PRANWAN LADAW (31) LABAN SHANI NA CHYUM LAIKA

30th October 2016

CHYUM MUNGGA DAW 1

 HPAJI BYENG-YA 11:22 - 12:2

Ya hti na gaw, Hpaji Byeng-ya laika hta na rai nga ai.

Madu e, mungkan ting gaw Na aman e kaji htum ai joi si hte, ga ntsa de hkrat ai mari nsi langai mi zawn rai nga ai. Rai ti mung, Nang gaw mahkra dang chye ai Madu rai nga ndai majaw, yawng mayawng hpe matsan dum chye nna, shut hpyit ai ni myit malai lu hkra, shanhte a mara hpe n matsing da ndai.

Rai sa, Madu e, nga yawng nga pra hpe Nang tsaw ra nna, hpan tawn da ai arai mahkra hta na, Nang n dawng n yawt ai baw hpa mung n nga ai. Hpa majaw nga yang, arai lama mi hpe Nang n dawng n yawt ai rai yang gaw, dai hpe n galaw tawn da na ndai. Nang Madu n ra yang gaw, hpan da ai baw lama mi kaning rai nga lu na i? Madu lanu lahku ya ai n nga yang gaw, gara hku grin luna i?

Asak hkrung ai ni hpe tsaw ra ai Madu e, yawng mayawng hte gaw Na a hkrai rai nga ai majaw, shanhte hpe matsan du chye nga ndai. Dai re ai majaw, shut hpyit ai ni hpe Nang angwi sha sharin achyin ya nna, shanhte hpe shadum jahprang let, gara hku shut ai lam shanhte hpe madun dan nga ndai. Shing rai, n hkru n kaja ai lam hpe shanhte koi kau lu nna, Nang Madu hpe kamhpa lu na ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

2 HTESALONI 1: 11 -22.

Ya hti na gaw, Htesaloni masha ni hpang de San Pawlu shagun dat ai laika lahkawng hta na rai nga ai.

Nanhte hpe shaga la ai chyeju hte maren ging dan ai hku hkan galaw lu hkra, anhte a Karai Kasang gaw nanhte hpe shadaw shangang ya u ga; mai kaja ai amu galaw na mayu ai myit shagu hpe mung, Karai Kasang Shi a n-gun atsam hte shadik ya nna, makam masham a jaw e nanhte galaw nga ai magam bungli shagu hpe Shi jahkum shatsup ya u ga, ngu nna, nanhte a matu mara anhte tut nawng e akyu a hpyi nga ga ai. Hpa majaw nga yang, anhte a Madu Karai Kasang hte Madu Yesu Hkristu a mying nsang gaw nanhte hta e shagrau ai hkrum lu na hte, nanhte mung shi hta e shagrau ai hkrum lu na myit dai.

Hpu nau ni e, ya anhte a Madu Yesu Hkristu bai du sa na hte, anhte Shi hte rau zup hpawng nga na lam hpe myit yu ga. Madu Yesu a Shani gaw ni magang wa ra ai, nga nna, masha ni tak tsun ai ga hte, tsun shamawng ai ga a majaw mung, anhte shagun dat ai laika zawn san ai laika hta ka da ai majaw mung, myit masin kahpra nna n dum n dam hkum rai myit.

Ya hti ai gaw Karai Kasang a mungga rai nga ai.

KABU GARA SHIGA 

LUKA 19: 1-10.

Ya hti na gaw, Luka a laika hta na Kabu Gara Shiga rai nga ai.

Yesu gaw Yerihku mare de shang nna, mare ka-ang hku lai sa wa ai. Ya Zake mying kang hta ai agyi langai mi nga ai: dai wa gaw sut su ai wa rai nga ai. Yesu gaw kaning san ai wa re ai hpe grai mu mayu ti mung, masha unawng kaba nga ai hte, shi gaw hkum gadun ai majaw, n mu lu wu ai. Dai rai nna Madu hpe mu lu hkra, shi shawng de gat sa nhtawm, Yesu lai sa wa na ra ai lam makau na lakum hpun hta lung dung nga ai.

Dai de du yang Yesu shi hpe mada ya nna, Zake e, alawan yu wa rit; dai ni ngai na a nta e rai na nngai, ngu nna shi hpe tsun wu ai. Shaloi shi alawan yu wa nna, kabu gara ai hte Yesu hpe hkap hkalum la wu ai. Nga manga ni gaw dai hpe mu jang, Yesu gaw mara kap ai wa langai mi kaw shang manam sai, nga nna aput angun nga ma ai. Zake chyawm gaw rawt tsap nna, Madu e, nye a sut rai ka-ang hkup ngai matsan mayan ni hpe karan jaw na we ai; langai ngai hpe mawp sha kau ai rai yang gaw, htam mali ngai bai wa na nngai, ngu nna Madu hpe tsun wu ai.

