2022: LUSHA GAM LADAW LABAN (5) NA MUNGGA

Isaiah Laika hta, mayam amyu tai mat sai Isarael amyu masha hpe Karai Kasang gaw shalawt dat ya na lam, nta buga de htang wa lu na lam shingran jaw ai. Shut hpyit lam dam ai ni hpe Karai Kasang matsan dum ai lam, shut hpyit lam dam ai ni, tara tawt lai ai masha ni hpe jeyang ga yang, tara mahkrun hta jan nna tsawra matsan dum myit hpe mung sawn shalawm ra ai lam sharin ya ai. Gawng kya ai shinggyim amyu, kadai n nga, shut kataw chye ai majaw, laja lana ari dam jaw ai zawn re, mara lu ai wa a sari sadang hpe mala la jahpoi ya ai hku dam jaw n mai ai lam sharin ya ai. Tara (justice) hte matsan dum myit (mercy) rap shara ai hku sawn shen chye ra ai lam hpe sharin ya ai. Zaibru jang e hka lwi na ra ai, nga ai Isaiah a myihtoi ga gaw Hkristu Yesu hta dik wa ai. Tsawra myit hkraw hkyet ai dinghta ga, mara raw dat ya na hpang gara ai shinggyim amyu, Madu Yesu kaw na tsawra matsan dum mara raw ya ai chyeju n taw n tsang, nhpaw n-ya hkam la lu ga ai. Hkristu Yesu a tsawra matsan dum myit hpe kup kup chye la lu ai hta, dinghpring kuptsup ai kaw du lu ai lam, San Pawlu sharin ya ai. 

Masha shada mara shagun jeyang hkat ai ălai hpe yu yang hkrit hpa nan rai nga ai. Tinang hpe shut da ai, mara lu ai masha hpe tara hta lai jan nna matai dawp chye ga ai. Ari jaw, hka ji la lu ai hpang e pyi gaw shut ai wa hpe yu matsat kau ai, jahpoi n ma, shătan n ma galaw chye ga ai. Tinang shut kataw ai, hkā hkrum ai aten hta gaw tinang a mara hpe magap lu ai daram magap, masu lu ai daram masu, magap n mai dan dawng ai hte hpe mara jahpa lu ai daram jahpa la lu na shakut chye ga ai. “Tara Rung” ngu, tara dara jeyang ai shara kaw nan masu shingjawng hkat, tinang nang a mara hpe magap shingjawng hkat, rai ma ai ŋ rai a hka? Ka da, masat da ai tara mahkrun hpe laknak shatai lang chye ai majaw, ŋ tara ai amu law law prut jat ai rung mung she rai nga ai: jaw ai wa tara sum, shut ai wa tara dang; mara ŋ lu ai wa hpe rim sharawng kau, tara shut ai wa hpe mahtang shalawt dat. Dai gaw dinghta ga e shinggyim masha ni jeyang hkat ai ălai rai nga ai.

Shakes Spear ka da ai tara rung maumwi____ lauban langai gaw, matsan kasha manang jinghku wa num hpyi, hkungran la lu hkra gumhpraw lajang ya ai. Garum ya ai lam gaw ndai hku re__ lauban gaw hpaga rai yawng mari kau ai, sanghpaw hta hpaga rai baw nna maigan de sa dut shangun na dat dat ai. Lata hta gumhpraw ŋ law ai majaw, manang wa hpe garum na matu Jew (Hebre) amyu lauban wa kaw gumhpraw hkoi lang ai. Masat da ai ŋhtoi hta hkoi lang ai gumhpaw ŋ wa lu jang shi a magyi shan joi mi kadoi jaw na, ngu, ga-sadi jaw nna masat hkat ma ai da. Myit kaja ai lauban wa gaw gam ŋ kaja; shi a sanghpaw panglai nbung laru hta lup mat ai, nga shi-ga du ai. Shi hkā wa’ nhtoi du mahka e sha, hpaga sanghpaw sum mat ai lam shi-ga lu ai. Hkā wa nhtoi hta n wa’ lu ai majaw tara rung de du mat ai. Tara rung kaw gaw tinang jaw da ai ga-sadi hte maren, tinang a magyi shan joi mi mawt jaw na lam, Jew lauban wa atik anang hpyi ai. Tara rung kaw na mung dai gaw tara ai, ngu, dawdan ya ai. Magyi shan mawt la maw ai aten hta matsan dum chye ai tara kasa langai hprawt. Jew lauban wa hpe tsun ai, “Ga-sadi laika hta shan kadoi la na sha lawm ai; sai n mai jahtaw ai. Sai n htaw ai hku shan kadoi la mai ai”, ngu, tara mahkrun hpe madi madun ai. 

Yawng gaw mau mahka mat sai. Dai hta ŋ ga, maigan masha re ai Jew amyu sha langai mi gaw buga masha langai hpe sai jahtaw ai, a’hpye alam di ai amu gaw mara kaba rai nga ai. Buga masha hpe sai jahtaw ai amu hte sat na gyam ai, maw ai, ngu ai hku nna Jew lauban wa hpe nhtang hku mara shagun dat ai. Jahtum e, Jew lauban wa hpe shi lu ai dum nta hte sutgan ni hpe rim zing la kau na hku tara rung e jeyang dawdan ya ai da. Shaloi she Jew lauban wa gaw ja ja tawngban ga tsun ai da. Magyi shan kadoi hkam na lauban wa gaw hkyamsa jaw mara dat ya ai da.

Maumi hpe grai kadun kau sai. Lachyum hpe chye la na mi ai, ngu kam ai. Mara lu ai shada, shut chye ai, tara tawt lai chye ai masha shada, matsan dum myit ŋ rawng hkra jeyang hkat ai, Karai a man e kade matsat hpa rai a hka! La shaw ai amu galaw hkrup ai numjan hpe Yesu a man de woi sa ma ai. Numjan hpe hkrai jeyang mara shagun ai gaw tara ai kun? Dai numjan hpe shut ai la wa hpe gaw hpa mara n nga ai hku tawn da ai, tara ai kun?

Yesu gaw, dai numjan hpe dun sa ai ni a mara ni a lam laika ka dan ai. Yawng gaw tinang nang a mara hpe dum wa ma ai; kaya dum nna langai hpang langai pru mat wa ma ai. Shanhte zawn sha, anhte kadai n nga, tinang nang a mara hpe byin mai ai daram magap da shaja ga ai. Kaga wa a mara hpe gaw pau jat hkra rai nna jahpoi asawng, mara shagun chye ga ai. Shake Spear a maumi na mabyin hpa she rai nga ai. Ga numhpu hte shachyaw da hkrum ai shinggyim masha, gawng kya dik ai shinggyim masha, shinggyim ga numhpu bai tai na ni she rai ma ai. Yesu gaw, “Shanhte hpa galaw shut da ai lam hpe ga numhpu hta ka ai”; nlung kaw n ka da ai. N na yang prai mat na sha re. Lachyum gaw, dinggrin matsing da na matu n rai. Myit malai tawngban shagu, mara raw dat ya ai. 

“Ngai mung, nang hpe n jeyang na nngai. Hpang de mara hkum galaw nu; hkum shut nu” nga ai. Yesu gaw, Kawa Karai a ŋ htum ŋ wai tsawra matsan dum myit hpe shadan dan ai. Masha shada mung matsan dum hkyamsa jaw chye ra ai lam sharin ya ai. Zaibru maling e lammaw waw ya na, zaibru maling e hka lwi shăngun nna Karai a amyu masha hpe lu-hka jaw na, nga ai. Yesu kaw na lwi pru ai tsawra matsan dum mara raw dat ya ai lam hpe nhpaw n-ya hkam la lu ga ai; Sakramentu ni a chyeju hpe nhpaw n-ya hkam la lu ga ai n rai a hka?

Yesu kaw na mai kaja ai baw yawng hpe chye na lu hkra, sharin la, hkan shakyang la na lam San Pawlu sharin ya ai. Hkristu Yesu a lam chye la ai hta kaga yawng hpe maza hku she nawn kau ai, nga ai. Yesu a lam chye la lu ai hta grau manu dan ai kaga hpa n nga sai, nga, matsun ya ai.

 Examination of conscience, ngu ai, tinang nang tsun shaga, dawdan, galaw sa ai amu ni hpe htang sumru yu ai lam hpe ya sha sha galaw chye ai kun?

