2023: MARIA KARAI A KANU POI SHANI NA MUNGGA

Moshe gaw Arun hte kasha ni hpe, “Nanhte shăman ga tsun yang ning ngu mu: Madu gaw nanhte hpe shăman măkawp măga ya u ga; Madu gaw nanhte hpe shi a myi-man ninghtoi jahtoi ya u ga, shi a matsan dum lăma nanhte hpe mădun ya u ga” nga ai. Karai a myi-man ninghtoi gaw Hkristu Yesu hku nna mungkan masha ni hpe jahtoi ya ai. Matsan mayan re ai masha ni mung, kabu mai ai shi-ga hpe lamu Kasa ni e shana ya ai hpe na la lu ma ai. Maria mung, shi hta byin ai lam yawng hpe shi a kraw hta htun bang da nna sawn sumru yu wu ai.

Kasa ni yawng hta Andrew gaw Nu Maria hpe tsawra kamhpa grau ai wa re, nga, moi moi na labau hta rawng ai. Shi si mat ai aten hta sumsing mungdan e Nu Maria hpe shawng sa hkrum na myit ai. Chyinghka sin ai Petru hpe Nu Maria gara yang e nga nga ai lam san ai; Petru htan ai, “N mu ai na sai; she hkan tam yu u” ngu dat ai. Shi hkan tam hkawm tim n mu ai. Kasha Yesu hpe san yang lu na re, ngu nna Yesu hpe sa san ai. Shaloi Yesu htan ai, “Shi sumsing mungdan e nau n nga ai; dinghta ga de yu sa sa rai nna shinggyim masha ni hpe hkan garum hkawm nga ai” ngu htan ya ai da. Kaga maumwi langai hta mung, Karai Kasang a mungdan hte n gingdan ai ni hpe Petru gaw hpa majaw jashawn bang bang re ai kun, ngu yang, Yesu a kanu hkum nan shang shangun dat dat re ai majaw n lu shingdang ai, ngu,htan ya ai da. Mabyin lahkawng yan, Yesu a kanu Maria shinggyim masha ni a matu gade galaw ya lu ai, ngu ai makam, kamhpa ging ai lam hpe tsun dan ai. Rai tim, Nawku Hpung gaw dai zawn re ai mabyin hta mahta nna kam ra ai lam ni hpe ndau shana sharin shaga ai n rai. 

Maria hpe “Karai a Kanu”, ngu ai amying shingteng jaw ai lam gaw n chye ai ni a matu kăjawng hpa tai na re. Myi hte n mu mai ai Karai hte Shi a tsawra myit hpe Yesu hta madun dan ai. Yesu gaw Karai majing re ai hte masha majing mung rai nga ai; dai atai lahkawng gaw marai mi hta sha, sung dik ai hku galung nga ai. Yesu hpe dai atai lahkawng găran ginhka kau n mai ai. Dai majaw, Yesu hpe shangai chyinghkai ai kanu hpe Karai a Kanu, ngu nna shamying lu ai lam rai nga ai. Galati laika hta Pawlu tsun ai, ahkying ladaw gu jang, Karai a Kasha hpe num shayi kaw na shangai chyinghkai shangun ai, dai Karai a Kasha gaw shinggyim masha a htung tara npu e taw hkam la ai, nga ai. Shing re ai mabyin a majaw, Yesu hta, kamsham ai ni yawng hpe Karai Kasang gaw shi hta la ai kasha ni shatai la ai, nga ai. Wenyi mahkrun hta teng sha, Yesu a hkum hkrang re ai Nawku Hpung masha ni yawng mung, Chyoi Pra ai Maria hpe kanu, ngu tara shang shaga lu ga ai re. 

Karai a Kanu, ngu ai amying shingteng lu tim, dinghta ga e nga lai wa ai prat hta shut hpyit mara hta lai nna kaga shinggyim masha ni zawn sha, tsin-yam amyu myu, kawsi hpang gara, ra kadawn ai amyu myu, kabu ai, yawn ai, yawng hpe hkam sha lai wa nu ai re. Luka a laika hta tsun da ai hte maren, Nu Maria gaw shi hta byin wa ai lam ni hpe n chye na ai rai tim, “Na mayam jan ngai rai nngai, Nang Madu myit ra ai lam ni ngai hta byin wa u ga”, ngu, htan ya ai. Karai a myit ra ai hte masing hpe Kasha Yesu wudang ntsa e jen noi si hkam ai shaloi sha hkrak chye lu ai. Wudang lagaw nhpang e, Kasha e nan, kamsham ai ni yawng a kanu tai ya na lam lit ap ya ai. Ndai zawn, mau-hpa, Karai a tsawra myit, hkye hkrang la ai masing hta Karai a Kanu hpe shăngun lang ai. Yesu a sape ni yawng, teng sha Yesu a Kanu hpe kamsham shămyet shănat mai ai lam, shi a akyu hpyi htinglu ya ai amu hpe kamhpa mai ai lam, Nawku Hpung e sharin ya ai. Karai Kasang hpe chyeju dum shakawn ging ai nhtoi rai nga ai. Mungkan simsa lam a matu, tinang a mungdan mungdaw, buga, ngwi pyaw simsa wa lu na matu laksan akyu hpyi ai nhtoi re ai lam, Nawku Hpung e masat da ya ai.

2023: MARIA KARAI A KANU POI SHANI NA CHYUM LAIKA

CHYOI PRA AI MARIA KARAI A KANU A POI
JANUARY 1, 2023
CHYUM MUNGGA DAW 1

Bu hkawm 6:22-27

Ya hti na gaw Bu Hkawm laika hta na rai nga ai.
Mawshe hpe Madu tsun wu ai gaw: Arun hte  shi a shadang sha ni hpe ning ngu tsun u: Israela a kashu kasha ni hpe ning ngu shaman ya mu: Madu nang hpe shaman ya nna, bau sin nga u ga. Madu nang hpe shi a myiman a nhtoi jahtoi ya nna, matsan dum nga u ga. Madu nang hpe mada yu nna, ngwi pyaw sim sa ai hpe jaw jau ya uga law, ngu na rai myit dai. Shingrai shanhte gaw, Israela a kashu kasha ni a ntsa e, nye a mying ningsang hpe gang shaga la nna, ngai shanhte hpe shaman chyeju jaw na we ai.
Karai Kasang a Mungga rai nga ai.

