PRANWAN LADAW (28) LABAN SHANI NA MUNGGA

Chyeju dum chye ai myit gaw masha hkum shagu hta rawng nga ai. Anhte kata na ndai myit masin hpe jasu sharawt la na matu gaw anhte lata la nna yu ai lam hta madung nga ai. Tinang hta rai nnga shi ai hpe mu chye ai wa gaw tinang nlu shi ai hpe lu na matu shakut mayu nga ai. Raitime, tinang kaw nga ai hpe mu chye ayang gaw chyeju dum mayu ai myit pru wa mai nga ai. 

Kabu gara shiga hta Madu Yesu shamai shatsai ya ai manggang kap ai masha marai shi hta na jahku gaw tinang san seng wa sai hpe chye ngut ai hpang san seng ai masha re ngu ai hpe masat hkam la na matu nawku jawng de sa nna seng ang ai up hkang ai ni kaw sa du na matu hkawm sa mat wa ai. Dai re ai majaw Madu Yesu hpe chyeju dum na matu hprai mat nga ai. Rai tim ndai zawn galaw na matu lit nnga ai maigan masha wa chyawm gaw tinang lu la sai akyu ara hpe mu nna Madu Yesu hpang de bai nhtang wa let chyeju dum ai lam hpe Madun dan lu nga ai.

Anhte a asak aprat hta ra kadawng ai lam ni hte shaman chyeju ni gaw hti ndang ai rai nga ai. Tinang lu tawn da ai akyu ara ni hpe mu chye ai wa she jaw ya sai Karai Kasang shing nrai htingbu wa hpe chyeju dum ai myit ni pru wa mai nga ai. Dai rai yang tinang hpe jaw ya sai chyeju sutgan ni hpe mu chye nna Karai Kasang hpe chyeju dum ai myit rawng wa nna mai kaja ai amu bungli ni hpe matut nna galaw sa wa lu u ga.

JARIT HPE LAI DI AI

Lani mi hta, “matsan dum la rit, ngai myi n mu ai” nga nna laika mahkret shakap da let, lam makau e hpyi sha nga ai wa hpe masha langai sa mu ai. Shi mung gumhpraw bang ya let mada yu yang dai wa a kawk hta gumhpraw n rawng ai daram she rai nga ai. Ahkang hpyi la hkra rai, mi na laika pa shingdu de laika ka shakap da ya nna hkawm mat sai. Shana de bai wa yu yang, dai hpyi sha ai wa a kawk hta gumhpraw hpring nga ai hpe shi wa mu sai. Hpyi sha ai wa mung dai wa a n sen hpe matsing ai rai nna, dai jepa hta hpa ka da ya ai hpe san yu ai. “N teng ai lam hpa n ka da ai law, ngai bai byeng ka da ya ai sha re” nga tsun nna hkawm mat wa sai. Myi n mu ai wa mung dai hta hpa ka da ai hpe n chye ai, rai tim, dai hta ka da ya ai gaw, “gin htawng ta du wa nna tsawm taw sai, tim ngai n mu lu ai” da! Anhte a makau grup yin hta e, ru yak jam jau hkrum ai ni hte shingbyi shara n lu ai ni law law hpe a mu yu nga ai. Hpyi sha nga ai ni, machyi makaw hkrum nga ai ni hpe mung mada shalai kau ai aten law law nga na sai. Tinang hta hkum nan hkrum sha wa ai shaloi she shaman chyeju majoi mi hkap la taw ai hpe dum shai lu ai, (snr) masha langai ngai tsun dan ai shaloi hta she shanhte a matsan mayan re ai prat hpe mu chye ya ai. Myi n mu, hpyi sha taw nga ai wa a matu laika ka da ya ai zawn, dai ni na kabu gara shiga hta Madu Yesu mang gang kap ai ni hpe shamai shatsai ya ai.

Madu Yesu a aten hta, manggang kap ai gaw myi n mu ai hta grau sawng nga ai. Shanhte hpe ‘n san seng ai’ ngu masat ai hte, dinghku, u hpung u hpawng kaw nna tsan ai de nga kau shangun ai. Israela myu sha ni a jasan jaseng ai tara hta, ‘jarit’ ni hte ginhka nna masat da let, uhpung shing gan na ni hpe ‘n san seng ai ni’ nga shamying da ma ai. Manggang kap ai ni gaw shanhte a ana zinli kap ai hkum hkrang a majaw jarit dan hkrum sai. Dai majaw tsan tsan kaw nna marawn jahtau let matsan dum la na Madu Yesu hpe tsun ai. Madu Yesu, shanhte hpe sanpra ya lu na kam ma ai hte san seng ai uhpung de bai wa lu na myit mada nga ma ai. Dai aten na masha ni gaw Karai Kasang chyu sha shamai shatsai ya lu ai ngu kam sham ma ai. Dai majaw Yesu hpe Karai Kasang hte manggang kap ai ni a lapran chyeju jaw ya ai ngu hkap la ma ai.