 Mara hta lup nan ai masha ni, mara raw Chyoi Pra Hkum n hkam mai ai masha ni hpe gara hku mu ai kun, shanhte hpe hkung ga tsawra ai myit gaw madun chye ai kun?

 Tinang hpe shut da ai masha hpe lăja lăna mara shagun chye ai kun?

2022: LUSHA GAM LADAW LABAN (5) NA CHYUM LAIKA

LUSHA GAM AI LADAW HTA LABAN 5
April 3, 2022
CHYUM MUNGGA DAW 1

ESAIA 43:16-21

Ya hti na gaw, myihtoi Esaia a Laika hta na rai nga ai.
Madu ning nga ai: Nammukdara hta lam waw nna, hka kaba ni hta lam hpaw ai wa; hpyen leng ni hte gumra ni hte hpawn, hpyen luksuk ni hte share ninghkring ni hpe si mat ai wan shat zawn jasim na matu, shanhte n rawt lu hkra, jahten shabyak ai de woi sa ai wa ngai rai nga nngai. Moi na amu hpe nanhte n dum ra myit dai; chyaloi nhkoi na lam ni hpe n gawn ra myit dai. Yu mu, amu nnan ngai galaw na nngai; ya pyi byin pru na ra ai; dai hpe nanhte n mu lu myit ni? Gaji wa, nam mali hkan e nmaw lam, hkraw hkun ai shara e hkanu hkashi, ngai shapraw na we ai. 
Nam na ashu ashan ni mung, nam gwi ni hte u gawla-uk ni mung, ngai hpe shagrau na mara ai; kaning rai nme law, ngai lata la ai amyu masha ni luhpa lu na matu, nam mali hkan e hka hpung ni, hkraw ai shara e hka nu hka shi, shapraw na we ai. Nye a matu ngai san da ai amyu masha ndai gaw ngai hpe shakawn kaungdawn nga na mara ai.
Karai Kasang a Mungga rai nga ai.

CHYUM MUNGGA DAW 2

HPILIPI 3:8-14

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai.
Hpu nau ni e, Nye a Madu Hkristu Yesu hpe chye chyang ai lam hta; grau kaja ai lam kaga n nga ai, ngai nawn nga nngai; gaja wa Hkristu a matu ngai yawng mayawng hte hpe sum kau ni ai. Shi hpe lu la nna, Shi hta grin nga lu yang gaw, ngai sum mat ai yawng mayawng hte hpe shanut shanaw zawn nawn nga nngai.  Ya kaw nna jep ai tara a hkum tsup ai lam ngai n hkan tam nngai; Hkristu hpe kam sham ai a marang e, makam masham hta ru jung nna, Karai Kasang kaw na lu la ai hkum tsup ai lam hpe ngai ra sharawng nngai. Hkristu hte Shi a bai hkrung rawt ai lam a atsam chye lu nna, Shi si hkam ai shaloi na myit marai hpe grau nna dagraw la ai a marang e, Shi hte rau nni nkri jawm hkam la ai lam hpe chyu sha, ngai myit ndawt nga li ai. Ngai dai hku hkan lu yang gaw, si ai kaw na bai hkrung rawt wa ai ni hte rau ngai hkan lawm lu na nngai. Shing rai tsun yang, ngai ya e pyi hkum tsup rai nga ai hpe n tsun nngai: ngai garai n awng ai ni; rai ti mung, Hkristu Yesu ngai hpe kumhpa jaw na matu hkap la ni ai hte maren, dai hpe ngai nan hkap la lu u ga gat shachyut nngai. Hpu nau ni e, ngai ya e pyi awng ni ai, ngai teng teng n myit nngai. Lam langai sha ngai tsun lu nngai: hpang na lam hte hpe malap kau nna, shawng na lam ni hpe hkan chyan la nngai. Hkristu Yesu hta e sumsing lamu de na kumhpa hpe lu la na matu, Karai Kasang anhte hpe shaga la sai hte maren, awng padang shadaw du hkra ngai gat shachyut nngai.
Karai Kasang a Mungga rai nga ai.

KABU GARA SHIGA

YAWHAN 8:1-11

Ya hti na gaw, Yawhan a Laika hta na Kabu Gara Shiga rai nga ai
Dai aten hta e, Yesu gaw Tsanlun Bum de sa mat wa ai. Hpang jahpawt jau jau e Nawku Htingnu de Shi bai sa wa ai rai nna, masha nlang hte Shi kaw sa ma ai; shi dung let shanhte hpe sharin shaga nga ai. Shaloi tara sara ni hte Hparishe ni gaw, shut hpyit nga ai masha num langai mi hpe dun sa nna, ka-ang e shatsap tawn da nhtawm, Sara e, ndai numsha hpe shut hpyit nga yang mu hkrup saga ai; ndai zawn re ai numsha hpe, nlung hte kabai sat kau lu na re ai, nga nna Mawshe gaw jep ai tara hta anhte hpe matsum jaw da mani ai: ya nang gaw kaning ngu na wu ta? ngu nna Shi hpe san mu ai. Shing nga san ai gaw, Shi hta mara shagun na lam mu lu hkra, Shi hpe chyam dinglik ya ai rai nga ai. Yesu chyawm gaw ga de gum nna, ga hta layung hte ka nga ai. 
Shanhte shing nga bai kahtap san san rai ma ai majaw, Shi rawt mada yu nna, Nanhte hta na mara n lu ai wa, shawng shi hpe nlung hte kabai mu, ngu nna shanhte hpe tsun mu ai. Shing nga tsun ngut jang Shi bai gum nna ga hta ka nga ai. Shanhte dai ga na jang, agyi salang ni shawng pru wa ai kaw nna, langai hte langai pru mat wa ma ai: shing rai Yesu Hkrai sha hti nga ai hte, dai numsha mung myi na shara e nga nga ai. Shaloi Yesu bai rawt mada yu nna, Numsha e, ya shanhte kanang rai wa ma sata? Nang hpe kadai mung n jeyang a ni? ngu nna shi hpe san yang, dai numsha gaw, Madu e, kadai mung n jeyang nngai. ngu nna htan wu ai. Shaloi Yesu gaw, Ngai mung nang hpe n jeyang na nngai: wa nu; ya kaw nna mara hkum galaw nit, ngu nna tsun dat wu ai. Madu a Kabu Gara Shiga rai nga ai.

2022: LUSHA GAM LADAW LABAN (4) NA MUNGGA

Dinghku masha ni ăhkum ăra hpawng nga lu ai aten gaw pyaw dik ai aten rai nga ai. Dai majaw, Hkrismat/Shaning Ningnan zawn re ai nhtoi ni hta nta masha ni kaga ga de bungli galaw nga hkawm tim, yawng tinang nang a buga, nta de bai wa shakut ma ai. Nta masha ni gum nna pyaw lu ai hpe ja ja manu shadan chye ma ai. Nta madu majing gaw yawng a kawa rai nga ai. “Kawa a nta de bai wa ai aten” gaw kabu pyaw dik ai aten rai nga ai. Yawng a hpan Madu Kawa Karai Kasang mung, Shi hkyen lajang da ai sumsing mungdan anhte kasha ni a buga nta majing de bai du wa shajang na hpe myit mada ala nga ai.

Yoshu woi awn let Kanan Buga de shang madu la lu ai Israel amyu sha ni gaw ja ja kabu lu ma ai. Shanhte n gat n hkai ai lamu ga, buga kaw na shawng ngai ai nsi nai si ni hpe shu la di sha lu ai majaw kabu n ma rai ma ai. Hpa majaw ta? Abraham hpe Karai Kasang jaw na, shu mashi shu masha ni gashun nna madu la lu na lam, shanhte a lamu ga rai lu na lam tsun da ai Karai a ga-sadi dik wa ai majaw rai nga ai. 

Ga-shaka Ningnan manu dan grau ai lam gaw Hkristu a marang e htani htana grin nga na ga-shaka rai nga ai. Dai gaw, Hkristu Yesu hta ningnan hpan shalat ai amu rai nga ai. Hkristu hta, Karai Kasang gaw shinggyim amyu ting hte htinglu htinglai lu ai lam rai nga ai. Mungkan mara gun la kau ai Hkristu a marang e, shinggyim amyu gaw Karai Kasang hte htingram lu ai hta ningnan hpan shalat ai hkrum ga ai. Kade kaba ai Karai a tsawra myit rai a hka!

