2018: PRANWAN LADAW LABAN (4) NA MUNGGA

Karai Kasang a hkum tsup ai tsawra myit hpe shut hpyit mara kaba galaw nna myit malai lu let Karai Kasang hpang de bai nhtang wa ai masha ni gaw tinang hkum hpe dinghpring dingman dum ai masha ni hta grai nna chye na lu, hkam la lu ai re. Hpa majaw nga ai shaloi tinang gaw mara nlu ai wa re, dingman ai wa re nga nna tsun ai ni gaw galai shai na matu nmai byin nga ai. Galai shai ai ngu ai gaw tinang a ra rawng gawng kya ai hpe dum shai ai ni hta she mai byin nga ai.

Madu Yesu Hkristu du sa ai shaloi dingman dinghpring dum ai masha ni gaw Shi Madu hpe nhkap la ai ni law law nga mat wa ai raitim, mara lu ai ni, nat satan a agung alau hkrum ai ni, nkaja ai masha ni chyawm gaw Karai Kasang a shaman chyeju hpe hpang gara ai a majaw Madu Yesu re ai ngu ai hpe mu chye nna shanhte hta ra ai shaman chyeju ni hpe hkam la lu lai wa sai re.

Shinggyim masha a ra rawng gawng kya ai a majaw nhkum ntsup ga ai re ngu nna dum shai lu na matu hte, galai shai lu na matu Karai Kasang hpang de sit shang nna ra ai shaman chye ju hpe hkam la lu u ga.

KARAI KASANG A MUNGDAN

“Kashin Kamun hkam la sai Hkristan yawng gaw, Hkristu a hkum hkrang (Nawku Hpung) hpe gaw gap na matu shaga la hkrum ai ni rai nga ai.”

Masha hta kap nga ai n kaja ai nat ni hpe Jau ni gawt shapraw kau ai hpe mu yu, na yu sa na re. Dai zawn mi chyaw mu lu ai shaloi nat gawt shapraw kau ai lam hpe atsawm n chye na ai raitim, kaning re ai atsam hte nat kap ai masha ni bai kaja wa ai hpe mau nga ma ai. Dai ni na kabu gara shiga hta na masha ni zawn “ndai gaw hpa rai nga a ta?” ngu nna tsun chye ma ai. Madu Yesu, n hkru ai nat ni hpe shaden kau lu ai, (Nawku hpung hpe mung jaw da sai) dai ahkang aya a grau sung ai lachyum gaw hpa rai nga a ta?

Dai lachyum gaw, Adam a prat kaw nna shinggyim masha ni hpe yam sha lai wa sai, Nat satan a mungdan hten run magang wa sai hte Karai Kasang a mungdan lam hpaw wa sai lachyum rai nga ai. Madu Yesu shi a prat hta Karai Kasang a mungdan hpe hpaw hpang tawn da ai rai yang, Satan a mungdan dai ni du hkra hpa majaw n-gun ja dingyang rai nga a ta? sawn yu mai nga ai. Mahtai jaw ga nga yang, Karai Kasang a mungdan gaw, kalang ta akajawng sha byin lu ai lam n rai nga ai. Kalang mi sha byin ai mabyin mung n rai, prat mi hte prat mi matut manoi gaw gap mat wa ra ai prat labau a mabyin rai nga ai. Dai hpe jahkum jatsup na matu Madu Yesu gaw anhte hpe lit shatsam da sai. Dai re ai majaw, “Na mungdan du wa ru ga!” nga nna anhte “Madu a akyu hpyi ga” hta matut manoi hpyi nga ga ai re. 

Karai Kasang a mungdan hpe hpun bawng hte shabung yu ga. Madu Yesu gaw Sumsing mungdan hpun bawng hpe hkai da ya sai. Raitim, Madu Yesu gaw dai hpun hpe nam hpun bang na, hka jaw na hte tsan lajang na magam bungli anhte hpe ngam da ya sai. Karai Kasang ra sharawng ai hku tu kaba wa lu hkra, yu lajang na mung anhte yawng a lit rai nga ai. Dai hpang anhte ga san kaga bai san yu mai nga ai. “Hpa majaw Karai Kasang a mungdan alawan n du wa ai kun?” (snr) “hpa majaw Satan a mungdan alawan n htum mat ai kun?” Mahtai gaw; anhte galaw ang ai daram bungli n galaw ai majaw rai na re. Ga shadawn; anhte marai kade wa, Madu Yesu anhte hpe tsawra ai zawn, shada da tsawra nga ga ai kun? Madu tsawra ai zawn masha kaga hpe tsawra n chye ai gaw anhte a hpyen wa, htingbu wa hpe sha nrai, anhte kun dinghku kata hta mung hkrat sum ai lam rai nga ai. Prat hkrun lam na matu amu magam ni hta sha myit jung nga ai majaw, dinghku masha ni a ra kadawn ai hpe gaw malap mali yu shalai kau chye nga ai. 

Shadang la marai mi gaw shi prat hta galoi mung n pyaw ai da. Grau sawng ai gaw hpa majaw dai zawn rai n pyaw ai hpe shi n chye lu ai lam rai nga ai. Dai gaw shi a mara re ai lam shi a manang shi hpe tsun dan sai. Shi gaw aten tup shara shagu de amu bungli kyin hkawm ai wa rai nga ai. Shi hku nna hkring sa aten n lu ai hte Karai Kasang hpan da ai tsawm htap la ai masha ni hpe yu chyai lu na aten nan nlu nga ai. Shi a manang numsha marai mi gaw shi a kawa a lam shi hpe tsun dan ai. Numsha dai tsun ai hta, kawa gaw shi a kahpu hte hpai kasup chyai ai hpe tut nawng yu yu rai nga ai da. Shawng nnan e gaw, kawa hpe, asak aprat kaba wa sai, tsawm htap lam n nga sai, hku nna sha mu mada ai. Raitim lani mi hta, kawa hpe yu nga ai shaloi, shawng de galoi mung n mu hkrup ai kaja ai hte n kaja ai lam ni, alak mi re ai lai len ni, tsun shaga ai lam ni hpe mu mau ai hte, “nye wa kaning re ai hpe ngai chye sai hte grai tsawra mat ni ai, kabu pyaw dik ai majaw marawn jahtau mayu ni ai, Karai Kasang hpe mung chye ju dum dik ai hte, ngai aten la nna tengman ai lam mu la lu ni ai”, nga nna tsun ai. 

