mahte ka da ai hpe yu yang, Sape, kasa ni tai mayu ai, Madu Yesu a hpang hkan nang na ngu yang, mayak jam jau ni hpe (nni nkri hkrun lam) hkrum ra na re lam, na la lu sa ga ai. Madu Yesu a ‘Lam’ hta hkan nang ai ngu ai gaw, myit sharawng awng ai hte jahtum du hkra hkan nang ai, ngu ai rai sai. Dai a matu lu la ai gaw, hkum zup shim lum ai lam hpe lu la ai rai sai.

Kasa Pawlu shadum ya ai lam gaw, kashin kamun hkam la ai marang e, anhte hta du wa ai byin yang nan rai nga ai, nga ai. Kashin kamun hkam la ai marang e, tingkyeng myit ni yawng si mat wa nna, Madu Yesu galaw lai wa sai zawn, mai kaja ai chyeju a matu anhte galaw ai lam nan rai sai. Dai zawn re ai ting kyeng n myit ai lam hpe dai ni hti ai mungga daw (I) hta na hpawmi jan hta mu lu sai. Elisha a ntsa shi galaw daw jau ai lam gaw akyu kumhpa lu la na matu n rai nga ai. Rai timung, shi lu la ai gaw, shi myit mada da ai hta grau dawn jan ai lam rai sai.

Dai ni jang, anhte mung tingkyeng a matu n re ai sha amu magam galaw lu na kun?

PRANWAN LADAW (13) LABAN SHANI NA CHYUM LAIKA

PRANWAN LADAW HTA LABAN (13)

2nd, July, 2017

CHYUM MUNGGA DAW 1

2 Hkawhkam 4:8-11.14-16

Ya hti na gaw Hkawhkam laika lahkawng hta na rai nga ai.

Lani mi, Elisha gaw Shunem mare de lai sa wa sai. Dai yang arawng lu ai numsha langai mi nga ai. Shi Elisha hpe hkap galaw daw wu ai. Elisha galoimung dai lam hku lai wa yang, dai nta hta shang manam nga ga ai. Dai num madu wa hpe tsun ai, ndai hku lai lai re ai wa gaw Karai Kasang a chyoi pra ai masha rai nga ai hpe ngai dum se ai. Ntsa htap hta gawk kaji langai galaw nna, shi a matu yupku, shaku, lahkum hte pyending ni tawn da ga. Shi an kaw shang manam yang, dai gawk hta shang yup mai ai, ngu wu ai. Kaja wa dai lam hku bai lai ai shani e, shi dai gawk hta shang nna yup nga ai.

Dai rai Elisha gaw, shangun ma Gehazi hpe, shi a matu hpa galaw sana ga ta? ngu wu ai. Gehazi gaw, shi kasha n lu nga ai. Madu wa mung dingla wa sai, ngu wu ai. Shaloi Elisha gaw, bai shaga u, ngu wu yang, num jan gaw chyinghka lam e tsap nga ai. Myihtoi wa gaw, nang htaning ndai aten hta e, shadang sha ba na rin dai, ngu wu ai. Numsha gaw, Nye madu, Karai Kasang a masha wa e, na nchyang jan hpe masu ga hkum tsun et, ngu wu ai.

Dai numsha na-um nasin wa nna, ladu hkrum jang, Elisha tsun ai hte maren shadang sha shangai wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 6:3-4.8-11

Ya hti na gaw Roma ni kaw San Pawlu shagun dat ai laika hta na rai nga ai.

Yesu Hkristu hta kashin kamun hkam la ai anhte nlang hte gaw, shi a si hkam ai hta kashin kamun hkam nga ga ai hpe, nanhte n chye nga myit ni? Dai rai, Hkristu gaw Kawa a hpung shingkang hte si ai ni kaw na hkrung sharawt la hkrum wu ai zawn, anhte mung asak nnan hta e rawt hkawm wa lu hkra, dai kashin kamun hkam ai hta e, anhte si hkam nna shi hte rau lup makoi ai hkrum saga ai.

