LUSHA GAM LADAW LABAN (2) NA CHYUM LAIKA

LUSHA GAM AI LADAW LABAN 2

12, March .2017

CHYUM MUNGGA DAW 1

Npawt Nhpang 12 : 1-4.

Ya hti na gaw Npawt Nhpang laika hta na rai nga ai.

Madu gaw Abram hpe, tsun wu ai gaw: Na a buga hte na a amyu, na nwa a nta de nna pru nhtawm, ngai nang hpe madun dan na mung de sa wa su. Ngai nang hpe amyu kaba shatai na de ai: nang hpe ngai shaman ya de ai hte, na a amying hpe ngai galu kaba shangun na rai nna, shaman chyeju lu la na matu, masha ni na a amying hpe gang lang na mara ai. Nang hpe shaman ai wa hpe, ngai shaman ya na we ai; nang hpe n gawn n sawn di kau ai wa hpe, ngai dagam kau na nngai. Ga ntsa na amyu baw shagu gaw na a marang e gumring gumrat ai chyeju hkam la na mara ai, ngu nna Madu gaw Abram hpe shaga la wu ai. Dai rai nna, Abram gaw, Madu shaga wuai hte maren, pru sa wa ai.

Ya hti ai gaw Karai Kasang a mungga rai nga ai.

CHYUM MUNGGA DAW 2
2 Timohti 1 : 8-10
Ya hti na gaw Saradaw Timohti hpe San Pawlu shagun dat ai laika lahkawng hta na rai nga ai.

Hkristu a kasa rai nga ai, ngai Pawlu gaw, ngai sha Timohti hpe ga shana dat nngai. Karai Kasang jaw ai n-gun atsam hpe kam hpa let, Kabu Gara shiga a majaw nang hkrum ang ai ru tsang ai hpe hkam sharang la u. Karai Kasang gaw, anhte a magam bungli a majaw n rai, shi yaw shada ai hte maren, shi a chyeju hte anhte hpe hkye hkrang la nna, chyoi pra ai ni tai wa lu na matu, shi anhte hpe shaga da mani ai. Dai chyeju lam, moi chyaloi nhkoi kaw nna, Hkristu Yesu hta e shi anhte hpe jaw da mani ai; rai timung, anhte a Hkye La Madu Yesu Hkristu ga ntsa e paw pru ai majaw, ya e shadan shaleng dat nu ai. Kaning rai nme law, Yesu Madu gaw, si hkrung si htan a atsam hpe jahten kau ya nna, dai Kabu Gara Shiga a marang e, asak hkrung ai lam hpe mung, htani htana nhten nbya re ai lam hpe mung, shi shadan dan nu ai.

Ya hti ai gaw Karai Kasang a mungga rai nga ai.

KABU GARA SHIGA

Mahte 17 : 1-9.

Ya hti na gaw Mahte a laika hta na Kabu Gara shiga rai nga ai.

Yesu gaw, Petru, Yaku hte shi a kanau Yawhan hpe shaga la nna, tsaw ai bum ntsa de shanhte hpe hkrai woi lung mu ai. Shaloi shanhte a man e, shi a hpraw nsam galai mat nna, shi a myiman jan zawn htoi kabrim ai hte, shi a hpun palawng hkyen zawn hpraw tu wa ai. Dai hta n-ga, Mawshe yan Elia mung, Yesu hte ga shaga nga ai hpe shanhte dan dan mu lu ma ai. Shing rai Petrugaw, Madu e, ndai yang e anhte nga nga na, gade pyaw la a hka!

Nang hkraw n yang gaw, nang e ginsum masum, na a matu langai mi, Mawshe a matu langai mi, Elia a matu langai mi, anhte gap saga, ngu nna Yesu hpe tsun wu ai. Petru gaw dai ga naw tsun nga yang, htoi tu ai summwi shanhte hpe ka-up nga ai hte, dai summwi hta na nsen ngoi pru nna, ndai wa gaw, ngai sharawng awng ai, nye a tsawra ai Kasha rai nga ai; shi hpe madat mara nga mu, nga ai. Sape ni dai ga hpe na jang, ga de dingnyawm dagup nna, nachying hkrit gari nga ma ai. Shaloi Yesu gaw shanhte hpe sa ahtawk nna, rawt mu, hkum hkrit nga myit, ngu mu ai. Shanhte mada yu jang, Yesu hta kaga kadai hpe mung n mu lu ma ai.

Ya dai bum de nna shanhte yu hkrat wa nga yang, Yesu gaw, Masha Kasha si ai ni kaw na garai n hkrung rawt yang, ndai shingran hpe kadai hpe mung hkum tsun dan mu, ngu nna shanhte hpe hkang dat mu ai.

Ya hti ai gaw Madu a Kabu Gara shiga rai nga ai.