Dai ni na kabu gara shiga gaw, anhte hpe nau n tin shachyut na matu saw shaga nga ai. Masha ni hpe atsawm hkrak chye, mu lu na hte Madu Yesu anhte hpe tsawra ai zawn anhte mung masha ni hpe tsawra chye na matu saw shaga nga ai. Shaloi she anhte a lapran hta Karai Kasang a mungdan hpe gaw gap lu na rai nna, dai mungdan hpe gaw gap na atsam rai nga ai Hkristu a simsa ai kabu gara ai hte tsawra ai mung anhte hte rau a nga nga na re!

Sawn sumru mai ai lam: Pawt sin dawng ai, manghkang law ai hte tara rap ra ai lam n nga ai ya ndai aten na masa hta, ngai hta rawng nga ai Hkristu a atsam hte Karai Kasang a mungdan hpe ngai gaw gap lu na re, ngu, ngai kaja wa kamsham nga ai kun?

2018: PRANWAN LADAW LABAN (4) NA CHYUM LAIKA

PRANWAN LADAW LABAN (4)

28th JANUARY 2018

CHYUM MUNGGA DAW 1

TARA JAHPRANG 18:15-20

Ya hti na gaw, Tara Jahprang laika hta na rai nga ai.

Israela a kashu kasha ni hpe Mawshe tsun ai gaw: Na a Madu Karai Kasang gaw, na a hpu nau ni hta na, ngai zawn re ai myihtoi langai mi hpe, na a matu paw pru shangun na ra ai: dai wa a ga hpe nanhte madat lu na rai myit dai. Horeb bum e hpawng ai shani e, nang gaw na Madu Karai Kasang hpe hpyi nem let, Ngai n si n ga, ya hpang de nye a Karai Kasang a nsen ngai bai n na lu ni ga; dai wan kaba hpe mung ngai bai n mu ni ga, nga nna nang tsun nit dai. Shaloi Karai Kasang ngai hpe htan nna, Israela amyu masha ni tsun ai ga mahkra htap htuk nga malu ai. 

Shanhte a kahpu kanau ni hta na nang zawn re ai myihtoi langai mi hpe, shanhte a matu ngai paw pru shangun na we ai rai nna, dai wa a n-gup hta nye a ga ngai hti bang na hte, ngai hkang da mada hte maren, shi shanhte hpe htawn tsun na ra ai. Nye a mying nsang hte shi htawn tsun ai nye a ga hpe, kadai wa n madat yang, dai wa hpe ngai deng na we ai. Rai ti mung, ngai n hkang da ai ga hpe, nye a amying gang nna tsun pru gwi ai myihtoi mung, hpara shaje a amying hte tsun pru ai myihtoi mung, si lu na rai nga ai, nga nna Madu Karai Kasang gaw ngai Mawshe hpe tsun nu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 KORINHTU 7:32-35

Ya hti na gaw, Korinhtu masha ni hpang de San Pawlu shangun dat ai laika langai hta na rai nga ai.

Hpu nau ni e, nanhte gaw myit ru myit tsang n nga myit ga ngai ra nga nngai. Num n la ai wa gaw, Madu Karai Kasang hpe myit shapyaw ya na lam chyu sha tsang nga ai majaw, Madu a lam hta htep lahti hkan galaw shakut lu ai; num la ai wa chyawm gaw, mungkan lam ni hpe tsang nga ai hte, shi a madu jan hpe myit shapyaw ya na lam hkan galaw shakut ra ai majaw, myit kabrang nga lu ai. Dai hte maren, num n wa ai jan gaw, mahkawn hkawn ji zawn, shi a hkum hte wenyi chyoi pra lu na lam hpe chyu sha tsang nga ai majaw, Madu a lam hta htep lahti hkan galaw shakut lu ai. Num wa ai jan chyawm gaw mungkan lam ni hpe myit tsang nga ai hte, shi a madu wa hpe myit shapyaw ya na matu, htep lahti hkan galaw shakut ra ai. Ngai ning ngu tsun ai gaw, nanhte hpe lashoi hte zawn shingdang da ai lam n rai, garum ai lam she rai nga ai: nanhte htap htuk jaw nga ai lam madun dan nna, Madu hpe n dut n dang daw jau lu myit ga tsun nga nngai.

Ya hti ai gaw, Karai Kasang a mungga rai nga ai.

KABU GARA SHIGA

MARKU 1:21-28

Ya hti na gaw, Marku a laika hta na Kabu Gara Shiga rai nga ai.

Yesu hte Shi a sape ni gaw Kaperna-um mare de shang ma ai. Shaloi jang laban nhtoi e shi shanhte a tara jawng hta shang nna sharin shaga nga ai. Shi sharin shaga ai lam hpe shanhte mau mat nga ma ai; kaning rai nme law, laika ka ai sara ni zawn nrai, daru magam ahkang lu ai wa zawn Shi shanhte hpe sharin shaga ya mu ai. Shaloi jang, shanhte a tara jawng hta e n san n seng nat kap ai masha marai mi lawm nga ai. Dai n seng ai nat  jahtau nna, Nazaret na wa Yesu e, anhte nang hte hpa seng ga ta? anhte hpe jahten na nang sa du nni? nang kadai re ai ngai chye nga n ngai, ngu wu ai. Shaloi jang Yesu gaw, Atsim sha nga u; shi kaw nna pru wa u, ngu nna shi hpe daru kau wu ai. Dai rai nna, dai n seng ai nat gaw shi hpe bu kashan shangun nna, nsen kaba hte jahtau let shi kaw nna pru mat wa ai. Shaloi yawng hte gaw mau mahka nga nna, ndai gaw hpa rai nga a ta? ning nan sharin shaga ai lam rai I? daru magam ahkang hte n seng ai nat ni hpe pyi shi htet da nna, shanhte madat mara nga ma ai, nga nna shada da tsun hkat ma ai. Shaloi jang Galile mung ting na shara shagu hkan e, Shi a lam kajai gara gumhkawng pri rai wa sai. 

