2023: CHYOI PRA AI HTINGGAW POI SHANI NA MUNGGA

Sanpra ai masha St. John Paul II tsun ai, “Kun dinghku ni hpe manu shadan ra ai; hpa majaw nga yang, shinggyim masha amyu a shawng lam gam maka, kun dinghku ni hta shachyaw gaw sharawt ai re” nga ai. Kun dinghku a dinghpring chyoi pra ai lam hpe manu shadan nna sha, shinggyim uhpung uhpawng ni rawt jat galu kaba wa lu ai hte, shinggyim amyu masha grin lu na rai nga ai.

Masha shada sat hkat ai majan a majaw, kun dinghku ni kade wa hten bya mat ai hpe anhte chye ga ai. Mungkan hta nse nsa ai amu hpe ninggun jaw ai ladat ni a majaw, nse nsa ai amu ni a majaw kun dinghku ni kade she hten bya mat ai lam hpe myit yu mai ga ai. Tinghkrai akyu amyat pyaw hpa tam ai tsa-ya kanni ya 4-ya ni a majaw, kun dinghku ni htenza mat ai kade law a hka! Shinggyim uhpung uhpawng ni hta byin nga ai hten bya lam ni a ningpawt ninghpang gaw kun dinghku masha ni kaw na hpang ai rai nga ai.

Amyu masha shagu, htunghking shagu, makam masham shagu, kun dinghku a dinghpring chyoi pra sanseng ai lam hpe sharin ya ai, matsun maroi ga ni, hpaji jaw ga ni nga ai, htung tara ni nga ai. Ran rawng hkra kup tsup ai tara matsun hte sharin achyin ai lam gara htung tara makam masham hta mung n nga ai. Rai tim, dinghku shagu gaw shada tsawra makawp maga, sai ni yang ni ai zawn magyep kap ai, zinlum hkat chye ai, masha yawng a myit hta Karai e jaw bang da ya chyalu rai nga ai.

Dinghku byak mat ai ni hpe yu yang ja gumhpraw lu ai n lu ai hte hpa n seng ai daram, hpaji madang nga ai n nga ai hte mung n seng ai daram re ai hpe mu lu na ga ai. Hkungran ga-shaka jaw hkat ai shaloi na ga-sadi a ntsa e kangka ai hku hkan shadik ai lam gaw ahkyak dik ai hpe chye lu ga ai. Dai ga-sadi grin ngang na matu gyit shajup ya ai gaw tsawra myit madung rai nga ai. Tsawra myit a lachyum htai hkap la ai lam hta mung, htung tara lailen ni hpe chye na hkap la ai lam hta mung, shinggyim uhpung uhpawng ni shai hkat ma ai. Chyum laika

hta kuptsup ai sharin shaga lam nga tim pyi, Hkristan ni hta lachyum htai hkap la ai madang n bung hkat ai hpe mu lu ai.

Sirak a laika hte Kolose hpung masha ni hpe shadum ya ga, ndai hte hpe hkan lu yang pyi ram la ai. Gawng kya ai shinggyim masha hpe hkye la na matu, Karai a Kasha hkum nan, shinggyim hkum shan dagraw la nna dinghku masha langai tai wa ai. Kuptsup ai kasi kamang hpe jaw ya ai. Kabu Gara Shi-ga hta lawm ai Yesu hte ni htep ai ni a mying ni hpe yu yang, yawng gaw Karai Kasang hpe hkrit hkung ga ai ni rai ma ai; makam masham htung tara ni hpe hkan shatup ai ni rai ma ai. Hkye la Madu hpe myit mada let n sim n sa akyu hpyi ai ni rai ma ai.

Yesu gaw dinghku langai na nta masha sha n re ai, mungkan dinghku a dinghku masha mung tai wa ai. Dam lada grau ai shinggyim amyu masha a dinghku masha tai wa ai. Mahte 12:50 hta tsun ai, Kawa Karai a sharawg awng ai lam hpe hkan ai ni yawng, shi a kanu kawa, kahpu kanau kana ni re, nga ai. Masha yawng gaw mungkan dinghku na dinghku masha ni re ai lam hpe myit dum ga yang, shada ginhka hkat na lam hpa n nga ai. Chyasam, ngu hkat na lam mung n nga ai. Dai na matu Hkristu gaw mungkan dinghku hpawng a dinghku masha tai wa ai.

2023: CHYOI PRA AI HTINGGAW POI SHANI NA CHYUM LAIKA

CHYOI PRA AI HTINGGAW POI
Dececember, 2023
CHYUM MUNGGA DAW 1

Sirak 3:3-7, 12-14

Ya hti na gaw, Sirak a laika hta na rai nga ai.
Kashu Kasha ni tinang a kawa hpe hkungga lara na lam, Karai Kasang hkang da nu ai; kanu gaw shi a shadang sha ni a ntsa e up hkang na ahkang aya hpe Madu nan jaw da nu ai. Tinang a kawa hpe hkungga lara di ai wa gaw, shut hpyit mara shaprai kau ai amu hpe galaw nga ai; tinang a kanu hpe akaw alaw di ai wa mung, sutgan law law mahkawng da ai wa hte bung nga ai.
Tinang a kawa hpe hkungga ai wa gaw, asak galu na ra ai; kanu a myit shadik shapyaw ai wa mung, Madu hpe madat mara nga ai.
Ngai sha e, nwa asak kaba wa ai shaloi, shi hpe bau garum u; shi hkrung nga ai nhtoi mahkra hta, shi a matu yawn hkyen shara hkum tai e. Shi myit n gring wa ti mung, nang hkam kaja ai hte n-gun rawng ai wa gaw, nwa a myit n-gun kya ai hpe hkam sharang nna, shi hpe n gawn n sawn hkum di u; kaning rai nme law, nwa hpe sumnung shingdi ai hte galaw ya ai lam hpe galoi mung malap kau ya na n rai; na a mara raw dat ya na lam tai na ra ai.
Karai Kasang a Mungga rai nga ai.

CHYUM MUNGGA DAW 2

Kolose 3:12-21

Ya hti na gaw, Kolose masha ni hpang de San Pawlu shagun dat ai laika hta na rai nga ai.
Hpu nau ni e, nanhte gaw Karai Kasang a lata la ai amyu rai nna, chyoi pra ai ni hte tsawra hkrum ai ni rai nga myit dai. Dai re ai majaw, matsan dum chye ai, mai kaja ai, myit nem ai, sumnung shingdi ai, myit galu kaba ai dagraw nga mu; nanhte a n-gun kya ai hpe shada da hkam sharang nna, mara langai ngai nga yang gaw, shada da raw dat hkat nga mu. Madu gaw nanhte a mara raw dat kau ai hte maren, nanhte mung shada da raw dat ya mu. Hpang jahtum e, dai yawng hte hpe matut da na hte jahkum shatsup ya na matu tsawra ai myit hpe dagraw hpun nga mu. Nanhte a myit masin hta e mung, Hkristu a ngwi pyaw ai lam a up nga u ga; kaning rai n me law, hkum hkrang langai sha a daw shan ni tai lu hkra, nanhte hpe shaga la manit dai. Dai hta n-ga, chyeju dum ai myit nanhte hta e a rawng nga mu.
Hkristu mungga gaw, nanhte hta n taw n tsang a shanu nga u ga: hpaji byeng ya amyu myu hte nanhte shada da sharin shaga nna, shadum jahprang ya mu. Nanhte a kraw lawamg hta e Karai Kasang hpe chyeju dum let, shakawn kungdawn ga, mahkawn mangoi ga, wenyi hte seng ai laka ga hpe mahkawn mangoi nga mu. Nanhte hpa lam galaw myit yang, ga hte rai ti mung, amu hte rai ti mung, Madu Yesu a amying ningsang hta galaw nga nna, Shi a marang e Kawa Karai Kasang hpe chyeju dum nga mu.
Numsha ni e, tinang a madu wa hkang ai hku hkan nga mu; dai gaw Madu a man e sut nga ai. La ni e, madu jan ni hpe tsawra nga nna, shanhte hpe sumnung shingdi ai hku galaw mu. Ma ni e, kanu kawa ni hpe madat mara nga mu; dai gaw, Madu a man e sharawng awng ai lam rai nga ai. Kanu Kawa ni e nanhte a ma ni myit n kaji u ga, shanhe hpe ladu lai nna hkum hta ahkre nga mu.
Karai Kasang a Mungga rai nga ai.

Kabu Gara Shiga

Luka 2:22-40

Ya hti na gaw Luka a laika hta na Kabu Gara Shiga rai nga ai.
Mawshe a htung tara hte maren Maria a jasan jaseng ai nhtoi gu jang, ‘Shadang sha alat dai Madu a matu chyoi pra ai nga lu na’ nga nna, Madu a tara lam hta ka da ai majaw, ma Yesu hpe Madu kaw sa ap ya na matu mung, Madu a tara hta tsun da ai hte maren, U hkru du lahkawng, shing nrai, U ra lahkawng hpe hkungga nawng ya na matu mung, Maria yan Yosep gaw dai ma hpe Yerusalem mare de woi sa ma ai. Ya, Simun mying ai masha langai mi Yerusalem mare e nga ai, dai wa gaw Dinghpring ai hte tara hkungga nna, Israela hpe shalan shabran na lam myit mada nga ai wa rai nga ai. Chyoi Pra ai Wenyi mung shi a ntsa e nga nga ai. Simun gaw Madu Karai a Hkristu hpe garai n mu yang, si na n rai, nga nna Chyoi Pra ai Wenyi hte madun dan ai lu la nu ai. Shi gaw Chyoi Pra ai Wenyi shadut ai a majaw, Nawku htingnu kata de du sa wu ai: kanu yan kawa gaw Ma Yesu hpe tara htung hte maren di ya na matu woi sa mu ai shaloi, Simun gaw shi a lata hte Ma hpe pawn la nna, Karai Kasang hpe shagrau sha-a let, N-gawn Madu e, Na a ga hte maren Na a shangun ma ngwi pyaw ai hte ya wa shangun dat nit ga law: kaning rai nme law, masha amyu shagu a man e nang lajang da nna, maigan amyu ni hpe jahtoi dan na nhtoi hte, Na a amyu Israela a hpung shingkang rai nga ai, Na a hkye hkrang la ai lam hpe, nye a myi hte chyaw ngai mu lu se ai, nga nna tsun wu ai.
Kanu yan Kawa gaw Ma Yesu a lam tsun ai ga a majaw mau nga ma ai. Simun mung shanhte hpe shaman ya nna, kanu Maria hpe, Yu u, ndai ma gaw, Israela masha ni hta na, law law a matu kataw shara hte, law law a matu rawt wa na lam mung, masha ni kau da na masha law law a kraw lawang na myit mang ai lam dan leng wa na ra ai; na a masin salum hta nan nhtu htinggrang na ra ai, ngu nna Maria hpe tsun wu ai. 
Dai hta n-ga, Ashe amyu na Hpanuela a shayi sha, Anna ngu ai num myihtoi langai mi nga ai; Shi gaw asak grai kaba la sai; mahkawn aprat kaw nna sanit ning laman hta shi a madu wa hte nga nhtawm, ya asak matsat shi mali ning du ai gaida rai nga ai. Dai numsha gaw Nawku htingnu kaw na npru ai sha, lusha gam nna akyu hpyi ai hte, shani shana Nawku daw jau nga wu ai. Shi mung dai ahkying hta nan lai sa nna, Karai Kasang hpe chyeju dum shakawn let, Yerusalem a hkye hkrang la na lam myit mada ai ni yawng hte hpe, Ma Yesu a lam tsun dan mu ai. Maria yan Yosep gaw Madu a tara hte maren ra ai lam mahkra hpe hkan shatup nhtawm, Galile mung na shanhte nga ai Nazaret mare de bai wa ma ai. Ma Yesu gaw kaba wa ai hte n-gun atsam jat wa let, hpaji hparat hte hkum tsup wa nu ai; Karai Kasang a chyeju mung shi hta e a nga nga ai.
Madu a Kabu Gara Shiga rai nga ai.

2023: HKRISMAT POI SHANI NA CHYUM LAIKA

HKRISMAT POI SHANI

December 25, 2023

CHYUM MUNGGA DAW 1

Esaia 52:7-10

Ya hti na gaw myihtoi Esaia a laika hta na rai nga ai.

Kabu gara ai shiga gun nna, ngwi pyaw ai lam shana ai wa a lagaw, kade tsawm htap nga a hka Kaja ai shiga kajai gumhkawng ai hte, hkye hkrang la ai lam shana ya let, na a Karai Kasang up nga ai nga nna, Ziun hpe tsun shana ai wa a lagaw gaw, bum lang ntsa e gade tsawm htap nga a hka! Na a sin langa ni a nsen madat u; shanhte nsen sharawt nna kabu gara ai hte rau garu ma ai: kaning rai nme law, Madu gaw Ziun mare de nhtang wa ai hpe, tinang nan myi chyaw mu lu na ma ai. Yerusalem mare na katsi katsang shara ni e, mahkawn mangwi let rau garu mu; Madu gaw, Shi a amyu hpe shalan shabran ai hte, Yerusalem mare hpe hkye mawai la wu ai. Madu gaw, masha amyu baw ni mahkra a man e Shi a chyoi pra ai lahpum shadawng dan nna, anhte a Karai Kasang hkrang la ai lam gaw, lamu ga htum hkra dan leng wa sai.

Karai Kasang a Mungga rai nga ai.

CHYUM MUNGGA DAW 2

Hebre 1:1-6

Ya hti na gaw, Hebre masha ni hpang de San Pawlu shagun dat ai laika hta na rai nga ai.

Hpu nau ni e, Karai Kasang gaw moi na lakhtak hta, prat mi hte prat mi lam amyu myu hku nna, myihtoi ni a n-gup hte ji wa ni hpe ga tsun da nu ai. Ndai hpang jahtum na aten ladaw hta, Shi a Kasha a n-gup hte anhte hpe ga matsun jaw da mani ai. Dai Kasha hpe, sali wunli mahkra hkam la na matu, Karai Kasang san da ai rai nna, Shi a marang e ndai mungkan ga hpe hpan tawn da nu ai.

