MADU YESU A HKUM HTE SAI POI SHANI NA MUNGGA

“Tinang lusha ai hte maren, tinang byin wa na re,” ngu ai English ga malai nga ai hte maren lama na tinang a hkum hkrang hte nhtuk ai malu masha ni hpe lusha ai rai yang tinang hpe teng sha dingbai dingna jaw na re. Dai hte maren hkam ja ai lam hte htuk ai malu masha hpe lusha ai rai yang mai hkam kaja ai chyeju hpe teng sha lu la na re.

Madu Yesu a Hkum hte Sai poi hpe galaw ai nhtoi hta anhte myit sawn sumru mai ai lam langai mi gaw anhte a ahkaw ahkang kaba rai nga ai Madu Yesu a Hkum hte Sai hpe Misa hkungga nawng ya ai hta hkam la lu ga ai. Madu Yesu a Hkum hte Sai hpe hkam la lu ai hta grau kaba ai chyeju kaga nnga na sai.

Tinang a myit masin hkum hkrang wenyi hpe jasan jaseng let Chyoi Pra Hkum hpe hkam la ai rai yang anhte hkam la ai Madu Yesu gaw anhte a hkum sai shan teng sha tai wa na re. Dai rai yang Chyoi Pra a Hkum hpe gingdan ai hte hkam la lu nna Shi Madu hte bungpre ai kashu kasha ni byin tai wa lu na matu shakut shaja sa wa ga.

HTANI HTANA ASAK A MATU LUSHA

Shinggyim masha ni a labau hta Asak galu na matu nga nna tsi kaja, malu masha kaja ni hpe tam sawk sagawn let sha lai wa sai. Korea ginseng, Nampan pu kaw nna lu la ai Pollen B, asak galu, n-gun rawng na re nga nna sung lang nga ga ai.

Dai ni na kabu gara shiga hta Madu Yesu gaw htani htana asak lu la na matu Shi a hkum hte Sai hpe lu sha na matu saw shaga nga ai. Mungga gaw masha tai wa nna nni nkri yu bak hkrum, si hkam ai hte bai hkrung rawt wa sai. Dai hkrung rawt sai Hkristu gaw chyoipra hkum Sakramentu hta teng teng rawng nga ai. Dai hpe hkam la lu ai (sha ai) anhte ni gaw Shi Madu hte bung na ra nga ai. Dai Madu a hkum hte Sai hpe hkam la lu na matu ging dan hkra anhte shakut, lajang da ra nga ga ai. Hkristu a Hkum hte Sai hpe hkam la nna, 

chyeju lu la ai marang e Shi Madu a ga ndat ni hpe hkan shadik na n-gun atsam mung lu na rai nga ai. Shaloi she Karai Kasang hpe tsawra myit grau rawng wa nna htingbu wa hpe mung daw jau lu na rai nga ai.

Anhte gaw Hkristu a Hkum hte Sai hpe aten law law hta hkam la lu ai rai tim, hkrak tup manu shadan na matu n dum shai ai aten ni nga lai wa na sai. Hkristan marai mi a prat hta e Hkristu a daw sha poi hta hpring tsup hkra shang lawm na gaw ahkyak dik htum ai lam re hpe n dum sawn kau chye ga ai. “Anhte ahkyep alep nga ai muk gaw, Hkristu a hkum hkrang hte kanawn mazum ai lam rai nga ai, n rai ni? Nga nna san Pawlu ga san san nga ai. E-mau kahtawng de lung wa ai kasa marai lahkawng zawn, anhte mung muk ahkyep alep ai hta Hkristu hpe dum chye lu ma ai. Dai Muk ahkyep ai hta anhte a matu Shi a hkum hkrang hpe jaw kau ai Hkristu hpe chyu sha mung n rai, anhte hkum nan mung shang lawm let dai Madu a sak jaw ap nawng ai Tsawra myit hta shang lawm ra nga ai. Hkristu a daw sha poi hta hpring tsup ai hte shang lawm lu na matu gaw, gum hkawng na matu n rai ai sha, kaga masha ni a matu tinang a prat hpe ap nawng mayu ai myit jasat ra nga ai.

