LUSHA GAM LADAW LABAN (4) NA CHYUM LAIKA

LUSHA GAM LADAW LABAN 4

26 March, 2017

CHYUM MUNGGA DAW 1 

1 Samuela 16:1, 6-7, 10-13

Ya hti na gaw Samuela a laika hta na rai nga ai.

Madu gaw Samuela hpe tsun ai gaw: Na a ndum hta sau bang jahpring nna, sa wa su; nye a hkawhkam tai na matu, Betlehem ma sha Yese a kasha ni hta na ngai langai mi hpe san da sai majaw, shi hpang de ngai nang hpe shangun dat nngai, ngu wu ai. Samuela mung, Madu tsun ai hte maren galaw nna,Betlehem mare de sa du ai. Yese hte shi a kasha ni hpe, hkungga jaw ai poi de shi shaga mu ai. Ya shanhte du jang, Samuela gaw Eliaya hpe hkap yu nna, gaja wa, Madu e sau chya ya hkam na wa gaw, shi a man e, tsap nga ai, nga nna myit lu ai. Madu chyawm gaw, shi a myiman hte shi a hkum shingyan hpe hkum yu et; ngai shi hpe n la we ai, masha yu yu ai hte maren Karai Kasang yu yu ai n rai; masha gaw ahpraw nsam sha yu chye nga ai; Karai Kasang chyawm gaw, myit masin she yu nga ai, ngu nna Samuela hpe tsun wu ai.

Shing rai Yese gaw shi a kasha sanit, langai hpang langai hpe, Samuela a man de tsap pru shangun timung, Samuela gaw, ndai ni hpe Madu n la wu ai, ngu wu ai. Bai Samuela gaw, na nsha ni ndai hte sha rai ni? ngu nna Yese hpe san wu yang shi gaw, hpungdim shadoi langai mi gaw naw nga ai; shi gaw sagu rem nga ai, ngu nna tsun dan wu ai. Shaloi Samuela gaw, shi hpe shaga la na shangun dat u; shi garai n du yang, poi de shang dung na ga ai n rai, ngu nna Yese hpe tsun wu ai. Shing rai, dai kasha hpungdim hpe shaga la ma ai. Shi gaw myiman hkyeng nna, ahpraw tsawm ai shabrang wa hte hkum hkrang hking ai wa rai nga ai. Madu gaw, ndai wa re ai; rawt nna shi hpe sau chya ya u, ngu wu ai. Samuela mung, shi a sau ndum la nna, shi hpe sau chya ya wu ai: dai shani kaw nna Madu a Wenyi gaw Dawi a ntsa e dung nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Ehpesu 5:8-14.

Ya hti na gaw Ehpesu masha ni hpang de San Pawlu shagun dat ai laika hta na rai nga ai. 

Hpu nau ni e, nanhte shawng e nsin rai nga myit dai; ya gaw Madu hta nhtoi rai nga myit dai. Dai rai nna, nhtoi a kashu kasha ni zawn hkawm nga mu; kaning rai nme law, nhtoi hta hkawm nga ai ni gaw, mai kaja ai, ding hpring ai hte, teng man ai lam hkrai hkan galaw nga ma ai. Madu ra sharawng ai lam hpa rai nga ai hpe hkrak sagawn yu nna, nsin hte seng ai, kaman lila re ai amu ni hpe n hkan galaw ai sha n-ga, dai amu ni gade wa n hkru n kaja rai nga ai hpe shadan dan mu. Kaning rai nme law, masha ni mayun mayaw e galaw ai lam ni gaw, ga hte tsun na pyi kaya kahpa lam rai nga ai. Rai timung, nhtoi hte shadan dan ai yawng hte gaw, dan dan leng leng mu lu ai rai nna, dan dan leng leng mu lu ai baw nhtoi tai nga lu ai. Dai majaw, “Yup pyaw ai wa e, rawt u; si ai kaw na bai rawt wa nu; shaloi Hkristu nang hpe jahtoi na ra ai.” nga nna tsun ai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 9:1. 6-9, 13-17, 34-38