Dai Kasha gaw, Karai Kasang a hpung shingkang tu kabrim ai nhtoi rai nga ai hte, Karai a atai a hkrang sumla rai nga nna, Shi hkang da ai mungga a atsam hte, Shi yawng mayawng hpe bau sin nga ai. Ya shut hpyit mara shatsai kau ya nna, matsaw ningtsang na daru magam a hkra maga de shi dung nga nna, lamu kasa ni hta Shi grau reng ai amying hkam la sai hte maren, shanhte hta Shi grau reng ai wa tai nga ai. Kaning rai nme law, ‘Ngai Sha Nang rai nga ndai; dai ni e Ngai Nang hpe shaprat sade ai’. Bai nna, ‘Ngai gaw Shi a Kawa tai nna, Shi gaw Ngai sha rai na ra ai’ nga nna Karai Kasang tsun ai ga hpe , gara lamu kasa hpe Shi tsun yu a ta? Dai hta kaga, Shi a Kasha Alat hpe Mungkan ga de jashawn dat ai shaloi, ‘Karai Kasang a lamu kasa ni yawng Shi hpe nawku mu ga’, nga nna tsun wu ai.

Karai Kasang a Mungga rai nga ai.

KABU GARA SHIGA

Yawhan 1:1-5, 9-14

Ya hti na gaw, Yawhan a laika hta na Kabu Gara Shiga rai nga ai.

Shawng npawt e Mungga nga nga ai: dai Mungga gaw Karai Kasang hte rau nga nga nna, dai mungga nan Karai Kasang rai nga ai. Dai Mungga gaw shawng npawt e Karai Kasang hte rau nga nga ai. Arai yawng mayawng hte gaw Shi a marang e tai wa ai rai nna, Shi n galaw lawm ai gaw langai pyi n nga ai. Shi hta e, asak daju rawng nga ai rai nna, dai asak gaw masha ni a nhtoi rai nga ai.

Dai nhtoi gaw nsin hta htoi nga nna, nsin mahtang dai hpe n dang kau lu ai. Mungkan ga e shangai wa ai masha yawng hte hpe jahtoi ya ai Nhtoi nga nga sai. Shi gaw nhtoi majing rai nga ai. Shi gaw mungkan ga e nga nga ai hte, mungkan ga mung Shi a marang e tai wa sai; rai timung, mungkan ga gaw Shi hpe n chye wu ai.

Shi gaw shi a buga de du sa timung, Shi a baw sang ni shi hpe n hkap la ma ai. Shi a amying ningsang hpe kam sham nna, Shi hpe hkap la ai ni yawng hte hpe chyawm gaw, Karai Kasang a kasha ni tai lu na atsam Shi jaw da nu ai; dai ni gaw, asai the shaprat ai ni n rai, hkum shan a myit hte mung n rai, masha a myit maw ai lam hte mung n rai, Karai Kasang e shaprat ai ni she rai nga ma ai. Mungga gaw masha tai wa nna, anhte hte rau nga nga sai. Dai rai nna, Kawa hta na prat wa ai Kasha shingtai a hpung shingkang zawn, Shi a hpung shingkang hpe anhte mu lu saga ai.

Madu a Kabu Gara Shiga rai nga ai.

2023: DUSA LADAW LABAN (4) NA MUNGGA

Hkawnsek Maria kaw na shăngai wa na kasha gaw, Yaku a nta (Karai a amyu sha) a ntsa htani htana uphkang na hte, shi a mungdan tutnawng dinggrin nga nga na, nga ai. Dai shăngai wa na kasha gaw shinggyim masha e shăbyin ai amu n rai, Karai Kasang kaw na re ai lam, prat shagu hta makoi magap da ai mungsung, shăngai wa ai Yesu hta hpaw tsun dan ai, nga ai.

Gawng kya shut hpyit chye ai Hkawhkam Dawi gaw, Karai Kasang hpe ja ja myit dum ai, chyeju dum chye ai. Shi gaw hkik hkam ai hkaw htingnu e rawng nna ga-shaka sumpu mahtang ban hte ban, tap ginsum e sha rawng lu ai hpe myit dum ai; shi n rai dum ai. Dai majaw, Karai Kasang a matu hkik hkam ai htingnu gawgap ya na, nga ai. Shi a shăgrit shănyem chye ai myit, chyeju htang jaw chye ai myit masin a majaw, shi myit lu, sawn lu ai hta shadawn n mai ai daram, Karai Kasang shi hpe jaw na, nga ai. Dai gaw, shi a aru arat kaw na paw pru na Hkawhkam gaw, shi a ting-nyang hta htani htana hkaw dung lu na, nga ai ga-sadi Karai kaw na lu la nu ai. Kade kaba ai shagrau kumhpa rai a hka! Karai Kasang hpe chyeju htang jaw na lahpawt dum ga ai kun?

Dawi hpe jaw da ai ga-sadi, Hkawnsek Maria hte kasha Yesu hta dik wa ai lam, San Luka sakse hkam dan ai. Dai Hkawnsek ma gun wa ai lam gaw Karai Kasang kaw na re ai, Karai e shabyin ai amu re ai lam hpe mung, sakse hkam ya ai. Chyaloi nhkoi kaw na, prat hte prat makoi magap da ai, sung dik ai Karai a hkye hkrang la ai lam, dai mabyin ni hta Karai Kasang gaw hpaw malang dan sai, nga, San Pawlu sakse hkam ya ai. Karai e nan shădan dan ai, hpaw tsun dan ai lam hpe shinggyim masha gaw kam nan kam ra ai, kamsham myit hte madat hkam la ra ai lam, San Pawlu matsun ai.

Masha hkum shagu, tinang hkye hkrang la hkrum ai kaw du lu na lam, Karai e laksan chyeju jaw, masing maka ka dat ai lam hpe kamsham ai myit hte madat mara hkam la ra ga ai. Tinang n chye madat ai prat na mahkrum madup ni hta, Karai e mai kaja ai lam hpe kamsham nna, tinang sing la ai gam maka hku n rai, Karai e sing da ya ai prat a maka ni hpe grit nyem ai myit, kamsham ai myit, madat mara ai myit hte hkap la chye ra ga ai. Dawi a shăgrit shănyem chye ai myit, chyeju dum chye ai myit masin hte, dai Hkawnsek a makam masham hte madat mara ai alai hpe kasi shatai mai ga ai.

Dai Hkawnsek gaw, “Ngai hkawnsek rai nngai, dai gara hku byin lu na ta?” nga ai. Karai e shabyin ai amu hpe shi n chye na ai rai tim kamsham madat mara ai myit hte, “Na ga hte maren ngai hta dik wa u ga” ngu nna htan ya lu ai rai nga ai. Hkye la Madu a kanu tai na, ngu ai hta, kade daram ruyak jamjau hkrum na lam Maria gaw tau chye da ai n rai. Karai Kasang a matu n byin mai ai hpa n nga ai, ngu ai ga hpe shi kamsham ai. Karai Kasang hpe nhpaw n-ya ap nawng da lu ai.

Sumru yu na matu:
 Tinang lu lawm awng dang wa ai aten ni hta, Dawi zawn, Karai
Kasang hpe myit dum chyeju htang chye ga ai kun? Karai Kasang hpe nampum toi ai myit jasat hte chyeju htang ai she law ga ai kun?
 Karai a mauhpa chyeju ni hpe hkam la lu ai hpang, San Pawlu
zawn, kaga masha ni hpe mung hkye hkrang la ai chyeju hpe gam garan ya na gara hku shakut lawm ai kun?

2023: DUSA LADAW LABAN (4) NA CHYUM LAIKA

Dusa ladaw laban (4)
December 24, 2023
Chyum Mungga Daw 1

2 Sam 7:1-5, 8-12, 16

Ya hti na gaw Samuela a laika lahkawng hta na rai nga ai.
Ya, Hkawhkam Dawi gaw jut magup na shi a hpyen ni yawng a lata na, Madu a chyeju hte hkye la ai hkrum nna, shi a hkaw e ban sa lu ai shaloi, myihtoi Nahtan hpe shi tsun wu ai gaw: Yu u, ngai wa gaw marau hpun nta hta rawng nga ni ai; Karai Kasang a chyoi pra ai sumpu chyawm gaw sumpan sum hta e rawng nga ai. ngu wu ai. Shaloi Nahtan gaw, Madu nang hte rai nga ai rai nna, nang myit lu ai hte maren galaw u, ngu nna Dawi hkawhkam hpe htan ya wu ai. Rai ti mung, dai shana e pyi Madu a mungga Nahtan kaw du nna, tsun ai gaw, Nye a shagun ma Dawi hpe sa tsun su; Madu ning nga ai: Ngai sa nga na htingnu hpe nang galaw lu na masha rai n ni? Nye a amyu Israela a ntsa e up ai du tai na matu, nang sagu naw rem nga ai shaloi, sagu lawng hta na ngai nang hpe lata la sade ai. Nang sa wa ai shara magup de nang hte rau ngai nga nga nna, nang hpe hpyen ni nlang hpe na a man e ngai seng kau ya sade ai. Shing rai, ga ntsa na dan hkung ai ni a galu kaba ai amying zawn, ngai na a amying hpe mung, galu kaba shangun ya na de ai.
Nye a amyu Israela matu mung, nga shara ngai tawn da nna, htawm hpang de shanhte shamu shamawt n re ai sha, tinang shara e nga grin lu hkra , ngai shanhte hpe shangang na we ai. Nye a Israela a ntsa e tara agyi ni hpe tawn da ai aprat e, n hkru n kaja ai ni zingri zingrat lu ai zawn, htawm hpang de zingri lu sana n rai; ngai shanhte hpe ban sa shangun na we ai. Nang hkum hpe ngai galu kaba shangun nna, na a amyu matu hpe mung ngai shagrin da ya sana. Na a amyu matu hte na a mungdan gaw nye a man e dinggrin a nga nga na ra ai: na a magam tingyang mung, htani htana dinggrin a nga nga na ra ai, ngu nna Madu gaw Nahtan hpe htawn tsun shangun wu ai.
Karai Kasang a Mungga rai nga ai.

CHYUM MUNGGA DAW 2

Roma 16:25-27

Ya hti na gaw Roma masha ni hpang de San Pawlu shagun dat ai laika hta na rai nga ai.
Hpu nau ni e, Ngai hkaw dan ai kabu gara shiga hte maren hkan sa lu na matu, nanhte hpe shada shangang ya lu ai Karai Kasang kaw hpung shingkang a nga nga u ga law. Dai kabu gara shiga hpe ngai hkaw dan ai shaloi, Yesu Hkristu a lam hpe htawn shana ya nna, chyi n ma hpri n hpra kaw nna makoi magap da ai, hkye la ai mung sung ga sung hpe, ya e shadan dat nga ai hpe hkaw tsun dan nngai. Dai mung sung hpe anhte dan dan leng leng chye lu saga ai majaw, amyu shagu hpe makam masham a madat mara ai de shaga la na matu, masha yawng hte hpe dai mung sung lam hkaw dan na ra ai. Myithtoi laika ni dai lam hpe nan nan tau tsun dan ai hte, htani htana Karai Kasang Shi ra sharawng ai hku lajang da ai lam rai nga ai. Karai Kasang chyu sha hpaji hkum tsup nga ai rai nna, Yesu Hkristu a marang e Shi kaw htani htana hpung shingkang a nga nga u ga law. Amen.
Karai Kasang a Mungga rai nga ai.

KABU GARA SHIGA

Luka 1:26-38

Ya hti na gaw Luka a laika hta na Kabu Gara Shiga rai nga ai.
Dai aten hta, Karai Kasang e shangun dat ai lamu kasa Gabriela gaw, Galile mung na Nazaret mare e nga ai. Dawi a myu na Yosep ngu ai wa mahtan da ai mahkawn hpang de sa du ai: dai mahkawn a amying chyawm gaw Maria ngu ai rai nga ai.
Dai lamu kasa gaw Maria kaw du jang, Awe, chyeju hte hpring nga ndai; Madu nang hte rau nga nga ai, ngu wu ai. Maria gaw dai ga majaw masin kahpra nna, Ndai shachyen ai ga gaw hpa ngu mayu ai i? nga nna myit aru yu nga ai. Shaloi lamu kasa gaw, Maria e, hkum hkrit et; nang Karai Kasang a man e myiman pa nit dai: yu u, nang na-um nasin rai wa nna, shadang sha shangai na rin dai; Shi a amying Yesu ngu nna, nang shamying ya na ru ai.
Dai wa gaw galu kaba na ra ai rai nna, Tsaw Htum ai Wa a Kasha ngu ai hkam la na ra ai. Madu Karai Kasang mung Shi a kawa Dawi a tingnyang shi hpe jaw na wu ai rai nna, Shi gaw Yaku a nta ntsa e htani htana up nga na ra ai: Shi a mungdan mung htum ngu ai nga na n rai, ngu nna shi hpe tsun wu ai.
Maria chyawm gaw, Dai gaw kaning rai byin na a ta? Ngai la n chye ai hkawn jet rai nga nngai, ngu nna lamu kasa hpe tsun wu ai. Dai lamu kasa gaw, Chyoi Pra ai Wenyi na ntsa de du nna, Tsaw Htum ai Wa a atsam nang hpe shingnip ka-up na ra ai: dai re ai majaw, shangai na ra ai wa gaw, Chyoi Pra ai Wa, Karai Kasang a Kasha ngu ai hkam la na ra ai. Dai hta kaga, na a amyu jan Elizabet mung, gumgai rai sayang shadang sha na-um nasin hkum rai nga nna, maudung ngu ai num hta ya shata kru rai wa sai; kaning rai nme law, Karai Kasang n galaw lu ai hpa mung n nga ai, ngu nna shi hpe htan wu ai. Shaloi, Maria gaw, Yu u, Madu a shangun ma ngai rai nga nngai; na a ga hte maren ngai hta byin wa u ga, ngu nna lamu kasa hpe tsun wu ai.
Madu a kabu gara shiga rai nga ai.

2023: DUSA LADAW LABAN (3) NA MUNGGA

Shingran katsi ai shara kaw na ngoi pru ai nsen gaw: Madu du sa na lam hpe shading mu, nga ai. Anhte a prat, myit jasat, nga-sa lailen ni hta n jaw ai, n tsawm ai lam ni hpe hprang shatsawm nna, Madu du sa jang kabu ai myit the hkrum katut lu na rai nga ai. Kabu gara ai, ngu ai gaw, Hkristan langai mi a dansan ai kumla rai nga ai.