CHYUM MUNGGA DAW 2

Galati 4:4-7

Ya hti na gaw Galati masha ni hpang de San Pawlu shagun dat ai laika hta na rai nga ai.
Hpu nau ni e, aten ladaw gu jang, jep ai tara n-pu e nga ai ni hpe hkye hkrang shaw la na hte, kasha shatai na chyeju anhte hkam la lu na matu, numsha kaw na shangai ai hte, dai tara dingsa n-pu e prat wa ai, shi a Kasha hpe nan, Karai Kasang anhte hpang de shangun dat wu ai. Ya anhte gaw, kashu kasha rai nga myit dai majaw, Karai Kasang a Kasha a Wenyi hpe anhte a myit masin de shangun dat nna, dai Wenyi mahtang gaw, Abba, Wa e, nga nna nanhte hta jahtau nga ai. Dai rai nna, nang gaw mayam naw rai nga ndai n rai, kasha nan rai nga nit dai; kasha nan rai nga yang gaw, Karai Kasang a marang e Sali wunli hkam la ang ai wa mung rai nga ndai.
Karai Kasang a Mungga rai nga ai.

KABU GARA SHIGA

Luka 2:16-21

Ya hti na gaw luka a laika hta na Kabu Gara Shiga rai nga ai.
Lamu kasa ni wa mat ai hpang,sagu rem ni Betlehem mare du hkra sa nna, Maria yan Yosep hpe mung, dumsu wakang hta kaleng taw nga ai ma chyangai hpe mung mu ma ai. Shi hpe mu yang, dai ma a lam shanhte hpe shana dan sai hte maren, shanhte tsun kajai dat ma ai. Na la lu ai ni yawng hte mung, sagu rem ai ni shanhte hpe tsun dan ai ga a majaw mau nga ma ai. Maria chyawm gaw dai ga mahkra matsing la nna, shi a myit hta e sumru yu nga ai. Sagu rem ai ni mung shanhte hpe tsun dan sai hte maren, na la lu ai hte mu la lu ai lam mahkra a majaw, Karai Kasang hpe shakawn kungdawn, shagrau sha-a let bai wa ma ai. Dai ma kaji hpe ashan kadoi na matu matsat ya nhtoi du jang, kanu a hkritung e garai n rawng yang, lamu kasa shamying ya mu ai.
Madu a Kabu Gara Shiga rai nga ai.

2022: HKRISMAT POI SHANI NA MUNGGA

Masha a myi hte n mu mai ai, jum hkra n mai ai, tsun shăga ai ga hpe na hte chyaw madat la na n mai byin ai KARAI KASANG gaw, masha a hkum shan dăgraw la nna, shinggyim masha ni a lăpran sa pra sai lam, dai mungsung hpe myit dum galaw ga ai. Mungkan a jahtum na amyu masha ni du hkra, Karai a hkye hkrang la ai amu hpe mu lu na ma ai, nga, Isaiah tsun ai. Lai sai ăprat ăban ni hta Karai Kasang gaw, lam amyu my hku, Shi tsun dan mayu ai ga hpe myihtoi ni a n-gup hku htawn tsun lai wa tim, ya, hpang jahtum e, Shi a Kasha hku nna tsun shaga ai. Myit hku pyi n hkawn lu ai Karai Kasang gaw, Madu Yesu hta, myi hte mu lu ai Karai Kasang tai wa sai lam, Chyum Mungga masum hte madi madun ai. 

Isaiah gaw Babylon, maigan mung de gawt kau hkrum ai Karai a amyu masha hpe Karai Kasang e matsan dum lama madun dan sai lam, “Na Karai, na hkawhkam du ra ai, kabu gara u” nga, Yerusalem hpe tsun ai. Shinggyim amyu masha yawng, ningpawt shut hpyit mara a majaw, Edin Sun kaw na gawt kau hkrum ai; Adam yan Ewa a amyu matu ni mung, Yesu shangai wa ai hta sumsing mungdan chyinghka bai hpaw ya sai. Mau hpa hku nna Karai Kasang gaw shi a hkye hkrang la ai amu hpe madun dan nu ai majaw, kabu awlaw chyeju shakawn na lam Hkrismat poi shani e shadum ya ai. Hebre laika e tsun da ai hta, hkum shan dagraw la ai dai Kasha gaw, kuptsup ai hku nna Karai Kasang a asam hpe shădan dan ai, nga ai. Hpang e law law lang Yesu tsun ai, shi hpe mu ai wa gaw Kawa hpe mu ai, hpa majaw nga yang Shi hte Kawa Karai langai sha re ai, nga ai. Mungkan shara law law hta, Yesu hpe n kam ai mungdan buga hkan e pyi, Hkrismat poi hte poi ladaw hta mare buga/ nta htingnu ni hpe myihprap wan-pu amyu myu hte mawn sumli htoi tu kabrim shangun ma ai. Hkrismat hpe myit dum ai masat arung arai amyu myu galaw shapraw dut sha ma ai (grau nna Miwa mungdan). Hkristmat kumhpa jaw hkat, daw-sha poi ni galaw, shăngwi shăpyaw amyu myu hte Hkrismat shang lawm ma ai. 

Myit masin kraw lawang hta kamsham myit n rawng ai sha galaw mat wa ai amu ni gaw hpa akyu lu la na rai ta? Masha shada hkap bawp hkung ga hkat lu ai akyu ni sha lu la na rai nga ai. Kamsham ai ni a matu sha, hkye hkrang la ai chyeju hpe hkam la lu na rai nga ai. Yesu rai n du shi ai aten na mungkan gaw ningsin hta nga nga ai lam, Yawhan gaw kahtap kahtap nna tsun dan ai. Ninghtoi majing, asak majing hpe mu lu sa ga ai, nga ai. Kamsham ai ni gaw, asai ashan hku n rai, masha a myit maw ai hku mung n rai, Karai a atsam hte dai Hkristu hpe kamsham hkap la ai ni, Karai a kasha ni tai wa lu ma ai, nga ai. 

Shinggyim masha wa Karai a kasha tai lu ai, ngu ai gaw masha a myit hte n hkawn lu ai lam n rai a hka! Shinggyim amyu masha a lapran e sa nga ai, masha tai wa ai Karai a Mungga gaw Kawa Karai a tsawra myit hpe shadan dan ai wa re, nga ai. Sumsing sutgan/shaman chyeju yawng, tup hkra, hpring hkra, dai Hkristu Yesu hku nna jaw ya na lam hpe mung Yawhan gaw sakse hkam da ai. Hkrismat nhtoi hte Hkrismat ladaw laman, gumhpraw ma hkam, aten ma hkam nna galaw mat wa ai lamang ni, lahpawt lama n tai mat ai sha, Karai e jaw ya mayu ai chyeju kumhpa ni hpe tup hkra, hpring hkra hkam la lu na lam shakut shaja mai ga ai. Karai e shabyin ai amu re ai majaw, kabu awlaw let Karai Kasang hpe ja ja chyeju dum shakawn ra ga ai.