Shaloi Yesu gaw, Dai ni ndai nta hta hkye hkrang la ai lam du shang sai: kaning rai nme law, shi mung Abraham a kasha rai nga ai. Masha Kasha gaw mat mat ai ni hpe, hkan tam nna hkye hkrang la na matu du sa ai rai nga ai, ngu nna Zake hpe tsun wu ai.

Ya hti ai gaw Madu a Kabu Gara Shiga rai nga ai.

PRANWAN LADAW (30) LABAN SHANI NA MUNGGA

“Tinang a hkum hpe san jep yu ai lam nnga ai wa a prat gaw lachyum npru nga ai,” ngu nna hpaji ninghkring langai mi tsun tawn da ai. Shi tsun mayu ai gaw masha hkum shagu tinang a prat hta kaning rai byin nga ai, kaning re ai masha re ai ngu ai hpe chye lu yang she rawt jat kalu gaba lu nna lachyum pru ai masha langai mi byin tai lu na re.

Kang hta ai wa hte Hparishe yan hpe yu dat ai shaloi, kang hta ai wa gaw tinang a mara hpe dum shai nna Karai Kasang a man hta shagrit shanem ai myit hte kyu hpyi ai rai tim Hparishe wa chyawm gaw manang wa hta grau nna kaja ai ngu nna gum rawng gum tawng ai myit hte akyu hpyi ai rai yang kang hta ai wa a kyu hpyi ai nsen hpe sha Karai Kasang na ya ai re. 

Shut hpyit mara nkap ai masha kadai wa nga ai kun ngu nna galoi mung myit ra ai hte tinang a ra rawng ai lam hpe dum shai yang she shading sharai la lu nna teng man ai lam hta sak hkrung nga sa lu na re. Tinang nchye ai ngu ai hpe dum shai yang she chye chyang ai lam hta hkawm sa lu na re. Tinang kaw nna ai, grau nna myit masin kaja ai ni, ngu nna chye yang she san seng chyoi pra ai lam hta hkawm sa lu na re.

Anhte marai shagu tinang a lam hpe grau grau nna dum shai let mungkan lam hta n-ga, wenyi lam hta mung rawt jat kung hpan wa lu na matu Karai Kasang shaman ya u ga.

TINANG A HKUM HPE SHAWNG YU GA

Magam bungli a majaw Thai mungdan de sa ra ai. Uban hte Chiangmai mare kaba na matsan ai kun dinghku ni hte sa nga let sawk sagawn ai lam ni hpe laban bat (2) galaw ga ai. Dai hpang Bangkok de bai wa nna hta la lu ai, Uhpung uhpawng a, mayak manghkang law law hpe hkaja dinglik yu ga ai. Lani mi hta, manang Jau wa gaw, Bangkok ga na nawku jawng kaba hta Missa hkungga nawng ya na matu ngai hpe saw shaga ai. Dai Jau wa gaw, shi a amu madu, America ga e shaning law law nga yu sai wa hte shachyen ya ai. Dai wa gaw, ngai a mungga hpe ‘Thai’ ga de ga byan ya na wa mung rai nga ai. Missa laman hta, mungga htawn na aten du wa ai shaloi, maumwi langai hpe ngai tsun dan ai. Dai amu madu wa mung Thai hpung masha ni chye na na matu ga byan ya sai. Maumwi tsun dan ngut ai hpang, tsun mayu ai gabaw de ngai ginchyum dat hpang wa sai. Dai aten hta, amu madu wa gaw, shi a ga shajan ni jat bang rai nna ngai tsun ai hta grau galu hkra tsun/byan magang sai. Ngai a shawng de mung shi sa tsap nna, n sen mung shaja, lata hte mawng rai nna hkaw bang wa sai. Ngai mung lahpa hpe apuk la let, ‘ngai tsun ai hta hkum jat bang, ngai a hpang kaw e bai wa tsap u’, ngu na zawn hkam sha lu sai. Rai tim, shawa uhpung a majaw, ngai dai zawn rai gaw n-galaw kau sai. Missa hkungga ngut ai hpang mung dai masha hte shaga na n mai byin mat sai. Dai shani sha, anhte mung Nagaya, Japan mung de nbungli hte lai hkawm sa ra mat ai. Tim, nhtoi loi mi na ai hpang, shi hpang de laika ka nna, dai zawn rai manang wa a mungga hta tinang a ga jat bang ai gaw n kaja ai lam, tsun dan na myit ai. Hta n-ga, mungga htawn ai wa a shawng kaw tsap na mung kaja ai n re ai lam shadum na, ka ai. 