Hkrismat poi hpe ala let, jahtum nhtoi hta Madu the hkrum matut lu na nhtoi hpe la nga ga ai. Dai ala nga ai ladaw laman, aten shagu hta kabu gara nna nga ra ai lam, Htessaloni laika hku nna shadum ya ai. N hkru n kaja ai alai maka ni yawng hpe koi yen kau let, mai kaja ai amu ni galaw ra ai lam hpe mung, shadum ya ai.

Dinghta prat hta ru ai yak ai, matsan jamjau ni hkrum ding-yang, myit ru myit tsang re ai baw law law a lapran, Isaiah laika hta mung, “Ngai gaw Madu hta ja ja kabu lu nngai, Madu hta nye myit masin wenyi kabu gara nga li ai” nga ai. Karai a Shangun Ma, ngu ai wa du sa ai shaloi, myit ru yawn hkyen ai ni hpe shalan shabran ya na, n tara gyit hkang hkrum ai ni hpe shalawt dat na, tara rap-ra ai lam awng dang lu na, nga ai kabu gara shi-ga tsun shabrawng ai rai nga ai.

Wu wu di di ngoi garu ai nsen ni a lapran, ga li ga law, găshun găshe re ai ni a lapran, n ju n dawng, masin n si, re ai ni a kraw hta, dai anhte a lapran e nga nga ai Madu hpe mu lu na n rai. Dai Madu a nsen hpe na lu na matu azim sha re ai aten hte shara lu ra ga ai. Katsi katsang re ai shara kaw na ngoi pru ai nsen hpe tam la ra ga ai. Facebook kaw hkrai aten shama, games kaw, chatting kaw, tiktalk kaw hkrai aten jaw ai ni, dai azim sha re ai kaw na ngoi pru ai nsen hpe na la lu na n rai. Ja gumhpraw lu lawm lam hpe hkrai shachyut, pyaw hpa lam hta hkrai len nga ai ni mung, dai shingran katsi ai, atsin sha re ai kaw na ngoi pru ai nsen hpe na la lu na n rai. Anhte a lapran e nga nga ai Madu hpe mu lu na n rai.

San Pawlu tsun ai hte maren, n hkring n sa akyu hpyi let la maja nga ai ni sha, dai anhte a lapran e nga ai Madu hpe mu hkrum lu na rai nga ai. Akyu hpyi ai hta, wu wu di di re ai grup-yin a lapran Chyum mungga hti yu, atsin rai myit sum ru ai hta, Sakramentu hkam la ai hta, dai anhte a lapran e nga ai Madu hte hkrum matut lu na rai nga ai. Ra kadawn nga ai htingbu wa hpe garum shingtau ai hta, dai Madu hpe mu lu na rai nga ai.

Sumru yu na matu:

 Myit ru myit tsang, jamjau nga ai a lapran hta “Kabu gara mu”,

ngu ai ga, tinang a matu hpa lachyum nga a ta?

 “Galoi aten hta mung kabu mu” nga, San Pawlu tsun ai ga, tinang a prat hta gara hku tsi tai, shamai shatsai hkrum ai lam tai lai wa

sai kun?

2023: DUSA LADAW LABAN (3) NA CHYUM LAIKA

Dusa ladaw laban (3)
December 17, 2023
Chyum Mungga Daw 1

Esaia 61:1-2, 10-11

Ya hti na gaw myihtoi Esaia a laika hta na rai nga ai.
Madu a Wenyi gaw nye a ntsa e dung nga ai; kaning rai nme law, matsan mayan ni hpe kabu gara shiga hkaw tsun dan na matu, Madu ngai hpe namman chya ya ni ai. Gawng run ai ni a nma hpe ahkyen kayawp na matu mung, bawng dung ai ni hpe shalawt dat na lam, gyit hkang hkrum ai ni hpe htawng chyinghka hpaw ya na lam hte, Madu sharawng awng ai shaning hkaw dan na matu mung, Shi ngai hpe shangun dat nngai.
Ngai gaw Madu hta aja awa kabu gara nga nna, nye a myit masin nye a Karai Kasang hta sharawng awng nga li ai. Kaning rai nme law, la nnan gaw nampan shanghkawng gup ai zawn mung, num nnan lung seng ni hte shi a hkum hpe mawn sumli ai zawn mung, Madu gaw ngai hpe hkye hkrang la ai hpun palawng jahpun ya nna, dinghpring ai nba lawai ya ni ai. Lamu ga gaw apu pu shangun nna, sun gaw gat hkai ai nli hpe maku ku shangun ai hte maren, Madu gaw dinghpring ai hte shakawn kungdawn ai lam, amyu baw ni mahkra a man e tu pru shangun na ra ai.
Karai Kasang a Mungga rai nga ai.

CHYUM MUNGGA DAW 2

1 Htesaloni 5:16-24

Ya hti na gaw Htesaloni masha ni hpang de San Pawlu shagun dat ai laika langai hta na rai nga ai.
Hpu nau ni e, tut nawng e kabu gara nga mu; n sim n sa akyu hpyi nga mu; lam shagu hta Karai Kasang hpe chyeju dum shakawn mu: kaning rai nme law, Hkristu Yesu hta e nanhte ndai lam hkan galaw na, Karai Kasang myit ra ai hku rai nga ai. Wenyi a jahtoi ya lam hpe hkum pat shadang kau mu; myihtoi htoi ai lam hpe n kaw n law hkum di myit; lama mi garai n galaw yang, myit sumru yu mu: shaloi mai kaja ai hpe lata la nna, n kaja ai lam baw sumhpa hpe koi gam nga mu. Ngwi pyaw ai npawt Karai Kasang nan nanhte hpe hkum dinghkum shachyoi shapra ya u ga; anhte a Madu Yesu Hkristu bai du sa ai shaloi e, nanhte a wenyi, myit masin hte hkum hkrang ting hpe, mara n kap hkra Shi makawp maga ya u ga. Nanhte hpe shaga la ai Karai Kasang gaw kangka nga ai rai nna, dai lam hpe Shi shabyin ya na ra ai.

Karai Kasang a Mungga rai nga ai.

KABU GARA SHIGA

Yawhan 1:6-8, 19-28

Ya hti na gaw Yawhan a laika hta na Kabu Gara shiga rai nga ai.
Karai Kasang e shangun dat ai, Yawhan mying ai wa langai mi du sa ai. Dai wa gaw, dai nhtoi a lam sakse hkam ya nna, masha yawng mayawng dai nhtoi a marang e kam sham lu mu ga, sakse sa tai na matu du sa ai. Shi gaw dai nhtoi n rai, dai nhtoi a lam sakse hkam ya na she du sa ai.

Ya Yawhan hkam ya ai sakse lam gaw, da ndai rai nga ai: Yuda masha ni gaw Yerusalem mare de nna, hkinjawng ni hte Lewi masha ni hpe Yawhan hpang de shangun dat nna, Nang gaw kadai rai nga nta? ngu nna san shangun yang Yawhan gaw hpa n ip da ai sha teng man ai hku htan ya let, Ngai gaw Hkristu n rai nngai ngu wu ai.

Shaloi shanhte gaw, Dai rai yang gaw, Elia rai nga n ni? ngu nna san mu yang, shi gaw, N rai nngai, ngu wu ai. Bai shanhte gaw, Dai myihtoi wa rai nga n ni? Ngu nna san yang, Yawhan gaw, N rai nngai ngu nna bai htan wu ai. Dai rai nna shanhte gaw, Anhte hpe shangun dat ai ni hpe wa tsun dan lu na matu, nang kadai re ai hte hpa baw galaw ai lam hpe tsun dan rit, ngu nna bai san mu ai. Shaloi Yawhan gaw, Ngai gaw myihtoi Esaia tau tsun dan sai hte maren, ‘Madu a lam hpe shading ya mu nga nna, nam e jahtau ai wa a nsen rai nga nngai’ ngu mu ai. Dai dat kasa ni chyawm gaw Hparishe ni kaw na rai ma ai. Dai rai nna shanhte gaw, Nang gaw Hkristu mung n rai, Elia mung n rai, dai myithtoi wa mung n rai yang gaw, nang hpa majaw kashin kamun jaw nga nta? ngu nna san mu ai. Yawhan gaw, Ngai gaw hka hte kashin kamun jaw nngai; rai ti mung, nanhte n chye ai wa langai mi nanhte ka-ang e tsap nga ai. Dai wa gaw nye a hpang e du sa ai wa rai nga ai, shi a kyepdin sumri hpe pyi ngai n raw gying nngai, ngu nna shanhte hpe htan ya mu ai. Ndai lam ni gaw, Yawhan kashin kamun jaw ai shaloi, Yawdan hka wora hkran na Behtani kahtawng hta byin wa sai rai.
Madu a Kabu Gara Shiga rai nga ai.

2023: DUSA LADAW LABAN (2) NA MUNGGA

Hkye La Madu du măgang ra ai; dai Madu du sa na hkrun lam hpe shătsawm mu, shăding shărai mu!” nga ai. Ndai dinghta ga na n hkru n kaja ai baw, myit n dawt ai, myit n dik ai baw ni law law, myit htum hpa law law a lapran e asak hkrung nga pra nga ga ai. Makam masham ngang ai ni a matu, mungkan e hpa byin nga ai rai tim, tinang a prat mahkrum madup hta kade mi myit ru jamjau ai rai tim, Karai a shalan shabran ai chyeju, lăkawn lănawn ai chyeju ni n taw n tsang hkam la lu ma ai. Kamsham ai ni a matu myit mada lu ai lam ă nga nga ai.

 Ndai dinghta ga ntsa hkrap ngu hkrap ngoi, madai ai nsen ni ă nga nga ai. Machyi madai ai nsen, kawsi hpang găra ai ni a madai nsen, n tara roi rip dip sha hkrum ai majaw kasu kabrawng ai nsen, yawn hkyen hkrum ai ni a hkrap madai nsen, shing re ai mungkan masha ni hpe, “Kabu mu, Madu gaw hpung shingkang hte rai, n shut n shai du sa maw ai” nga ai shi-ga na la ga yang kade myit pyaw myit rawt hpa rai na ta? Kamsham ai ni a matu lachyum pru tim n kamsham ai ni a matu lachyum n pru na rai nga ai.

   
“Magyi magaw re ai lam hpe shading mu!”; Shada masu magaw manai makai di hkat ai uhpung uhpawng/community (hpaga hpung)/ mungmasa uhpung,… e lu su nga-mai na lam n nga ai zawn, rawt jat galu kaba na n mai byin ai; matsan mayan re ai prat kaw na lawt lu na lam mung n nga ai.

 “Tsaw ai bum ni hpe daw kau mu, hkaraw ni hpe kăput jahpring mu!” Awng dang ai prat madang de du mayu ai wa kadai mung, shagrit shanyem ai myit rawng nan rawng ra ai. Awng dang ai hpang gumrawng gumtawng ai wa mung, shi prat galu awng dang ai madang hta n grin nga lu ai. Myit daw myit hten loi ai masha mung, awng dang ai prat de lahkam htawt sit lung wa lu na n rai.

Dinghta a lam hta pyi shing re ai rai yang, Karai Kasang hte matut mahkai, Karai hte hkrum lu na matu, Karai a chyeju hkam la lu na matu, kade mi myit san seng ra ai, kade mi myit malan ra ai, kade mi shagrit shanyem ra ai lam hpe shadum ya ai n rai a hka!

 Yawhan Baptista gaw Isaiah a myihtoi ga hpe shatup shadik na matu hkaw tsun hpang ai. Hkraw hkun shingran katsi ai shara kaw nna jahtau tsun ai ga gaw: myit malai lu mu, nga ai. Myit malai n ra ai kadai shinggyim masha nga a ta?

Sumru yu na matu:
 Tinang tau hkrau n hkyen da, n shajin da ai majaw sum mat ai, kaya hkrum ai kade lang rai ta?
 Tau hkrau sawn shajin da ai majaw hkrat sum hpa kaw na, machyi hkala hkrum mai ai kaw na lawt lu ai kade lang she rai ta?
 Dai ning na Du Sa ladaw hta tinang a myit masin hpe gara hku shajin da na rai ta? 

2023: DUSA LADAW LABAN (2) NA CHYUM LAIKA

Dusa ladaw laban (2)
December 10, 2023
Chyum Mungga Daw 1

Es 40:1-5, 9-11 

Ya hti na gaw Myihtoi Esaia a Laika hta na rai nga ai.
Nye a amyu hpe shalan shabran mu, shanhte hpe shalan shabran mu, nga nna nanhte a Karai Kasang tsun nga ai. Yerusalem mare hpe ngwi pyaw ga hte tsun mu: Shi a hpyen majan ngut wa sai, shi mara raw dat kau ai hkrum sai, n hkru ai amu a majaw Madu a lata na ari htam lahkawng hkam la nu ai, nga nna shi hpe jahtau tsun mu. Nsen langai mi jahtau ai gaw: “Nam mali e Madu a matu lam lajang da mu; zaibru jang e anhte a Karai Kasang a matu, nmaw lam shading mu. Hkaraw hkamwam shagu hpe kaput jahpring na ra ai; bum hte kawng shagu hpe shanem na ra ai; hkalik hkalawk re ai shara pri mat na ra ai; machyawk marawk re ai shara layang tai na ra ai. Shaloi Madu a hpung shingkang dan pru nna, masha yawng dai hpe mu lu na mara ai, nga nna Madu a n-gup tsun nga ai. Ziun bum de kabu gara shiga htawn tsun ai wa e, tsaw ai bum de lung u. Yerusalem mare de kabu gara shiga shana ya ai wa e, nsen kaba hte jahtau tsun u. Yuda mare ni hpe, ‘Nanhte a Karai Kasang hpe mada yu mu, ngu nna n hkrit ai sha jahtau tsun u. Madu gaw hpung shingkang hte du nna, Shi a lahpum up nga na ra ai. Shi a awng padang kumhpa shi lang nna, shi lu la ai lanep shabrai shi a man e nga nga ai. Shi gaw sagu rem wa zawn shi a sagu hpung ni hpe rem na ra ai; sagu kasha ni hpe shinggyim la nhtawm, hpai pawn na ra ai; hkalung woi ai sagu kanu ni hpe mung, angwi sha woi wa na ra ai. 
Karai Kasang a Mungga rai nga ai.
  
