2018:PRANWAN LADAW LABAN (22) NA MUNGGA

Tinang a hkum hpe nyet kau nna ngai hpang de hkan nang u ngu Madu Yesu saw shaga ai shaloi Shi a tara lam ni hpe hkan shatup let jet ai ali ama ni tai na matu shakut shaja ai lam re. Dai rai yang Karai Kasang a tara lam ni hte shinggyim wuhpung wuhpawng a ripkawp tara lam ni yawng hpe hkan shatup ra na re.

Ripkawp tara lam ni hpe hkan shatup let kaja ai masha byin tai wa lu na matu gaw shawng nnan na, ahkyak dik ai, yaw shada ai lam re. Kaja ai masha ngu ai shaloi Karai Kasang hte Htingbu wa hpe tsawra chye ai masha re.

Kaja ai masha langai tsawra myit kaba hte manang wa hpe garum la na matu ripkaw tara ni hpe kalang lang nhkan shatup ai hte, nkaja ai masha langai tinang a tinggyeng myit a majaw tara lam ni hpe tawt lai ai gaw shai nga ai. Ripkawp tara lam ni hpe hkan shatup let kaja masha byin tai wa lu nna Karai Kasang hte htingbu wa hpe amu bungli hte teng sha tsawra myit hpe madun dan lu na matu shakut shaja lu u ga.

MAKAM MASHAM A AKRI MADUNG

“Makam masham a akri madung gaw Nawku Htung hte Tara Upadi hpe hkan ai lam N rai, Karai Kasang hte htingbu wa hpe tsawra ai lam rai nga ai”

Scotland myu sha, Karai hpaji ninghkring ‘William Barclay’ gaw “Rabbi dingla marai mi, Roma ni a hkyuk htawng kaw bawng dung ai lam hpe tsun dan sai. Dai ‘Rabbi’ gaw lu sha hte hka jarik lu la nga ai. Aten ni lai wa ai hte Rabbi wa gaw n-gun yawm nna si wa sai. Hpang jahtum gaw tsi sarawun shaga ra ai aten du ni ai. Shi hta byin ai gaw hkum hkrang hta ‘hka’ dat n nga ai kumla yawga re ai hpe sagawn la lu ai. Dai hpe tsi sarawun tang madun ai majaw hkyuk htawng sin du ni gaw mau mat sai. Kaning rai nna dai Rabbi wa a hkum hkrang hkun hkraw wa ai kun myit ya n lu rai nga sai. Shi hpe jaw ya nga ai lu hka gaw n law la nga tim, ram daw rai nga ai. Sin hpyen la ni gaw dai dingla wa hpe atsawm sin yu nga ma ai. Dai shaloi she manghkang hpe chye lu sai. Rabbi gaw nawku htung tara nga ai hte maren, akyu rai n hpyi shi yang, lu sha rai n sha shi yang lagaw lata kashin kau ai majaw, lu na matu ‘hka’ n lu mat ai hpe hpyen la ni mu chye ya sai. 

Dai ni na kabu gara shiga hta lawm ai, Sape ni lata n shin ai shat sha ai majaw shanhte a htung tara hpe n hkan ai mu nna, Yuda hpung ningbaw ni mau ai hte kajawng ai lam hpe anhte chye na na matu ndai mabyin gaw shaleng ya nga ai. Mungga hta gaw Yesu hte Yuda ningbaw ni a lapran na n dang kalang ga tsun ai hpe madung da tsun dan nga ai. “Tara Upadi lam” Yesu tsun ai shaloi, laika hte ka da ai Tara hte Ji wa ni a ga madat Tara, lahkawng yan hpe tsun mayu ai rai nga ai. Grau nna ahkyak ai hte dingsa ai gaw ‘ka da ai Tara’ rai nga ai. Dai hpe ‘Torah’ ngu ai, Chyum laika buk yawng a shawng na laika buk 5 (Npt. Nph, Pru, J Jau, Bu hk, T Jhp) hta ka tawn da ai re. Dai tara ni hta n kau mi gaw laksan nan ka da ai raitim, n kau mi gaw tara ngu na daram n ja nga ai. Aten law law, Yuda ni gaw n dai shawa hte seng ai kasi kamang ni hpe lang nna nga lai wa sai. Shanhte a prat hta sunglang na hkrak dum ma ai. Yesu n du sa shi ai shawng na tsaban 5 daram kaw nna, Israela amyu sha laika ka ai Sara ni gaw dai hpe dam lada hkra galaw wa sai. Ndai kasi ni gaw n dan leng ai ngu hkam sha ai majaw, pu pu le le asan sha ka shapraw na shakut sai. Dai gaw tsang lahkawng Tara Upadi ni tai wa sai. 

Dai aten ladaw hta sha, Yuda nkau mi gaw shanhte a hkinjawng ni lang ai jasan jaseng ai nawku htung tara ni hpe hkan galaw na shakut wa sai. Ka da ai Tara hte maren nga yang, hkin jawng ni gaw san seng ai Nawku htingnu kata de rai n shang shi yang, jasan jaseng ai lam shawng galaw ra ai. Yaw shada ai lam gaw, n san seng ai hpe yawng kashin kau nna gingdan san seng ai hte Karai Kasang hpe Nawku lu na matu rai nga ai. Hpang de masha ni mung shanhte a hkinjawng ni zawn akyu rai n hpyi shi yang lata kashin ai lam ni hkan galaw hpang wa masai. Madu Yesu a aten hta rai yang, dai Ji wa ni a ga madat tara hpe ‘Torah’ hta ka tawn da ai tara ni hte maren kamsham ai hte galaw lang wa masai. Dai zawn rai shaman galaw ai a madung gaw, shani tup na amu magam hta makam masham tsim shang wa na matu rai nga tim kaga lam ni mung byin wa sai. Hpang e gaw dai nawku htung masa ni gaw makam masham akri hpe shayawm ya sai. Ndai nawku htung lai masa hkan ai gaw Karai Kasang hpe kabu shangun nna n hkan ai gaw mara lu shangun ai ngu kam wa sai. Tsun ga nga yang, dai n tsa lam galaw ai htung lai masa hpe hkan ai gaw makam masham grai ngang nna Karai Kasang hpe daw jau ai ngu myit la sai. Dai zawn galaw ai lam ni a hkrit hpa hpe mu lu na matu, William Barclay gaw Karai hpaji masa hte tsun dan sai. Marai rai gaw kaga langai wa hpe manu mana n-ju, pawt bu ai raitim, dai jasan jaseng ai htung lai masa ni hpe hkan galaw ai a marang e hpa mung n ra ai ngu sawn la ai zawn re ai hpe madi madun mayu ai lam rai nga ai. Dai zawn rai tara shatai myit sawn la ai hpe Madu Yesu Yuda hpung woi ningbaw ni hpe ja ja wa ning hkap wa sai. 

Ndai lam ni yawng gaw anhte hpe hpa tsun nga a ta? N tsa lam galaw ai magam ni hpe anhte a makam masham re ngu n myit la na matu sadi jaw nga ai. Nawku jawng sa ai, akyu hpyi ga tsun ai, lu sha gam ai hte alu jaw ai lam ni gaw anhte hpe san shangun ai rai na sai. Dai lam ni yawng hpe anhte gaw n jaw ai myit masa hte galaw mai nga ai. Ahkyak ai gaw anhte galaw ai lam n rai, anhte galaw lu na matu myit katu ya ai Salum Kata na Tsawra myit she rai nga ai. Lama na anhte a salum gaw n ju n dawng myit hte hpring nga na, shakawng mayu ai myit ni rawng nga ai rai yang, n tsa lam galaw ai mungkan n tsa na dai bungli ni gaw Karai Kasang man e anhte hpe shachyoi shapra ya na n rai nga ai. 

