HKRISTU HKAWHKAM POI MUNGGA (RVA)

PRANWAN LADAW LABAN (34) MUNGGA

Ndai laban gaw nawku hpung a nawku daw jau ai shata hti laika a hpang jahtum na laban rai nga ai. Du sa ai ladaw kaw nna hpang ai ndai shata hti laika gaw Hkristu Hkawhkam poi hte hpung dim dat ai rai nga ai.

Dai ni na laban poi shani hte seng nna myit sumru mai ai lam langai gaw Madu Yesu a hkye hkrang la ai lam a labau rai nga ai. Shi Madu du sa na matu hkyen lajang ai, shangai wa ai, nni nhkri yu bak hkam nna wudang hta si hkam ai, si ai kaw nna bai hkrung rawt ai, hpang jahtum Kawa Karai Kasang a hkra maga e hkaw dung nga lam ni hpe shaning ting langai hpang langai myitdum nna akyu hpyi kasi la na matu rai nga ai. Hkristu Hkawhkam ngu ai aya hpe shani shana jang lu la ai nrai nga ai. Madu Yesu gaw anhte shinggyim masha zawn nga sa lai wa nna hkye hkrang la ai lam hpe hkan shatup galaw sa ngut ai hpang she lu la ai rai nga ai. Anhte a prat hta e awng dang ai ngu ai de rai ndu shi yang shakut shaja ai, jam jau hkam ai, myit galu galang hte lani mi na amu hpe lani mi tup hkrak galaw ai, makam masham hta manoi manat nna sak hkrung hkawm sa ai lami ni hpe galaw sa let lu la mai nga ai.

Hkristu Hkaw Hkam matsun ai lam ni hpe hkan shatup let anhte yaw shada ai lam ni gaw Shi Madu myit ra ai rai nna, ndai yaw shada ai lam ni hpe lu la na matu shakut ai hta ra nga ai chye ju hpe anhte a Madu Hkristu Hkawhkam kaw nna hkam la lu u ga.

HKRISTU HKAWHKAM POI MUNGGA

Sumsing lamu hte ginding aga nga yawng nga pra ntsa up hkang na ahkaw ahkang, Madu Yesu hpe ap jaw da ai lam nang chye na nga ai kun?

Messiah hkawhkam rai nna Shi a amyu masha Israela ntsa e sha n rai, Mungdan shagu hpe up hkang na re lam shaleng dan na matu Madu Yesu gaw wudang hta jen noi si hkam sai. Rai yang, Madu Yesu a hkawhkam re ai lam gaw anhte a matu kaning re ai lachyum rai a ta? Democracy Mungdan ni hta, masha shagu gaw maren mara re ai ngu hkap la da ai shara ni hta rai yang, hkawhkam, hkaw seng ngu ai lam hpe, dai ni aten loi mi chye na yak na nhten. Karai Kasang gaw, shawng nnan e, Shi a amyu masha Israela hpe hkawhkam n jaw mayu ai. Hpa majaw rai?

Karai Kasang chyu sha shanhte a hkawhkam rai nna kaga masha n ra kadawn sai. Kaning mi rai tim, Karai Kasang gaw, Dawi a aru arat ni hku nna hkawhkam hkaw seng jaw ya let htani htana agrin nga na ra ai ngu gasadi jaw da sai. Dai majaw, Yuda ni hta chye na da ai lam gaw, Messiah Madu gaw hkawhkam hkring htawng hta du sa nna shanhte a matu Mungdan de ya na myit da ma ai. Maigan myu sha ni dip lu dip sha tawn ai kaw nna shalawt la na hkawhkam hpe shanhte ra sharawng ma ai. Law law wa Madu Yesu hpe dai Messiah hkawhkam ra na re ngu grai myit mada ma ai. Madu Yesu hpaw tsun dan ai hkawhkam ngu ai hpe n chye na ma ai. Madu Yesu du sa ai gaw hten za n-nga ai Mungdan a matu wenyi hte masin salum hpe zing madu la lu na matu rai nna hten za chye ai lamu ga ni, arawng aya ni a matu n rai nga ai.