CHYUM MUNGGA DAW 2

2 Petru 3:8-14

Ya hti na gaw Kasa Petru shagun dat ai laika lahkawng hta na rai nga ai.
Tsawra ai jinghku ni e, Madu a man e nhtoi langai mi gaw shaning hkying mi hte maren rai nga ai; shaning hkying mi mung nhtoi langai mi hte bung nga ai: ndai lam langai sha hpe galoi mung hkum malap kau mu. Masha nkau mi gaw, Madu lanyan nga ai, nga nna myit ma ai hte maren; Madu gaw shi a ga ndat hpe shadik na matu lanyan nga ai n rai. Rai ti mung, yawng mayawng myit malai lu nna, kadai raitimung, hten bya ai n hkrum mu ga, Shi nanhte hpe matsan dum sharang nga ai.  Madu a nhtoi chyawm gaw lagu lagut zawn du na ra ai. Dai nhtoi hta e sumsing lamu kadu ai nsen hte lai mat na rai ai; arai guji guyang ni, kahtet lai ai hta krawp ayai mat wa nna, aga hte dai hta nga ai yawng mayawng hte gaw, hkru hkat mat na ra ai. 
Shing rai, arai yawng mayawng krawp ayai mat ai hkrum na teng nga ai majaw, nanhte kaning re ai masha tai na ra ai hpe myit yu mu. Karai Kasang a nhtoi hpe nanhte myit mada la nga let, Chyoi Pra ai hte tara sharawng  ai masha ni tai ra myit dai. Dai nhtoi hta e sumsing lamu wan hkru ai hta krawp ayai mat nna, arai guji guyang kahtet lai ai byawng mat na ra ai. Shing rai byin wa ti mung, Karai Wa ga ndat da ai hte maren, dinghpring rawng ai sumsing lamu nnan hte ginding aga nnan hpe, anhte myit mada nga ga ai. Dai rai nna, tsawra ai jinghku ni e, Madu nanhte hpe ngwi pyaw ai hte hkap la lu u ga, myit mada let ala nga ai laman ndai hta e, shut hpyit mara hte agang chyalang n kap lu hkra shakut sharang nga mu.
Karai Kasang a Mungga rai nga ai.

KABU GARA SHIGA

Marku 1:1-8

Ya hti na gaw Marku a laika hta na Kabu Gara Shiga rai nga ai.
Yu mu, na a man e na a lam lajang magang na, Nye a kasa hpe ngai shangun dat we ai: Nam mali e jahtau ai nsen gaw: Madu a lam lajang da mu, Shi a lam masun ni hpe shading mu, nga nna, myihtoi Esaia a laika hta ka da ai hte maren, nam mali hkan e Yawhan Baptista paw pru nna, shut hpyit mara raw mat lu mu ga, myit malai kumla madum dan ai kashin kamun lam hpe hkaw dan wu ai. Dai rai nna, Yuda mung ting na hte, Yerusalem hkan na yawng hte gaw, Yawhan hpang de pru sa wa nna, tinang a shut hpyit mara hpe shapraw dan let, shi a lata hte Yawdan hka hta e kashin kamun hkam la ma ai. Yawhan gaw gawla-u mun hte da ai hpun palawng hpe bu hpun nna, shi nshang e shanhpyi shingkyit kyit nga ai: dinggam-yaw hte nam na lagat jahku hpe shi lu sha nga ai. Shaloi shi gaw, Ngai hta n-gun grau rawng ai wa gaw, nye a hpang e du na ra ai: shi a kyepdin sumri hpe ngai gum raw ya na pyi, n ging n dan nga nngai. Ngai gaw nanhte hpe hka hte kashin kamun jaw ma sade ai, rai ti mung, dai wa gaw nanhte hpe Chyoi Pra ai Wenyi hte kashin kamun jaw na marin dai, ngu nna Yawhan hkaw dan wu ai.
Madu a kabu gara shiga rai nga ai.

2023: DUSA LADAW LABAN (1) NA MUNGGA

“Madu gaw nta bai du wa ai aten hpe nanhte n chye mi ai maja, sin măja nga mu! Nahte n myit măda ai aten hta shi du wa yang nanhte yup pyaw nga ai hte n kătut mi ga, la măja nga mu” nga ai re.

Hpyen dap post hpe sin maja na judi ang ai hpyenla ni yup mălap shajang ai rai yang, post kata e nga ai ni a matu kade hkrit tsang hpa she rai a hka! Judi ang ai ni n kangka ai majaw hkrup sha ai mahkrum madup ni hpe myit yu mai ga ai. Wan sat dap na masha ni mare lawk hkan wan hkru wa ai majaw shana dat ai hte lăwan lădan sa je lu na matu masha hte arung arai ni shajin let maja nga ra ai n rai a hka! Lit lu ai ni n kangka ai majaw, yup nga ai masha ni hpe jasu la ra, mawdaw kaw hka n jahpring da, hka pipe ni hpe n shajin da ai majaw mawdaw kanawng jasu ra, hka jahpring la ra, hka pipe kapa chyai nga, re ai majaw wan chyam bra wa nna n hkru ging ai kaga nta ni hkru, lawk ting hkru rai, sum kaba byin chye ai n rai a hka!

Hten bya ai de n du na lam, n kangka ai majaw ari dam jaw ai n katut na lam sadi let ala maja nga na kade ahkyak ai lam hpe shadum ya ai. Marku a laika hta tsun ai sumtsan de hkawm mat wa ai nta madu gaw Yesu shi hkum hpe shi shăang tsun ai rai nga ai. Sumsing mungdan de rai n lung wa shi yang, Kasa ni hte sape ni hpa hpa galaw shajang na lam, htet matsun lit jaw da ai. Sumsing mungdan de lung mat wa ai hpang dinghta ga de bai du sa na, n shut n shai bai du na; shaloi, yawng mayawng hpe jeyang na rai nga ai.

Sumsing mungdan de du wa lu na matu machye machyang lam matsun yawng, Nawku Hpung hta sharin achyin ya ai ni nga ai, shachyoi shapra chyeju ni yawng lu mai ai; hpung masha hkum shagu, shada da ntsa e yu gawn hkat na lit tsang hte tsang jaw da ai. Madat mara hkan shatup na, tinang nang a lit hpe kangka ai hku hkap la dawjau na lit lu shajang ga ai. Kasa Pawlu Korintu hpung masha ni hpe shadum ai hta, Madu Yesu hku nna anhte hkam la lu ai wenyi a chyeju kumhpa ni law law re ai lam shadum ya ai. Dai chyeju kumhpa ni hte shada dawjau ai amu galaw ra ai lam hpe mung shadum ya ai. Isaiah laika hta tsun da ai hte maren, shinggyim amyu ting shut hpyit mara lu ai lam hpe shadum ya ai. Anhte gaw Karai Kasang hpe n gawn n sawn di kau ai ni, shut hpyit mara lu ai ni re ai lam hpe yin la tawngban ra ai lam shadum ya ai. Anhte a gawng kya shut chye ai ni rai tim, Karai Kasang gaw yawng a Kawa, matsan dum chye ai Kawa, kangka ai Kawa re ai majaw, hpyi nem tawngban ra ga ai lam hpe shadum ya ai.

Myit sumru yu na lam:
 Dinghku hta, mare buga hta, uhpung uhpawng hta, Nawku Hpung  hta, langai hpra hpe Karai e jaw da ai lit adum sha rai gun hpai shajang ai kun?
 Tinang a myit masin wenyi hpe mawn sumli hprang shatsawm ai amu, si nhtoi hpe sha la nna galaw ai kun, shani shagu la maja ai myit hte galaw ai kun?
 Dai ning na Du Sa ladaw hta hpa hpa hpe naw hprang shatsawm ra na myit da ai kun?

2023: DUSA LADAW LABAN (1) NA CHYUM LAIKA

Dusa ladaw laban (1)
December 3, 2023
CHYUM MUNGGA DAW 1

Esaia 63:16-17, 64:1, 3-8

Ya hti na gaw myihtoi Esaia a Laika hta na rai nga ai. 
Madu e, Nang nan anhte a Wa rai nga ndai; moi chyaloi nhkoi kaw nna Na a mying nsang hpe, Hkye Hkrang La ai Wa ngu nna tsun nga ai. Madu e, Na a lam kaw nna anhte hpe hpa majaw shadam n ta? Nang hpe n hkrit hkungga hkra, anhte a myit masin hpe hpa majaw shaja ya n ta? Na a ali ama ni ngu ai, Na a sali wunli amyu ni a matu bai wa rit.
Madu e, sumsing lamu hpe hpaw malang nna, yu wa rit law. Nang du sa jang Na a man e bum ni ashun gari nga na mara ai. Moi chyaloi nhkoi e, anhte myit mada ai hta grau ai hkrit hpa amu Nang shapraw ai shaloi, Nang yu wa nna, bum ni gaw Na a man e ashun gari masai. Nang hpe myit mada ai wa a matu, Nang zawn chyeju madun ai Karai Kasang kaga hpe, kadai mung n na yu ai hte, myi hte mung n mu yu ai. Dinghpring ai lam galaw nna, Na a lam dum ai ni hpe, Nang lam madun dan ndai.
Anhte shut hpyit ai shaloi, Nang pawt sindawng nit dai; anhte na na wa Nang hpe gumlau saga ai. Anhte yawng n san n seng ai wa zawn tai wa saga ai; anhte a dinghpring ai lam mahkra, agang chyalang re ai hpun nba hte bung nga ai. Anhte yawng namlap zawn nyip mat nna, anhte a shut hpyit ai gaw nbung zawn anhte hpe ahpawt kau mani ai. Na a mying nsang hpe shaga ai wa hte, Nang hpe manoi manat na matu tinang a hkum hpe shadut ai wa kadai mung n nga ai; hpa majaw nga yang, Nang gaw Na a myiman hpe makoi kau nna, anhte a shut hpyit ai hta anhte hpe tawn da mani ai. Rai ti mung Madu e, Nang gaw anhte a Kawa rai nga ndai; anhte gaw ga kagam rai nga ga ai, Nang gaw di bu sama rai ndai; anhte yawng Na a lata a amu rai nga ga ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 1:3-9

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.
Tsawra ai hpu nau ni e, anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw nanhte hta e a nga nga ma lit ga law. Yesu Hkristu a marang e nanhte hkam la ai chyeju mahkra a majaw, ngai tut nawng e Karai Kasang hpe chyeju dum nga nngai. Lam amyu myu hku nna Karai Kasang shi a chyeju kumhpa ni anhte hta shalaw shahtam sai majaw, ngai chyeju dum nga nngai. Kaning rai nme law, nanhte a sara ni n-gup atsam shagu hte hkaw dan lu ai majaw, chye chyang ai lam shagu hta nanhte hkum tsup nga myit dai; Hkristu a matu sakse hkam ya ai lam ni mung, nanhte hta e dan leng wa sai. Shing rai, anhte a Madu Yesu Hkristu a paw pru na lam ala let nga nga yang, hpa chyeju kumhpa mung n kadawn nga myit dai; anhte a Madu Yesu Hkristu a nhtoi e mung, mara shagun shara n nga hkra, Shi nanhte hpe shangang shakang na marin dai. Hpa majaw nga yang, Karai Kasang nan Shi a Kasha Yesu Hkristu hte matut mahkai nga lu na matu, nanhte hpe shaga la manit dai; dai Karai Kasang chyawm gaw kangka re ai wa rai nga ai.
Karai Kasang a Mungga rai nga ai.

KABU GARA SHIGA

Marku 13:33-37

Ya hti na gaw Marku a laika hta na Kabu Gara Shiga rai nga ai.
Yesu Shi a sape ni hpe tsun mu ai gaw: Sumsing lamu hte ginding aga lai mat wa na, ahkying aten hpe nanhte n chye nga myit dai majaw, sadi nna maja nga mu. Dai lam gaw, tsan tsan mung de hkawm sa wa ai masha hte bung nga ai: dai wa gaw shi a nta hpe kau da yang, shi a ali ama ni hpe arai mahkra ap ya nna, langai hte langai hpe bungli karan jaw da ai; chyinghka sin ai wa hpe mung. Maja nga u, ngu nna hkang da nu ai. Dai nta madu gaw, nrim e, yup tung e, u goi hpawa e, jahpawt manap e, galoi e bai du wa na ra ai hpe nanhte n chye da myit dai majaw, a maja nga mu. Shing n rai, Shi akajawng sha wa du nna, nanhte n dum shami yup nga ai hpe wa mu na ra ai. Nanhte hpe ngai tsun ai hte maren, yawng hte hpe ngai tsun nga nngai: a maja nga mu.
Madu a Kabu Gara Shiga rai nga ai.

2023 HKRISTU HKAWHKAM POI SHANI NA MUNGGA

Laban Missa hta Kasa ni a makam masham hpe tsun ga yang, “Dai Hkristu gaw Kawa Karai a hkra maga e hkaw dung nga ai….si ai hte hkrung ai ni hpe jeyang na matu, hpung shingkang hte bai du sa na ra ai” nga ai. Dai hpe n shut n shai kam ga ai. Dai jahtum na aten hpe sha la nga ga ai n rai; Karai a hkra maga e hkaw dung ai Wa gaw yawng mayawng hpe up ai Wa rai nga ai. Jahtum na nhtoi hta kadai mi hkraw tim n hkraw tim, dai hkawhkam a jeyang dawdan ai hpe hkam la ra na hte, gingdan ai ni gaw htani htana dai Hkristu Hkawhkam uphkang ai mungdan e htani htana ngwi pyaw nga lu na rai nga ai. Dai Hkristu gaw, “Sagu rem sin ai wa zawn shi a sagu hpung hpe rem sin bau sin na ra ai” (Ezek 34:11-12). Yesu gaw shi kadai re ai lam ning nga tsun ai, “Ngai gaw Sagu Rem kaja rai nngai; tinang a asak hpe n lahpawt ai, sagu ni a matu asak hpe ap nawng kau na…” nga ai (Yn 10:11). Dai Sagu Rem kaja gaw matut nna shi a sagu hpung hpe bau sin ya nga ai: tsit lali ai wudat shara hte lwi ai hka kau de sagu ni hpe woi sa ai (kashin kamun); baw hta sau chya ya ai (Ninggun shaja/machyi ai ni hpe sau chya ya ai); sha-hpa man man jaw ya ai (Chyoipra Hkum)…

 Ndai dinghta ga e Hkristu Hkawhkam gaw gara hku uphkang nga ai kun? Shi kaning re ai hpung shingkang atsam marai ni madun nga ai kun? Shi a nsen hpe gara hku madat lu, na lu na rai kun? Mt. 25:31-46 laman ka da ai hta, “Ngai kawsi hpang gara nngai, bu hkawm hkring sa shara tam nga n ngai, bu hpun palawng n lu nngai, machyi makaw hkrum nga nngai….., nga ai nsen ni hta dai Hkristu Hkawhkam a nsen hpe madat na la ya lam tsun da ai. Kawsi hpang gara, matsan mayan, roi rip zingri, ana zinli, n shawp n hkap, n tara ai, …n kaja ai baw yawng, hpyen tai ai yawng, jahtum chyalai si mat ai lam (si du) hpe Shi a lagaw lahpan npu kabye da lu ai aten du hkra (I Kor 15:25-26), tai hpyen ni hpe tai manga kau, gasat kau nga ra ai.