Sawn sumru mai ai lam: Ngai a ting kyeng prat mahkrum madup hta, dai ni na Mungga hta Madu Yesu sharin shaga ai hte n htan shai ai lam kaning rai nga nga sai kun?

2018:PRANWAN LADAW LABAN (22) NA CHYUM LAIKA

PRAN WAN LADAW HTA LABAN 22

2nd September 2018

CHYUM MUNGGA DAW 1

Tara Jahprang 4:1-2, 6-8

Ya hti na gaw, Tara Jahprang laika hta na rai nga ai.

Mawshe shawa masha ni mahkra hpe tsun mu ai gaw; Israela amyu ni e, asak hkrung nga lu nna, nanhte a nji nwa ni a Madu Karai Kasang jaw da ai mungdan hta, shang madu lu hkra, nanhte hkan shatup na matu, ngai sharin achyin da ai matsun maroi ga hte tara lam ni hpe madat mara la mu. Ngai nanhte hpe hkang da ai tara hta, kaga langai mi pyi jat lu na n rai; dai tara hta na langai mi pyi yet kau lu na n rai; Ngai nanhte hpe hkang da sai hte maren, nanhte a Madu Karai Kasang a tara matsun tup, nanhte hkan shatup lu na rai myit dai. 

Dai rai nna, dai ga mahkra hpe sadi sahka ai hte hkan shatup nga mu. Shing rai, maigan amyu ni hpe nanhte a hpaji byeng-ya hta kung hpan ai lam madun dan na myit dai. Ndai matsun maroi ga mahkra hpe shanhte na yu ai shaloi, kaja wa, ndai galu kaba ai amyu gaw, hpaji byeng-ya hkum tsup ai hte, kung hpan nga ai amyu rai nga ai, nga nna nanhte a lam kajai tsun na mara ai. Dai gaw teng nga ai, kaning rai nme law, anhte a Madu Karai Kasang hpang de anhte hpyi jahtau ai shaloi, shi anhte hte ni nga ai zawn, galu kaba ai amyu kaga ni hta, dai zawn re ai Karai Kasang kadai lu a ta? 8Dai hta kaga, dai ni ngai nanhte hpe tawn da ai tara ding hpring ai daram, amyu kaga ni hta, dai zawn re ai matsun maroi ga hte hkang da ai tara hpe, kadai wa lu a ta?

Ya hti ai gaw, Karai Kasang a mungga rai nga ai.

CHYUM MUNGGA DAW 2

Yaku 1:17-18, 21-22. 27

Ya hti na gaw, Kasa Yaku shagun dat ai laika hta na rai nga ai.

Hpu nau ni e, Kaja ai hte hkum tsup ai kumhpa yawng hte gaw, ntsa de na rai nga ai hte, nhtoi hkum ai a Kawa kaw nna yu hkrat wa nga ai; Shi hta e gale galau re ai hte, kayin kaye re ai shingnip rawng nga lu ai n rai. Shi hpan da ai baw mahkra hta e, shawng ngai ai nsi naisi zawn anhte tai wa lu na matu, shi myit ra ai hku hkan let, tengman ai mungga a marang e, shi anhte hpe shaprat dat mi ai. Nanhte a kraw lawang hta e hkai da ai mungga nanhte hpe hkye hkrang la lu ai rai nna, sumnung ai myit hte dai hpe hkap hkam la nga mu. Nanhte gaw tinang hkum hpe n hkalem myit ga, dai mungga hpe madat la ai ni sha n rai, dai hpe hkan galaw ai ni nan tai nga mu. Ya, kyindut hkrum ai jahkrai nmai ni hte gaida gaina ni hpe kawan katsan nna, mungkan ga a awu asin re ai hpe koi kau yang gaw, Kawa Karai Kasang a man e san seng ai hte ra n rawng ai hku, nanhte a makam masham hpe hkan shatup nga myit dai.

Ya hti ai gaw, Karai Kasang a mungga rai nga ai.

KABU GARA SHIGA

Marku 7:1-8, 14-15, 21-23

Ya hti na gaw, Marku a laika hta na Kabu Gara Shiga rai nga ai.

Ya, Yerusalem mare na lung wa ai Hparishe ni hte tara sara nkau mi gaw, Yesu kaw sa du nna, Shi a sape nkau mi, lata n kashin ai sha, awu asin ngu ai hte shat sha nga ma ai hpe mu hkrup ma ai. Hparishe ni hte Yuda masha ni mahkra gaw ji wa ni a matsun maroi hkan nga ma ai rai nna, lata hpe atsawm sha n kashin kau yang gaw, shat n sha ma ai; gat de nna bai wa jang, hkum garai n shin yang, shanhte n sha yu ma ai. Dai hta n-ga, gawm ni, di ni hte magri ban wan ni hpe kashin kau ai hte, dai zawn re ai htung hking law law hpe shanhte hkan ra ma ai. Dai rai nna, Hparishe ni hte tara sara ni gaw, na a sape ni, hpa majaw ji wa ni a matsun maroi hpe n hkan ai sha, awu asin re ai lata hte shat sha nga ma ta? ngu nna Yesu hpe san ma ai. Yesu gaw, Esaia ka da ai myihtoi ga gaw, nanhte hpyi hpun ai ni hta gaja wa teng wa sai; dai myihtoi wa ka da ai gaw; Ndai amyu gaw tinang a nten hte ngai hpe hkungga lara timung, Shanhte a myit masin ngai hte tsan gang malu ai. Masha a ga matsun hpe sha htawn sharin shaga nga ma ai majaw, Shanhte ngai hpe kaman lila nawku nga ma ai, nga nna rawng nga ai. Nanhte gaw Karai Kasang a hkang da ai ga hpe kau da nhtawm, masha a matsun maroi lam ni hpe sha hkan nga myit dai, ngu nna shanhte hpe htan ya mu ai. 

Shawa masha ni hpe Yesu bai shaga la nna, shanhte hpe tsun mu ai gaw; nanhte yawng ngai hpe madat la nna, ndai lam hpe chye na la mu; Masha a shinggan e nga nna, shi kata de shang wa ai hpa rai timung, shi hpe awu asin di kau lu na n rai; masha a kraw kata de na pru wa ai mahtang gaw, masha hpe awu asin di kau lu ai. Kaning rai nme law, masha a kraw kata de nna, n kaja ai myit mang ai, n se n sa amu galaw na, lagu na, masha sat na, num shaw na, lawhpa ai, nju n dawng ai, hkalem ai, ngang kayut ai, manawn masham ai, shatan nhkan ai, gumrawng ai hte, angawk re ai myit pru wa ai. Dai n hkru ai lam nlang hte gaw kata de nna pru wa ai hte, masha hpe awu asin di kau wu ai. 

Ya hti ai gaw, Madu a Kabu Gara shiga rai nga ai.

2018:PRANWAN LADAW LABAN (21) NA MUNGGA

Kaja ai manang ajet gaw ru yak jam jau ai ahkying aten hta manang wa a makau e tsap nna madi shadaw ai wa rai nga ai. Nga mu nga mai ai aten hta tinang a makau grup yin hta manang ni law law nga ai raitim yak hkak ai aten hta tinang a makau hta masha law law nnga ai hpe mu lu na re. 

