2018:PRANWAN LADAW LABAN (13) NA MUNGGA

Karai Kasang gaw tsawra myit kaba hte shinggyim masha ni hpe hpan tawn da ai hte maren shinggyim masha ni nga mu nga mai ai hpe ra sharawng ai lam gaw dai ni na chyum mung ga ni sakse hkam ai hpe mu lu nga ai.

Mahkra dang chye ai Karai Kasang ndang di ndang dep ai lam nnga ai majaw Karai Kasang hpe kamsham ai ni, Shi madu myit ra sharawng ai masha ni a matu hkrit tsang hpa lam nnga na re. Hpa majaw nga yang anhte a ru yak jam jau ai lam ni, myit tsang pu ai lam ni hpe Karai Kasang a atsam hte teng sha lai di lu nga ai.

Si ai masha hpe bai chyahkrung sharawt la ai Karai Kasang hpe kamsham myit kaba rawng let Shi hpang de sit shang nna Shi Madu ra sharawng ai lam hta sak hkrung nga sa let anhte ra kadawn ai ahkying aten hta Karai Kasang a lak lai ai shaman chyeju hpe hkam la lu u ga.

MAGAM BUNGLI N LAWM AI MAKAM GAW GAMAN LI LA

“Tinang hkum nan shakut ai ni hpe Karai Kasang mung garum la ai”

Laru kaba wa ai nhtoi langai mi hta, hka kaba wa nna mare ting hpe mayu sha kau ai. Gumgai marai mi, nta kata ngam rawng taw nga ai. Shi mung shat gawk na hkuwat hta tsap taw nga yang, hkali langai du wa ai. Dai li gawt sa ai wa gaw; ‘hkyela lu na matu li n tsa de lung wa rit’ ngu wu ai. ‘Rai sai law, Madu Yesu ngai hpe hkyela na ngai kam nngai’ ngu wu ai. Dai wa mung baw sha ga-ngat let li gawt mat wa sai. Hpang shani, hka hpungla gaw nta n tsa htap de du wa nna hkali langai bai du wa ai hte shi hpe hkye la na tsun tim dai gumgai gaw, Madu shi hpe hkyela na kam ai majaw li hta hkan nang na n dang nu ai. Hpang shani e gaw, hka grau kaba wa ai hte nta numgaw pyi du sai. Gumgai dai hpe mung tsinyam hkye ai ‘Helicopter’ na masha ni mu ai hte shi hpe hkyela na sumri jahkrat ya ai rai tim, Madu Karai hkyela na kamsham ai majaw n hkraw ai sha ngam nga da sai. Hpang shani e gaw hka kaba wa ai hte nta ting lup mat nna gumgai dai mung hka hta lup si mat sai.

Sumsing lamu de du ai shaloi, shi gaw San Petru hpe, “kata de ngai n shang shi yang, lajin laroi ga shawng tsun mayu nngai, Karai Kasang ngai hpe hkyela na kamsham ai raitim, ngai hpe hka lup si shangun ai” ngu wu ai. San Petru mung mau mat ai hte shi hpe, “Madu gaw hkali lahkawng hte Helicopter langai sa dat sai le, dai hta jan grau nna Madu na a matu hpa jan galaw ya lu na ngai mung n chye sai” ngu nu ai da.

Dai ni na kabu gara shiga hta mung, garum la na ra ai masha lahkawng a lam lawm ai. Dai yan mung Karai Kasang hpe kam shamyet ai hte mi na gumgai kamsham ai hte gaw tsawm ra mi shai nga ai. Shawng na wa gaw numsha marai mi re. Madu Yesu shi hpe shamai shatsai ya na hpe kamsham ai raitim, lama ma galaw ra na hpe shi chye lu wu ai. Nta kata hta sha n nga nga ai. Shamai shatsai hkrum lu na matu Yesu hpang de sa wa sai. Yairu a mabyin mung dai zawn sha rai nga ai. Shi a kasha hpe Yesu shamai ya na kamsham ai hte sha n rai, shi hkum nan Madu hpang de sa nna, shi a kasha hpe shamai ya na matu nta de hkan nang na saw shaga wu ai. Shi a kasha gaw grai machyi ai majaw Madu Yesu hpe sa hkrum lu na matu n mai byin ai.

Dai lahkawng yan gaw Madu Yesu hpe kamsham ai hte sha n rai, shanhte galaw ra ai lam galaw ma ai. Shanhte yu maya galaw ai raitim, Karai Kasang gaw shanhte ra ai shamai shatsai chyeju jaw ya sai. Dai gaw anhte ni lagawn lamawn rai, dung nga nna Karai Kasang anhte a matu galaw ya na lamik kumla hpe la taw nga n mai ai, ngu ai lam re. Anhte hkum hkye hkrang la lu na matu Karai Kasang jaw da ai yu maya atsam marai hpe sung lang na ra nga ai. Dai yu maya atsam marai ni gaw mayak mahkak aten ladaw hta Karai Kasang hpang de sit shang nna lawan ladan garum ya na hpyi lajin chye nga ai. Dai zawn rai sha Karai Kasang gaw anhte ra kadawn ai shaloi anhte hpe garum la na re.