2022: HKRISMAT POI SHANI NA CHYUM LAIKA

HKRISMAT POI 
December 25, 2022
CHYUM MUNGGA DAW  1

Esaia 52:7-10

Ya hti na gaw myihtoi Esaia a laika hta na rai nga ai.
Kabu gara ai shiga gun nna, ngwi pyaw ai lam shana ai wa a lagaw, gade tsawm htap nga a hka! Kaja ai shiga kajai gumhkawng ai hte, hkye hkrang la ai lam shana ya let, na a Karai Kasang up nga ai, nga nna Ziun hpe tsun shana ai wa a lagaw gaw, bum lang ntsa e gade tsawm htap nga a hka!  Na a sin langa ni a nsen madat: shanhte nsen sharawt nna, kabu gara ai hte rau garu ma ai: kaning rain me law, Madu gaw Zium mare de nhtang wa ai hpe, tinang nan myi chyaw mu lu na ma ai. Yerusalem mare na katsi katsang shara ni e, mahkawn mangai let rau garu mu: Madu gaw shi a amyu hpe shalan shabran ai hte, Yerusalem mare hpe hkye mawai la wu ai. Madu gaw, masha amyu baw ni mahkra a man e shi a chyoi pra ai lahpum shadawn dan nna, anhte a Karai Kasang a hkye hkrang la ai lam gaw, lamu ga htum hkra dan leng wa sai.
Karai Kasang a Mungga rai nga ai.

CHYUM MUNGGA DAW 2

Hebre  1:1-6

Ya hti na gaw Hebre masha ni hpe shagun dat ai laika hta na rai nga ai.
Hpu nau ni e, Karai Kasang gaw moi na lakhtak e, prat mi hte prat mi lam amyu myu hku nna, myihtoi ni a n-gup hte ji wa ni hpe ga tsun da nu ai. Ndai hpang jahtum na aten ladaw hta shi a Kasha a n-gup hte anhte hpe ga matsun jaw da mani ai. Dai kasha hpe, Sali wunli mahkra la na matu, Karai Kasang san da sai rai nna, shi a marang e ndai mungkan ga hpe hpan tawn da nu ai. Dai kasha gaw Karai Kasang a hpung shingkang tu kabrim ai ahtoi rai nga ai hte, Karai a atai a hkrang sumla rai nga nna, shi hkang da ai mungga a atsam hte, shi yawng mayawng hte hpe bau sin nga ai. Ya, shut hpyit mara shatsai kau ya nna, matsaw ningtsang na daru magam a hkra maga de shi dung nga nna, lamu kasa ni hta shi grau reng ai amying hkam la sai hte maren, shanhte hta grau reng ai wa tai nga ai. Kaning rai nme law, “Ngai sha Nang rai nga ndai; dai ni e ngai nang hpe shaprat sa de ai.” Bai nna, “Ngai gaw shi a Kawa tai nna,shi gaw Ngai sha rai na ra ai,”Nga nna Karai Kasang tsun ai ga hpe, gara lamu kasa hpe shi tsun yu a ta? Dai hta kaga, shi a Kasha alat hpe mungkan ga de jashawn dat ai shaloi, Karai Kasang a lamu Kasa ni yawng shi hpe nawku mu ga, nga nna tsun wu ai.
Karai Kasang a Mungga rai nga ai.

KABU GARA SHIGA

Yawhan 1:1-5, 9-14

Ya hti na gaw Yawhan a laika hta na Kabu Gara Shiga rai nga ai.
Shawng npawt e Mungga nga nga ai; dai Madu gaw Karai Kasang hte rau nga nga nna, dai Mungga nan Karai Kasang rai nga ai. Dai Mungga gaw shawng npawt e Karai Kasang hte rau nga nga ai. Arai yawng mayawng hte gaw shi a marang e tai wa ai rai nna, shi n galaw lawm ai gaw langai mi pyi n nga ai. Shi hta e asak daju rawng nga ai rai nna, dai asak gaw masha ni a nhtoi rai nga ai. Dai nhtoi gaw nsin hta htoi nga nna, nsin mahtang dai hpe n dang kau lu ai. Mungkan ga e shangai wa ai masha yawng hte hpe jahtoi ya ai nhtoi nga nga sai: shi gaw nhtoi majing rai nga ai. Shi gaw mungkan ga e nga nga ai hte, mungkan ga mung shi a marang e tai wa sai; rai timung mungkan ga gaw shi hpe n chye wu ai. Shi gaw shi a buga de du sa timung, shi a baw sang ni shi hpe n hkap la ma ai. Shi a amying ningsang hpe kam sham nna, shi hpe hkap la ai ni yawng hte hpe chyawm gaw, asai hte shaprat ai ni n rai, hkum shan a myit hte mung n rai, Karai Kasang e shaprat ai ni she rai nga ma ai. Mungga gaw masha tai wa nna, anhte hte rau nga nga sai. Dai rai nna, Kawa hta na prat wa ai Kasha shingtai a hpung shingkang zawn, shi a hpung shingkang hpe anhte mu lu saga ai. 
Madu a Kabu Gara Shiga rai nga ai. 

2022: DU SA LADAW LABAN (4) NA MUNGGA

Myihtoi Isaiah gaw Hkawhkam Ahaz hpe tsun ai, “Shayi hkawn-zin gaw shadang sha shăngai na ra ai” nga ai. Ahaz gaw kamsham myit n rawng ai. Lamu Kasa gaw hkawn- zin Maria hte hkungran na mahtan da ai Yosep hpe yupmang hta tsun ai, hkawn-zin Maria shadang sha gun da ai gaw Chyoi Pra Wenyi a atsam hte re ai lam, shi hpe hkungran la na hkum hkrit et, nga ai. Yosep gaw kam ya ai. Dai shăngai wa na ma a mying gaw Yesu rai nna, “Karai Kasang-anhte-hte-nga-nga-ai” ngu ai lachyum re. Myit mada shara n nga ai aten hta, n byin mai sai, ngu ai aten hta Karai Kasang gaw Shi a atsam hpe madun ai, shinggyim masha hpang de sit sa nna, “Karai Kasang-anhte-hte-nga-nga-ai” Karai Kasang re ai lam hpe madun dan ai. 