Kabu Gara Shi-ga hta shut hpyit lam dam ai kasha, kawa a nta de bai htang wa na hpe kawa gaw la dingda nga ai lam tsun ai. Kawa a tsawra myit kade sung ai, kade dam lada ai hpe n hkam sha chye ai kasha alat gaw, kanau myit malai lu nna nta de bai htang wa ai lam hta n kabu lawm lu ai. Kawa hpe mara shagun mayu ai zawn nga ai ga chyawm she shaga ai hpe chye lu ai. Anhte shinggyim masha ni mahtang tsawra mara raw dat ya hkat ai lam hta shadawn shadang masat da ga ai; shadawn sharam let she tsawra mara raw ya chye ga ai. N htum n wai tsawra mara raw dat ya ai Karai Kasang a tsawra myit hpe hkam sha chye na yak ga ai. Tinang myit ai, sawn ai, galaw ai lam gaw grau jaw ai, kaga ni hta gaw ra rawng ai lam, n gyeng ai lam, gawng kya ra rawng ai lam ni hpe mu mada ai; tinang hta ra rawng ai lam hpe n mu ai. Dai majaw, shada mara tam hkat, mara shagun hkat re ai shinggyim amyu rai ga ai hpe myit dum mai ga ai.
America hte kaga galu kaba nga sai mungdan hkan na ramma ni, kanu kawa a nta kaw na hka mat, yen hkawm mat wa ai, wam dam mat ai ma ni law dik rai nga ai. Kanu kawa hte rau n nga pyaw dum ai majaw, dinghku masha ni hta makam masham n ngang kang ai majaw, shada tsawra hkung ga manu shadan hkat ai lam n nga ai majaw,…. Asak 14-15 sha re ma ni nta kaw na hka mat ai, lam makau, mahkrai npu, shingjut shing-naw hkan hkrup mi ra nga mat ma ai; hpan bung ai shada manang tai hkat nna nga ma ai. Anhte a mungdan/buga na ramma ni law law, kani hte kaga nanghpan ni a mayam tai nna, nta masha, ngu, sawn n mai na daram, myit masin wenyi nta kaw na hka mat, lam dam mat ai ni kade she law a hka!

Shut hpyit lam dam ai ni hpe matsan dum chye ra ai lam, shanhte myit malai lu hkra  jawm garum ya ra ai lam, Kabu Gara Shi-ga kaw na sharin la lu ga ai. Mung shawa hku nna nanghpan pat jasan amu galaw ai hte ram sai kun? Dawn dabang ni hpaw da ai ram sai kun?  Maga mi hku gaw kanu kawa yan nan kasha ni myit pyaw hkra, shim lum ai lam lu la hkra, shada tsawra manu shadan hkat ai lailen kasi tai sharin shaga ya ra ai lam hpe shadum ya ai; makam masham greng ai htinggaw tai lu hkra shakut shaja ra ai lam hpe shadum ya ai.

San Pawlu tsun ai hte maren, anhte gaw htinglu htinglai ya ai kasa ni tai ra ga ai. Masha a gawng kya ai lam a majaw, hten byak nga ai ni hpe zinlum woi, matsan dum shading sharai ya ai ni tai ra ga ai. Marai lahkawng, uhpung lahkawng, hku hkau n mai mat ai lam nga jang, galoi mung lapran kasa tai ya nna htingram ya ai amu gaw galu kaba dik ai amu re ai lam hpe shadum ya ai.

 Karai a n htum n wai ai tsawra myit hpe adum sha rai hkam sha yu ga ai kun? Karai a tsawra matsan dum mara raw dat   ya ai lam hpe sung sung chye na hkra shakut yu ga ai kun? 
 Tinang hkum nan Kawa Karai a nta htinggaw kaw na hka mat, yen hkawm mat ai aten ni galoi, kade lang, gara hku wam dam yu ga ta?

 Kasha alat zawn, tinang galoi mung jaw dum, n shut dum, dinghpring dum ga ai kun?
 Tinang a prat hta htingram/htinglu htinglai garum ya ai amu kade lang galaw ya yu sai ta? Lit kaba re ai hpe dum ga ai kun?

2022: LUSHA GAM LADAW LABAN (4) NA CHYUM LAIKA

LUSHA GAM AI LADAW HTA LABAN 4

March 27, 2022
CHYUM MUNGGA DAW 1

YAWSHU 5:9a-12

Ya hti na gaw, Yawshu a Laika hta na rai nga ai.
Dai aten hta e Madu gaw Yawshu hpe, Dai ni, Egutu mung na kaya kahpa lam hpe nanhte kaw na galau kau ya ma sade ai, ngu nna tsun wu ai. Shaloi, Israela kashu kasha ni Gilgala shara e dap jung nna, dai shata shi mali ya shana de Yerihko pa e Shalai dat ai Paska poi sha ma ai. Paska poi sha ai hpang shani jang, dai mung na mam hte galaw ai, matsi n rawng ai muk hte mam nmyi shanhte sha lu ma ai. Dai mung na mam sha lu ai hpang shani kaw nna dai manna dawm mat sai: htawm hpang e Israela kashu kasha ni manna n lu sha ma sai. dai shaning shanhte gaw Hkanan mung na nsi naisi sha ma ai.
Karai Kasang a Mungga rai nga ai.

CHYUM MANGGA DAW 2

2 KORINHTU 5:17-21

Ya hti na gaw Korinhtu masha ni hpang de San Pawlu shagun dat ai Laika lahkawng hta na rai nga ai.
Hpu nau ni e, Hkristu hte matut mahkai hkrum ai wa gaw, masha nnan tai wa ai: prat dingsa htum mat nna, Shi prat nnan hta shang wa sai: Dai lam yawng mayawng hte gaw Karai Kasang kaw nna rai nga ai: Shi gaw Hkristu a Marang e anhte hpe Shi hkum lala hte htinglu htinglai ya mi ai; dai htinglu htinglai ya ai amu gun hpai na matu, Shi anhte hpe ahkang aya jaw da mani ai. Ngai tsun mayu ai gaw: Karai Kasang gaw Hkristu hta e nga nga nna, masha ni a ntsa e tinang a mara n shagun ai sha, mungkan ga hpe Shi hkum lala hte htinglu htinglai ya nga ai: dai htinglu htinglai ya ai lam a shiga hpe, Shi anhte kaw ap da ya mani ai. 
Dai re ai majaw, Hkristu a dat kasa ni anhte rai nga ga ai: Karai Kasang anhte a n-gup ga hku nna shadum jahprang ya ai hte maren rai nga ai. Dai rai nna, Karai Kasang hte htinglu htinglai nga mu, nga nna Hkristu a amying hte nanhte hpe akroi anoi hpyi nem nga ga ai. Shi hta e Karai Kasang a ding hpring ai ni anhte tai wa u ga, mara n chye ai wa Hkristu hpe, Karai Kasang gaw anhte a matu shut hpyit mara shatai wu ai.
Karai Kasang a Mungga rai nga ai.