Madu Yesu a ahkying aten hta Shi a hpang hkan nang ai masha law law nga lai mat wa sai raitim, tinang kaw nna jaw jau ra ai ahkying aten, n-gun atsam dat ra ai aten, makam masham hpe sakse hkam ra ai aten hta Shi a tara mungga ni hte Shi a hpang hkan nang ai masha ni nlaw mat ai hpe mu lu ga ai.

Anhte a makam masham hkrun lam kade wa ru yak jam jau hkrum ai raitim Karai Kasang hpe shingdu kayin kau da ai lam nnga ai sha tinang a makam masham hpe shangang shakang ai ahkaw ahkang langai byin tai wa lu na matu shakut shaja sa wa lu u ga.

TENGMAN AI LAM HPE HKAP LA YU SAI KUN?

“Madu Yesu sharin shaga ai ga matsun gaw anhte hta ang ang hkra ai shaloi hta la na yak la nga ai”

Yuda ni gaw Madu Yesu a mungga hte magam bungli hpe grai myit n-gun lu, yu kaba nga ma ai. Madu Yesu hkawm sa ai de mung kade tsan ai raitim hkan nang sa ma ai. Raitim, shi a Shan hte Asai hpe htani htana asak lu na matu Madu tsun wa ai shaloi gaw, shanhte hta myit yak na lam pru wa sai. “Ga ndai gaw yak la ai ga rai nga ai, kadai wa madat lu na i” nga nna aput apai nga ma ai. Myit npyaw hpa lam gaw, ‘dai ga na ai majaw shi a sape ni law law wa nhtang mat wa nna, shi kaw bai n hkan nang ma sai’ nga ai re. Anhte ni mung dai n kam sham ai Yuda masha ni zawn kalang lang byin yu sai kun? Myit hta pra pra wa n raitim, Madu sharin shaga ai lam ni hpe madat la na yak la ai majaw Hkristu hpe shingdu tawn kau ga ai kun?  

Kalang mi na Jau marai mi sharawng shara rai Mungga htawn nga ai. “Na manang wa hpe hkum sat hkum anu u” nga nna lata she mawng rai hkaw tsun nga ai. Hpung masha marai mi mung ‘Amen!’ nga htan ya ai. “Masha a rai hpe lagu lagan hkum galaw u” nga jau gaw tsun ai shaloi mi na hpung masha wa mung, ‘Amen’ nga nna bai madi shadaw sai. Manu mana myit rawt wa nna n sen grai tsaw ai hte jau gaw, “masha a madu jan hpe mung ra marit ai myit hkum rawng u’ nga dat sai. Shaloi, “Ya ya, tara hkaw ai hkring sanu, nang anhte a prat hpe hkum ginjang yaw” nga nna mi na hpung masha wa tsun dat nu ai. 

Anhte hpe ang ang n hkra, n seng ai zawn, a dawt ai lam n nga ai rai yang Hkristu a sharin shaga ai lam hpe aloi sha hkap la na mai nga ai. Raitim, anhte a prat hta ang ang hkra wa ai rai yang, mi na hpung masha zawn rai, “anhte a prat hpe hkum ginjang yaw” nga wa chye nga ai. Masha hkum sat, hkum lagu, masha num/la hkum shaw, karai shaje hpe hkum nawku, nga nna tsun ai rai yang anhte hpe nau n hkra, n ang ai majaw hkap la na matu nau n yak nga ai. Raitim, ‘na a hpyen wa hpe tsaw ra u, sanit lang n rai, htam sanit shi sanit lang raw ya u’ nga ai ni, sadi n dung ai nrum ntau wa hpe kaning rai mara raw ya lu na? Tinang hpe ten tup adawt nga nna gumle kau ai manang wa hpe kaning rai mara raw ya lu na? Yawng a ningbaw tai mayu ai wa gaw, yawng a shangun ma shawng tai u ga, ma masum hte madu jan hpe kabai kau da nna kaga num hpang de sa mat ai la hpe, n myit mada ai/ n ra sharawng ai ma hkum rai mat ai numsha a matu, gumhpraw sen law law hpe gun sha mat wa ai magam gun a matu, dinghku hka bra ai n tsa Nawku hpung a sharin shaga ai lam, ma shabrai kau ai lam, kadai wa n dai lam ni hpe sung sung hkap la yu sai rai?  

Aten law law hta, anhte gaw teng man ai lam hpe n kam madat ga ai. Grau nna, anhte a myit masa hte anhte a bai nhtang galaw ai gaw tengman ai lam (snr) tengman lam sakse hkam ai hpe jahten sharun wa ai aten ni hta rai nga ai. Anhte sadi hkam da ai manu shadan ai lam ni hte dai hta nga sa na aten hta kraw kata de galai shai wa shangun ai aten ni hta mung anhte a myit masa gaw hkrit hpa rai wa sai. Kaning mi raitim, anhte a kraw kata hte shinggan mungkan ni hta ra kadawn ai nga ai mabyin gaw byin wa ra na rai nga ai. Dai ni na kabu gara shiga hta Madu Yesu sharin ya mayu ai gaw; asak muk rai nga ai Madu gaw hkum hkrang hte maren shabung ya nna n-gun atsam jat ya let sha Madu a sharin shaga ai lam ni manu shadan ai hte myit masa ni gaw anhte kraw kata de mung rawng wa nna Madu hta prat tup sak hkrung nga sa wa lu na rai nga ai.           

Sawn sum ru mai ai lam: Chyoipra hkum hpe hkam la ai marang e, Madu Yesu a myit masa hte bung wa lu na matu myit masa galai shai lu na Shi Madu hpe ngai ahkang jaw ai kun?

2018:PRANWAN LADAW LABAN (21) NA CHYUM LAIKA

PRAN WAN LADAW HTA LABAN 21

26th  August 2018

CHYUM MUNGGA DAW 1

Yawshu 24:1-2, 15 -18

Ya hti na gaw, Yawshu a laika hta na rai nga ai.

Yawshu gaw Israela amyu yawng hte hpe Shekem mare e jahpawng nna, Israela a du salang ni, ningbaw ningla ni, tara agyi ni hte hpyen du ni hpe shaga la wu ai. Shanhte gaw Karai Kasang a man de sa pru ai shaloi, Yawshu gaw Israela masha ni mahkra hpe tsun mu ai gaw; Madu Karai Kasang hpe jaw jau na nanhte ra yang gaw, gara hpe mahtang daw jau na gaw, dai ni jang lata la mu; Hka wora hkran e nga ai shaloi, nanhte a nji nwa ni jaw jau ai hpara ni rai na kun? Shing n rai, ya nanhte nga ai mung na Amori masha ni a hpara ni rai na kun? Dai ni jang lata la mu; ngai hte nye a nta masha ni chyawm gaw Madu hpe nawku daw jau na ga ai law, ngu nna tsun wu ai.