Ya hti ai gaw, Madu a Kabu Gara Shiga rai nga ai.

2018: PRANWAN LADAW LABAN (3) NA MUNGGA

Madu Yesu gaw Shi a shawng e du sa ai datkasa Yawhan Baptista rim hkrum ai shiga hpe na lu ngut ai hpang aten ahkying ram sai lam hte Karai Kasang a Mungdan du magang ra ai majaw myit malai lu nna Kabu Gara Shiga hpe kam sham na matu hkaw tsun hpang wa sai re. 

Hkyen lajang ai aten ladaw ngut ai hpang tatut magam bungli galaw sa na matu ahkyak ai hpe mu lu ai hta n-ga Karai Kasang a Kabu Gara Shiga hpe htawn shana na matu Shi Madu hkrai nre ai sha Shi a hpang hkan nang na matu Sape ni hpe shaga la nna lit shatsam lai wa sai re.

Anhte lai di taw nga ai shani shagu na aten ahkying ni hta jet ai myit malai lu nna Kabu Gara Shiga hpe kamsham ai sha n-ga, anhte a makam masham hta sakhkrung nga sa ai lam gaw manang wa a matu Kabu Gara Shiga byin tai lu na matu shakut shaja sa wa lu u ga.

NAWKU HPUNG HTE NGAI

“Tengman ai makam masham gaw Masha ni hpe atsawm chye na lu na matu garum ya ai”

Lani mi hta salang marai mi gaw shi a kanu hpe, “ngai nawku jawng sa ai hpe lam lahkawng a majaw jahkring kau sana; (1) ngai masha ni hpe yu n lu ai hte (2) masha ni mung ngai hpe yu n lu ai majaw re,” nga a put a ngun ngu wu ai. kanu mung shi hpe yu let myit shalan shabran ya ai hku nna tsun ai gaw; “ngai sha e, lam lahkawng a majaw nang nawku jawng de bai sa ra na re, (1) nang asak (55) ning rai sai hte (2) nang gaw ginwang up jau rai nga ai majaw re” ngu wu ai.

Madu Yesu shi a Sasana magam galaw hpang wa ai shaloi, Petru, Andre, Yaku, Yawhan hte kaga masha ni hpe “masha hpe hkan hkwi na masha” ni tai wa na matu shaga la sai. Dai ni na kabu gara shiga hta rawng ai hte maren, Madu a Sape ni gaw, masha ni shanhte hpe ra ai raitim, n ra ai raitim, myit htum let raitim, Shi Sumsing lamu de lung wa mat ai hpang ngam da ai “Hkye hkrang la ai” magam bungli hpe matut galaw lai wa masai. Hpung masha ni gaw hpung woi ningbaw hpe, pawt ja ai, sut gan marin ai, jahkrum la n mai ai, ladat nnan n hkap la ai… nga nna ya sha sha mara shagun ai hpe na lu ga ai. Shanhte a gum rawng ai, myit marin ai hte n kam hkam ai myit ni gaw, shanhte Jau, Saradaw ni hpe myi kyaw shangun ai zawn, shanhte woi awn ai hpung masha ni hpe mung, myi kyaw shangun ya lu nga ai. Rai timung, Madu Yesu gaw, shi hpe masum lang nyet kau ai, n-ging n dan ai Petru hpe shi a Nawku Hpung, gaw de ai lung hkrung shatai da nna, n hkum n tsup ai ni hpe shaga la ai lam madun dan sai. Shinggyim masha ni re majaw shanhte mung shut chye na re. Raitim Karai Kasang shanhte hpe shaga la sai shaman chyeju hta kam hpa let tinang a Shinggyim gawng kya lam ni hpe tawt lai lu hkra n sim n sa shakut na matu lit nga malu ai. Nawku hpung hta sagurem ai ni a gawng kya lam a majaw masha n kau mi a makam masham hpe jahten kau ya lu nga ai, raitim, kaja ai sagurem ni gaw masha law law a myit masin hpe makam masham lam de bai woi wa na atsam kaba nga ai hpe mung mu lu nga ai. N nga mat sai Wasarabyin Yawhan XXIII hte Wasarabyin Yawhan Pawlu II ni hpe myit yu ga. Shanhte a tsawra shagrit shanem ai hte masha hpe kabu mani pyaw shangun ai lam ni gaw, kaga makam masham Uhpung kaw na masha ni a masin salum hpe pyi dang la lu nga ai. 

Tengman ai makam masham gaw, Nawku hpung a ningbaw ni hta nga ai atsam marai ni hpe, shanhte kaja tim, n kaja tim, chye na lu na garum ya nga ai. Hpung masha ni gaw Nawku hpung hpe dinglun na ahkang lu nga ai. Raitim, anhte kadai hpe a put a ngun di nga ai kun, nga ai hpe chye na mung ahkyak nga ai. Anhte hkum nan gaw Nawku hpung rai nga ai majaw, anhte hkum anhte sha tsun la nga ai hpe kalang lang n dum chye kau ga ai. Nawku hpung hpe anhte hte n seng ai zawn tsun shaga ai lam gaw, machyi ai tinang a ta layung hpe tinang a hkum hkrang daw chyen n shadu ai sha a put a ngun di ai hte bung nga ai. Nawku hpung hte anhte a mahku mara lam gaw, hkungran ai lam hte mung bung nga ai. Pyaw la ai hkungran ladaw ngut ai hpang, hkungran ai lam gaw pyaw nna sha nga na n rai, dai hta jan ai dinghku num yan la jawm shakut sha ra ai lam re ai hpe dum la mai ai. Dai hte maren, hpung woi ningbaw ni hte hpung masha ni mung rau jawm galaw ra nga ai. Ga san gaw; tinang hte seng ai lam galaw sai kun? Tinang galaw ra ai lam hpe gaw kaja wa chye ai kun? Nawku hpung woi ni chyu sha n rai, kashin kamun hkam la sai marai hkum shagu gaw tsawra matsan dum myit hte dai Yesu Hkristu a hkum rai nga ai Nawku hpung hpe gaw gap na shaga la hkrum sai ni hkrai rai nga ga ai hpe myit dum mai nga ai. 