Dai hpang, ngai ka da ai laika hpe grai jaw sai ngu ngai myit dik la nga nngai. Dai amu madu wa jaw ai lam n-galaw ai hpe ngai shajaw ya ai rai sai. Dai hpe myit yu nna, ngai na hkum hpe ngai arawng la nngai. Shi a mara hpe ngai chye ya nna dai hpe tsun shadum na matu ngai hta atsam rawng nga ai. Rai tim, ngai bai dum hprang la ai gaw, shi galaw ai zawn sha ngai mung galaw taw nga ai, ngu ai lam re. Ngai gaw jaw nna, shi hpe shut ai ngu madi madun lu ai hpe ngai arawng la taw nga ai. Teng sha wa, dai ni na kabu gara shiga hta na Hparishe wa zawn ngai rai nga ai. Ngai a mungga hpe ga byan ya ai wa a ntsa de ngai nga taw nga sai. Dai ni na kabu gara shiga hta, ‘kang hta ai wa chyawm gaw, tsan ai kaw tsap nna, lamu de pyi n mada yu ai sha’, nga Madu Yesu tsun dan nga sai. Dai majaw, Madu Yesu, shi hpe shakawn ai. Kadai wa hta e mung, grau ai nga nna shi n hkam sha nga ai. Teng sha wa, shi gaw shut ai wa re ai hpe mu mada nga ai.

Masha kaga ni a lam anhte myit ai shaloi grai sadi na ra ga ai. kaja wa sha, tinang a myit masin kraw lawang kata de yu yu yang, shut hpyit mara gaw anga nga ai. San pra ai masha byin wa lu na matu amu bungli law law anhte galaw na teng sha ra kadawn ga ai.

PRANWAN LADAW (30) LABAN SHANI NA CHYUM LAIKA

PRANWAN LADAW 30

23th October 2016

CHYUM MUNGGA DAW 1 

SIRAK 35: 12-14. 16-19.

Ya hti na gaw, Myihtoi a Laika na rai nga ai.

Madu gaw myiman n lata ai tara agyi wa rai nga ai. Shi gaw matsan mayan wa hpe n gawn n sawn di kau nna masha hpe myiman lata na n rai. Shut hkrum ai wa hpyi shawn ai ga hpe Madu madat ya nga ai.

Jahkrai nmai ni hpyi jahtau ai shaloi, Madu gaw shi a myiman kayin kau ai n rai; gaida jan shi a lam aput apai nga tsun dan ai shaloi, shi hpe gawt kau na n rai. Shi a myit masin mahkra hte Madu hpe daw jau ai wa gaw, Karai Kasang a man e myiman pa nna, dai wa hpyi nem ai sumwi du hkra lung wa na ra ai. Myit grit nem ai wa a akyu hpyi ai nsen gaw, sumsing lamu de hkrang wa na ra ai. Madu htan ya ai ga garai n du yang, shi shalan shabran ai n hkrum lu ai rai nna, Tsaw Htum ai Wa shi hpe garai n mada yu jang, shi hpyi nem ai lam n hkring na ra ai. Madu gaw lanyan nga na n rai; Shi gaw ding man ai ni hpe shalawt nna, shanhte a hpang maga de tara dara ya na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

2 TIMOHTI 4: 6-8. 16-18.

Ya hti na gaw, Timohti hpang de San Pawlu shagun dat ai laika lahkawng hta na rai nga ai.

Ya e pyi, nawku tawn ntsa de luhpa ru jaw ai zawn, nye a asak ru kau ai hkrum nna, ngai pru lai mat wa na aten du magang ra ai. Ngai gaw kaja ai gasat gala gasat ngut se ai: gat shingjanwng ai lam htum hkra gat shadu se ai; makam masham hpe a manoi nga ni ai. Ya e lam langai sha ra ai. Ding hpring ai tara agyi wa ngu ai Madu gaw, dai Nhtoi Kaba hta, ding hpring ai a ja janmau ngai hpe ap ya na ra ai; ngai hpe sha n rai, Shi a dan pru na lam hpe sharawng awng ai ni yawng hte hpe ap ya na ra ai.

Nye a amu hpe shawng lang tsun ai shaloi, ngai hpe garum ai sakse langai mi n pru ai; yawng hte gaw ngai hpe kau da mani ai; dai gaw shanhte a ntsa e mara n tai u ga. Rai ti mung, nye a marang e Kabu Gara Shiga hpe, maigan amyu ni mahkra na la lu hkra, hkaw shadan dan lu na matu, Madu gaw ngai a hpang manga de lawm nna, ngai hpe n-gun hta na mawai la ai ngai hkrum ni ai.

Madu gaw n hkru n hkra ai lam yawng hta na ngai hpe mawai la nna, sumsing lamu na Shi a mungdan du hkra ngai hpe makawp maga la na ra ai. Shi gaw htani htana prat dingsa hpung shingkang a nga nga u ga law. Amen.

Ya hti ai gaw Karai Kasang a mungga rai nga ai.

KABU GARA SHIGA 

LUKA 18: 9-14.

Ya hti na gaw, Luka a laika hta na Kabu Gara Shiga rai nga ai.

Dai aten hta e Yesu gaw, tinang a hkum hpe ding man dum nna, masha kaga hpe n gawn n sawn di kau ai ni hpe, ndai ga shadawn tsun mu ai gaw: Masha lahkawng akyu hpyi na matu nawku htingnu de lung wa ma ai; langai mi gaw Hparishe masha, langai mi gaw kang hta ai wa rai nga ma ai.