Shaloi amyu masha ni gaw, Madu hpe kau da nna, hpara shaje hpe nawku jaw jau na gaw, anhte hte tsan gang nga u ga law; kaning rai nme law, Madu Karai Kasang nan Egutu mung a mayam nta kaw na, anhte the anhte a ji wa ni hpe woi wa mani ai. Anhte a man e dai lamik kumla kaba madun dan nna, anhte hkawm sa wa ai lam ting hta, anhte hpe bau sin nga ai hte , anhte lai sa wa ai mungdan shagu a amyu masha ni kaw nna, anhte hpe makawp maga la ai wa gaw, anhte a Madu Karai Kasang chyu sha rai nga ai. Dai re ai majaw, anhte mung Madu hpe nawku jaw jau na ga ai; Shi chyu sha anhte a Karai Kasang rai nga ai law, nga nna htan ma ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Ehpesu 5:21-32

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, Hkristu hpe hkrit hkungga ai myit hte nanhte shada da yen ya mu. Numsha ni e, Hkristu hpe madat mara ai hte maren, tinang a madu wa ra ai hku hkan nga mu, kaning rai nme law, Hkristu gaw Nawku Hpung a baw rai nga ai zawn, madu wa mung madu jan a baw rai nga ai. Hkristu shi hkum nan dai hkum hkrang a Hkye Hkrang la ai Madu rai nga ai. Nawku Hpung gaw, Hkristu a hkang ai hku madat ai zawn, madu jan ni mung lam shagu hta e madu wa ni hkang ai hku hkan nga mu ga. Lasha ni e, Hkristu gaw Nawku Hpung hpe tsawra nna, shi hkum nan de a matu ap kau ya wu ai hte maren, nanhte a madu jan ni hpe tsawra nga mu.

Hkristu gaw dai hpung hpe shachyoi shapra ya na matu, hka hta mungga e dai hpe hkashin kau ya nna, jasan jaseng ya wu ai; shing rai, agang chyalang hte kapum kapam re ai hpa mung n lawm ai sha, chyoi pra ai hte ra n rawng ai, hpung shingkang htoi tu ai hpung hpe, shi a matu tawn da wu ai. Dai hte maren, madu wa ni gaw tinang a hkum hpe tsawra ai zawn, tinang a madu jan ni hpe tsawra lu na ma ai. Tinang a madu jan hpe tsawra ai wa gaw, tinang hkum hpe nan tsawra nga ai. Masha kadai rai timung, tinang a hkum hpe ndawng n-yawt ai n rai ai sha, dai hpe bau maka nna, lanu lahku ya wu ai. Hkristu gaw shi a Nawku hpung hpe dai hku galaw ya wu ai; kaning rai nme law, anhte gaw Shi a hkum hkrang na adaw ashan ni rai nga ga ai. Dai re ai majaw, lasha gaw shi a kanu kawa hpe kau da nhtawm, shi a madu jan hta manoi nga nna, shan lahkawng hkum shan langai sha tai wa na ra ai. Ya tsun ai chyum mungga hta sung la ai lam kaba ni rawng nga ai; rai timung, ngai mahtang gaw Hkristu hte shi a Nawku hpung hpe sha-ang nna tsun nga nngai. Ya hti ai gaw, Karai Kasang a mungga rai nga ai.

KABU GARA SHIGA

Yawhan 6:60-69

Ya hti na gaw,Yawhan a laika hta na Kabu Gara Shiga rai nga ai.

Yesu sharin shaga ai mungga madat la ai hpang, shi a sape ni law law wa, Ga ndai gaw yak la ai ga rai nga ai. Kadai wa madat lu na i? nga ma ai. Shi a sape ni tsun aput nga ma ai hpe Yesu chye wu ai majaw, shi shanhte hpe Ga ndai gaw nanhte a kam sham ai myit hten shangun wa sani? Masha Kasha gaw, mi shi nga ai shara de bai lung wa ai hpe nanhte mu yang gaw, kaning nga na myit ta? Asak jahkrung ya ai gaw nsa wenyi rai nga ai; hkum shan mahtang hpa mung n shabyin lu ai. Rai timung, nanhte hta na nkau mi gaw n kam n sham myit dai, ngu mu ai. Kaning rai nme law, Yesu gaw n kam n sham ai ni kadai rai ma ai mung, shi hpe ap kau na wa kadai re ai mung, shawng nna chye da nga ai.

Yesu bai tsun ai gaw; ndai lam a majaw she, Nye Wa a ahkang hte n rai yang gaw, kadai mung ngai hpang de n du n sa lu ai, ngu nna ngai nanhte hpe tsun ma sade ai, ngu mu ai. Dai ahkying kaw nna, shi a sape ni law law wa nhtang mat wa nna, Yesu kaw n hkan nang masai. Dai rai nna, Yesu gaw sape shi lahkawng hte hpe, nanhte mung wa mat mayu nit ni? ngu nna san mu ai. Simun Petru gaw, Anhte kadai hpang de wa na rai ta? Nang gaw htani htana asak hte seng ai mungga lu ndai; anhte kam sham saga ai rai nna, nang gaw Karai Kasang a Chyoi pra ai wa rai nga ndai hpe chye nga ga ai, ngu nna Yesu hpe htan wu ai.

Ya hti ai gaw, Madu a Kabu Gara shiga rai nga ai.

2018:CHYOI PRA AI MARIA HPE LAMU DE SHALUN LA AI POI SHANI NA MUNGGA

Mara lu ai shingyim masha ni gaw dinghta ga ntsa nga pra ngut ai hpang sumsing mungdan de rai ndu shi yang ngarai mung kaji hta tinang a mara ni hpe jasan jaseng la ra ai. San seng ai wenyi ni she Sanseng Sanpra ai Karai Kasang hte rau nga sa lu na rai nga ai.

Npawt shut hpyit mara nkap ai sha shangai wa sai Nu Maria gaw dinghta ga ntsa nga sa ai ten hta mara nkap ai sha nga sa let Madu Yesu a Kanu, anhte yawng a Kanu langai hku nna nga sa lai wa sai. Dai rai yang shut hpyit mara kap ai ni zawn Ngarai Mung Kaji hta jasan jaseng ai amu hpe n-galaw ra ai sha sumsing mungdan de wenyi hte hkum hkrang jawm pawng let woi shalun la ai chyeju kumhpa kaba hpe hkam la lu sai re.

Anhte ni a sak hkrung nga sa ai lam hta Nu Maria hpe kasi la nna anhte a hkum hkrang wenyi hpe sanseng sanpra ai lam hta hkawm sa lu na shakut shaja sa wa ga.

GAWAN KATSAN CHYE RA AI

Dai ni na kabu gara shiga gaw Nu Maria, shi a kana Elizabeth kaw alak mi sa chyai ai hpe tsun dan ai. Ndai mabyin hpe, Nu Maria gaw ra kadawn nga ai ni hpang de sa nhtawm shawang tsawra myit madun ai lam chye na na matu madi madun ai. Ma hkum re ai num lahkawng a shada tsun jahta hkat ai hpe yu yu nna, shawng nnan Nu Maria a matsan dum chye ai myit hpe mu ya lu ai. Nu Maria gaw, shi hte mahkrum madup bung ai hta na lai kadai n nga sai hpe chye nga ai. Raitim, shi gaw mungkan ga a hkyela Madu hpe hkritung hta gun da nna, Elizabeth chyawm gaw lam shawng baw ya na Yawhan hpe gun da nga ai. Shan lahkawng hkrum shaga ai ten, Elizabeth a hkritung na ma gaw kabu gara ai hte gum lawt nga ai. Elizabeth mung; “Numsha ni hta nang a lu ndai, na a hkritung na ma mung a lu lit dai,..., kam sham ai num sha gaw a lu ai, kaning rai nme law, dai Madu kaw nna shi hpe tsun ai ga gaw dik wa na ra ai” nga ai.

