MYIT DIK MYIT MADA SHARA

Ngwi pyaw simsa ai hte shimlum ai prat hpe sharawng ai anhte hpe, hpa gaw myit dik shara, myit mada shara jaw ya nga nta?

Sutgan lu su ai, shim lum ai prat hpe lu tawn da ai, shabrang wa marai mi, Madu Yesu hpang de sit sa wa ai. Shi hta ra kadawn ai lam langai mi nga nna, dai gaw; ja, gumhpraw hte mari la n lu ai, htani htana ngwi pyaw sim sa lam rai nga ai. Shi lu la ai mahtai chyawm, shi ra ai hte shai nga ai. Hkang da ai ga ndat ni yawng hpe shi hkan shatup ai nga tim, Madu Yesu tsun dat ai ga gaw Shi myit masin hpe hkra ya sai. Karai Kasang hpang de myit masin hkum hkrang yawng hte sit shang lu na Shi hpe lama mi pat hkum da sai. Arung arai hta shi ra kadawn ai lam n-nga tim, shi lu ai lam hta shi jung nga ai. Shi a lu su lam hta shi a myit mada shara hte myit dik shara hpe tawn da ai. Karai Kasang hpe chyu sha lu la da na matu, Madu Yesu tsun ai shaloi shi kajawng mat sai. Hpa majaw myit yawn ai hte Madu Yesu kaw nna shi hkawm mat wa ai kun?

Shi a sut gan hte ngwi pyaw simsa lam a myit mada shara gaw shara shut ai majaw rai nga ai. Shi hpe Madu Yesu ning dat ai ga tsun sai. Shi a sut su lam sum ma mat na tsang ai majaw, kaga masha ni hpe jaw kau na shi hkrit nga ai. Shi a sut su lam hta kabu pyaw ai hte shim lum lam mu tam ai majaw shawang tsawra myit kaba hte daw jau na hpe shi n galaw lu sai.

Sumsing Mungdan hta sut gan lu na matu hpa majaw ‘yawng dut kau na’ hpe Madu Yesu tsun ai rai kun? sut gan ngu ai shaloi myit masin de grai ni htep ai, ra marin ai hte byin mayu ai lam yawng hkra hte matut mahkai nga ai. Anhte a myit masin hta bang da dik htum ai gaw anhte manu shadan dik htum ai sut gan rai nga ai. Madu Yesu hpe nan anhte manu shadan dik ai sut gan hku nna lu da mai ai. Anhte lu da ai lam yawng hpe tawn kau nna Madu Yesu hpe anhte a sut gan shatai la ai lam gaw myit yawn hpa n rai, kabu gara mai dik ai lam rai nga ai. {makoi da ai sut gan a lam gashadawn ni hpe Mt 13:44 hta hti la mai ai.} anhte lu malu yawng hpe dut kau ai ngu tsun ai shaloi; myit dun nga ai lam ni, manaw manang ni hte kanawn mazum lam, ka up da ai lam, amu bungli, pyaw len chyai ai lam ni, nga pra sa ai lam ni, Karai Kasang hpe yawng a ning shawng shatai na kaw nna pat shingdang tawn da ai lam ni yawng rai nga ai.

Karai Kasang hpe mung htingbu wa hpe mung gam jaw gam ya chye ai wa hta Karai Kasang anhte hpe jaw ya ai daram anhte n lu jaw ai hpe mu lu na re. Karai Kasang gaw manu daw dan n lu ai Sumsing sut gan hte anhte hpe shaman ya nga ai. Karai Kasang gaw, ja gumhpraw hte mari n mai ai lam yawng hkra anhte hpe jaw ya ai. Karai Kasang shi chyu sha, anhte a masin salum kaw nna sung htum ai myit mada ai, sharawng awng ai lam ni hpe shadik ya lu ai. Madu Yesu hta jet ai kabu ngwi pyaw ai lam tam lu na matu shing dang tawn da ai lam yawng hpe nang tawn kau lu na rai kun?

Rai yang, hpa majaw, Madu Yesu gaw sut su ai ni, sut su mayu la ai anhte yawng hkra hpe dai daram laja lana tsun sai rai kun? Sut su nga mai ai lam hpe ning hkap ai rai kun? Madu Yesu gaw, sut su lam hpe mung, sut su ai ni hpe mung, ning hkap ai lam n-nga ai hpe anhte chye lu ga ai. Shi Madu hta sut su ai [kang hta ai ni] manang ni lu nga ai. Marai mi gaw sape pyi tai wa ai. Madu Yesu a sadi jaw ai lam gaw, Gashaka dingsa na hpaji ga hpe bai kahtap tsun ai lam rai nga ai. “Malang ai hku hkan nang ai, matsan mayan wa gaw, magaw ai hku hkan nang ai sahti wa hta, grau mai nga ai” (Ga 28:16, shk 37:16). “sut gan lu hkra tinang hkum hpe hkum jahki et; na a nyan hta hkum hpa et” (Ga 23:4). Madu Yesu tsun ai hte maren rai yang, sut su ai ni gaw, Karai Kasang a mungdan masha tai na n mai byin ai zawn rai nga ai.

Palestine lamu ga hta rai yang, gawla-uk gaw kaba dik ai du sat rai nga ai. ‘samyit na hku’ ngu ai hpe ading tawk lachyum hta la n mai na re. Dai gaw, mare chyinghka kaba pat kau ngut ai hpang du wa ai ni, mayun shang lu na matu galaw da ai, mayun chyinghka kaji rai nna masha marai mi pyi loi gum nna she shang mai ai. Gawla-uk rai yang, arung arai ni yawng jahkrat kau nna htimkum hkawm let sha shang mai ai rai nga ai.