B.C 700 jan hta Yuda mung hpe up ai Hkawhkam Ahaz gaw, sinpraw maga na htim shang wa ai Assyria hpyen hpung hpe tai htang mănga kau na atsam n nga ai, asum jaw kau na myit nga ai aten hta, Karai Kasang shi hpe lamik kumla jaw ai. Shi n kam ya ai. Kaja wa mung labau hta Yuda mungdan tsep kawp hpya run kau hkrum ai. Rai tim, Karai Kasang gaw shi a ga-sadi hpe n hprai kau ai. Prat shăgu hta, Karai Kasang Shi jaw ai ga-sadi gaw teng wa ai. Dai lam hpe Kasa Pawlu mung Roma laika hta tsun da ai. Masha a labau hta Roman empire ninggun ja dik ai prat, Roman ni yawng yawng hpe shaning law law adip arip uphkang nga ai prat, mayam law dik ai prat, hpyen majan law dik ai prat, matsan masha ni hte mayam ni lawt lu na myit mada shara n nga ai prat, myit masin wenyi ningsin chyip re ai aprat, Karai Kasang a amyu sha ni Messiah du sa na lam hpe akyu hpyi let la gawm kau ai zawn nga hkam sha ai aten, Israel myu sha ni Roman ni up hkang ai npu pyet pyet taw ai aten hta, Karai a Kasha mungkan ga de du sa ai. 

Raitim, kanu a hkriwang e dun nga ai aten, prat ningnan hpang wa ai aten a lam, Kabu mai ai shi-ga hta ka da ai. Anhte masha langai hpra a prat hta mung, Ahaz hpe zawn, Yosep hpe zawn, laklai ai mabyin/mahkrum madup hku, Karai Kasang du sa chye ai. Ja gumhpraw tam ai, lu su nga-mu nga-mai mayu ai ngu yang hpăga sum mat, matsan mat ai; hpaji lu la na matu rai nga ai. Hkamja ninggun ja hkra shakut ai ngu yang machyi makaw hkrum ai; kaga grau kaja ai amu ni hpe galaw lu na matu rai nga ai. Atsam marai arawng aya lu na hpyi yang, ga-ya hkrum ai, galau kataw ai; Karai Kasang hta grau kamhpa shămyet shănat chye wa na matu rai nga ai. Anhte myit daw myit hten na zawn nga hkrum katut ai aten ni hta, Karai e lăma ma hku hkye la, sai la nna grau gălaw lu, grau myit su kung zet wa hkra, Karai e shăbyin dat ai amu ni hpe myit yu mai ga ai. Kamsham myit n rawng ai ni a matu, hkrat sum ai, myit daw hpa hkrum katut jang sharai n mai hkra hten bya ai maga yawng wa chye ma ai: tsa chyaru a mayam, kaani a mayam, kau mi mana mat kun, tinang hkum hpe tinang sat si kun re ai kaw du mat lu ai. 

Byin tai mayu, awng dang mayu ai, myit mada da ai lam ni hte tai shai wa ai aten hta Karai Kasang e lăma ma hku hkye la na, lawt lu na lam hpe n kam ai majaw hten byak mat ai ni grup-yin e gade she law nga ma hka! Matsan mat yang gumhpraw kase ai; lu su wa ten, gumhpraw e shamai n lu, mări n lu ai baw ni hpe hkrum kătut lu ai. Yosep gaw shi myit mada ai hku n teng wa nna myit daw ai aten hta Karai Kasang gaw “Hkum hkrit et” nga nna n hkrit ra ai lam a hkinjang hpe tsun dan ai. Anhte ruyak kyindut hkrum ai aten ni hta Karai Kasang hpe kam shămyet ra ga ai: ruyak kyindut hte manghkang kaw na grau mai kaja ai baw hpan ni hpe Karai e shaman ya lu ai. Kya dik ai laswi gaw ja ai nra hta kap noi ai zawn, Karai a shaman chyeju ni mung ru ai yak ai mabyin hte kapyawn nna du chye ai hpe dum mai ga ai. Karai a Kasha hkum nan tsindam hte hpring ai mungkan masha tai wa ai; tsinyam amyu hkum hkra hkam sha lawm na matu du sa ai. Kaja wa shi hpe hpyen tai ai ni law la ai lam Chyum laika kaw na hti la lu ga ai. Rai tim, Karai Kasang gaw shinggyim masha ni hpe matsan dum ai lam, shanhte hte a nga nga ai lam, shi a shămai shătsai, shălan shăbran ai, matsan masha ni maga tsap ya ai, shut hpyit lam dam ai ni hpe shalawt dat ya ai. Dai zawn re ai amu yawng gaw “Karai Kasang-anhte-hte-nga-nga-ai” ngu ai lam hpe madun dan ai. “Karai Kasang-anhte-hte-nga-nga-ai” ai Emanuel a majaw kabu ga. Karai a hkye hkrang la ai masing hpang dat sai, ngu ai shi-ga a majaw ja ja kabu ga.

2022: DU SA LADAW LABAN (4) NA CHYUM LAIKA

DU SA AI LADAW HTA LABAN 4
December 18, 2022
CHYUM MUNGGA DAW 1

Esaia 7:10-14

Ya hti na gaw myihtoi Esaia a laika hta na rai nga ai.
Madu gaw Yuda ni a hkawhkam ahaza hpe, Na Madu Karai Kasang kaw lamik kumla hpyi u; sung ai shara e rai ti mung matsaw lahta tang e rai ti mung, hpyi u, ngu nna tsun wu ai. Ahaza chyawm gaw, ngai n hpyi na; Madu hpe n chyam yu na nngai ngu nna htan wu ai. Shaloi Madu gaw Dawi amyu  ni e madat la marit; nanhte gaw masha hpe nkaw n law di na hpa n nawn ai hta n-ga nye a Karai Kasang hpe mung n kaw n law di na myit ni? Dai re majaw, Madu shi nan nanhte hpe lamik kumla madun na ra ai: yu mu, shayi hkawnsek na-um nasin rai wa nna, shadang sha shangai na ra ai; shi a mying hpe Emanuela ngu nna shamying ya na ra ai.
Karai Kasang a Mungga rai nga ai.