Ndai poi nhtoi hta tinang hkum hpe san na gasan ni mung nga ai. “Chyoipra hkum hpe hkam la ai gaw ngai a matu hpa lachyum pru a ta? Yawng a shawng nnan hkam la ai shani na zawn dai Chyoipra hkum hpe manu shadan nga ai kun? Dai Hkristu Madu a kumhpa hpe kabu gara myit katu ai hte bai hkam la lu na matu tinang hkum hpe kaning rai lajang da lu na rai ta? 

Yawng a shawng nnan lang Hkristu hkum hpe mu la ai zawn dai hpe myit sawn sumru yu na mai nga ai. Du na ra ai Nhtoi ni hta, Hkristu a kumhpa rai nga ai Chyoipra ai hkum a matu 

chyeju dum ai akyu hpyi ga jat bang da let akyu hpyi shakawn ga!!

Sawn sumru yu mai ai lam: Ya ngai a sak hkrung lam gaw, Chyoi pra hkum sakramentu hpe hkam la ai akyu chyeju hta hkawm sa nga ai ngu tsun lu ai kun? Tsun mayu ai gaw, ra kadawn nga ai masha ni hpe tsawra myit kaba hte garum akyu jaw taw nga ai prat hta hkawm sa ai ngu mu lu ai kun?

YESU A HKUM HTE SAI POI SHANI NA CHYUM LAIKA

YESU A HKUM HTE SAI POI

18th June, 2017

CHYUM MUNGGA DAW 1

Tara Jahprang Laika 8:2-3,14-16

Ya hti na gaw Tara Jahprang Laika hta na rai nga ai.

Mawshe gaw Israela amyu masha ni yawng hte hpe tsun mu ai gaw; nanhte a Madu Karai Kasang nanhte hpe shagrit shanem nna, shi a hkang da ai ga hpe hkan mayu ai myit, rawng ai, n rawng ai chye lu hkra lai mat wa sai mali shi ning tup, nam mali hkan e nanhte hpe woi hkawm ai lam hpe dum nga mu. Shinggyim masha muk hte sha hkrung nga lu ai n rai, Karai Kasang a n-gup hta na pru mapru hte hkrung nga lu ai gaw, nanhte chye lu na matu, shi nanhte hpe shagrit shanem nna, kaw si jahkrum ai hpang, nanhte n mu yu ai, nji nwa ni mung n mu yu ai manna muk hte nanhte hpe bau ya manit dai.

Egutu mung e mayam tai ai nta kaw na nanhte hpe woi shaw ai Madu Karai Kasang hpe hkum malap kau myit. Shi gaw wan lapu hte n-gaw gawk sawng ai hte, lu na hka kata nna hpang gara hkrum ai, nam mali kaba a ka-ang hku, nanhte hpe woi wa nu ai. Dai Madu gaw grai ja la ai lunghkrung hta na, nanhte lu na hka shapraw jaw nna, nanhte hpe bau maka ai hpe myit dum nga mu.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Korinhtu 10:16-17

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, anhte a chyeju dum ai gawm gaw, Hkristu a Sai hte jawm pawng ai lam rai nga ai, n rai ni? anhte ahkyep garan nga ai muk gaw, Hkristu a Hkum hkrang hte jawm pawng ai lam rai nga ai n rai ni? Kaning rai nme law, anhte gaw marai law law rai nga ti mung, dai muk tawng mahtang langai sha rai nga ai. Shing rai, anhte yawng muk tawng langai sha hpe jawm sha ai majaw, anhte gaw hkum hkrang langai sha rai nga ga ai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 6:51-58

Ya hti na gaw Yawhan a laika hta na Kabu Gara Shiga rai nga ai.