Hpa majaw sut su lam hpe Madu Yesu sadi jaw tsun taw ai rai? Sut su lam gaw shut ai masa hta anhte hpe shang lawt lu shangun ai. “ngai gaw sut su nga nngai, ngai hta sut ring gan chying sali ai, ngai hpa n rai ni ai” (shngrn 3:17) nga ai majaw ‘Ladoki mare’ nawku hpung hpe sadi jaw daru sharin ga tsun sai. “sut su mayu ai ni gaw, hten byak nna shaza kau ai hta, masha ni hpe marit si shangun ai, . . . .gumhpraw marin ai myit chyawm gaw, n hkru n hkra ai amyu myu a ru pawt rai nga ai” (1 Tim 6:9-10). Lazaru hte sahti wa a labau hpe mung anhte hti la mai ai (Lk 16:19- ). Karai Kasang hpe daw jau na matu mung shanhte malap kau wu ai. Chyum laika e sharin ai gaw, anhte makoi da ai hpe sum kau nna, anhte jaw kau ai hpe lu la na’ nga ai. Gam jaw gam ya chye ai lam gaw ndai prat hta mung, hpang na prat hta mung, manu jahpu bai lu la na rai nga ai. Madu Yesu jaw ya na gaw, gumhpraw hte mung mari la n lu ai, lagut mung n lagu lu ai, sut gan rai nga ai. Anhte a myit masin hta rawng dik ai lam gaw anhte manu shadan dik ai lam rai nga ai. Na a sut gan gara kaw nga ai rai?

Madu Yesu e, Sumsing lamu na sut gan de du lu na, nang anhte a salum hpe hpaw ya ni ai. Nang Madu, ngai a sut gan tai nga ya rit, yawng mayawng Nang Madu hta jaw kau lu na matu ngai hpe n-gun atsam jaw ya rit law

PRANWAN LADAW LABAN (28) MUNGGA

“Sumsing mung dan a sutgan lu na matu nang lu ai arung arai ni hpe dut kau nna matsan mayan ni hpe jaw kau u. Ngut jang, ngai hpang hkan nang rit.” Ngu nna Madau Yesu shing hpang de du sa nna nhtum nwai ai asak lu na kaning rai galaw ra na kun ngu san ai wa hpe htan ya wu ai.

Mung kan asak ngamu ngamai na matu ja gumhpraw arung arai ni gaw ra ahkyak nga ai. Dai re ai majaw masha hkum shagu mungkan a sut gan hpe tam shajin nga ai. Raitim, anhte lu tawn da ai arung arai ni gaw grau nna ngamu ngamai ai prat hpe jaw na malai anhte a hkrun lam hpe lit li shangun ai ni byin chye nga ai. Lu ai ni mung lawhpa ai myit ni rawng wa nna grau nna lu mayu chye nga ai. Dai re majaw mungkan sut gan hpe chyu nsim nsa tam chye nga ai. Nkau mi gaw tinang lu ai ja gumhpraw hpe lagu lagut hkrum na hpe myit tsam pu chye nga ai. Masha nkau mi chyawm gaw lu tawn da ai ja gumhpraw hpe jai lang nna nhkru nkaja ai amu bungli hpe galaw chye nga ai. Bai nna tinang zawn, nlu nlawm ai masha ni hpe yu kaji ai shing nrai gumrawng gumtawng ai myit ni byin chye nga ai. 

Lahta na lam ni gaw ja gumhpraw lu ai majaw nre ai sha ja gumhpraw arung arai ni kaw tawn da ai anhte a myit masa njaw ai majaw byin ai rai nga ai. Anhte lu ai arung arai ja gumhpraw ni gaw Karai Kasang jaw ya ai shaman chyeju rai nna Karai Kasang hpe chyeju dum ai myit hte ndai shaman chyeju a jaw e htingbu wa, grau nna nlu nlawm ai masha ni a matu akyu pru ai hte sumsing mungdan a sutgan ni hpe tam ai magam bungli ni hta jai lang lu u ga.

Fr. Philip Aung, MS

PRANWAN LADAW LABAN (28) SHANI NA CHYUM LAIKA

October 11, 2015
CHYUM MUNGGA DAW 1

Hpaji Byeng-ya  7:7-11

Ya hti na gaw, Hpaji Byeng-ya a laika hta na rai nga ai.

Ngai akyu hpyi nga yang, myit su ai chyeju ngai hpe jaw ya ni ai; ngai hpyi nem ai shaloi hpaji byeng-ya a atsam marai nye a ntsa de yu hkrat wa sai. Up hkang ai sumdoi hte hkawhkam tingnyang hta grau nna, ngai hpaji byeng-ya hpe ra sharawng nngai; dai hpe lu la jang, ja sutgan hpe hpa n nawn nngai. Dai hpaji myit hpe, manu dan dik ai lungseng hta grau nna manu shadan nngai; kaning rai nme law, ja mahkra gaw hpaji byeng-ya hte shabung yang gaw, zaibru latsup mi zawn sha rai nga ai; gumhpraw mung hkum pup hkumpa zawn sha rai nga ai. Hkam kaja ai hte hkum hkrang tsawm htap ai hta grau nna, hpaji byeng-ya hpe ngai tsaw ra nngai; de a htoi tu kabrim ai hpung shingkang galoi mung n wai mat ai majaw, nhtoi hta grau nna shi hpe ra sharawng nga nngai. Hpaji byeng-ya ngai hte rau nga yang, mai kaja ai baw hkum sumhpa ngai lu la nna, n dang hti hkra law la ai sutgan ni hpe, shi a lata na ngai hkam la ni ai.

  Ya hti ai gaw, karai kasang a mungga rai nga ai.

CHYUM MUNGGA DAW 2

Hebre 4: 12-13

                                     

Ya hti na gaw, Hebre masha ni hpang de shagun dat ai laika hta na rai nga ai.

12 Karai kasang a mungdan gaw hkrung nga ai hte, shabyin da lu nga ai: nshan lahkawng maga dai ai ntawng nhtu hta grau dai ai: myit masin hte wenyi hpe mung, nra hkrihkraw hte laswi hpe mung, dinghkren gin hka nna, kraw lawang na myit mang ai hte yaw shada ai lam ni hpe, jeyang hparan ya lu ai. 13 Shi n mu lu hkra makoi da lu ai baw hpa mung n nga ai: yawng mayawng hte gaw shi a myi man e dan leng nga ai hte, asan brang lang rai nga ai rai nna, anhte shi a man e jahpan dan ra ga ai.

