CHYOI PRA AI WENYI YU HKRAT WA AI POI SHANI NA MUNGGA

Madu Yesu wudang ntsa e jen noi si hkrum ai aten kaw nna sape ni law law hte gaw, myit daw hten ai hta sha n-ga myit ru myit tsang hkrum nga ai hpe chye lu ga ai. Hpa majaw nga yang shanhte myit mada da ai ningbaw Yesu gaw shanhte htang da ai hte maren nbyin wa nna shanhte a shim lum ai lam hpe hkrit tsang ra ai majaw re. Dai majaw shanhte ni gaw hrit tsang nna makoi magap nga ai aten Madu Yesu bai hkrung rawt ai hpe chye lu nna Chyoi Pra ai Wenyi shanhte a ntsa e yu hkrat wa ai aten hta she myit masin n-gun rawt wa nna nhkrit ntsang ai sha, Karai Kasang a tara mungga ni hpe hkaw tsun let nawku hpung hpe de hpang sai re.

Shinggyim masha re ai majaw hkrit tsang ai lam ni anhte hta galoi mung nga na re. Hpa majaw nga yang anhte a atsam marai hte lam magup hpe nlu galaw ai majaw rai nga ai. Raitimmung, bai hkrung rawt wa ai Madu Yesu hpe kam sham nna Chyoi Pra ai Wenyi sakramentu ni a jaw e hkam la lu sai hpe myitdum let Shi a myit jahtoi ya ai hpe hkam la nna, hkan shatup lu let lam shagu hta, grau nna anhte wenyi lam hta rawt jat galu kaba wa u ga.

MADU YESU A GA SADI

Ndai lak lai ai nhtoi gaw Madu Yesu a gasadi rai nga ai.

Tengman ai a wenyi hpe shangun dat ya na lam dik wa sai rai nga ai. Dai Chyoipra ai Wenyi gaw, Madu Yesu, sape ni hpe tsun tawn da sai lam hpe sakse hkam ya na rai nga ai. Chyoipra ai wenyi anhte hte rau rai nga jang anhte galoi mung jahkrai rai nga na n rai. Dai gaw Madu Yesu anhte hte rau nga nga ai majaw rai nga ai. Madu Yesu a Wenyi anhte hta rai nga yang, galai shai ai lam teng sha wa byin pru na re. Anhte hta nga nga nna, amu galaw nga ai Wenyi hpe ahkang jaw ai rai yang, anhte gaw masha ningnan tai wa lu na re.

Sape ni mung, Chyoipra ai Wenyi hpe hkap la lu ai hpang mau na daram galai shai wa masai. Hkrit kajawng ai kaw nna marai rawng ai de, yawn hkyen nga ai kaw nna kabu gara ai de, myit mada shara n nga mat ai kaw nna myit mada shara lu la ai de galai shai wa sai. Madu Yesu nni nkri yubak hkam la ai hte si hkam ai ten ni hta, sadi n dung kau nna myit shut nga let kraw salum hta hkra machyi ai kaw nna, N’htoi hte Ngwi pyaw simsa ai lam jaw ya sai. Hkrung rawt sai Madu a lam hpe n hkrit n tsang hkaw tsun lu na atsam marai jaw ya sai.

Chyoi pra ai Wenyi a lam tsun sang lang dan na yak la nga ai.

Chyoi pra ai Trinita Karai Kasang a lam tsun jahta ai shaloi, Kawa hte Kasha Karai Kasang a lam anhte lama ma chye madat ga ai. 

Raitim, Chyoi pra ai Wenyi Karai Kasang a lam sang lang na matu gaw kaga lam langai rai nga ai. 

Dai Trinita Karai Kasang lam gaw mungsung gasung lam rai nga ai ngu nna hpa mung n sawn sumru yu ai sha nga na n kaja ai. Lagawn lamawn ai lam gaw anhte a chye chyang wa na lam hte prat hpe shagrau sha a chye na matu pat shing dang ya ai.

Chyoipra Chyum laika hta mung, Chyoipra ai wenyi a lam hpe Nbung, Uhkrudu, Wan shinglet ni hte tsun sang lang da nga ai. Dai Wenyi gaw anhte hpang de lam amyu myu hte du sa wa na rai nga ai. Bungshi zawn (snr) dai ni na mungga hta na la ai Nbung laru kaba wa ai zawn du sa chye nga ai. Rai yang, dai ni anhte a prat hta Chyoi pra ai Wenyi gaw hpa wa mi rai na kun? Ndai zawn mi rai na kun?

Anhte a prat hta hkap la kam sham ai lam yawng hpe shangang shakang ya ai wa rai na nhten. Marai rai a prat hta Asak hte seng nna hkrit tsang ra wa ai shaloi, dai hkap la kam sham ai lam hpe tsun hpaw tsap na yak la nga ai. Tim, dai gaw anhte hpe ap da sai amu magam hte seng nna anhte kade daram sakse hkam lu na chyam dinglik hkrum ai kaba dik ai mabyin rai nga ai. Dai ni na prat a ning dat ai lam gaw Asak a manu jahpu rai nga ai. Kahtawlik hpung masha anhte a lit gaw dai Asak manu dan ai lam hte Chyoipra ai lam hpe tsun sak se hkam na matu rai nga ai. Rai timung, anhte mu mada ai gaw arawn alai shut shai ai lam rai nga ai. Anhte Kahtawlik ni hta ningmu n bung ai lam kaba langai mi gaw ‘Si dam’ jaw ai lam rai nga ai. Nkau mi gaw ‘si dam’ hpe n ra sharawng ai rai tim, ‘ma shabrai’ ai hpe gaw myit hkrum lawm ai ni nga ma ai. Lahkawng yan Asak hte seng ai n rai i?

‘Nye Wa ngai hpe shangun dat ai hte maren, ngai mung nanhte hpe shangun dat ma de ai’. Tengman ai lam hpe sadi dung na hte, Asak a chyoipra ai lam hpe manu shadan lu na gaw Kahtawlik ngu nna mying gun/lu sai anhte yawng hpe Karai e jaw da ai lit magam rai nga ai. Dai hta n-ga, grau kaba law htam ai amu magam ni hpe galaw lu na matu gaw Chyoipra ai wenyi a atsam hte awng dang lu na rai nga ai. Ndai lam ni hpe ta tut hkrang shapraw galaw sa wa lu na matu yak la nga ai. Tim, Chyoipra ai Wenyi hpe hkam la lu sai anhte ni kaw nna myit mada nga ai lam ni mung rai nga ai.

Sawn sumru yu mai ai lam: “Chyoi pra ai Wenyi galaw lajang byin shangun ai rai nga” ngu nna tsun lu ai galai shai ai lam anhte a prat hta nga ai kun?

CHYOI PRA AI WENYI YU HKRAT WA AI POI SHANI NA CHYUM LAIKA

CHYOI PRA AI WENYI YU HKRAT WA AI POI

PENTEKAWSTE LABAN

4th June, 2017

CHYUM MUNGGA DAW 1

Kasa 2:1-11

Ya hti na gaw Kasa laika hta na rai nga ai.