 Dinghta ga na Du/Hkawhkam ni a uphkang masa, shanhte a myit jasat, shanhte a alai maka ni hpe shakawn hpa law law mu lu ai zawn, mungdan shawa masha ni hpe jahkrit shama ai, shada shingjawng hkat ai, num shalaw ai, ja gumhpraw marin ai, n tara ai hku, adip arip di ai lam ni, ndai zawn n kaja ai maka amyu myu hpe mung mu lu na ga ai. Uphkang arawng aya lu ai ni a matsat shabat re ai alai maka ni hpe mung mu lu na ga ai. Yawng mayawng gaw Hkristu Hkawhkam a jeyang ai hpe hkam la ra na ni rai ma ai. Dai Hkristu Hkawhkam gaw shi hpe n kamsham, shi a uphkang ai npu e n kam taw ai ni hpe adip arip di nna uphkang ai n rai. Shi a tsawra myit hpe kamsham hkap la ai ni a myit masin wenyi hpe sha uphkang ai Wa rai nga ai.

 Hpang jahtum Hkristu Hkawhkam a man e jeyang hkrum ai aten hta, dinghta ga e tinang kade awng dang ai, gade lu su ai, kade gumhkawng ai, ngu ai amying shingteng ni hpa n tai mat na rai nga ai. Masha shada kade daram tsawra matsan dum chye ai, matsan dum hkye mawoi amu, grau nna ruyak jamjau hkrum ai masha ni hpe kade lakawn lai wa ai, gara hku garum shingtau lai wa ai, ngu ai hpe shenjen nna jeyang dawdan hkrum na lam hpe shadum ya ai. Rap-ra tara, simsa shim lum ai mungkan, kawsi hpang gara machyi makaw ni kaw na lawt lu hkra, ndai dinghta ga ntsa Hkristu a uphkang gawn reng ai lam, Shi a sape ni, kamsham ai ni hpe lit jaw da ai. Dinghta ga e Shi a mungdan gawgap lawm ai ni gaw, jahtum nhtoi hta ning nga hkap tsun ai hpe na lu re, “Mungkan ningnan lat ai aten kaw nna nanhte a matu lajang da ai mungdan a sutli kumhtaw hpe dagraw hkam la mu!” nga na ra ai.

Myit sumru yu na lam:
• Hkristu Hkawhkam gaw ndai dinghta ga e gara hku uphkang nga ai lam hpe myit yu ga ai kun? N hkru n kaja ai mung-up du salang ni law law nga ma ai; de a majaw myit daw ai lam nga ai kun?
• Petru hte kaga Kasa ni hpe tsun ai, “Ngai a sagu hpung hpe rem sin bau sin nga mu!” nga ai ga a lachyum hpe kalang lang myit yu ga ai kun? Nang/ngai, yawng shang lawm ga ai kun?
• Mungkan a jahtum nhtoi hta kadai masu makoi n lu ai, yawng  gaw jeyang hkrum na, nga ai ga hpe ya sha sha myit dum ga  ai kun?

2023 HKRISTU HKAWHKAM POI SHANI NA CHYUM LAIKA

HKRISTU HKAWHKAM POI
November 26, 2023
CHYUM MUNGGA DAW 1

Ezekela 34:11-12. 15-17

Ya hti na gaw myihtoi Ezekela a laika hta na rai nga ai.
 Madu Karai ning nga ai, Ngai hkum nan nye a sagu ni hpe sawk tam na nngai. Sagu rem wa bra nga ai sagu ni hpe hkan shakut tam ai zawn ngai mung nye sagu ni hpe hkan tam na nngai. Lamu sin nna mak mat ai shani, bra ayai mat ai ni hpe shara shagu na bai tam shaw woi la na nngai. Ngai hkum nan nye sagu ni hpe bau na nngai. Shanhte hpe hpum shangun na nngai. Dam mat ai ni hpe hkan tam na nngai. Masha ni gau mat wa ai sagu ni hpe hkan mawai la na nngai. Nra daw ai sagu hpe ahkyen kayawp na nngai. Gawng kya ai sagu hpe n-gun shaja na nngai. Hpum sau ai hte n-gun ja ai ni hpe chyawm gaw ngai jahten na nngai. Ngai gaw tara ai hpe galaw ai sagu rem wa rai nngai. Nye sagu hpung e, sagu mi hte sagu mi hpe, sagu hte bainam, la ni hpe ngai ginhka dawdan na nngai, nga nna Madu Karai tsun ai.
Karai Kasang a Mungga rai nga ai.

CHYUM MUNGGA DAW 2

1 Korinhtu 15:20-26, 28

Ya hti na gaw Korinhtu ni kaw San Pawlu shagun dat ai laika langai hta na rai nga ai.
 Hkristu gaw si mat ai kaw na bai hkrung rawt sai majaw, si taw mat ai ni hpe bai jahkrung sharawt la na ra ai lam kam shut shara n nga ai. Masha langai mi a nhkan e, si ari pru sai. Masha langai mi a nhkan e, hkrung rawt ai bai pru sai rai. Masha yawng gaw Adam hte dun ai majaw si ra sai zawn, Hkristu hte dun ai ni yawng hpe mung bai hkrung sharawt la na rai. Marai hkum hpe chyawm bai hkrung sharawt ai hta lam masat da ya ai. Shawng nnan Hkristu, shi bai du yang, si ai ni yawng, bai hkrung rawt na rai. Shaloi jahtum nhtoi du na. Hkristu, wenyi dagu du, ahkang aya, du magam, yawng hpe dan kau nna, Kawa Karai Kasang hpe mungdan ap ya na ru ai. Gumlau mahkra hpe dang kabye dip kau ai du hkra Hkristu up na rai nga ai. Jahtum hpyen gaw si atsam re. Dai hpe mung dang kau, yeng kau na sana rai. Hkristu up ai hta yawng hpe shakyet ngut jang, Kasha shi, Karai Kasang npu e, shanu na wu ai. Shing rai, Karai Kasang gaw mahkra ting hpe up ai baw tai na ra ai.
Karai Kasang a Mungga rai nga ai.

KABU GARA SHIGA

Mahte 25:31-46

Ya hti na gaw Mahte a laika hta na Kabu Gara Shiga rai nga ai.
 Masha kasha gaw shi a hpung shingkang dan hkung let, lamu kasa ni nlang rau du sa ai shaloi, tinang a hpung shingkang tinang ntsa e dung let, amyu baw shagu hpe shi a man e, jahpawng da nna, sagu rem wa, sagu hte bainam garan jahka ai zawn, shanhte hpe garan nna, dingman ai hpe hkra de, kaga ni hpe pai de, di tawn da na mu ai. Hkra de nga ai ni hpe, hkawhkam wa tsun ai gaw, Nye Wa shaman ya sai ni e, sa marit, Mungdan hpe sa hkam la mu. Mungkan nnan hpan da kaw nna, lajang da sai. Hpa rai nga yang, Ngai kawsi yang, lusha jaw myit dai. Hpang gara yang, ntsin jaw myit dai. Tsasam manam rai yang, tinang kaw hkap la myit dai. Bu hpun n kap yang, jahpun myit dai. Ngai machyi yang yu lajang, htawng rawng yang, sa kawan katsan ya myit dai. Shaloi ding hpring ai ni gaw, Madu e, nang kawsi ai hpe anhte galoi mu nna galaw jaw ga ta? Hpang gara ai hpe anhte galoi mu nna, lu na jaw ga ta? Nang manam tai hkawm ai hpe anhte galoi mu nna, daw ga ta? Singgu krin rai nga ai hpe anhte galoi mu nna, jahpun ga ta? Nang machyi hkrum ai hte htawng rawng nga ai hpe, anhte galoi mu nna, nang hpe kawan yu ga ta? Ngu nna shi hpe htan na ma ai.
 Dai rai nna hkawhkam wa gaw, Nanhte hpe ngai teng teng tsun ma de ga, Ndai ngai nau ni hta na kaji htum ai wa hpe nanhte galaw ai gaw, nanhte ngai hpe galaw ma nit dai, rai nga ai, ngu nna shanhte hpe htan na mu ai. Bai, pai maga de nga ai ni hpe, Dagam dala hkrum ai ni e, ngai hte hka wa nna nat gumlau hte shi a salung sala ni a matu lajang da ai n htum n mai ai wan de shang wa mu: kaning rain me law, ngai kawsi yang, nanhte ngai hpe sha na n jaw myit dai; hpang gara yang, nanhte ngai hpe lu na n jaw myit dai: ngai manam tai hkawm yang, nanhte ngai hpe n daw myit dai; singgu krin rai jang, nanhte ngai hpe n jahpun myit dai: machyi hkrum ai hte htawng rawng nga yang, nanhte ngai hpe n yu lajang myit dai, ngu na mu ai. Shaloi shanhte mung, Madu e, nang kawsi ai, hpang gara ai, manam tai hkawm ai, singgu krin re ai, machyi hkrum ai hte htawng e nga ai hpe, anhte galoi mu nna, nang hpe n galaw daw ga ta?  ngu nna htan na mu ai. Dai rai nna, Ngai nanhte hpe teng teng tsun ma de ga, ndai ni hta na kaji htum ai wa hpe nanhte n galaw myit dai majaw, ngai hpe n galaw myit dai rai nga ai, ngu nna shanhte hpe htan na mu ai. Shaloi shanhte gaw n htum n wai ari de shang wa na ma ra ai; ding hpring ai ni mahtang n htum n wai asak de shang lu na ma ra ai, ngu wu ai.
Madu a Kabu Gara shiga rai nga ai.

2023: PRANWAN LADAW (33) LABAN SHANI NA MUNGGA

Sumsing mungdan de, Kawa Karai hpang de lung mat wa ai Yesu gaw hkrun lam galu hkawm sa ai wa rai nga ai. Shi bai du sa na lam tau nau tsun da ai. Tinang si wa ai nhtoi gaw dai Madu gaw bai du wa wa nna, tinang hpe woi la ai nhtoi rai na ra ai: shaloi, dinghta prat hta tinang galaw da ai amu ni yawng a jahpan tang madun dan ra na rai nga ai.
 

Shawng na Chyum mungga hta kangka ai dinghku num hpe shăkawn da ai: shi lu ai machye machyang, atsam marai, hkamja lam, ahkying aten ladaw, kaning re ai ahkaw ahkang ni hpe mung shangun lang nna, dinghku masha ni lum lum nai nai nga lu na matu n sim n sa shăkut ai. Madu wa myit ru myit tsang n hkrum ai, kam ging dik ai ningrum ningtau jan rai nga ai. Lahkawng ngu na Chyum mungga hta San Pawlu shadum ai lam: anhte gaw ningsin hta n mai nan taw nga ai lam, ninghtoi a kasha ni rai ga ai majaw, wenyi lam hta yup nga n mai ai; myit-su myit hprang nga ra ai lam hpe shadum ya ai. Myit masin wenyi zet let nna a kajawng sha galai shai htenza wa lu ai, a kajawng sha si wa mai ai lam ni hpe shădum ya ai. Dai ninghtoi gaw hpa wa rai ta? Tengman dinghpring ai, rap-ra tara hpe manu shadan ai, tsawra chye ai, sari sadang rawng ai, dz., dz. Dai ninghtoi hpe gam garan chye ga ai kun?

Masha kau mi nga mu nga mai ai nta htinggaw kaw shangai wa ma ai; matsan mayan re ai htinggaw kaw shangai wa ai ni mung law law rai ma ai. Shangai wa ai masha shagu gaw hkrang gu ai hku shangai wa na lam Karai e lajang da chyălu. Mabyin kau mi hta kanu kawa myit n su ai majaw hkrang n gu ai shangai wa ai ma ni mung law law nga ma ai. Masha shagu hpe Karai Kasang gaw mau-hpa atsam marai ni jaw da ai. Tinang nang hpe Karai e jaw da ai atsam marai ningja ni hpe gara hku akyu jashawn ga ta? Lagaw lata hten ai Miwa la langai a lam Facebook kaw pru wa ai: ayak ahkak rai nna hpun hta, wanhkret hkret, wan wut, di dun, udi kăngau, di htawn rai nna byin hkra, tai hkra lu galaw ai; tinang hta ngam ai atsam ni hpe dai hkra garang la ai n rai a hka!

“Ability is a poor man’s wealth” nga, ai hpaji jaw nga ai; lachyum_ galaw lu ai atsam marai gaw matsan masha langai a sutgan re, nga ai. Daw hten ai, myi kyaw ai, na hpang ai, lagaw lata n gum ai, shing re ai masha ni hta mau na daram re ai atsam marai ni madun dan lu ma ai; ngam la lu ai atsam marai ni hpe grau dik htum ai madang du hkra shăngun lang ai majaw n rai a hka? Nam kahtawng e bau kawa hte hpun kran hpun chye nna, kan bau makan galaw ai Abraham Linkun, U.S Gumsan magam tai wa lu ai; ma ten hta ga shaga n brat ai, dut dang ai lam hpe tawt lai lu nna Gumsan magam tai wa ai Joe Baiden; ma ten hta matsan dik ai masha kau mi lauban byin wa ma ai; dz,. dz. mabyin ni law law nga ai.