Sawn sumru mai ai lam: Nawku hpung masha marai mi hku nna galaw ra ai lit magam ni hpe ngai chye nga ai kun? Nawku hpung masha ni zet let ai, ap nawng ai hte Nawku hpung shamu shamawt lam ni hta kabu gara shang lawm lu hkra ngai gara hku garum ya lu na rai ta?

2018: PRANWAN LADAW LABAN (3) NA CHYUM LAIKA

PRANWAN LADAW LABAN (3)

21st JANUARY 2018

CHYUM MUNGGA DAW 1

YONA 3:1-5, 10

Ya hti na gaw, myihtoi Yona a laika hta na rai nga ai.

Lahkawng lang ngu na hta Madu gaw Yona hpe shi a mungga tsun dan wu ai. Madu gaw, Rawt u; kaba la ai Niniwe mare de sa nna, ngai nang hpe hkang da ni ai the maren hkaw dan su, ngu wu ai. Shing rai Yona gaw Madu a ga hpe madat la nna, Niniwe mare de rawt sa wa sai. Ya Niniwe mare gaw nhtoi masun ya sat dam lada nna, nachying kaba la ai mare rai nga ai. 

Yona gaw dai mare hta e lani sat hkawm nna, Nhtoi mali shi ya lai jang, Niniwe masha ni hten mat na ra ai, ngu nna jahtau tsun wu ai. Niniwe masha ni gaw Karai Kasang hpe kam sham ma ai rai nna, lusha gam na ladaw tawn da ma ai hte, kaji ai ni kaw nna kaba ai ni du hkra, lachyit nba bu hpun ma ai. Ya dai mare na ni gaw tinang a n hkru ai lam koi kau ai amu hpe, Karai Kasang mu wu ai rai nna, shanhte hpe ari jaw na lam, shi matsan dum ai hte tawn kau nna hpa n di mu ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 Korinhtu 7:29-31

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, ngai tsun mayu ai lam gaw: ahkying ladaw gying mat wa sai. Dai rai nna, num lu ai ni gaw n lu ai zawn rai wa manu ga. Hkrap ngu hkrap ngoi ai ni mung, yawn hkyen ai lam n nga ai zawn; kabu gara ai ni gaw kabu hpa lam n nga ai zawn; hpaga ga ai ni gaw tinang nan hpa n madu lu ai ni zawn rai wa manu ga. Bai nna, ndai mungkan ga a ja sutgan hpe jum lang ai ni gaw, dai hta myit hkum manoi nga mu ga. Kaning rai nme law, ya anhte mu chye ai ndai mungkan ga gaw lai mat wa nga ai.

Ya hti ai gaw, Karai Kasang a mungga rai nga ai.

KABU GARA SHIGA

MARKU 1:14-20

Ya hti na gaw, Marku a laika hta na Kabu Gara Shiga rai nga ai.

Yawhan gaw ap kau hkrum ai hpang, Yesu gaw Galile mung de sa du nna, dai aten ladaw dik wa ai hte, Karai Kasang a mung dan gaw ni wa magang ra ai: Myit malai lu nna, dai kabu gara shiga hpe kam sham nga mu, ngu nna Karai Kasang a kabu gara shiga hpe hkaw dan mu ai. Galile nawng makau e garet hkawm nga yang, Simun hte Andre yan nau gaw, nawng hta e sumgawn kabai bang nga ai hpe, shi mu hkrup wu ai. Kaning rai nme law, shan gaw nga hkan sha ai masha rai nga ai. 

Shaloi Yesu gaw, Ngai kaw hkan marit, masha hpe hkan hkwi na masha, ngai nan hpe shatai na made ai, ngu nna shan hpe tsun mu ai. Shaloi jang shan gaw dai sumgawn ni hpe kau da nna, Shi kaw hkan nang ma ai. Bai, loi mi hkawm sa wa yang, Zebedi a kasha Yaku hte shi a kanau Yawhan yan hpe Shi mu hkrup mu ai; shan gaw dai li hta e tinang a sumgawn ni hpe kapa nna nga nga ma la ai. Shaloi jang Yesu gaw shan hpe shaga mu ai; dai rai nna shan gaw. Shan a kawa Zebedi hpe nchyang ni hte rau, dai li hta e jahti da nna shi kaw hkan nang ma ai. 

Ya hti ai gaw, Madu a Kabu Gara Shiga rai nga ai.

2018: PRANWAN LADAW LABAN (2) NA MUNGGA

Madu Yesu Hkristu hte mu hkrum ai masha ni law law hte gaw Shi Madu a tsun shaga ai lam ni hte Shi a nga sat nga sa lam hpe mu la nna Shi a hpang hkan nang ai sape ni byin tai wa sai re. Hpa majaw nga yang tatut nga sa ai masha langai mi tsun shaga ai ga si ga ngau ni gaw numnak rawng nna na la ai ni a prat hpe galai shai lu ai re.

Dai ni na Kabu Gara shiga hta Madu Yesu a saw shaga ga hte maren Shi Madu nga ai shara de du nna shanhte a myi hte chyaw mu lu nna Madu Yesu gaw hkye hkrang la ai wa re ngu ai hpe teng sha chye la lu nna shanhte hkum nan kam sham ai sha n-ga, kaga masha (Petru) hpe Madu Yesu hpang de woi sa nna kamsham ai masha langai shabyin shatai ya lu sai re.