Ya hti na gaw Yawhan a laika hta na Kabu Gara shiga rai nga ai.
Lani mi hta Yesu hkawm sa wa nga yang, hkritung nna myi kyaw ai wa langai mi hpe mu wu ai. Yesu gaw ga hta mayen prat bang nna, hkumpup galaw la nhtawm, dai wa a myi hta chya ya nna, Silum hka lawng hta sa kashin su, ngu nna shi hpe tsun dat wu ai; dai hte maren myikyaw ai wa sa kashin nna, myi mu lu ai hte bai wa ai. ( Silum ngu ai a ga lachyum, shangun dat ai, ngu ai rai.) Dai rai nna, shi a htingbu ni hte, shawng e shi hpyi sha ai shaloi mu yu ai ni gaw, ndai wa gaw nang e dung nga nna, hpyi sha ai wa n rai ni? nga ma ai. Nkau mi gaw, dai wa nan rai nga ma ai. Bai, kaga nkau mi gaw dai wa n rai shi hte bung ai wa rai nga ai, nga ma ai. Dai wa chyawm gaw, ngai nan dai wa rai nga nngai, ngu nna tsun wu ai.
Dai rai nna shanhte gaw, shawng de myi n mu ai wa hpe Hparishe ni hpang de woi sa mu ai. Yesu hkum pup galaw la nna, dai wa myi hpaw ya ai shani Laban nhtoi rai nga ai majaw, Hparishe ni gaw dai wa hpe, shi a myi kaning rai mu lu ai lam san ma ai. Dai wa gaw, Yesu ngu ai wa nye a myi hta hkumpup chya ya nna, ngai kashin kau jang mu wa ni ai, ngu nna shanhte hpe htan mu ai. Shaloi Hparishe nkau mi gaw dai Yesu gaw, Laban nhtoi hpe tawt lai ai majaw, Karai Kasang kaw na du sa ai wa n rai, nga ma ai. Bai, nkau mi gaw, mara lu ai masha gaw, ning re ai lamik kumla kaning rai galaw lu na a ta? nga ma ai. Shing nga na myit n hkrum ma ai. Dai rai nna, shanhte gaw myi n mu ai wa hpe, na myi shi hpaw ya ai majaw, shi a lam nang kaning ngu da a ta? ngu nna bai san jang, shi gaw, dai wa gaw myihtoi rai nga ai, ngu nna bai htan wu ai. Shaloi shanhte gaw, nang wa mi anhte hpe sharin ya nni? Nang gaw shangai wa ai kaw na shut mara hte hpring chyat nga ndai, ngu nna jawm htan nhtawm, dai wa hpe kanawng shapraw kau mu ai. Dai wa hpe shapraw kau ai lam Yesu na wu ai rai nna, shi hpe mu tam jang, Masha Kasha hpe ngai kam sham lu na matu, shi kadai re ai ngai hpe tsun dan rit ngu wu ai. Yesu gaw, dai Masha Kasha hpe nang mu yu nit dai hta n-ga, ya nang hpe shaga ai gaw dai wa nan rai nga ai, ngu nna shi hpe htan wu ai. Shaloi dai wa gaw, Madu e, ngai kam sham nga nngai, ngu nna Yesu hpe nawku wu ai.
Ya hti ai gaw Madu a Kabu Gara shiga rai nga ai.

LUSHA GAM LADAW LABAN (3) NA MUNGGA

Lu sha gam ladaw hta galaw sa ai lam ni law law nga ai hta na ahkyak ai langai mi gaw tinang a myit hpe ndang nyet kau nna mai kaja ai lam ni hpe galaw sa ai re. Tinang a myit hpe ndang nyet kau ai ngu ai gaw anhte a hkri tung myit hpe machyu nna galaw sa ai lam hpe lai di let myit sawn sumru yu nna galaw ging ai hpe shakut shaja nna galaw sa ai lam re.

Madu Yesu gaw shanhte a wuhpung wuhpawng hte nju ndawng hkat ai Samari myu sha rai nga ai num sha hpe hkap la nna tinang a ru sai zawn tsun shaga ai a majaw Samari Numsha hte kaga masha ni Madu Yesu hpe kam sham wa sai re.

Ndai lusha gam ai ladaw hta tinang a myit masin, hkum hkrang hpe nyet kau let nkam tim galaw ging ai amu bungli ni hpe awngdang ai hte galaw lu nna tinang a htingbu wa a matu akyu shapraw ya lu u ga.

ASAK HKA HPAWK

Madu Yesu, Samari numsha hte matut manoi ga shaga ai kaw nna, dai numsha galai shai mat wa ai mabyin gaw, anhte ni mung, dai zawn rai nna, mahku mara hku hkau ai lam kaw nna mai kaja dik ai hpe shaw la lu mai ai, ngu ai lam hpe shadan shaleng ya ai rai sai. Madu Yesu a dai aten hta Yuda ni gaw, Samari masha ni hpe kachyi pyi n yu lu ai, nju ndawng ma ai.

Madu Yesu zawn re ai Yuda Rabbi marai mi hku nna Samari masha hte ga shaga ai lam gaw, matsat shabat re ai lam rai tim, shi hte rau hkrum zup shaga ai gaw, dai numsha hpe hkye la na matu rai sai. Madu Yesu kaw nna Samari numsha sharin la lu ai tengman ai lam langai mi gaw “Asak Hka Hpawk” rai nga ai.

“Asak hka hpawk” gaw Karai Kasang a mungga hte Chyoipra ai Wenyi ni a kumla masat rai nga ai. Karai Kasang a mungga hta ru pawt shatai ai prat hte Chyoipra ai Wenyi ashanu nga ai sak hkrung lam gaw, dai masha hpe tsep kawp kabu myit pyaw shangun ya na re. Ndai zawn rai nna hkum tsup ai prat a chyeju hpe lu la na matu ahkyak ai masa lam gaw, tinang a mara hpe dum shai lu na hte, dai shut hpyit mara ni a matu myit yawn myit malai lu na lam rai nga ai.

LUSHA GAM LADAW LABAN (3) NA CHYUM LAIKA

LUSHA GAM AI LADAW LABAN 3

19, March. 2017

CHYUM MUNGGA DAW 1

Pru Mat Wa ai Laika 17 : 3-7.

Ya hti na gaw Pru Mat Wa ai Laika hta na rai nga ai.