Madu Yesu gaw, dai nga nga ai ‘jarit’ hpe tawt lai ai wa, nga nna kabu gara shiga hta jahkring hkring masat hkrum ai. Shi gaw teng sha wa matsan dum lama ai wa rai nna, yawn hkyen hkrum sha nga ai ni hte rau anga nga ai hte tsan tsan de galoi mung n hprawng mat ai. Shanhte hpe shamai shatsai ya nna shanhte a prat lachyum hpe jaw ya sai. Chyeju htang na bai gayin wa ai dai Samari masha wa hpe shakawn shagrau ai hte shinggan kau hkrum ai masha ni hpe ahkyak la ya ai lam madun sai. Yuda myu sha marai jahku chyawm gaw Yerusalem mare de lung wa nna hkinjawng ni a man e Karai Kasang hpe chyeju shakawn let shanhte sanpra wa sai lam sakse madun n htawm dum nta, uhpung uhpawng de bai wa na myit lu nu ai. Samari myu sha wa chyawm Yerusalem Nawku htingnu hta shi n mai sa ai hpe chye wu ai. Israela Karai Kasang hte shi hpe shing gan da ya ai jarit naw nga nga ai. Raitim, Yesu hpang de gayin wa nna Karai Kasang hpe chyeju shakawn na ahkang lu la sai. Hpang jahtum, dai Samari myu sha wa chyu sha teng sha san pra wa lu sai. Madu Yesu hta nga ai shi a kam sham myit gaw hkum tsup shangun sai. Shi a lam hta matut hkawm sa mat wa ai rai tim, shinggan myu sha rai tim, Karai Kasang a tsawra myit kumhpa hpe hkap la lu ai hte masha kaga ni hpe mung sakse hkam garan jaw lu na sai.

Sawn sumru mai ai lam; Aten ladaw shagu hta lu la nga ai Karai Kasang a tsawra matsan dum ai kumhpa hpe dum chye nga ai kun? Dai kumhpa a matu chyeju shakawn na, masha ni hpe garum ya na myit dum nga ai kun?

PRANWAN LADAW (28) LABAN SHANI NA CHYUM LAIKA

9th October 2016

CHYUM MUNGGA DAW 1 

2 HKAWHKAM 5: 14-17.

Ya hti na gaw, Hkawhkam laika lahkawng hta na rai nga ai.

Manggang kap ai Naman gaw, Karai Kasang a masha wa Elisha tsun ai hte maren, Yawdan hka de yu wa nna, shi hkum hpe sanit lang kapruk jang, shi a hkum shan gaw, ma kaji a hkum shan zawn san pra wa ai.

Dai rai nna, shi gaw shi a ali ama ni hte rau, Karai Kasang a masha wa hpang de bai sa nna, shi a man e tsap let, Yu u, Israela mungdan hta kaga, ga ningtsa ting hta e Karai Kasang shaje n nga ai gaw, ya ngai chye se ai: dai rai nna na a mayam wa a kumhpaw kumhpa hpe hkap la u, ngu wu ai.

Myihtoi wa chyawm gaw, Ngai daw jau nga ai Madu hkrung nga ai hte maren, ngai n hkap la na nngai, ngu wu ai. Naman shadut ti mung, shi n hkap la hkraw wu ai. Bai Naman gaw, Nang n la ti mung, na a      mayam wa hpe lawze lahkawng htaw dang ai ga htingbut jaw dat rit; na a mayam wa gaw ya kaw nna, wan nat hkungga rai ti mung, hkungga amyu kaga rai ti mung, Madu hta kaga, hpara shaje hpe nawng ya na n rai, ngu nna myihtoi wa hpe tsun wu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

2 TIMOHTI 2: 8-13.

Ya hti na gaw, Timohti hpang de San Pawlu shagun dat ai laika lahkawng hta na rai nga ai.