Sawn sumru mai ai lam; Madu hta kamsham ai myit, ngai hta kade rawng ai rai? Mayak manghkang ni ngai na prat hta du wa ai shaloi, ngai hta kaning rai myit masa nga ai rai? Karai Kasang ngai hpe garum hkyela na matu a la nga ai kun? (snr) dai mang hkang ni hta na lawt lu na matu ngai lama ma galaw na shakut sai kun?

2018:PRANWAN LADAW LABAN (13) NA CHYUM LAIKA

PRAN WAN LADAW HTA LABAN 13

1st July 2018

CHYUM MUNGGA DAW 1

Hpaji Byengya 1:13-15; 2:23-24

Ya hti na gaw, Hpaji Byengya laika hta na rai nga ai.

Madu Karai Kasang gaw si hkrung si htan lam hpe, n shabyin da sai rai nna, hkrung nga ai ni hpe jahten shabya ai lam shi ra sharawng ai n rai. Nga yawng nga pra ahkrung nga na matu, Karai Kasang shanhte hpe hpan da nu ai majaw, sat kau lu ai agung shanhte hta n rawng nga ai; katsan ga na ni mung ndai dinghta ga ntsa e ahkang aya n lu ma ai; kaning rai me law, dinghpring dingman ai lam htani htana e agrin nga ai. Madu Karai Kasang gaw Shi a ahpraw asam the bung hkra shinggyim masha hpe shachyaw da sai rai nna, dai masha wa hpe si n chye ai hku shi hpan da nu ai. Rai timung, nat a manawn masham myit a majaw, si hkrung si htan mungkan ga e shang wa nna, nat a hpang maga hkan lawm nga ai ni gaw, dai lam hpe chye chyang wa na mara ai. 

Ya hti ai gaw, Karai Kasang a mungga rai nga ai.

CHYUM MUNGGA DAW 2

2 Korinhtu 8:7, 9, 13-15

Ya hti na gaw, Korinhtu masha ni hpang de San Pawlu shagun dat ai laika lahkawng hta na rai nga ai.

Nanhte gaw makam masham hte ga shaga ai hta, chye chyang ai hte shakut sharang ai lam amyu myu hta, anhte hpe tsawra ai lam hta mung, ndai lam shagu hta hkum tsup nga myit dai. Dai rai nna, (Yerusalem mare na matsan mayan ai hpung masha ni hpe bau garum ai.) ndai tsawra dum ai lam hta, nanhte dang ai daram garum ya na hpe myit mada nga ga ai.

Ndai amu hta e, masha kaga hpe kyindut ai shaloi garum ya ai majaw, nanhte nan kyindut hkrum na hpe ngai tsun nga nngai nrai; maren mara rai na lam hpe ngai myit nga nngai. Ya e, nanhte a jan gaw shanhte a taw ai hta shang lu na rai nga ai. Dai hku galaw yang, maren mara rai na ra ai. Shing rai, ‘Law law hta la ai wa jan ai n rai, Loi mi hta la ai wa mung naw ra nga ai n rai,’ nga nna Chyum Laika hta ka da ai hte maren dik wa na ra ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 5:21-43

Ya hti na gaw, Marku a laika hta na Kabu Gara Shiga rai nga ai.

Yesu gaw, li hte wora hkran de bai rap wa yang, masha unawng uwa kaba Shi kaw sa hpawng ma ai. Dai nawng makau e, Shi naw nga ai. shaloi, tara jawng agyi ni hta na, Ya-iru mying ai masha langai mi sa du nna, Yesu hpe mu jang, shi a lagaw nhpang e dingnyawm nna, Nye a shayi sha kaji si wa magang nga ai; shi bran wa nna, naw ahkrung nga na matu, shi a ntsa lata sa mara ya rit, ngu nna akroi anoi shi hpe hpyi nem wu ai. Dai rai nna Yesu shi hte rau sa wa ai; masha wunawng kaba mung, Yesu kaw hkan gumbawm nna, shanhte gaw shi hpe kanawng matep hkra mu ai. Shi lahkawng ning tup sai htaw machyi ai numsha langai mi mung lawm nga ai, shi gaw tsi sara law law a lata hta nni nkri law law wa hkrum ai hte, shi lu malu mahkra hpe shama kau timung, n mai mat lu ai sha, grau nna yak wa lu ai.

Dai numsha gaw Yesu a lam na yang, shawa hpawng hta e Madu a shingdu maga de sa du nna Shi a hpun palawng hpe ahtawk wu ai. Kaning rai n me law, shi gaw, Dai Sara wa a hpun palawng hpe chyu sha ngai ahtawk lu jang, ngai mai wa na nngai, nga ai. Shaloi jang, sai htaw ai a npawt pat mat wa nna, shi a atsu atsam mai mat ai hpe, shi a myit hta e dum chye wu ai. Yesu gaw Shi hta na atsam pru wa ai hpe, Shi a myit hta shaloi jang chye dum ai majaw, dai shawa hpawng de kayin yu let, Nye a hpun palawng hpe kadai ahtawk ya sai i? ngu nna san mu ai. Dai rai nna, Shi a sape ni gaw, shawa masha ni Nang hpe kanawng matep hkra nga ai hpe, Nang mu nhtawm e, Ngai hpe kadai ahtawk ya a ta? naw nga n hka i? ngu nna Shi hpe htan mu ai. Yesu mahtang, shi hpe ahtawk ai kadai re ai chye na matu naw kayin yu nga ai.