1Ya Pentekawste shani du jang, Kasa ni yawng shara mi hta rau hpawng nga ma ai. 2Shaloi nbung laru kaba wa ai zawn, lamu de na nsen akajawng sha kadu pru nna, shanhte rawng nga ai nta, dai nsen hte hpring chyat rai wa ai. 3Wan shinglet zawn re ai baw mung, shanhte kaw dan pru nna, bra karan wa nhtawm, langai hte langai a ntsa e jung nga ai. 4Shanhte nlang hte mung Chyoi pra ai Wenyi hte hpring nga nna, dai Wenyi shadut mu ai hte maren, ga amyu myu shaga wa ma ai.

5Ya, sumsing lamu a n-pu e nga ai masha amyu shagu hta na, tara hkan shatup ai Yuda masha ni Yerusalem mare e nga nga ma ai. 6Dai kadu ai nsen na la jang, masha unawng uwa hpawng sa nna, sape ni tsun ai ga hpe, tinang nang a ga hku na la lu ma ai. 7Shanhte mak mat ai rai nna, mau mahka let, yu mu, ya shaga nga ai ndai ni gaw, Galile masha hkrai n rai ma ni? 8Dai rai yang gaw, anhte langai hte langai, tinang nang a dai daw shara na ga hku, na la lu ai gaw kaning re ai i? 9Parhti, Elam mung na ni hte, Mesopotamia mung e nga ai ni; Yuda hte Kapodoki mung, Pontu hte Asia, 10Hprugi hte Pamhpuli; Egutu hte, Kureni ginwang hkan e nga ai Libia mung na ni; Roma mare de nna wa nga ai, Yuda masha ni hte tara nnan hta la ai ni, 11Kreti hte Arabia mung na ni anhte rai nga ga ai; rai ti mung, anhte yawng hte gaw, Karai Kasang a mauhpa amu magam shanhte hkai dan ga ai hpe, tinang nang a ga hku na la lu ga hka! nga nna myit kahpra let tsun ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

1 Korinhtu 12:3-7.12-13

Ya hti na gaw Korinhtu masha ni hpang de San Pawlu shagun dat ai laika langai hta na rai nga ai.

3Hpu nau ni e, Chyoi Pra ai Wenyi hte sha n rai yang gaw, Yesu gaw Madu rai nga ai, nga nna kadai n tsun lu ai.

4Ya, chyeju kumhpa amyu myu nga timung, dai ni hpe karan jaw ai Wenyi gaw, langai sha rai nga ai. 5Daw jau ai lam amyu myu nga timung, Madu langai sha hpe anhte daw jau nga ga ai. 6Mauhpa atsam amyu myu nga timung, yawng mayawng hte e dai lam mahkra hpe shabyin ai Karai Kasang gaw langai sha rai nga ai.7Rai timung, akyu chyeju lu la u ga she, dai Wenyi gaw langai hte langai hta e, shi atsam shapraw shadan dan nga ai.

12Masha a hkum hkrang hta daw shan law law rawng nga timung, dai ni yawng hte gaw hkum hkrang langai sha jawm tai nga ma ai. Dai hte maren Hkristu mung, daw shan law law lu ai hkum hkrang langai sha rai nga ai. 13Anhte yawng mayawng, Yuda ni hte Greka ni rai timung, mayam ni hte shanglawt ni rai timung, hkum hkrang langai sha tai na matu, Wenyi langai sha hte e kashin kamun hkam la sa ga ai rai nna, anhte yawng jawm lu na matu, dai wenyi hpe jaw ya mani ai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 20:19-23

Ya hti na gaw Yawhan a laika hta na Kabu Gara Shiga rai nga ai.

19Dai Laban Bat a shawng shani na nsin rim e, Yuda masha ni hpe hkrit ai majaw, sape ni hpawng nga ai nta e chyinghka la da sa yang, Yesu shanhte a ka-ang e sa du tsap let, Nanhte ngwi pyaw nga myit ga, ngu nna shanhte hpe tsun mu ai.

20Shing nga tsun nhtawm, shi a lata hte garep hpe shanhte hpe madun dan wu ai. Sape ni mung dai Madu hpe mu lu jang,kabu gara nga ma ai. 21Bai Yesu gaw, Nanhte ngwi pyaw nga myit ga; Wa ngai hpe shangun dat ai hte maren, ngai mung nanhte hpe shangun dat made ai, ngu mu ai. 22Shing nga nhtawm, sape ni a ntsa e shi nsa gawut nna, Chyoi pra ai Wenyi hpe hkap la mu; 23kadai a shut hpyit mara hpe rai timung, nanhte raw dat yang gaw, raw mat na ra ai; kadai a shut hpyit mara hpe rai timung, nanhte shagun da yang gaw, dai mara naw nga na ra ai, ngu nna shanhte hpe tsun mu ai.

Ya hti ai gaw Madu a Kabu Gara Shiga rai nga ai.

YESU LAMU DE LUNG WA AI POI SHANI NA MUNGGA

Kawa Karai Kasang shangun dat ai Madu Yesu gaw mungkan ga de yu sa nna shinggyim hkumhkrang hpe dagraw la sai. Nni nhkri yubak hpe hkam nna Wudang ntsa hta si hkam ai, bai hkrung rawt ai hpang sumsing lamu de bai lung wa sai. Kawa Karai Kasang kaw nna yu sa ai Madu Yesu gaw Shi a magam bungli yawng ngut ai hpang Kawa Karai Kasang hte rau sumsing mungdan de bai du wa sai re. 

Madu Yesu du sa ai a marang e shinggyim masha ni hkye hkrang la hkrum sai re. Shi mungkan ga ntsa e shinggyim masha langai zawn sa du ai shaloi masha law law hte a mai kaja ai lam hpe galaw lai mat wa ai hta n-ga shi a hpang hkan nang ai masha ni hpe kasi kaja madun let lam woi ningshawng lai wa sai. Dai hta n-ga Shi gaw de da ai nawku hpung mung dai ni du hkra matut nna rawt jat galu kaba wa nga ai.

Karai Kasang hpan da hkrum ai anhte shinggyim masha ni gaw ndai mungkan ga ntsa kaw sak hkrung ngut ai hpang sumsing mungdan hta Karai Kasang hte rau bai mu hkrum na matu ahkyak nga ai. Mungkan ntsa hta sak hkrung nga sa yang anhte galaw sa ai amu magam lam ni gaw manang wa a matu akyu pru ai kun? Mungkan ga hpe lani mi na aten hta anhte kau da ai shaloi manang ni a matu kaja ai kasi hpe anhte ngam kau da lu na kun?

MAKAM MASHAM HTE TSAWRA MYIT HPE GAM GARAN GA

“Karai Kasang anhte a Wa e, Madu Yesu a hpang hkan nang let hpan da ai ning nan hta anhte hpe mung shang na ahkang jaw rit law” nga nna shawng nnan a akyu hpyi ga hta lawm sa ga ai. Sumsing Lamu de lung wa ai a marang e, Karai Kasang a hpung shingkang hta, htani htana ning ngai nga lu na matu, Madu Yesu gaw ahkying aten hte shara hpe rap lai sai.

Madu Yesu, Sumsing lamu de lung wa ai gaw anhte a matu hpa lachyum jaw a ta?