Si ai ni kaw na hkrung sharawt la hkrum ai Hkristu gaw, galoi bai n si lu na hte, si hkrung si htan shi hpe galoi n madu lu na nu ai, anhte chye ga ai. Hkristu hte rau si hkam yang gaw anhte shi hte rau mung hkrung nga lu na ga ai, ngu nna anhte kam sham nga ga ai. Shi a si hkam ai gaw mara a matu kalang sha mi si hkam ai rai nga ai. Bai hkrung rawt ai chyawm gaw, Karai Kasang rau hkrung nga ai lam rai nga ai.

Nanhte mung mara hte si hka mat ai ni rai nga manit dai rai nna, Hkristu Yesu hta e, Karai Kasang a man e hkrung nga ai ni rai nga ga ai, ngu nna myit la mu.

Ya hti ai gaw Karai Kasang a mungga rai nga ai.

KABU GARA SHIGA

Mahte 10:37-42

Ya hti na gaw Mahte a laika hta na Kabu Gara Shiga rai nga ai.

Kadai mung ngai hpe tsawra ai hta, kanu kawa hpe grau nna tsawra ai wa gaw, ngai hte n ging dan nga ai. Ngai hpe tsawra ai hta, shayi shadang sha hpe grau tsawra ai wa mung, ngai hte n ging dan nga ai. Tinang udang hpai let Nye a hpang n hkan nang ai wa gaw, ngai hte n gying dan nga ai. Tinang asak lahpawt dum ai wa asak sum na ra ai. Nye a majaw asak jasum ai wa chyawm gaw asak mu lu na ru ai.

Nanhte hpe hkap hkalum la ai wa, ngai hpe hkap hkalum la ai. Ngai hpe hkap hkalum la ai wa mung, ngai hpe shangun dat ai wa hpe hkap hkalum la ai rai nga ai. Myihtoi a myiman hpe tau yu nna, myihtoi hpe hkap hkalum la ai wa gaw, myihtoi a shabrai lu la na ru ai. Dinghpring ai wa a myiman hpe tau yu nna, dinghpring ai wa hpe hkap hkalum la ai wa gaw, dinghpring ai wa a shabrai lu la na ru ai. Masha langai ngai gaw sape a myiman hpe tau nna, ndai ma kaji langai ngai hpe ntsin katsi htinggap mi sha jaw wu yang, dai wa shi a shabrai n lu la na n rai, nga nna ngai nanhte hpe teng teng tsun nngai,ngu wu ai.

Ya hti ai gaw Madu a Kabu Gara Shiga rai nga ai.

YESU A SALUM NINGSANG POI SHANI NA MUNGGA

Manang wa hpe manawn masham ai myit gaw anhte hkum ngau shagu hta rawng chye nga ai. Manawn masham ai myit ngu ai shaloi manang wa hta grau lu mayu chye mayu, byin mayu ai. Manang wa tinang hta grau grau rawt jat wa jang ndawng n-yawt ai myit ni byin pru chye ai. Dai rai yang anhte a myit masin ni gaw manang wa kaning rai byin nga ai, kaning re ai amu hpe galaw taw nga ai sha n-ga manang wa n-galaw ai ngu ai hpe ten tup yu nna tinang galaw ra ai hpe galaw na matu hprai mat chye nga ai.

Madu Yesu a Salum Ningsang poi hpe galaw ai shaloi Madu Yesu gaw Kawa Karai Kasang a myit ra ai lam hpe sha myit maju jung nna mai kaja ai lam ni hpe chyu nhprai n-yet ai sha galaw lai wa sai. Dai hte maren, Shi a shadawn ndang ai tsawra myit gaw kaja ai, nkaja ai masha hkum ngau shagu hpe maren mara tsawra lu nga ai.

Dai rai yang Madu Yesu a kasi hpe la nna tinang galaw ging ai amu bungli ni gaw manang wa galaw ai, n-galaw ai ngu ai hta madung nda ai sha tatut galaw sa lu na matu hte makau grup yin na htingbu ni hpe mung kaja ai nkaja nga nna n-gin hka ai sha maren mara rai tsawra lu na matu shakut shaja sa wa ga.