           Ya hti ai gaw, Karai kasang a mungga rai nga ai.

KABU GARA SHIGA

Marku 10:17-30

Ya hti na gaw, Marku a laika hta na Kabu Gara ai Shiga rai nga ai.

  17 Yesu gaw rawt sa wa maw ai shaloi, masha langai mi gat sa nna, Shi a man e lahput hput di let, Mai kaja ai Sara e, n htum n wai ai asak a Sali wunli lu hkra, ngai hpa galaw ra a ta? ngu nna Shi hpe san wu ai. Yesu gaw,18 Ngai hpe mi kaja ai nga nna, hpa rai tsun n ta? Karai Kasang hta kaga mai kaja ai kadai mung n nga ai.19 Jep ai tara hta: - Masha hkum sat, Masha num hkum shaw,  Hkum lagu, N teng n man ai sakse hkum hkam,  Maw sha map sha hkum rai et, Nnu yan nwa hpe hkungga lara di u, nga ai ga hpe nang chye nga ndai, ngu nna shi hpe tsun wu ai. 20 Dai wa gaw, Sara e, dai yawng mayawng hte hpe ma aprat kaw nna ngai hkan shatup se ai, ngu nna Yesu hpe tsun wu ai.21 Yesu gaw shi hpe n-gaw nja ai myit hte mada yu let, Lam langai mi nang naw ra nga ndai: Nang wa su, lu malu hte dut kau nna, matsan mayan ni hpe karan jaw u; shing rai, sumsing lamu ntsa e nang sutgan lu na rit dai; ngai kaw mung sa hkan nang rit, ngu nna shi hpe tsun wu ai.

      22 Dai wa mahtang Yesu a ga majaw myiman sum mat nna, myit yawn la ai hte bai wa mat ai: kaning rai nme law, shi sutgan law law lu ai wa rai nga ai. 23 Yesu gaw kayin yu nna, Shi a sape ni hpe, Sut su ai ni gaw Karai Kasang a mungdan hta shang na matu, nachying yak la ahka gaw! ngu nna tsun mu ai.24 Sape ni mahtang Shi a ga majaw mau mahka ma ai. Dai rai nna Yesu gaw, Ngai sha ni e, Karai Kasang a mungdan hta shang na gaw, nachying yak la a hka gaw!25 Lu su ai wa gaw, Karai Kasang a mungdan hta shang loi ai hta, gawla-u gaw samyit na hku gale na grau loi nga ai, ngu nna shanhte hpe bai htan wu ai. 26 Shanhte mahtang n dang tsun hkra mau mat let, Dai rai yang kadai wa mi hkye hkrang la ai hkrum lu na a ta? nga nna shada da tsun ma ai.27 Yesu mahtang shanhte hpe mada yu nna, Dai amu hpe masha n galaw lu ti mung, Karai kasang galaw lu nga ai; kaning rai nme law, Karai Kasang gaw yawng mayawng hpe dang galaw nga ai, ngu nna tsun mu ai.

      28 Petru gaw, Anhte mahkra hte hpe kau da nna, Nang kaw hkan nang saga ai; anhte gara hku rai na i? ngu nna Yesu hpe san wu ai.29 Yesu gaw, Nanhte hpe ngai teng teng tsun made ga, Nye a matu hte kabu gara shiga a matu mara, nta, kahpu kanau, kajan, kanu kawa, kashu kasha hte yi hkauna hte hpe kau da ai wa kadai raitimung,30 zingri zingrat hkrum ai hte hpawn, adai prat hta e nta, kahpu kanau, kajan, kanu kawa, kashu kasha hte, yi hkauna hte hpe htam latsa n lu  la na kadai n nga ai: htawm na prat e n htum n wai asak lu la na ra ai, ngu nna sape ni hpe tsun mu ai.

Ya hti ai gaw, Madu a Kabu Gara Shiga rai nga ai.

KARAI KASANG A YAW SHADA AI LAM

      Dinghku shang ai rai tim, n shang ai rai tim, anhte a matu Karai Kasang a yaw shada lam gaw hpa ni rai kun? Num, La jahka ai lam hte seng nna Madu Yesu tsun sang lang dan ai shaloi, hpan da ai magam ningnan hpang ai ten, shinggyim masha a matu Karai Kasang a yaw sing ai lam she bai tsun dan sai. Hkung ran sai num hte la yan gaw hkum shan langai sha rai na matu Karai Kasang lajang da sai hpe anhte mu lu ga ai (Npt Nph 2:23-24). Dai lam hpe Adam yan Eva a kanawn mazum ai lam hta anhte mu lu na re. shan gaw langai a matu langai hpe hpan da ya ai rai nna kaga kadai a matu mung n rai nga ai. Shan gaw anhte yawng a matu kumla hte hkan sa ra ai masa lam rai sai. Mawshe a hkang da ai lam hpe yu yang, sum mat ai de du ai hpe Madu Yesu shaleng ya ai. Dinghku de na ni mung dai Madu a ga matsun hpe tsang tup hte hta la lu na lam Madu Yesu kasi tawn da sai. Dai hte maren, Karai Kasang a Mungdan lam a matu, hkungran ai lam hpe ningdang kau ai ni a matu mung (Mt 19:11-12) kasi hpe Madu Yesu tawn da ya sai.

Dinghku de ai ni hte, ap nawng tawn da ai (Jau, Mama, Brother) prat ni hpe san seng ai prat hta nga na matu Karai Kasang shaga la ai rai sai. Anhte a prat hpe anhte seng nga ai n rai, Karai Kasang hta sha rai nga ai. Anhte a prat hta san seng san pra ai hte nga lu na matu shaman chyeju Shi Madu Karai jaw ya nga ai. Na a prat masa lam hta Karai Kasang a shaman chyeju hpe tam nga ai kun? Madu Yesu hte ni htep wa hkra masha kaga ni hpe garum ya na tam nga ai kun?