Hkum hkrang hte nawng lung wa ai lam gaw Chyoi pra ai Wenyi yu hkrat wa ai a matu tau nau kumla rai sai. Hpang jahtum shana daw sha poi hta Yesu gaw, ‘ning nga ti mung, teng man ai lam she ngai nanhte hpe tsun nngai: ngai wa ai gaw nanhte a akyu matu rai nga ai: kaning rai n me law, ngai n wa yang gaw, dai shalan shabran ai wa nanhte kaw du sa na nrai; ngai wa jang chyawm gaw, ngai shi hpe nanhte hpang de shangun dat na we ai” (Yh 16:7) nga nna tsun da sai. Dai ni hti ai Chyum mungga ni hta, Yesu Hkristu gaw, mungkan htum ai du hkra Shi a lam sakse hkam na, Shi shangun dat ai sara ni tai na Sape ni hpe tsun sai. Tsun mayu ai gaw, “nanhte ngai hte rau n de n law shaning nga sai, Ngai a prat hte Sasana magam hpe mung nanhte mu chye sai, dai majaw, ya aten kaw nna ndai Sasana magam hpe nanhte matut gun hpai sa wa mu” ngu ai re.

Sumsing lamu de lung wa ai poi gaw, duk shingna kahti galaila let lagat shing jawng ai hte bung nga ai. Shaning 2000 ning lai wa sai ndai aten hta, Madu Yesu gaw Sumsing mungdan a matu shi galaw ra ai lit magam hpe shi a hpang hkan nang ai ni hpe lata galai ya sai. Shi hpang da ai magam hpe shangut shakre shangun sai. Teng sha wa dai gaw hpa lachyum wa rai a ta? Nang hte ngai dai Madu a Sasana magam hpe kaning rai galaw lu na rai ta? Madu Yesu jaw da sai Sasana lit magam hpe galaw lu na masa lam law law nga ai. Anhte a dum nta, bungli shara, laika sharin jawng, mungmasa lam hte tam lu tam sha ai lam shagu hta Hkristu hpe sakse hkam nna dai Madu a lam sharin ai ni tai lu na rai nga ai. Chyoi pra ai Wenyi lam madun sharin ya ai hte maren galaw shakut na ra ahkyak ai.

Anhte a tsawra myit hte Hkristu Yesu hpe sakse hkam nnakaga masha ni hpe Shi a lam sharin ya ra nga ai. Anhte hpe ra kadawn ai ten, garum jaw na, anhte hpe shut shai ai ten hta mara dat ya na, masha law law shut shai nga ai ten anhte ding hpring nga na, n teng n man, n kang ka ai ten hta nanhte gaw teng man kang ka nga let, ngai hte ngai a matu ngu n myit ai sha, masha kaga hte uhpung uhpawng a matu ngu myit let, myit daw hten nna lata sharawt kau na zawn re ai ten hta, matut shakut let anhte shakut ra nga ai. N-gup aga hte hkaw tsun ai lam sha n rai, anhte a prat nga sa lam hte sak se hkam na kaja nga ai. Madu Yesu hpe sakse hkam let, Shi a lam sharin na gaw, anhte du taw ai shara hta Chyoi pra ai Wenyi jahtoi ya ai hte maren shakut hkawm sa na lam rai nga ai.

Ga hpungdim tsun ga nga yang, Madu Yesu a lam sakse hkam na hte Shi a lam masha ni hpe sharin ya na gaw, anhte hkum nan a makam masham hte Tsawra myit hpe shanhte hte gam garan ai lam rai nga ai. Dai hta n-ga, Madu Yesu mung, “lamu ga aprat htum hkra, ngai nanhte hte rau dinggrin a nga nga na nngai” nga nna ga sadi jaw da sai.

Sawn sumru yu mai ai lam; Kashin Kamun hkam la sai Hkristan marai mi hku nna Madu Yesu hte Shi a sharin shaga ai lam hpe sakse hkam na lit magam lu sa ga ai. Dai hpe shani shagu na ngai a prat hta kaning rai galaw lu na rai?

YESU LAMU DE LUNG WA AI POI SHANI NA CHYUM LAIKA

YESU LAMU DE LUNG WA AI POI

28, May, 2017

CHYUM MUNGGA DAW 1

Kasa 1:1-11

Ya hti na gaw Kasa laika hta na rai nga ai.

Shawng e ngai ka da ai laika hta, Htawhpilu e, Yesu sumsing lamu de shalun la hkrum ai nhtoi du hkra, shi galaw dan ai amu ni hte sharin shaga ai lam yawng hte hpe, ngai ka lajang da se ai. Shi shalun la hkrum ai shani e, Chyoi pra ai Wenyi a garum ai hte, Shi lata la ai kasa ni hpe ga matsun hkang da nu ai. Yesu si mat ai hpang, dai kasa ni hpe shi a hkum shadan dan nna, Shi naw hkrung nga ai hpe kam gying ai sakse lam law law hte madun dan wu ai; nhtoi mali shi ya laman e, kasa ni kaw dan pru nna, Karai Kasang a mungdan lam shanhte hpe tsun dan mu ai.

Shing rai, shanhte rau hpawng nga ai shaloi, Yesu gaw, Yerusalem mare kaw na nanhte n pru ai sha, ngai kaw nna na la ai, Wa a ga ndat hpe ala nga mu; kaning rai nme law, ngai hkum nan nanhte hpe tsun dan ai hte maren, Yawhan gaw hka hte kashin kamun jaw ai: nanhte chyawm gaw nhtoi gade n na yang, Chyoi pra ai Wenyi hte kashin kamun hkam la na marin dai, ngu nna shanhte hpe tsun mu ai.

Dai rai nna, Yesu hte rau hpawng nga ai ni gaw, Madu e, dai mungdan hpe ya aten e Israela masha ni kaw bai de ya na rai ni? Ngu nna san ma ai. Yesu mahtang gaw, Wa shi a ahkaw ahkang hte daw da ai aten ladaw hpe nanhte chye shara n nga ai. Rai timung, Chyoi pra ai Wenyi nanhte a ntsa de du jang, n-gun atsam lu la na myit dai rai nna, Yerusalem mare hte Yuda mung ting, Samari mung hte lamu ga htum hkra, nanhte nye a sakse ni tai wa na marin dai, ngu nna shanhte hpe tsun wu ai.

Ndai ga tsun jang, shanhte yu nga ninglen, shi hpe ntsa de shalun la ai rai nna, sumwi gaw shanhte a man na Shi hpe magap la mat wa ai. Shanhte naw azi yu nga yang, hpraw tu ai hpun palawng bu hpun ai marai lahkawng shanhte a makau e tsap pru nna, Galile masha ni e, htaw lamu de hpa rai azi yu nga myit ta? Nanhte a man na sumsing lamu de shalun la ai wa dai Yesu gaw, nanhte mada yu nga yang, Shi sumsing lamu de lung wa ai zawn, dai hku Shi bai du sa na ra ai, ngu nna kasa ni hpe tsun mu ai.

Ya hti ai gaw Karai Kasang a mungga rai nga ai.

CHYUM MUNGGA DAW 2 

Ehpesu 1:17-23

Ya hti na gaw Ehpesu masha ni hpang de San Pawlu shagun dat ai laika hta na rai nga ai.