CHYUM MUNGGA DAW 2

Roma 1:1-7

Ya hti  na gaw Roma  masha ni hpang de kasa Pawlu shagun dat ai laika hta na rai nga ai.
Tsaw ra ai a sha ni e, Hkristu Yesu a ali ama, Kasa ayan dang da nna, kabu gara shiga hkaw tsun na matu, Karai Kasang e san da hkrum ai ngai Pawlu gaw, Karai Kasang a tsaw ra ai ni hte, chyoi pra ai masha tai wa mu ga shaga la hkrum ai ni, Roma mare na yawng the hpe ga shana dat nngai. Karai Kasang  asha n kabu gara shiga hpe, moi moi shi a myihtoi ni a n-gup the Chyum laika hta ndat da nu ai. Dai shiga gaw Karai Kasang a Kasha a lam tsun dan nga ai: masha a hkum shan hku nna shi gaw Dawi a aru arat rai nga ai; ashan rawng ai san pra htum ai wenyi a lam hku nna rai jang, si mat ai ni kaw na bai hkrung rawt wa ai majaw, mahkra dang chye ai, Karai Kasang a Kasha rai nga ai hpe shi madun dan ya ai. Dai ash a, anhte a Madu Yesu Hkristu nan rai nga ai. Shi a mying ningsang hpe shagrau sha-a na matu, masha amyu baw shagu dai kam sham ai lam hpe madat mara mu ga, shi a marang e, shi a chyeju the, Kasa aya anhte hkam la sa ga ai. Nanhte mung, Yesu Hkristu e shaga la ai ni rai nga myit dai majaw, dai amyu  ash ani the rau, Hkristu the seng ai ni tai wa marit dai. Anhte a Wa Karai Kasang the Madu Yesu Hkristu kaw na, chyeju the ngwi pyaw ai gaw nanhte hta e a nga nga malit ga law.
Karai Kasang a Mungga rai nga ai.

KABU GARA SHIGA

Mahte 1:18-24

Ya hti na gaw Mahte a laika hta na Kabu Gara shiga rai nga ai.
Ya, Yesu Hkristu shangai wa ai lam ning rai nga ai: shi a Kanu Maria gaw, Yosep e mahtan da sai rai nna, shan shada da garai n kanawn yang, shi gaw Chyoi pra ai Wenyi a majaw na-um nasin rai wa sai. Shi a madu wa Yosep chyam gaw ding man nga ai rai nna, shi a lam n shabrawng mayu ai majaw, lagyim dat kau na maw nga ai. Ndai lam ni hpe myit aru yu nga yang, Madu a lamu Kasa langai mi yup mang hta shi kaw dan pru nna, Dawi a kasha Yosep e, na a madu jan Maria hpe la na hkum myit ru et; shi a na-um nasin gaw Chyoi pra ai Wenyi kaw na rai nga ai; shi gaw shadang sha shangai na ru ai rai nna, nang shi a mying hpe Yesu ngu nna, shamying lu na rai nga ai. Kaning rai nme law shi a amyu hpe tinang a shut hpyit mara kaw na hkye hkrang la ai wa shi rai nga ai, ngu wu ai. De a lam yawng hte gaw, Madu shi a myihtoi a n-gup hte tsun ai ga dik wa u ga matu byin wa sai. Dai myihtoi wa gaw, yu u, shayi hkawnsek na-um nasin rai wa na rai nna, shadang sha shangai na ra ai. Shi a amying, Emanuela shamying ya na ma ra ai: de a ga lachyum, Karai Kasang anhte hte rau nga nga ai. Ngu ai rai. Yosep yup pyaw kaw na rawt wa nhtawm, Madu a lamu kasa shi hpe hkang da ai hte maren galaw wu ai rai nna, Maria hpe shi a madu jan hku nna shi a nta de woi la nu ai.
Madu a Kabu Gara shiga rai nga ai.

2022: DU SA LADAW LABAN (3) NA MUNGGA

Prat shagu na masha ni, dinghta ga na nni nkri, machyi makaw hte shoi-hpa amyu myu a lachyum hpe tam ma ai; myit dik ai mahtai n lu kun (?). Makam masham baw hpan amyu myu gaw shălan shăbran ya ai mahtai amyu myu jaw ma ai. Babylon mungdan e yam sha hkrum ai Karai a amyu masha ni lawt lu na lam, kabu lu na lam, Isaiah shingran jaw ai; jahtum e Yesu du sa ai aten hta kuptsup ai mahtai hpe jaw ya ai: myi kyaw ai ni mu lu ma sai; daw hten ai ni hkawm lu ma sai; manggang kap ai ni mai tsai ma sai; na hpang ai ni bai na lu ma sai; si ai ni bai hkrung rawt ma sai; matsan masha ni kabu mai ai shi-ga madat la lu ma sai, nga ai.

Shaning law law maigan mung e mayam tai mat ai Karai a amyu masha ni gaw myit mada shara n nga, myit htum nga ma ai aten hta, Isaiah gaw dai amyu masha ni hpe tsun ai: myit shaja da mu, hkum hkrit mi, nanhte a Karai Kasang gaw dinghpring ai hku jeyang ya na ra ai, nga ai. Kaja wa mung Babylon empire hkrat sum mat nna Persian amyu rawt lung wa ai. Galai uphkang ai kade n na yang, Karai a amyu masha hpe shalawt dat nna tinang a mungdan, Israel de bai htang wa shangun ai. Dai gaw dan san ai kumla jaw ai sha rai nga ai. Kaja wa dai kaw kre ai n rai; dai Hkye La Madu Hkristu du sa ai aten hta sha, Isaiah a myihtoi ga gaw dik wa, tup wa lu na rai nga ai. Yesu Madu du sa ai aten kaw nna hpang ai, prat shagu na masha ni a matu ndai dinghta ga na tsinyam tsindam, ruyak shoi-hpa ni gaw jahtum n rai; n htum n wai asak nga ai lam, htani htana a grin nga ai, ruyak kyindut ni hte hkrap ngu hkrap ngoi nsen n nga ai, htani htana pyaw nga lu ai asak aprat nga ai lam hpe myit mada lu ai lam jaw ya ai.