Dawi a aru arat rai nga ai Yesu Hkristu gaw, si mat ai ni kaw na bai hkrung rawt sai, nga nna ngai hkaw tsun ai Kabu Gara Shiga hpe adum nga u. Dai Kabu Gara Shiga a jaw e, n hkru ai wa zawn bawng dung hkra, ru yak ai hkrum nngai, rai ti mung, Karai Kasang a mungga gaw sharen da ai hkrum lu ai n rai. Dai re ai majaw, Karai Kasang e lata la hkrum ai ni gaw, Hkristu Yesu hta e hkye hkrang la ai hkrum nna, htani htana na hpung shingkang hpe hkam la lu mu ga, shanhte a matu mara ndai ru yak ai lam mahkra hpe hkam sharang nga nngai.

Ga ndai gaw kangka re ai ga rai nga ai: Anhte Shi hte rau si sayang gaw, shi hte rau hkrung lu na ra ga ai. Anhte myit n htum ai sha shakut sharang yang gaw, shi hte rau up lu na ra ga ai. Anhte shi hpe nyet kau yang gaw, shi mung anhte hpe nyet kau na ra ai. Anhte kangka n rai nga ti mung, shi gaw kangka rai nga ai: kaning rai nme law, shi hkum nan hpe n nyet kau lu ai.

Ya hti ai gaw Karai Kasang a mungga rai nga ai.

KABU GARA SHIGA 

LUKA 17: 11-19.

Ya hti na gaw, Luka a laika hta na Kabu Gara Shiga rai nga ai.

Yesu gaw Yerusalem mare de lung wa nga yang, Samari hte Galile mung lapran hku lai sa wa ai. Kahtawng langai mi de shang yang, manggang kap ai masha marai shi Yesu hpe hkap mu nna, tsan ai kaw tsap nga let, Yesu e, Madu e, anhte hpe matsan dum la mi law, ngu nna jahtau ma ai. Yesu shanhte hpe mu jang, Nanhte a hkum hkinjawng ni kaw wa madun dan mu, ngu dat mu ai rai nna, shanhte sa wa nga yang, san pra mat ma ai.

Shanhte hta na marai langai mi gaw, shi a hkum san pra mat ai hpe mu chye jang, bai nhtang sa nna, nsen kaba hte Karai Kasang hpe shagrau sha-a nga ai. Yesu a lagaw nhpang e dingnyawm dagup nna, Madu hpe chyeju dum wu ai: dai wa gaw Samari masha rai nga ai.

Dai rai nna Yesu gaw, Marai shi San Pra mat masai, n rai ni? Marai jahku gaw kanang rai wa ma ta? Ndai tsasam masha hta kaga, Karai Kasang hpe shagrau sha-a na matu, bai nhtang sa ai masha langai mi mung n nga a ni? ngu nna tsun nhtawm, dai wa hpe, Rawt nna nta de wa nu; na a kam sham ai gaw nang hpe hkye la nit dai, ngu nna shi hpe tsun dat wu ai.

Ya hti ai gaw Madu a Kabu Gara Shiga rai nga ai.

PRANWAN LADAW (27) LABAN SHANI NA MUNGGA

Mai kaja ai lam mahkra hte hkum tsup ai Karai Kasang gaw anhte shinggyim masha ni a garum shingtau ai lam hpe ra kadawn ai nrai nga ai. Anhte shinggyim masha ni she nhkum tsup ai majaw Karai Kasang a shaman chyeju hpe hkam la ra ai rai nga ai.

Dai rai yang, anhte mai kaja ai lam galaw sa ai, shi a tara lam ni hpe shadik ai amu bungli ni hpe galaw ai shaloi Shi Madu gaw, anhte teng sha shaman chyeju jaw ra na re ngu ai, Karai Kasang gaw anhte hta hka kap ai zawn myit la ai myit masa lam ni nmai nga na re. Kabu Gara shiga kaw na nchyang mayam wa gaw shi galaw ai mai kaja ai amu bungli ni a majaw shi a Madu shi hpe daw jau na myit mada ai myit masa nmai nga ai ngu Madu Yeus shadum ai zawn anhte ni mung tinang galaw ging ai, galaw ra ai hpe kangka ai hte galaw lu sai ngu ai myit masa rawng ra na re.