Hpu nau ni e, Anhte a Madu Yesu Hkristu a Karai Kasang, hpung shingkang rawng ai Kawa gaw, shi hkum nan hpe chye chyang lu na matu, nanhte a myit masin hpe hpaji byeng-ya hte myit leng ai chyeju shi jaw ya u ga, ngu nna ngai hpyi nngai. Karai Kasang shaga la ai a jaw e, myi mada shara gade wa nga ai hpe mung, chyoi pra ai ni gaw hpung shingkang rawng ai sali wunli gade wa hkrum lu na hpe mung, shi hpe kam sham ai ni a matu, shi a chyeju atsam gade wa galu kaba nga ai hpe mung, nanht chye lu na matu, Karai Kasang anhte a myit masin na myi hpe jahtoi jasan ya malit ga, ngu nna ngai hpyi nga nngai. Karai Kasang gaw Hkristu hta shabyin da ai amu hpe gawn yu jang, shi a n-gun atsam nachying galu kaba htum rai nga ai hpe nanhte chye lu na myit dai. Shi a atsam hte, Hkristu hpe si mat ai ni kaw na sharawt la nna, sumsing lamu hta shi a hkra maga e dung nga shangun da wu ai. Du Magam, Ahkang, Hpung shingkang hte Up ai Aya lu ai ni nlang hte a ntsa e mung, ndai prat hte htawm hpang na aprat e shamying lu ai amying ahkang mahka a ntsa e mung, shi hpe shagrau shatsaw da nu ai. Karai Kasang gaw arai baw sumhpa hpe shi a lagaw n-pu e tawn da nu ai rai nna, yawng mayawng hpe up hkang lu na matu, Nawku Hpung a baw shi hpe shatai da wu ai: Dai Hpung gaw Hkristu a hkum hkrang rai nga nna, yawng mayawng hpe jahpring shatsup ya ai Hkristu gaw, dai Nawku Hpung a marang e jahkum shatsup ai hkrum wu ai.

Ya hti ai gaw Karai Kasang a mungga rai nga ai.

KABU GARA SHIGA 

Mahte 28:16-20

Ya hti na gaw Mahte a laika hta na Kabu Gara Shiga rai nga ai. Yesu a sape shi langai hte gaw, shi shanhte hpe hkang da ai hte maren, Galile mung na bum de lung mat wa ma ai. Yesu hpe mu jang shanhte nawku ma ai; nkau mi mahtang ai n kam ma ai.

Yesu shanhte hpang de sit sa wa nna, Sumsing lamu hta e mung, ginding aga hta e mung, up hkang na ahkang nlang hte hpe ngai kaw ap ya ni ai. Dai majaw, nanhte pru sa wa nna, masha amyu baw shagu hpe sape shatai let Kawa, Kasha, Chyoi pra aimu; ngai nanhte hpe hkang da mada shanhte hkan shadik lu mu ga, sharin shaga ya mu. Dai hta kaga lamu ga aprat htum mat hkra, ngai nanhte hte rau dinggrin a nga nga na nngai, ngu nna Yesu Madu shi a sape ni hpe matsun dat mu ai.

Ya hti ai gaw Madu a Kabu Gara Shiga rai nga ai.

PASKA LADAW LABAN (6) NA MUNGGA

Tengman ai lam hpe hkan shatup ai wa gaw shi a myit hta e hkrit tsang ai lam nnga ai hte shadut shadang ai lam nnga ai asak aprat hta nga sa lu na re. Nteng nman ai wa she tinang a ateng nman myit ai, tsun ai hte galaw sa ai lam ni hpe manang ni nchye u ga nga galoi mung sadi maja let hkawm sa ra ai majaw myit hki lit li hkrum na teng sha rai nga ai.

Madu Yesu gaw Shi Madu nnga ai hpang hkrit tsang hkrum nga ai Sape ni hpe garum shingtau na matu Chyoi Pra ai Wenyi hpe shangun dat na nga sape ni hpe n-gun jaw let teng man ai lam hta hkawm sa nna Shi ndat da ai tara lam ni hpe hkan shatup ai wa gaw Shi hpe tsaw ra ai wa rai nna Kawa Karai a tsaw ai hpe hkrum nna Chyoi Pra ai Wenyi a lam matsun ai hpe hkam la lu na re ai hpe dai ni na Kabu Gara Shiga hta ga matsun tawn da sai.

Chyoi Pra ai Wenyi a matsun madun ai hpe hkam la lu nna Kawa Karai Kasang a tsaw rai ai hpe hkam la let Madu Yesu jaw ya ai tara lam ni hpe hkan shatut nna teng man ai lam hta sak hkrung nga sa ai, Shi Madu hpe tsaw ra ai ngu ai hpe shawng de na Sape ni zawn sakse hkam lu u ga.

TENGMAN AI HTE SENG AI WENYI

Nau n na ai aten hta, nang gaw ndai mungkan kaw nna pru mat wa (si mat wa ) na ngu ga. Nang a matu ga san masum san mayu nngai. 1. nang hpa baw wa mi ngam kau da ai kun? 2. Kadai a matu dai yawng hpe ngam da ya na rai? 3. Na a hpang jahtum matsun ga gaw hpa wa rai ta? Madu Yesu a hpang jahtum myit ra ai lam hte byin shangun mayu ai lam hpe dai ni hti ai kabu gara shiga hta asan sha hti lu sai.

1. Tengman ai hte seng ai Wenyi ngu ai shalan shabran ai wa sape ni a matu ngam da ya sai. Anhte gaw arung arai makup sumhpa law law hpe ngam da na nhten, tim, teng sha wa dai arai ni hpe anhte langai mi mung la mat wa n mai nga ai.

2. Madu Yesu gaw shi myit ra ai lam hpe shi a matsun ga hkan galaw ai, shi hpe tsawra ai ni yawng a matu ngam da ya sai. Anhte ni chyawm gaw prat tup galaw shakut sai amu magam Sali wunli hpe, tinang a matu amu magam n-galaw yu ai kashu kasha matu mara ni hpe ngam da ya chye nga ai. Ya aten e, mungkan hta mying kaba dik ai sahti ni gaw shanhte a sut su ai ja gumhpraw ni hpe kashu kasha ni a matu n-rai, mai kaja ai amu magam galaw ai uhpung uhpawng ni jai lang na matu ngam da ya nga ai.

3. Hpang jahtum Madu Yesu myit ra ai lam gaw Tsawra ai lam rai nga ai. Tsawra ai ngu ai shaloi, anhte hta e rawng nga ai Karai a hkrang sumla hpe myit dinglik yu ai lam rai sai. Tsawra ai hte mai kaja ai lam hpe n dut n dang galaw ai shaloi shang lawt lu ai a lachyum hpe anhte chye lu ai. Tsawra ai lam hta gaw de da ai makam masham, nawku hpung gaw agrin nga nna daw jau na matu lam tam nga ai. Manang wa a ra kadawn ai hpe bungli masa hta grau nna galaw ya lu na myit nga ai.