Madu Yesu nam mali e, nhtoi mali shi ya lu sha gam nga yang, Satan wa gaw mungkan a Mungdan ni yawng jaw na, (Mt 4:8-9)nga nna gung lau sai. Mungkan gaw Satan a atsam kata rai nga ai hpe Madu Yesu chye nga ai. Dai hte maren, mungkan ga ntsa Satan wa up hkang sha nga ai hpe gasat shamat kau na matu Madu Yesu du sa wa ai nan rai nga ai. Dai lam a matu, shi hkum nan wudang ntsa hta asak ap nawng kau ai du hkra, Karai Kasang sharawng awng ai hpe hkan galaw ai lam sha, awng dang ai lam rai nga ai hpe Madu Yesu chye nga ai. Madu Yesu wudang ntsa hta noi nga yang, shi a hkawhkam aya hpe asawng asang di ai hpe mung hkrum sha sai. Kaning mi rai tim, Madu Yesu gaw, Yuda ni a hkawhkam ngu ai hta sha n rai, mungkan ting a hkawhkam tai let si hkam lai wa sai. Satan, mara, mungkan ga hpe Madu Yesu awng Padang dip lu ai gaw wudang ntsa hta si hkam ai hte bai hkrung rawt ai marang e rai nga ai.

Hpung shing kang a ting nyang matu gaya kahpa wudang hte, shut hpyit mara a mayam prat na anhte hpe Karai Kasang a hpung shingkang hta kashu kasha ni tai na matu, Madu Yesu galai ya da sai. Shingran laika hta Madu Yesu hpe hkawhkam ni yawng a hkawhkam, Madu ni yawng a Madu ngu shamying shaga sai. Madu Yesu Hkristu hpe Na a hkawhkam hte Madu ngu nang chye na, dum hprang hkap la ai kun?

Ninghtoi a Mungdan hte ningsin a Mungdan lahkawng lapran lata la lu na lam Chyum laika madun ya sai. Manu dan ai hpe lata la na gaw anhte a lit rai sai. Hten run mat na mungkan hte, htani htana agrin nga na Karai Kasang a Mungdan gaw Shi Madu a htani htana tsawra myit hte Tara rap ra lam hta gaw de tawn da ai majaw galoi mung agrin nga na re.

Madu Yesu hpe Madu hte Hkawhkam ngu hkap la na matu gaw, ding hpring ai, ngwi pyaw sim sa ai, Tengman ai tara hte Tsawra myit hte up hkang ai htani htana agrin nga ai Mungdan a mung shawa masha tai na matu shakut ra na re.

“Madu Yesu Hkristu e, Nang gaw ngai a hkawhkam rai nna kaga n nga sai. Ngai a masin salum, myit mang ai lam, sharawng awng ai lam hte wenyi a matu sara hte Madu tai nga ya rit law. Ngai a kaja dik ai hte htingbu ni hpe daw jau ai lam, ngai galaw ai amu magam yawng hte gaw Nang Madu hpe kabu shangun ai lam rai u ga law,"

HKRISTU HKAWHKAM POI LABAN CHYUM LAIKA

November 22, 2015
CHYUM  MUNGGA  DAW 1

Daniela 7: 13-14

  Ya hti na gaw, myihtoi Daniela a laika hta na rai nga ai.

13 Shana na shingran hta ngai mu mada nna, masha kasha zawn san ai wa langai mi, sumwi hta jawn let du sa ai hpe ngai mu se ai. Moi chyaloi nhkoi na, asak kaba dik ai wa hpang de shi du jang, dai wa a man de shi hpe jashawn mu ai. 14 Masha amyu baw shagu hte, ga amyu myu tsun ai ni yawng, shi hpe daw jau na matu, daru magam, hpung shingkang hte mungdan, shi hpe ap ya wu ai. Shi a up hkang ai gaw n htum n wai, htani htana prat dingsa up hkang ai lam rai nga nna, shi a mungdan gaw hten byak lu ai mungdan n rai.

Ya hti ai gaw, Karai kasang a mungga rai nga ai.

CHYUM  MUNGGA  DAW  2

Shingran laika 1: 5-8

Ya hti na gaw, Yawhan a shingran laka hta na rai nga ai.

Yesu Hkristu gaw kangka re ai sakse wa, si mat ni hta na kasha alat, dinghta ga na hkawhkam ni hpe up ai Madu Magam rai nga ai. Shi anhte hpe tsaw ra nna, shi hkum nan a Asai hte anhte a shut hpyit mara hpe raw dat ya mani ai; Shi a Kawa Karai Kasang hpe daw jau na matu, anhte hpe hkawhkam amyu hte hkungga nawng ai amyu shatai da mani ai; dai Yesu Hkristu kaw hpung shingkang hte daru magam ahkang, htani htana e a nga nga u ga law. Amen. Yu mu, Shi gaw sumwi hta du sa wa nna, yawng mayawng mung, Shi hpe galun ai ni mung, Shi hpe hkap mu na mara ai rai nna, dinghta ga na amyu nlang hte gaw, Shi a majaw sharung shayawt ai hte, htawm hpang de du na ra ai wa, mahkra dang chye ai Madu Karai Kasang tsun nga ai.