Yesu gaw Yuda masha ni hpe tsun mu ai gaw; Ngai gaw Sumsing lamu de na yu wa ai, hkrung ai muk rai nga nngai: muk ndai sha ai wa kadai mung, htani htana ahkrung nga na ra ai; mungkan ga asak hkrung nga na matu, ngai jaw ai muk chyawm gaw Nye a Shan rai nga li ai, ngu nna tsun jang, Yuda masha ni gaw, ndai wa gaw kaning di nna anhte hpe Shi a ashan jaw sha lu na a ta? nga nna shada da tsun hkat ma ai. Yesu gaw, Ngai nanhte hpe kaja wa teng teng tsun made ga, Masha Kasha a Shan nanhte n sha, Shi a Asai hpe mung n lu yang gaw, nanhte hta asak n rawng lu ai. Nye Ashan sha ai hte, Nye a Asai lu ai wa gaw, htani htana asak lu la nu ai; dai wa hpe mung hpang jahtum na nhtoi hta Ngai bai sharawt la na we ai. Kaning rai nme law, Nye a Ashan gaw sha hpa majing rai nga li ai. Nye a Ashan sha ai hte Nye a Asai lu ai wa gaw, Ngai hta rawng nga ai; dai wa hta mung Ngai rawng nga nngai. 

Ahkrung nga ai Nye Wa gaw, Ngai hpe shangun dat ai rai nna, ngai gaw Wa a majaw hkrung nga nngai hte maren, Ngai hpe sha ai wa mung, Nye a majaw hkrung nga na ra ai. Ndai gaw sumsing lamu de nna yu wa ai muk rai nga ai; nji nwa ni sha ai muk zawn n rai: kaning rai nme law, shanhte yawng si mat masai. Ndai muk sha ai wa chyawm gaw htani htana ahkrung nga na ra ai ngu nna Yesu tsun wu ai.
Ya hti ai gaw Madu a Kabu Gara Shiga rai nga ai.

CHYOI PRA AI TRINITA POI SHANI NA MUNGGA

Karai Kasang gaw shinggyim masha ni hpe tsawra ai majaw Shi a Kasha hpe mungkan ga de shangun dat nna anhte hpe hkye hkrang la sai hta n-ga Chyoi Pra ai Wenyi Karai Kasang mung anhte hpe shani shana garum chye ju jaw ya nga ai re.

Kanu Kawa ni gaw tinang a kasha ni hpe tsun ndang hkra tsaw ra ai rai timmung, Kanu Kawa ni hpe kam ai, Kanu Kawa ni a ga hpe madat mara ai wa she dai tsawra myit hpe hkam sha lu na re.

Anhte a makam masham lam hta Karai Kasang gaw shi a kasha shingtai hpe mungkan masha ni hkye hkrang la hkrum na matu jaw ya sai Karai Kasang a tsawra myit gaw kaba nga ai. Raitim, ndai tsaw ra myit hpe hkam la lu ai ni gaw Karai Kasang hpe kam sham let Shi madu hpe tsaw nna, tara lam ni hpe hkan shatup lu ai ni re. Dai rai yang Karai Kasang a tara lam ni hpe hkan shadik ai hte kamsham myit rawt jat wa nna Karai Kasang a shadawn ndang a tsawra myit hpe chye la, hkam la lu u ga.

KAWA, KASHA, CHYOI PRA AI WENYI HTA SAK HKRUNG RA

"Kawa, Kasha, Chyoipra ai Wenyi gaw htani htana hkungga shakawn nga u ga law!"

Anhte kam sham ai makam masham sharin shaga ai lam ni gaw Mungsung gasung re ai majaw Kahtawlik langai tai ai hta kalang lang myit yak, sawn la yak ai lam ni nga ga ai. Lai wa sai laban shani hta anhte gaw Chyoipra ai Wenyi hte seng nna sum-ru lai wa sai. Dai ni, Chyoipra ai Trinita Karai Kasang hpe bai an-hte chye madat la na myit taw nga ga ai. Anhte hta Karai Kasang ngu ai langai mi sha nga ai, tim marai masum rawng ai hpe kaning rai chye madat nna masha ni hpe kaning rai tsun dan lu na rai ta?

Trinita Karai Kasang hte seng nna ka da ai lam ni law law nga ai rai tim chye madat na gaw yak la nga ai. Dai gaw sung htum ai mungsung gasung rai nga ai. Ja chyum laika hta chyawm dai hte seng nna loi mi ka madun tawn da ai. Kasa Mahte a kabu gara shiga hta, hkrung rawt sai Madu Yesu gaw shi a sape ni hpe, “masha amyu baw shagu hpe sape shatai let, Kawa a, Kasha a, Chyoipra ai Wenyi a amying ningsang hta, shanhte hpe kashin kamun jaw mu" nga nna htet da ai hta mu lu sai.