Ndai lam ni hpe anhte aloi sha galaw lu na nrai. Raitim, Madu Yesu ga sadi jaw da sai hte maren, Tengman ai hte seng ai Wenyi anhte hpang de shangun dat ya ai shaloi anhte gaw san pra ai hte nga lu nna jet ai Hkristan ni tai wa na re. Madu Yesu matsun da sai ga n dat ni hpe hkan shadik lu na matu dai wenyi anhte hpe garum na ra ai. Dai wenyi anhte hpe manang tai ya nna anhte hte rau htani htana anga nga na ra ai. Anhte shada tsawra nga ai gaw Madu Yesu a ga ndat hpe hkan shadik ai lam nan rai sai. Anhte hpa majaw dai ga ndat hpe hkan shadik na rai? Hkrit ai majaw i? Masha ni mu chye na matu mkun? Kumhpa lu mayu ai majaw kun? Madu Yesu hpe tsawra ai a majaw rai na re ngu myit mada ai. Madu Yesu a ga ndat hpe hkan shadik ai hta myit daw hten ai lam ni n-nga ga. Shi Madu a wenyi anhte hte rau rai nna, anhte hpe n-gun atsam jaw, lam woi madun ai hte manang tai ya nga na re.

Sawn sumru mai ai lam; Tsawra hkat nga na ga matsun/ ndat hpe ngai kaning rai chye madat ai kun?

PASKA LADAW LABAN (6) NA CHYUM LAIKA

PASKA LADAW HTA LABAN 6

21, May, 2017

CHYUM MUNGGA DAW 1

Kasa 8 : 5-8, 14-17

Ya hti na gaw Kasa laika hta na rai nga ai.

(Dai aten e, Yerusalem mare na Nawku hpung gaw zingri zingrat kaba hkrum wa ai rai nna, kasa ni hta kaga ningbaw ningla ni yawng hte gaw, Yuda mung, Samari mung, shara magup hkan e bra mat wa ma ai.) Hpilip gaw Samari mare de sa wa nna, Hkristu a lam hkaw tsun dan wu ai. Shi tsun dan ai lam na la ai hte, shi madun ai lamik kumla mu ma yang, masha unawng uwa myit langai sha hte, Hpilip a ga madat mara nga ma ai. Kaning rai nme nga yang, nat kap ai ni law law hta na, n seng ai nat ni jahtau marawn let pru mat shajang ma ai; hkum katsing si ai ni hte lagaw hten ai ni law law mung, mai mat shajang ma ai. Dai rai nna, dai mare na masha ni nachying kabu gara nga ma ai.

Samari masha ni Karai Kasang a mungga hta la ma ai hpe, Yerusalem e nga ai kasa ni na ma yang, shanhte gaw Petru yan Yawhan hpe shangun dat mu ai; shan mung du jang, dai masha ni Chyoi pra ai Wenyi lu la na matu akyu hpyi ya ma ai; hpa majaw nga yang, dai Chyoi pra ai Wenyi gaw, shanhte hta na kadai a ntsa e mung garai n yu wa ai; Madu Yesu a amying hte kashin kamun hkam ai sha, naw rai nga ma ai. Dai rai nna, kasa Petru yan Yawhan shanhte a ntsa e lata mara ya jang, dai Chyoi pra ai Wenyi hpe hkam la ma ai.

Ya hti ai gaw Karai Kasang a mungga rai nga ai. 

CHYUM MUNGGA DAW 2

1 Petru 3 : 15-18

Ya hti na gaw Kasa Petru shagun dat ai laika langai hta na rai nga ai.

Hpu nau ni e, nanhte a myit masin hta e Madu Hkristu hpe hkrit hkungga nga mu: dai Hkristu hpe hpa majaw myit mada nga myit ta? nga nna masha langai ngai nanhte hpe san yu jang, lachyum tsun dan na matu tut nawng e, jin jin rai nga mu; rai ti mung, sumnung ai hte hkungga ai myit hte ga htan ya mu. Nanhte myit asan sha rai nga ai hte amu mahkra hpe galaw nga mu; shaloi nanhte hkan ai Hkristu a nga sat nga sa ai lam a majaw, aroi arip hkrum yang, nanhte hpe shatan nhkan ai ni, n teng n man ai hku mara shagun ma ai hpe, masha yawng chye lu na mara ai. Dai rai nna, Karai Kasang dai hku hkraw nga yang, n kaja ai amu galaw ai majaw nni nkri hkrum ai gaw, grau nna kaja nga ai, kaning rai nme law, Hkristu gaw shut hpyit mara a majaw, kalang mi sha si hkam nu ai. Karai Kasang hpang de anhte hpe woi wa lu hkra, ding hpring ai wa Hkristu gaw, n ding n hpring ai ni a matu nni nkri hkam la nu ai. Shi gaw hkum tsawp hta sat kau hkrum ti mung, nsa wenyi hta jahkrung sharawt la ai hkrum nu ai.

Ya hti ai gaw Karai Kasang a mungga rai nga ai.

KABU GARA SHIGA 

Yawhan 14 : 15-21

Ya hti na gaw Yawhan a laika hta na rai nga ai. Yesu Shi a sape ni hpe tsun mu ai gaw: Nanhte ngai hpe tsawra ai rai yang gaw, nye a ga matsun hkan shatup na myit dai.

Ngai mung Wa kaw hpyi nna, Shi gaw, nanhte hte prat tup rau nga na matu, teng man ai hte seng ai Wenyi ngu ai, shalan shabran ai wa kaga nanhte hpang de shangun dat ya na ra ai. Mungkan ga gaw dai Chyoi pra ai Wenyi hpe n mu n chye ai majaw, n hkap la lu ma ai. Nanhte chyawm gaw, dai Wenyi hpe chye nga myit dai; kaning rai nme law, shi gaw nanhte hte rau nga nga ai rai nna, nanhte hta mung rawng nga na ra ai.

Nanhte hpe jahkrai zawn ngai kau da na n rai: nanhte hpang de ngai bai sa na ring ngai. Loi hkring mi rai jang, mungkan ga ngai hpe n mu dat na nu ai; nanhte chyawm gaw naw mu lu na marin dai: kaning rai nme law, ngai ahkrung nga nngai majaw, nanhte mung ahkrung nga na marin dai.

Ngai gaw nye Wa hta nga nga ai mung, nanhte ngai hta nga nga myit dai mung, ngai nanhte hta nga nga nngai mung, dai shani e, nanhte chye lu na marin dai. Nye a ga matsun lu la nna, hkan shatup ai wa gaw, ngai hpe tsawra ai wa rai nga ai: ngai hpe tsawra ai wa hpe nye Wa mung tsawra na wu ai: ngai mung dai wa hpe tsawra ai hte, ngai hkum nan shi hpe shadan dan na we ai.

Ya hti ai gaw Madu a Kabu Gara shiga rai nga ai.  

PASKA LADAW LABAN (5) NA MUNGGA

Tinang n-lu galaw ai amu magam langai mi hpe manang wa galaw na matu kam ai lam gaw tatut hta byin mai na matu yak nga ai. Tinang nchye ai majaw, nkam ai majaw, galaw na atsam nnga ai majaw nlu galaw ai rai yang manang wa mung dai hte maren byin na ngu nna sawn la mai nga ai.

Madu Yesu gaw tsun ai, “Ngai gaw lam re” ngu ai shaloi htani htana asak lu la na matu hkawm sa ra ai hkrun lam hpe tsun ai re. Ndai lam hpe hkawm sa ai shaloi anhte shinggyim masha ni galaw chye ai ladat rai nga ai, manang wa hpe sha lam madun ai nre ai sha Shi hkum nan dai lam hpe anhte hkan lu na matu anhte a shawng e hkawm let woi awn ai Wa rai nga ai.