Shaloi dai numsha gaw, shi hta byin ai amu hpe chye chyang ai majaw, hkrit gari let sit sa nna, Yesu a man e dingnyawm nhtawm, shi a lam mahkra hte hpe tengman ai hku tsun dan wu ai. Yesu mahtang, shayi sha e, na a kam sham ai gaw nang hpe shamai ya nit dai; nang machyi ai ana ahkya hta na lawt lu nna, ngwi pyaw ai hte wa nu, ngu nna shi hpe tsun dat wu ai. Yesu dai ga hpe naw tsun nga yang, Dai tara jawng agyi a nta de na, masha nkau mi sa du nna, Na a shayi sha si mat sai; dai Sara hpe hpa majaw naw shatsang nga n ta? ngu mu ai. Yesu mahtang, dai masha ni tsun ai ga hpe na jang, hkum hkrit et; kam sham ai myit sha rawng u, ngu nna tara jawng agyi wa hpe tsun wu ai. Shaloi, Petru, Yaku hte Yaku a kanau Yawhan hta kaga, shi kaw hkan nang na ahkang kadai hpe mung n jaw mu ai. Ya, dai tara agyi a nta de, du yang, kaming kamawng re ai, hkrap ngu hkrap ngoi ai hte sharung shayawt kaba hpe Yesu mada mu wu ai.

Shi nhku de shang wa yang, nanhte hpa rai nga myit ta? Ma gaw si ai n rai, yup pyaw nga ai, ngu nna shanhte hpe tsun mu ai. Shanhte chyawm gaw shi hpe asawng asang ngu kau mu ai. Yesu mahtang yawng hte hpe shaden kau ngut jang, dai ma a kanu yan kawa hte shi a manang masum hpe shaga la nna, dai ma taw nga ai shara de shang wa ma ai. Shaloi, dai ma a lata hpe Shi jum nna, Talihta Kumi, ngu wu ai; de a ga lachyum gaw, Ma e, ngai nang hpe tsun de ai, Rawt u, ngu ai rai lu ai. Shaloi jang dai numsha ma rawt hkawm wa ai; shi a aprat gaw shi lahkawng ning rai nga ai. Shingrai shanhte nachying mau mahka mat ma ai.43Dai lam hpe kadai mung n chye mu ga, Yesu shanhte hpe grai ginhtim da mu ai; dai hta kaga, ma hpe shahpa jaw na shi htet da mu ai. 

Ya hti ai gaw, Madu a Kabu Gara Shiga rai nga ai.

2018:SAN YAWHAN BAPTISTA SHANGAI POI SHANI NA MUNGGA

Karai Kasang hpan da ai shinggyim masha hkum ngau shagu shangai wa ai shaloi mai kaja ai hte hpring tsup let kaja ai masha langai mi byin tai wa na matu myit mada mai nga ai. Shi lu tawn da ai dawdan lu ai ahkaw ahkang hpe htap htuk ai hku jai lai let masha ni hpe pawn ba lu ai masha byin tai mai nga ai.

Yahaw Baptista shangai wa ai shaloi makau grup yin na masha ni kabu pyaw ai hte maren asak aprat kaba wa ai hte masha ni hpe dingman ai lam hta hkawm sa na Madu Yesu hpe madun dan lu ai myi htoi kaba langai byin tai wa sai.

Karai Kasang jaw ya ai wanglu wanglang dawdan lu ai ahkaw ahkang hpe anhte lu tawn da ai nyan marai ni hte masam maram let manang wa hpe Madu Yesu hpang de woi sa lu hkra shakut shaja lu ai chyeju ni hpe hkam la lu u ga.

LAM WOI KAJA

San Yawhan Baptista a prat hta shi hpe Madu Yesu hta grau ai wa ngu myit la ma ai. Shi gaw Messiah Madu a shawng lam lajang ai wa rai nna shi shangai wa na hpe lamu kasa gaw tau nau myi htoi tsun da sai. Shi hpe myihtoi Eliah shang sha ai wa ngu myit la ma ai. Lani mi hta sha masha marai mun mi daram hpe kashin kamun jaw, hkaw tsun lu ai wa hku nna mying dan hkung wa sai. Madu Yesu tara mungga hkaw tsun ai lam n-galaw shi ai ten kaw nna Yawhan hta hpang hkan sape ni shawng nga sai. Simun Petru hte kahpu kanau Andre ni gaw San Yawhan a sape ni rai nga ma ai.

Madu Yesu hte seng nna san Yawhan shi a lam sape ni hpe tsun sharin ai hta; ‘shi gaw rawt jat wa na rai nna, ngai chyawm gaw yawm wa na ra ai’ nga nna tsun let sape ni hpe Yesu hte rau nga da na matsun sai. Madu Yesu hpe mu ai hte rau, “Karai Kasang a sagu kasha hpe yu yu mu” nga nna kalang ta tsun shapraw sai. Madu Yesu mung, “kanu ni yawng hkra kaw nna shangai ai gara kasha mung shi hta grau ai n-nga ai’ nga nna bai htang tsun sai.