Madu Yesu, Jordan hka hta kashin kamun hkam la ai shaloi, dai Wenyi gaw uhkrudu zawn Shi a ntsa e yu wa ai, lamu de na nsen kaba mung, ‘nang gaw ngai tsawra ai kasha rai nga ndai, nang hta ngai sharawng awng nngai law’ nga ai n sen ngoi pru sai. Dai uhkrudu, Nsen hte Madu Yesu, shanhte masum a kumla gaw Trinita Karai Kasang a kumla nan rai nga ai.

Dai hte, Kasa Yawhan a kabu gara shiga hta mung, Kawa hte Kasha gaw langai sha rai nga ai hte dai Madu a amu magam hte Teng-man ai lam hpe shadum ya na Wenyi (Paraclet) hpe shangun dat ya na lam anhte hti lu sa ga ai. Hpang jahtum, Missa hkungga nawng ya ai shaloi Jau ni shakram ai ga, “Madu Yesu Hkristu a shaman chyeju, Kawa Karai Kasang a tsawra ai hte, Chyoipra ai Wenyi a ganawn mazum ai lam gaw nanhte mahkra hte rau anga nga u ga law’ nga ai hpe mung anhte dai ni na la lu saga ai. Anhte a kam sham ai hta mung, Kawa Karai Kasang hpe Hpan Madu, Kasha Karai Kasang hpe Hkyela Madu, Chyoipra ai Wenyi Karai Kasang hpe asak jaw ya ai wa ngu nna anhte kam sham ga ai. Anhte matsing da na lam langai mi gaw, Kawa Karai Kasang ngu ai hta Kasha hte Chyoipra ai Wenyi mung nga nga ai lam rai nga ai. Trinita Karai Kasang gaw myit hkrum rap ra lam hte shai hkat ai lam a sung htum ai mungsung gasung rai nga ai.

Trinita Karai Kasang ngu ai shaloi, marai masum rai nga tim, shanhte masum a amu magam gaw ‘Tsawra myit’ a magam bungli hta sha rai nga ai. Masha marai mi a prat hta myit hkrum rap ra lam hte ngwi pyaw simsa ai hpe mu lu ai a marang e, ndai mungkan hta Trinita Karai Kasang a nga nga ai hpe chye ya lu ai. Tinang a kashu kasha ni hpe kade daram kaja hkra galaw yu ai rai tim kashu kasha ni manghkang law law jaw nna myit htum nga ai kanu kawa ni a lam anhte a na nga ga ai. Kun dinghku kata, myit hkrum myit ra, ngwi pyaw sim sa ai hpe ra sharawng tim lu la na yak la nga ai. Anhte a prat hta Trinita Karai Kasang a nga nga ai hpe jahten ya ai lam (n ru n ra byin ai) ni law law nga nga ai. Shada n ju n dawng hkat ai, n kam hkat ai, n hkrum n ra byin ai majaw Trinita Karai Kasang hpe mu lu na yak nga ga ai. Dai majaw, anhte a prat hta Trinita Karai Kasang matut nna a nga nga let myit hkrum rap ra lam, ngwi pyaw simsa lam ajaw ya na matu akyu hpyi nga ga!

Sawn sumru yu mai ai lam: Trinita Karai Kasang a lam chye madat na matu yak la ai. Tim, anhte hta, uhpung uhpawng hta, mungkan ntsa hta nga nga ai hpe chye na ga ai. Ngai a prat hta Trinita Karai Kasang a nga nga ai hpe hkam sha ai aten ni nga lai wa sai kun?

CHYOI PRA AI TRINITA POI SHANI NA CHYUM LAIKA

CHYOI PRA AI TRINITA POI 

11th, June, 2017 

CHYUM MUNGGA DAW 1 

Pru mat wa ai laika 34:4-6, 8-9

Ya hti na gaw Pru mat wa ai laika hta na rai nga ai. 