Karai Kasang hta kam sham ai myit rawng nna galaw ging ai, galaw ra ai amu bungli ni hpe n-gun atsam dat let galaw sa ai rai yang gaw, amu baw sumhpa mahkra hpe awngdang ai hte galaw la lu na re ngu kam hpe let kam sham myit kaba hte seng ang ai amu bungli ni hpe kangka ai hte galaw sa let awngdang ai ngu ai pandung de anhte yawng du shang lu u ga.

YESU HTA MAJU JUNG KAM SHAM NGA GA

“Anhte a makam masham shalaw ya rit”

Lai wa sai bat laman, sumla hkrung yu ai shaloi, Japan mung na ‘wu’ a lam yu hkrup ai. Lagaw galu ai, singkaw mung galu ai hpe mu mada ai. Wu yi gaw kaba ai wudi manga di tawn da ai. Wu kasha ni kraw ai hpang wu kanu gaw grai sadi maja let bau maka ai. Wu la hte wu kanu gaw makau mayang hkan e pyen gayin hkawm let, lu sha tam la nna wu kasha ni hpe atsawm sha jaw sha ma ai. Tim, laban bat 6/7 daram na wa yang, wu kanu gaw wu kasha ni hpe wutsip kaw nna gawt shapraw kau ai hpe mau hpa mu lu sai. Grai mazut ai masam she rai sai ngu ngai myit kau sai. Tim, ngai bai chye la lu ai gaw, wutsip kaw nna gawt shapraw kau dat ai ten, pe hkying mi jan ai lung rawk ntsa kaw nna hkrat wa nga yang, wukasha a singkaw ni gaw ja wa ai rai nna pyen na matu jin jin rai wa sai. Lama na wu kasha ni hpe n gawt shapraw dat ai rai yang, shanhte a singkaw ni mung galu kaba wa na n rai nga ai. Dai majaw, wu kanu gaw jaw ai amu hpe galaw ai rai sai.

Dai ni na kabu gara shiga hta mung, sape ni gaw, ‘anhte a kam sham myit shalaw ya rit’, nga nna Madu Yesu hpe tsun sai. Sape ni tsun ai hpe Madu Yesu gaw ading tawk mahtai n jaw sai hte Shi Madu tsun ai gaw; ‘nanhte hta kamsham ai myit chyinghkrang tum daram rawng yang gaw, ndai labyi hpun hpe, hpun e, aru hte nawng baw nna, nammukdara e sa tu nga u law, ngu yang nanhte a ga madat na ra ai;’ nga ai. Ndai hta, Sara hte sape ni a lapran na mahku mara ai lam hpe Madu Yesu tsun dan ai rai sai. Kaja ai sape wa gaw shi galaw ang ai amu hpe galaw ai. Shi galaw ra ai amu magam hpe sadi dung ai hte galaw ai rai

yang, sara wa gaw teng sha shakawn shagrau na rai nga ai.

Ndai ga ni yawng hpe Madu Yesu tsun ai gaw hpa lachyum rai ta? Kaja wa nga yang, sape ni makam masham shalaw ya na hte seng nna tsun ai shaloi loi mi pawt mayu ai mung rai na nhten. Teng sha nga yang, shanhte hta kam sham myit rawng chyalu re. Madu Yesu galaw ai lamik kumla law law hpe mung mu yu sai. Myi kyaw ai ni hpe myi hpaw ya ai hte mang gang kap ai ni hpe shamai shatsai ya lai wa sai. nga lahkawng hte muk tawng manga hte masha hkying lam hpe jaw sha lai wa sai. ‘Hka’ ntsa hta mung lam hkawm dan sai. Dai majaw, lak lai ai masha rai nna Karai kaw na atsam lu ai wa, ngu shanhte mu mada da sai. Rai tim, shanhte hta ra kadawn ai gaw, nga taw sai makam masham hte amu magam galaw na atsam ningja rai nga ai. Madu Yesu galaw ai zawn, pru hkawm sa let amu magam galaw na lam rai sai. Teng sha wa, hkying ten shagu Karai Kasang hta shamyet shanat nga ai hpe dum hprang na sha ra nga ai.

PRANWAN LADAW (27) LABAN SHANI NA CHYUM LAIKA

2nd October 2016

CHYUM MUNGGA DAW 1 

HABAKU 1: 2-3 2: 2-4. 

Ya hti na gaw, myihtoi Habaku a laika hta na rai nga ai.