  Ya hti ai gaw, Karai Kasang a mungga rai nga ai.

KABU GARA SHIGA

Yawhan 18:33-37

Ya hti na gaw, Yawhan a laika hta na Kabu Gara ai Shiga rai nga ai.

            33 Pilatu gaw Yesu hpe, Nang Yuda masha ni a hkawhkam rai nga nni? ngu nna, san wu ai.34 Yesu gaw, Dai gaw na a myit hte nang san nni? Shing n rai, masha kaga e nye a lam nang hpe tsun dan ma ni? ngu nna htan wu ai.35 Pilatu gaw, Ngai Yuda masha rai nga a ni? Na a amyu masha ni hte Jau agyi ni gaw, nang hpe ngai kaw sa ap nga ma ai; nang hpa galaw shut nit ta? ngu nna bai san wu ai.

           36 Yesu gaw, Nye a mungdan gaw ndai mungkan ga na n rai li ai; nye a mungdan ndai mungkan ga na rai yang gaw, ngai Yuda masha ni a lata de n shang hkra, nye a ali ama ni gasat na masai: ya chyawm gaw, nye a mungdan ndai yang na n rai li ai, ngu nna Pilatu hpe htan wu ai.37 Dai re ai majaw pilatu gaw, Dai rai yang, nang teng teng hkawhkam rai nga n ni? ngu nna san wu ai. Yesu gaw, Nang tsun ai hte maren, ngai teng teng Hkawhkam rai nga nngai: ngai gaw teng man ai a maga de sakse hkam ya ra nngai. Dai a matu ngai shangai chying hkai wa ni ai hte, mungkan ga de du sa ring ngai: tengman ai hte seng ai ni yawng hte gaw, nye a ga nsen madat ma ai, ngu nna htan wu ai.

Ya hti ai gaw, Madu a Kabu Gara Shiga rai nga ai.

PRANWAN LADAW LABAN (33) MUNGGA

Anhte shinggyim masha ni gaw tinang galaw ra ai amu bungli ni hpe ahkying garawt nna n-lu galaw dat ai majaw hkrat sum ai lam law law nga nga ai. Anhte a asak aprat hta awngdang ai lam hpe lu la na matu gaw tinang galaw ra ai lam hpe shi a hkying aten hta tup hkrak rai nna kaja dik htum ai hku galaw sa nna lu la mai nga ai. Ahkaw ahkang ngu ai gaw yawng hta nga ai rai tim shi a aten ahkying hta tup hkrak rai nna nlu jai lang kau dat yang gaw hkrat sum chye nga ai.

Dai hte maren, anhte a wenyi hkrun lam hta shi aten ahkying hte rau rai nna hkan shatup galaw sa ra na rai nga ai. Tinang shajin shachyip ra ai lam ni hpe nhprai n-yet ai sha galaw sa ai wa gaw Karai a Kasha galoi ahkying hta du sa ai rai tim hkrit tsang hpa lam nnga na re.

Karai Kasang gaw anhte shinggyim masha ni hpe tsaw ra ai a majaw nkaja tim je yang dawdan ai lam hpe yajang n-galaw ai sha shading sharai la na matu ahkaw ahkang jaw ya nga ai. Karai Kasang a tsaw ra myit hpe n-gawn nsawn n-galaw ai sha shani shana hkan shatup ra ai lam ni hpe nhprai n-yet ai sha hkan shatup sa wa ra na re. Mai kaja ai lam hta Karai Kasang ra sharawng ai hku nna nga sa lu ai hta grau nna myit pyaw myit dik lu ai asak a prat gaw nnga na re.

Hpang jahtum na je yang dawdan ai lam hpe hkrit tsang nna nre ai sha, shani shana na anhte a asak aprat hta myit pyaw myit dik ai lam hpe lu la na matu Karai Kasang ra sharawng ai hpe ahkying aten n-garawt ai sha hkan shatup nga sa lu u ga.

MAKA KUMLA NI HPE NANG ATSAWM SHA CHYE HTI AI KUN?