Mawshe gaw dai lungpa lahkawng hpe lang let, Madu shi hpe hkang ai hte maren, Sina bum de lung wa ai. Madu mung sumwi hta yu hkat wa nna, dai yang e Mawshe hte rau tsap nga ai.

Mawshe gaw Madu a mying hpe shaga wu ai rai nna, Madu shi a man e lai wa let, Madu gaw, matsan dum ai hte n-gaw awai ai myit rawng ai Karai Kasang rai nga ai: myit galu nga nna, sumnung shingdi ai hte, kangka ai hte hpring ai Karai Kasang rai nga lu ai, nga nna tsun dan wu ai. Shaloi Mawshe gaw gum dagup nna nawku let, Madu e, na a man e myiman pa ni ai rai yang gaw, Madu anhte rau sa wa ga law. Ndai amyu gaw masin ja ai amyu rai nga ti mung, anhte a shut hpyit mara ni hpe dat kau ya nna, anhte hpe na a sali wunli shatai da ya mi law, ngu nna hpyi wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

2 Korinhtu 13:11-13

Ya hti na gaw Korinhtu masha ni hpang de San Pawlu shagun dat ai laika lahkawng hta na rai nga ai.

Hpu nau ni e, Kabu gara nga mu; hkum hkum tsup tsup nga nga na shakut nga mu; myit hkrum myit ra, ngwi pyaw simsa ai hku nga nga mu; shaloi, tsawra hte ngwi pyaw simsa ai lam a npawt daju, anhte a Karai Kasang nanhte hte rau a nga nga na ra ai. Chyoi pra san pra ai myit hte shada da shakram ya mi. Chyoi pra ai ni yawng mayawng nanhte hpe shakram dat ma ai.

Madu Yesu Hkristu a chyeju, Karai Kasang a tsawra ai hte, Chyoi pra ai Wenyi hte hkau ai gaw nanhte hte rau nga nga u ga law.

Ya hti ai gaw Karai Kasang a mungga rai nga ai.

KABU GARA SHIGA

Yawhan 3:16-18

Ya hti na gaw Yawhan a laika hta na Kabu Gara Shiga rai nga ai.

Yesu gaw Nikodemu hpe tsun wu ai gaw: Karai Kasang a Kasha hpe kam sham ai ni yawng hte gaw, hten bya n hkrum ai sha, htani htana asak lu la mu ga nga, Karai Kasang gaw shi a Kasha Shingtai hpe jaw kau ai du hkra, mungkan ga hpe tsawra wu ai. Mungkan ga hpe tara dara u ga nga nna, Karai Kasang gaw dai Kasha hpe shangun dat wu ai n rai; mungkan ga gaw shi a marang e hkye hkrang la ai hkrum lu na she, shangun dat wu ai.

Karai Kasang a Kasha hpe kam sham ai wa gaw, tara dara ai n hkrum lu ai; n kam n sham ai wa chyawm gaw, Karai Kasang a Kasha Shingtai a mying ningsang hpe n kam n sham ai majaw, ya e pyi tara dara ai hkrum nga ai.

Ya hti ai gaw Madu a Kabu Gara Shiga rai nga ai.

CHYOI PRA AI WENYI YU HKRAT WA AI POI SHANI NA MUNGGA

Madu Yesu wudang ntsa e jen noi si hkrum ai aten kaw nna sape ni law law hte gaw, myit daw hten ai hta sha n-ga myit ru myit tsang hkrum nga ai hpe chye lu ga ai. Hpa majaw nga yang shanhte myit mada da ai ningbaw Yesu gaw shanhte htang da ai hte maren nbyin wa nna shanhte a shim lum ai lam hpe hkrit tsang ra ai majaw re. Dai majaw shanhte ni gaw hrit tsang nna makoi magap nga ai aten Madu Yesu bai hkrung rawt ai hpe chye lu nna Chyoi Pra ai Wenyi shanhte a ntsa e yu hkrat wa ai aten hta she myit masin n-gun rawt wa nna nhkrit ntsang ai sha, Karai Kasang a tara mungga ni hpe hkaw tsun let nawku hpung hpe de hpang sai re.