Hparishe wa gaw tsap nga nna, Karai Kasang e, lagu lagan, n ding n man ai, num shaw ai amu galaw ai masha gale ni hte, ngai n bung nngai hta n-ga, ndai kang hta ai wa zawn pyi n rai nngai majaw, ngai nang hpe chyeju dum nngai. Ngai mahtang bat mi hta lahkawng lang lusha gam nga nngai; ngai lu malu hta na htam shi hta htam mi alu jaw nga nngai, nga nna shi a kraw lawang hta tsun wu ai.

Kang hta ai wa chyawm gaw, tsan ai kaw tsap nna, lamu de pyi n mada yu ai sha, sinda adup nga let, Karai Kasang e, mara kap ai wa ngai hpe matsan dum rit law, ngu nna hpyi wu ai. Ngai nanhte hpe tsun made ga: Kang hta ai wa gaw, Hparishe wa hta Karai Kasang a chyeju grau lu la nna ,shi a nta de wa mat nga ai. Kaning rai nme law, tinang a hkum hpe shagrau ai wa kadai mung, shagrit shanem ai hkrum na ra ai; tinang hkum hpe shagrit ai wa chyawm gaw shagrau ai hkrum na ra ai.

Ya hti ai gaw Madu a Kabu Gara Shiga rai nga ai.

PRANWAN LADAW (29) LABAN SHANI NA MUNGGA

Tara rap ra ai ngu ai gaw “masha langai hte ging ai hpe jaw ya ai re” ngu nna lachyum hpaw da nga ai. Dai rai yang tinang hte ging ai hpe nlu ai shaloi, shing nrai, manang wa hte ging ai hpe njaw ya ai shaloi tara rap ra ai lam nnga ai ngu sawn mai nga ai.

Maga mi hku yu yang, manang ni hte ganawn mazum ai shaloi manang wa hpe tinang jaw ra ai lit hte maren jaw ya ra na re. Grau nna tinang a npu kaw nna masha ni a ahkaw ahkang hpe shawng jahpring shatsup ya ra na re. Tara rap ra ai ngu ai hpe gaw gap ai shaloi jaw jau ai ngu ai kaw gaw gap yang she ngang grin na re. 

Chyum mungga hta tara agyi wa hpe akroi anoi hpyi ai a majaw hpang jahtum gai da jan hpyi ai hte maren dawdan ya hkrum sai re. Tinang kaw nna tara rap ra ai lam jaw ya ra ai ni hpe jaw nna tinang lu ging ai hpe Mahkra Dang Chye ai Karai Kasang gaw hpyi nem ai rai yang tinang lu ging ai tara rap ra ai lam hpe teng sha lu la na re.

MYIT NDAW AI SHA AKYU HPYI SHAJA RA AI

Kabu gara shiga ni hta, masha law law, Madu Yesu kaw sa nna garum hpyi ai lam hpe hti lu ga ai. N kau mi gaw, hkrit kajawng ai hte hpyi ma ai. Ga-shadawn, ‘manggang kap ai masha langai mi sa du nna shi hpe nawku let, Madu e, nang hkraw n-yang gaw, ngai hpe shapra ya lu na rai nga nndai’, ngu wu ai.

Madu Yesu chyawm lata ladawn nna, Shi hpe ahtawk let, ‘ngai hkraw nga nngai’, san pra wa nu, ngu wu ai. Shaloi jang shi a manggang san pra mat lu ai” (Mt 8:2-4). Nkau mi chyawm gaw grai shagrau ai hte jahtau shaga ma ai. Myi kyaw ai Barateme gaw, Nazareth wa Yesu lai wa ai hpe shi na yang, ‘Dawi a kasha Yesu e, ngai hpe mamtsan dum la e law, ngu nna hpyi jahtau wu ai” (Mk 10:47) nga nna kasa Marku ka tawn da ai. Masha law law wa shi atsin sha nga mat wu ga, shi hpe jet kau mu ai rai tim, ‘Dawi a kasha e, ngai hpe matsan dum la e law, ngu nna grau jahtau shaja wu ai. (Mk 10:48)

Dai ni na kabu gara shiga hta, makam masham a atsam lam hpe Madu Yesu anhte hpe grau nna tsun dan nga sai. Ndai lang hta chyawm gaw, mau mwi langai mi hpe shi jai lang let ‘myit nhten ai sha tut nawng akyu hpyi na lam’ sharin ya sai. Yuda uhpung uhpawng hta ahkyak dik ai masha gaw ‘Tara agyi’ wa re. Amu manghkang hpe shi hpran da sai hte maren tup hkrak galaw sa wa ra ai. Maga mi de na wa chyawm gaw ‘gaida jan’, lama na matsan ai rai yang, sawng dik rai sai. Hpa majaw nga yang, shi gaw num rai nna, matsan mung matsan ai hpe yu yang, ahkaw ahkang n lu ai daram pyi rai sai.