Madu Yesu hpang de tinang a kashu kasha ni hpe woi sa ai kanu kawa ni hta, dai ma ni a ntsa, Madu Yesu lata mara shaman ya na ra sharawng nga ai. Madu Yesu lata mara shaman ya ai marang e, hkum hkrang hte wenyi hta, shamai shatsai hkrum na hpe shanhte chye nga ai. Ma kaji ni sa wa ai hpe pat shingdang ai sape ni hpe chyawm Madu Yesu daru da nu ai. Ma kaji ni a gin sup ai hte garu kachyi nga ai lam kaw nna Madu Yesu hpe makawp maga mayu ai lam sape ni hta nga nga ai. Rai tim, Karai Kasang a tsawra ai hpe hkam la lu na matu masha shagu hta ahkaw ahkang nga ai hpe Madu Yesu madun dan na sharawng nga ai. Karai Kasang a man hta yawng mayawng gaw ahkyak nga ai. Masha shagu hpang de, shi a tsawra myit hte atsam hte shamai ya na matu lak san Madu Karai du sa na re. Anhte a ramma kaji ni, Madu Yesu hpang de sa du nna shi a shamai shatsai ya ai chyeju hkam la lu na galaoi mung n mai shing dang da na re. anhte, asak kaba wa sai ni mung, dai ma kaji ni zawn, Madu Yesu hpang de, grit nem ai, sharawng awng ai myit hte sit shang sa wa lu na matu n mai malap kau na re. Nawku jawng, htingbu ni hta hkrum zup lu ai ma kaji ni hpe nang atsawm sha lakawn la ai kun? Shanhte ni Madu Yesu a nyan marai, hpaji atsam hta galu kaba wa lu na matu akyu hpyi ya ai kun?

"Madu Yesu Hkristu e, prat a tsang shagu hta, san seng ai hte nga pra sa lu na, Madu shaga la ya ai. Anhte a kun dinghku de ai prat, san seng ai hte nga sa na ap nawng tawn da ai prat hta teng sha wa san seng ai hte nga pra lu na matu anhte hpe shachyoi shapra ya rit. Kang ka ai, san seng ai, nang Madu hta ap nawng da ai prat hta, ding man ai hte nga pra lu ai matsi anhte hpe shatai la rit law."

PRANWAN LADAW LABAN (27) MUNGGA

Shin gyim masha sak hkrung nga sa lam hta tinang hkrai nre ai sha wuhpung wuhpawng a lapran hta she sak hkrung mai nga ai. Masha langai shangai wa ai shaloi manang ni a garum shingtau ai hpe lu la yang she sak hkrung mai nga ai. Dai hte maren masha wuhpung shagu hta masha shagu nbung ai amu bungli ni hpe galaw nna shada da garum shing tau let sha sak hkrung mai nga ai. Marai mi nlu ai hpe marai mi jahpring shatsup ya mai nga ai. Dai nrai yang sak hkrung nga sa ai lam hta ru yak jam jau kaba hkrum hkra na gaw teng sha rai nga ai. Nbung ai amu bung li ni hte shada da garum hkat let sak hkrung mai nga ai.

Anhte Hkristan masha a npawt nhpang shaga la hkrum ai lam gaw Madu Yesu Hkristu a hpang hkan ai lam rai nga ai. Masha yawng shagu gaw Madu Yesu a shaga la ai lam hta kang ka let hkawm sa ra nga ai. Ndai zawn hkawm sa ai lam hta tinang hte htuk ang ai asak aprat, magam bungli hpe lata la let hkawm sa ai rai nga ai. Dai rai yang kun dinghku de ai prat shing nrai tinang hkrai nga sa ai prat hpe lata la mai nga ai.

Dai ni na chyum mungga ni hta kung dinghku de ai num hte la gaw lahkawng nre ai sha, langai sha rai nga ai. Karai Kasang matut ai hpe masha n-gin hka u ga ngu nna na la lu ai lam gaw kun dinghku de ai prat hpe lata la na matu daw dan let hkawm sa ai ni gaw tinang a asak aprat htum hkra Karai Kasang a man hta tawn da ai ga sadi hpe jahpring shatsup ra na rai nga ai. Tinang a myit shadang ai lam hpe kau da let manang wa hpe chye na ya ai, jet ai tsaw ra myit hte manang wa n-ging dan tim tsaw ra lu ai, shada da myit kaba ai hte nbung ai lam ni hpe shapri shanyem ai lam ni hta Karai Kasang hpe kam hpa let shakut shaja nga sa lu na rai nga ai.

Madu Yesu a hpang hkan nang ai Hkristan masha hkum ngau shagu gaw Karai Kasang shaga la ai lam hta tinang hkum nan daw dan let lata la nna hkan sa ai asak aprat hpe prat tup ngang kang ding grin ai hte nga sa lu u ga.

PRANWAN LADAW LABAN (27) SHANI NA CHYUM LAIKA

4 October, 2015
CHYUM MUNGGA DAW  1                                                           

Npawt Nhpang  2:18-24

Ya hti na gaw, Npawt Nhpang laika hta na rai nga ai.