Shinggyim masha re ai majaw hkrit tsang ai lam ni anhte hta galoi mung nga na re. Hpa majaw nga yang anhte a atsam marai hte lam magup hpe nlu galaw ai majaw rai nga ai. Raitimmung, bai hkrung rawt wa ai Madu Yesu hpe kam sham nna Chyoi Pra ai Wenyi sakramentu ni a jaw e hkam la lu sai hpe myitdum let Shi a myit jahtoi ya ai hpe hkam la nna, hkan shatup lu let lam shagu hta, grau nna anhte wenyi lam hta rawt jat galu kaba wa u ga.

MADU YESU A GA SADI

Ndai lak lai ai nhtoi gaw Madu Yesu a gasadi rai nga ai.

Tengman ai a wenyi hpe shangun dat ya na lam dik wa sai rai nga ai. Dai Chyoipra ai Wenyi gaw, Madu Yesu, sape ni hpe tsun tawn da sai lam hpe sakse hkam ya na rai nga ai. Chyoipra ai wenyi anhte hte rau rai nga jang anhte galoi mung jahkrai rai nga na n rai. Dai gaw Madu Yesu anhte hte rau nga nga ai majaw rai nga ai. Madu Yesu a Wenyi anhte hta rai nga yang, galai shai ai lam teng sha wa byin pru na re. Anhte hta nga nga nna, amu galaw nga ai Wenyi hpe ahkang jaw ai rai yang, anhte gaw masha ningnan tai wa lu na re.

Sape ni mung, Chyoipra ai Wenyi hpe hkap la lu ai hpang mau na daram galai shai wa masai. Hkrit kajawng ai kaw nna marai rawng ai de, yawn hkyen nga ai kaw nna kabu gara ai de, myit mada shara n nga mat ai kaw nna myit mada shara lu la ai de galai shai wa sai. Madu Yesu nni nkri yubak hkam la ai hte si hkam ai ten ni hta, sadi n dung kau nna myit shut nga let kraw salum hta hkra machyi ai kaw nna, N’htoi hte Ngwi pyaw simsa ai lam jaw ya sai. Hkrung rawt sai Madu a lam hpe n hkrit n tsang hkaw tsun lu na atsam marai jaw ya sai.

Chyoi pra ai Wenyi a lam tsun sang lang dan na yak la nga ai.

Chyoi pra ai Trinita Karai Kasang a lam tsun jahta ai shaloi, Kawa hte Kasha Karai Kasang a lam anhte lama ma chye madat ga ai. 

Raitim, Chyoi pra ai Wenyi Karai Kasang a lam sang lang na matu gaw kaga lam langai rai nga ai. 

Dai Trinita Karai Kasang lam gaw mungsung gasung lam rai nga ai ngu nna hpa mung n sawn sumru yu ai sha nga na n kaja ai. Lagawn lamawn ai lam gaw anhte a chye chyang wa na lam hte prat hpe shagrau sha a chye na matu pat shing dang ya ai.

Chyoipra Chyum laika hta mung, Chyoipra ai wenyi a lam hpe Nbung, Uhkrudu, Wan shinglet ni hte tsun sang lang da nga ai. Dai Wenyi gaw anhte hpang de lam amyu myu hte du sa wa na rai nga ai. Bungshi zawn (snr) dai ni na mungga hta na la ai Nbung laru kaba wa ai zawn du sa chye nga ai. Rai yang, dai ni anhte a prat hta Chyoi pra ai Wenyi gaw hpa wa mi rai na kun? Ndai zawn mi rai na kun?