Maumwi kaw nna Tara Agyi wa gaw Karai Kasang hpe mung nhkrit, n kam, masha shawa hpe mung hpa zawn nnawn ai. Dai majaw gaida jan hpe n-garum la ai ngu ai shaloi, mau shara n nga ai. Rai tim, gau ngwi ngwi gaw, gaida jan e atsun shatsang hpyi nem nga ai majaw, tara dara ya na matu myit wa sai. Hpang jahtum, gaida jan hpe madat ya nna garum la nu ai.

Hebre masha ni kaw shagun dat ai laika hta shadan madun da ai zawn, Madu Yesu, dai gaida jan a lam hpe yu la nna,Karai Kasang kaw akyu hpyi lai wa sai. “dai hkinjawng wa gaw, dinghta hkum shan hte naw pra nga ai nhtoi hte hta, si ai kaw na shi hpe mawai la lu ai wa kaw, akyu hpyi ai ga hte tawng ban ai ga hpe, hkrap ngu hkrap ngoi nna myi prwi law law hte nawng ya ngut yang, shi a hkum tsup ai myit majaw hkap madat la ya ai hkrum nhtawm’, (Heb5:8) Karai Kasang hpang de, “nsen ja ja hte, myi prwi si hte” Madu Yesu akyu hpyi nu ai. Shi hpang de sa ai masha ni, myit nhten ai hte matut manoi akyu hpyi ai zawn, Madu Yesu mung hpyi lai wa sai. Dai majaw, Karai Kasang gaw Shi Madu hpe si ai kaw nna bai jahkrung sharawt la sai.

Ndai gaw, anhte akyu hpyi na lam nan rai sai. Karai Kasang hpe gin jang nna aput let akroi anoi hpyi ra ga ai; anhte hta ra kadawn nga ai hpe hpyi na n mai shazim kau ai. Dai gaw Karai Kasang hpe Madu Yesu hpyi shawn lai wa sai lam mung rai nna Karai Kasang mung madat ya ai lam rai sai. Dai gaw, anhte a hpyi jahtau ai nsen hpe Madu Yesu madat ya na lam mung rai nga ai.

PRANWAN LADAW (29) LABAN SHANI NA CHYUM LAIKA

16th October 2016

CHYUM MUNGGA DAW 1 

PRU MAT WA AI 17: 8-13.

Ya hti na gaw, Pru Mat Wa Ai laika hta na rai nga ai.

Dai aten hta e, Amalek masha ni sa pru nna, Rehpidim ngu ai shara e, Israela amyu hpe sa gasat ma ai. Dai majaw Mawshe gaw Yawshu hpe, Masha lata la nna, Amalek ni hpe gasat na pru su; hpawt de, Karai Kasang a dawhkrawng lang nna, dai kawng pungding e ngai tsap nga na ring ngai, ngu nna tsun wu ai.

Shing rai Mawshe hkang dat ai hte maren Yawshu galaw nna, Amalek ni hpe gasat wu ai; Mawshe, Arun hte Hura gaw kawng pungding de lung wa ma ai. Ya Mawshe gaw shi a lata sharawt yang, Israela masha ni dang wa ma ai; shi a lata jahkrat yang gaw, Amalek ni dang wa ma ai. Rai ti mung, Mawshe a lata tsu wa lu ai rai nna, Arun yan Hura nlung langai mi la nhtawm, dai hta shi hpe dung shangun wu ai. Shing rai Arun yan Hura gaw, maga mi de langai ngai nga nna, Mawshe a lata pawn shadaw ya mu ai: dai rai nna jan du hkra shi a lata sharawt dingyang rai nga lu ai. Yawshu mung Amalek du wa hte shi a masha ni hpe, nhtu hte gasat dang kau wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

2 TIMOHTI 3: 14 - 4:2.

Ya hti na gaw, Timohti hpang de San Pawlu shagun dat ai laika lahkawng hta na rai nga ai.

Nang sharin la sai mungga teng man rai nga ai hpe myit hkut da nit dai majaw, dai hpe myit jung ai hte manoi manat ra ai. Nang hpe sharin ya ai sara ni kadai re ai myit dum nna, ma kaji aprat kaw nna Chyoi Pra ai Chyum laika ni hpe chye nga nit dai hpe a dum nga u. Dai Chyum laika ni gaw, Hkristu Yesu hpe kam sham ai a marang e hkye hkrang la ai hkrum lu hkra, chye ra ai hpaji byeng-ya nang hpe jaw lu ai.

Chyum Laika shagu gaw, Karai Kasang a myit jahtoi ya ai hte ka da nga ai. Dai rai nna, sharin shaga ya na, n teng n man ai lam hpe nhtang madun na, masha a arawn alai hpe shading ya na hte, Chyoi Pra ai lam hpe sharin achyin ya na matu, Chyum Laika ni akyu rawng nga ai. Karai Kasang a masha wa gaw dai hku hkan galaw yang, hkum hkum tsup tsup rai wa nna, mai kaja ai magam bungli shagu a matu chyip chyip rai na ra ai.