HKI BA LA NNA LIT LI GUN AI NI NGAI KAW WA MARIT

“Hki ba la nna lit li gun ai ni yawng hte e, ngai kaw wa ma rit, ngai nanhte hpe ban sa shangun na nngai” 

Eugene Hamilton ngu ai, grai myit su ai hte Jau tai na matu shakut ai ramma marai mi nga ai. Shi gaw Nyan kaja ai jawngma, yawng hte tsun shaga chye ai wa, grai matsan dum ai hte myit tau ya chye ai wa, makam masham ngang kang ai hte jau tai lu na matu tsep kawp ap nawng let shakut nga ai. Dai daram shakut nga ai shi hta hkrit tsang ra dik ai mawng ana (cancer) byin wa sai. Dai mawng ana hpe matsan mayan hkam sha let prat a hpang jahtum aten mung grai ni wa sai. Wasarabyin Yawhan Pawlu II a lata kaw na laklai dik ai, masa hte shai ai rai tim, Jau aya hkam la lu sai. Dai hpang hkying hkum masum hta shi asak htum mat sai. Shi gaw htani htana jau tai wa lu sai. 

Ndai Eugene Hamilton a mabyin hpe yu yang, Chyoi pra ai Karai Kasang a mau hpa magam bungli gaw n bung la ai, mauhpa re ai, yu maya masha marai mi a shakut shaja ai hta mung shang lawm nga ai hpe madun dan sai. Mawng ana a majaw machyi kaba hkrum sha nga ai Eugene gaw Madu kaw nna tsawra matsan dum shamai shatsai ya na matu matut manoi akyu hpyi shakut sai. Dai machyi hkam sha ai gaw, Madu e shaga la hkrum nna jau tai mayu ai shi a san seng ai myit masin hpe dang kau ai lam n nga ai. Karai Kasang ra sharawng ai hpe hkan galaw mayu ai shi a myit masa gaw, machyi hkam sha nga ai hpe hkam sharang na atsam jaw ya sai.

Dai ni kabu gara shiga hta na la ai Madu Yesu a mungga ni gaw Eugene a matu n-gun atsam tai wa sai. Dai Madu a mungga ni gaw, machyi hkam sha ai, ruyak kyin dut hkrum sha ai, myit daw myit hten chye ai anhte yawng a matu mung simsa lam lu na, kam hpa mai ai Madu a saw shaga ga rai nga sai. Ma kasha ni Madu Yesu hta kam hpa manoi manat ai zawn anhte mung kam sham na ra nga ai.

“Hki ba la nna lit li gun ai ni yawng hte e, ngai kaw wa ma rit, ngai nanhte hpe ban sa shangun na nngai” nga ai Madu a shalan shabran ga gaw anhte yawng a matu n-gun atsam kaba rai wa sai rai! Anhte yawng Karai Kasang a kashu kasha majing zawn atai nga let Shi Madu hta grau grau kam shamyet let sak hkrung hkawm sa nga ga law!

Sawn sumru yu mai ai lam: Karai Kasang myit ra sharawng ai hpe kade daram yak hkak jam jau hkrum ai rai tim byin tai lu hkra shakut shaja na myit dum lu sai kun?

YESU A SALUM NINGSANG POI SHANI NA CHYUM LAIKA

YESU A SALUM NINGSANG POI 

25th June, 2017 

CHYUM MUNGGA DAW 1 

Tara Jahpang 7:6-11

Ya hti na gaw Tara Jahprang Laika hta na rai nga ai. 

6Mawshe gaw Israela amyu ting hpe shaga la nna shanhte hpe tsun mu ai gaw: Nang gaw na a Madu Karai Kasang a matu chyoi 