LUSHA GAM LADAW LABAN (1) NA MUNGGA

Lu sha gam aten ladaw hpe wan wu chya ai laban hpang masum ya shani hta hpang nna dai ni gaw lusha gam ai aten ladaw a shawng nnan na laban shani rai nga ai. Atum kasha langai mi kaw nna tu wa ai hkai li langai gaw kaba wa nna apu asi si ngut ai hpang, hpang jahtum na aten hta hten za mat wa ai hpe wanwu hte shadawn mai ai zawn shinggyim masha a sakprat rawt jat galu kaba wa ai hpang hten za mat nna, ga run teng sha bai tai ma na rai nga ai.

Lu sha gam ai aten ladaw hta n-ngang grin ai shinggyim masha a asak aprat hpe myit dum nna ngang grin ai asak aprat hpe lu la na matu shakut shaja ra ai hpe myit shadum ya nga ai. Dai re ai majaw, myit malai lu nna Kabu Gara Shiga hpe kam hpa sak hkrung na matu mung shadum ya nga ai.

Lu sha gam ai aten ladaw hta akyu hpyi ai, lu sha gam ai hte, ra kadawn ai ni hpe jaw jau ai lam ni galaw sa let, wenyi n-gun atsam lu la nna kadun la ai tinang a asak aprat hpe hpu ging ai hte nga sa lu u ga.

NA A HKA-PUNG HPE SUNG AI DE JAHKRAT U

Kalang mi na sanghpaw li langai mi gaw nbung laru hkrum hkra ai majaw, Amazon hka nu hta n lu hkawm taw ai. Aten na wa ai hte rau, sanghpaw masha ni ‘lu hka’ n lu mat sai. Gam mi arawng, sanghpaw lithkam wa gaw dai makau mayang na kaga sanghpaw langai mi hte matut mahkai lu la sai. “Chyeju hte ‘lu hka’ naw sa jaw rit” ngu shiga shana dat ai. Dai shaloi jang, “na a hkapung hpe sung ai de jahkrat u” ngu ai shiga lu la sai. Kaga sanghpaw li na ni shala ai shadu nna lithkam wa gaw grau hkrit wa sai. Loi mi na ai hpang shi a ningtau wa mung, shiga kalang bai sa yu na hpaji jaw wa sai. Dai majaw, ‘garum la marit lo, anhte luhka n lu sa ga ai’ ngu nna bai sa dat ai. Aten kadun hta sha, ‘na a hka pung hpe sung ai de jahkrat u’ ngu ai mina shiga sha bai lu la ai. Dai majaw, lithkam wa mung chyam yu na matu myit lu ni ai. Sanghpaw la ni, shanhte a hka pung kaba hpe sung ai de dip jahkrat dat ai. Bai gang shapraw la ai shaloi, Amazon hka nu kata kaw nna san seng ai, lu hka kaja hpe lu la nu ai.

Zaibrujang e nga hkawm ai ten, Madu Yesu gaw, mahkrum madup law ai, yak ai hte zen ai hpyen hte hkrum katut sai. Anhte maram lu ai hte maren, satan wa gaw Madu Yesu shut hpyit na matu adding tawk n-gung lau ai. Anhte shinggyim masha ni ra marin ai; apyaw angawn sha rai nga ai prat, masha kaga ni tinang hpe myit shang sha na lam, tinang ra ai hpe lu la ai atsam, zawn re ai ni hpe jai lang ai.

Dai zawn re ai agung alau de Madu Yesu kadawng bang ai rai yang, shanhte ni n-gun ja wa ai rai nna, dai a marang e hkum pat na yak wa ai hte maren, dai gaw mara de du na hpe satan wa chye da nu ai. Madu Yesu, satan wa hpe bai htang tsun ai mung hpaji rawng nga ai. Shawng nnan, satan wa a hpaji jaw ai hpe kalang ta ningdang kau lu ai hpe anhte chye ga ai. Hta n-ga, Chyum laika na Karai a Mungga ni hpe mung mahta nna tsun dan sai. Karai Kasang a atsam hpe jai lang let Madu Yesu gaw satan a agung alau hpe dang manga kau lu ai lam, anhte hpe sharin ya sai. Shi Madu galaw dat ai amu magam a majaw byin wa na lam hpe mung, shawa masha ni hkawhkam dang mayu ai lam ni hpe mung, sutgan law law lu su na lam hpe mung, n marin hkra shi a myit hpe up hkang tawn da lu sai. Dai hpang, Yesu gaw, ‘satan e, pru mat wa u, dai Madu Na a Karai Kasang hpe nang nawku lu na rai nna, Shi hpe hkrai daw jau lu na re ai’, nga nna satan hpe gawt kau nu ai. Lama na, satan a gawng kya ai hpe chye na yang, anhte ni shanhte hpe dang manga kau lu na re.

Gashadawn, wudang hpe satan n dawng n-yawt ai hpe anhte chye ai rai yang, Madu Yesu hte ani sha anhte nga nna, shi a wunma hte nni nkri hkam la ai lam hpe sawn sumru yu ai marang e, mai kaja ai magam bungli galaw ai hte akyu hpyi shaja ai prat de anhte du wa lu na rai nga ai. Dai lam gaw, anhte hpe n-gun shaja ya na rai nna, “nat gaw kadai wa hpe mahtang mayu kau lu na, nga nna shabam ai hkang hkyi zawn, ningwan kahkrang hkawm nga ai”, (1 Pet 5:8) ngu ai kasa Petru tsun ai nat hpe anhte dang manga kau lu na rai nga ai.