Karai Kasang a man e mung, hkrung nga ai ni hte si ai ni hpe jeyang daw dan na ra ai, Yesu Hkristu a man e mung ngai nga nna, Yesu a dan pru na lam hte, shi a mungdan a amying hte, ngai nang hpe shadut dat de ai gaw: Dai shiga a lam hpe hkaw dan nga u; na ra ti mung, n na ra ti mung, shakut sharang ai hte tsun shana ya u. Daru sharin u; kam shut ai lam hpe madun dan u; mai kaja lam de woi len la u; rai ti mung, sharin shaga ya na myit rawng nga nna, myit galu kaba ai hte dai lam yawng hpe hkan galaw nga u.

Ya hti ai gaw Karai Kasang a mungga rai nga ai.

KABU GARA SHIGA 

LUKA 18: 1-8.

Ya hti na gaw, Luka a laika hta na Kabu Gara Shiga rai nga ai.

Tut nawng e akyu a hpyi nga mu ga hte, myit n hten mat mu ga, Yesu shi a sape ni hpe ga shadawn tsun mu ai gaw: Mare langai mi hta Karai Kasang hpe mung n hkrit, masha hpe mung hpa n shadu ai tara agyi langai mi nga ai. Dai mare hta gaida jan langai mi mung nga ai. Shi gaw dai tara agyi wa kaw sa nna, Ngai hte amu byin ai wa hpe, ding man ai hku daw dan ya rit, nga nna a tsun nga ai.

Rai ti mung, nhtoi ram ram na hkra dai tara agyi wa n jeyang ya hkraw ai. Dai hpang shi gaw, Karai Kasnag hpe n hkrit, masha hpe hpa n shadu nngai, rai ti mung, ndai gaida jan ngai hpe a tsun shatsang nga ai majaw, shi hpang maga ngai tara dara ya na nngai; dai n rai yang, shi ya sha ya sha sa sa rai nna, ngai hpe n sim n sa sharu shatsang na ra ai, nga nna shi a kraw hta myit la wu ai, ngu nna Yesu ga shadawn hkai dan wu ai.

Shaloi Madu Yesu gaw, N ding n man ai tara agyi wa tsun ai ga hpe myit la mu: Karai Kasang gaw matsan dum lama nga ai rai nna, shi a shani shana hpyi jahtau nga ai, shi a lata la ai ni a hpang maga de, tara n dara ya ai, nga na a ni? Nanhte hpe ngai tsun made ga, Shanhte hpang maga alawan tara dara ya na ra ai. Rai ti mung, Masha Kasha du sa ai nhtoi hta, ndai mungkan ga ntsa e makam masham nga nga ai gaw mu lu na a ni? ngu nna sape ni hpe tsun mu ai.

Ya hti ai gaw Madu a Kabu Gara Shiga rai nga ai.

PRANWAN LADAW (28) LABAN SHANI NA MUNGGA

Chyeju dum chye ai myit gaw masha hkum shagu hta rawng nga ai. Anhte kata na ndai myit masin hpe jasu sharawt la na matu gaw anhte lata la nna yu ai lam hta madung nga ai. Tinang hta rai nnga shi ai hpe mu chye ai wa gaw tinang nlu shi ai hpe lu na matu shakut mayu nga ai. Raitime, tinang kaw nga ai hpe mu chye ayang gaw chyeju dum mayu ai myit pru wa mai nga ai. 

Kabu gara shiga hta Madu Yesu shamai shatsai ya ai manggang kap ai masha marai shi hta na jahku gaw tinang san seng wa sai hpe chye ngut ai hpang san seng ai masha re ngu ai hpe masat hkam la na matu nawku jawng de sa nna seng ang ai up hkang ai ni kaw sa du na matu hkawm sa mat wa ai. Dai re ai majaw Madu Yesu hpe chyeju dum na matu hprai mat nga ai. Rai tim ndai zawn galaw na matu lit nnga ai maigan masha wa chyawm gaw tinang lu la sai akyu ara hpe mu nna Madu Yesu hpang de bai nhtang wa let chyeju dum ai lam hpe Madun dan lu nga ai.

Anhte a asak aprat hta ra kadawng ai lam ni hte shaman chyeju ni gaw hti ndang ai rai nga ai. Tinang lu tawn da ai akyu ara ni hpe mu chye ai wa she jaw ya sai Karai Kasang shing nrai htingbu wa hpe chyeju dum ai myit ni pru wa mai nga ai. Dai rai yang tinang hpe jaw ya sai chyeju sutgan ni hpe mu chye nna Karai Kasang hpe chyeju dum ai myit rawng wa nna mai kaja ai amu bungli ni hpe matut nna galaw sa wa lu u ga.