pra ai amyu rai nga ndai; Na Madu Karai Kasang madu gying ai 

amyu nang hpe shatai na matu, ga ntsa ting na masha amyu yawng hta na, shi nang hpe lata la nit dai: 7Nanhte amyu kaga ni hta grau law ai majaw, Madu gaw nang hpe n ja nna, lata la ndai n rai; amyu kaga hta nanhte grau kaji nga myit dai.8Madu nanhte hpe tsawra ai majaw mung, nji nwa ni hpe dagam da ai ga shaka shatup mayu ai majaw mung, nang mayam tai ai, Egutu mung a hkawhkam Hpara-u a lata hta na, shi n-gun ja ai lata hte nang hpe hkye la nna, woi wa nit dai. 9Dai rai nna, na Madu Karai Kasang gaw, Karai Kasang nan rai nga ai dum chye nga mu; shi gaw kangka re ai Karai Wa rai nga nna, shi hpe tsawra ai hte, shi a hkang da ai ga hkan shatup ai ni hpe prat hkying mun du hkra ga shaka shagrin da nna, matsan dum ai myit rawng ai Karai Wa rai nga ai; 10rai timung, shi hpe ndawng n yawt ai ni hpe jahten kau na matu, shanhte a hkum hpe nan ari dan jaw ai Karai Wa rai nga ai. 11Dai re ai majaw, ngai nang hpe tawn da ya ai hkang da ai ga, tara lam ni hte matsun maroi ga mahkra hpe sadi sahka ai hte hkan shatup lu na ndai. 

Ya hti ai gaw Karai Kasang a mungga rai nga ai.

CHYUM MUNGGA DAW 2 

1 Yawhan 4:7-16

Ya hti na gaw Yawhan a shagun dat ai laika langai hta na rai nga ai. 

7Ngai tsawra ai shu sha ni e, anhte shada da tsaw ra nga ga: tsawra ai myit Karai Kasang kaw na rai nga ai majaw, tsawra ai myit rawng ai wa kadai rai ti mung, Karai Kasang a Kasha rai nga 

ai hte, Karai Kasang hpe chye chyang nga ai. 8Tsawra ai myit n rawng ai wa gaw, Karai Kasang a lam n chye wu ai; kaning rai nme law, Karai Kasang gaw tsawra ai myit madung rai nga ai. 

9Anhte gaw shi a Kasha a marang e ahkrung nga mali ga Karai Kasang gaw shi a Kasha hpe mungkan ga de shangun dat ai hku nna, shi a tsawra ai myit anhte hpe madun dan nu ai;10 anhte gaw Karai Kasang hpe tsawra ai lam tsun mayu ai n rai; Shi hkum nan anhte hpe tsawra nga ai hte, anhte a shut hpyit mara a matu gawng malai hkungga tai u ga, Karai Kasang Shi a Kasha hpe shangun dat ai lam tsun mayu nngai; dai gaw tsawra ai lam madung rai nga ai. 

11Tsawra ai jinghku ni e, Karai Kasang gaw anhte hpe ndai hte wa tsawra manit ai rai yang gaw, anhte shada da tsawra ai lam hkan shatup ra ga ai. 12Masha kadai rai timung Karai Kasang hpe mu yu sai n rai; anhte shada da tsaw ra nga yang gaw, Karai Kasang anhte hta e rawng nga nna, Shi a tsawra ai myit gaw anhte hta hkum tsup wa lu ai. 13Karai Kasang Shi a Wenyi anhte hpe jaw da mi ai majaw, Shi hta e anhte nga nga ai hte, Shi mung anhte hta e nga nga ai hpe anhte chye nga ga ai. 

14Mungkan ga a hkye la ai Madu tai na matu Kawa gaw dai Kasha hpe shangun ai lam, anhte mu lu sai hte maren, sakse hkam ya nga ga. 15Yesu Hkristu gaw Karai Kasang a Kasha rai nga ai, nga nna yin la ai wa kadai hta rai ti mung, Karai Kasang a nga nga ai rai nna, Shi mung Karai Kasang hta e a nga nga ai. 16Karai Kasang anhte hpe nan teng teng tsawra da ai hpe anhte chye nga ai hte kam sham nga ga ai. Karai Kasang gaw tsawra ai myit rai nga ai: tsawra ai lam hkan nang let, nga sa ai wa gaw Karai Kasang hta e a nga nga ai rai nna, Karai Kasang mung shi hta e a nga nga ai. 

Ya hti ai gaw Karai Kasang a mungga rai nga ai. 

KABU GARA SHIGA 

Mahte 11:25-30

Ya hti na gaw Mahte a laika hta na Kabu Gara Shiga rai nga ai. 