Rai timung, anhte a hka pung hpe sung ai de jahkrat ra nga ai. Lama na anhte a wenyi lam yan sung ai rai yang, grai zen ai gumlau nat hpe dang manga kau lu na ra kadawn ai san seng ai salum hte atsam ningja hpe lu la na rai nga ai.

LUSHA GAM LADAW LABAN (1) NA CHYUM LAIKA

LUSHA GAM AI LADAW LABAN 1

5th March,2017

CHYUM MUNGGA DAW 1

Npawt nhpang : 7-9, 3:1-7.

Ya hti na gaw Npawt nhpang laika hta na rai nga ai. Madu Karai Kasang gaw aga hta na ga yun hte shinggyim hkrang shachyaw wu ai rai nna, dai masha a ladi hta hkrung nga ai nsoi nsa kawut bang ya ai: shaloi shinggyim masha gaw hkrung nga ai nsa wenyi rawng ai masha tai wa sai. Dai hpang Madu Karai Kasang gaw, sinpraw maga na Edin ngu ai shara e, sun langai mi hkai lajang da wu ai: dai kaw e, shi shachyaw ai shinggyim masha hpe nga shangun da wu ai.

Ya Madu Karai Kasang gaw yu tsawm ai hte, sha na matu mai kaja ai hpun amyu myu hpe, ga hta na tu shangun ai: dai sun ka-ang e, asak jahkrung jaw ai hpun hte, kaja ai hte n kaja ai hpe chye ginhka shangun ai hpun mung tu nga ai.

Ya lapu gaw, Madu Karai Kasang hpan da ai dusat nhprang mahkra hta hpaji grau rawng nga ai. Dai lapu gaw shawng na numsha hpe, ndai sun hta tu ai hpun mahkra hta na, nan n sha lu na myit dai, nga nna Karai Kasang kaja wa tsun sa ni? ngu nna Ewa hpe san wu ai. Shaloi dai numsha gaw, ndai sun hta tu ai hpun ni a asi hpe an sha lu ga ai, rai timung, nan si ai n hkrum myit ga, sun a ka-ang e tu ai hpun a asi hpe nan n sha lu na myit dai; dai hpe mung hkum hkra mu, nga nna Karai Kasang tsun da nu ai, ngu nna lapu hpe htan ya wu ai. Dai rai nna lapu gaw, nan kaja wa teng teng n si na myit dai. Dai namsi hpe sha ai nhtoi hta, nan a myi hpaw nna, kaja ai hte n kaja ai hpe chye ginhka na ra ai majaw, Karai Kasang zawn nan tai wa na marin dai; kaja wa Karai Kasang dai lam hpe chye chyalu rai nga ai, ngu nna dai numsha hpe tsun wu ai. Shaloi, hpun dai gaw sha na matu mai kaja nga ai mung, mada yu ai shaloi tsawm la ai hpe mung, hpaji lu la na matu masha ra sharawng ai hpun rai nga ai hpe mung, dai numsha mu jang, dai hpun hta na asi di sha wu ai: madu wa hpe mung shi agaw jaw wu ai rai nna, Adam mung sha wu ai. Dai shaloi shan lahkawng a myi hpaw wa nna, singgu krin rai nga ma ai hpe dum chye ma ai. Dai rai nna, shan gaw lakum lap chywi matut nna, tinang a matu dangpai galaw ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Roma 5 : 12-19.

Ya hti na gaw, Roma masha ni hpang de San Pawlu shagun dat ai laika hta na rai nga ai.

Hpu nau ni e, Masha langai mi a jaw e, shut hpyit mara mungkan ga e shang wa nna, mara a majaw si hkrung si htan shang nang wa ai hte maren, masha yawng mayawng mara kap nga ma ai majaw, nlang kaw e si hkrung si htan du bang wa sai. Mawshe a htung dingsa garai n nga yang, shut hpyit mara mungkan ga e nga nga sai; rai timung tara n da ai laman e mara shagun ai n nga ai. Ngai tsun mayu ai gaw, Adam shut hpyit kau sai majaw, tara tawt lai ai amu n galaw ai ni a ntsa e pyi, Adam kaw nna Mawshe a prat du hkra, si hkrung si htan up hkang nga sai. Adam gaw, “Du Na Ra ai Wa” kumla rai nga ai.

Rai timung, chyeju kumhpa lam gaw, tara tawt lai ai zawn nrai; hpa majaw nga yang marai langai mi a jaw e, yawng mayawng si mat sa yang gaw, Yesu Hkristu ngu ai masha langai mi a marang e, Karai Kasang a chyeju ningsang gaw, masha lanlak a matu grau nna law htam wa sai rai nga ai.