JARIT HPE LAI DI AI

Lani mi hta, “matsan dum la rit, ngai myi n mu ai” nga nna laika mahkret shakap da let, lam makau e hpyi sha nga ai wa hpe masha langai sa mu ai. Shi mung gumhpraw bang ya let mada yu yang dai wa a kawk hta gumhpraw n rawng ai daram she rai nga ai. Ahkang hpyi la hkra rai, mi na laika pa shingdu de laika ka shakap da ya nna hkawm mat sai. Shana de bai wa yu yang, dai hpyi sha ai wa a kawk hta gumhpraw hpring nga ai hpe shi wa mu sai. Hpyi sha ai wa mung dai wa a n sen hpe matsing ai rai nna, dai jepa hta hpa ka da ya ai hpe san yu ai. “N teng ai lam hpa n ka da ai law, ngai bai byeng ka da ya ai sha re” nga tsun nna hkawm mat wa sai. Myi n mu ai wa mung dai hta hpa ka da ai hpe n chye ai, rai tim, dai hta ka da ya ai gaw, “gin htawng ta du wa nna tsawm taw sai, tim ngai n mu lu ai” da! Anhte a makau grup yin hta e, ru yak jam jau hkrum ai ni hte shingbyi shara n lu ai ni law law hpe a mu yu nga ai. Hpyi sha nga ai ni, machyi makaw hkrum nga ai ni hpe mung mada shalai kau ai aten law law nga na sai. Tinang hta hkum nan hkrum sha wa ai shaloi she shaman chyeju majoi mi hkap la taw ai hpe dum shai lu ai, (snr) masha langai ngai tsun dan ai shaloi hta she shanhte a matsan mayan re ai prat hpe mu chye ya ai. Myi n mu, hpyi sha taw nga ai wa a matu laika ka da ya ai zawn, dai ni na kabu gara shiga hta Madu Yesu mang gang kap ai ni hpe shamai shatsai ya ai.

Madu Yesu a aten hta, manggang kap ai gaw myi n mu ai hta grau sawng nga ai. Shanhte hpe ‘n san seng ai’ ngu masat ai hte, dinghku, u hpung u hpawng kaw nna tsan ai de nga kau shangun ai. Israela myu sha ni a jasan jaseng ai tara hta, ‘jarit’ ni hte ginhka nna masat da let, uhpung shing gan na ni hpe ‘n san seng ai ni’ nga shamying da ma ai. Manggang kap ai ni gaw shanhte a ana zinli kap ai hkum hkrang a majaw jarit dan hkrum sai. Dai majaw tsan tsan kaw nna marawn jahtau let matsan dum la na Madu Yesu hpe tsun ai. Madu Yesu, shanhte hpe sanpra ya lu na kam ma ai hte san seng ai uhpung de bai wa lu na myit mada nga ma ai. Dai aten na masha ni gaw Karai Kasang chyu sha shamai shatsai ya lu ai ngu kam sham ma ai. Dai majaw Yesu hpe Karai Kasang hte manggang kap ai ni a lapran chyeju jaw ya ai ngu hkap la ma ai.

Madu Yesu gaw, dai nga nga ai ‘jarit’ hpe tawt lai ai wa, nga nna kabu gara shiga hta jahkring hkring masat hkrum ai. Shi gaw teng sha wa matsan dum lama ai wa rai nna, yawn hkyen hkrum sha nga ai ni hte rau anga nga ai hte tsan tsan de galoi mung n hprawng mat ai. Shanhte hpe shamai shatsai ya nna shanhte a prat lachyum hpe jaw ya sai. Chyeju htang na bai gayin wa ai dai Samari masha wa hpe shakawn shagrau ai hte shinggan kau hkrum ai masha ni hpe ahkyak la ya ai lam madun sai. Yuda myu sha marai jahku chyawm gaw Yerusalem mare de lung wa nna hkinjawng ni a man e Karai Kasang hpe chyeju shakawn let shanhte sanpra wa sai lam sakse madun n htawm dum nta, uhpung uhpawng de bai wa na myit lu nu ai. Samari myu sha wa chyawm Yerusalem Nawku htingnu hta shi n mai sa ai hpe chye wu ai. Israela Karai Kasang hte shi hpe shing gan da ya ai jarit naw nga nga ai. Raitim, Yesu hpang de gayin wa nna Karai Kasang hpe chyeju shakawn na ahkang lu la sai. Hpang jahtum, dai Samari myu sha wa chyu sha teng sha san pra wa lu sai. Madu Yesu hta nga ai shi a kam sham myit gaw hkum tsup shangun sai. Shi a lam hta matut hkawm sa mat wa ai rai tim, shinggan myu sha rai tim, Karai Kasang a tsawra myit kumhpa hpe hkap la lu ai hte masha kaga ni hpe mung sakse hkam garan jaw lu na sai.

Sawn sumru mai ai lam; Aten ladaw shagu hta lu la nga ai Karai Kasang a tsawra matsan dum ai kumhpa hpe dum chye nga ai kun? Dai kumhpa a matu chyeju shakawn na, masha ni hpe garum ya na myit dum nga ai kun?