   18 Madu Karai Kasang gaw, Lasha gaw shi hkrai nga na n mai ai; shi a amyu na nrum ntau shi a matu ngai galaw na we ai, nga ai. 19 shaloi Madu Karai Kasang gaw nam mali na ashu ashan mahkra hpe mung, ntsa malen pyen ai u mahkra hpe mung, ga hte shachyaw wu ai rai nna, dai ni hpe kaning ngu shamying na chye lu hkra, dai masha wa hpang de woi sa wu ai.Dai masha wa mung nsoi nsa rawng ai baw yawng hte hpe amying shingteng jaw wu ai hte maren, tinang nang e shingteng amying lu ma ai. 20 Shaloi dai masha wa gaw yam nga mahkra hpe mung, ntsa malen pyen ai u mahkra hpe mung, nam mali na dusat nhprang mahkra hpe mung, amying shingteng jaw wu ai; rai ti mung, dai masha wa a amyu na nrum ntau garai nnga lu ai. 21 Dai  majaw Madu Karai Kasang gaw dai masha wa hpe yup kaba hte shayup wu ai rai nna, shi yup pyaw nga yang, shi a garep nra langai mi shaw la nna, dai shara hta ashan hte shatup yu wu ai. 22 Dai hpang madu Karai Kasang gaw dai masha wa hta na shaw la ai garep nra hte shinggyim numsha hpe shachyaw wu ai rai nna, masha wa kaw woi wa ya wu ai. 23 Dai masha wa gaw, ya masha ndai gaw, nye a nra hta na nra, nye a ashan hta na ashan rai nga ai: dai majaw shi hpe numsha ngu na rai nga ai; kaning rai nme law, shi gaw lasha hta na shaw la ai rai nga ai, nga ai.24 Dai re ai majaw, lasha gaw shi a kanu kawa hpe kau da nhtawm, shi a madu jan hta manoi nga na rai nna, shan lahkawng hkum shan langai sha tai lu na mara ai.

Ya hti ai gaw, Karai Kasang a mungga rai nga ai.

CHYUM MUNGGA DAW  2

Hebre  2: 9-11

Ya hti na gaw, Hebre masha ni hpang de shagun dat ai laika hta na rai nga ai.

 9 Madu Yesu gaw, Karai Kasang myit ra ai hte maren, masha yawng mayawng a matu si hkam  u ga, tawng marang mi sha lamu kasa ni hta shagrit kau ai hkrum wu ai; ya e chyawm gaw, si hkrung si htan a nni nkri hpe hkam la wu ai majaw, hpung shingkang hte arawng sadang dagraw hkam la nu ai. Yawng mayawng a ntsa e up nna, yawng a npawt rai nga ai Karai Kasang gaw, 10 kashu kasha law law hpe hpung shingkang de woi wa yang, dai hkye hkrang la ai lam hta masha ni hpe woi ningshawng ai wa hpe, nni nkri hte jahkum shatsup na gaw, htap htuk nga ai. 11 Shing rai, shachyoi shapra ya ai wa hte, shachyoi shapra hkrum ai ni gaw, amyu langai sha hta rum nga ma ai majaw, shanhte hpe hpu nau ni ngu nna, shi n kaya ai sha tsun nga ai.

  Ya hti ai gaw, Karai Kasang a mungga rai nga ai.

KABU GARA SHIGA     

Marku 10:2-16

Ya hti na gaw, Marku a laika hta na Kabu Gara ai Shiga rai nga ai.

2 Hparishe masha nkau mi sa du nna, Yesu hpe chyam let, Masha gaw tinang a madu jan hpe jahka kau na, mai nga a ni? ngu nna san mu ai.3 Yesu gaw, Mawshe nanhte hpe kaning nga hkang da a ta? ngu nna htan wu ai. 4 Shan hte gaw, Jahka ai laika ka da nna, tinang a madu jan hpe shabawn kau na ahkang Mawshe jaw da sai, ngu mu ai.5 Yesu gaw, Nanhte a myit ja malit dai majaw, Mawshe nanhte a matu dai tara tawn da nu ai.6 Rai ti mung, shawng npawt e, masha hpe hpan da ai shaloi, Karai Kasang gaw numsha hte lasha yan hpe hpan da mu ai.7 De a majaw, lasha gaw kanu kawa hpe kau da nna,8 shan lahkawng gaw hkum shan langai sha tai lu na mara ai.9 Shing rai shan gaw, lahkawng rai nga ma ai n rai, hkum shan langai sha rai nga ma ai. Dai rai nna, Karai Kasang matut da nu ai hpe, masha gaw jahka kau lu na n rai, ngu nna tsun mu ai. 10 Shanhte nta nhku de nga yang, sape ni ndai lam Yesu hpe bai san mu ai.11 Shaloi Yesu gaw, Tinang a madu jan hpe jahka kau nhtawm, num kaga hpe hkungran la ai wa kadai mung, shi a madu jan hpe shut nna num shaw ai wa tai nga ai.12 Numsha mung shi a madu wa hte hka mat nna, la kaga kaw num wa jang, la shaw ai amu galaw nga ai, ngu nna sape ni hpe tsun mu ai.

       13 Masha ni mung shanhte a ma kaji ni hpe shaman ya u ga nga nna, Yesu hpang de shanhte hpe woi sa ma ai: sape ni mahtang shanhte hpe daru kau mu ai.14 Yesu dai hpe mu jang, n yu ra ai rai nna, Ma ni hpe ngai hpang de sa shangun maru; shanhte hpe hkum shadang mu; kaning rai nme law, Karai Kasang a mungdan gaw dai zawn re ai ni a mungdan rai nga ai.15 Nanhte hpe ngai teng teng tsun made ga: Karai Kasang a mungdan hpe ma kaji zawn n hkap la ai wa kadai rai ti mung, dai hta e kaja wa n shang lu na ra ai, ngu nna shanhte hpe tsun mu ai.16 Shaloi Yesu gaw dai ma kaji ni hpe pawn la nna, shanhte a ntsa e lata mara ya let shaman ya mu ai.

Ya hti ai gaw, Madu a Kabu Gara Shiga rai nga ai.

MANAWN MASHAM MYIT HPE KANING RAI ANHTE DANG KAU LU NA RAI?