Bai, dai chyeju kumhpa gaw, marai langai mi galaw ai shut hpyit mara hte grai shai nga ai; kaning rai nme nga yang, tara tawt lai ai amu langai mi a jaw e, tara jeyang nhtawm, daw dan ai lam byin pru sai. Ya e, tara tawt lai ai amu law law galaw ai hpang, ding hpring la lu hkra chyeju kumhpa pru wa sai.

Dai hta kaga, marai langai mi tara tawt lai ai amu a majaw si hkrung si htan up hkang nga sa yang gaw, n taw n tsang ai chyeju ningsang hte, ding hpring shangun ai kumhpa hpe hkam la sai ni gaw, Yesu Hkristu ngu ai wa langai mi a marang e grau nna asak hkrung ai hte up hkang nga na mara ai. Dai rai nna, tara tawt lai ai amu langai mi a majaw, masha yawng hte gaw daw dan ai hkrum ma ai hte maren, ding hpring ai amu langai mi a jaw e, masha yawng mayawng ding hpring wa lu nna, asak sumdan lu la manu ai. Masha langai mi a n madat mara ai a majaw, nlang hte gaw mara kap ai ni tai wa sai hte maren, marai langai mi a madat mara ai lam a majaw, masha lanlak ding hpring ai ni tai lu na mara ai. 

Ya hti ai gaw Karai Kasang a mungga rai nga ai.

KABU GARA SHIGA 

Mahte 4: 1-11.

Ya hti na gaw Mahte a laika hta na Kabu Gara shiga rai nga ai.

Nat e gung lau ai hkrum na matu, dai Wenyi gaw Yesu hpe nam mali de woi sa wu ai. Ya, nhtoi mali shi ya, shana mali shi na tup, Yesu lusha gam ai hpang, kawsi hkrum nga ai. Shaloi dai gung lau ai wa shi kaw du nna, Nang Karai Kasang a Kasha rai yang gaw, ndai nlung ni hpe Muk tai mu ga, nga nna hkang dat u, ngu wu ai. Yesu chyawm gaw, Masha gaw muk hte sha hkrung nga lu ai n rai; Karai Kasang a n-gup hta na pru ai mungga mahkra hte mung hkrung nga lu ai, nga nna ka da ai, ngu nna nat hpe htan ya wu ai.

Shaloi nat gaw dai chyoi pra ai mare de Yesu hpe woi sa nna, nawku htingnu a nchyun e shadun da nhtawm, Nang Karai Kasang a Kasha rai yang gaw, na a hkum hpe le de jahkrat dat u; kaning rai nme law, nlung hta, na a lagaw n ahtu u ga, na a matu shi a lamu kasa ni hpe hkang da nna, shanhte a lata hta nang hpe pawn la na mara ai, nga nna Chyum Laika hta ka da ai, ngu nna tsun wu ai. Yesu gaw, Na a Madu Karai Kasang hpe nang chyam yu lu na n rai, nga nna ka da ai ga mung Chyum Laika hta rawng nga ai, ngu nna nat hpe htan ya wu ai.

Bai, dai gung lau ai nat gaw, nachying tsaw ai bum ntsa de Yesu hpe woi lung nna, mungkan ga mungdan yawng mayawng hte, de a arawng sadang mahkra hpe madun dan nhtawm, Nang dingnyawm nna ngai hpe nawku yang gaw, ndai yawng mayawng hte hpe, ngai nang hpe jaw na we ai, ngu wu ai. Shaloi, Yesu gaw, Satan e, pru mat wa su; na a Madu Karai Kasang hpe nang nawku lu na rai nna, shi hpe chyu sha daw jau lu na ndai, nga nna Chyum Laika hta ka da ai, ngu nna shi hpe htan wu ai. Shaloi dai nat pru mat wa ai hte, lamu kasa ni Yesu hpe sa galaw daw ma ai. 

Ya hti ai gaw Madu a Kabu Gara shiga rai nga ai.

PRANWAN LADAW (8) LABAN SHANI NA MUNGGA

Mani, dai ni hte hpawt ni ngu nna aten ladaw masum nga ai rai yang masha law malawng gaw dai ni ngu ai kaw nnga ai sha mani hte hpawt ni ngu ai aten ladaw ni hta chyu nga chye nga ai. Dai rai yang dai ni, dai na na galaw ra ai lam ni, n-gun dat ra ai lam ni hpe hprai mat nna hkrat sum chye nga ai hta n-ga tinang kaw nga ai n-gun lagaw ni yawm mat chye nga ai.

Mani ngu ai aten ladaw hta byin mat wa ai ni hpe chyu myit nga nna anhte a myit masin salum hta n-dawng n-yawt ai lam, pawt sindawng ai lam, matai htang mayu ai lam ni hte masin n-si ai lam ni byin chye ai rai yang dai ni ngu ai aten hta myit hki lit li hkrum chye nga ai.