25Lani mi hta Yesu Madu tsun wu ai gaw: sumsing lamu hte ginding aga a madu, Wa e, hpaji byeng-ya rawng ai ni hte, myit kung hpan ai ni kaw na ndai lam Nang makoi magap da nhtawm, myit n kaba ai ni hpe madun dan ndai majaw, ngai Nang hpe chyeju dum nngai. 26Rai sa, Wa e, dai gaw Nang ra sharawng ai hku rai nga ai. 

27Nye Wa gaw yawng mayawng hte hpe ngai kaw ap ya ni ai; Wa hta kaga Kasha hpe kadai mung n chye lu ai; dai kasha hte kasha jahtoi ya mayu ai masha hta kaga, Wa hpe mung kadai n chye lu ai.28Hki ba la nna, lit li gun ai ni yawng hte e, ngai kaw wa marit; ngai nanhte hpe ban sa shangun na we ai. 29Ngai gaw sumnung shingdi la ai hte, myit grit nem nga nngai majaw, nye a kandang hpe hpai mu, nye a lam sharin la mu; shaloi nanhte a myit masin ban sa ai hkrun na marin dai. 30Kaning rai nme nga yang, Nye a kandang hpai loi ai hte, Nye a lit mung tsang nga li ai. 

Ya hti ai gaw Madu a Kabu Gara Shiga rai nga ai.

MADU YESU A HKUM HTE SAI POI SHANI NA MUNGGA

“Tinang lusha ai hte maren, tinang byin wa na re,” ngu ai English ga malai nga ai hte maren lama na tinang a hkum hkrang hte nhtuk ai malu masha ni hpe lusha ai rai yang tinang hpe teng sha dingbai dingna jaw na re. Dai hte maren hkam ja ai lam hte htuk ai malu masha hpe lusha ai rai yang mai hkam kaja ai chyeju hpe teng sha lu la na re.

Madu Yesu a Hkum hte Sai poi hpe galaw ai nhtoi hta anhte myit sawn sumru mai ai lam langai mi gaw anhte a ahkaw ahkang kaba rai nga ai Madu Yesu a Hkum hte Sai hpe Misa hkungga nawng ya ai hta hkam la lu ga ai. Madu Yesu a Hkum hte Sai hpe hkam la lu ai hta grau kaba ai chyeju kaga nnga na sai.

Tinang a myit masin hkum hkrang wenyi hpe jasan jaseng let Chyoi Pra Hkum hpe hkam la ai rai yang anhte hkam la ai Madu Yesu gaw anhte a hkum sai shan teng sha tai wa na re. Dai rai yang Chyoi Pra a Hkum hpe gingdan ai hte hkam la lu nna Shi Madu hte bungpre ai kashu kasha ni byin tai wa lu na matu shakut shaja sa wa ga.

HTANI HTANA ASAK A MATU LUSHA

Shinggyim masha ni a labau hta Asak galu na matu nga nna tsi kaja, malu masha kaja ni hpe tam sawk sagawn let sha lai wa sai. Korea ginseng, Nampan pu kaw nna lu la ai Pollen B, asak galu, n-gun rawng na re nga nna sung lang nga ga ai.

Dai ni na kabu gara shiga hta Madu Yesu gaw htani htana asak lu la na matu Shi a hkum hte Sai hpe lu sha na matu saw shaga nga ai. Mungga gaw masha tai wa nna nni nkri yu bak hkrum, si hkam ai hte bai hkrung rawt wa sai. Dai hkrung rawt sai Hkristu gaw chyoipra hkum Sakramentu hta teng teng rawng nga ai. Dai hpe hkam la lu ai (sha ai) anhte ni gaw Shi Madu hte bung na ra nga ai. Dai Madu a hkum hte Sai hpe hkam la lu na matu ging dan hkra anhte shakut, lajang da ra nga ga ai. Hkristu a Hkum hte Sai hpe hkam la nna, 

chyeju lu la ai marang e Shi Madu a ga ndat ni hpe hkan shadik na n-gun atsam mung lu na rai nga ai. Shaloi she Karai Kasang hpe tsawra myit grau rawng wa nna htingbu wa hpe mung daw jau lu na rai nga ai.