“Anhte hpe jaw da sai Chyoipra ai wenyi e Karai Kasang a tsawra ai myit, anhte a kraw lawang hta e ru bang ya manit ai” (Rom 5:5) hte maren, dai hte anhte dang kau lu na rai nga ai. Anhte a myit kraw lawang hta nga ai, n hkru n kaja ai myit, manawn masham ai myit, namak lawhpa myit, asung arung, ahkup ahkap nga ai myit ni hpe Chyoipra ai wenyi gaw jasan jaseng kau ya na rai nga ai. Karai Kasang a tsawra ai lam gaw, ting kyeng myit ai lam n-nga, anhte yawng a mai kaja ai lam hpe myit nga ai. Karai Kasang anhte a kraw kata hta bang tawn da ya ai tsawra myit gaw, tinang a jinghku wa/htingbu wa hpe kaja dik ai jaw ya na matu tam nga ai. Karai Kasang a tsawra myit gaw, anhte a n hkru n kaja ai myit yawng hpe jasan jaseng kau ya na rai nna, ra kadawn nga ai ni hpe gam jaw gam ya na matu n-gun jaw ya nga ai. Ra kadawn nga ai marai hkum shagu a matu anhte hta lit nga nga ai. Hpa majaw nga yang, Karai Kasang gaw anhte yawng hkra hpe Shi a hkrang sumla hte maren hpan tawn da sai rai nga ai (Npt Nph 1:26-27). Karai Kasang gaw anhte hpe tsawra nna, tsawra na matu hpan tawn da sai. Madu Karai tsawra ai zawn anhte tsawra ai shaloi, anhte gaw kabu pyaw dik ai hte lawt lam lu ai ni rai na re.

Anhte a jinghku ni/ htingbu ni hpe tsawra myit hte matsan dum garum kahtau ai lam gaw, Karai Kasang anhte a ntsa tawn da ya ai n htum n wai tsawra myit hpe htang madun ai lam rai nga ai. Ra kadawn nga ai, kaji htum ai wa hpe galaw daw ya ai a matu kumhpa bai nhtang lu na re lam Madu Yesu nan tsun tawn da sai. Garum hpyi let sit shang sa wa ai kadai hpe mung Madu Yesu ning dang kau wu ai n rai. Dai majaw, Shi Madu a sape ni rai nga ai anhte ni hpe mung dai hte maren galaw chye na matu saw shaga nga ai. Na a ntsa tawn da ai Karai Kasang a law la ai tsawra matsan dum lama ai hpe chyeju dum nga ai kun? Na a htingbu/ jinghku wa hpe dai Madu a tsawra myit hte maren galaw daw ya na matu jin jin rai sai kun? 

Mai kaja ai lam hta masha kaga ni sharawng awng ai zawn, nang mung rai nga ai kun? manawn masham ai hte n kam ai myit a majaw, sape ni hpe Madu Yesu daru kau nu ai. Shanhte ni zawn, Sape n re ai wa marai mi, Yesu a mying gang let nat gawt kau ai majaw myit n pyaw la nga ai. Dai wa hpe sape ni pat shingdang ai lam galaw sai. Madu Yesu mahtang; “nye a amying hte magam amu galaw ai wa gaw, nye a lam hpe n kaja ai ga alawan tsun lu na, kadai mung n nga ai” ngu bai tsun sai. Anhte mung, sape ni zawn, masha kaga ni, mai kaja ai lam galaw ai hpe, manawn ai myit, hkrit ai myit ni a majaw, myit yawn chye ga ai kun?

“tsawra ai myit gaw manawn masham n nga ai, . . .  dai teng man ai hte rau kabu gara nga ai” (1kor 13:4,6) nga nna san Pawlu gaw anhte hpe shadum ya nga ai. 

Shut hpyit mara hpe koi yen kau na lam hte seng nna sape ni hpe daru sharin ai shaloi, Madu Yesu lai lai jan jan tsun kau sai kun (MK 9:42-47)? Mungkan ga na nni nkri, hkam sha ai lam ni yawng hta grau manu kaba la ai, Karai Kasang hta htani htana ngwi pyaw simsa lam, ngu ai bandung shadaw kaba hpe Sape ni a matu tawn da ya sai. Asak naw hkrung nga lu na matu hkum hkrang a daw chyen langai ngai hpe tsi sara ni la kau ya ai zawn rai nga ai. Dai re ai majaw, wenyi si mat na lam de woi sa chye ai shut hpyit mara ni hpe koi yen kau ya lu na anhte shakut ra ga ai. Masha kaga ni hpe shut hpyit mara de lam woi na rai yang, kade daram lit kaba ai hpe Madu Yesu sadi jaw nga ai. Marai rai hpe shut hpyit na matu sharin ya ai rai yang, mara raw hkyem sa n jaw lu ai hpe Yuda ni hkap la ma ai. Grau nna, sak naw kaji ai ni a kam sham ai lam gaw hten bya loi ai hte shanhte hpe mai kaja ai kasi madun na ahkyak la nga ai. Masha kaga ni, grau nna sak naw kaji ai ni a man kaw kaja ai kasi hpe nang madun lu ai kun?

“Madu Yesu e, masha kaga ni hpe kabu gara shiga e sharin ai hte maren, kasi kaja madun lu na matu, Chyoipra ai wenyi hte ngai hpe jahpring ya rit. Nang Madu a Tengman ai ninghtoi, ngai kaw mung htoi tu ai marang e, masha kaga ni mung, shut hpyit mara a agung alau kaw nna lawt lu let prat nnan hta lawt lam lu la u ga law"

PRANWAN LADAW LABAN (26) MUNGGA

Manang ni mai kaja ai lam galaw ai hpe awng sharawng ai kun ngu tinang a hkum hpe san mai nga ai. Madu Yesu a kasa ni ga masha langai mi mai kaja ai lam hpe Madu Yesu a mying hta galaw nga ai hpe mu nna pat shing dang lai wa sai. Hap majaw nga yang manang wa shan hte zawn shing nrai shan hte hta grau nna mai kaja ai hpe galaw ai wa hpe manawn ai, ndawng n-yawt ai a majaw rai nga ai.

Dai rai yang Madu Yesu gaw "Anhte a gumlau maga e n nga ai wa gaw, anhte a hpang maga nga ai wa rai nga ai." ngu nna shadum jahprang ga tsun wu ai. Mai kaja ai lam hpe galaw ai gaw masha yawng shagu, makam masham shagu a yaw shada ai pan dung rai nga ai. Dai re ai majaw mai kaja ai lam hpe galaw ai masha kadai rai tim shakawn shagrau let grau nna kaja ai hpe galaw lu na matu garum shing tau ra na rai nga ai. Ahkyak ai gaw mai kaja ai hpe galaw ai hte masha ni hpe Madu Yesu zawn daw jau lu na matu rai nga ai.