Anhte a prat hta hkap la kam sham ai lam yawng hpe shangang shakang ya ai wa rai na nhten. Marai rai a prat hta Asak hte seng nna hkrit tsang ra wa ai shaloi, dai hkap la kam sham ai lam hpe tsun hpaw tsap na yak la nga ai. Tim, dai gaw anhte hpe ap da sai amu magam hte seng nna anhte kade daram sakse hkam lu na chyam dinglik hkrum ai kaba dik ai mabyin rai nga ai. Dai ni na prat a ning dat ai lam gaw Asak a manu jahpu rai nga ai. Kahtawlik hpung masha anhte a lit gaw dai Asak manu dan ai lam hte Chyoipra ai lam hpe tsun sak se hkam na matu rai nga ai. Rai timung, anhte mu mada ai gaw arawn alai shut shai ai lam rai nga ai. Anhte Kahtawlik ni hta ningmu n bung ai lam kaba langai mi gaw ‘Si dam’ jaw ai lam rai nga ai. Nkau mi gaw ‘si dam’ hpe n ra sharawng ai rai tim, ‘ma shabrai’ ai hpe gaw myit hkrum lawm ai ni nga ma ai. Lahkawng yan Asak hte seng ai n rai i?

‘Nye Wa ngai hpe shangun dat ai hte maren, ngai mung nanhte hpe shangun dat ma de ai’. Tengman ai lam hpe sadi dung na hte, Asak a chyoipra ai lam hpe manu shadan lu na gaw Kahtawlik ngu nna mying gun/lu sai anhte yawng hpe Karai e jaw da ai lit magam rai nga ai. Dai hta n-ga, grau kaba law htam ai amu magam ni hpe galaw lu na matu gaw Chyoipra ai wenyi a atsam hte awng dang lu na rai nga ai. Ndai lam ni hpe ta tut hkrang shapraw galaw sa wa lu na matu yak la nga ai. Tim, Chyoipra ai Wenyi hpe hkam la lu sai anhte ni kaw nna myit mada nga ai lam ni mung rai nga ai.

Sawn sumru yu mai ai lam: “Chyoi pra ai Wenyi galaw lajang byin shangun ai rai nga” ngu nna tsun lu ai galai shai ai lam anhte a prat hta nga ai kun?

CHYOI PRA AI WENYI YU HKRAT WA AI POI SHANI NA CHYUM LAIKA

CHYOI PRA AI WENYI YU HKRAT WA AI POI

PENTEKAWSTE LABAN

4th June, 2017

CHYUM MUNGGA DAW 1

Kasa 2:1-11

Ya hti na gaw Kasa laika hta na rai nga ai.

1Ya Pentekawste shani du jang, Kasa ni yawng shara mi hta rau hpawng nga ma ai. 2Shaloi nbung laru kaba wa ai zawn, lamu de na nsen akajawng sha kadu pru nna, shanhte rawng nga ai nta, dai nsen hte hpring chyat rai wa ai. 3Wan shinglet zawn re ai baw mung, shanhte kaw dan pru nna, bra karan wa nhtawm, langai hte langai a ntsa e jung nga ai. 4Shanhte nlang hte mung Chyoi pra ai Wenyi hte hpring nga nna, dai Wenyi shadut mu ai hte maren, ga amyu myu shaga wa ma ai.

5Ya, sumsing lamu a n-pu e nga ai masha amyu shagu hta na, tara hkan shatup ai Yuda masha ni Yerusalem mare e nga nga ma ai. 6Dai kadu ai nsen na la jang, masha unawng uwa hpawng sa nna, sape ni tsun ai ga hpe, tinang nang a ga hku na la lu ma ai. 7Shanhte mak mat ai rai nna, mau mahka let, yu mu, ya shaga nga ai ndai ni gaw, Galile masha hkrai n rai ma ni? 8Dai rai yang gaw, anhte langai hte langai, tinang nang a dai daw shara na ga hku, na la lu ai gaw kaning re ai i? 9Parhti, Elam mung na ni hte, Mesopotamia mung e nga ai ni; Yuda hte Kapodoki mung, Pontu hte Asia, 10Hprugi hte Pamhpuli; Egutu hte, Kureni ginwang hkan e nga ai Libia mung na ni; Roma mare de nna wa nga ai, Yuda masha ni hte tara nnan hta la ai ni, 11Kreti hte Arabia mung na ni anhte rai nga ga ai; rai ti mung, anhte yawng hte gaw, Karai Kasang a mauhpa amu magam shanhte hkai dan ga ai hpe, tinang nang a ga hku na la lu ga hka! nga nna myit kahpra let tsun ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

1 Korinhtu 12:3-7.12-13

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

3Hpu nau ni e, Chyoi Pra ai Wenyi hte sha n rai yang gaw, Yesu gaw Madu rai nga ai, nga nna kadai n tsun lu ai.