Madu Yesu matsun madun let woi awn nna hkawm sa ai hkrun lam hpe anhte hkawm sa nna hpang na prat hta sha nrai, dai ni a ahkying aten hta mung htani htana asak hte ngwi pyaw simsa ai hpe lu la u ga hte manang wa a matu kaja ai lam hta hkawm sa nna kaja ai kasi hpe madun dan lu u ga.

MADU YESU: LAM, TENGMAN AI HTE ASAK

Dai ni na kabu gara shiga hta Madu Yesu gaw, Lam, Tengman ai hte Asak re ai lam tsun shapraw da sai. Dai gaw Yesu Hkristu a hpang hkan nga ai anhte a matu hpa lachyum wa rai na kun? Madu Yesu gaw lam re ai ngu tsun ai gaw, Sumsing Lamu na Kawa de du lu ai lam shi rai nga ai hpe tsun mayu nga ai. Madu Yesu gaw shi a hkum hkrang hta anhte hpe hkrum zup hpawng da ya nna sumsing lamu na Kawa Karai hpang de wa ai hkrun lam hta manang mung tai ya nga ai. Kabu gara shiga ni hta na la lu ai Madu Yesu a mungga hte shi galaw sa nga ai amu magam ni gaw Kawa Karai a tsawra myit anhte hpe mu chye shangun ai lam rai nga ai.

Kasa Hpilip hpe Madu Yesu tsun ai ga gaw teng nga ai. Madu Yesu hpe mu ai lama rai yang Kawa Karai hpe mu ai lam mung rai nga ai. Sumsing Lamu na Kawa Karai hpe mu mayu ai lama rai yang, Madu Yesu hte shi a tsawra ai hpe yu yang chye lu na re. Madu Yesu gaw tengman ai lam re ngu tsun ai shaloi, anhte shinggyim masha ni nga pra sa ai lam a ga san yawng hpe htai ya lu ai Tengman ai lam shi re ai hpe tsun nga ai. Anhte a ruyak jam jau lam hpe rau hkam sha lawm ai hku nna mahtai jaw ya nga ai.

Prat a lachyum hpe shi htai ya ai gaw, masha kaga a matu kumhpa taiya nna manu jahpu n la ai sha dai kumhpa (tinang hkum) hpe jaw ya na madun ya sai. Shut hpyit mara hte n-kaja ai lam a lachyum hpe mara kap ai ni yawng a ntsa tsawra matsan dum ai hte anhte hpe madun dan sai. Shinggyim masha tai ai a lachyum hpe, tsawra chye na matu anhte hpe sharin ya ai hte mahtai jaw ya sai. Tingkyeng myit ai a mayam prat kaw nna anhte hpe shalawt la ai, Tengman ai lam shi Madu rai nna, myit masin salum kaw nna atsam tup hte tsawra chye na matu shalawt ya sai. Hpang jahtum, Madu Yesu gaw Asak re ai ngu tsun ai shaloi dai shi a prat hkrun lam zawn anhte mung hkan nang na saw shaga ai lam rai nga ai. Hkristu a lai len hpe yu la nna hkan galaw sa na gaw jet ai ngwi pyaw simsa lam de anhte hpe du shangun na lam rai sai. Anhte a mungkan gaw ngwi pyaw simsa lam masu law law hpe lajang da ya nga ai. ‘Ngai kaw hkan nang rit’ nga nna anhte marai hkum shagu hpe Hkristu shaga nga ai. Dai lam gaw yak hkak jam jau hte ru yak lam law law nga na rai tim, shi Madu a prat hkrun lam zawn hkan nang na gaw hpu ging la ai prat rai na re. San pra masha law law wa dai shaga la ai lam hta kaja wa hkawm sa lai wa masai. Anhte mung dai shaga ai lam hte shaman ya hkrum saga ai. Hkristu hpe anhte a Lam, Tengman ai hte Asak hku nna ya mung htani htana aten shagu madung da lu u ga law!

Sawn sumru mai ai lam; Karai Kasang a lam hpe kasa Hpilip zawn rai mahtai tam ai aten ni ngai a prat hta nga lai wa sai kun? Ngai a prat hta Karai Kasang hpe kam shut ai lam nga lai wa sai kun?

PASKA LADAW LABAN (5) NA CHYUM LAIKA

PASKA LADAW HTA LABAN 5

14 May, 2017

CHYUM MUNGGA DAW 1

Kasa 6 : 1-7

Ya hti na gaw Kasa laika hta na rai nga ai.

Ya, sape ni law htam wa ai nhtoi hta e, Greka ga shaga ai ni gaw, Hebre ga shaga ai ni hte myit n hkrum ai lam pru sai; gaida jan ni hpe shani shagu galaw lu galaw sha ai amu hta, shanhte a gaida ni hpe, jaw ang ai made n karan jaw ma ai, nga nna Greka ga shaga ai ni Hebre ni hpe aput angun nga ma ai. Shaloi kasa shi lahkawng gaw sape hpung ting hpe shaga la nna, Anhte gaw Karai Kasang a mungga hpe kau da rap rai nna, shahpa daw jaw ai amu hta shakut yang n htuk nga ai. Dai majaw, hpu nau ni e, nanhte hta na, akyang lailen kaja rawng nna, Chyoi Pra ai Wenyi hte hpring ai, myitsu ai masha marai sanit hpe lata la mu; dai ni hpe ndai amu madu shangun na matu, anhte san da na ga ai; anhte chyawm gaw akyu hpyi ai amu hte, mungga hkaw dan ai amu hpe, htep lahti hkan shatup na ga ai, ngu nna tsun mu ai. Ga dai hpe salang hpawng ting na ra ai majaw, makam masham kup tsup ai hte, Chyoi Pra ai Wenyi hpring ai Stephen ngu ai wa hte, Hpilip, Prokoru, Nekanora, Timun, Parmena hte, Anti-ok mare na, shawng e Yuda tara htung de kayin shang wa sai Nikora hte hpe lata la nna, Kasa ni a man e tsap shangun da mu ai. Kasa ni akyu hpyi ngut jang, shanhte hpe lata mara jaw da mu ai.

Karai Kasang a mungga mung, lani hte lani grau nna maden jat wa nna, Yerusalem mare hta sape ni law htam wa ai hte, hkinjawng ni law law wa dai makam masham lam hpe madat mara nga ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Petru 2 : 4-9

Ya hti na gaw Kasa Petru shagun dat ai laika langai hta na rai nga ai.