Anhte langai hpra mung tinang hkrai mai kaja ai lam hpe shakut shaja galaw ai sha n-ga, manang ni grau nna kaja ai hpe nju ndawng ai nre ai sha, shakawn shagrau hte grau kaja ai magam bungli hte manang ni hpe daw jau ai lam hta garum shing tau lu u ga.

Fr. Philip Aung, MS

PRANWAN LADAW LABAN (26) SHANI NA CHYUM LAIKA

27 Sep, 2015

CHYUM MUNGGA DAW 1

Bu Hkawn  11:25-29

Ya hti na gaw, Bu hkawm laika hta na rai nga ai.

25 (Mawshe gaw amyu masha ni a agyi salang sanit shi hte hpe jahpawng la nna, shawa ginsum a grup e tsap shangun wu ai.)Madu gaw sumwi hte yu wa nna, Mawshe hta rawng ai atsam marai hta na la nhtawm, agyi salang sanit shi a ntsa de mara ya wu ai.Dai atsam marai shanhte a ntsa de yu hkrat wa jang, myihtoi  htoi ma ai; dai kaw nna myihtoi bai n htoi lu ma ai. 26 Dai salang hpung hta lawm ai, Eldad hte Medad mying ai marai lahkawng gaw, jahpan hta lawm ti mung, ginsum de n sa ai sha dap e nga nga ma ai. Dai salang yan a ntsa de mung dai atsam marai yu hkrat wa nna, shan gaw dap kata e myihtoi htoi ma ai. 27 Shaloi shabrang langai mi gat sa nna, Eldad yan Medad gaw dap kata e myihtoi htoi nga ma ai, nga nna Mawshe hpe tsun dan wu ai. 28 Dai rai nna, shabrang aprat kaw nna Mawshe a hkring mang tai ai, Num a kasha Yawshu gaw, nye a Madu, Mawshe e, shan hpe jahkring kau u, ngu nna Mawshe hpe tsun wu ai. 29 Mawshe chyawm gaw, nye a matu nang manawn nga nni? Madu a amyu masha yawng hte gaw, myihtoi hkrai rai nga mu ga; Madu gaw shi a atsam marai hpe shanhte yawng a ntsa de mara jaw ya u ga law, ngu nna tsun wu ai.

Ya hti ai gaw, Karai Kasang a mungga rai nga ai.

CHYUM MUNGGA DAW  2                                                       

Yaku  5:1-6

Ya hti na gaw, Kasa Yaku a shagun dat ai laika hta na rai nga ai.                                                

1 Sut su ai ni e, ngai nanhte hpe tsun ai ga hpe madat mara la mu: Nanhte a ningtsa e du magang ra ai tsinyam tsindam majaw, hkrap shabam nga mu. 2 Nanhte a sutgan mahkra yat mat wa nna, nanhte a hpun nba hpe manut e sha kau ma nu ai. 3 Nanhte a ja hte gumhpraw hta pyi, nhkan jung nga ai; dai nhkan mung nanhte a mara a lam sakse hkam ya ai hte, nanhte a hkum shan hpe sha kau na ra ai. Shing rai, hpang jahtum na nhtoi ni a matu, wan grung ai zawn re ai sutgan hpe nanhte mahkawng da manit dai. 4 Yu mu, nanhte a yi hkauna ni hpe dan shangun nhtawm, bungli galaw ai ni a shabrai hpe nanhte hkalem sha kau manit dai; dai ni a shabrai gaw jahtau nga ai hpe mada la mu; mam dan ai ni a garu ai nsen mung, zawnawng zawwa up ai Madu a na hta e hkrang shang wa sai hpe dum chye mu. 5 Nanhte gaw ga ntsa e n dut n dang ai hku lu sha nna, pyawdaw hkrai myit dai; sat ai shani du ni ti mung, dusat dumyeng zawn, nanhte a myit dik hkra lu sha manit dai. 6 Ding hpring ai ni hpe mung nanhte daw dan nna sat kau manu ai; shanhte gaw nanhte hpe hkum shing dang lu sai n rai.

      Ya hti ai gaw, Karai Kasang a mungga rai nga ai.

KABU GARA SHIGA   

Marku 9:38-43.45.47-48

Ya hti na gaw, Marku a laika hta na Kabu Gara ai Shiga rai nga ai.

38 Sape Yawhan gaw Yesu hpe, Sara e, anhte kaw n hkan nang ai masha langai mi na a amying hte nat shaden kau ai hpe anhte mu hkrup saga ai, rai ti mung, anhte kaw n hkan nang ai majaw, shi hpe hkum kau ga ai, ngu nna tsun wu ai. 39 Yesu mahtang, Shi hpe hkum hkum kau mu: nye a amying hte lamik kumla galaw ai wa gaw, nye a lam hpe n kaja ai ga hte shatan kau na n rai.40 Anhte a gumlau maga e n nga ai wa gaw, anhte a hpang maga nga ai wa rai nga ai.

41 Nanhte hpe ngai teng teng tsun made ai gaw: Hkristu kaw hkan nang ai sape ni rai nga myit dai, nga nna nanhte hpe ntsin htinggap mi jaw ai wa kadai mung, shi a shabrai hpe n lu la na n rai.