Madu Yesu, Yawhan kaw nna kashin kamun hkam la ai gaw shut hpyit mara kaw nna lawt lu na matu n rai, shagrit shanem ai hpe madun na matu rai nga ai. Myit ru tsam pu ten, ung ang ai hpe hkam sha ai ten ni hta san Yawhan Baptista a garum shingtau la ai hpe anhte hpyi mai nga ai. Shi hkum nan Hkristu hpe Messiah madu re ngu tsun dan ai shaloi shut ai mabyin rai na hpe myit tsang ai lam nga yang nga lai wa na sai. Rai tim, dai myit ru tsam pu ai lam hpe shi hkam jan tawt lai lu nna anhte Nawku Hpung labau hta ahkyak dik htum ai masha marai mi shi tai nga sai.

Anhte ni yawng hta; sharin shaga mayu ai myit, lam woi ning shawng tai mayu ai myit hte hkaw tsun ai wa tai mayu ai myit ni nga na re. Raitim, anhte yawng galaw ai lam a hpang jahtum hte bung pre ai bandung gaw Hkristu Madu sha rai nga ai hpe anhte n mai malap na re.

2018:SAN YAWHAN BAPTISTA SHANGAI POI SHANI NA CHYUM LAIKA

SAN YAWHAN BAPTISTA SHANGAI POI 

24th June 2018

CHYUM MUNGGA DAW 1

Esaia 49:1-6

Ya hti na gaw myihtoi Esaia laika hta na rai nga ai.

Ngai a ga na la mu, sumtsan hte zunlawng amyu masha ni e! Ngai n shangai yang Madu ngai hpe lata la ni ai. Shi a shangun ma tai na san da ni ai. Nhtu nshan zawn Shi nye n-gup ga hpe shadai ya ni ai. Shi lata hte ngai hpe makawp maga ai. Shachyen mara da ai pala zawn shi ngai hpe daw jau na jin jin nga shangun ai. Shi ngai hpe tsun ai, Israela e, nang nye shangun ma re. Nang hta nna masha ni ngai hpe shagrau sha-a na ra ai, nga ai. Ngai tsun ai, Ngai atsam dat tim lila re. N-gun tup shakut tim kaman re, ngu nngai. Raitim, nye a lam hta Madu hta kam krem nngai. Nye amu hta shi htang jaw na ra ai. Garai n shangai yang shi ngai hpe san da ni ai. Shi a masha ni hpe nhtang wa ya na bra ayai nga ai Israela masha ni hpe jahpawng la ya na wa, shi a shangun ma ngai hpe shatai da ni ai. Madu ngai hpe arawng jaw ai. Shi nye a n-gun la ai npawt rai nga ai. Madu ngai hpe tsun ai, nang hpe ngai grai kaba ai bungli jaw na de ai. Ngam nga ai Israela masha ni a arawng sadang hpe sharawt da ya ai, shangun ma tai ai sha; nang n law ai. Masha ni a nhtoi shatai na de ai. Mungkan ting hta hkye la ai lam pri wa na rai nga ai, nga ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

Kasa 13:22-26

Ya hti na gaw Kasa laika hta na rai nga ai.

Shawlu hpe jahkrat kau ai hpang, Karai Kasang gaw, Dawi hpe shanhte a hkawhkam shatai ya wu ai. Karai Kasang shi a lam ning nga ai, Yese a kasha Dawi hpe ngai htuk mu se ai. Ngai ra ai lam yawng hkan shatup na wa rai nga ai. Dawi a amyu matu hta Yesu paw pru sai. Ga shaka hte maren, Yesu gaw Israela masha ni a Hkye La Madu, Karai Kasang sharawt da ai wa rai nga ai. Yesu magam garai n hpang yang, Yawhan Israela masha ni yawng hpe hkaw dan nna, myit malai nhtawm hkam la na tsun mu ai. Yawhan shi a bungli kre mahka e, masha ni hpe san let, Nanhte ngai hpe kadai wa ngu myit ta? Ngai gaw nanhte ala ai wa n rai nngai. Raitim, na la mu! Nye a hpang e du na ra ai. Ngai mahtang shi a kyepdin shingri raw ya na pyi n gying nngai. Abraham a kashu kasha ni hte Karai Kasang hpe nawku ai ni yawng e, ndai hkye la ai mungga gaw anhte a matu nan jaw dat ai rai sai.

Ya hti ai gaw Karai Kasang a mungga rai nga ai.

KABU GARA SHIGA

Luka 1:56-66, 80

Ya hti na gaw Luka a laika hta na Kabu Gara Shiga rai nga ai.

Elizabeth nhtoi gu nna, shadang sha shangai ai. Htingbu ni, jinghku ni, Madu shi hpe chyeju chyalai jaw sai lam, na jang, shi rau jawm kabu nga ma ai.  Matsat ya du jang, ma hpe matu kadoi na ma ai hte, kawa zawn, Zakari, ngu mying jaw mayu ma ai.  Kanu a kraw nna, shi a mying Yawhan, rai lu ai, nga ai. Shanhte shi hpe tsun mu ai. Shaloi kawa hpe dingsi shaga nna, ma hpe kaning ngu shamying mayu ai lam san mu ai. Shi lungpa langai hpyi la nna, Shi a mying Yawhan, rai lu ai, ngu ka ya mu ai. Shanhte nlang mau mat ma ai.