Hpawt ni ngu ai aten ladaw a matu myit tsang pu ai lam ni byin nna myit hki lit li hkrum chye nga ai. Shing n-rai, tsang n-ra ai nga nna galaw ra ai lam ni hpe n-galaw ai sha pyaw len ai lam ni mung byin chye nga ai.

Dai rai yang Karai Kasang hpe sha kamhpa nna mani ngu ai aten ladaw hta byin lai mat wa sai ni hpe ngam tawn da kau ai hta sha n-ga hpawt ni ngu ai aten na, rai nbyin shi ai lam ni hpe myit tsang pu ai lam nnga ai sha galaw ra ai lam ni hpe kangka ai hte daini na aten hta galaw lu nna awngdang ai ngu ai hpe yawng hkam la lu u ga.

HPAWT NI NA MATU MYIT HKUM TSANG MU

Ngai na asak 10 ning daram hta, German Htinggaw langai mi Uropa dan de na htawt wa nhtawm anhte a htingbu sa tai let nga hpang wa masai. Matsan ai re majaw, kawa gaw shi a lagaw leng hpe dut kau mayu nga ai. Grai hkrak ai lagaw leng dai hta gear law law mung lawm ai majaw, bum lung na mung mai nga ai. 

Aten langai mi hta, dai salang wa, nye wa hpe ga shaga nga ai, ngai na lu ai. Nye wa mung, ngai hpe mu ai re majaw, 'ma nang, lagaw leng dai hpe ra ai kun?, nga san wa ai. "mai byin yang gaw ra ai" ngu ngai htan ya sai. Mayak langai mi chyawm gaw, lagaw leng dai dollar 40 ang ai rai nna, ngai hta mung gumhpraw dai daram n lu ai. Ah wa chyawm gaw, "Ok, ngai shi hpe gumhpraw jaw da na, nang ngai hpe hpang e bai jaw rit" nga nna lagaw leng la da ya sai. 

Lagaw leng dai hpe jawn hkawm yang grai pyaw la ai rai tim, Ah wa hpe gumhpraw bai n htang jaw ra ai hpe mung ngai dum taw nga ai. Dai hpe myit hta bang da nna, bat kru ya shani shagu, ah wa a gungrai seng de sa nna shani tup bungli sa galaw sai. Jahpawt jau e mung, shilaika hkan sa ai amu ngai naw galaw ai. Raitimung, shata mi na ai hpang, ndai amu kaw nna gumhpraw kachyi mi sha lu tam ai hpe ngai mu se ai. 

Ngai bungli grai shakut ai hpe mu ai ah wa gaw, "rai sa, nang dollar shi gaw tam lu sai, ram dik sai. Ngam ai gumhpraw na matu hpa hkum tsang" nga nna tsun ai. Dai hpe myit yu ai marang e, ndai gaw Karai Kasang anhte hpe matut mahkai ai lam hte n bung ai i?. Teng nga ai, anhte yawng hta lit lama ma hpe gun hpai ra nga ai. Mayak loi li nga ai chyawm gaw kadai hta e mung re. Tim, Madu Yesu tsun ai hte maren, dai mayak anhte hpe ka-up da na ahkang n mai jaw ai. Lama na, anhte galaw ra ai lit magam hpe kaja dik ai hte galaw ai rai yang, ngam ai hpe gaw Karai Kasang lajang ya na re. Lai wa sai aten law law hta mung ya aten hta mung, Karai Kasang gaw anhte hpe atsawm sha gawn lajang ya na re. Teng sha wa, htawm hpang e mung, Karai Kasang gaw anhte hpe grai kaja ai hku nna garum nga na rai nga ai.

PRANWAN LADAW (8) LABAN SHANI NA CHYUM LAIKA

PRAN  WAN  LADAW  HTA LABAN  8

26th February 2017

CHYUM MUNGGA DAW 1

Esaia  49:  14-15.

Ya hti na gaw myihtoi Esaia a laika hta na rai nga ai.

Ziun tsun ai gaw: Madu ngai hpe kau da ni ai: Madu gaw ngai hpe malap kau ni ai, nga ai. Madu bai tsun wu ai gaw: numsha gaw tinang shangai ai kasha hpe matsan n dum ai hte chyu chyu ai ma hpe malap kau lu na rai ni? Kaja wa, malap kau timung, ngai nang hpe malap kau lu na n rai.

Ya hti ai gaw Karai Kasang a mungga rai nga ai.

CHYUM MUNGGA DAW  2

1 Korinhtu  4: 1-5.

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, anhte gaw Hkristu a ali ama ni hte, Karai Kasang a sung htum ai lam ni a kunhting ni rai nga ga ai hpe, masha ni shadu nga mu ga. Ya, kunhting tai na matu, kangka re ai wa hpe masha ni ra nga ma ai. Dai rai nna, nanhte ngai hpe jeyang ai, shing n rai, masha ni a tara rung e ngai hpe jeyang ai rai yang, dai hpe ngai hpa ahkyak n shadu nngai; nye a hkum hpe pyi ngai n jeyang nngai. Kaning rai nme law, ngai hta mara nga ai hpe n dum nngai; rai timung, ngai dinghpring nga nngai, ngu nna n tsun lu nngai; Madu she ngai hpe jeyang ai wa rai nga ai.