      42 Lam mi gaw, Ndai kam sham nga ai ma kaji ni hta na langai mi hpe, myit kataw shangun ai wa kadai rai ti mung, shi a du hta htumrin kaba noi nna, nawng hta kabai bang kau na gaw shi a matu grau nna mai nga ai.43 Na a lata nang hpe mara galaw shangun yang gaw, dai hpe kahtam di kau u: lata lahkawng hkum ai hte ngarai mung na n si n krip ai wan de shang na hta, lata hten ai hte asak hkrung ai de shang na gaw grau mai nga ai,45 Na a lagaw nang hpe mara galaw shangun yang gaw, dai hpe kahtam di kau u: lagaw lahkawng hkum nga ai hte, ngarai mung de jahkrat kau ai hkrum na hta, lagaw hten ai hte asak hkrung ai de shang na gaw, grau mai nga ai. 47 Na a myi nang hpe mara galaw shangun yang gaw, dai hpe malawk kau u; myi lahkawng maga hkum ai hte, byet n si nna wan mung n si n krip ai,48 ngarai mung de jahkrat kau ai hkrum na hta, myi maga sha nga ai hte, Karai Kasang a mungdan de nang shang na gaw, grau mai nga ai.

Ya hti ai gaw, Madu a Kabu Gara Shiga rai nga ai.  

KADAI A SHAKAWN SHAGRAU AI HPE NANG TAM NGA NTA?

Wudang n lawm ai sha, Karai Kasang a hpung shingkang hpe garan la na matu n mai byin nga ai. Nni nkri hkam la let wudang hta sat kau hkrum na lam tau nau tsun dan ai shaloi, Messiah Madu du sa ai lam, amu galaw na lam hpe n chye ai majaw, sape ni hta chye na hkawn hkrang ai lam n nga ai. Hta n-ga, dai hta lai nna garan mung n wam san wu ai. Sarawun kaw nna n kaja ai hte masat, daw dan ya ngut ai hpang, kaga ga san san na n chye mat ai zawn rai nga ai. Anhte n mu mayu ai hpe kade daram ning dang kau ya sai rai? Karai a mungga: kabu gara shiga hpe anhte na la lu sai hte maren, dai hpe hkap la ai, ning dang ai akyu ara ni hpe mung anhte chye ga ai. Tim, anhte a prat hpe Karai a mungga matsun ai hte maren gaw gap sa wa ai kun? Dai mungga hpe madat mara lu na hte hkan nang sa lu na matu Chyoipra ai Wenyi jahtoi ya u ga, Madu kaw akyu hpyi ga!

Shanhte a lapran hta kadai wa grau na kun ngu ai lam jahta ai hpe Madu Yesu na chye kau ya ai majaw, Sape ni grai gaya kahpa hkrum sha sai. Anhte mung, dai sape ni hte bung nga ga ai nrai? Kaga masha ni hpe tinang hkum hte shing daw yu nna shanhte a shakawn shagrau ai hpe ra sharawng ga ai. Shakawn shagrau ai hte arawng aya hpe ra sharawng ai lam gaw anhte hkum shan kata hta arawng nga ai lam nan rai sai. ‘Nang shi hpe Karai Kasang hta loi mi sha shagrit da nna, arawng sadang hte hpung shingkang shi hpe ka up ya nu ai’ (shk 8:5) nga nna shakawn kungdawn sara wa e, Karai Kasang a hpung shingkang anhte a matu lajang da ya ai hpe, ka tawn da nga ai.

Karai Kasang a Mungdan hta kaba dik ai gaw kadai rai na, sape ni chye la lu mu ga, Madu Yesu gaw ma kaji hpe pawn la let madun dan wu ai. Hkik hkam grau ai a lam, ma kaji ni kaning rai sharin ya lu ai rai? Moi prat na ma kaji ni hta, ahkaw ahkang, shara, hpa mung shanhte n lu ma ai. Shanhte gaw, shinggyim uhpung uhpawng hta grit htum ai tsang na rai nna, n ta bungli galaw na, shangun ai hpe galaw na, ni rai ma ai.

Ma kaji hpe pawn la ai Madu Yesu a kumla gaw hpa hpe madun ai kun? Shi a sape ni a man e, ma kaji hpe pawn la ai gaw, hkungga ging ai shara hta ma kaji ni hpe tawn da ai ngu madun dan nga ai.

Karai Kasang a Mungdan hta kaba grau dik ai gaw kadai rai na kun? shagrit shanem ai, myit masin hpraw tsawm ai, gumrawng gum tawng ai hpe kabai kau nna, shangun ma a shara (snr) ma kaji shara hpe la ai ni rai nga ai. Madu Yesu hkum nan anhte a matu kasi kaja rai nga sai. “shangun ma hpe yam sha na nga dusa ai n rai, shangun ma a amu hpe galaw daw ya na matu du sa ai” (Mt 20:28). Tinang dai shagawm kau nna, mayam a ahpraw nsam dagraw let”, (Hpil 2:7) nga nna kasa Pawlu mung Madu Yesu a lam hpe tsun da sai. Madu Yesu gaw shi a hkum hpe shagrit kau n’htawm (shi a teng wa shara gaw Kawa Karai a hkra maga kaw), anhte shinggyim masha sa tai let anhte hpe sharawt la nna Shi a Mungdan hta rau nga lu na matu sa wa sai.

Karai Kasang gaw gumrawng gumtawng ai ni hpe gang hkum kau nna, myit nem ai ni hpe chyeju jaw ya wu ai (Yk 4:6). Lama na, Karai Kasang a shaman chyeju, atsam hte hpring zup mayu ai rai yang, anhte a kraw kata kaw rawng ai, gumrawng ai myit, arawng aya tam ai myit, myit tsaw myit dap ai lam, ni yawng hpe shawng jasan kau na ra ang ga ai. Shaloi she, Karai Kasang a arawng aya, n-gun atsam, hte tsawra ai myit hte anhte hpe jahpring ya lu na rai nga ai. 

Tinang hkum hpe shagrit kau nna Madu Yesu zawn daw jau lu na nang jin jin rai sai kun?

“Madu Yesu e, Na a wudang a marang e, mungkan ga hpe hkye la sai hte shut hpyit mara hte si du hpe dang manga kau ya sai. Nang Madu a Awng Padang hte arawng aya hpe dai wudang hta ngai galoi mung mu lu u ga law. Nang Madu a Chyoipra ai lam yan hta sharawng awng ai hta ngai mung hkan nang lu na matu, shaman chyeju jaw, garum ya rit law!!!