KABU GARA SHIGA

LUKA 15:1-3, 11-32

Ya hti na gaw, Luka a Laika hta na Kabu Gara Shiga rai nga ai.
Dai aten hta e, Kang hta ai ni hte mara kap ai ni nlang hte gaw Shi a ga madat na nga, Yesu hpang de sa ma ai. Dai rai nna, Hparishe ni hte tara sara ni gaw, Ndai wa mara kap ai ni hpe hkap la nna, shanhte hte rau lu sha nga ai, nga nna aput angun nga ma ai. Shaloi  dai ni hpe ndai ga shadawn Shi tsun mu ai gaw: Masha langai mi shadang sha lahkawng lu ai. Dai yan hta kasha kaji mahtang gaw kawa hpe, Wa e, ngai la ang ai sali kumhtaw gaw, ngai hpe karan ya e, ngu nna hpyi yang, Kawa mung shan hpe sali wunli karan ya wu ai. 
Dai hpang nhtoi gade ya n na yang, kasha kaji gaw arai mahkra shinggyin la nhtawm, tsan ai mung de sa wa nna, dai shara e pyaw daw kadaw hkawm ai hte, shi a sut rai ginlut shamat kau wu ai. Shing rai lu malu shamat kau ma jang, dai mung e hku wa kaba hku wa ai rai nna, shi matsan chyaren hkrum magang nga ai. Shaloi dai mung na masha langai mi kaw shi sa shingbyi nga ai: dai wa shi a prang ga de, shi hpe wa rem shangun dat wu ai. Shaloi shi gaw, wa ni sha ai shapre kawp hte pyi, shi a kan jahkru mayu ti mung, kadai wa mung n jaw sha mu ai. Shing rai shi myit dum yang, Nye wa a shabrai sha ai ni gade wa n taw n tsang muk sha nga ma hka! Ngai wa gaw ndai yang e kawsi kyet ai hte hten bya magang wa nga nngai; Ngai rawt nna nye wa kaw wa nhtawm, Wa e, sumsing lamu hpe mung, nang hpe mung, ngai shut ni ai: ya kaw nna na nsha ngu na ngai n ging n dan nngai: na shabrai sha ai masha langai mi zawn ngai hpe tawn da e law, ngu na we ai, nga nna myit lu ai. 
Shing rai shi rawt wa nna, kawa kaw du wa ai. Shi tsan tsan naw rai nga yang, kawa gaw shi hpe hkap mu ai hte matsan yu dum nna, gat sa nhtawm, kasha a du hta noi ginshum let shi hpe a pup wu ai. Shaloi kasha gaw, Wa e, sumsing lamu hpe mung, nang hpe mung, ngai shut ni ai: ya kaw nna na nsha ngu na ngai n ging n dan nngai, ngu nna kawa hpe tsun nem wu ai. 
Kawa chyawm gaw shi a shangun ma ni hpe, Reng htum ai hpun palawng alawan la sa nna, shi hpe jahpun ya maru; shi a lata hta lachyawp chyawp ya maru; lagaw hta kyepding din ya maru; kawn tawn da ai dumsu kasha mung la sat mu: shing rai anhte kabu gara ai hte lu sha nga ga: hpa majaw nga yang, ndai ngai sha gaw si mat sai, ya bai hkrung sali ai; mat mat sai mung, ya bai mu la se ai, ngu mu ai: Shing rai shanhte pyaw pyaw rai nga ma ai. Kasha kaba wa chyawm gaw yi e nga nga ai. Yi de na wa nna shi nta du magang yang, chying bau dum ai hte ka manau ai nsen na wu ai. 
Dai rai nna, ma langai mi hpe shaga la nhtawm, dai kaning re ai rai nga ai, san yu wu ai. Dai ma gaw, Na nnau bai wa ai rai nna, nwa mung shi hpe hkam akaja sha hkap la lu ai majaw, kawn tawn ai dumsu kasha sat nu ai, ngu nna shi hpe tsun dan wu ai. Dai na jang shi masin pawt nna nhku de n shang hkraw wu ai. Shaloi shi a kawa pru sa nna, shi hpe sa nem wu ai.Dai kasha chyawm gaw, Yu u, nde nlaw ning tup na a nchyang amu ngai galaw nna, nang hkang da ai ga ngai galoimung n lai nngai rai ti mung, nye jinghku ni hte pyaw pyaw rai nga na, nang lang mi mung bainam kasha langai mi pyi, ngai hpe n jaw yu ndai. 
Shawa num ni hte kanawn nna, na a sut rai ginlut shamat kau ai ndai na nsha wa bai wa jang chyawm gaw, kawn tawn ai dumsu kasha, shi a matu nang sat nit hka, ngu nna shi a kawa hpe htan wu ai. Kawa gaw, Ngai sha e, nang gaw ngai hte rau tut anga nga ndai; nye a sut rai nga manga gaw, na a hkrai rai nga ai. Rai ti mung, pyaw pyaw rai kabu gara mai nga ai; hpa majaw nga yang, ndai na nnau gaw: si mat sai; ya bai hkrung ra ai: mat mat sai mung ya bai mu la saga ai, ngu nna shi hpe nem wu ai.
Madu a Kabu Gara Shiga rai nga ai.

2022: LUSHA GAM LADAW LABAN (3) NA MUNGGA

Marai hkum shagu hpe Karai e myit ra ai hku, langai hpra hta atsam ningja ni jaw da ai. Namsi hpun ni hpe yu yang, lamung hpun gaw lamung asi si jaw na; mungdung hpun gaw mungdung asi si jaw na matu re. Asi n si ya ai namsi hpun hpe gaw kran nna wan nat kau na sha akyu rawng sai. Masha langai hpra hpe Karai a yaw masing hte maren, nga pra shangun da ai; langai hpra hta rawng ai atsam ningja ni hpe akyu jashawn nna Karai Kasang myit mada ra sharawng ai apu asi si jaw ra ai. Kadai n nga, mara n kap sawng re ai masha n nga ai; myit malai lu nna shading sharai let asak hkrung lu na lam, Chyum Mungga ni hku nna shadum ya ai: “Nanhte mung, myit malai n lu mi yang, shanhte zawn hten bya hkrum na mi ai” nga ai.

Mungkan labau hta n hkru dik, gumsheng dik ai Adolf Hitler hpe shi a masha ni sat kau na matu law law lang gyam yu ma ai. Lang shagu, kanoi kanoi rai nna lawt mat ai. Karai e makawp maga da ya ai kun? Jahtum e shi a hkum hpe shi gap sat ai shaloi sha labau kre mat ai. Mara kata, sat kau hkrum ai ni law law nga ai zawn, shingra maka hta hkan nna hkala si ai ni mung law law. Shanhte hpe Karai e n maga ya ai, ngu na kun? 

Kabu Gara Shi-ga hku nna anhte yawng hpe shadum ya ai lam gaw, kadai n nga, aten masat da ai lam n nga ai, kaning re hkala nba mung hkrum katut chye ai; n myit mada ai hpa lam hku nna mung si wa lu ai, ngu ai lam hpe shadum ya ai: “Nanhte mung, myit malai n lu mi yang, shanhte zawn hten bya hkrum na mi ai” nga ai. Makam masham grak re ai ni rai tim, akyu hpyi let hkawm sa ai rai tim, hkala nba hkrum ai, si lawm mat ai ni lak lak. Si ging ninglen n si ai, asak lawt lu ai, “ganoi sha law” ngu hkai dan lu ai mahkrum madup mung law law hkrum yu na ga ai. Asak hpe tinang n madu ai. Hkrit tsang-hpa law law a lapran e asak hkrung nga shajang ga ai.

Ahkyak madung gaw Karai e jaw da ai chyeju kumhpa ni, atsam marai, ningja ni hpe akyu jashawn nna, langai hpra Karai Kasang hpe wenyi a apu asi si jaw na sha ahkyak ai. Dinghta aprat kade galu ra ai, ngu ai n rai. Karai e shadawn da ya ai hku hkan nna, tinang nang mung sadi maja let hkrung nga ra ai. Tinang a asak aprat, madu majing re ai Karai Kasang hpe tsep kawp ap nawng da chye na mahtang ahkyak dik ai. Tinang hpe Karai e jaw da ai chyeju atsam ni hpe chyeju dum chye let, masha law law hpe akyu jaw lu ai masha tai na ahkyak ai.

Shut hpyit mara a majaw, dingnye hkrum nna si mat ai ni mung nga na ma ai. Hkala nba hkrum shagu, nji nmu hkrum shagu, shut hpyit mara a majaw, ngu nna n tsun mai ai lam, Madu Yesu shadum ya ai. Akyu hpyi ai majaw hkala nba kaw na lawt lu ai mung lak lak rai na re. Akyu hpyi nna hkawm sa ninglen hkala nba hkrum ai, manghkang hkrum ai mung lak lak rai na re. Karai Kasang hpe kamsham tsawra ai ni a matu, hpa byin byin, Karai a lata hta myit pyaw ai hte nawng da lu ai. Byin wa ai lam hpa mi rai rai, hkap la chye ai.

San Pawlu shadum ai hta, moi na Israel amyu sha ni Panglai Hkyeng hpe rap tawng nna bu hkawm ai hkrun lam hta Karai e lu-hpa shahpa jaw ya ai. Bau sin makawp maga ai chyeju ni hkam la lu ninglen, hten bya hkrum ai ni law law rai ma ai lam shadum ya ai. Anhte a prat hta mung, sakramentu chyeju ni law law lang hkam la ninglen, myit n malai, myit ja nga nan ai rai yang, hten bya lu ai lam shadum ya ai.

Karai a maga hku nna gaw myit galu ai; mara lu ai wa shut hpyit mara hta si wa na lam hpe n sharawng ai. Maihpang hpun  asi n si jaw yang kalang ta n kran kau ai. Jahtum chyalai, la yu tim asi n si jang kran kau na lam tsun ai. Lu-sha gam/jahkran ai ladaw hta sha pyi, tinang hta gawng kya ra rawng ai lam hpe shading sharai lu na lam, tinang a hkum hpe ningdang nyet kau ai amu ni galaw mai ga ai. 
 Ru yak shoi chyum lama ma hkrum katut ai aten hta gara hku hkap la chye ga ai kun?
 N byin kam ai lama ma, hkrat sum ai lam lama ma hkrum katut ai aten hta gara hku sharai la chye ga ai kun?
 Tinang lu lawm awng dang ai daram, masha ni hpe gara hku akyu jaw nga ai kun?    