Madu Yesu a kasi hpe la nna anhte a kamsham ai lam hpe n-gup ga hte sha nrai, amu bungli hte sakse hkam lu nna tinang a htingbu wa hpe Madu Yesu a hpang de lam madun woi sa lu u ga.

SAK SE HKAM NGA GA

“Anhte a makam masham lam masha kaga ni hpe tsun dan na hpa majaw ung ang nga ga ta?”

Kalang mi na, dingla marai mi gaw tsi tsi lajang la na matu tsirung lung ai da. Tsi saranum mung shi hpe atsawm hkap tau shara lajang ya ngut ai hpang, tsirung na jahpan laika hta matsing da na matu ga san ni san wu ai. Shi san ai ga san langai mi gaw, “nang grau ra sharawng ai makam masham gaw hpa rai ta?” ngu san jang dai dingla gaw, tsi saranum hpe mada let, “ga san dai ngai hpe san ai majaw grai kabu sai, ngai galoi mung Kahtawlik hpung masha tai mayu lai wa sai, rai tim, kadai mung ngai hpe n san yu ma ai. Nang gaw yawng a shawng re”, ngu bai htan wu ai. Ndai gaw kaja wa byin ai lam rai nga ai.

Ndai mabyin gaw hpa majaw anhte a makam masham hpe masha kaga ni hte tsun garan dan na ung ang nga ga ta? shing nrai, Madu a kabu gara shiga gaw kaja wa kabu mai ai shiga re hpe anhte kam sham ai rai yang, hpa majaw kaga masha ni hpe n kam gam garan ai rai ta? nga nna anhte hpe san nga ai. Madu Yesu gaw anhte a masin salum a matu hpu ging htum ai sutgan kaba rai yang, hpa majaw Madu Yesu hta nga ai anhte a makam masham lam masha ni hpe n kam gam garan ai kun?

Dai ni na chyum mungga ni hta ndai lam ni lawm nga ai. Mungga daw 1 hta myihtoi Eli, shi a makam masham hpe shadang sha Samuela hpe hti dan ai lam, daw 2 hta kasa Pawlu shi a makam masham hpe Korinhtu masha ni hpe gam garan ai lam, kabu gara shiga hta, kashin kamun sara Yawhan gaw shi a makam masham hpe shi a Sape lahkawng hpe garan ya sai hte Andre gaw shi a kahpu Petru hpe bai gam garan ya sai lam ni hti lu nga ai. Ya, kabu gara shiga na Andre a lam bai sumru yu ga.

Yawhan a kabu gara shiga hta Andre a lam masum rawng nga ai. Lang shagu hta Andre gaw marai rai hpe Yesu hpang de woi wa nna makam masham gam garan ai lam ka da nga ai. Dai ni na mungga hta Andre gaw shi a kahpu Petru hpe Madu Yesu hpang de woi wa wu ai. Hpang jahtum Madu Yesu gaw Petru hpe shi a Nawku hpung de da na ‘lung hkrung’ tai na matu lata la sai. Dai hpang Andre gaw muk tawng (5) hte nga (2) lu ai ma kasha hpe Yesu hpang de woi wa nna, (Yn 6:9) Yesu mung dai hpe la nhtawm masha law law hpe shalaw jaw sha lu sai. Hpang jahtum, Andre gaw ‘Heleni’ myu sha ni hpe Yesu hpang de woi wa ai hte (Yn 12: 20-22) Madu Yesu mung shanhte hpe ahkyak ai lam ni sharin shaga na aten lu la sai.

Ndai lam ni gaw lahta na gasan ni de bai woi wa nga ai. Madu Yesu gaw anhte lu la mai ai manu dan dik ai sut gan re hpe kam sham ai rai yang, dai sut gan masha hpe hpa majaw n kam gam garan ai rai ta? “Masha kaga ni Madu Yesu hpe myit shang sha ai lam n nga ai majaw re” nga nna anhte mahtai jaw na re. Bai mi na tsirung lung ai dingla wa mung Yesu hpe chye mayu ai, Kahtawlik tai wa mayu ai lama rai yang, shawng shawng kaw nna hkan sagawn na rai nga ai re” nga nna myit ai ni mung lawm na re. Tsisaranum lama n san hkrup ai rai yang, dingla dai shi myit mada ai Kahtawlik tai mayu ai myit n hkum tsup ai sha si mat wa na rai nga ai. Tinang a makam masham hpe masha kaga hpe tsun dan, gam garan dan na ahkyak n re ngu myit ai ni kadai rai timung, dai ni na kabu gara shiga hpe sung sung myit yu mai nga ai. Andre, shi kahpu Petru hpe Yesu hpang de n woi wa ai rai yang, Petru gaw Madu Yesu, shi a Nawku hpung de da na lung hkrung galoi mung n byin wa na re. Andre, muk tawng hte ‘nga’ lu ai la kasha hpe Yesu hpang de n woi wa ai rai yang, shawa masha ni yawng mung kaw si hkrum nna, kabu gara shiga hta mung dai zawn rai Wenyi n-gun lu la hpa ahkyak ai mabyin n lawm mat na rai nga ai. Dai re ai majaw, anhte dai ni na kabu gara shiga gaw, tinang a makam masham masha kaga ni hpe gam garan lu hkra shakut shaja na matu anhte hpe saw shaga nga ai.

Sawn sumru mai ai lam:  Ngai a makam masham lam, ngai a kun dinghku, manaw manang hte htingbu ni hpe gam garan dan na matu ngai hpa majaw n kam a ta?

2018: PRANWAN LADAW LABAN (2) NA CHYUM LAIKA

PRAN WAN LAWAN LADAW (2)

14th JANUARY 2018

CHYUM MUNGGA DAW 1

1 Samuela 3:3-10, 19

Ya hti na gaw, Samuela a laika hta na rai nga ai.