Madu e, Nang n madat ya ai; ngai galoi ten du hkra hpyi jahtau na rai ta? Kashum kashe hkrum ai majaw, ngai nang hpe marawn jahtau ti mung, nang garum la ai n rai. Nang hpa majaw n ding n man ai amu ngai a man e madun dan nna, adip ahkrip rai galaw ai amu hpe, nang hpa rai nna tsap yu nga nta? Kashun kashe hkrum ai majaw, ngai nang hpe marawn jahtau ti mung, nang garum la ai n rai. Nang hpa majaw n ding n man ai amu ngai a man e madun dan nna, adip ahkrip rai galaw ai amu hpe, nang hpa rai nna tsap yu nga nta? Hten byak ai hte kashun kashe nye a man e rai nga nna, ndang kalang hkat ai hte ga law ga la ai law htam nga ai.

Shaloi Madu ngai hpe htan ya nna, Shingran ga hpe ka da u; hti ai wa gaw ndai hpe hti loi na matu, lung pa hta dan dan pra pra ka da u. Kaning rai nme law ndai shingran gaw, ndat da ai aten hte seng nna, dik wa na matu sharawng nga ai majaw, masu hkalem na n rai. Dai gaw lau n du ti mung, ala nga u; hpa majaw nga yang, dai shingran ga teng teng dik wa na ra ai. Myit n malang ai wa gaw, hten byak wa ai hpe yu yu u; ding hpring ai wa chyawm gaw shi a kam sham ai hte hkrung nga lu na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

TIMOHTI 1: 6-8. 13-14.

Ya hti na gaw, Timohti hpang de San Pawlu shagun dat ai laika hta na rai nga ai.

Ngai na a ntsa e lata mara ya ai shaloi, Karai Kasang nang hpe jaw ai chyeju kumhpa hpe wut shagrung dat na, ngai nang hpe shadum dat de ai. Karai Kasang jaw ai kumhpa gaw, hkrit chye ai myit n rai; n-gun atsam rawng ai myit, tsaw ra chye ai myit, tinang a hkum hpe hkang dang ai myit mahtang she rai nga ai. Dai rai nna, Madu Yesu a matu sakse hkam ya ai hta mung, shi a bawng dung ai wa ngai rai nga ai majaw mung, nang galoi mung hkum kaya et; Karai Kasang jaw ai n-gun atsam hpe kam hpa let, Kabu Gara Shiga a matu ru yak ai lam ni hpe mahtang, ngai hte rau hkam sharang nga u.

Ngai kaw na nang na la sai san seng ai mungga jet hpe, na a kasi ningli shatai nna, Hkristu Yesu hta e kam sham tsaw ra ai myit hte manoi manat nga u. Grai manu dan ai sut nang hpe ap ya da sai rai nna, anhte hta rawng nga ai Chyoi Pra ai Wenyi a garum ai hte, dai hpe sin makawp maga da u.

Ya hti ai gaw Karai Kasang a mungga rai nga ai.

KABU GARA SHIGA

LUKA 17: 5-10.

Ya hti na gaw, Luka a laika hta na Kabu Gara Shiga rai nga ai.

Lang mi na kasa ni gaw. Anhte a kam sham myit shalaw ya mi, ngu nna Yesu Madu hpe hpyi ma ai. Shaloi Yesu gaw shanhte hpe htan ya ai gaw: Nanhte hta kam sham ai myit chying hkrang tum daram rawng yang gaw, ndai labyi hpun hpe, hpun e, aru hte nawng baw nna, nammukdara e sa tu nga u law, ngu yang nanhte a ga madat na ra ai. Hkauna galau ai, shing n rai sagu bainam rem ai, na a shangun ma gaw hkauna pa de na du wa yang, dai wa hpe, Alawan wa dung nna, shat sha ru, nga nna tsun na, nanhte hta kadai rai ta? Shing n nga ai sha, na a shangun ma hpe, Ngai sha na shana shat lajang tawn u; ngai lu sha ngut hkra, na a hkum shajin nna ngai hpe galaw jaw rit; dai ngut jang she nang lu sha lu na ndai, ngu na wu ai n rai ni?

Dai shangun ma gaw hkang da ai ga mahkra hpe shatup ai majaw, shi a madu shi hpe chyeju htang ai ga tsun ra a ni? Dai hte maren nanhte mung, hkang da mada yawng hpe hkan shatup ngut jang, Anhte gaw akyu n rawng ai shangun ma ni rai nga ga ai; galaw ang ai bungli hpe sha anhte shatup sa ga ai, ngu mu, ngu nna Madu Yesu shi a kasa ni hpe tsun mu ai.