Anhte marai hkum shagu gaw dai Madu hpe gun da ai ni rai nna, dai Hkristu a lam shawng lajang ya ai ni re ngu dum sawn la mai ai. Anhte shada da hkrum zup ai mi rai rai, sa kawan chyai ai ten hta raitim, shada da a hkam sha lam hpe madi shadaw ya lu ai, yawn hkyen ai ni hpe n-gun jaw ya lu ai, myit ru yak hkak ai ni hpe lam madun ya lu ai. Dai hpe anhte myit jung nna yu yu ai shaloi, shada da kawan katsan ai ten hta dai Madu hpe shaprat ya lu na re. Myit sawn sumru yu ai lam gaw dai hta nga pra lu ai. Dai gaw anhte kaning rai kawan katsan lu na matu sharin la lu ai shara nan rai nga ai.

Sawn sumru mai ai lam; Marai rai kaw sa chyai kawan ai shaloi, Karai Kasang a shigna shi hta nga ai hpe ngai dum chye lu ai kun? Ngai masha ni kaw sa chyai kawan ai ten hta Karai Kasang a shingna hpe grau nna dum sawn chye lu na aten rai nga sai.

2018:CHYOI PRA AI MARIA HPE LAMU DE SHALUN LA AI POI SHANI NA CHYUM LAIKA

CHYOI PRA AI MARIA HPE LAMU DE SHALUN LA AI POI 

19th August 2018

CHYUM MUNGGA DAW 1

Shingran 11:19; 12:1-6. 10

Ya hti na gaw, Shingran laika hta na rai nga ai.

Sumsing lamu hta e Karai Kasang a chyoi pra ai Htingnu hpaw malang nna, dai Htingnu kata e Ga shaka Sumpu hpe mu lu ai. Bai, sumsing lamu kata e mauhpa amu kaba dan pru ai gaw: Jan lawai nna shata kabye ai hte, shagan shi lahkawng kap ai janmau gup ai numsha langai mi dan pru ai. Shi gaw na-um nasin rai nna, shangai na matu shinggyim machyi ai majaw, jahtau hkrap nga ai. Bai, mauhpa amu kaga sumsing lamu kata e dan pru ai gaw:Yu u, hkyeng ai baren numraw kaba dan pru ai; shi gaw baw sanit hte nrung shi tu nna, baw shagu hta ja kagup gup nga ai. Shi a nmai gaw lamu na shagan htam masum hta na, htam mi magawn la nna, ga de jahgkrat dat wu ai. Kasha shangai maw ai numsha, shi a kasha shangai dat jang, dai ma hpe sha kau na nga, baren numraw dai numsha a man e la tsap nga ai.

Shaloi dai numsha gaw, amyu baw shagu a ntsa e hpri sumdoi hte up na ra ai, shadang sha langai hpe shangai wu ai; shi a kasha hpe Karai Kasang a man de mung, Shi a tingnyang a man de mung gare shalun la wu ai. Dai numsha gaw nam mali de hprawng mat wa ai; dai yang e Karai Kasang gaw shi a matu nga shara lajang da ya wu ai. Shaloi sumsing lamu kata na nsen kaba gaw: Ya gaw, Karai Kasang a Hkristu up hkang na ahkang aya lu la nna, Madu Karai Kasang Shi a daru magam, hpung shingkang hte mungdan hpe lu la ai ahkying rai sai, nga nna tsun ma ai hpe ngai na nngai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1Korinhtu 15:20-26

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Hkristu si mat ai ni kaw na bai hkrung rawt sai rai nna, yup pyaw mat ai ni hta na, shawng si ai asi tai wa sai. Masha langai mi a jaw e mung, bai hkrung rawt wa na lam byin wa sai. Yawng mayawng gaw, Adam hta e si mat wa ai hte maren, yawng mayawng gaw Hkristu hta e bai hkrung rawt wa na mara ai. Rai timung, langai hte langai tinang ang ai hku hte maren byin wa na ra ai: Hkristu gaw shawng si ai asi nnan re ai majaw, shawng na ra ai; dai hpang Hkristu bai du ai ladaw e, Shi hte seng ai masha ni hkrung wa na mara ai.

Dai hpang e, Hpang jahtum Nhtoi du na ra ai. Dai shaloi e, Hkristu gaw daru magam, hpung Shingkang hte ahkang aya mahkra hpe jahten kau nna, Kawa Karai Kasang kaw dai mungdan hpe ap ya na ra ai. Kaning rai nme law, Shi a hpyen ni yawng hte hpe, Shi a lagaw npu e tawn da ai du hkra, Shi up hkang nga na ra ai. Hpang jahtum na hpyen wa ngu ai si hkrung si htan gaw, jahten kau ai hkrum na ra ai; hpa majaw nga yang, yawng mayawng hte hpe shi a lagaw npu e tawn da nu ai, nga nna Chyum laika hta ka da nga ai.

Ya hti ai gaw, Karai Kasang a mungga rai nga ai.

KABU GARA SHIGA

Luka 1:39-56

Ya hti na gaw, Luka a laika hta na Kabu Gara Shiga rai nga ai.

Maria gaw, Yuda mung na bum ga e nga ai, mare langai mi de alawan rawt sa nna, Zakari a nta de shang nhtawm, Elisabet hpe hkrum shaga wu ai. Maria hkrum shaga ai ga hpe Elisabet na la jang, shi a hkritung na ma gumlawt nga ai. Elisabet mung, Chyoi pra ai Wenyi hte hpring nna, nsen kaba hte jahtau let, Numsha ni hta nang a lu ndai; na a hkritung na ma mung a lu nga ai. Nye a Madu a kanu ngai hpe sa kawan ai gaw, hpa chyeju a jaw e rai ra ai i? Ngai nang hpe tsun de ga: Na a shakram ai ga nsen ngai na la ai hte rau, nye hkritung na ma kabu gara ai hte gumlawt nga ai. Madu shi hpe tsun ai ga dik wa na ra ai lam hpe kam sham ai numsha gaw, a lu nga ai, ngu nna tsun wu ai. Shaloi Maria gaw: Nye wenyi mung ngai hpe hkye la ai Madu Karai Kasang hta kabu gara li ai.

Shi a mayam jan a myit nem ai hpe shi mada yu nu ai. Atsam rawng ai wa gaw ngai hpe galu kaba ai galaw ya ni ai, majaw, ya kaw nna shu mashi shu masha, ngai hpe a lu ai ngu na mani ai. Shi a mying ningsang chyoi pra lu ai. Shi hpe hkrit kamyin ai ni a ntsa e, shu mashi shu masha du hkra, shi a matsan dum ai myit a nga nga ai. Shi a lahpum hpe atsam hte ladawn dat nna, myit gumrawng nga ai ni hpe shabra kau nu ai. Du magam ni hpe tingnyang na jahkrat kau nna, myit nem ai ni hpe shagrau ya nu ai. Krawsi hkrum ai ni hpe kaja ai hte jahkru shakat nna, sut su ai ni hpe kaman dat dat nu ai. Anhte a ji wa ni hpe tsun da ai hte maren, Abraham hte shi a kashu kasha ni hpe, prat dingsa e matsan dum ai lam dum nga let, shi a shangun ma Israela hpe lanu lahku ya nu ai, ngu nna Maria tsun wu ai. Maria gaw Elisabet hte rau shata masum dang nga nhtawm, nta de bai wa mat ai.

Ya hti ai gaw, Madu a Kabu Gara shiga rai nga ai.

2018:PRANWAN LADAW LABAN (19) NA MUNGGA

Kashin Kamun hkam la sai anhte ni gaw Chyoi Pra ai Wenyi a shaman chyeju hpe hkam la nna ndut ndang nga sa lu ai Karai Kasang a kashu kasha ni shabyin shatai hkrum sai re. Ndai lam hpe dai ni na Chyum Mungga daw lahkawng hta San Paulu Ephesus masha ni hpe shagun dat ai laika hta na la lu sai re.