Dai re majaw, Madu garai n du sa ai laman e, nanhte hkum jeyang nga  mu. Dai Madu gaw nsin hta makoi nga ai lam ni hpe hpaw madun dan nna, masha a myit masin hta rawng ai myit mang hpe shapraw shadan na ra ai. Dai shaloi e, Karai Kasang gaw langai hte langai hpe, tinang ging dan ai hte maren hkap shakawn na ra ai.

Ya hti ai gaw Karai Kasang a mungga rai nga ai.

KABU GARA SHIGA

Mahte  6: 24-34.

Ya hti na gaw Mahte a laika hta na Kabu Gara Shiga rai nga ai.

Yesu shi a sape ni hpe tsun mu ai gaw: kadai rai timung, Madu lahkawng kaw lang lata nchyang chyang lu na n rai; shi langai mi hpe n dawng n yawt nna, kaga hpe tsaw ra na ra ai. Shing n rai, langai mi hta manoi nna, kaga hpe n gawn n sawn di kau na ra ai. Nanhte mung, Karai Kasang hte mungkan sutgan kaw rau chyang lu na myit dai n rai. Dai rai nna, ngai nanhte hpe tsun made ga: nanhte a asak bau na matu, hpa lu sha na hte, nanhte a hkum a matu kaning rai bu hpun lu na hpe hkum tsang nga myit. Asak gaw sha hpa hta grau nga ai; hkum hkrang gaw bu hpun palawng hta grau nga ai, n rai ni? Ntsa malen u ni hpe mada yu mu: shanhte n hkai n dan ma ai, dum hta mung n mahkawng da ma ai, rai timung, sumsing lamu na nanhte a Kawa gaw, shanhte hpe lusha jaw da nga ai. Nanhte gaw shanhte hta grau nga myit dai n rai ni?

Nanhte hta na kadai rai timung, myit tsang let sumru yu ai majaw, tinang a gawng shingyan hpe dawng mi jat la lu myit ni? Dai rai nna, hpun palawng a matu hpa rai myit tsang nga myit ta? Prang na hkalaw pan ni kaning rai kaba wa ma ai hpe myit dum nga mu: dai ni gaw bungli n galaw ai, ari mung n ri ma ai, rai timung, ngai nanhte hpe tsun made ai gaw, Sawlumun pyi shi a hpung shingkang mahkra hte, dai nampan langai mi zawn n bu n hpun lu ai. 

Ai n kam ai ni e, dai ni e nga nna, hpawt ni wan mang hta kabai bang kau ai, nam na tsingdu hpe pyi, Karai Kasang shing rai jahpun ya yang gaw, dai hta grau nna, nanhte hpe jahpun ya na, n rai ni? Dai re ai majaw, anhte hpa sha na, hpa lu na, hpa bu hpun na i? nga nna myit tsang let hkum tsang nga mu. Tara maigan ni  dai nlang hte hpe tam bu nga ma ai; nanhte mahtang dai hku n hkan ra ai; hpa majaw nga yang, dai yawng mayawng hte hpe nanhte ra bu nga ai lam, sumsing lamu na nanhte a Kawa chye nga ai. Dai rai nna, Karai Kasang a mungdan hte, shi a dinghpring ai lam hpe shawng tam nga mu; shaloi dai nlang shi nanhte hpe kahtap jaw na ra ai. Dai rai nna, hpawt ni a matu hkum myit tsang mu; hpawt ni a ru tsang ai lam, hpawt ni a matu rai u ga; dai ni na ru tsang ai gaw, dai ni a matu ram nga ai.

Ya hti ai gaw Madu a Kabu Gara shiga rai nga ai.

PRANWAN LADAW (7) LABAN SHANI NA MUNGGA

Anhte a makau grup yin na masha ni hpe yu dat ai shaloi marai hkum shagu gaw myit kaja rawng ai ni re ngu tsun mai nga. Hpaw majaw nga yang, masha law malawng gaw shanhte hpe tsawra myit madun ai wa hpe teng sha tsawra myit hte bai htang chye nga ai. Tinang hpe nju ndawng ai masha hpe mung nju ndawng ai myit hte bai htang chye nga ai. 

Karai Kasang hpan da ai amyu baw sumhpa hta na masha hte du sat ni gaw hkritung myit (Instinct) hpe machyu nna ganawn mazum hkawm sa chye nga ai. Raitim, Karai Kasang a hkrang sumla hte bung ai anhte shinggyim masha ni gaw hkritung myit sha n-ga myit sawn sumru chye ai atsam hpe mung lu tawn da nga ai. 