Madu Yesu a prat na shawa masha ni gaw, Messiah (Hkyela Madu) hpe, mau hpa lamik kumla ni hte rau du sa wa na myit mada ma ai. Madu Yesu a shawng na lang du sa ai shaloi mung sung lam law law hte hpring nga ai; David a kasha gaw Bethlehem mare na ‘nga lawng’ hta shangai ai, dai Israela a hkawhkam wa hpe sa du nawku na matu Sinpraw mung na hkawhkam ni gaw shagan e lam woi ya ai majaw du wa ma ai, Laksama a kasha, myi kyaw ai wa hpe myi mu shangun nna, si ai kaw na bai jahkrung sharawt ya lu ai lamik kumla galaw ai, nni nkri hkam la ai hte wudang ntsa hta si hkam sai, hkrung rawt sai Madu gaw Katsan ga na chyinghka ni hpe hpaw kabai kau let dai kaw nga nga ai ni hpe hkye mawoi la sai. Dai Madu a lam hpe myi htoi law law htawn tsun ai hte maren, mungkan htum ai aten hta bai du sa wa nna shi a magam bungli hpe shangut shakre na rai nga ai.

“Masha kasha n san ai wa marai mi sumoi hta jawn let, Hpung shingkang hta du sa wa na” ngu ai gaw myihtoi Daniela a laika hta na rai nga ai. Shi a shingran gaw, Karai Kasang a tingnyang man e, shinggyim hkawhkam wa hpe ahkang aya ap ya ai zawn rai sai. Ndai hkawhkam wa a ahkang aya gaw Karai Kasang kaw nna rai nna, mungkan ting hpe htani htana up hkang na matu rai sai. Madu Yesu a prat na Yuda ni gaw, maigan masha ni up hkang sha ai kaw nna lawt lu hkra, rawt malan woi na, hkawhkam hpe myit mada nga ma ai. Madu Yesu shanhte hpe tsun ai gaw, Shi Madu bai du sa ai shaloi, yawng a matu Tara rap ra ai, ding hpring ding man ai, hte ngwi pyaw simsa ai mungkan nnan hpe gaw gap na lam rai nga ai.

Madu Yesu tau nau tsun ai, hpang jahtum n’htoi na Tara Jeyang na lam gaw, Israela amyu masha ni a matu lam yan nnan gaw n rai sai. Tsaban law law tau nau nna ndai mabyin a lam hpe myihtoi ni tsun shapraw lai wa sai. “yu  u, dai mungkan hpe katsi katsang shakram kau nna, dai hta nga ai mara kap ai ni hpe shamyit kau na matu, yak la ai Karai Kasang a nhtoi gaw, pawt sin dawng nna n-yun bu ai hte du na ra ai” (Esa 13:9-13, Yoel 2:1-2, Amo 5:18-20, Zephania 1:14-18). Lahkawng lang ngu na du sa ai lam hpe Madu Yesu tsun ai hpe chye sai lam rai nna byin wa na hpe anhte myit mada mai nga ai. Dai du sa wa na lam chyawm gaw yawng e dum hprang mai ai Maka kumla hte rai nna, hkyen lajang da ai lam n nga ai ni a matu hkrit kajawng hpa rai nna, Madu hpe hkrum zup na jin jin re ai ni a matu mau hpa kaba rai na re. Madu Yesu bai du sa ai shaloi, Tara rapra lam hte Tengman ding hpring ai hpe gaw gap nna, shi hta sadi dung ai ni yawng hpe hkam shaw la na rai nga ai. Shi Madu a Tara Jeyang lam gaw, Shi Madu hpe kam sham ai ni a matu Myit mada shara kumla rai nga ai.

‘Mai hpang hpun na lap prut wa jang’ ngu ai gashadawn hpe tsun ai shaloi, Madu Yesu gaw anhte hpe hpa baw sharin la shangun mayu ai kun? Mai hpang hpun gaw Yuda amyu masha ni a matu ahkyak ai hte galoi mung a sha nga ai namsi hpun rai nga ai. Laning mi hta lahkawng lang asi si ai rai lu ai. Asi law law si ai rai yang, Madu Karai kaw nna shaman ya ai lu la ai re, nga nna myihtoi Yoela tsun dan nga ai (Yoe 2:22). Shalai wa ai poi hpang shani e, shawng na asi si ai nga nna ‘Talmud’ (Yuda htung tara laika) hta ka da ai.