2022: LUSHA GAM LADAW LABAN (3) NA CHYUM LAIKA

LUSHA GAM AI LADAW HTA LABAN 3
March 20, 2022
CHYUM MUNGGA DAW 1

PRU MAT WA AI 3:1-8a, 13-15

Ya hti na gaw, Pru Mat Wa Ai Laika hta na rai nga ai.
Dai aten hta e, Mawshe gaw shi a katsa Yehtru ngu ai Midian hkinjawng a sagu bainam hpung hpe rem nna nga nga ai. Dai hpung ni hpe nam mali jahtum de shi gawt sa wa ai rai nna, Horeb ngu ai Karai Kasang a bum de sa du ai. Shaloi Karai Kasang a lamu kasa gaw singwum hta shi kaw dan pru ai: dai hpe shi yu yu yang, wan grung nga timung singwum gaw n hkru mat nga ai. Dai rai nna, Mawshe gaw, Singwum hpa rai n hkru mat ai kun? Mauhpa lam kaba wora hpe ngai sa yu se ga, nga ai. 
Shi sit sa wa ai hpe madu mu yang, Karai Kasang gaw, Mawshe e, Mawshe e, nga nna dai singwum kata na shi hpe shaga ai: shi gaw, Nang e rai nga nngai, ngu nna htan wu ai. Shaloi Karai Kasang gaw, Nang de hkum sit nit; na a kyepdin raw kau u; dai nang kabye ai ga gaw chyoi pra ai ga rai nga ai, nga nna mung; Ngai gaw na nwa a Karai Kasang, Abraham a Karai Kasang, Isak a Karai Kasang, Yuku a Karai Kasang rai nga nngai, nga nna mung tsun wu ai. Dai rai nna, Mawshe gaw Karai Kasang hpe yu na hkrit wu ai majaw, shi a myiman magap da wu ai. 
Bai Madu gaw, Egutu mung e nye a amyu hkrum ai ru tsang lam hpe ngai mu se ai rai nna, shanhte a hpareng ni a majaw hkrap sharung ai nsen hpe ngai na ya mase ai: shanhte hkrum ai nni nkri hpe ngai chye nga nngai: shanhte hpe Egutu masha ni a lata na hkye hkrang la na hte ,dai mung kaw nna ja kat ai hte kaba nga ai, nga chyu hte lagat jahku lwi ai mung de woi wa na, ngai yu sa ring ngai. 
Shaloi, Mawshe gaw, Yu u, Israela a kashu kasha ni hpang de ngai sa du nna, Nanhte a nji nwoi ni a Karai Kasang gaw ngai hpe nanhte hpang de shangun dat nngai, ngu mawe yang, shanhte mung, Dai Karai Wa a mying ningsang kaning nga lu ta? Nga nna san yang, ngai kaning ngu bai htan na rai ta? ngu nna Karai Kasang hpe sun wu ai.Shaloi Karai Kasang gaw, NGAI A RAI NGA NNGAI; dai wa nan ngai rai nga nngai. NGAI A RAI NGA NNGAI nga ai wa gaw nanthe hpang de ngai hpe shangun dat ni ai, ngu nna Israela a kashu kasha ni hpe nang tsun na rin ndai, ngu nna Mawshe hpe tsun wu ai. Bai Karai Kasang gaw Mawshe hpe, Nanhte a nji nwoi ni a Karai Kasang, Abraham a Karai Kasang Isak a Karai Kasang, Yaku a Karai Kasang ngu ai Madu gaw, ngai hpe nanhte hpang de shangun dat ni ai, ngu nna Israela a kashu kasha ni hpe nang tsun na rai ndai: dai gaw htani htana nye a amying rai nga na li ai; dai gaw prat mi hte prat mi na nye a masat dingsat mying rai nga na lit ai.
Karai Kasang a Mungga rai nga ai.

CHYUM MUNGGA DAW 2

1KORINHTU 10:1-6, 10-12

Ya hti na gaw Korinhtu masha ni hpang de San Pawlu shagun dat ai Laika langai hta na rai nga ai.
Hpu nau ni e, Ndai lam langai mi hpe nanhte n chye n mai ai ngu nna, shadum dat nngai. Ngai tsun mayu ai lam gaw: Anhte a ji wa ni yawng gaw dai sumwi npu e gawp ma ai hte, nawng lapran hku rap sa wa ma ai. Shing rai, yawng hte gaw dai sumwi hte nawng hta e, Mawshe hte matut mahkai ai hkrum lu hkra kashin kamun hkam la ma ai. Shanhte yawng hte gaw dai mauhpa shahpa maren sha nna, dai mauhpa luhpa mung maren lu ma ai. Kaning rai nme law, shanhte kaw hkan nang ai mauhpa lunghkrung hta na shanhte lu ma ai rai nna, dai lunghkrung gaw Hkristu rai nga ai. Rai ti mung, shanhte hta na malaw maga hte hpe Karai Kasang n sharawng da mu ai rai nna, shanhte dai nam mali hkan e run byak mat ai hkrum ma ai. 
Anhte a ji wa ni gaw n kaja ai arai hpe myit marin nga ma ai zawn, anhte n marin u ga she, dai lam hte gaw anhte a matu shari tai wa masai. Shanhte nkau mi aput angun nga ma ai zawn, nanhte gaw aput angun hkum rai myit; dai ni gaw Jahten ai Wa a lata e hten byak ai hkrum manu ai. Dai lam yawng hte gaw shari tai u ga, shanhte hta byin wa sai rai nna, anhte hpe sharin achyin ya na matu ka da nga ai; kaning rai nme law, anhte a aprat hta e dai ahtik labau ni dik wa sai rai. Dai rai nna, marai langai ngai gaw jan rai tsap nga nngai, nga nna myit yang gaw, shi n kadawng u ga sadi ra ai.
Karai Kasang a Mungga rai nga ai.

KABU GARA SHIGA

LUKA 13:1-9

Ya hti na gaw, Luka a Laika hta na Kabu Gara Shiga rai nga ai.
Dai aten hta e, masha nkau mi Yesu kaw sa du nna, Pilatu gaw Galile masha nkau mi a asai hpe, shanhte nawng ya ai hkungga asai hte kayau kau ai lam, Shi hpe tsun dan mu ai. Shi shanhte hpe, Dai Galile masha ni shing re ai hkrum ma ai majaw, Galile masha yawng hta mara grau law ai ngu nna nanhte myit da mu ni? Dai nrai; ngai nanhte hpe tsun de ga: nanhte mung myit malai n lu yang gaw, nanhte nlang dai hte maren hten bya mat na marin dai. 
Ndai ga shadawn mung Shi tsun wu ai gaw: Masha langai mi shi a tsabyi sun hta hkai da ai maihpang hpun langai mi tu lu ai rai nna, dai hta na asi sa tam yang, n mu wu ai.  Dai rai nna shi gaw, Ngai masum ning tup dai maihpang hpun hta na asi sa tam ti mung, n mu we ai; dai hpe kran kau u; hpa rai ga lahpawt tu nga na a ta? Ngu nna sun lajang ai wa hpe tsun wu ai. Dai wa gaw, Madu e, dai ning sha gaw naw tu nga yu u ga; de a nhpang grup e ngai htu kapun nna hpun apawm na we ai: dai hpang asi si yang gaw tu nga u ga: asi n si yang gaw nang kran kau na rai nga ai, ngu nna madu hpe htan wu ai.
Madu a Kabu Gara Shiga rai nga ai.

2022: LUSHA GAM LADAW LABAN (2) NA MUNGGA

Ndai dinghta ga e mu lu ai baw, hkam sha lu ai baw yawng gaw galai shai lu ai, jahtum e htum mat hten mat ai kaw kre ai. Karai e shagrau ya na hpung shingkang, asak aprat ningnan gaw htenza mat lu ai n rai; myi na hte mung, myit hte mung, n hkawn hkrang lu ai sumsing mungdan na shabrai kumhpa gaw kaba la ai lam, Karai a ga-sadi gaw n shut n shai re ai lam hpe shadum ya ai. Petru, Yaku hte Yawhan, shanhte masum gaw asam galai shai wa ai, hpung shingkang hkam la ai Yesu hpe mu la ai lam hta, sumsing mungdan na hpung shingkang hpe praw rai gan mu la ma ai. Kasa Pawlu mung ning nga nna shadum ya ai, “Anhte a nta majing gaw sumsing mungdan e she re; sumsing mungdan kaw na yu sa ai hkye la Madu hpe anhte ala nga ga ai. Anhte a hten yat chye ai hkum hkrang hpe shi a htoi kabrim ai hpung shingkang hte shabung nna galai shai ya na ra ai” nga ai.