Israela a shawa hpung ting, Egutu mung de nna pru mat wa ai hpang, Re-hpi-dim e but nga ma ai; dai kaw e amyu masha ni hpang gara nna, Mawshe hpe aput let tsun mu ai gaw, anhte hte anhte a kashu kasha ni mung, anhte a yam nga ni mung, hpang gara ai hte si na matu, Egutu mung de na anhte hpe woi wa sa ni? ngu mu ai. Shaloi Mawshe gaw Madu hpe hpyi nem let, ndai amyu hpe ngai kaning di woi awn lu na rai ta? Ngai hpe nlung hte kabai sat kau na maw nga ma ai, ngu wu ai. Dai rai nna, Madu gaw Mawshe hpe, Israela a agyi salang nkau mi hpe woi nna, dai amyu masha ni a shawng e sa wa su; dai hkanu hpe kayat ai dawhkrawng lang let sa wa su. Horeb bum na lunghkrung ntsa hta ngai na a man e tsap nga na ring ngai. Dai nlung hpe nang kayat na wu ai rai nna, amyu masha ni lu na matu, dai hta na hka lwi pru na ra ai ngu nna Madu tsun wu ai.

Mawshe mung Israela a agyi salang ni a man e shingdi galaw wu ai. Dai shara kaw e, Israela amyu masha ni gaw, Madu anhte hte rau nga nga ai kun? n nga nga ai kun? nga nna Madu hpe chyam dinglik yu ai majaw mung, Mawshe hpe aput nna ndang kalang hkat ai lam a majaw mung, shara dai hpe, Massah hte Moriba ngu ai amying lahkawng hte shamying ya mu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 5: 1-2, 5-8.

Ya hti na gaw Roma masha ni hpang de San Pawlu shagun dat ai laika hta na rai nga ai,

Hpu nau ni e, anhte a Madu Yesu Hkristu a marang e, kam sham ai hte ding hpring wa lu saga ai majaw, Karai Kasang hte hku hkau nga ga ai. Yesu Madu a marang e, anhte kam sham ai hte chyeju ningsang a prat hta shang lu saga ai; shing rai, Karai Kasang a hpung shingkang hpe myit mada nga ga ai majaw, nachying kabu sharawng awng nga ga ai.

Dai myit mada ai gaw, kaman lila n rai nga ai; kaning rai nme nga yang, anhte hpe jaw ya sai Chyoi pra ai Wenyi gaw, Karai Kasang a tsawra ai myit, anhte a masin salum hta e ru bang ya mani ai. Anhte hpa n byin lu ai shaloi, Karai Kasang lajang da ai aten hta, Hkritsu gaw shut hpyit ai masha ni a matu si hkam sai. Gaja wa, ding hpring ai masha a matu si hkam na, ai n kam nga ga ai; mai kaja ai masha a matu chyawm gaw, si hkam gwi na masha langai ngai nga nhten; rai timung, anhte mara kap nga ninglen, Hkristu anhte a matu si hkam ya ai gaw, Karai Kasang anhte hpe tsawra nga ai lam a sakse rai nga ai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 4 : 5-15, 19-26, 39, 40-42.

Ya hit na gaw Yawhan a laika hta na Kabu Gara shiga rai nga ai.

Yesu gaw, Yaku e shi a kasha Yosep hpe jaw ai ga dachyawk makau na, Suhka ngu ai, Samari mung na mare langai mi de du wa ai; dai yang e, Yaku a hka htung nga nga ai. Yesu gaw lam hkawm ba ai majaw, hka htung makau e dung nga ai. Dai aten gaw shani ka-ang, ahkying shi lahkawng daram rai nga ai. Shaloi Samari numsha langai mi hka ja na pru sa ai.

Yesu gaw, Ngai hpe hka jaw lu e, ngu nna shi hpe hpyi ai: shi a sape ni chyawm gaw shahpa mari na matu, mare de sa mat ma ai. Dai Samari numsha gaw, Nang Yuda masha rai nga ndai; ngai Samari numsha hpe, hpa majaw lu na hka hpyi n ta? ngu nna shi hpe tsun wu ai, kaning rai nme nga yang, Yuda hte Samari masha ni shada da n hku n hkau nga ma ai. Shaloi Yesu gaw, Karai Kasang a kumhpa hte, Ngai hpe hka jaw lu e nga nna nang kaw hpyi ai wa, kadai re hpe nang chye taw gaw, nang shi kaw hpyi nna, shi gaw nang hpe hkrung ai ntsin jaw na nit dai, ngu nna Yesu htan wu ai. Dai numsha mung, Madu e, Nang hka ja na rai hpa mung n lu ndai; hka htung mung sung nga ai; dai rai nna, dai hkrung ai ntsin hpe kanang na lu la n ta? Anhte a nji nwa Yaku gaw ndai hka htung anhte hpe jaw da mani ai rai nna, shi hkum nan hte shi a kashu kasha ni, shi a yam nga ni ndai hta na lu ma sai; nang gaw shi hta grau kaba n ni? Ngu nna tsun wu ai.