Hpang na prat hpe la nga let ndai dinghta ga na ruyak shoi-hpa ni hpe majoi hkam sha shalai kau ra na kun? Ndai prat hta Yesu a shamai shatsai ai amu ni hpe n hkam sha lu ai baw kun? Madu Yesu a hkye hkrang la ai amu matut nna a nga nga ai. Kamsham ai masha ni a lăpran galoi mung a nga nga na re. Anhte mungkan ga a shut hpyit mara ni a majaw, ruyak jamjau ai, matsan mayan ai lam ni ding-yang nga nga na re. Shămai shătsai ai amu, matsan dum ai amu, hkye mawoi amu ni mung ding-run nga nga na re. Kamsham ai uhpung uhpawng shăgu hte kamsham ai masha shăgu, Karai a matsan dum hkye mawoi ai amu ni galaw nga na re. Karai Kasang hpe kamsham hkap la ai ni a matu hkye hkrang la ai amu ni hpe mu lu ai hte, dai hkye hkrang la ai amu ni hta hkum nan galaw lawm nga na re. Jăhtum chyălai, hpang jăhtum Madu bai du sa ai nhtoi hta sha ra n rawng, kuptsup ai hkye hkrang la ai lam hpe hkam la lu na ga ai. Kamsham ai ni gaw nni nkri, machyi makaw amyu hpan ni hpe myit galu ai hte hkamjan na lam, hkai sun galaw ai masha gaw myit galu ai hte shi a hkai nmai asi si jaw na, dan la shu la lu na nhtoi hpe myit galu ai hte a la nga ra ai lam, San Yaku shadum ninggun jaw ai. Ruyak jamjau ai lam, nni nkri hpan hkum hkra hkrum sha nga ga ai dinghta ga e asak hkrung nga ga yang, myit n daw n hten ai, Karai a shalan shabran ai lam ni hpe myit mada let, Hkristan prat hta kabu gara ai myit masin galoi mung prut ja nga ra ga ai

2022: DU SA LADAW LABAN (3) NA CHYUM LAIKA

DU SA AI LADAW HTA LABAN 3
December 11, 2022
CHYUM MUNGGA DAW 1

Esaia 35:1-6,10

Ya hti na gaw myihtoi Esaia a laika hta na rai nga ai.
Nam mali hte hkraw hkun ai shara gaw kabu gara na ra ai; Zaibru jang mung awng sharawng nna, mari pan zawn pu na ra ai; dai gaw grai wa pu an nna, sharawng let, kabu gara ai hte mahkawn mangoi na ra ai. Lebanon a arawng sadang, Hkarmela hte Sharon a hpung shingkang, shanhte hpe jaw na ra ai; shanhte gaw Madu a arawng sadang, anhte a Karai Kasang a hpung shingkang hpe mu lu na ra ai. N-gun kya ai lata hpe n-gun shaja mu; gari ai lahput ni hpe shangang mu; da ting mu, hkum hkrit myit, nga nna myit kaji ai ni hpe tsun mu. Yu mu, nanhte a Karai Kasang gaw matai htang na matu du na ra ai; nanhte hpe hpe hkye hkrang la na matu, shi nan shabrai kumhpa lang let du sa na ra ai. Dai shani e, myit hten ai ni myi mu lu nna, na n na ai ni na lu na mara ai. Lagaw hten ai wa gaw shan nga zawn gumtawng lu nna, ma-a ai wa a shinglet mahkawn mangoi na ra ai; kaning rai nme law, hkraw hkun ai shara e hka hpawk hpaw nna, zaibru jang e lwi na ra ai. Madu a majaw hkye hkrang la hkrum ai ni gaw nhtang wa nna, mahkawn mangoi let Ziun bum de du na mara ai; shanhte a myi man htani htana kabu gara ai dan hkung na ra ai. Shanhte gaw awng sharawng let kabu gara nga nna, yawn hkyen ai hte madai ai gaw sim mat na ra ai. 
Karai Kasang a Mungga rai nga ai.

CHYUM MUNGGZ DAW 2

Yaku 5:7-10

Ya hti na gaw Yaku a shagun dat ai laika hta na rai nga ai.
Hpu nau ni e, Madu bai du sa ai nhtoi du hkra shakut sharang nga mu law. Yu mu sun galaw ai wa gaw ga a asau asi hpe ala nga ai rai nna, marang nhpaw hta hpang shakoi na marang dai ga hta e htu shaya ai du hkra, myit galu ai hte shakut sharang nga ai. Nanhte mung shakut nga mu; Madu bai du sa na gaw ni magang ra ai majaw, myit hkum kaji nga mu. Hpu nau ni e, nanhte daw dan ai n hkrum myit ga, shada da hkum aput angun nga mu: yu mu, tara agyi wa gaw chyinhka makau e tsap nga ai. Hpu nau ni e, ru yak kyindut hkrum ai shaloi, nanhte gara hku shakut sharang ra ai hpe sharing la na matu, Madu a mying ningsang hta hkaw dan ai myihtoi ni gaw nanhte a kasi ningli tai wa ma lit ga.
Karai Kasang a Mungga rai nga ai.

KABU GARA SHIGA

Mahte 11:2-11

Ya hti na gaw Mahte a laika hta na Kabu Gara shiga rai nga ai.
Hkristu e galaw da ai magam amu ni a lam hpe Yawhan gaw htawng hta e na la jang,shi a sape nkau mi hpe shangun dat nna, Nang gaw, “Dai du sa na ra ai wa” rai nga nni? Shing nrai, kaga hpe anhte naw ala ra a ni? Nga nna Yesu hpe san dat mu ai. Yesu htan let shanhte hpe tsun mu ai gaw, nanhte na la ai hte mu lu ai lam mahkra Yawhan hpe wa tsun dan mu; myi kyaw ai ni myi mu lu ma ai; lagaw hten ai ni hkawm sa lu ma ai; manggang kap ai ni san pra lu ma ai; na lahpang ai ni na lu ma ai. Si mat ai ni bai hkrung rawt ma ai hte, matsan mayan ni hpe kabu gara shiga hkaw dan nga ai; ngai a majaw myit nkataw ai wa gaw alu nga ai, ngu nna htan ya wu ai. Ya dai dat kasa ni wa mat nga ai shaloi, Yesu gaw Yawhan a lam hpe lakap nna, shawa masha ni hpe tsun shadum ai gaw: nanhte hpa hpe yu na matu nam mali de pru sa wa myit ta? Nbung e kanga ai mai-aw hpa rai ni?  Dai nrai yang hpa hpe yu na sa myit ta? Kya mani ai lai sumpan bu hpun ai wa rai ni? N rai law. Reng htum ai hpun palawng bu hpun ai ni hkawhkam ni a htingnu hta tam ra myit dai. Dai n rai yang hpa majaw sa pru myit ta? Myihtoi langai ngai hpe sa yu na rai myit ni? Kaja wa dai a majaw rai sai; nanhte hpe ngai tsun made ga: myihtoi hta grau kaba ai wa mung rai nga ai. Kaning rai n me law, na a man e na a lam lajang magang na matu, nye a kasa hpe na a shawng de ngai shangun dat na we ai, nga nna chyum laika hta ka da ai gaw, Yawhan hpe nan sha-ang  ka da nga ai. Nanhte hpe ngai teg teng tsun made ga numsha kaw na shangai ai ni yawng hta na, kashin kamun jaw ai Yawhan hta grau kaba ai marai langai mi n paw pru ai; rai ti mung, sumsing lamu mungdan hta kaji htum ai wa gaw Yawhan hta grau kaba nga ai.
Madu a Kabu Gara shiga rai nga ai.