Hpu nau ni e, Madu hpang de sit sa wa marit; Shi gaw ahkrung nga ai nlung rai nga ai: masha ni dai hpe kau da timung, Karai Kasang a man e, lata la ai hte hpu gying la ai nlung rai nga ai. Nanhte mung, ahkrung nga ai nlung ni tai wa nna, wenyi hte seng ai nawku htingnu hpe nanhte gaw shachyaw da lu na matu, Madu hpang de sit sa marit. Shing rai, Yesu Hkristu a marang e, Karai Kasang sharawng awng ai, nsa wenyi hte seng ai hkungga hpe, Wa Karai kaw nanhte ap ya lu na matu, chyoi pra ai jaw jau ai amyu tai wa na marin dai. Kaning rai nme law, Ngai lata la ai hte hpu gying la ai, ningjut jahtum na nlung hpe, Ziun hta e ngai gaw da se ai rai nna, dai hpe kam sham ai wa gaw dakan dakring tsap lu na ra ai, nga nna Chyum Laika hta rawng nga ai. Nanhte kam sham ai ni a matu dai nlung gaw hpu ging la ai baw rai nga malit dai. Rai timung, n kam n sham ai ni a matu mara, Wahpang gaw ai ni lata kau ai nlung gaw, ningjut jahtum na nlung tai sai rai nna, ahtu kataw shara hte, myit kataw shangun ai lunghkrung mung tai wa sai. Karai Kasang a mungga hpe n kam n sham nga ma ai majaw, shanhte kataw hkrat wa ma ai; shing rai shanhte hkrum na matu, moi chyaloi nhkoi kaw nna lajang da ngut sai.

Nanhte chyawm gaw, lata la ai amyu, hkungga nawng ai hkawhkam amyu ni, chyoi pra ai amyu baw hte, nsin kata de nna shi a mauhpa nhtoi de nanhte hpe shaga la ai wa a magam amu ni hpe shana shabra dat ya na matu, Karai Kasang e san da hkrum ai ni rai nga myit dai.

Ya hti ai gaw Karai Kasang a mungga rai nga ai.

KABU GARA SHIGA

Yawhan 14 : 1-12

Ya hti na gaw Yawhan a laika hta na Kabu Gara Shiga rai nga ai.

Yesu shi a sape ni hpe tsun mu ai gaw: Nanhte myit hkum ru mu; Karai Kasang hpe kam sham mu, ngai hpe mung kam nga mu. Nye Wa a nta e nga shara law law nga ai; dai n nga yang, ngai nanhte hpe tsun dan ang sai; kaning rai nme law, nanhte a matu nga shara lajang na she, ngai wa na nngai. Shing rai ngai wa nna, nanhte a matu nga shara lajang da nhtawm, ngai nga nga ai shara e nanhte mung nga lu hkra, ngai bai sa nna, nanhte hpe ngai hpang de woi la

na made ai. Ngai sa wa ai shara de du ai lam nanhte chye nga myit dai.

Shaloi Htawma gaw, Madu e, Nang gade sa wa na pyi anhte n chye ga ai mi, lam kaning rai chye na ga ta? ngu nna Yesu hpe tsun wu ai. Yesu gaw, Lam gaw ngai rai nga nngai, teng man ai hte asak mung ngai rai nga nngai: ngai hta nna n rai yang gaw, kadai mung Nye Wa kaw n du wa lu ai. Nanhte ngai hpe chye sai rai yang gaw, Nye Wa hpe mung chye na manit dai. Ya kaw nna shi hpe chye nga myit dai, mu mung mu yu manit dai, ngu nna Htawma hpe htan ya ai.

Hpilip mung, Madu e, Wa hpe anhte hpe madun mu, shaloi anhte myit dik na ga ai, ngu wu ai. Yesu gaw, Hpilip e, ngai nanhte hte nde nlaw na hkra nga nga ti mung nang ngai hpe n chye n ni?

Ngai hpe mu yu sai wa gaw Wa hpe mu yu nu ai: dai re ai mi, Wa hpe anhte hpe madun mi, nga nna hpa rai tsun n ta? Ngai gaw Wa hta nga nga nngai mung, Wa gaw ngai hta nga nga ai mung, nang n kam n ni? Ngai nanhte hpe tsun ai ga gaw, nye a myit hte ngai tsun ai n rai; ngai hta rawng nga ai nye Wa gaw Shi a amu hpe galaw nga ai. Ngai gaw Wa hta nga nngai mung, Wa gaw ngai hta nga nga ai mung, kam sham ra ai: dai n rai yang gaw, galaw dan ai amu ni hpe tau yu nna, kam sham nga u. Nanhte hpe ngai kaja wa teng teng tsun made ai gaw, ngai hpe kam sham ai wa gaw, ngai galaw ai amu lu galaw na ra a; dai hta grau kaba ai amu lu galaw na ra ai; kaning rai nme law, ngai gaw Wa hpang de wa na nngai.

Ya hti ai gaw Madu a Kabu Gara shiga rai nga ai.

PASKA LADAW LABAN (4) NA MUNGGA

Mungkan ntsa hta kaman lu mai ai gaw hpa mung nnga ai ngu nna English ga malai nga ai. Lachyum gaw tinang lu mayu ai akyu ara a matu tinang kaw nna sakjaw ap nawng ra ai lam ni galoi mung lawm nga ai. Manang wa tinang hpe garum ya ai gaw tinang lu mayu ai akyu ara ni a matu nhkum tsup nga ai.

Madu Yesu gaw sagurem wa rai nhtawm sagu ni a matu shim lum chyinghka rai nga hpe dai ni a kabu gara shiga hta na la lu nga ai. Sagu ni a ngamu ngamai na matu sagurem wa gaw ten tup shakut shaja nga ai rai tim sagurem wa a nsen hpe chye nna hkan madat ai shagu ni she sagurem wa jaw ya ai shim lum ai hpe lu la na re.

Karai Kasang gaw anhte hpe sagurem wa zawn bausin makawp maga ai hta anhte sakhkrung hkawm sa let shim lum ai hpe lu la nna hpang na prat hta nhtum nwai ai asak de shang wa lu na matu Sagurem Wa rai nga ai Madu Yesu a nsen hpe kaga nsen ni law law hta nna gin hka chye let Shi Madu a up hkang ai hta sak hkrung nga sa lu u ga.

MADU YESU A N'SEN HPE MADAT MARA AI

Dai ni na nawku daw jau ai lam hta, anhte gaw, jet dik ai, ap nawng ai, Tengman ai hte tsun shaga ai, Shi a sagu hpung a matu asak ap nawng ya na jin jin rai nga ai, Saguremwa a lam htawng madun nga ga ai. Madu Yesu gaw, magawp maga ai, hkrit shara n nga ai hte tsit lali ai prat de anhte hpe woi wa na saguremwa kaja rai nga ai.

Madu Yesu tsun ai gaw, shi a sagu ni hpe chye ai rai nna, shi a nsen hpe madat ma ai, nga ai. Saguremwa kaja rai nga ai Madu Yesu gaw, sagu hpung a matu asak ap nawng ai hte htani htana asak a matu ‘lam’ mung tai wa sai. Shi a sagu ni hpe ding yang bau sin makawp maga ya ra ai hpe Madu Yesu chye nga ai. Saguremwa a magam bungle ningra wa ai lam gaw sagu hpung hpe hten za ai de du shangun ai. Sagu ni a lai kyang nan mung, saguremwa a nsen madat nna hkan nang ai sha n rai yang n chye hkawm sa nga ai.