Messiah du sa ai rai yang, shalai wa ai poi aten hta Karai Kasang a Mungdan lam htawn tsun na re, nga nna Yuda ni kam ma ai. Ndai gashadawn gaw, Karai Kasang Mungdan a ngwi pyaw lam, sak prat nnan a kabu pyaw lam, sak prat nnan na ngwi pyaw kabu gara ai hte shaman chyeju lam ni hpe tau nau tsun ai lam rai sai. Hpun lap ni nnan prut pru tsawm wa ai hpe mu lu ai ni yawng hkam sha lu ma ai. Hte maren, Karai Kasang Mungdan a kumla hpe mung mu chye lu na re. Karai Kasang Mungdan lam mung, Karai Kasang a mungga hpe hkap la ai ni a masin salum hta nnan pru pru wa na re. Karai Kasang a mungga hpe kam sham ai ni hta, Karai Kasang a Mungdan asi si wa lu na re. Rai yang, dai Mungdan a asi gaw hpa mi rai kun? “Karai Kasang a Mungdan lam gaw. . . .Chyoipra ai wenyi e, ding hpring ai, ngwi pyaw ai hte kabu gara ai, rai nga ai” (Rom 14:7).

Madu Karai, hpung shingkang hta galoi bai du sa wa na ngu ai aten hpe kadai n chye ga ai. Tim, Shi Madu, anhte hpe kumla madun ya nna, dai Mungdan a hpung shingkang hte arawng sadang hpe mu mayu na matu, anhte a wenyi hpe jasu sharawt ya na rai nga ai. Madu bai du sa wa na lam hpe tau nau kabu gara nga na matu Madu ra sharawng nga ai. Kaja wa sha, Madu gaw anhte hpang de shani shagu du sa wa nna anhte a salum hte ga shaga na rai nga ai. Shi Madu, gasadi hta teng sha bai du sa na rai nga ai. Madu a bai du sa na madun ya ai kumla ni hpe nang tam nga ai kun? Alawan sha du sa wa nna Tara rap ra lam hte ngwi pyaw simsa lam n dai mungkan ntsa hta lajang da ya na matu nang akyu hpyi nga ai kun?

“Madu Yesu Hkristu e, Nang gaw Alpha hte Omega, nnan hpang ai hte jahtum rai nga ai hte hpan da ai lam yawng a Madu rai nga ndai. Nang Madu, hpung shingkang hte du sa wa ai ten hta myiman chyaw rai mu lu na matu ra nga ai n-gun atsam, myit mada lam, ngai hpe jaw ya rit law."

PRANWAN LADAW LABAN (33) SHANI NA CHYUM LAIKA

15 Novembrt, 2015

CHYUM  MUNGGA  DAW  1

Daniela 12: 1-3

Ya hti na gaw, myihtoi Daniela a laika hta na rai nga ai.

1 Nang Madu Karai Kasang daw da ai aten hta e, na a amyu masha ni hpe makawp maga ai Du Magam Mikelu rawt pru na ra ai. Masha amyu ni shawng nga pra wa ai kaw nna dai aten du hkra, galoi n byin yu ai, ru tsang ai aten du na ra ai. Dai aten hta e, jahpan laika hta mying lawm ai, na a amyu masha ni lawt lu na mara ai.

      2  Ga nhpu hta yup pyaw nga ai ni law law wa, yup hprang na mara ai: nkau mi gaw htani htana asak lu la nna, nkau mi gaw htani htana kaya kahpa hte arawng hpoi ai hkrum na mara ai. 3 myit su ai ni gaw  sumsing lamu a nhtoi zawn htoi tu kabrim na mara ai; masha law law hpe ding hpring ai maga de woi awn ai ni mung, shagan ni zawn htani htana prat dingsa e htoi tu na mara ai. 

 Ya hti ai gaw, Karai Kasang a mungga rai nga ai.

CHYUM MUNGGA DAW  2

Hebre 10: 11-14, 18

Ya hti na gaw, Hebre masha ni hpang de San Pawlu shagun dat ai laika hta na rai nga ai.

11 Hkungga nawng ai jau kadai mung, shani shagu daw jau let, shut hpyit mara hpe galoi mung n raw kau ya lu ai, shagu hkungga amyu sha hpe law law lang kahtap nawng ya ma ai. 12 Yesu Hkristu chyawm gaw, shut hpyit mara raw kau ya lu ai hkungga langai sha hpe nawng ya ngut jang, prat dingsa a matu Karai Kasang a hkra maga de dung nga sai; 13 dai shata hta e, Shi a hpyen ni Shi a lagaw n-pu e tawn da ai du hkra Shi la nga ai. 18 Dai rai nna, shut hpyit mara raw dat ya ngut sai rai yang gaw, mara a matu hkungga nawng shara n nga na sai.

 Ya hti ai gaw, Karai Kasang a mungga rai nga ai.

KABU GARA SHIGA

Marku 13:24-32

Ya hti na gaw, Marku a laika hta na Kabu Gara ai Shiga rai nga ai.