Ya hti ai gaw Madu a Kabu Gara Shiga rai nga ai.

PRANWAN LADAW (26) LABAN SHANI NA MUNGGA

Tsawra njin ai myit hte Karai Kasang hpan da ai shinggyim masha shagu hta tsawra myit ngu ai gaw teng sha rawng nga ai. Kade daram nkaja ai masha raitim tsawra myit ngu ai gaw shi hta rawng nga nna ahkying aten ang jang dai tsawra myit hpe madun dan lu nga ai.

Madu Yesu saw shaga ai hta ahkying aten lata na tsawra myit hpe madun dan na matu nre ai sha, manang wa ra rawng ai hta madung nna tsawra myit madun dan lu na matu shakut ra na re. Chyum Mungga hta sahti wa gaw shi hta e garum shingtau na matu ahkaw ahkang nga tim Lazaru hpe garum la ai lam hta hprai mat nga ai.

Ra rawng ai wa hpe garum shingtau lu na matu gaw manang wa a hpang maga de nna yu chye hkam sha chye yang she garum lu na re. Anhte hte nyi htep ai wa, ra kadawn wa ai shaloi tinang hkum nan ra kadawn taw nga ai zawn hkam sha lu ai a majaw garum shingtau ya na matu ladat amyu myu shaw nna shakut lu nga ai.

Dai rai yang ra kadawn taw nga ai masha langai hpe garum lu na matu Madu Yesu zawn dai ra kadawn taw nga ai wa kaw shang yu chye na, shi a hkam sha ai lam hpe tinang hkam sha lu nna dangdi dangdep ai daram tinang a htingbu wa hpe garum shingtau lu u ga. 

KARAI KASANG A YAW SING AI LAM HTA SAK HKRUNG HKAWM SA NGA GA

Na a aten, ahkyak da ai hte masin salum hpe ka-up tawn da ai gaw hpa rai kun?

Madu Yesu a ga-shadawn hta na, sahti wa hte hpa mung n lu ai wa a mabyin hpe yu nna grai pyaw ai wa a prat, nhti nhtang byin mat ai hpe anhte chye lu sa ga ai. Dai mabyin hta, lu su ai hte matsan ai, Sumsing lamu hte ngarai, tsawra matsan dum myit hte n-gawn nsawn di ai myit, shalawm la ai hte shinggan kau ai, ngu ai lam ni a shai hkat ai hpe Madu Yesu, madi madun sai. Gam maka, nhti nhtang re ai hpe ma anhte mu lu sa ga ai. Lazaru gaw matsan ai sha n rai, machyi hkrum ai hte shi hkum hpe pyi n sharawt lu ai. Shi gaw sahti wa a nta chyinghka makau e ‘taw’ nga ai. Shi a nma sa mata ya ai gwi ni mung, shi lu tawn da ai muk tawng ni hpe sha kau ya ang sai. Shi hpe n-gawn nsawn di sai sahti wa chyawm gaw si mat ai hpang shi a gam maka hpe mu la sai.

Karai Kasang a yaw sing ai lam hta, arung arai sut gan lu ai ni gaw, hpang jahtum ten hta yawng sum mat nna, gam jaw gam ya chye ai ni chyawm gaw htam latsa hta n-ga lu la ma ai. Lazaru ngu ai a lachyum gaw; Karai Kasang gaw ngai a garum ningtum rai nga ai, nga ai. Gam maka ntsawm ai hte hkam sha yak la ai rai tim, Lazaru gaw Karai Kasang hta myit mada shara n mat mat ai. Sumsing sutgan hta shi a myi jung nga ai. Sahti wa chyawm gaw, shi a sutgan, sut su lam hta lai kaga n mu lu sai. Shi hta ra mi ra lu tawn da ai sha n-ga, myit dik ai hte kam mi kam jai lang kau sai. Shi a sut gan ntsa myit machyu nga ai majaw, makau mayang na ra kadawn ai ni hpe pyi n mu kau sai. Karai Kasang hpe mung, Sumsing sutgan hpe mung shi n mu lu sai. Karai Kasang hpe n rai, sut gan hpe daw jau kau sai. Hpang jahtum, sahti wa gaw mawhpyi bai tai mat sai.

Karai Kasang hpe jet ai sutgan kaba zawn lu tawn da ai daram myit pyaw myit dik ai prat hpe nang chye nga ai kun? Sumsing Lamu hta myit mada shara hte shimlum lam hpe tawn da ai ni gaw galoi mung yak hkak jam jau hkrum na n rai.