Samuela gaw Madu a nawku nta hta, Karai Kasang a chyoi pra ai sumpu tawn da ai shara e yup nga yang,4Madu shi hpe shaga wu ai. Samuela gaw, Nang e nga nngai, ngu nna htan wu ai. Shaloi hkinjawng agyi Eli hpang de gat sa nna, Nang shaga ai majaw, wa ring ngai, ngu wu ai. Eli gaw, Ngai n shaga ai; naw yup nga su, ngu nna tsun jang Samuela wa nna bai yup nga ai. Bai Madu gaw, Smmuela e, ngu nna shi hpe bai shaga wu ai. Shi mung rawt nna Eli hpang de sa nhtawm, Nang shaga ai majaw wa ring nngai, ngu wu yang, Eli gaw Ngai sha e, ngai n shaga ai; bai wa yup nga su, ngu dat wu ai. Ya Samuela gaw Madu a lam hpe atsawm sha garai n chye nga ai; Madu mung shi a mungga shi hpe garai n tsun dan wu ai. 

Masum lang ngu na hta Madu gaw Samuela hpe shaga wu ai. Shi mung rawt nna Eli hpang de sa nhtawm, Nang shaga ai majaw wa ring ngai, ngu wu yang, dai ma hpe Madu shaga nga ai gaw Eli dum wu ai. Dai rai ai majaw Eli gaw, Naw wa yup nga su; ya na lang bai shaga jang, Madu e, tsun rit; na a shangun ma madat nga nngai, ngu nna htan u, ngu dat wu ai. Shing rai Samuela bai wa nna, shi a shara e yup nga ai. Shaloi Madu sa tsap nna, shawng na zawn, Samuela, Samuela nga nna, shaga wu ai. Samuela mung, Tsun rit; na a shangun ma madat nga nngai, ngu nna htan wu ai. Samuela kaba wa nna, Madu shi hte rau nga nga ai; shi n-gun matsing ai Madu a mungga langai mi pyi n nga ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

1 KORINHTU 6:13-15, 17-20

Ya hti na gaw, Korinhtu masha ni hpang de San Pawlu shagun dat ai laika langai hta na rai nga ai.

Hpu nau ni e, Masha a hkum hkrang gaw n se n sa ai amu a matu n re ai sha, Madu a matu rai nga ai; Madu mung dai hkum hkrang a matu rai nga ai. Karai Kasang gaw Madu Hkristu hpe jahkrung sharawt la sai rai nna, anhte hpe mung shi a n-gun atsam hte jahkrung sharawt la na mi ai. Nanhte a hkum hkrang ni Hkristu a daw shan ni rai nga ai hpe nanhte chye chyalu rai nga myit dai; Madu Hkristu hte matut manoi nga ai wa gaw, nsa wenyi a lam hta Madu hte langai sha tai wa nga ai. 

Dai rai nna, n se n sa ai amu hpe koi kau nga mu. Masha galaw ai shut hpyit mara kaga hte gaw, tinang a hkum hkrang a shinggan e galaw nga ai; n se n sa ai amu galaw ai wa chyawm gaw shi a hkum hkrang hpe nan shut hpyit da wu ai. Ya nanhte a hkum hkrang gaw Chyoi Pra ai Wenyi sa nga ai htingnu rai nga ai hpe nanhte chye nga myit dai. Nanhte tinang hkum hpe madu lu ai n rai;  Nanhte a matu jahpu manu jaw ya nna mari da sai ni rai nga myit dai. Dai re ai majaw, nanhte a hkum hkrang hte Karai Kasang hpe shagrau sha-a nga mu law.

Ya hti ai gaw, Karai Kasang a mung rai nga ai.

KABU GARA SHIGA

YAWHAN 1:35-42

Ya hti na gaw, Yawhan a laika hta na Kabu Gara Shiga rai nga ai.

Bai hpang shani e, Yawhan hte shi a sape lahkawng rau tsap nga ma ai rai nna, Yesu lai sa wa nga yang, Yawhan gaw Shi hpe mada yu nna, Karai Kasang a sagu kasha hpe yu yu mu! Ngu mu ai. Dai sape yan gaw shi tsun ai ga na nna, Yesu kaw hkan sa ma ai. Yesu gaw gayin yu nna, dai yan hkan sa ai hpe mu wu yang, nan hpa tam myit ta? ngu nna hkap san mu ai. Shan gaw, Rabai e, nang ganang nga n ta? ngu nna Shi hpe n htang san mu ai. Yesu gaw, sa ma rit, shaloi nan mu na marin dai, ngu nna shan hpe tsun wu ai. Dai re ai majaw, shan hkan sa nna, Shi nga ai shara ganang re ai mung mu ma jang, dai shani tup Shi hte rau nga nga ma ai.

Yawhan tsun ai ga na nna, Shi kaw hkan sa ai yan hta na langai mi gaw, Simun Petru a kanau Andre rai nga ai. Dai wa gaw shi a kahpu Simun hpe shawng mu nna, an gaw Mesiah hpe mu saga ai, ngu nna shi hpe tsun dan ma ai. (Mesiah ngu ai ga lachyum gaw, Hkristu nga ai, rai nga ai.) Shaloi Andre gaw Yesu hpang de shi hpe woi wa wu ai. Yesu gaw shi hpe hkap yu nna, nang gaw Yawhan a kasha Simun rai nga ndai: nang Kehpa ngu ai mying lu na rin dai, ngu wu ai. (Kehpa ngu ai lachyum gaw, lunghkrung nga ai, rai nga ai)   

Ya hti ai gaw, Madu a Kabu Gara Shiga rai nga ai.

HKAWHKAM MASUM POI SHANI NA MUNGGA

Madu Yesu Hkristu shangai wa ai shaloi Shi a makau grup yin na masha law law hte wa, Shi Madu hte nmu nhkrum ai raitim, sum tsan buga na du sa ai hkawhkam masum gaw Madu Yesu hpe mu hkrum lu wa sai.