          24 Dai nhtoi ni hta e, ru tsang ai amyu myu byin ai hpang de, jan gaw sin mat wa nna, shata mung nip mat na ra ai;25 shagan ni mung lamu de na di hkrat mat nna, sumsing lamu hta e nga ai atsam ni gaw gari ashun wa na mara ai.26 Dai shaloi e, Masha Kasha gaw daru magam hte hpung shingkang hte nawng, sumwi ni hta e du sa ai hpe, shanhte mu na mara ai.27 Dai shaloi e, Karai Kasang Shi a lamu kasa ni hpe, shangun dat nna, aga htum ai kaw nna lamu htum ai du hkra, nbung mali maga de na, Shi a lata la ai ni hpe jahprawng la na maru ai. 28 Dai hta kaga, maihpang hpun hpe yu nna chye la mu: de a lakung lakying ni majawm wa nna lap prut wa jang, nlum ta ni wa ra ai hpe nanhte chye nga myit dai.29 Dai hte maren, dai lam ni byin hpang wa ai hpe nanhte mu ai shaloi, Shi gaw chyinghka lam makau e ni wa ra ai hpe, chye nga mu.

         30 Nanhte hpe ngai teng teng tsun made ga: Ya pra nga ai ndai amyu masha ni garai n lai mat yang, dai lam yawng mayawng hte byin wa na ra ai.31 Sumsing lamu hte ginding aga lai mat wa ti mung, nye a ga gaw n lai mat na li ai.32 Rai ti mung, dai shani hte ahkying hpe, Wa hta kaga, kadai mung n chye lu ai: lamu kasa ni hte dai Kasha pyi dai hpe n chye lu ma ai.

Ya hti ai gaw, Madu a Kabu Gara Shiga rai nga ai.

PRANWAN LADAW LABAN (32) MUNGGA

Shani shagu anhte galaw sa ai amu magam ni gaw anhte a myit masa lam hpe gram ya mai nga ai. Tinang galaw sa ai, kaja ai nkaja ai amu magam lam ni hpe myit lawm hkum lawm ai hte galaw sa ai a marang re kaja ai, nkaja ai nga nna byin chye nga ai.

Dai hte maren anhte a myit masa lam ni hpe mung amu bungli ni hku nna hkrang shala ya mai nga ai. Chyum mungga hta Madu Yesu gaw masha wuhpung hpe laika ka ai sara ni a lam shadum jahprang lai wa sai.  Shanhte gaw buhpun palawng kaja ai ni hpe buhpun nna manang ni a shakram ai hkam la ai, kaja ai shara kaw dung ai, akyu galu galang hpyi ai lam ni hpe galaw ai rai tim gaidawng gaida ni hpe dip sha zingri jaw ai majaw ja la ai ari dan ni hpe hkam la hkrum na re ngu shadum jahprang lai wa sai.

Dai re ai majaw shinggan masa lam kaw galaw sa ai amu bungli kaja na matu hta anhte a myit masin kaja na gaw grau ahkyak nga ai. Gaida jan gaw ja gumhpraw law law alu nlu jaw ai rai tim shi a myit masin kaw nna kamsham ai hte lu ai yawng hpe jaw ya sai rai nga ai. Shi jaw ai alu gaw masha ni jaw ai hte shadawn yang nlaw la ai rai tim Karai Kasang a man hta yawng hta grau nna myi man lu sai rai nga ai.

Dai rai yang anhte galaw sa ai mai kaja ai lam ni hpe myit lawm hkum lawm ai hte galaw sa nna kaja ai myit masin hpe gaw gap lu let gaida jan zawn rai nna galaw sa ai lam shagu gaw masha a man hta myi man nlu tim Karai Kasang a man hta arawng aya lu ai amu bungli ni hpe galaw sa wa lu u ga.

TSAWRA SHAWANG MYIT KABA HTE SAK JAW U

Karai Kasang hpe nawku ai hte tengman ai makam masham gaw hpa mi rai kun?

Shut shai ai makam hte seng nna, Madu Yesu gaw Sape ni hpe sadi jaw wu ai. Laika ka ai Sara ni hpe lawng lam masum hte seng nna Madu sadi jaw ai hta; 

(1) Sak jaw ap nawng na malai shakawng shakang rai hkawm ai, 

(2) Tsawra myit hte galaw daw jau na malai masha kaga ni hta grau ai hpe madun mayu ma ai, 

(3) Tinang a lu lawm lam a matu, arawng aya hpe jai lang ai, lam ni rai nga ai.