Shaloi Yesu gaw, ndai hka lu ai wa kadai mung, hpang bai gara na ra ai; ngai jaw ai hka lu ai wa chyawm gaw, galoimung hpang gara na n rai: dai ngai jaw ai hka gaw, htani htana asak lu na matu, dai wa hta e lwi pru ai hka hpawk tai na ra ai , ngu nna Yesu htan wu ai. Shaloi dai numsha gaw, ngai galoimung hpang gara bai n hkrum na hte, nang de mung hka n sa ja ra u ga, hka dai ngai hpe jaw rit law. Nang gaw myihtoi rai nga ndai hpe ngai dum se ai: anhte a ji wa ni gaw ndai bum ntsa e nawku masai; nanhte Yuda masha ni chyawm gaw, Yerusalem mare e chyu sha Karai Kasang hpe nawku mai ai, nga nna tsun myit dai, ngu wu ai.

Yesu gaw, numsha e, nye a ga hpe kam sham u: ndai bum e mung n rai; Yerusalem mare e mung n re ai, Wa hpe nawku na aten du na ra ai. Nanhte Samari masha ni gaw, tinang n chye na ai hpe nawku myit dai; anhte chyawm gaw tinang chye ai hpe nawku ga ai: kaning rai nme law, hkye hkrang la ai lam Yuda amyu hta na pru ra ai. Rai timung, ding man ai hku nawku ai ni gaw, wenyi hta mung, teng man ai hta mung, Wa hpe nawku na aten du wa ra ai rai nna, ya e pyi rai nga ai. Wa gaw shing rai nawku ai ni hpe tam nga ai. Karai Kasang gaw Wenyi rai nga ai; shi hpe nawku ai ni gaw wenyi hta mung, teng man ai hta mung, nawku lu na rai nga ai ngu nna shi hpe tsun wu ai.

Dai numsha gaw, Hkristu ngu ai Karai Kasang san da ai wa du na ra ai hpe ngai chye nngai; dai wa du jang, shi anhte hpe lam magup tsun madun na ra ai, ngu wu ai. Shaloi Yesu gaw, nang hte ga tsun nga ai, ngai gaw dai wa nan rai nga ai, ngu nna shi hpe tsun wu ai. Dai rai nna dai numsha gaw, shi a ntsin di bu tawn kau da nna mare de bai wa nhtawm, mare masha ni hpe, ngai galaw ai lam yawng ngai hpe tsun dan ya ai wa hpe sa yu marit; dai wa gaw, Hkristu rai na kun? ngu nna wa tsun mu ai. Dai mare na Samari masha law law wa, dai numsha sakse hkam ya ai ga a majaw, Yesu hpe kam sham ma ai. Dai rai nna, Samari masha ni Yesu hpang de du jang, shanhte hte nga nga na hpyi ma ai majaw, dai yang e lahkawng ya shi hkring nga ai. Yesu nan tsun ai ga a majaw mung kam sham ai ni grau law jat wa ma ai. Dai ni gaw dai numsha hpe, ya gaw, na a ga majaw chyu sha kam sham ai n rai saga ai: anhte nan na lu na nna, ndai wa gaw, mungkan ga a hkye hkrang la ai Madu teng teng rai nga ai hpe anhte chye saga ai, ngu mu ai.

Ya hti ai gaw Madu a Kabu Gara shiga rai nga ai.

LUSHA GAM LADAW LABAN (2) NA MUNGGA

Lai mat wa sai ahkying aten na mahkrum madup ni gaw anhte shinggyim masha ni a dai ni na nga sat nga sa lam hpe gin shapraw ya sai re. Kaja ai mahkrum madup law ai wa gaw kaja ai arawn alai hpe lu la na re.

Madu Yesu hpraw nsam galai shai ai hpe mu hkrum ai Kasa ni gaw shahte a asak aprat hta ahkyak ai mahkrum madup langai byin pru wa sai re. Ndai mahkrum madup a jaw e yak hkak wa ai aten hta shanhte hkan nang ai Wa gaw Karai Kasang a Kasha re ngu ai hpe shadum nna n-gun jaw ya nga ai.

Kasa ni zawn Madu Yesu a hpang hkan nang na matu shakut shaja nga ai anhte ni mung Karai Kasang hte mu hkrum ai ngu ai mahkrum madup hpe lu la nna ndai mahkrum madup a jaw e n-gun astam lu la na matu grau nna ndai lu sha gam ai ladaw hta Akyu Hpyi ai, Lu Sha Gam ai hte Manang Wa hpe Garum shingtau ai lam ni hpe Karai Kasang hta manoi manat nna galaw sa wa lu u ga.

SHIGA HKAP LA LU AI

Mu na kyit hkai hta kung kyang ai ni tsun ai, shiga ngu ai gaw; tsun shapraw ai, sa dat ai n rai, hkap la lu ai mahtang rai nga ai, nga ai. Dai majaw shiga hpe hkap la, chye na shut ai rai yang, matut mahkai ai lam hten ai rai nga ai. Dai ni na kabu gara shiga matu kaja dik ai gashadawn rai sai.

Madu Yesu bum ntsa hta ahpraw nsam galai ai hpe mu mada la nna kasa Petru gaw manu mana wa kabu lu ai hte, Madu Yesu a matu langai, Mawshe a matu langai, Elia a matu langai ‘sum’ gap ga nga nna tsun wa sai. Shi bai hkap la lu nna, sape ni mung hkrit kajawng ai nsen gaw; ‘ndai wa gaw ngai sharawng awng ai, ngai tsawra ai ngai sha rai nga ai; shi a ga madat mara mu’ nga ai rai sai. Ga ndai ni chyawm gaw yawng wa ahkyak la nga ai rai tim, ‘shi a ga madat mara mu’ ngu ai hpe chyawm dinglik yu ga!