Kashin kamun hkam la ai aten hta Karai e bra da ya ai mai kaja ai nli tum, shachyoi shapra ya ai asak a chyeju kumhpa ni hpe gara hku manu shadan ga ta? Nli tum dai gaw tu kaba prut tsawm wa nna asi kaja ni si ya ra ai n rai a hka? Rawt jat galu kaba wa na matu Karai e jaw da ai sawn sumru lu ai atsam, hpaji hkaja la lu ai ahkaw ahkang, hkamja lam, ahkying aten, hpaga awng ai aten, lu su ngamu nga-mai lam, Nawku Hpung, Chyum mungga, Sakramentu ni, hti n dang hkra re ai Karai a shaman chyeju ni hpa di kau a hka? Karai a mungdan gawgap ai magam hta, htawm hpang prat a matu sutgan mahkawng ai lam hta, gara hku shakut shaja nga ga ai kun? Yawng mayawng gaw dinghta asak aprat htum mat ai shani, Karai a man e jahpan tang madun dan ra na ga ai. Grau jaw da hkrum ai wa kaw na grau ai sumsing sutgan hpe Karai Kasang myit mada na sha rai nga ai. Arang loi sha hkam la lu tim amyat law law madun lu ai wa mahtang grau ai hku shakawn hkrum na rai nga ai.

Myit sumru yu na lam:
• Karai Kasang tinang hpe jaw da ai atsam marai, ahkaw ahkang, chyeju kumhpa ni hte myit dik dum, chyeju dum chye ga ai kun?
• Kaga masha ni lu, byin ai hte shadawn nna myit n dik byin chye ga ai kun?
• Tinang hpe Karai e jaw ya ai atsam marai ni hpa hpa rai ta?

2023: PRANWAN LADAW (33) LABAN SHANI NA CHYUM LAIKA

PRAN WAN LADAW HTA LABAN 33

November 19, 2023

CHYUM MUNGGA DAW 1

Ga Shagawp 31:10-13, 19-20, 30-31

Ya hti na gaw Ga Shagawp laika hta na rai nga ai.

 Sari rawng ai num hkrup na yak ai. Shi gaw lungseng hta grau hpu nga ai. Shi hta madu wa kam krem nga ai. Shi matsan mayan n hkrum na ra ai. Prat tup shi gaw madu wa a matu kaja lam hkrai di nga ai. Shi gaw sagu ri, lachyit ri, tam nna lata ri da galaw nga ai. Shi gaw gawng hte, kabang hte, ri ri nna sumpan da ai. Shi gaw matsan mayan ni hpe jaw ya, kawsi hpang gara ai ni hpe, garum rai nga ai. Hkum shingyan tsawm ai hkalem chye nna, hpraw tsawm ai, grit mat chye ai. Madu hpe hkrit hkungga ai num gaw shakawn ang ai jan rai nga ai. Shi galaw ai yawng hta akyu dum mu. Kadai yawng mung shi hpe shakawn mai ai.

Karai Kasang a Mungga rai nga ai.

CHYUM MUNGGA DAW 2

1 Htesaloni 5:1-6

Ya hti na gaw Htesaloni ni kaw San Pawlu shagun dat ai laika langai hta na rai nga ai.

Hpu nau ni e, dai aten, dai ladaw a lam nanhte hpe ka shana shara n nga ai. Madu a nhtoi gaw lagut zawn du sa na ra ai, hpe nanhte chye chyalu re. Masha ni tsun ai, yawng simsa shim ai, nga ma yang, akajawng sha hten bya hkrum hkra na ma ai. Numsha hta shinggyim machyi pru ai zawn lawan du na ra ai. Masha ni lawt na ma ai n rai. Hpu nau ni e, nanhte gaw nsin hta myit n rai. Dai nhtoi nanhte kaw kajawng kaja lagut zawn du na n byin mai ai. Nanhte nlang nhtoi hte seng ai ni rai myit dai. Anhte gaw shana hte nsin hte n seng ga ai. Kaga ni zawn yup malap nga ai ni n mai rai ga ai. N yup nga nna htauli htaula rai nga ga.

Karai Kasang a Mungga rai nga ai.

 

KABU GARA SHIGA

Mahte 25:14-30

Ya hti na gaw Mahte a laika hta na Kabu Gara Shiga rai nga ai.

Yesu ga shadawn tsun ai gaw, Masha langai mi bu hkawm na maw ai. Shi a mayam ni hpe shaga la nna shi a rai ap ya da mu ai. Langai mi hpe gumhpraw joi manga, langai mi hpe lahkawng, langai mi hpe joi mi di nna, tinang a atsam hte maren, ap ya da mu ai. Dai hpang hkawm mat wa ai. Gumhpraw joi manga lu ai wa gaw, pru wa nna hpaga ga ai hte amyat joi manga kap la wu ai. Dai zawn lahkawng lu ai wa mung, joi lahkawng myat la wu ai. Joi mi lu ai wa mahtang gaw gumhpraw hpe nhkun htu nna lup da wu ai. Tawng marang hpang, madu bai du wa ai. Mayam ni hpe hpaga jahpan la wu ai. Joi manga lu ai mayam gaw amyat joi manga hte hpawn sa nna, Madu e, ngai hpe joi manga jaw ni ai. Kaga joi manga myat la se ai, ngu wu ai. Madu gaw, Ara, sadi sahka kaja ai mayam e, arai loi sha hta nang kang na nit dai. Arai law a ntsa e, ngai nang hpe san da na de ai. Na Madu a kabu gara ai hta shang lawm u, ngu nna shi hpe tsun mu ai. Gumhraw joi lahkawng lu ai wa mung, sa nna, Madu e, joi lahkawng ngai hpe arang ya ndai. Amyat joi lahkawng lu la se ai, ngu wu ai. 

Madu gaw, Ara, sadi sahka dung kaja ai mayam e, arai loi sha hta kangka nit dai. Arai law a ntsa e, ngai nang hpe san da na de ai. Na a madu a kabu gara ai hta shang lawm u, ngu shi hpe tsun wu ai. Joi mi arang ai wa chyawm gaw, sa nna, Madu e, nang maji ai wa re. Tinang n gat ai kaw na dan la, tinang n ayai ai kaw na magawn la ndai hpe ngai chye ai. Ngai dai rai, hkrit nna, na gumhpraw hpe ga hta htu lup da nngai. Na arai nang nga ai, ngu wu ai. Madu gaw, lagawn ai, n hkru ai, mayam e, tinang n gat ai kaw na dan la, n ayai ai shara na magawn la ai hpe nang chye ndai. Nye gumhpraw hpe boi ai shara kaw da ang ndai. Ngai bai wa yang arang hte atu ngai la na we ai. Shi a gumhpraw joi hpe la nna, joi shi lu ai wa hpe jaw mu. Lu ai wa hpe kahtap jaw nna law htam wa na ra ai. N lu ai wa kaw na, naw shaw la na ru ai. Dai n hkru ai mayam hpe shinggan nsin de shaden kau mu. Dai yang wa utik let hkrap ngoi nga na ra ai, ngu nna jeyang nu ai, nga ai.

Madu a Kabu Gara shiga rai nga ai.

2023: PRANWAN LADAW (32) LABAN SHANI NA MUNGGA

“Dai nhtoi hte ahkying aten hpe nanhte n chye mi ai majaw, myi hpaw let maja nga mu!” nga ai, Yesu a shadum ga gaw madung rai nga ai. Lam mi gaw, hpaji rawng ra ai, myit su ra ai, ngu ai lachyum re. Htauli htaula myit su wa na matu, hpaji rawng wa na matu, myi hpaw, na hpaw nna sharin hkaja la yang sha byin mai ai rai nga ai.

Masha a prat hta sharin hkaja la ra ai baw hpan law law nga ai: gara hku asak hkrung nga lu na, gara hku nga yang myit pyaw myit dik lu ai, mabyin yawng a lachyum hte mahtai ni hpe chye mayu ga ai. Jahtum chyalai, masha tai wa ai a lachyum, asak a lachyum, si mat ai ngu ai a lachyum hpe n chye n mai rai nga ai. Dai majaw, gara hku shangai wa ai, ngu ai hta gara hku si mat wa ai, ngu ai, grau ahkyak ai nga, hpaji ga nga ai. Dai lam ni hpe ndai Laban nhtoi na Chyum Mungga ni lam matsun ya ai. Masha langai, asak langai dinghta ga e nga pra wa lu hkra jawm hkyen lajang ra ai lam ni law law nga ai. Shangai shaprat dat nna n ngut ai; machye machyang rawng ai, masha langai a arawng sadang hte bung ai hku hkrung nga lu na ahkyak dik ai. Langai hpra a jahtum na nhtoi hpe kadai mung tau nau n chye da lu ai: asak kaba wa ai, machyi galu wa ai, gumgai dingla wa ai, ndai ni gaw jahtum nhtoi hte ni magang wa sai, ngu ai kumla ni rai na re. Rai tim, nhtoi hkrak kadai n chye lu ai. Wan shanan a matu sau ndum jăhpring da ra ai lam, La Ningnan du sa ai aten hta, hkungran poi de hkan nang lu na matu jin jin ala maja nga ra ai lam, Israel myu sha ni a htung lailen hku nna Madu Yesu shadum ya ai.

Sau ndum, dai sau gaw hpa hpe ngu mayu a ta? Dai wan-sau gaw Hkristan aprat hpe gawgap ai makam masham, mai kaja ai myit masin, tsawra matsan dum chye ai myit, sanseng dinghpring ai myit, gam jaw gam ya chye ai shawang myit, garum chye ai myit, dz., dz. Karai Kasang hte masha ni hpe shăpyaw ya lu ai li-ningja ni rai nga ai. Myit sanseng nna yawng hpe kabu shăngun lu ai ningli kaja ni gaw wan-sau nan rai nga ai. Tinang si wa na lam hpe tau nau n chye dat ai si mat ai ni law law nga ma ai. Galoi ahkying aten hta rai tim, Madu Yesu woi la ai shani, jin jin rai nga na ahkyak ai. Mai kaja ai amu law law galaw da ai ni (wan-sau ndum jahpring da ai ni) a matu tsang shara n nga ai. Hkrup mi ra nga lai wa ai, kaga masha ni hpe kaja ai akyu n jaw ai, maji hkrai maji nna nga ai ni, hkyen lajang da ai lam n nga ai ni a matu gaw teng sha tsang hpa nan rai na re.Hkungran poi gaw kabu pyaw dik ai lam hpe shingran jaw ai sha re. Yesu gaw Nawku Hpung hte hkungran da ai, kamsham ai ni langai hpra mung Shi Madu hte hkungran da ai.  Shangai wa ai hta si mat wa ai gaw grau ahkyak ai, grau manu dan ai; jahtum chyalai Madu a hkungran poi, sumsing mungdan na daw-sha poi de shang lawm na matu saw shaga da hkrum ai, htani htana pyaw nga lu ai lam, dai gaw manu dan grau dik htum rai nga ai. Si wa ai lam hpe lachyum hkrak chye ai Hkristan ni a matu hkrithpa n rai. Chyum mungga masum hte dai lam hpe sharin ya ai.

Myit sumru yu na lam:
Anhte a kamsham tsawra myit, myit mada chye ai lam yawm hkrat mat lu ai; ruyak manghkang amyu myu hkrum katut ai aten hta, ja gumhpraw grai lu wa ai aten hta, awng dang ai lam law law lu la ai aten hta, hkrat sum ai aten ni hta, kamsham tsawra myit mada ai lam hkyet wa lu ai. Wan-sau galaw jahpring la ra ai dingyang rai ra ga ai re.

2023: PRANWAN LADAW (32) LABAN SHANI NA CHYUM LAIKA

PRAN WAN LADAW HTA LABAN 32

November 12, 2023

CHYUM MUNGGA DAW 1

Hpaji Byeng-ya 6:12-16

Ya hti na gaw Hpaji Byeng-ya laika hta na rai nga ai.

Byeng-ya chyawm gaw n wai let, htoi kabrim nga ai. Dai hpe tsaw ai ni aloisha mu tam lu ma ai. Dai hpe tam ai ni mung mu hkrup la ma ai. Byeng-ya gaw tinang hpe sharawng ai ni mu hkrup la lu hkra, dai shi lawan sa madun dan ai. Jahpawt manap hkap la ai wa mung, myit gawm lu na n rai, shi a wang chyinghka lam e, dung nga ai hpe mu na ru ai. Byeng-ya hpe dum nga ai gaw, htauli htaula rai nga ai. Dai a matu maja la nga ai wa mung myit rutsang hta na, dai jang, lawt lu na ra ai. Byeng-ya gaw shi hpe gying ai ni hpe hkan kawan tam la nga ai. Lam hkan n-gaw n wai let, shanhte kaw dan pru ai. Myit tsang garum let, hkan hkrum lu ma ai.

Karai Kasang a Mungga rai nga ai.

CHYUM MUNGGA DAW 2

1 Htesaloni 4:13-18

Ya hti na gaw Htesaloni ni kaw San Pawlu shagun dat ai laika langai hta na rai nga ai.
Hpu nau ni e, si mat ai ni a lam masa hkrak chye la shangun mayu ga ai. Shaloi myit mada lam kata ai ni zawn, yawn hkyen n rai na myit dai. Yesu si nna bai hkrung rawt sai hpe kam sham ga ai. Yesu hta kam sham nna si ai ni hpe shi hte rau Karai Kasang woi wa na hpe mung kam sham ga ai. Nanhte hpe anhte sharin ya ai gaw Madu a ga rai nga ai. Madu bai du sa ai shaloi, anhte hkrung ngam taw nga ai ni, shawng si mat sai ni hta hpa grau lu na ga ai n rai. Aming ga jahtau ngoi na ra ai. Lamu kasa agyi a nsen, Karai Kasang a pahtau nsen hte Madu hkum nan lamu na yu wa ra ai. Hkristu hta kam sham nna, si wa ai ni shawng bai hkrung rawt na ma ai. Anhte naw hkrung nga ai ni mung, dai rau, jahpawng la nna, lamu kata summwi hta Madu hpe wa hkrum na ga ai. Madu hte prat dingsa nga mat na saga ai. Ndai myit nna, shada da n-gun jaw hkat nga mu!
Karai Kasang a Mungga rai nga ai.