Tengman ai makam/nawku hpung ngu ai gaw, dingman ai masa hte Karai Kasang hte htingbu ni hte mung, tsawra ai, hkungga la ra ai hte mahku mara galaw ai lam rai nga ai. Karai Kasang gaw Chyoipra ai wenyi hpe anhte kaw bang da ya ai marang e, Madu hta kabu gara ai hte hpring wa nna, tengman kabu pyaw ai nawku daw jau ai lam, masha kaga ni hpe sak jaw ap nawng tsawra ai hta kabu myit pyaw lu ai lam ni hte hpring tup wa na rai nga ai. Karai Kasang hpe jaw teng ai hte hkungga lu ai lam gaw, anhte a masin salum hpe awng dawm ahkang jaw ya nna Karai Kasang hte mung jinghku ni hpe mung n dut ndang matut nga lu na rai nga ai.  

Tsawra myit hte gam jaw gam ya chye na matu mara Madu Yesu, Shi a sape ni hpe sharin achyin ya nga ai. Tsawra myit gaw zing da ai lam nnga, nhpaw n-ya jai lang ngu ai. Dai lam hpe madi madun na matu, Madu Yesu hte sape ni gaw Nawku htingnu kaw dung nga nna, masha ni Alu bang jaw ai hpe yu nga ma ai. Lu su ai ni law law wa sa bang ai hta jan nna bang sai gaida jan a alu kachyi mi hpe Madu Yesu shakawn shagrau nga ai. Kaning rai nna matsan mayan re ai wa a alu gumhpraw gaw sut gan law law lu ai ni a Alu hta grau law sai kun? Madu Yesu a mahtai gaw asan sha rai nga ai. Tsawra myit gaw ja jet hta grau nga ai”. 

Teng ai jaw ya ai lam gaw masin salum kaw nna prut pru wa ai hpe Madu Yesu sharin ya nga ai. N san seng ai (snr) masha ni mu lu u ga, jaw ya ai kumhpa gaw manu jahpu yawm mat nga ai. Tim, Tsawra myit hte, gam jaw ya mayu ai myit hte, hkam sharang let jaw ya ai alu kumhpa gaw, manu daw dan n lu ai. Kade kaba ai, manu jahpu law law hkrat ang ai ngu ai gaw ahkyak n rai nga ai. Dai matsan ginda jan hta byek san langai mi daram sha gaw zing da yang mai ai rai tim, shi lu malu yawng hpe bang jaw kau nit ai. Dai hpe Madu Yesu shakawn shagrau ai lam gaw, shi lata lu mi lu, asak hkrung nga pra na hte hpawn, yawng jaw kau mayu ai majaw rai nga ai. Anhte hta, jaw ya na matu manu n dan, kaji la ai kumhpa sha lu ai rai tim, Madu Yesu, sharin shaga ai hte maren, anhte hta na hpe bang jaw ai rai yang, anhte myit mada da ai hta grau ai hpe Karai Kasang lajang ya na rai nga ai. Tsawra shawang myit hte Karai Kasang hte htingbu ni hpe gam jaw gam ya ai marang e, lu la mai ai ngwi pyaw kabu gara ai lam hpe nang chye nga ai kun? 

Madu Yesu e, ngai hta lu mi lu gaw Nang Madu a rai nga ai. Na a hpung shing kang a matu, ngai a aten, lu lawm ai hte sak prat ni hpe hkap la ya rit law.

PRANWAN LADAW LABAN (32) SHANI NA CHYUM LAIKA

18 November, 2015

CHYUM  MUNGGA  DAW  1

1 Hkawhkam  17: 10-16

Ya hti na gaw, Hkawhkam laika langai hta na rai nga ai.