Lu su matsan ai n nga, gumhpraw hte arung arai ni hkoi shap lang shajang ga ai. Gumhpraw hkoi lang nna hka n wa ai ni mung law law, arai shap lang ai hpang lawan bai htang jaw n kam ai ni mung law law. Ga-sadi dung ai ni hpe kam ga ai. Ga-sadi n dung ai ni hpe matsat ga ai. Tinang hkum nan mung ga-sadi hprai ai lam law law nga yu sai lam hpe myit dum mai ga ai.

Abraham gaw Karai e jaw ai ga-sadi hpe chyip mak kam ai. Masha e sawn yu yang n byin mai ai lam hpe rai tim, Abraham gaw Karai Kasang hpe kam ding-yang sha re. N mai byin ai amu ni hpe mung Karai e shabyin lu ai lam shi kamsham ai. Dai majaw, Abraham gaw makam masham a ji-jum daju tai wa ai. Shi a aru arat ni Karai a shaman chyeju, sutli wunli hkam la lu ma ai. Abraham a amyu matu Israel amyu madu la lu na Kanan buga de hkum nan n du lu na rai tim, Karai Kasang gaw shi hpe praw rai, tsan kaw na mada mu shangun ai.

Karai Kasang Abraham a aru arat ni hpe jaw ai lamu, Egyip mundan kaw nna (ya na) Iraq mung du hkra dam lada dik ai; ya dai ni anhte chye ai hku rai yang, mungkan e sut su dik ai lamu ga, wan-sau pru dik htum ai buga she rai nga ai. Mungkan ting hte matut mahkai hpaga ga na matu kaja dik htum ai shara she rai taw nga ai. Prat sanat, Isarael amyu sha ni n kangka ai majaw, ya na Palestine buga loi sha mi madu la lu ma ai; Karai e masat ya ai mahtang dam pa dik, dut sha n ma ai wan-sau lamu ga hpe tat kau ma ai. Karai a maga ga-sadi dung ai majaw, dai nip rat du hkra, Israel myu sha ni hpe Karai e n malap kau ai. Lamu ga hkraw hkun dik ai buga, nhprang sut rai taw dik ai lamu ga e she nga nga ma tim, madang tsaw dik ai hku hkai sha lu ai hte hpaji kunghpan dik ai, sut su dik ai amyu naw tai lu ma ai.
Hkristu hpe kamsham ai ni gaw ningnan re ai Israel amyu masha, sutli kumhtaw dagraw la na amyu masha tai wa ma ai.

Anhte hte Karai a lapran shabung shadawn hkat na lam hpa n nga ai. Rai tim, kashin kamun a marang e Karai e jaw ai ga-shaka hta hkik hkam dik htum ai arawng sadang hpung shingkang jaw na lam tsun ai. Masha a maga gaw Karai a tara matsun ni hpe hkan shatup na ga-sadi hte ga-shaka shagrin da ai rai nga ai. Anhte Karai Kasang hpe ap nawng jaw kau ra ai gaw hpa mi n rai, Karai a maga jaw ya na shagrau kumhpa mahtang shadawn n mai kaba la nga ai.

Moi na Israel amyu ni sadi n dung ai zawn, anhte langai hpra mung Karai hpe jaw da ai ga-sadi tawt lai kau ai, hprai kau ai kade lang, kade she sawng ai, ngu ai hpe myit dum myit malai ra ga ai. Anhte shinggyim masha ni n kangka ai rai tim, Hkristu a marang e, Shi hta jung noi nga ai a marang e, Karai Kasang gaw kamsham ai ni hpe teng sha shagrau ya na lam n shut n shai rai nga ai.

Ndai dinghta ga e anhte chye lu ai pyaw-hpa yawng hpe tawt lai nna, Karai e hkyen lajang da ya ai sumsing mungdan hpe mada yu let, Karai a ga-sadi hpe n shut n shai kam ging ga ai. Tinang tsawra dik ai tinang a hkum, si mat hten mat ai kaw kre mat na rai tim, jahtum e ningnan re ai hkum hkrang bai lu la nna, hpung shingkang sutli dagraw hkam la lu na ga ai. Anhte a gingdan ai lam a majaw n rai, Hkristu a marang e sha anhte mung hpung shingkang hkam la na teng sha myit mada lu ga ai.

 Hkrat sum ai aten, machyi makaw yawn hkyen hkrum ai aten, myit htum myit daw ai aten ni hta tinang a prat jahtum na bandung hpe myit dum ga ai kun?

 Sut lu nga mai ai aten, hkam kaja ninggun rawng ai aten, pyaw hpa law law hkam la lu ai aten ni hta sumsing mungdan hte seng ai ga-sadi ni hpe malap mali byin chye ai kun?
 Yesu a wudang gaw Karai a n htum n wai tsawra ra ai myit a kumla re ai lam myit yu mai ga ai n rai a hka?

2022: LUSHA GAM LADAW LABAN (2) NA CHYUM LAIKA

LUSHA GAM AI LADAW HTA LABAN 2
March 13, 2022
CHYUM MUGGA DAW 1

NPAWT NHPANG 15:5-12, 17-18

Ya hti na gaw, Npawt Nhpang Laika hta na rai nga ai.
Dai nhtoi hte hta e, Karai Kasang gaw Abram hpe shinggan de woi shapraw nna, Sumsing lamu de mada yu u; dai shagan ni hpe nang dang hti yang gaw hti yu u: na a myu matu ni dai hte maren rai na mara ai, ngu nna shi hpe tsun wu ai. Abram mung Madu hpe kam sham wu ai rai nna, dai gaw shi a ding hpring ai lam ngu nna Madu sawn la ya wu ai. Bai Shi tsun wu ai gaw, Ndai mung hpe na a sali wunli shatai na matu, ngai nang hpe jaw sana nga nna, Hkaladea masha ni nga ai Ura mare kaw nna nang hpe shaga woi wa ai Madu ngai rai nga nngai, ngu wu ai.
Shaloi Abram gaw, Madu e, dai mung nye a Sali wunli tai na gaw, ngai kaning di chye lu na rai ta? ngu nna san wu ai. Madu gaw, Masum ning du ai dumsu upra langai mi, masum ning du ai bai nam yi langai mi, masum ning du ai sagu la langai mi hte u hkru du langai mi, ura kasha langai mi nye a matu la tawn u, ngu wu ai, Dai hte maren dai ni nlang hte hpe shi la tawn nna, hkum shagu hpe ka-ang brang brang di ga nhtawm, maga mi de chyen chyen di nna jahka tawn wu ai: u yan hpe chyawm gaw shi n ga wu ai. 11U matse ni dai mang de pyen hkrat ma timung, Abram dai ni hpe hkap gawn kau wu ai. 
Jan du wa jang, Abram gaw yup sha-up hkrum nna, ja htat ai nsin hta hkrit gari mat wa ai. Jan shang mat nna, nsin htat nga ai shaloi, wan hkut hku ai wan mang hte, wan tu ai shanan paw pru nna, shan chyen ni a lapran hku lai mat wa ai. Dai shani e Madu gaw Abram hte ga shaka tawm da nna, Egutu hka nu kaw nna Uhprat hka nu kaba du hkra dam ai lamu ga hpe, na a amyu matu ni hpe ngai jaw da se ai, ngu nna tsun wu ai.
Karai Kasang a Mungga rai nga ai.
 