KABU GARA SHIGA

Mahte 25:1-13

Ya hti na gaw Mahte a laika hta na Kabu Gara Shiga rai nga ai.
Yesu tsun ai, Lamu mungdan gaw, tinang pyending lang nna, la nnan hpe pang la na pru sa ai mahkawn shi hte bung na ra ai. Shanhte hta na manga gaw myit n su ma ai, kaga manga gaw hpaji rawng nga ma ai. Myit n su ai ni gaw, shanhte a pyengdin ni hpe lang ma yang, tinang a matu sau shajan n lang sa ma ai; myit su nna hpaji rawng ai ni mahtang, tinang a pyengdin ni hte rau, tau ni hta sau hpring hkra lang nga ma ai. Ya, La ningnan du sa wa na hpe naw la ra nga ai majaw, shanhte nlang yup shamwi nna yup pyaw nga ma ai.

“Yup tung hpawa e chyawm gaw, ‘Nang e la ningnan wa du ra ai! Shi hpe hkap bawp la na pru mu!,’ nga nna garu pru wa ai. Shaloi jang dai mahkawn shi rawt nna tinang a pyengdin lajang shachyi ma ai. Myit n su ai ni mahtang, ‘Anhte a pyengdin ni si mat wa ai majaw, nanhte a sau hta na nkau mi garan jaw mi,’ ngu nna hpaji rawng ai ni hpe hpyi mu ai. Hpaji rawng ai ni mahtang htan nna, ‘Anhte hte nanhte a matu n law nhten: dut ai ni kaw sa nna nanhte a matu mari la na grau mai nga ai,’ ngu mu ai. Shing rai myit n su ai mahkawn ni sau mari na sa wa ai laman e, la ningnan du sa wa ai. jin jin rai nga ai mahkawn manga hte gaw hkungran ai poi de shi hte rau shang lu ma ai rai nna, dai chyinghka hpe la kau manu ai.

“Dai hpang mahkawn kaga ni du wa nna, ‘Madu e! Madu e! Anhte hpe hpaw la mi!,’ ngu nna hpyi mu ai.  La ningnan wa mahtang htan nna, ‘Nanhte hpe ngai teng teng tsun made ga, ngai nanhte hpe n chye made ai,’” ngu mu ai.

Dai rai nna Yesu gaw, “Dai nhtoi hpe mung, dai ahkying hpe mung, nanhte n chye myit dai majaw amaja nga mu,” ngu nna tsun hpungdim wu ai.

Madu a Kabu Gara shiga rai nga ai.

2023: SAN PRA AI NI YAWNG MAYAWNG A POI SHANI NA MUNGGA

Madu Karai Kasang san seng chyoi pra ai zawn, san seng chyoi pra ai hku nga sa na lam, yawng hpe saw shaga ai. Hkristu hta yawng mayawng gaw langai sha tai nga nna shada matut mahkai nga ai, ngu ai lam hpe shadan dan na matu, San Pra ai ni yawng mayawng a poi hpe myit dum galaw ga ai re.  San pra ai masha n tai ai sha, kadai mi chyoi pra dik htum ai sumsing mungdan de n shang lu na rai nga ai. San seng chyoi pra ai lam hpe ndai dinghta ga na aprat hta nan gawgap nga sa ra ga ai. Sumsing Mungdan e du taw sai san pra ai masha ni yawng gaw, ndai dinghta ga e shut hpyit mara awu asin kap yu ai ni, ra kadawn gawng kya yu ai ni rai ma tim, hkam jan tawt lai wa ai ni rai ma ai. Masha a atsam hte sha kadai mi sumsing mungdan de du shang wa lu na n rai. Hpan da Madu a tsawra matsan dum myit, hkye hkrang la ai chyeju, ngu ai hpe hkam la shajang nna sha, Karai a mara raw dat ya ai chyeju hpe hkam la nna sha, Karai a mungdan de du lu na ga ai. Chyoi pra san seng ai, ngu ai shaloi, mai kaja ai baw yawng hpe ngu ai: dingman ai, myit malang ai, tsawra chye ai, matsan dum chye ai, nhpaw n-ya jaw chye ai, hku-hkau chye ai, sumnung ai, mara dat ya chye ai, dz. dz., manawn masham, n ju n dawng, masu magaw, n shawp n kap, dz. dz., n kaja ai baw ni n lawm, n kayau ai, yawng mai kaja ai, shada tsawra hku hkau, kahkyin gumdin ya lu ai….

Shut hpyit mara a ningpawt gaw tingkyeng akyu hpe myit ai kaw ru dun ai: tinang a ningmu maga, tinang a lu lawm lam, tinang a mai kaja lam ni hpe nhtung de tawn nna, kaga masha ni a ngamu nga-mai lam ni hpe gaw htingre maga de tawn kau ai; dai gaw, san seng chyoi pra ai lam hte tai shai mat wa ai; dai hpe shut hpyit mara, ngu ai rai nga ai. Mai kaja ai akyu jaw ai ni, shawang myit rawng ai lailen gawgap nga ra ga ai. Dinghpring chyoi pra ai aprat hpe gawgap lu ai lam-yan matsat hpe Madu Yesu sharin ya ai. Kaga makam masham yawng hte n bung ai hku sharin ya ai. Hkan shadik na matu yakhkak dik ai zawn nga ai ni lawm ai. Dinghta ga na hpaji ga, machye machyang hku, mungkan a ningmu hku yu yang, ding-nye hku she sawn ai hpe Madu a sharin shaga lam hta, “A lu mi ai” nga ai. Kabu Gara Shi-ga a lachyum hpe atsawm myit sumru yu nna hkan shatup ai rai yang, teng sha a lu ai ni tai nna Sanpra ai ni a hpawng hta shang lawm lu na rai nga ai.

Dinghpring chyoi pra wa lu ai lam a ninghpang gaw ndai re_ “Wenyi hta matsan mayan ai ni a lu ma ai”, nga ai mahtang rai ang ai. Tinang a myit masin wenyi a ninggun kya ai lam, hten loi za loi ai lam, shut hpyit mara lu ai hte kataw chye ai hpe dum ai, wenyi a akyu ara ni hpe hkam la mayu ai, kawsi hpang gara ai, Karai Kasang a matsan dum lama hpe kam hpa ai, shamyet shanat ai, Shing rai nna sha dinghpring ai kaw du lu na rai nga ai. Jahtum na hta tsun da ai gaw Yesu shi a majaw, Shi a matu mara asum hkam ai, hkamjan ai ai lam ni gaw kaman n tai ai, hkam la lu na shabrai kumhpa mung kaba la ai, nga nna shadum ya ai.

Myit sumru yu na lam:
·         Tinang mai kaja dum ai majaw, makam masham hkan shadik  nga ai majaw, tinang hkum hpe tinang hkrak sumsing mung dan de shang lu na n shut n shai myit la, hkam la ai kun?
·         Tinang a myit masin, nga-sa lailen ndai hku rai sai, kaga mi lai lu na lam n nga sai, ngu, myit daw myit hten ai aten ni nga ai  kun?
. Hpan lahkawng hta shut wa lu ai: galoi aten hta rai tim, Karai a matsan dum mara raw dat ya ai chyeju gaw madung re ai lam hpe myit dum ga ai kun? 

2023: SAN PRA AI NI YAWNG MAYAWNG A POI SHANI NA CHYUM LAIKA

SAN PRA AI NI YAWNG MAYAWNG A POI
November 5, 2023
CHYUM MUNGGA DAW 1

Shingran 7:2-4, 9-14

Ya hti na gaw, Shingran laika hta na rai nga ai.
 Jan praw maga de na pru lung wa nna, ahkrung nga ai Karai Kasang a dazik lang ai lamu kasa kaga hpe: ngai Yawhan mu nngai. Dai lamu kasa gaw, anhte a Karai Kasang a shangun ma ni hpe, kahtan e dazik garai n shakap yang, aga hpe mung, nammukdara hpe mung, hpun ni hpe mung hkum jahten kau mu, nga nna lamu ga hte nammukdara hpe jahten shabya na ahkang lu ai lamu kasa mali hpe, nsen kaba hte jahtau wu ai. Shaloi, dazik shakap hkam la ai ni hpe hti ai jahpan ngai na nngai: Israela kashu kasha ni a amyu yawng hta na, sen mi mun mali e hkying mali dazik shakap ai hkam la masai. Dai hpang, yu u, mungdan shagu hta na mung, baw lakung shagu hta na mung, amyu baw shagu hta na mung, ga amyu shaga ai hta na mung, kadai n dang hti lu ai, masha unawng kaba hpe ngai mu nngai. Ndai ni gaw hpraw ai hpun palawng bu hpun nna, tinang a lata hta namhtan hpun lakung lang let, Tingnyang a man e mung, Sagu Kasha a man e mung, tsap nga ma ai. Shanhte gaw, nsen kaba hte jahtau let, 
Tingnyang hta dung nga ai anhte a Karai Kasang hte Sagu Kasha gaw, Awng Dang nga u ga law, nga ma ai. Bai, lamu kasa yawng hte gaw dai Tingnyang hpe shinggrup let, salang ni hte dusat mali a grup yin e kawan tsap nga ma ai. Shaloi, shanhte gaw Tingnyang a man e dingnyawm dagup nna, Karai Kasang hpe nawku let, Amen. Shakawn kungdawn ai, hpung shingkang, hpaji byeng-ya, chyeju dum ya ai, arawng sadang, ahkang aya hte, n-gun atsam gaw, Karai Kasang kaw a nga nga u ga law. Amen, nga nna tsun ma ai. Shaloi, salang ni hta na langai mi gaw, Hpun palawng ahpraw bu hpun ai ndai ni gaw, kadai ni rai nga ma ta? Kanang na pru wa ma ta? nga nna ngai hpe hkap san nngai. Ngai gaw, Nye a Madu e, nang chye nga ndai, ngu nna shi hpe htan wu ai. Shaloi shi tsun ai gaw: Ndai ni gaw, zingri zingrat kaba hpe hkam sharing ngut nna, Tinang a hpun palawng hpe Sagu Kasha a asai hta hkrut jahpraw la ai ni rai nga ma ai. 
Karai Kasang a Mungga rai nga ai.

CHYUM MUNGGA DAW 2 

1 Yawhan 3:1-3

Ya hti na gaw, Yawhan shagun dat ai laika langai hta na rai nga ai.
Karai Kasang a kashu kasha ni anhte hpe ngu shamying mi ai majaw, Kawa gaw anhte hpe gade wa tsawra da mi hka! Shi a kashu kasha ni nan anhte rai nga ai. Dai rai nna, mungkan ga gaw shi hpe n chye wu ai majaw, anhte hpe mung n chye n hkap la ma ai. Tsawra ai ni e, Karai Kasang a kashu kasha ni, anhte ya e rai nga ga ai; hpang e anhte hpa tai na, garai n shadan dan nga ai. Dai hpe shadan dan ai shaloi, anhte Shi hte maren bung na ga ai lam hpe anhte chye nga ga ai; hpa majaw nga yang, Karai Kasang shi hkum nan nga nga ai hte maren, anhte shi hpe mu lu na ga ai. Ndai lam hpe myit mada ai masha yawng hte gaw, Hkristu Madu chyoi pra nga ai hte maren, tinang a hkum hpe shachyoi shapra ya ra ai.
Karai Kasang a Mungga rai nga ai.

KABU GARA SHIGA

Mahte 5:1-12

Ya hti na gaw, Mahte a laika hta na Kabu Gara Shiga rai nga ai.
Yesu gaw masha unawng uwa hpe mu jang, bum ntsa de lung wa ai; dai yang e shi dung nga yang, shi sape ni shi a makau de sit sa wa ma ai. Shaloi Yesu shanhte hpe sharin shaga let, tsun wu ai gaw: Myit masin hta matsan mayan ai ni gaw, ngwi pyaw nga ma ai; lamu mungdan gaw shanhte a mungdan rai nga malu ai. Myit sumnung ai ni gaw ngwi pyaw nga ma ai; shanhte mungkan ga hpe madu lu na mara ai. Yawn hkyen hkrum ai ni gaw ngwi pyaw nga ma ai; shanhte shalan shabran ai hkrum na mara ai. Dinghpring ai hte krawsi hpang gara ai ni gaw ngwi pyaw nga ma ai; shanhte gaw hkru kat wa na mara ai. 
Matsan dum chye ai ni gaw ngwi pyaw nga ma ai; shanhte matsan dum la ai hkrum na mara ai. Myit san seng ai ni gaw ngwi pyaw nga ma ai; shanhte gaw Karai Kasang hpe mu lu na mara ai. Ngwi pyaw sim sa ai hpe shabyin ai ni gaw ngwi pyaw nga ma ai; shanhte hpe Karai a kasha ni ngu shamying na mara ai. Dingman ai lam a majaw, zingri zingrat hkrum ai ni gaw ngwi pyaw nga ma ai; lamu mungdan gaw shanhte a mungdan rai nga malu ai. Nye a amying majaw masha ni nanhte hpe asawng zingri zingrat di ai hte, n teng n man ai hku mara amyu myu shagun da ai shaloi, nanhte ngwi pyaw nga myit dai: lamu mungdan hta e nanhte a shabrai kumhpa kaba nga malit dai majaw, kabu gara nna, ngwi pyaw nga mu.
Madu a Kabu Gara shiga rai nga ai.

2023: PRANWAN LADAW (30) LABAN SHANI NA MUNGGA

“Na htingbu wa hpe na hkum hte maren tsaw ra lu na ndai”. Tara upade/ tara gaihpan ni gaw ra ai majaw, jahkrat da kum da ai re; tara masat da ai lam n nga ai rai yang, teng sha, shinggyim masha uhpung uhpawng ni hta manghkang grai law ai baw rai nga ai. Tara matsun ni gaw hpa hpa yaw shada ai lam ni nga ai, ngu nna mahtai kaja jaw lu ra ai; lachyum pru ra ai. Tara upade/ tara matsun/ tara nhpan ni hpe gara hku chye na lachyum htai ai baw rai ta? Tsawra myit hta gindai jun nna gawde da ai, hkan shatup woi ai n rai yang, hpa kaning re ai tara mung lachyum n pru na re.