“Madu Yesu e, Nang gaw ngai a sutgan hte kabu shara rai nga ai. Sumsing sutgan hte ngai hpe lu su shangun rit. Nang Madu jaw da ai wenyi sutgan, arung arai sut gan ni hpe masha kaga ni hte gam garan chye lu ai, gam jaw gam ya chye ai salum hpe mung ngai hpe jaw ya rit law” Amen!

PRANWAN LADAW (26) LABAN SHANI NA CHYUM LAIKA

25th September 2016

CHYUM MUNGGA DAW 1 

AMO 6: 1. 4-7.

Ya hti na gaw, m yihtoi Amo a laika hta na rai nga ai.

Mahkra dang chye ai Karai Kasang ning nga ai: Zium bum ntsa e ngwi pyaw nga nna, Samari bum ntsa e hkithrpa n dum nga ai ni a matu, tsang shara nga malu ai. Magwi kawng yup ku hta shanhte kaleng tawn nga nna, panep ni hta gumkan taw nga ma ai. Shanhte gaw sagu hpung na sagu kasha hpe mung, dumsu ulawng na dumsu kasha hpe mung, sha ma ai: tingse dum let, nchyun chyun nna, Dawi zawn dum ai baw amyu myu hpe tinang a matu galaw ma ai: tsabyi chyaru hpe lu lai nna, kaja htum ai sau hte tinang a hkum hpe chya ma ai.

Rai ti mung, Yosep hten byak ai lam hpe n tsang ma ai. Dai re ai majaw, tsasam mung de bawng dung na matu, shanhte hpe shawng woi wa na mara ai. Shing rai, gumkan taw ai ni a pyaw daw kadaw ai lam htum mat na ra ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

1 TIMOHTI 6: 11-16.

Ya hti na gaw, Timohti hpang de San Pawlu shagun dat ai laika langai hta na rai nga ai.

Nang gaw Karai Kasang a masha wa rai nga ndai majaw, ding hpring ai, tara hkungga ai, kam sham ai, tsaw ra ai, shakut sharing ai hte, sumnung ai myit hpe hkan shachyut nga u. Htani htana asak hpe nang hkam la lu na matu, makam masham hte seng ai, mai kaja ai gasat gala ai hpe a gasat nga u: dai hpe hkam la na matu nang hpe shaga la nna, sakse law law a man e teng man ai a matu nang sakse hkam ya nit dai.

Yawng mayawng hpe asak jahkrung ya ai Karai Kasang a man e mung, Puntsiu Pilatu a man e teng man ai a matu sakse hkam ya ai. Yesu Hkristu a man e mung, ngai nang hpe shadum dat ai gaw: Anhte a Madu Yesu Hkristu paw pru ai nhtoi du hkra, nang hpe hkang da ai ga mahkra hpe, mara n kap ai sha ding ding man hkan galaw shatup nga u, ngu nna nang galaw ra ai magam hpe madun dat nngai.

Karai Kasang gaw, ahkying aten ang wa yang, dai Yesu Hkristu paw pru shangun na ra ai. Madu Karai Kasang htani htana ngwi pyaw ai hta anga nga nna, yawng mayawng hte hpe up nga ai Madu langai sha rai nga ai. Shi gaw hkawhkam ni a Hkawhkam, madu ni a Madu rai nga ai rai nna, Shi chyu sha htani htana asak a rawng nga ai hte, anhte a n dep lu ai nhtoi hta a nga nga ai. Masha kadai mung Shi hpe n mu yu ai hte, n mu lu nga ai: Shi kaw htani htana arawng sadang hte hpung shingkang anga nga u ga law. Amen.

Ya hti ai gaw Karai Kasang a mungga rai nga ai.

KABU GARA SHIGA

LUKA 16: 19-31.