Myit masin kaja hpe gaw gap da let manang wa hpe nju ndawng ai lam ni, pawt sindawng ai lam ni hpe koi gam kau nna, hting bu wa hpe matsan dum chye ai hte Karai Kasang gaw Madu Yesu a mying ningsan hta anhte a mara ni hpe raw dat ya sai zawn, manang ni a mara hpe raw dat ya lu na matu shadum jahprang ya sai re.

Manang wa hpe mara raw dat ya ra ai hte maren anhte hkum nan a shut shai ai lam ni, ra rawng gawng kya ai lam ni hpe mara raw dat chye lu na matu akhyak nga ai. Lai wa sai ten hta byin lai wa sai kaja ai, nkaja ai hpe hkap la lu nna du na ra ai ahkying aten hta grau grau nna kaja ai hku Karai Kasang hpe manoi manat nna nga sa let Shi Madu yaw shada ai hte maren ndut ndang, wanglu wanglang nga sa lu na matu shakut shaja sa wa ga.

HTANI HTANA ASAK HKA HPAWK

Miwa mung na hkawhkam kaba ‘CHIN’ gaw kaba dik ai wut shakum (Great Wall) gaw gap ai wa re. Deng 2,000 jan galu ai dai wut shakum gaw lamu hpung tang de nna jak shagan gawt ai ni myi hte pra mu lu ai langai sha re ai masha galaw ai htingtsip rai nga ai. Hkawhkam wa ‘Chin’ gaw si na grai hkrit ai wa re da. Lana mi hta shi a mandan sara wa gaw, Sinpraw panglai kata na sumsing mungdan zinlawng a lam tsun dan nu ai. Dai hta nga ai myu sha ni gaw htani htana asak hkrung na lam a akri mu chye da ma ai da. Hkawhkam wa Chin mung hpu reng dik ai sutgan ni hpe sanghpaw law law hta bang ya dat nna dai asak hkrung nga na akri lam hte sa galai la na shangun dat nu ai. Kaja wa sha dai zinlawng hpe sa mu tam ai raitim, dai kaw nga ai amyu sha ni gaw shanhte ip da ai lam hpe dai manu dan ai sut rai ni hte n-galai ya ma ai da!

Shinggyim masha ni nnan nga pra wa ai ten kaw na n si ai sha htani htana a hkrung nga na lam hpe myit mang da ma ai. Tinang a hku hkau tsawra ai ni si mat wa ai hpe yu nna, n si ai sha ahkrung nga na matu grau grau myit machyu jung wa sai. Dai majaw, Madu Yesu, Palestine ga e paw pru wa nna htani htana asak hte seng nna hkaw tsun hpang wa ai shaloi, masha ni madat na la na matu htim sa wa ma ai. Yuda ni grau nna myit shang sha ma ai. Abraham hte Mawshe ni a prat kaw nna, si hkrung si htan hte seng nna n sin chyip rai ma ai. ‘katsan ga’ ngu ai nga na re ngu kam sham ma ai. Raitim kaning san na ngu ai hpe gaw n chye ma ai. Dai majaw Madu Yesu tsun ai kate mi sha raitim madat mayu la nga ai. Madu Yesu tsun ai htani htana ask a lam ni hta na laklai dik ai gaw dai ni na la ai Mungga hta na shi tsun ai; “Ngai gaw sumsing lamu de na yu wa ai, hkrung ai muk rai nga nngai: muk ndai sha ai wa kadai mung htani htana ahkrung nga na re ai. Mungkan ga a asak hkrung nga na matu ngai jaw ai muk chyawm gaw, nye a shan rai nga li ai” nga ai ga re. Ndai prat gaw arai yawng a matu jahtum n re ai lam Madu Yesu hpaw tsun dan sai. Hpang na prat ngu ai nga nna dai gaw htum n chye ai rai nga ai. Dai gaw htani htana asak, n htum nwoi prat rai nga ai.

“Ngai gaw sumsing lamu de na du yu wa ai hkrung ai muk rai nga nngai” ngu tsun ai hpe na jang Yuda masha ni shanhte n kam ai gaw mau hpa n rai nga ai. “Yosep a kasha, Yesu n rai ni taw?, shi kanu kawa ni hpe anhte chye ga ai nrai ni taw?, kaning rai nna sumsing lamu de na yu hkrat wa ai ngu tsun lu a ta?” nga nna shada da tsun hkat ma ai mung, mau shara n nga nga ai. Madu Yesu si ai kaw na hkrung rawt wa ai aten hta she ndai Yuda masha law law wa shi tsun ai ga a lachyum sung sung chye na wu ai. Dai ni anhte mung tsun ai htani htana asak a lam madat la na hte dai asak muk hte anhte a hkum hkrang hkru kat la na matu ndai shara kaw du taw nga ga ai. Karai Kasang a kasha, Yesu Hkristu, htani htana asak a hkahpawk gaw anhte hte rau ya e nga nga ai law. 

Sawn sumru mai ai lam: Madu Yesu gaw htani htana asak a muk re ngu myit dum ai hte laban nhtoi ni hta Missa hkungga shang lawm nga ai kun? (snr) Laban Missa hpe lit nga ai ngu nna sha sa lung ai kun?

2018:PRANWAN LADAW LABAN (19) NA CHYUM LAIKA

PRAN WAN LADAW HTA LABAN 19

12th August 2018

CHYUM MUNGGA DAW 1

1 Hkawhkam 19:4-8

Ya hti na gaw, Hkawhkam laika langai hta na rai nga ai.

Myihtoi Elia gaw, nam mali de hprawng nna, lani mi sat sa nhtawm, marau hpun npu e dung nga ai. Shaloi shi si mayu nna hpyi wu ai gaw; Madu e, ya ram sai; nye a asak dawm la ya rit; ngai gaw ji wa ni hta akyu grau rawng ai n rai, nga nna tsun nhtawm, marau hpun npu e galeng yup pyaw wa sai. Shaloi lamu kasa langai mi shi hpe ahtawk ya nna, Rawt u, shat sha u, ngu nna tsun wu ai. Elia mada yu jang, shi a baw makau e, wan n-ga hta kakang ai muk pa hte, ntsin namtau hpe mu wu ai. Shi mung lu sha nna, bai galeng taw nga ai. Madu a lamu kasa bai sa nna, Rawt u, shat sha u, shing nrai, nang sa wa na lam naw tsan la ai majaw, n du lu na ndai, ngu wu ai. Shaloi Elia gaw rawt nna, lu sha nga ai hte, dai lu sha hta n-gun lu la nna, Karai Kasang a bum Horeb du hkra, shani mali shi ya, shana mali shi na shi hkawm sa wa ai. 

Ya hti ai gaw, Karai Kasang a mungga rai nga ai.