Dai rai yang myitmang chye ai shinggyim masha ni gaw kaja ai hte nkaja ai hpe ginghka chye ai hte maren nkaja ai hpe kau da nna kaja ai hpe lata lu na ahkaw ahkang hte atsam rawng ga ai rai yang dai ni na kabu gara shiga hta Madu Yesu tsun da ai hte maren, tinang hpe tsawra ai masha ni hpe sha n-ga n-tsawra ging ai manang wa hpe Karai Kasang yawng hpe maren mara tsawra ai zawn anthe a tsawra myit hpe madun da lu u ga.

KUP TSUP AI

Dai ni na kabu gara shiga gaw kasa Mahte ka matsing da ai Bum ntsa e Madu Yesu sharin shaga ai lam a akri Mungga rai nga ai. Shi a hpang hkan nang ai ni hta nga ra ai kup tsup ai (snr) dinghpring ai lam hpe Madu tsun dan nga ai. Laika ka sara ni hte Hparishe ni hta grau nna dinghpring na lam tsun ai hpe mung anhte na saga ai. "Na a baw sang wa hpe nang tsaw ra lu nna, na hpyen wa hpe n dawng n yawt lu na ndai" nga nna tsun ai ga hpe na la na sai mung Madu Yesu chye da wu ai. "myi a matu myi, wa a matu wa bai htang lu na" nga nna tara lu ai shanhte a matu matai htang ai gaw hkap la mai ai lam rai nga ai. Raitim, Madu Yesu a sape tai na matu gaw dai hta grau ai ding hpring ai lam (snr) kup tsup ai ra kadawn nga ai. Matai  htang na malai, hpyen wa hpe tsaw ra lu na ning dat hkrum sai. Teng sha wa, dai gaw laika ka ai sara ni hte Hparishe ni hta grau nna dinghpring na lam rai sai. "sumsing lamu na nanhte a Kawa gaw kup nga ai hte maren, nanhte mung kup tsup rai nga mu" ngu ai Madu Yesu sharin ai ga hpe anhte malap kau n mai na ga ai. 

Kaja wa sha Sumsing lamu na Kawa Karai zawn anhte mung kup tsup na mai byin ai kun? Hpang na prat e, mara ni yawng tsai mat nna, Sumsing chyeju hpe hkam sha nga ai aten hta gaw mai byin na daram rai na nhten. Raitim, ndai mungkan ga n tsa hta anhte hpe jam jau jaw ai ni hte hpyen wa hte rau anhte nga ra ga ai. Anhte hkra machyi hkrum sai re majaw tara dara ya na myit ra nga ga ai. Dai majaw, Madu Yesu gaw n mai byin ai lam anhte hpe tsun ai kun?, mau shara rai sai. 

Anhte a n-gun atsam hpe sha kam nna galaw hkawm sa ai rai yang gaw n mai byin na re. Madu Yesu anhte hpe myit dinglik shangun mayu ai lam mung dai she rai na re. Tinang a n-gun atsam hpe sha kam let hkawm sa ai rai yang laika ka sara ni hte Hparishe ni hta grau nna dinghpring lu na gaw n mai byin na re. Raitim, Karai Kasang a matsan dum garum la ai hte rai yang anhte ni mai byin lu nga ai. "Karai Kasang hta rai yang n mai byin ai hpa n-nga ai" ngu ai ga hpe mung Madu Yesu shadum ya ai hpe anhte na yu sai. 

Nmai byin na zawn re ai amu magam hpe galaw nna, Shi Madu a hpang hkan nang na shaga let, dai Madu nan sha anhte hpe n-gun atsam jat jaw ya na rai nga ai. Shi Madu garum ya ai majaw sha anhte ni hkawm sa lu na rai nga ai. Rai yang, dai Madu a garum ya ai lam gaw hpa rai na ta?

                    

Dai gaw anhte hpe tut nawng Tsawra ai myit, ning dat ai Tsawra myit hte n-gun shaja ya na tsawra myit rai nga ai. Anhte a tsawra myit e galaw lu ai hte galaw ra ai hpe madun ya ai lam mung rai sai. Anhte prat a tsawra myit, Madu Yesu a tsawra hkrum ai lam gaw kup tsup ding hpring ai de sa wa lu na lam mung rai nga ai.

Sawn sumru mai ai lam; kup tsup dinghpring lu na ngai myit da ai kun? Ngai myit da lu ai hte Hkristu Yesu e tsun sharin ai lam bung nga ai kun?   Kaning re ai masa ni hta bung ai kun? Lama na shai hkat ai rai yang, kaning re ai masa lam ni hta shai nga ai kun? Dai lam ni gaw masha kaga ni hte kanawn mazum ai lam hta akyu jaw ya ai kun?

PRANWAN LADAW (7) LABAN SHANI NA CHYUM LAIKA

PRAN  WAN  LADAW  HTA LABAN  7 

19th February 2017

CHYUM MUNGGA DAW  1

Jaw Jau ai laika  19: 1-2, 17-18.

Ya hti na gaw Jaw Jau ai laika hta na rai nga ai.