Ya hti na gaw, Luka a laika hta na Kabu Gara Shiga rai nga ai.
Yesu gaw Hparishe ni hpe tsun mu ai gaw: Lang mi na sahti langai mi gaw reng htum ai hte kya mani ai hpun palawng bu hpun sumli nna, shani shanang pyaw pyaw ningngai nga ai. Hkum ting kahpraw hpye ai Lazaru ngu ai hpyi sha ai wa langai mi hpe mung, dai sahti wa sha ku hta na hkrat ai adaw ahkyep hta sha mayu nna, shi a chyinghka makau e sa tawn da mu ai: gwi nimung shi a nma sa mata ya ma ai. Shaloi, dai hpyi sha ai wa si mat nna, lamu kasa ni gaw shi hpe Abraham a lahpyen hta woi bang da mu ai: sahti wa mung si wa nna, makoi mayang di dat mu ai.
Katsan ga e nachying nni hkri hkrum let shi mada yu nna, Abraham hpe mung, shi a lahpyen hta rawng ai Lazaru hpe mung mu wu ai. Shaloi, shi gaw Wa Abraham e, ngai hpe matsan dum la e; ngai gaw ndai wan grung ai hta, n ji n mu hkrum nga nngai majaw, Lazaru gaw shi a lata ndung hte ntsin kapruk sa nna, nye a shinglet madit katsi ya li ga, ngai hpang de shangun dat ru law, ngu nna hpyi jahtau wu ai. Shaloi, Abraham gaw, Sha e, nang gaw naw hkrung nga ai hte yang, na a ngamu ngamai lu la nit dai mung, Lazaru gaw dai hte yang tsin yam tsindam hkrum nga ai mung, dum nga u: ya chyawm gaw shi nang e pyaw nga sai, nang mahtang gaw n ji n mu hkrum nga nit dai. dai hta kaga, ndai yang nna, nanhte gaw n ji n mu hkrum nga nit dai. dai hta kaga, ndai yang nna, nanhte hpang de rap sa mayu ai ni, n rap lu mu ga mung, dai yang nna, anhte hpang de kadai n rap wa lu mu ga mung, anhte hte nanhte a lapran e sung la ai krung sinwa din nga ai, ngu nna htan wu ai. Bai, sahti wa gaw, Wa e, dai rai yang gaw, ngai nang hpe hpyi de ga, ngai nau manga naw nga ma ai majaw, shanhte mung ndai nni nkri hkrum ai shara de n du mu ga, shanhte hpe wa shadum shahprang na, Lazaru hpe nye wa nta de shangun dat ya e law, ngu nna hpyi wu ai.
Abraham gaw, shanhte kaw Mawshe hte myihtoi ni nga ma ai: dai ni a ga madat mu ga, ngu wu ai. Sahti wa gaw, N rai, Wa Abraham e, si ai ni hta na, langai mi shanhte kaw bai wa yang gaw, shanhte myit malai lu na ma ai, ngu wu ai. Abraham gaw Mawshe hte myihtoi ni a ga shanhte n madat ma yang gaw, si ai ni hta na langai mi bai hkrung rawt wa rai ti mung, madat kam na ma ai n rai, ngu nna shi hpe htan wu ai.
Ya hti ai gaw Madu a Kabu Gara Shiga rai nga ai.

PRANWAN LADAW (25) LABAN SHANI NA MUNGGA

Mungkan ga ntsa hta ngang grin ai ngu ai “galai sha ai” ngu ai hta lai nna kaga nnga ai ngu nna myit mang hpaji ning hkring langai mi tsun tawn da ai. Shi tsun ai hte mare mungkan ntsa na nga manga gaw aten ahking hte maren galai shai nga ai. Dai rai yang anhte a prat hta mung ru yak jawm jau ai hte nga mu nga mai ai ngu ai ni mung tut e grin nga na nrai.

Kabu Gara shiga hta amu kaw nna jahkring hkawm na mayam wa gaw shi amu nnga mat wa ai shani, shi hpe manang ni garum shigtau ya na matu manang ni hpe garum shingtau ai lam hpe galaw lai mat wa ai majaw shi a nyan marai (n-ding man ai hpe nrai) hpe amu madu wa shakawn shagrau nga ai.

Wuhpung wuhpawng hta nga ra ai shinggyim masha ni gaw shada da garum shingtau yang she sakhkrung nga sa mai ai a majaw tinang hta garum lu ai atsam nga ai shaloi, grau na ra rawng ai ni hpe garum shingtau na matu gaw ahkyak nga ai. Tinang a matu lit nli ai sha garum lu ai lam ni gaw manang ni a matu kaba la ai akyu ara ni byin mai nga ai. Bai garum shingtau ai hpe lu la na matu myit mada ai lam hpe koi gam kau nna garum mai ai hte garum la ging ai a majaw manang ni hpe garum shingtau la lu na matu ra ai chyeju ni Wa Karai Kasang kaw nna hkam la lu u ga.