Mahkra dang chye ai Karai Kasang gaw anhte hte rau galoi mung nga ai raitim Karai Kasang a garum ya ai hpe ra kadawn taw nga ai ni hte Karai Kasang hpe galoi mung dum shai ai sha Karai Kasang a matu aten jaw nna Karai Kasang hte mu hkrum mai nga ai.

Ndai Madu a shaning nnan hta e anhte ni yawng gaw ru yak jam jau ai raitim, nga mu nga mai ai raitim, anhte a makau grup yin hta Karai Kasang nga ai hpe dum shai nna Shi Madu hte mu hkrum let shaman chyeju hpe hkam la lu ai ngwi pyaw ai, kaja ai shaning teng sha anhte a matu byin tai wa lu u ga.

HPAJI CHYE AI NI KAW SHARIN LA GA

Hkawhkam masum poi gaw Hkrismat ladaw a hpang jahtum na poi rai nga ai. Ma Yesu hpe sa nawku hkungga ai Sinpraw mung na sa du ai masha marai 3 hpe Hkawhkam ni nga nna sha chye na hkap la ga ai. San Mahte chyu sha shanhte hpe ‘hpaji rawng ai masha ni’ (Mt 2:2) nga nna ka da sai. Shanhte gaw gunhpan ni n rai, ‘hpaji rawng ai ni’ (snr) ‘ myit jahtoi ya hkrum ai lamu shagan hpaji chye ai ni’ rai nga ma ai. Hpaji rawng ai masha ni a lam ka da ai mungga gaw anhte a prat hte gara hku matut mahkai lachyum pru nga a ta? San Mahte a kabu gara shiga hta hpaji rawng ai masha 3 gaw, nnan shangai wa ai ma hpe hkan sagawn tam hkawm ma ai lam rawng nga ai. Tam sagawn hkawm na matu nden ja myit hte shakut shaja myit lawm ra nga ai. “Shagan a hpang hkan nang da aw?” “ Hpa galaw na matu da i?” “Anhte gaw grai kyin ai, shani shagu dai shagan yu nga na ten n nga ai” nga nna shanhte a manang ni asawng asang nga na hpe mung anhte myit sawn ya yu mai ai. Rai tim, hpaji rawng ai masha 3 gaw Ma Yesu hpe mu ai du hkra hkan tam shakut sai.

Dai hte maren anthe a makam masham hta sadi dung ngang kang ai hte kam sham lu na matu mung, nden ja myit hte tinang hkum n dang nyet kau ai lam lawm ra nga ai. N teng n man n ding n hpring ai masha law la ai prat hta, masha yawng kaja ai nga tim Karai Kasang a myit ra ai lam hte n htan shai ai rai yang, tinang gaw kaja ai hku n mai hkap la nga ai. Matsan jam jau kade hkrum ai raitim, n ding n hpring ai ja sutgan hpe n mai marin nga ai. Sadi n dung hten bya ai dinghku law la ai rai tim, tinang gaw shada sadi dung nga lu hkra atsam dat shakut ra nga ai. kaja wa sha ja gumhpraw hpe sha madung da hkan tam ai anhte a prat hta myit ding man ai masha tai nga na matu n den ja marai rawng na ahkyak la nga ai. Kaga naw sharin la mai ai lam langai gaw, “ makam masham” hte seng ai lam re. “ shanhte lahput hput di let shi hpe nawku nna kumhpa ni hpe sak jaw mu ai.” Grai tsan ai Sinpraw mung de na hkawm sa wa ai raitim, shanhte a reng dik ai kumhpa, aja, lawban hte mura ngu ai kumhpa ni hpe gun sa wa ma ai lam rawng nga ai. Dai gaw shanhte a makam masham kumhpa rai sai. Kumhpa hte seng nna myit pyaw kabu hpa mabyin langai mi nga ai. Ndai mabyin hta; grai matsan ai raitim shada grai tsawra hkat ai ‘Jim’ hte ‘Delia’ ngu ai shan la nga ai da. Hkrismat aten du ai shaloi tinang a tsawra myit hpe kumhpaw kumhpa hta shadan shaleng mayu ma ai. Delia gaw shi a tsawm htap galu la ai kara hpe zen dut kau nna nrum ntau wa a matu nayi sumri mari wa ya ai. Jim mung shi a nari dut kau nna madu jan a matu tsawm htap la ai kara masit hte kara matep ni hpe kumhpa shatai na matu mari wa sai. Shan a kum hpa ni hpe hpaw yu dat ai shaloi, ma-am mat ma sai. Kumhpa dai ni hpe shan lahkawng n mai lang mat sai rai tim shan a tsawra myit ni gaw dai kumhpa ni hta grau tengman manu dan ai hpe chye la lu sai.

Ma Yesu a matu anhte gun sa na kumhpa gaw hpa rai ta? Ndai ladaw laman anhte a myit masin wenyi hpe sharai lajang ai ten hkrum sha ai yak hkak ai lam hte kabu pyaw ai lam ni mahkra gaw anhte a kam sham ai myit a sung htum ai kumhpa rai sai. Ja gumhpraw arung arai hkrai n rai ra ai. Raitim, anthe a prat hta manu dan hpu reng ai sutgan rai ra ai. Ga shadawn; ja sutgan hte mari la n lu ai tsawra myit, tinang lu ai ahkying aten, atsam marai, shada matsan dum mara raw ya ai… lam ni, mai rai nga ai. Hpang jahtum kasi la mai ai gaw, hpaji rawng ai masha ni, sumtsan buga kaw nna Ma Yesu hpe hkan tam ai hta ruyak jam jau hkam sharang nna shakut ai zawn, anhte mung Madu Yesu hte rau asak hkrung nga lu na matu atsam marai dat hkam sharang ra ai lam rai nga ai.

Sawn sumru mai ai lam;   Ngai a hpu reng dik htum ai, Madu Yesu hpe jaw na kumhpa gaw hpa rai ta? Hpaji rawng ai masha ni madun da ai, marai dat shakut shaja ai kasi kaja hpe ngai gara hku hkap la hkan sa lu na rai ta? Ngai a prat hta makam masham hpe sakse hkam na matu, grau nna jaw/n jaw ai hpe lata ra wa ai aten ni hta ngai a makam masham sharin shaga ai hte maren hkrak lata la na nden myit ngai hta rawng ai kun?