Ndai ga a majaw anhte mau na nhten. Hpa majaw Kawa Karai kaw nna nsen gaw, hkrit kajawng nga ai sape ni, Madu Yesu hpe yu mada na n tsun ai rai kun? Tim sape ni chyawm gaw Madu Yesu hpe madat mara na tsun hkrum sai. Madu Yesu hpe kasa Petru hku hkau kanawn lai wa sai lam ni, Madu Yesu si ai aten du hkra kaning rai mahku mara lai wa sai lam ni hpe bai sawn sumru yu yang, Kawa sape ni hpe tsun ai, Madu Yesu hpe madat na lam hpe anhte chye na lu na rai nga ai. Teng nga ai, kasa Petru a gawng kya lam rai ngaai; myit kahtet ai hte, madat ai, myit sumru yu ai lam nau n nga ai sha, lawan ladan rai galaw chye ai hpe anhte mu lu na re. Dai hpe madi madun ai mabyin kaba gaw, Madu Yesu a matu shi a asak pyi ap nawng kau gwi ai (Yh 13:38) nga nna, kade nna yang, Madu Yesu hpe n chye ai nga bai ning dang ai lam rai sai.

Madu Yesu, ahpraw nsam galai ai ten hta na kasa Petru a makam gaw grai wa law hkra n rai shi nga ai. Zingri zingrat ai hpe hkam sha ai, tinang a masin salum kata na nsen hpe madat na ahkyak ai lam hpe chye la lu ai hpang e she shi hkum hpe shi atsawm sha chye na lu nna, Karai Kasang hta lak lai ai makam hte Madu Yesu hpe sung sung tsaw ra nga ai lam masha kaga ni hpe hti dan ya lu sai.

Tsun ga nga yang, madat la na gaw mu la ai hta grau ahkyak nga ai. Teng nga ai, Karai Kasang a mungga hte Madu Yesu a sharin shaga ai mungga ni hpe anhte a shani shagu na sak hkrung lam a matu lu tawn da ai gaw mai kaja dik ai lam n rai a ni! Chyum laika hpe hti la nna madat mara nga ga!

LUSHA GAM LADAW LABAN (2) NA CHYUM LAIKA

LUSHA GAM AI LADAW LABAN 2

12, March .2017

CHYUM MUNGGA DAW 1

Npawt Nhpang 12 : 1-4.

Ya hti na gaw Npawt Nhpang laika hta na rai nga ai.

Madu gaw Abram hpe, tsun wu ai gaw: Na a buga hte na a amyu, na nwa a nta de nna pru nhtawm, ngai nang hpe madun dan na mung de sa wa su. Ngai nang hpe amyu kaba shatai na de ai: nang hpe ngai shaman ya de ai hte, na a amying hpe ngai galu kaba shangun na rai nna, shaman chyeju lu la na matu, masha ni na a amying hpe gang lang na mara ai. Nang hpe shaman ai wa hpe, ngai shaman ya na we ai; nang hpe n gawn n sawn di kau ai wa hpe, ngai dagam kau na nngai. Ga ntsa na amyu baw shagu gaw na a marang e gumring gumrat ai chyeju hkam la na mara ai, ngu nna Madu gaw Abram hpe shaga la wu ai. Dai rai nna, Abram gaw, Madu shaga wuai hte maren, pru sa wa ai.

Ya hti ai gaw Karai Kasang a mungga rai nga ai.

CHYUM MUNGGA DAW 2
2 Timohti 1 : 8-10
Ya hti na gaw Saradaw Timohti hpe San Pawlu shagun dat ai laika lahkawng hta na rai nga ai.

Hkristu a kasa rai nga ai, ngai Pawlu gaw, ngai sha Timohti hpe ga shana dat nngai. Karai Kasang jaw ai n-gun atsam hpe kam hpa let, Kabu Gara shiga a majaw nang hkrum ang ai ru tsang ai hpe hkam sharang la u. Karai Kasang gaw, anhte a magam bungli a majaw n rai, shi yaw shada ai hte maren, shi a chyeju hte anhte hpe hkye hkrang la nna, chyoi pra ai ni tai wa lu na matu, shi anhte hpe shaga da mani ai. Dai chyeju lam, moi chyaloi nhkoi kaw nna, Hkristu Yesu hta e shi anhte hpe jaw da mani ai; rai timung, anhte a Hkye La Madu Yesu Hkristu ga ntsa e paw pru ai majaw, ya e shadan shaleng dat nu ai. Kaning rai nme law, Yesu Madu gaw, si hkrung si htan a atsam hpe jahten kau ya nna, dai Kabu Gara Shiga a marang e, asak hkrung ai lam hpe mung, htani htana nhten nbya re ai lam hpe mung, shi shadan dan nu ai.

Ya hti ai gaw Karai Kasang a mungga rai nga ai.

KABU GARA SHIGA

Mahte 17 : 1-9.

Ya hti na gaw Mahte a laika hta na Kabu Gara shiga rai nga ai.