Anhte gaw Hkristu a Hkum hte Sai hpe aten law law hta hkam la lu ai rai tim, hkrak tup manu shadan na matu n dum shai ai aten ni nga lai wa na sai. Hkristan marai mi a prat hta e Hkristu a daw sha poi hta hpring tsup hkra shang lawm na gaw ahkyak dik htum ai lam re hpe n dum sawn kau chye ga ai. “Anhte ahkyep alep nga ai muk gaw, Hkristu a hkum hkrang hte kanawn mazum ai lam rai nga ai, n rai ni? Nga nna san Pawlu ga san san nga ai. E-mau kahtawng de lung wa ai kasa marai lahkawng zawn, anhte mung muk ahkyep alep ai hta Hkristu hpe dum chye lu ma ai. Dai Muk ahkyep ai hta anhte a matu Shi a hkum hkrang hpe jaw kau ai Hkristu hpe chyu sha mung n rai, anhte hkum nan mung shang lawm let dai Madu a sak jaw ap nawng ai Tsawra myit hta shang lawm ra nga ai. Hkristu a daw sha poi hta hpring tsup ai hte shang lawm lu na matu gaw, gum hkawng na matu n rai ai sha, kaga masha ni a matu tinang a prat hpe ap nawng mayu ai myit jasat ra nga ai.

Ndai poi nhtoi hta tinang hkum hpe san na gasan ni mung nga ai. “Chyoipra hkum hpe hkam la ai gaw ngai a matu hpa lachyum pru a ta? Yawng a shawng nnan hkam la ai shani na zawn dai Chyoipra hkum hpe manu shadan nga ai kun? Dai Hkristu Madu a kumhpa hpe kabu gara myit katu ai hte bai hkam la lu na matu tinang hkum hpe kaning rai lajang da lu na rai ta? 

Yawng a shawng nnan lang Hkristu hkum hpe mu la ai zawn dai hpe myit sawn sumru yu na mai nga ai. Du na ra ai Nhtoi ni hta, Hkristu a kumhpa rai nga ai Chyoipra ai hkum a matu 

chyeju dum ai akyu hpyi ga jat bang da let akyu hpyi shakawn ga!!

Sawn sumru yu mai ai lam: Ya ngai a sak hkrung lam gaw, Chyoi pra hkum sakramentu hpe hkam la ai akyu chyeju hta hkawm sa nga ai ngu tsun lu ai kun? Tsun mayu ai gaw, ra kadawn nga ai masha ni hpe tsawra myit kaba hte garum akyu jaw taw nga ai prat hta hkawm sa ai ngu mu lu ai kun?

YESU A HKUM HTE SAI POI SHANI NA CHYUM LAIKA

YESU A HKUM HTE SAI POI

18th June, 2017

CHYUM MUNGGA DAW 1

Tara Jahprang Laika 8:2-3,14-16

Ya hti na gaw Tara Jahprang Laika hta na rai nga ai.

Mawshe gaw Israela amyu masha ni yawng hte hpe tsun mu ai gaw; nanhte a Madu Karai Kasang nanhte hpe shagrit shanem nna, shi a hkang da ai ga hpe hkan mayu ai myit, rawng ai, n rawng ai chye lu hkra lai mat wa sai mali shi ning tup, nam mali hkan e nanhte hpe woi hkawm ai lam hpe dum nga mu. Shinggyim masha muk hte sha hkrung nga lu ai n rai, Karai Kasang a n-gup hta na pru mapru hte hkrung nga lu ai gaw, nanhte chye lu na matu, shi nanhte hpe shagrit shanem nna, kaw si jahkrum ai hpang, nanhte n mu yu ai, nji nwa ni mung n mu yu ai manna muk hte nanhte hpe bau ya manit dai.