PRANWAN LADAW (28) LABAN SHANI NA CHYUM LAIKA

9th October 2016

CHYUM MUNGGA DAW 1 

2 HKAWHKAM 5: 14-17.

Ya hti na gaw, Hkawhkam laika lahkawng hta na rai nga ai.

Manggang kap ai Naman gaw, Karai Kasang a masha wa Elisha tsun ai hte maren, Yawdan hka de yu wa nna, shi hkum hpe sanit lang kapruk jang, shi a hkum shan gaw, ma kaji a hkum shan zawn san pra wa ai.

Dai rai nna, shi gaw shi a ali ama ni hte rau, Karai Kasang a masha wa hpang de bai sa nna, shi a man e tsap let, Yu u, Israela mungdan hta kaga, ga ningtsa ting hta e Karai Kasang shaje n nga ai gaw, ya ngai chye se ai: dai rai nna na a mayam wa a kumhpaw kumhpa hpe hkap la u, ngu wu ai.

Myihtoi wa chyawm gaw, Ngai daw jau nga ai Madu hkrung nga ai hte maren, ngai n hkap la na nngai, ngu wu ai. Naman shadut ti mung, shi n hkap la hkraw wu ai. Bai Naman gaw, Nang n la ti mung, na a      mayam wa hpe lawze lahkawng htaw dang ai ga htingbut jaw dat rit; na a mayam wa gaw ya kaw nna, wan nat hkungga rai ti mung, hkungga amyu kaga rai ti mung, Madu hta kaga, hpara shaje hpe nawng ya na n rai, ngu nna myihtoi wa hpe tsun wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

2 TIMOHTI 2: 8-13.

Ya hti na gaw, Timohti hpang de San Pawlu shagun dat ai laika lahkawng hta na rai nga ai.

Dawi a aru arat rai nga ai Yesu Hkristu gaw, si mat ai ni kaw na bai hkrung rawt sai, nga nna ngai hkaw tsun ai Kabu Gara Shiga hpe adum nga u. Dai Kabu Gara Shiga a jaw e, n hkru ai wa zawn bawng dung hkra, ru yak ai hkrum nngai, rai ti mung, Karai Kasang a mungga gaw sharen da ai hkrum lu ai n rai. Dai re ai majaw, Karai Kasang e lata la hkrum ai ni gaw, Hkristu Yesu hta e hkye hkrang la ai hkrum nna, htani htana na hpung shingkang hpe hkam la lu mu ga, shanhte a matu mara ndai ru yak ai lam mahkra hpe hkam sharang nga nngai.

Ga ndai gaw kangka re ai ga rai nga ai: Anhte Shi hte rau si sayang gaw, shi hte rau hkrung lu na ra ga ai. Anhte myit n htum ai sha shakut sharang yang gaw, shi hte rau up lu na ra ga ai. Anhte shi hpe nyet kau yang gaw, shi mung anhte hpe nyet kau na ra ai. Anhte kangka n rai nga ti mung, shi gaw kangka rai nga ai: kaning rai nme law, shi hkum nan hpe n nyet kau lu ai.

Ya hti ai gaw Karai Kasang a mungga rai nga ai.

KABU GARA SHIGA 

LUKA 17: 11-19.

Ya hti na gaw, Luka a laika hta na Kabu Gara Shiga rai nga ai.

Yesu gaw Yerusalem mare de lung wa nga yang, Samari hte Galile mung lapran hku lai sa wa ai. Kahtawng langai mi de shang yang, manggang kap ai masha marai shi Yesu hpe hkap mu nna, tsan ai kaw tsap nga let, Yesu e, Madu e, anhte hpe matsan dum la mi law, ngu nna jahtau ma ai. Yesu shanhte hpe mu jang, Nanhte a hkum hkinjawng ni kaw wa madun dan mu, ngu dat mu ai rai nna, shanhte sa wa nga yang, san pra mat ma ai.

Shanhte hta na marai langai mi gaw, shi a hkum san pra mat ai hpe mu chye jang, bai nhtang sa nna, nsen kaba hte Karai Kasang hpe shagrau sha-a nga ai. Yesu a lagaw nhpang e dingnyawm dagup nna, Madu hpe chyeju dum wu ai: dai wa gaw Samari masha rai nga ai.

Dai rai nna Yesu gaw, Marai shi San Pra mat masai, n rai ni? Marai jahku gaw kanang rai wa ma ta? Ndai tsasam masha hta kaga, Karai Kasang hpe shagrau sha-a na matu, bai nhtang sa ai masha langai mi mung n nga a ni? ngu nna tsun nhtawm, dai wa hpe, Rawt nna nta de wa nu; na a kam sham ai gaw nang hpe hkye la nit dai, ngu nna shi hpe tsun dat wu ai.

Ya hti ai gaw Madu a Kabu Gara Shiga rai nga ai.