Dai jang Zakari mung ga shaga mai wa ai. Shi a Karai Kasang hpe chyeju dum shakawn nga ai.64Htingbu manang ni yawng hkrit kahpra wa ma ai. Yuda bum ga ting dai shiga pri rai wa ai. Dai na la ai ni yawng na myit mau let, ndai ma hpa she rai wa na ra ai kun? nga shada tsun hkat ma ai. Ma hta Madu a dagu rawng nga ai gaw dan nga ai. Ma hkum hkrang wenyi hta kup tsup let galu kaba wa ai. Nam mali de sha nga nga nna, aten du jang, Israela masha shawa kaw du pru wa sai.

Ya hti ai gaw Madu a Kabu Gara shiga rai nga ai.

2018:PRANWAN LADAW LABAN (11) NA MUNGGA

Kaji ai amu hta kangka ai wa gaw kaba ai amu hta kangka na re ngu ai hte maren hkik hkam ai amu magam ni yawng gaw kaji ai amu magam kaw nna hpang ai rai nga ai. Kaji ai hkai tum langai gaw atsam marai nnga ai zawn raitim shi a shara, shi a aten ahkying htuk ai shaloi hkai ai rai yang tu kaba wa nna ahkying aten na wa ai hte maren mayat maya wa nna tsun ndang hkra law htam wa lu nga ai.

Anhte a makam masham, anhte galaw lu ai n-gun atsam gaw kaji la ai re, hkang nhkang na re, ngu nna myit ndaw hten ai sha shakut shaja sa wa lu nna tinang a wuhpung wuhpawng hpe kaja ai de galai shai lu na matu, shing nrai, kaba ai amu magam byin tai wa lu na matu Wa Karai Kasang hpang de ap nawng shaman hkam la let hkan sha tup galaw sa lu u ga.

MADU YESU HPE NINGSHAWNG DA AI RAI YANG

Dai ni na kabu gara shiga hta, masha marai mi ga ntsa e nli tum hkai ai lam Madu Yesu tsun ai hpe anhte na lu ga ai. Madu Yesu tsun ai hte maren, “dai gaw chyinghkrang tum zawn rai nga ai; ga ntsa e gat dat jang ga ntsa na tum amyu mahkra hta kaji htum dam timung, gat dat ai hpang tu wa nna, shatmai lap amyu mahkra hta grau kaba wa ai hte, lakung lakying kung dam wa nna, ntsa malen u ni de a shingnip hta e shingbyi nga lu ma ai, ngu mu ai” (4:31-32). 

Ndai hta Madu Yesu tsun dan mayu ai lam gaw, Karai Kasang a atsam hta rai yang, kaji dik htum ai nga timung, lak lai ai hte kaba dik htum ai de du wa lu ai, ngu ai lam rai nga ai. Teng sha wa, Madu Yesu tsun da ai lam gaw shi a htawm hpang na Nawku Hpung hpe tsun ai lam rai sai. Dai aten hta kachyi sha mi raitim, gau ngwi ngwi gaw rawt jat galu kaba wa nna hpang e gaw mungkan ting chyam bra hkra kaba wa sai. Anhte marai hkum shagu a myit masin hta mung Madu Yesu anga nga ai hpe sawn la mai ai. Teng sha nga yang, anhte marai hkum hpra hpe mung shi Madu a marang e rawt jat galu kaba wa ai hte san pra masha pyi tai shangun mayu nga ai.

Kasa Pawlu a prat hpe gashadawn yu yu ga. Shi gaw grai nga nna shakut lai wa sai Hparishe, Hkristan ni hpe zingri zingrat galaw lai wa sai raitim, Madu Yesu shaga la ai hte galai shai ya ai marang e, anhte chye ai hte maren, mau hpa Sasana majen je ai wa shi tai wa sai. Dai hte maren, kasa Petru hpe mung yu yu ga. Hkrit ja ai masha shi raitim, Madu Yesu garum madi shadaw la ai marang e, marai rawng ai, shi a Nawku hpung a ningbaw nnan shi tai wa sai.

Dai hte maren sha anhte yawng hkra hpe mung Madu Yesu gaw atsam ningja jaw galai shai wa na hpe ra sharawng nga ai. Anhte kaw nna galaw ra ai lam gaw, tinang hkawm sa taw sai hkrun lam hta n shut n shai ding ding hkawm sa nna Madu Karai hte grau grau ni htep wa hkra madu Yesu lam woi sa wa ai hte shakut hkawm sa na lam sha rai nga ai. Dai shaloi, Madu Yesu gaw anhte hpe ngwi pyaw ai, awngdang gat hkrang ai, kabu gara ai, atsam marai rawng ai prat, san pra ai masha pyi anhte hpe byin shangun na re!

Sawn sumru mai ai lam; Madu Yesu hpe anhte a prat hta shara jaw, ningshawng jaw da ai kun? Anhte marai hkum shagu a salum hta shi Madu hpe shara jaw da nna n shut n shai hkawm sa na myit mada let shakut nga ai kun?

2018:PRANWAN LADAW LABAN (11) NA CHYUM LAIKA

PRAN WAN LADAW HTA LABAN 11

17th June 2018

CHYUM MUNGGA DAW 1

Ezekela 17:22-24

Ya hti na gaw, Myihtoi Ezekela a laika hta na rai nga ai.