4Ya, chyeju kumhpa amyu myu nga timung, dai ni hpe karan jaw ai Wenyi gaw, langai sha rai nga ai. 5Daw jau ai lam amyu myu nga timung, Madu langai sha hpe anhte daw jau nga ga ai. 6Mauhpa atsam amyu myu nga timung, yawng mayawng hte e dai lam mahkra hpe shabyin ai Karai Kasang gaw langai sha rai nga ai.7Rai timung, akyu chyeju lu la u ga she, dai Wenyi gaw langai hte langai hta e, shi atsam shapraw shadan dan nga ai.

12Masha a hkum hkrang hta daw shan law law rawng nga timung, dai ni yawng hte gaw hkum hkrang langai sha jawm tai nga ma ai. Dai hte maren Hkristu mung, daw shan law law lu ai hkum hkrang langai sha rai nga ai. 13Anhte yawng mayawng, Yuda ni hte Greka ni rai timung, mayam ni hte shanglawt ni rai timung, hkum hkrang langai sha tai na matu, Wenyi langai sha hte e kashin kamun hkam la sa ga ai rai nna, anhte yawng jawm lu na matu, dai wenyi hpe jaw ya mani ai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 20:19-23

Ya hti na gaw Yawhan a laika hta na Kabu Gara Shiga rai nga ai.

19Dai Laban Bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sa yang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai.

20Shing nga tsun nhtawm, shi a lata hte garep hpe shanhte hpe madun dan wu ai. Sape ni mung dai Madu hpe mu lu jang,kabu gara nga ma ai. 21Bai Yesu gaw, Nanhte ngwi pyaw nga myit ga; Wa ngai hpe shangun dat ai hte maren, ngai mung nanhte hpe shangun dat made ai, ngu mu ai. 22Shing nga nhtawm, sape ni a ntsa e shi nsa gawut nna, Chyoi pra ai Wenyi hpe hkap la mu; 23kadai a shut hpyit mara hpe rai timung, nanhte raw dat yang gaw, raw mat na ra ai; kadai a shut hpyit mara hpe rai timung, nanhte shagun da yang gaw, dai mara naw nga na ra ai, ngu nna shanhte hpe tsun mu ai.

Ya hti ai gaw Madu a Kabu Gara Shiga rai nga ai.

YESU LAMU DE LUNG WA AI POI SHANI NA MUNGGA

Kawa Karai Kasang shangun dat ai Madu Yesu gaw mungkan ga de yu sa nna shinggyim hkumhkrang hpe dagraw la sai. Nni nhkri yubak hpe hkam nna Wudang ntsa hta si hkam ai, bai hkrung rawt ai hpang sumsing lamu de bai lung wa sai. Kawa Karai Kasang kaw nna yu sa ai Madu Yesu gaw Shi a magam bungli yawng ngut ai hpang Kawa Karai Kasang hte rau sumsing mungdan de bai du wa sai re. 

Madu Yesu du sa ai a marang e shinggyim masha ni hkye hkrang la hkrum sai re. Shi mungkan ga ntsa e shinggyim masha langai zawn sa du ai shaloi masha law law hte a mai kaja ai lam hpe galaw lai mat wa ai hta n-ga shi a hpang hkan nang ai masha ni hpe kasi kaja madun let lam woi ningshawng lai wa sai. Dai hta n-ga Shi gaw de da ai nawku hpung mung dai ni du hkra matut nna rawt jat galu kaba wa nga ai.

Karai Kasang hpan da hkrum ai anhte shinggyim masha ni gaw ndai mungkan ga ntsa kaw sak hkrung ngut ai hpang sumsing mungdan hta Karai Kasang hte rau bai mu hkrum na matu ahkyak nga ai. Mungkan ntsa hta sak hkrung nga sa yang anhte galaw sa ai amu magam lam ni gaw manang wa a matu akyu pru ai kun? Mungkan ga hpe lani mi na aten hta anhte kau da ai shaloi manang ni a matu kaja ai kasi hpe anhte ngam kau da lu na kun?