CHYUM MUNGGA DAW 2

Ehpesu 4:30-5:2

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, du sa na ra ai nhtoi hta e, nanhte hkye hkrang la ai hkrum lu hkra, shi a dazik hte nanhte hpe masat da ya ai, Karai Kasang a Chyoi pra ai Wenyi hpe hkum shayawn nga mu. Dai rai nna, manang wa hpe myit n pyaw ai lam n matsing ai sha tawn kau mu; masin pawt ai, ga li ga law ai, manang ni hpe matsa kau ai hte, n ju n dawng ai myit hte matai tai ai lam mahkra hte gaw, nanhte hte tsan gang nga u ga. Nanhte shada da hkau chyap nga nna, tsawra matsan dum ai myit madun hkat nga mu. Karai Kasang gaw Hkristu hta e nanhte a mara raw dat kau ya ai hte maren, nanhte mung shada da a mara raw dat kau nga mu. Shing rai, tsawra nga ai kasha ni zawn, Karai Kasang madun dan ai kasi ningli hte maren hkan galaw nga mu. Hkristu gaw nanhte hpe tsawra ai hte maren, tsawra ai lam hta hkawm nga mu. Hkristu mahtang nanhte a matu mara manam pyaw ai kumhpa tai nna, Karai Kasang kaw Shi a hkum hpe hkungga nawng kau ya wu ai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 6:41-51

Ya hti na gaw, Yawhan a laika hta na Kabu Gara Shiga rai nga ai.

Yesu shi nan, sumsing lamu de na yu wa ai muk rai nga nngai, nga ai majaw, Yuda masha ni, shi a lam aput angun let, Ndai wa gaw Yosep a kasha n rai ni? Shi a kanu kawa hpe anhte chye nga ga ai n rai ni? Dai rai jang, ngai gaw sumsing lamu de na yu wa nngai, nga nna kaning rai tsun lu a ta? ngu nna tsun ma ai. Shaloi Yesu gaw, nanhte shada da hkum aput angun nga mu. Ngai hpe shangun dat ai nye Wa e woi la ai n hkrum yang gaw, kadai mung ngai hpang de du sa lu na n rai; du sa ai wa hpe, hpang jahtum na nhtoi hta ngai sharawt la na we ai. Masha yawng mayawng gaw Karai Kasang e sharin achyin ai hkam la na mara ai.’ nga nna myihtoi laika hta ka da nga ai. Nye Wa hpe madat la nna, Shi kaw na sharin achyin la ai ni yawng hte gaw, ngai hpang de du sa ma ai.

Shinggyim masha langai mi pyi Wa hpe mu yu sai n rai; Karai Kasang kaw nna du sa ai wa chyu sha, Wa hpe mu yu nu ai. Nanhte hpe ngai kaja wa teng teng tsun made ga; Kam sham ai wa gaw htani htana asak lu la lu ai. Ngai gaw asak jaw ai muk rai nga nngai. Nanhte a nji nwoi ni nam mali hkan e, mana muk sha timung, si wa masai, Ya na muk chyawm gaw, masha wa sha nna, n si u ga matu, sumsing lamu de na yu wa ai muk rai nga ai. Muk ndai sha ai wa kadai mung htani htana ahkrung nga na ra ai; mungkan ga a asak hkrung nga na matu, ngai jaw ai muk chyawm gaw, nye a Ashan rai nga li ai, ngu nna Yesu gaw dai Yuda masha ni hpe htan ya mu ai.

Ya hti ai gaw, Madu a Kabu Gara shiga rai nga ai.

2018:PRANWAN LADAW LABAN (18) NA MUNGGA

Masha hkum ngau shagu hta shawng nna ahkyak ai, nnga nmai ai gaw malu masha, bu hpun palawng hte nga shara rai nga ai. Ra kadawn ai ndai npawt daju hpe lu la hkra shakut shaja hkawm sa ai hta htum nma ai hkrun lam hte kalang lang wa bung chye nga ai.

Kade daram lu yang myit pyaw myit dik na ngu ai gaw langai hte langai nbung nga ai. Masha nkau mi gaw tinang a prat hpe mungkan sut masa tam ai kaw sha aten shama kau chye nga ai. Madu Yesu tsun ai hta htani htana asak hpe jaw ya na muk hpe madung dat tam na matu chyum mungga hta shadum jahprang ya nga ai.

Kaning re ai mabyin masa hta anhte sak hkung nga sa ai raitim, Karai Kasang hte galoi mung ntsan gang ai sha hkawm sa na matu gaw ahkyak nga ai. Dai rai yang she anhte a myit masin hta ru yak tsang pu ai lam ni, hkrit tsang ai lam ni hkoi mat nna ja gumhpraw arung arai hkum tsup ai raitim, nhkum ntsup ai raitim Karai Kasang jaw ya ai ngwi pyaw sim sa ai hpe lu la mai nga ai.

ASAK MUK

“Madu Yesu chyu sha anhte yawng a kawsi hpang gara lam hpe jahkru kat ya lu ai"

Manu mana kawsi ai raitim hpa hpe marit ai re lam n chye ai nang byin yu sai kun? Grai hpang gara ai raitim hpa hpe gara ai n chye ai nang byin yu sai kun? Lama na “Re ai” ngu htai ai rai yang, dai ni na chyum mungga hta ahkyak ai shiga anhte a matu rawng nga ai. Anhte malap kau ai lam ni hpe bai shadum ya nga ai. Mungkan n tsa hpang gara ai lam lahkawng nga ai. Langai mi gaw hkumhkrang hta kawsi hpang gara ai rai nna lusha hte hkru kat la mai ai. Lahkawng ngu na gaw Wenyi hta hpang gara ai rai nna mungkan ga na lusha ni n jahkru ya lu ai. Tsun ga nga yang, anhte grai lu su, awngdang ai raitim, manu mana hpang gara ai lam anhte kraw kata hta byin chye nga ai. 

Massachusetts mungdaw na kaba dik ai Company madu gaw asak (40) sha naw re ai Tom Philips ngu ai wa re. Shi hta grai manu dan ai mawdaw, dum nta hte ngwi pyaw la ai dinghku lu da nu ai. Rai timung, shi gaw n pyaw la nga ai. Shi prat hta lama ma ra kadawn ai hpe hkam sha tim, hpa re ai hpe n chye lu ai. Lana mi na, New York mare de sa ai hkrun lam ntsa lama mi byin wa sai. Makam masham hte seng nna mahkrum madup lu la ai hte dai gaw shi prat ting hpe lak lai shai ya sai. Dai a lam shi tsun dan ai hta, ‘ngai na prat hta mat mat nga ai hpe ngai mu la sai. Dai gaw Yesu Hkristu rai nga ai. Shi hpang de ngai kalang mi mung myi man n yawng yu shi ai’ nga ai. Dai shana e Tom a prat galai shai mat wa ai gaw, grai "ngwi pyaw ai" de shi hpe woi la ai prat tup n mu yu ai yup mang re. 

Dai ni na chyum mungga hta mung anhte a matu ahkyak ai shiga rawng nga ai. Dai gaw Madu Yesu hkum nan tsun ai, “Asak muk gaw ngai rai nga ngai; ngai hpang de sa ai wa gaw kawsi hkrum na n rai, ngai hpe kam sham ai wa mung, galoi mung hpang gara hkrum na n rai”. Tsun dan mayu ai shiga gaw, anhte a kraw salum kata hta kawsi hpang gara nga ai lam hpe Yesu Hkristu chyu sha jahpring ya lu ai ngu ai lam re. Ndai shiga gaw mun sen re ai masha ni a prat ni hpe lachyum shaleng ya sai hte anhte mung dai hpe hkap la ai rai yang gaw lachyum sung wa na re. 