Madu Karai Kasang ning nga ai; Dai rit hpun a ndung e tu nga ai, tsaw htum ai makrung hta na maku langai mi hpe ngai di la nna, tsaw ai bum ntsa e hkai da na nngai: tsaw htum ai Israela bum ntsa e ngai dai hpe hkai da na nngai. Dai gaw lakung lakying kying wa nna, asi si ai hte reng htum ai rit hpun tai na ra ai: de a npu e, u amyu shagu nga nga nna, de a lakung lakying ni a shingnip hta shanu nga na mara ai. Shingrai, Ngai Madu gaw, tsaw ai hpun hpe shanem kau nna, nem ai hpun hpe shatsaw nngai mung, tsit lali ai hpun hpe jahkraw kau nna, hkraw ai hpun hpe tsit lali shangun nngai mung, nam mali na hpun ni yawng chye lu na mara ai; ngai Madu nan tsun ai hte maren shabyin na nngai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

2 Korinhtu 5:6-10

Ya hti na gaw, Korinhtu masha ni hpang de San Pawlu shagun dat ai laika lahkawng hta na rai nga ai.

Hpu nau ni e, anhte galoi mung myit mada let kam nga ga ai. Madu hpe n mu lu timung, makam masham anhte hpe lam madun dan ai majaw, ndai hkum hkrang hta naw shanu nga yang, Madu hte anhte tsan gang nga ai hpe chye nga ga ai. Kaja wa, anhte myit mada let kam nga ga ai rai nna, ndai shinggyim hkum hkrang hte hka mat nna, Madu kaw shanu lu u ga, anhte grau nna ra nga ga ai. Dai rai nna, anhte a hkum hkrang hta naw rawng nga timung, dai hkum hkrang hte hka mat wa timung, Madu a man e sharawng awng ai ni tai lu hkra, n sim n sa shakut shaja nga ga ai. Kaning rai me law, tara jeyang daw dan ai Hkristu a man e, anhte a lam mahkra dan pru na ra ai. Dai shaloi e, Kaja ai hte n kaja ai hpe, dai hkum hkrang hta galaw saga ai hte maren, anhte langai hte langai hkam la shajang na ra ai.

Ya hti ai gaw, Karai Kasang a mungga rai nga ai.

KABU GARA SHIGA

Marku 4:26-34

Ya hti na gaw, Marku laika hta na Kabu Gara Shiga rai nga ai.

Yesu shi a sape ni hpe tsun mu ai gaw; Karai Kasang a mungdan ndai zawn rai nga ai; Masha langai mi aga hta nli gat bang da nu ai. Shaloi shani shana shi yup wa, rawt wa nga ai rai nna, shi n chye ai hku dai nli gaw pru wa nna, tu kaba wa nga ai. Aga gaw shi chyu asi si shangun nna, shawng e maku, hpang e mam nsi, dai hpang mam nsi kata e n-gu tum kung wa shangun ai. Mam myin jang, nmut ta du ai majaw, dai nli gat ai wa, shaloi jang nhkyau lang nna, mam dan nga ai, ngu mu ai. Bai Yesu gaw, Karai Kasang a mungdan hpe hpa hte shabung lu ga ta? Hpa baw ga shadawn hte shadawn na ga ta?

Dai gaw chyinghkrang tum zawn rai nga ai. Ga ntsa e gat dat jang, ga ntsa na tum amyu mahkra hta kaji htum rai nga timung, gat dat ai hpang tu wa nna, singwum kaba tai wa ai hte, lakung lakying kung dam wa nna, ntsa malen u ni, de a shingnip hta e shingbyi nga lu ma ai., ngu mu ai. Shingrai ga shadawn hku law law hte, shawa masha ni matsing lu ai hte maren, Yesu shanhte hpe dai mungga lam tsun dan mu ai. Ga shadawn hte nrai yang gaw, shi shanhte hpe hpa mung n tsun dan yu ai. Rai timung, Yesu hte Shi a sape ni hkrai nga ai shaloi, dai ga mahkra a lachyum shi shanhte hpe tsun dan mu ai.

Ya hti ai gaw, Madu a Kabu Gara shiga rai nga ai.

2018:YESU A SALUM NINGSANG POI SHANI NA MUNGGA

Karai Kasang jaw tawn da ai tara lam ni yawng a daju gaw Shi Madu Karai Kasang hpe tsawra chye na matu hte htingbu wa hpe tsawra chye na matu rai nga ai. Ndai tsawra myit lahkawng hpe Madu Yesu hta rawng ai hpe dan dan leng leng mu lu nga ai.

Shinggyim masha langai zawn masin pawt aMi, yawn ai, hkrap ai, matsan dum ai, myit ni Shi hta rawng ai ten ni hta Shi galaw sa ai magam lam ni a npawt daju gaw Kawa Karai Kasang hte htingbu wa hpe tsawra ai ngu ai re. Tsawra myit hte hkum zup ai wa re majaw Shi a tsun shaga ai ga ni hte arawn alai ni gaw Karai Kasang hte htingbu wa hpe tsawra ai ngu ai hpe hkrang shapraw ya nga ai.

Yesu a salum ning sang poi hpe galaw ai shaloi anhte galaw sa ai lam shagu hte tsun shaga ai ga ni gaw Karai Kasang hte htingbu wa hpe tsawra ai ngu ai hpe sakse hkam lu na matu shakut shaja sa wa ga.