CHYUM MUNGGA DAW 2

HPILIPI 3:17-21, 4:1

Ya hti na gaw, Hpilipi masha ni hpang de San Pawlu shagun dat ai Laika hta na rai nga ai. 
Hpu nau ni e, Nanhte hpawm nna, ngai madun dan ai kasi hte maren hkan galaw nga mu. Anhte gaw nanhte a kasi ningli tai saga ai rai nna, dai zawn hkan nang ai ni hpe yu matsing nga mu. Kaning rai nme law, shawng e ngai nanhte hpe law law lang tsun dan nna, ya e pyi hkrap let nanhte hpe tsun dan nga nngai hte maren, Hkristu a Udang hte nhtan shai ai hku hkan galaw ai ni law law nga ma ai. Shanhte a chyahtum ai gaw hten byak ai rai nga ai; shanhte a Karai Kasang gaw tinang a kan rai nga ai; tinang a kaya kahpa hta gumrawng nga ma ai; dinghta ga na arai ni hpe hkrai myit tsang nga ma ai. 
Anhte a buga chyawm gaw sumsing lamu hta e rai nga ai; dai yang nna Madu Yesu Hkrsitu ngu ai Hkye Hkrang La ai Wa hpe anhte ala nga ga ai. Shi gaw arai yawng mayawng hpe Shi a npu e tawn da lu na atsam a marang e, anhte a grit nem ai hkum hkrang hpe ningnan galai nna, Shi a hpung shingkang rawng ai hkum hkrang hte bung hkra, shachyaw jahtap na ra ai. Dai rai nna, ngai tsaw rai ai hte sharawng awng nna, nye a kabu gara shara hte janmau rai nga ai, jinghku ni e, dai Madu hta dakan dakring rai nna tsap nga mu, ngai tsaw ra ai ni e.
Karai Kasang a Mungga rai nga ai.

KABU GARA SHIGA

LUKA 9:28b-36

Ya hti na gaw, Luka a Laika hta na Kabu Gara Shiga rai nga ai.
Dai aten hta e, Yesu gaw Petru, Yawhan, Yaku hte hpe woi wa nna, akyu hpyi na nga bum ntsa de lung wa ai. Akyu hpyi nga yang, Shi a myiman gaw ahpraw nsam galai mat nna, Shi a hpun palawng mung hpraw tu ai hte, kabrim kabram rai wa lu ai.Shaloi, Mawshe yan Elia ngu ai masha lahkawng, hpung shingkang hte dan pru nna, Yerusalem mare e shatup na ra ai, Shi lai wa na lam Shi hte ga tsun nga ma ai. 
Petru hte shi a manang yan gaw yup shamwi nga ma ai; rai ti mung, n yup ai sharang nna, Shi a hpung shingkang hte Shi hte rau tsap nga ai hpe mu ma ai. Dai yan gaw Yesu kaw na wa magang yang, Petru gaw, Madu e, ndai yang e nga na anhte a matu mai nga ai; nang e Na a matu langai mi, Mawshe a matu langai mi, Elia a matu langai mi, sum masum, anhte gap saga nga nna Yesu hpe tsun wu ai; rai ti mung, shi hpa tsun ai n chye wu ai. 
Dai ga tsun nga yang, sumwi du nna shanhte hpe ka-up wa nga ai: dai sumwi kata de shang lawm wa yang, shanhte hkrit nga ma ai. Dai sumwi hta na nsen ngoi pru wa nna, Ndai wa gaw, ngai Sha, ngai lata la ai Wa rai nga ai: Shi a ga madat mara mu, nga ai. Dai nsen ngoi pru wa ai hpang, Yesu shi hkrai nga ai hpe mu ma ai; sape ni mung atsin sha nga nna, shanhte mu ai lam ni hpe, dai aten hta kadai hpe mung n tsun dan ma ai. Madu a Kabu Gara Shiga rai nga ai.

2022: LUSHA GAM LADAW LABAN (1) NA MUNGGA

Hpa lu hpa sha na, hpa galaw na, ngu, shani shagu na matu myit tsang ra ga ai; grup-yin e shingjawng hkat ra ai lam ni law law, dangrang hkat ra ai lam ni law law re ai a lapran hkrung nga ga ai. Tinang lu lawm ai hta myit n dik, byin tai nga ai madang hta myit n dik lu ai majaw, myit n pyaw myit n dik rai shajang ga ai. Byin mayu, ra mayu re ai majaw nji n mu hkam sha ai kade she law a hka! Chyum Mungga ni hku nna sharin ya ai lam gaw ndai re: tinang byin tai nga ai daram, lu lawm ai daram myit dik myit pyaw chye na lam ahkyak ai. N lu n mai, n lang n mai re ai baw ni hpe lu da jang myit dik chye ai a majaw myit simsa lam lu la ai gaw manu dan dik ai. Wan-u hte wudang, zaibru jang hte katsi katsang nga ai shara, lu-sha gam ai amu hte mara dam hka wa ai amu, ndai ni gaw namak lawhpa hte agung alau ni hpe dang kau lu ai laknak kaja ni rai nga ai.

Dinghta prat hta n lu n mai, n lang n mai ai hpa hpa wa rai ta? Mahtai gaw law law re. Lu-hpa sha-hpa, dum nta hte machyu shara, manaw manang hte jinghku kaja ni, bu hpun nba, motorcycle, handphone, kaga law law rai nga ai. Lu-hpa sha-hpa, ngu ai shaloi, kaja wa hkum sai shan a matu ninggun tai ai baw hpan ni hpe lu sha na lata la mai ai zawn, manu grai laja ai baw, lu sha dan yang arawng madun lu ai baw mari sha mai nga ai.

Akyu jaw nna shangun lang mai ai baw motorcycle, hand phone lang mai ninglen, manu laja grau ai, model ningnan ni hpe mari lang nna gumrawng dan mai nga ai. Reng grau ai, kaba grau ai, tsawm grau ai, manu laja grau ai, dz., dz., grau ai grau ai ngu ai hpang shachyut nna ba kalawp si ai ni kade lang she rai a hka! Ra mayu lu mayu nna mahkawng da ai arai ni law law hpe kyem da ai na jang hpang e majoi kabai kau ra ai dinghku rai ni mung kade she law a hka!

Moshe gaw shawa masha ni hpe shadum ai__ Karai Kasang gaw chyeju yawng a ningpawt, chyeju madu majing re ai majaw, langai sha re ai Madu Karai Kasang hpe chyu sha nawku jawjau na lam htet matsun ai. Israel amyu masha a ru-pawt ninghpang hpe gawn dat yang, bu hkawm masha, lamu ga n lu ai, kaga amyu ni hpa n sawn ai, kaji kadun rai nga ai kaw na Egyip mung e amyu masha langai hku byin tai wa ai. Mayam prat kaw na mung hkye shalawt dat ai hkrum nna Kanan mung hpe kashun madu la lu ai Israel amyu, grit nyem ai myit hte Karai Kasang hpe nawku jawjau let chyeju htang chye na lam, Moshe matsun ai. Gumrawng gumtawng ai myit n rawng na lam shadum ya ai. Anhte kadai n nga, tinang byin tai nga ai, la lawm ai, hkam kaja ai, awng dang ai…. yawng hta gumrawng myit n rawng ai sha, Karai Kasang hpe chyeju dum shakawn ra ga ai.

Anhte bu hkawm na rai jang, hkrun lam a matu n gun n mai, ra nan ra ahkyak madung re ai arai ni hpe sha baw gun ga ai. Lit tsang lu ai daram shatsang nna hkrun lam hkawm ga ai. Yesu gaw mare kahtawng hte tsan hkran ai, shingran katsi ai shara de sa nna shi hkrai myit sumru akyu hpyi ai. Mungkan ga, dinghta ga hte seng ai lam ni yawng hpe kau da nna Karai Kasang hta myit maju jung let, wenyi a atsam marai jahpring la ai. Shi hkrai sha, Karai Kasang hte matut mahkai nna nga nga tim pyi nat satan a agung alau hpe hkrum katut ai. Nhtoi na wa jang hkum shan hta ra kadawn ai lam hpe ja ja hkam sha ai. Hkum sai shan hte myit masin a matu ra kadawn ai lam hpe dum wa ai aten hta agung alau mung ja dik ai aten rai nga ai.

Anhte a prat, modern prat hta kaja wa ra ai, akyu jashawn ra ai baw, n lu n mai ai hta lai jan nna, gat rai dut ai ni hpe maram yu ga: ndai baw grau sau ai, mu grau ai, tsawm grau ai, reng grau ai; ndai baw hpan grau kaja ai, grau reng ai ngu nna mung, ndai baw wora baw hpe lu mu, sha mu, bu hpun mu, shapyaw la mu… nga nna mari lang ai ni hpe gunglau ai ladat law law nga nga ai. Pyaw hpa lam ni mung law law; lata la mai ai hpan mung law law re ai aprat rai nga ai. Ra ahkyak madung ni gaw hpa hpa wa rai ta?