Ga-shaka Dingsa prat, Madu Yesu a prat hta Moshe a tara matsun ni law la ai; laika n chye ai ni a matu mung, matsan masha ni a matu mung, tup hkra hkan nang na n mai byin ai. Hkum pat ai tara hte matsun ai tara ni (613) nga ai da. Ga-shadawn, Laban nhtoi hta lagaw lahkam kade hta jan nna n mai htawt hkawm ai, shat-mai lap ni n mai di ai, shat shadu sha n mai ai (muk kabaw n mai ai hpe ngu ai), dusat yam-nga ni hpe n mai shaprang ai, nga ai baw ni… Masha langai machyi si wa nga tim, Laban nhtoi ang jang tsi sara hpang woi sa n mai ai; tsi sara mung machyi masha nga ai de masat da ai lagaw lahkam hta jan nna n mai hkawm sa ai. Dai zawn re ai tara ni gaw akyu nga ai baw rai kun? Masha hpe zingri ai, grau nna, matsan masha ni hpe zingri ai tara, gyit hkang ai tara mahtang n tai wa ai kun? Moshe a Tara gaw Karai Kasang kaw madi ai rai nga ai; rai jang, Karai Kasang hpe grai n mahta ai, grai sharu ai, ngu na kun?

Pru Mat ai Laika hta Karai Kasang gaw tsawra matsan dum myit hte hpring ai Wa, rap-ra tara a ningpawt, masha shada tsawra matsan dum chye na matu sharin ya ai Karai Kasang re ai lam, tsun da ai. Moshe Tara hpe shakying shakang na matu, Karai a tara matsun ni hpe masha ni hkan shadik na matu, prat hte prat, ban hte ban, makam masham sara ni gaw lachyum htai htawn jat, tara matsun ni hpe shalaw jat pau jat di ma ai. Moshe a tara/ Karai Kasang jaw ai Tara gaw, dinghpring chyoi pra ai, matsan dum mara raw ya ai Karai Kasang zawn, shinggyim masha shada, tsawra matsan dum chye na lam, n tara ai amu ni hpe koi yen kau lu na lam, mara dat ya hkyamsa jaw ya chye na matu, ndai lam ni hpe sharin ya ai lam she re. Mahte a Laika kaw na tara agyi langai gaw kaja wa n chye nna san ai rai sam ai: “Tara ni hta ahkyak dik reng grau dik htum ai gaw gara mahtang rai ta?”, nga, Yesu hpe san ai (tara matsun yawng 600 jan ai). Yesu htan tsun ai gaw langai ngu na hta, “Na myit masin, machye machyang, atsam marai tup hkra hte Karai Kasang hpe tsawra lu na”, lahkawng ngu na hta, “Na htingbu wa hpe na hkum hte maren tsawra lu na’”, ngu, htan ya ai. Mungdan asuya a tara upade ni hkan ai lam hta, mara jaw kătut na hpe sha hkrit ai majaw tara hkan ai kun? Rim katut na tsang shara n nga jang tara tawt lai na kun? Nanghpam tsi mawan amyu myu hkai ai, dut ai, shalai ai amu… mungchying sha ni hpe, mungdan hpe jahten sharun ai, ngu, lachyum chye nna koi gam ai rai kun? Mayun lagyim nna hkai ai, dut ai ni law law nga ma ai. Mungchying sha ni a rawt jat lam hte shimlum lam hpe jahten ai, matsan ai amyu tai mat sa ga ai.

Hkanse n bang jang dam katut na, bungli galaw n mai na hkrit ai majaw sha hkanse bang ai kun? Shing n rai, hkanse bang ai a marang e asuya gaw shawa akyu hpe dam lada ai hku galaw ya lu ai, ngu ai hpe chye na ai majaw hkanse bang ya ai kun? Cycle baw-gup n gup ai jawn hkawm ai mu jang dam katut na hpe hkrit ai majaw baw-gup gup ai kun, shing n rai, motor PK n mu tim accident koi ai, asak hpe maga shalawt dat na matu baw-gup gup ai kun? Tsa chyaru lu da nna motor/cycle n gawt hkawm mai ai, ngu ai shaloi, rim katut na tsang ai majaw tara hkan ai kun, shing n rai, kaga masha ni a asak hpe manu shadan ai myit masin hte tsa chyaru lu da nna cycle n gawt hkawm ai rai kun?
 Tara a yaw shada ai lam hte tai shai dik ai shara langai gaw TARA RUNG nan re ai hpe chye lu ga ai. Tara upade/tara mahkrun hpe manai makai di lachyum htai ai majaw, dingman ai masha law law htawng hkrat mat ai, ja gumhpraw sutgan tat shamat kau ma ai; shut ai wa/mara lu ai wa mahtang gumhpraw hte, masu magaw nna tara mahkrun hku shadang la ai ni law law nga ma ai. Karai Kasang hpe teng sha mahtai jaw ra na ma ai.

Myit sumru yu na lam:
• Kanu kawa tai ai ni, sara sarama tai ai ni, uphkang du salang ni, “Tara gaw  tara re” ngu, lai lai tara shaja nna masa n bung hkat ai ai ma ni, mungchying sha ni a yakhkak ai lam, aten, shara, masha, masa n ginhka ai hku jeyang kau kau ga ai kun?
• Tara tawt lai ai masha shagu hpe maren mara re ai hku jeyang kau ga ai kun?
• Tinang makam masham tara hkan shatup ai lam gaw tsawra matsan dum myit hpe shalaw jahtam ya ai kun? Shada hku hkau kanawn mazum ai lam hpe madi shadaw ya ai lam tai ai kun?

2023: PRANWAN LADAW (30) LABAN SHANI NA CHYUM LAIKA

PRAN WAN LADAW HTA LABAN 30
October 29, 2023
CHYUM MUNGGA DAW 1

Pru mat wa ai Laika 22:20-26

Ya hti na gaw Pru mat wa ai Laika hta na rai nga ai.
 Karai Kasang hta kaga hpara shaje a man e hkungga jau ai wa gaw, atsai awai hpya kau ai hkrum lu na rai nga ai. Tsasam manam hpe hkum shatsang zingri myit. Nanhte mung Egutu mung e, tsasam tai yu manit dai hpe dum mu. Gaida jan hte jahkrai nmai ni hpe sharu shatsang hkum rai myit. Lama rai jang, shanhte garum hpyi jahtau yang, ngai Madu htan ya na mawe ai. Ngai pawt nna nanhte hpe majan hta sum mat shangun na made ai. Nanhte a madu jan ni gaida da mat nna kasha ni jahkrai byin mat na mara ai. Nang hte rau nga ai nye amyu matsan mayan wa hpe, gumhpraw hkoi ya yang, gumhpraw hkoi sha ai wa zawn hkum rai et! Amyat hkum hpyi u. Na a htingbu wa nang kaw hpa jawng sa tang da yang, jan garai ndu yang bai ya kau u. Shi hkum shalum hpun na dai sha nga na lu ai. Shi hpe ngai matsan dum ai. Shi garum hpyi jahtau yang ngai madat ya na sha rai nga ai.
Karai Kasang a Mungga rai nga ai.

CHYUM MUNGGA DAW 2

1 Htesaloni 1:5-10

Ya hti na gaw Htesaloni ni kaw shagun dat ai laika langai hta na rai nga ai.
Nanhte rau nga ai shaloi anhte mu na myit dai. Anhte gara hku nga dan ai. Nanhte a akyu tai na matu rai nga ai. Madu hpe kasi la mu. Anhte hpe kasi la mi. Nanhte nni nkri law law hkrum tim, Chyoi Pra ai Wenyi kaw na kabu gara hte dai mungga hpe hkap la mu. Makedonia hte Akaia mung n kam sham ai ni nlang a matu kasi kamang tai wa na myit dai. Madu a mungga sha Makedonia hte Akaia mung ting hkan nanhte kaw nna pru wa sai n rai. Karai Kasang hta nanhte a makam masham a lam mung shara shagu bra chyam du wa sai. Kaga mi anhte tsun shara n nga ai. 
 Shanhte nlang mung anhte hpe nanhte kaw du sa yang gara hku hkap la ai. Nat kabai kau nna Karai Kasang hpang de kayin shang wa ai. Shingrai, tengman ahkrung nga ai Karai Kasang hpe nawku daw jau ai. Lamu na bai du sa na Kasha hpe nanhte ala nga ai. Dai shi a Kasha Yesu gaw, si ai kaw na shi jahkrung sharawt la ai, du na ra ai Karai Kasang pawt sindawng ai kaw na anhte hpe hkye la ai wa rai nga ai, nga nna hkai tsun ma ai.
Karai Kasang a Mungga rai nga ai.

KABU GARA SHIGA

Mahte 22:34-40

Ya hti na gaw Mahte a laika hta na Kabu Gara Shiga rai nga ai.
Saduke ni hte Hparishe ni jawm dung nna, tara sara langai mi Yesu hpe ga san hte hkam na myit let san wu ai gaw, Sara e, jep ai tara grau kaba ai hkang da ai ga gaw gara mahtang rai ai kun? ngu wu ai. Yesu htan nna, Madu na Karai Kasang hpe na myit kraw lawang mahkra hte, na a myit masin mahkra hte tsawra lu na ndai, nga ai gaw grau kaba ai hte shawng na ga mung rai nga ai. Hpang na gaw, dai hte bung nna, Na htingbu wa hpe na a hkum hte maren tsawra lu na ndai, nga nna rawng nga ai. Ndai hkang da ai ga lahkawng gaw, jep ai tara mahkra hte, myihtoi ni a ga madung rai nga ai, ngu wu ai.
Madu a Kabu Gara shiga rai nga ai.

2023: PRANWAN LADAW (29) LABAN SHANI NA MUNGGA

Cyrus (Sairas, ngu hti ai) gaw, Babylon e bawng dung ai Israel amyu sha ni hpe shălawt dat ai hte, Israel amyu sha ni Palestine de bai htang wa lu ma ai. Madu Yesu a prat hta mung, Karai Kasang gaw Roma empire (Roman ni uphkang ai mungkan) hpe akyu jăshawn lang ai. Cyrus mung, Roman hkawhkam daju ni mung, shanhte n dum ai hku, Karai Kasang gaw shanhte hpe akyu jăshawn nna mungkan labau, Nawku Hpung a labau hpe laklai ai hku hkrang shalat gyin shapraw na shăngun lang ai. “Karai Kasang gaw mungkan labau a Madu nan re” ngu ai gaw mungga madung rai nga ai.

Anhte a prat, anhte a ban, anhte a grup-yin e byin nga ai n hkru n hkra, hkrit-hpa tsang-hpa amyu myu hpe hkam sha jin wa jang, Karai Kasang gaw mu nga ai kun, hpa sha galaw nga ai kun, ngu nna ung ang chye ga ai. Shinggyim masha labau hta mungkan majan, ngu nna pyi lahkawng lang byin lai wa nna, ya mung no. 3, ngu na mungkan majan byin maw maw re ai kade lang she rai a hka! Anhte Hkristan ni a matu, kaning re ai aten hta rai tim myit daw myit hten ai lam n mai nga ai; galoi mung myit mada ai lam madun dan ra ga ai. Htenza nga ai, n hkru ai mungkan hta tsawra tara, rapra tara, dingman ai lam, chyoi pra ai lailen ni hpe hkan shătup let, mai kaja ai sakse ni tai na matu, anhte gaw hkring san da hkrum sa ga ai. Karai Kasang gawn reng ai lam n nga yang, mugkan gaw dai ni du hkra n grin nga lu na re ai hpe myit dum mai ga ai.

Ndai dinghta ga e makam masham lu ai ni a matu, mungdan lahkawng a mung masha ni rai ma ai: dinghta ga na mungdan asuya a renghkang ai npu e taw nga ga ai zawn, lahta tsang, sumsing mungdan hte seng ai uphkang tara npu e mung taw nga ga ai. Mungdan asuya mung, mungdan masha ni a nga-mu ngamai lam, shimlum lam hpe gawn hkang ai, gaw sharawt ai hte maren, lahta tsang na (myit masin wenyi hpe up ai) tara matsun ni mung, maren re ai yaw shada lam sha re. Rai ti mung, kalang lang dai tara lahkawng gaw kahprai shai tai shai hkat wa lu ai. Shing re ai aten hta, myi hte mu lu ai nhtu sinat hpe grau hkrit ra ai baw kun? Myi hte n mu lu ai Karai a jeyang ai hpe grau hkrit ra ai baw kun? Mungdan tara hpe n madat ya, n hkan galaw ai rai yang ari dam katu sha lu ai, htawng hkrat lu ai, sat kau hkrum ai du hkra byin wa lu ai.

Asuya tara upade hte tara matsun kau mi, Karai a tara masa hte tai shai hkat ai lam ni teng sha nga ai_ democracy (shawa ra, masha ahkaw ahkang hpyau ai)/ Communit-Socialit (Uphkang ai du ni a ahkaw ahkang nau hpyau ai), masa lahkawng yan hta Karai a tara hte nhtan shai ai lam ni nga ai. Dai zawn tai shai ai aten hta Karai a tara masa hpe mahtang madat ra ga ai. Shing re ai majaw htawng sharawng hkrum ai, zingri hkrum ai, sat kau hkrum ai ni law law nga ma ai. Nawku dawjau, makam masham amu n hkan mai hkra gyit hkang da ai mungdan a tara upade ni law law nga ai zawn, pyaw-daw kadaw ai, masha ra, shawa ra hpe hkrai ninggun jaw nna akyang lailen hten za shangun ai tara masa ni mung nga ai. Ga shadawn, nse nsa ai amu hpe makawp maga ya ai awmdawm ahkaw ahkang, ma shaprai mai ai ahkaw ahkang, dz., dz. Tsawra myit a majaw, Karai a tara masa hpe madat ai, makawp maga ai majaw, dingman ai maga, tara ai maga tsap lawm ai majaw, asak jaw ap nawng lai wa ai tara sakse ni law law nga ma ai.

Myit sumru yu na lam:
• Shawa e tsun ai, hkap la ai hte tinang a kraw hta gaw n jaw ai, n hkap la mai ai, ngu ai aten ni hta tinang gara hpe mahtang  lata la la re ai kun?
• N jaw ai, n hkap la mai ai, ngu dum tim shawa hpe hkrit agam ai majaw, shawa maga kap nang mat ai kun?  Tinang jaw dum ai hpe sha lata la la re ai kun?