Egutu mung e mayam tai ai nta kaw na nanhte hpe woi shaw ai Madu Karai Kasang hpe hkum malap kau myit. Shi gaw wan lapu hte n-gaw gawk sawng ai hte, lu na hka kata nna hpang gara hkrum ai, nam mali kaba a ka-ang hku, nanhte hpe woi wa nu ai. Dai Madu gaw grai ja la ai lunghkrung hta na, nanhte lu na hka shapraw jaw nna, nanhte hpe bau maka ai hpe myit dum nga mu.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Korinhtu 10:16-17

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, anhte a chyeju dum ai gawm gaw, Hkristu a Sai hte jawm pawng ai lam rai nga ai, n rai ni? anhte ahkyep garan nga ai muk gaw, Hkristu a Hkum hkrang hte jawm pawng ai lam rai nga ai n rai ni? Kaning rai nme law, anhte gaw marai law law rai nga ti mung, dai muk tawng mahtang langai sha rai nga ai. Shing rai, anhte yawng muk tawng langai sha hpe jawm sha ai majaw, anhte gaw hkum hkrang langai sha rai nga ga ai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 6:51-58

Ya hti na gaw Yawhan a laika hta na Kabu Gara Shiga rai nga ai.

Yesu gaw Yuda masha ni hpe tsun mu ai gaw; Ngai gaw Sumsing lamu de na yu wa ai, hkrung ai muk rai nga nngai: muk ndai sha ai wa kadai mung, htani htana ahkrung nga na ra ai; mungkan ga asak hkrung nga na matu, ngai jaw ai muk chyawm gaw Nye a Shan rai nga li ai, ngu nna tsun jang, Yuda masha ni gaw, ndai wa gaw kaning di nna anhte hpe Shi a ashan jaw sha lu na a ta? nga nna shada da tsun hkat ma ai. Yesu gaw, Ngai nanhte hpe kaja wa teng teng tsun made ga, Masha Kasha a Shan nanhte n sha, Shi a Asai hpe mung n lu yang gaw, nanhte hta asak n rawng lu ai. Nye Ashan sha ai hte, Nye a Asai lu ai wa gaw, htani htana asak lu la nu ai; dai wa hpe mung hpang jahtum na nhtoi hta Ngai bai sharawt la na we ai. Kaning rai nme law, Nye a Ashan gaw sha hpa majing rai nga li ai. Nye a Ashan sha ai hte Nye a Asai lu ai wa gaw, Ngai hta rawng nga ai; dai wa hta mung Ngai rawng nga nngai. 

Ahkrung nga ai Nye Wa gaw, Ngai hpe shangun dat ai rai nna, ngai gaw Wa a majaw hkrung nga nngai hte maren, Ngai hpe sha ai wa mung, Nye a majaw hkrung nga na ra ai. Ndai gaw sumsing lamu de nna yu wa ai muk rai nga ai; nji nwa ni sha ai muk zawn n rai: kaning rai nme law, shanhte yawng si mat masai. Ndai muk sha ai wa chyawm gaw htani htana ahkrung nga na ra ai ngu nna Yesu tsun wu ai.
Ya hti ai gaw Madu a Kabu Gara Shiga rai nga ai.

CHYOI PRA AI TRINITA POI SHANI NA MUNGGA

Karai Kasang gaw shinggyim masha ni hpe tsawra ai majaw Shi a Kasha hpe mungkan ga de shangun dat nna anhte hpe hkye hkrang la sai hta n-ga Chyoi Pra ai Wenyi Karai Kasang mung anhte hpe shani shana garum chye ju jaw ya nga ai re.

Kanu Kawa ni gaw tinang a kasha ni hpe tsun ndang hkra tsaw ra ai rai timmung, Kanu Kawa ni hpe kam ai, Kanu Kawa ni a ga hpe madat mara ai wa she dai tsawra myit hpe hkam sha lu na re.

Anhte a makam masham lam hta Karai Kasang gaw shi a kasha shingtai hpe mungkan masha ni hkye hkrang la hkrum na matu jaw ya sai Karai Kasang a tsawra myit gaw kaba nga ai. Raitim, ndai tsaw ra myit hpe hkam la lu ai ni gaw Karai Kasang hpe kam sham let Shi madu hpe tsaw nna, tara lam ni hpe hkan shatup lu ai ni re. Dai rai yang Karai Kasang a tara lam ni hpe hkan shadik ai hte kamsham myit rawt jat wa nna Karai Kasang a shadawn ndang a tsawra myit hpe chye la, hkam la lu u ga.