Madu nan Mawshe hpe tsun wu ai gaw: Israela a amyu ting hpe ning ngu tsun u: Ngai Madu, nanhte a Karai Kasang Chyoi pra nga nngai hte maren, nanhte mung chyoi pra nga mu. Na a nhpu nnau wa hpe n dawng n yawt ai myit hkum rawng u ga. Na a manang wa mara lu yang, shi hpe teng teng shadum jahprang na ra ai. Shing rai ai a majaw nang mara n lu na ndai. Na a amyu masha ni hpe nang hkum nan matai nhtang lu na; na a htingbu wa a mara hpe hkum matsing da u; na a htingbu wa hpe na a hkum hte maren, nang tsawra lu na ndai: Ngai gaw Madu rai nga nngai.

Ya hti ai gaw Karai Kasang a mungga rai nga ai.

CHYUM MUNGGA DAW  2

1 Korinhtu  3: 16-23.

Ya hti na gaw Korinhtu masha ni hpang de San Pawlu shagun dat ai laika hta na rai nga ai.

Hpu nau ni e, Nanhte gaw Karai Kasang a nawku htingnu rai nga nna, Karai Kasang a Wenyi nanhte hta e rawng nga ai hpe n chye nga myit ni? Marai langai ngai Karai Kasang a nawku htingnu hpe jahten sharun kau yang gaw, Karai Kasang dai wa hpe jahten sharun kau na ra ai; kaning rai nme law, Karai Kasang a nawku htingnu chyoi pra nga ai; nanhte mung dai htingu nan rai nga myit dai.

Kadai rai timung, hkum myit shut mu: nanhte hta na marai langai ngai, ndai mungkan ga na hpaji madang hte sawn yu nna, ngai gaw hpaji rawng ai wa rai nga nngai, nga nna myit lu yang, hpaji byeng-ya majing lu la na matu, shi angawk angak tai wa na ra ai. Hpa majaw nga yang, ndai mungkan ga a hpaji byeng-ya gaw, Karai Kasang a man e angawk angak rai nga ai. Dai rai nna, “ hpaji rawng ai ni hpe, tinang daw ai hpaji lam hta shi shanut kau nu ai” bai, “Hpaji rawng ai ni a myit mang ai lam kaman lila rai nga ai hpe Madu chye nga ai” nga nna Chyum Laika hta ka da nga ai. Shing rai masha a majaw hkum gumrawng nga mu. Yawng mayawng hte gaw nanhte hte seng nga ai. Pawlu hte Apollo mung, Kehpa hte mungkan ga mung, hkrung mahkrung hte si hkrung si htan mung, ya e nga ai hte htawm hpang e nga pra na ra ai ni mung: dai yawng mayawng hte gaw nanhte hte seng ai baw hkrai rai nga ma ai. Nanhte mahtang Hkristu hte seng ai ni rai nga myit dai; Hkristu chyawm gaw Karai Kasang hte seng ai wa rai nga ai.

Ya hti ai gaw Karai Kasang a mungga rai nga ai.

KABU GARA SHIGA

Mahte  5: 38-48.

Ya hti na gaw Mahte a laika hta na Kabu Gara Shiga rai nga ai.

Yesu shi a sape ni hpe tsun mu ai gaw; Myi a matu myi, wa a matu wa, nga nna jaw da ai tara hpe nanhte na yu manit dai. Ngai nanhte hpe tsun made ai gaw: n hkru ai wa hpe hpa mung hkum tai mu. Na a hkra shabyi bye ai wa hpe, maga mi naw jaw ya u. Nang hpe tara dara nna, na a kata palawng la kau mayu ai wa hpe, na a ntsa palawng hpe mung jaw ya u. Nang hpe dip nna, deng mi sa shangun ai wa hte rau, deng lahkawng naw hkan sa u. Nang kaw hpyi ai wa hpe jaw u; nang kaw nna hkoi shap mayu ai wa hpe, hkum koi kau u.

Na a baw sang wa hpe nang tsawra lu nna, na a hpyen wa hpe n dawng n yawt lu na ndai, nga nna tsun ai ga hpe nanhte na yu manit dai. Ngai mahtang nanhte hpe tsun made ai gaw: nanhte a hpyen ni hpe tsawra mu; nanhte hpe zingri zingrat ai ni a matu akyu hpyi mu; shing rai yang gaw, sumsing lamu na nanhte a Kawa a kashu kasha ni tai wa na marin dai. Kaning rai nme law, n kaja ai ni hte kaja ai ni a ntsa e shi a jan hpe pru shangun nga ai; dinghpring ai ni hte n ding n hpring ai ni a ntsa e marang jahtu ya mu ai. Nanhte hpe tsawra ai ni hpe chyu sha tsawra yang gaw, nanhte hpe hpa shakawn shara nga a ta? Kang hta ai ni mung dai hte maren galaw ma ai n rai ni? Nanhte a nhpu nnau ni hpe sha hkrum shaga  yang gaw, hpa shagrau shara nga na myit ta? Dai majaw, sumsing lamu na nanhte a Kawa kup tsup nga ai hte maren, nanhte mung kup tsup rai nga mu.

Ya hti ai gaw Madu a Kabu Gara shiga rai nga ai.