10 Myihtoi Elia gaw Madu a ga na la jang, rawt sa nna, Sidun  mung na Za-rep-hta mare de wa ai; mare chyinghka lam de du jang, gaida jan langai mi hpun hta nga ai rai nna, Elia gaw, Ngai lu na ntsin loi mi sa jaw rit, ngu nna shi hpe shaga ai. 11 Shi gaw ntsin sa la na wa nga yang, Elia gaw, muk  hkyep mi mung la sa rit, ngu nna bai hpyi dat wu ai. 12 Sha loi dai gaida jan gaw, Na a Madu Karai Kasang hkrung nga ai hte maren, ngai muk pa mi pyi n lu nngai; dibu hta muk shadung latup mi hte, nam tau hta namman kaji mi sha rawng nga ai. Ngai hpung hkyep langai lahkawng sa hta nna, dai muk hpe nye a matu, ngai sha a matu mung,shadu ngut jang,an lahkawng sha nna, si na saga ai, ngu nna Elia hpe htan wu ai. 13 Bai Elia gaw, Hkum tsang et; nang tsun ai hte maren, wa galaw jang, nye a matu muk pa kaji shawng shadu nna,  sa jaw rit: dai hpang, na a matu mung, nsha a matu mung shadu tawn u; hpa majaw nga yang, Israela a Madu 14 Karai Kasang ning nga ai: Madu gaw ga ntsa e marang htu shangun ai shani du hkra, Dibu na muk  shadung mung yawm mat na n rai; Nam tau na namman mung  yawm na rai, nga ai, ngu nna shi hpe htawn tsun wu ai. 15 Dai gaida jan Elia a ga hte maren wa galaw wu ai. Shi mung, dai myihtoi wa mung, shi a kasha mung, laning mi tup sha nga lu ma ai. 16 Madu gaw Elia a n-gup hta htawn tsun ai hte maren, dibu na muk shadung ma mat ai n rai, nan tau na namman mung yawm mat wa ai n rai.

          Ya hti ai gaw, Karai Kasang a mungga rai nga ai.

CHYUM  MUNGGA  DAW  2

Hebre 9: 24-28 

Ya hti na gaw, Hebre masha ni hpang de shagun dat ai laika hta na rai nga ai.     

24 Hkristu gaw, sumsing lamu na chyoi pra ai shara majing a kasi kumla hku nna, masha a lata hte galaw tawn ai chyoi pra ai shara kata de n shang sai; Shi gaw, Karai Kasang a man e dan pru nna, anhte a matu htinglu htinglai ya na nga, sumsing lamu kata de nan shang wa sai; 25 Ga shaka Dingsa hta, ningbaw tai ai jau kaba gaw, tinang a sai n re ai asai hte, dai chyoi pra ai shara de laning hte laning shang ra ai zawn, Hkristu gaw Shi hkum hpe law law lang hkungga nawng ya ra ai n rai; 26 law law lang nawng ya ra ai rai yang gaw, ginding aga lat kaw nna Shi law law lang si hkam ra na nu ai. 27 Rai ti mung, Hkristu gaw dai hku n galaw ai sha, Shi hkum hpe hkungga nawng ya ai a marang e, shut hpyit mara hpe la kau ya na matu, ndai prat a jahtum ai de, shi kalang mi sha dan pru nu ai. 28 Ya hpang de kalang mi bai dan pru ai shaloi, mara la kau ya na matu n rai, Shi hpe myit mada la nga ai ni hpe, hkye hkrang la ai a shabrai kumhpa jaw na matu, Shi dan pru na ra ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 12:38-44

Ya hti na gaw, Marku a laika hta na Kabu Gara ai Shiga rai nga ai.

          38 Yesu nawku htingnu nhku de sharin shaga nga yang, Shi tsun mu ai gaw: Tara sara ni hpe sadi nga mu: shanhte palawng galu hpun nna hkawm sa mayu ai; gat hkan e hkungga ai hte shachyen ai,39 tara jawng ni hta grau reng ai lahkum ni hpe mung, poi hkan e grau ai dung shara ni hpe mung grai ra nga ma ai.40 Shanhte gaw gaida gaina ni lu da ai hpe sha shama let, masha a man e arawng tam ai hku galu galang akyu hpyi ma ai. Dai ni gaw, daw dan ai shaloi, kaba htum ai yubak hkrum na mara ai, ngu mu ai.

         41 Lani mi na Yesu gaw, alu sumpu ang e man yawng nna dung nga yang, shawa masha ni dai alu sumpu hta e gumhpraw bang ma ai hpe yu nga ai. Sut su ai ni law law wa, law law sa bang ma ai.42 Shaloi, matsan mayan re ai gaida jan langai mi sa nna, peksan langai mi ging ai, magri dingsen lahkawng bang nu ai.

         43 De a majaw, Yesu Shi a sape ni hpe shaga la nna, Nanhte hpe ngai teng teng tsun made ga: ndai matsan mayan re ai gaida jan gaw, alu sumpu hta e bang da ai ni yawng hta, grau nna bang dat nu ai.44 Hpa majaw nga yang, shanhte yawng tinang lu ai hta na jan ai hpe sha bang da ma ai; shi chyawm gaw, kaji mi lu ai hta na lu malu mahkra hpe, rai sa, asak bau na mahkra hpe pyi bang kau nu ai.

Ya hti ai gaw, Madu a Kabu Gara Shiga rai nga ai.