2022: DU SA LADAW LABAN (2) NA MUNGGA

Tinkyeng akyu amyat tam ai, masu magaw chye ai ningbaw ningla ni a majaw, shanhte a npu na masha ni, mung shawa masha ni ruyak jamjau amyu myu hkrum sha ma ai. Mung-masa, sut-masa hkrat sum mat ai majaw hten bya nga ai mungdan, ningsin chyip re ai aprat aban hta Isaiah gaw Hkawhkam Dawi hte bung ai ningbaw kăja du pru na lam hpe myit măda lu ai lam jaw ya ai. Kabu Gara Shi-ga hta Yesu gaw dai myit măda a la nga ai lam hpe shătup ya ai, tara rap-ra ai lam hte hpaji atsam mărai hpring ai wa, tara hte maren jeyang ai wa tai na lam hpe madi madun ya ai. Yesu Hkristu hpe kamsham hkap la ai a mărang e, amyu/madang n ginhka ai, yawng hpe hkap la tsawra dawjau ai lam gaw, Isaiah hta tsun da ai simsa lam majing hpe shabyin ya ai lam, Isaiah a myihtoi ga hpe shăteng ya ai lam hpe chye lu ai.

Isaiah jaw ai shingran_ Dawi a amyu matu, hkraw si maw ai hpun-du kaw na nnaw prut pru na. Dai dinghpring dik ai hkawhkam wa gaw ra n rawng ai, hpaji hte atsam marai kunghpan ai wa, shi uphkang ai npu na masha ni hta hpyen tai hkat ai ni n nga na,…kup tsup dik ai, simsa dik ai mungdan rai lu na lam tsun da ai. Hkristu Yesu du sa ai aten, Messiah uphkang ai ladaw na lam hpe shingran jaw da ai. Yesu a prat kaw na dai ni du hkra, shinggyim masha a labau hpe jep jen yu jang, dai ni na aprat du hkra, Isaiah jaw da ai shingran mungdan/mungkan n tup lu shi ai hpe mu lu na ga ai. Myit daw hpa n tai na kun? Masha kau mi na matu kamsham myit mada ai lam hpe teng sha shanut kau, azat kau ya ai hpa tai na kun? Kamsham myit n rawng ai wa a matu, tsawra ai myit hte yawng hpe awng dang ai lam n kam ai wa, mara dat ya ai a marang e simsa lam lu la ai hpe n kam ai wa, ndai zawn re ai masha langai a matu Isaiah a myihtoi ga teng wa ai lam galoi n mu lu na re. Isaiah a myihtoi ga byin wa, teng wa na matu hkan galaw ra ai lam ni hpe Yawhan Baptista hkaw tsun dan ai: “Myit malai lu nna nanhte a nga-sa lailen hpe shajaw sharai mu! Madu du sa na hkrun lam hpe lajang mu!” nga ai. Madu Yesu du ai aten kaw nna Karai Kasang a mungdan gaw ndai dinghta ga e hpang sai; kamsham ai ni gaw tsawra myit, dinghpring sanseng ai myit, mara dat ya chye ai, shada htingram hkat lu ai, myit masin hpe sharai shatsawm ding-yang galaw nga na re.

Mungkan e majan a nga nga na re; shada sat hkat nat hkat re ai amu ni a nga nga na re. Rai tim kaja wa simsa ai lam hpe jawm gawgap ding-yang, jawm sharai ding-yang re ai majaw, mungkan hten bya ai kaw na shalawt dat lu ai amu ni mung kade she law ai, awng dang ai amu ni kade nga lai wa ai lam ni hpe mung myit dum mai ga ai. “Myit malai lu nna nanhte a nga-sa lailen hpe shajaw sharai mu! Madu du sa na hkrun lam hpe lajang mu!” nga ai Yawhan Baptista saw shaga ai nsen, jahtau ai nsen gaw masha shăgu hpe, uhpung shagu, amyu/mungdan shagu hpe saw shaga ai. N madat kam ai ni, n kam n sham ai ni a matu Isaiah shingran jaw ai simsa lam kaw n du lu na rai nga ai. Kamsham ai myit hte hkan shatup ai masha ni hta, uhpung uhpawng ni hta, amyu/mungdan ni hta sha, simsa shimlum ai lam shăkut la ai daram hkam la lu na rai nga ai. N kamsham ai ni mungkan htum ai shani du hkra nga nga na ma ai. Kamsham ai ni mung, munkan htum ai shani du hkra, Isaiah jaw ai shingran byin tai hkra matut shakut sakse hkam na rai nga ai. San Pawlu gaw kamsham ai ni tatut hkan galaw na lam matsun kau mi jaw da ai: shăda chye hkap la hkat, hkam măna hkat, Hkrist a wenyi hta myit hkrum myit ra let Karai Kasang a hpung shingkang a matu asak hkrung nga na lam rai nga ai. Karai a matsan dum myit a jaw e, tara maigan masha ni mung Karai Kasang hpe nawku shăkawn kungdan lu ma ai, nga ai. Hkristmat poi a matu ja gumhpraw, bu hpun palawng hte kaga ra ai lam law law hpe hkyen shachyip magang let, Karai a mungdan a matu myit masin wenyi nga-sa lailen hpe hprang shatsawm ai amu ni matut galaw nga ra ai lam ni hpe shadum ya ai.