Yesu gaw, Petru, Yaku hte shi a kanau Yawhan hpe shaga la nna, tsaw ai bum ntsa de shanhte hpe hkrai woi lung mu ai. Shaloi shanhte a man e, shi a hpraw nsam galai mat nna, shi a myiman jan zawn htoi kabrim ai hte, shi a hpun palawng hkyen zawn hpraw tu wa ai. Dai hta n-ga, Mawshe yan Elia mung, Yesu hte ga shaga nga ai hpe shanhte dan dan mu lu ma ai. Shing rai Petrugaw, Madu e, ndai yang e anhte nga nga na, gade pyaw la a hka!

Nang hkraw n yang gaw, nang e ginsum masum, na a matu langai mi, Mawshe a matu langai mi, Elia a matu langai mi, anhte gap saga, ngu nna Yesu hpe tsun wu ai. Petru gaw dai ga naw tsun nga yang, htoi tu ai summwi shanhte hpe ka-up nga ai hte, dai summwi hta na nsen ngoi pru nna, ndai wa gaw, ngai sharawng awng ai, nye a tsawra ai Kasha rai nga ai; shi hpe madat mara nga mu, nga ai. Sape ni dai ga hpe na jang, ga de dingnyawm dagup nna, nachying hkrit gari nga ma ai. Shaloi Yesu gaw shanhte hpe sa ahtawk nna, rawt mu, hkum hkrit nga myit, ngu mu ai. Shanhte mada yu jang, Yesu hta kaga kadai hpe mung n mu lu ma ai.

Ya dai bum de nna shanhte yu hkrat wa nga yang, Yesu gaw, Masha Kasha si ai ni kaw na garai n hkrung rawt yang, ndai shingran hpe kadai hpe mung hkum tsun dan mu, ngu nna shanhte hpe hkang dat mu ai.

Ya hti ai gaw Madu a Kabu Gara shiga rai nga ai.

LUSHA GAM LADAW LABAN (1) NA MUNGGA

Lu sha gam aten ladaw hpe wan wu chya ai laban hpang masum ya shani hta hpang nna dai ni gaw lusha gam ai aten ladaw a shawng nnan na laban shani rai nga ai. Atum kasha langai mi kaw nna tu wa ai hkai li langai gaw kaba wa nna apu asi si ngut ai hpang, hpang jahtum na aten hta hten za mat wa ai hpe wanwu hte shadawn mai ai zawn shinggyim masha a sakprat rawt jat galu kaba wa ai hpang hten za mat nna, ga run teng sha bai tai ma na rai nga ai.

Lu sha gam ai aten ladaw hta n-ngang grin ai shinggyim masha a asak aprat hpe myit dum nna ngang grin ai asak aprat hpe lu la na matu shakut shaja ra ai hpe myit shadum ya nga ai. Dai re ai majaw, myit malai lu nna Kabu Gara Shiga hpe kam hpa sak hkrung na matu mung shadum ya nga ai.

Lu sha gam ai aten ladaw hta akyu hpyi ai, lu sha gam ai hte, ra kadawn ai ni hpe jaw jau ai lam ni galaw sa let, wenyi n-gun atsam lu la nna kadun la ai tinang a asak aprat hpe hpu ging ai hte nga sa lu u ga.

NA A HKA-PUNG HPE SUNG AI DE JAHKRAT U

Kalang mi na sanghpaw li langai mi gaw nbung laru hkrum hkra ai majaw, Amazon hka nu hta n lu hkawm taw ai. Aten na wa ai hte rau, sanghpaw masha ni ‘lu hka’ n lu mat sai. Gam mi arawng, sanghpaw lithkam wa gaw dai makau mayang na kaga sanghpaw langai mi hte matut mahkai lu la sai. “Chyeju hte ‘lu hka’ naw sa jaw rit” ngu shiga shana dat ai. Dai shaloi jang, “na a hkapung hpe sung ai de jahkrat u” ngu ai shiga lu la sai. Kaga sanghpaw li na ni shala ai shadu nna lithkam wa gaw grau hkrit wa sai. Loi mi na ai hpang shi a ningtau wa mung, shiga kalang bai sa yu na hpaji jaw wa sai. Dai majaw, ‘garum la marit lo, anhte luhka n lu sa ga ai’ ngu nna bai sa dat ai. Aten kadun hta sha, ‘na a hka pung hpe sung ai de jahkrat u’ ngu ai mina shiga sha bai lu la ai. Dai majaw, lithkam wa mung chyam yu na matu myit lu ni ai. Sanghpaw la ni, shanhte a hka pung kaba hpe sung ai de dip jahkrat dat ai. Bai gang shapraw la ai shaloi, Amazon hka nu kata kaw nna san seng ai, lu hka kaja hpe lu la nu ai.

Zaibrujang e nga hkawm ai ten, Madu Yesu gaw, mahkrum madup law ai, yak ai hte zen ai hpyen hte hkrum katut sai. Anhte maram lu ai hte maren, satan wa gaw Madu Yesu shut hpyit na matu adding tawk n-gung lau ai. Anhte shinggyim masha ni ra marin ai; apyaw angawn sha rai nga ai prat, masha kaga ni tinang hpe myit shang sha na lam, tinang ra ai hpe lu la ai atsam, zawn re ai ni hpe jai lang ai.