Wandap, wan-u, wudang, ndai ni gaw hpa hpa hpe shadum ai rai ta? Kawsi hpang gara ai, machyi makaw, nni nkri, yawn hkyen shoi-hpa, myit kaji karen ai, hkrat sum ai, myit daw ai, kaya hkrum ai…. ndai zawn re baw ni a kumla rai nga ai. Tinang n ra sharawng ai, koi kau mayu ai rai tim, masha langai a prat hta kahtap kahtap nna hkrum katut ga ai. Dai wudang hkrun lam a jahtum e si mat nna wan-u zawn ga numhpu tai mat na ga ai. Karai a man e hpa wa gumrawng shara nga a ta?

Moshe gaw shalawt dat hkrum ai Israel amyu masha ni hpe shanhte a ji-jum daju a ru-pawt hpe gawn dan ai: matsan mayan bu hkawm ai amyu, lamu ga n lu ai amyu she re ai. Matsan mayan re ai amyu matu kaw na hkrawn hkrat ai hpe Karai e matsan dum sharawt shagrau da ai lam myit dum shangun ai. Prat ban shagu na makam masham a kasha ni mung, masha a ru pawt gaw ga numhpu kaw na re ai, ga numhpu tai ai kaw kre na lam myit dum ra ga ai. Ga numhpu kaw na asak ningnan prut pru nna n htum n wai ai, pyaw hpa n htum ai lu ai asak aprat hpe myit mada lu na matu, lu-sha gam ai ladaw nhtoi mali-shi ya masat da ya ai. Masha hta ra ahkyak dik htum ai hpa hpa sha re ai, ngu ai lam hpe myit sumru nna, mungkan ga a agung alau ni hpe ningdang nyet kau lu na lam shakut la mai ai aten ladaw gaw lu-sha gam ladaw rai nga ai. Karai a man e pyet pyet taw nna gumrawng gumtawng myit, rai dum ai myit, nammak lawhpa hte marin ai myit ni hpe renghkang lu na lam shakut ra ai aten ladaw rai nga ai.

 Dai ning na lu-sha gam ladaw hta kaning re ai baw n kaja ai lailen ni hpe kau da na myit lu a ta?
 Dinghta ga a lam hta shingjawng lawm nna ba kalawp si ai baw hpa hpa wa rai a ta?

2022: LUSHA GAM LADAW LABAN (1) NA CHYUM LAIKA

LUSHA GAM AI LADAW HTA LABAN 1
March 16, 2022
CHYUM MUNGGA DAW 1

TARA JAHPRANG 26:4-10

Ya hti na gaw, Tara Jahprang Laika hta na rai nga ai.
Israela masha ni yawng hte hpe Mawshe ning nga ai: Hkinjawng agyi wa gaw shawng myin ai nsi naisi amyu shagu hpe na a lata na la nna, na a Madu Karai Kasang a tawn hkungri a man e tawn da na rai wu ai. Shaloi na a Madu Karai Kasang a man e nang tsun na gaw: Nye wa gaw brak hkawm ai Arame masha rai nga ai; shi gaw n law n htam ai masha ni hte rau Egutu mung de yu wa nna, galu kaba ai hte atsam rawng nna law htam ai amyu tai wa lu hkra, dai yang e shingbyi nga ai.
Egutu masha ni chyawm gaw anhte hpe n htum nni zingri zingrat ai hte, aja awa yam sha kau mi ai. Shaloi anhte a ji wa ni a Madu Karai Kasang hpang de anhte hpyi jahtau saga ai rai nna, Madu anhte a nsen madat mara ya ai hte, anhte hkrum ai bungli lit hte nni nkri hpe yu ya mi ai. Dai rai nna, Madu gaw n-gun ja ai lata hte ladawn dat ai lahpum, hkrithpa lam law law hte lamik kumla mauhpa amu madun nna, Egutu mung na anhte hpe shaw woi wa nhtawm, nga chyu hte lagat jahku lwi ai ndai mungdan hta woi shawn tawn da mani ai. Ya, Madu e, Nang ngai hpe jaw ai yi hkauna a shawng myin ai nsi naisi ngai la sa ring ngai, ngu nna na a Madu Karai Kasang a man e nawng let, Shi hpe dingnyawm nawku na rai ndai.
Karai Kasang a Mungga rai nga ai.

CHYUM MUNGGA DAW 2

ROMA 10:8-13

Ya hti na gaw, Roma masha ni hpang de San Pawlu shagun dat ai Laika hta na rai nga ai.
Hpu nau ni e, Chyum Laika hpa tsun a ta? ‘Dai Mungga gaw nang hte htep rai nga ai; na a n-gup hte kraw lawang hta e rawng nga ai,’ dai gaw anhte hkaw tsun dan ai makam masham rai nga ai. Shingrai, ‘Yesu gaw Madu rai nga ai,’ nga nna na a n-gup ga hte hkap hta la nna, Karai Kasang si mat ai ni kaw na Shi hpe hkrung sharawt la ai hpe, na a myit masin hta kamsham yang gaw, nang hkye hkrang la ai hkrum na rin dai. Kaning rai nme law, myit masin mahkra hte kam sham yang gaw, ding hpring ai lu la na ra ai; n-gup ga hte dai makam masham hpe hkap hta la yang gaw hkye hkrang la ai hkrum na ra ai. 
Chyum Laika gaw Shi hpe kam sham ai ni yawng mayawng hte gaw kaya kahpa n hkrum na ra ai, nga nna tsun ai. shaloi, Yuda ni hte Greka masha ni hpe n ginhka nga ai: dai Madu gaw yawng mayawng a ntsa na Madu langai sha rai nga ai; Shi hpe shaga ai ni yawng mayawng hpe garum na matu, Shi chyeju sutgan hte hpring nga ai. Shingrai, Madu a mying ningsang hpe shaga ai masha kadai mung hkye hkrang la ai kaw du lu na ra ai.
Karai Kasang a Mungga rai nga ai.

KABU GARA SHIGA

LUKA 4:1-13

Ya hti na gaw, Luka a Laika hta na Kabu Gara Shiga rai nga ai.
Dai aten hta e, Yesu gaw Chyoi Pra ai Wenyi hte hpring let, Yawdan hka nna bai wa yang, dai Wenyi e nam mali de nhtoi mali shi ya tup woi hkawm wu ai rai nna, nat e gunglau ai hkrum wu ai. Dai nhtoi mahkra a laman e Shi hpa mung n sha ai rai nna, jahtum ai de kraw si wu ai. Dai rai nna Nat gaw, Nang Karai Kasang a Kasha rai yang gaw, ndai nlung hpe muk tai u ga tsun u, ngu nna Shi hpe tsun wu ai. Yesu htan let, Masha gaw muk hte sha hkrung nga lu na n rai, nga nna ka da nga ai, ngu wu ai. 
Bai, Nat gaw Shi hpe tsaw ai shara de woi lung nna, mungkan ga na mungdan nlang hpe myi grip mi hta madun dan nna, Ndai ahkang aya mahkra hte, dai mungdan ni a hpung shingkang hpe ngai nang hpe jaw na de ai: dai gaw ngai hpe ap ya ni ai rai nna, ngai jaw mayu ai wa kadai hpe mung jaw lu nngai. Dai re ai majaw, nye a man e nang nawku yang gaw, ndai yawng mayawng na a tai na ra ai, ngu nna Shi hpe tsun wu ai. Shaloi Yesu gaw, Dai Madu na a Karai Kasang hpe nang nawku lu na rai nna, Shi hpe hkrai daw jau lu na ndai, nga nna ka da nga ai, ngu nna htan wu ai. 
Bai, Nat gaw Yerusalem mare de Shi hpe woi sa nna, Nawku Htingnu a nchyun e shadun tawn nhtawm, Nang Karai Kasang a Kasha rai yang gaw, Na a hkum hpe nang de nna le ra de jahkrat dat u; kaning rai nme law, Nang hpe bau sin na, Na a matu Shi a lamu kasa ni hpe Shi hkang da nu ai; Bai, Nlung hta Na a lagaw n ahtu u ga, shanhte a lata hta Nang hpe pawn la na mara ai, nga nna ka da nga ai, ngu wu ai. Yesu gaw, Dai Madu na a Karai Kasang hpe nang chyam yu lu na n rai, nga nna rawng ai, ngu nna htan wu ai. Nat gaw agung alau lam mahkra shatup ngut jang, bai sa ang ai aten du hkra Shi kaw na pru wa ai.
Madu a Kabu Gara Shiga rai nga ai.