Sagu ni gaw lam jaw hkra sa chye ai hpan n rai ai. shanhte a prat hta mung kaning rai hkawm sa na n chye nga ai hte shanhte hkum shanhte makawp maga la lu ai hpan dusat n rai nga ai. Shanhte hpe rim sha na ni htim sa wa ai shaloi aloi sha ba kalawp chye ai hte shingle n chye ai hpan rai nga ai. Madu Yesu, shi hkum hpe saguremwa ngu hkam la ai gaw, anhte kade daram gawng kya ai, matsan mayan re ai hpe sharin ya na matu hte anhte hpe hkye la na matu rai sai.

Sagu ni zawn sha anhte mung, hkrat sum chye ai, agung alau hkrum ai hte wunma ni lu chye ai, rai nga ai. Madu Yesu gaw anhte a n-gun atsam tai wa nna, gawng kya ai lam kaw nna anhte tawt lai lu na rai nga ai. Anhte a lit magam chyawm gaw, ‘daw jau ai Karai Kasang hpe anhte chye na na hte chye na ai karai Kasang hpe anhte daw jau na‘ ngu ai re. “Ngai gaw chyinghka hku rai nga nngai, ngai hta shang ai wa gaw, hkye hkrang la hkrum na wu ai” ngu ai, Madu Yesu anhte hpe tsun ai ga hpe na la na matu akyu hpyi let maja nga ga!

PASKA LADAW LABAN (4) NA CHYUM LAIKA

PASKA LADAW HTA LABAN 4

7 May, 2017

CHYUM MUNGGA DAW 1

Kasa 2 : 14, 36-41

Ya hti na gaw Kasa laika hta na rai nga ai.

Chyoi Pra ai Wenyi Kasa ni a ntsa de yu hkrat wa ai Pentekawste shani e, Petru gaw sape shi langai hte rau pru wa nna, nsen shaja let, masha unawng kaba hpe tsun mu ai gaw: Nanhte Wudang hta jen da sat kau ai dai Yesu hpe, Karai Kasang gaw Madu hte Hkristu shatai ni ai gaw, Israela amyu ting, gaja wa chye nga mu ga, ngu nna tsun mu ai. Dai ga na jang, shanhte gaw, Hpu nau ni e anhte kaning rai na rai ta? nga nna Petru hte kaga Kasa ni hpe tsun ma ai. Petru gaw, myit malai lu nna, nanhte a shut hpyit mara raw dat kau ya u ga, nanhte hkum shagu Yesu Hkristu a amying ningsang hte kashin kamun hkam la mu; shaloi, Chyoi Pra ai Wenyi ngu ai kumhpa hpe, nanhte hkam la na marin dai; kaning rai nme nga yang, ga ndat dai gaw, nanhte hte nanhte a nshu nsha ni hpe mung, ya sumtsan e naw nga ti mung, anhte a Madu Karai Kasang shaga la ai ni yawng hpe mung, Shi nan jaw da sai ga ndat lam rai nga ai, ngu nna shanhte hpe tsun mu ai. Shi a sakse ga shanhte kam sham lu na matu, ga kaga law law hta lam madun dan nna, ndai myit magaw ai amyu hta na lawt pru wa mu law, ngu nna shanhte hpe shadum jahprang mu ai. Petru hkaw shana ya ai sakse ga hpe hkap yin la ai ni gaw Kashin Kamun hkam la nna, dai shani e, masha hkying masum dang hpung shang jat wa ma ai.

Ya hti ai gaw Karai Kasang a mungga rai nga ai.

CHYUM MUNGGA DAW 2

1 Petru 2 : 20-25

Ya hti na gaw Kasa Petru shagun dat ai laika langai hta na rai nga ai. Hpu nau ni e, Nanhte hte seng ang ai amu hpe hkrak ding man ai hte galaw ninglen, ari dan hkrum sha nna, machyi sharing yang gaw, dai gaw Karai Kasang a man e akyu nga ai. Dai zawn re ai shakut sharang ai lam hkan na matu, nanhte hpe shaga da sai rai nga ai Hkristu mung, nanhte a matu nni nkri hkam sharang nna, shi a hkang hta nanhte hkan nang lu myit ga, kasi ningli tawn da nu ai. Hkristu gaw hpa mara n galaw yu ai; shi a n-gup hta na masu hkalem ai ga n na yu ai. Shi a roi a rip hkrum yang, bai roi htang ai n rai; nni nkri hkrum yang, ahkrim nga ai n re ai sha, ding man ai hku daw dan ai wa lata hta Shi a hkum hpe ap da nu ai.

Anhte gaw shut hpyit mara hte si hka mat wa nna, Karai Kasang myit ra ai lam hkan sa lu u ga, Shi gaw Shi a hkum hta nna, udang a hpun ntsa e, anhte a shut hpyit mara hpe gun kau nu ai: Shi a nma a marang e anhte shamai shatsai ai hkrum saga ai, kaning rai nme law, nanhte yawng sagu zawn dam mat timung, ya gaw, nanhte a nsa wenyi hpe yu lahku ya ai Sagu Rem Wa hpang de nhtang wa manit dai.

Ya hti ai gaw Karai Kasang a mungga rai nga ai.

KABU GARA SHIGA Yawhan 10 : 1-10

Yesu gaw Yuda masha ni hpe tsun mu ai gaw: Ngai nanhte hpe gaja wa teng teng tsun ma de ai gaw: Sagu lawng de, chyinghka lam hku n shang ai sha, kaga hku nna lung shang ai wa gaw, lagut hte damya rai nga ai. Chyinghka lam hku shang ai wa chyawm gaw, sagu ni hpe rem ai wa rai nga ai. Chyinghka sin ai wa mung, dai wa a matu chyinghka hpaw da ya wu ai; sagu ni mung shi a nsen madat ma ai rai nna, shi gaw tinang a sagu ni hpe amying hte shaga nna, shinggan de woi la sa nga ai. Shi a sagu nlang hte hpe woi shapraw nhtawm, sagu ni a shawng e sa wa nna, sagu ni ,mung Shi a nsen chye chyap ma ai majaw, Shi kaw hkan nang ma ai. Tsasam wa a nsen hpe gaw, sagu ni n chye n chyap ma ai majaw, tsasam wa kaw n hkan hkraw ai sha, hprawng mat wa ma ai, ngu nna Yesu shanhte hpe tsun mu ai.

Yesu gaw dai ga shadawn shanhte hpe tsun mu ai, rai timung, Shi tsun mayu ai lam a lachyum shanhte n chye madat ma ai. Dai re ai majaw, Yesu shanhte hpe, bai tsun mu ai gaw: Ngai nanhte hpe gaja wa teng teng tsun made ai gaw, Ngai gaw sagu ni shang ai chyinghka hku rai nga nngai; nye a shawng e pru ai ni myawng hte gaw lagut hte damya rai nga ma ai: sagu ni mung shanhte a ga n madat ya ma ai. Ngai gaw chyinghka lam hku rai nga nngai: ngai hta shang ai wa gaw, hkye hkrang la ai hkrum na wu ai rai nna, shang wa pru wa lu ai hte, udat shara mu na ra ai. Lagut wa gaw, lagu na, sat na, hpya sha na, nga nna she sa du ai. Ngai chyawm gaw sagu ni a asak hkrung lu na hte, nhpaw n-ya asak lu la mu ga, ngu nna sa ring ngai. 

Ya hti ai gaw Madu a Kabu Gara shiga rai nga ai.