TSAWRA MYIT HTE HPRING TSUP AI YESU A SALUM NINGSANG

Anhte shinggyim masha ni a Salum gaw tsawra myit a masat kumla rai nga ai hte myit mang, tsun shaga, shamu shamawt lam mahkra a npawt rai nga ai. Nawku hpung hta Yesu a salum Ningsang poi kaba hpe Wasarabyin Pius IX gaw 1856 ning kaw nna woi awn galaw ai rai nga ai. Hpa majaw ndai poi hpe galaw ai rai ta?

Masha a hkum hkrang hta masin salum gaw, tsawra ai, n ju n dawng ai, kabu pyaw ai, yawn ai, myit machyi ai, hkrit tsang ai, matsan dum ai, myit daw ai zawn re ai, myit a shamu shamawt lam mahkra hpe hkam sha chye ai shara re ai hpe masha ni kam ma ai. Chyum laika hta shaleng da ai masha a salum gaw dai hta grau nga ai. Masha a masin salum gaw Karai Kasang hte tsaw ra kam sham matut mahkai ga shaga ai daju shara rai nga ai. “Shada da tsawra nga ga (1Yh 4:11) nga ai hte maren anhte grai tsawra hku hkau ai masha ni, grau nna shanhte ru yak jam jau hkrum nga ai ten hta jahkring hkring myit dum akyu hpyi ya chye nga ga ai. Dai ten Madu Yesu mung anhte hte rau shanhte a matu akyu hpyi ya nga ai hpe myit dum la mai nga ai. “Wa e, shanhte a mara dat kau ya mu: shanhte galaw ai lam shanhte n chye nga ma ai” (Lk 23:34). Yesu a Salum ningsang poi hpe galaw ai gaw, anhte hpe tsawra matsan dum n jin ai Yesu hpe chyeju dum shagrau ai lam mung rai nga ai. Dai ni na kabu gara shiga hta, “Shi a garep hpe ri hte galun waw ya ai shaloi jang, sai hte n tsin pru wa ai” (Yh 19:31) ngu ai gaw Yesu anhte hpe gade daram tsawra ai hpe tatut madun dan ai lam rai nga ai. Madu Yesu gaw mabyin amyu myu hku nna anhte hpe shi a tsawra myit madun dan ai hpe law law lang n chye hkap la ga ai. Shi a tsawra myit kaba hte masha ni a mara raw dat kau ya ai, machyi makaw hta na shamai shatsai ya ai, shut hpyit mara hta na hkyela ai, kaja ai hte n kaja ai masha yawng hpe tsawra chye na hkap la, chyeju jaw ya ai Madu rai nga ai. Yesu gaw “hki ba la nna lit li gun ai ni yawng hte e, ngai kaw wa marit, ngai nanhte hpe ban sa shangun na made ai” (Mt 11:28) nga nna tut e saw shaga hkap la n-gun jaw ya nga ai.

Kalang lang tinang a magam bungli galaw ai hta n kam mat wa ai shaloi kang ka ai hte galaw lu na saw shaga ai, ru yak jam jau, myit ru myit tsang amyu myu hkrum nga ai ni hpe, shi hpang de wa na matu Yesu saw shaga nga ai. Grau nna, Yesu shi a sape ni hte hpang jahtum shana shat sha ten hta shi a tsawra myit sakse hku nna Chyoipra hkum sakramentu hpe shabyin da ya sai. Ndai chyoipra hkum kaw nna masha yawng gaw tut e lwi taw nga ai hka hpawk zawn anhte hpe chyeju n taw n tsang jaw ya nga ai. Kalawari kawng ntsa Yesu u dang hta jen noi da hkrum ai ten hta, “Wa e, shanhte a mara dat kau ya mu: shanhte galaw ai lam shanhte n chye nga ma ai” nga nna anhte shinggyim masha ni a mara a matu tsawra myit kaba hte hpyi nem tawng ban ya ai rai nga ai. 

Hpang jahtum Yesu a garep hpe Nri hte galun waw ya ai shaloi Sai hte N tsin pru wa ai gaw anhte shinggyim masha ni hpe tsawra dik sai lam shadan dan ai rai nga ai.

Dai ni na kabu gara shiga gaw mau hpa Madu Yesu a tsawra matsan dum ai lam hta shang lawm na matu anhte yawng hpe saw shaga nga ai. Yesu zawn grit nem ai, tsawra matsan dum ai, mara raw ya ai, shada chye na hkap la ai, myit galu kaba ai hte tinang a kun dinghku, uhpung uhpawng hta Karai Kasang jaw ai kabu hpa shaman chyeju hpe lu la, garan jaw lu ai kun? ngu nna tinang a hkum hpe dinglik yu mai nga ai. 

Sawn sumru mai ai lam: Ngai a prat hkrun lam hta byin wa ai lam shagu hpe Karai Kasang a shaman chyeju re ngu ngai hkap la ai kun? Chyoipra hkum hpe man man sa du kawan let, akyu hpyi ai aten gade wa ngai lu jaw nga ai kun?

2018:YESU A SALUM NINGSANG POI SHANI NA CHYUM LAIKA

YESU A SALUM NINGSANG POI

10th June 2018

CHYUM MUNGGA DAW 1

Hosea 11:1,3-4,8-9

Ya hti na gaw, Hosea a laika hta na rai nga ai.