2022: DU SA LADAW LABAN (2) NA CHYUM LAIKA

DU SA AI LADAW HTA LABAN 2
December 4, 2022
CHYUM MUNGGA DAW 1

Esaia 11:1-10

Ya hti na gaw myihtoi Esaia a laika hta na rai nga ai.
Yese amyu a ndu hta nnaw rawt nna, shi a aru ni hta na makrung gaw asi si na ra ai. Madu a wenyi shi kaw sa nga nga ra ai: hpaji byeng-ya hte shaleng ya ai myit jaw ai wenyi, myit su ai hte nden ja ai myit jaw ai wenyi, chye chyang ai hte Madu hpe hkrit hkungga ai myit jaw ai wenyi shi hta e rawng nga na ra ai rai nna, shi gaw Madu hpe hkrit hkungga ai hta awng sharawng nga na ra ai. Shi mu hkrup ai hte maren n daw dan ai hte na hkrup ai hte maren n jeyang na ra ai: ding man ai hku hkan let shi matsan mayan ni hpe tara dara nna, myit malang ai hku hkan let, ahkaw ahkang n lu ai ni a hpang maga de daw dan na ra ai. Shi a n-gup ga ngu ai shingna hte, tinang ra ai hku shabyin na matu, nhtum nni di kau ai ni hpe kayat sharin ya nna, shi nten na pru ai nsoi nsa hte tara n lang ai ni hpe sat kau na ra ai. Ding hpring ai gaw shi nshang a shingkyit, kangka re ai gaw shi hkum hkrang a shingkyit rai nga ai. 
Shing rai, chyahkyawn gaw sagu kasha a manam tai nga nna, rawng gawk gaw bainam kasha hta rau hpum nga na ra ai; dumsu kasha hte hkanghkyi hkalung rau hkawm sa nna, ma kaji shan hpe dun woi na ra ai. Dumsu hte tsap rau ushat sha nna, de a hkalung ni rau hpum nga na mara ai; hkanghkyi gaw dumsu zawn yi hku sha na ra ai. Chyu chyu ai ma gaw pu htum a tsip ntsa e ginsup lu nna, chyu hka ai ma gaw pu hkram hku hta shi a lata manaw bang lu na ra ai. Nye a chyoi pra ai bum ting hta, shada da zingri ai hte, jahten shaza hkat na n rai, hpa majaw  nga yang, nammukdara hka gaw shi a shara hpe lim kau ai zawn, Madu hpe chye chyang ai lam mungkan ting pri rai na ra ai. Dai aten e, Yesu a aru gaw, masha amyu baw ni a matu dan hkung ai kumla tai na ra ai; shi shanu nga ai shara gaw, hpung shingkang rawng na ra ai majaw, maigan amyu ni shi hpe hkan tam na mara ai.
Karai Kasang a Mungga rai nga ai.

CHYUM MUNGGA DAW 2

Roma 15:4-9

Ya hti na gaw Roma masha ni hpang de kasa Pawlu shagun dat ai laika hta na rai nga ai.
Hpu nau ni e, Myit n htum ai sha shakut sharang ai ni hpe, Karai Kasang shalan shabran garum ya ai lam, Chyum laika hta hti lu ai majaw, anhte myit mada shara nga lu u ga, shawng e ka da ai lam shagu gaw, anhte hpe sharin achyin ya na matu ka da nga sai. Ya, anhte a Madu Yesu Hkristu a Kawa rai nga ai Karai Kasang hpe, nanhte myit mang langai sha hte, n-gup ga langai sha hte shakawn kungdawn nga lu myit ga, Hkristu Yesu a kasi ningli hpe hkan nna, nanhte shada da myit mang ara sha rai nga lu na matu, shakut sharang ai hte, shalan shabran ai lam mahkra a npawt daju Karai Kasang gaw, nanhte yawng hpe awng nga u ga law, Dai rai nna, Karai Kasang a hpung shingkang a matu mara, Hkristu gaw nanhte hpe hkap hkalum la sai hte maren, nanhte shada da hkap hkalum la mu. Ngai tsun nngai gaw: Ji wa ni kaw jaw da ai ga ndat hpe kangka ai hte shadik na matu chyu sha nrai, maigan amyu ni mung Karai Kasang a matsan dum ai chyeju a majaw, shi hpe shagrau sha-a lu mu ga; Hkristu gaw Yuda masha ni a ali ama tai wa sai. Shing rai: “Maigan amyu ni a ka-ang e, ngai nang hpe shakawn na nngai; Na a mying ningsang hpe mahkawn mangaoi na nngai,” nga nna Chyum laika hta ka da nga ai.
Karai Kasang a Mungga rai nga ai.

KABU GARA SHIGA

Mahte 3:1-12

Ya hti na gaw Mahte a laika na Kabu Gara shiga rai nga ai.
Kashin Kamun jaw ai yawhan paw pru ai shaloi, shi Yuda nam mali hkan e tara hkaw nna, Sumsing lamu a mungdan du magang ra ai majaw, myit malai lu mu, nga nna tsun wu ai. Shing rai, myihtoi Esaia gaw, Nam mali kata e nsen jahtau tsun nga ai: Madu a lam lajang da mu, shi a lam matsun ni hpe shading mu, nga nna Yawhan hpe sha-ang let tsun wu ai. Yawhan gaw gawla-u mun hte da ai nba bu hpun nna, shi nshang e shan-hpyi shingkyit kyit nga ai. Shi a shahpa mung dinggam-yaw hte nam na lagat jahku rai nga lu ai. Dai shaloi e, Yerusalem na ni, Yuda mung ting na ni hte, Yawdan hka ginwang shara magup hkan na ni, Yawhan hpang de pru sa wa ma ai rai nna, tinang a shut hpyit mara hpe shapraw dan let, shi a lata hte yawdan hka hta e kashin kamun hkam la ma ai. 
Ya, Hparishe hte Saduke masha ni law law wa Kashin Kamun hkam la na nga, sa ma ai hpe Yawhan mu jang, shanhte hpe shi tsun mu ai gaw: Pu htum amyu ni e, du magang ra ai ari dan hta na hprawng wa lu myit ga, nanhte hpe kadai shadum myit ta? Dai majaw, nanhte teng teng myit malai lu da ai rai yang gaw: htap htuk ai asi si mu. Abraham gaw anhte a wa rai nga mali ai, nga nna gumrawng ai hte nanhte a kraw e hkum tsun mu. Nanhte hpe ngai tsun ma de ga: Karai Kasang gaw ndai nlung ni hta na, Abraham a matu kasha ni hpe hpan shapraw da lu ai. Ya e pyi, dai dingwa gaw hpun npawt nhpang hkan e tawn da nga ai. Dai rai nna, asi kaja n si ai hpun mahkra hpe kran daw kau nna, wan hta kabai bang kau nga ai. Ngai gaw, myit malai lu myit ga, hka hta nanhte hpe kashin kamun jaw made ai, rai timung, nye a hpang e du sa ai wa mahtang gaw, ngai hta n-gun grau ja ai wa rai nga nna, shi a kyepdin gun na pyi ngai n ging n dan nngai. Dai wa gaw, Chyoi pra ai Wenyi hte mung, wan hte mung, nanhte hpe kashin kamun jaw ya na ra ai. Shi a lata hta hkuwawn lang nga nna, shi a mam chyarang hpe shi yit jasan nhtawm, shi a mam hpe dum hta shinggyin bang da na nna, mam nsan hpe chyawm n sat lu ai wan hta nat kau na ra ai.
Madu a Kabu Gara shiga rai nga ai.