Sinpraw kaang mungdan ni de bungli sa galaw ai Philippine myu sha ni gaw laban n htoi ni hta nta buga na ni shagun jaw ai ketset tape hta Missa hkungga hpe lagu madat la ma ai. Nkau mi gaw, ga kata de mayun galaw ai Missa hkungga hta rim hkrum, zingri hkrum na hkrit ra ai lapran e sa lung nna chyoipra hkum hpe hkam la ra nga ai. Shanhte hpa majaw dai zawn galaw ai rai? Sakramentu hkam la na matu pat shing dang da ai majaw grau hkam la mayu ai mung rai na re. Raitim, shanhte ni hta htani htana asak muk hpe nachying ra sharawng ai myit rawng nga ai hpe ningdang n lu na re. Dai htani htana lu sha gaw “Chyoipra Hkum” sakramentu hta Madu anhte hpe jaw sha nga ai re.

Sawn sumru mai ai lam: Kawsi hpang gara nga ai raitim dai hpe hpa hte hkru kat la na n chye ai ni hta ngai mung lawm nga ai kun? (snr) Ngai na prat hta Madu jaw ya ai lusha hpe manu n shadan, n gawn n sawn di ai ni hta ngai mung lawm nga ai kun?

2018:PRANWAN LADAW LABAN (18) NA CHYUM LAIKA

PRAN WAN LADAW HTA LABAN 18

5th August 2018

CHYUM MUNGGA DAW 1

Pru Mat Wa ai 16:2-4, 12-15

Ya hti na gaw, Pru Mat Wa ai laika hta na rai nga ai.

Israela kashu kasha ni Egutu mung de nna pru wa ai hpang, lahkawng ngu na shata hta, Sin ngu ai nam mali de du shang wa ai shaloi, dai shawa hpung nlang hte gaw Mawshe yan Arun hpe aput nga ma ai. Shanhte gaw, Egutu mung e, shat di ni makau e anhte dung nga nna, hkru hkru kat kat muk sha lu nga yang, madu a lata hte si mat yang grau mai ai. Nan chyawm gaw, ndai shawa hpung ting hpe kaw si ai hte sat kau na matu, ndai nam mali de anhte hpe woi wa myit hka, nga nna Mawshe yan Arun hpe tsun ma ai. Dai rai nna, Madu gaw Mawshe hpe, ngai nanhte a matu lamu de na muk jahtu ya na made ai. Shani shagu shawa masha ni pru sa nna, lani mi sha na matu hkrak hta la na rai ma ai; shing rai, nye a tara hpe shanhte hkan nang na kun, n hkan nang na kun, ngai chyam yu na we ai.

Ngai Madu gaw Israela kashu kasha ni aput ai ga hpe na la se ai. Shanhte hpe ning nga nna tsun mu; shana de nanhte sha lu na marin dai. Shaloi ngai nanhte a Madu Karai Kasang rai nga nngai gaw, nanhte chye lu na marin dai, ngu nna, Mawshe hpe tsun wu ai. Madu tsun ai hte maren, shana de u preng ni hkrat nna, dai dap ting hpe ka-up da ma ai. Jahpawt e mung, dai dap grup yin e mari hkrat nga ai. Dai mari hkoi mat jang, yu mu, dai zaibru jang a ntsa e, hkyen ni zawn din din re ai baw taw nga ai. Israela masha ni dai hpe mu jang, ndai hpa baw rai nga a ta? nga nna shada da san ma ai, hpa majaw nga yang, dai hpa baw re ai hpe garai n chye ma ai. Dai rai nna Mawshe gaw, Nanhte sha na matu, Madu jaw ai muk gaw ndai rai nga ai, ngu nna shanhte hpe tsun dan mu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

Ehpesu 4:17, 20-24

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, Madu a amying ahkang hte ngai nanhte hpe shadum jahprang ya let, tsun mayu ai gaw; Tara maigan ni zawn, akyu n rawng ai, n sut n ang ai lam ni hta, nanhte ya kaw nna hkum hkawm nga mu. Nanhte gaw Hkristu a lam hpe shing rai sharin la yu manit dai n rai. Yesu hta e teng man ai lam nga nga ai hte maren, Shi a nga sat nga sa ai lam hpe nanhte atsawmsha sharin la manit dai, n rai ni? Dai rai jang, shawng na nga sat nga sa ai lam ding sa hpe kau da ra myit dai; marin marit ai lam ni a majaw hkalem hkalau ai hkrum nna, hten magang ra ai gawng shing yan ding sa hpe raw kau nhtawm, nanhte myit mang ai lam hta masha nnan tai wa ra ai. Ding hpring ai hte chyoi pra ai myit, Karai Kasang a tengman ai kaw nna byin pru wa ai majaw, Madu Karai Kasang, shi ra ai hku hpan tawn da ai gawng shing-yan nnan hpe, nanhte hkan dagraw la na marin dai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 6:24-35

Ya hti na gaw, Yawhan a laika hta na Kabu Gara Shiga rai nga ai.

Shawa masha ni gaw, Yesu hte Shi a sape ni dai kaw n nga sai hpe chye jang, shanhte mung li ni hta jawn nna, Yesu hpe tam let Kaperna-um mare de hkan du ma ai. Shing rai, dai nawng wora hkran e Shi hpe mu yang, shanhte gaw, Rabai e, nang de galoi du nit ta? ngu nna san mu ai. Yesu gaw, Ngai nanhte hpe gaja wa teng teng tsun made ga, lamik kumla mu ai majaw, nanhte ngai hpe tam ai n rai; muk lu sha nna hkru kat ai majaw sha tam nga myit dai. Hten bya chye ai lusha a matu hkum shaja myit; Masha kasha nanhte hpe jaw lu ai, htani htana asak a matu grin nga ai lusha lu sha na she shaja mu; kaning rai nme law, dai wa gaw Karai Kasang a dazik kap ai wa rai nga ai, ngu nna htan mu ai. Dai majaw shawa masha ni gaw, Karai Kasang myit ra ai hte maren amu bungli galaw lu na matu, anhte gara hku hkan galaw ra a ta? ngu nna shi hpe san yang, Yesu gaw, Karai Kasang myit ra ai hte maren galaw ra ai amu gaw, Shi a shangun dat ai wa hpe kam sham ai lam rai nga ai, ngu nna shanhte hpe htan mu ai. Dai re majaw shawa masha ni gaw, anhte mu lu nna, Nang hpe kam sham na matu, Nang hpa lamik kumla madun dan lu n ta? Nang hpa amu magam galaw n ta? Shi gaw shanhte sha na matu, sumsing lamu de nna muk jaw mu ai, nga nna chyum laika hta ka da ai hte maren, anhte a ji wa ni gaw nam mali hkan e "mana" muk lu sha ma ai, ngu nna Yesu hpe tsun mu ai. Shaloi Yesu htan ya ai gaw; Ngai nanhte hpe gaja wa teng teng tsun made ga, Nanhte hpe sumsing lamu de na muk jaw ai gaw Mawshe n rai, Nye Wa she sumsing lamu de na dai kup tsup ai muk nanhte hpe jaw myit dai. Kaning rai nme law, Karai Kasang a muk ngu ai gaw, sumsing lamu de na yu wa nna, mungkan ga hpe asak jaw ai muk rai nga ai, ngu nna shanhte hpe tsun mu ai. Dai rai nna shanhte gaw, Madu e, dai muk anhte hpe galoimung jaw nga mi, ngu mu ai. Yesu gaw, asak jaw ai muk gaw ngai nan rai nga nngai. Ngai hpang de sa ai wa gaw kawsi hkrum na n rai; ngai hpe kam sham ai wa mung, galoimung hpang gara hkrum na n rai.

Ya hti ai gaw, Madu a Kabu Gara ai shiga rai nga ai.