2018 HKAWHKAM (3) POI SHANI NA CHYUM LAIKA

HKAWHKAM MASUM POI

7 JANUARY, 2018

CHYUM MUNGGA DAW 1

ESAIA 60:1-6

Ya hti na gaw, Esaia a laika hta na rai nga ai.

Yerusalem e, rawt u; htoi tu u; na a nhtoi du na ra ai; Madu a hpung shingkang na a ntsa e dan hkung nga ai: Kaning rai nme law, nsin gaw ginding aga hpe, saiwan gaw amyu baw ni hpe ka-up nga ai, rai ti mung, Madu gaw, na a ntsa e paw pru nna, Shi a hpung shingkang na a ntsa e dan pru na ra ai. Maigan amyu ni gaw na a nhtoi de, hkawhkam ni gaw na a nhtoi tu kabrim ai de du sa na mara ai. Baw sharawt nna, grup yin mada yu mu; shanhte yawng zuphpawng nna, nang hpang de du wa mara ai. Na a shadang sha ni gaw sumtsan mung de na wa nna, na a shayi sha ni gaw ba wa ai ni hpe hkrum na mara ai. 

Shaloi, nang mu mada yang, na a myiman htoi kabrim na ra ai; na a myit masin kabu gara ai hte kaba wa na ra ai; kaning rai nme law, nammukdara a sutgan nang hpang de kayin wa nna, maigan amyu ni a arung arai ni nang hpang de du na ra ai. Gawla-uk wunawng ni, Midian hte Ehpa Mung na gawla-uk hkalung ni gaw, nang hpe ka-up na ra ai; Sheba mung na ni yawng du na mara ai; shanhte gaw aja hte lawban lang nna, Madu hpe shakawn kungdawn na lam kajai gumhkawng na mara ai.

Ya hti ai gaw, Karai Kasang a mungga rai nga ai.

CHYUM MUNGGA DAW 2

EHPESU 3:2-3a,  5-6

Ya hti na gaw, Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, Karai Kasang nanhte hpe jaw mayu ai chyeju lam, Shi nye a lata hta ap ya da sai hpe nanhte na lu sai nhten; dai hta n-ga , dai mung sung ga sung hpe shingran ga hte ngai hpe shana dat ai gaw, Nanhte na la sai hpe nawn da nngai. Ndai mung sung lam, ya aprat e Shi a chyoi pra ai kasa ni hpe myihtoi ni kaw , Wenyi a shadan dan ai hte maren , moi shawng na aprat ni hta e shinggyim masha kaw n shana yu mu ai. Dai mung sung a lachyum gaw, maigan amyu ni Yuda amyu ni hte rau, ga ndat a sali wunli hkam la lu nna, shanhte hte rau hkum hkrang langai sha tai wa ai hte, ga ndat ni hpe jawm lu jawm la ai ni tai wa nga ma ai.

Ya hti ai gaw, Karai Kasang a mungga rai nga ai.

KABU GARA SHIGA

MAHTE 2:1-12

Ya hti na gaw, Mahte a laika hta na Kabu Gara Shiga rai nga ai.

Ya, Herawt hkawhkam a lakhtak hta, Yuda mung na Betlehem mare e Yesu shangai wa ai hpang, Sinpraw mung na hpaji rawng ai masha ni Yerusalem mare de du sa ma ai rai nna, Shangai wa ai Yuda hkawhkam wa gaw ganang e nga a ta? Shi a shagan hpe Sinpraw mung hta mu lu sai rai nna, Shi hpe Nawku na matu sa du ga ai, nga nna san mu ai. Herawt hkawhkam dai ga hpe na jang, shi hte Yerusalem na ni yawng gaw myit kahpra mat ai rai nna, Dai amyu na hkinjawng agyi ni hte tara sara ni yawng hpe jahpawng Shinggyim da nhtawm, shanhte hpe, Hkristu gaw ganang e shangai wa na a ta? nga nna san wu ai. Shanhte gaw, Yuda mung na Batlehem mare e shangai wa na ra ai; kaning rai nme law, myihtoi wa ka da ai gaw, Yuda mung na nang Batlehem e, Yuda agyini hta kaji htum rai nga ndai n rai; nye a amyu Israela hpe woi rem na Du gaw, nang kaw nna pru wa na ra ai’ nga ai, ngu nna shi hpe tsun dan mu ai.

Shaloi Herawt gaw hpaji rawng ai ni hpe lagyim shaga la nna, dai shagan shanhte kaw dan pru ai aten hpe azin ayang san la nhtawm, Nanhte sa wa nna, dai ma kaji hpe azin ayang hakn tam mu; shi hpe mu jang ngai mung shi hpe sa Nawku lu u ga, ngai hpe wa shana rit, ngu nna shanhte hpe Batlehem mare de sa shangun dat mu ai. Ya, hkawhkam wa a ga na la jang, shanhte pru sa wa ma ai. Shaloi, yu mu, Sinpraw mung e mu mada ai shagan gaw, shanhte a shawng e sa wa nna, ma kaji nga ai shara ntsa ang e hkring mat ai.  Dai shagan hpe bai mu ai shaloi, shanhte nachying kabu gara nga ma ai.  Dai nta de shang wa jang, ma kaji hte Shi a kanu Maria hpe mu ma ai rai nna, lahput hput di let Shi hpe Nawku ma ai. Tinang a sut sumpu ni hpe hpaw nna, Shi hpe Aja, Lawban hte mura ngu ai kumhpa sak jaw ma ai.  Herawt hpang hku bai n wa mu ga, yup mang hta shanhte hpe madun dan ai majaw, shanhte gaw tinang a mung de lam kaga hku wa mat ma ai.

Ya hti ai gaw, Madu a Kabu Gara Shiga rai nga ai.