Dai zawn re ai agung alau de Madu Yesu kadawng bang ai rai yang, shanhte ni n-gun ja wa ai rai nna, dai a marang e hkum pat na yak wa ai hte maren, dai gaw mara de du na hpe satan wa chye da nu ai. Madu Yesu, satan wa hpe bai htang tsun ai mung hpaji rawng nga ai. Shawng nnan, satan wa a hpaji jaw ai hpe kalang ta ningdang kau lu ai hpe anhte chye ga ai. Hta n-ga, Chyum laika na Karai a Mungga ni hpe mung mahta nna tsun dan sai. Karai Kasang a atsam hpe jai lang let Madu Yesu gaw satan a agung alau hpe dang manga kau lu ai lam, anhte hpe sharin ya sai. Shi Madu galaw dat ai amu magam a majaw byin wa na lam hpe mung, shawa masha ni hkawhkam dang mayu ai lam ni hpe mung, sutgan law law lu su na lam hpe mung, n marin hkra shi a myit hpe up hkang tawn da lu sai. Dai hpang, Yesu gaw, ‘satan e, pru mat wa u, dai Madu Na a Karai Kasang hpe nang nawku lu na rai nna, Shi hpe hkrai daw jau lu na re ai’, nga nna satan hpe gawt kau nu ai. Lama na, satan a gawng kya ai hpe chye na yang, anhte ni shanhte hpe dang manga kau lu na re.

Gashadawn, wudang hpe satan n dawng n-yawt ai hpe anhte chye ai rai yang, Madu Yesu hte ani sha anhte nga nna, shi a wunma hte nni nkri hkam la ai lam hpe sawn sumru yu ai marang e, mai kaja ai magam bungli galaw ai hte akyu hpyi shaja ai prat de anhte du wa lu na rai nga ai. Dai lam gaw, anhte hpe n-gun shaja ya na rai nna, “nat gaw kadai wa hpe mahtang mayu kau lu na, nga nna shabam ai hkang hkyi zawn, ningwan kahkrang hkawm nga ai”, (1 Pet 5:8) ngu ai kasa Petru tsun ai nat hpe anhte dang manga kau lu na rai nga ai.

Rai timung, anhte a hka pung hpe sung ai de jahkrat ra nga ai. Lama na anhte a wenyi lam yan sung ai rai yang, grai zen ai gumlau nat hpe dang manga kau lu na ra kadawn ai san seng ai salum hte atsam ningja hpe lu la na rai nga ai.

LUSHA GAM LADAW LABAN (1) NA CHYUM LAIKA

LUSHA GAM AI LADAW LABAN 1

5th March,2017

CHYUM MUNGGA DAW 1

Npawt nhpang : 7-9, 3:1-7.

Ya hti na gaw Npawt nhpang laika hta na rai nga ai. Madu Karai Kasang gaw aga hta na ga yun hte shinggyim hkrang shachyaw wu ai rai nna, dai masha a ladi hta hkrung nga ai nsoi nsa kawut bang ya ai: shaloi shinggyim masha gaw hkrung nga ai nsa wenyi rawng ai masha tai wa sai. Dai hpang Madu Karai Kasang gaw, sinpraw maga na Edin ngu ai shara e, sun langai mi hkai lajang da wu ai: dai kaw e, shi shachyaw ai shinggyim masha hpe nga shangun da wu ai.

Ya Madu Karai Kasang gaw yu tsawm ai hte, sha na matu mai kaja ai hpun amyu myu hpe, ga hta na tu shangun ai: dai sun ka-ang e, asak jahkrung jaw ai hpun hte, kaja ai hte n kaja ai hpe chye ginhka shangun ai hpun mung tu nga ai.

Ya lapu gaw, Madu Karai Kasang hpan da ai dusat nhprang mahkra hta hpaji grau rawng nga ai. Dai lapu gaw shawng na numsha hpe, ndai sun hta tu ai hpun mahkra hta na, nan n sha lu na myit dai, nga nna Karai Kasang kaja wa tsun sa ni? ngu nna Ewa hpe san wu ai. Shaloi dai numsha gaw, ndai sun hta tu ai hpun ni a asi hpe an sha lu ga ai, rai timung, nan si ai n hkrum myit ga, sun a ka-ang e tu ai hpun a asi hpe nan n sha lu na myit dai; dai hpe mung hkum hkra mu, nga nna Karai Kasang tsun da nu ai, ngu nna lapu hpe htan ya wu ai. Dai rai nna lapu gaw, nan kaja wa teng teng n si na myit dai. Dai namsi hpe sha ai nhtoi hta, nan a myi hpaw nna, kaja ai hte n kaja ai hpe chye ginhka na ra ai majaw, Karai Kasang zawn nan tai wa na marin dai; kaja wa Karai Kasang dai lam hpe chye chyalu rai nga ai, ngu nna dai numsha hpe tsun wu ai. Shaloi, hpun dai gaw sha na matu mai kaja nga ai mung, mada yu ai shaloi tsawm la ai hpe mung, hpaji lu la na matu masha ra sharawng ai hpun rai nga ai hpe mung, dai numsha mu jang, dai hpun hta na asi di sha wu ai: madu wa hpe mung shi agaw jaw wu ai rai nna, Adam mung sha wu ai. Dai shaloi shan lahkawng a myi hpaw wa nna, singgu krin rai nga ma ai hpe dum chye ma ai. Dai rai nna, shan gaw lakum lap chywi matut nna, tinang a matu dangpai galaw ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 5 : 12-19.