Madu Karai Kasang a mungga madat la mu: Israela gaw ma kasha naw rai nga yang, ngai shi hpe tsawra nna, ngai sha hpe Egutu mung de na shaga la se ai. Ngai nan Ehprim hpe hkawm sharin nngai; nye a lata hte shanhte hpe pawn nngai: rai timung, ngai lanu lahku ai hpe shanhte n dum n chye ma ai. Tsawra matsan dum ai sumri hte ngai shanhte hpe dun woi la nngai. Ma kaji hpe pawn ahpum nna angwisha lusha jaw ai wa zawn ngai rai nga nngai. Nye a kraw kata e matsan dum ai myit hpring tsup nna nye a n gaw n wai ai myit katu nga ai. Ngai naw masin pawt kahtet ai hte maren, n daw dan mayu nngai; Ehprim hpe ngai bai jahten kau na n rai. Hpa majaw nga yang, ngai gaw masha n rai, Karai Kasang rai nga nngai: nanhte a ka-ang e shanu ai Chyoi pra htum ai Wa ngai rai nga nngai; ngai gaw nanhte hpe jahten shabya kau na myit n rawng nngai. 

Ya hti ai gaw, Karai Kasang a mungga rai nga ai.

CHYUM MUNGGA DAW 2

Ehpesu 3:8-12, 14-19

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, Ngai gaw chyoi pra ai ni yawng hta kaji htum ai wa rai nga timung, maigan amyu ni hpe Hkristu a galu kaba htum ai sutgan lam tsun shana dan na matu mung, dai sung la ai amu lam gara hku dik wa na ra ai lam, masha yawng hte hpe madun dan na matu mung, ngai hpe dai chyeju jaw ya ni ai. Nga manga hte hpe hpan da sai Karai Kasang hta e, moi chyaloi nhkoi kaw nna, dai sung la ai amu lam makoi magap da sai. Ya e Nawku Hpung a lata hte, Karai Kasang a chyahtum chyalai re ai hpaji byeng-ya hpe, lamu lahta tang e nga ai du magam ni hte ahkang aya lu ai ni kaw, shana dan na ra ai; dai gaw, anhte a Madu Yesu Hkristu hta e shabyin na matu, prat dingsa Karai Kasang yaw shada ai lam hte maren rai nga ai. Anhte a Madu Yesu Hkristu hpe kam sham ai a marang e, nden ja ai myit hte, n hkrit n kang let, Karai Kasang kaw shang wa ai lam anhte lu la ga ai.

Dai lam hpe myit dum let, sumsing lamu hta mung, ginding aga hta mung, kawa ngu shamying ai yawng hte a npawt daju rai nga ai,  anhte a Madu Yesu Hkristu a man e ngai lahput hput di let akyu hpyi nga nngai; Dai Kawa gaw, shi a Wenyi a marang e, shi a n taw n tsang ai hpung shingkang hte maren, myit kraw lawang de hkrang lu ai atsam hte, nanhte hpe shadaw shalan ya u ga; Hkristu gaw makam masham a marang e, nanhte a masin salum hta shanu nga lu u ga; Tsawra ai lam hta nanhte ru jung da nna, tsawra ai lam a ntsa e nanhte a nga sat nga sa ai lam a npawt nhpang gaw da lu myit ga; Shing rai, chye chyang ai myit hte n dang chye ai Hkristu a tsawra ai lam, de a nda de, dingdung de, tsaw de, sung de, gade wa galu kaba nga ai hpe, Karai Kasang a amyu masha ni yawng hte rau, nanhte chye na lu myit ga; Karai Kasang a hkum tsup ai lam, mahkra hte, nanhte hkum tsup lu mu ga matu, ngai akyu hpyi nga nngai.

Ya hti ai gaw, Karai Kasang a mungga rai nga ai.

KABU GARA SHIGA

Yawhan 19:31-37

Ya hti na gaw, Yawhan a laika hta na Kabu Gara Shiga rai nga ai.

Dai shani gaw shachyip ai nhtoi rai nga ai hte, laban nhtoi e wudang hta mang n noi nga u ga, Yuda masha ni gaw jen noi nga ai ni a lagaw kayet daw nna, dai mang ni hpe htawm kau na, Pilatu kaw ahkaw ahkang hpyi ma ai. Dai majaw hpyen la ni sa nna, Yesu hte rau jen da ai yan a lagaw hpe, kayet daw ya mu ai: Yesu kaw du yang, shi si mat sai hpe shanhte mu ma ai majaw, Shi a lagaw hpe n daw ya mu ai. Rai timung, hpyen la langai mi gaw, Yesu a garep hpe ri hte galun waw ya wu ai rai nna, shaloi jang sai hte ntsin lwi pru nga ai. Dai lam, mu ai wa gaw sakse hkam ya ai rai nna, shi a sakse teng man nga lu ai. Nanhte mung kam sham lu myit ga, teng man ai ga shi tsun nga ai gaw, shi nan chye nga ai. Hpa majaw nga yang, dai lam byin ai gaw,‘Shi a nra langai mi pyi daw na n rai,’ nga nna chyum laika hta ka da ai gaw, dik wa na matu rai nga ai. Bai Laika langai mi hta, Shanhte galun waw kau ai wa hpe shanhte mu lu na ra ai’ nga nna ka da nga ai.

Ya hti ai gaw, Madu a Kabu Gara shiga rai nga ai.