Ya hti na gaw, Roma masha ni hpang de San Pawlu shagun dat ai laika hta na rai nga ai.

Hpu nau ni e, Masha langai mi a jaw e, shut hpyit mara mungkan ga e shang wa nna, mara a majaw si hkrung si htan shang nang wa ai hte maren, masha yawng mayawng mara kap nga ma ai majaw, nlang kaw e si hkrung si htan du bang wa sai. Mawshe a htung dingsa garai n nga yang, shut hpyit mara mungkan ga e nga nga sai; rai timung tara n da ai laman e mara shagun ai n nga ai. Ngai tsun mayu ai gaw, Adam shut hpyit kau sai majaw, tara tawt lai ai amu n galaw ai ni a ntsa e pyi, Adam kaw nna Mawshe a prat du hkra, si hkrung si htan up hkang nga sai. Adam gaw, “Du Na Ra ai Wa” kumla rai nga ai.

Rai timung, chyeju kumhpa lam gaw, tara tawt lai ai zawn nrai; hpa majaw nga yang marai langai mi a jaw e, yawng mayawng si mat sa yang gaw, Yesu Hkristu ngu ai masha langai mi a marang e, Karai Kasang a chyeju ningsang gaw, masha lanlak a matu grau nna law htam wa sai rai nga ai.

Bai, dai chyeju kumhpa gaw, marai langai mi galaw ai shut hpyit mara hte grai shai nga ai; kaning rai nme nga yang, tara tawt lai ai amu langai mi a jaw e, tara jeyang nhtawm, daw dan ai lam byin pru sai. Ya e, tara tawt lai ai amu law law galaw ai hpang, ding hpring la lu hkra chyeju kumhpa pru wa sai.

Dai hta kaga, marai langai mi tara tawt lai ai amu a majaw si hkrung si htan up hkang nga sa yang gaw, n taw n tsang ai chyeju ningsang hte, ding hpring shangun ai kumhpa hpe hkam la sai ni gaw, Yesu Hkristu ngu ai wa langai mi a marang e grau nna asak hkrung ai hte up hkang nga na mara ai. Dai rai nna, tara tawt lai ai amu langai mi a majaw, masha yawng hte gaw daw dan ai hkrum ma ai hte maren, ding hpring ai amu langai mi a jaw e, masha yawng mayawng ding hpring wa lu nna, asak sumdan lu la manu ai. Masha langai mi a n madat mara ai a majaw, nlang hte gaw mara kap ai ni tai wa sai hte maren, marai langai mi a madat mara ai lam a majaw, masha lanlak ding hpring ai ni tai lu na mara ai. 

Ya hti ai gaw Karai Kasang a mungga rai nga ai.

KABU GARA SHIGA 

Mahte 4: 1-11.

Ya hti na gaw Mahte a laika hta na Kabu Gara shiga rai nga ai.

Nat e gung lau ai hkrum na matu, dai Wenyi gaw Yesu hpe nam mali de woi sa wu ai. Ya, nhtoi mali shi ya, shana mali shi na tup, Yesu lusha gam ai hpang, kawsi hkrum nga ai. Shaloi dai gung lau ai wa shi kaw du nna, Nang Karai Kasang a Kasha rai yang gaw, ndai nlung ni hpe Muk tai mu ga, nga nna hkang dat u, ngu wu ai. Yesu chyawm gaw, Masha gaw muk hte sha hkrung nga lu ai n rai; Karai Kasang a n-gup hta na pru ai mungga mahkra hte mung hkrung nga lu ai, nga nna ka da ai, ngu nna nat hpe htan ya wu ai.

Shaloi nat gaw dai chyoi pra ai mare de Yesu hpe woi sa nna, nawku htingnu a nchyun e shadun da nhtawm, Nang Karai Kasang a Kasha rai yang gaw, na a hkum hpe le de jahkrat dat u; kaning rai nme law, nlung hta, na a lagaw n ahtu u ga, na a matu shi a lamu kasa ni hpe hkang da nna, shanhte a lata hta nang hpe pawn la na mara ai, nga nna Chyum Laika hta ka da ai, ngu nna tsun wu ai. Yesu gaw, Na a Madu Karai Kasang hpe nang chyam yu lu na n rai, nga nna ka da ai ga mung Chyum Laika hta rawng nga ai, ngu nna nat hpe htan ya wu ai.

Bai, dai gung lau ai nat gaw, nachying tsaw ai bum ntsa de Yesu hpe woi lung nna, mungkan ga mungdan yawng mayawng hte, de a arawng sadang mahkra hpe madun dan nhtawm, Nang dingnyawm nna ngai hpe nawku yang gaw, ndai yawng mayawng hte hpe, ngai nang hpe jaw na we ai, ngu wu ai. Shaloi, Yesu gaw, Satan e, pru mat wa su; na a Madu Karai Kasang hpe nang nawku lu na rai nna, shi hpe chyu sha daw jau lu na ndai, nga nna Chyum Laika hta ka da ai, ngu nna shi hpe htan wu ai. Shaloi dai nat pru mat wa ai hte, lamu kasa ni Yesu hpe sa galaw daw ma ai. 

Ya hti ai gaw Madu a Kabu Gara shiga rai nga ai.